‘ခပ်သိမ်းသောသူတို့အား ကောင်းမှုပြုကြကုန်အံ့’
“ငါ့ထံသို့လာကြလော့။ ငါသည် လန်းဆန်းစေမည်”
‘ခပ်သိမ်းသောသူတို့အား ကောင်းမှုပြုကြကုန်အံ့’
ယေရှု၏အဓိကလုပ်ငန်းကား ဘုရားသခင့်နိုင်ငံတော်သတင်းကောင်း ဟောပြောခြင်းနှင့် သွန်သင်ခြင်းဖြစ်၏။ (မာကု ၁:၁၄; လုကာ ၈:၁) ခရစ်တော်နောက်လိုက်များသည် ကိုယ်တော့်ကို တုပလိုသောကြောင့် ဘုရားသခင့်နိုင်ငံတော်နှင့်ပတ်သက်၍ ကျမ်းစာသတင်းတရား သွန်သင်ခြင်းလုပ်ငန်းကို သူတို့ဘဝ၏ အဓိကလုပ်ငန်းအဖြစ် သဘောထားကြသည်။ (လုကာ ၆:၄၀) ယေရှု ကမ္ဘာပေါ်ရှိစဉ်က ကဲ့သို့ပင် ဘုရားသခင့်နိုင်ငံတော်သတင်းတရားကို လက်ခံသူများသည် အစဉ်လန်းဆန်းကြသည်ကို တွေ့ မြင်ရသောအခါ ယေဟောဝါသက်သေများ အမှန်ပင်ပျော်ရွှင်ကြ၏။—မဿဲ ၁၁:၂၈-၃၀။
ဘုရားသခင့်စကားတော်ကို ယေရှုသွန်သင်သည့်အပြင် လူနာများကို ကုသပေးခြင်းနှင့် ဆာမွတ်သူများကို ကျွေးမွေးခြင်းစသော တခြားကောင်းမှုများကိုလည်း လုပ်ဆောင်ခဲ့သည်။ (မဿဲ ၁၄:၁၄-၂၁) အလားတူစွာ၊ ယေဟောဝါသက်သေများသည် ကျမ်းစာသွန်သင်ခြင်းလုပ်ငန်းအပြင် ဆင်းရဲချို့တဲ့သူများကို ကူညီပေးကြ၏။ အမှန်မှာ၊ သမ္မာကျမ်းစာက ခရစ်ယာန်များကို “ကောင်းသောအမှုအမျိုးမျိုးတို့ကို” ပြုစေရန် အသင့်ရှိစေပြီး “ခပ်သိမ်းသောသူတို့အား ကျေးဇူး [“ကောင်းမှု၊” ကဘ] ပြုကြ” ရန်တိုက်တွန်းထားသည်။—၂ တိမောသေ ၃:၁၆၊ ၁၇; ဂလာတိ ၆:၁၀။
“ကျွန်မတို့ရဲ့ညီအစ်ကိုတွေ အဲဒီမှာရှိနေကြတယ်”
၁၉၉၉၊ စက်တင်ဘာလတွင် မြေငလျင်အကြီးအကျယ်လှုပ်သောကြောင့် ထိုင်ဝမ်နိုင်ငံ လှုပ်ခါသွားခဲ့၏။ လအနည်းငယ်အကြာတွင် မိုးသည်းထန်စွာရွာသွန်းပြီး ဆီးနှင်းပြိုကျခြင်းကြောင့် ဗင်နီဇွဲလားနိုင်ငံ၏သမိုင်းတွင် အဆိုးရွားဆုံးသဘာဝဘေးဒဏ်တစ်ခုဖြစ်ပျက်ခဲ့၏။ များမကြာမီက မိုဇမ်ဘစ်နိုင်ငံတွင် အကြီးအကျယ်ရေလွှမ်းမိုးခဲ့သောကြောင့် များစွာပျက်စီးဆုံးရှုံးခဲ့ရ၏။ ဤအဖြစ်အပျက်သုံးခုစလုံးတွင် ယေဟောဝါသက်သေများသည် ကပ်သင့်နေသူများအတွက် အစာရေစာ၊ ဆေးဝါး၊ အဝတ်အထည်၊ ယာယီတဲများနှင့် မီးဖိုဆောင်အသုံးအဆောင်များ ထောက်ပံ့ပေးရန် လျင်မြန်စွာရောက်ရှိလာခဲ့ကြသည်။ ဆေးကျွမ်းကျင်သူ စေတနာ့ဝန်ထမ်းများသည် ထိခိုက်ဒဏ်ရာရသူများကို ကုသပေးရန် ယာယီသူနာပြုစခန်းများ စီစဉ်လိုက်ကြပြီး အိုးမဲ့အိမ်မဲ့ဖြစ်နေသူများအတွက် ဆောက်လုပ်ရေးစေတနာ့ဝန်ထမ်းများက အိမ်အသစ်များဆောက်လုပ်ပေးခဲ့ကြသည်။
ဘေးသင့်သူများသည် သူတို့ရရှိခဲ့သည့် အချိန်မီအကူအညီကြောင့် စိတ်အားတက်ကြွခဲ့ကြ၏။ ဗင်နီဇွဲလားနိုင်ငံတွင် ဆီးနှင်းပြိုကျခြင်းကြောင့် အိမ်ပျက်စီးသွားခဲ့ရသော မာလ်ယိုရီက “ကျွန်မတို့ အကြီးအကျယ်စိတ်ဓာတ်ကျနေတဲ့အချိန်မှာ ကျွန်မတို့ရဲ့ညီအစ်ကိုတွေ အဲဒီမှာရှိနေကြတယ်” ဟုပြောပြသည်။ စေတနာ့ဝန်ထမ်းများက မာလ်ယိုရီ၏မိသားစုအတွက် အိမ်အသစ်တစ်လုံး ဆောက်လုပ်ပေးပြီးနောက် သူက “ကျွန်မတို့အတွက် ယေဟောဝါပြုလုပ်ပေးသမျှကို ကျေးဇူးတင်လို့မဆုံးနိုင်ဘူး!” ဟူ၍ပြော၏။ မိုဇမ်ဘစ်နိုင်ငံမှ ရေလွှမ်းမိုးဘေးကပ်သင့်ခဲ့သူများသည် ဆောက်လုပ်ပြီးခါစ အိမ်အသစ်၏သော့များကို ရရှိကြသောအခါ အုပ်စုတစ်စုလုံးက “ယေဟောဝါသည် ငါတို့ခိုလှုံရာဖြစ်၏” * ဟူသော ဘုရားသခင့်နိုင်ငံတော်သီချင်းကို ရုတ်တရက်သီဆိုကြလေတော့သည်။
ဆင်းရဲချို့တဲ့သူများကို ကူညီပေးခြင်းသည် စေတနာ့ဝန်ထမ်းများကိုလည်း လန်းဆန်းစေ၏။ မိုဇမ်ဘစ်နိုင်ငံမှ ခိုလှုံရေးစခန်းတစ်ခုတွင် သူနာပြုလုပ်ခဲ့သော မာရ်စီလိုက “အရမ်းဆင်းရဲနေကြတဲ့ ဒီညီအစ်ကိုတွေကို ကူညီပေးခွင့်ရလို့ ကျွန်တော်တကယ်ပျော်တယ်” ဟုပြောပြသည်။ ထိုင်ဝမ်နိုင်ငံမှ စေတနာ့ဝန်ထမ်းဖြစ်သူ ဝှန်က “အကူအညီလိုနေတဲ့ ညီအစ်ကိုတွေအတွက် အစားအသောက်တွေဝေမျှရတာ၊ တဲရှင်တွေထိုးပေးရတာ အရမ်းပျော်စရာကောင်းတယ်။ ယုံကြည်ခြင်းကိုလည်း ပိုခိုင်ခံ့စေတယ်” ဟုထုတ်ဖော်ပြောခဲ့သည်။
အကျိုးဖြစ်ထွန်းသည့် စေတနာ့ဝန်ထမ်းအစီအစဉ်တစ်ခု
စေတနာ့ဝန်ထမ်းလုပ်ငန်းသည် ကမ္ဘာတစ်ဝန်းရှိ ထောင်နှင့်ချီသော အကျဉ်းသားများအတွက်လည်း ဝိညာဉ်ရေးလန်းဆန်းမှု ရရှိစေခဲ့ပြီ။ မည်သို့အားဖြင့်နည်း။ မကြာသေးမီနှစ်များက ယေဟောဝါသက်သေများသည် အမေရိကန်ပြည်ထောင်စုတစ်နိုင်ငံတည်းမှ အကျဉ်းထောင် ၄,၀၀၀ ခန့်က အကျဉ်းသား ၃၀,၀၀၀ ကျော်ကို ကျမ်းစာ,စာပေများ ဝေငှပေးခဲ့သည်။ ထို့ပြင် သက်သေခံများသည် ဖြစ်နိုင်သည့်အခါတိုင်း အကျဉ်းသားများနှင့် ကျမ်းစာသင်အံမှုပြုလုပ်ရန်၊ ခရစ်ယာန်အစည်းအဝေးများကျင်းပပေးရန် အကျဉ်းထောင်များသို့ ကိုယ်တိုင်လည်ပတ်ကြသည်။ အကျဉ်းသားများအတွက် အကျိုးရှိသလော။ ကျမ်းစာလေ့လာနေကြသော အကျဉ်းသားအချို့သည် အကျဉ်းသားချင်းများအား လန်းဆန်းစေသော ကျမ်းစာသွန်သင်ချက်များ စတင်ဟောပြောနေကြပြီ။ ယင်းကြောင့် ကမ္ဘာတစ်ဝန်းရှိ အကျဉ်းထောင်များစွာတွင် ယခု ယေဟောဝါအား အတူတကွဝတ်ပြုကိုးကွယ်ကြသူ အကျဉ်းသားအုပ်စုများစွာရှိနေပြီ။ ၂၀၀၁ ခုနှစ်တွင် ယူ.အက်စ်.အေ.၊ အော်ရီဂွန်ထောင်ရှိ အကျဉ်းသားတစ်ဦးက “ကျွန်တော်တို့အုပ်စုက တိုးတက်နေတယ်။ ကျွန်တော်တို့ဆီမှာ ဘုရားသခင့်နိုင်ငံတော်ကြေညာသူ ၇ ယောက်ရှိပြီး ကျမ်းစာသင်အံမှု ၃၈ ခုရှိတယ်။ လူထုဟောပြောချက်နဲ့ ကင်းမျှော်စင် သင်တန်းကို ၂၅ ယောက်ကျော်တက်ပြီး [ခရစ်တော်သေခြင်း] သတိရအောက်မေ့ပွဲကို ၃၉ ယောက်တက်ခဲ့တယ်။ မကြာခင် နောက်ထပ်သုံးယောက် နှစ်ခြင်းခံလိမ့်မယ်” ဟုပြောပြ၏။
အကျိုးကျေးဇူးများနှင့် ပျော်ရွှင်မှုများ
ဤစေတနာ့ဝန်ထမ်းအစီအစဉ်သည် အကျိုးရှိကြောင်း အကျဉ်းထောင်အရာရှိများက သတိပြုခဲ့ကြသည်။ ဤအရာရှိများကို စိတ်စွဲမှတ်စရာဖြစ်စေသည်မှာ ဤစေတနာ့ဝန်ထမ်းအစီအစဉ်၏ ကြာရှည်ခံအကျိုးကျေးဇူးဖြစ်သည်။ သတင်းတစ်ပုဒ်က ဤသို့ဆိုသည်– “ဤအစီအစဉ်စတင်ခဲ့သည့် ဆယ်နှစ်အတွင်း ယေဟောဝါသက်သေတစ်ဦးအနေနှင့် ထောင်ထဲတွင် နှစ်ခြင်းခံခဲ့သော ထောင်ထွက်တစ်ဦးတစ်ယောက်မျှ ထောင်ပြန်မကျတော့ချေ၊ တခြားအုပ်စုများမှ အကျဉ်းသားများမူကား ၅၀ မှ ၆၀ ရာခိုင်နှုန်းအထိ ထောင်ပြန်ကျကြ၏။” စေတနာ့ဝန်ထမ်းသက်သေခံများ ဆောင်ရွက်ခဲ့သောအကျိုးကျေးဇူးများကိုတွေ့ မြင်ပြီး အိုက်ဒါဟိုပြည်နယ်မှ အကျဉ်းထောင်ဓမ္မဆရာတစ်ဦးက ယေဟောဝါသက်သေများ၏ ကမ္ဘာ့ဌာနချုပ်သို့ ဤစာတစ်စောင်ကို ပေးပို့ခဲ့သည်– “ခင်ဗျားတို့ရဲ့သွန်သင်ချက်တွေကို ကျွန်တော်လက်မခံနိုင်ပေမဲ့ ခင်ဗျားတို့အဖွဲ့အစည်းကိုတော့ အရမ်းသဘောကျပါတယ်။”
အကျဉ်းသားများကို ကူညီပေးရခြင်းသည် စေတနာ့ဝန်ထမ်းများအတွက်လည်း အကျိုးရှိသည်။ ပထမဆုံးအကြိမ် ဘုရားသခင့်နိုင်ငံတော်သီချင်းတစ်ပုဒ် သီဆိုကြသော အကျဉ်းသားအုပ်စုတစ်စုနှင့် အစည်းအဝေးကျင်းပပြီးနောက် စေတနာ့ဝန်ထမ်းတစ်ဦးက ဤသို့စာရေးအကြောင်းကြားခဲ့၏– “ယေဟောဝါကိုချီးမွမ်းတဲ့ သီချင်းတစ်ပုဒ်ကို အမျိုးသား ၂၈ ယောက် ပူးပေါင်းသီဆိုကြတာကို တွေ့ရတာ အားရှိစရာကောင်းတယ်။ အားရပါးရသီဆိုကြတယ်! ဒီလိုအချိန်အခါမျိုးမှာ ရောက်ရှိနေတာ တကယ်အခွင့်ထူးတစ်ခုပါပဲ!” အရီဇိုးနားအကျဉ်းထောင်များသို့ လည်ပတ်အားပေးခဲ့သော စေတနာ့ဝန်ထမ်းတစ်ဦးက ဤသို့ပြောပြသည်– “ဒီအထူးလုပ်ငန်းမှာ ပါဝင်ခွင့်ရတာ ကောင်းချီးတစ်ခုပါ!”
ကမ္ဘာတစ်ဝန်းရှိ စေတနာ့ဝန်ထမ်းသက်သေခံများသည် “အစွန့်အကြဲခံခြင်းအရာထက် စွန့်ကြဲခြင်းအရာသည် သာ၍မင်္ဂလာရှိ [“ပျော်ရွှင်၊” ကဘ] သည်” ဟုမိန့်ဆိုခဲ့သော ယေရှုနှင့် ထပ်တူထပ်မျှသဘောတူကြ၏။ (တမန်တော် ၂၀:၃၅) ခပ်သိမ်းသောသူတို့အား ကောင်းမှုပြုရန် ကျမ်းစာ၏ဆုံးမစကားကို လိုက်နာခြင်းသည် အမှန်တကယ်ပင် လန်းဆန်းစေသည်ဟူ၍လည်း သူတို့ထောက်ခံပြောဆိုကြ၏။—သု. ၁၁:၂၅။
[အောက်ခြေမှတ်]
^ အပိုဒ်၊ 7 ယေဟောဝါသက်သေများ ထုတ်ဝေသော ယေဟောဝါအား ချီးမွမ်းကျူးဧခြင်း စာအုပ်မှ သီချင်းနံပါတ် ၈၅ ကိုရှု။
[စာမျက်နှာ ၈ ပါ ရုပ်ပုံ]
ဗင်နီဇွဲလား
[စာမျက်နှာ ၈ ပါ ရုပ်ပုံ]
ထိုင်ဝမ်
[စာမျက်နှာ ၈ ပါ ရုပ်ပုံ]
မိုဇမ်ဘစ်