သူတို့သည် အမှန်တရား၌ ဆက်လျှောက်လှမ်းနေကြ
သူတို့သည် အမှန်တရား၌ ဆက်လျှောက်လှမ်းနေကြ
“ငါ၏သားသမီးတို့သည် [အမှန်] တရား၌ကျင်လည် [“လျှောက်လှမ်း၊” ကဘ] သည်ကို ငါကြား၍ဝမ်းမြောက်ခြင်းထက် သာ၍ဝမ်းမြောက်ခြင်းမရှိ။”—၃ ယောဟန် ၄။
၁။ “မှန်သောဧဝံဂေလိတရား” သည် အဘယ်အရာကို ဗဟိုပြုသနည်း။
ယေဟောဝါသည် မိမိအား “. . . ဝိညာဉ်နှင့်လည်းကောင်း၊ [အမှန်တရား] နှင့်လည်းကောင်း” ဝတ်ပြုကိုးကွယ်သူများကိုသာ နှစ်သက်တော်မူ၏။ (ယောဟန် ၄:၂၄) သူတို့သည် ကျမ်းစာအခြေပြု ခရစ်ယာန်သွန်သင်ချက်ရှိရှိသမျှတို့ကို လက်ခံ၍ အမှန်တရားကို ခံယူလိုက်နာကြသည်။ ဤ “မှန်သောဧဝံဂေလိတရား” သည် ယေရှုခရစ်နှင့် ဘုရားသခင့်နိုင်ငံတော်အားဖြင့် ယေဟောဝါ၏ပိုင်သအုပ်စိုးမှုအပေါ် သံသယကင်းရှင်းရေးကိစ္စကို ဗဟိုပြုသည်။ (ဂလာတိ ၂:၁၄) လိမ်ညာမှုကို နှစ်သက်သူများအား “အလှည့်စားခံစေ” ရန် ဘုရားသခင်ခွင့်ပြုထားသော်လည်း ကယ်တင်ခြင်းသည် သတင်းကောင်းကို ယုံကြည်ခြင်း၊ အမှန်တရား၌ လျှောက်လှမ်းနေခြင်းအပေါ် မူတည်သည်။—၂ သက်သာလောနိတ် ၂:၉-၁၂၊ သတင်းကောင်း; ဧဖက် ၁:၁၃၊ ၁၄။
၂။ တမန်တော်ယောဟန်သည် အဘယ်အတွက် အလွန်ဝမ်းမြောက်ခဲ့သနည်း၊ ဂါယုနှင့်သူ၏ဆက်ဆံရေးကား အသို့နည်း။
၂ ဘုရားသခင့်နိုင်ငံတော်သတင်း ကြေညာသူများသည် ‘အမှန်တရား၌ လုပ်ဖော်ဆောင်ဖက်များ’ ဖြစ်ကြသည်။ သူတို့သည် တမန်တော်ယောဟန်နှင့် သူ့မိတ်ဆွေဂါယုတို့ကဲ့သို့ အမှန်တရားကိုစွဲကိုင်၍ ယင်း၌ လျှောက်လှမ်းကြသည်။ ဂါယုကိုအောက်မေ့သတိရပြီး ယောဟန်ဤသို့ရေးသားခဲ့သည်– “ငါ၏သားသမီးတို့သည် [အမှန်] တရား၌ကျင်လည် [“လျှောက်လှမ်း၊” ကဘ] သည်ကို ငါကြား၍ဝမ်းမြောက်ခြင်းထက် သာ၍ဝမ်းမြောက်ခြင်းမရှိ။” (၃ ယောဟန် ၃-၈) အသက်ကြီးသူယောဟန်သည် ဂါယုအား အမှန်တရားသွန်သင်ပေးခဲ့သူ မဟုတ်သည့်တိုင် တမန်တော်၏အသက်ကြီးရင့်မှု၊ ခရစ်ယာန်ရင့်ကျက်မှုနှင့် ဖခင်သဖွယ်ချစ်ခင်တတ်မှုတို့ကြောင့် အသက်ပိုငယ်ပုံရသော ဤအမျိုးသားကို ယောဟန်၏ဝိညာဉ်ရေးသားတစ်ဦးအဖြစ် ရှုမြင်ခြင်းသည် သင့်လျော်ပေသည်။
အမှန်တရားနှင့် ခရစ်ယာန်ဝတ်ပြုကိုးကွယ်မှု
၃။ အစောပိုင်းခရစ်ယာန်များ ကျင်းပခဲ့သော အစည်းအဝေးများ၏ရည်ရွယ်ချက်နှင့် အကျိုးကျေးဇူးကား အဘယ်နည်း။
၃ အစောပိုင်းခရစ်ယာန်များသည် အမှန်တရားကိုသင်ယူဖို့ ကိုယ်ပိုင်နေအိမ်များတွင် တည်ထောင်ထားသော အသင်းတော်များ၌ စည်းဝေးလေ့ရှိသည်။ (ရောမ ၁၆:၃-၅) ထိုနည်းအားဖြင့် သူတို့သည် အချင်းချင်းမေတ္တာစိတ်ရှိရန်နှင့် ကောင်းသောအကျင့်ကိုကျင့်ရန် အားပေးမှုနှင့် တိုက်တွန်းနှိုးဆော်မှု ခံစားခဲ့ကြရသည်။ (ဟေဗြဲ ၁၀:၂၄၊ ၂၅) နှောင်းခေတ်မှ ခရစ်ယာန်အမည်ခံသူများနှင့်စပ်လျဉ်း၍ တာတူလျန် (စီ.အီး. ၁၅၅ ခန့်–စီ.အီး. ၂၂၀ နောက်ပိုင်း) ကဤသို့ရေးသားခဲ့သည်– “ကျွန်ုပ်တို့သည် ဘုရားသခင့်ကျမ်းစောင်များကိုဖတ်ရှုဖို့ တွေ့ဆုံကြသည်။ . . . ထိုစင်ကြယ်သောတရားစကားများဖြင့် ကျွန်ုပ်တို့၏ယုံကြည်ခြင်းကို အားဖြည့်ပေးကြသည်၊ ကျွန်ုပ်တို့၏မျှော်လင့်ချက်ကို ရှင်သန်စေကြသည်၊ ကျွန်ုပ်တို့၏ယုံကြည်စိတ်ချမှုကို ခိုင်ခံ့စေကြသည်။”—Apology, အခန်း ၃၉။
၄။ ခရစ်ယာန်အစည်းအဝေးများတွင် ဓမ္မသီချင်းများသီဆိုခြင်းသည် အဘယ်အခန်းကဏ္ဍ၌ ပါဝင်ခဲ့ပြီနည်း။
၄ အစောပိုင်းခရစ်ယာန်အစည်းအဝေးများ၏ ကဏ္ဍတစ်ခုမှာ သီချင်းဆိုခြင်းဖြစ်သည်။ (ဧဖက် ၅:၁၉; ကောလောသဲ ၃:၁၆) ဒုတိယရာစုမှ ဝေဖန်ရေးသမား စဲလ်စပ်စ်သည် ခရစ်ယာန်အမည်ခံသူများ အသုံးပြုခဲ့ဟန်ရှိသော တေးသီချင်းများသည် “အလွန်သာယာနာပျော်ဖွယ်ကောင်းလှပြီး စိတ်ကိုထိမိသည့်အတွက် သူအမှန်ပင်မခံနိုင်” ကြောင်း ပါမောက္ခ ဟယ်နရီ ချက်ဒဝစ်ခ်ကရေးသားခဲ့သည်။ ချက်ဒဝစ်ခ်ကဤသို့ထပ်ဆင့်ပြောသည်– “အဘယ်တေးဂီတမျိုးကို ခရစ်ယာန်များအသုံးပြုဖို့ သင့်လျော်ကြောင်းဆွေးနွေးခဲ့သည့် အစောဆုံးခရစ်ယာန်စာရေးဆရာမှာ အလက်ဇန္ဒြီးယားမြို့မှ ကလဲမင့်ဖြစ်သည်။ သူက ထိုတေးဂီတသည် လိင်စိတ်နိုးကြွစေသော အကတေးဂီတနှင့် ဆက်နွှယ်မှုမရှိသင့်ဟုဆို၏။” (အစောပိုင်းချာ့ခ်ျ၊ စာမျက်နှာ ၂၇၄-၅) ကနဦးခရစ်ယာန်များသည် အတူတကွတွေ့ဆုံစည်းဝေးကြသောအခါ ဓမ္မသီချင်းများသီဆိုခဲ့ကြပုံရှိသကဲ့သို့ ယေဟောဝါသက်သေများသည် ဘုရားသခင်နှင့် ကိုယ်တော့်နိုင်ငံတော်ကိုချီးမွမ်းသည့် တန်ခိုးပါသောဓမ္မသီချင်းများအပါအဝင် ကျမ်းစာအခြေပြုသီချင်းများကို သီဆိုလေ့ရှိကြသည်။
၅။ (က) အစောပိုင်းခရစ်ယာန်အသင်းတော်များတွင် ဝိညာဉ်ရေးညွှန်ကြားချက်ကို မည်သို့ပေးခဲ့သနည်း။ (ခ) မဿဲ ၂၃:၈၊ ၉ ပါယေရှု၏စကားများကို ခရစ်ယာန်စစ်များ မည်သို့ကျင့်သုံးခဲ့ကြသနည်း။
၅ အစောပိုင်းခရစ်ယာန်အသင်းတော်များတွင် ကြီးကြပ်မှူးများသည် အမှန်တရားကိုသွန်သင်ပေးခဲ့ကြပြီး ဓမ္မအမှုထမ်းများသည် ယုံကြည်သူချင်းများကို နည်းအမျိုးမျိုးဖြင့် ကူညီပေးခဲ့ကြ၏။ (ဖိလိပ္ပိ ၁:၁) ဘုရားသခင့်နှုတ်မြွက်စကားတော်နှင့် သန့်ရှင်းသောဝိညာဉ်တော်ကို မှီခိုအားထားသည့် အုပ်ချုပ်ရေးအဖွဲ့က ဝိညာဉ်ရေးလမ်းညွှန်မှုကိုပေးသည်။ (တမန်တော် ၁၅:၆၊ ၂၃-၃၁) ယေရှုက တပည့်တော်များကို ဤသို့မိန့်မှာခဲ့သောကြောင့် ဘာသာရေးဘွဲ့အမည်များကို အသုံးမပြုခဲ့ကြချေ– “သင်တို့မူကား အရှင်ဘုရားဟု ခေါ်ဝေါ်ခြင်းကို မခံကြနှင့်။ ခရစ်တော်တည်းဟူသော သင်တို့ . . . ဆရာတစ်ပါးတည်းရှိ၏။ သင်တို့အပေါင်းသည် ညီအစ်ကိုချင်းဖြစ်ကြ၏။ မြေကြီးပေါ်မှာ အဘယ်သူကိုမျှ အဘဟူ၍ မခေါ်ဝေါ်ကြနှင့်။ ကောင်းကင်ဘုံ၌ သင်တို့အဘတစ်ပါးတည်းရှိတော်မူ၏။” (မဿဲ ၂၃:၈၊ ၉) အစောပိုင်းခရစ်ယာန်များနှင့် ယေဟောဝါသက်သေများစပ်ကြား တူညီချက်များစွာရှိသည်။
အမှန်တရားဟောပြောခြင်းအတွက် နှိပ်စက်ညှဉ်းပန်းခံခဲ့ရ
၆၊ ၇။ ခရစ်ယာန်များသည် ငြိမ်သက်ခြင်းသတင်းကို ကြေညာကြသော်လည်း မည်သို့ပြုမူဆက်ဆံ ခံခဲ့ကြရပြီနည်း။
၆ အစောပိုင်းခရစ်ယာန်များသည် ဘုရားသခင်၏ ငြိမ်သက်သောနိုင်ငံတော်သတင်းကို ကြေညာခဲ့ကြသော်လည်း ယေရှုကဲ့သို့ပင် နှိပ်စက်ညှဉ်းပန်းခံခဲ့ကြရသည်။ (ယောဟန် ၁၅:၂၀; ၁၇:၁၄) သမိုင်းဆရာ ဂျောန် အယ်လ်. ဗွန် မိုရှိမ်းက ပထမရာစုခရစ်ယာန်များကို “နိုင်ငံတော်ကို ထိခိုက်နစ်နာစေလိုစိတ်ရှိသော အတွေးမျိုး တစ်ခါမျှ သိုမထားတတ်သည့်၊ ရန်မမူတတ်သော သဘောအရိုးဆုံးလူစု” ဟုခေါ်ဆိုခဲ့သည်။ “အခြားအဘယ်လူမျိုးတို့၏ ဝတ်ပြုကိုးကွယ်နည်းနှင့်မျှမတူသော ခရစ်ယာန်များ၏ ရိုးစင်းသောဝတ်ပြုကိုးကွယ်မှုကြောင့် ရောမလူမျိုးသည် ခရစ်ယာန်များကို မနှစ်မြို့ကြ” ကြောင်း ဒေါက်တာမိုရှိမ်းဖော်ပြခဲ့သည်။ သူဤသို့ထပ်ဆင့်ဆိုသည်– “သူတို့၌ ယဇ်ပူဇော်ခြင်း၊ ဘုရားကျောင်းများ၊ ရုပ်ပုံများ၊ နတ်နှုတ်များ သို့မဟုတ် ယဇ်ပုရောဟိတ်အတန်းအစားမရှိ; ယင်းက ဤအရာများမရှိသော ဘာသာတရားမရှိနိုင်ဟုယူမှတ်သည့် အသိပညာကင်းမဲ့သောလူထု၏ ပြစ်တင်ရှုတ်ချမှုကို ခံရစေသည်။ သို့ဖြင့် သူတို့သည် ဘုရားသခင်မဲ့ဝါဒီများအဖြစ် ရှုမြင်ခံရကြသည်; ရောမဥပဒေအရ ဘုရားသခင်မဲ့အယူဝါဒစွဲကိုင်သူများအား လူ့အဖွဲ့အစည်းကို ဘေးပြုသူများဟု သတ်မှတ်ကြေညာသည်။”
၇ ယဇ်ပုရောဟိတ်များ၊ လက်မှုပညာသည်များနှင့် . . . ကိုးကွယ်မှုဖြင့် အသက်မွေးဝမ်းကျောင်းပြုသူများသည် . . . ကိုးကွယ်ခြင်း၌ မပါဝင်ကြသော ခရစ်ယာန်များကို ဆန့်ကျင်ရန် ပြည်သူလူထုကို လှုံ့ဆော်ပေးကြသည်။ (တမန်တော် ၁၉:၂၃-၄၀; ၁ ကောရိန္သု ၁၀:၁၄) တာတူလျန်က ဤသို့ရေးသားခဲ့သည်– “တိုင်းပြည်တွင် ဘေးဆိုက်ရောက်တိုင်း၊ လူတို့သည် ပြဿနာတစ်ခုခုပေါ်တိုင်း ခရစ်ယာန်များကြောင့်ဟု သူတို့ယူမှတ်ခဲ့ကြသည်။ မြို့ရိုးအထိ တိုင်ဘာမြစ်ရေတက်လာလျှင်၊ လယ်ပြင်များတွင် နိုင်းလ်မြစ်ရေမလွှမ်းလျှင်၊ မိုးမရွာလျှင်၊ သို့မဟုတ် မြေငလျင်လှုပ်လျှင်၊ ငတ်မွတ်ခေါင်းပါးခြင်းဖြစ်လျှင်၊ ကပ်ရောဂါတစ်မျိုးမျိုးဖြစ်လျှင် ချက်ချင်းပင် ‘ခရစ်ယာန်များကို ခြင်္သေ့စာကျွေးပစ်!’ ဟုအော်ဟစ်ကြသည်။” မည်သို့ပင်ဖြစ်စေ စစ်မှန်သောခရစ်ယာန်များသည် ‘ရုပ်ပုံကို ကြဉ်ရှောင်’ ကြသည်။—၁ ယောဟန် ၅:၂၁။
အမှန်တရားနှင့် ဘာသာရေးပွဲများ
၈။ အမှန်တရား၌ လျှောက်လှမ်းနေသူများသည် ခရစ္စမတ်ပွဲကို အဘယ်ကြောင့်မကျင်းပကြသနည်း။
၈ ‘အလင်းသည် မှောင်မိုက်နှင့်မဆက်ဆံ’ သောကြောင့် အမှန်တရား၌ လျှောက်လှမ်းနေသူများသည် ကျမ်းစာနှင့်မညီညွတ်သောပွဲများကို ရှောင်ကြဉ်ကြသည်။ (၂ ကောရိန္သု ၆:၁၄-၁၈) ဥပမာ၊ ဒီဇင်ဘာ ၂၅ ရက်နေ့တွင်ကျင်းပသည့် ခရစ္စမတ်ကို သူတို့မကျင်းပကြချေ။ “ခရစ်တော်၏မွေးနေ့ အတိအကျကို မည်သူမျှမသိ” ဟု ကမ္ဘာ့စာအုပ်စွယ်စုံကျမ်းကဝန်ခံသည်။ အမေရိကားနားစွယ်စုံကျမ်း (၁၉၅၆ ခုထုတ်) က ဤသို့ဆိုသည်– “ဒီဇင်ဘာလလယ်ပိုင်း၌ ကျင်းပသော ရောမပွဲတော် ဆက်တန်နေလီယာသည် ခရစ္စမတ်၏ပျော်ပွဲရွှင်ပွဲ ဓလေ့ထုံးစံများအတွက် စံဖြစ်လာခဲ့သည်။” မက်ကလင်းတော့နှင့် စထရောင်းတို့၏စွယ်စုံကျမ်းက ဤသို့ဖော်ပြသည်– “ခရစ္စမတ်ပွဲသည် ဘုရားသခင့်အမိန့်အရမဟုတ်သကဲ့သို့ ဓမ္မသစ်ကျမ်းမှ အစပြုခဲ့သည်လည်းမဟုတ်ပါ။” ထို့အပြင် ယေရှုလက်ထက် နေ့စဉ်ဘဝဟူသောစာအုပ်က ဤသို့ဆို၏– “သိုးစုတို့သည် . . . အမိုးအကာအောက်တွင်နေ၍ ဆောင်းကူးကြသည်; ဤအချက်ကိုကြည့်ရုံနှင့် ဆောင်းအချိန်၌ ခရစ္စမတ်ပွဲလုပ်သော၊ မိရိုးဖလာနေ့စွဲသည် မှန်ပုံမရ၊ ခရစ်ဝင်ကျမ်းက သိုးထိန်းများသည် လယ်ပြင်မှာရှိကြသည်ဟု ဆိုသောကြောင့်ဖြစ်သည်။”—လုကာ ၂:၈-၁၁။
၉။ ယေဟောဝါ၏ နှောင်းခေတ်နှင့် မျက်မှောက်ခေတ်ကျေးကျွန်များသည် အဘယ်ကြောင့်အီစတာပွဲ မကျင်းပကြသနည်း။
၉ အီစတာပွဲသည် ခရစ်တော်၏ရှင်ပြန်ထမြောက်ခြင်းကို အထိမ်းအမှတ်ပွဲခံခြင်းဖြစ်သည်ဟုဆို၏၊ သို့သော် ခိုင်လုံသောရင်းမြစ်တို့မှာ မှားသောဝတ်ပြုကိုးကွယ်မှုနှင့် ဆက်စပ်နေ၏။ ဝက်ဘ်မင်စတာအဘိဓာန်ကျမ်းက အီစတာပွဲသည် “အင်္ဂလို-ဆက်ဆွန်၌ အက်စ္စထရီ” သို့မဟုတ် အီအောစတာဟု “သိထားကြသော အလင်းနှင့် နွေဦး၏ ထယူတောနစ်ခ်နတ်သမီးကို ဂုဏ်ပြုသည့် နွေဦးပွဲတော်မှ မြစ်ဖျားခံသည်” ဟုဆို၏။ မည်သို့ပင်ဖြစ်စေ ဗြိတဲန်နစ်ကာစွယ်စုံကျမ်း (၁၁ ကြိမ်မြောက်) ကဤသို့ဆို၏– “အီစတာပွဲကျင်းပခြင်းအကြောင်း ဓမ္မသစ်ကျမ်း၌ အရိပ်အမြွက်ပင် မတွေ့ရ။” အီစတာပွဲသည် အစောပိုင်းခရစ်ယာန်ပွဲမဟုတ်၊ ယေဟောဝါ၏ မျက်မှောက်ခေတ်လူမျိုးတော်သည် ၎င်းပွဲကိုမကျင်းပကြချေ။
၁၀။ အဘယ်အထိမ်းအမှတ်ပွဲကို ယေရှုအစပြုကျင်းပခဲ့သနည်း၊ ၎င်းပွဲကို မည်သူတို့ လျောက်ပတ်စွာကျင်းပခဲ့ကြပြီနည်း။
၁၀ ယေရှုသည် နောက်တော်လိုက်များအား မိမိ၏မွေးနေ့ကိုဖြစ်စေ၊ ရှင်ပြန်ထမြောက်သည့်နေ့ကိုဖြစ်စေ အထိမ်းအမှတ်ပွဲခံဖို့ မိန့်မှာတော်မမူခဲ့ချေ၊ သို့သော် မိမိ၏ယဇ်ပူဇော်ရာသေခြင်း သတိရအောက်မေ့ပွဲကိုကား ကိုယ်တော်အစပြုကျင်းပခဲ့သည်။ (ရောမ ၅:၈) ဤပွဲတော်ကိုသာ နောက်တော်လိုက်များအား ကျင်းပရန် ကိုယ်တော်မိန့်မှာခဲ့သည်။ (လုကာ ၂၂:၁၉၊ ၂၀) သခင့်ညစာစားပွဲဟုလည်းခေါ်သည့် ဤနှစ်ပတ်လည်ပွဲတော်ကို ယေဟောဝါသက်သေများ ကျင်းပနေကြဆဲဖြစ်သည်။—၁ ကောရိန္သု ၁၁:၂၀-၂၆။
ကမ္ဘာတစ်ဝန်းကြေညာနေသော အမှန်တရား
၁၁၊ ၁၂။ အမှန်တရား၌ လျှောက်လှမ်းနေသူများသည် သူတို့၏ဟောပြောခြင်းလုပ်ငန်းကို မည်သို့အစဉ်ထမ်းဆောင်ခဲ့ကြသနည်း။
၁၁ အမှန်တရားသိရှိသူတို့သည် သတင်းကောင်းဟောပြောခြင်းလုပ်ငန်းအတွက် မိမိတို့၏အချိန်၊ ခွန်အားနှင့် အခြားဥစ္စာအင်ခွင်များ ပေးဆက်ရခြင်းကို အခွင့်ထူးတစ်ခုဟုယူမှတ်ကြသည်။ (မာကု ၁၃:၁၀) အစောပိုင်းခရစ်ယာန်ဟောပြောခြင်းလုပ်ငန်းကို စေတနာအလျောက်လှူဒါန်းသော အလှူငွေများဖြင့် ထမ်းဆောင်ခဲ့ကြသည်။ (၂ ကောရိန္သု ၈:၁၂; ၉:၇) တာတူလျန် ဤသို့ရေးသားခဲ့သည်– “ငွေသေတ္တာတစ်မျိုးမျိုးထားလျှင်ပင် ၎င်းငွေသည် ဝင်ကြေးကောက်သည့်ငွေမဟုတ်ပါ၊ ထိုသို့ပြုခြင်းသည် ဘာသာရေးကို စီးပွားရေးလုပ်ငန်းတစ်ခုအလား ဖြစ်စေပေမည်။ လူတိုင်း တစ်လတစ်ကြိမ်၊ သို့မဟုတ် ဆန္ဒရှိသည့်အခါ၊ အမှန်ဆန္ဒရှိမှသာ၊ သူတတ်နိုင်လျှင် ငွေအနည်းငယ် ပါဝင်လှူဒါန်းကြ၏; မည်သူ့ကိုမျှ အတင်းအကျပ် အလှူငွေထည့်စေသည်မဟုတ်; စေတနာအလျောက်သာ လှူဒါန်းကြခြင်းဖြစ်သည်။”—Apology, အခန်း ၃၉။
၁၂ ယေဟောဝါသက်သေများ၏ ကမ္ဘာချီနိုင်ငံတော်ဟောပြောခြင်းလုပ်ငန်းကိုလည်း စေတနာအလျောက်ထည့်ဝင်သော အလှူငွေများဖြင့် ထမ်းဆောင်ပါသည်။ ယေဟောဝါသက်သေများအပြင် ကျေးဇူးသိတတ်သော စိတ်ဝင်စားသူများကလည်း မိမိတို့အလှူငွေဖြင့် ဤလုပ်ငန်းကို အားပေးကူညီခွင့်ရသဖြင့် ဝမ်းမြောက်ကြသည်။ ဤတွင်လည်း ကနဦးခရစ်ယာန်များနှင့် ယေဟောဝါသက်သေများ တူညီကြသည်။
အမှန်တရားနှင့် ကိုယ်ပိုင်အမူအကျင့်
၁၃။ ယေဟောဝါသက်သေများသည် အမူအကျင့်နှင့်ပတ်သက်၍ ပေတရု၏အဘယ်ဆုံးမစကားကို လိုက်နာကြသနည်း။
၁၃ အမှန်တရား၌ လျှောက်လှမ်းနေသူများအနေနှင့် အစောပိုင်းခရစ်ယာန်များသည် တမန်တော်ပေတရု၏ ဤဆုံးမစကားကိုလိုက်နာခဲ့ကြသည်– “[ပြင်]ပလူတို့သည် သင်တို့ကိုကဲ့ရဲ့ပြစ်တင်ကြသည်အမှုမှာ၊ ဘုရားသခင်ကြည့်ရှုစီရင်တော်မူသောနေ့ရက်၌၊ သင်တို့၏ကောင်းသောအကျင့်ကို သူတို့သည်ထောက်ရှု၍ ဘုရားသခင်ကိုချီးမွမ်းမည်အကြောင်း၊ သူတို့ရှေ့၌ တင့်တယ်လျောက်ပတ်စွာကျင့်နေကြလော့။” (၁ ပေတရု ၂:၁၂) ဤစကားများကို ယေဟောဝါသက်သေများ နှလုံးသွင်းကြသည်။
၁၄။ အကျင့်ယိုယွင်းသော အပန်းဖြေမှုအပေါ် ခရစ်ယာန်ရှုမြင်ပုံကား အဘယ်နည်း။
၁၄ အယူဖောက်ပြန်ခြင်း ပေါ်လာပြီးနောက်၌ပင် အမည်ခံခရစ်ယာန်များသည် အကျင့်ယိုယွင်းသည့်အပြုအမူများကို ရှောင်ကြဉ်ခဲ့ကြသည်။ ခရစ်ယာန်သာသနာ့သမိုင်းပါမောက္ခ ဒဗလျူ. ဒီ. ကေလဲန်က ဤသို့ရေးသားခဲ့သည်– “ဒုတိယနှင့် တတိယရာစုများတွင် မြို့ကြီးပြကြီးတိုင်းတွင်ရှိသော ပြဇာတ်ရုံသည် ဆွဲဆောင်မှုအားကောင်းသည့်နေရာဖြစ်ခဲ့သည်; ဇာတ်သမားများသည် အများအားဖြင့် အလွန်အကျင့်ယိုယွင်းသူများဖြစ်ကြစေကာမူ သူတို့၏တင်ဆက်မှုများသည် ထိုခေတ်၏ယိုယွင်းသောစိတ်ထားများကို အာသာပြေစေခဲ့သည်။ . . . ခရစ်ယာန်စစ်အားလုံးသည် ပြဇာတ်ရုံများကို စက်ဆုပ်ရွံရှာစရာအဖြစ် ရှုမြင်ခဲ့ကြသည်။ . . . ၎င်း၏ညစ်ညမ်းမှုများမှ သူတို့နောက်တွန့်ဆုတ်ခဲ့ကြသည်; သူတို့၏ဘာသာရေးခံယူချက်များကြောင့် ပြဇာတ်ရုံတွင် နတ်ဘုရားများ၊ နတ်ဘုရားမများကို မပြတ်အသနားခံကြခြင်းသည် သူတို့ကို မခံချိမခံသာဖြစ်စေသည်။” (ရှေးခေတ်ချာ့ခ်ျ၊ စာမျက်နှာ ၃၁၈-၁၉) ယေရှု၏နောက်လိုက်အစစ်အမှန်များသည် ညစ်ညမ်း၍ အကျင့်ယိုယွင်းသော အပန်းဖြေမှုများကိုလည်း ရှောင်ကြဉ်ကြသည်။—ဧဖက် ၅:၃-၅။
အမှန်တရားနှင့် “အစိုးရသောမင်းအာဏာစက်”
၁၅၊ ၁၆။ “မင်းအာဏာစက်” များကား မည်သူတို့နည်း၊ အမှန်တရား၌ လျှောက်လှမ်းနေသူများသည် သူတို့ကို မည်သို့သဘောထားကြသနည်း။
၁၅ အစောပိုင်းခရစ်ယာန်များသည် အမူအကျင့်ကောင်းကြသော်လည်း ရောမဧကရာဇ်မင်းအများစုသည် သူတို့ကိုအထင်လွဲခဲ့ကြသည်။ ဧကရာဇ်မင်းများသည် သူတို့အား “ယုတ်ညံ့သော စိတ်အားထက်သန်သူများ” အဖြစ် ယူမှတ်ကြကြောင်း သမိုင်းဆရာ အီး၊ ဂျီ၊ ဟာဒီကဆို၏။ အုပ်ချုပ်သူများသည် ခရစ်ယာန်ဘာသာ၏ သဘောသကန်အစစ်အမှန်ကို အများအားဖြင့် မသိခဲ့ကြကြောင်း ဘီသနီယာဘုရင်ခံ ပလင်နီအငယ်နှင့် ဧကရာဇ်ထရာဂျင်တို့ အပြန်အလှန်ပေးပို့သည့်စာများက ဖော်ပြသည်။ နိုင်ငံတော်အစိုးရကို ခရစ်ယာန်များ မည်သို့ရှုမြင်ကြသနည်း။
၁၆ ယေရှု၏အစောပိုင်းနောက်လိုက်များကဲ့သို့ ယေဟောဝါသက်သေများသည် အစိုးရနှင့်ဆိုင်သော “မင်းအာဏာစက်” ကိုအတိုင်းအတာတစ်ခုအထိ လက်အောက်ခံကြသည်။ (ရောမ ၁၃:၁-၇) လူ့တောင်းဆိုမှုနှင့် ဘုရားသခင့်အလိုတော် ယှဉ်ပြိုင်လာပါက သူတို့သည် “လူ၏စကားထက် ဘုရားသခင်၏စကားတော်ကိုနားထောင်” ကြပါသည်။ (တမန်တော် ၅:၂၉) ယေရှုနောက်ပိုင်း—ခရစ်ယာန်ဘာသာအောင်ပွဲခံဟူသောစာအုပ်က ဤသို့ဆို၏– “ခရစ်ယာန်များသည် ဧကရာဇ်ဝတ်ပြုမှုတွင် ပါဝင်ခဲ့ကြမည်မဟုတ်သော်လည်း သူတို့သည် ပုန်ကန်ရန်လှုံ့ဆော်ပေးသူများမဟုတ်ကြပါ၊ သူတို့၏ဘာသာတရားသည် တစ်မူထူး၍ တစ်ခါတစ်ရံ အယူမှားသူတို့၏အမြင်မှကြည့်လျှင် မနှစ်မြို့ဖွယ်ကောင်းသူများဖြစ်ကြသော်လည်း အင်ပါယာကို အဘယ်အန္တရာယ်မျှမပြုပါ။”
၁၇။ (က) အစောပိုင်းခရစ်ယာန်များသည် အဘယ်အစိုးရကို ထောက်ခံပြောဆိုခဲ့ကြသနည်း။ (ခ) ခရစ်တော်၏နောက်လိုက်အစစ်အမှန်များသည် ဟေရှာယ ၂:၄ ပါစကားများကို မိမိတို့ဘဝအသက်တာတွင် မည်သို့ကျင့်သုံးကြသနည်း။
၁၇ ဘိုးဘေးအာဗြဟံ၊ ဣဇာက်နှင့် ယာကုပ်တို့သည် ‘ဘုရားသခင်တည်ထောင်သော’ ကတိထားရာ “မြို့” ကိုယုံကြည်ကြောင်း တင်ပြခဲ့ကြသကဲ့သို့ အစောပိုင်းခရစ်ယာန်များသည် ဘုရားသခင့်နိုင်ငံတော်ကို ထောက်ခံပြောဆိုခဲ့ကြသည်။ (ဟေဗြဲ ၁၁:၈-၁၀) ယေရှု၏နောက်လိုက်များသည် သူတို့၏သခင်ကဲ့သို့ “ဤလောကနှင့်မဆက်ဆံ” ခဲ့ကြချေ။ (ယောဟန် ၁၇:၁၄-၁၆) လူ့စစ်မက်၊ ပဋိပက္ခတို့နှင့်ပတ်သက်၍လည်း သူတို့သည် ‘ဓားလက်နက်များကို ထွန်သွားဖြစ်စေခြင်း’ ဖြင့် ငြိမ်သက်ခြင်းကို မီအောင်လိုက်ကြသည်။ (ဟေရှာယ ၂:၄) စိတ်ဝင်စားဖွယ်တူညီချက်တစ်ခုကို သတိပြုမိပြီး ချာ့ခ်ျသမိုင်းကထိက ဂျက်ဖရီ အက်ဖ်. နတ်တယ်လ်က ဤသို့ကောက်ချက်ချခဲ့သည်– “ကျွန်ုပ်တို့လက်မခံချင်ကြသော်လည်း စစ်နှင့်ပတ်သက်၍ အစောပိုင်းခရစ်ယာန်များ၏သဘောထားသည် မိမိတို့ကိုယ်ကို ယေဟောဝါသက်သေများဟုခေါ်ဆိုကြသူတို့၏ သဘောထားနှင့် အလွန်ဆင်တူသည်။”
၁၈။ ယေဟောဝါသက်သေများကို အဘယ်အစိုးရကမျှ အဘယ်ကြောင့် ကြောက်စရာမလိုသနည်း။
၁၈ “မင်းအာဏာစက်” များကို လက်အောက်ခံကြသော ကြားနေသူများအနေနှင့် ကနဦးခရစ်ယာန်များသည် မည်သည့်တည်ရှိဆဲ နိုင်ငံတော်အာဏာကိုမျှ အန္တရာယ်မပြုခဲ့ကြသကဲ့သို့ ယေဟောဝါသက်သေများလည်း ထိုနည်းအတိုင်းပင်ဖြစ်သည်။ မြောက်အမေရိကရှိ ခေါင်းကြီးပိုင်းဆောင်းပါးရေးသူတစ်ဦးက ဤသို့ရေးသားခဲ့သည်– “ယေဟောဝါသက်သေများသည် နိုင်ငံရေးအုပ်ချုပ်မှုနည်းစနစ်တစ်ခုခုကို တစ်နည်းနည်းဖြင့် ခြိမ်းခြောက်မည်ဟုယုံကြည်ခြင်းသည် တစ်ယူသန်ဆန်ခြင်း၊ အစွန်းထွက် မယုံသင်္ကာခြင်းသာဖြစ်သည်။ သူတို့သည် ဘာသာရေးအဖွဲ့အစည်းတစ်ခုအနေနှင့် ဖြိုဖျက်မည်မဟုတ်၊ အေးချမ်းငြိမ်သက်စွာ နေထိုင်ကြသည်။” ယေဟောဝါသက်သေများအကြောင်းသိသူ အာဏာပိုင်များက သူတို့ကို ကြောက်စရာမလိုကြောင်း သိကြပါသည်။
၁၉။ အခွန်ပေးဆက်ခြင်းနှင့်ပတ်သက်၍ အစောပိုင်းခရစ်ယာန်များနှင့် ယေဟောဝါသက်သေများအကြောင်း မည်သို့ဆိုနိုင်သနည်း။
၁၉ “မင်းအာဏာစက်” များကို ရှေးခရစ်ယာန်များ လေးစားမှုတင်ပြခဲ့သောနည်းတစ်နည်းမှာ အခွန်အတုတ်များပေးခြင်းဖြင့်ဖြစ်သည်။ ရောမဧကရာဇ် အန်တိုနီနပ်စ် ပိုင်းယပ်စ် (စီ.အီး. ၁၃၈-၁၆၁) ထံစာရေးရာတွင် ဂျပ်စ်တင်မာတာက ခရစ်ယာန်များသည် သူတို့၏အခွန်အတုတ်များကို “အခြားသူအားလုံးတို့ထက် လွယ်ကူစွာ” ပေးဆက်ကြသည်ဟု ဆိုခဲ့သည်။ (First Apology, အခန်း ၁၇) ထို့အပြင် တာတူလျန်ကလည်း ခရစ်ယာန်များသည် အခွန်အတုတ်များကို အသိစိတ်ရှိရှိဖြင့် ပေးဆက်ကြသောကြောင့် ရောမအာဏာပိုင်များ၏ အခွန်ကောက်သူများသည် “ခရစ်ယာန်များကို အလွန်ကျေးဇူးတင်ရမည်ဖြစ်ကြောင်း” ရောမအာဏာပိုင်များအားပြောခဲ့သည်။ (Apology, အခန်း ၄၂) ခရစ်ယာန်များသည် ပက်စ်ရိုမာနာ သို့မဟုတ် ရောမငြိမ်းချမ်းရေးအစီအစဉ်နှင့် ၎င်း၏ဥပဒေ၊ အမိန့်ပြဋ္ဌာန်းချက်များ၊ ကောင်းမွန်သောလမ်းများနှင့် အတော်အသင့်လုံခြုံမှုရှိ ရေကြောင်းခရီးစဉ်များတို့မှ အကျိုးရရှိခဲ့ကြသည်။ လူ့ဘောင်အဖွဲ့အစည်းအား မိမိတို့ပေးဆောင်စရာရှိသည်ကို အသိအမှတ်ပြုကာ “ကဲသာဘုရင်၏ဥစ္စာကို ကဲသာဘုရင်အား ဆက်ပေးကြလော့” ဟူသော ယေရှု၏စကားကို သူတို့လိုက်နာခဲ့ကြသည်။ (မာကု ၁၂:၁၇) ဤစကားကို ယေဟောဝါ၏ မျက်မှောက်ခေတ်ကျေးကျွန်များ လိုက်နာကြပြီး အခွန်အတုတ်ပေးခြင်းကိစ္စ၌ကဲ့သို့ သူတို့၏ရိုးသားဖြောင့်မတ်မှုအတွက် ချီးမွမ်းခံခဲ့ကြရပြီ။—ဟေဗြဲ ၁၃:၁၈။
အမှန်တရား—နှောင်ကြိုး
၂၀၊ ၂၁။ ငြိမ်းချမ်းသော ညီအစ်ကိုအသင်းအပင်းနှင့်စပ်လျဉ်း၍ အစောပိုင်းခရစ်ယာန်များနှင့် ယေဟောဝါ၏ မျက်မှောက်ခေတ်ကျေးကျွန်များသည် အဘယ်အရာကို အမှန်ပင်ဖော်ပြခဲ့ပြီနည်း။
၂၀ အစောပိုင်းခရစ်ယာန်များသည် အမှန်တရား၌ လျှောက်လှမ်းကြသောကြောင့် မျက်မှောက်ခေတ် ယေဟောဝါသက်သေများကဲ့သို့ပင် ငြိမ်းချမ်းသောညီအစ်ကိုအသင်းအပင်း၌ စည်းလုံးကြသည်။ (တမန်တော် ၁၀:၃၄၊ ၃၅) မော်စကိုတိုင်းမ်တွင်ပါသော စာတစ်စောင်က ဤသို့ဆို၏– “[ယေဟောဝါသက်သေများသည်] ခင်မင်မှုရှိပြီး ကြင်နာသော၊ ပေါင်းရသင်းရအလွန်လွယ်ကူသော နူးညံ့သိမ်မွေ့သူများဖြစ်သည်ဟု လူသိများကြသည်၊ အခြားသူများကို ဘယ်သောအခါမျှ ဖိအားမပေးဘဲ သူတစ်ပါးနှင့်ဆက်ဆံရာ၌လည်း ငြိမ်သက်ခြင်းကို အစဉ်ရှာကြံကြသည်။ . . . သူတို့အလယ်၌ လာဘ်ယူသူများ၊ သောက်ကြူးသူများ သို့မဟုတ် မူးယစ်ဆေးစွဲသူများမရှိချေ၊ ထိုသို့ဖြစ်ရသည့်အကြောင်းရင်းမှာ ရှင်းပါသည်– သူတို့ပြုလေသမျှ၊ ပြောလေသမျှ ကျမ်းစာအခြေပြု ယုံကြည်ချက်များ၏ လမ်းညွှန်မှုကို အတတ်နိုင်ဆုံးခံယူကြသောကြောင့်ဖြစ်သည်။ ကမ္ဘာသားအားလုံးသာ ယေဟောဝါသက်သေများကဲ့သို့ ကျမ်းစာနှင့်အညီ အသက်ရှင်ဖို့ အနည်းဆုံးကြိုးစားကြမည်ဆိုလျှင် ကျွန်ုပ်တို့၏ရက်စက်ကြမ်းတမ်းသော ကမ္ဘာကြီးသည် လုံးလုံးပြောင်းလဲသွားပါလိမ့်မည်။”
၂၁ အစောပိုင်းခရစ်ယာန်များဆိုင်ရာ စွယ်စုံကျမ်းက ဤသို့ဖော်ပြသည်– “အစောပိုင်းချာ့ခ်ျသည် ယခင်က ရန်လိုသောလူစုများဖြစ်သည့် ဂျူးနှင့် တစ်ပါးအမျိုးသားတို့တွင် လူ့လောကအသစ်တစ်ခုအဖြစ် မိမိကိုယ်ကိုရှုမြင်ကာ အတူတကွ ငြိမ်းချမ်းစွာ နေထိုင်နိုင်ကြသည်။” ယေဟောဝါသက်သေများသည် ငြိမ်းချမ်းမှုကိုမြတ်နိုးသော အပြည်ပြည်ဆိုင်ရာ ညီအစ်ကိုများအသင်းအပင်းတစ်ခုလည်းဖြစ်သည်၊ အမှန်တကယ်ပင် ကမ္ဘာသစ်အဖွဲ့အစည်းတစ်ခုဖြစ်သည်။ (ဧဖက် ၂:၁၁-၁၈; ၁ ပေတရု ၅:၉; ၂ ပေတရု ၃:၁၃) တောင်အာဖရိကရှိ ပရီတိုရီးယားပြပွဲကွင်း၏ လုံခြုံရေးအကြီးအမှူးသည် လူမျိုးအသီးသီးမှဖြစ်သော သက်သေခံများ စည်းဝေးကြီးကို ငြိမ်သက်စွာ လာတက်ရောက်ကြကြောင်း တွေ့မြင်သောအခါ သူဤသို့ပြောခဲ့သည်– “လူတိုင်း ယဉ်ကျေးသိမ်မွေ့ ရည်မွန်ကြတယ်၊ တစ်ယောက်ကိုတစ်ယောက် ကောင်းမွန်စွာစကားပြော ဆက်ဆံကြတယ်၊ လွန်ခဲ့တဲ့ရက်အနည်းငယ်မှာ တွေ့မြင်ခဲ့ရတဲ့ သဘောထားတွေက သင်တို့အသင်းသားများရဲ့ အရည်အသွေးကိုထောက်ပြပါတယ်၊ အားလုံးဟာ ပျော်ရွှင်တဲ့မိသားစုကြီးတစ်စုလိုပဲ။”
အမှန်တရားသွန်သင်ပေးခြင်းအတွက် ကောင်းချီးခံစားရ
၂၂။ ခရစ်ယာန်များသည် အမှန်တရားကိုဖော်ပြနေကြသောကြောင့် အဘယ်အရာဖြစ်ပျက်နေပြီနည်း။
၂၂ ပေါလုနှင့် အခြားခရစ်ယာန်များသည် သူတို့၏အမူအကျင့်နှင့် ဟောပြောခြင်းလုပ်ငန်းအားဖြင့် “[အမှန်] တရားကို အတည့်အလင်းဖော်ပြ” ခဲ့ကြသည်။ (၂ ကောရိန္သု ၄:၂) ယေဟောဝါသက်သေများသည် ထိုအတိုင်းပြုနေကြပြီး လူမျိုးအပေါင်းအား အမှန်တရားသွန်သင်ပေးနေကြောင်း သင်သဘောတူသည်မဟုတ်ပေလော။ ကမ္ဘာတစ်ဝန်းရှိလူတို့သည် စစ်မှန်သောဝတ်ပြုကိုးကွယ်မှုကို ယုံကြည်သက်ဝင်လာကြပြီး ‘ယေဟောဝါ၏အိမ်တော် တည်သောတောင်’ ပေါ်သို့ တသီတတန်းတက်သွားနေကြသူ များသည်ထက်များလာနေသည်။ (ဟေရှာယ ၂:၂၊ ၃) နှစ်စဉ်နှစ်တိုင်း ထောင်နှင့်ချီသောသူတို့သည် ဘုရားသခင်ထံဆက်ကပ်အပ်နှံခြင်း အထိမ်းအမှတ်အဖြစ် နှစ်ခြင်းယူခဲ့ကြပြီး အသင်းတော်အသစ်များစွာကို ဖွဲ့စည်းတည်ထောင်ခဲ့ရကြပြီ။
၂၃။ လူမျိုးအပေါင်းအား အမှန်တရားသွန်သင်ပေးနေသူများကို သင်မည်သို့ရှုမြင်သနည်း။
၂၃ ယေဟောဝါ၏လူမျိုးတော်သည် နောက်ခံအမျိုးမျိုးမှလာကြသော်လည်း စစ်မှန်သောဝတ်ပြုရေး၌ စည်းလုံးနေကြသည်။ သူတို့တင်ပြသောမေတ္တာက သူတို့သည် ယေရှု၏တပည့်များဖြစ်ကြောင်း ခွဲခြားသိမြင်စေသည်။ (ယောဟန် ၁၃:၃၅) “ဘုရားသခင်သည် သူတို့တွင်အမှန်ရှိတော်မူ” ကြောင်းကို သင်တွေ့မြင်ပါသလော။ (၁ ကောရိန္သု ၁၄:၂၅) လူမျိုးအပေါင်းအား အမှန်တရားသွန်သင်ပေးနေသူများနှင့်အတူ သင်ရပ်တည်နေပြီလော။ သို့ဖြစ်ပါက အမှန်တရားရထားသည့်အတွက် အစဉ်ကျေးဇူးတင်ကြောင်းဖော်ပြပြီး အမှန်တရားလမ်းစဉ်၌ ထာဝစဉ်လျှောက်လှမ်းခွင့်ရပါစေ။
သင်မည်သို့ဖြေဆိုမည်နည်
• ဝတ်ပြုကိုးကွယ်ပုံနှင့်ပတ်သက်၍ အစောပိုင်းခရစ်ယာန်များနှင့် ယေဟောဝါသက်သေများ၏ တူညီချက်များကား အဘယ်နည်း။
• အမှန်တရား၌ လျှောက်လှမ်းနေသူများ ကျင်းပသည့် တစ်ခုတည်းသောဘာသာရေးပွဲကား အဘယ်နည်း။
• “အစိုးရသောမင်းအာဏာစက်” ကား မည်သူနည်း၊ သူတို့ကို ခရစ်ယာန်များ မည်သို့ ရှုမြင်ကြသနည်း။
• အမှန်တရားသည် မည်သို့အားဖြင့် နှောင်ကြိုးဖြစ်သနည်း။
[လေ့လာရန်မေးခွန်းများ]
[စာမျက်နှာ ၂၁ ပါ ရုပ်ပုံ]
အမှန်တရားလမ်းစဉ်အတိုင်း လျှောက်လှမ်းနေသူများအတွက် ခရစ်ယာန်အစည်းအဝေးများသည် အစဉ်သဖြင့် ကောင်းချီးတစ်ရပ်ဖြစ်ခဲ့ပြီ
[စာမျက်နှာ ၂၃ ပါ ရုပ်ပုံ]
ယေရှုက မိမိ၏ယဇ်ပူဇော်ရာသေခြင်းကို သတိရအောက်မေ့ပွဲကျင်းပရန် နောက်လိုက်များအား မိန့်မှာခဲ့
[စာမျက်နှာ ၂၄ ပါ ရုပ်ပုံ]
အစောပိုင်းခရစ်ယာန်များကဲ့သို့ ယေဟောဝါသက်သေများသည် “အစိုးရသောမင်းအာဏာစက်” ကို ရိုသေလေးစားကြ