ငှက်ကျားထံမှ သင်ခန်းစာတစ်ရပ်
ငှက်ကျားထံမှ သင်ခန်းစာတစ်ရပ်
“မိုးကောင်းကင်၌ ကျင်လည်သော တောငန်း [“ငှက်ကျား၊” ကဘ] သော်လည်း မိမိအချိန်ကို သိတတ်၏။ . . . ငါ၏လူမူကား ထာဝရဘုရားစီရင်တော်မူခြင်းကို နားမလည်တတ်။” (ယေရမိ ၈:၇) အဆိုပါစကားများအားဖြင့် မိမိတို့၏ဘုရားသခင် ယေဟောဝါကို စွန့်ခွာ၍ တိုင်းတစ်ပါးနတ်ဘုရားများကို ကိုးကွယ်နေကြသည့် ဖောက်ပြန်သော ယုဒလူတို့ကို ယေဟောဝါ၏တရားစီရင်ခြင်းအကြောင်း ပရောဖက်ယေရမိ ကြေညာခဲ့၏။ (ယေရမိ ၇:၁၈၊ ၃၁) ယေရမိသည် တည်ကြည်မှုမရှိသောဂျူးများအတွက် လက်တွေ့ကျသင်ခန်းစာပေးရန် ငှက်ကျားကို အဘယ်ကြောင့်ရွေးချယ်ခဲ့သနည်း။
ငှက်ကျား အထူးသဖြင့် ငှက်ကျားဖြူသည် ကျမ်းစာနယ်မြေများတစ်လျှောက် ရာသီအလိုက် သွားလာနေသောကြောင့် ထိုငှက်ကို ဣသရေလလူတို့ တွေ့ ဖူးနေကျဖြစ်၏။ အရွယ်ကြီးပြီး ခြေတံရှည်သော ရေစပ်နေဤငှက်၏ ဟေဗြဲအမည်မှာ မ,သဘာဝရှိပြီး “တည်ကြည်သူ; ချစ်ခင်ကြင်နာသူ” ဟုအဓိပ္ပာယ်ရသည်။ အခြားငှက်များနှင့်မတူဘဲ ဤငှက်ကျားဖြူမောင်နှံသည် သေသည့်အထိ တပူးတတွဲနေကြသောကြောင့် ၎င်းအမည်သည် အလွန်သင့်လျော်ပေ၏။ ဆောင်းရာသီတွင် ပူနွေးသောဒေသများ၌ နေထိုင်ပြီးနောက် ငှက်ကျားအများစုသည် နှစ်စဉ်နှစ်တိုင်း ယခင်က သူတို့အသုံးပြုခဲ့သောအသိုက်သို့ ပြန်လာတတ်ကြသည်။
ငှက်ကျား၏ ပင်ကိုသဘာဝက ထူးဆန်းဖွယ်တခြားနည်းဖြင့် တည်ကြည်သောအရည်အသွေးကို ဖော်ထုတ်၏။ သားဝပ်ရာတွင်လည်းကောင်း၊ ကလေးများကို အစာကျွေးရာတွင်လည်းကောင်း အထီးနှင့်အမ နှစ်ကောင်စလုံးက ပူးတွဲလုပ်ဆောင်ကြသည်။ ကျွန်ုပ်တို့၏ အံ့ဖွယ်ကောင်းသော တောရိုင်းတိရစ္ဆာန် စာအုပ်က ဤသို့ ရှင်းပြသည်– “ငှက်ကျားမိဘများသည် တစ်ကောင်အပေါ်တစ်ကောင် တည်ကြည်ကြသည်မှာ ထူးဆန်း၏။ ဂျာမနီနိုင်ငံမှ ငှက်ကျားအထီးတစ်ကောင်သည် လျှပ်စစ်ဝါယာကြိုးများနှင့် ထိမိ၍ ဓာတ်လိုက်သေဆုံးသွားသည်။ သူ၏မိတ်ဖက်သည် ၃ ရက်အထိ တစ်ကောင်တည်း ဆက်၍သားဝပ်ခဲ့ပြီး ထိုအချိန်အတွင်း အစာရှာရန် တစ်ကြိမ် တစ်ခဏတည်းသာ အသိုက်မှ ထွက်ခွာသွားခဲ့သည်။ . . . အခြားအဖြစ်အပျက်တစ်ခုတွင် ငှက်ကျားမ ပစ်ခတ်ခံရသောအခါ ဖခင်ငှက်ကျားသည် ကလေးများကို ကျွေးမွေးပြုစုခဲ့၏။”
ငှက်ကျားသည် ရာသက်ပန်အဖော်ကို ပင်ကိုအသိဖြင့် တည်ကြည်မှုပြ၍ ကလေးများကို ကျေပွန်စွာ ကြည့်ရှုစောင့်ရှောက်ခြင်းအားဖြင့် “တည်ကြည်သူ” ဟူသော ၎င်းအမည်၏ အဓိပ္ပာယ်နှင့်အညီ ပြုမူသည်။ ထို့ကြောင့် ငှက်ကျားများသည် တည်ကြည်မှုမရှိ၊ ခေါင်းမာသော ဣသရေလလူမျိုးအတွက် ထိရောက်သော သင်ခန်းစာဖြစ်ပေသည်။
မျက်မှောက်ခေတ် လူအများစုအတွက် တည်ကြည်မှုသည် ချီးမွမ်းဖွယ်ကောင်းသော အရည်အချင်းဖြစ်သော်လည်း လက်တွေ့မကျ၊ ရှေးဆန်သည်ဟု သဘောထားကြ၏။ ကွာရှင်းခြင်း၊ စွန့်ပစ်ခြင်း၊ ငွေအလွဲသုံးစားပြုလုပ်ခြင်းနှင့် တခြားကောက်ကျစ်စဉ်းလဲသောနည်းများ တိုးများလာနေခြင်းက တည်ကြည်မှုကို တန်ဖိုးမထားတော့ကြောင်း ဖော်ပြနေသည်။ ယင်းနှင့် ဆန့်ကျင်လျက်၊ သမ္မာကျမ်းစာက မေတ္တာနှင့် ကြင်နာမှု လှုံ့ဆော်ပေး၍ ဖြစ်ပေါ်သည့် တည်ကြည်မှုကို အလွန်တန်ဖိုးထားပါသည်။ ၎င်းက ခရစ်ယာန်များကို “မှန်သောဖြောင့်မတ်ခြင်း၊ သန့်ရှင်းခြင်း . . . အားဖြင့် ဘုရားသခင်နှင့်အတူအမျှ ဖန်ဆင်းသောလူသစ် [“ဥပဓိရုပ်သစ်၊” ကဘ] ကို ယူတင်ဝတ်ဆောင်” ကြရန် တိုက်တွန်းနှိုးဆော်သည်။ (ဧဖက် ၄:၂၄) မှန်ပါသည်၊ ဥပဓိရုပ်သစ်က ကျွန်ုပ်တို့ကို တည်ကြည်မှုရှိရန် ကူညီပေး၏၊ သို့သော်လည်း ငှက်ကျားထံမှ တည်ကြည်မှုအကြောင်း သင်ခန်းစာယူနိုင်ပါသည်။