‘ဘုရားသခင်၏နှုတ်မြွက်တော်သည် တန်ခိုးနှင့်ပြုပြင်တတ်’
ဘုရားသခင့်နိုင်ငံတော်ကြွေးကြော်သူများ မှတ်တမ်း
‘ဘုရားသခင်၏နှုတ်မြွက်တော်သည် တန်ခိုးနှင့်ပြုပြင်တတ်’
နေသာသည့် ကရစ်ဘီယန်ကျွန်းစုရှိ ဂျမေကာကျွန်းတွင် လူအများသည် သမ္မာကျမ်းစာနှင့် အကျွမ်းတဝင်ရှိ၏။ အမှန်မှာ၊ ဂျိမ်းစ်ဘုရင်ဘာသာပြန်ကျမ်းကို အိမ်တိုင်းလိုလိုတွင် တွေ့ ရှိနိုင်သည်၊ “ဘုရားသခင်၏ နှုတ် [မြွက်] တော်သည် အသက်ရှင် . . . [ပြီး] တန်ခိုးနှင့်ပြုပြင်” တတ်ကြောင်း လူအချို့ တွေ့ ကြုံခံစားခဲ့ကြရပြီ။ (ဟေဗြဲ ၄:၁၂) အောက်ပါတွေ့ ကြုံမှုက ဖော်ပြသည့်အတိုင်း ယင်းတန်ခိုးသည် ဘဝအသက်တာများကို ပြောင်းလဲပေးနိုင်သည်။
ကလိဗ်လန်အမည်ရှိ အမျိုးသားတစ်ဦးသည် အလုပ်မှအိမ်သို့ ပြန်ရောက်ရုံရှိသေးစဉ် ယေဟောဝါသက်သေတစ်ဦး သူ့ထံလည်ပတ်လာသည်။ ထိုသက်သေခံသည် ကျမ်းစာမှအကြောင်းအရာအချို့ကို တင်ပြပြောဆိုပြီးနောက် ထာဝရအသက်ရစေသော အသိပညာဟူသည့် ကျမ်းစာလေ့လာရန် အထောက်အကူပြုစာအုပ်တစ်အုပ်ကို သူ့အား ပေးထားခဲ့သည်။ သမ္မာကျမ်းစာသည် မိမိ၏အသက်တာကို မည်မျှပြုပြင်ပေးလိမ့်မည်ကို သူမသိရှိခဲ့ချေ။
ကလိဗ်လန်သည် ဘုရားသခင်ကို နည်းမှန်လမ်းကျဝတ်ပြုရန် မိမိအားကူညီပေးဖို့ ကိုယ်တော့်ထံ တစ်နေ့သုံးကြိမ် ဆုတောင်းခဲ့၏။ သူ၏မိဘများသည် နည်းမှန်လမ်းမှန် ဝတ်မပြုခဲ့ကြကြောင်း ကလိဗ်လန် သိထားသော်လည်း အခြားဘာသာရေးများကို သူဆန်းစစ်လေ့လာပြီးနောက် အလွန်စိတ်ပျက်သွားခဲ့သည်။ ယေဟောဝါသက်သေများအကြောင်း သူကြားဖူးသော်လည်း ထိုသူတို့တွင် အမှန်တရားရှိမရှိကို သူသံသယဝင်မိ၏။ သံသယရှိနေလင့်ကစား သူ့အိမ်သို့လည်ပတ်လာသည့် သက်သေခံနှင့် ကျမ်းစာသင်ရန် ကလိဗ်လန်သဘောတူလိုက်သည်။ အဘယ်ကြောင့်နည်း။ သက်သေခံများမှားကြောင်း ထောက်ပြလို၍ဖြစ်၏။
မကြာမီပင် ကလိဗ်လန်သည် အမျိုးသမီးနှစ်ဦးနှင့် အကျင့်ပျက်နေထိုင်ခြင်းကို ဘုရားသခင်မနှစ်သက်ကြောင်း သိရှိလာလေသည်။ (၁ ကောရိန္သု ၆:၉၊ ၁၀) နှစ်ကြိမ်မျှသာ ကျမ်းစာလေ့လာပြီးနောက် ထိုအမျိုးသမီးများနှင့် အဆက်ဖြတ်ရန် သူအားမွေးလိုက်သည်။ ထို့ပြင် ဘုရားသခင့်နိုင်ငံတော်ခန်းမ၌ ခရစ်ယာန်အစည်းအဝေးများကိုလည်း စတက်လေသည်။ သို့သော် ဤသို့ပြုခြင်းသည် နောက်ထပ်စမ်းသပ်မှုတစ်ခု ဖြစ်စေခဲ့၏။
ကလိဗ်လန်သည် ရပ်ကွက်ဘောလုံးအသင်းတွင် တက်ကြွစွာ ပါဝင်နေသူဖြစ်ရာ ဘောလုံးပွဲများက အစည်းအဝေးတက်ခြင်းကို အနှောင့်အယှက်ပေးနေသည်။ သူ မည်သို့ ပြုလုပ်မည်နည်း။ ကလိဗ်လန်သည် ကစားဖော်ကစားဖက်များ၊ အားကစားနည်းပြဆရာနှင့် မိတ်ဆွေသူငယ်ချင်းများ၏ ဖိအားပေးမှုကို ခံခဲ့ရသော်လည်း ထိုဘောလုံးအသင်းမှ နုတ်ထွက်ရန် ဆုံးဖြတ်လိုက်လေသည်။ မှန်ပါသည်၊ သမ္မာကျမ်းစာက သူ့ကိုအကျိုးပေးနေပါသည်!
ကလိဗ်လန်သည် သူရရှိထားသောကျမ်းစာအသိပညာကို အခြားသူများအား စတင်ဟောပြောသည့်အခါ သမ္မာကျမ်းစာ၏တန်ခိုး ထင်ရှားလာပြန်သည်။ (တမန်တော် ၁:၈) ယင်းကြောင့် သူနှင့် ဘောလုံးကန်ခဲ့သူ ကစားဖော်နှစ်ဦးသည် ယေဟောဝါသက်သေများ၏ အစည်းအဝေးများကို စတင်တက်ရောက်လာကြသည်။ ကလိဗ်လန်သည် သတင်းကောင်းကြေညာသူတစ်ဦးဖြစ်ဖို့ အရည်အချင်းပြည့်မီလာပြီးနောက် အခြားသူများကို သမ္မာကျမ်းစာနှင့် အကူအညီပေးရာ ခရစ်ယာန်ဓမ္မအမှုတွင်ပါဝင်ရခြင်းမှ များစွာရွှင်လန်းဝမ်းမြောက်မှု ရရှိခဲ့၏။
ကျမ်းစာ၏တန်ခိုးကို ဆက်လက်ခံစားခဲ့ရရာ အဆုံးတွင် ကလိဗ်လန်သည် ရေတွင်နှစ်ခြင်းယူပြီး ယေဟောဝါထံ သူ့ကိုယ်သူဆက်ကပ်အပ်နှံခဲ့၏၊ အချိန်ပြည့်ခရစ်ယာန်ဓမ္မအမှုဆောင်တစ်ဦးအဖြစ်နှင့် အသင်းတော်တွင် ခရစ်ယာန်ဓမ္မအမှုထမ်းတစ်ဦးအဖြစ် အမှုဆောင်ခွင့်ရပေပြီ။
သမ္မာကျမ်းစာသည် “အသက်ရှင် . . . [ပြီး] တန်ခိုးနှင့်ပြုပြင်” တတ်ကြောင်းကို ဂျမေကာကျွန်းနှင့် ကမ္ဘာတစ်ဝန်းရှိ ထောင်နှင့်ချီသောလူတို့သည် သိရှိနားလည်လာကြပြီ။
[စာမျက်နှာ ၈ ပါ မြေပုံ/ ရုပ်ပုံ]
(ကားချက်အပြည့်အစုံကို စာစောင်တွင်ကြည့်ပါ)
ဂျမေကာ
[Credit Line]
Map and globe: Mountain High Maps® Copyright © 1997 Digital Wisdom, Inc.