သင့်သမာဓိကို သင်စောင့်ထိန်းထားမည်လော
သင့်သမာဓိကို သင်စောင့်ထိန်းထားမည်လော
မနေ့က စာကလေး မည်မျှသေသွားသနည်း။ မည်သူမျှ သိမည်မဟုတ်ချေ၊ ဤမျှများပြားသည့် ငှက်များကို ဂရုစိုက်သူ နည်း၏။ သို့သော် ယေဟောဝါမူကား ဂရုစိုက်တော်မူ၏။ အမြင်အားဖြင့် တန်ဖိုးမရှိသော ဤငှက်များနှင့်ပတ်သက်၍ ယေရှုက တပည့်များကို ဤသို့မိန့်ဆိုခဲ့၏– “သင်တို့အဘ အခွင့်မရှိလျှင် ထိုစာငှက်တစ်ကောင်မျှ မြေသို့မကျရ။” ကိုယ်တော်က ဤသို့ထပ်ဆင့်မိန့်ခဲ့၏– “မကြောက်ကြနှင့်။ သင်တို့သည် စာငှက်အများတို့ထက် သာ၍မြတ်ကြ၏။”—မဿဲ ၁၀:၂၉၊ ၃၁။
တပည့်များသည် မိမိတို့ကို ယေဟောဝါ မည်မျှတန်ဖိုးထားကြောင်း နောက်ပိုင်းတွင် သဘောပေါက်လာခဲ့ကြသည်။ တပည့်တစ်ဦးဖြစ်သူ တမန်တော်ယောဟန်က ဤသို့ရေးသားခဲ့သည်– “သားတော်အားဖြင့် ငါတို့သည် အသက်ရှင်စေခြင်းငှာ၊ ဘုရားသခင်သည် တစ်ပါးတည်းသော သားတော်ကို ဤလောကသို့ စေလွှတ်တော်မူသောအရာ၌ ငါတို့ကို ချစ်တော်မူသော မေတ္တာတော်သည် ထင်ရှားလျက်ရှိ၏။” (၁ ယောဟန် ၄:၉) ယေဟောဝါသည် မိမိ၏ကျေးကျွန်များကို ရွေးနုတ်ဖိုးပြင်ဆင်ပေးသည့်အပြင် “ငါသည် သင့်ကိုမစွန့်၊ သင့်ကို အလျှင်းပစ်၍မထား” ဟူ၍လည်း အာမခံတော်မူ၏။—ဟေဗြဲ ၁၃:၅။
လူမျိုးတော်အတွက် ယေဟောဝါ၏မေတ္တာတော်သည် မပြောင်းလဲကြောင်း ထင်ရှားပါသည်။ သို့ရာတွင် မေးစရာကား ‘ကျွန်ုပ်တို့သည် ယေဟောဝါကို ဘယ်တော့မျှ မစွန့်ခွာသည့်အထိ ကိုယ်တော့်ကို အလွန်ချစ်မြတ်နိုးသလော’ ဖြစ်သည်။
ကျွန်ုပ်တို့၏သမာဓိကို ချိုးဖျက်ရန် စာတန်၏ ကြိုးစားမှုများ
ယေဟောဝါသည် ယောဘ၏သမာဓိကို စာတန်အား ထောက်ပြသောအခါ စာတန်က “ယောဘသည် အကျိုးမရဘဲ ဘုရား[သခင်]ဝတ်ကို ပြုသလော” ဟုခွန်းတုံ့ပြန်ခဲ့သည်။ (ယောဘ ၁:၉) ‘ရရှိမည့် အကျိုးကျေးဇူးများ’ ကိုထောက်၍ ဘုရားသခင်အား လူတို့ တည်ကြည်ကြခြင်းဖြစ်သည်ဟု စာတန် ဆိုလိုနေခြင်းဖြစ်သည်။ ယင်းသည် မှန်ကန်ခဲ့သော် မက်မောစရာတစ်ခုခု ကမ်းလှမ်းခံရသည့်အခါ အဘယ်ခရစ်ယာန်မဆို၏ သမာဓိကို ချိုးဖျက်နိုင်မည်ဖြစ်သည်။
ယောဘ၏အဖြစ်အပျက်တွင် စာတန်က ယောဘသည် သူအမြတ်နိုးဆုံးအရာများ ဆုံးရှုံးသွားလျှင် ဘုရားသခင်အပေါ်ထားရှိသည့် သူ၏တည်ကြည်မှုကို စွန့်လိမ့်မည်ဟု အစပိုင်းတွင် ပြောဆိုခဲ့သည်။ (ယောဘ ၁:၁၀၊ ၁၁) ဤစွဲချက် မှားကြောင်း ထင်ရှားသောအခါ စာတန်က “လူသည် မိမိအသက်ဖို့ မိမိဥစ္စာရှိသမျှကို ပေးပါလိမ့်မည်” ဟုယိုးစွပ်ပြန်သည်။ (ယောဘ ၂:၄) စာတန်၏အဆိုသည် လူအချို့အတွက် မှန်ကောင်းမှန်မည်ဖြစ်သော်လည်း ယောဘမူကား သူ၏တည်ကြည်မှုကို လုံးဝမစွန့်ခဲ့ချေ။ ယင်းကို သမိုင်းကဖော်ပြသည်။ (ယောဘ ၂၇:၅; ၄၂:၁၀-၁၇) အလားတူ တည်ကြည်မှုမျိုး သင်၌ ရှိပါသလော။ သင်၏သမာဓိကို စာတန်အား ချိုးဖျက်ခွင့်ပြုမည်လော။ ခရစ်ယာန်တိုင်းနှင့်ပတ်သက်သည့် အမှန်တရားအချို့ကို ကျွန်ုပ်တို့ဆန်းစစ်ကြည့်ရာတွင် သင့်အကြောင်းသင် သုံးသပ်ကြည့်ပါ။
စစ်မှန်သော ခရစ်ယာန်တည်ကြည်မှုသည် အမှန်တကယ်ခိုင်ခံ့မြဲမြံနိုင်သည်ဟု တမန်တော်ပေါလု ယုံကြည်ခဲ့သည်။ သူက “‘သေခြင်းဖြစ်စေ၊ အသက်ရှင်ခြင်းဖြစ်စေ၊ . . . မျက်မှောက်အရာဖြစ်စေ၊ နောင်လာလတ္တံ့သောအရာဖြစ်စေ၊ . . . ဤအရာမှစ၍ အဘယ်နိမ္မိတအရာမျှသည် ငါတို့သခင်ယေရှုခရစ်အားဖြင့်ခံရသော ဘုရားသခင်၏ မေတ္တာတော်နှင့် ငါတို့ကို မကွာစေနိုင်ဟု ငါသည် သဘောကျ [“ယုံကြည်စိတ်ချ၊” ကဘ] လျက်ရှိ၏’” ဟူ၍ ရေးသားခဲ့သည်။ (ရောမ ၈:၃၈၊ ၃၉) ယေဟောဝါအပေါ် ကျွန်ုပ်တို့မေတ္တာသည် ခိုင်ခံ့မြဲမြံမည်ဆိုလျှင် ထပ်တူယုံကြည်စိတ်ချမှုမျိုး ရှိနိုင်ကြပါသည်။ ဤသို့သောမေတ္တာမျိုးသည် သေခြင်းပင် အနိုင်မပိုင်းနိုင်သည့် ခိုင်မြဲသောနှောင်ကြိုးဖြစ်၏။
ဘုရားသခင်နှင့် ကျွန်ုပ်တို့၏ဆက်ဆံရေးသည် ထိုသို့ဖြစ်မည်ဆိုလျှင် ‘နောက်နှစ်အနည်းငယ်မှာ ယေဟောဝါကို ငါဆက်ပြီးကိုးကွယ်နေဦးမှာလား’ ဟုဘယ်သောအခါမျှ မေးကြမည်မဟုတ်ပေ။ ဤသို့သောမရေရာမသေချာမှုက ဘုရားသခင်ကို ကျွန်ုပ်တို့တည်ကြည်ခြင်းသည် ကျွန်ုပ်တို့၏ဘဝအသက်တာအတွင်း ဖြစ်ပျက်ရာများအပေါ် မူတည်သည်ဟု ဆိုနေပုံပေါက်သည်။ စစ်မှန်သောသမာဓိသည် ပြင်ပအခြေအနေများအပေါ် မမူတည်ချေ။ ကျွန်ုပ်တို့၏အတွင်းလူအပေါ် မူတည်သည်။ (၂ ကောရိန္သု ၄:၁၆-၁၈) ယေဟောဝါကို ကျွန်ုပ်တို့ စိတ်နှလုံးအကြွင်းမဲ့ ချစ်မြတ်နိုးမည်ဆိုလျှင် ကိုယ်တော့်ကို ဘယ်တော့မျှ စိတ်ထိခိုက်စေမည်မဟုတ်ချေ။—မဿဲ ၂၂:၃၇; ၁ ကောရိန္သု ၁၃:၈။
သို့သော် စာတန်သည် ကျွန်ုပ်တို့၏သမာဓိကို ချိုးဖျက်ရန် သဲသဲမဲမဲကြိုးစားနေကြောင်း သတိရကြမည်။ သူသည် ကိုယ်ကာယတပ်မက်ခြင်း၊ ရွယ်တူခြင်းဖိအားတို့ကို အလျှော့ပေးလိုက်လျောမိစေရန် သွေးဆောင်၍ အမှန်တရားကို စွန့်လွှတ်ရန် ဆင်းရဲခြင်းတစ်မျိုးမျိုး ကျရောက်ခွင့် ပြုမည်ဖြစ်သည်။ ကျွန်ုပ်တို့၏မစုံလင်မှုက စာတန်၏လုပ်ဆောင်မှုကို သာ၍လွယ်ကူစေသော်လည်း ဤတိုက်ခိုက်မှုတွင် စာတန်အဓိကအသုံးပြုသော သူ၏မဟာမိတ်မှာ ဘုရားသခင်နှင့် ဝေးကွာသွားသော လောကဖြစ်သည်။ (ရောမ ၇:၁၉၊ ၂၀; ၁ ယောဟန် ၂:၁၆) မည်သို့ပင်ဆိုစေ၊ ဤတိုက်ပွဲတွင် ကျွန်ုပ်တို့ အခွင့်အရေးသာကြပါသည်၊ အထူးသဖြင့် အခွင့်သာသည်မှာ စာတန်၏အကြံအစည်များကို ကျွန်ုပ်တို့ ကြိုသိထားခြင်းဖြစ်သည်။—၂ ကောရိန္သု ၂:၁၁။
စာတန်၏အကြံအစည်များကား အဘယ်နည်း။ ပေါလုသည် ဧဖက်မြို့သားများထံ ရေးလိုက်သော သူ၏စာတွင် ယင်းအကြံအစည်များကို “ပရိယာယ်” ဟုဖော်ပြခဲ့သည်။ * (ဧဖက် ၆:၁၁) စာတန်သည် ကျွန်ုပ်တို့၏သမာဓိကို ချိုးဖျက်ရန် လိမ္မာပါးနပ်သောပရိယာယ်များကို အကွက်ဆင်ထား၏။ စာတန်၏နည်းပရိယာယ်များကို သမ္မာကျမ်းစာတွင် မှတ်တမ်းတင်ထားရာ အဆိုပါဉာဏ်နီဉာဏ်နက်လုပ်ရပ်များကို ကျွန်ုပ်တို့သိရှိနိုင်ကြသည်။ ကျွန်ုပ်တို့၏ခရစ်ယာန်သမာဓိကို ချိုးဖျက်ရန် စာတန်ရှာကြံသည့် နည်းအချို့ကိုသိရှိရန် ယေရှုနှင့် ယောဘတို့၏သမာဓိကို ဖျက်ဆီးရန် စာတန် မည်သို့ကြိုးစားခဲ့ကြောင်း သတိပြုပါ။
ယေရှု၏သမာဓိကို မချိုးဖျက်နိုင်
ယေရှု၏ဓမ္မအမှုအစတွင် စာတန်က ကျောက်ခဲကို မုန့်လုပ်ခိုင်းခြင်းအားဖြင့် ဘုရားသခင့်သားတော်ကို ရဲရဲတင်းတင်းသွေးဆောင်ခဲ့သည်။ ကောက်ကျစ်စဉ်းလဲလိုက်လေခြင်း! ယေရှုသည် ရက်ပေါင်း ၄၀ အစာမစားခဲ့သောကြောင့် အလွန်ဆာလောင်နေပေမည်။ (လုကာ ၄:၂၊ ၃) ယေရှုသည် ယေဟောဝါ၏အလိုတော်နှင့် ဆန့်ကျင်၍ ကိုယ်တော်၏ပင်ကိုဆန္ဒကို ချက်ချင်းဖြည့်ဆည်းရန် စာတန်အကြံပြုခဲ့သည်။ ထိုနည်းတူ ယနေ့လည်း ဤလောက၏ဝါဒဖြန့်မှုက အကျိုးဆက်ကို ထည့်မတွက်ဘဲ လိုဘပြေရန် ချက်ချင်းပြုမူဆောင်ရွက်ဖို့ အားပေးသည်။ ‘အခုပဲ ရထိုက်တယ်၊’ သို့မဟုတ် ‘လုပ်လိုက်ပါလား!’ ဟူ၍ပင်ဖြစ်၏။
ယေရှုသည် ဖြစ်ပေါ်လာမည့်အကျိုးဆက်များကို မစဉ်းစားဘဲ ဆာလောင်မှုပြေစေခဲ့မည်ဆိုလျှင် ကိုယ်တော်၏သမာဓိကို ချိုးဖျက်ရာတွင် စာတန် အောင်မြင်သွားလိမ့်မည်။ ယေရှုသည် ဝိညာဉ်ရေးရာများကို ရှေးရှု၍ တိကျပြတ်သားစွာဖြင့် “‘လူသည် မုန့်အားဖြင့်သာ အသက်ကို မွေးရမည်မဟုတ်’ . . . ကျမ်းစာလာသည်” ဟုပြန်ပြောခဲ့၏။—လုကာ ၄:၄; မဿဲ ၄:၄။
ထို့နောက် စာတန်သည် သူ၏နည်းဗျူဟာကို ပြောင်းလိုက်သည်။ ယေရှုကိုးကားတင်ပြသည့် ကျမ်းချက်များကို တလွဲအသုံးပြု၍ စာတန်က ယေရှုအား ဝတ်ပြုရာအိမ်တော်၏ မြို့ရိုးမှ ခုန်ချခိုင်းခဲ့သည်။ ‘ကောင်းကင်တမန်တစ်ပါးက သင့်ကို ကာကွယ်လိမ့်မည်’ ဟုစာတန်ပြောခဲ့သည်။ ယေရှုသည် မိမိအား အာရုံစိုက်စေရန် ခမည်းတော်ထံမှ အံ့ဖွယ်နည်းဖြင့် ကာကွယ်ပေးဖို့ မတောင်းလိုခဲ့ချေ။ “သင်၏ဘုရားသခင် ထာဝရဘုရားကို သင်သည် အစုံအစမ်းမပြုရ” ဟူ၍ ယေရှုမိန့်တော်မူခဲ့သည်။—မဿဲ ၄:၅-၇; လုကာ ၄:၉-၁၂။
စာတန်အသုံးပြုခဲ့သည့် နောက်ဆုံးနည်းဗျူဟာသည် သာ၍ပင်တိုက်ရိုက်ဖြစ်၏။ တစ်ကြိမ်သာ ပျပ်ဝပ်ကိုးကွယ်လျှင် တစ်လောကလုံးနှင့် ၎င်း၏ဘုန်းစည်းစိမ်ရှိသမျှတို့ကို ပေးမည်ဟု ယေရှုနှင့် အပေးအယူပြုလုပ်ရန် သူကြိုးစားခဲ့သည်။ စာတန်၌ရှိသော အရာအားလုံးနီးပါးမျှကို ကမ်းလှမ်းလိုက်ခြင်းဖြစ်၏။ သို့ရာတွင် ယေရှုသည် မိမိခမည်းတော်၏ အဓိကရန်သူကြီးရှေ့ မည်သို့ပျပ်ဝပ်ကိုးကွယ်နိုင်မည်နည်း။ စဉ်းစား၍ပင် မရနိုင်ချေ! ယေရှုက “သင်၏ဘုရားသခင် ထာဝရဘုရားကို ကိုးကွယ်ရမည်။ ထိုဘုရားသခင်ကိုသာ ဝတ်ပြုရမည်” ဟုပြန်ပြောတော်မူ၏။—မဿဲ ၄:၈-၁၁; လုကာ ၄:၅-၈။
စာတန်သည် အဆိုပါသွေးဆောင်မှု သုံးခုစလုံး မအောင်မြင်သောအခါ “ယေရှုအထံတော်မှ ထွက်သွား၍ အခြားအဆင်ပြေသောအချိန် မရောက်မီတိုင်အောင် နေလေ၏။” (လုကာ ၄:၁၃၊ ကဘ) ယင်းက စာတန်သည် ယေရှု၏သမာဓိကို စမ်းသပ်ရန် အခွင့်ကောင်းကို အမြဲရှာကြံနေကြောင်း ထင်ရှားသည်။ နှစ်နှစ်ခွဲခန့်အကြာတွင် ယေရှုသည် သက်ရောက်အံ့ဆဲဆဲ မိမိ၏သေခြင်းအတွက် တပည့်များကို အသင့်ပြင်ဆင်ပေးစဉ် ထိုအဆင်ပြေသည့်အချိန် ရောက်ခဲ့သည်။ တမန်တော်ပေတရုက “သခင်၊ ကိုယ်တော်၌ ဤသို့မဖြစ်ပါစေနှင့်။ ဤအမှုသည် ကိုယ်တော်၌မရောက်ရာ” ဟုပြောခဲ့သည်။—မဿဲ ၁၆:၂၁၊ ၂၂။
ယေရှု၏တပည့်တစ်ဦးကိုယ်တိုင်က တလွဲဖြစ်သည့် စေတနာနှင့်ပေးခဲ့သော ထိုအကြံပြုချက်ကို ကိုယ်တော်နှစ်သက်တော်မူခဲ့သလော။ ထိုစကားများသည် ယေဟောဝါ၏အလိုတော်မဟုတ်ဘဲ စာတန်၏အလိုဆန္ဒအတိုင်းဖြစ်ကြောင်း ယေရှု ချက်ချင်းရိပ်မိခဲ့သည်။ ထိုအခါ ခရစ်တော်က “အချင်းရန်သူ၊ ငါ့နောက်သို့ ဆုတ်လော့။ သင်သည် ငါတိုက်မိ၍ လဲစရာအကြောင်းဖြစ်၏။ သင်သည် ဘုရားသခင်၏အရာကို စိတ်မစွဲလမ်း၊ လူတို့၏အရာကိုသာ စွဲလမ်းသည်” ဟုအခိုင်အမာမိန့်ဆိုခဲ့၏။—မဿဲ ၁၆:၂၃။
ယေဟောဝါကို ယေရှုစွဲစွဲမြဲမြဲချစ်သောကြောင့် စာတန်သည် ကိုယ်တော်၏သမာဓိကို မချိုးဖျက်နိုင်ခဲ့ချေ။ စာတန်ပေးနိုင်သည့် အဘယ်အရာမဆို၊ မည်မျှပြင်းထန်သော စမ်းသပ်မှုဖြစ်ပါစေ ကောင်းကင်ခမည်းတော်အပေါ် ထားရှိသည့် ယေရှု၏တည်ကြည်မှုကို အားမပျော့သွားစေနိုင်ပေ။ ကျွန်ုပ်တို့ကော၊ အခြေအနေက ကျွန်ုပ်တို့၏သမာဓိကို ဆက်စောင့်ထိန်းရန် ခက်ခဲစေသောအခါ အလားတူသန္နိဋ္ဌာန်မျိုး ချနိုင်ပါမည်လော။ ယောဘ၏အဖြစ်က ကျွန်ုပ်တို့ရင်ဆိုင်ရဖွယ်ရှိသည့် စိန်ခေါ်ချက်များကို သဘောပေါက်စေပါလိမ့်မည်။
ဆင်းရဲမှုခံရစဉ် တည်ကြည်ခြင်း
ယောဘ ကြုံတွေ့ခဲ့ရသည့်အတိုင်းပင် ဆင်းရဲခြင်းအမျိုးမျိုးကို မည်သည့်အချိန်၌မဆို ကျွန်ုပ်တို့တွေ့ကြုံနိုင်သည်။ သူသည် ကလေးဆယ်ယောက်ရှိသည့် သာယာသောအိမ်ထောင်သည်တစ်ဦးဖြစ်ပြီး ဝိညာဉ်ရေးရာ လုပ်ရိုးလုပ်စဉ်ကောင်းရှိခဲ့သူ ဖြစ်၏။ (ယောဘ ၁:၅) သို့သော် ယောဘမသိသည်မှာ ဘုရားသခင်အပေါ် သူသမာဓိစောင့်သိခြင်းသည် ကောင်းကင်တရားရုံးတွင် အငြင်းပွားစရာဖြစ်နေပြီး စာတန်က မည်သည့်နည်းဖြင့်မဆို သူ၏သမာဓိကို ချိုးဖျက်ရန် ဆုံးဖြတ်ထားခြင်းဖြစ်သည်။
ယောဘ၏ပစ္စည်းဥစ္စာများ မရှေးမနှောင်းပင် ဆုံးရှုံးခဲ့ရသည်။ (ယောဘ ၁:၁၄-၁၇) သို့ဖြစ်စေကာမူ၊ ယောဘသည် ငွေကြေးအပေါ် တစ်ခါမျှ ယုံကြည်ကိုးစားခဲ့ခြင်းမရှိသောကြောင့် သူ၏သမာဓိသည် ဤစမ်းသပ်မှုကို ကြံ့ကြံ့ခံနိုင်ခဲ့၏။ ချမ်းသာကြွယ်ဝခဲ့ချိန်ကို ယောဘပြန်ပြောင်းသတိရကာ ဤသို့ပြောခဲ့သည်– “ငါသည် ရွှေကို ကိုးစား၍. . . ငါ၌စည်းစိမ်ကြီး၍ . . . ငါဝါကြွားဝမ်းမြောက်မိသော် . . . အပြစ်ရှိ၏။ . . . အထက်အရပ်၌ ရှိတော်မူသော ဘုရားသခင်ကို ငြင်းပယ်ရာရောက်၏။”—ယောဘ ၃၁:၂၄၊ ၂၅၊ ၂၈။
ယနေ့လည်း ကျွန်ုပ်တို့ပိုင်ဆိုင်သမျှဆိုရလောက်အောင် ညတွင်းချင်း ဆုံးရှုံးသွားနိုင်ဖွယ်ရှိသည်။ ယေဟောဝါသက်သေဖြစ်သူ လုပ်ငန်းရှင်တစ်ဦးသည် ငွေအမြောက်အမြား အလိမ်ခံလိုက်ရ၍ မွဲပြာကျသွားသလောက်ဖြစ်သွားသည်။ သူက ဤသို့ပွင့်ပွင့်လင်းလင်းဝန်ခံသည်– “ကျွန်တော် နှလုံးရပ်သွားမတတ်ပဲ။ တကယ်တော့၊ ဘုရားသခင်နဲ့ဆက်ဆံရေးသာ မကောင်းခဲ့ဘူးဆိုရင် အဲဒီအတိုင်းဖြစ်မှာ။ ဘာပဲဖြစ်ဖြစ်၊ ကျွန်တော့်ဘဝမှာ ဝိညာဉ်ရေးရာတွေကို ရှေးဦးမထားခဲ့ဘူးဆိုတာကိုတော့ ဒီအတွေ့အကြုံက ကျွန်တော့်ကို သဘောပေါက်သွားစေတယ်။ ငွေရှာလို့ရတဲ့ ကျေနပ်အားရမှုက အခြားအရာအားလုံးကို လွှမ်းမိုးသွားတယ်။” ဤသက်သေခံသည် ယခု သူ၏စီးပွားရေးလုပ်ငန်းကို လျှော့ချလိုက်ပြီး ခရစ်ယာန်ဓမ္မအမှုတွင် တစ်လလျှင် နာရီ ၅၀၊ သို့မဟုတ် ထို့ထက်မက ပါဝင်ရသော အရန်ရှေ့ဆောင်တစ်ဦးအဖြစ် မှန်မှန်အမှုဆောင်လျက်ရှိသည်။ သို့ရာတွင် မိမိပစ္စည်းဥစ္စာဆုံးရှုံးခြင်းထက်ပင် ပို၍ဝမ်းနည်းကြေကွဲနိုင်စရာ တခြားပြဿနာများ ရှိပါသေးသည်။
ယောဘသည် မိမိ၏ပစ္စည်းဥစ္စာဆုံးရှုံးသွားပြီဟူသော သတင်းကို ကြား၍တွေဝေနေစဉ်ပင် ကလေးဆယ်ဦးစလုံး သေဆုံးသွားပြီဟူသော သတင်းကို ကြားရပြန်သည်။ သူက “ထာဝရဘုရား၏နာမတော်သည် မင်္ဂလာရှိစေသတည်း” ဟုအလေးအနက်ပြောဆိုနေဆဲပင်။ (ယောဘ ၁:၁၈-၂၁) အကယ်၍ ကျွန်ုပ်တို့မိသားစုမှတစ်ဦးဦး ရုတ်တရက် သေဆုံးသွားမည်ဆိုလျှင် ကျွန်ုပ်တို့၏သမာဓိကို ဆက်စောင့်ထိန်းနိုင်ပါမည်လော။ စပိန်နိုင်ငံမှ ခရစ်ယာန်ကြီးကြပ်မှူးတစ်ဦးဖြစ်သူ ဖရန်စစ္စကိုသည် ဝမ်းနည်းကြေကွဲဖွယ် ဘတ်စကားတိုက်မှုတစ်ခုတွင် သူ၏ကလေးနှစ်ဦး ဆုံးသွားရှာသည်။ သူသည် ယေဟောဝါထံ ပိုမိုရင်းနှီးစွာ ချဉ်းကပ်ပြီး ခရစ်ယာန်ဓမ္မအမှုတွင် အချိန်တိုး၍ ပါဝင်ခြင်းအားဖြင့် စိတ်သက်သာမှု ရရှိခဲ့၏။
ယောဘသည် သူ၏ကလေးများ သေဆုံးသွားသည့် သတင်းဆိုးကို ကြားရပြီးနောက်၌ပင် သူ၏စိတ်ချောက်ချားဖွယ် စမ်းသပ်မှုများသည် မပြီးဆုံးသေးချေ။ စာတန်သည် သူ့အား ရွံရှာဖွယ်ကောင်းပြီး နာကျင်သောရောဂါ ရစေခဲ့သည်။ ထိုအချိန်တွင် ဇနီးက ယောဘကို မကောင်းသောအကြံပေးခဲ့၏။ သူက “ဘုရားသခင်ကို စွန့်ပယ်၍ သေလော့” ဟုတိုက်တွန်းခဲ့သည်။ ယောဘသည် ဇနီး၏အကြံပြုချက်ကို လျစ်လျူရှုပြီး “နှုတ်ဖြင့်မျှ မမှားယွင်း” ခဲ့ချေ။ (ယောဘ ၂:၉၊ ၁၀) သူ၏သမာဓိသည် မိသားစု၏ထောက်မမှုအပေါ် မမူတည်ဘဲ ယေဟောဝါနှင့် နှစ်ကိုယ်ကြားဆက်ဆံရေးအပေါ် မူတည်ခဲ့၏။
လွန်ခဲ့သောဆယ်နှစ်ကျော်က မိမိ၏ခင်ပွန်းနှင့် သားကြီးသည် ခရစ်ယာန်လမ်းစဉ်ကို စွန့်ခွာခဲ့ရာ ဖလော်ရာအနေနှင့် ယောဘ၏ခံစားချက်များကို သဘောပေါက်နားလည်၏။ “မိသားစုရဲ့ အားပေးကူညီမှု ရုတ်တရက်မရတော့တဲ့အခါ တကယ်ပင်စိတ်ထိခိုက်တယ်” ဟုသူဝန်ခံ၏။ “ဒါပေမဲ့ ယေဟောဝါအဖွဲ့အစည်းရဲ့အပြင်မှာ ပျော်ရွှင်မှုရနိုင်မှာ မဟုတ်ဘူးဆိုတာ ကျွန်မသိတယ်။ ဒါကြောင့် ဇနီးကောင်း၊ မိခင်ကောင်းဖြစ်ဖို့ ဆက်ကြိုးစားနေရင်း အခိုင်အမာရပ်တည်ပြီး ယေဟောဝါကို ရှေးဦးထားခဲ့တယ်။ ကျွန်မအမြဲဆုတောင်းတယ်၊ ဒါကြောင့်လည်း ကျွန်မကို ယေဟောဝါ ခွန်အားပေးခဲ့တယ်။ ကျွန်မခင်ပွန်းက အကြီးအကျယ်အတိုက်အခံလုပ်တဲ့ကြားကနေ ယေဟောဝါကို ကျွန်မ လုံးလုံးလျားလျားမှီခိုအားထားလို့ ကျွန်မ ပျော်နိုင်တာပေါ့။”
ယောဘ၏သမာဓိကို ချိုးဖျက်ရန် စာတန်၏နောက်ထပ်အကြံအစည်တစ်ခုမှာ ယောဘ၏သူငယ်ချင်းသုံးဦးနှင့် ပတ်သက်သည်။ (ယောဘ ၂:၁၁-၁၃) ယောဘကို သူတို့စတင်ဝေဖန်အပြစ်တင်သောအခါ တကယ်ပင်စိတ်အနှောင့်အယှက်ဖြစ်ခဲ့မည်။ သူတို့၏အကြောင်းပြချက်များကို ယောဘသာ လက်ခံခဲ့မည်ဆိုလျှင် ယေဟောဝါဘုရားသခင်အပေါ် သူ၏ယုံကြည်စိတ်ချမှု ပျောက်ဆုံးသွားပေမည်။ သူတို့၏စိတ်ပျက်စရာ အကြံပြုချက်များသည် ယောဘ၏စိတ်ပိုင်းနှင့် သမာဓိကိုပါ ချိုးဖျက်နိုင်ပြီး သို့နှင့် စာတန်၏အကြံအစည်သည် အောင်မြင်သွားလိမ့်မည်။
ထိုသို့ဖြစ်မည့်အစား၊ ယောဘက “ငါမသေမီတိုင် ကိုယ့်ကိုယ်နှိုက်မှ ကိုယ့်သမာဓိကို ငါဖယ်ရှားမည်မဟုတ်” ဟုအခိုင်အမာပြောခဲ့၏။ (ယောဘ ၂၇:၅၊ ကဘ) သူက ‘ငါ၏သမာဓိကို သင်တို့ ဖယ်ရှားခွင့်ပြုမည်မဟုတ်’ ဟုမပြောခဲ့ချေ။ မိမိ၏သမာဓိသည် မိမိအပေါ်လည်းကောင်း၊ ယေဟောဝါကို ချစ်သည့် မေတ္တာအပေါ်လည်းကောင်း မူတည်ကြောင်း ယောဘသိရှိခဲ့သည်။
သားကောင်အသစ်ကို ဖမ်းဆီးရန် ရှေးပရိယာယ်ဟောင်းတစ်ခု
မိတ်ဆွေများနှင့် ယုံကြည်သူချင်းများထံမှ မစဉ်းစားမဆင်ခြင်ပြောဆိုသည့် စကားနှင့် တလွဲညွှန်ကြားသော ဆုံးမစကားကို စာတန်အသုံးချနေသေးသည်။ အသင်းတော်အတွင်းမှ စိတ်ဓာတ်ကျစရာသည် ပြင်ပမှ ညှဉ်းပန်းနှိပ်စက်မှုထက်ပင် ကျွန်ုပ်တို့၏ယုံကြည်စိတ်ချမှုကို သာ၍လွယ်ကူစွာ အားလျော့စိတ်ပျက်သွားစေနိုင်သည်။ ယခင်က စစ်တပ်တွင် တိုက်ပွဲဝင်ခဲ့ဖူးသူ ခရစ်ယာန်အကြီးအကဲတစ်ဦးက ခရစ်ယာန်ချင်းအချို့၏ မဆင်မခြင်ပြောဆိုသော စကားများနှင့် လုပ်ရပ်များကြောင့် သူခံစားခဲ့ရသည့် စိတ်နာကြည်းမှုကို တိုက်ပွဲဝင်ခြင်းနှင့် နှိုင်းယှဉ်ခဲ့၏။ ခံစားရသောနာကြည်းမှုတိုက်ပွဲနှင့်ပတ်သက်၍ သူက “အဲ့ဒါကို ကျွန်တော်ခံရ အခက်ဆုံးပဲ” ဟုပြောခဲ့သည်။
အခြားရှုထောင့်မှကြည့်လျှင် ယုံကြည်သူချင်းများ၏ မစုံလင်မှုများကြောင့် အလွန်စိတ်အနှောင့်အယှက်ဖြစ်ပြီး အချို့သူများကို စကားမပြောသည့်အထိ၊ သို့မဟုတ် ခရစ်ယာန်အစည်းအဝေးများကိုပင် မတက်တော့သည့်အထိ ဖြစ်သွားနိုင်၏။ သို့ပြုခြင်းဖြင့် ကျွန်ုပ်တို့၏နာကြည်းမှုများကို ပြေပျောက်စေလိုခြင်းသည် အရေးအကြီးဆုံးကိစ္စ ဖြစ်စေပုံရသည်။ သို့သော် ရေရှည်ကိုမကြည့်ဘဲ အခြားသူများ၏လုပ်ရပ်ကြောင့်၊ သူတို့၏စကားကြောင့် ကျွန်ုပ်တို့၏တန်ဖိုးအရှိဆုံး ပိုင်ဆိုင်ရာဖြစ်သည့် ယေဟောဝါနှင့် ကျွန်ုပ်တို့၏ဆက်ဆံရေး လျော့ရဲသွားစေခြင်းသည် တကယ်ဝမ်းနည်းစရာပင်။ ကျွန်ုပ်တို့သည် ထိုသို့သာဖြစ်စေလျှင် စာတန်၏ရှေးပရိယာယ်ဟောင်းတစ်ခု၏ သားကောင်ဖြစ်သွားလိမ့်မည်။
ကျွန်ုပ်တို့သည် ခရစ်ယာန်အသင်းတော်တွင် မြင့်မားသောစံနှုန်းများတွေ့မည်ဟု မျှော်လင့်ထိုက်ပေသည်။ သို့သော် မစုံလင်ကြသေးသည့် ကျွန်ုပ်တို့၏ ဝတ်ပြုသူချင်းများထံမှ အဆမတန်မျှော်လင့်ကြမည်ဆိုလျှင် စိတ်ပျက်ဖို့သာ အကြောင်းရှိသည်။ ယေဟောဝါမူကား ကိုယ်တော်၏ကျေးကျွန်များထံမှ လက်တွေ့ကျကျ မျှော်လင့်တော်မူ၏။ ကိုယ်တော်၏ပုံသက်သေကို ကျွန်ုပ်တို့ တုပကြမည်ဆိုလျှင် သူတို့၏မစုံလင်မှုများကို သည်းခံနိုင်ကြမည်ဖြစ်သည်။ (ဧဖက် ၄:၂၊ ၃၂) တမန်တော်ပေါလုက ဤသို့အကြံပြုသည်– “အမျက်ထွက်ရာတွင် အပြစ်မရှိစေနှင့်။ အမျက်မပြေဘဲ နေမဝင်စေနှင့်။ [စာတန်]ကို အခွင့်မပေးကြနှင့်။”—ဧဖက် ၄:၂၆၊ ၂၇။
သမ္မာကျမ်းစာက ရှင်းရှင်းလင်းလင်းဖော်ပြထားသည့်အတိုင်း စာတန်သည် ခရစ်ယာန်တစ်ဦး၏သမာဓိကို ချိုးဖျက်ရန် ကောက်ကျစ်စဉ်းလဲသော နည်းလမ်းအမျိုးမျိုးကို အသုံးပြုသည်။ သူ၏ပရိယာယ်အချို့သည် အားနည်းသော သွေးသားအတွက် မက်မောစရာဖြစ်ပြီး တခြားပရိယာယ်များမှာမူ နာကျင်မှုပေးသည်။ အထက်ပါဆွေးနွေးချက်မှ အမြဲသတိရှိသင့်ကြောင်း သင်တွေ့ရှိနိုင်မည်။ ဘုရားသခင်ကိုချစ်သည့်စိတ် ခိုင်မြဲစွာဖြင့် စာတန်သည် မုသာကောင်ဖြစ်ကြောင်း သက်သေထူရန် သန္နိဋ္ဌာန်ချပြီး ယေဟောဝါ၏စိတ်တော်ကို ရွှင်လန်းစေပါ။ (သု. ၂၇:၁၁; ယောဟန် ၈:၄၄) ကျွန်ုပ်တို့သည် မည်သည့်စမ်းသပ်မှုမဆို ခံရပါစေ၊ စစ်မှန်သောခရစ်ယာန်သမာဓိကို ဘယ်သောအခါမျှ မချိုးဖျက်သင့်ကြောင်း အမြဲသတိရပါ။
[အောက်ခြေမှတ်ချက်]
^ အပိုဒ်၊ 11 မူရင်းဂရိစကားလုံးကို “လိမ္မာပါးနပ်သောပရိယာယ်” ဟုလည်း ဘာသာပြန်ဆိုနိုင်ကြောင်း ကျမ်းစာပညာရှင် ဒဗလျူ. အီး. ဗိုင်းကဆို၏။