“ထိုသူဟောပြောသကဲ့သို့ အဘယ်သူမျှမဟောစဖူးပါ”
“ထိုသူဟောပြောသကဲ့သို့ အဘယ်သူမျှမဟောစဖူးပါ”
“ထိုသူအပေါင်းတို့သည် ကိုယ်တော်ကိုဝန်ခံ၍၊ တင့်တယ်လျောက်ပတ်သောနှုတ်ထွက်စကားကို အံ့သြချီးမွမ်း . . . ကြ၏။”—လုကာ ၄:၂၂။
၁၊ ၂။ (က) ယေရှုအား ဖမ်းဆီးရန် စေလွှတ်ခံရသည့် မင်းလုလင်များသည် အဘယ်ကြောင့် လက်ချည်းသက်သက် ပြန်လာခဲ့ကြသည်။ (ခ) မင်းလုလင်များသာ ယေရှု၏သွန်သင်ချက်ကို စွဲမှတ်ခဲ့ကြခြင်းမဟုတ်ကြောင်း အဘယ်အရာက ဖော်ပြသနည်း။
မင်းလုလင်တို့သည် သူတို့၏တာဝန်ကို ပျက်ကွက်ခဲ့ကြသည်။ ယေရှုခရစ်အား ဖမ်းဆီးရန် စေလွှတ်ခံရကြသော်လည်း သူတို့လက်ချည်းပြန်လာခဲ့ကြ၏။ ယဇ်ပုရောဟိတ်မင်းတို့နှင့် ဖာရိရှဲတို့က “အဘယ်ကြောင့် သူ့ကိုမဆောင်ခဲ့ကြသနည်း” ဟုရှင်းပြစေခဲ့ကြသည်။ မှန်ပါသည်၊ ကာယရေးအရခုခံကာကွယ်မှု မပြုသည့် လူတစ်ဦးကို အဘယ်ကြောင့် မင်းလုလင်တို့ မဖမ်းဆီးခဲ့ရသနည်း။ မင်းလုလင်တို့က “ထိုသူဟောပြောသကဲ့သို့ အဘယ်သူမျှမဟောစဖူးပါ” ဟူ၍ရှင်းပြသည်။ သူတို့သည် ယေရှု၏သွန်သင်ချက်ကို မည်မျှစွဲမှတ်သွားသနည်းဟူမူ ဤအေးဆေးသောသူအား ထိန်းသိမ်းချုပ်နှောင်ဖို့ သူတို့မတတ်နိုင်ခဲ့ကြချေ။ *—ယောဟန် ၇:၃၂၊ ၄၅၊ ၄၆။
၂ ထိုမင်းလုလင်များသာ ယေရှု၏သွန်သင်ချက်ကို စွဲမှတ်ခဲ့ကြသည်မဟုတ်ချေ။ လူမြောက်မြားစွာသည် ကိုယ်တော့်ဟောပြောချက်ကို ကြားနာရန် ကိုယ်တော့်ထံစုဝေးခဲ့ကြသည်ဟု သမ္မာကျမ်းစာက ဆို၏။ ကိုယ်တော့်ဇာတိမြို့ရှိလူတို့သည် “တင့်တယ်လျောက်ပတ်သောနှုတ်ထွက်စကားကို အံ့သြချီးမွမ်း” ခဲ့ကြသည်။ (လုကာ ၄:၂၂) ကိုယ်တော်သည် ဂါလိလဲပင်လယ်ကမ်းခြေတွင် စုဝေးခဲ့ကြသော လူအုပ်ကြီးကို တစ်ကြိမ်ထက်မက လှေပေါ်မှဟောပြောခဲ့သည်။ (မာကု ၃:၉; မာကု ၄:၁; လုကာ ၅:၁-၃) တစ်ကြိမ်တွင် ‘လူအုပ်ကြီး’ သည် အစာမစားဘဲ ကိုယ်တော်နှင့်အတူ ရက်နှင့်ချီ၍ နေခဲ့ကြသည်။—မာကု ၈:၁၊ ၂။
၃။ ယေရှုသည် ဤမျှထူးခြားထင်ရှားသောသွန်သင်သူဖြစ်ရသည့် အဓိကအကြောင်းရင်းကား အဘယ်နည်း။
၃ အဘယ်အရာက ယေရှုအား ထူးခြားထင်ရှားသောသွန်သင်သူ ဖြစ်စေခဲ့သနည်း။ အဓိကအကြောင်းရင်းမှာ ချစ်ခြင်းမေတ္တာဖြစ်သည်။ * ကိုယ်တော်သည် မိမိဟောပြောသည့် အမှန်တရားများကို ချစ်မြတ်နိုးပြီး မိမိသွန်သင်ပေးသည့်လူတို့ကိုပါ ချစ်ခဲ့သည်။ ထို့အပြင် ယေရှုသည် သွန်သင်နည်းများကို အံ့သြဖွယ်ကောင်းလောက်အောင် အမိအရအသုံးချနိုင်စွမ်းလည်းရှိတော်မူ၏။ ဤလထုတ်လေ့လာရန်ဆောင်းပါးများတွင် ကိုယ်တော်အသုံးပြုခဲ့သည့် ထိရောက်သောနည်းလမ်းတချို့နှင့် ယင်းတို့ကို မည်သို့တုပနိုင်ကြောင်း ကျွန်ုပ်တို့ဆွေးနွေးသွားပါမည်။
ရိုးရှင်းမှု
၄၊ ၅။ (က) ယေရှုသည် သွန်သင်ရာတွင် ရိုးစင်းသောအသုံးအနှုန်းကို အဘယ်ကြောင့် အသုံးပြုခဲ့သနည်း၊ ထိုသို့ကိုယ်တော်ပြုခြင်းသည် အဘယ်ကြောင့် ထူးခြားသနည်း။ (ခ) ယေရှုသွန်သင်ပုံနှင့်ပတ်သက်၍ တောင်ပေါ်တရားတော်သည် ရိုးရှင်းသည့်နမူနာတစ်ရပ် မည်သို့ဖြစ်သနည်း။
၄ ပညာတတ်များသည် ပရိသတ်လိုက်မမီသည့် စကားလုံးများကို သုံးနှုန်းတတ်ကြသည်မှာ အဆန်းမဟုတ်ချေ။ သို့သော် ကျွန်ုပ်တို့၏စကားကို အခြားသူနားမလည်နိုင်လျှင် ကျွန်ုပ်တို့၏အသိပညာမှ သူတို့မည်သို့အကျိုးခံစားနိုင်ပါမည်နည်း။ သွန်သင်သူတစ်ဦးအနေနှင့် ယေရှုသည် အခြားသူများ လိုက်မမီသည့်စကားများကို ဘယ်သောအခါမျှ မပြောဆိုခဲ့ချေ။ ကိုယ်တော် သဘောရှိအသုံးပြုနိုင်ခဲ့သည့် ဝေါဟာရအတိုင်းအတာကို စဉ်းစားကြည့်ပါ။ ကိုယ်တော်သည် အသိပညာအလွန်ကြွယ်ဝလင့်ကစား မိမိအတွက်မဟုတ်ဘဲ ပရိသတ်ကိုထည့်တွက်ပေးခဲ့သည်။ ထိုသူများစွာတို့သည် “လူတတ်မဟုတ်၊ လူသာမညသာဖြစ်” ကြကြောင်းကို ကိုယ်တော်သိတော်မူ၏။ (တမန်တော် ၄:၁၃) ဤသူတို့ကိုထိမိဖို့ နားလည်နိုင်သည့်အသုံးအနှုန်းကို ကိုယ်တော်သုံးစွဲခဲ့သည်။ စကားလုံးများမှာ ရိုးရှင်း၏၊ သို့သော် ယင်းတို့ဖော်ပြသော အမှန်တရားများသည် အမြော်အမြင်ကြီးမားလှသည်။
၅ ဥပမာ၊ မဿဲ ၅:၃–၇:၂၇ တွင်မှတ်တမ်းတင်ထားသော တောင်ပေါ်တရားတော်ကို သုံးသပ်ကြည့်ပါ။ ထိုတရားကို ယေရှုဟောဖို့ မိနစ် ၂၀ ခန့်မျှသာ ကြာခဲ့ပေမည်။ သို့တိုင် ယင်းသွန်သင်ချက်များသည် အလွန်နက်ရှိုင်း၍ သူ့သားအိမ်ရာပြစ်မှားခြင်း၊ ကွာရှင်းခြင်းနှင့် ဥစ္စာပစ္စည်းကိုအဓိကထားခြင်း အစရှိသောအကြောင်းများ၏ရင်းမြစ်ထိတိုင် ရောက်သည်။ (မဿဲ ၅:၂၇-၃၂; မဿဲ ၆:၁၉-၃၄) သို့ရာတွင် ရှုပ်ထွေးသည့် သို့မဟုတ် ကြီးကျယ်သည့် အသုံးအနှုန်းများ မပါရှိချေ။ စင်စစ်အားဖြင့် ကလေးတစ်ယောက် အလွယ်တကူနားမလည်နိုင်သည့် စကားလုံးတစ်လုံးမျှပင် မပါရှိချေ! ထို့ကြောင့် ကိုယ်တော် ဟောပြောပြီးနောက်—လယ်သမားများ၊ သိုးထိန်းများနှင့် တံငါသည်များစွာတို့ ပါဝင်နိုင်ဖွယ်ရှိသော—လူအုပ်သည် “ဆုံးမ [သွန်သင်] ခြင်းကို အလွန်အံ့သြကြ၏။”—မဿဲ ၇:၂၈။
၆။ ရိုးရှင်းသော်လည်း အဓိပ္ပာယ်ကြွယ်ဝသော စကားများကို ယေရှုပြောဆိုခဲ့သည့် ဥပမာတစ်ခုဖော်ပြပါ။
၆ ရှင်းလင်းတိုတုတ်သည့် စကားစုများကိုအသုံးပြုလေ့ရှိကာ ရိုးရှင်းသော်လည်း အဓိပ္ပာယ်ကြွယ်ဝလှသော စကားများကို ယေရှုမိန့်မြွက်ခဲ့သည်။ ပုံနှိပ်စာအုပ်များမပေါ်မီတွင် ကိုယ်တော်သည် မိမိ၏သတင်းတရားကို ပရိသတ်၏စိတ်နှလုံးထဲ ဖျောက်ဖျက်မရအောင် ခတ်နှိပ်ပေးခဲ့၏။ ဥပမာအချို့ကို သတိပြုပါ– “အဘယ်သူမျှ သခင်နှစ်ဦးအစေကို မခံနိုင်။ . . . သင်တို့သည် ဘုရားသခင်၏အစေကိုလည်းကောင်း၊ လော[က]စည်းစိမ်အစေကိုလည်းကောင်း မခံနိုင်ကြ။” “သင်တို့သည် စစ်ကြောဆုံးဖြတ်ခြင်းနှင့် ကင်းလွတ်မည်အကြောင်း သူတစ်ပါး၏အမှု၌ စစ်ကြောဆုံးဖြတ်ခြင်းကို မပြုကြနှင့်။” “[သူ] တို့၏အကျင့်ကိုထောက်သော် သူတို့၏သဘောကို သိရကြလိမ့်မည်။” “ကျန်းမာသောသူတို့သည် ဆေးသမားကိုအလိုမရှိကြ။ နာသောသူတို့သာလျှင် အလိုရှိကြ၏။” “ဓားကိုကိုင်သောသူရှိသမျှတို့သည် ဓားဖြင့်ဆုံးခြင်းသို့ရောက်ကြလိမ့်မည်။” “ကဲသာဘုရင်၏ဥစ္စာကို ကဲသာဘုရင်အားဆက်ပေးကြလော့။ ဘုရားသခင်၏ဥစ္စာကိုကား၊ ဘုရားသခင်အားဆက်ပေးကြလော့။” “ခံယူခြင်းထက်ပေးကမ်းခြင်း၌ ပျော်ရွှင်မှုသာ၍ရှိ၏။” * (မဿဲ ၆:၂၄; ၇:၁၊ ၂၀; ၉:၁၂; ၂၆:၅၂; မာကု ၁၂:၁၇; တမန်တော် ၂၀:၃၅၊ ကဘ) ယင်းတို့ကို ယေရှုမိန့်ဆိုခဲ့သည်မှာ နှစ်ပေါင်း ၂၀၀၀ နီးပါးကြာညောင်းခဲ့ပြီဖြစ်သည့် ယနေ့အချိန်အထိ အဆိုပါ ထိမိလှသောစကားများကို အလွယ်တကူမှတ်မိနိုင်ဆဲပင်။
မေးခွန်းများအသုံးပြုခြင်း
၇။ ယေရှုသည် အဘယ်ကြောင့် မေးခွန်းများ မေးခဲ့သနည်း။
၇ ယေရှုသည် မေးခွန်းများကို အထူးတလည် အသုံးပြုခဲ့သည်။ လိုရင်းပြောလိုက်လျှင် အချိန်ကုန်သက်သာမည်ဖြစ်လျက်နှင့်ပင် မေးခွန်းများကို ကိုယ်တော်မကြာခဏ အသုံးပြုလေ့ရှိသည်။ သို့ဖြစ်လျှင် မေးခွန်းများကို ကိုယ်တော် အဘယ်ကြောင့် အသုံးပြုခဲ့သနည်း။ ကိုယ်တော်သည် ဆန့်ကျင်သူများ၏ ရည်ရွယ်ချက်ကိုထုတ်ဖော်ရန် ထိုးနှက်မေးခွန်းများကို အခါအားလျော်စွာ အသုံးပြုခဲ့၏၊ ဤနည်းအားဖြင့် သူတို့ကို နှုတ်ဆိတ်စေခဲ့သည်။ (မဿဲ ၁၂:၂၄-၃၀; ၂၁:၂၃-၂၇; ၂၂:၄၁-၄၆) သို့ရာတွင် ကိစ္စအတော်များများ၌ အမှန်တရားကိုပြောပြရန်၊ ပရိသတ်၏နှလုံးတွင် အဘယ်အရာရှိကြောင်းကို ဖော်ထုတ်ရန်၊ တပည့်များ၏တွေးတောမှုကို လေ့ကျင့်ပေးရန် အချိန်ယူ၍ မေးခွန်းများမေးခဲ့၏။ တမန်တော်ပေတရုနှင့်ပတ်သက်သည့် ဥပမာနှစ်ခုကို ဆန်းစစ်ကြည့်ကြစို့။
၈၊ ၉။ ဝတ်ပြုရာအိမ်တော်အခွန် ပေးရမည့်ကိစ္စနှင့်ပတ်သက်၍ ပေတရု အဖြေမှန်ရရှိရန် မေးခွန်းများကို ယေရှုမည်သို့အသုံးပြုခဲ့သနည်း။
၈ ပထမအနေနှင့် ဝတ်ပြုရာအိမ်တော်အခွန်ကို ယေရှုပေးမပေး ပေတရုအား အခွန်ခံများက မေးမြန်းခဲ့ခြင်းကို ပြန်သတိရပါ။ * ရံဖန်ရံခါ စိတ်လိုက်မာန်ပါပြုမူတတ်သည့် ပေတရုက “ပေးပါသည်” ဟုဖြေဆိုခဲ့သည်။ သို့ရာတွင် ခဏကြာပြီးနောက် သူ့အား ယေရှုက ဤသို့ကျိုးကြောင်းဆင်ခြင်ပြခဲ့သည်– “‘အချင်းရှိမုန်၊ သင်သည် အဘယ်သို့ထင်သနည်း။ လောကီရှင်ဘုရင်တို့သည် အဘယ်သူမှာ အခွန်ကိုခံကြသနည်း။ မိမိသားမှာခံကြသလော။ သူတစ်ပါးမှာခံကြသလော’ ဟုမေးတော်မူလျှင်၊ ပေတရုက ‘သူတစ်ပါးမှာခံကြပါသည်’ ဟုလျှောက်သော်၊ ယေရှုကလည်း ‘သို့ဖြစ်လျှင် သားမူကား လွတ်ရ၏။’” (မဿဲ ၁၇:၂၄-၂၇) ယေရှုမေးသည့်မေးခွန်းများ၏ဆိုလိုရင်းကို ပေတရု နားလည်ခဲ့ပေမည်။ အဘယ်ကြောင့်နည်း။
၉ ယေရှုလက်ထက်၌ ဧကရာဇ်မင်း၏မိသားစုသည် အခွန်ကင်းလွတ်ခွင့်ရကြောင်း သိရှိကြသည်။ ထို့ကြောင့် ဝတ်ပြုရာအိမ်တော်တွင် ကိုးကွယ်ကြသည့် ကောင်းကင်ဘုရင်၏ တစ်ပါးတည်းသောသားတော်အနေနှင့် ယေရှုသည် အခွန်ပေးစရာမလိုချေ။ ပေတရုအား အဖြေမှန်ကိုပြောလိုက်ရုံပြုမည့်အစား အဖြေမှန်ကို ပေတရုသိရှိစေရန် ယေရှုသည် ထိရောက်ညင်သာစွာ မေးခွန်းများအသုံးပြုခဲ့ခြင်းဖြစ်ကြောင်း သတိပြုပါ၊ သို့နှင့် စကားမပြောဆိုမီ ပို၍ဂရုတစိုက်တွေးတောရန် လိုအပ်ကြောင်း သဘောပေါက်စေခဲ့သည်။
၁၀၊ ၁၁။ စီ.အီး. ၃၃ ပသခါပွဲညတွင် လူတစ်ဦး၏နားရွက်ကို ပေတရု ခုတ်ဖြတ်လိုက်သောအခါ ယေရှုမည်သို့တုံ့ပြန်ခဲ့သနည်း၊ မေးခွန်းများ၏တန်ဖိုးကို ယေရှုသဘောပေါက်ကြောင်း ယင်းက မည်သို့ဖော်ပြသနည်း။
၁၀ ဒုတိယဥပမာမှာ စီ.အီး. ၃၃ ပသခါပွဲညမှ အဖြစ်အပျက်တစ်ခုဖြစ်သည်၊ ထိုအချိန်တွင် ယေရှုကိုဖမ်းဆီးရန် လူအုပ်ရောက်လာသည်။ တပည့်များက ယေရှုအတွက် ကာကွယ်တိုက်ခိုက်ပေးသင့်မသင့် ကိုယ်တော်အား မေးမြန်းခဲ့ကြသည်။ (လုကာ ၂၂:၄၉) အဖြေကိုစောင့်မနေဘဲ ပေတရုသည် လူတစ်ဦး၏နားရွက်ကို ဓားဖြင့်ခုတ်ဖြတ်ခဲ့သည် (ထိုထက်မက သူထိခိုက်စေလိုခဲ့ပေမည်)။ ထိုအချိန်တွင် ပေတရုသည် သူ၏သခင်အလိုတော်နှင့်ဆန့်ကျင်၍ ပြုမူခဲ့၏၊ အကြောင်းမှာ ယေရှုသည် အဖမ်းခံရန် လုံးလုံးပြင်ဆင်ထားပြီးဖြစ်သည်။ ယေရှု မည်သို့တုံ့ပြန်ခဲ့သနည်း။ ယေရှုသည် စိတ်ရှည်မြဲရှည်စွာ ပေတရုအား မေးခွန်းသုံးခုမေးခဲ့သည်– “ခမည်းတော်သည် ငါ့အားပေးတော်မူသောခွက်ကို ငါမသောက်ရာသလော။” “ယခုပင် ငါ့အဘကိုငါတောင်းနိုင်သည်ကိုလည်းကောင်း၊ တောင်းလျှင် ကောင်းကင်တမန်တစ်ဆယ့်နှစ်တပ်မက ငါ့ထံသို့စေလွှတ်တော်မူသည်ကိုလည်းကောင်း သင်သည်မထင်သလော။ သို့ဖြစ်လျှင် ဤသို့သောအမှုအရာတို့သည် ဖြစ်ရမည်ဟူသောကျမ်းစာအချက်သည် အဘယ်သို့ပြည့်စုံအံ့နည်း။”—ယောဟန် ၁၈:၁၁; မဿဲ ၂၆:၅၂-၅၄။
၁၁ ထိုမှတ်တမ်းကို တစ်ခဏမျှ ပုံဖော်ကြည့်ပါ။ ဒေါသအမျက်စူးရှနေသော လူအုပ်၏ ဝန်းရံမှုခံနေရသူ ယေရှုအနေဖြင့် မကြာမီ မိမိသေရတော့မည်ဖြစ်ပြီး ခမည်းတော်၏နာမတော် သံသယကင်းရှင်းခြင်းနှင့် လူ့မိသားစု၏ ကယ်တင်ခြင်းတို့မှာ မိမိအပေါ်မူတည်နေကြောင်း ကိုယ်တော်သိတော်မူသည်။ သို့တိုင် ကိုယ်တော်သည် ထိုအချိန်အခါတွင်ပင် အချိန်ယူပြီး အမှန်တရားကို ပေတရုစွဲမှတ်သွားစေရန် မေးခွန်းများမေးခဲ့သည်။ မေးခွန်းမေးခြင်း၏တန်ဖိုးကို ယေရှုသဘောပေါက်ကြောင်း ထင်ရှားသည်မဟုတ်လော။
ကွင်းကွင်းကွက်ကွက်ပေါ်သော တမင်ရည်ရွယ်ချဲ့ကားပြောဆိုခြင်း
၁၂၊ ၁၃။ (က) တမင်ရည်ရွယ်ချဲ့ကားပြောဆိုခြင်းဟူသည် အဘယ်နည်း။ (ခ) ယေရှုသည် ကျွန်ုပ်တို့ညီအစ်ကိုများ၏ အသေးအမွှားအမှားများကို ပြစ်တင်ဝေဖန်ခြင်း၏မိုက်မဲမှုကို တမင်ရည်ရွယ်ချဲ့ကားပြောဆိုခြင်းဖြင့် မည်သို့အလေးပေးဖော်ပြသနည်း။
၁၂ ယေရှုသည် မိမိ၏ခရစ်ယာန်ဓမ္မအမှုတွင် အခြားထိရောက်သောသွန်သင်နည်းဖြစ်သည့် တမင်ရည်ရွယ်ချဲ့ကားပြောဆိုခြင်းကို အသုံးပြုလေ့ရှိသည်။ ယင်းသည် လေးနက်စေရန်ရည်စူး၍ ချဲ့ကားပြောဆိုခြင်းဖြစ်၏။ ယေရှုသည် တမင်ရည်ရွယ်ချဲ့ကားပြောဆိုခြင်းဖြင့် မေ့ရခက်သောရုပ်လုံးများကို စိတ်တွင်ပေါ်စေခဲ့သည်။ ပုံဥပမာအချို့ကို သုံးသပ်ကြည့်ကြစို့။
၁၃ သူတစ်ပါးအား ‘စစ်ကြောဆုံးဖြတ်ခြင်းမပြု’ ရကြောင်းကို တောင်ပေါ်တရားတော်တွင် အလေးအနက်ဖော်ပြသောအခါ ယေရှုက ဤသို့ဆိုခဲ့သည်– “ကိုယ်မျက်စိ၌ရှိသောတံကျင်ကိုမအောက်မေ့ဘဲ ညီအစ်ကိုမျက်စိ၌ရှိသောငြောင့်ငယ်ကို အဘယ်ကြောင့်ကြည့်ရှုသနည်း။” (မဿဲ ၇:၁-၃) သင်မြင်ယောင်ကြည့်နိုင်သလော။ ပြစ်တင်ဝေဖန်တတ်သူတစ်ဦးသည် မိမိညီအစ်ကို “မျက်စိ” မှငြောင့်ငယ်ကို ထုတ်ပေးရန်အလိုရှိ၏။ မိမိညီအစ်ကိုသည် လက်သင့်ခံနိုင်ဖွယ်စီရင်ချက်များချရန် အကြောင်းခြင်းရာများကို ရှင်းလင်းပြတ်သားစွာမမြင်ဟု ပြစ်တင်ဝေဖန်တတ်သူက ဆိုပေမည်။ သို့သော် ပြစ်တင်ဝေဖန်သူကိုယ်တိုင်၏ စီရင်ဆုံးဖြတ်နိုင်စွမ်းမှာ “တံကျင်” တစ်ခုကြောင့် ပျက်ယွင်းနေ၏။ ကျွန်ုပ်တို့ကိုယ်တိုင် ကြီးလေးသောအမှားများရှိလျက်ပင် ညီအစ်ကိုများ၏ အသေးအမွှားအမှားများကို ပြစ်တင်ဝေဖန်ခြင်းသည် အမှန်ပင်မိုက်မဲကြောင်း အလေးအနက်ပေါ်လွင်စေသည့် မေ့ပျောက်မရသောနည်းပါတကား!
၁၄။ ခြင်မပါစေခြင်းငှာ စစ်လျက်နှင့် ကုလားအုတ်ကိုကား မျိုချကြ၏ဟူသည့် ယေရှု၏စကားများသည် အဘယ်ကြောင့် အလွန်ထိရောက်သည့် ချဲ့ကားပြောဆိုသည့်အလင်္ကာ ဖြစ်သနည်း။
၁၄ နောက်တစ်ကြိမ်တွင် ယေရှုသည် ဖာရိရှဲများအား “လမ်းပြသောလူကန်းတို့၊ သင်တို့သည် ခြင်တစ်ကောင်ကိုမျှမပါစေခြင်းငှာ ရေကိုစစ်လျက်နှင့် ကုလားအုတ်ကိုမျိုကြ၏” ဟုပြစ်တင်ရှုတ်ချခဲ့သည်။ (မဿဲ ၂၃:၂၄) ယင်းသည် အထူးထိရောက်သည့် ချဲ့ကားပြောဆိုသည့်အလင်္ကာဖြစ်၏။ အဘယ်ကြောင့်နည်း။ အလွန်သေးငယ်သောခြင်တစ်ကောင်နှင့် အကြီးမားဆုံးတိရစ္ဆာန်အဖြစ် ယေရှု၏ပရိသတ်သိထားသည့် ကုလားအုတ်တစ်ကောင်ကို နှိုင်းယှဉ်ခြင်းမှာ ထူးခြားလှ၏။ ပျမ်းမျှကုလားအုတ်တစ်ကောင်၏ အလေးချိန်နှင့်ညီမျှရန် ခြင်အကောင်ပေါင်းသန်း ၇၀ ခန့်လိုအပ်လိမ့်မည်ဟု ခန့်မှန်းကြသည်! ထို့အပြင် ဖာရိရှဲများသည် ၎င်းတို့၏စပျစ်ရည်ကို အဝတ်ဖြင့်စစ်ကြကြောင်း ယေရှုသိထား၏။ စည်းကမ်းကြီးသည့် ထိုသူတို့သည် ခြင်တစ်ကောင်ကိုမျိုမိသောကြောင့် မစင်မကြယ်ဖြစ်လာမည်ကိုစိုးရိမ်ကြ၍ ထိုသို့ပြုကြသည်။ သို့တိုင် သူတို့သည် မစင်ကြယ်သည့် ကုလားအုတ်ကို ပုံဆောင်သဘောအရ မျိုကြ၏။ (ဝတ်ပြုရာ ၁၁:၄၊ ၂၁-၂၄) ယေရှု၏ဆိုလိုရင်းကား ရှင်းနေပါသည်။ ဖာရိရှဲများသည် အသေးငယ်ဆုံး ပညတ်ချက် တောင်းဆိုရာကို စိုးရိမ်တကြီးလိုက်နာကြသော်လည်း ပို၍ကြီးလေးသောကိစ္စများဖြစ်သည့် “တရားသဖြင့်စီရင်ခြင်း၊ သူတစ်ပါးကိုသနားခြင်း၊ [တည်ကြည်] ခြင်း” တို့ကိုမူကား လျစ်လျူရှုခဲ့ကြသည်။ (မဿဲ ၂၃:၂၃) သူတို့သည် မည်သို့သောလူစားမျိုးဖြစ်ကြောင်းကို ယေရှုရှင်းရှင်းလင်းလင်း ဖော်ထုတ်ခဲ့သည်တကား!
၁၅။ ချဲ့ကားပြောဆိုခြင်းအလင်္ကာကို အသုံးပြုခြင်းဖြင့် ယေရှုသွန်သင်ခဲ့သည့် သင်ခန်းစာအချို့ကား အဘယ်နည်း။
၁၅ ယေရှုသည် မိမိ၏ခရစ်ယာန်ဓမ္မအမှုတစ်လျှောက် ချဲ့ကားပြောဆိုသည့်အလင်္ကာကို အသုံးပြုခဲ့သည်။ ဥပမာတချို့ကို သုံးသပ်ကြည့်ပါ။ တောင်တစ်တောင်ကို ရွှေ့နိုင်သော “[သေးငယ်လှသည့်] မုန်ညင်းစေ့ခန့်မျှလောက်သာ ယုံကြည်ခြင်း” အကြောင်းဖြင့် အနည်းငယ်သော ယုံကြည်ခြင်းသည်ပင် များစွာအကျိုးရှိကြောင်း ယေရှုပေါ်လွင်စေခဲ့ခြင်းသည် အထိရောက်ဆုံးဥပမာပင်ဖြစ်ပေမည်။ (မဿဲ ၁၇:၂၀) အပ်နဖားထဲ လျှိုဝင်ဖို့ကြိုးစားနေသည့် ကုလားအုတ်ကြီးတစ်ကောင်ဥပမာသည် ပစ္စည်းဥစ္စာကိုအဓိကထားသည့် ဘဝပုံစံကိုစွဲကိုင်ထားလျက် ဘုရားသခင်အား ဝတ်ပြုရန်ကြိုးစားသည့် သူကြွယ်တစ်ဦး၏အခက်အခဲကို ကောင်းစွာပုံဖော်သည်တကား! (မဿဲ ၁၉:၂၄) ယေရှု၏ပြောင်မြောက်လှသည့် တင်စားချက်များနှင့် စကားလုံးနည်းနည်းဖြင့် အကျိုးအများဆုံးသက်ရောက်စေနိုင်သည့် ကိုယ်တော့်စွမ်းရည်ကို သင်မအံ့သြပေလော။
ငြင်းမရနိုင်အောင် ဆင်ခြင်တုံတရား
၁၆။ ယေရှုသည် မိမိ၏ထက်မြက်သောဉာဏ်စွမ်းများကို အဘယ်နည်းဖြင့် အမြဲအသုံးပြုလေ့ရှိသနည်း။
၁၆ ယေရှုသည် မိမိ၏စုံလင်သောစိတ်ကို အသုံးပြုကာ လူတို့နှင့် အလွန်ကျွမ်းကျင်စွာ ကျိုးကြောင်းဆင်ခြင်နိုင်ခဲ့သည်။ သို့သော်လည်း ဤစွမ်းရည်ကို ဘယ်သောအခါမျှ တလွဲအသုံးမပြုခဲ့ချေ။ ကိုယ်တော်သွန်သင်ပေးရာတွင် အမှန်တရားတိုးပွားစေရန် ထက်မြက်သောစိတ်စွမ်းရည်များကို အမြဲအသုံးချခဲ့သည်။ ကိုယ်တော်သည် ဘာသာရေးအတိုက်အခံပြုသူများ၏ မှားယွင်းသည့်စွဲချက်များ ချေပရာတွင် ထိရောက်သောဆင်ခြင်တုံတရားကို ရံဖန်ရံခါ အသုံးပြုခဲ့သည်။ တပည့်များအား အရေးကြီးသည့် သင်ခန်းစာများ သွန်သင်ပေးရာတွင် ဆင်ခြင်တုံတရားနှင့်အညီ ကြိမ်ဖန်များစွာ ကျိုးကြောင်းဆင်ခြင်ခဲ့သည်။ ဆင်ခြင်တုံတရားကို ယေရှုပိုင်နိုင်စွာအသုံးပြုနိုင်ခဲ့ခြင်းကို သုံးသပ်ကြည့်ကြစို့။
၁၇၊ ၁၈။ ယေရှုသည် ဖာရိရှဲတို့၏မှားယွင်းသောစွဲချက်ကို ဆင်ခြင်တုံတရားနှင့်အညီ မည်သို့ထိရောက်စွာချေပပြောဆိုခဲ့သနည်း။
၁၇ နတ်ဆိုးစွဲ၍ မျက်စိမမြင်၊ စကားအသူတစ်ဦးအား ယေရှုကုသပေးခဲ့ချိန်ကို သုံးသပ်ကြည့်ပါ။ ယင်းသတင်းကို ကြားသည်နှင့် ဖာရိရှဲများက “ဤသူသည် နတ်ဆိုးမင်း ဗေလဇေဗုလ [စာတန်] ကိုအမှီပြု၍သာ နတ်ဆိုးတို့ကိုနှင်ထုတ်သည်” ဟူ၍ပြောဆိုခဲ့ကြသည်။ စာတန်၏နတ်ဆိုးများကို နှင်ထုတ်ရန် သာမန်လူထက် စွမ်းရည်သာလွန်ဖို့လိုကြောင်း ဖာရိရှဲများ ဝန်ခံခဲ့ကြသည်ကို သတိပြုပါ။ သို့ရာတွင် ယေရှုအား လူတို့မယုံကြည်စေရန် ကိုယ်တော့်တန်ခိုးသည် စာတန်ထံမှဖြစ်သည်ဟု ယိုးစွပ်ခဲ့ကြသည်။ ဆင်ခြင်တုံတရားနှင့်အညီ သူတို့ကောက်ချက်မချကြောင်းဖော်ပြရန် ယေရှုက ဤသို့ဖြေဆိုခဲ့သည်– “တိုင်းနိုင်ငံမည်သည်ကား၊ မိမိနှင့်မသင့်မတင့်ကွဲပြားလျှင် ပျက်စီးခြင်းသို့ရောက်လိမ့်မည်။ မြို့ရွာဖြစ်စေ၊ အိမ်ဖြစ်စေ၊ မိမိနှင့်မသင့်မတင့်ကွဲပြားလျှင် မတည်နိုင်ရာ။ စာတန်သည်လည်း စာတန်ကိုနှင်ထုတ်သည်မှန်လျှင်၊ သူသည်မိမိနှင့်ကွဲပြား၏။ သူ၏နိုင်ငံသည် အဘယ်သို့တည်နိုင်မည်နည်း။” (မဿဲ ၁၂:၂၂-၂၆) စင်စစ်အားဖြင့် ယေရှုက ဤသို့ဆိုခြင်းဖြစ်သည်– ‘သင်တို့ဆိုသကဲ့သို့ ငါသည် စာတန့်လူဖြစ်၍ စာတန့်လုပ်ရပ်ကို ချေဖျက်သည်မှန်လျှင် စာတန်သည် မိမိ၏အကျိုးစီးပွားကို ဖျက်ဆီးနေရာ မကြာမီ ကွဲပြားတော့မည်မဟုတ်တုံလော။’ အမှန်တကယ်ထိရောက်သော ဆင်ခြင်တုံတရား မဟုတ်ပေလော။
၁၈ ထို့အပြင် ယေရှုသည် ဤကိစ္စကို ထပ်၍ကျိုးကြောင်းဆင်ခြင်ခဲ့သည်။ ဖာရိရှဲအချို့သည် နတ်ဆိုးများကိုနှင်ထုတ်ခဲ့ကြောင်း ကိုယ်တော်သိမှတ်သည်။ ထို့ကြောင့် ကိုယ်တော်က ရိုးရှင်းပြီး ထိမိလှသည့် ဤမေးခွန်းကိုမေးခဲ့သည်– “ငါသည် ဗေလဇေဗုလကိုအမှီပြု၍ နတ်ဆိုးတို့ကိုနှင်ထုတ်သည်မှန်လျှင်၊ သင်တို့၏သား [သို့မဟုတ် တပည့်] တို့သည် အဘယ်သူကိုအမှီပြု၍ နှင်ထုတ်ကြသနည်း။” (မဿဲ ၁၂:၂၇) တစ်နည်းဆိုရလျှင် ယေရှုက ဤသို့ဆင်ခြေတက်ခဲ့သည်– ‘ငါသည် စာတန့်တန်ခိုးကိုအမှီပြု၍ နတ်ဆိုးတို့ကို နှင်ထုတ်သည်မှန်လျှင် သင်တို့၏တပည့်များသည်လည်း ဤတန်ခိုးကိုအမှီပြု၍ နှင်ထုတ်ခြင်းဖြစ်ရမည်။’ ထိုအခါ ဖာရိရှဲများသည် အဘယ်သို့ဖြေဆိုနိုင်မည်နည်း။ သူတို့၏တပည့်များသည် စာတန့်တန်ခိုးကိုအမှီပြု၏ဟု သူတို့ဘယ်တော့မျှ ဝန်ခံကြလိမ့်မည်မဟုတ်ချေ။ ယေရှုသည် မငြင်းဆိုနိုင်သည့်ဆင်ခြင်တုံတရားဖြင့် သူတို့၏စွဲချက်ကို ရယ်စရာဖြစ်စေခဲ့သည်။
၁၉၊ ၂၀။ (က) ယေရှုသည် ဆင်ခြင်တုံတရားကို အဘယ်အပြုသဘောပါသောနည်းဖြင့် အသုံးပြုခဲ့သနည်း။ (ခ) ဆုတောင်းနည်းသင်ပေးရန် တပည့်များ တောင်းဆိုသည့်အခါ ‘ထိုမျှမက’ ကျိုးကြောင်းဆင်ခြင်နည်းကို ယေရှုမည်သို့အသုံးပြုခဲ့သနည်း။
၁၉ ယေရှုသည် အတိုက်အခံပြုသူများကို နှုတ်ဆိတ်သွားစေရန် ဆင်ခြင်တုံတရားကို အသုံးပြုသည့်အပြင် ယေဟောဝါနှင့်ပတ်သက်သော အားရှိဖွယ်၊ နှလုံးနွေးထွေးစေသော အမှန်တရားကို သွန်သင်ပေးရန် ဆင်ခြင်တုံတရားနှင့်ညီစွာ ကျေနပ်လက်ခံလောက်သော အချေတင်ချက်များကိုလည်း အသုံးပြုခဲ့သည်။ ‘ထိုမျှမက’ ဟူသည့် ကျိုးကြောင်းဆင်ခြင်နည်းကိုလည်း ကိုယ်တော်ကြိမ်ဖန်များစွာသုံးပြီး တရားနာသူများ အကျွမ်းတဝင်ရှိထားသည့် အမှန်တရားကို သာ၍ယုံကြည်စိတ်ချစေခဲ့သည်။ ဥပမာနှစ်ခုမျှ သုံးသပ်ကြည့်ကြစို့။
၂၀ ဆုတောင်းနည်းသင်ပေးရန် တပည့်များ တောင်းဆိုသည့်အခါ ယေရှုက “အားမလျော့ဘဲတောင်း၍နေ” သောကြောင့် နောက်ဆုံးတွင် တောင်းဆိုသည့်အရာကို မကြည်ဖြူသူမိတ်ဆွေတစ်ဦးထံမှ ရရှိခဲ့သူတစ်ဦး၏ ပုံဥပမာကို ဖော်ပြခဲ့သည်။ ထို့အပြင် မိမိတို့၏သားသမီးများအား “ကောင်းသောအရာကိုပေးတတ်သည့်” မိဘများ၏စေတနာအကြောင်း ယေရှုဖော်ပြခဲ့သည်။ ထို့နောက် ကိုယ်တော်က ဤသို့နိဂုံးချုပ်ခဲ့သည်– “သင်တို့သည် အဆိုးဖြစ်လျက်ပင် ကိုယ်သားတို့အား ကောင်းသောအရာကိုပေးတတ်လျှင်၊ ထိုမျှမက ကောင်းကင်ဘုံ၌ရှိတော်မူသော သင်တို့အဘသည် ဆုတောင်းသောသူတို့အား သန့်ရှင်းသောဝိညာဉ်တော်ကို သာ၍ပေးတော်မူမည်မဟုတ်လော။” (လုကာ ၁၁:၁-၁၃) ယေရှုတင်ပြခဲ့သောအချက်သည် ဆင်တူမှုအပေါ်မဟုတ်ဘဲ ကွဲပြားခြားနားမှုအပေါ် အခြေခံသည်။ မကြည်ဖြူသောမိတ်ဆွေတစ်ဦးသည် နောက်ဆုံးတွင် မိမိအိမ်နီးချင်း တောင်းဆိုသည့်အရာကိုပေးရန် သွေးဆောင်ခံရလျှင်၊ သို့မဟုတ် မစုံလင်သောလူသားမိဘများသည် သားသမီးများ၏လိုအပ်ရာများကို ပြုစုပေးလျှင် နှိမ့်ချစွာ ဆုတောင်းသည့် တည်ကြည်သောကျေးကျွန်များအား ကျွန်ုပ်တို့၏မေတ္တာရှင် ကောင်းကင်ခမည်းတော်သည် သန့်ရှင်းသောဝိညာဉ်တော်ကို ထိုမျှမက သာ၍အမှန်တကယ်ပေးတော်မူမည်!
၂၁၊ ၂၂။ (က) ရုပ်ပစ္စည်းများအတွက် စိုးရိမ်ပူပန်မှုနှင့်စပ်လျဉ်း၍ ဆုံးမစကားပြောဆိုရာတွင် အဘယ်ကျိုးကြောင်းဆင်ခြင်မှုကို ယေရှုအသုံးပြုခဲ့သနည်း။ (ခ) ယေရှု၏သွန်သင်နည်းပညာအချို့ကို သုံးသပ်ပြီးနောက် အဘယ်ကောက်ချက်ချကြသနည်း။
၂၁ ရုပ်ပစ္စည်းများအတွက် စိုးရိမ်ပူပန်မှုနှင့်စပ်လျဉ်း၍ ဆုံးမစကားပြောဆိုရာတွင် ယေရှုသည် အလားတူကျိုးကြောင်းဆင်ခြင်မှုကို အသုံးပြုခဲ့သည်။ ကိုယ်တော်က ဤသို့ဆိုခဲ့သည်– “ကျီးကန်းများကို ကြည့်ရှုဆင်ခြင်ကြလော့။ ထိုငှက်တို့သည် မျိုးစေ့ကိုမစိုက်မကြဲ၊ စပါးကိုမရိတ်၊ စပါးကျီမရှိ၊ ဘဏ္ဍာတိုက်မရှိ။ သို့သော်လည်း ဘုရားသခင်သည် သူတို့ကိုကျွေးမွေးတော်မူ၏။ ထိုငှက်တို့ထက် သင်တို့သည် အလွန်မြတ်သည်မဟုတ်လော။ နှင်းပင်တို့သည် အဘယ်သို့သောအားဖြင့်ကြီးပွားသည်ကို ကြည့်ရှုဆင်ခြင်ကြလော့။ ထိုအပင်တို့သည် အလုပ်လည်းမလုပ်၊ ချည်ဖြစ်စေခြင်းငှာ မငင်မဝင့်။ . . . ယုံကြည်အားနည်းသောသူတို့၊ ယနေ့အသက်ရှင်လျက်၊ နက်ဖြန်မီးဖိုထဲသို့ရောက်သော တောမြက်ပင်ကို ဘုရားသခင်သည် ထိုသို့သောအဝတ်နှင့် ဖုံးလွှမ်းတော်မူလျှင်၊ ထိုမျှမက သင်တို့ကို အဝတ်နှင့်ဖုံးလွှမ်းတော်မူမည် မဟုတ်လော။” (လုကာ ၁၂:၂၄၊ ၂၇၊ ၂၈) မှန်ပါသည်၊ ယေဟောဝါသည် ငှက်များနှင့် ပန်းများကိုကြည့်ရှုစောင့်ရှောက်လျှင် မိမိ၏ကျေးကျွန်များကို ထိုမျှမကဂရုစိုက်ပေလိမ့်မည်တကား! ယင်းသို့သော ညင်သာထိရောက်သည့် ကျိုးကြောင်းဆင်ခြင်မှုသည် ယေရှုပရိသတ်၏နှလုံးကို ထိမိခဲ့မည်မှာ ဧကန်မုချပင်။
၂၂ ယေရှု၏သွန်သင်နည်းပညာအချို့ကို သုံးသပ်ပြီးနောက် “ထိုသူဟောပြောသကဲ့သို့ အဘယ်သူမျှမဟောစဖူးပါ” ဟုပြောဆိုခဲ့သည့် မင်းလုလင်တို့၏စကားသည် ချဲ့ကားပြောဆိုခြင်းမဟုတ်ကြောင်း ကျွန်ုပ်တို့အလွယ်တကူ ကောက်ချက်ချနိုင်ကြပါသည်။ သို့သော် ယေရှုအသုံးပြုခဲ့သောသွန်သင်နည်းတွင် ပုံဥပမာ သို့မဟုတ် ပုံဆောင်ချက်များကို အသုံးပြုခြင်းသည် အကျော်ကြားဆုံးဖြစ်နိုင်ဖွယ်ရှိ၏။ ဤနည်းကို အဘယ်ကြောင့် ကိုယ်တော်အသုံးပြုရသနည်း။ ကိုယ်တော့်ဥပမာများကို အဘယ်အရာက အလွန်ထိရောက်စေခဲ့သနည်း။ ဤမေးခွန်းများကို နောက်ဆောင်းပါးတွင် ဆွေးနွေးပါမည်။
[အောက်ခြေမှတ်ချက်များ]
^ အပိုဒ်၊ 1 ထိုမင်းလုလင်တို့သည် ဆဲန်ဟီဒရင်ရုံးမှကိုယ်စားလှယ်များဖြစ်ပြီး ယဇ်ပုရောဟိတ်မင်းများ၏သြဇာခံသူများ ဖြစ်နိုင်ဖွယ်ရှိသည်။
^ အပိုဒ်၊ 3 ၂၀၀၂၊ ဩဂုတ် ၁၅ ရက်ထုတ်ကင်းမျှော်စင်မှ “ငါသည် . . . ပုံသက်သေကိုပြခဲ့ပြီ” နှင့် “ငါ့နောက်သို့ အဆက်မပြတ်လိုက်လော့” ဆောင်းပါးများကိုရှု။
^ အပိုဒ်၊ 6 နောက်ဆုံးကောက်နုတ်ချက်ဖြစ်သည့် တမန်တော် ၂၀:၃၅ ကိုတမန်တော်ပေါလုတစ်ဦးတည်းကသာ ကိုးကားခဲ့သော်လည်း ဤစကားလုံး၏သဘောတရားကို ခရစ်ဝင်ကျမ်းများတွင် တွေ့ရှိရသည်။ ထိုစကားကို (ယေရှုမိန့်ဆိုခဲ့စဉ် ကြားနာခဲ့သည့် တပည့်တစ်ဦးထံမှလည်းကောင်း၊ ရှင်ပြန်ထမြောက်သည့်ယေရှုထံမှလည်းကောင်း) ပေါလုကြားခဲ့ပေမည်၊ သို့မဟုတ် ဘုရားသခင်ဖွင့်ပြခဲ့၍ သိရှိခဲ့ပေမည်။—တမန်တော် ၂၂:၆-၁၅; ၁ ကောရိန္သု ၁၅:၆၊ ၈။
^ အပိုဒ်၊ 8 ဂျူးများသည် ဝတ်ပြုရာအိမ်တော်အခွန်အဖြစ် (နှစ်ရက်စာလုပ်အားခလောက်ရှိ) ဒိဒြမ္မကို နှစ်စဉ် ပေးဆက်ရသည်။ ထိုအခွန်ငွေကိုအသုံးပြုကာ ဝတ်ပြုရာအိမ်တော်ကို ပြုပြင်ထိန်းသိမ်း၍ ထိုတွင်ဆောင်ရွက်ရသည့် လုပ်ငန်းဆောင်တာနှင့် ထိုလူမျိုးတို့အတွက် နေ့စဉ်ပူဇော်ရာယဇ်များ ပူဇော်ကြသည်။
သင်မှတ်မိသလော
• ယေရှုသည် ရှင်းလင်းပြတ်သားစွာ သွန်သင်ပေးခဲ့ကြောင်း အဘယ်ဥပမာများက ဖော်ပြသနည်း။
• ယေရှုသည် သွန်သင်ရာတွင် မေးခွန်းများကို အဘယ်ကြောင့် အသုံးပြုခဲ့သနည်း။
• တမင်ရည်ရွယ်ချဲ့ကားပြောဆိုခြင်းဟူသည် အဘယ်နည်း၊ ဤသွန်သင်နည်းကို ယေရှုမည်သို့အသုံးပြုခဲ့သနည်း။
• ယေဟောဝါနှင့်ဆိုင်သော နှစ်လိုဖွယ်အမှန်တရားကို တပည့်များအား သွန်သင်ပေးရာတွင် ထိရောက်သောဆင်ခြင်တုံတရားကို ယေရှုမည်သို့အသုံးပြုခဲ့သနည်း။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
ယေရှုသည် သာမန်လူတို့နားလည်နိုင်သည့် ရိုးစင်းသောစကားများကို ပြောဆိုခဲ့သည်
[စာမျက်နှာ ၁၀ ပါ ရုပ်ပုံ]
ဖာရိရှဲများသည် ‘ခြင်မပါစေခြင်းငှာ စစ်ကြသော်လည်း ကုလားအုတ်ကို မျိုခဲ့ကြ၏’