ယေဟောဝါသည် နာခံမှုရှိသူများကို ကောင်းချီးပေး၍ ကာကွယ်တော်မူ၏
ယေဟောဝါသည် နာခံမှုရှိသူများကို ကောင်းချီးပေး၍ ကာကွယ်တော်မူ၏
“ငါ့စကားကိုနားထောင်သောသူမူကား လုံခြုံစွာနေ၍ ဘေးကိုမကြောက်ဘဲ ငြိမ်ဝပ်လိမ့်မည်။”—သု. ၁:၃၃။
၁၊ ၂။ ဘုရားသခင်အား နာခံခြင်းသည် အဘယ်ကြောင့်အရေးကြီးသနည်း။ ဥပမာပေးပါ။
အမွေးပွပွ၊ အဝါရောင်ကြက်ပေါက်စလေးများသည် ဝေဟင်ထက် သိမ်းငှက်တစ်ကောင် ပျံဝဲနေသည်ကို လုံးလုံးသတိမမူဘဲ မြက်ပင်တိုများကြား အစာရှာဖွေစားရင်း အလုပ်ရှုပ်နေကြသည်။ မိခင်ကြက်မကြီးသည် အထိတ်တလန့်ဖြင့် ရုတ်တရက် အချက်ပေးခေါ်လိုက်ပြီး သူ၏တောင်ပံကို ဖြန့်လိုက်လေသည်။ ကြက်ပေါက်စလေးများသည် သူ့ထံအပြေးအလွှား ရောက်လာကြပြီး စက္ကန့်ပိုင်းအတွင်း အတောင်များအောက် လုံခြုံစွာပုန်းနေကြသည်။ ထိုအခါ သိမ်းငှက်သည် တိုက်ခိုက်ရန်အကြံကို ဖျက်သိမ်းလိုက်သည်။ * အဘယ်သင်ခန်းစာရသနည်း။ နာခံမှုသည် အသက်ချမ်းသာရာရစေ၏!
၂ ၎င်းသင်ခန်းစာသည် အထူးသဖြင့် မျက်မှောက်ခေတ်ခရစ်ယာန်များအတွက် အရေးပါ၏၊ အကြောင်းမှာ စာတန်သည် ဘုရားသခင့်လူမျိုးတော်ကို ဖမ်းစားဖို့ အစွမ်းကုန်ကြိုးစားလျက်ရှိသောကြောင့်ဖြစ်သည်။ (ဗျာ. ၁၂:၉၊ ၁၂၊ ၁၇) သူ၏ပန်းတိုင်မှာ ကျွန်ုပ်တို့၏ဝိညာဉ်ရေးကို ဖျက်ဆီးပစ်ပြီး ယေဟောဝါ၏မျက်နှာသာတော်နှင့် ထာဝရအသက်ရနိုင်ခွင့် ဆုံးရှုံးသွားစေရန်ဖြစ်သည်။ (၁ ပေတရု ၅:၈) သို့သော် ကျွန်ုပ်တို့သည် ဘုရားသခင်နှင့် အနီးကပ်နေပြီး ကိုယ်တော်၏နှုတ်မြွက်စကားတော်နှင့် အဖွဲ့အစည်းမှတစ်ဆင့်ရရှိသော ညွှန်ကြားချက်ကို ချက်ချင်းတုံ့ပြန်မည်ဆိုလျှင် ကိုယ်တော်၏ကာကွယ်စောင်မမှုခံရမည်ကို စိတ်ချနိုင်ကြသည်။ “အတောင်တော်အမွေးနှင့်ဖုံးအုပ်တော်မူ၍ အတောင်တော်အောက်၌ သင်သည်လုံခြုံစွာနေရလိမ့်မည်” ဟုဆာလံဆရာရေးသားခဲ့သည်။—ဆာလံ ၉၁:၄။
နာခံမှုမရှိသောလူမျိုး တိုက်ခိုက်လုယူခံရ
၃။ ဣသရေလလူမျိုးသည် ထပ်ခါတလဲ မနာခံခဲ့သည့်အတွက် အကျိုးဆက်ကား အဘယ်နည်း။
၃ ဣသရေလလူမျိုးသည် ယေဟောဝါကို နာခံခဲ့စဉ် ကိုယ်တော်သည် သူတို့ကို အမြဲဂရုစိုက်စောင့်ကြည့်တော်မူခဲ့သည်။ သို့သော်လည်း ထိုလူမျိုးသည် သူတို့၏ဖန်ဆင်းရှင်ကို ကြိမ်ဖန်များစွာ စွန့်ပြီး “ကျေးဇူးမပြု မကယ်တင်နိုင်၊ အချည်းနှီးဖြစ်သောအရာတို့” . . . ကို ကိုးကွယ်လေ့ရှိကြသည်။ (၁ ဓမ္မရာဇဝင် ၁၂:၂၁) သူတို့သည် ရာစုနှစ်ပေါင်းများစွာ ဤသို့ပုန်ကန်ကြပြီးနောက် လူမျိုးတစ်မျိုးအနေဖြင့် ပြန်၍မလှည့်လာနိုင်တော့သည့်အထိ အယူဖောက်ပြန်သွားလေသည်။ ထို့ကြောင့် ယေရှုဤသို့မြည်တမ်းခဲ့ခြင်းဖြစ်သည်– “အို ယေရုရှလင်မြို့၊ ယေရုရှလင်မြို့၊ သင်သည် ပရောဖက်တို့ကိုသတ်မြဲရှိ၏။ သင်ရှိရာသို့စေလွှတ်သောသူကိုလည်း ကျောက်ခဲနှင့်ပစ်မြဲရှိ၏။ ကြက်မသည် မိမိသားငယ်တို့ကို အတောင်အောက်၌စုရုံးသကဲ့သို့ သင်၏သားတို့ကိုစုရုံးစေခြင်းငှာ ကြိမ်ဖန်များစွာငါအလိုရှိပြီ။ သင်တို့မူကားအလိုမရှိ။ သင်တို့နေသောအိမ်သည် သင်တို့၌ လူဆိတ်ညံလျက်ရှိ၏။”—မဿဲ ၂၃:၃၇၊ ၃၈။
၄။ ယေရုရှလင်မြို့ကို ယေဟောဝါစွန့်ပယ်ခြင်းသည် စီ.အီး. ၇၀ ၌ မည်သို့ထင်ရှားလာခဲ့သနည်း။
၄ ဖောက်ပြန်သောဣသရေလလူမျိုးကို ယေဟောဝါစွန့်ပယ်တော်မူကြောင်း စီ.အီး. ၇၀ တွင် ဝမ်းနည်းဖွယ်ကောင်းလောက်အောင် သိသာထင်ရှားခဲ့သည်။ ၎င်းနှစ်တွင် ရောမစစ်တပ်သည် ၁ ဓမ္မရာဇဝင် ၁၅:၂၂။
လင်းယုန်ငှက်ရုပ် ရေးဆွဲထားသော သူတို့၏အောင်လံများကိုင်ကာ ယေရုရှလင်မြို့ထဲ ချင်းနင်းဝင်ရောက်ပြီး ရက်ရက်စက်စက် သိမ်းရုံးသတ်ဖြတ်ခဲ့သည်။ ထိုအချိန်တွင် မြို့ထဲ၌ ပသခါပွဲကျင်းပဖို့ လူမြောက်မြားစွာ ရောက်ရှိနေကြသည်။ ဤသူတို့၏ မြောက်မြားလှသော ပူဇော်ရာယဇ်များက ဘုရားသခင့်မျက်နှာသာ မရစေခဲ့ချေ။ ၎င်းသည် နာခံမှုမရှိသော ရှောလုမင်းအား ရှမွေလပြောဆိုခဲ့သည့်စကားကို သတိရစေသည်– “ထာဝရဘုရား၏အမိန့်တော်ကိုနားထောင်ခြင်း၌ အားရတော်မူသကဲ့သို့၊ မီးရှို့ရာယဇ်အစရှိသော ယဇ်မျိုးတို့ကိုပူဇော်ခြင်း၌ အားရတော်မူမည်လော။ အလိုတော်သို့လိုက်ခြင်းသည် ယဇ်မျိုးထက်သာ၍ကောင်း၏။ နားထောင်ခြင်းသည် သိုးထီးဆီဥထက်သာ၍ကောင်း၏။”—၅။ အဘယ်နာခံမှုမျိုးကို ယေဟောဝါတောင်းဆိုတော်မူသနည်း၊ ယင်းသို့သောနာခံမှုမျိုးကို တင်ပြနိုင်ကြောင်း ကျွန်ုပ်တို့ မည်သို့သိရသနည်း။
၅ ယေဟောဝါသည် နာခံမှုကို အမြဲတောင်းဆိုတော်မူသော်လည်း မစုံလင်သောလူသားများ၌ ကန့်သတ်မှုများရှိကြောင်း ကိုယ်တော်ကောင်းစွာသိတော်မူ၏။ (ဆာလံ ၁၃၀:၃၊ ၄) ကိုယ်တော်တောင်းဆိုသည်ကား ယုံကြည်ခြင်း၊ ချစ်ခြင်းမေတ္တာနှင့် ကိုယ်တော်မနှစ်သက်ရာ ပြုမိမည်ကို စိုးရိမ်ခြင်းတို့အပေါ် အခြေပြုသော စိတ်ရင်းမှန်ဖြင့် နာခံမှုပြခြင်းဖြစ်သည်။ (တရားဟောရာ ၁၀:၁၂၊ ၁၃; သု. ၁၆:၆; ဟေရှာယ ၄၃:၁၀; မိက္ခာ ၆:၈; ရောမ ၆:၁၇) ထိုသို့သောနာခံမှုမျိုး ရှိနိုင်ကြောင်း သေသည့်တိုင်အောင် ကြီးမားခက်ခဲသောစမ်းသပ်မှုများ ရင်ဆိုင်ကြရာတွင် သမာဓိစောင့်သိခဲ့ကြသူ ‘ခရစ်ယာန်ခေတ်မတိုင်မီက သက်သေအမြောက်အမြား’ တင်ပြခဲ့ကြပါပြီ။ (ဟေဗြဲ ၁၁:၃၆၊ ၃၇; ၁၂:၁) ထိုသူတို့သည် ယေဟောဝါ၏နှလုံးကို အမှန်ပင် ရွှင်ပြုံးစေခဲ့ကြသည်တကား! (သု. ၂၇:၁၁) အခြားသူများမှာမူ အစပိုင်းတွင် တည်ကြည်မှုရှိကြသော်လည်း နာခံမှုကို အဆုံးတိုင်မပြခဲ့ကြချေ။ ဤသူတို့တွင် တစ်ဦးမှာ ရှေးခေတ်ယုဒဘုရင် ယောရှဖြစ်သည်။
မကောင်းသောအပေါင်းအသင်းများကြောင့် ပျက်စီးခဲ့သောရှင်ဘုရင်တစ်ပါး
၆၊ ၇။ ယောယဒအသက်ရှင်စဉ် ယောရှသည် မည်သို့သောရှင်ဘုရင်ဖြစ်ခဲ့သနည်း။
၆ ယောရှမင်းသည် ကလေးဘဝတွင် အသက်ဘေးမှ သီသီကလေးလွတ်ခဲ့သည်။ ယောရှ အသက်ခုနစ်နှစ်စေ့သော် ယဇ်ပုရောဟိတ်မင်း ယောယဒသည် သူ့ကိုဝှက်ထားရာမှထုတ်ပြီး သတ္တိရှိရှိဖြင့် မင်းမြှောက်လေ၏။ ဘုရားသခင်ကိုကြောက်ရွံ့သော ယောယဒသည် ယောရှ၏ဖခင်နှင့် အကြံပေးသူသဖွယ် ဖြစ်ခဲ့သောကြောင့် ဘုရင်ငယ်သည် “ယဇ်ပုရောဟိတ် ယောယဒလက်ထက်ကာလပတ်လုံး . . . ထာဝရဘုရားရှေ့တော်၌ တရားသောအမှုကိုပြု၏။”—၂ ရာဇဝင်ချုပ် ၂၂:၁၀–၂၃:၁၊၁၁; ၂၄:၁၊ ၂။
၇ ယောရှ၏ကောင်းမှုများတွင် ‘ယောရှအလွန်စိတ်ပါဝင်စားသော’ ယေဟောဝါ၏ဝတ်ပြုရာအိမ်တော်ကို ပြုပြင်မွမ်းမံခြင်းပါဝင်သည်။ ပြုပြင်ရေးလုပ်ငန်းအတွက် ထောက်ပံ့ငွေရှိရန်၊ “မောရှေ . . . ပြုသည်နည်းတူ” ယုဒပြည်နှင့် ယေရုရှလင်မြို့မှ ဗိမာန်တော်အခွန်ကောက်ဖို့ ယဇ်ပုရောဟိတ်မင်းယောယဒကို သူသတိပေးခဲ့သည်။ ထိုဘုရင်ငယ်အား ဘုရားသခင်၏ပညတ်တော်ကို လေ့လာ၍ နာခံရန် ယောယဒတိုက်တွန်းခဲ့ခြင်းသည် အောင်မြင်ပုံရသည်။ ယင်းကြောင့် ဝတ်ပြုရာအိမ်တော်နှင့် အိမ်တော်တန်ဆာများကို ပြုပြင်ခြင်းလုပ်ငန်း အလျင်အမြန်ပြီးစီးသွားခဲ့သည်။—၂ ရာဇဝင်ချုပ် ၂၄:၄၊ ၆၊ ၁၃၊ ၁၄; တရားဟောရာ ၁၇:၁၈။
၈။ (က) ယောရှ၏ဝိညာဉ်ရေး ကျရှုံးခဲ့ရသည့် အဓိကအကြောင်းကား အဘယ်နည်း။ (ခ) ရှင်ဘုရင်၏မနာခံမှုက နောက်ဆုံးတွင် သူ့ကို အဘယ်အရာပြုစေခဲ့သနည်း။
၈ ဝမ်းနည်းစရာမှာ၊ ယောရှသည် ယေဟောဝါကို အဆုံးတိုင် နာခံမှုမပြခဲ့ပါ။ အဘယ်ကြောင့်နည်း။ ကျမ်းစာက ဤသို့ပြောပြသည်– “ယောယဒသေသောနောက် ယုဒမင်းတို့သည် ရှင်ဘုရင်ထံတော်သို့လာ၍ ရှိခိုး [“ဦးညွှတ်၊” ကဘ] ကြ၏။ သူတို့စကားကို ရှင်ဘုရင်နားထောင်သဖြင့်၊ သူတို့သည် ဘိုးဘေးတို့၏ဘုရားသခင် ထာဝရဘုရား၏အိမ်တော်ကိုစွန့်၍ အာရှရပင်နှင့် ရုပ်[ပုံ]တို့ကိုဝတ်ပြုကြ၏။ ထိုအပြစ်ကြောင့် အမျက်တော်သည် ယုဒပြည်နှင့် ယေရုရှလင်မြို့အပေါ်မှာ သက်ရောက်လေ၏။” ယုဒမင်းညီမင်းသားတို့၏ မကောင်းသောသြဇာလွှမ်းမှုကြောင့်လည်း ရှင်ဘုရင်သည် ဘုရားသခင့်ပရောဖက်များကို နားမထောင်ခဲ့ချေ၊ ထိုပရောဖက်တစ်ဦးမှာ ယောရှနှင့် လူများတို့၏မနာခံမှုကို သတ္တိရှိရှိဖော်ထုတ်၍ ပြစ်တင်ဆုံးမခဲ့သူ၊ ယောယဒ၏သားဇာခရိဖြစ်သည်။ ယောရှသည် နောင်တယူမည့်အစား ဇာခရိကို ကျောက်ခဲနှင့်ပေါက်သတ်စေခဲ့သည်။ ယောရှသည် ၂ ရာဇဝင်ချုပ် ၂၄:၁၇-၂၂; ၁ ကောရိန္သု ၁၅:၃၃။
အမှန်ပင်ရက်စက်၍ နာခံမှုမရှိသူတစ်ဦး ဖြစ်လာခဲ့သည်—ယင်းသို့ဖြစ်လာရခြင်းမှာ မကောင်းသောအပေါင်းအသင်း၏ ဩဇာလွှမ်းမှုကိုခံခဲ့သောကြောင့်ပင်တည်း!—၉။ ယောရှနှင့် မင်းညီမင်းသားများ၏ နောက်ဆုံးဖြစ်အင်က မနာခံခြင်း၏မိုက်မဲမှုကို မည်သို့အလေးပေးဖော်ပြသနည်း။
၉ ယေဟောဝါအားစွန့်ပယ်ခဲ့ကြရာ ယောရှနှင့် သူ၏ဆိုးသွမ်းသောအပေါင်းအဖော် မင်းညီမင်းသားတို့ မည်သို့ဖြစ်သွားကြသနည်း။ “နည်းသော . . . အလုံးအရင်း” မျှသာရှိသော ရှုရိစစ်တပ်သည် ယုဒပြည်ကို ဝင်ရောက်တိုက်ခိုက်ပြီး “မှူးမတ်အရာရှိအပေါင်းတို့ကို သုတ်သင်ပယ်ရှင်း” လေ၏။ ဝင်ရောက်ကျူးကျော်သူတို့က ရှင်ဘုရင်၏ပိုင်ဆိုင်ရာများသာမက သန့်ရှင်းရာဌာနမှ ရွှေ၊ ငွေကိုပါ ပေးအပ်ရန် အနိုင်အထက်ပြုကြလေသည်။ ယောရှသည် အသက်ချမ်းသာရာရသော်လည်း အားနည်းလာပြီး အနာရောဂါစွဲခဲ့၏။ ထို့နောက် များမကြာမီ သူ၏ကျွန်တို့သည် သင်းဖွဲ့၍ သူ့ကိုလုပ်ကြံကြ၏။ (၂ ရာဇဝင်ချုပ် ၂၄:၂၃-၂၅; ၄ ဓမ္မရာဇဝင် ၁၂:၁၇၊ ၁၈) ဣသရေလလူမျိုးကို ယေဟောဝါမိန့်တော်မူခဲ့သော ဤစကားများ မှန်လိုက်လေခြင်း– “သင်၏ဘုရားသခင်ထာဝရဘုရား စီရင်ထုံးဖွဲ့တော်မူချက်အလုံးစုံတို့ကို ကျင့်စောင့်ခြင်းငှာ စကားတော်ကိုနားမထောင်လျှင် သင့်အပေါ်မှာ [ကျိန်ခြင်းအမင်္ဂလာများ] သက်ရောက်လတ္တံ့။”—တရားဟောရာ ၂၈:၁၅။
နာခံမှုကြောင့် အသက်ချမ်းသာရသော အတွင်းရေးမှူး
၁၀၊ ၁၁။ (က) ဗာရုတ်အား ယေဟောဝါပေးခဲ့သော ဆုံးမစကားကို ပြန်သုံးသပ်ခြင်းသည် အဘယ်ကြောင့်အထောက်အကူဖြစ်သနည်း။ (ခ) ယေဟောဝါသည် ဗာရုတ်ကို မည်သို့ဆုံးမခဲ့သနည်း။
၁၀ ခရစ်ယာန်ဓမ္မအမှုဆောင်ရာတွင် သတင်းကောင်းကိုစိတ်မဝင်စားသူ များသောကြောင့် တစ်ခါတစ်ရံ သင်စိတ်ပျက်အားလျော့ပါသလော။ ချမ်းသာကြွယ်ဝသူနှင့် သူတို့၏ဇိမ်ကျသောဘဝပုံစံကို တစ်ခါတစ်ရံ အနည်းငယ်မနာလိုဖြစ်သလော။ ထိုသို့ဖြစ်မည်ဆိုလျှင် ယေရမိ၏အတွင်းရေးမှူးဗာရုတ်နှင့် သူ့အား ယေဟောဝါပေးခဲ့သော မေတ္တာပါသည့်အကြံပေးချက်ကို ပြန်လည်သုံးသပ်ကြည့်ပါ။
၁၁ ပရောဖက်ပြုသတင်းတစ်ရပ်ကို ဗာရုတ်ရေးမှတ်နေချိန်တွင် ဗာရုတ်ကို ယေဟောဝါ အာရုံစိုက်ဖို့ အကြောင်းပေါ်ခဲ့သည်။ အဘယ်ကြောင့်နည်း။ အကြောင်းမှာ ဗာရုတ်သည် သူ့ဘဝအခြေအနေကိုသူ ညည်းတွား၍ ဘုရားသခင့်အမှုတော်ထမ်းရသည့်အခွင့်ထူးထက် သာ၍ကောင်းမွန်ရာကို လိုချင်တောင့်တစ ပြုလာသောကြောင့်ဖြစ်သည်။ ယေဟောဝါသည် ဗာရုတ်၏သဘော ပြောင်းလဲသွားကြောင်း သတိပြုမိသောအခါ ဤရှင်းလင်းပြတ်သားပြီး ကြင်နာသည့်အကြံပေးချက်ကို သူ့အား ပေးခဲ့သည်– “သင်သည် ကြီးစွာသောအရာတို့ကို ကိုယ်အဖို့ရှာသလော။ မရှာနှင့်။ အကြောင်းမူကား ငါသည် ခပ်သိမ်းသောသတ္တဝါတို့အပေါ်သို့ ဘေးရောက်စေမည်။ သို့ရာတွင် သင်ရောက်လေရာရာအရပ်တို့၌ သင်၏အသက်ကို လက်ရဥစ္စာကဲ့သို့ သင့်အားငါပေးမည်။”—ယေရမိ ၃၆:၄; ၄၅:၅။
၁၂။ လက်ရှိအစီအစဉ်စနစ်တွင် ကျွန်ုပ်တို့အဖို့ “ကြီးစွာသောအရာတို့” ရှာဖွေခြင်းကို အဘယ်ကြောင့်ရှောင်သင့်သနည်း။
၁၂ ယေရမိနှင့်အတူ တည်ကြည်စွာ၊ သတ္တိရှိစွာအမှုထမ်းခဲ့သူ၊ လူကောင်းဗာရုတ်အတွက် ယေဟောဝါ စိုးရိမ်မကင်းဖြစ်ကြောင်း သင်သတိပြုမိပါသလော။ အလားတူ၊ ယနေ့လည်း ဤအစီအစဉ်စနစ်၌ စီးပွားရေးအကွက်ကောင်းသည်ဟု မိမိတို့ယူမှတ်ရာနောက်လိုက်ရန် သွေးဆောင်ခံရသူတို့အတွက် ယေဟောဝါအလွန်စိုးရိမ်တော်မူ၏။ ထိုသူအများစုသည် ဗာရုတ်ကဲ့သို့ပင် တာဝန်ရှိ ဝိညာဉ်ရေးညီအစ်ကိုများ၏ မေတ္တာပါသောတည့်မတ်ပေးမှုကို တုံ့ပြန်ခဲ့ကြခြင်းသည် ဝမ်းသာစရာပင်။ (လုကာ ၁၅:၄-၇) ဤအစီအစဉ်စနစ်တွင် မိမိတို့အဖို့ “ကြီးစွာသောအရာတို့” ကိုရှာဖွေသူများအတွက် အနာဂတ်မရှိကြောင်း ကျွန်ုပ်တို့အားလုံး ပိုင်းခြားသိမြင်ကြပါစို့။ ထိုသို့သောသူများသည် စစ်မှန်သောပျော်ရွှင်မှုကို ရှာမတွေ့ကြရုံမက အဆိုးဆုံးမှာ ဤလောကနှင့် ၎င်း၏အတ္တသဘောတို့နှင့်အတူ သူတို့မကြာမီ ရွေ့သွားကွယ်ပျောက်တော့မည်။—မဿဲ ၆:၁၉၊ ၂၀; ၁ ယောဟန် ၂:၁၅-၁၇။
၁၃။ ဗာရုတ်၏အကြောင်းသည် နှိမ့်ချမှုနှင့်ပတ်သက်၍ ကျွန်ုပ်တို့ကို အဘယ်သင်ခန်းစာပေးသနည်း။
၁၃ ဗာရုတ်၏အကြောင်းက ကျွန်ုပ်တို့ကို နှိမ့်ချဖို့လည်း သင်ခန်းစာပေးသည်။ ယေဟောဝါသည် ဗာရုတ်အား တိုက်ရိုက်မဆုံးမဘဲ၊ ယေရမိ၏မစုံလင်မှုများနှင့် ဆန်းပြားသောအမူအကျင့်များကို ကောင်းစွာသိနိုင်ဖွယ်ဖြစ်သူ ဗာရုတ်ကို ယေရမိမှတစ်ဆင့်ဆုံးမခဲ့ကြောင်း သတိပြုပါ။ (ယေရမိ ၄၅:၁၊ ၂) သို့တိုင် ဗာရုတ်သည် မာန်မာနကြီးစွာ မပြုမူခဲ့ပါ; တကယ်ဆုံးမချက်၏အရင်းအမြစ်မှာ ယေဟောဝါဖြစ်ကြောင်း နှိမ့်ချစွာ သူသိမြင်နားလည်ခဲ့သည်။ (၂ ရာဇဝင်ချုပ် ၂၆:၃၊ ၄၊ ၁၆; သု. ၁၈:၁၂; ၁၉:၂၀) ထို့ကြောင့် ကျွန်ုပ်တို့သည် ‘သတိလစ်၍ တစ်စုံတစ်ခုသောမကောင်းမှုကိုပြုမိ’ ပြီး သမ္မာကျမ်းစာမှ လိုအပ်သောဆုံးမစကားကိုရရှိပါက ဗာရုတ်၏ရင့်ကျက်မှု၊ ဝိညာဉ်ရေးပိုင်းခြားသိမြင်မှုနှင့် နှိမ့်ချမှုတို့ကို အတုယူကြစို့။—ဂလာတိ ၆:၁။
၁၄။ ကျွန်ုပ်တို့ကို ဦးဆောင်နေကြသူများအား နာခံမှုသည် ကျွန်ုပ်တို့အတွက် အဘယ်ကြောင့်အကျိုးရှိသနည်း။
၁၄ ကျွန်ုပ်တို့ဘက်မှ ဤသို့နှိမ့်ချမှုတင်ပြခြင်းသည် ဆုံးမပေးရသူအတွက်လည်း အကူအညီဖြစ်သည်။ ဟေဗြဲ ၁၃:၁၇ ကဤသို့ဆို၏– “သင်တို့ကိုအုပ်သောသူတို့၏စကားကို နားထောင်၍ နှိမ့်ချလျက်နေကြလော့၊ သူတို့သည် ကိုယ်တိုင်စစ်ကြောခြင်းကိုခံရသောသူကဲ့သို့၊ သင်တို့စိတ်ဝိညာဉ်၏အကျိုးအလို့ငှာ စောင့်နေကြ၏။ သင်တို့အကျိုးကိုမဖြစ်စေတတ်သော ဝမ်းနည်းခြင်းမရှိ၊ ဝမ်းမြောက်ခြင်းရှိ၍၊ သူတို့သည် စစ်ကြောခြင်းကိုခံရမည်အကြောင်း သတိပြုလျက်နေကြလော့။” အကြီးအကဲများသည် သိုးထိန်းလုပ်ငန်း၏ ဤခက်ခဲသောတာဝန်ကို ကျေပွန်စွာဆောင်ရွက်နိုင်ဖို့ လိုအပ်သောသတ္တိ၊ ဉာဏ်ပညာနှင့် လိမ္မာပါးနပ်မှုပေးပါရန် ယေဟောဝါထံ ကြိမ်ဖန်များစွာ လှိုက်လှိုက်လှဲလှဲဆုတောင်းခဲ့ကြပေပြီ! ကျွန်ုပ်တို့သည် “ထိုသို့သောသူတို့ကို သိမှတ်ကြ” ပါစို့။—၁ ကောရိန္သု ၁၆:၁၈၊ သမ္မာ။
၁၅။ (က) ယေရမိသည် ဗာရုတ်ကိုယုံကြည်စိတ်ချကြောင်း မည်သို့တင်ပြခဲ့သနည်း။ (ခ) ဗာရုတ်သည် နှိမ့်ချစွာနာခံမှုပြခဲ့သည့်အတွက် မည်သို့ဆုချခံခဲ့ရသနည်း။
၁၅ ဗာရုတ်သည် သူ၏အတွေးအခေါ်ကို ပြုပြင်ပြောင်းလဲခဲ့ကြောင်းထင်ရှားသည်၊ အကြောင်းမှာ သူကိုယ်တိုင်ရေးချရသော ယေရမိမြွက်ဆိုသည့် တရားစီရင်ခြင်းသတင်းကို ဝတ်ပြုရာအိမ်၌ အသံကျယ်ကျယ်ဖြင့် သူကိုယ်တိုင်ဖတ်ပြရမည့် အခက်ခဲဆုံးတာဝန်နောက်တစ်ခုကို ယေရမိပေးခဲ့သည်။ ဗာရုတ်နာခံခဲ့သလော။ နာခံခဲ့ပါသည်၊ သူသည် “ပရောဖက်ယေရမိမှာထားသမျှအတိုင်း . . . ပြု” ခဲ့သည်။ အမှန်မှာ ထိုသတင်းကို ယေရုရှလင်မြို့ရှိ မင်းညီမင်းသားများရှေ့၌ပင် သူဖတ်ပြခဲ့ရာ သို့ပြုရန် ရဲစွမ်းသတ္တိအတော်အတန်လိုခဲ့မည်မှာ သေချာသည်။ (ယေရမိ ၃၆:၁-၆၊ ၈၊ ၁၄၊ ၁၅) နောင် ၁၈ နှစ်လွန်ပြီးနောက် ဗာဗုလုန်လက်သို့ မြို့တော်ကျရှုံးသွားသောအခါ ယေဟောဝါ၏သတိပေးချက်ကို သူနာခံ၍ “ကြီးစွာသောအရာတို့” ကိုမရှာဖွေတော့သည့်အတွက် အသက်ချမ်းသာရာရခဲ့သောကြောင့် ဗာရုတ် မည်မျှကျေးဇူးတင်လိုက်မည်ဖြစ်ခြင်း!—ယေရမိ ၃၉:၁၊ ၂၊ ၁၁၊ ၁၂; ၄၃:၆။
ဝိုင်းရံခံရချိန်တွင် နာခံမှုပြခြင်းက အသက်ချမ်းသာရစေခဲ့
၁၆။ ဘီ.စီ.အီး. ၆၀၇ ခုတွင် ဗာဗုလုန်တို့၏ဝိုင်းရံပိတ်ဆို့မှုခံရချိန်တွင် ယေရုရှလင်မြို့ရှိဂျူးများအား ယေဟောဝါမည်သို့ထောက်ထားစာနာမှုပြခဲ့သနည်း။
၁၆ ဘီ.စီ.အီး. ၆၀၇ ခုနှစ်တွင် ယေရုရှလင်မြို့ဆုံးခန်းတိုင်သောအခါ နာခံမှုရှိသူတို့ကို ဘုရားသခင် တစ်ဖန် ထောက်ထားစာနာကြောင်း ထင်ရှားပြန်သည်။ ဝိုင်းရံပိတ်ဆို့မှု အပြင်းထန်ဆုံးအချိန်တွင် ဂျူးများကို ယေဟောဝါဤသို့မိန့်ဆိုခဲ့သည်– “အသက်ရှင်ရာလမ်း၊ သေရာလမ်းတို့ကို သင်တို့ရှေ့မှာငါဖွင့်ထား၏။ ဤမြို့ထဲမှာနေသောသူသည် ဓားဘေး၊ မွတ်သိပ်ခြင်းဘေး၊ နာခြင်းဘေးဖြင့် သေလိမ့်မည်။ မြို့ပြင်သို့ထွက်၍ မြို့ပြင်မှာတပ်စွဲလျက်နေသော ခါလဒဲလူတို့ဘက်သို့ ဝင်စားသောသူသည် အသက်ချမ်းသာ၍ လုယူသောဥစ္စာကဲ့သို့ ကိုယ်အသက်ကိုရလိမ့်မည်။” (ယေရမိ ၂၁:၈၊ ၉) ယေရုရှလင်မြို့သူမြို့သားများသည် ဖျက်ဆီးခံထိုက်သော်လည်း အထူးအရေးကြုံနေသော၊ ထိုနောက်ဆုံးအချိန်၌ပင် မိမိအားနာခံသူများကို ယေဟောဝါသည် ထောက်ထားစာနာမှုပြခဲ့သည်။ *
၁၇။ (က) “ခါလဒဲလူတို့ဘက်သို့ကူးသွား” ရန် ဝိုင်းရံပိတ်ဆို့ခံရသောဂျူးများကိုပြောဖို့ ယေရမိကို ယေဟောဝါညွှန်ကြားသောအခါ အဘယ်နည်းနှစ်နည်းဖြင့် သူ၏နာခံမှု စမ်းသပ်ခံခဲ့ရသနည်း။ (ခ) ရဲစွမ်းသတ္တိရှိရှိ နာခံမှုပြခဲ့သော ယေရမိ၏ပုံသက်သေမှ ကျွန်ုပ်တို့အဘယ်အကျိုးရရှိနိုင်သနည်း။
၁၇ လက်နက်ချအညံ့ခံရန် ဂျူးများကိုပြောခြင်းသည် ယေရမိ၏နာခံမှုကိုပါ စမ်းသပ်မှုဖြစ်ခဲ့မည်မှာ သေချာသည်။ အကြောင်းရင်းတစ်ခုမှာ သူသည် ဘုရားသခင့်နာမတော်အတွက် စိတ်အားထက်သန်သူတစ်ဦးဖြစ်သည်။ မိမိတို့အောင်ပွဲသည် သက်မဲ့ရုပ်ပုံများကြောင့်ဟု မှတ်ယူကြမည့် ရန်သူများအားဖြင့် ဘုရားသခင့်နာမတော် ရှုတ်ချခံရမည်ကို သူမလိုလားခဲ့ချေ။ (ယေရမိ ၅၀:၂၊ ၁၁; မြည်တမ်းစကား ၂:၁၆) ထို့အပြင်၊ အညံ့ခံအရှုံးပေးရန် ပြောရာတွင် မိမိ၏စကားကို ပုန်ကန်ရန်လှုံ့ဆော်သည့်စကားအဖြစ် အများက အဓိပ္ပာယ်ကောက်ကြမည်ဖြစ်ရာ မိမိအသက်အန္တရာယ်တွေ့နိုင်ကြောင်း ယေရမိသိထားသည်။ သို့သော် ကြောက်ရွံ့တွန့်ဆုတ်ခြင်းမရှိဘဲ ယေဟောဝါ၏ ကြေညာချက်များကို နာခံမှုရှိရှိ ယေရမိပြောကြားခဲ့သည်။ (ယေရမိ ၃၈:၄၊ ၁၇၊ ၁၈) ယေရမိကဲ့သို့ပင် ကျွန်ုပ်တို့လည်း လူတို့မကြိုက်သောသတင်းစကားကို ပြောကြားကြသည်။ အဆိုပါသတင်းစကားကြောင့်ပင် ယေရှုလည်း မထီမဲ့မြင်ပြုခံခဲ့ရသည်။ (ဟေရှာယ ၅၃:၃; မဿဲ ၂၄:၉) ထို့ကြောင့် “လူကိုကြောက်ရွံ့ခြင်း” မရှိဘဲ ယေရမိကဲ့သို့ ယေဟောဝါ၌ အကြွင်းမဲ့ယုံကြည်ကိုးစားလျက် ကိုယ်တော်အား ရဲစွမ်းသတ္တိရှိရှိ နာခံကြပါစို့။—သု. ၂၉:၂၅။
ဂေါဂ၏တိုက်ခိုက်မှုခံရချိန်တွင် နာခံမှုတင်ပြခြင်း
၁၈။ ယေဟောဝါ၏ကျေးကျွန်များသည် အနာဂတ်တွင် နာခံမှုနှင့်ပတ်သက်၍ အဘယ်စမ်းသပ်မှုများကိုခံကြရမည်နည်း။
၁၈ မကြာမီ၊ စာတန်၏စနစ်ဆိုးတစ်ခုလုံးသည် မကြုံစဖူးသော ‘ကြီးစွာသောဆင်းရဲခြင်း’ တွင် ဖျက်ဆီးခံရပါလိမ့်မည်။ (မဿဲ ၂၄:၂၁) ထိုအချိန်မတိုင်မီနှင့် ထိုအချိန်အတောအတွင်း ဘုရားသခင့်လူမျိုးတော်၏ ယုံကြည်ခြင်းနှင့် နာခံမှုသည် အကြီးအကျယ်စမ်းသပ်ခံရမည်ဖြစ်သည်။ ဥပမာ၊ စာတန်သည် “မာဂေါဂပြည်သား ဂေါဂမင်း” အဖြစ် “အားကြီးသောစစ်သူရဲအပေါင်းတို့နှင့် . . . ပြည်ကိုမိုးအုံ့သကဲ့သို့” အင်အားစုရုံးကာ ယေဟောဝါ၏ကျေးကျွန်များကို မီးကုန်ယမ်းကုန်တိုက်ခိုက်လိမ့်မည်ဟု သမ္မာကျမ်းစာကဖော်ပြသည်။ (ယေဇကျေလ ၃၈:၂၊ ၁၄-၁၆) ထိုအခါ ဘုရားသခင့်လူမျိုးတော်သည် ရန်သူတို့ထက်အရေအတွက်နည်းပြီး လက်နက်မဲ့သူများဖြစ်ကြရာ နာခံမှုရှိသူများကိုကာကွယ်ပေးရန် ယေဟောဝါဆန့်ထုတ်ထားသော “အတောင်တော်အမွေး” အောက်၌ ခိုလှုံကြပါလိမ့်မည်။
၁၉၊ ၂၀။ (က) ဣသရေလလူမျိုးသည် ပင်လယ်နီအရပ်တွင်ရှိစဉ် နာခံမှုရှိဖို့ အဘယ်ကြောင့်အလွန်အရေးပါခဲ့သနည်း။ (ခ) ပင်လယ်နီ၌အဖြစ်အပျက်ကို ဆုတောင်း၍ဆင်ခြင်သုံးသပ်ခြင်းသည် ယနေ့ ကျွန်ုပ်တို့ကို မည်သို့အကျိုးပြုနိုင်သနည်း။
၁၉ ဤအခြေအနေက အီဂျစ်ပြည်မှ ဣသရေလလူမျိုးထွက်လာခဲ့ချိန်ကို ပြန်သတိရစေသည်။ ယေဟောဝါသည် အီဂျစ်ပြည်အပေါ် သိမ်းရုံးပျက်စီးစေသော ကပ်ဘေးဆယ်ပါး ကျရောက်စေပြီးနောက် မိမိ၏လူမျိုးတော်ကို ကတိထားရာပြည်သို့ အတိုဆုံးလမ်းဖြင့်မဟုတ်ဘဲ၊ အလွယ်တကူချောင်ပိတ်မိပြီး တိုက်ခိုက်ခံရနိုင်သော ပင်လယ်နီသို့ ဦးဆောင်ခေါ်သွားခဲ့သည်။ စစ်ရေးရှုထောင့်မှကြည့်လျှင် ယင်းသည် ဘေးသင့်မည့်ချီတက်မှုဖြစ်ဟန်တူသည်။ ထိုအချိန်အခါတွင် သင်ရှိခဲ့မည်ဆိုလျှင် မောရှေမှတစ်ဆင့်လာသော ယေဟောဝါ၏စကားကို သင်နာခံမည်လော၊ ကတိထားရာပြည်သည် အခြားတစ်နေရာရာ၌ရှိကြောင်း သင်သိထားလျက် ယုံကြည်စိတ်ချမှုဖြင့် ပင်လယ်နီထဲသို့ ချီတက်သွားမည်လော။—ထွက်မြောက်ရာ ၁၄:၁-၄။
၂၀ ထွက်မြောက်ရာကျမ်း အခန်းကြီး ၁၄ ကို ကျွန်ုပ်တို့ဆက်ဖတ်သည့်အခါ ယေဟောဝါသည် စိုးရွံ့ထိတ်လန့်ဖွယ်ကောင်းစွာ တန်ခိုးတော်ပြပြီး မိမိ၏လူမျိုးတော်ကို ကယ်လွှတ်ခဲ့ကြောင်းသိရှိရသည်။ ဤသို့သောအဖြစ်အပျက်များကို အချိန်ယူဖတ်ရှုလေ့လာပြီး ဆင်ခြင်တွေးတောသည့်အခါ ကျွန်ုပ်တို့၏ယုံကြည်ခြင်း ပိုမိုခိုင်ခံ့လာပါသည်! (၂ ပေတရု ၂:၉) ခိုင်ခံ့သောယုံကြည်ခြင်းက တစ်ဖန် ယေဟောဝါ၏စကားကိုနာခံရန် ခွန်အားပေးသည်၊ ကိုယ်တော်၏တောင်းဆိုချက်များသည် လူ့အတွေးအခေါ်နှင့် ဆန့်ကျင်ပုံရသည့်အခါတွင်ပင် နာခံမှုရှိစေသည်။ (သု. ၃:၅၊ ၆) ထို့ကြောင့် မိမိကိုယ်ကို ဤသို့မေးကြည့်ပါ– ‘ဝီရိယရှိရှိ ကျမ်းစာလေ့လာခြင်း၊ ဆုတောင်းခြင်း၊ ဆင်ခြင်တွေးတောခြင်းတို့ကိုပြုသည့်အပြင် ဘုရားသခင့်လူမျိုးတော်နှင့် မှန်မှန်ပေါင်းသင်းခြင်းအားဖြင့် မိမိယုံကြည်ခြင်းကိုတိုးပွားစေဖို့ ကျွန်ုပ်ကြိုးစားနေသလော။’—ဟေဗြဲ ၁၀:၂၄၊ ၂၅; ၁၂:၁-၃။
နာခံမှုက မျှော်လင့်ချက်ရှိစေ
၂၁။ ယေဟောဝါအား နာခံသူများသည် လောလောဆယ်နှင့် အနာဂတ်တွင် အဘယ်အကျိုးကျေးဇူးများ ခံစားကြရမည်နည်း။
၂၁ ယေဟောဝါအား နာခံမှုရှိခြင်းကို မိမိတို့ဘဝလမ်းစဉ်ဖြစ်စေသူများသည် နယပုံပြင် ၁:၃၃ ပါဤစကားများပြည့်စုံခြင်းကို ယခုပင်ခံစားရကြသည်– “ငါ့စကားကို [နာခံမှုရှိစွာ] နားထောင်သောသူမူကား လုံခြုံစွာနေ၍ ဘေးကိုမကြောက်ဘဲ ငြိမ်ဝပ်လိမ့်မည်။” ဤနှစ်သိမ့်ဖွယ်စကားများသည် ရောက်လာတော့မည့် ယေဟောဝါအပြစ်စီရင်ရာနေ့အတွင်း အမှန်ပင်သက်ဆိုင်ပါလိမ့်မည်! တပည့်များအား ယေရှုဤသို့မိန့်ဆိုခဲ့သည်– “ထိုအမှုအရာတို့သည် ဖြစ်စရှိသောအခါ၊ သင်တို့ကိုရွေးနုတ်သောအချိန်ကာလ ရောက်လုနီး သည်ကိုထောက်သဖြင့်၊ မျှော်ကြည့်၍ ခေါင်းကိုကြွကြလော့။” (လုကာ ၂၁:၂၈) ဘုရားသခင်အား နာခံသူများသာလျှင် ဤစကားကို ယုံကြည်စိတ်ချစွာ လိုက်နာကြပါလိမ့်မည်။—မဿဲ ၇:၂၁။
၂၂။ (က) ယေဟောဝါ၏လူမျိုးတော်သည် ယုံကြည်စိတ်ချစရာ အဘယ်အကြောင်းရင်းရှိသနည်း။ (ခ) နောက်ဆောင်းပါးတွင် အဘယ်အကြောင်းများကို ဆွေးနွေးကြမည်နည်း။
၂၂ ယုံကြည်စိတ်ချနိုင်သည့် အကြောင်းရင်းနောက်တစ်ခုမှာ “အရှင်ထာဝရဘုရားသည် မိမိကျွန်ပရောဖက်တို့အား မဖော်ပြဘဲ အဘယ်အမှုကိုမျှစီရင်တော်မမူ” ကြောင်းဖြစ်သည်။ (အာမုတ် ၃:၇) မျက်မှောက်ခေတ်တွင် ယေဟောဝါသည် အတိတ်ကကဲ့သို့ ပရောဖက်များအား မှုတ်သွင်းတော်မမူချေ; ယင်းအစား မိမိ၏အိမ်သူအိမ်သားများအား အချိန်တန်ဝိညာဉ်အစာကျွေးမွေးဖို့ သစ္စာရှိကျေးကျွန်အတန်းအစားကို တာဝန်ပေးထားတော်မူပြီ။ (မဿဲ ၂၄:၄၅-၄၇) ထို့ကြောင့် ထို “ကျွန်” အား နာခံမှုပြဖို့ အရေးကြီးလှသည်တကား! ထိုသို့နာခံမှုရှိခြင်းသည် ‘ကျွန်၏’ သခင်၊ ယေရှုအပေါ် ကျွန်ုပ်တို့၏သဘောထားကိုပါ ထင်ရှားစေကြောင်း နောက်ဆောင်းပါးက ဖော်ပြပါမည်။ “လူမျိုးတို့၏နာခံမှုကို . . . ပိုင်ဆိုင်” သူကား ကိုယ်တော်ပင်ဖြစ်သတည်း။—ကမ္ဘာဦး ၄၉:၁၀၊ ကဘ။
[အောက်ခြေမှတ်ချက်များ]
^ အပိုဒ်၊ 1 ကြောက်တတ်သောသတ္တဝါအဖြစ် ပုံဖော်ခံရလေ့ရှိသော်လည်း “မိခင်ကြက်မသည် မိမိ၏ကြက်ကလေးများကို ဘေးအန္တရာယ်မှ ကာကွယ်ပေးဖို့ သေသည့်တိုင် ခုခံတိုက်ခိုက်မည်ဖြစ်သည်” ဟု တိရစ္ဆာန်ကာကွယ်ရေးအဖွဲ့တစ်ဖွဲ့၏ စာပေတစ်စောင်ကဆိုသည်။
^ အပိုဒ်၊ 16 ခါလဒဲလူတို့ဘက်သို့ “ကူးသွား” ၍အသက်မသေသော်လည်း ပြည်နှင်ခံခဲ့ရသော ဂျူးအချို့ရှိကြောင်း ယေရမိ ၃၈:၁၉ ကဖော်ပြသည်။ သူတို့သည် ယေရမိ၏စကားကို လက်ခံတုံ့ပြန်သည့်အနေနှင့် လက်နက်ချအညံ့ခံခဲ့ခြင်းဟုတ်၊ မဟုတ် ကျွန်ုပ်တို့မသိရပါ။ သို့သော် သူတို့အသက်ချမ်းသာရခြင်းက ပရောဖက်၏စကားများ မှန်ကန်ကြောင်းဖော်ပြသည်။
သင်မှတ်မိသလော
• ဣသရေလလူမျိုးသည် ထပ်ခါတလဲ မနာခံခဲ့သည့်အတွက် အကျိုးဆက်ကား အဘယ်နည်း။
• ယောရှမင်းသည် မိမိ၏အပေါင်းအသင်းများကြောင့် သူငယ်ရွယ်စဉ်နှင့် ဘဝနှောင်းပိုင်းအပေါ် မည်သို့သော သက်ရောက်မှုရှိခဲ့သနည်း။
• ဗာရုတ်ထံမှ ကျွန်ုပ်တို့ အဘယ်သင်ခန်းစာရနိုင်သနည်း။
• လက်ရှိအစီအစဉ်စနစ် ဆုံးခန်းနီးလာသည်နှင့်အမျှ ယေဟောဝါ၏နာခံမှုရှိသောလူမျိုးတော်သည် အဘယ်ကြောင့် ကြောက်စရာအကြောင်းမရှိသနည်း။
[လေ့လာရန်မေးခွန်းများ]
[စာမျက်နှာ ၁၃ ပါ ရုပ်ပုံ]
ယောယဒ၏လမ်းညွှန်မှုအောက်တွင် လူငယ်ယောရှသည် ယေဟောဝါအား နာခံခဲ့
[စာမျက်နှာ ၁၅ ပါ ရုပ်ပုံ]
ဘုရားသခင်၏ပရောဖက်ကိုသတ်ပစ်ရန် မကောင်းသောအပေါင်းအသင်းများက ယောရှကိုသြဇာလွှမ်းမိုးခဲ့
[စာမျက်နှာ ၁၆ ပါ ရုပ်ပုံ]
အသင်သည် ယေဟောဝါအား နာခံပြီး ကိုယ်တော်၏စိုးရွံ့ဖွယ် ကယ်တင်ခြင်းတန်ခိုးတော်ကို မြင်တွေ့သူ ဖြစ်ခဲ့မည်လော