ယေဟောဝါ သင်တို့ကို သတိနှင့်ကြည့်ရှုတော်မူ၏
ယေဟောဝါ သင်တို့ကို သတိနှင့်ကြည့်ရှုတော်မူ၏
“သင်တို့ကို သတိနှင့်ကြည့်ရှုတော်မူသောကြောင့် သင်တို့၌စိုးရိမ်ခြင်းအမှုရှိသမျှတို့ကို ကိုယ်တော်၌အပ်နှံကြလော့။”—၁ ပေတရု ၅:၇။
၁။ ယေဟောဝါနှင့် စာတန်သည် အဘယ်အရေးပါသောကဏ္ဍတွင် လုံးလုံးလျားလျားဆန့်ကျင်သနည်း။
ယေဟောဝါနှင့် စာတန်သည် လုံးလုံးဆန့်ကျင်ဘက်ဖြစ်သည်။ ယေဟောဝါထံ ဆွဲဆောင်ခံရသူမည်သူမဆိုသည် စာတန်၏ရန်ဘက်ပြုခြင်းကို ခံရဖို့သာရှိသည်။ ဤကွာခြားချက်ကို စံပြုကျမ်းကိုးတစ်အုပ်တွင် ဖော်ပြထားသည်။ ယောဘကျမ်း၌ဖော်ပြထားသော စာတန်၏ လှုပ်ရှားမှုများနှင့်စပ်လျဉ်း၍ ဗြိတဲန်နစ်ကာစွယ်စုံကျမ်း (၁၉၇၀) ကဤသို့ဆို၏– ‘စာတန်၏အလုပ်မှာ အဘယ်အမှု၊ အဘယ်သူကို ဖော်ထုတ်တိုင်ကြားရမည်ကို ကမ္ဘာတစ်ခွင်လှည့်လည် ရှာဖွေနေခြင်းဖြစ်သည်; သို့ဖြင့် ကောင်းမှုဟူသ၍ကို အားဖြည့်ပေးဖို့ လှည့်လည်ကြည့်ရှုတော်မူသော ‘သခင်၏မျက်စိတော်’ နှင့် သူ၏လုပ်ဆောင်မှုသည် ဆန့်ကျင်ဘက်ဖြစ်သည် (၂ ရာ. ၁၆:၉)။ စာတန်သည် အဆိုးသာမြင်တတ်ပြီး ကိုယ်ကျိုးမပါဘဲ လူသားကောင်းမှုပြုခြင်းကို သံသယဝင်၏၊ ဘုရားသခင့်ခွင့်ပြုချက်နှင့် ထိန်းချုပ်မှုအောက်တွင် ဘုရားသခင်ချမှတ်ထားသောဘောင်အတွင်း ယင်းကို စမ်းသပ်ခွင့်ရှိသည်။’ ကွာခြားလိုက်လေခြင်း!—ယောဘ ၁:၆-၁၂; ၂:၁-၇။
၂၊ ၃။ (က) Devil (နတ်ဆိုးမင်း) ဟူသောစကားလုံး၏အဓိပ္ပာယ်ကို ယောဘအဖြစ်အပျက်က မည်သို့ကောင်းစွာဖော်ပြသနည်း။ (ခ) မြေကြီးပေါ်ရှိ ယေဟောဝါ၏ကျေးကျွန်များကို စာတန်စွပ်စွဲနေဆဲရှိကြောင်း ကျမ်းစာက မည်သို့ဖော်ပြသနည်း။
၂ Devil (နတ်ဆိုးမင်း) ဟူသောအင်္ဂလိပ်စကားလုံးသည် “မဟုတ်မမှန်စွပ်စွဲသူ၊” “သွားပုပ်လေလွင့်ပြောသူ” ဟုအဓိပ္ပာယ်ရှိသော ဂရိစကားလုံးမှဆင်းသက်လာသည်။ စာတန်က “ယောဘသည်အကျိုးမရဘဲ ဘုရား[သခင်]ဝတ်ကိုပြုသလော” ဟုဆိုလျက် ယေဟောဝါ၏တည်ကြည်သောကျေးကျွန် ယောဘသည် ကိုယ်ကျိုးအတွက်သာ ဘုရားသခင်ကိုဝတ်ပြုသည်ဟု စွပ်စွဲခဲ့ကြောင်း ယောဘကျမ်းကဖော်ပြသည်။ (ယောဘ ၁:၉) ယောဘသည် စုံစမ်းနှောင့်ယှက်မှုအမျိုးမျိုးခံခဲ့ရသော်လည်း ယေဟောဝါနှင့် ပို၍ရင်းနှီးလာကြောင်း ယောဘဝတ္ထုကဖော်ပြသည်။ (ယောဘ ၁၀:၉၊ ၁၂; ၁၂:၉၊ ၁၀; ၁၉:၂၅; ၂၇:၅; ၂၈:၂၈) ပင်ပန်းဆင်းရဲမှုအမျိုးမျိုး ကြုံရပြီးနောက် ဘုရားသခင်အား ယောဘဤသို့ပြောဆိုခဲ့သည်– “သတင်းတော်ကို အကျွန်ုပ်သည် နားနှင့်ကြားဖူးပါပြီ။ ယခုမူကား ကိုယ်တော်ကိုမျက်စိနှင့်မြင်ရပါ၏။”—ယောဘ ၄၂:၅။
၃ ယောဘအချိန်နောက်ပိုင်းတွင် ဘုရားသခင့်တည်ကြည်သောကျေးကျွန်များအား စွပ်စွဲခြင်းကို စာတန်ရပ်တန့်ခဲ့ပြီလော။ မရပ်တန့်ပါ။ ဤဆုံးခန်းကာလတွင် စာတန်သည် ခရစ်တော်၏ ဝိညာဉ်တော်ဖွားညီတော်များနှင့် သူတို့၏တည်ကြည်သောအပေါင်းပါများကိုပါ စွပ်စွဲနေဆဲရှိကြောင်း ဗျာဒိတ်ကျမ်းကဖော်ပြသည်။ (၂ တိမောသေ ၃:၁၂; ဗျာ. ၁၂:၁၀၊ ၁၇) ထို့ကြောင့် ခရစ်ယာန်စစ်များအနေနှင့် ကျွန်ုပ်တို့အားလုံး အဓိကလုပ်ဆောင်ကြရမည်မှာ ကျွန်ုပ်တို့ကို သတိနှင့်ကြည့်ရှုနေတော်မူသော ဘုရားသခင် ယေဟောဝါ၏အုပ်စိုးခြင်းကို ဝန်ခံပြီး၊ ကိုယ်တော်အားနှစ်နှစ်ကာကာချစ်သောကြောင့် ဝတ်ပြုကြခြင်းဖြင့် စာတန်၏စွပ်စွဲချက် မှားကြောင်း သက်သေထူရန်ဖြစ်သည်။ ဤသို့ပြုခြင်းအားဖြင့် ယေဟောဝါ၏စိတ်တော်ကို ကျွန်ုပ်တို့ရွှင်လန်းစေလိမ့်မည်။—သု. ၂၇:၁၁။
ကျွန်ုပ်တို့ကို ကူညီပေးဖို့ ယေဟောဝါရှာကြံ
၄၊ ၅။ (က) ယေဟောဝါသည် စာတန်နှင့်မတူဘဲ မြေကြီးပေါ်မှ အဘယ်အရာကိုရှုမှတ်တော်မူသနည်း။ (ခ) ယေဟောဝါ၏မျက်နှာသာတော်ရလိုလျှင် ကျွန်ုပ်တို့ အဘယ်အရာပြုဖို့လိုသနည်း။
၄ မြေကြီးပေါ်မှ မည်သူကို ပြစ်တင်စွပ်စွဲ၊ ဝါးမျိုရမည်နည်းဟု စာတန်လှည့်လည်ရှာဖွေလျက်ရှိသည်။ (ယောဘ ၁:၇၊ ၉; ၁ ပေတရု ၅:၈) ယေဟောဝါမူကား ကိုယ်တော်၏အကူအညီလိုအပ်သူများကို ခွန်အားပေးဖို့ရှာကြံတော်မူ၏။ ဘုရင်အာသကို ပရောဖက်ဟာနန်က ဤသို့ပြောဆိုခဲ့သည်– “ထာဝရဘုရားသည် အထံတော်၌စုံလင်သောစိတ်နှလုံးရှိသူတို့ဘက်တွင် တန်ခိုးတော်ပြတော်မူခြင်းငှာ မျက်စိတော်သည်လျင်မြန်၍ မြေကြီးတစ်ပြင်လုံးကို တစ်ပြိုင်နက် နှံ့အောင်ကြည့်ရှုလျက်ရှိ၏။” (၂ ရာဇဝင်ချုပ် ၁၆:၉၊ သမ္မာ) စာတန်၏ မုန်းတီးစိတ်အပြည့်နှင့် မျက်လုံး ဒေါက်ထောက်ကြည့်ခြင်းနှင့် ယေဟောဝါ၏မေတ္တာပါသော ကြည့်ရှုခြင်းသည် ကွာလိုက်လေခြင်း!
၅ ယေဟောဝါသည် ကျွန်ုပ်တို့၏အပြစ် အနာအဆာများကို ထောက်လှမ်းမနေပါ။ ဆာလံဆရာက “အိုဘုရားရှင်ထာဝရဘုရား ကိုယ်တော်သည် [မကောင်းမှု] အပြစ်များကို မှတ်တော်မူလျှင် အဘယ်သူခံရပ်နိုင်ပါမည်နည်း” ဟုရေးခဲ့သည်။ (ဆာလံ ၁၃၀:၃) အဖြေမှာ မည်သူမျှခံရပ်နိုင်မည်မဟုတ်ကြောင်း သဘောပေါက်စေသည်။ (ဒေ. ၇:၂၀) စိတ်နှလုံးအကြွင်းမဲ့ဖြင့် ယေဟောဝါထံ ကျွန်ုပ်တို့ချဉ်းကပ်ကြမည်ဆိုလျှင် ကိုယ်တော်သည် ကျွန်ုပ်တို့ကိုအပြစ်တင်ဖို့မဟုတ်ဘဲ ကျွန်ုပ်တို့၏ကြိုးပမ်းမှုများကိုရှုမှတ်ဖို့နှင့် ကျွန်ုပ်တို့ဆုတောင်းသည့်အတိုင်း ကူညီပေးပြီး ခွင့်လွှတ်ဖို့ ကျွန်ုပ်တို့ကို ဂရုစိုက်ကြည့်ရှုတော်မူမည်။ တမန်တော်ပေတရုက ဤသို့ရေးသားခဲ့သည်– “ထာဝရဘုရားသည် ဖြောင့်မတ်သောသူတို့ကို ကြည့်ရှုတော်မူ၏။ သူတို့ဆုတောင်းခြင်းကိုလည်း နားထောင်တော်မူ၏။ [မကောင်းမှု] ပြုသောသူတို့ကိုကား၊ ထာဝရဘုရားသည် မျက်နှာလွှဲတော်မူ၏။”—၁ ပေတရု ၃:၁၂။
၆။ ဒါဝိဒ်၏အဖြစ်အပျက်သည် ကျွန်ုပ်တို့အတွက် နှစ်သိမ့်မှုနှင့် သတိပေးချက် မည်သို့ဖြစ်သနည်း။
၆ ဒါဝိဒ်သည် မစုံလင်သူဖြစ်ပြီး ကြီးလေးသောအပြစ်ကျူးလွန်ခဲ့သည်။ (၂ ဓမ္မရာဇဝင် ၁၂:၇-၉) သို့သော် ယေဟောဝါထံ သူရင်ဖွင့်ပြီး ထက်သန်စွာဆုတောင်း၍ ကိုယ်တော်ထံချဉ်းကပ်ခဲ့သည်။ (ဆာလံ ၅၁:၁-၁၂) သူ၏ဆုတောင်းချက်ကို ယေဟောဝါနားညောင်းတော်မူ၍ ခွင့်လွှတ်သည်မှန်သော်လည်း ဒါဝိဒ်သည် သူ့အပြစ်၏ မနှစ်မြို့ဖွယ်ရလဒ်များကို ခံစားခဲ့ရသည်။ (၂ ဓမ္မရာဇဝင် ၁၂:၁၀-၁၄) ၎င်းသည် ကျွန်ုပ်တို့အတွက် နှစ်သိမ့်မှုကော သတိပေးချက်ပါဖြစ်သင့်သည်။ ကျွန်ုပ်တို့ အမှန်နောင်တယူကြပါက ယေဟောဝါသည် ကျွန်ုပ်တို့ကို ခွင့်လွှတ်ဖို့အသင့်ရှိကြောင်း သိရခြင်းသည် နှစ်သိမ့်မှုဖြစ်သည်၊ သို့သော် အပြစ်ပြုလျှင် ကြောက်မက်ဖွယ်ဆိုးကျိုးများ ခံရလေ့ရှိကြောင်း သိရခြင်းသည် အလေးအနက်ဆင်ခြင်စရာဖြစ်သည်။ (ဂလာတိ ၆:၇-၉) ယေဟောဝါထံ ကျွန်ုပ်တို့နီးကပ်လိုပါက ကိုယ်တော်မနှစ်သက်ရာဟူသ၍မှ ဝေးနိုင်သမျှ ဝေးဝေးရှောင်နေသင့်သည်။—ဆာလံ ၉၇:၁၀။
ယေဟောဝါသည် မိမိ၏လူမျိုးတော်ကို အထံတော်သို့သွေးဆောင်
၇။ အဘယ်သို့သောလူစားမျိုးကို ယေဟောဝါစောင့်ကြည့်တော်မူသနည်း၊ ထိုသူတို့ကို ကိုယ်တော့်ထံသို့ မည်သို့သွေးဆောင်တော်မူသနည်း။
၇ သူ၏ဆာလံကျမ်းတစ်ပုဒ်တွင် ဒါဝိဒ်ဤသို့ရေးသားခဲ့သည်– “[ယေဟောဝါ] သည် မြင့်မြတ်တော်မူသော်လည်း စိတ်နှိမ့်ချသောသူတို့ကို ကြည့်ရှုတော်မူ၏။ စိတ်မြင့်သောသူတို့ကိုကား အဝေးကသိတော်မူ၏။” (ဆာလံ ၁၃၈:၆) အလားတူ အခြားဆာလံကျမ်းတစ်ပုဒ်က ဤသို့ဆို၏– “ကိုယ်ကိုချီးမြှင့်၍ ကျိန်းဝပ်တော်မူသော်လည်း၊ ကိုယ်ကိုနှိမ့်ချ၍ ကောင်းကင်အရာနှင့် မြေကြီးအရာတို့ကို ကြည့်ရှုတော်မူသော ငါတို့၏ဘုရားသခင်ထာဝရဘုရားနှင့် အဘယ်သူတူသနည်း။ ဆင်းရဲသောသူကို မြေမှုန့်ထဲကကြွလျက်၊ ငတ်မွတ်သောသူကို နောက်ချေးပုံထဲကချီးမြှောက် [တော်မူ၏။]” (ဆာလံ ၁၁၃:၅-၇) မှန်ပါသည်၊ စကြဝဠာ၏ အတိုင်းအဆမဲ့တန်ခိုးတော်ရှိသော ဖန်ဆင်းရှင်သည် ကိုယ်ကိုနှိမ့်ချ၍ မြေကြီးကိုကြည့်ရှုတော်မူပြီး “ပြုသမျှသော စက်ဆုပ်ရွံရှာဖွယ်အမှုတို့ကြောင့် ညည်းတွားငိုကြွေး” ကြသူများဖြစ်သည့် “စိတ်နှိမ့်ချသောသူ၊” “ဆင်းရဲသောသူ” များကိုမြင်တော်မူ၏။ (ယေဇကျေလ ၉:၄) ကိုယ်တော်သည် ထိုသူတို့ကို မိမိ၏သားတော်အားဖြင့် အထံတော်သို့သွေးဆောင်တော်မူ၏။ မြေကြီးပေါ်ရှိစဉ် ယေရှုဤသို့မိန့်ဆိုခဲ့သည်– “ငါ့ကိုစေလွှတ်တော်မူသော ခမည်းတော်သည် သွေးဆောင်တော်မမူလျှင်၊ အဘယ်သူမျှ ငါ့ထံသို့မလာနိုင်။ . . . ငါ၏ခမည်းတော်သည် အခွင့်ပေးတော်မမူလျှင်၊ အဘယ်သူမျှငါ့ထံသို့မလာနိုင်။”—ယောဟန် ၆:၄၄၊ ၆၅။
၈၊ ၉။ (က) ကျွန်ုပ်တို့အားလုံး ယေရှုထံသို့ အဘယ်ကြောင့်ချဉ်းကပ်ဖို့လိုသနည်း။ (ခ) ရွေးနုတ်ဖိုးအစီအစဉ်သည် အဘယ်ကြောင့်အလွန်ထူးမြတ်သနည်း။
၈ လူသားအားလုံးသည် အပြစ်သားများအဖြစ် မွေးဖွားလာကြရာ ဘုရားသခင်နှင့်ကင်းကွာနေကြသောကြောင့် ယေရှုထံချဉ်းကပ်၍ ရွေးဖိုးပူဇော်ရာယဇ်ကို လက်ခံယုံကြည်သင့်သည်။ (ယောဟန် ၃:၃၆) ဘုရားသခင်နှင့် သူတို့ ပြန်လည်သင့်မြတ်ဖို့လိုသည်။ (၂ ကောရိန္သု ၅:၂၀) ဘုရားသခင်နှင့် ငြိမ်သက်မှုရရှိနိုင်ဖို့ စီစဉ်ပေးပါရန် အပြစ်သားများ အသနားခံသည်အထိ ကိုယ်တော်စောင့်နေတော်မမူချေ။ တမန်တော်ပေါလုဤသို့ရေးသားခဲ့သည်– “ငါတို့သည် အပြစ်ရှိ [“အပြစ်သားဖြစ်နေ၊” ကဘ] စဉ်ပင်၊ ခရစ်တော်သည် ငါတို့အတွက်ကြောင့် အသေခံတော်မူသည်ဖြစ်၍၊ ဘုရားသခင်သည် ငါတို့ကို အဘယ်မျှလောက်ချစ်တော်မူသည်ကို ငါတို့အားထင်ရှားစွာပြတော်မူ၏။ . . . အကြောင်းမူကား၊ ရန်သူ [များ] ဖြစ်လျက်ပင် ဘုရားသခင်၏သားတော် အသေခံတော်မူခြင်းအားဖြင့်၊ ငါတို့သည် ဘုရားသခင်နှင့် မိတ်သဟာယဖွဲ့ခြင်းကျေးဇူးတော်ကို ခံရသည်မှန်လျှင်၊ မိတ်သဟာယဖွဲ့ပြီးမှ၊ အသက်တော်အားဖြင့် ကယ်တင်တော်မူခြင်းသို့ရောက်မည်ဟု သာ၍မျှော်လင့်စရာရှိ၏။”—ရောမ ၅:၈၊ ၁၀။
၉ ဘုရားသခင်သည် ကိုယ်တော်နှင့် လူသားတို့ မိတ်သဟာယဖွဲ့နိုင်ရန် စီစဉ်ပေးတော်မူ၏ဟူသော ထူးထူးခြားခြားအမှန်တရားကို တမန်တော်ယောဟန်က ဤသို့အတည်ပြုဖော်ပြခဲ့သည်– “သားတော်အားဖြင့် ငါတို့သည်အသက်ရှင်စေခြင်းငှာ၊ ဘုရားသခင်သည် တစ်ပါးတည်းသောသားတော်ကို ဤလောကသို့စေလွှတ်တော်မူသောအရာ၌၊ ငါတို့ကိုချစ်တော်မူသောမေတ္တာတော်သည် ထင်ရှားလျက်ရှိ၏။ ငါတို့သည် ဘုရားသခင်ကိုချစ်ကြသည်ဟုမဆို။ ဘုရားသခင်သည် ငါတို့ကိုချစ်၍ ငါတို့အပြစ်ဖြေစရာအကြောင်းဖြစ်စေခြင်းငှာ၊ သားတော်ကိုစေလွှတ်တော်မူသောအရာ၌ ချစ်ခြင်းမေတ္တာရှိ၏။” (၁ ယောဟန် ၄:၉၊ ၁၀) လူမဟုတ်ဘဲ ဘုရားသခင်က အစပြုလုပ်ဆောင်ခဲ့ခြင်းဖြစ်သည်။ ‘အပြစ်သားများ’ ဖြစ်ရုံမက ‘ရန်သူများ’ ပင်ဖြစ်သူတို့အတွက် ဤမျှတိုင်မေတ္တာပြသော ဘုရားသခင်ထံ ချဉ်းကပ်ရန် သင်ဆွဲဆောင်ခံရသည်မဟုတ်ပေလော။—ယောဟန် ၃:၁၆။
ယေဟောဝါအားရှာဖို့လို
၁၀၊ ၁၁။ (က) ယေဟောဝါကိုရှာဖို့ ကျွန်ုပ်တို့အဘယ်အရာပြုရမည်နည်း။ (ခ) စာတန့်အစီအစဉ်စနစ်ကို ကျွန်ုပ်တို့မည်သို့ရှုမြင်သင့်သနည်း။
၁၀ ယေဟောဝါသည် ကိုယ်တော့်ထံချဉ်းကပ်ဖို့ ကျွန်ုပ်တို့ကို အတင်းအကျပ်တော့မပြုပါ။ ကိုယ်တော်အား ကျွန်ုပ်တို့ရှာကြရမည်၊ “ဘုရားသခင်ကိုရှာစမ်းသဖြင့် တွေ့ကောင်းတွေ့ကြလိမ့်မည်အကြောင်းတည်း။ သို့ဆိုသော်လည်း၊ ဘုရားသခင်သည် ငါတို့တွင် အဘယ်သူနှင့်မျှဝေးတော်မူသည်မဟုတ်။” (တမန်တော် ၁၇:၂၇) ကိုယ်တော့်ထံ လက်အောက်ခံရန် ယေဟောဝါတောင်းဆိုပိုင်ခွင့်ရှိကြောင်း ကျွန်ုပ်တို့အသိအမှတ်ပြုကြရမည်။ တပည့်တော်ယာကုပ်က ဤသို့ရေးသားခဲ့သည်– “ထို့ကြောင့်၊ ဘုရားသခင်၏ [“အုပ်စိုးတော်မူခြင်းကို ဝန်ခံ၊” သမ္မာ] ကြလော့။ [စာတန်] ကိုဆီးတားကြလော့။ သို့ပြုလျှင်၊ သူသည် သင်တို့ထံကပြေးသွားလိမ့်မည်။ ဘုရားသခင်၌ချဉ်းကပ်ကြလော့။ သို့ပြုလျှင်၊ သင်တို့၌ချဉ်းကပ်တော်မူလိမ့်မည်။ အပြစ်ရှိသောသူတို့၊ သင်တို့လက်ကို စင်ကြယ်စေကြလော့။ စိတ်နှစ်ခွရှိသောသူတို့၊ သင်တို့စိတ်နှလုံးကို သန့်ရှင်းစေကြလော့။” (ယာကုပ် ၄:၇၊ ၈) စာတန်ကို တွန်းလှန်ဆီးတားပြီး ယေဟောဝါဘက် အခိုင်အမာရပ်တည်ဖို့ ကျွန်ုပ်တို့မတွန့်ဆုတ်သင့်ချေ။
၁၁ ဆိုလိုသည်မှာ စာတန်၏ဆိုးညစ်သော အစီအစဉ်စနစ်နှင့် ခပ်ခွာခွာနေရမည်ဖြစ်သည်။ ယာကုပ်ဤသို့လည်း ရေးသားခဲ့သည်– “လော[က]မိတ်သဟာယသည် ဘုရားသခင်နှင့်ဆန့်ကျင်ဘက်ဖြစ်သည်ကို မသိကြသလော။ ဤလောကနှင့်မိတ်သဟာယဖွဲ့သောသူသည် ဘုရားသခင်၏ရန်သူဖြစ်၏။” (ယာကုပ် ၄:၄) အခြားတစ်ဖက်တွင်၊ ယေဟောဝါ၏မိတ်ဆွေများဖြစ်လိုပါက စာတန့်လောက၏ မုန်းတီးခြင်းကို ကျွန်ုပ်တို့ခံရဖို့ အသင့်ရှိကြရမည်။—ယောဟန် ၁၅:၁၉; ၁ ယောဟန် ၃:၁၃။
၁၂။ (က) အဘယ်နှစ်သိမ့်စကားများကို ဒါဝိဒ်ရေးသားခဲ့သနည်း။ (ခ) ယေဟောဝါသည် ပရောဖက်အာဇရိအားဖြင့် အဘယ်သို့သတိပေးခဲ့သနည်း။
၁၂ စာတန့်လောက၏ အတိုက်အခံပြုမှုကို ကျွန်ုပ်တို့တစ်နည်းနည်းဖြင့် ခံရသောအခါ ဆုတောင်းခြင်းဖြင့် ယေဟောဝါ၏အကူအညီကို တောင်းခံလျက် ကိုယ်တော့်ထံချဉ်းကပ်ဖို့ အထူးလိုအပ်သည်။ ယေဟောဝါ၏ကယ်လွှတ်ခြင်းချမ်းသာကို ကြိမ်ဖန်များစွာခံစားခဲ့ရသူ ဒါဝိဒ်သည် ကျွန်ုပ်တို့ကို ဤသို့နှစ်သိမ့်ပေးခဲ့သည်– “ထာဝရဘုရားသည် [ဆုတောင်း] သောသူအပေါင်း၊ [တည်ကြည်မှု] နှင့်တကွ [ဆုတောင်း] သောသူအပေါင်းတို့၏ အနီးအပါး၌ရှိတော်မူ၏။ ကြောက်ရွံ့သောသူတို့၏အလိုကို ပြည့်စုံစေတော်မူ၏။ ထိုသူတို့၏အော်ဟစ်ခြင်းကိုကြား၍ ကယ်တင်တော်မူ၏။ [ယေဟောဝါ] သည် ကြည်ညိုသောသူအပေါင်းတို့ကို စောင့်မတော်မူ၏။ မတရားသောသူအပေါင်းတို့ကိုကား ဖျက်ဆီးတော်မူမည်။” (ဆာလံ ၁၄၅:၁၈-၂၀) ယေဟောဝါသည် ကိုယ်တော်၏လူမျိုး စုံစမ်းနှောင့်ယှက်ခံရသည့်အခါ တစ်ဦးချင်းစီကိုကယ်ဆယ်နိုင်သကဲ့သို့ ‘ကြီးစွာသောဆင်းရဲခြင်း’ ကျရောက်ချိန်တွင် မိမိ၏လူမျိုးတော်ကို အုပ်စုလိုက်အနေနှင့် ကာကွယ်ပေးမည်ဖြစ်ကြောင်း ဤဆာလံသီချင်းက တင်ပြသည်။ (ဗျာ. ၇:၁၄) ယေဟောဝါနှင့် ကျွန်ုပ်တို့နီးနီးကပ်ကပ်နေမည်ဆိုလျှင် ကိုယ်တော်သည် ကျွန်ုပ်တို့အနီးအပါး၌ ရှိပါလိမ့်မည်။ ပရောဖက်အာဇရိသည် ယေဘုယျအမှန်တရားအဖြစ် ကျွန်ုပ်တို့ယူမှတ်နိုင်သော ဤအချက်ကို “ဘုရားသခင်၏ဝိညာဉ်တော်” ညွှန်ကြားခြင်းအားဖြင့် ဖော်ပြခဲ့သည်– “သင်တို့သည် ထာဝရဘုရားဘက်၌နေလျှင် နေစဉ်ကာလ ထာဝရဘုရားသည် သင်တို့နှင့်အတူရှိတော်မူမည်။ ထာဝရဘုရားကိုရှာလျှင် အတွေ့ခံတော်မူမည်။ စွန့်လျှင် သင်တို့ကိုစွန့်တော်မူမည်။”—၂ ရာဇဝင်ချုပ် ၁၅:၁၊ ၂။
ယေဟောဝါသည် ကျွန်ုပ်တို့အတွက် တကယ့်ပုဂ္ဂိုလ်ဖြစ်ရမည်
၁၃။ ယေဟောဝါသည် ကျွန်ုပ်တို့အတွက် တကယ့်ပုဂ္ဂိုလ်ဖြစ်ကြောင်း မည်သို့တင်ပြနိုင်ကြသနည်း။
၁၃ မောရှေသည် “မျက်မြင်မရသောဘုရားသခင်ကို မြင်ရဘိသကဲ့သို့ တည်ကြည်ခြင်းရှိ၏” ဟု တမန်တော်ပေါလုရေးသားခဲ့သည်။ (ဟေဗြဲ ၁၁:၂၇) မောရှေသည် ယေဟောဝါကို ပကတိမျက်စိနှင့် တစ်ခါမျှမမြင်ဖူးခဲ့ပါ။ (ထွက်မြောက်ရာ ၃၃:၂၀) သို့တိုင် ယေဟောဝါကို မြင်ရဘိသကဲ့သို့ ကိုယ်တော်သည် မောရှေအတွက် တကယ့်ပုဂ္ဂိုလ်ဖြစ်ခဲ့သည်။ အလားတူပင်၊ စုံစမ်းနှောင့်ယှက်ခံရပြီးနောက် ယောဘသည် သူ၏ယုံကြည်ခြင်းမျက်စိဖြင့် ယေဟောဝါကို သာ၍ကွဲကွဲပြားပြားသိမြင်ခဲ့သည်၊ ဘုရားသခင်သည် မိမိ၏တည်ကြည်သောကျေးကျွန်များကို စုံစမ်းနှောင့်ယှက်ခံစေသော်လည်း သူတို့ကို ကိုယ်တော်ဘယ်သောအခါမျှ စွန့်ပစ်တော်မမူကြောင်း သိမြင်ခဲ့သည်။ (ယောဘ ၄၂:၅) ဧနောက်နှင့် နောဧတို့သည် ‘ဘုရားသခင်နှင့်အတူသွားလာခဲ့’ သည်ဟုဆို၏။ သူတို့သည် ဘုရားသခင်နှစ်သက်ရာကို ရှာကြံပြုမူပြီး ကိုယ်တော်၏စကားကို နားထောင်ခြင်းအားဖြင့် ထိုသို့ပြုလုပ်ကြသည်။ (ကမ္ဘာဦး ၅:၂၂-၂၄; ၆:၉၊ ၂၂; ဟေဗြဲ ၁၁:၅၊ ၇) ယေဟောဝါသည် ဧနောက်၊ နောဧ၊ ယောဘနှင့် မောရှေတို့အတွက် တကယ့်ပုဂ္ဂိုလ်ဖြစ်ခဲ့သကဲ့သို့ ကိုယ်တော်သည် ကျွန်ုပ်တို့အတွက်လည်း ထိုသို့ဖြစ်မည်ဆိုလျှင် ကျွန်ုပ်တို့သွားလေရာရာ၌ ‘ကိုယ်တော်ကိုမျက်မှောက်ပြု’ ပြီး ကိုယ်တော်သည် “[ကျွန်ုပ်တို့] ၏လမ်းခရီးတို့ကို ပဲ့ပြင်” တော်မူပါလိမ့်မည်။—သု. ၃:၅၊ ၆။
၁၄။ ယေဟောဝါအား “ဆည်းကပ်မှီဝဲ” ခြင်းဟူသည် အဘယ်အဓိပ္ပာယ်ရှိသနည်း။
၁၄ ကတိထားရာပြည်ထဲ ဣသရေလလူမျိုး မဝင်မီကလေးတွင် သူတို့ကို မောရှေဤသို့ညွှန်ကြားခဲ့သည်– “သင်၏ဘုရားသခင် ထာဝရဘုရားနောက်တော်သို့လိုက်ရကြမည်။ ကြောက်ရွံ့သောစိတ်နှင့် ပညတ်တော်တို့ကိုစောင့်ရကြမည်။ စကားတော်ကိုနားထောင်လျက် ဝတ်ပြု၍၊ ကိုယ်တော်၌ဆည်းကပ်မှီဝဲရကြမည်။” (တရားဟောရာ ၁၃:၄) သူတို့သည် ယေဟောဝါနောက်တော်သို့လိုက်၍၊ ကိုယ်တော်အား ကြောက်ရွံ့၊ နာခံပြီး ကိုယ်တော်၌ဆည်းကပ်မှီဝဲကြရမည်ဖြစ်သည်။ ဤတွင် “ဆည်းကပ်မှီဝဲ” ဟုဘာသာပြန်ဆိုထားသော စကားလုံးနှင့်ပတ်သက်၍ ကျမ်းပညာရှင်တစ်ဦးက “၎င်းဝေါဟာရသည် အလွန်ရင်းနှီးကျွမ်းဝင်သောဆက်ဆံရေးကို ဖော်ပြသည်” ဟုဆို၏။ ဆာလံဆရာက “ထာဝရဘုရားကိုကြောက်ရွံ့သောသူတို့သည် ကိုယ်တော်မြတ်နှင့် မိတ်သဟာယဖွဲ့ရသောအခွင့် . . . ရှိကြ၏” ဟုဖော်ပြသည်။ (ဆာလံ ၂၅:၁၄) ယေဟောဝါသည် ကျွန်ုပ်တို့အတွက် တကယ့်ပုဂ္ဂိုလ်ဖြစ်မည်ဆိုလျှင်၊ ကိုယ်တော့်စိတ်တော်နှင့်မတွေ့မည်ကို စိုးရိမ်သည့်အထိ ကိုယ်တော်အား ကျွန်ုပ်တို့ အလွန်ချစ်ကြမည်ဆိုလျှင် ယေဟောဝါနှင့်ရင်းနှီးသော ဤအထူးမြတ်နိုးဖွယ်ဆက်ဆံရေး ကျွန်ုပ်တို့၌ ရှိပါလိမ့်မည်။—ဆာလံ ၁၉:၉-၁၄။
သတိနှင့် ယေဟောဝါကြည့်ရှုတော်မူကြောင်း သင်ခံစားရသလော
၁၅၊ ၁၆။ (က) ကျွန်ုပ်တို့ကို ယေဟောဝါသတိနှင့်ကြည့်ရှုတော်မူကြောင်း ဆာလံ ၃၄ ကမည်သို့ဖော်ပြသနည်း။ (ခ) ကျွန်ုပ်တို့အတွက် ယေဟောဝါပြုတော်မူသည့် ကောင်းမြတ်သောအမှုများကို သတိရဖို့ခက်မည်ဆိုလျှင် အဘယ်အရာပြုလုပ်သင့်သနည်း။
၁၅ စာတန်၏စဉ်းလဲသောလုပ်ရပ်တစ်ခုမှာ ကျွန်ုပ်တို့၏ဘုရားသခင်၊ ယေဟောဝါသည် မိမိ၏တည်ကြည်သောကျေးကျွန်များကို အစဉ်မပြတ် သတိနှင့်ကြည့်ရှုနေတော်မူကြောင်းကို မေ့လျော့သွားစေဖို့ဖြစ်သည်။ ဣသရေလရှင်ဘုရင်ဒါဝိဒ်သည် ကြောက်မက်ဖွယ်အကောင်းဆုံးအချိန်တစ်ချိန်ကို ကြုံရသောအခါ၌ပင် ယေဟောဝါ၏ အကာအကွယ်ရကြောင်း ကောင်းစွာသိမြင်ခဲ့သည်။ ဂါသမင်းကြီးအာခိတ်ရှေ့ ရူးသွပ်ဟန်ဆောင်ခဲ့ရသောအခါ ယုံကြည်ခြင်းတင်ပြချက်များပါဝင်သော အလွန်လှပသည့် ဤဆာလံသီချင်းတစ်ပိုဒ်ကို သူစပ်ဆိုခဲ့သည်– “ငါနှင့်အတူ ထာဝရဘုရားကိုချီးမွမ်းကြလော့။ နာမတော်ကို တညီတညွတ်တည်းချီးမြှောက်ကြကုန်အံ့။ ငါသည် ထာဝရဘုရားကိုရှာသောအခါ နားထောင်တော်မူ၏။ ကြောက်မက်ဖွယ်သောအကြောင်းအလုံးစုံတို့အထဲက ငါ့ကိုကယ်နုတ်တော်မူ၏။ ထာဝရဘုရားကိုကြောက်ရွံ့သောသူတို့ပတ်လည်၌ ကောင်းကင်တမန်တော်တို့သည် တပ်ချ၍ ကယ်လွှတ်တတ်ကြ၏။ ထာဝရဘုရားသည် ကောင်းမြတ်တော်မူကြောင်းကို မြည်းစမ်း၍သိမှတ်ကြလော့။ ကိုယ်တော်ကိုခိုလှုံသောသူသည် မင်္ဂလာရှိ၏။ ထာဝရဘုရားသည် ကျိုးပဲ့သောစိတ်ရှိသောသူတို့နှင့် နှလုံးကြေကွဲသောသူတို့ကိုနီးတော်မူ၏။ နောင်တရှိ၍ စိတ်နှိမ့်ချသောသူတို့ကိုလည်း ကယ်တင်တော်မူ၏။ ဖြောင့်မတ်သောသူသည် များစွာသော . . . ဆင်းရဲကိုခံရသော်လည်း ထာဝရဘုရားသည် ခပ်သိမ်းသော . . . ဆင်းရဲထဲက ကယ်လွှတ်တော်မူ၏။”—ဆာလံ ၃၄:၃၊ ၄၊ ၇၊ ၈၊ ၁၈၊ ၁၉; ၁ ဓမ္မရာဇဝင် ၂၁:၁၀-၁၅။
၁၆ ယေဟောဝါ၏ကယ်တင်နိုင်စွမ်းကို သင်ယုံကြည်စိတ်ချပါသလော။ ကိုယ်တော်၏ကောင်းကင်တမန်များ ကာကွယ်ပေးနေကြောင်းကို သင်သိပါသလော။ ယေဟောဝါသည် ကောင်းမြတ်တော်မူကြောင်း သင်ကိုယ်တိုင် မြည်းစမ်းခဲ့ရပြီလော။ ယေဟောဝါ၏ကောင်းမြတ်ခြင်းကို သင်အထူးခံစားခဲ့ရသော နောက်ဆုံးအကြိမ်ကား အဘယ်နည်း။ မှတ်မိရန် ကြိုးစားကြည့်ပါ။ ဓမ္မအမှု၌ သင်ဆက်မလုပ်ဆောင်နိုင်တော့ဟု အထင်ရှိခဲ့စဉ် နောက်ဆုံးအိမ်သို့ဝင်ခဲ့ချိန်၌လော။ ထိုစဉ်က အိမ်ရှင်နှင့် သင်ကောင်းကောင်း စကားပြောဆိုဆွေးနွေးခွင့်ရခဲ့ပေမည်။ ထိုအခိုက် သင်လိုအပ်နေသော ခွန်အားကို ယေဟောဝါပေးခဲ့၍ သင့်အပေါ် ကောင်းချီးသွန်းလောင်းခဲ့သောကြောင့် ကိုယ်တော်အားကျေးဇူးတင်ကြောင်း ပြောဆိုခဲ့ပါသလော။ (၂ ကောရိန္သု ၄:၇) တစ်ဖက်တွင်မူ သင့်အတွက် ယေဟောဝါလုပ်ဆောင်ပေးခဲ့သော ကောင်းမှုတစ်စုံတစ်ရာကို မမှတ်မိဘဲနေပေမည်။ လွန်ခဲ့သောအပတ်၊ လွန်ခဲ့သောလ၊ လွန်ခဲ့သောနှစ် သို့မဟုတ် ထိုထက်မကပင် သင်စဉ်းစားနေရပေမည်။ ထိုသို့ဖြစ်ပါက ယေဟောဝါနှင့် သာ၍အကျွမ်းဝင်ဖို့နှင့် ကိုယ်တော်သည် သင့်ကို မည်သို့လမ်းပြညွှန်ကြားကြောင်း သိမြင်ဖို့ကြိုးစားပါ။ တမန်တော်ပေတရုက ခရစ်ယာန်များကို ဤသို့တိုက်တွန်းခဲ့သည်– “ဘုရားသခင် [၏] . . . တန်ခိုးကြီးသောလက်တော်အောက်၌ ကိုယ်ကိုကိုယ်နှိမ့်ချကြလော့။ သင်တို့ကို သတိနှင့်ကြည့်ရှုတော်မူသောကြောင့်၊ သင်တို့၌စိုးရိမ်ခြင်းအမှုရှိသမျှတို့ကို ကိုယ်တော်၌အပ်နှံကြလော့။” (၁ ပေတရု ၅:၆၊ ၇) အမှန်ဆိုလျှင် သင့်ကို ကိုယ်တော်မည်မျှတိုင် သတိနှင့်ကြည့်ရှုသည်ကို သင်အံ့အားသင့်သွားပါလိမ့်မည်!—ဆာလံ ၇၃:၂၈။
ယေဟောဝါအား ဆက်ရှာဖွေလော့
၁၇။ ယေဟောဝါကို ကျွန်ုပ်တို့ဆက်၍ရှာနေဖို့ဆိုလျှင် အဘယ်အရာလိုအပ်သနည်း။
၁၇ ယေဟောဝါနှင့် ဆက်ဆံရေး အစဉ်အမြဲကောင်းနေဖို့ ကျွန်ုပ်တို့အမြဲကြိုးစားရမည်။ ခမည်းတော်ထံ ယေရှုဤသို့ဆုတောင်းခဲ့သည်– “ထာဝရအသက်ဟူမူကား၊ မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။” (ယောဟန် ၁၇:၃) ယေဟောဝါအကြောင်း၊ ကိုယ်တော့်သားတော်အကြောင်း အသိပညာတိုးများလာရန် ကျွန်ုပ်တို့အစဉ်မပြတ်ကြိုးစားဖို့လိုသည်။ “ဘုရားသခင်၏နက်နဲသောအရာ” များကို ကျွန်ုပ်တို့နားလည်သဘောပေါက်ဖို့ ဆုတောင်းခြင်းနှင့် သန့်ရှင်းသောဝိညာဉ်တော်၏အကူအညီ လိုအပ်သည်။ (၁ ကောရိန္သု ၂:၁၀; လုကာ ၁၁:၁၃) ကျွန်ုပ်တို့၏စိတ်ကိုကျွေးမွေးရန် “အချိန်တန်” ဝိညာဉ်အစာပေးသော ‘သစ္စာနှင့်သတိပညာရှိကျေးကျွန်’ ၏လမ်းညွှန်မှုကိုလည်း ကျွန်ုပ်တို့လိုအပ်သည်။ (မဿဲ ၂၄:၄၅) ထိုဆက်သွယ်ရာလမ်းကြောင်းမှတစ်ဆင့် ယေဟောဝါသည် ကိုယ်တော်၏နှုတ်မြွက်စကားတော်ကို နေ့စဉ်ဖတ်ရှုရန်၊ ခရစ်ယာန်အစည်းအဝေးများကို မှန်မှန်တက်ရောက်ရန်နှင့် “[ဘုရားသခင့်] နိုင်ငံတော်နှင့်ယှဉ်သော ဧဝံဂေလိတရားကို” ဟောပြောခြင်းလုပ်ငန်း၌ အဓိပ္ပာယ်ရှိရှိပါဝင်ရန် ကျွန်ုပ်တို့ကိုဆုံးမပေးတော်မူပြီ။ (မဿဲ ၂၄:၁၄) ထိုသို့ပြုခြင်းအားဖြင့် ကျွန်ုပ်တို့အား သတိနှင့်ကြည့်ရှုနေတော်မူသော ဘုရားသခင်၊ ယေဟောဝါကို ကျွန်ုပ်တို့ဆက်၍ရှာနေကြမည်။
၁၈၊ ၁၉။ (က) အဘယ်အရာပြုလုပ်ဖို့ ကျွန်ုပ်တို့စိတ်ပိုင်းဖြတ်သင့်သနည်း။ (ခ) စာတန်ကို အခိုင်အမာဆန့်ကျင်တွန်းလှန်ပြီး ယေဟောဝါကို ဆက်ရှာနေကြမည်ဆိုလျှင် အဘယ်ကောင်းချီးများ ခံစားရမည်နည်း။
၁၈ စာတန်သည် ယေဟောဝါ၏လူမျိုးအပေါ်သို့ နှိပ်စက်ညှဉ်းပန်းမှု၊ အတိုက်အခံပြုမှုနှင့် အဘက်ဘက်မှ ဖိအားပေးမှုများကျရောက်စေဖို့ အစွမ်းကုန်ကြိုးပမ်းလျက်ရှိသည်။ ကျွန်ုပ်တို့၏ငြိမ်သက်မှုကို ပြိုကွဲစေပြီး ဘုရားသခင်နှင့် ကျွန်ုပ်တို့၏ကောင်းသောရပ်တည်မှုကို ဖျက်ဆီးဖို့ သူကြိုးပမ်းလျက်ရှိသည်။ စိတ်ရိုးဖြောင့်သူများကိုရှာဖွေပြီး စကြဝဠာပိုင်သအုပ်စိုးမှု အရေးကိစ္စတွင် ယေဟောဝါဘက်ရပ်တည်လာရန် သူတို့ကိုကူညီပေးခြင်းလုပ်ငန်း၌ ကျွန်ုပ်တို့ဆက်လုပ်ဆောင်သည်ကို သူမလိုလားပါ။ သို့သော် ယေဟောဝါသည် ကျွန်ုပ်တို့ကို မတရားသောသူ၏လက်မှ ကယ်နုတ်မည်ဟု ယုံကြည်စိတ်ချလျက် ကိုယ်တော်အားတည်ကြည်ကြဖို့ စိတ်ပိုင်းဖြတ်ထားကြရမည်။ ဘုရားသခင့်နှုတ်မြွက်စကားတော်၏ လမ်းညွှန်မှုကိုခံယူပြီး ကိုယ်တော်၏မျက်မြင်ရအဖွဲ့အစည်းနှင့် ရင်ပေါင်တန်းနေခြင်းအားဖြင့် ကျွန်ုပ်တို့ကို ကိုယ်တော်အစဉ်ထောက်မတော်မူမည်ဟု ယုံကြည်စိတ်ချနိုင်ပါသည်။—ဟေရှာယ ၄၁:၈-၁၃။
၁၉ ထို့ကြောင့်၊ ‘ကျွန်ုပ်တို့ကိုတည်ကြည်ခိုင်ခံ့၊ သန်စွမ်းစေ’ မည့် ကျွန်ုပ်တို့ချစ်မြတ်နိုးသောဘုရားသခင်၊ ယေဟောဝါကို အစဉ်ရှာကာ စာတန်နှင့် သူ၏စဉ်းလဲသောလုပ်ရပ်များကို ကျွန်ုပ်တို့အားလုံး အခိုင်အမာဆန့်ကျင်တွန်းလှန်ကြပါစို့။ (၁ ပေတရု ၅:၈-၁၁) သို့ဖြင့် ကျွန်ုပ်တို့သည် ‘ထာဝရအသက်အလိုငှာ သခင်ယေရှုခရစ်၏ သနားကြင်နာမှုကို စောင့်မျှော်လျက် ဘုရားသခင်၏ချစ်ခြင်းမေတ္တာ၌ ကိုယ်ကိုစောင့်ရှောက်၍နေကြ’ မည်။—ယုဒ ၂၁၊ သမ္မာ။
သင်မည်သို့ဖြေဆိုမည်နည်း
• Devil (နတ်ဆိုးမင်း) အတွက် ဂရိစကားလုံးသည် အဘယ်အဓိပ္ပာယ်ရှိသနည်း၊ စာတန်သည် အဆိုပါထူးခြားသောဘွဲ့အမည်နှင့် မည်သို့ကိုက်ညီသနည်း။
• မြေကြီးသားများကို ယေဟောဝါရှုမြင်ပုံသည် စာတန်နှင့် မည်သို့ကွာခြားသနည်း။
• ယေဟောဝါထံ ချဉ်းကပ်ရာတွင် ရွေးနုတ်ဖိုးကို အဘယ်ကြောင့်လက်ခံရမည်နည်း။
• ယေဟောဝါအား “ဆည်းကပ်မှီဝဲ” ခြင်းဟူသည် အဘယ်အရာကိုဆိုလိုသနည်း၊ ကိုယ်တော့်ကို ကျွန်ုပ်တို့မည်သို့ ဆက်ရှာနိုင်သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
စုံစမ်းနှောင့်ယှက်မှုများကို ခံရလျက်ကယ် မိမိကို ယေဟောဝါ သတိနှင့်ကြည့်ရှုတော်မူကြောင်း ယောဘသိနားလည်ခဲ့
[စာမျက်နှာ ၁၆၊ ၁၇ ပါ ရုပ်ပုံ]
ကျမ်းစာကိုနေ့စဉ်ဖတ်ရှုခြင်း၊ ခရစ်ယာန် အစည်းအဝေးများကို မှန်မှန်တက်ရောက်ခြင်းနှင့် ဟောပြောခြင်းလုပ်ငန်း၌ ဇွဲရှိရှိပါဝင်ခြင်းတို့က ကျွန်ုပ်တို့ကို ယေဟောဝါသတိနှင့်ကြည့်ရှုနေ တော်မူကြောင်း သတိရစေ