နောက်ဆုံးကာလတွင် ကြားနေသောခရစ်ယာန်များ
နောက်ဆုံးကာလတွင် ကြားနေသောခရစ်ယာန်များ
“အကျွန်ုပ်သည် ဤလောကနှင့်မဆက်ဆံသကဲ့သို့ ဤသူတို့သည် မဆက်ဆံကြပါ။”—ယောဟန် ၁၇:၁၆။
၁၊ ၂။ ဤလောကနှင့် နောက်တော်လိုက်များ၏ဆက်ဆံရေးအကြောင်း ယေရှုအဘယ်သို့ဆိုခဲ့သနည်း၊ ကိုယ်တော်၏စကားက အဘယ်မေးခွန်းများကို ပေါ်ပေါက်စေသနည်း။
ယေရှုသည် ကိုယ်တော်၏စုံလင်သောလူသားဘဝ နောက်ဆုံးညတွင် ရှည်လျားသောဆုတောင်းချက်တစ်ခုကို တပည့်များရှိနေစဉ် မြွက်ဆိုခဲ့၏။ အဆိုပါဆုတောင်းချက်ထဲတွင် ခရစ်ယာန်စစ်အားလုံး၏ အသက်တာကိုဖော်ပြသည့် အကြောင်းအရာတစ်ခု ကိုယ်တော်မိန့်ဆိုခဲ့သည်။ နောက်တော်လိုက်များနှင့်စပ်လျဉ်း၍ ကိုယ်တော်ဤသို့မိန့်ဆို၏– “ကိုယ်တော်၏နှုတ်[မြွက်]တရားကို ဤသူတို့အား အကျွန်ုပ်ပေးပါပြီ။ အကျွန်ုပ်သည် ဤလောကနှင့်မဆက်ဆံသကဲ့သို့ ဤသူတို့သည် မဆက်ဆံသောကြောင့်၊ လော[က]သားတို့သည် ဤသူတို့ကိုမုန်းကြပါ၏။ ဤသူတို့ကို ဤလောကမှနုတ်ယူတော်မူမည်အကြောင်း အကျွန်ုပ်တောင်းသည်မဟုတ်ပါ။ မကောင်းသောအမှုအရာနှင့် ကင်းလွတ်စေခြင်းငှာ စောင့်မတော်မူမည်အကြောင်းကိုသာ တောင်းပါ၏။ အကျွန်ုပ်သည် ဤလောကနှင့်မဆက်ဆံသကဲ့သို့ ဤသူတို့သည်မဆက်ဆံကြပါ။”—ယောဟန် ၁၇:၁၄-၁၆။
၂ ယေရှု၏နောက်လိုက်များသည် ဤလောကနှင့်ဆက်ဆံမည်မဟုတ်ကြောင်း နှစ်ကြိမ်တိုင် ကိုယ်တော်မြွက်ဆိုခဲ့သည်။ ထို့အပြင် ထိုသို့သီးခြားနေခြင်းကြောင့် လောက၏မုန်းတီးမှုကိုခံရပြီး တင်းမာမှုများဖြစ်ပေါ်လိမ့်မည်ဖြစ်သည်။ သို့တိုင် ခရစ်ယာန်များသည် တုန်လှုပ်ချောက်ချားစရာမလိုပါ; သူတို့ကို ယေဟောဝါကာကွယ်စောင့်ရှောက်တော်မူလိမ့်မည်။ (သု. ၁၈:၁၀; မဿဲ ၂၄:၉၊ ၁၃) ယေရှု၏စကားကိုထောက်ပြီး ကျွန်ုပ်တို့ ဤသို့မေးကောင်းမေးပေမည်– ‘ခရစ်ယာန်စစ်များသည် အဘယ်ကြောင့် လောကနှင့်မဆက်ဆံကြသနည်း။ ဤလောကနှင့်မဆက်ဆံခြင်းဟူသည် အဘယ်အရာကိုဆိုလိုသနည်း။ ခရစ်ယာန်များသည် လောက၏မုန်းတီးခြင်း ခံရမည်ဆိုလျှင် လောကကို သူတို့မည်သို့ရှုမြင်ကြသနည်း။ အထူးသဖြင့် လောကအစိုးရများကို သူတို့မည်သို့ရှုမြင်ကြသနည်း။’ ဤမေးခွန်းများကို ကျမ်းစာဖြေဆိုပုံသည် ကျွန်ုပ်တို့အားလုံးနှင့်သက်ဆိုင်သောကြောင့် အရေးပါ၏။
“ငါတို့သည် ဘုရားသခင်နှင့်စပ်ဆိုင်”
၃။ (က) အဘယ်အရာက ကျွန်ုပ်တို့ကို လောကနှင့်သီးခြားဖြစ်စေသနည်း။ (ခ) လောကသားအပေါင်းသည် ‘စာတန်၏လက်၌ရှိ’ ကြောင်း မည်သို့ထင်ရှားသနည်း။
၃ ကျွန်ုပ်တို့သည် ယေဟောဝါနှင့် ရင်းနှီးသောဆက်ဆံရေးရှိသောကြောင့် ဤလောကနှင့် ကျွန်ုပ်တို့မဆက်ဆံနိုင်ကြခြင်းဖြစ်သည်။ တမန်တော်ယောဟန်က “ငါတို့သည် ဘုရားသခင်နှင့်စပ်ဆိုင်သည်ကိုလည်းကောင်း၊ လော[က]သားအပေါင်းတို့သည် [စာတန်] ၏လက်၌ရှိကြသည်ကိုလည်းကောင်း ငါတို့သိကြ၏” ဟုရေးသားခဲ့သည်။ (၁ ယောဟန် ၅:၁၉) လောကနှင့်ပတ်သက်သော ယောဟန်၏စကားသည် မှန်ကန်ကြောင်း ထင်ရှားလှသည်။ ယနေ့ နေရာအနှံ့ ဖြစ်ပျက်နေသော စစ်မက်များ၊ ရာဇဝတ်မှု၊ ရက်စက်မှု၊ ဖိနှိပ်မှု၊ မရိုးသားမှုနှင့် အကျင့်ယိုယွင်းမှုတို့သည် ဘုရားသခင်ထံမှမဟုတ်ဘဲ စာတန်၏လွှမ်းမိုးမှုကြောင့်ဖြစ်ကြောင်း ထင်ရှားသည်။ (ယောဟန် ၁၂:၃၁; ၂ ကောရိန္သု ၄:၄; ဧဖက် ၆:၁၂) လူတစ်ဦး ယေဟောဝါသက်သေ ဖြစ်လာသည့်အခါ သူသည် မှားယွင်းသော ဤအကျင့်များကို ပြုကျင့်တော့မည်မဟုတ်၊ သဘောတူလိုက်လျောမည်လည်း မဟုတ်ချေ၊ ထို့ကြောင့် သူသည် ဤလောကနှင့်မစပ်ဆိုင်သူ ဖြစ်လာလေသည်။—ရောမ ၁၂:၂; ၁၃:၁၂-၁၄; ၁ ကောရိန္သု ၆:၉-၁၁; ၁ ယောဟန် ၃:၁၀-၁၂။
၄။ ကျွန်ုပ်တို့သည် ယေဟောဝါ၏ပိုင်ဆိုင်ရာဖြစ်ကြောင်း အဘယ်နည်းများဖြင့် တင်ပြကြသနည်း။
၄ ခရစ်ယာန်များသည် လောကနှင့်မတူဘဲ “ဘုရားသခင်နှင့်စပ်ဆိုင်ကြသည်” ဟုယောဟန်ဆိုခဲ့သည်။ ကိုယ့်ကိုယ်ကို ယေဟောဝါထံဆက်ကပ်အပ်နှံသူအားလုံး ကိုယ်တော့်ပိုင်ဆိုင်ရာဖြစ်သည်။ ယင်းကြောင့် တမန်တော်ပေါလုက ဤသို့ဆိုခဲ့သည်– “အသက်ရှင်လျှင်၊ [ယေဟောဝါ] အဖို့အလိုငှာအသက်ရှင်၏။ သေလျှင်လည်း၊ [ယေဟောဝါ] အဖို့အလိုငှာသေ၏။ ထို့ကြောင့် အသက်ရှင်သည်ဖြစ်စေ၊ သေသည်ဖြစ်စေ၊ [“ယေဟောဝါပိုင်၊” ကဘ] ဆိုင်တော်မူ၏။” (ရောမ ၁၄:၈; ဆာလံ ၁၁၆:၁၅) ကျွန်ုပ်တို့သည် ယေဟောဝါ၏ပိုင်ဆိုင်ရာဖြစ်ကြသောကြောင့် ကိုယ်တော်အား ကျွန်ုပ်တို့အကြွင်းမဲ့ဆက်ကပ်ဝတ်ပြုကြသည်။ (ထွက်မြောက်ရာ ၂၀:၄-၆) ထို့ကြောင့် ခရစ်ယာန်စစ်တစ်ဦးသည် မိမိ၏ဘဝကို လောကရည်မှန်းချက်များ၌ မြှုပ်နှံမထားချေ။ နိုင်ငံတော်အထိမ်းအမှတ်များကို သူရိုသေလေးစားသော်လည်း ၎င်းတို့ကို အပြုအမူအားဖြင့်ဖြစ်စေ၊ စိတ်ဖြင့်ဖြစ်စေ ဝတ်ပြုကိုးကွယ်မည်မဟုတ်။ အားကစားအကျော်အမော်များ၊ အခြားခေတ်ပေါ် အသည်းစွဲရသူများကိုလည်း သူစွဲစွဲလမ်းလမ်းဖြစ်မည်မဟုတ်ချေ။ အခြားသူများ ကိုယ်ကြိုက်ရာလုပ်ပိုင်ခွင့်ရှိသည်ကို သူလေးစားသည်မှန်သော်လည်း သူမူကား ဖန်ဆင်းရှင်ကိုသာ ဝတ်ပြုကိုးကွယ်ပေမည်။ (မဿဲ ၄:၁၀; ဗျာ. ၁၉:၁၀) ဤအချက်ကလည်း လောကနှင့် သူ့ကိုသီးခြားဖြစ်စေသည်။
“ငါ၏နိုင်ငံသည် ဤလောကနှင့်မစပ်ဆိုင်”
၅၊ ၆။ ဘုရားသခင့်နိုင်ငံတော်ကို လက်အောက်ခံခြင်းက ကျွန်ုပ်တို့ကို မည်သို့လောကနှင့်သီးခြားဖြစ်စေသနည်း။
၅ ခရစ်ယာန်များသည် ခရစ်တော်ယေရှု၏နောက်တော်လိုက်များဖြစ်ကြပြီး ဘုရားသခင့်နိုင်ငံတော် လက်အောက်ခံများဖြစ်ကြ၏၊ ယင်းက သူတို့ကို ဤလောကနှင့်မစပ်ဆိုင်စေပါ။ ယေရှုသည် ပုန္တိပိလတ်မင်းရှေ့ အမှုစစ်ခံရသောအခါ ကိုယ်တော် ဤသို့မိန့်တော်မူခဲ့သည်– “ငါ၏နိုင်ငံသည် ဤလောကနှင့်မစပ်ဆိုင်။ ငါ၏နိုင်ငံသည် ဤလောကနှင့်စပ်ဆိုင်လျှင်၊ ငါသည် ယုဒလူတို့လက်သို့မရောက်စေခြင်းငှာ ငါ၏လူတို့သည်တိုက်လှန်ကြလိမ့်မည်။ ယခုမူကား ငါ၏နိုင်ငံသည် ဤဒေသအရပ်နှင့်မစပ်ဆိုင်။” (ယောဟန် ၁၈:၃၆) ဘုရားသခင့်နိုင်ငံတော်အားဖြင့် ယေဟောဝါ၏နာမတော်သည် အထွတ်အမြတ်ထားခံရလိမ့်မည်၊ ကိုယ်တော်၏ပိုင်သအုပ်စိုးမှုကိုလည်း သံသယဖြစ်ကြတော့မည်မဟုတ်၊ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာ ပြည့်စုံလာပါလိမ့်မည်။ (မဿဲ ၆:၉၊ ၁၀) ယေရှုအမှုတော်ဆောင်စဉ်တစ်လျှောက် ကိုယ်တော်သည် ဘုရားသခင်၏နိုင်ငံတော်သတင်းကောင်းကို ဟောပြောတော်မူခဲ့ပြီး ဤအစီအစဉ်စနစ်ကုန်ဆုံးသည့်အထိ ကိုယ်တော်၏နောက်လိုက်များ ၎င်းကိုကြေညာကြလိမ့်မည်ဟု မိန့်ဆိုခဲ့သည်။ (မဿဲ ၄:၂၃; ၂၄:၁၄) ၁၉၁၄ ခုနှစ်တွင် ဗျာဒိတ် ၁၁:၁၅ ပါဤပရောဖက်ပြုချက်စကားများ ပြည့်စုံခဲ့သည်– ‘လောကနိုင်ငံသည် ငါတို့အရှင်၏နိုင်ငံဖြစ်လေပြီ။ ထိုအရှင်၏ ခရစ်တော်နိုင်ငံဖြစ်လေပြီ။ သူသည်လည်း ကမ္ဘာအဆက်ဆက်စိုးစံတော်မူမည်။’ များမကြာမီ အဆိုပါကောင်းကင်နိုင်ငံတော်သည် လူသားတို့အပေါ် အုပ်စိုးသည့် တစ်ခုတည်းသောအာဏာပိုင်ဖြစ်လိမ့်မည်။ (ဒံယေလ ၂:၄၄၊ ၄၅) တစ်စုံတစ်ရာသောအချိန်တွင် လောကအုပ်စိုးရှင်များပင်လျှင် ယင်း၏အခွင့်အာဏာကို မဖြစ်မနေအသိအမှတ်ပြုကြရလိမ့်မည်။—ဆာလံ ၂:၆-၁၂။
၆ ဤအရာအားလုံးကို စိတ်စွဲမှတ်လျက် ယနေ့ ခရစ်ယာန်စစ်များသည် ဘုရားသခင့်နိုင်ငံတော်ကို လက်အောက်ခံကြပြီး ‘ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ဆက်၍ရှေးဦးရှာနေ’ ကြပါဟူသော ယေရှု၏ညွှန်ကြားချက်ကို လိုက်နာကြသည်။ (မဿဲ ၆:၃၃) ဤသို့ပြုကြခြင်းကြောင့် သူတို့နေထိုင်ရာတိုင်းနိုင်ငံကို သစ္စာပျက်သည်မဟုတ်ပါ၊ သို့သော် သူတို့ကို ဝိညာဉ်ရေးအရ ဤလောကနှင့် အမှန်ပင်သီးခြားဖြစ်စေပါသည်။ ပထမရာစုမှာကဲ့သို့ မျက်မှောက်ခေတ်ခရစ်ယာန်များ၏ အဓိကတာဝန်မှာ “ဘုရားသခင့်နိုင်ငံတော်အကြောင်းကို သက်သေခံ” ဖို့ဖြစ်သည်။ (တမန်တော် ၂၈:၂၃) အဆိုပါဘုရားပေးတာဝန်ကို အဘယ်လူ့အစိုးရမျှ တားမြစ်ခွင့်မရှိပေ။
၇။ ခရစ်ယာန်စစ်များသည် အဘယ်ကြောင့်ကြားနေကြသနည်း၊ ယင်းကို သူတို့မည်သို့တင်ပြခဲ့ကြပြီနည်း။
၇ ယေဟောဝါ၏ပိုင်ဆိုင်ရာဖြစ်ပြီး ယေရှု၏နောက်တော်လိုက်များနှင့် ဘုရားသခင့်နိုင်ငံတော် လက်အောက်ခံများ ဖြစ်သည်နှင့်အညီ ယေဟောဝါသက်သေများသည် ၂၀ နှင့် ၂၁ ရာစုများ၏ နိုင်ငံရေးနှင့် အပြည်ပြည်ဆိုင်ရာ ပဋိပက္ခများတွင် ကြားနေခဲ့ကြပြီ။ သူတို့သည် မည်သည့်ဘက်တွင်မျှမနေကြ၊ တိုက်ခိုက်ဖို့ လက်နက်မကိုင်ဆောင်ခဲ့ကြ၊ မည်သည့်လောကအရေးအတွက်မျှ ဝါဒဖြန့်မှုမပြုခဲ့ကြချေ။ သူတို့သည် မခံမရပ်နိုင်လောက်အောင် အတိုက်အခံများသည့်ကြားမှ ယုံကြည်ခြင်းကို ထူးခြားစွာတင်ပြခဲ့ခြင်းဖြင့် ၁၉၃၄ ခုနှစ်တွင် နာဇီဂျာမနီအုပ်စိုးရှင်များကို ပြောဆိုခဲ့သော ဤမူများအတိုင်း လိုက်လျှောက်ခဲ့ကြသည်– “ကျွန်ုပ်တို့သည် နိုင်ငံရေးတွင် စိတ်မဝင်စားပါ၊ ခရစ်တော်ဘုရင်လက်အောက်ရှိ ဘုရားသခင့်နိုင်ငံတော်ကိုသာ စိတ်နှလုံးအကြွင်းမဲ့ အပ်နှံထားကြပါသည်။ မည်သူ့ကိုမျှ ကျွန်ုပ်တို့ထိခိုက်၊ နစ်နာစေမည်မဟုတ်ပါ။ အေးချမ်းငြိမ်သက်စွာ ကျွန်ုပ်တို့နေထိုင်ကြပြီး အခွင့်အရေးရသ၍ လူအားလုံးကို ကောင်းမှုပြုလိုကြသည်။”
ခရစ်တော်၏ သံအမတ်များနှင့် သံတမန်များ
၈၊ ၉။ ယနေ့ ယေဟောဝါသက်သေများသည် အဘယ်နည်းဖြင့် သံအမတ်များနှင့် သံတမန်များဖြစ်ကြသနည်း၊ ယင်းကြောင့် တိုင်းနိုင်ငံများနှင့် သူတို့၏ဆက်ဆံရေးသည် မည်သို့ရှိသနည်း။
၈ ပေါလုသည် မိမိကိုယ်ကိုလည်းကောင်း၊ ဝိညာဉ်တော်ဖွားခရစ်ယာန်ရောင်းရင်းများကိုလည်းကောင်း ရည်ညွှန်း၍ ဤသို့ဖော်ပြသည်– “ငါတို့အားဖြင့် ဘုရားသခင်နှိုးဆော်တော်မူသည့်သဖွယ်၊ ခရစ်တော်၏သံတမန် [“သံအမတ်၊” ကဘ] များ” ဖြစ်ကြ၏။ (၂ ကောရိန္သု ၅:၂၀၊ သမ; ဧဖက် ၆:၂၀) ၁၉၁၄ ခုနှစ်ကတည်းက ဝိညာဉ်တော်ဖွားခရစ်ယာန်များကို ဘုရားသခင့်နိုင်ငံတော် သံအမတ်များဟု သင့်လျော်စွာခေါ်ဆိုနိုင်ပါသည်၊ သူတို့သည် ထိုနိုင်ငံတော်၏ ‘သားများ’ ဖြစ်ကြသည်။ (မဿဲ ၁၃:၃၈; ဖိလိပ္ပိ ၃:၂၀; ဗျာ. ၅:၉၊ ၁၀) ထို့အပြင် ဝိညာဉ်တော်ဖွားသားများ၏ သံအမတ်လုပ်ငန်းကို ထောက်မကူညီပေးရန် မြေကြီးမျှော်လင့်ချက်ရှိ ခရစ်ယာန်များဖြစ်သော၊ “အခြားသိုး” အဝင် “လူအုပ်ကြီး” ကို လူမျိုးအပေါင်းမှ ယေဟောဝါ နုတ်ယူခေါ်ဆောင်လာခဲ့ပြီ။ (ဗျာ. ၇:၉; ယောဟန် ၁၀:၁၆) ဤ “အခြားသိုး” တို့ကို ဘုရားသခင့်နိုင်ငံတော်၏ “သံတမန်များ” ဟု ခေါ်ဆိုနိုင်ပါသည်။
၉ သံအမတ်တစ်ဦးနှင့် သူ၏တမန်များသည် သူတို့အမှုထမ်းရာတွင် ရောက်ရှိနေသောနိုင်ငံ၏ နိုင်ငံရေးကိစ္စများတွင် ဝင်ရောက်စွက်ဖက်ခြင်းမပြုကြချေ။ အလားတူ ခရစ်ယာန်များသည် လောကတိုင်းနိုင်ငံများ၏ နိုင်ငံရေးကိစ္စရပ်များတွင် ကြားနေကြသည်။ သူတို့သည် မည်သည့်နိုင်ငံ၊ မည်သည့်လူမျိုး၊ လူမှုရေး သို့မဟုတ် စီးပွားရေးအုပ်စုဘက်တွင် ရပ်တည်ခြင်း သို့မဟုတ် ဆန့်ကျင်ခြင်းမပြုကြချေ။ (တမန်တော် ၁၀:၃၄၊ ၃၅) ထိုသို့ပြုမည့်အစား သူတို့သည် “ခပ်သိမ်းသောသူတို့အား ကျေးဇူး [“ကောင်းမှု၊” ကဘ] ပြုကြ” သည်။ (ဂလာတိ ၆:၁၀) ယေဟောဝါသက်သေများသည် ကြားနေကြသည်၊ ဤကြားနေမှုကြောင့် သူတို့သည် တစ်ဖက်လူမျိုးတစ်မျိုး၊ နိုင်ငံတစ်ခု၊ လူမျိုးစုတစ်စုဘက်ပါသည်ဟုဆိုပြီး သူတို့၏သတင်းတရားကို မည်သူကမျှ မှန်မှန်ကန်ကန်မငြင်းဆိုနိုင်ပေ။
ချစ်ခြင်းမေတ္တာအားဖြင့် ခွဲခြားဖော်ပြ
၁၀။ ခရစ်ယာန်တစ်ဦးအတွက် ချစ်ခြင်းမေတ္တာသည် မည်မျှအရေးပါသနည်း။
၁၀ အထက်ပါအကြောင်းအပြင်၊ ခရစ်ယာန်ချင်းတို့နှင့် မိမိတို့၏ဆက်ဆံရေးကြောင့် ဤခရစ်ယာန်များသည် လောကအရေးကိစ္စများ၌ ကြားနေကြခြင်းဖြစ်သည်။ ယေရှုက မိမိ၏နောက်လိုက်များအား ဤသို့မိန့်ဆိုခဲ့သည်– “သင်တို့သည် အချင်းချင်းချစ်ကြလျှင်၊ လူအပေါင်းတို့သည် ထိုမေတ္တာကိုထောက်၍ သင်တို့သည် ငါ၏တပည့်ဖြစ်သည်ကို သိရကြလိမ့်မည်။” (ယောဟန် ၁၃:၃၅) ညီအစ်ကိုချင်းမေတ္တာသည် ခရစ်ယာန်တစ်ဦးဖြစ်ခြင်း၏ အရေးပါသောအမှတ်အသားဖြစ်သည်။ (၁ ယောဟန် ၃:၁၄) ခရစ်ယာန်တစ်ဦးသည် ယေဟောဝါနှင့်လည်းကောင်း၊ ယေရှုနှင့်လည်းကောင်း ဆက်ဆံရေးရှိသကဲ့သို့ အခြားခရစ်ယာန်များနှင့်လည်း အလွန်ရင်းနှီးချစ်ခင်သော ဆက်ဆံရေးရှိသည်။ သူသည် ဒေသခံအသင်းတော်ရှိသူများကိုသာ ချစ်ဖို့မဟုတ်ပါ။ ‘လောက၌ရှိသော [သူ၏] ညီအစ်ကိုအသင်းအပင်းတစ်ခုလုံး’ ကိုချစ်ရမည်ဖြစ်သည်။—၁ ပေတရု ၅:၉။
၁၁။ ယေဟောဝါသက်သေများ၏ အမူအကျင့်ကို သူတို့အချင်းချင်းချစ်ခြင်းက မည်သို့သြဇာလွှမ်းမိုးသနည်း။
၁၁ ယနေ့ ယေဟောဝါသက်သေများသည် ဟေရှာယ ၂:၄ ပါဤစကားများကိုပြည့်စုံစေခြင်းဖြင့် သူတို့၏ညီအစ်ကိုချင်းမေတ္တာကို တင်ပြကြသည်– “သူတို့ဓားလက်နက်များကို ထွန်သွားဖြစ်စေခြင်းငှာလည်းကောင်း၊ လှံများကိုတံစဉ်ဖြစ်စေခြင်းငှာလည်းကောင်း ထုလုပ်ကြလိမ့်မည်။ တစ်ပြည်ကိုတစ်ပြည်စစ်မတိုက်၊ စစ်အတတ်ကိုလည်း နောက်တစ်ဖန်မသင်ရကြ။” ယေဟောဝါ၏သွန်သင်မှုကို ခံကြရသဖြင့် စစ်မှန်သောခရစ်ယာန်များသည် ဘုရားသခင်နှင့်လည်းကောင်း၊ လူလူချင်းနှင့်လည်းကောင်း ငြိမ်သက်မှုရှိကြ၏။ (ဟေရှာယ ၅၄:၁၃) ဘုရားသခင်ကိုလည်းကောင်း၊ ညီအစ်ကိုချင်းကိုလည်းကောင်း သူတို့ချစ်ကြသောကြောင့် အခြားနိုင်ငံများရှိ ခရစ်ယာန်ချင်းများကိုသာမက အခြားမည်သူ့ကိုမျှ တိုက်ခိုက်ဖို့ လက်နက်များကိုင်ဆောင်ရန် သူတို့စဉ်းစား၍မရနိုင်ကြချေ။ သူတို့၏ငြိမ်သက်မှုနှင့် စည်းလုံးမှုသည် သူတို့၏ဝတ်ပြုကိုးကွယ်ရေး၏ အရေးပါသောအခန်းကဏ္ဍတစ်ခုဖြစ်ပြီး သူတို့၌ ဘုရားသခင့်ဝိညာဉ်တော် အမှန်ရှိကြောင်း ထင်ရှားစေသည်။ (ဆာလံ ၁၃၃:၁; မိက္ခာ ၂:၁၂; မဿဲ ၂၂:၃၇-၃၉; ကောလောသဲ ၃:၁၄) “[ယေဟောဝါ] သည် ဖြောင့်မတ်သောသူတို့ကို ကြည့်ရှုတော်မူ” ကြောင်း သူတို့သိထားကြရာ “ငြိမ်သက်ခြင်းကိုရှာ၍ မီအောင်လိုက်” ကြ၏။—ဆာလံ ၃၄:၁၄၊ ၁၅၊ သမ္မာ။
လောကကို ခရစ်ယာန်များရှုမြင်ပုံ
၁၂။ လောကသားများအပေါ် ယေဟောဝါ၏ အဘယ်သဘောထားကို ယေဟောဝါသက်သေများ တုပကြသနည်း၊ မည်သို့အားဖြင့်နည်း။
၁၂ ဤလောကကို ယေဟောဝါ ဒဏ်စီရင်ချက်ချမှတ်ပြီးဖြစ်သော်လည်း လောကသားတစ်ဦးချင်းစီ အားလုံးကိုကား ကိုယ်တော်တရားမစီရင်ရသေးပါ။ ယင်းကို ကိုယ်တော်သတ်မှတ်ထားချိန်၌ ယေရှုမှတစ်ဆင့် ကိုယ်တော်ပြုတော်မူလိမ့်မည်။ (ဆာလံ ၆၇:၃၊ ၄; မဿဲ ၂၅:၃၁-၄၆; ၂ ပေတရု ၃:၁၀) ဤအတောအတွင်း ကိုယ်တော်သည် လူသားတို့အပေါ် ကြီးမားသောမေတ္တာကို ပြတော်မူ၏။ လူတိုင်း ထာဝရအသက်ရနိုင်ဖို့ မိမိ၏တစ်ပါးတည်းသောသားတော်ကိုပင် စွန့်တော်မူခဲ့ပြီ။ (ယောဟန် ၃:၁၆) ခရစ်ယာန်များအနေနှင့် ကျွန်ုပ်တို့သည် လူအပေါင်း ကယ်တင်ခြင်းရရန် ဘုရားသခင့်ပြင်ဆင်ပေးချက်များအကြောင်း သူတစ်ပါးကို ကြိုးစားပြောပြရာတွင် မကြာခဏငြင်းပယ်ခံရဦးတော့ ဘုရားသခင့်မေတ္တာတော်ကို တုပပြီး ဆက်ပြောဟောကြသည်။
၁၃။ လောကအုပ်စိုးရှင်များကို ကျွန်ုပ်တို့ မည်သို့ရှုမြင်သင့်သနည်း။
၁၃ လောကအုပ်စိုးရှင်များကို ကျွန်ုပ်တို့မည်သို့ရှုမြင်သင့်သနည်း။ ထိုမေးခွန်းကို ပေါလုဤသို့ရေးသားဖြေဆိုခဲ့သည်– “အစိုးရသော မင်းအာဏာစက်၏ အုပ်စိုးခြင်းကို လူတိုင်းဝန်ခံစေ။ အကြောင်းမူကား၊ ဘုရားသခင်၏အခွင့်မရှိလျှင်၊ မင်းအာဏာစက်မရှိ။ အာဏာစက်ရှိသမျှသည် ဘုရားသခင် [“အားဖြင့် အခွင့်အာဏာအထိုက်အလျောက်ရှိကြ၊” ကဘ] သတည်း။” (ရောမ ၁၃:၁၊ ၂) အတိုင်းအဆမဲ့တန်ခိုးရှင်ဘုရားသခင် ခွင့်ပြုထားသောကြောင့် လူသားတို့သည် (အချင်းချင်းနှင့်ပတ်သက်၍ အာဏာပိုကြီးသည်၊ အာဏာလျော့နည်းသည်ရှိသော်လည်း ယေဟောဝါထက် အစဉ်နိမ့်ကျသည့်) အခွင့်အာဏာ “အထိုက်အလျောက်” ကို သူတို့ရရှိထားကြသည်။ လောကအာဏာပိုင်များကို ခရစ်ယာန်တစ်ဦး လက်အောက်ခံခြင်းသည် ယေဟောဝါအား နာခံခြင်း၏ သွင်ပြင်လက္ခဏာတစ်ရပ်ဖြစ်သည်။ သို့ရာတွင် ဘုရားသခင့်တောင်းဆိုချက်များသည် လူ့အစိုးရ၏တောင်းဆိုချက်များနှင့် ဆန့်ကျင်ဖီလာဖြစ်နေလျှင်ကော မည်သို့နည်း။
ဘုရားသခင့်ဥပဒေနှင့် ကဲသာ၏ဥပဒေ
၁၄၊ ၁၅။ (က) နာခံခြင်းကိစ္စနှင့်ပတ်သက်၍ သဘောထားကွဲလွဲမှုကို ဒံယေလသည် အဘယ်နည်းဖြင့် ရှောင်နိုင်ခဲ့သနည်း။ (ခ) နာခံခြင်းကိစ္စနှင့်ပတ်သက်၍ သဘောထားကွဲလွဲမှုကို မရှောင်နိုင်သောအခါ ဟေဗြဲသုံးဦးတို့သည် မည်သို့ရပ်တည်ခဲ့ကြသနည်း။
၁၄ ဒံယေလနှင့် သူ့အဖော်သုံးဦးသည် လူ့အစိုးရများကို လက်အောက်ခံရင်း ဘုရားသခင့်အခွင့်အာဏာကို လက်အောက်ခံတတ်ရန် ပုံသက်သေကောင်းပြခဲ့သည်။ ဟေဗြဲလူငယ်လေးဦးတို့သည် ဗာဗုလုန်တွင်ပြည်နှင်ခံရစဉ် သူတို့သည် ထိုနိုင်ငံ၏ဥပဒေများကိုနာခံခဲ့ကြရာ အထူးသင်တန်းတစ်ခုတက်ရန် ချက်ချင်းရွေးချယ်ခံခဲ့ရသည်။ အဆိုပါသင်တန်းသည် ယေဟောဝါ၏ဥပဒေနှင့် ကွဲလွဲဆန့်ကျင်နိုင်ဖွယ်ရှိမည်ကို ဒံယေလသိရှိထားရာ ထိုကိစ္စကို ကိုင်တွယ်ရသော တာဝန်ခံအရာရှိနှင့် ဆွေးနွေးခဲ့သည်။ ယင်းကြောင့် ထိုဟေဗြဲလေးဦး၏ ကိုယ်ကိုကိုယ်သိသောစိတ်ကိုလေးစားရန် အထူးအစီအစဉ်များ ပြုလုပ်ပေးခဲ့ကြသည်။ (ဒံယေလ ၁:၈-၁၇) ယေဟောဝါသက်သေများသည် မလိုအပ်သောပြဿနာများကိုရှောင်ရှားရန် မိမိတို့၏ရှုမြင်ပုံကို မင်းအရာရှိများအား လိမ္မာပါးနပ်စွာ ရှင်းပြကြသောအခါ ဒံယေလကိုတုပကြသည်။
၁၅ သို့သော် နောက်တစ်ကြိမ်တွင်မူ လက်အောက်ခံခြင်းကိစ္စနှင့်ပတ်သက်၍ သဘောထားကွဲလွဲမှုကို မရှောင်ရှားနိုင်ခဲ့ချေ။ ဗာဗုလုန်ရှင်ဘုရင်သည် ဒုရလွင်ပြင်တွင် ရုပ်တုကြီးတစ်ခုကိုစိုက်ထူပြီး စီရင်စုနယ်ဝန်မင်းအပေါင်းတို့အပါအဝင် ဘုရင်ခံချုပ်မင်းများကို ယင်း၏ဖွင့်ပွဲအတွက် စုရုံးလာကြရန် အမိန့်ပေးခဲ့သည်။ ထိုအချိန်တွင် ဒံယေလ၏မိတ်ဆွေသုံးဦးမှာ ဗာဗုလုန်ဝန်မင်းများအဖြစ် ခန့်အပ်ခံရပြီးဖြစ်ရာ ၎င်းအမိန့်သည် သူတို့နှင့်လည်း သက်ဆိုင်လျက်ရှိသည်။ အခမ်းအနားကျင်းပစဉ် အချိန်တစ်ချိန်တွင် စုရုံးနေကြသူအားလုံး ရုပ်တုရှေ့ ဦးညွှတ်ကြရမည်ဖြစ်သည်။ သို့သော် ထိုသို့ပြုခြင်းသည် ဘုရားသခင့်ဥပဒေနှင့်ဆန့်ကျင်မည်ကို ဟေဗြဲလူများသိထားကြသည်။ (တရားဟောရာ ၅:၈-၁၀) ထို့ကြောင့် လူတိုင်းဦးညွှတ်ပျပ်ဝပ်ကြသောအခါ သူတို့သည် မတ်တတ်ရပ်မြဲ ရပ်နေကြ၏။ ရှင်ဘုရင်၏အမိန့်ကိုမနာခံခြင်းဖြင့် သူတို့သည် ကြောက်မက်ဖွယ်ကောင်းသော အသက်ဘေးကိုရင်ဆိုင်ခဲ့ရကြပြီး အံ့ဖွယ်နည်းတစ်ခုဖြင့်သာ အသက်ဘေးမှလွတ်ခဲ့ကြသည်; သို့သော် သူတို့သည် ယေဟောဝါအား မနာခံဖို့ရွေးမည့်အစား သေဘေးကိုရင်ဆိုင်ဖို့ ရွေးချယ်ခဲ့ကြသည်။—ဒံယေလ ၂:၄၉–၃:၂၉။
၁၆၊ ၁၇။ မဟောပြောဖို့ အမိန့်ပေးခံရသောအခါ တမန်တော်များ မည်သို့တုံ့ပြန်ခဲ့ကြသနည်း၊ အဘယ်ကြောင့်နည်း။
၁၆ ပထမရာစုတွင် ယေရှုခရစ်၏တမန်တော်များသည် ယေရုရှလင်မြို့ရှိ ဂျူးခေါင်းဆောင်များထံလာရန် ဆင့်ခေါ်ခံရပြီး ယေရှု၏နာမဖြင့် မဟောရဟု တားမြစ်ခံရကြသည်။ သူတို့ မည်သို့တုံ့ပြန်ခဲ့ကြသနည်း။ လူမျိုးတကာတို့ကို တပည့်ဖြစ်စေရမည်ဟု သူတို့ကို ယေရှုမိန့်မှာထားရာ ယုဒပြည်တွင်လည်း ဟောရမည်ဖြစ်သည်။ ထို့အပြင် ယေရုရှလင်မြို့မှစ၍ မြေကြီးစွန်းတိုင်အောင် ကိုယ်တော်၏သက်သေများဖြစ်ကြရမည်ဟု ကိုယ်တော်မိန့်မှာတော်မူခဲ့သည်။ (မဿဲ ၂၈:၁၉၊ ၂၀; တမန်တော် ၁:၈) ယေရှုသည် မိမိတို့နှင့်ပတ်သက်သည့် ဘုရားသခင့်အလိုတော်ကို မိန့်မှာနေကြောင်း တမန်တော်များသိခဲ့ကြသည်။ (ယောဟန် ၅:၃၀; ၈:၂၈) ထို့ကြောင့် သူတို့က “လူ၏စကားထက် ဘုရားသခင်၏စကားတော်ကို နားထောင်သင့်ပါ၏” ဟုပြောခဲ့ကြသည်။—တမန်တော် ၄:၁၉၊ ၂၀; ၅:၂၉။
၁၇ တမန်တော်များသည် ပုန်ကန်နေကြခြင်းမဟုတ်ပါ။ (သု. ၂၄:၂၁) သို့သော် ဘုရားသခင့်အလိုတော်ဆောင်ခြင်းကို လူ့အုပ်စိုးရှင်များက တားမြစ်ပိတ်ပင်ကြသောအခါ ‘ကျွန်ုပ်တို့သည် လူကိုမဟုတ်ဘဲ ဘုရားသခင်ကိုနာခံရကြမည်’ ဟု သူတို့ပြောဖို့သာရှိသည်။ ယေရှုက ကျွန်ုပ်တို့သည် ‘ကဲသာဘုရင်၏ဥစ္စာကို ကဲသာဘုရင်အား ဆက်ပေးကြကာ ဘုရားသခင်၏ဥစ္စာကိုကား၊ ဘုရားသခင်အား ဆက်ပေး’ ရမည်ဟု မိန့်ကြားခဲ့သည်။ (မာကု ၁၂:၁၇) လူတစ်ဦး၏အပြောကြောင့် ဘုရားသခင့်အမိန့်ကို ကျွန်ုပ်တို့လွန်ဆန်ပါက ကျွန်ုပ်တို့သည် ဘုရားသခင့်ပိုင်ဆိုင်ရာကို လူတို့အား ပေးရာရောက်သွားမည်။ ထိုသို့မပြုဘဲ ယေဟောဝါ၏အမြင့်မြတ်ဆုံးအခွင့်အာဏာကို ကျွန်ုပ်တို့အသိအမှတ်ပြုကာ ကဲသာအား ပေးထိုက်ရာမှန်သမျှကို ကျွန်ုပ်တို့ပေးကြသည်။ ကိုယ်တော်သည် အကြွင်းမဲ့ပိုင်သအုပ်စိုးရှင်၊ ဖန်ဆင်းရှင်၊ အခွင့်အာဏာရင်းမြစ်ဖြစ်တော်မူ၏။—ဗျာ. ၄:၁၁။
ကျွန်ုပ်တို့အခိုင်အမာရပ်တည်ကြမည်
၁၈၊ ၁၉။ ကျွန်ုပ်တို့၏ညီအစ်ကိုများစွာသည် စံထားလောက်စွာ မည်သို့ရပ်တည်ခဲ့ကြပြီနည်း၊ သူတို့၏ပုံသက်သေကို ကျွန်ုပ်တို့မည်သို့ အတုယူနိုင်မည်နည်း။
၁၈ ယခုအခါ လောကအစိုးရအများစုသည် ယေဟောဝါသက်သေများ၏ ကြားနေမှုကို အသိအမှတ်ပြုကြပြီး ထို့အတွက် ကျွန်ုပ်တို့ကျေးဇူးတင်ပါသည်။ အချို့နိုင်ငံများတွင်မူ သက်သေခံများသည် ပြင်းထန်သောအတိုက်အခံပြုမှုကို ရင်ဆိုင်ရကြသည်။ ၂၀ ရာစုတစ်လျှောက်နှင့် လက်ရှိအချိန်အထိ ကျွန်ုပ်တို့၏ညီအစ်ကို၊ ညီအစ်မအချို့သည် ရုန်းကန်လှုပ်ရှားခဲ့ကြပြီး ဝိညာဉ်ရေးသဘောအရ “ယုံကြည်ခြင်းနှင့်ဆိုင်၍ ကောင်းစွာသောတိုက်လှန်ခြင်းကို” တိုက်လှန်နေကြရသည်။—၁ တိမောသေ ၆:၁၂။
၁၉ သူတို့နည်းတူ ကျွန်ုပ်တို့ မည်သို့အခိုင်အမာရပ်တည်နိုင်ကြမည်နည်း။ ဦးဆုံး ကျွန်ုပ်တို့သတိရကြမည်မှာ ကျွန်ုပ်တို့သည် အတိုက်အခံပြုခံရဖို့ အကြောင်းရှိသည်။ ထို့ကြောင့် အတိုက်အခံပြုခံရလျှင် ကြောက်လန့်မှိုင်တွေစရာ၊ အံ့အားသင့်စရာမလိုပါ။ တိမောသေကို ပေါလုဤသို့သတိပေးခဲ့သည်– ‘ယေရှုခရစ်၏တရားတော်နှင့်အညီ၊ ဘုရားသခင်ဝတ်၌မွေ့လျော်၍နေခြင်းငှာ အလိုရှိသောသူအပေါင်းတို့သည် ညှဉ်းဆဲခြင်းကိုခံရကြလိမ့်မည်။’ (၂ တိမောသေ ၃:၁၂; ၁ ပေတရု ၄:၁၂) စာတန့်သြဇာလွှမ်းနေသော ဤလောကတွင် အတိုက်အခံပြု မခံရဘဲ မည်သို့ဖြစ်နိုင်မည်နည်း။ (ဗျာ. ၁၂:၁၇) ကျွန်ုပ်တို့တည်ကြည်နေသ၍ ‘ကျွန်ုပ်တို့ကိုအံ့သြပြီး ကဲ့ရဲ့’ မည့်သူ အစဉ်ရှိပါလိမ့်မည်။—၁ ပေတရု ၄:၄။
၂၀။ ခွန်အားရှိစေသော အဘယ်အမှန်တရားကို ကျွန်ုပ်တို့သတိပေးခံရကြသနည်း။
၂၀ ဒုတိယအနေနှင့် ယေဟောဝါနှင့် ကိုယ်တော်၏ကောင်းကင်တမန်များသည် ကျွန်ုပ်တို့ကိုထောက်မမည်ဟု ယုံကြည်စိတ်ချကြသည်။ ရှေးခေတ်မှဧလိရှဲ ပြောခဲ့သည့်အတိုင်းပင် “ငါတို့ဘက်၌နေသောသူတို့သည် ရန်သူတို့ဘက်၌နေသောသူတို့ထက် သာ၍များကြသည်။” (၄ ဓမ္မရာဇဝင် ၆:၁၆; ဆာလံ ၃၄:၇) ယေဟောဝါသည် ကိုယ်တော်၏ရည်ရွယ်ချက်ကောင်းအတွက် ဆန့်ကျင်သူများ၏ဖိနှိပ်မှုကို ခေတ္တခံခွင့်ပြုထားခြင်း ဖြစ်ကောင်းဖြစ်မည်။ သို့ရာတွင် ကျွန်ုပ်တို့ခံရပ်နိုင်ရန် လိုအပ်သောခွန်အားကို ကိုယ်တော်အစဉ်ပေးသနားတော်မူလိမ့်မည်။ (ဟေရှာယ ၄၁:၉၊ ၁၀) အချို့သူများသည် အသက်ဆုံးရှုံးခဲ့ကြရပြီဖြစ်သော်လည်း ယင်းက ကျွန်ုပ်တို့ကို မတုန်လှုပ်စေပါ။ ယေရှုက “ကိုယ်ခန္ဓာကိုသာသတ်၍ စိတ်ဝိညာဉ်ကိုမသတ်နိုင်သောသူတို့ကို မကြောက်ကြနှင့်။ ကိုယ်ခန္ဓာနှင့်စိတ်ဝိညာဉ်ကို ငရဲ၌ဖျက်ဆီးနိုင်သောသူကို သာ၍ကြောက်ကြလော့” ဟုမိန့်တော်မူခဲ့သည်။ (မဿဲ ၁၀:၁၆-၂၃၊ ၂၈) ဤအစီအစဉ်စနစ်တွင် ကျွန်ုပ်တို့သည် “ဧည့်သည်အာဂန္တု” များသာဖြစ်ကြသည်။ ဤတွင် ကျွန်ုပ်တို့ရှိနေသ၍ ဘုရားသခင့်ကမ္ဘာသစ်တွင်ရမည့် ထာဝရအသက်ဖြစ်သည့် “မှန်သောအသက်ကို ဝင်စား” နိုင်ရန် ကြိုးစားလျက်ရှိကြသည်။ (၁ ပေတရု ၂:၁၁; ၁ တိမောသေ ၆:၁၉) ဘုရားသခင်ကို ကျွန်ုပ်တို့တည်ကြည်နေသရွေ့ ထိုဆုကျေးဇူးကို မည်သူမျှ လုယူမသွားနိုင်ပါ။
၂၁။ အဘယ်အရာကို ကျွန်ုပ်တို့စိတ်ထဲ အစဉ်စွဲမှတ်ထားသင့်သနည်း။
၂၁ ထို့ကြောင့် ယေဟောဝါဘုရားသခင်နှင့် ကျွန်ုပ်တို့ဆက်ဆံခွင့်ရရှိထားခြင်းကို သတိရကြပါစို့။ ခရစ်တော်၏နောက်လိုက်များနှင့် ဘုရားသခင့်နိုင်ငံတော် လက်အောက်ခံများ ဖြစ်ကြရသည့် အကျိုးကျေးဇူးကို အစဉ်ကျေးဇူးတင်လေးမြတ်ကြပါစို့။ ကျွန်ုပ်တို့၏ညီအစ်ကိုများကို စိတ်နှလုံးအကြွင်းမဲ့ချစ်ကြစို့၊ သူတို့ထံမှရသောမေတ္တာ၌လည်း ကျွန်ုပ်တို့အစဉ် မွေ့လျော်နေနိုင်ကြပါစေ။ ထို့ထက်ကား၊ ဆာလံဆရာ၏ ဤစကားများကို နာယူကြပါစို့– “[ယေဟောဝါ] ကိုမျှော်လင့်လော့။ အားယူ၍ ရဲရင့်သောစိတ်နှလုံးရှိလော့။ [ယေဟောဝါ] ကို မျှော်လင့်လျက်နေလော့။” (ဆာလံ ၂၇:၁၄; ဟေရှာယ ၅၄:၁၇) သို့ပြုလျှင် ကျွန်ုပ်တို့ခေတ်မတိုင်မီက မရေမတွက်နိုင်သောခရစ်ယာန်များကဲ့သို့ ကျွန်ုပ်တို့သည်ဤလောကနှင့်မဆက်ဆံကြသော တည်ကြည်သည့် ကြားနေခရစ်ယာန်များအဖြစ် ကျွန်ုပ်တို့၏ မျှော်လင့်ချက်သေချာလျက် အခိုင်အမာ ရပ်တည်နိုင်ကြပါလိမ့်မည်။
သင်ရှင်းပြနိုင်သလော
• ယေဟောဝါနှင့် ကျွန်ုပ်တို့၏ဆက်ဆံရေးက ဤလောကနှင့် ကျွန်ုပ်တို့ကို မည်သို့သီးခြားဖြစ်စေသနည်း။
• ဘုရားသခင့်နိုင်ငံတော်လက်အောက်ခံများအနေနှင့် ဤလောကတွင် ကျွန်ုပ်တို့ မည်သို့ကြားနေကြသနည်း။
• ညီအစ်ကိုများကိုချစ်သည့်မေတ္တာက အဘယ်နည်းများဖြင့် ကျွန်ုပ်တို့ကို ကြားနေစေ၍ ဤလောကနှင့် သီးခြားဖြစ်စေသနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
ဘုရားသခင့်နိုင်ငံတော်အား လက်အောက်ခံ ခြင်းက လောကနှင့် ကျွန်ုပ်တို့၏ဆက်ဆံရေးအပေါ် မည်သို့သက်ရောက်မှုရှိသနည်း
[စာမျက်နှာ ၁၆ ပါ ရုပ်ပုံ]
ဟူတူလူမျိုးတစ်ဦးနှင့် တွတ်စီလူမျိုးတစ်ဦး အတူတကွပျော်ရွှင်စွာအလုပ်လုပ်ဆောင်နေ
[စာမျက်နှာ ၁၇ ပါ ရုပ်ပုံ]
ဂျူးနှင့် အာရပ် ခရစ်ယာန်ညီအစ်ကိုများ
[စာမျက်နှာ ၁၇ ပါ ရုပ်ပုံ]
ဆားဗီးယား၊ ဘော့စနီးယားနှင့် ခရိုအေးရှားခရစ်ယာန်များ အချင်းချင်းပေါင်းဖော် ပျော်မွေ့နေကြ
[စာမျက်နှာ ၁၈ ပါ ရုပ်ပုံ]
အုပ်စိုးရှင်များက ဘုရားသခင့်ဥပဒေကိုချိုးဖောက်ရန် ကျွန်ုပ်တို့ကို အမိန့်ပေးသောအခါ လမ်းစဉ်မှန်ကား အဘယ်နည်း