စာရှုသူများထံမှမေးခွန်းလွှာ
စာရှုသူများထံမှမေးခွန်းလွှာ
ဘုရားသခင်ထံပြုသော သစ္စာကတိများသည် အစဉ်ချည်နှောင်ထားသလော။
သမ္မာကျမ်းစာအရ သစ္စာကတိပြုခြင်းဟူသည် လုပ်ရပ်တစ်ခုလုပ်ဆောင်ရန်၊ ဆက်သပူဇော်ရန်၊ လုပ်ငန်းတစ်ခု၊ သို့မဟုတ် အခြေအနေတစ်ခုသို့ဝင်ရန်၊ သို့တည်းမဟုတ် တရားဝင်သောအရာများဖြစ်သော်လည်း အရာအချို့ကိုရှောင်ရန် ဘုရားသခင်ထံ အလေးအနက်ကတိပြုခြင်းဖြစ်သည်။ ဘုရားသခင်က တစ်စုံတစ်ရာကို ဦးဆုံးပြုခဲ့ပါလျှင် ၎င်းပေါ်မူတည်ပြီး ဖော်ပြပါလမ်းစဉ်တစ်ခုကို မိမိတို့လိုက်လျှောက်မည်ဟု သစ္စာကတိပြုခဲ့ခြင်းများအကြောင်း သမ္မာကျမ်းစာကဖော်ပြထားသည်။ ဥပမာ၊ ပရောဖက်ရှမွေလ၏မိခင် ဟန္နက “‘အိုကောင်းကင်ဗိုလ်ခြေအရှင်ထာဝရဘုရား၊ ကိုယ်တော်၏ကျွန်မကိုမေ့လျော့တော်မမူဘဲ . . . သားယောက်ျားကိုပေးသနားတော်မူလျှင်၊ သူ၏ဆံပင်ရိတ်ခြင်းကို အလျှင်းမပြု။ တစ်သက်လုံးထာဝရဘုရား၏ကျွန်ဖြစ်စေခြင်းငှာ ကျွန်မအပ်ပါမည်’ ဟု သစ္စာကတိပြုလေ၏။” (၁ ဓမ္မရာဇဝင် ၁:၁၁) စိတ်လိုကိုယ်လျောက်ပြုသည့် သစ္စာကတိပြုချက်များကိုလည်း သမ္မာကျမ်းစာကဖော်ပြပါသည်။ ကျမ်းစာဆိုင်ရာသစ္စာကတိပြုချက်များသည် အဘယ်မျှတိုင် ချည်နှောင်ထားသနည်း။
“ဘုရားသခင်ထံတော်၌ သစ္စာကတိပြုမိလျှင် သစ္စာဝတ်ကိုမဖြေဘဲမနေနှင့်” ဟု ရှေးခေတ်ဣသရေလရှင်ဘုရင် ရှောလမုန်ကဆို၏။ သူဤသို့ထပ်ဆင့်သည်– “သစ္စာကတိပြုသည်အတိုင်း ဝတ်ကိုဖြေလော့။ သစ္စာကတိပြု၍ ဝတ်ကိုမဖြေဘဲနေသည်ထက် သစ္စာကတိအလျှင်းမပြုဘဲနေသော် သာ၍ကောင်း၏။” (ဒေ. ၅:၄၊ ၅) မောရှေမှတစ်ဆင့် ဣသရေလလူမျိုးကိုပေးခဲ့သော ပညတ်တရားကဤသို့ဆိုသည်– “သင်၏ဘုရားသခင် [ယေဟောဝါ] အား သစ္စာကတိထားလျှင် ထားသည်အတိုင်းမပြုဘဲမနေရ။ သင်၏ဘုရားသခင်ထာဝရဘုရားသည် ဧကန်အမှန်တောင်းတော်မူမည်။ သင်သည် မပြုဘဲနေလျှင် အပြစ်ရောက်လိမ့်မည်။” (တရားဟောရာ ၂၃:၂၁) ဘုရားသခင်ထံ သစ္စာကတိပြုခြင်းသည် အလေးအနက်ထားစရာကိစ္စဖြစ်သည်မှာ ရှင်းပါသည်။ ယင်းကို စိတ်ရင်းမှန်ဖြင့်ပြုသင့်သည်၊ သစ္စာကတိပြုသူသည်လည်း ပြုထားသမျှ ကတိကဝတ်အတိုင်းပြုရန် မိမိ၌အရည်အချင်းပြည့်မီကြောင်း သေချာသိထားသင့်သည်။ သို့မဟုတ်လျှင် သစ္စာကတိမပြုဘဲနေပါက ပိုကောင်းမည်။ သို့သော် သစ္စာကတိပြုသည်နှင့် ၎င်းကတိပြုချက်အားလုံးသည် ချည်နှောင်ထားသလော။
မိမိပြုခဲ့သောသစ္စာကတိသည် ဘုရားသခင့်အလိုတော်နှင့်မညီကြောင်း နောက်ပိုင်းမှ သိရှိလာလျှင် မည်သို့ပြုမည်နည်း။ စစ်မှန်သောဝတ်ပြုရေးနှင့် အကျင့်ယိုယွင်းမှုကို တစ်နည်းနည်းဖြင့် ဆက်စပ်ထားသည့် ကတိကဝတ်တစ်ခုဖြစ်သည်ဆိုပါစို့။ (တရားဟောရာ ၂၃:၁၈) ဤသို့သော ကတိပြုချက်သည် အတည်မဖြစ်နိုင်ကြောင်း သိသာထင်ရှားပါသည်။ ထို့အပြင် မောရှေပညတ်အောက်တွင် အမျိုးသမီးတစ်ဦးပြုခဲ့သော သစ္စာကတိကို သူ၏ဖခင် သို့မဟုတ် သူ၏လင်ယောက်ျားက ပျက်ပြယ်စေနိုင်သည်။—တောလည်ရာ ၃၀:၃-၁၅။
တစ်ကိုယ်ရေတစ်ကာယနေဖို့ ဘုရားသခင်ထံ သစ္စာကတိပြုထားပြီး ယခု အကျပ်ရိုက်နေသော လူတစ်ဦး၏အဖြစ်ကိုလည်း သုံးသပ်ကြည့်ပါ။ သူ၏သစ္စာကတိအတိုင်း နေထိုင်ခြင်းက ကိုယ်ကျင့်တရားဆိုင်ရာ ဘုရားသခင့်စံနှုန်းများကို ချိုးဖောက်ခါနီးဖြစ်စေနေသည်ဆိုပါစို့။ ထိုအခါ သူ၏ကတိကဝတ်ကိုဖြေရန် ဆက်၍ကြိုးစားနေသင့်သလော။ အကျင့်ယိုယွင်းသူမဖြစ်သွားစေရန် မိမိ၏သစ္စာကတိကိုဖျက်ပြီး ဘုရားသခင့်သနားကြင်နာမှု၊ ခွင့်လွှတ်မှုရဖို့ ကိုယ်တော်အားတိုးလျှိုးတောင်းပန်ပြီး အနူးအညွတ်အသနားခံလျှင် ပိုကောင်းမည်မဟုတ်ပေလော။ ဤကိစ္စကို သူကိုယ်တိုင် ဆုံးဖြတ်ပြုလုပ်ရမည်ဖြစ်သည်။ မည်သူကမျှ သူ့အတွက် ဆုံးဖြတ်မပေးနိုင်ပေ။
သစ္စာကတိတစ်ခုကို မိမိအလောတကြီးပြုမိခဲ့ကြောင်း နောက်ပိုင်းမှ သိလာလျှင်ကော။ ထိုကတိကိုဖြေရန် သူဆက်ကြိုးစားနေသင့်သလော။ ယေဖသသည် ဘုရားသခင်ထံပြုခဲ့သောသစ္စာကတိကိုဆောင်ရွက်ရန် မလွယ်ကူခဲ့သော်လည်း အသိစိတ်ရှိရှိ ထိုအတိုင်းဆောင်ရွက်ခဲ့သည်။ (တရားသူကြီး ၁၁:၃၀-၄၀) မိမိကတိရှိသည်အတိုင်း မပြုလုပ်ခြင်းသည် ဘုရားသခင်၏ “အမျက်တော်ထွက်” စရာဖြစ်နိုင်ပြီး မိမိပြီးမြောက်ထားခဲ့ရာများကို ဖြိုဖျက်ရာကျသည်။ (ဒေ. ၅:၆) သစ္စာကတိတည်ခြင်းကိစ္စကို ပေါ့ပေါ့တန်တန်သဘောထားလျှင် ဘုရားသခင့်မျက်နှာသာတော် ဆုံးရှုံးနိုင်သည်။
ယေရှုခရစ်တော်က ဤသို့မိန့်ဆိုခဲ့သည်– “သင်၏စကားမှာ ဟုတ်သည်ကိုအဟုတ်၊ မဟုတ်သည်ကိုမဟုတ် ဖြစ်စေလော့။ ဤထက်လွန်သောစကားသည် မကောင်းသောအရာနှင့်စပ်ဆိုင်ပေ၏။” (မဿဲ ၅:၃၇) ခရစ်ယာန်တစ်ဦးသည် ဘုရားသခင်ထံပြုသော သစ္စာကတိများကို တည်စေမည်သာမက ဘုရားသခင်နှင့် လူသားများအား ပြောဆိုခဲ့သမျှစကားအားလုံးကို သူတစ်ပါးယုံကြည်စိတ်ချစေရန် အလေးအနက်သဘောထားရကြမည်။ အစပထမတွင် ကောင်းမည်ဟုအထင်ရှိပြီး အခြားသူတစ်ဦးနှင့် သဘောတူညီချက်တစ်ခုပြုမိခဲ့သော်လည်း အသေအချာဆန်းစစ်ကြည့်သောအခါ မိမိမှားသွားကြောင်းထင်ရှားသည့် ဘေးကျပ်နံကျပ်အခြေအနေမျိုး ရောက်နေလျှင် မည်သို့ပြုမည်နည်း။ ဤသို့သောကိစ္စမျိုးကို သူပေါ့ပေါ့တန်တန်သဘောမထားသင့်ပါ။ သို့သော် အသေအချာအပြန်အလှန်ဆွေးနွေးပြီးနောက် သူတစ်ဖက်သားက သူ့ကို တာဝန်မှကင်းလွတ်စေဖို့ ဆုံးဖြတ်ကောင်းဆုံးဖြတ်ပေမည်။—ဆာလံ ၁၅:၄; သု. ၆:၂၊ ၃။
သစ္စာကတိများ၊ အခြားကိစ္စရပ်များနှင့်စပ်လျဉ်း၍ ကျွန်ုပ်တို့အဓိကအာရုံစိုက်သင့်ရာကား အဘယ်အရာဖြစ်သင့်သနည်း။ ယေဟောဝါဘုရားသခင်နှင့် ကောင်းသောဆက်ဆံရေးရှိရန် အစဉ်ကြိုးစားကြစို့လေ။
[စာမျက်နှာ ၃၀၊ ၃၁ ပါ ရုပ်ပုံ]
ဟန္နသည် မိမိ၏သစ္စာကတိအတိုင်းပြုရန် မတွန့်ဆုတ်ခဲ့
[စာမျက်နှာ ၃၀၊ ၃၁ ပါ ရုပ်ပုံ]
ယေဖသသည် ဆိုခဲ့ပြီးသည့်အတိုင်း ပြုရန် အခက်တွေ့သော်လည်း မိမိ၏ကတိကို တည်စေခဲ့