“ဘုရားသခင်၏သိုးတော်စုကို ထိန်းကျောင်းလော့”
“ငါ့ထံသို့လာကြလော့။ ငါသည် လန်းဆန်းစေမည်”
“ဘုရားသခင်၏သိုးတော်စုကို ထိန်းကျောင်းလော့”
“ကျွန်မတို့ရဲ့စကားကိုနားထောင်ဖို့ အမြဲအသင့်ရှိပြီး ကျမ်းစာနဲ့အားပေးကြတယ်။”—ပယ်မီလာ။
“ကျွန်တော်တို့အားလုံးရဲ့အကျိုးအတွက် သင်တို့ပြုလုပ်သမျှကို ကျေးဇူးတင်ပါတယ်။ ကျွန်တော်တို့အတွက် တကယ်အကူအညီ ဖြစ်တယ်။”—ရောဘတ်။
ပယ်မီလာနှင့် ရောဘတ်တို့သည် သူတို့၏သက်ဆိုင်ရာအသင်းတော်များမှ ခရစ်ယာန်အကြီးအကဲများထံ ဤသို့ကျေးဇူးတင်စကားများ ရေးပို့ပေးရန် လှုံ့ဆော်ခံခဲ့ကြရသည်။ ကမ္ဘာတစ်ဝန်းရှိ ဘုရားသခင့်ကျေးကျွန်များထဲမှ တခြားသူများလည်း “ဘုရားသခင်၏သိုးတော်စုကို ထိန်းကျောင်း” သူတို့ထံမှရရှိသည့် မပြတ်တမ်းထောက်မမှုနှင့် ကြည့်ရှုစောင့်ရှောက်မှုတို့အတွက် ကျေးဇူးတင်ကြသည်။ (၁ ပေတရု ၅:၂) အမှန်မှာ ယေဟောဝါ၏လူမျိုးသည် သူတို့၏အကျိုးအတွက် အကြီးအကဲများ လုပ်ဆောင်ခဲ့ရာများစွာနှင့် သူတို့လုပ်ဆောင်ပုံများအတွက် ကျေးဇူးတင်ကြသည်။
‘လုပ်ကိုင်စရာများစွာရှိ’
ခရစ်ယာန်အကြီးအကဲများ ထမ်းဆောင်ကြရသည့်တာဝန် မြောက်မြားစွာရှိသည်။ (လုကာ ၁၂:၄၈) သူတို့သည် အသင်းတော်အစည်းအဝေးများအတွက် ဟောပြောချက်များကို ပြင်ဆင်ကြရပြီး ဘုရားသခင့်နိုင်ငံတော်သတင်းကောင်းကို လူသိရှင်ကြားဟောပြောခြင်းတွင်လည်း ပါဝင်ကြသည်။ သူတို့ထမ်းဆောင်ရသောတာဝန်များတွင် ယုံကြည်သူချင်းများထံ သိုးထိန်းလည်ပတ်မှုများ ပြုလုပ်ခြင်း ပါဝင်သည်။ အကြီးအကဲများသည် မိမိတို့မိသားစုများ၏ ကာယရေးနှင့် ဝိညာဉ်ရေးကို လျစ်လျူမရှုဘဲ အထူးဂရုစိုက်မှုလိုအပ်နေသူများဖြစ်သည့် သက်ကြီးရွယ်အိုများနှင့် တခြားသူများကိုပါ အချိန်ပေးကြ၏။ (ယောဘ ၂၉:၁၂-၁၅; ၁ တိမောသေ ၃:၄၊ ၅; ၅:၈) အကြီးအကဲတချို့သည် နိုင်ငံတော်ခန်းမများ ဆောက်လုပ်ရေးတွင် ပါဝင်ကူညီကြ၏။ တချို့သည် ဆေးရုံဆက်သွယ်ရေးကော်မတီများတွင် ပါဝင်ထမ်းဆောင်ကြသည်၊ အခြားသူများမှာမူ လူနာများထံ လည်ပတ်သည့်အုပ်စုများတွင် ပါဝင်ကြသည်။ ထို့အပြင် သူတို့အများစုသည် စည်းဝေးပွဲများနှင့် စည်းဝေးကြီးများတွင် စေတနာ့ဝန်ထမ်းကြသည်။ မှန်ပါသည်၊ အကြီးအကဲများအတွက် ‘သခင်ဘုရား၏အမှုတော်၌ လုပ်ကိုင်စရာများစွာရှိ’ သည်။ (၁ ကောရိန္သု ၁၅:၅၈) ထိုသို့အလုပ်ကြိုးစားသူ အကြီးအကဲများကို ၎င်းတို့ကြည့်ရှုစောင့်ရှောက်ရန် အပ်နှင်းခံရသူတို့ အလွန်လေးမြတ်တန်ဖိုးထားကြခြင်းသည် အံ့ဩစရာမဟုတ်ပေ!—၁ သက်သာလောနိတ် ၅:၁၂၊ ၁၃။
ဝိညာဉ်ရေးအရ အားပေးရန် ခရစ်ယာန်ချင်းများ၏ အိမ်များသို့ဖြစ်စေ၊ တခြားတစ်နေရာရာသို့ဖြစ်စေ အကြီးအကဲများ မှန်မှန်လည်ပတ်ခြင်းသည် တကယ်အားပေးတည်ဆောက်မှုဖြစ်သည်။ “အကြီးအကဲတွေရဲ့ မေတ္တာပြည့်ဝတဲ့ ထောက်မကူညီမှုနဲ့ အားပေးမှုမရခဲ့ရင် ဒီနေ့ အချိန်ပြည့်အမှုဆောင်တစ်ဦးအဖြစ် ယေဟောဝါကို ကျွန်တော် အမှုဆောင်နိုင်လိမ့်မယ်လို့ မထင်ဘူး” ဟုဖခင်မဲ့အိမ်တွင် ကြီးပြင်းလာသည့် သောမတ်စ်က ပြောပြသည်။ ကြင်ဖော်မဲ့မိသားစုတွင် ကြီးပြင်းလာကြသည့် လူငယ်များစွာသည် အကြီးအကဲများထံမှ သူတို့ရရှိသည့် ဂရုစိုက်မှုကြောင့် ယေဟောဝါနှင့် နှစ်ကိုယ်ကြားဆက်ဆံရေးကို ပျိုးထောင်ရန် အထောက်အကူရခဲ့ကြောင်း အသိအမှတ်ပြုကြသည်။
သိုးထိန်းလည်ပတ်မှုများကို အသင်းတော်ရှိ သက်ကြီးရွယ်အိုများကလည်း အလွန်တန်ဖိုးထားကြသည်။ အကြီးအကဲနှစ်ဦး လာရောက်လည်ပတ်ပြီးနောက် အသက် ၈၀ ဝန်းကျင်ရှိ ခရစ်ယာန်သာသနာပြုမောင်နှံတစ်စုံက ဤသို့စာရေးခဲ့ကြသည်– “သင်တို့၏လည်ပတ်မှုအတွက် ကျွန်တော်တို့ကျေးဇူးတင်ပါတယ်။
သင်တို့ပြန်သွားတာနဲ့ ကျွန်တော်တို့နဲ့အတူ သုံးသပ်ဖတ်ရှုခဲ့တဲ့ ကျမ်းချက်တွေကို ပြန်ဖတ်ကြတယ်။ သင်တို့ရဲ့ အားပေးစကားတွေကို ကျွန်တော်တို့ လုံးဝမေ့မှာမဟုတ်ဘူး။” အသက် ၇၀ ရှိမုဆိုးမတစ်ဦးက အကြီးအကဲများထံ ဤသို့စာရေးခဲ့သည်– “ကျွန်မကိုကူညီဖို့ ယေဟောဝါဆီ ဆုတောင်းနေတာ၊ ကျွန်မရဲ့အိမ်ကို ညီအစ်ကိုတို့နှစ်ယောက်ကို ဘုရားသခင်စေလွှတ်တာပဲ။ သင်တို့ရဲ့လည်ပတ်မှုဟာ ယေဟောဝါဆီက တကယ့်ကောင်းချီးပါပဲ!” သင့်အသင်းတော်မှ အကြီးအကဲများ သင့်ထံ မကြာမီက လည်ပတ်ရောက်ရှိလာခဲ့ပါသလော။ သူတို့ကြည့်ရှုထိန်းကျောင်းဖို့တာဝန်ရထားသော သိုးတော်စုကို သူတို့ကြိုးစားဂရုစိုက်ကြခြင်းကို ကျွန်ုပ်တို့အားလုံး လေးမြတ်တန်ဖိုးထားကြမည် သေချာပါသည်။ဘုရားသခင်နှင့် ခရစ်တော်ကိုတုပသည့် သိုးထိန်းများ
ယေဟောဝါသည် မေတ္တာပြည့်ဝသောသိုးထိန်းဖြစ်တော်မူ၏။ (ဆာလံ ၂၃:၁-၄; ယေရမိ ၃၁:၁၀; ၁ ပေတရု ၂:၂၅) ယေရှုခရစ်တော်သည်လည်း ထူးခြားသောသိုးထိန်းဖြစ်၏။ ကိုယ်တော်အား “ကောင်းသောသိုးထိန်း၊” “သိုးထိန်းကြီး” နှင့် “သိုးထိန်းချုပ်” ဟုခေါ်ထား၏။ (ယောဟန် ၁၀:၁၁; ဟေဗြဲ ၁၃:၂၀; ၁ ပေတရု ၅:၄၊ ကဘ) ယေရှု၏တပည့်ဖြစ်လိုသူတို့အား ကိုယ်တော် မည်သို့ဆက်ဆံခဲ့သနည်း။ ကိုယ်တော်က သူတို့ကို ဤသို့နွေးထွေးစွာ ဖိတ်ခေါ်သည်– “ဝန်လေး၍ပင်ပန်းသောသူအပေါင်းတို့၊ ငါ့ထံသို့လာကြလော့။ ငါသည် လန်းဆန်းစေမည်။”—မဿဲ ၁၁:၂၈၊ ကဘ။
အလားတူ ယနေ့ အကြီးအကဲများသည် သိုးတော်စုကို လန်းဆန်းမှုပေး၍ ကာကွယ်ပေးသူများဖြစ်ရန် ကြိုးစားကြသည်။ သူတို့သည် “လေလုံ၍ မိုးသက်မုန်တိုင်းကွယ်ရာအရပ်ကဲ့သို့လည်းကောင်း၊ သွေ့ခြောက်သောမြေ၌စီးသော ချောင်းရေကဲ့သို့လည်းကောင်း၊ နေပူသောအရပ်၌ ကျောက်လုံးကြီးအရိပ်ကဲ့သို့လည်းကောင်း ဖြစ်ကြ” ပါသည်။ (ဟေရှာယ ၃၂:၂) ထိုသို့ကာကွယ်စောင့်ရှောက်ပေးသူများသည် လန်းဆန်းမှုပေးကြ၏၊ သိုးတော်စု၏လေးစားမှုခံရကြပြီး ဘုရားသခင့်မျက်နှာသာရရှိကြ၏။—ဖိလိပ္ပိ ၂:၂၉; ၁ တိမောသေ ၅:၁၇။
၎င်းတို့၏ဇနီးသည်များထံမှ အဖိုးတန်ထောက်မမှု
ဘုရားသခင့်လူမျိုးသည် ခရစ်ယာန်အကြီးအကဲများ၏အကူအညီနှင့် ၎င်းတို့၏ဇနီးသည်များ သူတို့လင်သားများအား,ပေးသည့် မေတ္တာပါထောက်မကူညီမှုအတွက်ပါ ကျေးဇူးတင်ကြသည်။ သူတို့လင်သားများကို အထောက်အကူပြုရာတွင် ထိုအမျိုးသမီးများသည် ကိုယ်ကျိုးစွန့်ကြရသည်။ ရံဖန်ရံခါ သူတို့၏ခင်ပွန်းများ အသင်းတော်ကိစ္စ လုပ်ဆောင်နေစဉ်၊ သို့မဟုတ် သိုးထိန်းလည်ပတ်မှုများပြုလုပ်နေစဉ် ထိုအမျိုးသမီးများသည် အိမ်တွင်ကျန်ရစ်နေကြရ၏။ တစ်ခါတစ်ရံ အသင်းတော်တွင် အရေးပေါ်ကိစ္စတစ်ခုခု ပေါ်လာသောကြောင့် အသေအချာကြိုတင်စီစဉ်ထားသော ကိုယ်ရေးကိုယ်တာကိစ္စများကို ပြောင်းလဲ ရွှေ့ဆိုင်းလိုက်ကြရ၏။ “ကျွန်မရဲ့ခင်ပွန်းက အစည်းအဝေးတွေအတွက်ပြင်ဆင်လိုက်၊ သိုးထိန်းလည်ပတ်မှုလုပ်လိုက်နဲ့ ဘယ်လောက်အလုပ်များနေတယ်ဆိုတာကို မြင်တဲ့အခါ ယေဟောဝါအတွက် သူအလုပ်များနေတာပဲလေဆိုပြီး ကျွန်မအတတ်နိုင်ဆုံး ထောက်မကူညီပေးတယ်” ဟု မစ်ရှယ်လ်ကပြောသည်။
အကြီးအကဲတစ်ဦးကို ထိမ်းမြားထားသည့် ရှယ်ရယ်လ်ကလည်း ဤသို့ဆိုသည်– “အသင်းတော်က ညီအစ်ကိုညီအစ်မတွေဟာ အကြီးအကဲတွေနဲ့ စကားပြောဆိုဖို့ လိုတယ်ဆိုတာကို ကျွန်မသိတယ်၊ သူတို့အကူအညီလိုတိုင်း ကျွန်မခင်ပွန်းဆီလာပြီး အကူအညီတောင်းနိုင်တယ်ဆိုတာ သူတို့ကိုသိစေချင်တယ်။” မစ်ရှယ်လ်နဲ့ ရှယ်ရယ်လ်တို့ကဲ့သို့ အထောက်အကူဖြစ်ကြသည့် အမျိုးသမီးများသည် သူတို့၏ခင်ပွန်းသည်များ ဘုရားသခင့်သိုးများကို ကြည့်ရှုစောင့်ရှောက်နိုင်ရန် လိုလိုလားလား ကိုယ်ကျိုးစွန့်ကြသည်။ အကြီးအကဲများ၏ဇနီးသည်များ တင်ပြကြသည့် အထောက်အကူပြုလိုသောစိတ်ဓာတ်အတွက် သူတို့ကို လေးမြတ်တန်ဖိုးထားကြရသည်။
သို့တိုင် အလုပ်များသော အကြီးအကဲတစ်ဦးသည် မိမိဇနီးနှင့် သားသမီးများ၏ ဝိညာဉ်ရေးအပြင် တခြားလိုအပ်ချက်များကို လျစ်လျူရှုမထားနိုင်ချေ။ အိမ်ထောင်သည်အကြီးအကဲတစ်ဦးသည် “အပြစ်တင်ခွင့်နှင့်ကင်းလွတ်သောသူ၊ မယားတစ်ယောက်တည်းရှိသောသူ . . . သူ၏သားသမီးတို့သည် ကာမဂုဏ်၌လွန်ကျူးသည်ဟု အပြစ်တင်ခြင်း၊ နားမထောင်ခြင်းနှင့်လွတ်” သောသူများ ဖြစ်ကြရမည်။ (တိတု ၁:၆) သူသည် ခရစ်ယာန်ကြီးကြပ်မှူးများထံမှ ကျမ်းစာတောင်းဆိုထားသည့် ဘုရားသခင်ရေးရာ နည်းလမ်းအတိုင်း မိမိ၏အိမ်ထောင်ကို ကြည့်ရှုစောင့်ရှောက်ရမည်ဖြစ်သည်။—၁ တိမောသေ ၃:၁-၇။
အလုပ်များသော အကြီးအကဲတစ်ဦးအတွက် ထောက်မကူညီမှုဖြစ်သောဇနီးတစ်ဦးသည် အလွန်တန်ဖိုးရှိလှသည်! ထောက်ထားစာနာစိတ်ရှိသည့် အိမ်ထောင်သည် အကြီးအကဲများ ထိုသို့ပင်ခံစားကြရသည်။ ကျမ်းစာပြောထားသည့်အတိုင်းပင် “မယား [“ကောင်း၊” ကဘ] ကိုရသောသူသည် ကောင်းသောအရာကိုရ၍ ထာဝရဘုရား၏ကျေးဇူးတော်ကိုခံရ၏။” (သု. ၁၈:၂၂) ထိုသို့သောအကြီးအကဲများသည် ၎င်းတို့၏ဇနီးသည်များကို လှိုက်လှိုက်လှဲလှဲကျေးဇူးတင်ကြောင်း အပြောနှင့် အလုပ်ဖြင့် ဖော်ပြကြသည်။ ဤအိမ်ထောင်သည်မောင်နှံစုံများသည် အတူတကွ ထက်သန်စွာဆုတောင်းကြ၊ ပျော်ရွှင်စွာလေ့လာဖတ်ရှုကြသည့်အပြင် ဘဝ၏သာယာမှုများဖြစ်သည့် ပင်လယ်ကမ်းခြေတွင် လမ်းလျှောက်ခြင်း၊ တောတောင်အရပ်တွင် ခြေလျင်ခရီးထွက်ခြင်း၊ ပန်းခြံတွင် အေးအေးဆေးဆေးလမ်းလျှောက်ထွက်ခြင်းတို့အတွက် အချိန်ပေးကြသည်။ မှန်ပါ၏၊ အကြီးအကဲများသည် သူတို့၏ဇနီးသည်များကို ချစ်ခင်ကြင်နာစွာ ဂရုစိုက်ကြခြင်းမှ အားရရွှင်လန်းမှုရရှိကြသည်။—၁ ပေတရု ၃:၇။
ဘုရားသခင်၏သိုးတော်စုကို ကိုယ်ကျိုးကင်းမဲ့စွာ ထိန်းကျောင်းသည့် အကြီးအကဲများသည် ယေဟောဝါ၏လူမျိုးတို့ကို ဝိညာဉ်ရေးဘက် တကယ်လန်းဆန်းစေပါသည်။ သူတို့သည် အသင်းတော်အတွက် အမှန်တကယ်ပင် ကောင်းချီးတစ်ရပ်ဖြစ်သည်၊ “လူတို့တွင်ဆုလာဘ်များ” အမှန်ဖြစ်ကြပါသည်။—ဧဖက် ၄:၈၊ ၁၁-၁၃၊ ကဘ။