ယောရှုအမှတ်ရခဲ့ရာ
ယောရှုအမှတ်ရခဲ့ရာ
ယေဟောဝါက “ငါ၏ကျွန် မောရှေသည် အနိစ္စရောက်လေပြီ။ သို့ဖြစ်၍ သင်နှင့် သင်၌ပါသော ဤလူအပေါင်းတို့သည် ယခုထ၍ ယော်ဒန်မြစ်တစ်ဖက်သို့ ကူးကြလော့။ . . . ငါပေးသောပြည်ကို ဝင်စားကြလော့” ဟုမိန့်တော်မူခဲ့သည်။ (ယောရှု ၁:၂) ယောရှုရှေ့တွင် တာဝန်ကြီးတစ်ခု ချထားခြင်းပါတကား! သူသည် အနှစ် ၄၀ နီးပါး မောရှေ၏နောက်လိုက်ဖြစ်ခဲ့သည်။ ယခု သူသည် သခင်၏အရိုက်အရာကိုခံယူပြီး ကတိထားရာပြည်တော်သို့ ထိန်းသိမ်းရခက်သော ဣသရေလလူမျိုးကို ခေါ်ဆောင်သွားရန် အမိန့်ရလေ၏။
ယောရှုသည် ရှေ့တွင်ကြုံတွေ့ရမည့်အရာများကို စေ့စေ့ဆင်ခြင်သည့်အခါ တွေ့ကြုံကျော်လွှားခဲ့ပြီးသော အခက်အခဲများကို အမှတ်ရခဲ့ပေမည်။ ယောရှုအမှတ်ရခဲ့ရာသည် ထိုစဉ်က သူ့အတွက် တန်ဖိုးမဖြတ်နိုင်သော အထောက်အကူဖြစ်ခဲ့သကဲ့သို့ ယနေ့လည်း ခရစ်ယာန်များအတွက် တန်ဖိုးရှိရာဖြစ်နိုင်၏။
ကျွန်အဖြစ်မှ တပ်မှူးအဖြစ်သို့
ယောရှုသည် နှစ်ချီ၍ ကျွန်ခံခဲ့ရသည်ကို အမှတ်ရခဲ့၏။ (ထွက်မြောက်ရာ ၁:၁၃၊ ၁၄; ၂:၂၃) ထိုအချိန်က ယောရှုကြုံတွေ့ခဲ့ရာများကို ကျမ်းစာက အသေးစိတ်မဖော်ပြထားသောကြောင့် ကျွန်ုပ်တို့ မှန်းဆရုံသာမှန်းဆနိုင်ကြသည်။ ယောရှုသည် အီဂျစ်ပြည်တွင် အမှုထမ်းခဲ့စဉ် ကောင်းစွာစီစဉ်ဖွဲ့စည်းတတ်သူတစ်ဦး ဖြစ်လာခဲ့မည်၊ ထိုပြည်မှ ဟေဗြဲလူတို့နှင့် “အမျိုးမျိုးသောလူအများတို့” ထွက်ခွာခဲ့ချိန်တွင် သူကူညီပေးနိုင်ခဲ့၏။—ထွက်မြောက်ရာ ၁၂:၃၈။
ယောရှုသည် ဧဖရိမ်မျိုးနွယ်မှဖြစ်၏။ သူ၏အဘိုးဖြစ်သူ ဧလိရှမာသည် အဆွေအမျိုးသူကြီးမင်းဖြစ်ပြီး ဣသရေလအနွယ် သုံးနွယ်မှ တစ်နွယ်၏တပ်သား ၁၀၈,၁၀၀ ကိုဦးဆောင်ခဲ့ရဖွယ်ရှိသည်။ (တောလည်ရာ ၁:၄၊ ၁၀၊ ၁၆; ၂:၁၈-၂၄; ၁ ရာဇဝင်ချုပ် ၇:၂၀၊ ၂၆၊ ၂၇) သို့တိုင် အီဂျစ်ပြည်မှ ဣသရေလလူတို့ ထွက်ခွာလာပြီးနောက် မကြာမီ အာမလက်လူတို့က ဣသရေလလူတို့ကို တိုက်ခိုက်သောအခါ မောရှေသည် ယောရှုအား ခုခံကာကွယ်ရေးအတွက် ဖွဲ့စည်းစေခဲ့သည်။ (ထွက်မြောက်ရာ ၁၇:၈၊ ၉က) ဥပမာ၊ ယောရှု၏အဘိုး သို့မဟုတ် ဖခင်ကို မစေခိုင်းဘဲ အဘယ်ကြောင့် ယောရှုကိုမှ စေခိုင်းသနည်း။ ဖြစ်နိုင်ခြေတစ်ခုမှာ–“[ယောရှု] သည်
အရေးပါသောဧဖရိမ်မျိုးနွယ်၏ ခေါင်းဆောင်တစ်ဦးဖြစ်ရုံမက စီစဉ်ဖွဲ့စည်းရေး ကျွမ်းကျင်သူ၊ လူတို့၏ယုံကြည်အားကိုးမှု ရရှိထားသူလည်းဖြစ်သောကြောင့် စစ်သားများကို ရွေးချယ်လေ့ကျင့်ပေးရန် အကောင်းဆုံးအရည်အချင်းရှိသူအဖြစ် မောရှေအသိအမှတ်ပြုပြီး သူ့ကို ခေါင်းဆောင်တင်မြှောက်ခဲ့ခြင်းဖြစ်သည်။”
မည်သို့ပင်ဖြစ်ပါစေ၊ ယောရှုကို ရွေးချယ်လိုက်သောအခါ သူသည် မောရှေအမိန့်ပေးသည့်အတိုင်း ပြုလုပ်ခဲ့သည်။ ဣသရေလလူမျိုးသည် စစ်မက်ရေးရာတွင် လုံးဝအတွေ့အကြုံမရှိသော်လည်း ဘုရားသခင်၏အကူအညီရရှိမည်ကို ယောရှု ယုံကြည်စိတ်ချခဲ့သည်။ ထို့ကြောင့် မောရှေက “နက်ဖြန်နေ့၌ ဘုရားသခင်၏လှံတံကိုကိုင်လျက် တောင်ထိပ်ပေါ်မှာ ငါရပ်နေမည်ဟု” ပြောရုံဖြင့် သူသည် စိတ်ချလက်ချရှိခဲ့၏။ ယေဟောဝါသည် ထိုခေတ်အခါ၏ စစ်အင်အားအကြီးမားဆုံးအာဏာစက်ကို မကြာမီကပင် လုံးလုံးချေမှုန်းဖျက်ဆီးခဲ့ကြောင်း ယောရှုအမှတ်ရခဲ့မည်။ နောက်နေ့တွင် မောရှေသည် သူ၏လက်ကို နေဝင်သည်တိုင်အောင် မြှောက်ထားသောအခါ မည်သည့်ရန်သူမျှ ဣသရေလလူမျိုးကို စစ်မနိုင်တော့ချေ၊ အာမလက်လူတို့ကို အပြီးအပြတ်အောင်နိုင်ခဲ့၏။ ထို့နောက် “ကောင်းကင်အောက်၌ အာမလက်၏အမှတ်ရှိသမျှကို ငါပယ်ရှင်းမည်” ဟူသော ယေဟောဝါ၏မိန့်မှာချက်ကို စာအုပ်၌ရေးသား၍ “ယောရှုအား ဖတ်ရွတ်” ပြရန် မောရှေကို မိန့်တော်မူခဲ့သည်။ (ထွက်မြောက်ရာ ၁၇:၉ခ-၁၄) မှန်ပါသည်၊ ထိုအတိုင်းပင် ယေဟောဝါစီရင်တော်မူခဲ့သည်။
မောရှေ၏နောက်လိုက်အဖြစ်
အာမလက်လူတို့နှင့် စစ်တိုက်ခဲ့ကြပြီးနောက် ယောရှုနှင့် မောရှေတို့သည် ပိုမိုရင်းနှီးလာခဲ့ကြမည်။ ယောရှုသည် “အသက်ငယ်စဉ်မှ” မောရှေကွယ်လွန်သည့်အထိ အနှစ် ၄၀ ခန့် မောရှေ၏နောက်လိုက် သို့မဟုတ် “လက်ထောက်” ဖြစ်ခွင့်ရခဲ့သည်။—တောလည်ရာ ၁၁:၂၈၊ သမ္မာ။
ထိုအခွင့်အရာကြောင့် သူသည် အထူးအခွင့်အရေးများနှင့် တာဝန်များပါ ရရှိခဲ့၏။ ဥပမာ၊ မောရှေ၊ အာရုန်၊ အာရုန်၏သားများနှင့် ဣသရေလအသက်ကြီးသူ ၇၀ တို့သည် သိနာတောင်ပေါ်သို့တက်၍ ယေဟောဝါ၏ဘုန်းအာနုဘော်တော် အဆင်းအာရုံကို မြင်ခဲ့ရသောအခါ သူတို့နှင့်အတူ ယောရှုလည်း ပါဝင်နိုင်ဖွယ်ရှိ၏။ နောက်လိုက်တစ်ဦးအဖြစ် သူသည် သာ၍မြင့်သောတောင်ပေါ်သို့ မောရှေနှင့်အတူ လိုက်ပါသွားပြီး ယေဟောဝါရောက်ရှိနေခြင်း အထိမ်းအမှတ်ဖြစ်သည့် တိမ်တိုက်ထဲသို့ မောရှေဝင်သွားစဉ် ခပ်လှမ်းလှမ်းတွင် ရပ်ကျန်ရစ်ခဲ့ဖွယ်ရှိသည်။ ယောရှုသည် တောင်ပေါ်တွင်နေ့ ၄၀ နှင့်ည ၄၀ နေခဲ့ပုံရသည်မှာ မှတ်သားထိုက်ပေသည်။ သခင်ပြန်ဆင်းလာသည်အထိ ယောရှု သစ္စာရှိရှိစောင့်မျှော်ခဲ့၏၊ အကြောင်းမှာ သက်သေခံချက်ကျောက်ပြားတို့နှင့် တောင်ပေါ်မှ မောရှေဆင်းလာချိန်တွင် သူ့ကို ယောရှုကြိုဆိုခဲ့၏။—ထွက်မြောက်ရာ ၂၄:၁၊ ၂၊ ၉-၁၈; ၃၂:၁၅-၁၇။
ဣသရေလလူမျိုးသည် ရွှေနွားရုပ်ကို ကိုးကွယ်ခဲ့သည့် အဖြစ်အပျက်ပြီးနောက် ယောရှုသည် တပ်အပြင်ဘက် ပရိသတ်စည်းဝေးရာတဲတွင် မောရှေနှင့်အတူရှိခဲ့သည်။ ထိုတွင် ယေဟောဝါသည် မောရှေနှင့် မျက်နှာချင်းဆိုင် စကားပြောခဲ့၏။ သို့သော် မောရှေသည် တပ်ထဲသို့ ပြန်ဝင်သွားသောအခါ ယောရှုသည် “တဲတော်မှမထွက်ဘဲနေ၏။” ဣသရေလလူတို့သည် သူတို့၏မသန့်ရှင်းသောအခြေအနေနှင့် တဲတော်ထဲ မဝင်မိစေရန် တားဆီးဖို့ ထိုတွင် သူရှိနေဖို့ လိုအပ်၍ဖြစ်ပေမည်။ ယောရှုသည် ထိုတာဝန်ကို အလွန်ပင်အလေးအနက်ထားခဲ့လေသည်!—ထွက်မြောက်ရာ ၃၃:၇၊ ၁၁။
သမိုင်းပညာရှင် ဂျိုစီဖတ်စ်၏အဆိုအရ ယောရှုထက် မောရှေသည် အသက် ၃၅ နှစ်ပို၍ကြီးကာ သူနှင့် ပေါင်းဖော်ခဲ့ရခြင်းက ယောရှု၏ယုံကြည်ခြင်းကို အတိုင်းထက်အလွန် ခိုင်ခံ့စေခြင်းဖြစ်ရမည်။ သူတို့၏ဆက်ဆံရေးကို “ရင့်ကျက်သူနှင့်လူငယ်၊ ကျွမ်းကျင်သူနှင့်ကျောင်းသားတို့၏ ဆက်သွယ်ပေါင်းဖော်မှု” ဟုခေါ်ဆိုခဲ့ကာ ယင်းက ယောရှုအား “စိတ်ဓာတ်ကြံ့ခိုင်ပြီး ယုံကြည်စိတ်ချရသူတစ်ဦး” ဖြစ်လာစေသည်။ ယနေ့ ကျွန်ုပ်တို့အလယ်တွင် မောရှေကဲ့သို့ ပရောဖက်များမရှိသော်လည်း ယေဟောဝါလူမျိုးတော်၏ အသင်းတော်များတွင် အသက်ကြီးသူများရှိကြသည်၊ ဤသူတို့၏ အတွေ့အကြုံနှင့် ဝိညာဉ်ရေးရာကြောင့် ခွန်အားနှင့်အားပေးမှုရင်းမြစ် အမှန်ဖြစ်ကြသည်။ သူတို့ကို သင်လေးမြတ်ပါသလော။ သူတို့နှင့်ပေါင်းဖော်ခြင်းမှ သင်အကျိုးခံစားနေရပါသလော။
ခါနာန်ပြည်တွင် သူလျှို
ပညတ်တရားကို ဣသရေလလူမျိုး ရရှိပြီးနောက် မကြာမီ ယောရှု၏အသက်တာတွင် သေရေးရှင်ရေးတမျှ အရေးကြီးသည့်ဖြစ်ရပ်တစ်ခု ဖြစ်ပျက်ခဲ့သည်။ သူသည် ကတိထားရာပြည်ကို စူးစမ်းရန် သူ့မျိုးနွယ်၏ကိုယ်စားအဖြစ် ရွေးချယ်ခံခဲ့ရ၏။ ဤအကြောင်းကို လူသိများပါသည်။ ထိုပြည်သည် ယေဟောဝါကတိပေးခဲ့သည့်အတိုင်း “နို့နှင့်ပျားရည်စီးသောပြည်” ဖြစ်သည်ကို သူလျှို ၁၂ ဦးစလုံးက သဘောတူကြသည်။ သို့သော် သူလျှိုဆယ်ဦးက ဣသရေလလူမျိုးသည် ထိုပြည်သားများကို တိုက်ထုတ်နိုင်မည်မဟုတ်ဟု ယုံကြည်ခြင်းကင်းမဲ့စွာ ကြောက်ရွံ့ခဲ့ကြသည်။ သူတို့နှင့် ယေဟောဝါအမှန်ပင်ရှိသောကြောင့် ကြောက်ရွံ့ပြီး မပုန်ကန်ကြဖို့ ယောရှုနှင့် ကာလက်သာလျှင် လူတို့ကို အားပေးခဲ့သည်။ သို့နှင့် ပရိသတ်အပေါင်းတို့သည် ကန့်ကွက်ခဲ့ပြီး သူတို့နှစ်ဦးကို ကျောက်ခဲနှင့်ပစ်ပေါက်ရန် ပြောဆိုခဲ့ကြသည်။ ယေဟောဝါသည် မိမိ၏ဘုန်းတော်ကိုဖော်ပြခြင်းဖြင့် ဝင်မစွက်ခဲ့လျှင် သူတို့သည် ထိုသို့ပင်ပြုလုပ်ကြပေလိမ့်မည်။ သူတို့သည် ယုံကြည်ခြင်းကင်းမဲ့သောကြောင့် အသက် ၂၀ အထက်ရှိ မည်သည့်ဣသရေလမျှ ခါနာန်ပြည်ထဲ ဝင်ခွင့်ရမည်မဟုတ်ဟု ဘုရားသခင် မိန့်တော်မူခဲ့သည်။ သူတို့အနက် ယောရှု၊ ကာလက်နှင့် လေဝိနွယ်သားများသာ ကပ်ကျော်ခဲ့ကြ၏။—တောလည်ရာ ၁၃:၁-၁၆၊ ၂၅-၂၉; ၁၄:၆-၁၀၊ ၂၆-၃၀။
အီဂျစ်ပြည်တွင် ယေဟောဝါ၏တန်ခိုးကြီးလုပ်ရပ်များကို လူအားလုံး တွေ့မြင်ခဲ့ကြသည်မဟုတ်ပေလော။ သို့ဖြစ်၍ လူအများက သံသယဖြစ်နေကြစဉ် ဘုရားသခင့်အကူအညီရရှိမည်ဟု ယောရှု အဘယ်ကြောင့် ယုံကြည်စိတ်ချနိုင်ခဲ့သနည်း။ ယေဟောဝါပေးခဲ့သောကတိတော်များနှင့် လုပ်ဆောင်တော်မူခဲ့သမျှကို ယောရှုသည် ပီပြင်စွာသတိရပြီး ယင်းတို့ကို ဆင်ခြင်တွေးတောခဲ့ပေမည်။ နှစ်ပေါင်းများစွာ ကုန်လွန်ပြီးနောက်ပင် ယောရှုက ‘ဣသရေလလူမျိုးအား ယေဟောဝါမိန့်တော်မူသော ကောင်းကျိုးတစ်စုံတစ်ပါးမျှ မယုတ်မလျော့၊ အကုန်အစင်ပြည့်စုံသည်’ ဟုပြောဆိုနိုင်ခဲ့၏။ (ယောရှု ၂၃:၁၄) ထို့ကြောင့် အနာဂတ်နှင့်စပ်လျဉ်း၍ ယေဟောဝါပေးခဲ့သည့် ကတိတော်အားလုံးသည်လည်း ပြည့်စုံလိမ့်မည်ကို ယောရှုယုံကြည်စိတ်ချ၏။ (ဟေဗြဲ ၁၁:၆) ယင်းက လူတစ်ဦးအား ကိုယ်ကိုကိုယ် ဤသို့မေးမြန်းစေသင့်သည်– ‘ကျွန်ုပ်ကော။ ယေဟောဝါ၏ကတိတော်များကို ကြိုးစားအားထုတ်၍ လေ့လာဆင်ခြင်သုံးသပ်ခြင်းဖြင့် ယင်းတို့ကို ယုံကြည်စိတ်ချနိုင်ကြောင်း ကျွန်ုပ်အား လက်ခံစေခဲ့ပြီလော။ ဘုရားသခင်သည် လာမည့်ကြီးစွာသောဆင်းရဲခြင်းအတွင်း ကိုယ်တော်၏လူမျိုးတော်နှင့်အတူ ကျွန်ုပ်ကိုပါ ကာကွယ်ပေးနိုင်ကြောင်း ယုံကြည်ပါသလော။’
ယောရှုသည် ယုံကြည်ခြင်းတင်ပြရုံမက မှန်ရာကိုလုပ်ဝံ့သည့်သတ္တိလည်း ရှိခဲ့သည်။ သူနှင့် ကာလက်တို့သာလျှင် အခိုင်အမာရပ်တည်ခဲ့ကြပြီး ပရိသတ်အပေါင်းက သူတို့ကို ကျောက်ခဲနှင့်ပစ်ပေါက်ရန် ပြောဆိုခဲ့ကြသည်။ သင်သည် မည်သို့ခံစားရမည်နည်း။ ကြောက်ရွံ့ခဲ့မည်လော။ ယောရှုမကြောက်ရွံ့ခဲ့ပါ။ သူနှင့် ကာလက်သည် မိမိတို့၏ခံယူချက်ကို အခိုင်အမာပြောဆိုခဲ့ကြ၏။ ယေဟောဝါအပေါ် တည်ကြည်မှုက တစ်နေ့နေ့တွင် ကျွန်ုပ်တို့ ထပ်တူပြုရန် လိုအပ်ပေမည်။
သူလျှိုများ၏အတ္ထုပ္ပတ္တိက ယောရှု၏ နာမည်ကို ပြောင်းခဲ့ကြောင်းကိုလည်း ဖော်ပြသည်။ မောရှေသည် “ကယ်တင်ခြင်း” ဟုအဓိပ္ပာယ်ရှိသော သူ၏မူရင်းအမည် ဩရှေ [“ဟောရှီ၊” ကဘ] တွင် ဘုရားသခင်၏နာမတော်ကို ရည်ညွှန်းသည့် အက္ခရာကို ဖြည့်စွက်လိုက်ပြီး ယေဟောရှု သို့မဟုတ် ယောရှုဟု အမည်ပေးခဲ့သည်၊ ၎င်း၏အဓိပ္ပာယ်မှာ “ယေဟောဝါသည် ကယ်တင်ခြင်းဖြစ်တော်မူ၏။” စက်ပ်တွားဂျင့်ကျမ်းက သူ၏အမည်ကို “ယေရှု” ဟုဘာသာပြန်ဆိုသည်။ (တောလည်ရာ ၁၃:၈၊ ၁၆၊ ကဘ) ထိုအရေးပါသောအမည်နှင့်အညီ ယေဟောဝါသည် ကယ်တင်ခြင်းဖြစ်တော်မူ၏ဟု ယောရှု ရဲရင့်စွာကြေညာခဲ့သည်။ ယောရှု၏အမည်ကို ကောက်ကာငင်ကာ ပြောင်းလဲခဲ့ခြင်းမဟုတ်နိုင်ပေ။ မောရှေသည် ယောရှု၏အရည်အချင်းကို လေးမြတ်ကြောင်း တင်ပြခဲ့ရုံမက ကတိထားရာပြည်တော်ထဲသို့ လူမျိုးဆက်အသစ်ကို ယောရှုဦးဆောင်ခေါ်သွားရမည့် တာဝန်နှင့်လည်း ထိုအမည်က လိုက်ဖက်ခဲ့သည်။
ဣသရေလလူတို့၏ဖခင်များ တစ်ဦးပြီးတစ်ဦး သေဆုံးခဲ့စဉ်အတွင်း သူတို့သည် တောကန္တာရတွင် အနှစ် ၄၀ တိုင် ပင်ပန်းဆင်းရဲစွာ လှည့်လည်သွားလာခဲ့ကြရသည်။ ထိုအချိန်အတွင်း ယောရှုအကြောင်း ဖော်ပြထားခြင်းမရှိချေ။ သို့သော် သူသည် ထိုအဖြစ်အပျက်မှ များစွာသင်ယူခဲ့ပေမည်။ ပုန်ကန်သူ ကောရ၊ ဒါသန်၊ အဘိရံတို့နှင့် သူတို့၏နောက်လိုက်များကိုသာမက ယုတ်ညံ့သော ဗာလပေဂုရဘုရားကို ကိုးကွယ်ခဲ့ကြသူများကိုပါ ဘုရားသခင်တရားစီရင်ခဲ့ခြင်းကို ယောရှုတွေ့မြင်ခဲ့မည်။ မောရှေသည် မေရိဘတောလည်ရာ ၁၆:၁-၅၀; ၂၀:၉-၁၃; ၂၅:၁-၉။
အရပ်တွင် ရေနှင့်ပတ်သက်၍ ယေဟောဝါကို ဂုဏ်မတင်ခဲ့သောကြောင့် မောရှေသည်လည်း ကတိထားရာပြည်တော်ထဲ ဝင်ရမည်မဟုတ်ကြောင်း သိရှိရသောအခါ အကြီးအကျယ်ဝမ်းနည်းကြေကွဲခဲ့မည်မှာ သေချာသည်။—မောရှေအရိုက်အရာကို ဆက်ခံသူအဖြစ် ခန့်အပ်ခံခဲ့ရ
မောရှေကွယ်လွန်ခါနီးအချိန်တွင် ဣသရေလလူမျိုးသည် “အထိန်းမရှိသော သိုးကဲ့သို့” မဖြစ်စေရန် မိမိအရိုက်အရာဆက်ခံမည့်သူကို ခန့်အပ်ပေးပါရန် ဘုရားသခင်အား တောင်းဆိုခဲ့သည်။ ယေဟောဝါ မည်သို့ဖြေဆိုခဲ့သနည်း။ “ဝိညာဉ်တော်ကိုရသော” ယောရှုအား ပရိသတ်အပေါင်းရှေ့၌ ခန့်အပ်ရန် မှာကြားလေ၏။ သူတို့သည် ယောရှု၏စကားကို နားထောင်ကြရမည်ဖြစ်သည်။ ထောက်ခံချက်တစ်ခုပါတကား! ယေဟောဝါသည် ယောရှု၏ယုံကြည်ခြင်းနှင့် စွမ်းရည်ကို တွေ့မြင်တော်မူ၏။ ဣသရေလလူမျိုး၏ခေါင်းဆောင်အဖြစ် ခန့်အပ်ရန် ယောရှုထက် သာ၍အရည်အချင်းရှိသူ မရှိချေ။ (တောလည်ရာ ၂၇:၁၅-၂၀) သို့ရာတွင် ယောရှုသည် အလွန့်အလွန်ကြီးမားသော အခက်အခဲများကို ရင်ဆိုင်ရမည်ဖြစ်ကြောင်း မောရှေသိထားသည်။ ထို့ကြောင့် မိမိအရိုက်အရာကို ဆက်ခံမည့်သူနှင့်အတူ ယေဟောဝါဆက်ရှိသွားမည်ဖြစ်ရာ မောရှေက “အားယူ၍ ရဲရင့်ခြင်းရှိလော့” ဟုအားပေးတိုက်တွန်းခဲ့သည်။—တရားဟောရာ ၃၁:၇၊ ၈။
ဘုရားသခင်ကိုယ်တော်တိုင်ကလည်း ယောရှုကို ထိုနည်းထပ်တူအားပေးတော်မူပြီး ဤသို့ဆင့်ဆိုသည်– “ငါ၏ကျွန်မောရှေ မှာထားသောတရားအတိုင်း ကျင့် . . . လော့။ ကြံစည်လေသမျှတို့၌ အောင်မည်အကြောင်း ထိုတရားလမ်းသို့လိုက်လော့။ လက်ယာဘက်၊ လက်ဝဲဘက်သို့မလွှဲနှင့်။ ထိုပညတ္တိကျမ်းစာ၌ ရေးထားသမျှအတိုင်း ကျင့်မည်ဟု စောင့်ရှောက်ခြင်းအလို့ငှာ ကျမ်းစာကို မဖတ်မရွတ်ဘဲမနေ၊ နေ့ညမပြတ် ကြည့်ရှုဖတ်ရွတ်ရမည်။ သို့ပြုလျှင် သင်သည် အကြံထမြောက်၍ အောင်မြင်လိမ့်မည်။ သင့်ကို ငါမှာထားသည်မဟုတ်လော။ အားယူ၍ ရဲရင့်ခြင်းရှိလော့။ မကြောက်နှင့်၊ စိတ်မပျက်နှင့်။ သွားလေရာရာ၌ သင်၏ဘုရားသခင် ထာဝရဘုရားရှိသည်။”—ယောရှု ၁:၇-၉။
ယေဟောဝါ၏စကားတော်ကို ယောရှု အဆက်မပြတ်ကြားယောင်နေပြီး အတွေ့အကြုံအမျိုးမျိုး ရရှိခဲ့ပြီဖြစ်ရာ သူမည်သို့သံသယရှိနိုင်မည်နည်း။ ထိုပြည်ကို အနိုင်ရမည်ဟု အာမခံချက်ရရှိထား၏။ အခက်အခဲများ အမှန်ပေါ်ပေါက်လာပေမည်၊ ပထမဆုံးအခက်အခဲမှာ ရေကြီးနေချိန်တွင် ယော်ဒန်မြစ်ကို ဖြတ်ကူးရမည်ဖြစ်၏။ သို့တိုင် ယေဟောဝါကိုယ်တော်တိုင်က “ယခုထ၍ ယော်ဒန်မြစ်တစ်ဖက်သို့ကူးကြလော့” ဟုမိန့်တော်မူခဲ့သည်။ ထို့ကြောင့် အဘယ်အခက်အခဲရှိနိုင်ပါဦးမည်နည်း။—ယောရှု ၁:၂။
ယောရှု၏အသက်တာတွင် ဆက်တိုက်ဖြစ်ရပ်များ—ယေရိခေါမြို့ကို အနိုင်ရအောင်မြင်ခြင်း၊ ရန်သူများကို နိုင်နင်းအောင်မြင်ခြင်းနှင့် ထိုပြည်ကို ခွဲဝေခြင်း—တို့က သူသည် ဘုရားသခင်၏ကတိတော်များကို တစ်ခါမျှ မျက်ခြည်မပြတ်ခဲ့ကြောင်း ဖော်ပြသည်။ ယောရှုကွယ်လွန်ခါနီးတွင် ယေဟောဝါသည် ဣသရေလလူမျိုးကို ရန်သူလက်မှ လွတ်ငြိမ်းခွင့်ပေးသောအခါ သူသည် လူတို့ကို စုဝေးစေ၍ သူတို့နှင့် ဘုရားသခင်၏ဆက်ဆံရေးကို ပြန်လည်ဆင်ခြင်သုံးသပ်ပြီး ကိုယ်တော်၏အမှုတော်ကို စိတ်နှလုံးအကြွင်းမဲ့ ထမ်းဆောင်ကြရန် တိုက်တွန်းခဲ့သည်။ ယင်းကြောင့် ဣသရေလလူမျိုးသည် ယေဟောဝါနှင့် သူတို့၏ပဋိညာဉ်ကို အားသစ်လောင်း ဖွဲ့ဆိုခဲ့ကြပြီး သူတို့ခေါင်းဆောင်၏ ပုံသက်သေမှ အားရကာ “ယောရှုလက်ထက်ကာလပတ်လုံး ဣသရေလအမျိုးသားတို့သည် ထာဝရဘုရားကို ဝတ်ပြု” ခဲ့ကြခြင်းဖြစ်မည်မှာအမှန်။—ယောရှု ၂၄:၁၆၊ ၃၁။
ယောရှုသည် ကျွန်ုပ်တို့အတွက် သာလွန်ကောင်းမွန်သော ပုံသက်သေတစ်ခုဖြစ်၏။ ယနေ့ ခရစ်ယာန်များသည် ယုံကြည်ခြင်းစမ်းသပ်မှုများစွာကို ရင်ဆိုင်နေရကြသည်။ ထိုစမ်းသပ်မှုများကို အောင်မြင်စွာကျော်လွှားခြင်းသည် ယေဟောဝါ၏မျက်နှာသာတော် ဆက်ခံစားရခြင်းနှင့် နောက်ဆုံးတွင် ကိုယ်တော်၏ကတိတော်များကို အမွေခံရခြင်းအတွက် အရေးပါသည်။ ယောရှု၏အောင်မြင်မှုသည် သူ၏ခိုင်ခံ့သောယုံကြည်ခြင်းအပေါ် မူတည်၏။ မှန်ပါသည်၊ ယောရှုကဲ့သို့ ကျွန်ုပ်တို့သည် ဘုရားသခင်၏တန်ခိုးတော်ပါလုပ်ရပ်များကို မတွေ့မြင်ခဲ့ရသော်လည်း တစ်ဦးတစ်ယောက်က သံသယဖြစ်မည်ဆိုလျှင် ယေဟောဝါ၏စကားတော်ကို ယုံကြည်စိတ်ချနိုင်ကြောင်း ယောရှုအမည်တပ်ထားသည့် ကျမ်းစောင်က မျက်မြင်သက်သေဖော်ပြထားသည်။ ကျွန်ုပ်တို့သည် ကျမ်းစာကို နေ့စဉ်ဖတ်ရှုပြီး လက်တွေ့ကျင့်သုံးမည်ဆိုလျှင် ယောရှုနည်းတူ ဉာဏ်ပညာရှိပြီး အောင်မြင်မည်မှာ သေချာပါသည်။
တစ်ခါတစ်ရံ ခရစ်ယာန်ချင်းများ၏ အပြုအမူကြောင့် သင်စိတ်ထိခိုက်ခဲ့ဖူးသလော။ ယောရှုကိုယ်တိုင် မမှားခဲ့ဘဲ သစ္စာမဲ့အဖော်များနှင့် တောကန္တာရ၌ အနှစ် ၄၀ လှည့်လည်သွားလာရချိန်အတွင်း သူ၏ခံနိုင်ရည်ကို သတိရပါ။ မိမိ၏ခံယူချက်အတွက် အခိုင်အမာရပ်တည်ရန် သင်အခက်တွေ့သလော။ ယောရှုနှင့် ကာလက်တို့ ပြုလုပ်ခဲ့သမျှကို ပြန်အမှတ်ရပါ။ သူတို့၏ယုံကြည်ခြင်းနှင့် နာခံမှုတို့ကြောင့် အလွန်ကောင်းသော ဆုကျေးဇူးကို ခံစားခဲ့ကြရသည်။ ယေဟောဝါသည် မိမိ၏ကတိတော်အားလုံးကို ပြည့်စုံစေမည်ဟု ယောရှု အမှန်တကယ် ယုံကြည်စိတ်ချခဲ့သည်။ ကျွန်ုပ်တို့လည်း ထပ်တူယုံကြည်ခြင်းမျိုး ရှိနိုင်ကြပါစေ။—ယောရှု ၂၃:၁၄။
[စာမျက်နှာ ၁၀ ပါ ရုပ်ပုံ]
မောရှေနှင့်ပေါင်းဖော်ခဲ့ခြင်းက ယောရှု၏ယုံကြည်ခြင်းကို ခိုင်ခံ့စေ
[စာမျက်နှာ ၁၀ ပါ ရုပ်ပုံ]
ယောရှုနှင့် ကာလက်တို့သည် ယေဟောဝါ၏တန်ခိုးတော်ကို ယုံကြည်စိတ်ချခဲ့ကြ
[စာမျက်နှာ ၁၀ ပါ ရုပ်ပုံ]
ယောရှု၏ခေါင်းဆောင်မှုက ယေဟောဝါနှင့်တွယ်ကပ်နေစေရန် လူတို့ကို လှုံ့ဆော်ပေးခဲ့