သင်၏လက်တို့ကို ခိုင်ခံ့စေလော့
သင်၏လက်တို့ကို ခိုင်ခံ့စေလော့
သမ္မာကျမ်းစာတွင် လက်ကို အကြိမ်ပေါင်းရာနှင့်ချီ ဖော်ပြထားသည်။ ဟေဗြဲဘာသာစကား၌ လက်နှင့်ပတ်သက်သော ဥပစာစကားများကို နည်းအမျိုးမျိုးဖြင့် အသုံးပြုထားသည်။ ဥပမာ၊ သန့်ရှင်းစင်ကြယ်သောလက်သည် အပြစ်ကင်းခြင်းဟု အဓိပ္ပာယ်ရသည်။ (၂ ဓမ္မရာဇဝင် ၂၂:၂၁; ဆာလံ ၂၄:၃၊ ၄) လက်ကိုဖွင့်ခြင်းက သူတစ်ပါးအပေါ် ရက်ရောသည်ဟု ဆိုလိုသည်။ (တရားဟောရာ ၁၅:၁၁; ဆာလံ ၁၄၅:၁၆) အသက်စွန့်စားသူသည် မိမိအသက်ကို လက်နှင့်ဆုပ်ကိုင်၏ဟုဆိုသည်။ (၁ ဓမ္မရာဇဝင် ၁၉:၅၊ သမ) လက်လျော့ခြင်း၏အဓိပ္ပာယ်မှာ စိတ်ဓာတ်ကျခြင်းကိုဆိုလိုသည်။ (၂ ရာဇဝင်ချုပ် ၁၅:၇၊ သမ) လက်ကိုခိုင်ခံ့စေခြင်းဟူသည် ပြုမူဆောင်ရွက်စရာအတွက် ခွန်အားနှင့် အစွမ်းရှိစေခြင်းကိုဆိုလိုသည်။—၁ ဓမ္မရာဇဝင် ၂၃:၁၆။
ယနေ့ ကျွန်ုပ်တို့ခွန်အားရှိဖို့ သို့မဟုတ် ဟေဗြဲကျမ်းအရ ကျွန်ုပ်တို့၏လက်များကို ခိုင်ခံ့စေဖို့ အရေးတကြီးလိုအပ်လျက်ရှိသည်။ “ခဲယဉ်းသောကာလ” တွင် ကျွန်ုပ်တို့အသက်ရှင်နေကြ၏။ (၂ တိမောသေ ၃:၁) လူသည် စိတ်ဓာတ်ကျသည့်အခါ အရှုံးပေး လက်လျော့တတ်ကြသည်။ ဆယ်ကျော်သက်များ ကျောင်းထွက်ကြ၊ လင်ယောက်ျားများ မိသားစုကိုစွန့်ခွာကြ၊ မိခင်များ မိမိတို့သားသမီးများကို စွန့်ပစ်ကြခြင်းကို မြင်တွေ့ရစမြဲဖြစ်သည်။ သို့သော် ခရစ်ယာန်များအနေနှင့် ဘုရားသခင်အမှုတော်ဆောင်ရာတွင် ကျွန်ုပ်တို့ရင်ဆိုင်ရသော စမ်းသပ်မှုများကိုခံရပ်နိုင်ဖို့ ကျွန်ုပ်တို့၏လက်များကို ခိုင်ခံ့စေကြရမည်။ (မဿဲ ၂၄:၁၃) ဤသို့ပြုခြင်းအားဖြင့် ယေဟောဝါ၏စိတ်တော်ကို ကျွန်ုပ်တို့ရွှင်ပြုံးစေကြသည်။—သု. ၂၇:၁၁။
လက်တို့ကို ခိုင်ခံ့စေခဲ့ကြပုံ
ဧဇရခေတ်မှ ဂျူးများသည် ယေရုရှလင်မြို့ရှိ ယေဟောဝါ၏ဝတ်ပြုရာအိမ်တော်ကို ပြန်လည်ဆောက်လုပ်ပြီးစီးရန် မိမိတို့လက်များကို ခိုင်ခံ့စေဖို့လိုအပ်ခဲ့ကြသည်။ သူတို့၏လက်များကို မည်သို့ခိုင်ခံ့စေခဲ့ကြသနည်း။ မှတ်တမ်းကဤသို့ဆို၏– “ခုနစ်ရက်ပတ်လုံး ဝမ်းမြောက်သောစိတ်နှင့် တဆေးမဲ့မုန့်ပွဲကိုလည်းခံကြ၏။ အကြောင်းမူကား ထာဝရဘုရားသည် သူတို့ကို ဝမ်းမြောက်စေတော်မူသတည်း။ ဣသရေလအမျိုး၏ ဘုရားသခင့်[အိမ်]တော် တည်ဆောက်ခြင်းအမှုမှာ အာရှုရိဘုရင် အားပေးမစ [“သူတို့၏လက်များကို ခိုင်ခံ့စေ၊” ကဘ] မည်အကြောင်း စိတ်နှလုံးတော်ကို သူတို့ဘက်သို့လှည့်စေတော်မူ၏။” (ဧဇရ ၆:၂၂၊ သမ္မာ) ယေဟောဝါသည် မိမိ၏လူမျိုးတော်ကို ပြည်တော်ပြန်ခွင့်ပေးစေရန် “အာရှုရိရှင်ဘုရင်” ကို လှုပ်ရှားသောစွမ်းအားဖြင့် နှိုးဆော်ပေးခဲ့ကြောင်းနှင့် မိမိ၏လူမျိုးတော်အစပြုခဲ့သောလုပ်ငန်းကို လက်စသတ်ရန် သူတို့၏စိတ်ကို ကိုယ်တော်လှုံ့ဆော်ပေးခဲ့ကြောင်းလည်း ထင်ရှားသည်။
နောက်ပိုင်းတွင် ယေရုရှလင်မြို့ရိုး ပြန်ပြုပြင်ဖို့လိုလာသောအခါ နေဟမိသည် မိမိညီအစ်ကိုများ၏လက်တို့ကို ခိုင်ခံ့စေခဲ့သည်။ ကျွန်ုပ်တို့ဤသို့ဖတ်ရသည်– “ငါ၏ဘုရားသခင်သည် ငါ့အားပြုတော်မူသောကျေးဇူးကိုလည်းကောင်း၊ ရှင်ဘုရင်မိန့်တော်မူသောစကားကိုလည်းကောင်း ကြားပြောလေသော် သူတို့က ‘ငါတို့သည်ထ၍တည်ကြကုန်အံ့’ ဟုဆိုလျက် ထိုကောင်းမှုကိုပြီးစီးစေခြင်းငှာ တစ်ယောက်ကိုတစ်ယောက်နှိုးဆော် [“မိမိတို့လက်များကို ခိုင်ခံ့စေ၊” ကဘ] ကြ၏။” နေဟမိနှင့် သူ၏ဂျူးအဖော်များသည် မိမိတို့လက်များကို ခိုင်ခံ့စေပြီး ယေရုရှလင်မြို့ရိုးကို ၅၂ ရက်တည်းဖြင့် ပြန်လည်တည်ဆောက်နိုင်ခဲ့ကြလေသည်!—နေဟမိ ၂:၁၈; ၆:၉၊ ၁၅။
ထိုနည်းတူပင် ယေဟောဝါသည် ဘုရားသခင့်နိုင်ငံတော်သတင်းကောင်း ဟောပြောရန် ကျွန်ုပ်တို့၏လက်များကို ခိုင်ခံ့စေပါသည်။ (မဿဲ ၂၄:၁၄) ကျွန်ုပ်တို့သည် ‘အလိုတော်သို့လိုက်မည်အကြောင်း ကောင်းသောအရာရှိသမျှဖြင့် ကျွန်ုပ်တို့ကိုပြည့်စုံစေ’ တော်မူ၏။ (ဟေဗြဲ ၁၃:၂၁၊ သမ္မာ) အကောင်းဆုံးလက်နက်ကိရိယာများကို ကျွန်ုပ်တို့အား ကိုယ်တော်ပေးအပ်ထားတော်မူပြီ။ ကမ္ဘာတစ်ဝန်းမှ လူများထံ သတင်းတရားရောက်ရှိရန် ကျွန်ုပ်တို့တွင် သမ္မာကျမ်းစာ၊ ကျမ်းစာအခြေပြုစာအုပ်များ၊ မဂ္ဂဇင်းများ၊ ဘရိုရှာများ၊ ဝေစာ များ၊ အော်ဒီယိုနှင့် ဗီဒီယိုတိတ်ခွေများရှိသည်။ အမှန်မှာ ကျွန်ုပ်တို့၏စာပေစာတမ်းများကို ဘာသာစကား ၃၈၀ ကျော်ဖြင့် ရရှိနိုင်ပါသည်။ ထို့အပြင် ယေဟောဝါသည် ကျွန်ုပ်တို့၏ဓမ္မအမှု ပြီးမြောက်အောင်မြင်ရန် အလွန်ကောင်းမွန်သော အဆိုပါကိရိယာများ မည်သို့အသုံးပြုနိုင်ကြောင်း သီအိုကရက်တစ်ပညာရေးနှင့် လေ့ကျင့်မှုကို အသင်းတော်အစည်းအဝေးများ၊ စည်းဝေးပွဲများနှင့် စည်းဝေးကြီးများအားဖြင့်လည်း စီမံပေး၏။
ယေဟောဝါသည် နည်းလမ်းများစွာဖြင့် ကျွန်ုပ်တို့လက်များကို ခိုင်ခံ့စေသည်မှန်သော်လည်း ကိုယ်တော်သည် ကျွန်ုပ်တို့ကို ကြိုးစားအားထုတ်စေလို၏။ ကျူးကျော်ဝင်ရောက်သူ ရှုရိလူတို့ကိုတိုက်ခိုက်ရန် ဧလိရှဲထံအကူအညီလာတောင်းသူ ယောရှမင်းအား ပရောဖက်ဧလိရှဲပြောဆိုခဲ့သောစကားကို ပြန်သတိရပါ။ ဧလိရှဲက မြားအချို့ကိုယူ၍ မြေကြီးကိုရိုက်လော့ဟု ရှင်ဘုရင်အားဆို၏။ ကျမ်းစာမှတ်တမ်းက ဤသို့ဆိုသည်– “[သူသည်] သုံးကြိမ်ရိုက် [“ပြီးမှ ရပ်၊” သမ္မာ] လေ၏။ ထိုအခါ ဘုရားသခင်၏လူသည် အမျက်ထွက်၍ ‘အဘယ်ကြောင့်ငါးကြိမ်ခြောက်ကြိမ်မရိုက်သနည်း။ ထိုသို့ရိုက်လျှင် ရှုရိလူတို့ကို အကုန်အစင်လုပ်ကြံရလိမ့်မည်။ ယခုမူကား သုံးကြိမ်သာလုပ်ကြံရလိမ့်မည်’ ဟုဆို၏။” (၄ ဓမ္မရာဇဝင် ၁၃:၁၈၊ ၁၉) စိတ်အားထက်သန်စွာ ကြိုးစားအားထုတ်ခြင်းမပြုသဖြင့် ယောရှသည် ရှုရိလူတို့ကို အကန့်အသတ်ဖြင့်သာ အနိုင်ရခဲ့သည်။
ယေဟောဝါပေးအပ်ထားသောအလုပ်ကို ကျွန်ုပ်တို့ပြီးမြောက်အောင်မြင်လိုလျှင် အဆိုပါမူအတိုင်း ကျွန်ုပ်တို့လုပ်ကိုင်ရမည်။ ကျွန်ုပ်တို့ရှေ့တွင်ရှိသော အတားအဆီးများ၊ အခက်အခဲများအကြောင်း တွေးပူနေမည့်အစား လုပ်စရာအလုပ်ကို ဇွဲရှိရှိ၊ စိတ်နှလုံးအကြွင်းမဲ့ လုပ်ဆောင်သင့်သည်။ ကျွန်ုပ်တို့၏လက်များကို ခိုင်ခံ့စေပြီး ယေဟောဝါအား မျှော်ကိုးဖို့လိုသည်။—ဟေရှာယ ၃၅:၃၊ ၄။
ကျွန်ုပ်တို့၏လက်များကို ယေဟောဝါခိုင်ခံ့စေမည်
ယေဟောဝါ၏အလိုတော်ကို ဆောင်ရွက်နိုင်ရန် ကိုယ်တော်အမှန်ထောက်မကူညီပေးပြီး ကျွန်ုပ်တို့၏လက်များကို ခိုင်ခံ့စေပါလိမ့်မည်။ ဘုရားသခင်သည် အံ့ဖွယ်အမှုတစ်ခုခုပြုလုပ်ပြီး ကျွန်ုပ်တို့အတွက် အစစအရာရာဆောင်ရွက်ပေးမည်မဟုတ်ပါ။ ကျွန်ုပ်တို့လုပ်ဆောင်ရမည့် နေ့စဉ်ကျမ်းစာဖတ်ရှုခြင်း၊ အစည်းအဝေးများအတွက် ပြင်ဆင်၍ မှန်မှန်တက်ရောက်ခြင်း၊ တတ်နိုင်သ၍ ဓမ္မအမှု၌ပါဝင်ခြင်းနှင့် ကိုယ်တော်အား မပြတ်ဆုတောင်းခြင်းတို့ကို ပြုလုပ်စေလိုတော်မူ၏။ အခွင့်အရေးရစဉ် ကျွန်ုပ်တို့လုပ်ကိုင်ရမည့်အလုပ်ကို တည်တည်ကြည်ကြည် လုံ့လဝီရိယရှိရှိ လုပ်ဆောင်ကြမည်ဆိုလျှင် ကျွန်ုပ်တို့ကို ယေဟောဝါပြုလုပ်စေလိုသောအမှုအတွက် ခွန်အားရှိစေပါလိမ့်မည်။—ဖိလိပ္ပိ ၄:၁၃။
တစ်နှစ်အတွင်း ဇနီးရော မိခင်ပါ ဆုံးပါးခဲ့ရှာသော ခရစ်ယာန်တစ်ဦး၏အဖြစ်ကို သုံးသပ်ကြည့်ပါ။ ထိုသို့ဖြစ်ပြီးမကြာမီ ချွေးမဖြစ်သူသည် သူ၏သားကိုထားရစ်ခဲ့ပြီး ခရစ်ယာန်လမ်းစဉ်ကို စွန့်ခွာသွားခဲ့သည်။ ၎င်းညီအစ်ကိုက ဤသို့ပြောသည်– “ကျွန်တော်တို့ခံရတဲ့ စုံစမ်းမှုတွေကိုဖြစ်စေ၊ အဲဒါကိုကြုံရတဲ့ အချိန်အခါကိုဖြစ်စေ၊ အကြိမ်ပေါင်းကိုဖြစ်စေ ကျွန်တော်တို့မရွေးနိုင်ဘူးဆိုတာသိခဲ့ရတယ်။” ထို့နောက် သူမည်သို့ခွန်အား ဆက်ရှိနိုင်ခဲ့သနည်း။ “ဆုတောင်းခြင်းနဲ့ ကိုယ်ပိုင်လေ့လာမှုတို့က ကျွန်တော့်အတွက် ခေါင်းကိုရေပေါ်မှာ ထောင်စေနိုင်ခဲ့တဲ့ အသက်ကယ်အင်္ကျီဖြစ်ခဲ့တယ်။ ဝိညာဉ်ရေးညီအစ်ကို၊ ညီအစ်မတွေရဲ့ အားပေးထောက်မမှုကလည်း ကျွန်တော့်ကို အများကြီးနှစ်သိမ့်မှုပေးတယ်။ ဒါတွေအားလုံးထက်၊ အခြေအနေဆိုးတွေ မပေါ်ပေါက်လာခင် ယေဟောဝါနဲ့နှစ်ကိုယ်ကြား ဆက်ဆံရေးကောင်းဖို့ တကယ်အရေးကြီးတယ်ဆိုတာကို ကျွန်တော်သိခဲ့ရပါတယ်။”
သင်သည် ဘဝတွင် အဘယ်အရာကိုတွေ့ကြုံရပါစေ ယေဟောဝါကို အပြည့်အဝယုံကြည်အားထားပါ၊ သင်၏လက်များ ခိုင်ခံ့စေဖို့ ကိုယ်တော်ပြုလုပ်ပေးသမျှအရာအားလုံးကို ကောင်းကောင်းအသုံးချရန် စိတ်ပိုင်းဖြတ်ထားပါ။ သို့ပြုလျှင် အရည်အသွေးအမြင့်ဆုံးလုပ်ငန်းတော်ကို ယေဟောဝါအား သင်ပေးဆက်နိုင်ကာ ကိုယ်တော်၏ ဂုဏ်အသရေရှိနာမတော်ကို ချီးမွမ်း၊ ဂုဏ်တင်မှုဖြစ်စေပါလိမ့်မည်။—ဟေဗြဲ ၁၃:၁၅။
[စာမျက်နှာ ၃၁ ပါ ရုပ်ပုံ]
ယောရှသည် စိတ်အားထက်သန်စွာ ကြိုးစားအားထုတ် မပြုလုပ်ခဲ့သဖြင့် ရှုရိလူတို့ကို အကန့်အသတ်ဖြင့်သာ အနိုင်ရခဲ့