သွန်သင်သူများဖြစ်စေသည့် ကိုယ်ပိုင်လေ့လာမှု
သွန်သင်သူများဖြစ်စေသည့် ကိုယ်ပိုင်လေ့လာမှု
“သင်၏တိုးပွားခြင်းကို လူအပေါင်းတို့အားထင်ရှားစေခြင်းငှာ၊ ဤအရာများကိုစိတ်စွဲလမ်း၍ ကြိုးစားအားထုတ်လော့။ ကိုယ်ကိုလည်းကောင်း၊ ကိုယ်ဆုံးမ [စကား] ကိုလည်းကောင်း သတိပြု၍ အမြဲတည်နေလော့။” —၁ တိမောသေ ၄:၁၅၊ ၁၆။
၁။ အချိန်နှင့် ကိုယ်ပိုင်ကျမ်းစာလေ့လာမှုနှင့်ပတ်သက်၍ အမှန်သိရမည်ကား အဘယ်နည်း။
“ခပ်သိမ်းသောအမှုအရာတို့သည် မိမိတို့အချိန်ရှိ၏” ဟူ၍ ဒေ. ၃:၁ တွင်သမ္မာကျမ်းစာကဆိုသည်။ ကိုယ်ပိုင်ကျမ်းစာလေ့လာမှုနှင့်ပတ်သက်လျှင် ယင်းသည် အမှန်ပင်ဖြစ်သည်။ လူအများသည် အချိန်အခါမသင့်၊ နေရာမမှန်လျှင် ဝိညာဉ်ရေးရာများကို ဆင်ခြင်သုံးသပ်ရန် အခက်တွေ့ကြသည်။ ဥပမာ၊ သင်သည် တစ်နေ့တာအလုပ်ပင်ပန်း၍ ညစာကို ဝစွာစားပြီးနောက် အထူးသဖြင့် ရုပ်မြင်သံကြားရှေ့ သင်အနှစ်သက်ဆုံး ပက်လက်ကုလားထိုင်တွင် ကျောမှီထိုင်ပြီးလျှင် လေ့လာမှုပြုလုပ်လိုမည်လော။ လေ့လာလိုမည်မဟုတ်။ သို့ဆိုလျှင် ယင်းကို မည်သို့ဖြေရှင်းမည်နည်း။ ရှင်းနေသည်မှာ ကျွန်ုပ်တို့၏ကြိုးစားအားထုတ်မှုမှ အကျိုးအများဆုံးခံစားရရန် လေ့လာမှုပြုလုပ်ဖို့ အချိန်နှင့် နေရာကို ရွေးချယ်ကြရမည်။
၂။ ကိုယ်ပိုင်ကျမ်းစာလေ့လာမှုပြုလုပ်ရန် အဘယ်အချိန်သည် အကောင်းဆုံးအချိန်ဖြစ်လေ့ရှိသနည်း။
၂ လူအများက လေ့လာရန် အကောင်းဆုံးအချိန်သည် များသောအားဖြင့် အနိုးကြားဆုံးအချိန်ဖြစ်သည့် နံနက်စောစောဖြစ်သည်ဟု ဆုံးဖြတ်ကြ၏။ အခြားသူတို့မှာမူ အချိန်တိုလေ့လာမှုအတွက် နေ့ခင်းအနားယူချိန်ကို အသုံးပြုတတ်ကြသည်။ အောက်ပါဥပမာများတွင် အရေးပါသော ဝိညာဉ်ရေးလုပ်ဆောင်မှုများနှင့်ပတ်သက်၍ အချိန်ဖော်ညွှန်းထားပုံကို သတိပြုပါ။ ရှေးခေတ်ဣသရေလရှင်ဘုရင်ဒါဝိဒ်က ဤသို့ရေးသားခဲ့သည်– “ကိုယ်တော်၌ အကျွန်ုပ်ကိုးစားသောကြောင့် မေတ္တာကျေးဇူးတော်သံကို နံနက်ယံ၌ကြားနာခွင့်၊ ကိုယ်တော်အားစွဲလမ်းသောကြောင့် သွားရာလမ်းကို သိမြင်ခွင့်ပေးတော်မူပါ။” (ဆာလံ ၁၄၃:၈၊ သမ) ပရောဖက်ဟေရှာယကလည်း ထပ်တူပင်ကျေးဇူးတင်လေးမြတ်ကြောင်း ဤသို့ဖော်ပြခဲ့သည်– “ငါသည် ပင်ပန်းသောသူအား မစခြင်းငှာ စကားပြောတတ်မည်အကြောင်း အရှင်ထာဝရဘုရားသည် လူတတ်၏နှုတ်သတ္တိကို ငါ့အားပေးတော်မူပြီ။ နံနက်အစဉ်အတိုင်း ငါ့ကိုနှိုးတော်မူ၏။ စာသင်သောသူကဲ့သို့ နားထောင်စေမည်အကြောင်း ငါ့နားကိုနှိုးဆော်တော်မူ၏။” ဆိုလိုသည်မှာ ကျွန်ုပ်တို့သည် တစ်နေ့တာအတွင်း ဉာဏ်ရည်ထက်မြက်နေချိန် အဘယ်အချိန်၌မဆို ယေဟောဝါနှင့်တရင်းတနှီးရှိရန် လေ့လာသုံးသပ်ဖို့လိုသည်။—ဟေရှာယ ၅၀:၄၊ ၅; ဆာလံ ၅:၃; ၈၈:၁၃။
၃။ ထိရောက်စွာလေ့လာဖို့အတွက် သင့်လျော်သောအခြေအနေများကား အဘယ်နည်း။
၃ ထိထိရောက်ရောက်လေ့လာရန် နောက်တစ်ချက်မှာ သက်သောင့်သက်သာအရှိဆုံးကုလားထိုင် သို့မဟုတ် ဆိုဖာကို ရွေးမထိုင်ဖို့ဖြစ်သည်။ သို့ပြုမှသာ ဆက်နိုးနိုးကြားကြားရှိလိမ့်မည်။ ကျွန်ုပ်တို့လေ့လာမှုပြုသည့်အခါ စိတ်လန်းလန်းဆန်းဆန်းရှိဖို့လိုသည်၊ အလွန်အမင်းသက်သောင့်သက်သာရှိခြင်းက လူကိုလေးတွဲ့စေ၏။ ထို့အပြင် ကောင်းစွာလေ့လာ၊ စဉ်းစားဆင်ခြင်လိုလျှင် အတော်အသင့်တိတ်ဆိတ်ငြိမ်သက်ပြီး အနှောင့်အယှက်မရှိသည့်နေရာကိုရွေးပါ။ ရေဒီယို၊ ရုပ်မြင်သံကြား သို့မဟုတ် ကလေးများက သင့်အာရုံစိုက်မှုကို ပျက်ပြားစေမည်ဆိုလျှင် သင့်လေ့လာမှုမှ အကျိုးများများ ရရှိလိမ့်မည်မဟုတ်ချေ။ ယေရှုသည် စဉ်းစားဆင်ခြင်လိုသောအခါ တိတ်ဆိတ်သောနေရာတစ်နေရာသို့ သွားခဲ့သည်။ ဆုတောင်းဖို့အတွက် ဆိတ်ကွယ်ငြိမ်သက်ရာအရပ် ရွေးခြင်း၏တန်ဖိုးကိုလည်း ကိုယ်တော်မိန့်မှာတော်မူခဲ့သည်။—မဿဲ ၆:၆; ၁၄:၁၃; မာကု ၆:၃၀-၃၂။
ဖြေဆိုတတ်ရန် အသင့်ရှိစေသော ကိုယ်ပိုင်လေ့လာမှု
၄၊ ၅။ တောင်းဆိုဘရိုရှာသည် အဘယ်နည်းများဖြင့် လက်တွေ့ကျအကူအညီတစ်ရပ် ဖြစ်သနည်း။
၄ အကြောင်းအရာတစ်ခုကို ကောင်းစွာသိရှိထားရန် ကျမ်းစာနားလည်ဖို့ အထောက်အကူပြုစာပေအမျိုးမျိုးကို ကျွန်ုပ်တို့အသုံးပြုသည့်အခါ ကျေနပ်မှုရရှိသည်၊ အထူးသဖြင့် စိတ်ရင်းမှန်ဖြင့်မေးမြန်းသူ၏ မေးခွန်းများကိုဖြေဆိုရန် ထိုသို့ပြုသောအခါ ကျေနပ်မှုပိုရရှိသည်။ (၁ တိမောသေ ၁:၄; ၂ တိမောသေ ၂:၂၃) ကျမ်းစာစလေ့လာသည်အနေနှင့် လူသစ်များစွာသည် ယခု ဘာသာစကားပေါင်း ၂၆၁ ဘာသာဖြင့်ရရှိနိုင်သော ကျွန်ုပ်တို့ထံမှ ဘုရားသခင် အဘယ်အရာတောင်းဆိုတော်မူသနည်း * ဘရိုရှာကို လေ့လာနေကြပါသည်။ ဤဘရိုရှာသည် သမ္မာကျမ်းစာအပေါ် လုံးလုံးအခြေပြု၏၊ နားလည်ရအလွန်လွယ်ကူပြီး စေ့စပ်တိကျစွာ ရေးသားထား၏။ စစ်မှန်သောဝတ်ပြုရေးနှင့်စပ်လျဉ်း၍ ဘုရားသခင်အဘယ်အရာများတောင်းဆိုထားသည်ကို ဤစာစောင်ဖတ်ရှုသူအား အလျင်အမြန် သဘောပေါက်နားလည်စေ၏။ သို့သော် ဤစာစောင်၏အရွယ်အစားကြောင့် အကြောင်းအရာတစ်ခုချင်းစီကို အသေးစိတ်လေ့လာရန် မဖြစ်နိုင်ချေ။ ထို့ကြောင့် သင်၏သင်သားက ဆွေးနွေးသုံးသပ်နေသော ကျမ်းစာအကြောင်းတစ်ခုခုကို အလေးအနက်သိလိုပြီး မေးခွန်းများမေးလျှင် သမ္မာကျမ်းစာမှအဖြေကို မည်သို့ရှာဖွေယူနိုင်မည်နည်း။
၅ မိမိတို့၏ဘာသာစကားဖြင့် ကင်းမျှော်စင်စာကြည့်တိုက်စီဒီရွမ်ရှိသူတို့သည် ကွန်ပျူတာမှ သတင်းအချက်အလက်အမျိုးမျိုးကို အလွယ်တကူရရှိနိုင်သည်။ သို့သော် ဤကိရိယာများမရှိသူတို့အတွက်ကော မည်သို့နည်း။ တောင်းဆိုဘရိုရှာ၌ သုံးသပ်ထားသောအကြောင်းအရာနှစ်ခုနှင့်ပတ်သက်၍ အကယ်၍ တစ်ဦးတစ်ယောက်က ဘုရားသခင်ကား မည်သူနည်း၊ ယေရှုခရစ်သည် အမှန်တကယ်မည်သူနှင့်တူသနည်း စသည့်မေးခွန်းများမေးလျှင် ကျွန်ုပ်တို့၏သိနားလည်မှုကို မည်သို့တိုးချဲ့ပြီး သာ၍တိတိကျကျ ဖြေဆိုနိုင်မည်ကို ဆန်းစစ်ကြည့်ကြစို့။—ထွက်မြောက်ရာ ၅:၂; လုကာ ၉:၁၈-၂၀; ၁ ပေတရု ၃:၁၅။
ဘုရားသခင်ကား မည်သူနည်း
၆၊ ၇။ (က) ဘုရားသခင်နှင့်ပတ်သက်၍ အဘယ်မေးခွန်း ပေါ်ထွက်လာသနည်း။ (ခ) ခရစ်ယာန်ဘုန်းကြီးတစ်ပါးသည် သူ၏ပို့ချချက်တွင် အဘယ်အလေးအနက်ထားရာကို ချန်လှပ်ထားခဲ့သနည်း။
၆ တောင်းဆိုဘရိုရှာရှိ အခန်း ၂ က ဘုရားသခင်ကား မည်သူနည်း ဟူသော အရေးပါသည့်မေးခွန်းကို ဖြေကြားပေးသည်။ ဤအကြောင်းသည် ပဓာနကျသောအကြောင်းအရာတစ်ခုဖြစ်သည်၊ အကြောင်းမှာ စစ်မှန်သောဘုရားသခင်ကို မသိ၊ ကိုယ်တော်ရှိကြောင်းကို သံသယဖြစ်လျှင် ကိုယ်တော်အား ဝတ်ပြုကိုးကွယ်နိုင်မည်မဟုတ်ချေ။ (ရောမ ၁:၁၉၊ ၂၀; ဟေဗြဲ ၁၁:၆) ကမ္ဘာတစ်ဝန်းရှိသူတို့၌ ဘုရားသခင်သည် မည်သူမည်ဝါဖြစ်သည်ဟူသောအယူအဆ ရာနှင့်ချီရှိ၏။ (၁ ကောရိန္သု ၈:၄-၆) ဘုရားသခင်သည် မည်သူမည်ဝါဖြစ်သည်နှင့်ပတ်သက်၍ ဘာသာရေးအတွေးအခေါ်တိုင်းက တစ်မျိုးစီဖြေဆိုကြသည်။ ခရစ်ယာန်ဘောင်လောကတွင် ခရစ်ယာန်ဘာသာအများစုက ဘုရားသခင်သည် သုံးပါးပေါင်းတစ်ဆူဖြစ်၏ဟု ယူမှတ်ကြသည်။ အမေရိကန်ပြည်ထောင်စုမှ အထင်ကရခရစ်ယာန်ဘုန်းကြီးတစ်ပါးက “ဘုရားသခင်အား သင်သိသလော” ဟူသောခေါင်းစဉ်ဖြင့် ဟောပြောပို့ချခဲ့ရာ ဟေဗြဲကျမ်းစောင်ကို ကြိမ်ဖန်များစွာကိုးကားခဲ့သော်လည်း မြင့်မြတ်သောနာမတော်ကို သူ၏ဟောပြောချက်တွင် တစ်ကြိမ်တစ်ခါမျှ မဖော်ပြခဲ့ချေ။ သူသည် ယေဟောဝါ သို့မဟုတ် ယာဝေးအစား အနက်အဓိပ္ပာယ်ဒွိဟဖြစ်စေသည့် “သခင်” ဟူ၍ဖော်ပြအသုံးပြုထားသော ဘာသာပြန်ကျမ်းစာမှ ဖတ်ပြခဲ့သည်။
၇ ထိုခရစ်ယာန်ဘုန်းကြီးသည် ယေရမိ ၃၁:၃၃၊ ၃၄ ကို ကိုးကားခဲ့သောအခါ အမှန်တကယ်အရေးပါသောအချက်ကို လုံးဝမဖော်ပြခဲ့ပါ၊ ထိုကျမ်းပိုဒ်က ဤသို့ဆိုသည်– “‘“ထာဝရဘုရားကိုသိလော့” [ဟေဗြဲ၊ “ယေဟောဝါကိုသိလော့”] ဟု အမျိုးသားချင်း၊ ညီအစ်ကိုအချင်းချင်း တစ်ယောက်ကိုတစ်ယောက် ဆုံးမ . . . မပေးရကြ။ အကြောင်းမူကား အငယ်ဆုံးသောသူမှစ၍ အကြီးဆုံးသောသူတိုင်အောင် ထိုသူအပေါင်းတို့သည် ငါ့ကိုသိကြလိမ့်မည်’ . . . ဟု ထာဝရဘုရား [ဟေဗြဲ၊ ယေဟောဝါ] မိန့်တော်မူ၏။” သူအသုံးပြုခဲ့သော ဘာသာပြန်ကျမ်းက ဤထူးခြားထင်ရှားသည့် မြင့်မြတ်သောနာမတော် ယေဟောဝါကို ချန်လှပ်ထားသည်။—ယေရမိ ၃၃:၂။
၈။ ဘုရားသခင့်နာမတော် အသုံးပြုခြင်း၏အရေးပါမှုကို အဘယ်အရာက ရှင်းလင်းဖော်ပြသနည်း။
၈ ဆာလံ ၈:၉ [ကဘ] က ယေဟောဝါ၏နာမတော်ကို အသုံးပြုရခြင်းမှာ အဘယ်ကြောင့်သာလွန်ထူးခြားရကြောင်း ဤသို့ဖော်ပြသည်– ‘အိုအကျွန်ုပ်တို့၏ဘုရားသခင်ယေဟောဝါ ကိုယ်တော်၏နာမသည် မြေကြီးတစ်ပြင်လုံး၌ အလွန်ကြီးမြတ်တော်မူသတည်း။’ ၎င်းကို ‘အိုအကျွန်ုပ်တို့၏ဘုရားသခင်ထာဝရဘုရား ကိုယ်တော်၏နာမသည် မြေကြီးတစ်ပြင်လုံး၌ အလွန်ကြီးမြတ်တော်မူသတည်း’ နှင့်နှိုင်းယှဉ်ကြည့်ပါ။ (ယုဒသန်၊ သမ္မာကျမ်းစာတော်၊ သမာကျမ်း၊ သတင်းကောင်းကျမ်းတို့ကိုလည်းရှု။) ရှေ့ဆောင်းပါး၌ ဖော်ပြထားသည့်အတိုင်း ကိုယ်တော်၏နှုတ်မြွက်စကားတော် သမ္မာကျမ်းစာကို ကျွန်ုပ်တို့အား ဉာဏ်အလင်းပေးခွင့်ပြုမည်ဆိုလျှင် “ဘုရားသခင်ကိုသိသောဉာဏ်” ကျွန်ုပ်တို့ရရှိနိုင်၏။ သို့သော် မြင့်မြတ်သောနာမတော်၏ အရေးပါမှုနှင့်ပတ်သက်၍ ကျွန်ုပ်တို့၏မေးခွန်းများကို ဖြေဆိုပေးရန် အသင့်ပြင်ဆင်ထားသော သမ္မာကျမ်းဆိုင်ရာ အဘယ်လေ့လာမှုအထောက်အကူစာအုပ်ရှိသနည်း။—သု. ၂:၁-၆။
၉။ (က) မြင့်မြတ်သောနာမတော်ကို အသုံးပြုခြင်း၏အရေးပါပုံအကြောင်း ရှင်းပြပေးရန် အဘယ်စာပေက ကူညီပေးနိုင်သနည်း။ (ခ) ဘာသာပြန်များစွာသည် ဘုရားသခင့်နာမတော်ကို ရိုသေလေးမြတ်ဖို့ မည်သို့ပျက်ကွက်ခဲ့သနည်း။
၉ ဘာသာစကားပေါင်း ၆၉ ဘာသာသို့ ဘာသာပြန်ဆိုထားသော “ထာဝစဉ်တည်တံ့သွားမည့် မြင့်မြတ်သောနာမတော်” ဘရိုရှာကို ကျွန်ုပ်တို့အသုံးပြုနိုင်ကြသည်။ * “ဘုရားသခင်၏နာမတော်—၎င်း၏အဓိပ္ပာယ်နှင့် အသံထွက်” (စာမျက်နှာ ၆-၁၁) ခေါင်းစဉ်ရှိအပိုင်းက ဟေဗြဲတက်တြာဂရမ်မီတန် (“ဗျည်းလေးလုံး” ဟုအဓိပ္ပာယ်ရှိသောဂရိစကားလုံး) သည် ရှေးဟေဗြဲကျမ်းတွင် အကြိမ်ပေါင်း ၇,၀၀၀ နီးပါးခန့်ပါရှိကြောင်း အထင်အရှားဖော်ပြသည်။ သို့တိုင် ယုဒဘာသာ၊ ခရစ်ယာန်ဘောင်ရှိဘုန်းကြီးများနှင့် ဘာသာပြန်ဆိုသူတို့က ၎င်းတို့၏ဘာသာပြန်ကျမ်းအများစုမှ နာမတော်မြတ်ကို တမင်သက်သက်ပင် ချန်လှပ်ထားခဲ့ကြသည်။ * သူတို့သည် ဘုရားသခင်အား ကိုယ်တော်၏နာမတော်ဖြင့် အသိအမှတ်မပြုလိုလျှင် ဘုရားသခင်ကို သိပါသည်ဟုဆိုပြီး ကိုယ်တော်နှင့် ကောင်းသောဆက်ဆံရေး မည်သို့ရှိနိုင်မည်နည်း။ ကိုယ်တော်၏စစ်မှန်သောနာမတော်မြတ်က ကိုယ်တော်၏ရည်ရွယ်ချက်များနှင့် ကိုယ်တော်သည် မည်သူမည်ဝါဖြစ်ကြောင်း နားလည်စေသည်။ ထိုထက်ကား ဘုရားသခင့်နာမတော်ကို အသုံးမပြုလျှင် ယေရှု၏စံပြဆုတောင်းချက်ပါ “ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော” ဟူသည့်အပိုင်းသည် အဘယ်တန်ဖိုးရှိမည်နည်း။—မဿဲ ၆:၉; ယောဟန် ၅:၄၃; ၁၇:၆။
ယေရှုခရစ်ကားမည်သူနည်း
၁၀။ ယေရှု၏ဘဝအသက်တာအပြင် ခရစ်ယာန်ဓမ္မအမှုနှင့်ပတ်သက်၍ ရုပ်လုံးဖော်ပြချက်တစ်ရပ်လုံးကို အခြားအဘယ်နည်းများဖြင့် ကျွန်ုပ်တို့သိရှိနိုင်ကြသနည်း။
၁၀ တောင်းဆိုဘရိုရှာ အခန်း ၃ ၏ခေါင်းစဉ်မှာ “ယေရှုခရစ်ကား မည်သူနည်း” ဖြစ်သည်။ ခြောက်ပိုဒ်တည်းဖြင့်သာ ယေရှု၏မူလအစနှင့် မြေကြီးပေါ်ကြွလာရခြင်းရည်ရွယ်ချက်ကို အကြမ်းဖျင်း အကျဉ်းချုပ်ဖော်ပြပေး၏။ သို့သော် ကိုယ်တော်၏ဘဝအသက်တာနှင့်ပတ်သက်၍ မှတ်တမ်းအပြည့်အစုံကိုသိလိုပါက ခရစ်ဝင်မှတ်တမ်းများကိုယ်နှိုက်အပြင် ဘာသာစကားပေါင်း ၁၁၁ ဘာသာဖြင့်ရရှိနိုင်သော အသက်ရှင်ခဲ့သမျှတွင် အကြီးမြတ်ဆုံးလူသား စာအုပ်ထက် သာ၍ကောင်းသောစာအုပ်မရှိချေ။* ဤစာအုပ်သည် ခရစ်ဝင်ကျမ်းလေးကျမ်းကို အခြေပြုပြီး ခရစ်တော်၏ဘဝအသက်တာနှင့် သွန်သင်ချက်များကို သက္ကရာဇ်စဉ်အတိုင်း အပြည့်အစုံမှတ်တမ်းတင်ဖော်ပြပေးသည်။ ဤစာအုပ်၏အခန်း ၁၃၃ ခန်းက ယေရှု၏ဘဝအသက်တာနှင့် ခရစ်ယာန်ဓမ္မအမှုမှ အဖြစ်အပျက်များကို ခြုံငုံဖော်ပြသည်။ ထူးထူးခြားခြား ခွဲခြမ်းစိတ်ဖြာဖော်ပြနည်းကိုသိလိုလျှင် ထိုးထွင်းသိမြင်ခြင်း အတွဲ ၂ မှ “ယေရှုခရစ်” ခေါင်းစဉ်အောက်ရှိအကြောင်းအရာကို သင်ဖတ်ကြည့်နိုင်သည်။
၁၁။ (က) ယေရှုနှင့်ပတ်သက်၍ ယေဟောဝါသက်သေများ၏ယုံကြည်ချက်သည် အခြားသူများနှင့် မည်သို့ခြားနားသနည်း။ (ခ) သုံးပါးပေါင်းတစ်ဆူအယူဝါဒမှားကြောင်း အတိအလင်းဖော်ပြသည့်ကျမ်းချက်အချို့ကား အဘယ်နည်း၊ ယင်းနှင့်ပတ်သက်၍ အဘယ်စာပေက အကူအညီဖြစ်စေသနည်း။
၁၁ ခရစ်ယာန်ဘောင်တွင် ယေရှုနှင့်ပတ်သက်၍ အငြင်းအခုံဖြစ်နေသည်မှာ ကိုယ်တော်သည် “ဘုရားသခင်၏သားတော်” လည်းဖြစ်၊ “သားတော်ဘုရားသခင်” လည်းဖြစ်သလောဟူ၍ဖြစ်သည်၊ တစ်နည်းဆိုရသော် ကက်သလစ်ချာ့ခ်ျ၏အမေးအဖြေစာအရ “ခရစ်ယာန်ယုံကြည်ချက်၏ အချက်အချာနက်နဲရာ၊” သုံးပါးပေါင်းတစ်ဆူကို အချေအတင်ငြင်းခုံနေကြသည်။ ခရစ်ယာန်ဘောင်ဘာသာများနှင့်မတူ သီးခြားကွဲပြား၍ ယေဟောဝါသက်သေများက ယေရှုကို ဘုရားသခင်အဖြစ်မဟုတ်ဘဲ ဘုရားသခင်ထံတော်မှဖြစ်လာကြောင်း ယုံကြည်ကြသည်။ ဤအကြောင်းကို ၉၅ ဘာသာစကားသို့ပြန်ဆိုထားသည့် သုံးပါးပေါင်းတစ်ဆူကို သင်ယုံကြည်သင့်သလော [လိပ်] ဘရိုရှာ၌ သာလွန်ထူးခြားစွာ ဆွေးနွေးတင်ပြထားသည်။ * သုံးပါးပေါင်းတစ်ဆူ အယူဝါဒမှားကြောင်းဖော်ပြရန် ထိုဘရိုရှာအသုံးပြုသည့်ကျမ်းချက်အချို့မှာ မာကု ၁၃:၃၂ နှင့် ၁ ကောရိန္သု ၁၅:၂၄၊ ၂၈ တို့ဖြစ်သည်။
၁၂။ နောက်ထပ်အဘယ်မေးခွန်းကိုအာရုံပြုဖို့ လိုသေးသနည်း။
၁၂ ဘုရားသခင်အကြောင်း၊ ယေရှုခရစ်အကြောင်း နှင့်ပတ်သက်၍ အထက်ပါဆွေးနွေးတင်ပြချက်များသည် သမ္မာကျမ်းစာနှင့် ရင်းနှီးကျွမ်းဝင်မှုမရှိသူတို့အား တိကျမှန်ကန်သောအသိပညာရရှိစေရန် ရည်ရွယ်ချက်ဖြင့် ကိုယ်ပိုင်ကျမ်းစာလေ့လာမှု ပြုလုပ်နိုင်သည့်နည်းလမ်းများကို ဖော်ပြသည်။ (ယောဟန် ၁၇:၃) သို့သော် ခရစ်ယာန်အသင်းတော်နှင့် နှစ်ချီပေါင်းသင်းခဲ့ကြသူတို့နှင့်ပတ်သက်၍ကော အသို့နည်း။ သူတို့ဆည်းပူးစုဆောင်းထားသည့် သမ္မာကျမ်းဆိုင်ရာ အသိပညာနောက်ခံရှိထားသဖြင့် ယေဟောဝါ၏နှုတ်မြွက်စကားတော်ကို ဆက်အာရုံစိုက်လေ့လာရန်လိုသေးသလော။
အဘယ်ကြောင့် ‘ကိုယ့်ကိုယ်ကို အမြဲသတိပြုရ’
၁၃။ ကိုယ်ပိုင်ကျမ်းစာလေ့လာမှုနှင့်ပတ်သက်၍ အချို့သူတို့၌ အဘယ်အမြင်မှားရှိနေကြမည်နည်း။
၁၃ နှစ်ပေါင်းများစွာ အသင်းသားဖြစ်နေသူအချို့သည် ယေဟောဝါသက်သေဖြစ်ခါစ အစောပိုင်းနှစ်အနည်းငယ်အတွင်း ဆည်းပူးထားသော သမ္မာကျမ်းစာအသိပညာကို အမှီသဟဲပြုရုံသာပြုနေပေမည်။ “လူသစ်တွေလောက် ကျွန်ုပ်လေ့လာစရာမလိုပါဘူး။ နှစ်တွေတစ်လျှောက် သမ္မာကျမ်းစာနဲ့ ကျမ်းစာအခြေပြုစာပေတွေကို ကျွန်ုပ်အခေါက်ခေါက်ဖတ်ရှုခဲ့ဖူးပြီပဲ” ဟု ဆင်ခြေပေးရန် လွယ်ကူပေသည်။ ဤသို့ပြောဆိုခြင်းသည် “အရင်က ကျွန်ုပ်စားခဲ့တာတွေကိုထောက်ပြီး အခုကျွန်ုပ်ရဲ့အစားအသောက်ကို သိပ်ဂရုစိုက်စရာမလိုဘူး” ဟုဆိုခြင်းနှင့် အတူတူပင်ဖြစ်မည်။ ကိုယ်ခန္ဓာကျန်းမာသန်စွမ်း၍ တက်တက်ကြွကြွရှိစေရန် အာဟာရရှိပြီး ကောင်းစွာပြင်ဆင်ချက်ပြုတ်ထားသောအစားအစာကို အမြဲတစေစားသုံးနေဖို့လိုကြောင်း ကျွန်ုပ်တို့သိထားကြသည်။ ကျွန်ုပ်တို့၏ဝိညာဉ်ရေးကျန်းမာမှုနှင့် ခွန်အား ဆက်ရှိဖို့ ထိုထက်မကအရေးကြီးပါသည်!—ဟေဗြဲ ၅:၁၂-၁၄။
၁၄။ မိမိကိုယ်ကို အမြဲတစေဂရုစိုက်ရန် အဘယ်ကြောင့်လိုအပ်သနည်း။
၁၄ သို့ဖြစ်၍ ကျွန်ုပ်တို့အားလုံးသည် ကြာမြင့်စွာကတည်းက ကျမ်းစာလေ့လာခဲ့သူများဖြစ်ဖြစ်၊ မဖြစ်ဖြစ် ရင့်ကျက်၍ တာဝန်ရှိကြီးကြပ်မှူးတစ်ဦးဖြစ်နေသူ တိမောသေနည်းတူ ပေါလု၏ ဤဆုံးမစကားကို ဂရုပြုရန်လိုသည်– “ကိုယ်ကိုလည်းကောင်း၊ ကိုယ်ဆုံးမ [စကား] ကိုလည်းကောင်း သတိပြု၍ အမြဲတည်နေလော့။ ထိုသို့ပြုလျှင်၊ ကိုယ်ကိုလည်းကောင်း၊ နားထောင်သောသူတို့ကိုလည်းကောင်း ကယ်တင်လိမ့်မည်။” (၁ တိမောသေ ၄:၁၅၊ ၁၆) ပေါလု၏အကြံပြုချက်ကို ကျွန်ုပ်တို့ အဘယ်ကြောင့်နှလုံးသွင်းသင့်သနည်း။ ပေါလုက ကျွန်ုပ်တို့သည် “[စာတန်]၏ပရိယာယ်တို့ [“ဉာဏ်နီဉာဏ်နက်များသောလုပ်ရပ်များ၊” ကဘ အောက်ခြေမှတ်ချက်]” နှင့် “မိုးကောင်းကင်၌နေသော နတ်ဆိုးတို့” ကို ဆိုင်ပြိုင်တိုက်လှန်ကြရကြောင်း ညွှန်ပြခဲ့သည်ကို သတိရပါ။ ထို့ပြင် တမန်တော်ပေတရုက စာတန်သည် “အဘယ်သူကိုမျိုရမည်နည်းဟူ၍ လှည့်လည်ရှာဖွေလျက်ရှိ” ကြောင်း သတိပေးထားရာ ထို “အဘယ်သူ” သည် ကျွန်ုပ်တို့ထဲမှ မည်သူမဆိုဖြစ်နိုင်၏။ ကျွန်ုပ်တို့၏ရောင့်ရဲကျေနပ်နေခြင်းအဖြစ်က သူရှာဖွေနေသည့် အခွင့်အရေးပင်ဖြစ်နေနိုင်သည်။—ဧဖက် ၆:၁၁၊ ၁၂; ၁ ပေတရု ၅:၈။
၁၅။ ကျွန်ုပ်တို့တွင် အဘယ်ဝိညာဉ်ရေးအကာအကွယ် ရှိသနည်း၊ ယင်းကို ကျွန်ုပ်တို့ မည်သို့ထိန်းသိမ်းထားနိုင်သနည်း။
၁၅ သို့ဖြစ်၍ ကျွန်ုပ်တို့တွင် အဘယ်အကာအကွယ်ရှိသနည်း။ တမန်တော်ပေါလုက ကျွန်ုပ်တို့ကို ဤသို့သတိပေးသည်– “ခဲယဉ်းဆိုးယုတ်သောနေ့ရက်ကာလ၌ ဆီးတားနိုင်သဖြင့်၊ ကိစ္စအလုံးစုံတို့ကိုပြီးစီး၍ ခံရပ်နိုင်မည်အကြောင်း၊ ဘုရားသခင်ပြင်ဆင်တော်မူသောလက်နက်စုံကို ယူဆောင်ကြလော့။” (ဧဖက် ၆:၁၃) ထိုဝိညာဉ်ရေးချပ်ဝတ်တန်ဆာ၏ ထိရောက်မှုသည် ယင်း၏မူလအရည်အသွေးအပေါ်၌သာမက ၎င်းကိုအမြဲထိန်းသွားခြင်းအပေါ် မူတည်သည်။ သို့ဖြစ်၍ ဘုရားသခင့်ထံတော်မှဖြစ်သော ချပ်ဝတ်တန်ဆာအပြည့်အစုံတွင် ဘုရားသခင့်နှုတ်မြွက်စကားတော်ဆိုင်ရာ ခေတ်နှင့်အညီ နောက်ဆုံးဖော်ပြသောအသိပညာရှိရန်လိုသည်။ ယင်းက ယေဟောဝါ၏နှုတ်မြွက်စကားတော်နှင့် သစ္စာသတိပညာရှိကျေးကျွန်အတန်းအစားမှတစ်ဆင့် နောက်ဆုံးဖော်ပြသည့်အမှန်တရားအပေါ် ကျွန်ုပ်တို့သိနားလည်ခြင်း၏အရေးပါမှုကို ဖော်ညွှန်းသည်။ ကျွန်ုပ်တို့၏ဝိညာဉ်ရေးချပ်ဝတ်တန်ဆာကို ထိန်းသိမ်းစောင့်ရှောက်ထားရန် သမ္မာကျမ်းစာနှင့် ကျမ်းစာအခြေပြုစာပေများကို မှန်မှန်လေ့လာခြင်းသည် အလွန်အရေးကြီး၏။—မဿဲ ၂၄:၄၅-၄၇; ဧဖက် ၆:၁၄၊ ၁၅။
၁၆။ ကျွန်ုပ်တို့၏ “ယုံကြည်ခြင်းတည်းဟူသော လွှား” သည် ယုံကြည်အားထားလောက်ဖွယ်ဖြစ်စေရန် အဘယ်အရာကိုပြုလုပ်နိုင်ကြသနည်း။
၁၆ ကျွန်ုပ်တို့၏ချပ်ဝတ်တန်ဆာတွင် အရေးပါသောအပိုင်းဖြစ်သည့် “ယုံကြည်ခြင်းတည်းဟူသော လွှား” ကိုပေါလုအလေးပေးဖော်ပြ၏၊ ၎င်းနှင့် ကျွန်ုပ်တို့သည် မှားယွင်းသောစွပ်စွဲချက်များနှင့် အယူဖောက်ပြန်သောသွန်သင်ချက်များဖြစ်သည့် စာတန်၏မီးစက်လက်နက်များကို လွှဲဖယ် ကာသတ်ပေးနိုင်၏။ (ဧဖက် ၆:၁၆) သို့ဖြင့် ကျွန်ုပ်တို့၏ယုံကြည်ခြင်းဒိုင်းလွှားသည် မည်မျှခိုင်ခံ့ကြောင်းနှင့် ယင်းကို ထိန်းသိမ်းစောင့်ရှောက်၊ သန်စွမ်းစေဖို့ မည်သို့ပြုမူနေကြောင်း ဆန်းစစ်ကြည့်ဖို့ အလွန်အရေးကြီးသည်။ ဥပမာ၊ သင့်ကိုယ်သင် ဤသို့မေးမြန်းနိုင်ကြသည်– ‘ကင်းမျှော်စင်အသုံးပြု၍ ပတ်စဉ်ကျမ်းစာလေ့လာမှုအတွက် ကျွန်ုပ် မည်သို့ပြင်ဆင်သနည်း။ အစည်းအဝေးတွင် ကောင်းစွာစဉ်းစားဖြေဆိုခြင်းဖြင့် ‘မေတ္တာစိတ်ရှိ၍ ကောင်းသောအကျင့် ကျင့်စေ’ နိုင်ရန် ကျွန်ုပ်အသေအချာလေ့လာသုံးသပ်ခဲ့ပြီလော။ ကိုးကားဖော်ပြမထားဘဲ ရည်ညွှန်းထားသောကျမ်းချက်များကို ကျွန်ုပ်ဖွင့်ဖတ်ပါသလော။ အစည်းအဝေးများတွင် အားတက်သရောပါဝင်ဖြေဆိုခြင်းဖြင့် တစ်ဦးကိုတစ်ဦး ကျွန်ုပ်အားပေးတည်ဆောက်ပါသလော။’ ကျွန်ုပ်တို့၏ဝိညာဉ်ရေးအစာသည် အစိုင်အခဲဖြစ်၏၊ ထို့ကြောင့် အပြည့်အဝအကျိုးခံစားရရန် ကြေညက်စွာအစာချေဖို့လိုသည်။—ဟေဗြဲ ၅:၁၄; ၁၀:၂၄။
၁၇။ (က) ကျွန်ုပ်တို့၏ဝိညာဉ်ရေးကို အောက်ခြေမှလှိုက်စားသွားစေရန် စာတန်သည် အဘယ်မြွေဆိပ်ကိုအသုံးပြုနေသနည်း။ (ခ) စာတန်၏မြွေဆိပ်အတွက် ဖြေဆေးကားအဘယ်နည်း။
၁၇ စာတန်သည် အသွေးအသား၏အားနည်းမှုများကို ကောင်းစွာသိရှိထား၏၊ သူ၏မီးစက်လက်နက်များသည်လည်း ပရိယာယ်အလွန်များသည်။ သူ၏ဆိုးညစ်သောသြဇာသက်ရောက်မှုကို ပျံ့နှံ့စေသည့်နည်းတစ်နည်းမှာ အညှီအဟောက်အပြာရုပ်ရှင်ကို ရုပ်မြင်သံကြား၊ အင်တာနက်၊ ဗီဒီယိုများပေါ်၌မက စာပေများမှတစ်ဆင့် တစ်ချိန်တစ်ခါနှင့်မျှမတူအောင် အလွယ်တကူရရှိစေခြင်းအားဖြင့်ဖြစ်သည်။ ခရစ်ယာန်အချို့သည် ဤအဆိပ်အတောက်ကို သုံးဆောင်ခဲ့ရာ သူတို့ကိုယ်ကို မခုခံမကာကွယ်နိုင်တော့သဖြင့် အသင်းတော်တွင် အခွင့်အရေးများဆုံးရှုံးသွားရုံမက ထိုထက်ပင် အရေးယူခံခဲ့ရပေပြီ။ (ဧဖက် ၄:၁၇-၁၉) စာတန်၏ဝိညာဉ်ရေးမြွေဆိပ်အတွက် ဖြေဆေးကားအဘယ်နည်း။ ကိုယ်ပိုင်ကျမ်းစာလေ့လာမှုကို မှန်မှန်ပြုလုပ်ခြင်း၊ ခရစ်ယာန်စည်းဝေးများကို မှန်မှန်တက်ခြင်းနှင့် ဘုရားသခင့်ထံတော်မှ ဝိညာဉ်ရေးချပ်ဝတ်တန်ဆာအပြည့်အစုံကို လျစ်လျူရှုမထားကြခြင်းဖြစ်သည်။ ဤအရာများပြုလုပ်ခြင်းက အမှန်အမှားကိုပိုင်းခြားသိမြင်စေပြီး ဘုရားသခင်ရွံရှာမုန်းတီးသောအရာများကို မုန်းတီးနိုင်စွမ်း ရရှိစေသည်။—ဆာလံ ၉၇:၁၀; ရောမ ၁၂:၉။
၁၈။ ကျွန်ုပ်တို့၏ဝိညာဉ်ရေးတိုက်ပွဲတွင် “ဝိညာဉ်တော်၏ဓား” က မည်သို့အကူအညီပေးနိုင်သနည်း။
၁၈ ပုံမှန်ကျမ်းစာလေ့လာမှုအလေ့အထများကို ကျွန်ုပ်တို့ဆက်ပြုလုပ်သွားမည်ဆိုလျှင် ဘုရားသခင့်နှုတ်မြွက်စကားတော်ဆိုင်ရာ တိကျမှန်ကန်သောအသိပညာ၏ ခိုင်ခံ့သောကာကွယ်မှုရှိမည်သာမက “ဘုရားသခင်၏နှုတ် [မြွက်စကား] တော်တည်းဟူသော ဝိညာဉ်တော်၏ဓား” အားဖြင့် ထိရောက်သောထိုးစစ်ကိုလည်း ပြုနိုင်ကြလိမ့်မည်။ ဘုရားသခင်၏နှုတ်မြွက်စကားတော်သည် “အသက်ရှင်ခြင်း၊ တန်ခိုးနှင့်ပြုပြင်ခြင်း၊ သန်လျက်တကာတို့ထက် ထက်ခြင်းနှင့်ပြည့်စုံသည်ဖြစ်၍၊ အသက်နှင့်စိတ်ဝိညာဉ်ကိုလည်းကောင်း၊ အရိုးဆစ်နှင့်ခြင်ဆီကိုလည်းကောင်း ပိုင်းခြား၍ ထုတ်ချင်းခွင်းတတ်၏။ စိတ်နှလုံးအကြံအစည်များကိုလည်း သိမြင်တတ်၏။” (ဧဖက် ၆:၁၇; ဟေဗြဲ ၄:၁၂) အဆိုပါ “ဓား” ကို ကျွမ်းကျင်စွာအသုံးပြုတတ်လာပါက စုံစမ်းမှုများကို ကျွန်ုပ်တို့ရင်ဆိုင်ကြရသောအခါ ဘေးအန္တရာယ်ရှိပုံမပေါ် သို့မဟုတ် နှစ်သက်စရာပင်ရှိပုံပေါက်သောအရာကို ခွဲခြမ်းသိမြင်နိုင်ပြီး ယင်းကို ဆိုးယုတ်သူ၏ သေမင်းတမန်ထောင်ချောက်အဖြစ် အထင်အရှားဖော်ထုတ်နိုင်ပေလိမ့်မည်။ ကျွန်ုပ်တို့သိုမှီးထားသော ကျမ်းစာအသိပညာနှင့် သိနားလည်မှုက ဆိုးယုတ်သောအရာကိုငြင်းပယ်၍ ကောင်းမှုကိုပြုရန် ကူညီပေးပါလိမ့်မည်။ သို့ဖြစ်၍ ကျွန်ုပ်တို့အားလုံး ဤသို့ကိုယ့်ကိုယ်ကို မေးမြန်းရန်လိုသည်– ‘ငါ့ရဲ့ဓားဟာ အသွားထက်သလား ဒါမှမဟုတ် သံချေးတက်နေသလား။ ထိုးစစ်ဆင်နိုင်မယ့် ခိုင်လုံတဲ့ကျမ်းချက်တွေကို မှတ်မိဖို့ ကျွန်ုပ် အခက်တွေ့နေသလား။’ ကျွန်ုပ်တို့၏ ကိုယ်ပိုင်ကျမ်းစာလေ့လာမှုအလေ့အထကောင်းများကို ဆက်ထိန်းသိမ်းထား၍ စာတန်ကိုတွန်းလှန်နိုင်ဖို့ ကြိုးစားကြပါစို့။—ဧဖက် ၄:၂၂-၂၄။
၁၉။ ကိုယ်ပိုင်လေ့လာမှုကို ကျွန်ုပ်တို့အာရုံစိုက်သွားကြမည်ဆိုလျှင် အဘယ်အကျိုးကျေးဇူးများ ခံစားရမည်နည်း။
၁၉ ပေါလုက ဤသို့ရေးသားခဲ့သည်– “ထိုကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍၊ ဘုရားသခင်၏လူသည် စုံလင်သောသူ၊ ကောင်းသောအမှုအမျိုးမျိုးတို့ကိုပြုစုခြင်းအလိုငှာ ပြင်ဆင်သောသူဖြစ်မည်အကြောင်း၊ [ဆုံးမ] ပေးခြင်း၊ အပြစ်ကိုဖော်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်းကျေးဇူးများကို ပြုတတ်၏။” တိမောသေထံလိပ်မူသော ပေါလု၏စကားကို ကျွန်ုပ်တို့နှလုံးသွင်းကြမည်ဆိုလျှင် ကိုယ်ကိုယ်တိုင်ဝိညာဉ်ရေးခွန်အားရှိလာမည်ဖြစ်ပြီး ကျွန်ုပ်တို့၏ခရစ်ယာန်ဓမ္မအမှုကို သာ၍ထိရောက်စေနိုင်သည်။ ဝိညာဉ်ရေးအကြီးအကဲများနှင့် ခရစ်ယာန်ဓမ္မအမှုထမ်းများသည် အသင်းတော်တွင် များစွာအကျိုးပြုနိုင်ပြီး ကျွန်ုပ်တို့အားလုံး ယုံကြည်ခြင်းဘက် အခိုင်အမာရပ်တည်နိုင်ကြလိမ့်မည်။—၂ တိမောသေ ၃:၁၆၊ ၁၇; မဿဲ ၇:၂၄-၂၇။
[အောက်ခြေမှတ်ချက်များ]
^ အပိုဒ်၊ 4 ပုံမှန်အားဖြင့် တောင်းဆိုဘရိုရှာကိုလေ့လာနေသောစိတ်ဝင်စားသူလူသစ်တစ်ဦးသည် ထာဝရအသက်ရစေသောအသိပညာစာအုပ်ကို ဆက်လေ့လာလိမ့်မည်၊ ထိုစာစောင်နှစ်မျိုးစလုံးကို ယေဟောဝါသက်သေများ ထုတ်ဝေ၏။ ဤတွင်ပေးထားသော အကြံပြုချက်များသည် ဝိညာဉ်ရေးတိုးတက်မှုအား အတားအဆီးဖြစ်စေရာများကို ဖယ်ရှားပေးပါလိမ့်မည်။
^ အပိုဒ်၊ 9 ယေဟောဝါသက်သေများ ထုတ်ဝေသည်။ မိမိတို့၏ဘာသာစကားဖြင့် ကျမ်းစာစောင်များအပေါ် ထိုးထွင်းသိမြင်ခြင်းစာအုပ်ရှိသူတို့သည် အတွဲ ၂ ရှိ “ယေဟောဝါ” ဟူသောခေါင်းစဉ်အောက်တွင် လေ့လာဖတ်ရှုနိုင်သည်။
^ အပိုဒ်၊ 9 ခြွင်းချက်အနေနှင့်ဖော်ပြရလျှင် စပိန်နှင့် ကက်တလိုနီယန်ဘာသာပြန်ကျမ်းအများသည် ဟေဗြဲတက်တြာဂရမ်မီတန်ကို “ယဗေ၊” “ယာဗား၊” “ဂျာဗာ၊” နှင့် “ဂျီဟိုဗား၊” ဟုဘာသာပြန်ဆိုခြင်းမှာ အလွန်ထူးခြားသည်။
^ အပိုဒ်၊ 11 ယေဟောဝါသက်သေများ ထုတ်ဝေသည်။
သင်မှတ်မိသလော
• ကိုယ်ပိုင်လေ့လာမှုကို ထိရောက်စွာပြုလုပ်နိုင်ဖို့ အဘယ် အခြေအနေများလိုအပ်သနည်း။
• ဘုရားသခင့်နာမတော်နှင့်ပတ်သက်၍ ဘာသာပြန်ကျမ်းအများတွင် အဘယ်အမှားကို တွေ့ ရှိကြရသနည်း။
• သုံးပါးပေါင်းတစ်ဆူသွန်သင်ချက် မှားကြောင်းဖော်ပြရန် အဘယ်ကျမ်းချက်များကို သင်အသုံးပြုမည်နည်း။
• ကျွန်ုပ်တို့သည် နှစ်များစွာ စစ်မှန်သောခရစ်ယာန်များ ဖြစ်ခဲ့လျှင်ပင် စာတန်၏မီးစက်လက်နက်များမှ မိမိကိုယ်ကိုကာကွယ်ဖို့ အဘယ်အရာပြုလုပ်ရမည်နည်း။
[လေ့လာရန်မေးခွန်းများ]
[စာမျက်နှာ ၁၉ ပါ ရုပ်ပုံ]
ကိုယ်ပိုင်လေ့လာမှုကို ထိရောက်စွာပြုလုပ်နိုင်ရန် နှောင့်ယှက်မှုအနည်းဆုံးရှိသော သင့်တော်သည့် ဝန်းကျင်လိုအပ်
[စာမျက်နှာ ၂၃ ပါ ရုပ်ပုံ]
သင်၏ “ဓား” သည် အသွားထက်သလော၊ သံချေးတက်နေသလော