ယခင်ကထက် ယခု ပို၍နိုးကြားနေလော့!
ယခင်ကထက် ယခု ပို၍နိုးကြားနေလော့!
“အခြားသောသူတို့သည် အိပ်ပျော်သကဲ့သို့၊ ငါတို့သည် အိပ်မပျော်ဘဲ [ကောင်းသော] သတိ [“နိုးနိုးကြားကြား၊” ကဘ] ရှိ၍ စောင့်ကြကုန်အံ့။”—၁ သက်သာလောနိတ် ၅:၆။
၁၊ ၂။ (က) ပုံပေနှင့် ဟယ်ခရူလေးနီယမ်မြို့တို့သည် မည်သို့သောမြို့များဖြစ်ခဲ့ကြသနည်း။ (ခ) ပုံပေနှင့် ဟယ်ခရူလေးနီယမ်မြို့သူမြို့သားများသည် အဘယ်သတိပေးချက်ကို လျစ်လျူရှုခဲ့ကြသနည်း၊ ရလဒ်ကားအဘယ်နည်း။
ကျွန်ုပ်တို့၏ခရစ်နှစ် ပထမရာစုတွင် ပုံပေမြို့နှင့် ဟယ်ခရူလေးနီယမ်မြို့တို့သည် ဗစူးဗီးယပ်စ်တောင်ရိပ်အောက်တည်ရှိသည့် ကြွယ်ဝချမ်းသာသော ရောမမြို့နှစ်မြို့ဖြစ်ခဲ့သည်။ အဆိုပါမြို့များသည် ရောမလူကုံထံများအတွက် လူကြိုက်များသော အပန်းဖြေနေရာများဖြစ်ခဲ့သည်။ ယင်းတို့၌ ပရိသတ်တစ်ထောင်ကျော်ဆံ့သော ပြဇာတ်ရုံများရှိပြီး ပုံပေမြို့တွင် မြို့သူမြို့သားအားလုံးနီးပါး ဝင်ဆံ့နိုင်သော လဟာပြင်ပြဇာတ်ရုံကြီးတစ်ခုရှိသည်။ ပုံပေမြို့ကိုတူးဖော်သူများသည် အရက်ဆိုင်နှင့် တည်းခိုခန်း ၁၁၈ ခုရေတွက်ရရှိ၍ အချို့ တို့မှာ လောင်းကစားရုံနှင့် ပြည့်တန်ဆာနေရာများဖြစ်ခဲ့ကြသည်။ နံရံပေါ်မှရုပ်ပုံများနှင့် အခြားအသုံးအဆောင်ပစ္စည်းများကလည်း အကျင့်ယိုယွင်းမှုနှင့် ရုပ်ပစ္စည်းပဓာနထားမှုတို့ ပျံ့နှံ့ခဲ့ကြောင်း သက်သေထူသည်။
၂ စီ.အီး. ၇၉ ခုနှစ် ဩဂုတ်လ ၂၄ ရက်နေ့တွင် ဗစူးဗီးယပ်စ်မီးတောင် စတင်ပေါက်ကွဲလေသည်။ ပထမဆုံးအကြိမ် ထိုမီးတောင်ပေါက်ကွဲချိန်တွင် ၎င်းမြို့နှစ်မြို့အပေါ်ရွာသွန်းခဲ့သော ကျောက်ပွနှင့် ပြာသည် မြို့သူမြို့သားများ ဘေးလွတ်စရာအကြောင်းမရှိနိုင်ချေဟု မီးတောင်ပညာရှင်များယူဆခဲ့ကြသည်။ အမှန်မှာ လွတ်မြောက်သူများစွာရှိခဲ့ပုံရသည်။ သို့သော် အန္တရာယ်ကိုလျော့တွက်ခဲ့ကြသူ၊ သို့မဟုတ် သတိပေးလက္ခဏာများကို လျစ်လျူရှုခဲ့ကြသူများမူ ဘေးကိုမရှောင်တိမ်းဘဲ ကျန်ရစ်နေကြသည်။ သို့နှင့် ညသန်းခေါင်ခန့်တွင် ဟယ်ခရူလေးနီယမ်မြို့တွင်းသို့ အလွန်ပူပြင်းသောဓာတ်ငွေ့များ၊ ကျောက်ပွနှင့် ကျောက်တုံးများ တစ်ဟုန်ထိုးလျှောကျစီးဆင်းလာပြီး ကျန်ရှိသောမြို့သူမြို့သားများကို မွန်းကျပ်သေကျေပျက်စီးစေခဲ့သည်။ နောက်တစ်နေ့နံနက်စောစောတွင် ထပ်မံတောင်ပြိုသဖြင့် ပုံပေမြို့ရှိလူအားလုံး သေဆုံးခဲ့ရလေသည်။ သတိပေးလက္ခဏာများကို အရေးမစိုက်ခြင်း၏ ဝမ်းနည်းကြေကွဲဖွယ် ရလဒ်ပါတကား!
ဂျူးအစီအစဉ်စနစ်၏နိဂုံး
၃။ ယေရုရှလင်မြို့ပျက်စီးခြင်းနှင့် ပုံပေနှင့် ဟယ်ခရူလေးနီယမ်မြို့တို့၏အဖြစ်တွင် အဘယ်ဆင်တူချက်ရှိသနည်း။
၃ လွန်ခဲ့သောကိုးနှစ်က လူ့လက်ချက်ဖြင့် ယေရုရှလင်မြို့ ရုတ်တရက်ဖျက်ဆီးခံရခြင်းသည် ပုံပေမြို့နှင့် ဟယ်ခရူလေးနီယမ်မြို့တို့၏ ထိတ်လန့်ချောက်ချားဖွယ်နိဂုံးထက် သာလွန်ဆိုးရွားသည်။ ယေရုရှလင်မြို့ပျက်စီးခြင်းသည် “လူ့သမိုင်းတစ်လျှောက် ကြောက်စရာအကောင်းဆုံး ဝိုင်းရံမှုတစ်ခု” ဖြစ်၏ဟုဖော်ပြထားရာ ဂျူးတစ်သန်းကျော် သေဆုံးသည်ဟု မှတ်တမ်းတင်ထားသည်။ သို့သော် ပုံပေမြို့နှင့် ဟယ်ခရူလေးနီယမ်မြို့တို့မှာကဲ့သို့ ယေရုရှလင်မြို့သည် ကြိုတင်သတိပေးချက်မရှိဘဲ ဖျက်ဆီးခံခဲ့ရခြင်းမဟုတ်ပါ။
၄။ အစီအစဉ်စနစ်၏ဆုံးခန်းနီးကြောင်း နောက်လိုက်များကိုသတိပေးရန် ယေရှု အဘယ်ပရောဖက်ပြု နိမိတ်လက္ခဏာပေးခဲ့သနည်း၊ ပထမရာစုတွင် မည်သို့ဦးဆုံး ပြည့်စုံခဲ့သနည်း။
၄ ယေရှုခရစ်သည် မြို့တော်ဖျက်ဆီးခံရမည့်အကြောင်း ကြိုတင်ဟောကြားခဲ့သည်၊ ၎င်းမတိုင်မီ စစ်ပွဲများ၊ အစာရှားပါးမှုများ၊ မြေငလျင်များနှင့် မတရားမှုများစသည့် စိုးရိမ်ဖွယ်ရာများ အလျင်ဖြစ်ပျက်မည့်အကြောင်း ကြိုတင်ဟောခဲ့သည်။ ပရောဖက်အတုအယောင်များ ထကြွလှုပ်ရှားလိမ့်မည်၊ သို့သော်လည်း ဘုရားသခင့်နိုင်ငံတော်သတင်းကောင်းကို ကမ္ဘာချီဟောပြောကြလိမ့်မည်ဖြစ်သည်။ (မဿဲ ၂၄:၄-၇၊ ၁၁-၁၄) မျက်မှောက်ခေတ်တွင် ယေရှု၏စကားများ အကြီးစားပြည့်စုံနေသော်လည်း ထိုစဉ်က အသေးစားပြည့်စုံခဲ့ပါသည်။ ယုဒပြည်၌ အကြီးအကျယ်အစာခေါင်းပါးခဲ့ကြောင်း သမိုင်းကဖော်ပြသည်။ (တမန်တော် ၁၁:၂၈) ယေရုရှလင်မြို့ဖျက်ဆီးမခံရမီကလေးတွင် ထိုဒေသ၌ မြေငလျင်လှုပ်ခဲ့ကြောင်း ဂျူးသမိုင်းပညာရှင် ဂျိုစီဖတ်စ်ကဆိုသည်။ ယေရုရှလင်မြို့ကျဆုံးချိန်နီးလာသည်နှင့် အဆက်မပြတ် ပုန်ကန်ထကြွမှုများ၊ သဘောထားကွဲလွဲသော နိုင်ငံရေးအုပ်စုငယ်များအကြား ပြည်တွင်းစစ်များအပြင် ဂျူးနှင့် တစ်ပါးအမျိုးသားတို့ ရောနှောနေထိုင်သည့်မြို့အများတွင် အစုလိုက်အပြုံလိုက် သတ်ဖြတ်မှုများဖြစ်ပျက်ခဲ့သည်။ သို့တိုင် ဘုရားသခင့်နိုင်ငံတော်သတင်းကောင်းကို “ကောင်းကင်အောက်၌ရှိသမျှသော . . . သတ္တဝါတို့အား” ဟောပြောလျက်ရှိသည်။—ကောလောသဲ ၁:၂၂။
၅၊ ၆။ (က) စီ.အီး. ၆၆ ခုနှစ်တွင် ယေရှု၏ အဘယ်ပရောဖက်ပြုစကားများ ပြည့်စုံခဲ့သနည်း။ (ခ) နောက်ဆုံး စီ.အီး. ၇၀ ပြည့်နှစ်တွင် ယေရုရှလင်မြို့ကျဆုံးသောအခါ သေကျေပျက်စီးသူ အဘယ်ကြောင့် အလွန်များပြားခဲ့ရသနည်း။
၅ နောက်ဆုံး၊ စီ.အီး. ၆၆ ခုနှစ်တွင် ဂျူးတို့သည် ရောမကိုပုန်ကန်လေသည်။ ယေရုရှလင်မြို့ကိုဝိုင်းရံဖို့ စက်စ်တီးယပ်စ် ဂဲလပ်စ် စစ်ချီလာသောအခါ ယေရှု၏နောက်လိုက်များသည် ယေရှု၏ဤစကားကို ပြန်သတိရခဲ့ကြသည်– “ယေရုရှလင်မြို့ကို ဗိုလ်ခြေများဝန်းရံလျက်ရှိသည်ကို သင်တို့မြင်သောအခါ၊ ထိုမြို့သည်ပျက်စီးခြင်းသို့ရောက်လုသည်ကို သိမှတ်ကြလော့။ ထိုအခါ ယုဒပြည်၌ရှိသောသူတို့သည် တောင်ပေါ်သို့ပြေးကြစေ။ မြို့ထဲ၌ရှိသောသူတို့သည် မြို့ပြင်သို့ထွက်ကြစေ။ တောရွာမှာရှိသောသူတို့သည် မြို့ထဲသို့မဝင်ကြစေနှင့်။” (လုကာ ၂၁:၂၀၊ ၂၁) ယေရုရှလင်မြို့ကို စွန့်ခွာရမည့်အချိန်တိုင်လေပြီ—သို့သော် မည်သို့ထွက်ခွာမည်နည်း။ ဂဲလပ်စ်၏စစ်တပ်သည် မမျှော်လင့်ဘဲ ဆုတ်ခွာသွားခဲ့ရာ ယေရုရှလင်မြို့နှင့် ယုဒနယ်ရှိခရစ်ယာန်များ ယေရှု၏စကားကိုနာခံပြီး တောင်တန်းများသို့ထွက်ပြေးဖို့ လမ်းပွင့်သွားလေသည်။—မဿဲ ၂၄:၁၅၊ ၁၆။
၆ လေးနှစ်ကြာပြီးနောက် ပသခါပွဲခံချိန်လောက်တွင် ဂျူးပုန်ကန်သူများကို ချေမှုန်းနှိမ်နင်းရန် သန္နိဋ္ဌာန်ချထားသူ၊ ဗိုလ်ချုပ်တိတုဦးစီးသည့် ရောမစစ်သည်များ ပြန်လာသည်။ သူ၏စစ်တပ်သည် ယေရုရှလင်မြို့ကိုဝိုင်းရံပြီး ထွက်မပြေးနိုင်စေရန် “တုတ်ချွန်ခံတပ်” တည်လေသည်။ (လုကာ ၁၉:၄၃၊ ၄၄၊ ကဘ) ရောမအင်ပါယာတစ်လျှောက်ရှိ ဂျူးလူမျိုးတို့သည် စစ်အန္တရာယ်ရှိသည့်ကြားမှ ပသခါပွဲအတွက် ယေရုရှလင်မြို့သို့ စုပြုံလာကြသည်။ ယခု သူတို့ပိတ်မိနေကြသည်။ ဂျိုစီဖတ်စ်အဆိုအရ ရောမတို့၏ဝိုင်းရံမှုကြောင့် သေကျေပျက်စီးသူအများစုမှာ အဆိုပါအကြောင်းမလှသော ဧည့်သည်များဖြစ်ကြသည်။ * နောက်ဆုံးတွင် ယေရုရှလင်မြို့ကျဆုံးသောအခါ ရောမအင်ပါယာရှိ ဂျူးလူမျိုး ခုနစ်ပုံတစ်ပုံခန့် သေဆုံးခဲ့သည်။ ယေရုရှလင်မြို့နှင့် ယင်း၏ဝတ်ပြုရာအိမ်တော်ဖျက်ဆီးခံရခြင်းသည် ဂျူးနိုင်ငံနှင့် မောရှေပညတ်အပေါ်အခြေပြုသော ယင်း၏ဘာသာရေးစနစ်ပါ ပျက်စီးဆုံးရှုံးသည့်အဓိပ္ပာယ်ပင်ဖြစ်သည်။ *—မာကု ၁၃:၁၊ ၂။
၇။ တည်ကြည်သောခရစ်ယာန်များသည် ယေရုရှလင်မြို့ပျက်စီးသောအခါ အဘယ်ကြောင့်ကပ်ကျော်ခဲ့ကြသနည်း။
၇ စီ.အီး. ၇၀ ပြည့်နှစ်တွင် ဂျူးခရစ်ယာန်များသည် ယေရုရှလင်မြို့ရှိ အခြားသူများနှင့်အတူ အသတ်ခံရ သို့မဟုတ် ကျွန်ဘဝရောက်ခဲ့နိုင်သည်။ သို့သော် သမိုင်းအထောက်အထားအရ သူတို့သည် အစောပိုင်း ၃၇ နှစ်ကပေးခဲ့သော ယေရှု၏သတိပေးချက်ကို လိုက်နာခဲ့ကြသည်။ မြို့တော်ကို သူတို့စွန့်ခွာပြီး ပြန်မလာခဲ့ကြချေ။
တမန်တော်များ၏ အချိန်တန်သတိပေးချက်များ
၈။ အဘယ်လိုအပ်ချက်ကို ပေတရုသတိပြုမိခဲ့သနည်း၊ ယေရှု၏အဘယ်စကားကို သတိရ၍ဖြစ်မည်နည်း။
၈ ယနေ့ ဤအစီအစဉ်စနစ်တစ်ခုလုံးကို ဆုံးခန်းတိုင်စေမည့် သာ၍ကြီးမားသောဖျက်ဆီးခြင်း ကျရောက်လာပါတော့မည်။ ယေရုရှလင်မြို့မပျက်စီးမီ ခြောက်နှစ်အလိုတွင် တမန်တော်ပေတရုသည် သတိဝီရိယရှိပါဟု အရေးတကြီး အချိန်မီ အကြံပေးခဲ့ရာ ယင်းအကြံပြုချက်သည် ကျွန်ုပ်တို့ခေတ်ရှိ ခရစ်ယာန်များနှင့် အထူးသက်ဆိုင်သည်! အရှင်သခင်ယေရှုခရစ်၏ “ပညတ်တို့ကို” လျစ်လျူမရှုမိရန် ခရစ်ယာန်များသည် မိမိတို့၏ ‘ကြည်လင်သော စဉ်းစားတွေးခေါ်နိုင်စွမ်း’ ကိုနှိုးဆော်ဖို့လိုကြောင်း ပေတရုသိရှိခဲ့သည်။ (၂ ပေတရု ၃:၁၊ ၂) နိုးနိုးကြားကြားရှိကြဖို့ ခရစ်ယာန်များကို ပေတရုတိုက်တွန်းချိန်တွင် သူသည် ယေရှုမသေဆုံးမီ ရက်ပိုင်းအလို၌ တမန်တော်များအား ကိုယ်တော်မိန့်မှာခဲ့သော ဤစကားကို သတိရ၍ဖြစ်ပေမည်– “ထိုအချိန်ကာလသည် အဘယ်အခါ၌ရောက်မည်ကို သင်တို့မသိသောကြောင့်၊ သတိပြု၍ . . . စောင့်နေ [“နိုးနိုးကြားကြားရှိ၊” ကဘ] ကြလော့။”—မာကု ၁၃:၃၃။
၉။ (က) အဘယ်အန္တရာယ်ရှိသော သဘောထားကို အချို့ မွေးမြူကြမည်နည်း။ (ခ) သံသယရှိခြင်းသည် အဘယ်ကြောင့် အထူးအန္တရာယ်ရှိသနည်း။
၉ ယနေ့ အချို့ သူတို့က “သခင်ဘုရားကြွလာမည်ဟူသောကတိတော်သည် အဘယ်မှာရှိသနည်း” ဟုပြောင်လှောင်မေးမြန်းကြသည်။ (၂ ပေတရု ၃:၃၊ ၄) အရာခပ်သိမ်းသည် ဤလောကကို ဖန်ဆင်းကတည်းကအတိုင်း ဖြစ်မြဲဖြစ်နေပြီး တစ်ခါမျှပြောင်းလဲမှုမရှိဟု ထိုသူတို့ယူမှတ်ကြ၍ဖြစ်သည်မှာ ထင်ရှားသည်။ ဤသို့ယုံမှားသံသယရှိခြင်းသည် အန္တရာယ်ရှိ၏။ သံသယစိတ်သည် ကျွန်ုပ်တို့၏အရေးတကြီးသဘောထားကို အားနည်းစေ၍ စိတ်အလိုလိုက်သည့်အခြေအနေသို့ တဖြည်းဖြည်း ကျရောက်သွားစေနိုင်သည်။ (လုကာ ၂၁:၃၄) ထို့အပြင် ပေတရုဖော်ပြသည့်အတိုင်း အဆိုပါပြက်ရယ်ပြုသူများသည် ကမ္ဘာချီအစီအစဉ်စနစ်တစ်ခုကို ဖျက်ဆီးခဲ့သော နောဧခေတ်က ရေလွှမ်းမိုးဘေးကို မေ့လျော့နေကြသည်။ ထိုအချိန်က ကမ္ဘာ့အခြေအနေ အမှန်တကယ်ပြောင်းလဲခဲ့ပါသည်!—ကမ္ဘာဦး ၆:၁၃၊ ၁၇; ၂ ပေတရု ၃:၅၊ ၆။
၁၀။ စိတ်မရှည်လိုသူတို့ကို ပေတရု မည်သို့အားပေးသနည်း။
၁၀ ဘုရားသခင်သည် တစ်ခါတစ်ရံ အဘယ်ကြောင့်ချက်ချင်းအရေးမယူကြောင်း သတိပေးခြင်းဖြင့် ပေတရုသည် မိမိ၏စာရှုသူများကို စိတ်ရှည်ခြင်းမွေးမြူစေသည်။ ဦးဆုံး သူဤသို့ဆို၏– “ထာဝရဘုရားမှာ ကာလတစ်ရက်သည်၊ အနှစ်တစ်ထောင်ကဲ့သို့လည်းကောင်း၊ အနှစ်တစ်ထောင်သည် တစ်ရက်ကဲ့သို့လည်းကောင်းဖြစ်သည်။” (၂ ပေတရု ၃:၈) ယေဟောဝါသည် ထာဝစဉ်အသက်ရှင်သောကြောင့် ကိုယ်တော်သည် အကြောင်းရင်းအားလုံးကို ထည့်သွင်းစဉ်းစား၍ အရေးယူလုပ်ဆောင်ရန် အသင့်တော်ဆုံးအချိန်ကို ရွေးချယ်နိုင်ပါသည်။ ထို့နောက် ယေဟောဝါ၏အလိုတော်မှာ အရပ်ရပ်ရှိလူတို့ နောင်တယူဖို့ဖြစ်ကြောင်း ပေတရုညွှန်ပြသည်။ ဘုရားသခင်၏စိတ်ရှည်ခြင်းသည် လူများစွာအတွက် ကယ်တင်ခြင်းဖြစ်သည်၊ ကိုယ်တော်သာ အလျင်စလိုပြုမူခဲ့ပါမူ လူများစွာ သေဆုံးသွားကြလိမ့်မည်။ (၁ တိမောသေ ၂:၃၊ ၄; ၂ ပေတရု ၃:၉) သို့သော် ယေဟောဝါသည် စိတ်ရှည်သောကြောင့် ဘယ်သောအခါမျှ အရေးယူမည်မဟုတ်ဟု မဆိုလိုပါ။ “သူခိုးသည် ညဉ့်အခါလာသကဲ့သို့ ထာဝရဘုရား၏နေ့ရက်သည် လာလိမ့်မည်” ဟု ပေတရုဆို၏။—၂ ပေတရု ၃:၁၀။
၁၁။ အဘယ်အရာသည် ကျွန်ုပ်တို့ကို ဝိညာဉ်ရေးအရ နိုးနိုးကြားကြားရှိစေမည်နည်း၊ ယင်းက ယေဟောဝါ၏နေ့ကို မည်သို့ ‘အရှိန်မြှင့်တင်’ ပေးနိုင်မည်နည်း။
၁၁ ပေတရု၏ ခိုင်းနှိုင်းပြောဆိုပုံသည် မှတ်သားဖွယ်ဖြစ်၏။ သူခိုးကိုဖမ်းဖို့ မလွယ်ကူပေ၊ သို့သော် တစ်ညလုံး နိုးနိုးကြားကြားနေသောအစောင့်သည် အခါအားလျော်စွာ အိပ်ငိုက်သော အစောင့်ထက် သူခိုးဖမ်းမိနိုင်သည်။ အစောင့်တစ်ဦးသည် မည်သို့နိုးနိုးကြားကြားရှိနိုင်သနည်း။ တစ်ညလုံးထိုင်နေခြင်းထက် လမ်းလျှောက်နေခြင်းက နိုးကြား၍သတိရှိစေသည်။ အလားတူ ဝိညာဉ်ရေးတွင် တက်ကြွလှုပ်ရှားနေခြင်းက ခရစ်ယာန်များအဖြစ် နိုးနိုးကြားကြားရှိနေစေပါလိမ့်မည်။ ထို့ကြောင့် ပေတရုက “သန့်ရှင်းသောအကျင့်ကိုကျင့်ခြင်း၊ ဘုရား[သခင်]ဝတ်၌မွေ့လျော်ခြင်း” တို့၌ အလုပ်များနေကြဖို့ ကျွန်ုပ်တို့ကိုတိုက်တွန်းသည်။ (၂ ပေတရု ၃:၁၁၊ ၁၂) ထိုသို့လှုပ်ရှားနေပါက ကျွန်ုပ်တို့သည် “ယေဟောဝါ၏နေ့ကို စိတ်စွဲလမ်းနေ” နိုင်ပါလိမ့်မည်။ “စိတ်စွဲလမ်းနေ” ဟုပြန်ဆိုထားသော ဂရိစကားလုံးကို စာသားအရ “အရှိန်မြှင့်တင်ခြင်း” ဟုပြန်ဆိုနိုင်ပါသည်။ (၂ ပေတရု ၃:၁၂၊ ကဘ; အောက်ခြေမှတ်ချက်) ယေဟောဝါ၏အချိန်ဇယားကို ကျွန်ုပ်တို့မပြောင်းလဲနိုင်ပါ။ ကိုယ်တော်သတ်မှတ်ထားချိန်၌ ကိုယ်တော်၏နေ့ ရောက်လာပါလိမ့်မည်။ သို့တိုင် ကိုယ်တော်၏လုပ်ငန်းတော်၌ ကျွန်ုပ်တို့အလုပ်များနေမည်ဆိုလျှင် ဤအချိန်မှ ထိုအချိန်အထိသည် ကုန်မြန်ပုံရှိလိမ့်မည်။—၁ ကောရိန္သု ၁၅:၅၈။
၁၂။ ယေဟောဝါ၏စိတ်ရှည်ခြင်းကို ကျွန်ုပ်တို့တစ်ဦးစီ မည်သို့အခွင့်အရေးယူနိုင်သနည်း။
၁၂ ထို့ကြောင့် ယေဟောဝါ၏နေ့ လာခဲသည်ဟုယူမှတ်သူ မည်သူမဆိုသည် ယေဟောဝါသတ်မှတ်ထားချိန်ကို စိတ်ရှည်စွာစောင့်ဆိုင်းပါဟူသော ပေတရု၏အကြံပေးချက်ကိုလိုက်နာရန် တိုက်တွန်းခံရကြသည်။ အမှန်မှာ ဘုရားသခင်စိတ်ရှည်စွာ ခွင့်ပြုထားသောအချိန်ပိုကို ကျွန်ုပ်တို့ပညာရှိစွာ အသုံးပြုနိုင်ကြသည်။ ဥပမာ၊ ကျွန်ုပ်တို့သည် အရေးပါသောခရစ်ယာန်အရည်အသွေးများကို ဆက်၍ပြုစုပျိုးထောင်နိုင်သည့်အပြင် အချိန်ပိုမရပါက လူများစွာ မကြားလိုက်ရဘဲဖြစ်မည့် သတင်းကောင်းကို ဟောပြောနိုင်ပါသည်။ ကျွန်ုပ်တို့နိုးနိုးကြားကြားရှိကြမည်ဆိုလျှင် ဤအစီအစဉ်စနစ်ဆုံးခန်းချိန်တွင် ကျွန်ုပ်တို့သည် ယေဟောဝါရှေ့ “အစွန်းအကွက်ကင်းစင်၍ အပြစ်တင်ခွင့်မရှိဘဲ ငြိမ်သက်စွာရှိနေ” ကြပါလိမ့်မည်။ (၂ ပေတရု ၃:၁၄၊ ၁၅၊ သမ္မာ) တကယ့်ဆုကျေးဇူးဖြစ်မည်ပါတကား!
၁၃။ သက်သာလောနိတ်ခရစ်ယာန်များထံ ပေါလုရေးခဲ့သော အဘယ်စကားသည် ယနေ့ အထူးသက်ဆိုင်သနည်း။
၁၃ ပေါလုသည်လည်း သက်သာလောနိတ်မြို့ရှိ ခရစ်ယာန်များထံရေးသော သူ၏ပထမစာစောင်တွင် နိုးကြားနေဖို့လိုကြောင်း ဖော်ပြခဲ့သည်။ သူဤသို့ဆုံးမသည်– “အခြားသောသူတို့သည် အိပ်ပျော်သကဲ့သို့၊ ငါတို့သည် အိပ်မပျော်ဘဲ [ကောင်းသော] သတိ [“နိုးနိုးကြားကြား၊” ကဘ] ရှိ၍ စောင့်ကြကုန်အံ့။” (၁ သက်သာလောနိတ် ၅:၂၊ ၆) ယနေ့ ကမ္ဘာချီအစီအစဉ်စနစ်တစ်ခုလုံး ပျက်စီးလုနီးပြီဖြစ်ရာ အဆိုပါဆုံးမစကား အမှန်တကယ်လိုအပ်ပေသည်! ယေဟောဝါအား ဝတ်ပြုသူများသည် ဝိညာဉ်ရေးကို လျစ်လျူရှုသည့်လောက၌ အသက်ရှင်နေကြရာ ယင်းက သူတို့ကို ထိခိုက်နိုင်ပါသည်။ ထို့ကြောင့် ပေါလုဤသို့ဆုံးမသည်– “နေ့၏သားဖြစ်သောငါတို့မူကား၊ [ကောင်းသော] သတိရှိကြကုန်အံ့။ ယုံကြည်ခြင်း၊ ချစ်ခြင်းတည်းဟူသော ရင်အုပ်တန်ဆာကိုလည်းကောင်း၊ ကယ်တင်ခြင်းသို့ရောက်မည်ဟု မျှော်လင့်ခြင်းတည်းဟူသော သံခမောက်လုံးကိုလည်းကောင်း ဝတ်ဆောင်ကြကုန်အံ့။” (၁ သက်သာလောနိတ် ၅:၈) ဘုရားသခင့်နှုတ်မြွက်စကားတော်ကို မှန်မှန်လေ့လာခြင်းနှင့် အစည်းအဝေးများတွင် ညီအစ်ကိုများနှင့် မှန်မှန်ပေါင်းသင်းခြင်းက ပေါလု၏ဆုံးမစကားကိုလိုက်နာ၍ အရေးတကြီးသဘောထားရှိရန် ကျွန်ုပ်တို့ကို ထောက်ကူပေးမည်။—မဿဲ ၁၆:၁-၃။
သန်းပေါင်းများစွာ သတိနှင့်စောင့်နေကြ
၁၄။ နိုးနိုးကြားကြားရှိကြရန် ပေတရု၏ဆုံးမစကားကို ယနေ့ လူများစွာလိုက်နာနေကြောင်း အဘယ်ကိန်းဂဏန်းများက ဖော်ပြသနည်း။
၁၄ နိုးနိုးကြားကြားရှိဖို့ မှုတ်သွင်းခံအားပေးချက်ကို ယနေ့ လိုက်နာသူများစွာရှိသလော။ ရှိပါသည်။ ၂၀၀၂ လုပ်ငန်းတော်နှစ်အတွင်းတွင် ၂၀၀၁ ခုနှစ်ထက် ၃.၁ ရာခိုင်နှုန်းတိုးများလာသော အများဆုံးကြေညာသူအရေအတွက် ၆,၃၀၄,၆၄၅ ဦးတို့က ဘုရားသခင့်နိုင်ငံတော်အကြောင်း သူတစ်ပါးကို ၁,၂၀၂,၃၈၁,၃၀၂ နာရီတိုင်ပြောဆိုကြခြင်းဖြင့် ဝိညာဉ်ရေးနိုးကြားမှုရှိကြောင်း သက်သေထူခဲ့သည်။ သူတို့သည် ဤသို့အမှုမဲ့အမှတ်မဲ့ လုပ်ဆောင်ခဲ့ကြသည်မဟုတ်ပါ။ ယင်းသည် သူတို့၏အသက်တာတွင် အရေးပါသည့်လုပ်ငန်းဖြစ်သည်။ သူတို့အများစု၏သဘောထားကို အယ်လ်ဆာဗေးဒေါနိုင်ငံမှ အက်ဒ်ဝါးဒိုနှင့် နေအိုမီတို့က တင်ပြပါသည်။
၁၅။ ဝိညာဉ်ရေး၌ နိုးကြား၍သတိရှိနေသူ များစွာရှိကြောင်း အယ်လ်ဆာဗေးဒေါနိုင်ငံမှ အဘယ်တွေ့ကြုံမှုက ဖော်ပြသနည်း။
၁၅ ‘ဤလောက၏အဆင်းသဏ္ဌာန်သည် ပြောင်းလဲနေ၏’ ဟူသော ပေါလု၏စကားများကို လွန်ခဲ့သောနှစ်အနည်းငယ်က အက်ဒ်ဝါးဒိုနှင့် နေအိုမီတို့ သတိမူခဲ့ကြသည်။ (၁ ကောရိန္သု ၇:၃၁) သူတို့၏ဘဝကိုရိုးရှင်းစေပြီး အချိန်ပြည့်ရှေ့ဆောင်ဓမ္မအမှုလုပ်ငန်း၌ ပါဝင်ခဲ့ကြသည်။ အချိန်လွန်လေသော် သူတို့ကောင်းချီးအမျိုးမျိုးခံစားကြရပြီး တိုက်နယ်နှင့် ခရိုင်လုပ်ငန်း၌ပင် ပါဝင်ခဲ့ကြသည်။ ကြီးလေးသောပြဿနာများ ရင်ဆိုင်ခဲ့ကြရသော်လည်း အက်ဒ်ဝါးဒိုနှင့် နေအိုမီတို့သည် စည်းစိမ်ချမ်းသာကို စွန့်လွှတ်ပြီး အချိန်ပြည့်လုပ်ငန်းလုပ်ဆောင်ခဲ့ခြင်းသည် မှန်သောဆုံးဖြတ်ချက်ဟု သူတို့အခိုင်အမာယုံကြည်ကြသည်။ အယ်လ်ဆာဗေးဒေါနိုင်ငံရှိ ရှေ့ဆောင် ၂,၄၅၄ ဦးအပါအဝင် ကြေညာသူ ၂၉,၂၆၉ ဦးတို့မှ လူအများစုသည် အလားတူကိုယ်ကျိုးစွန့်စိတ်ဓာတ်ကို တင်ပြခဲ့ကြပြီ၊ ယင်းကြောင့်လည်း လွန်ခဲ့သောနှစ်တွင် ထိုနိုင်ငံ၌ ကြေညာသူအရေအတွက် ၂ ရာခိုင်နှုန်း တိုးတက်ခဲ့ခြင်းဖြစ်သည်။
၁၆။ ကုတ်ဒ်အဗွားနိုင်ငံမှ ညီအစ်ကိုငယ်တစ်ဦး အဘယ်သဘောထား တင်ပြခဲ့သနည်း။
၁၆ ကုတ်ဒ်အဗွားနိုင်ငံ ဌာနခွဲရုံးသို့ ဤသို့စာရေးပို့ခဲ့သော ခရစ်ယာန်လူရွယ်တစ်ဦးသည် အလားတူစိတ်ဓာတ်တင်ပြခဲ့သည်– “ကျွန်တော် ဓမ္မအမှုထမ်းတစ်ဦးအဖြစ် အမှုထမ်းနေပါတယ်။ ဒါပေမဲ့ ကျွန်တော်ကိုယ်တိုင် ရှေ့ဆောင်မလုပ်ဘဲနဲ့ ညီအစ်ကိုတွေကို ရှေ့ဆောင်လုပ်ကြပါလို့ မပြောနိုင်ဘူး။ ဒါကြောင့် ဝင်ငွေကောင်းတဲ့အလုပ်ကို ကျွန်တော်စွန့်လွှတ်ပြီး အခု ကိုယ်ပိုင်လုပ်ငန်းလုပ်နေပါတယ်၊ ဒါကြောင့် ခရစ်ယာန်ဓမ္မအမှုအတွက် အချိန်ပိုရတယ်။” ဤလူရွယ်သည် လွန်ခဲ့သောနှစ်က ၅ ရာခိုင်နှုန်းတိုးတက်မှုဖြစ်သည့် ကြေညာသူအရေအတွက် ၆,၇၀၁ ဦးမှတ်တမ်းသွင်းခဲ့သော ကုတ်ဒ်အဗွားနိုင်ငံမှ ရှေ့ဆောင် ၉၈၃ ဦးအနက် တစ်ဦးဖြစ်သည်။
၁၇။ စိတ်စွန်းကွက်မှုကြောင့် ကြောက်ရွံ့တွန့်ဆုတ်ခြင်းမရှိကြောင်း ဘယ်လ်ဂျီယံနိုင်ငံမှ သက်သေခံလူငယ်တစ်ဦး မည်သို့တင်ပြခဲ့သနည်း။
၁၇ ဘာသာကွဲကို သည်းမခံနိုင်ခြင်း၊ စိတ်စွန်းကွက်ခြင်းနှင့် ခွဲခြားဆက်ဆံခြင်းတို့က ဘယ်လ်ဂျီယံနိုင်ငံရှိ ဘုရားသခင့်နိုင်ငံတော်ကြေညာသူ ၂၄,၉၆၁ ဦးအတွက် ပြဿနာများပေါ်ပေါက်စေတုန်းပင်။ သို့တိုင် သူတို့သည် ကြောက်ရွံ့တွန့်ဆုတ်မှုမရှိ စိတ်ထက်သန်နေကြဆဲဖြစ်သည်။ ကျောင်းတွင် လူ့ကျင့်ဝတ် သင်တန်းချိန်အတောအတွင်း ယေဟောဝါသက်သေများအား ဂိုဏ်းတစ်ဂိုဏ်းအဖြစ်ဖော်ပြသည်ကို ၁၆ နှစ်အရွယ် သက်သေခံတစ်ဦးကြားသောအခါ သူသည် သက်သေခံတို့၏ရှုမြင်ပုံကို တင်ပြခွင့်တောင်းဆိုခဲ့သည်။ ယေဟောဝါသက်သေများ—နာမည်နောက်ဝယ်ရှိအဖွဲ့အစည်းဗီဒီယိုခွေနှင့် ယေဟောဝါသက်သေများ—သူတို့မည်သူများနည်းဘရိုရှာကိုသုံး၍ သက်သေခံများသည် အမှန်အားဖြင့် မည်သူများဖြစ်ကြောင်း သူရှင်းပြနိုင်ခဲ့သည်။ သူပြောဆိုတင်ပြခဲ့သမျှကို ကောင်းစွာလက်ခံကြပြီး နောက်အပတ်တွင် ကျောင်းသူ၊ ကျောင်းသားများကို စာမေးပွဲစစ်သောအခါ မေးခွန်းအားလုံးသည် ယေဟောဝါသက်သေ ခရစ်ယာန်ဘာသာနှင့်ပတ်သက်သော မေးခွန်းများသာဖြစ်ခဲ့သည်။
၁၈။ စီးပွားရေးပြဿနာများသည် ယေဟောဝါအမှုထမ်းခြင်းမှ အာဂျင်တီးနားနှင့် မိုဇမ်ဘစ်နိုင်ငံများမှ ကြေညာသူများကို မတားဆီးနိုင်ကြောင်း အဘယ်အထောက်အထားရှိသနည်း။
၁၈ ဤနောက်ဆုံးကာလတွင် ခရစ်ယာန်အများစုသည် ကြီးလေးသောပြဿနာများ ရင်ဆိုင်နေကြရသည်။ သို့တိုင် အာရုံမပျံ့လွင့်ဖို့ သူတို့ကြိုးစားနေကြသည်။ လူအများသိသော စီးပွားရေးပြဿနာများရှိသည့်ကြားမှ အာဂျင်တီးနားနိုင်ငံတွင် လွန်ခဲ့သောနှစ်က အရေအတွက်နှုန်းသစ်ဖြစ်သည့် သက်သေခံ ၁၂၆,၇၀၉ ဦးမှတ်တမ်းသွင်းခဲ့ကြသည်။ မိုဇမ်ဘစ်နိုင်ငံတွင် ဆင်းရဲနွမ်းပါးမှု ပျံ့နှံ့ဆဲဖြစ်သည်။ သို့ရာတွင် သက်သေခံခြင်းလုပ်ငန်းတွင် ၃၇,၅၆၃ ဦးပါဝင်၍ မှတ်တမ်းသွင်းခဲ့သည်၊ ယင်းသည် ၄ ရာခိုင်နှုန်းတိုးတက်မှုဖြစ်သည်။ အယ်လ်ဘေးနီးယားနိုင်ငံရှိ လူများစွာအတွက် ဘဝသည် အလွန်ခက်ခဲသော်လည်း အဆိုပါနိုင်ငံသည် ကြေညာသူနှုန်းသစ် ၂,၇၀၈ ဦးအထိတိုးများလာ၍ ၁၂ ရာခိုင်နှုန်း တိုးတက်မှုရခဲ့သည်။ ယေဟောဝါ၏ကျေးကျွန်များသည် ကိုယ်တော်၏နိုင်ငံတော်အကျိုးစီးပွားကို ရှေးဦးထားသောအခါ ခက်ခဲသောအခြေအနေများက ကိုယ်တော်၏ဝိညာဉ်တော်ကို မတားဆီးနိုင်ကြောင်း ထင်ရှားပါသည်။—မဿဲ ၆:၃၃။
၁၉။ (က) ကျမ်းစာအမှန်တရားကို ငတ်မွတ်သူ သိုးကဲ့သို့သောသူ များစွာရှိသေးကြောင်း အဘယ်အရာက သက်သေထူသနည်း။ (ခ) ယေဟောဝါ၏ကျေးကျွန်များသည် ဝိညာဉ်ရေးအရ နိုးနိုးကြားကြားရှိကြောင်း နှစ်ချုပ်မှတ်တမ်းမှ အဘယ်အချက်အချို့ က ဖော်ပြသနည်း။ (စာမျက်နှာ ၁၂-၁၅ ပါဇယားကိုရှု။)
၁၉ လွန်ခဲ့သောနှစ်တွင် ကမ္ဘာတစ်ဝန်း လစဉ် ပျမ်းမျှကျမ်းစာသင်အံမှု ၅,၃၀၉,၂၈၉ ခုမှတ်တမ်းသွင်းခဲ့ခြင်းက ကျမ်းစာအမှန်တရားကို ငတ်မွတ်သူ သိုးကဲ့သို့သောလူ များစွာရှိနေသေးကြောင်းဖော်ပြသည်။ သတိရအောက်မေ့ပွဲ တက်ရောက်သူနှုန်းသစ် ၁၅,၅၉၇,၇၄၆ ဦးအနက်မှ အများစုမှာ ယေဟောဝါအား တက်ကြွစွာ အမှုမထမ်းဆောင်ကြသေးချေ။ ဤသူတို့သည် ယေဟောဝါနှင့် ညီအစ်ကိုအသင်းအပင်းကို ပိုမိုသိကျွမ်းလာပြီး သူတို့အပေါ် မေတ္တာတိုးပွားလာနိုင်ကြပါစေ။ “အခြားသိုး” အဝင် “လူအုပ်ကြီး” သည် ဝိညာဉ်တော်ဖွားညီအစ်ကိုများနှင့်အတူ ဖန်ဆင်းရှင်အား “ဗိမာန်တော်၌ . . . နေ့ညမပြတ်” အမှုထမ်းကြစဉ် ဆက်၍တိုးတက်နေသည်ကို တွေ့မြင်ရခြင်းသည် စိတ်လှုပ်ရှားဖွယ်ဖြစ်သည်။—ဗျာ. ၇:၉၊ ၁၅; ယောဟန် ၁၀:၁၆။
လောတထံမှ သင်ခန်းစာတစ်ခု
၂၀။ လောတနှင့် သူ၏ဇနီးပုံနမူနာမှ ကျွန်ုပ်တို့အဘယ်သင်ခန်းစာရသနည်း။
၂၀ မှန်ပါသည်၊ ဘုရားသခင်၏တည်ကြည်သော ကျေးကျွန်များပင်လျှင် အရေးတကြီးသဘောထား ခေတ္တပျောက်ဆုံးသွားနိုင်ပါသည်။ အာဗြဟံ၏တူ လောတကိုစဉ်းစားကြည့်ပါ။ သောဒုံနှင့် ဂေါမောရမြို့ကို ဘုရားသခင်ဖျက်ဆီးလုပြီဖြစ်ကြောင်း ဧည့်သည်ကောင်းကင်တမန်နှစ်ပါးထံမှ သူသိရှိခဲ့ရသည်။ အဆိုပါသတင်းကို “မတရားသောသူတို့၏ညစ်ညူးသောအကျင့်အားဖြင့် [“ကြီးစွာ၊” ကဘ] နှောင့်ယှက်ခြင်းကိုခံရသောသူ” လောတ အံ့အားသင့်ခဲ့မည်မဟုတ်ပါ။ (၂ ပေတရု ၂:၇) သို့တိုင် ကောင်းကင်တမန်နှစ်ပါးက သောဒုံမြို့မှ သူ့ကိုခေါ်ထုတ်ဖို့ရောက်လာချိန်တွင် သူသည် “ဖင့်နွှဲ” နေခဲ့သည်။ ကောင်းကင်တမန်တို့သည် သူနှင့် သူ့မိသားစုကို မြို့ထဲမှစောင့်ကြပ်ကာထွက်စေခဲ့ရသည်အထိဖြစ်၏။ နောက်ပိုင်းတွင် လောတ၏မယားသည် နောက်သို့လှည့်မကြည့်နှင့်ဟူသော ကောင်းကင်တမန်များ၏ သတိပေးချက်ကို ဂရုမစိုက်ခဲ့ပေ။ သူ၏ပေါ့လျော့သောသဘောထားကြောင့် သူအသက်ဆုံးခဲ့ရသည်။ (ကမ္ဘာဦး ၁၉:၁၄-၁၇၊ ၂၆) “လောတ၏မယားကိုအောက်မေ့ကြလော့” ဟုယေရှုသတိပေးခဲ့၏။—လုကာ ၁၇:၃၂။
၂၁။ ယခင်ကထက် ယခု ပို၍နိုးကြားနေဖို့ အဘယ်ကြောင့်အရေးကြီးသနည်း။
၂၁ ပုံပေမြို့နှင့် ဟယ်ခရူလေးနီယမ်မြို့တို့ ကပ်ဆိုက်ခဲ့ခြင်း၊ ယေရုရှလင်မြို့ဖျက်ဆီးခံရခြင်းဆိုင်ရာ အဖြစ်အပျက်များအပြင် နောဧခေတ် ရေလွှမ်းမိုးခြင်းနှင့် လောတ၏ပုံနမူနာ အားလုံးတို့သည် သတိပေးချက်များကို အလေးအနက်သဘောထားဖို့အရေးကြီးကြောင်း ဖော်ပြသည်။ ယေဟောဝါ၏ကျေးကျွန်များအနေနှင့် ဆုံးခန်းချိန်၏နိမိတ်လက္ခဏာကို ကျွန်ုပ်တို့တွေ့မြင်ကြသည်။ (မဿဲ ၂၄:၃) အယူလွဲဝတ်ပြုမှုမှ ကျွန်ုပ်တို့သီးခြားနေခဲ့ကြပြီ။ (ဗျာ. ၁၈:၄) ပထမရာစုခရစ်ယာန်များကဲ့သို့ ကျွန်ုပ်တို့သည် ‘ယေဟောဝါ၏နေ့ကို စိတ်စွဲလမ်း’ ကြရမည်။ (၂ ပေတရု ၃:၁၂၊ ကဘ) မှန်ပါသည်၊ ယခင်ကထက် ယခု ကျွန်ုပ်တို့ပို၍ နိုးကြားနေကြရမည်! နိုးနိုးကြားကြားရှိနေဖို့ အဘယ်ခြေလှမ်းများလှမ်း၍ အဘယ်အရည်အသွေးများကို ကျွန်ုပ်တို့ပြုစုပျိုးထောင်နိုင်သနည်း။ နောက်ဆောင်းပါးက ယင်းကိစ္စရပ်များကို ဆွေးနွေးသုံးသပ်ပါမည်။
[အောက်ခြေမှတ်ချက်များ]
^ အပိုဒ်၊ 6 ပထမရာစုတွင် ယေရုရှလင်မြို့၌ မြို့သူမြို့သား ၁၂၀,၀၀၀ ထက်ပို၍ ရှိခဲ့ဟန်မတူပေ။ စီ.အီး. ၇၀ ပြည့်နှစ်တွင် ယုဒနယ်တွင်နေထိုင်သူ ၃၀၀,၀၀၀ သည် ပသခါပွဲအတွက် ယေရုရှလင်မြို့သို့ရောက်လာကြောင်း ယူစီဘီးယပ်စ်က ခန့်မှန်းသည်။ သေကျေပျက်စီးသော ကျန်သူတို့မှာ အင်ပါယာ၏အခြားဒေသများမှ ရောက်လာသူများဖြစ်ရပေမည်။
^ အပိုဒ်၊ 6 ယေဟောဝါ၏အမြင်မှဆိုလျှင် စီ.အီး. ၃၃ ခုနှစ်တွင် မောရှေ၏ပညတ်ကို ပဋိညာဉ်သစ်ဖြင့် အစားထိုးခဲ့သည်။—ဧဖက် ၂:၁၅။
သင်မည်သို့ဖြေမည်နည်း
• ယေရုရှလင်မြို့ပျက်စီးခြင်းဘေးကို ဂျူးခရစ်ယာန်များအား အဘယ်အဖြစ်အပျက်က လွတ်မြောက်စေခဲ့သနည်း။
• တမန်တော်ပေတရုနှင့် ပေါလုတို့၏စာစောင်များပါ ဆုံးမစကားက ကျွန်ုပ်တို့နိုးနိုးကြားကြားရှိရန် မည်သို့ထောက်ကူပေးသနည်း။
• ယနေ့ မည်သူသည် နိုးနိုးကြားကြားရှိကြောင်း ထင်ရှားသနည်း။
• လောတနှင့်သူ၏ဇနီး မှတ်တမ်းမှ ကျွန်ုပ်တို့ အဘယ်သင်ခန်းစာရရှိသနည်း။
[လေ့လာရန်မေးခွန်းများ]
[စာမျက်နှာ ၁၂–၁၅ ပါ ဇယား]
ကမ္ဘာချီယေဟောဝါ သက်သေများ၏ ၂၀၀၂ ခုနှစ်လုပ်ငန်းတော်မှတ်တမ်း
[စာမျက်နှာ ၉ ပါ ရုပ်ပုံ]
စီ.အီး. ၆၆ ခုနှစ်တွင် ယေရုရှလင်မြို့ရှိ ခရစ်ယာန်အသိုင်းအဝိုင်းသည် ယေရှု၏ သတိပေးချက်ကို လိုက်နာခဲ့ကြ
[စာမျက်နှာ ၁၀ ပါ ရုပ်ပုံ]
တက်ကြွလှုပ်ရှားနေခြင်းက ခရစ်ယာန်များကို နိုးနိုးကြားကြားရှိစေ