ဝေဒနာ မီးလောင်တိုက်အတွင်း စမ်းသပ်ခံရခြင်း
ဘဝအတ္ထုပ္ပတ္တိ
ဝေဒနာ မီးလောင်တိုက်အတွင်း စမ်းသပ်ခံရခြင်း
ပါရီကလီဇ် ယာနောရီဇ် ပြောပြသည်
မှိုစော်နံနေတဲ့ အကျဉ်းခန်းရဲ့စိုထိုင်းမှုက ကျွန်တော့်အရိုးထိ အေးစိမ့်သွားစေပါတယ်။ စောင်ပါးလေးခြုံပြီး တစ်ယောက်ထဲ ထိုင်နေရင်း လွန်ခဲ့တဲ့နှစ်ရက်ကအဖြစ်ကို ကျွန်တော်မြင်ယောင်နေတုန်းပဲ၊ စစ်မှုထမ်းတွေ ကျွန်တော့်ကို အိမ်ထဲက ဆွဲထုတ်ခေါ်သွားချိန်မှာ ကျွန်တော်တို့ရဲ့ ချူချာတဲ့ကလေးငယ်နှစ်ယောက်နဲ့ ကျန်ရစ်ခဲ့တဲ့ ကျွန်တော့်ကိုကြည့်နေတဲ့ ငယ်ရွယ်သေးတဲ့ဇနီးရဲ့ ခံစားချက်ကင်းတဲ့မျက်နှာကို မြင်ယောင်ဆဲပါပဲ။ နောက်ပိုင်းမှာ ကျွန်တော်နဲ့ယုံကြည်ခြင်းမတူတဲ့ ဇနီးက “ရှင့်အတွက် ဒီကိတ်မုန့်တွေပို့လိုက်တယ်၊ ရှင့်ကလေးတွေလို ရှင်လည်းဖျားနေပါစေ” ဆိုပြီး စာတိုတစ်စောင်နဲ့ ချောထုပ်တစ်ထုပ်ပို့တယ်။ မသေဘဲ မိသားစုနဲ့ပြန်ဆုံနိုင်ပါ့မလား။
အဲဒါက ခရစ်ယာန်ယုံကြည်ခြင်းအတွက် ခက်ခက်ခဲခဲ ကြာရှည်တိုက်လှန်ခဲ့ရချိန်က ဖြစ်ရပ်လေးတစ်ခုပါ၊ အဲ့ဒီဆိုင်ပြိုင်တွန်းလှန်မှုအထဲမှာ မိသားစုဆန့်ကျင်မှု၊ အသိုင်းအဝိုင်းမှ ကြဉ်ထားခံရခြင်း၊ အမှုအခင်းတွေနဲ့ ပြင်းပြင်းထန်ထန် နှိပ်စက်ညှဉ်းပန်းခံရတာတွေပါဝင်တယ်။ ဒါပေမဲ့ အေးအေးဆေးဆေးနေတတ်ပြီး ဘုရားသခင်ကိုကြောက်ရွံ့သူတစ်ဦးဖြစ်တဲ့ ကျွန်တော်ဟာ ဒီလိုစိတ်ပျက်စရာအခြေအနေမျိုးမှာ ဘယ်လိုနဲ့ ဘာကြောင့် ဇာတ်သိမ်းရတာလဲ။ ရှင်းပြခွင့်ပြုပါ။
မြင့်မားသောရည်မှန်းချက်ရှိ ဆင်းရဲနုံချာသူလူမမည်လေး
၁၉၀၉ ခုနှစ်၊ ခရိကျွန်း၊ စတာဗရိုမိနိုရွာမှာ ကျွန်တော့်ကိုမွေးဖွားခဲ့ချိန်က တစ်တိုင်းပြည်လုံးစစ်တိုက်နေပြီး ဆင်းရဲငတ်ပြတ်နေတယ်။ နောက်ပိုင်းမှာ ကျွန်တော့်မွေးချင်းလေးယောက်နဲ့ ကျွန်တော်ဟာ စပိန်တုပ်ကွေးရဲ့ဒဏ်ကနေ သီသီကလေးလွတ်ခဲ့တယ်။ ကျွန်တော်တို့ရဲ့မိဘတွေက ကျွန်တော်တို့ တုပ်ကွေးကူးမှာစိုးလို့ အိမ်ပြင်ပေးမထွက်ဘဲ အပတ်နဲ့ချီ သော့ပိတ်ထားတာမှတ်မိသေးတယ်။
ဆင်းရဲတဲ့ လယ်သမားဖြစ်တဲ့ ကျွန်တော်တို့အဖေဟာ ဘာသာရေး
တကယ်ကိုင်းရှိုင်းပေမဲ့ သဘောထားကြီးတဲ့သူဖြစ်တယ်။ ပြင်သစ်နဲ့ မာဒတ်ဂါစကားမှာ နေထိုင်ခဲ့ဖူးလို့ ဘာသာရေးနဲ့ပတ်သက်ပြီး တိုးတက်တဲ့အယူအဆတွေကို ကြားဖူးနားဝရှိခဲ့တယ်။ ဒါပေမဲ့လည်း ကျွန်တော်တို့မိသားစုက ဂရိသြသဒေါက်စ်ချာ့ခ်ျကို မစွန့်ဘဲ တနင်္ဂနွေနေ့တိုင်း မားစ်ပွဲတက်တယ်၊ နှစ်စဉ် ဒေသခံဂိုဏ်းအုပ်ဘုန်းကြီး လည်ပတ်လာတဲ့အခါ ကျွန်တော်တို့အိမ်မှာပဲတည်းတယ်။ ချာ့ခ်ျဓမ္မတေးသီဆိုအဖွဲ့မှာ ကျွန်တော်ပါဝင်ပြီး ကျွန်တော့်ဘဝရည်မှန်းချက်က ခရစ်ယာန်ဘုန်းကြီးတစ်ပါးဖြစ်ဖို့ပဲ။၁၉၂၉ ခုနှစ်မှာ ရဲတပ်ဖွဲ့ထဲ ကျွန်တော်ဝင်လိုက်တယ်။ အဖေဆုံးတဲ့အချိန်မှာ ဂရိနိုင်ငံမြောက်ပိုင်း၊ သက်စလိုနီကာမြို့မှာ ကျွန်တော်တာဝန်ကျနေတယ်။ စိတ်သက်သာရာနဲ့ ဝိညာဉ်ရေးအလင်း ရှာတွေ့နိုင်ဖို့ အဲသော့စ်တောင် ရဲတပ်ဖွဲ့ကို ကျွန်တော်တောင်းပြောင်းခဲ့တယ်၊ အဲဒီတောင်ကို “သန့်ရှင်းသောတောင်” ဆိုပြီး အနီးအနား ခရစ်ယာန်ဘုန်းကြီးကျောင်းရပ်ကွက်ရှိ ဩသဒေါက်စ်ခရစ်ယာန်တွေက ကြည်ညိုကိုင်းရှိုင်းကြတယ်။ * အဲဒီမှာ လေးနှစ်လောက်တာဝန်ထမ်းပြီး အဲဒီကျောင်းကသူတွေရဲ့ဘဝကို အနီးကပ်လေ့လာတယ်။ အဲ့ဒါကြောင့် ဘုရားသခင်နဲ့ပိုနီးစပ်လာမယ့်အစား သူတို့တွေရဲ့ ဗြောင်ကျကျအကျင့်ယိုယွင်းမှုနဲ့ ဖောက်ပြန်မှုတွေကိုတွေ့ပြီး ထိတ်လန့်သွားတယ်။ အထူးသဖြင့် ကျွန်တော်ကြည်ညိုခဲ့တဲ့ ချာ့ခ်ျဓမ္မပညာကျောင်းအုပ်တစ်ယောက်က သူနဲ့စပ်ယှက်ဖို့ ကျွန်တော့်ကို လာသွေးဆောင်တဲ့အခါ အရမ်းရွံရှာသွားတယ်။ ဒီလိုစိတ်ပျက်ခဲ့ရပေမဲ့လည်း ဘုရားသခင်ရဲ့အမှုတော်ကိုဆောင်နိုင်ဖို့ ချာ့ခ်ျဘုန်းကြီးဖြစ်ချင်ဆဲပဲ။ ချာ့ခ်ျဘုန်းကြီးဝတ်ရုံနဲ့ ဓာတ်ပုံတောင်ရိုက်ခဲ့သေးတယ်။ နောက်ဆုံးတော့ ခရိကျွန်းကို ပြန်ပြောင်းလာခဲ့တယ်။
“သူက နတ်ဆိုးပဲ!”
၁၉၄၂ ခုနှစ်မှာ ဂုဏ်သိက္ခာရှိတဲ့မိသားစုက သိပ်လှတဲ့မိန်းကလေးဖရိုစီနီကို ကျွန်တော်လက်ထပ်ခဲ့တယ်။ ကျွန်တော့်ဇနီးရဲ့မိသားစုဟာ ဝတ်ပြုရေးမှာ အရမ်းကိုင်းရှိုင်းတဲ့သူတွေဖြစ်တဲ့အတွက် ချာ့ခ်ျဘုန်းကြီးဖြစ်ဖို့ ကျွန်တော့်ဆုံးဖြတ်ချက်က အိမ်ထောင်ကျပြီးမှတောင် ပိုပြင်းထန်လာတယ်။ * ဒါနဲ့အေသင်မြို့မှာ ကျမ်းစာသင်ကျောင်းသွားတက်ဖို့ ဆုံးဖြတ်လိုက်တယ်။ ၁၉၄၃ ခုနှစ်ကုန်ပိုင်းမှာ ခရိကျွန်း၊ အစ်ရေခ်လီအန်သင်္ဘောဆိပ်ကိုသွားပေမဲ့ အေသင်မြို့ကို မရောက်ဘူး။ ဘာကြောင့်လဲဆိုတော့ ဒီအတောအတွင်း ဝိညာဉ်ရေးအားသစ်တွေ တက်လာလို့ပါပဲ။ ဘာဖြစ်ခဲ့လို့လဲ။
ယေဟောဝါသက်သေတွေနဲ့ပူးပေါင်းပြီး လုံ့လရှိရှိဟောပြောနေတဲ့လူငယ် အမန္နဝဲလ် လီအိုနူဒါကိစ်ဟာ ခရိတစ်လျှောက်လုံး သမ္မာကျမ်းစာအမှန်တရားအလင်းကို သွန်သင်ပေးနေတာ နှစ်အနည်းငယ်ရှိနေပြီ။ * ဘုရားသခင့်နှုတ်မြွက်စကားတော်ကို သက်သေခံတွေ ရှင်းလင်းပြတာကို လူအချို့သဘောကျပြီး အယူလွဲဝတ်ပြုမှုကို စွန့်လွှတ်ခဲ့ကြတယ်။ မနီးမဝေးမှာရှိတဲ့စီတီအာမြို့မှာ စိတ်ထက်သန်တဲ့သက်သေခံအုပ်စုတစ်စု ဖွဲ့စည်းထားတယ်။ အဲ့ဒါကို တစ်ချိန်က အမေရိကန်မှာ နေခဲ့ဖူးတဲ့ ဒေသခံဂိုဏ်းအုပ်ဘုန်းကြီးက မကြိုက်ဘူး။ ယေဟောဝါသက်သေတွေ ဟောပြောကြတာ ဘယ်လောက်ထိရောက်တယ်ဆိုတာကို သူသိထားလို့ဖြစ်တယ်။ သူ့နယ်မြေက ဒီ “အယူလွဲသူ” တွေကိုချေမှုန်းပစ်ဖို့ သူဆုံးဖြတ်ထားတယ်။ ဒါနဲ့ပဲ သူလှုံ့ဆော်ပေးလို့ ရဲတွေက သက်သေခံတွေကို တရားရုံးရှေ့မတရားစွပ်စွဲပြီး ထောင်ထဲအမြဲဆွဲခေါ်သွားကြတယ်။
အဲ့ဒီသက်သေခံတွေထဲကတစ်ယောက်က ကျွန်တော့်ကို ကျမ်းစာအမှန်တရား ကြိုးစားရှင်းပြတယ်၊ ဒါပေမဲ့ ကျွန်တော်စိတ်မဝင်စားဘူးလို့ သူထင်ခဲ့တယ်။ ဒါနဲ့ အတွေ့အကြုံပိုရှိတဲ့ ဓမ္မအမှုဆောင်တစ်ဦးကို ကျွန်တော့်ဆီလွှတ်လိုက်တယ်။ ကျွန်တော်ခပ်ပြတ်ပြတ်စကားပြောလိုက်တဲ့အတွက် ဒုတိယသက်သေခံကလည်း သူတို့လူစုလေးကို “ပါရီကလီဇ်တော့ သက်သေခံမဖြစ်လာနိုင်ဘူး။ သူက နတ်ဆိုးပဲ!” လို့ သတင်းပို့ခဲ့တယ်။
ပထမအကြိမ် အတိုက်အခံပြုခံရ
ဘုရားသခင်က သူတို့လို ကျွန်တော့်ကို မသတ်မှတ်လို့ ဝမ်းသာလိုက်တာ။ အမှန်တရားကို ယေဟောဝါသက်သေတွေ သွန်သင်ပေးတယ်လို့ ယုံကြည်ခဲ့တဲ့ ကျွန်တော့်ညီ ဒီမတ်စ်သီနက်စ်က စိတ်မသာညည်းတွားသူတို့အား နှစ်သိမ့်ပေး [လိပ်] * စာအုပ်ငယ် ကို ၁၉၄၅ ခုနှစ် အောက်တိုဘာလမှာ ကျွန်တော့်ကိုပေးဖတ်တယ်။ အဲ့ဒီအထဲက အကြောင်းအရာတွေကို ကျွန်တော်စိတ်စွဲမှတ်သွားတော့တာပဲ။ အဲ့ဒီနောက် ဩသဒေါက်စ်ချာ့ခ်ျနဲ့ ချက်ချင်းအဆက်ဖြတ်ပြီး စီတီအာမြို့က အဲ့ဒီလူစုကလေးနဲ့ပူးပေါင်းခဲ့တယ်၊ ကျွန်တော်တို့ရဲ့မွေးချင်းတွေကိုလည်း ကျွန်တော်တို့ရဲ့ခံယူချက်အသစ်ကို ပြောပြခဲ့တယ်။ သူတို့အားလုံး ကျမ်းစာအမှန်တရားကို လက်ခံကြတယ်။ ထင်သလိုပါပဲ အယူလွဲဝတ်ပြုမှုကိုစွန့်ဖို့ ကျွန်တော်ဆုံးဖြတ်လို့ ကျွန်တော့်ဇနီးနဲ့ သူ့မိသားစုကဝိုင်းပယ်တော့တာပဲ။ ကျွန်တော့်ရဲ့ယောက္ခမဆိုရင် ကျွန်တော့်ကို အတော်ကြာကြာ စကားမပြောဘူး။ အိမ်တွင်းမှာလည်း သဘောထားကွဲလွဲမှုတွေနဲ့ တင်းမာမှုတွေရှိနေတယ်။ အဲဒီလိုဖြစ်နေတဲ့ကြားက ၁၉၄၅ ခုနှစ် မေလမှာ ကျွန်တော်နဲ့ ဒီမတ်စ်သီနက်စ်ကို ညီအစ်ကို မီနော့စ် ကိုကီနာကိစ် * က နှစ်ခြင်းပေးခဲ့တယ်။
နောက်ဆုံး ကျွန်တော့်ရည်မှန်းချက် အကောင်အထည်ပေါ်လာပြီး ဘုရားသခင်ရဲ့ စစ်မှန်တဲ့ဓမ္မအမှုဆောင်ဖြစ်လာပါရော! ကျွန်တော်ဦးဆုံးအကြိမ် တစ်အိမ်တက်ဆင်းဓမ္မအမှုဆောင်ခဲ့တဲ့နေ့ကို မှတ်မိတုန်းပဲ။ စာအုပ်ငယ် ၃၅ အုပ် အိတ်ထဲထည့်ပြီး ရွာတစ်ရွာကို ကျွန်တော်တစ်ယောက်ထဲ ဘတ်စကားစီးသွားတယ်။ လန့်လန့်နဲ့ တစ်အိမ်ပြီးတစ်အိမ် စဟောသွားတော့တာပဲ။ သွားရင်းသွားရင်းနဲ့ သတ္တိရှိလာတယ်။ ဒေါသထွက်နေတဲ့ ချာ့ခ်ျဘုန်းကြီးတစ်ပါး ရောက်လာပြီး ရဲဌာနကို သူနဲ့လိုက်ခဲ့ဖို့ မရမကဆွဲခေါ်တာကို ကျွန်တော်မမှုဘဲ သတ္တိရှိရှိပြန်ပြောနိုင်ခဲ့တယ်။ တစ်ရွာလုံးပတ်ဟောပြီးမှပြန်မယ်လို့ သူ့ကိုပြောတဲ့အတိုင်း လုပ်ခဲ့တယ်။ ကျွန်တော်ပျော်လွန်းလို့ ဘတ်စကားကိုတောင်မစောင့်ဘဲ အိမ်ကိုခြေကျင်လျှောက်ပြီး ပြန်ခဲ့တယ်။
ရက်စက်သောလူဆိုးများလက်ထဲ
၁၉၄၅ ခုနှစ် စက်တင်ဘာလကျတော့ စီတီအာမြို့မှာ စတည်ထောင်တဲ့အသင်းတော်မှာ တာဝန်တွေထပ်ရတယ်။ မကြာမီ ဂရိမှာ ပြည်တွင်းစစ်ဖြစ်ပွားတယ်။ တော်လှန်ရေးပြောက်ကျားအုပ်စုတွေက တစ်ဖက်ကိုတစ်ဖက် အမုန်းထားပြီး အကြမ်းဖက်တော့တာပဲ။ ဒီအခြေအနေကို အခွင့်ကောင်းယူပြီး ဂိုဏ်းအုပ်ဘုန်းကြီးက ဒေသခံပြောက်ကျားယောဟန် ၁၆:၂) အဲ့ဒီပြောက်ကျားအုပ်စုက ကျွန်တော်တို့ရဲ့မြို့ကို ဘတ်စကားစီးလာတုန်း “ဘုရားသခင်ခန့်အပ်တဲ့” သူတို့အလုပ်ကို ဘယ်လိုလုပ်ကြမယ်ဆိုတာတွေ ဆွေးနွေးတာကို အမှတ်တမဲ့ကြားလိုက်တဲ့ ကျွန်တော်တို့ကိုခင်တဲ့အမျိုးသမီးတစ်ဦးက ကျွန်တော်တို့ကို လာပြောပြတယ်။ ဒါနဲ့ကျွန်တော်တို့ ပုန်းနေကြပြီး ကျွန်တော်တို့ရဲ့ ဆွေမျိုးတစ်ဦးက ကြားဝင်ကူညီပေးခဲ့လို့ ကျွန်တော်တို့ အသက်ချမ်းသာရခဲ့ကြတာ။
အုပ်စုတစ်စုကို သက်သေခံတွေကို အပြုတ်တိုက်နှိမ်နင်းပစ်ဖို့ တိုက်တွန်းခဲ့တယ်။ (အဲ့ဒီအချိန်ကစပြီး ဖိစီးနှိပ်စက်မှုတွေ ခံရတော့တာပဲ။ ရိုက်နှက်ခံရတာတွေ၊ ခြိမ်းခြောက်ခံရတာတွေက မဆန်းတော့ဘူး။ ကျွန်တော်တို့ကို တိုက်ခိုက်သူတွေက ချာ့ခ်ျကိုပြန်လာဖို့၊ ကျွန်တော်တို့ကလေးတွေကို ရေဖျန်းပြီး နှစ်ခြင်းပေးဖို့၊ လက်ဝါးကပ်တိုင်အမှတ်သင်္ကေတ လုပ်ပြဖို့ မရမကအမျိုးမျိုးကြိုးစားတယ်။ တစ်ခါကဆိုရင် ကျွန်တော့်ညီကို သေပြီလို့ သူတို့ထင်တဲ့အထိ ရိုက်နှက်ခဲ့တာ။ ကျွန်တော့်ညီမနှစ်ယောက်ကိုလည်း အဝတ်တွေဆွဲဆုတ်ပြီး ရိုက်ခဲ့ကြတာကို ကျွန်တော်တကယ် အခံရခက်ခဲ့တယ်။ အဲဒီအချိန်အတောအတွင်းမှာ ချာ့ခ်ျက ယေဟောဝါသက်သေတွေရဲ့ ကလေးရှစ်ယောက်ကို အတင်းအဓမ္မ ရေဖျန်းပြီးနှစ်ခြင်းပေးခဲ့တယ်။
၁၉၄၉ ခုနှစ်မှာ အမေဆုံးသွားတယ်။ ချာ့ခ်ျဘုန်းကြီးက ကျွန်တော်တို့ကိုအပြစ်ရှာပြီး ဈာပနခွင့်ပြုမိန့်အတွက် တရားဝင်ပြဋ္ဌာန်းချက်တွေကို မလိုက်လျှောက်ခဲ့ဘူးလို့ စွဲချက်တင်တယ်။ တရားရုံးမှာ ကျွန်တော်စစ်ဆေးခံရပြီး အပြစ်တင်ခွင့်ကင်းလွတ်ခဲ့တယ်။ အဲ့ဒါက အကြီးအကျယ်သက်သေခံချက်ဖြစ်ခဲ့တယ်။ ဘာကြောင့်လည်းဆိုတော့ အမှုစစစ်တဲ့အချိန်မှာ ယေဟောဝါရဲ့နာမကို လူတွေကြားသိလိုက်ရလို့ပဲ။ “ကျွန်တော်တို့ကိုအသိတရားပြန်ရစေဖို့” ကျွန်တော်တို့ရန်သူတွေလုပ်နိုင်တာ တစ်နည်းပဲရှိပြီး အဲ့ဒါကတော့ ကျွန်တော်တို့ကို ဖမ်းချုပ်ပြီး ပြည်နှင်ဒဏ်ပေးဖို့ပဲ။ ၁၉၄၉ ခုနှစ်၊ ဧပြီလမှာ သူတို့ အဲ့ဒီလိုလုပ်ခဲ့ကြတယ်။
မီးလောင်တိုက်ထဲရောက်
အဖမ်းခံရတဲ့ ညီအစ်ကိုသုံးဦးထဲမှာ ကျွန်တော်လည်းပါတယ်။ ဒေသခံရဲစခန်းကို ကျွန်တော့်ဇနီးက လာတောင်မကြည့်ဘူး။ ဦးဆုံး၊ အစ်ရေခ်လီအန်ဆိပ်ကမ်းမြို့မှာရှိတဲ့ အကျဉ်းထောင်ကိုပို့ခဲ့တယ်။ အစကဖော်ပြထားတဲ့အတိုင်းပဲ ကျွန်တော်အထီးကျန်ဖြစ်ခဲ့ပြီး စိတ်ဓာတ်အတော်ကျခဲ့တယ်။ ကျွန်တော့်ခံယူချက်တွေကိုလက်မခံတဲ့ ငယ်ရွယ်သေးတဲ့ဇနီးနဲ့ နို့စို့ကလေးနှစ်ယောက်ကို ထားရစ်ခဲ့ရတယ်။ ကူညီပေးတော်မူပါလို့ ယေဟောဝါကို အပြင်းအထန်ဆုတောင်းတယ်။ ဒါနဲ့ ဟေဗြဲ ၁၃:၅ မှာမှတ်တမ်းတင်ထားတဲ့ “ငါသည်သင့်ကိုမစွန့်၊ သင့်ကိုအလျှင်းပစ်၍မထား” ဆိုတဲ့စကားကို ကျွန်တော်သတိရလာတယ်။ ယေဟောဝါကို အပြည့်အဝယုံကြည်ကိုးစားတာပဲ ကောင်းမယ်လို့ ကျွန်တော်အသိအမှတ်ပြုတယ်။—သု. ၃:၅။
ဂရိနိုင်ငံ အတီကားကမ်းခြေကနေ အလှမ်းကွာဝေးတဲ့ မာခရိုနီဆော့စ်ကျွန်းကို ကျွန်တော်တို့ပြည်နှင်ခံရတော့မယ်လို့ သတင်းရတယ်။ မာခရိုနီဆော့စ်ဆိုတဲ့နာမည်ကြားရုံနဲ့ ဘယ်သူမဆိုကြောက်ကြတယ်၊ အကြောင်းက အဲဒီအကျဉ်းစခန်းဟာ တကယ်နှိပ်စက်ညှဉ်းဆဲပြီး ကျွန်လိုခိုင်းတတ်တယ်လို့ နာမည်ကြီးတယ်။ အကျဉ်းထောင်ကိုအသွားမှာ ပိုင်ရီးအက်မြို့မှာ တစ်ထောက်နားခဲ့ကြရတယ်။ လက်ထိတ်တွေနဲ့ဖြစ်နေပေမဲ့ ကျွန်တော်တို့ရဲ့ယုံကြည်သူချင်းအချို့က သင်္ဘောပေါ်တက်လာပြီး ကျွန်တော်တို့ကိုပွေ့ဖက် အားပေးခဲ့ကြတယ်။—တမန်တော် ၂၈:၁၄၊ ၁၅။
မာခရိုနီဆော့စ်ကျွန်းမှာ နေခဲ့ရတဲ့အချိန်ဟာ တကယ်အိပ်မက်ဆိုးကြီးပဲ။ စစ်သားတွေက မနက်မိုးလင်းကနေ ညမိုးချုပ်တဲ့အထိ နှိပ်စက်ခဲ့ကြတယ်။ သက်သေခံမဟုတ်တဲ့ အကျဉ်းသားတချို့ ရူးသွားကြတယ်၊ တခြားသူတွေကျတော့ သေသွားတယ်၊ အတော်များများ မစွမ်းမသန်ဖြစ်ကုန်ကြတယ်။ ညဘက်မှာ နှိပ်စက်ခံရတဲ့သူတွေရဲ့ အော်ဟစ်သံတွေ၊ ညဉ်းညူသံတွေကို ကြားကြားနေကြရတယ်။ ညအေးချမ်းတဲ့အချိန်မှာ ကျွန်တော့်စောင်ပါးလေးက မဆိုစလောက်ပဲနွေးစေတယ်။
အကျဉ်းစခန်းမှာ ယေဟောဝါသက်သေတွေရဲ့နာမည်ကို နံနက်တိုင်း နာမည်စာရင်းခေါ်တဲ့အတွက် တဖြည်းဖြည်း လူသိများလာတယ်။ ဒါနဲ့ ကျွန်တော်တို့လည်း သက်သေခံဖို့ အခွင့်အရေးတွေအတော်ရလာတယ်။ ယေဟောဝါကို သူ့ရဲ့အသက်တာဆက်ကပ်အပ်နှံတဲ့အထိ သူတိုးတက်လာခဲ့တဲ့ နိုင်ငံရေးအကျဉ်းသားတစ်ယောက်ကိုတောင် ကျွန်တော်နှစ်ခြင်းပေးခွင့်ရခဲ့တယ်။
ကျွန်တော်ပြည်နှင်ခံရတဲ့အချိန်တစ်လျှောက် ကျွန်တော့်ကိုစာလုံးဝမပြန်တဲ့ ကျွန်တော့်ချစ်ဇနီးဆီ စာအမြဲရေးတယ်။ သူစာမပြန်ပေမဲ့ သူ့ကို ကြင်ကြင်နာနာနဲ့ နှစ်သိမ့်မပေးဘဲမနေခဲ့ပါဘူး၊ ဒီအခြေအနေဟာ တစ်ခဏပဲ၊ ပြန်ပျော်ရွှင်လာရမှာပါလို့ စာနဲ့အားပေး စိတ်ချစေခဲ့တယ်။
တဖြည်းဖြည်းနဲ့ ညီအစ်ကိုတွေ နောက်ထပ်ရောက်လာလို့ လူများလာတယ်။ ကျွန်တော်က ရုံးခန်းထဲမှာ အလုပ်လုပ်ရလို့ အဲ့ဒီစခန်းရဲ့ဗိုလ်မှူးချုပ်ကြီးနဲ့ ရင်းနှီးလာတယ်။ သက်သေခံတွေကို သူလေးစားတဲ့အတွက် အေသင်မြို့မှာရှိတဲ့ ကျွန်တော်တို့ရုံးကနေ ကျမ်းစာစာပေအချို့ကို ရရှိနိုင်မလားလို့ ကျွန်တော်အရဲစွန့်ပြီးမေးလိုက်တယ်။ သူက “ဘယ်ဖြစ်နိုင်မလဲ” လို့ပြောတယ်၊ “ဒါပေမဲ့ မင်းရဲ့ဝန်စည်စလယ်ထဲမှာထုပ်ပိုးပြီး ငါ့နာမည်နဲ့ အေသင်မြို့က မင်းတို့ရဲ့လူတွေကို ပို့ခိုင်းလိုက်ပါလား” လို့ပြောတယ်။ ကျွန်တော် အံ့ဩလွန်းလို့ မှင်တက်သွားမိတယ်! ရက်အနည်းငယ်အကြာမှာ ရောက်လာတဲ့သင်္ဘောတစ်စီးကနေ ကုန်စည်တွေကို ကျွန်တော်တို့ချနေတုန်းမှာ ရဲသားတစ်ဦးက ဗိုလ်မှူးကြီးကိုအလေးပြုပြီး “ဗိုလ်မှူးကြီး၊ ဗိုလ်မှူးကြီးရဲ့အထုပ်ရောက်လာပြီ” လို့ သတင်းပေးတော့ သူက “ဘာအထုပ်လဲ” ဆိုပြီးပြန်မေး
တာ ကျွန်တော်အမှတ်တမဲ့ကြားလိုက်တာနဲ့ သူ့ကို “ဗိုလ်မှူးကြီးခွင့်ပြုတဲ့အတိုင်း ဗိုလ်မှူးကြီးနာမည်နဲ့ပို့ထားတဲ့ ကျွန်တော်တို့ရဲ့အထုပ်ဖြစ်နိုင်တယ်” လို့ တိုးတိုးလေးပြောလိုက်တယ်။ အဲ့ဒါကျွန်တော်တို့ကို ယေဟောဝါဝိညာဉ်အစာကျွေးခဲ့တဲ့ နည်းတစ်နည်းပဲ။မမျှော်လင့်ပဲ ကောင်းချီးရ —ထို့နောက် ဆင်းရဲခြင်းများ ထပ်မံခံရ
၁၉၅၀ ပြည့်နှစ်အကုန်ပိုင်းမှာ ကျွန်တော်အကျဉ်းထောင်က ထွက်ခွင့်ရတယ်။ အဲ့ဒီအချိန်မှာ ကျွန်တော်ဟာအင်အားချည့်နဲ့၊ ဖြူဖပ်ဖြူရော်၊ ပိန်လှီလှီနဲ့ အိမ်ပြန်ရောက်တဲ့အခါဘယ်လိုဖြစ်မလဲလို့ စိုးရိမ်မိတယ်။ ကျွန်တော့်ဇနီးနဲ့ ကလေးတွေကို ပြန်တွေ့ရတာ ဝမ်းသာလိုက်တာ! ပိုဝမ်းသာစရာက ဖရိုစီနီဟာ ကျွန်တော့်အပေါ် ရန်လိုမုန်းထားစိတ် လုံးဝမရှိတော့တာပဲ။ ထောင်ထဲက ကျွန်တော်ရေးပို့လိုက်တဲ့စာတွေ တကယ်အကျိုးပေးပါလား။ ကျွန်တော်ရဲ့ခံနိုင်ရည်နဲ့ မဆုတ်မနစ်ဇွဲက ဖရိုစီနီရဲ့စိတ်ကို ထိမိခဲ့တဲ့ပုံပဲ။ အဲ့ဒီနောက်မကြာခင်မှာ သူနဲ့ကျေအေးသင့်မြတ်တဲ့စကားတွေ ဆွေးနွေးပြောဆိုဖြစ်တယ်။ ကျမ်းစာသင်အံမှုကိုလည်း သူလက်ခံပြီး တဖြည်းဖြည်း ယေဟောဝါနဲ့ ကိုယ်တော်ရဲ့ကတိတော်တွေကို ယုံကြည်လာတယ်။ ကျွန်တော်ရဲ့အပျော်ဆုံးနေ့တစ်နေ့ကတော့ ၁၉၅၂ ခုနှစ်မှာ ကျွန်တော့်ဇနီးကို ယေဟောဝါရဲ့ဆက်ကပ်အပ်နှံကျေးကျွန်တစ်ဦးအဖြစ် ကျွန်တော်နှစ်ခြင်းပေးခဲ့ရတဲ့နေ့ပါပဲ!
၁၉၅၅ ခုနှစ်မှာ ခရစ်ယာန်ဘောင် သို့မဟုတ် ခရစ်ယာန်ဘာသာတရား အဘယ်အရာက “ဤလောက၏အလင်းဖြစ်” သနည်း ဟူသော စာအုပ်ငယ်ကို ချာ့ခ်ျဘုန်းကြီးတိုင်းကို တစ်အုပ်စီဝေပေးဖို့အစီအစဉ် စခဲ့တယ်။ အဲ့ဒီနောက် သက်သေခံအတော်များများနဲ့အတူ ကျွန်တော်လည်းအဖမ်းခံရပြီး အမှုစစ်ခံခဲ့ရတယ်။ ယေဟောဝါသက်သေများရဲ့အမှုတွေက များလွန်းလို့ အားလုံးကိုစစ်နိုင်ဖို့ တရားရုံးက အထူးစီစဉ်ပေးခဲ့ရတယ်။ အဲဒီနေ့မှာ ကျွန်တော်တို့စီရင်စုတစ်ခုလုံးက တရားရေးအမှုထမ်းအဖွဲ့ဝင်အားလုံး ရောက်ရှိနေကြပြီး တရားရုံးထဲမှာ ချာ့ခ်ျဘုန်းကြီးတွေပြည့်လို့ပဲ။ ဂိုဏ်းအုပ်ဘုန်းကြီးက မင်းလမ်းတွေမှာ ခေါက်တုံ့ခေါက်ပြန်လမ်းလျှောက်နေတယ်။ ဘုန်းကြီးတစ်ပါးက ကျွန်တော့်ကို ဘာသာပြောင်းစေခြင်းစွဲချက်နဲ့ အမှုဖွင့်ထားတာ။ တရားသူကြီးက “ဘရိုရှာလေးတစ်စောင်ဖတ်လိုက်ရုံနဲ့ ဘာသာပြောင်းသွားရလောက်အောင် ခင်ဗျားရဲ့ယုံကြည်ခြင်းက ဒီလောက်တောင် နည်းရသလား” လို့ သူ့ကိုမေးမြန်းလိုက်တော့ အဲဒီဘုန်းကြီး စကားပြန်မပြောနိုင်ဘဲဖြစ်သွားတယ်။ ကျွန်တော့်ကို အပြစ်မှတရားသေလွှတ်လိုက်ပေမဲ့ ညီအစ်ကိုအချို့ ခြောက်လထောင်ချခံခဲ့ရတယ်။
အဲဒီနောက်ပိုင်းမှာ ကျွန်တော်တို့ ထပ်ခါထပ်ခါ အဖမ်းခံခဲ့ရလို့ တရားရေးအမှုတွေ တိုးများလာတယ်။ အဲ့ဒီအမှုတွေနဲ့ ကျွန်တော်တို့ရဲ့ရှေ့နေတွေ အလုပ်များသွားကြတယ်။ ကျွန်တော်စုစုပေါင်း ၁၇ ကြိမ် တရားစီရင်ခံခဲ့ရတယ်။ ဒီလောက်အတိုက်အခံတွေများပေမဲ့ ကျွန်တော်တို့မှန်မှန်ပဲ ဟောပြောသက်သေခံခဲ့ကြတယ်။ ဒီလိုအခက်အခဲတွေကို ကျွန်တော်တို့ပျော်ပျော်ရွှင်ရွှင်ပဲ လက်ခံခဲ့ကြပြီး ပြင်းထန်တဲ့အဲ့ဒီစမ်းသပ်မှုတွေက ကျွန်တော်တို့ရဲ့ယုံကြည်ခြင်းကို ပိုထက်သန်စေခဲ့တယ်။—ယာကုပ် ၁:၂၊ ၃။
အခွင့်အရေးနှင့် စိန်ခေါ်ချက်အသစ်များ
၁၉၅၇ ခုနှစ်မှာ အေသင်မြို့ကို ကျွန်တော်တို့ပြောင်းရွှေ့သွားခဲ့ကြတယ်။ မကြာခင်မှာပဲ အသစ်တည်ထောင်တဲ့အသင်းတော်မှာ အမှုထမ်းဖို့ ကျွန်တော်တာဝန်ရတယ်။ ကျွန်တော့်ဇနီးရဲ့ စိတ်နှလုံးအပြည့်ထောက်ခံအားပေးမှုက ကျွန်တော်တို့ရဲ့ဘဝကို ရိုးရိုးရှင်းရှင်းဆက်ထားစေနိုင်ကြပြီး ဝိညာဉ်ရေးကို ဦးစားထားနိုင်ခဲ့ကြတယ်။ ဒါကြောင့် ကျွန်တော်တို့ ဟောပြောခြင်းလုပ်ငန်းမှာ များများပါဝင်နိုင်ခဲ့ကြတယ်။ နှစ်တွေတစ်လျှောက် ကျွန်တော်တို့ကို အကူအညီလိုအပ်တဲ့အသင်းတော်တွေဆီ ပြောင်းရွှေ့အားပေးခိုင်းခဲ့တယ်။
၁၉၆၃ ခုနှစ်မှာ ကျွန်တော့်သားက အသက် ၂၁ နှစ်ပြည့်လို့ စစ်မှုမထမ်းမနေရအမိန့် ကျလာတယ်။ စစ်မှုထမ်းဖို့ အတင်းနာမည်စာရင်းသွင်းခဲ့ရတဲ့ သက်သေခံတွေအားလုံး ကြားနေကြတဲ့အတွက် အရိုက်ခံ၊ လှောင်ပြောင်သရော်ခံရပြီး အရှက်ခွဲခံခဲ့ကြရတယ်။ ကျွန်တော့်သားလည်းပဲ ဒါတွေကိုခံခဲ့ရတယ်။ ဒါနဲ့ သူအားရှိဖို့ မာခရိုနီဆော့စ်မှာသုံးခဲ့တဲ့ ကျွန်တော့်စောင်ကိုပေးလိုက်တယ်။ အရင်သမာဓိစောင့်သိခဲ့သူတွေရဲ့ ပုံနမူနာကိုတုပဖို့ အထိမ်းအမှတ်အနေနဲ့ပေါ့။ စစ်မှုထမ်းဖို့အခေါ်ခံရတဲ့ညီအစ်ကိုတွေဟာ စစ်ခုံရုံးတင်ခံရပြီး အများအားဖြင့် နှစ်နှစ်ကနေ လေးနှစ်အထိ ထောင်ချခံခဲ့ကြရတယ်။ သူတို့ကိုလွှတ်လိုက်ပြီးနောက်လည်း တစ်ခါပြန်အခေါ်ခံရပြီး ပြစ်ဒဏ်ပေးခံရပြန်တယ်။ ဓမ္မအမှုဆောင်တစ်ဦးအနေနဲ့ ကျွန်တော်အကျဉ်းထောင်အတော်များများကိုသွားရတဲ့အတွက် ကျွန်တော့်သားနဲ့ တခြားတည်ကြည်တဲ့ သက်သေခံတွေနဲ့ အကန့်အသတ်နဲ့ဆက်သွယ်နိုင်ခဲ့တယ်။ ကျွန်တော့်သားက ခြောက်နှစ်ကျော် ထောင်ချခံခဲ့ရတယ်။
ကျွန်ုပ်တို့ကို ယေဟောဝါထောက်ပံ့ပေးခဲ့
ဂရိနိုင်ငံမှာ ဝတ်ပြုရေးလွတ်လပ်ခွင့်ရပြီးနောက် ယာယီအထူးရှေ့ဆောင်အဖြစ် ရိုဒ်စ်ကျွန်းပေါ်မှာ ကျွန်တော်အမှုထမ်းခွင့်ရခဲ့တယ်။ အဲ့ဒီနောက် ၁၉၈၆ ခုနှစ်မှာ ကျွန်တော်ရဲ့ခရစ်ယာန်လုပ်ငန်းကို စတင်ခဲ့တဲ့ ခရိကျွန်း၊ စီတီအာမြို့မှာ ကူညီပေးဖို့အကြောင်းပေါ်လာတယ်။ ကျွန်တော်ငယ်ငယ်ကတည်းက သိကျွမ်းခဲ့တဲ့ ချစ်မြတ်နိုးရတဲ့ယုံကြည်သူချင်းတွေနဲ့ အမှုထမ်းခွင့်ရမယ့် ဒီတာဝန်ကို ဝမ်းသာအားရလက်ခံခဲ့တယ်။
ကျွန်တော့်မိသားစုမှာ အသက်အကြီးဆုံးသူအနေနဲ့ အခုကျွန်တော့်ဆွေမျိုးစုစုပေါင်း ၇၀ နီးပါး ယေဟောဝါအမှုတော်ကို သစ္စာရှိရှိထမ်းဆောင်နေတာကိုတွေ့ရလို့ ဝမ်းသာမိတယ်။ အဲ့ဒီအရေအတွက်ကလည်း ဆက်တိုးများလာနေတယ်။ အချို့က အကြီးအကဲတွေ၊ ဓမ္မအမှုထမ်းတွေ၊ ရှေ့ဆောင်တွေ၊ ဗေသလအိမ်သားတွေနဲ့ နယ်လှည့်ကြီးကြပ်မှူးတွေအဖြစ် အမှုထမ်းခဲ့ကြတယ်။ ကျွန်တော့်ရဲ့ယုံကြည်ခြင်းဟာ ၅၈ နှစ်ကျော် ဝေဒနာမီးလောင်တိုက်ထဲမှာ စမ်းသပ်ခံခဲ့ရပါတယ်။ အခုဆိုရင် ကျွန်တော်ဟာ ၉၃ နှစ်ရှိပြီ၊ အတိတ်ကိုပြန်ပြောင်းကြည့်ရင် ဘုရားသခင်ရဲ့အမှုတော်ထမ်းခဲ့ရလို့ နောင်တရစရာလုံးဝမရှိဘူး။ “ငါ့သား သင့်နှလုံးကိုငါ့အားပေးလော့။ သင့်မျက်စိတို့သည် ငါသွားသောလမ်းကိုကြည့်မှတ်ပါစေ” လို့မေတ္တာပါပါ ကိုယ်တော်ဖိတ်ခေါ်တာကို လက်ခံနိုင်ဖို့ ကျွန်တော့်ကို ကိုယ်တော်ခွန်အားပေးခဲ့ပါပြီ။—သု. ၂၃:၂၆။
[အောက်ခြေမှတ်ချက်များ]
^ အပိုဒ်၊ 9 ၁၉၉၉၊ ဒီဇင်ဘာ ၁၊ ကင်းမျှော်စင် စာမျက်နှာ ၃၀-၁ ကိုရှု။
^ အပိုဒ်၊ 11 ဂရိသြသဒေါက်စ်ချာ့ခ်ျသည် ချာ့ခ်ျဘုန်းကြီးများကို လက်ထပ်ရန် ခွင့်ပြုထားခဲ့သည်။
^ အပိုဒ်၊ 12 အမန္နဝဲလ် လီအိုနူဒါကိစ်၏ဘဝအတ္ထုပ္ပတ္တိကို ၁၉၉၉၊ စက်တင်ဘာ ၁ ရက်ထုတ် ကင်းမျှော်စင် စာမျက်နှာ ၂၅-၉ ကိုရှု။
^ အပိုဒ်၊ 15 ယေဟောဝါသက်သေများထုတ်ဝေခဲ့သည်; ယခု မထုတ်တော့ပါ။
^ အပိုဒ်၊ 15 မီနော့စ် ကိုကီနာကိစ်နှင့်ပတ်သက်သည့် တရားဝင်အောင်ပွဲခံခဲ့ခြင်းအကြောင်း ၁၉၉၃၊ စက်တင်ဘာ ၁ ရက်ထုတ် ကင်းမျှော်စင် စာမျက်နှာ ၂၇-၃၁ ကိုရှု။
[စာမျက်နှာ ၂၇ ပါ လေးထောင့်ကွက်]
မာခရိုနီဆော့စ် ကြောက်လန့်တုန်လှုပ်ဖွယ်ကျွန်း
၁၉၄၇ ခုနှစ်မှ ၁၉၅၇ ခုနှစ်တိုင် ဆယ်စုနှစ်ချီ၍ ဤသွေ့ခြောက်ပြီး လူသူကင်းဝေးသော မာခရိုနီဆော့စ်ကျွန်းသည် အကျဉ်းသားပေါင်း ၁၀၀,၀၀၀ ကျော်၏နေအိမ် ဖြစ်ခဲ့သည်။ သူတို့ထဲတွင် မိမိတို့၏ခရစ်ယာန်ကြားနေမှုကြောင့် ထိုနေရာသို့ အပို့ခံခဲ့ရသည့် တည်ကြည်သော သက်သေခံအမြောက်အမြား ပါရှိသည်။ သူတို့ ပြည်နှင်ဒဏ်ခံရရန် မြှောက်ပင့်သွေးထိုးပေးသူများမှာ ယေဟောဝါသက်သေများကို ကွန်မြူနစ်များဟု မတရားသဖြင့်စွပ်စွဲကြသည့် ဂရိသြသဒေါက်စ်ချာ့ခ်ျမှ ခရစ်ယာန်ဘုန်းကြီးများ ဖြစ်လေ့ရှိ၏။
မာခရိုနီဆော့စ်ကျွန်းပေါ်တွင် အသုံးပြုလေ့ရှိသည့် “ပြုပြင်ပြောင်းလဲရေး” စနစ်နှင့်ပတ်သက်၍ ဂရိစွယ်စုံကျမ်း ပါပရို့စ် လာရောစီဗြိတိန်နီကာ က ဤသို့သတိပြုစေသည်– “ရက်စက်စွာနှိပ်စက်နည်းများ၊ . . . ယဉ်ကျေးသောလူမျိုးတစ်မျိုး လက်မခံနိုင်သည့် နေမှုထိုင်မှုအခြေအနေများနှင့် အကျဉ်းသားများကို အစောင့်များဆက်ဆံပုံသည် . . . ဂရိနိုင်ငံ၏သမိုင်းတွင် အလွန်ရှက်ဖွယ်ရာဖြစ်ပါသည်။”
ဝတ်ပြုမှုကိုစွန့်မှ လွှတ်မည်ဟု ခြိမ်းခြောက်ခံရသော သက်သေခံအချို့လည်းရှိသည်။ မည်သို့ပင်ဖြစ်စေ သက်သေခံများသည် တည်ကြည်ခဲ့ကြသည်။ ထိုမျှမက ယေဟောဝါသက်သေများနှင့် တွေ့ဆုံသိကျွမ်းပြီးနောက် သမ္မာကျမ်းစာအမှန်တရားကို လက်ခံခဲ့ကြသည့် နိုင်ငံရေးအကျဉ်းသားအချို့ပင်ရှိသည်။
[စာမျက်နှာ ၂၇ ပါ ရုပ်ပုံ]
ပြစ်ဒဏ်စီရင်ရာ မာခရိုနီဆော့စ်ကျွန်းတွင် မီနော့စ် ကိုကီနာကိစ် (ယာဘက်မှ သုံးယောက်မြောက်) နှင့် ကျွန်တော် (ဘယ်ဘက်မှ လေးယောက်မြောက်)
[စာမျက်နှာ ၂၉ ပါ ရုပ်ပုံ]
လူငယ်ဘဝက ကျွန်တော် အမှုဆောင်ခဲ့သည့် ခရိကျွန်း၊ စီတီအာမြို့တွင် သက်သေခံချင်းတစ်ဦးနှင့်အတူ လုပ်ဆောင်နေ