သခင့်​ညစာ​စားပွဲ​ကို အဘယ်ကြောင့် ကျင်းပ​ကြ​သနည်း

“သင်တို့၌ ငါ​အပ်ပေး​သော​အရာ​ကို သခင်​ဘုရားထံ​၌ ငါ​ခံရ​ပြီ။”—၁ ကောရိန္သု ၁၁:၂၃။

၁၊ ၂။ စီ.အီး. ၃၃၊ ပသခါပွဲ​ည​တွင် ယေရှု အဘယ်အရာ ပြုလုပ်​ခဲ့​သနည်း။

ယေဟောဝါ​၏ တစ်ပါး​တည်း​သော​သားတော် ရှိ​နေသည်။ ‘ကိုယ်တော် စုံစမ်း​နှောင့်ယှက်ခြင်း ခံရ​စဉ် ကိုယ်တော်၌ မှီဝဲ​ကြ​သူ’ ၁၁ ဦး​လည်း ရှိနေကြ​၏။ (လုကာ ၂၂:၂၈) ထို​နေ့ရက်​သည် စီ.အီး. ၃၃၊ မတ်​လ ၃၁ ရက် ကြာသပတေး​နေ့ ညနေပိုင်း​ဖြစ်​ပြီး ယေရုရှလင်​မြို့​ပေါ်​တွင် လ​ပြည့်​ဝန်း​သာ​နေဖို့ အကြောင်း​များသည်။ ယေရှု​ခရစ်​နှင့် ကိုယ်တော်​၏​တမန်​တော်​များသည် ပသခါပွဲ ကျင်းပ​ပြီး​ခါ​စ​ဖြစ်သည်။ သစ္စာဖောက် ယုဒရှကာရုတ်​ကို အခန်း​ထဲ​မှ ယေရှု​ထွက်သွား​ခိုင်း​လိုက်​သော်လည်း တခြား​သူများ​မှာ​မူ ထွက်ခွာ​သွား​ရန် အချိန်​မ​တိုင်​သေး​ချေ။ အဘယ်ကြောင့်​နည်း။ အကြောင်း​မှာ အလွန်​အရေးကြီးသော အလုပ်​တစ်ခု​ကို ယေရှု​လုပ်ဆောင်တော့​မည်​ဖြစ်သည်။ ယင်း​ကား အဘယ်နည်း။

^၂ ထို​အချိန်တွင် ခရစ်ဝင်​ကျမ်း​ရေးသူ မဿဲ ရှိနေ​သောကြောင့် ကျွန်ုပ်​တို့ကို သူ​ပြောပြ​ပါစေ။ သူ​ဤသို့​ရေးသားခဲ့​၏– “ယေရှုသည် မုန့်ကို​ယူ၍ ကျေးဇူးတော်​ကို ချီးမွမ်း​ပြီး​မှ မုန့်ကို​ဖဲ့၍ ‘ဤ​မုန့်​ကား ငါ​၏​ကိုယ်​ဖြစ်၏။ ယူ၍​စား​ကြလော့’ ဟု​မိန့်တော်မူ​လျက် တပည့်တော်​တို့အား ပေး​တော်​မူ​၏။ ခွက်​ကိုလည်း​ယူ၍ ကျေးဇူးတော်​ကို ချီးမွမ်း​ပြီး​မှ သူတို့အား​ပေး​တော်​မူ​၍ ‘သင်တို့​ရှိသမျှသည် သောက်​ကြလော့။ ဤ​ခွက်​ကား “ပဋိညာဉ်တရား​သစ်” နှင့်​ဆိုင်၍ လူများ​တို့၏​အပြစ်ကို လွှတ်​စေခြင်း​ငှာ​သွန်း​သော ငါ​၏​အသွေး​ဖြစ်၏။’” (မဿဲ ၂၆:၂၆-၂၈) ယင်းသည် တစ်ကြိမ်​သာ​ဖြစ်သော ဖြစ်ရပ်​လော။ ထိုသို့​ပြုလုပ်ခြင်း​၏ အဓိပ္ပာယ်​ကား အဘယ်နည်း။ ယနေ့ ကျွန်ုပ်​တို့အတွက် အဓိပ္ပာယ်​တစ်စုံတစ်ရာ​ရှိသလော။

“ဤသို့​ပြု​ကြလော့”

၃။ စီ.အီး. ၃၃၊ နိသန်လ ၁၄ ရက်​ည​တွင် ယေရှု​ပြုလုပ်​ခဲ့​သော​အမှုသည် အဘယ်ကြောင့် အထူး​အဓိပ္ပာယ်​ရှိ​သနည်း။

^၃ စီ.အီး. ၃၃၊ နိသန်လ ၁၄ ရက်​ည​တွင် ယေရှု​ခရစ်​၏ လုပ်ဆောင်ချက်​သည် ကိုယ်တော်​၏​အသက်တာတွင် အမှတ်မထင်​ပြု​ခဲ့​သည့်​အမှု​မျှ မဟုတ်​ချေ။ တမန်​တော်​ပေါလု​သည် နောင်​အနှစ် ၂၀ ကျော်​အထိ ထို​ပုံစံ​အတိုင်း​ပြုမူ​နေ​သေး​သည့် ကောရိန္သု​မြို့မှ ဝိညာဉ်​တော်​ဖွား​ခရစ်ယာန်​များ​ထံ စာရေး​စဉ် ယင်း​အကြောင်းကို ဆွေးနွေး​ခဲ့​သည်။ စီ.အီး. ၃၃ ၌​ယေရှု​နှင့် တမန်​တော် ၁၁ ပါး​တို့​အလယ်တွင် ပေါလု​မရှိခဲ့​သော်လည်း ထို​အချိန်​အခါ​က အဖြစ်အပျက်​ကို တမန်​တော်​အချို့​ထံ​မှ သူ​ကြားသိ​ခဲ့​ရ​ပုံ​ရှိသည်။ ထို့​ပြင် ၎င်း​အဖြစ်အပျက် အမှန်တကယ်​ဖြစ်ပျက်​ခဲ့​ကြောင်း ဘုရားသခင့်​တန်ခိုးတော်​ဖြင့် ပေါလု​သိရှိ​ခဲ့​ရ​ကြောင်း ထင်ရှား​၏။ ပေါလု​က ဤသို့​ဆို​သည်– “သင်တို့၌ ငါ​အပ်ပေး​သော​အရာ​ကို  သခင်​ဘုရားထံ​၌ ငါ​ခံရ​ပြီ။ ခံရ​သော​အရာ​ဟူ​မူ​ကား၊ သခင်​ယေရှုသည် ရန်သူ​လက်​သို့ အပ်နှံခြင်း​ကို​ခံ​သော​နေ့​ည​မှာ မုန့်ကို​ယူ၍ ကျေးဇူးတော်​ကို ချီးမွမ်း​ပြီး​မှ မုန့်ကို​ဖဲ့၍ ‘ဤ​မုန့်​ကား သင်တို့​အဖို့​အလို​ငှာ ချိုးဖဲ့​သော ငါ​၏​ကိုယ်​ဖြစ်၏။ ယူ၍​စား​ကြလော့။ ငါ့ကို​အောက်မေ့​ဖို့​ရာ ဤသို့​ပြု​ကြလော့’ ဟု​မိန့်တော်မူ၏။ ထို​နည်းတူ ညစာ​စား​ပြီး​မှ ခွက်​ကိုလည်း​ယူ၍ ‘ဤ​ခွက်​ကား ငါ​၏​အသွေး​၌​တည်​သော ပဋိညာဉ်တရား​သစ်​ဖြစ်၏။ ဤ​ခွက်​ကို သောက်​သောအခါ​ခါ၊ ငါ့ကို​အောက်မေ့​ဖို့​ရာ သောက်​ကြလော့’ ဟု​မိန့်တော်မူ၏။”—၁ ကောရိန္သု ၁၁:၂၃-၂၅။

၄။ သခင့်​ညစာ​စားပွဲ​ကို ခရစ်ယာန်​များ အဘယ်ကြောင့် ကျင်းပ​သင့်​သနည်း။

^၄ “ငါ့ကို​အောက်မေ့​ဖို့​ရာ ဤသို့​ပြု​ကြလော့” ဟူ၍ ယေရှု​မိန့်မှာ​ခဲ့​ကြောင်း ခရစ်ဝင်​ကျမ်း​ရေးသူ လုကာ​က​လည်း ထောက်ခံ​ပြောဆို​သည်။ (လုကာ ၂၂:၁၉) အဆိုပါ​စကား​များ​ကို ဤသို့​လည်း ပြန်ဆို​ကြသည်– “ငါ့ကို​သတိရခြင်း​ငှာ ဤသို့​ပြု​ကြလော့။” (သ​မ) “ငါ့ကို​အောက်မေ့​သတိရ​ရန် ဤသို့​ပြု​ကြလော့။” (သတင်းကောင်း) အမှန်​မှာ ဤ​ပွဲတော်​ကို ခရစ်တော်​၏​သေခြင်း အောက်မေ့ရာပွဲ​တော်​ဟု ရည်ညွှန်းလေ့​ရှိကြသည်။ ဤ​ပွဲတော်​ကို ည​တွင် အစပြု​ကျင်းပ​ခဲ့​သောကြောင့် သခင့်​ညစာ​စားပွဲ​ဟု ပေါလု​ခေါ်ဆို​ခဲ့​ခြင်း​သည်လည်း လျောက်ပတ်​ပေ​၏။ (၁ ကောရိန္သု ၁၁:၂၀) သခင့်​ညစာ​စားပွဲ​ကို ကျင်းပ​ရမည်ဟု ခရစ်ယာန်​များ​အား မိန့်မှာ​ထား​သည်။ သို့သော် ဤ​ပွဲတော်​ကို အဘယ်ကြောင့် အစပြု​ကျင်းပ​ခဲ့​ကြ​ရသနည်း။

ပွဲတော်​ကို အစပြု​ကျင်းပ​ခဲ့​ရသည့်​အကြောင်းရင်း

၅၊ ၆။ (က) အောက်မေ့ရာပွဲ​တော်​ကို ယေရှု အစပြု​ကျင်းပ​ရသည့် အကြောင်းရင်း​တစ်ခု​ကား အဘယ်နည်း။ (ခ) သခင့်​ညစာ​စားပွဲ အစပြု​ကျင်းပ​ခဲ့​ရသည့်​အကြောင်းရင်း နောက်တစ်ခု​ကို ဖော်ပြ​ပါ။

^၅ အောက်မေ့ရာပွဲကို အစပြု​ကျင်းပ​ခဲ့​ရသည့် အကြောင်းရင်း​တစ်ခု​မှာ ယေရှု၏​သေခြင်း​ကြောင့် ဖြစ်မြောက်​ခဲ့​သည့် ရည်ရွယ်ချက်​တစ်ခု​နှင့် ပတ်သက်​သည်။ ကိုယ်တော်​သည် ကောင်းကင်​ခမည်းတော်​၏ ပိုင်သ​အုပ်စိုးမှု​ကို ထောက်ခံသူ​တစ်ဦး​အဖြစ် သေဆုံး​ခဲ့​သည်။ ဤနည်းဖြင့် ကိုယ်ကျိုး​အတွက်သာ ဘုရားသခင်​ကို လူ​တို့​ကိုးကွယ်​ကြသည်​ဟု မဟုတ်မမှန်​စွပ်စွဲ​ပြောဆို​ခဲ့​သူ စာတန်​ကို မုသာကောင်​အဖြစ် ခရစ်တော် သက်သေထူ​ခဲ့​၏။ (ယောဘ ၂:၁-၅) ယေရှု တည်ကြည်​စွာ သေဆုံး​ခဲ့​ခြင်း​က ဤ​စွပ်စွဲချက် မှား​ကြောင်း သက်သေထူ​ပြီး ယေဟောဝါ​၏​စိတ်တော်​ကို ရွှင်လန်း​စေ​ခဲ့​သည်။—သု. ၂၇:၁၁။

^၆ သခင့်​ညစာ​စားပွဲ​ကို အစပြု​ကျင်းပ​ရခြင်း​၏ အကြောင်းရင်း​နောက်တစ်ခု​မှာ ယေရှုသည် စုံလင်​ပြီး အပြစ်ကင်း​သော လူသား​တစ်ဦး​အဖြစ် အသေခံ​ခြင်း​အားဖြင့် “အသက်ကို​စွန့်​၍ လူများ​ကို​ရွေး” ခဲ့​ကြောင်း ကျွန်ုပ်​တို့ကို သတိရ​စေရန်​ဖြစ်သည်။ (မဿဲ ၂၀:၂၈) ပထမ​လူသား​သည် ဘုရားသခင်​ကို ပြစ်မှား​လိုက်​သောအခါ သူသည် စုံလင်သော​လူ့​အသက်တာ​အပြင် ၎င်းနှင့်​ဆိုင်သော အလားအလာ​ရှိသမျှ​တို့ကို လက်လွှတ်​ဆုံးရှုံး​ခဲ့​သည်။ သို့သော် ယေရှု​က ‘ဘုရားသခင်​၏​သားတော်ကို ယုံကြည်​သော​သူအပေါင်း​တို့သည် ပျက်စီးခြင်း​သို့​မ​ရောက်၊ ထာဝရ​အသက်ကို ရစေ​ခြင်း​ငှာ၊ ဘုရားသခင်​သည် မိမိ​၌​တစ်ပါး​တည်း​သော​သားတော်ကို စွန့်​တော်​မူ​သည်​တိုင်အောင် လောကသား​တို့ကို ချစ်တော်မူ​၏’ ဟု​မိန့်ဆိုခဲ့သည်။ (ယောဟန် ၃:၁၆) မှန်ပါသည်၊ “အပြစ်​တရား​၏​အ​ခ​ကား သေခြင်း​ပေ​တည်း။ ဘုရားသခင်​ပေး​တော်​မူ​သော ဆုကျေးဇူး​တော်​ကား ငါ​တို့​သခင်​ယေရှု​ခရစ်​အားဖြင့် ထာဝရ​အသက်​ပေ​တည်း။” (ရောမ ၆:၂၃) သခင့်​ညစာ​စားပွဲ​ကျင်းပ​ခြင်း​က ယေရှု၏​ပူဇော်ရာ​သေခြင်းနှင့်​ဆက်စပ်​၍ ယေဟောဝါ​နှင့် ကိုယ်တော်​၏​သားတော်​တို့ ပြသ​ခဲ့​ကြသော ကြီးမား​သည့်​မေတ္တာတော်ကို ကျွန်ုပ်​တို့အား သတိရ​မှတ်မိ​စေ​သည်။ ထို​မေတ္တာတော်ကို ကျွန်ုပ်​တို့ အမှန်တကယ်​ကျေးဇူး​တင်​သင့်​သည်​တကား!

ပွဲတော်​ကို မည်သည့်​အချိန်တွင် ကျင်းပ​သင့်​သနည်း

၇။ ဝိညာဉ်​တော်​ဖွား ခရစ်ယာန်​များသည် အောက်မေ့ရာပွဲ​အထိမ်းအမှတ်​များ​ကို မည်သို့ “အခါခါ” စားသုံး​ကြ​သနည်း။

^၇ သခင့်​ညစာ​စားပွဲ​နှင့် စပ်လျဉ်း၍ ပေါလု​က “သင်တို့သည် ထို​မုန့်ကို​စား၍ ထို​ခွက်​ကို သောက်​သောအခါ​ခါ သခင်​ဘုရား​အသေခံ​တော်​မူ​ခြင်း​ကို ကြွလာ​တော်​မ​မူ​မီ​တိုင်အောင်​ပြု​ကြ​၏” ဟု​ပြော​ခဲ့​သည်။ (၁ ကောရိန္သု ၁၁:၂၆) ဝိညာဉ်​တော်​ဖွား​ခရစ်ယာန်​တစ်ဦးချင်း​စီ​သည် သေ​သည့်​တိုင် အောက်မေ့ရာပွဲ​အထိမ်းအမှတ်​များ​ဖြစ်သော မုန့်​နှင့်​စပျစ်​ရည်​ကို သုံးဆောင်​ကြလိမ့်မည်။ ဤနည်းဖြင့် ယေဟောဝါ​ဘုရားသခင်​နှင့် လောကသား​များ ရှေ့မှောက်​တွင် သူတို့သည် ဘုရားသခင်​စီစဉ်​ထား​သည့် ယေရှု၏​ရွေးနုတ်ဖိုး​ပူဇော်ရာ​ယဇ်ကို ယုံကြည်​ကြောင်း ထပ်ခါတလဲ​လဲ​ဖော်ပြ​ကြလိမ့်မည်။

၈။ ဝိညာဉ်​တော်​ဖွား​အဖွဲ့​သည် သခင့်​ညစာ​စားပွဲ​ကို မည်မျှ​ကြာကြာ ကျင်းပ​ကြ​ရမည်​နည်း။

^၈ ဝိညာဉ်​တော်​ဖွား ခရစ်ယာန်​များသည် ခရစ်တော်​၏​သေခြင်း အောက်မေ့ရာပွဲကို မည်မျှ​ကြာကြာ ကျင်းပ​ကြ​ရမည်​နည်း။ ယေရှု “ကြွလာ​တော်​မ​မူ​မီ​တိုင်အောင်” ဟု​ပေါလု​ပြောဆို​ခဲ့​ခြင်း​မှာ ကိုယ်တော် “ကြွလာ [“ရောက်ရှိ၊” က​ဘ]” ချိန်​အတွင်း ရှင်ပြန်ထမြောက်​စေခြင်း​အားဖြင့် ကောင်းကင်​သို့ ကိုယ်တော်​၏​ဝိညာဉ်​တော်​ဖွား​နောက်လိုက်​များ​ကို ခေါ်တော်မူ​သည့်​အချိန်တိုင်​အောင် အဆိုပါ​ပွဲတော်​ကို ဆက်​ကျင်းပ​သွား​ကြ​ရ​လိမ့်​မည်​ဟု ဆိုလို​နေခြင်း​ဖြစ်သည်။ (၁ သက်သာလောနိတ် ၄:၁၄-၁၇၊ က​ဘ) ယင်းသည် တည်ကြည်သော​ တမန်​တော် ၁၁ ပါး​ကို ယေရှု​မိန့်ဆိုခဲ့​သည့် ဤ​စကား​များနှင့်​လည်း ကိုက်ညီ​ပါ​သည်– “ငါသည်​သွား​၍ သင်တို့​နေစရာ​အရပ်​ကို ပြင်ဆင်​ပြီး​မှ တစ်ဖန်​လာ​ပြန်၍ ငါ​ရှိရာ​အရပ်၌ သင်တို့​ရှိစေ​ခြင်း​ငှာ သင်တို့ကို ငါ့​ထံ​သို့ သိမ်းဆည်း​မည်။”—ယောဟန် ၁၄:၃။

၉။ မာကု ၁၄:၂၅ တွင်​မှတ်တမ်း​တင်ထားသော ယေရှု​စကား​၏​အဓိပ္ပာယ်​ကား အဘယ်နည်း။

 ^၉ ယေရှုသည် အောက်မေ့ရာပွဲကို အစပြု​ကျင်းပ​ခဲ့​သောအခါ စပျစ်​ရည်​ခွက်​ကို ရည်ညွှန်း​၍ “ဤ​စပျစ်​ရည်​မျိုး​အသစ်​ကို ဘုရားသခင်​၏​နိုင်ငံတော်​၌ ငါ​မ​သောက်​မီ​နေ့​တိုင်အောင် ယခု​မှ​စ၍ တစ်ဖန်​ငါ​မ​သောက်​ရ” ဟု​တည်ကြည်သော တမန်​တော်​များ​အား မိန့်ဆိုခဲ့​၏။ (မာကု ၁၄:၂၅) ယေရှုသည် ကောင်းကင်​တွင် ပကတိ​စပျစ်​ရည်​ကို သောက်​လိမ့်​မည်​မဟုတ်သည့်​အတွက် စပျစ်​ရည်​ဖြင့် တစ်ခါတစ်ရံ ပုံဆောင်​သည့် ရွှင်လန်းမှု​ကို ကိုယ်တော်​ရည်ညွှန်း​နေကြောင်း ထင်ရှား​ပါ​သည်။ (ဆာလံ ၁၀၄:၁၅; ဒေ. ၁၀:၁၉) ဘုရားသခင့်​နိုင်ငံတော်​တွင် အတူတကွ​ရှိနေခြင်း​သည် ဝမ်းသာ​အားရစရာ​အချိန် ဖြစ်ပါ​လိမ့်​မည်၊ ၎င်းကို ကိုယ်တော်​နှင့် ကိုယ်တော်​၏​ခြေရာ​ကို လိုက်လျှောက်​ကြသော နောက်လိုက်​များ မျှော်လင့်​တောင့်တ​ခဲ့​ကြ​၏။—ရောမ ၈:၂၃; ၂ ကောရိန္သု ၅:၂။

၁၀။ အောက်မေ့ရာပွဲကို အကြိမ်​မည်မျှ ကျင်းပ​သင့်​သနည်း။

^၁၀ ယေရှု၏​သေခြင်း​အောက်မေ့ရာပွဲကို လစဉ်၊ အပတ်စဉ် သို့​မဟုတ် နေ့စဉ်​ပင် ကျင်းပ​သင့်​သလော။ မ​ကျင်းပ​သင့်​ချေ။ ဘီ.စီ.အီး. ၁၅၁၃ ခုနှစ်​တွင် အီဂျစ်​ကျွန်​အဖြစ်​မှ ဣသရေလ​လူမျိုး လွတ်မြောက်ခြင်း​ကို “အောက်မေ့​စ​ရာ​ဖို့” ကျင်းပ​ခဲ့​သော ပသခါပွဲ​နေ့၌​ပင် ယေရှုသည် သခင့်​ညစာ​စားပွဲ​ကို အစပြု​ကျင်းပ​ခဲ့​ပြီး အသတ်ခံခဲ့ရ​၏။ (ထွက်မြောက်ရာ ၁၂:၁၄) ပသခါပွဲ​ကို ဂျူး​ပြက္ခဒိန်​အရ နိသန်လ ၁၄ ရက်​နေ့တွင် တစ်နှစ်​လျှင် တစ်ကြိမ်​သာ ကျင်းပ​ကြသည်။ (ထွက်မြောက်ရာ ၁၂:၁-၆; ဝတ်ပြုရာ ၂၃:၅) ယင်းကို​ထောက်၍ ယေရှု​သေခြင်း​အောက်မေ့ရာပွဲကို လစဉ်၊ အပတ်စဉ်၊ သို့​မဟုတ် နေ့စဉ်​မ​ကျင်းပ​သင့်​ဘဲ ပသခါပွဲ​နည်းတူ တစ်နှစ်​လျှင် တစ်ကြိမ်​သာ ကျင်းပ​သင့်​၏။

၁၁၊ ၁၂။ အစောပိုင်း​တွင် အောက်မေ့ရာပွဲ​ကျင်းပ​ခြင်း​နှင့်​ပတ်သက်​၍ သမိုင်းက အဘယ်အရာ ဖော်ပြ​သနည်း။

^၁၁ သို့​ဆိုလျှင် အောက်မေ့ရာပွဲကို နှစ်စဉ် နိသန်လ ၁၄ ရက်​နေ့တွင် ကျင်းပ​ခြင်း​သည် လျောက်ပတ်​ပေ​၏။ အကိုးအကား​စာအုပ်​တစ်အုပ်​က ဤသို့​ဆို​၏– “အာရှမိုင်းနား​ရှိ ခရစ်ယာန်​များသည် ပါစကာ [သခင့်​ညစာ​စားပွဲ] ကို နိသန်လ ၁၄ ရက်​နေ့တွင် ကျင်းပ​လေ့​ရှိ​ခြင်း​ကြောင့် သူတို့ကို ကွာ​တို​ဒက်​စ​မ​န်စ် [ဆ​ယ့်​လေး​ရက်​သမားများ] ဟု​ခေါ်​ခဲ့​ကြသည်။ . . . ထို​နေ့ရက်​သည် သောကြာ​နေ့ သို့​မဟုတ် ရက်သတ္တပတ်​၏​တခြား​တစ်နေ့​နေ့တွင် ကျရောက်​နိုင်​ပါ​သည်။”—ဘာသာရေး​အသိပညာ​ဆိုင်ရာ သည်​န​ယူး​ရှ​ဖ်​အက်​စော့ဖ်​စွယ်စုံ​ကျမ်း၊ အတွဲ ၄၊ စာမျက်နှာ ၄၄။

^၁၂ စီ.အီး. ဒုတိယ​ရာစုနှစ် အလေ့အထ​ကို မှတ်ချက်ချ​ရာ​တွင် သမိုင်း​ပညာရှင် ဂျေ. အယ်​လ်. ဗွန် မို​ရှိ​မ်း​က ကွာ​တို​ဒက်​စ​မ​န်စ်​များသည် “ခရစ်တော်​၏ ပုံသက်သေ​ကို ပညတ်တရား​တစ်ရပ်​၏ အခွင့်အာဏာကို ပိုင်ဆိုင်​ထား​ရာ​အဖြစ် ယူမှတ်​ကြ” သောကြောင့် နိသန်လ ၁၄ ရက်​နေ့တွင် အောက်မေ့ရာပွဲ ကျင်းပ​ခဲ့​ကြသည်​ဟု​ဆို​၏။ သမိုင်း​ပညာရှင်​နောက်​တစ်ဦး​က ဤသို့​ဆို​သည်– “အာရှရှိ ကွာ​တို​ဒက်​စ​မ​န်စ်​ချာ့ခ်ျ​များ​၏ အလေ့အထ​သည် ယေရုရှလင်​ချာ့ခ်ျ​၏​အလေ့အထ​နှင့် တစ်​ပုံစံ​တည်း​ဖြစ်၏။ ဒုတိယ​ရာစုနှစ်​၌ အဆိုပါ​ချာ့ခ်ျ​များ​က နိသန်လ ၁၄ ရက်​နေ့တွင်​ကျင်းပ​သော ပါစကာ​ပွဲ​တွင် ခရစ်တော်​၏​သေခြင်း​ဖြင့် စတင်​ခဲ့​သော ပြန်လည်​ရွေးခြင်း​အထိမ်းအမှတ်ပွဲ​ကို ကျင်းပ​ကြသည်။”—စ​တတ်​ဒ်​ယား ပါ​ထ​ရီ​စ်​တီ​ကာ၊ အတွဲ ၅၊ ၁၉၆၂၊ စာမျက်နှာ ၈။

မုန့်​ပုံဆောင်ချက်

၁၃။ သခင့်​ညစာ​စားပွဲ​ကို အစပြု​ကျင်းပ​သောအခါ မည်သည့်​မုန့်​မျိုးကို ယေရှု အသုံးပြု​ခဲ့​သနည်း။

^၁၃ ယေရှုသည် အောက်မေ့ရာပွဲကို အစပြု​ကျင်းပ​သောအခါ “မုန့်ကို​ယူ၍ ကျေးဇူးတော်​ကို ချီးမွမ်း​ပြီး​မှ မုန့်ကို​ဖဲ့၍ . . . [တမန်​တော်​များ] အားပေး​တော်​မူ​၏။” (မာကု ၁၄:၂၂) ထို​အချိန်တွင် အသုံးပြု​ခဲ့​သော​မုန့်​သည် ပသခါပွဲ​၌ အသုံးပြုပြီး​ခါ​စ​ဖြစ်သည့် မုန့်​ပင်​ဖြစ်၏။ (ထွက်မြောက်ရာ ၁၃:၆-၁၀) ၎င်း​သည် တဆေးမဲ့​မုန့်​ဖြစ်​သဖြင့် သိပ်​မ​ထူ​ဘဲ ကြွပ်ဆတ်​နေ​ကာ မုန့်ကို​ဝေ​ရန် ချိုးဖဲ့​ခဲ့​ရ၏။ ယေရှုသည် ထောင်နှင့်ချီ​သော​လူ​တို့အတွက် အံ့ဖွယ်​နည်းဖြင့် မုန့်ကို​ပွား​စေ​၍ ကျွေးမွေး​ခဲ့​သောအခါ ထို​မုန့်​သည်လည်း ကြွပ်ဆတ်​သော​မုန့်​ဖြစ်၏၊ အကြောင်း​မှာ ကိုယ်တော်​သည် မုန့်ကို​ချိုးဖဲ့​၍ ဝေပေး​ခဲ့​သည်။ (မဿဲ ၁၄:၁၉; ၁၅:၃၆) ထို့​ကြောင့် အောက်မေ့ရာပွဲ​တော်​မုန့်ကို ချိုးဖဲ့ခြင်း​၌ ဝိညာဉ်​ရေး​ပုံဆောင်ချက်​မရှိကြောင်း ထင်ရှား​ပါ​သည်။

၁၄။ (က) အောက်မေ့ရာပွဲ​တော်​မုန့်​သည် တဆေးမဲ့​မုန့်​ဖြစ်​ရခြင်း​မှာ အဘယ်ကြောင့် သင့်လျော်​သနည်း။ (ခ) သခင့်​ညစာ​စားပွဲ​တွင် အသုံးပြုရန် အဘယ်​မုန့်​မျိုးကို ရယူ သို့​မဟုတ် ဖုတ်​နိုင်​သနည်း။

^၁၄ အောက်မေ့ရာပွဲကို အစပြု​ကျင်းပ​ချိန်​တွင် အသုံးပြု​ခဲ့​သော မုန့်​နှင့်​ပတ်သက်​၍ ယေရှု​က “ဤ​မုန့်​ကား သင်တို့​အဖို့​အ​လို့​ငှာ ချိုးဖဲ့​သော ငါ​၏​ကိုယ်​ဖြစ်၏” ဟု​မိန့်ဆိုခဲ့သည်။ (၁ ကောရိန္သု ၁၁:၂၄; မာကု ၁၄:၂၂) ထို​မုန့်​သည် တဆေးမဲ့​မုန့်​ဖြစ်နေ​ခြင်း​မှာ အပ်စပ်​၏။ အဘယ်ကြောင့်​နည်း။ အကြောင်း​မှာ တဆေး​ကို မကောင်းမှု၊ ဆိုးညစ်မှု၊ အပြစ်​တို့​နှင့် အမှတ်သညာ​ပြု​နိုင်​သည်။ (၁ ကောရိန္သု ၅:၆-၈) ထို​မုန့်​သည် ရွေးနုတ်ဖိုး​ပူဇော်ရာ​ယဇ်​အဖြစ် သင့်လျော်​စွာ ဆက်သ​ခဲ့​သည့် ယေရှု၏ စုံလင်​၍​အပြစ်ကင်း​သော လူ့​ကိုယ်ခန္ဓာ​ကို ကိုယ်စား​ပြု​သည်။ (ဟေဗြဲ ၇:၂၆; ၁၀:၅-၁၀) ယေဟောဝါသက်သေ​များသည် ယင်းကို စိတ်​စွဲမှတ်​ထားပြီး အောက်မေ့ရာပွဲ​တော် ကျင်းပ​ချိန်​များ​တွင် ယေရှု​ချမှတ်​ခဲ့​သော ပုံသက်သေ​ကို​လိုက်လျှောက်​၍ တဆေးမဲ့​မုန့်ကို အသုံးပြု​ကြသည်။ တစ်ခါတစ်ရံ ကြက်သွန်နီ၊ ကြက်​ဥ​စ​သည့် အမည်​ပစ္စည်း​များ​မပါ​သည့် မက်​ဇို​ခေါ် ဂျူး​တဆေးမဲ့​မုန့်ကို သူတို့​အသုံးပြု​ကြသည်။ သို့​မဟုတ်လျှင် တဆေးမဲ့​မုန့်ကို (ဂျုံ​ရနိုင်​သည့်​နေရာတွင်)  ဂျုံကြမ်း​အနည်းငယ်​နှင့် ရေ​ရော​၍ ပြုလုပ်​နိုင်​သည်။ မုန့်​စိမ်း​ကို ပါး​ပါး​လှိမ့်​ပြီး ဆီ​အနည်းငယ်​လူး​ထားသော ဒယ်ပြား​ပေါ်​တွင် ခြောက်သွေ့​၍ ကြွ​ပ်​သည့်​အထိ ဖုတ်​နိုင်​သည်။

စပျစ်​ရည်​ပုံဆောင်ချက်

၁၅။ ခရစ်တော်​သည် မိမိ၏​သေခြင်း အောက်မေ့ရာပွဲကို အစပြု​ကျင်းပ​ခဲ့​သောအခါ ကိုယ်တော်​အသုံးပြုသည့်​ခွက်​တွင် အဘယ်အရာ​ရှိ​သနည်း။

^၁၅ တဆေးမဲ့​မုန့်ကို လက်ဆင့်ကမ်း​ပြီး​နောက် ယေရှုသည် ခွက်​ကို​ယူ၍ “ကျေးဇူးတော်​ချီးမွမ်း​ပြီး​မှ [တမန်​တော်​များ] အားပေး​တော်​မူလျှင် ထို​သူ​ရှိသမျှ​တို့သည် သောက်​ကြ​၏။” ယေရှု​က “ဤ​ခွက်​ကား ‘ပဋိညာဉ်တရား​သစ်’ နှင့်​ဆိုင်၍ လူများ​အဖို့​အ​လို့​ငှာ​သွန်း​သော ငါ​၏​အသွေး​ဖြစ်၏” ဟု​မိန့်တော်မူ​ခဲ့​သည်။ (မာကု ၁၄:၂၃၊ ၂၄) ခွက်​ထဲ​တွင် အဘယ်အရာ​ရှိ​သနည်း။ က​စော်​မ​ပေါက်​သေး​သော စပျစ်​ရည်​မဟုတ်ဘဲ က​စော်​ပေါက်​ပြီး​သော ဝိုင်​ဖြစ်သည်။ သမ္မာကျမ်းစာ​က ဝိုင်​ဟု​ဆို​သည့်​အခါ က​စော်​မ​ပေါက်​သေး​သော စပျစ်​ရည်​ကို ဆိုလို​နေခြင်း​မဟုတ်ပါ။ ဥပမာ၊ ယေရှု​မိန့်ဆိုခဲ့​သည့်​အတိုင်း စပျစ်​ရည်​မဟုတ်ဘဲ က​စော်​ပေါက်​ပြီး​သား​ဝိုင်​သည် “ဟောင်း​သော​သားရေ​ဘူး” ကို​စုတ်ကွဲ​သွား​စေနိုင်​၏။ ထို့​ပြင် ခရစ်တော်​၏​ရန်သူများ​က​လည်း ကိုယ်တော်​သည် “စပျစ်​ရည်​သောက်ကြူး​သော​သူ” ဖြစ်သည်ဟု​စွပ်စွဲ​ကြသည်။ ထို​ဝိုင်​သည် စပျစ်​ရည်​မျှ​သာ​ဖြစ်​ခဲ့​မည်​ဆိုလျှင် ထိုသို့​စွပ်စွဲ​ခြင်း​သည် အဓိပ္ပာယ်​ရှိ​မည်​မဟုတ်ပေ။ (မဿဲ ၉:၁၇; ၁၁:၁၉၊ သ​မ) ပသခါပွဲ​ကျင်းပ​စဉ် ဝိုင်​သောက်​လေ့​ရှိပြီး ခရစ်တော်​သည် မိမိ၏​သေခြင်း အောက်မေ့ရာပွဲကို အစပြု​ကျင်းပ​သောအခါ ထို​ဝိုင်ကို အသုံးပြု​ခဲ့​၏။

၁၆၊ ၁၇။ အောက်မေ့ရာပွဲ​တော်​အတွက် မည်သည့်​ဝိုင်​အမျိုးအစား​သည် သင့်လျော်​သနည်း၊ အဘယ်ကြောင့်​နည်း။

^၁၆ ဝိုင်​အ​နီ​သာ​လျှင် ခွက်​ထဲ​ရှိ​အရာ ပုံဆောင်​သော ယေရှု​သွန်းလောင်း​သော​အသွေး​၏ ဆီလျော်​သော အထိမ်းအမှတ်​ဖြစ်သည်။ ယေရှု​ကိုယ်တော်တိုင် ဤသို့​မိန့်ဆိုခဲ့သည်– “ဤ​ခွက်​ကား ‘ပဋိညာဉ်တရား​သစ်’ နှင့်​ဆိုင်၍ လူများ​အဖို့​အ​လို့​ငှာ​သွန်း​သော ငါ​၏​အသွေး​ဖြစ်၏။” ထို့​ပြင် တမန်​တော်​ပေတရု​က​လည်း ဤသို့​ရေးသားခဲ့​သည်– “မိ​စဉ်​ဘ​ဆက်​ကျင်လည်​သော အချည်းနှီး​ကျင့်ကြံ​ပြုမူခြင်း​မှ ရွှေငွေ​အစ​ရှိသော ဖောက်ပြန်​ပျက်စီး​တတ်သော ဥစ္စာ​နှင့် သင်တို့ [ဝိညာဉ်​တော်​ဖွား​ခရစ်ယာန်​များ] ကို​ရွေးတော်မူ​သည်မဟုတ်။ အဘယ်​အပြစ်​မျှ​မရှိ၊ အညစ်အကြေး​နှင့်​ကင်းစင်​သော သိုးသငယ်​ကဲ့သို့​သော ခရစ်တော်​၏​အသွေးတော်မြတ်​နှင့် ရွေးတော်မူ​သည်ကို သိမှတ်​ကြလော့။”—၁ ပေတရု ၁:၁၈၊ ၁၉။

^၁၇ အောက်မေ့ရာပွဲကို အစပြု​ကျင်းပ​ခဲ့​ချိန်​က ယေရှု​အသုံးပြု​ခဲ့​သော ဝိုင်​သည် အနီရောင်​စပျစ်​ဝိုင်​ဖြစ်​မည်​မှာ သေချာ​၏။ သို့သော် ယခု​ခေတ် အနီရောင်​ဝိုင်​အချို့​တွင် ဘ​ရန်​ဒီ​စ​သည့်​အရက်​တစ်မျိုး​မျိုး ရောစပ်​ထားခြင်း၊ သို့​မဟုတ် ဆေးပင်​နှင့် အမွှေးအကြိုင်​များ ထည့်​ထားခြင်း​တို့​ကြောင့် ၎င်းတို့ကို အသုံးမပြု​နိုင်​ပေ။ ယေရှု၏​အသွေး​သည် လိုအပ်​သည့်​အရည်အသွေး​နှင့်​ပြည့်စုံ​ရာ အဘယ်အရာကို​မျှ ထပ်​ထည့်​စ​ရာ​မလို​ပေ။ ထို့​ကြောင့် ဤသို့​ရောစပ်​ထား​သည့် ပေါ့​တ်၊ ရှယ်​ရီ​နှင့် ဗာ​မော့​သ်​အစ​ရှိသော ဝိုင်​များ​ကို အသုံးမပြု​နိုင်​ပေ။ အောက်မေ့ရာပွဲ​တော်​ခွက်​တွင် သကြား​မပါ၊ အခြား​အဘယ်အရာမျှ​မ​ရော​ထားသော ဝိုင်​စစ်စစ်​သာ​ရှိ​သင့်​သည်။ အိမ်တွင်းဖြစ် သကြား​မပါ​သော စပျစ်​ဝိုင်၊ အနီရောင်​ဘာ​ဂ​န်​ဒီ​နှင့် ခ​လဲ​ရ​တ်​ကဲ့သို့​သော ဝိုင်​များ​ကိုလည်း အသုံးပြုနိုင်​၏။

၁၈။ ယေရှုသည် အောက်မေ့ရာပွဲ​တော်​မုန့်​နှင့် ဝိုင်ကို အံ့ဖွယ်​နည်းဖြင့် အဘယ်ကြောင့် မပြောင်းလဲ​ခဲ့​သနည်း။

^၁၈ ဤ​ပွဲတော်​ကို ယေရှု​အစပြု​ကျင်းပ​သောအခါ ကိုယ်တော်​သည် အံ့ဖွယ်အမှု​ကို​ပြုပြီး အထိမ်းအမှတ်​အဖြစ် အသုံးပြု​သော မုန့်​နှင့်​စပျစ်​ရည်​ကို မိမိ၏​ပကတိ​အသွေးအသား​အဖြစ်သို့ မပြောင်းလဲ​ခဲ့​ချေ။ လူသား​စားခြင်း၊ လူ​သွေး​သောက်​ခြင်း​သည် ဘုရားသခင့်​ပညတ်တရား​ကို ချိုးဖောက်​ခြင်း​ဖြစ်သည်။ (ကမ္ဘာဦး ၉:၃၊ ၄; ဝတ်ပြုရာ ၁၇:၁၀) ထို​နေ့​ညနေခင်း​တွင် ယေရှု၏​ပကတိ​အသွေးအသား​အားလုံး ရှိနေသေး​၏။ ကိုယ်တော်​သည် မိမိ၏​ကိုယ်ခန္ဓာ​ကို စုံလင်သော​ပူဇော်ရာ​ယဇ်​အဖြစ် ဆက်သ​ပြီး ကိုယ်တော်​၏​အသွေးကို ဂျူး​တို့၏​နိသန်လ ၁၄ ရက် မွန်းလွဲပိုင်း​အချိန်တွင် သွန်းလောင်းခဲ့​သည်။ ထို့​ကြောင့် အောက်မေ့ရာပွဲ​တော်​၏​အထိမ်းအမှတ်​များ​ဖြစ်သော မုန့်​နှင့် ဝိုင်​သည် ခရစ်တော်​၏​အသွေး​နှင့်​အသားကို တင်စား​၏။ *

 အောက်မေ့ရာပွဲ​တော်—မိတ်သဟာယ​စားပွဲ

၁၉။ သခင့်​ညစာ​စားပွဲ​တွင် ပန်းကန်ပြား​တစ်ချပ်​နှင့် ခွက်​တစ်လုံးတည်း​ထက်မက အဘယ်ကြောင့် အသုံးပြုနိုင်​သနည်း။

^၁၉ အောက်မေ့ရာပွဲကို ယေရှု​အစပြု​ကျင်းပ​သောအခါ ကိုယ်တော်​၏​တည်ကြည်သော​တမန်​တော်​များ​ကို ခွက်​တစ်ခွက်​တည်း​မှ သောက်​စေ​ခဲ့​သည်။ မဿဲ​၏​ခရစ်ဝင်​ကျမ်း​က ဤသို့​ဆို​၏– “[ယေရှုသည်] ခွက်​ကိုလည်း​ယူ၍ ကျေးဇူးတော်​ကို ချီးမွမ်း​ပြီး​မှ သူတို့အား ပေး​တော်​မူ​၍ ‘သင်တို့​ရှိသမျှသည် သောက်​ကြလော့။’” (မဿဲ ၂၆:၂၇) ထို​အချိန်​က စားပွဲ​တစ်လုံးတည်း​တွင် လူ ၁၁ ဦး​သာ ပါဝင်​စားသုံး​ခဲ့​သောကြောင့် ခွက်​အများ​ကို အသုံးမပြု​ဘဲ “ခွက်” တစ်ခွက်​တည်း​ကို​သာ အသုံးပြုပြီး လက်ဆင့်ကမ်း​ပေး​ခဲ့​ခြင်း​သည် အခက်အခဲ​မရှိပေ။ ဤ​နှစ်​တွင် လူ​သန်းပေါင်း​များစွာ​သည် ကမ္ဘာ​တစ်ဝန်း​ရှိ ယေဟောဝါသက်သေ​များ​၏ အသင်းတော် ၉၄,၀၀၀ ကျော်​တွင် သခင့်​ညစာ​စားပွဲ​ကို​ကျင်းပ​ဖို့ စုဝေး​လာ​ကြလိမ့်မည်။ တစ်ည​တည်း​တွင်​ပင် ပွဲတော်​ကို​ကျင်းပ​ဖို့ ဤမျှ​များပြား​သော​သူတို့ စုဝေး​လာ​ကြ​မည်​ဖြစ်​ရာ အားလုံး​အတွက် ခွက်​တစ်ခွက်​တည်း​ကို​သာ အသုံးပြုနိုင်​မည်​မဟုတ်​ချေ။ သို့သော် အသင်းတော်​ကြီး​များ​တွင် တော်​သင့်​သော​အချိန်အတွင်း ပရိသတ်​အားလုံးထံ ယင်း​တို့ကို လက်ဆင့်ကမ်း​နိုင်​ရန် ခွက်​အများ​အသုံးပြုသည့် အခြေခံ​မူ​အတိုင်း ပြုလုပ်​လေ့​ရှိသည်။ ထို​နည်းတူ​စွာ မုန့်​အတွက် ပန်းကန်ပြား​တစ်ချပ်​ထက်မက အသုံးပြုနိုင်​၏။ အသုံးပြု​သော​ခွက်​၏​ပုံစံ​နှင့်​ပတ်သက်​၍ သမ္မာကျမ်းစာ​က သတ်သတ်မှတ်မှတ် ဖော်ပြ​ထားခြင်း​မရှိ​ချေ။ သို့ရာတွင် အသုံးပြု​သော​ခွက်​နှင့် ပန်းကန်ပြား​တို့သည် ပွဲတော်​၏​လေးနက်မှု​ကို ရောင်ပြန်ဟပ်​သင့်​သည်။ ခွက်​ကို လက်ဆင့်ကမ်း​ချိန်​တွင် ဝိုင်​ဖိတ်စင်​နိုင်​သည့်​အထိ ထည့်​ထားခြင်း​ကို ရှောင်ခြင်း​သည် ပညာရှိရာ​ကျ​၏!

၂၀၊ ၂၁။ အောက်မေ့ရာပွဲ​သည် မိတ်သဟာယ​စားပွဲ​ဖြစ်သည်ဟု ကျွန်ုပ်​တို့ အဘယ်ကြောင့် ပြော​နိုင်​သနည်း။

^၂၀ မုန့်​ပန်းကန်​တစ်ချပ်​နှင့် ဝိုင်ခွက်​တစ်ခွက်​တည်း​ထက်မက အသုံးပြုနိုင်​သော်လည်း အောက်မေ့ရာပွဲ​သည် မိတ်သဟာယ​စားပွဲ​ဖြစ်၏။ ရှေး​ဣသရေလ​နိုင်ငံ​တွင် အမျိုးသား​တစ်ဦး​သည် ဘုရားသခင်​၏​သန့်ရှင်း​ရာ​ဌာန​သို့ တိရစ္ဆာန်​တစ်ကောင် ယူဆောင်​လာပြီး ထို​တွင်​သတ်​ခြင်း​ဖြင့် မိတ်သဟာယ​စားပွဲ​ကို ပေး​နိုင်​သည်။ ထို​တိရစ္ဆာန်​၏​အပိုင်း​တစ်ပိုင်း​ကို ယဇ်​ပလ္လင်​ပေါ် မီးရှို့​ပြီး တစ်ပိုင်း​ကို အမှုထမ်း​ယဇ်ပုရောဟိတ်​အားပေး​၍ ကျန်​အပိုင်း​ကို​ကား အာရုန်​၏​ယဇ်ပုရောဟိတ်​သားများ​နှင့် ယဇ်​ပူဇော်​သူ၊ သူ၏​အိမ်သူအိမ်သား​များ​အပါအဝင် အတူတကွ​သုံးဆောင်​ကြသည်။ (ဝတ်ပြုရာ ၃:၁-၁၆; ၇:၂၈-၃၆) အောက်မေ့ရာပွဲ​တွင် အတူတကွ​ပါဝင်​စားသုံး​ကြသော​ကြောင့် ၎င်း​သည်လည်း မိတ်သဟာယ​စားပွဲ​တစ်ခု​ဖြစ်သည်။

^၂၁ ယေဟောဝါ​သည် ဤ​အစီအစဉ်ကို စတင်​စီစဉ်​ပေး​သူ​အဖြစ် ထို​မိတ်သဟာယ​စားပွဲ​တွင် ကိုယ်တော်​လည်း​ပါဝင်​၏။ ယေရှု​မူ​ကား ယဇ်ကောင်​ဖြစ်၏၊ ဝိညာဉ်​တော်​ဖွား​ခရစ်ယာန်​များသည် ပါဝင်​စားသုံး​သူများ​အဖြစ် အထိမ်းအမှတ်​များ​ကို အတူတကွ​စားသုံး​ကြသည်။ ယေဟောဝါ​၏​စားပွဲ​တွင် စားသုံးခြင်း​က စားသုံးသူ​များနှင့် ကိုယ်တော် သင့်မြတ်​သည်​ဟု အဓိပ္ပာယ်​သက်ရောက်​၏။ သို့​ဖြစ်၍ ပေါလု​က ဤသို့​ရေးသားခဲ့​သည်– “ငါ​တို့သည် ကျေးဇူးတော်​ကို​ချီးမွမ်း​ရာ မင်္ဂလာ​ခွက်ဖလား​မူ​ကား ခရစ်တော်​၏​အသွေးကို ဆက်ဆံခြင်း​ဖြစ်သည်​မဟုတ်လော။ ငါ​တို့​ဖဲ့​သော​မုန့်​မူ​ကား ခရစ်တော်​၏​ကိုယ်ကို ဆက်ဆံခြင်း​ဖြစ်သည်​မဟုတ်လော။ မုန့်​တစ်လုံးတည်း​ရှိသည်​ဖြစ်၍ ငါ​တို့​ရှိသမျှသည် တစ်လုံးတည်း​ဖြစ်သော ထို​မုန့်ကို ဆက်ဆံ​လျက်​ခံယူ​ကြသော​ကြောင့် အများ​ဖြစ်သော​ငါ​တို့သည် တစ်လုံး​တစ်ကိုယ်တည်း​ဖြစ်​ကြ​၏။”—၁ ကောရိန္သု ၁၀:၁၆၊ ၁၇။

၂၂။ အောက်မေ့ရာပွဲ​နှင့်​ပတ်သက်​၍ ကျွန်ုပ်​တို့ စဉ်းစား​သုံးသပ်​ဖို့ အဘယ်​မေးခွန်းများ ကျန်ရှိ​သေး​သနည်း။

^၂၂ သခင့်​ညစာ​စားပွဲ​သည် ယေဟောဝါသက်သေ​များ​၏ တစ်ခု​တည်း​သော နှစ်စဉ်​ကျင်းပ​သည့် ဘာသာရေးပွဲ​တော်​ဖြစ်၏။ ယင်းသည် လျောက်ပတ်​ပေ​၏၊ အကြောင်း​မှာ နောက်လိုက်​များ​ကို ယေရှု​က “ငါ့ကို​အောက်မေ့​ဖို့​ရာ ဤသို့​ပြု​ကြလော့” ဟု​မိန့်မှာ​ခဲ့​၏။ အောက်မေ့ရာပွဲ​တွင် ယေရှု၏​သေခြင်းကို ကျွန်ုပ်​တို့​မှတ်မိ​သတိရ​ရန် ပွဲခံ​ကြ​၏၊ ကိုယ်တော်​၏​သေခြင်း​သည် ယေဟောဝါ​၏​ပိုင်သ​အုပ်စိုးမှု​ကို ထောက်ခံ​၏။ ကျွန်ုပ်​တို့​သတိပြု​ခဲ့​သည့်​အတိုင်း ဤ​မိတ်သဟာယ​စားပွဲ​တွင် မုန့်​သည် ခရစ်တော်​ပူဇော်​သော ကိုယ်တော်​၏​လူ့​ခန္ဓာကိုယ်​ကို ပုံဆောင်​ပြီး ဝိုင်​မူ​ကား ကိုယ်တော်​သွန်းလောင်းခဲ့​သော အသွေးကို ပုံဆောင်​ပါ​သည်။ သို့​တိုင် ထို​အထိမ်းအမှတ် မုန့်​နှင့်​ဝိုင်​တို့ကို ပါဝင်​သုံးဆောင်​ကြ​သူ အလွန်​နည်း​၏။ ထိုသို့ အဘယ်ကြောင့်​ဖြစ်​ရသနည်း။ အောက်မေ့ရာပွဲ​သည် ပါဝင်​မစားသုံး​သူ သန်းပေါင်း​များစွာ​အတွက် အမှန်တကယ် အဓိပ္ပာယ်​ရှိပါ​သလော။ သခင့်​ညစာ​စားပွဲ​သည် သင့်အတွက် အဘယ်​အဓိပ္ပာယ်​ရှိ​သင့်​သနည်း။

[အောက်ခြေမှတ်ချက်]

သင့်​အဖြေ​များ​ကား အဘယ်နည်း

• ယေရှုသည် အဘယ်ကြောင့် သခင့်​ညစာ​စားပွဲ​ကို အစပြု ကျင်းပ​ခဲ့​သနည်း။

• အောက်မေ့ရာပွဲကို ဘယ်နှစ်ကြိမ်​ကျင်းပ​သင့်​သနည်း။

• အောက်မေ့ရာပွဲ​တော်​တွင် အသုံးပြု​သောတ​ဆေး​မဲ့​မုန့်​သည် အဘယ်အရာကို ပုံဆောင်​သနည်း။

• အောက်မေ့ရာပွဲ​တော်​ဝိုင်​သည် အဘယ်အရာကို တင်စား သနည်း။

[လေ့လာ​ရန်​မေးခွန်းများ]

[စာမျက်နှာ ၁၅ ပါ ရုပ်ပုံ]

ယေရှုသည် သခင့်​ညစာ​စားပွဲ​ကို အစပြု​ကျင်းပ​ခဲ့