ယေဟောဝါကို စိတ်နှလုံးအကြွင်းမဲ့ ကိုးစားလော့
ယေဟောဝါကို စိတ်နှလုံးအကြွင်းမဲ့ ကိုးစားလော့
“နာမတော်ကိုသိသောသူတို့သည် ကိုယ်တော်၌ကိုးစားကြပါလိမ့်မည်။”—ဆာလံ ၉:၁၀၊ သမ္မာ။
၁၊ ၂။ လုံခြုံမှုရှိရန် လူတို့ အချည်းနှီးကိုးစားနေကြသည့် အရာအချို့ကား အဘယ်နည်း။
ယနေ့ ကျွန်ုပ်တို့၏ကောင်းကျိုးကိုထိခိုက်သည့် အရာများစွာရှိနေရာ လုံခြုံမှုပေးမည့်သူ သို့မဟုတ် လုံခြုံမှုပေးမည့်အရာကို ရှာဖွေကြခြင်းသည် ဓမ္မတာပင်။ လူအချို့က ငွေကြေးများစွာရှိထားလျှင် အနာဂတ်တွင် လုံခြုံလိမ့်မည်ဟုယူဆကြသည်၊ အမှန်မှာ ငွေသည် ခဏမျှသာလုံခြုံမှုပေး၏။ သမ္မာကျမ်းစာက ဤသို့ဆိုသည်– “မိမိစည်းစိမ်ကိုကိုးစားသောသူသည် ရှုံးလိမ့်မည်။” (သု. ၁၁:၂၈) အခြားသူတို့မူ လူ့ခေါင်းဆောင်များကို မျှော်ကိုးကြသည်၊ သို့သော် အတော်ဆုံးခေါင်းဆောင်များပင် မှားတတ်ကြသည်တကား။ အဆုံးတွင် ထိုသူအပေါင်းသည် သေဆုံးသွားကြရ၏။ ထို့ကြောင့် သမ္မာကျမ်းစာက ပညာရှိစွာ ဤသို့ဆိုသည်– “မင်းများမှစ၍ မကယ်တင်နိုင်သောလူသားကို မကိုးစားကြနှင့်။” (ဆာလံ ၁၄၆:၃) ထိုမှုတ်သွင်းခံစကားများက ကိုယ့်အားကိုယ်ကိုး၍ အားထုတ်ကြိုးပမ်းခြင်းကို မကိုးစားကြဖို့လည်းသတိပေး၏။ ကျွန်ုပ်တို့သည်လည်း ‘လူသားများ’ သာဖြစ်ကြပေသည်။
၂ ပရောဖက်ဟေရှာယအချိန်က ဣသရေလနိုင်ငံ၏ခေါင်းဆောင်များသည် “မုသာကိုခိုလှုံ” ခဲ့ကြသည့်အတွက် သူတို့ကိုအပြစ်တင်ခဲ့၏။ (ဟေရှာယ ၂၈:၁၅-၁၇၊ သမ္မာ) သူတို့သည် လုံခြုံမှုရဖို့ အိမ်နီးချင်းနိုင်ငံများနှင့် မဟာမိတ်ဖွဲ့ခဲ့ကြသည်။ ထိုသို့မဟာမိတ်ဖွဲ့မှုများကို စိတ်မချရ၊ ၎င်းတို့သည် မုသားပင်။ အလားတူပင်၊ ယနေ့ ဘာသာရေးခေါင်းဆောင်များစွာတို့သည် . . . နှင့် ပေါင်းသင်းဆက်ဆံကြသည်။ ထိုမဟာမိတ်များသည်လည်း “မုသာ” မျှဖြစ်ကြလိမ့်မည်။ (ဗျာ. ၁၇:၁၆၊ ၁၇) သူတို့သည် တည်မြဲသောလုံခြုံမှု ပေးလိမ့်မည်မဟုတ်။
ယောရှုနှင့်ကာလက်တို့၏ ပုံနမူနာကောင်းများ
၃၊ ၄။ ယောရှုနှင့်ကာလက်ပေးသောသတင်းသည် အခြားသူလျှိုဆယ်ဦးတို့၏သတင်းနှင့် မည်သို့ကွာခြားသနည်း။
၃ သို့ဆိုလျှင်၊ အဘယ်နေရာတွင် လုံခြုံမှုကိုမျှော်ကိုးသင့်သနည်း။ မောရှေလက်ထက်က ယောရှုနှင့်ကာလက်တို့ မျှော်ကိုးခဲ့ကြရာကိုပင်ဖြစ်သည်။ အီဂျစ်ပြည်မှ ဣသရေလလူမျိုးလွတ်မြောက်လာကြပြီး များမကြာမီပင် ကတိထားရာပြည်ဖြစ်သော ခါနာန်ပြည်ထဲဝင်ရန် သူတို့ အသင့်ရှိနေကြသည်။ အဆိုပါပြည်ထဲဝင်၍ စူးစမ်းထောက်လှမ်းရန် လူဆယ့်နှစ်ဦးကို စေလွှတ်ခဲ့ရာ ရက် ၄၀ ကြာသော် သူတို့ပြန်ရောက်လာ၍ သတင်းပေးခဲ့ကြ၏။ ယောရှုနှင့်ကာလက်တို့နှစ်ဦးသာ ခါနာန်ပြည်တွင် ဣသရေလလူမျိုးသည် အခွင့်အရေးသာမည်ဟု ပြောဆိုကြသည်။ အခြားသူတို့ကမူ အဆိုပါပြည်သည် နှစ်သက်ဖွယ်ကောင်းကြောင်း ထောက်ခံပြောဆိုကြသော်လည်း ဤသို့ဆက်၍ပြောသည်– “ပြည်သူပြည်သားတို့သည် အားကြီးပါ၏။ ခိုင်ခံ့သောမြို့ကြီးနှင့်နေကြပါ၏။ . . . ထိုပြည်သားတို့ကို ငါတို့မတိုက်နိုင်။ သူတို့သည် ငါတို့ထက်သာ၍အားကြီးကြသည်။”—တောလည်ရာ ၁၃:၂၇၊ ၂၈၊ ၃၁။
၄ ဣသရေလလူမျိုးသည် သူလျှိုဆယ်ဦး၏စကားကိုသာ အရေးစိုက်ကြပြီး ကြောက်ရွံ့လာခဲ့ကြရာ မောရှေကို အပြစ်တင်သည်အထိပြုကြ၏။ အဆုံးတွင် ယောရှုနှင့်ကာလက်တို့က စိတ်အကြီးအကျယ်ထိခိုက်ပြီး ဤသို့ပြောဆိုခဲ့ကြသည်– “ငါတို့လျှောက်သွား၍စူးစမ်းသောပြည်သည် အလွန်တရာကောင်းသောပြည်ဖြစ်ပါ၏။ ထာဝရဘုရားသည် ငါတို့ကိုနှစ်သက်လျှင် နို့နှင့်ပျားရည်စီးသောထိုပြည်သို့ ငါတို့ကိုဆောင်သွင်း၍ အပိုင်ပေးတော်မူလိမ့်မည်။ ထာဝရဘုရားကို မပုန်ကန်ကြပါနှင့်။ ထိုပြည်သူပြည်သားတို့ကို မကြောက်ကြနှင့်။” (တောလည်ရာ ၁၄:၆-၉) ဤသို့အားပေးသော်လည်း ဣသရေလလူမျိုးသည် နားမထောင်ခဲ့ကြပေ၊ ယင်းကြောင့် ထိုအချိန်တွင် ကတိထားရာပြည်တော်ထဲ ဝင်ခွင့်မရခဲ့ကြချေ။
၅။ ယောရှုနှင့်ကာလက်တို့သည် နှစ်သက်ဖွယ်သတင်းကို အဘယ်ကြောင့်ပေးခဲ့ကြသနည်း။
၅ သူလျှိုဆယ်ဦးပေးသောသတင်းသည် မကောင်းသော်လည်း ယောရှုနှင့်ကာလက်တို့၏သတင်းကား အဘယ်ကြောင့်ကောင်းသနည်း။ အဆိုပါသူလျှိုဆယ့်နှစ်ဦးစလုံးသည် တစ်မျိုးတည်းဖြစ်သော ခိုင်ခံ့သည့်မြို့ရိုးများနှင့် အခြေတကျရှိနေသည့်လူမျိုးများကို တွေ့မြင်ခဲ့ကြ၏။ ဣသရေလလူမျိုးသည် အဆိုပါပြည်ကိုနိုင်အောင်တိုက်ဖို့ ခွန်အားအလုံအလောက်မရှိဟု သူလျှိုဆယ်ဦးပြောဆိုခဲ့ခြင်းကား ဟုတ်မှန်ပါသည်။ ယင်းကို ယောရှုနှင့်ကာလက်တို့လည်း အသိအမှတ်ပြုသည်။ သို့ရာတွင်၊ သူလျှိုဆယ်ဦးက လူ့ရှုထောင့်မှကြည့်မြင်ခဲ့ကြသည်။ ယောရှုနှင့်ကာလက်တို့မူကား ယေဟောဝါကို ယုံကြည်ကိုးစားကြ၏။ သူတို့သည် ကိုယ်တော်၏တန်ခိုးပါလုပ်ရပ်များကို အီဂျစ်ပြည်၊ ပင်လယ်နီနှင့် သိနာတောင်ခြေတို့တွင် တွေ့မြင်ခဲ့ကြ၏။ စဉ်းစားကြည့်ပါ၊ ထိုအမှုများဖြစ်ပျက်ပြီး၍ နှစ်များစွာကြာပြီးနောက်တွင်ပင် ယေရိခေါမြို့သူ ရာခပ်သည် အဆိုပါသတင်းများကို ကြားသိရုံမျှနှင့် ယေဟောဝါ၏လူမျိုးအတွက် အသက်စွန့်လိုခဲ့သည်တကား! (ယောရှု ၂:၁-၂၄; ၆:၂၂-၂၅) ယေဟောဝါ၏လုပ်ရပ်များကို ကိုယ်တိုင်တွေ့ မြင်ခဲ့သူ ယောရှုနှင့်ကာလက်တို့သည် မိမိလူမျိုးအတွက် ဘုရားသခင်ဆက်တိုက်ခိုက်ပေးမည်ကို အပြည့်အဝယုံကြည်စိတ်ချ၏။ အနှစ်လေးဆယ်ကြာပြီးနောက် သူတို့ယုံကြည်မှုသည်မှန်ကန်ကြောင်း ထင်ရှား၏၊ ထိုအချိန်တွင် ယောရှု၏ဦးဆောင်မှုအောက်ရှိ ဣသရေလလူမျိုးဆက်အသစ်သည် ခါနာန်ပြည်ထဲချီတက်ဝင်ရောက်ကာ သိမ်းပိုက်ခဲ့၏။
ယေဟောဝါကို လုံးလုံးလျားလျားယုံကြည်ကိုးစားရသည့်အကြောင်း
၆။ ယနေ့ခရစ်ယာန်များသည် အဘယ်ကြောင့် ဖိစီးမှုကြုံနေကြရပြီး သူတို့၏ယုံကြည်ကိုးစားမှုကို အဘယ်တွင်ထားရှိသင့်သနည်း။
၆ ဤ “ခဲယဉ်းသောကာလ” တွင် ကျွန်ုပ်တို့သည် ဣသရေလလူတို့နည်းတူ ကျွန်ုပ်တို့ထက် များစွာခွန်အားကြီးသည့် ရန်သူများကို ရင်ဆိုင်နေကြရသည်။ (၂ တိမောသေ ၃:၁) ကျွန်ုပ်တို့သည် ကျင့်ဝတ်ပိုင်းအရ၊ ဝိညာဉ်ရေးပိုင်းအရနှင့် တချို့ကိစ္စရပ်များတွင် ကာယရေးအရပါ ဖိစီးမှုကြုံနေကြရ၏။ ထိုဖိစီးမှုများသည် လူ့ထက်သာလွန်သူ၊ စာတန်မှ အရင်းခံသောကြောင့် ၎င်းတို့ကို ကျွန်ုပ်တို့ဘာသာ မတွန်းလှန်နိုင်ကြပေ။ (ဧဖက် ၆:၁၂; ၁ ယောဟန် ၅:၁၉) သို့ဖြစ်၍၊ မည်သူ့ထံမှအကူအညီရနိုင်သနည်း။ ယေဟောဝါထံဆုတောင်းရာတွင် ရှေးခေတ်က တည်ကြည်သူအမျိုးသားတစ်ဦး ဤသို့ဆိုခဲ့၏– “နာမတော်ကိုသိသောသူတို့သည် ကိုယ်တော်၌ကိုးစားကြပါလိမ့်မည်။” (ဆာလံ ၉:၁၀၊ သမ္မာ) ယေဟောဝါကို ကျွန်ုပ်တို့အမှန်သိကျွမ်းပြီး ကိုယ်တော်၏နာမတော်က အဘယ်အရာကိုကိုယ်စားပြုကြောင်း သဘောပေါက်ကြမည်ဆိုလျှင် ယောရှုနှင့်ကာလက်တို့နည်းတူ ကိုယ်တော့်အား ကျွန်ုပ်တို့ကိုးစားကြမည် သေချာသည်။—ယောဟန် ၁၇:၃။
၇၊ ၈။ (က) ဖန်ဆင်းခြင်းက ယေဟောဝါအားယုံကြည်ကိုးစားရန်အကြောင်းများ မည်သို့ပေးသနည်း။ (ခ) သမ္မာကျမ်းစာက ယေဟောဝါအားယုံကြည်ကိုးစားရန် အဘယ်အကြောင်းများပေးသနည်း။
၇ ယေဟောဝါအား အဘယ်ကြောင့် ယုံကြည်ကိုးစားသင့်သနည်း။ ယောရှုနှင့်ကာလက်တို့ ကိုယ်တော့်ကိုယုံကြည်ကိုးစားခဲ့ကြသည့် အကြောင်းရင်းတစ်ခုမှာ ကိုယ်တော်၏တန်ခိုးတော်ထင်ရှားချက်များကို တွေ့မြင်ခဲ့ကြသောကြောင့်ဖြစ်သည်။ ကျွန်ုပ်တို့လည်း ကိုယ်တော့်တန်ခိုးများကို တွေ့မြင်ခဲ့ကြပြီ။ ဥပမာ၊ ဂလက်ဆီဘီလီယံပေါင်းများစွာရှိသည့် စကြဝဠာအပါအဝင် ယေဟောဝါ၏ဖန်ဆင်းခြင်းလက်ရာတော်များကို သုံးသပ်ကြည့်ပါ။ ယေဟောဝါထိန်းချုပ်ထားသည့် အတိုင်းမသိများပြားလှသော သဘာဝစွမ်းအားများက ကိုယ်တော်သည် အမှန်ပင် အတိုင်းအဆမဲ့တန်ခိုးရှင်ဖြစ်ကြောင်းပြသ၏။ ဖန်ဆင်းခြင်း၏အံ့ချီးဖွယ်ရာများကို ကျွန်ုပ်တို့ စေ့စေ့စဉ်းစားဆင်ခြင်သည့်အခါ ယေဟောဝါနှင့်ပတ်သက်၍ ကိုယ်တော်အား “အဘယ်သူဆီးတားနိုင်သနည်း။ ‘အဘယ်သို့ပြုတော်မူသနည်း’ ဟု မည်သူဆိုဝံ့သနည်း” ဟုပြောဆိုခဲ့သူယောဘနှင့် ကျွန်ုပ်တို့သဘောတူကြရမည်။ (ယောဘ ၉:၁၂၊ သမ္မာ) အမှန်မှာ ယေဟောဝါသည် ကျွန်ုပ်တို့ဘက်၌ရှိမည်ဆိုလျှင် စကြဝဠာတစ်ခွင် မည်သူ့ကိုမျှကြောက်စရာမလိုချေ။—ရောမ ၈:၃၁။
၈ ယေဟောဝါ၏နှုတ်မြွက်စကားတော်၊ သမ္မာကျမ်းစာကိုလည်း သုံးသပ်ကြည့်ပါ။ ဘုရားသခင့်ဉာဏ်ပညာကို မကုန်မခန်းနိုင်အောင်ဖော်ပြထားသည့် ဤစာစောင်သည် မှားယွင်းသောအကျင့်များကိုအောင်နိုင်ကာ ယေဟောဝါ၏အလိုတော်နှင့်အညီ အသက်ရှင်ရန် ကူညီပေးနိုင်ပါသည်။ (ဟေဗြဲ ၄:၁၂) သမ္မာကျမ်းစာအားဖြင့်သာ ယေဟောဝါအား အမည်နာမနှင့်တကွ သိလာကြ၍ နာမတော်၏အဓိပ္ပာယ်ကိုလည်း နားလည်လာရ၏။ (ထွက်မြောက်ရာ ၃:၁၄) ယေဟောဝါသည် မိမိ၏ရည်ရွယ်တော်မူချက်များကို ပြည့်စုံလာစေရန် မေတ္တာပြည့်ဝသည့်ဖခင်၊ ဖြောင့်မတ်သည့်တရားသူကြီး၊ အောင်ပွဲရစစ်သူရဲ အစရှိသည်ဖြင့် မည်သည့်အနေအထားမဆို မိမိကိုယ်ကို ဖြစ်စေနိုင်ကြောင်း ကျွန်ုပ်တို့သိနားလည်လာရသည်။ ထို့ပြင် ကိုယ်တော်၏စကားသည် အစဉ်ဖြစ်ပျက်လာကြောင်း ကျွန်ုပ်တို့သိမြင်ခဲ့ကြသည်။ သမ္မာကျမ်းစာကို ကျွန်ုပ်တို့လေ့လာသည့်အခါ ဆာလံဆရာကဲ့သို့ “နှုတ် [မြွက်] တော်၌ အကျွန်ုပ်ကိုးစားသည်” ဟုပြောဆိုကြရ၏။—ဆာလံ ၁၁၉:၄၂၊ သမ္မာ; ဟေရှာယ ၄၀:၈။
၉။ ရွေးနုတ်ဖိုးနှင့် ယေရှု၏ထမြောက်ခြင်းက ယေဟောဝါအားယုံကြည်ကိုးစားရန် မည်သို့ခွန်အားပေးသနည်း။
၉ ရွေးနုတ်ဖိုးအစီအစဉ်သည် ယေဟောဝါအား ယုံကြည်ကိုးစားရမည့် နောက်ထပ်အကြောင်းရင်းတစ်ခုဖြစ်၏။ (မဿဲ ၂၀:၂၈) ကျွန်ုပ်တို့အတွက် ရွေးနုတ်ဖိုးအဖြစ် အသေခံရန် မိမိ၏သားတော်ကို ဘုရားသခင်စေလွှတ်လိုက်ခြင်းက အလွန်ဝမ်းသာစရာပင်! အဆိုပါရွေးနုတ်ဖိုးသည် အမှန်ပင်တန်ခိုးပါလှ၏။ နောင်တရ၍ ရိုးဖြောင့်သောနှလုံးဖြင့် ယေဟောဝါထံသို့လှည့်လာကြသူ လူသားအားလုံး၏အပြစ်များကို ယင်းကဖုံးအုပ်ပစ်လိုက်သည်။ (ယောဟန် ၃:၁၆; ဟေဗြဲ ၆:၁၀; ၁ ယောဟန် ၄:၁၆၊ ၁၉) ရွေးနုတ်ဖိုးပေးရန်အစီအစဉ်တွင် ယေရှုကို ထမြောက်စေခြင်းပါဝင်သည်။ ရာနှင့်ချီသော မျက်မြင်သက်သေများက မှန်သည်ဟုထောက်ခံခဲ့သည့် ထိုအံ့ဖွယ်အမှုသည် ယေဟောဝါအား ယုံကြည်ကိုးစားရန်အကြောင်း နောက်တစ်ခုဖြစ်ပေသည်။ ယင်းက ကျွန်ုပ်တို့မျှော်လင့်ထားသည့်အတိုင်း ဖြစ်ပျက်လာမည်ကိုအာမခံသည်။—တမန်တော် ၁၇:၃၁; ရောမ ၅:၅; ၁ ကောရိန္သု ၁၅:၃-၈။
၁၀။ ယေဟောဝါကိုယုံကြည်ကိုးစားရန် ကျွန်ုပ်တို့တွင် အဘယ်ကိုယ်ပိုင်အကြောင်းရင်းများရှိသနည်း။
၁၀ ယင်းတို့သည် ယေဟောဝါအား ကျွန်ုပ်တို့အကြွင်းမဲ့ယုံကြည်ကိုးစားနိုင်၍ ယုံကြည်ကိုးစားသင့်သည့်အကြောင်း တချို့သာဖြစ်သည်။ အခြားအကြောင်းရင်းများစွာရှိပါသေးသည်၊ တချို့မှာ ကိုယ်တွေ့အခြေအနေနှင့်သက်ဆိုင်သည်။ ဥပမာ၊ ကျွန်ုပ်တို့အားလုံးသည် ဘဝအသက်တာတွင် ခက်ခဲသောအခြေအနေများကို ရံဖန်ရံခါ ရင်ဆိုင်ရ၏။ ၎င်းတို့ကို ကိုင်တွယ်ဖြေရှင်းရန် ယေဟောဝါ၏လမ်းညွှန်မှုကို တောင်းခံသောအခါ ထိုလမ်းညွှန်မှုသည် မည်မျှလက်တွေ့ကျကြောင်း ကျွန်ုပ်တို့သိမြင်လာကြရသည်။ (ယာကုပ် ၁:၅-၈) ကျွန်ုပ်တို့၏နေ့စဉ်ဘဝအသက်တာတွင် ယေဟောဝါကို မှီခိုအားထားလေ၊ ထိုသို့ပြုခြင်း၏အကျိုးကျေးဇူးများကို ခံစားရလေ ကိုယ်တော်ကို ကျွန်ုပ်တို့ပို၍ယုံကြည်ကိုးစားလာလေဖြစ်သည်။
ယေဟောဝါကို ဒါဝိဒ်ယုံကြည်ကိုးစားခဲ့
၁၁။ မည်သည့်အခြေအနေများကို ရင်ဆိုင်နေရသည့်ကြားမှ ယေဟောဝါအား ဒါဝိဒ်ယုံကြည်ကိုးစားခဲ့သနည်း။
၁၁ ယေဟောဝါကို ယုံကြည်ကိုးစားခဲ့သူတစ်ဦးမှာ ရှေးဣသရေလနိုင်ငံ၏ဘုရင်ဒါဝိဒ်ဖြစ်သည်။ ဒါဝိဒ်သည် မိမိကိုသတ်လိုသည့် ဘုရင်ရှောလု၏ခြိမ်းခြောက်မှုနှင့် ဣသရေလနိုင်ငံကို သိမ်းပိုက်ဖို့ကြိုးစားနေသည့် အင်အားကြီးမားသော ဖိလိတ္တိစစ်တပ်၏ရန်ကို ရင်ဆိုင်ခဲ့ရသည်။ သို့တိုင်၊ အသက်ဘေးမှ သူလွတ်မြောက်ခဲ့ပြီး အောင်မြင်မှုပင်ရရှိခဲ့၏။ အဘယ်ကြောင့်နည်း။ ဒါဝိဒ်ကိုယ်တိုင် ဤသို့ရှင်းပြသည်– “ထာဝရဘုရားသည် ငါ၏အလင်း၊ ငါ့ကိုကယ်တင်သောအရှင်ဖြစ်တော်မူ၏။ ငါသည်အဘယ်သူကိုကြောက်ရအံ့နည်း။ ထာဝရဘုရားသည် ငါ၏အသက်ခိုလှုံရာဖြစ်တော်မူ၏။ ငါသည်အဘယ်သူကိုကြောက်လန့်ရအံ့နည်း။” (ဆာလံ ၂၇:၁) အလားတူ ယေဟောဝါကို ကျွန်ုပ်တို့ယုံကြည်ကိုးစားကြမည်ဆိုလျှင် ကျွန်ုပ်တို့လည်း အောင်မြင်ပေလိမ့်မည်။
၁၂၊ ၁၃။ အတိုက်အခံပြုသူများသည် ၎င်းတို့၏လျှာကို လက်နက်အဖြစ်အသုံးပြုလျှင်ပင် ယေဟောဝါအား ကျွန်ုပ်တို့ယုံကြည်ကိုးစားသင့်ကြောင်း ဒါဝိဒ်မည်သို့ဖော်ပြခဲ့သနည်း။
၁၂ တစ်ချိန်တစ်ခါတွင် ဒါဝိဒ်ဤသို့ဆုတောင်းခဲ့၏– “အိုဘုရားသခင် အကျွန်ုပ်ဆုတောင်းသောစကားသံကို နားထောင်၍ အကျွန်ုပ်အသက်ကို ရန်သူဘေးမှ ကွယ်ကာစောင့်မတော်မူပါ။ လူဆိုးတို့၏ တိုင်ပင်ရာမှလည်းကောင်း၊ [မကောင်းမှု] ကိုပြုလေ့ရှိသောသူတို့၏ စုဝေးရာမှလည်းကောင်း အကျွန်ုပ်ကိုကွယ်ကာတော်မူပါ။ ထိုသူတို့သည် မိမိတို့လျှာကို ဓားကဲ့သို့သွေးတတ်ကြ၏။ စုံလင်သောသူကို မထင်မရှားပစ်မည်အကြံနှင့် ခါးသောစကားတည်းဟူသော မိမိတို့မြားကိုရွယ်တတ်ကြ၏။” (ဆာလံ ၆၄:၁-၄) ထိုစကားများကို ဒါဝိဒ်ရေးသားရန် အဘယ်အရာကလှုံ့ဆော်ခဲ့ကြောင်းကို ကျွန်ုပ်တို့အသေအချာမသိရှိကြပါ။ သို့သော် ယနေ့လည်း အလားတူပင်၊ ကျွန်ုပ်တို့ကိုအတိုက်အခံပြုသူများသည် စကားကို စစ်လက်နက်ပမာအသုံးပြုလျက် ‘၎င်းတို့၏လျှာကို သွေး’ ကြကြောင်း ကျွန်ုပ်တို့သိရှိကြသည်။ အပြစ်မရှိသောခရစ်ယာန်များကို တလွဲထင်စေရန် အပြောဖြင့်ဖြစ်စေ၊ ရေးသားခြင်းဖြင့်ဖြစ်စေ စကားကို “မြား” အဖြစ်အသုံးပြုလျက် သူတို့ “ပစ်” ကြ၏။ ယေဟောဝါကို ကျွန်ုပ်တို့ မယိမ်းမယိုင်ယုံကြည်ကိုးစားကြမည်ဆိုလျှင် အဘယ်အကျိုးကျေးဇူးခံစားရမည်နည်း။
၁၃ ဒါဝိဒ်က ဤသို့ဆက်၍ဆိုသည်– “သူတို့၌ ဘုရားသခင်ပစ်တော်မူသောမြားမှန်၍ သူတို့သည် အမှတ်တမဲ့နာကြလိမ့်မည်။ သို့ဖြစ်၍ မိမိတို့လျှာသည် မိမိတို့ကိုတိုက်စေ . . . မည်။ . . . ဖြောင့်မတ်သောသူသည် ထာဝရဘုရား၌ဝမ်းမြောက်၍ ခိုလှုံလိမ့်မည်။” (ဆာလံ ၆၄:၇-၁၀) ရန်သူတို့သည် ၎င်းတို့၏လျှာကိုသွေး၍ ကျွန်ုပ်တို့ကိုရှုတ်ချပြောဆိုကြသော်လည်း အဆုံးတွင် ‘သူတို့၏လျှာသည် သူတို့ကိုတိုက်မည်။’ အဆုံးတွင် ယေဟောဝါသည် အခြေအနေကိုအကောင်းဖြစ်စေရာ ကိုယ်တော်အား ယုံကြည်ကိုးစားသူများ ဝမ်းမြောက်ရွှင်လန်းနိုင်ကြပါလိမ့်မည်။
ဟေဇကိ၏ယုံကြည်ကိုးစားမှု မှန်ကန်ကြောင်းထင်ရှား
၁၄။ (က) အဘယ်အန္တရာယ်အခြေအနေအောက်တွင် ယေဟောဝါအား ဟေဇကိယုံကြည်ကိုးစားခဲ့သနည်း။ (ခ) ထိုအာရှုရိလူ၏ လိမ်ညာမှုကို ဟေဇကိမယုံကြည်ကြောင်း မည်သို့ဖော်ပြခဲ့သနည်း။
၁၄ ယေဟောဝါအား ယုံကြည်ကိုးစားမှုမှန်ကန်ကြောင်း ထင်ရှားပြသူနောက်တစ်ဦးမှာ ဘုရင်ဟေဇကိဖြစ်သည်။ ဟေဇကိအုပ်စိုးစဉ်အတွင်း ယေရုရှလင်မြို့ကို အင်အားကြီးမားသော အာရှုရိစစ်တပ်သည် လာရောက်ခြိမ်းခြောက်ခဲ့သည်။ ထိုစစ်တပ်သည် အခြားတိုင်းနိုင်ငံများစွာတို့ကို အနိုင်ရခဲ့၏။ ယုဒနိုင်ငံ၏မြို့များကိုပင် ချင်းနင်းဝင်ရောက်သိမ်းပိုက်ခဲ့ရာ ယေရုရှလင်မြို့တစ်မြို့တည်းသာကျန်ကြွင်းသည်။ ထိုအခါ သနာခရိပ်မင်းက အဆိုပါမြို့ကိုလည်း သူသိမ်းပိုက်မည်ဟု ကြုံးဝါးလေ၏။ အီဂျစ်ကို သူတို့ကိုးစားနေခြင်းသည် အချည်းနှီးဖြစ်ကြောင်း ရာဗရှာခမှတစ်ဆင့် သနာခရိပ်မင်း ပြောခဲ့သည်၊ သူမှန်၏။ သို့သော် သူက “သင်ကိုးစားသောဘုရားသခင်က ‘ယေရုရှလင်မြို့သည် အာရှုရိရှင်ဘုရင်လက်သို့မရောက်ရ’ ဟူ၍ သင့်ကိုမလှည့်စားစေနှင့်” ဟုဆိုပြန်လေသည်။ (ဟေရှာယ ၃၇:၁၀) သို့ရာတွင်၊ ယေဟောဝါသည် မိမိကို လှည့်စားမည်မဟုတ်ကြောင်း ဟေဇကိသိထား၏။ သို့ဖြစ်၍ သူကဤသို့ဆုတောင်းခဲ့သည်– “အိုအကျွန်ုပ်တို့ဘုရားသခင်ထာဝရဘုရား၊ ကိုယ်တော်တစ်ပါးတည်းသာ ဘုရားသခင်ဖြစ်တော်မူသည်ကို မြေကြီးပေါ်မှာရှိသမျှသော တိုင်းနိုင်ငံတို့သည်သိမည်အကြောင်း အိုထာဝရဘုရား၊ အကျွန်ုပ်တို့ကို ထိုမင်း [အာရှုရိလူ] လက်မှ ကယ်လွှတ်တော်မူပါ။” (ဟေရှာယ ၃၇:၂၀၊ သမ္မာ) ဟေဇကိ၏ဆုတောင်းချက်ကို ယေဟောဝါနားထောင်တော်မူခဲ့၏။ ကောင်းကင်တမန်တစ်ပါးသည် တစ်ညတည်းတွင် အာရှုရိစစ်သား ၁၈၅,၀၀၀ ကိုသတ်ပစ်လိုက်လေသည်။ ထိုအခါ ယေရုရှလင်မြို့သည် ပျက်စီးခြင်းဘေးမှလွတ်ပြီး သနာခရိပ်မင်းသည် ယုဒနယ်မြေပေါ်သို့ လုံးဝခေါင်းပြန်မလှည့်တော့ချေ။ ဤအကြောင်းကို ကြားသိလိုက်သူအပေါင်းသည် ယေဟောဝါ၏ကြီးမြတ်မှုကို သိမြင်သွားကြလေတော့သည်။
၁၅။ ဤမတည်ငြိမ်သည့်လောကတွင် ကျွန်ုပ်တို့ကြုံတွေ့ရနိုင်မည့် မည်သည့်ခက်ခဲသောအခြေအနေမဆိုအတွက် အဘယ်အရာတစ်ခုတည်းကသာ ကျွန်ုပ်တို့ကိုအသင့်ရှိစေမည်နည်း။
၁၅ ယနေ့ ကျွန်ုပ်တို့လည်း ဟေဇကိနည်းတူ စစ်ဆင်နွှဲရသည့်အခြေအနေမျိုးတွင် ရောက်ရှိနေကြသည်။ ကျွန်ုပ်တို့မူကား ဝိညာဉ်ရေးစစ်ပွဲကို တိုက်ခိုက်နေကြရ၏။ ဝိညာဉ်ရေးစစ်သားများအနေနှင့် ဝိညာဉ်ရေးအရ အသက်ဆက်ရှင်သန်ရန် လိုအပ်သောစွမ်းရည်များကို ပြုစုပျိုးထောင်ကြရပေမည်။ ဆန့်ကျင်တိုက်ခိုက်မှုများကို ကြိုမြင်ထားပြီး ယင်းတို့ကို ခုခံတွန်းလှန်နိုင်ရန် ကိုယ်ကိုကိုယ်အသင့်ပြင်ဆင်ထားဖို့လိုသည်။ (ဧဖက် ၆:၁၁၊ ၁၂၊ ၁၇) ဤမတည်ငြိမ်သည့်လောကတွင် အခြေအနေများသည် ရုတ်တရက်ပြောင်းလဲသွားနိုင်သည်။ မထင်မမှတ်ဘဲ ပြည်တွင်းမငြိမ်မသက်မှု ပေါ်ပေါက်လာနိုင်သည်။ လွတ်လပ်စွာကိုးကွယ်ယုံကြည်ခွင့်ရှိသော နိုင်ငံများသည် လွတ်လပ်စွာကိုးကွယ်ခွင့်မရှိသောနိုင်ငံများ ဖြစ်လာနိုင်သည်။ ဟေဇကိနည်းတူ ယေဟောဝါအား မယိမ်းမယိုင်သောယုံကြည်ကိုးစားမှုမျိုး မိမိတို့တွင်ရှိလာအောင် ပြုစုပျိုးထောင်ထားမည်ဆိုလျှင် ဖြစ်လာမည့်အရေးကို ကျွန်ုပ်တို့ရင်ဆိုင်ဖို့ အသင့်ရှိနေကြပါလိမ့်မည်။
ယေဟောဝါကိုယုံကြည်ကိုးစားခြင်းဟူသည် အဘယ်နည်း
၁၆၊ ၁၇။ ယေဟောဝါကိုယုံကြည်ကိုးစားကြောင်း ကျွန်ုပ်တို့မည်သို့ဖော်ပြကြမည်နည်း။
၁၆ ယေဟောဝါကိုယုံကြည်ကိုးစားခြင်းသည် အပြောသက်သက်မျှသာမဟုတ်ပါ။ ကျွန်ုပ်တို့၏နှလုံးနှင့်ပတ်သက်ပြီး အပြုအမူအားဖြင့်တင်ပြရသည်။ ယေဟောဝါကို ကျွန်ုပ်တို့ယုံကြည်ကိုးစားမည်ဆိုလျှင် ကိုယ်တော့်နှုတ်မြွက်စကားတော်၊ သမ္မာကျမ်းစာကို အပြည့်အဝယုံကြည်ကိုးစားကြပါမည်။ ၎င်းကို ကျွန်ုပ်တို့နေ့စဉ်ဖတ်ရှုပြီး တွေးတောဆင်ခြင်၍ ကျွန်ုပ်တို့၏လမ်းညွှန်အဖြစ် ၎င်းကိုအသုံးပြုမည်။ (ဆာလံ ၁၁၉:၁၀၅) ထို့ပြင် ယေဟောဝါကိုယုံကြည်ကိုးစားခြင်းတွင် သန့်ရှင်းသောဝိညာဉ်တော်၏တန်ခိုးကို ယုံကြည်ကိုးစားခြင်းပါဝင်သည်။ သန့်ရှင်းသောဝိညာဉ်တော်အကူအညီဖြင့် ယေဟောဝါ၏အလိုတော်နှင့်တွေ့သည့် ဝိညာဉ်အသီးများကို ကျွန်ုပ်တို့ပြုစုပျိုးထောင်နိုင်ကြပြီး အမြစ်စွဲနေသည့် အကျင့်ဆိုးများကို နှိမ်နင်းနိုင်ကြမည်။ (၁ ကောရိန္သု ၆:၁၁; ဂလာတိ ၅:၂၂-၂၄) သို့ဖြစ်၍၊ များစွာသောသူတို့သည် သန့်ရှင်းသောဝိညာဉ်တော်၏အကူအညီဖြင့် ဆေးလိပ်သောက်ခြင်း သို့မဟုတ် မူးယစ်ဆေးဝါးသုံးစွဲခြင်းတို့ကို ဖြတ်ပစ်နိုင်ခဲ့ကြပြီ။ အခြားသူများမူ အကျင့်ယိုယွင်းသည့် ဘဝပုံစံများကို စွန့်လွှတ်ခဲ့ကြပြီ။ မှန်ပါသည်၊ ယေဟောဝါကို ယုံကြည်ကိုးစားကြမည်ဆိုလျှင် ကျွန်ုပ်တို့သည် မိမိအစွမ်းဖြင့်မဟုတ်ဘဲ ကိုယ်တော်ပေးသောအစွမ်းခွန်အားဖြင့် ပြုမူလုပ်ဆောင်ကြပေမည်။—ဧဖက် ၃:၁၄-၁၈။
၁၇ ထို့အပြင်၊ ယေဟောဝါကိုယုံကြည်ကိုးစားခြင်းဟူသည် ကိုယ်တော်ယုံကြည်အားထားသူတို့ကို ယုံကြည်ကိုးစားခြင်းမည်၏။ ဥပမာ၊ ယေဟောဝါသည် မြေကြီးဆိုင်ရာ ဘုရားသခင့်နိုင်ငံတော်အကျိုးစီးပွားကို ကြည့်ရှုစောင့်ရှောက်ပေးရန် ‘သစ္စာနှင့်သတိပညာရှိကျွန်’ ကို စီစဉ်ထားတော်မူပြီ။ (မဿဲ ၂၄:၄၅-၄၇) ကိုယ့်ဘာသာကိုယ် လွတ်လွတ်လပ်လပ်ပြုမူဖို့ ကျွန်ုပ်တို့မကြိုးစားကြပါ၊ အဆိုပါအပ်နှင်းထားမှုကိုလည်း လျစ်လျူမရှုကြပါ၊ အကြောင်းမူကား ယေဟောဝါ၏အစီအစဉ်ကို ကျွန်ုပ်တို့ယုံကြည်ကိုးစားကြ၏။ ၎င်းပြင်၊ ဒေသခံခရစ်ယာန်အသင်းတော်တွင် အကြီးအကဲများ အမှုထမ်းနေကြသည်၊ တမန်တော်ပေါလုပြောသည့်အတိုင်း သူတို့ကို သန့်ရှင်းသောဝိညာဉ်တော်အားဖြင့် ခန့်အပ်ထားသည်။ (တမန်တော် ၂၀:၂၈) အသင်းတော်တွင် အကြီးအကဲအစီအစဉ်နှင့်အညီ ကျွန်ုပ်တို့ပူးပေါင်းဆောင်ရွက်ခြင်းအားဖြင့် ယေဟောဝါကိုယုံကြည်ကိုးစားကြောင်း တင်ပြကြသည်။—ဟေဗြဲ ၁၃:၁၇။
ပေါလု၏ပုံသက်သေကို အတုယူလော့
၁၈။ ယနေ့ ခရစ်ယာန်များသည် ပေါလု၏ပုံသက်သေကို မည်သို့အတုယူကြပြီး၊ အဘယ်အရာကို သူတို့မကိုးစားကြသနည်း။
၁၈ တမန်တော်ပေါလုသည် ခရစ်ယာန်ဓမ္မအမှုဆောင်ရာတွင် ကျွန်ုပ်တို့နည်းတူ ဖိစီးမှုအမျိုးမျိုး ရင်ဆိုင်ကြုံတွေ့ခဲ့ရ၏။ သူ့လက်ထက်တွင် ခရစ်ယာန်ဘာသာတရားကို အစိုးရအာဏာပိုင်များက အထင်လွဲခဲ့ရာ အဆိုပါအမြင်စောင်းမှုများကို ပြုပြင်တည့်မတ်ပေးဖို့ သို့မဟုတ် ခရစ်ယာန်ဟောပြောခြင်းလုပ်ငန်းကို တရားဝင်ဖြစ်စေဖို့ တစ်ခါတစ်ရံ ကြိုးပမ်းအားထုတ်ခဲ့ရ၏။ (တမန်တော် ၂၈:၁၉-၂၂; ဖိလိပ္ပိ ၁:၇) ယနေ့ ခရစ်ယာန်များလည်း သူ၏ပုံသက်သေကိုအတုယူကြသည်။ ကျွန်ုပ်တို့သည် ဖြစ်နိုင်သည့်အခါတိုင်း ရသမျှအခွင့်အရေးကိုအသုံးချကာ အခြားသူများအား ကျွန်ုပ်တို့၏လုပ်ငန်းအကြောင်း သိမြင်နားလည်လာစေကြသည်။ ထို့ပြင် ကျွန်ုပ်တို့သည် သတင်းကောင်းကို ကာကွယ်ထောက်ခံ၍ တရားဝင်ဖြစ်စေရန် ကြိုးစားပြုမူကြသည်။ သို့ရာတွင်၊ အောင်မြင်မှု သို့မဟုတ် ရှုံးနိမ့်မှုသည် တရားရုံးတွင် အမှုနိုင်ခြင်း သို့မဟုတ် လူအများ၏နှစ်သက်လက်ခံမှုရရှိခြင်းအပေါ် မူတည်သည်ဟု ကျွန်ုပ်တို့မယူမှတ်ကြသောကြောင့် ထိုသို့သောကြိုးပမ်းအားထုတ်မှုများကို အပြည့်အဝအားမကိုးပါ။ ယင်းအစား၊ ယေဟောဝါကိုသာ ကျွန်ုပ်တို့ယုံကြည်ကိုးစားကြသည်။ ရှေးဣသရေလလူမျိုးအား ကိုယ်တော်ဤသို့အားပေးခဲ့သည်ကို ကျွန်ုပ်တို့အမှတ်ရကြသည်– “ငြိမ်ဝပ်စွာနေခြင်း၊ ကိုးစားခြင်းအားဖြင့် ခွန်အားအစွမ်းကို ရကြလိမ့်မည်။”—ဟေရှာယ ၃၀:၁၅၊ သမ္မာ။
၁၉။ နှိပ်စက်ညှဉ်းပန်းခံရသည့်အခါ ညီအစ်ကိုများသည် ယေဟောဝါကိုယုံကြည်ကိုးစားကြောင်း မည်သို့ထင်ရှားခဲ့ပြီနည်း။
၁၉ တစ်ခါတစ်ရံ ကျွန်ုပ်တို့၏ခေတ်သစ်သမိုင်းတွင် ကျွန်ုပ်တို့၏လုပ်ငန်းသည် အရှေ့နှင့်အနောက် ဥရောပနိုင်ငံများ၊ အာရှနှင့်အာဖရိကရှိ အချို့နိုင်ငံများ၊ တောင်နှင့်မြောက်အမေရိကရှိနိုင်ငံများတွင် ပိတ်ပင်ခံခဲ့ရ သို့မဟုတ် ကန့်သတ်ခံရ၏။ ဤသို့ပိတ်ပင်ခံရခြင်းက ယေဟောဝါကို ကျွန်ုပ်တို့ယုံကြည်ကိုးစားခြင်းသည် အချည်းနှီးဖြစ်သွားပြီဟု ဆိုလိုပါသလော။ မဆိုလိုပါ။ ယေဟောဝါသည် မိမိ၏ရည်ရွယ်တော်မူချက်ကောင်းအတွက် ခါးသီးသော နှိပ်စက်ညှဉ်းပန်းမှုကို တစ်ခါတစ်ရံ ခွင့်ပြုခဲ့သော်လည်း ထိုနှိပ်စက်ညှဉ်းပန်းမှုဒဏ်ကို ခံခဲ့ရသူတို့အား မေတ္တာပါစွာ ခွန်အားပေးတော်မူခဲ့၏။ နှိပ်စက်ညှဉ်းပန်းခံရစဉ် ခရစ်ယာန်များစွာတို့သည် ယုံကြည်ခြင်းမှတ်တမ်းကောင်းနှင့် ဘုရားသခင်ကိုယုံကြည်ကိုးစားမှုတို့ကို ထူးခြားစွာတင်ပြခဲ့ကြပြီ။
၂၀။ တရားဝင်လွတ်လပ်ခွင့်များမှ ကျွန်ုပ်တို့အကျိုးကျေးဇူးခံစားရသည်မှန်သော်လည်း အဘယ်ကဏ္ဍများတွင်မူ ကျွန်ုပ်တို့ဘယ်သောအခါမျှ အလျှော့ပေးလိုက်လျောခြင်း ပြုမည်မဟုတ်သနည်း။
၂၀ အခြားတစ်ဖက်တွင်မူ၊ နိုင်ငံအများစုတွင် ကျွန်ုပ်တို့၏လုပ်ငန်းကို တရားဝင်အသိအမှတ်ပြုထားကြပြီး ရံဖန်ရံခါ လူထု၏နှစ်သက်လက်ခံမှုကို လူထုဆက်သွယ်ရေးများမှတစ်ဆင့် ကျွန်ုပ်တို့လက်ခံရရှိကြသည်။ ယင်းကို ကျွန်ုပ်တို့ကျေးဇူးများစွာတင်ရှိကြပြီး ၎င်းအားဖြင့် ယေဟောဝါ၏ရည်ရွယ်ချက်ပြည့်စုံကြောင်း အသိအမှတ်ပြုကြပါသည်။ ကိုယ်တော်၏ကောင်းချီးဖြင့် ကျွန်ုပ်တို့ရရှိထားသည့် လွတ်လပ်မှုကို မိမိတို့၏ဘဝပုံစံတိုးတက်ရေးအတွက်မဟုတ်ဘဲ ယေဟောဝါ၏အမှုတော်ကို လူသိရှင်ကြား အပြည့်အဝထမ်းဆောင်နိုင်ဖို့ ကျွန်ုပ်တို့အသုံးပြုကြသည်။ သို့ရာတွင်၊ အာဏာပိုင်များက ကျွန်ုပ်တို့ကိုအကောင်းမြင်စေဖို့ ကျွန်ုပ်တို့၏ကြားနေမှုကို ဘယ်သောအခါမျှ အလျှော့ပေးလိုက်လျောမည်မဟုတ်ချေ၊ ကျွန်ုပ်တို့၏ဟောပြောခြင်းလုပ်ငန်းကို လျော့ပေါ့လုပ်ဆောင်မည်မဟုတ်၊ ယေဟောဝါ၏အမှုတော်ဆောင်ခြင်းကိုလည်း အခြားဘယ်နည်းဖြင့်မျှ အားလျော့သွားစေမည်မဟုတ်ပါ။ ကျွန်ုပ်တို့သည် မေရှိယနိုင်ငံတော်သားများဖြစ်ကြရာ ယေဟောဝါ၏အကြွင်းမဲ့ပိုင်သအုပ်စိုးမှုဘက်၌ အခိုင်အမာရပ်တည်နေကြပါသည်။ ကျွန်ုပ်တို့သည် ဤအစီအစဉ်စနစ်ကို မျှော်ကိုးသည်မဟုတ်၊ ကမ္ဘာသစ်ကိုသာ စောင့်မျှော်နေကြ၏၊ ထိုတွင် ကောင်းကင်မေရှိယနိုင်ငံတော်ကသာ တစ်ခုတည်းသောအစိုးရအဖြစ် ဤကမ္ဘာမြေကြီးကို အုပ်စိုးပါလိမ့်မည်။ ဗုံးများ၊ ဒုံးကျည်များ၊ နျူကလီးယားလက်နက်ဖြင့် တိုက်ခိုက်ခြင်းပင်လျှင် ထိုအစိုးရကို လှုပ်ခါနိုင်မည်မဟုတ်၊ ကောင်းကင်မှကျလာအောင်လည်း ပစ်ချနိုင်မည်မဟုတ်ပေ။ ထိုကောင်းကင်အစိုးရသည် မနိုင်နင်းနိုင်သောနိုင်ငံဖြစ်ပြီး ၎င်းနှင့်စပ်လျဉ်းသည့် ယေဟောဝါ၏ရည်ရွယ်ချက်ကို ပြည့်စုံစေပေလိမ့်မည်။—ဒံယေလ ၂:၄၄၊ ၄၅; ဟေဗြဲ ၁၂:၂၈; ဗျာ. ၆:၂။
၂၁။ အဘယ်လမ်းစဉ်ကိုလိုက်ဖို့ ကျွန်ုပ်တို့စိတ်ပိုင်းဖြတ်ထားကြသနည်း။
၂၁ ပေါလုကဤသို့ဆိုသည်– “ငါတို့မူကား၊ ပျက်စီးခြင်းသို့ရောက်အံ့သောငှာ ရွေ့လျော့သောသူမဟုတ်။ စိတ်ဝိညာဉ်သည် ကယ်တင်ခြင်းသို့ရောက်အံ့သောငှာ ယုံကြည်သောသူဖြစ်ကြ၏။” (ဟေဗြဲ ၁၀:၃၉) သို့ဖြစ်၍၊ ကျွန်ုပ်တို့အားလုံး ယေဟောဝါ၏အမှုတော်ကို အဆုံးတိုင်အောင် တည်ကြည်စွာ ထမ်းဆောင်နိုင်ကြပါစေ။ ယေဟောဝါအား ယခုနှင့်ထာဝရ အပြည့်အဝယုံကြည်ကိုးစားရန်အကြောင်း မြောက်မြားစွာရှိပေသည်။—ဆာလံ ၃၇:၃; ၁၂၅:၁။
သင်အဘယ်အရာသိရှိခဲ့သနည်း
• ယောရှုနှင့်ကာလက်တို့သည် နှစ်သက်ဖွယ်သတင်းကို အဘယ်ကြောင့် သယ်ဆောင်လာခဲ့ကြသနည်း။
• ယေဟောဝါအား လုံးလုံးလျားလျား ယုံကြည်ကိုးစားသင့်သည့် အကြောင်းရင်းတချို့ကား အဘယ်နည်း။
• ယေဟောဝါကိုယုံကြည်ကိုးစားခြင်းဟူသည် အဘယ်အဓိပ္ပာယ်ရှိသနည်း။
• ယေဟောဝါကိုယုံကြည်ကိုးစားလျက် ကျွန်ုပ်တို့ မည်သို့ရပ်တည်ရန် စိတ်ပိုင်းဖြတ်ထားသနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
ယောရှုနှင့်ကာလက်တို့သည် နှစ်သက်ဖွယ်သတင်းကို အဘယ်ကြောင့် ပေးခဲ့ကြသနည်း
[စာမျက်နှာ ၁၆ ပါ ရုပ်ပုံ]
ဖန်ဆင်းခြင်းက ယေဟောဝါကိုယုံကြည်ကိုးစားရန် အကြောင်းခိုင်လုံစေ
[Credit Line]
All three images: Courtesy of Anglo-Australian Observatory, photograph by David Malin
[စာမျက်နှာ ၁၈ ပါ ရုပ်ပုံ]
ယေဟောဝါအားယုံကြည်ကိုးစားခြင်းဟူသည် ကိုယ်တော်ယုံကြည်စိတ်ချသူတို့ကို ယုံကြည်ကိုးစားခြင်းမည်၏