‘အားယူ၍ရဲရင့်ခြင်းရှိကြလော့!’
‘အားယူ၍ရဲရင့်ခြင်းရှိကြလော့!’
“အားယူကြလော့! ငါသည် ဤလောကကိုအောင်ပြီ။”—ယောဟန် ၁၆:၃၃၊ သမ္မာ။
၁။ ခါနာန်ပြည်တွင် ဣသရေလလူမျိုး တွေ့ ကြုံကြရမည့်အခြေအနေအတွက် အဘယ်အားပေးမှုရရှိခဲ့ကြသနည်း။
ကတိထားရာပြည်ထဲ ဣသရေလလူတို့ဝင်ရန် ယော်ဒန်မြစ်ကို ဖြတ်ကူးမည့်ဆဲဆဲအချိန်တွင် သူတို့အား မောရှေဤသို့ဆိုခဲ့၏– “အားယူ၍ရဲရင့်ခြင်းရှိကြလော့။ မစိုးရိမ်ကြနှင့်။ သူတို့ကိုမကြောက်ကြနှင့်။ ထာဝရဘုရား [“ယေဟောဝါ၊” ကဘ] သည် သင်တို့ဘုရားသခင်ဖြစ်၍ သင်တို့နှင့်အတူ ကိုယ်တိုင်ကြွတော်မူမည်။” ထို့နောက် မောရှေသည် ဣသရေလလူမျိုးကို ခါနာန်ပြည်ထဲ ဦးစီးဦးဆောင်သွားမည့် ယောရှုအားခေါ်၍ ရဲရင့်ခြင်းရှိရန် အကြံပြုချက်ကို ကိုယ်တိုင်ပြန်မိန့်မှာခဲ့၏။ (တရားဟောရာ ၃၁:၆၊ ၇) နောက်ပိုင်းတွင် ယေဟောဝါကိုယ်တော်တိုင် ယောရှုကို ဤသို့အားပေးတော်မူခဲ့သည်– “အားယူ၍ရဲရင့်ခြင်းရှိလော့။ . . . အားယူ၍ အလွန်ရဲရင့်ခြင်းရှိလော့။” (ယောရှု ၁:၆၊ ၇၊ ၉) အဆိုပါစကားများသည် အခန့်သင့်စကားများဖြစ်၏။ ဣသရေလလူမျိုးသည် ယော်ဒန်မြစ်တစ်ဖက်ကမ်းတွင် တွေ့ဆုံကြရမည့် ခွန်အားဗလကြီးမားသော ရန်သူများကို ရင်ဆိုင်တိုက်ခိုက်နိုင်ရန် ရဲစွမ်းသတ္တိလိုပေသည်။
၂။ မျက်မှောက်ခေတ်တွင် အဘယ်အခြေအနေမျိုးကို ကျွန်ုပ်တို့တွေ့ ကြုံနေကြရပြီး အဘယ်အရာပြုဖို့လိုသနည်း။
၂ ယနေ့ စစ်မှန်သောခရစ်ယာန်များသည် ကတိထားရာ ကမ္ဘာသစ်ထဲသို့ မကြာမီ ဝင်ရောက်ကြရတော့မည်ဖြစ်ရာ ယောရှုကဲ့သို့ ရဲစွမ်းသတ္တိရှိရန်လိုသည်။ (၂ ပေတရု ၃:၁၃; ဗျာ. ၇:၁၄) သို့ဖြစ်လင့်ကစား ယောရှု၏အခြေအနေနှင့် ကျွန်ုပ်တို့၏အခြေအနေသည် မတူညီပါ။ ယောရှုသည် ဓားများ၊ လှံများနှင့် တိုက်ခိုက်ခဲ့၏။ ကျွန်ုပ်တို့မှာမူ ဝိညာဉ်ရေးစစ်ဆင်နွှဲနေရရာ ပကတိစစ်လက်နက်များကို အသုံးမပြုကြချေ။ (ဟေရှာယ ၂:၂-၄; ဧဖက် ၆:၁၁-၁၇) ထို့အပြင်၊ ယောရှုသည် ကတိထားရာပြည်ထဲဝင်ပြီးနောက်၌ပင် စစ်ပွဲများစွာကို အကြိတ်အနယ် ယှဉ်ပြိုင်တိုက်ခိုက်ခဲ့ရသည်။ ကျွန်ုပ်တို့မူကား ကမ္ဘာသစ်ထဲမဝင်မီ ယခုပင် အကြိတ်အနယ်ဆိုင်ပြိုင်တိုက်လှန်ကြရ၏။ ရဲရင့်ဖို့လိုသည့် အခြေအနေအချို့ကို သုံးသပ်ကြည့်ကြစို့။
ကျွန်ုပ်တို့အဘယ်ကြောင့် ဆိုင်ပြိုင်တိုက်လှန်ကြရသနည်း
၃။ ကျွန်ုပ်တို့၏အဓိကရန်သူကြီးအကြောင်း သမ္မာကျမ်းစာက အဘယ်အရာဖော်ပြသနည်း။
၃ တမန်တော်ယောဟန်က ဤသို့ရေးသားခဲ့သည်– “ငါတို့သည် ဘုရားသခင်နှင့်စပ်ဆိုင်သည်ကိုလည်းကောင်း၊ လော [က] သားအပေါင်းတို့သည် [စာတန်] ၏လက်၌ရှိကြသည်ကိုလည်းကောင်း ငါတို့သိကြ၏။” (၁ ယောဟန် ၅:၁၉) ခရစ်ယာန်များသည် သူတို့၏ယုံကြည်ခြင်းကို အဘယ်ကြောင့် ကြိုးစားထိန်းသိမ်းကြရကြောင်းကို ထိုစကားများကဖော်ပြသည်။ ခရစ်ယာန်တစ်ဦးသည် သူ၏သမာဓိကိုစောင့်ထိန်းသည့်အခါ စာတန်အတွက် အတိုင်းအတာတစ်ခုအထိ ရှုံးနိမ့်မှုဖြစ်သည်။ ထို့ကြောင့်၊ စာတန်သည် “ဟောက်သောခြင်္သေ့” ကဲ့သို့ တည်ကြည်သောခရစ်ယာန်များကို ခြိမ်းခြောက်ဝါးမျိုဖို့ ကြိုးစားနေခြင်းဖြစ်သည်။ (၁ ပေတရု ၅:၈) သူသည် ဝိညာဉ်တော်ဖွားခရစ်ယာန်များနှင့် ၎င်းတို့၏အပေါင်းအဖော်များကို အမှန်တကယ်စစ်ဆင်နွှဲနေသည်။ (ဗျာ. ၁၂:၁၇) ဤတိုက်ပွဲတွင် သူ၏ရည်ရွယ်ချက်များကို သိလျက်ဖြစ်စေ၊ မသိဘဲလျက်ဖြစ်စေ ဆောင်ရွက်ပေးသူများကို စာတန်အသုံးပြုသည်။ ထို့ကြောင့် စာတန်နှင့် သူအသုံးချသူများတစ်ဖက်တွင် မားမားမတ်မတ်ရပ်တည်ရန် သတ္တိရှိဖို့လိုသည်။
၄။ အဘယ်သတိပေးချက်ကို ယေရှုပေးခဲ့သနည်း၊ အဘယ်အရည်အသွေးကို စစ်မှန်သောခရစ်ယာန်များ ပြသခဲ့ကြသနည်း။
၄ စာတန်နှင့် သူအသုံးချသူများသည် သတင်းကောင်းကို အစွမ်းကုန် ဆီးတားပိတ်ပင်ကြလိမ့်မည်ဖြစ်ကြောင်း တပည့်များကို ယေရှုဤသို့ကြိုသတိပေးခဲ့သည်– “လူများတို့သည် သင်တို့ကိုညှဉ်းဆဲခြင်း၊ အသေသတ်ခြင်းကိုခံစေခြင်းငှာ အပ်နှံကြလိမ့်မည်။ ငါ၏နာမကြောင့်လည်း ခပ်သိမ်းသောလူမျိုးတို့သည် သင်တို့ကိုမုန်းကြလိမ့်မည်။” (မဿဲ ၂၄:၉) ပထမရာစုတွင် ထိုသို့ဖြစ်ခဲ့ပြီး ယနေ့လည်း ထိုအတိုင်းပင်ဖြစ်သည်။ အမှန်မှာ၊ ယေဟောဝါ၏ မျက်မှောက်ခေတ်သက်သေခံအချို့ခံခဲ့ရသည့် နှိပ်စက်ညှဉ်းပန်းမှုသည် သမိုင်းတစ်လျှောက် မည်သည့်နှိပ်စက်ညှဉ်းပန်းမှုမဆိုကဲ့သို့ ရက်စက်ပြင်းထန်ခဲ့ပေပြီ။ သို့တိုင်၊ စစ်မှန်သောခရစ်ယာန်များသည် ထိုသို့သောဖိနှိပ်မှုကို ရဲရင့်စွာရင်ဆိုင်ကြ၏။ “လူကိုကြောက်ရွံ့ခြင်းသဘောသည် ကျော့ကွင်းကိုထောင်တတ်” ကြောင်း သူတို့သိရှိကြရာ အဆိုပါကျော့ကွင်းတွင် မကျော့မိလိုကြချေ။—သု. ၂၉:၂၅။
၅၊ ၆။ (က) အဘယ်အခြေအနေများတွင် ကျွန်ုပ်တို့ရဲရင့်ဖို့လိုသနည်း။ (ခ) တည်ကြည်သောခရစ်ယာန်များသည် ရဲရင့်ခြင်းရှိမရှိ စမ်းသပ်ခံရသောအခါ မည်သို့တုံ့ပြန်ကြရမည်နည်း။
၅ နှိပ်စက်ညှဉ်းပန်းခြင်းအပြင် အခြားစိန်ခေါ်ချက်များအတွက်လည်း ရဲရင့်ခြင်းရှိဖို့လိုသည်။ လူအချို့အတွက် သူစိမ်းများကို သတင်းကောင်းပြောခြင်းသည် စိန်ခေါ်ချက်တစ်ခုဖြစ်၏။ ကျောင်းသူကျောင်းသားအချို့သည် . . . သစ္စာဆိုရန် တောင်းဆိုခံရသည့်အခါ သူတို့၏ရဲရင့်ခြင်း စမ်းသပ်ခံရကြသည်။ ထိုကဲ့သို့သစ္စာဆိုခြင်းသည် အမှန်မှာ ဝတ်ပြုမှုအသုံးအနှုန်းပင်ဖြစ်သဖြင့် ခရစ်ယာန်လူငယ်များသည် ဘုရားသခင်၏အလိုတော်နှင့်အညီပြုမူဖို့ သတ္တိရှိရှိရပ်တည်ခဲ့ကြရာ သူတို့၏မှတ်တမ်းကောင်းသည် အလွန်အားရစရာဖြစ်ခဲ့ပေသည်။
၆ အတိုက်အခံပြုသူများသည် လူထုဆက်သွယ်ရေးကိုအသုံးပြုပြီး ဘုရားသခင့်ကျေးကျွန်များအကြောင်း မကောင်းသတင်းဖြန့်သည့်အခါ သို့မဟုတ် “မတရားသောအကြံ” ကိုကြံစည်၍ စစ်မှန်သောဝတ်ပြုရေးကို ကြိုးစားပိတ်ပင်သည့်အခါတို့၌လည်း ရဲစွမ်းသတ္တိရှိဖို့လိုသည်။ (ဆာလံ ၉၄:၂၀) ဥပမာ၊ သတင်းစာ၊ ရေဒီယို၊ ရုပ်မြင်သံကြားတို့မှ ယေဟောဝါသက်သေများအကြောင်း မဟုတ်မမှန်သတင်းများ လွှင့်သောအခါ ကျွန်ုပ်တို့မည်သို့သဘောထားသင့်သနည်း။ ထိတ်လန့်သွားသင့်သလော။ မဖြစ်သင့်ပေ။ ယင်းသို့ဖြစ်မည်ဟု ကျွန်ုပ်တို့ကြိုသိထားကြသည်။ (ဆာလံ ၁၀၉:၂) ထုတ်လွှင့်သည့်မုသာစကားကို လူတချို့ယုံလျှင်လည်း ကျွန်ုပ်တို့မအံ့သြကြပါ၊ အကြောင်းမှာ “ဉာဏ်တိမ်သောသူသည် သူတစ်ပါးပြောသမျှကို ယုံတတ်” ၏။ (သု. ၁၄:၁၅) သစ္စာရှိခရစ်ယာန်များသည် မိမိတို့ညီအစ်ကိုများအကြောင်း ပြောဆိုလေသမျှကို ယုံကြည်လက်ခံကြမည်မဟုတ်၊ မကောင်းသတင်းလွှင့်ထားသောကြောင့် ခရစ်ယာန်အစည်းအဝေးများမတက်၊ လယ်ကွင်းဓမ္မအမှုတွင်မပါဝင်၊ ယုံကြည်ခြင်းအားနည်းသွားဖို့ ခွင့်ပြုကြမည်မဟုတ်ပါ။ ယင်းအစား “ဘုရားသခင့်အမှုတော်ဆောင်များအဖြစ် . . . အသရေတင်ခြင်းနှင့်ချခြင်း၊ ချီးမွမ်းခြင်းနှင့် ကုန်းချောခြင်းများကို ခံရသည့်အားဖြင့်လည်းကောင်း၊ [အတိုက်အခံပြုသူတို့၏အဆိုအရ] လူလိမ်အနေနှင့် [အမှန်စင်စစ်အားဖြင့်] မှန်ကန်သူ . . . ဖြစ်ခြင်းအားဖြင့်လည်းကောင်း ကိုယ်ကိုထောက်ခံကြသည်။”—၂ ကောရိန္သု ၆:၄-၁၀၊ သမ။
၇။ အဘယ်နှိုက်နှိုက်ချွတ်ချွတ်မေးခွန်းများကို မိမိကိုယ်ကိုမေးနိုင်သနည်း။
၇ တိမောသေထံ ပေါလုစာရေးရာတွင် ဤသို့ပြောဆိုခဲ့သည်– “ဘုရားသခင်သည် ကြောက်တတ်သောစိတ်သဘောကို ငါတို့အား ပေးတော်မူသည်မဟုတ်။ တန်ခိုးပါသောစိတ် . . . ကိုပေးတော်မူ၏။ ထို့ကြောင့် ငါတို့သခင်ဘုရား၏သက်သေကို . . . ရှက်ကြောက်ခြင်းမရှိနှင့်။” (၂ တိမောသေ ၁:၇၊ ၈; မာကု ၈:၃၈) ထိုစကားများကိုဖတ်ရှုပြီးဖြစ်ရာ မိမိတို့ကိုယ်ကို ဤသို့မေးနိုင်သည်– ‘ကျွန်ုပ်၏ယုံကြည်ချက်ကို ရှက်မိသလား၊ ဒါမှမဟုတ် ကျွန်ုပ်သတ္တိရှိသလား။ ကျွန်ုပ်အလုပ်လုပ်တဲ့နေရာ (ဒါမှမဟုတ် ကျောင်း) မှာ ကျွန်ုပ် ယေဟောဝါသက်သေဖြစ်တယ်လို့ အသိပေးသလား၊ ဒါမှမဟုတ် ဖုံးကွယ်ဖို့ ကြိုးစားသလား။ သူများနဲ့မတူလို့ ရှက်သလား၊ ဒါမှမဟုတ် ယေဟောဝါနဲ့ကျွန်ုပ်ရဲ့ဆက်ဆံရေးအတွက် ဂုဏ်ယူသလား။’ တစ်ဦးတစ်ယောက်သည် သတင်းကောင်းဟောပြောခြင်း၊ လူကြိုက်မများသည့် ရပ်တည်ချက်ကြောင့် အပျက်သဘောရှိမည်ဆိုလျှင် ယေဟောဝါက ယောရှုကို “အားယူ၍ရဲရင့်ခြင်းရှိလော့” ဟု ညွှန်ကြားခဲ့သည်ကို သတိရပါ။ ကျွန်ုပ်တို့၏အလုပ်ဖော်များ၊ အတန်းဖော်များ၏ ရှုမြင်ချက်မဟုတ်ဘဲ ယေဟောဝါနှင့်ယေရှုခရစ်၏ ရှုမြင်ချက်ကသာ အရေးကြီးကြောင်းကို ဘယ်တော့မျှမမေ့ပါနှင့်။—ဂလာတိ ၁:၁၀။
ရဲရင့်ခြင်း ရှိစေနိုင်ပုံ
၈၊ ၉။ (က) တစ်ချိန်တစ်ခါက အစောပိုင်းခရစ်ယာန်များ၏ရဲရင့်ခြင်းသည် မည်သို့စမ်းသပ်ခံခဲ့ရသနည်း။ (ခ) ပေတရုနှင့်ယောဟန်တို့ ခြိမ်းခြောက်ခံရသည့်အခါ မည်သို့တုံ့ပြန်ခဲ့ကြသနည်း၊ သူတို့နှင့် သူတို့၏ညီအစ်ကိုများသည် အဘယ်အရာကို တွေ့ ကြုံခဲ့ကြသနည်း။
၈ ဤခဲယဉ်းကျပ်တည်းသည့်ကာလအတွင်း ကျွန်ုပ်တို့၏သမာဓိကို ဆက်လက်စောင့်ထိန်းနိုင်မည့် ရဲရင့်ခြင်းကို မည်သို့ပြုစုပျိုးထောင်နိုင်မည်နည်း။ ရဲရင့်ခြင်းကို အစောပိုင်းခရစ်ယာန်များ မည်သို့ပြုစုပျိုးထောင်ခဲ့ကြသနည်း။ ယေရုရှလင်မြို့မှ ယဇ်ပုရောဟိတ်အကြီးတို့နှင့် အသက်ကြီးသူတို့က ပေတရုနှင့်ယောဟန်အား ယေရှုနာမဖြင့် မဟောပြောရန်ပြောဆိုခဲ့ချိန်တွင် အဘယ်အရာဖြစ်ပျက်ခဲ့ကြောင်း သုံးသပ်ကြည့်ပါ။ ထိုတပည့်များသည် ငြင်းဆိုခဲ့ကြသဖြင့် ခြိမ်းခြောက်ခံခဲ့ရပြီးနောက် လွတ်မြောက်လာကြသည်။ ၎င်းနောက် သူတို့သည် ညီအစ်ကိုများထံသွား၍ အတူတကွ ဤသို့ဆုတောင်းခဲ့ကြသည်– ‘အိုထာဝရဘုရား၊ ယခုအခါ ထိုသူတို့၏ခြိမ်းခြောက်ခြင်းကို မှတ်တော်မူပါ။ . . . ကိုယ်တော်၏ကျွန်တို့သည် နှုတ်မြွက်တရားတော်ကို ရဲရင့်စွာဟောပြောပါမည်အကြောင်း ကယ်မသနားတော်မူပါ။’ (တမန်တော် ၄:၁၃-၃၀) ထိုအခါ ယေဟောဝါသည် သူတို့ကို သန့်ရှင်းသောဝိညာဉ်တော်ဖြင့် ခွန်အားပေးတော်မူခဲ့သည်၊ နောက်ပိုင်းတွင် ဂျူးခေါင်းဆောင်များ သက်သေထူခဲ့သည့်အတိုင်း သူတို့၏သွန်သင်ခြင်းနှင့် “ယေရုရှလင်မြို့ကို . . . ပြည့်စေ” ခဲ့ကြ၏။—တမန်တော် ၅:၂၈။
၉ ထိုအချိန်တွင် အဘယ်အရာဖြစ်ပျက်ခဲ့ကြောင်း ဆန်းစစ်ကြည့်ကြစို့။ ကိုယ်တော်၏တပည့်များသည် ဂျူးခေါင်းဆောင်များ၏ ခြိမ်းခြောက်မှုကိုခံကြရသောအခါ အညံ့ခံအရှုံးပေးလိုက်ဖို့ သူတို့မစဉ်းစားခဲ့ကြပေ။ ယင်းအစား တပည့်များသည် ဆက်ဟောပြောနိုင်ဖို့ ရဲစွမ်းသတ္တိရှိရန် ဆုတောင်းခဲ့ကြ၏။ ထို့နောက် သူတို့ဆုတောင်းသည့်အတိုင်း လုပ်ဆောင်ခဲ့ကြရာ ယေဟောဝါသည် သူတို့ကို ဝိညာဉ်တော်ဖြင့် ခွန်အားပေးလေသည်။ နှစ်အနည်းငယ်ကြာသော် အခြားအဖြစ်အပျက်တစ်ခုနှင့်ပတ်သက်၍ ပေါလုရေးသားခဲ့သောစကားသည် ခရစ်ယာန်များ နှိပ်စက်ညှဉ်းပန်းခံရသည့်အချိန်နှင့်သက်ဆိုင်ကြောင်း သူတို့၏တွေ့ကြုံမှုက ဖော်ပြ၏။ ပေါလုဤသို့ဆိုခဲ့သည်– “ငါ့ကိုခွန်အားနှင့်ပြည့်စုံစေတော်မူသော ခရစ်တော်အားဖြင့် ခပ်သိမ်းသောအမှုတို့ကို ငါတတ်စွမ်းနိုင်၏။”—ဖိလိပ္ပိ ၄:၁၃။
၁၀။ ပင်ကိုသဘောအရ ရှက်ကြောက်တတ်သူများအတွက် ယေရမိ၏တွေ့ ကြုံမှုက မည်သို့ကူညီပေးသနည်း။
၁၀ ဥပမာ၊ လူတစ်ဦးသည် ပင်ကိုသဘောအရ ရှက်ကြောက်တတ်သည်ဆိုပါစို့။ ထိုသူသည် အတိုက်အခံရင်ဆိုင်ရလျှင် ယေဟောဝါ၏အမှုတော်ကို ရဲရင့်စွာ ထမ်းဆောင်နိုင်ပါမည်လော။ အမှန်ထမ်းဆောင်နိုင်ပါသည်! ယေရမိကို ပရောဖက်တစ်ပါးအဖြစ် ယေဟောဝါခန့်အပ်ခဲ့သည့်အခါ သူ၏တုံ့ပြန်မှုကို အမှတ်ရပါ။ ထိုလူငယ်က “အကျွန်ုပ်သည် . . . သူငယ်ဖြစ်ပါ၏” ဟုဆိုခဲ့သည်။ စွမ်းဆောင်နိုင်မည်မဟုတ်ဟု သူခံစားခဲ့ရကြောင်း ထင်ရှားသည်။ သို့တိုင်၊ ယေဟောဝါက “‘အကျွန်ုပ်သည် သူငယ်ဖြစ်ပါ၏’ ဟုမပြောနှင့်။ အကြင်သူရှိရာသို့ သင့်ကိုငါစေလွှတ်၏။ ထိုသူရှိရာသို့ သင်သွားရမည်။ အကြင်စကားကို ငါမှာထား၏။ ထိုစကားကို သင်ဆင့်ဆိုရမည်။ သူတို့ကိုမကြောက်နှင့်။ ‘သင့်ကိုကယ်နုတ်ခြင်းငှာ သင်နှင့်အတူငါရှိသည်’” ဟုသူ့ကို အားပေးတော်မူခဲ့သည်။ (ယေရမိ ၁:၆-၁၀) ယေဟောဝါအား ယေရမိယုံကြည်စိတ်ချခဲ့သည်၊ ယင်းကြောင့် ယေဟောဝါပေးသည့်ခွန်အားဖြင့် သူ၏ဆုတ်ဆိုင်းနေမှုကို ကျော်လွှားနိုင်ခဲ့ပြီး ဣသရေလနိုင်ငံတွင် ရဲစွမ်းသတ္တိ ထူးထူးခြားခြားပြသည့် သက်သေတစ်ဦးဖြစ်ခဲ့သည်။
၁၁။ ယနေ့ ခရစ်ယာန်များကို အဘယ်အရာက ယေရမိကဲ့သို့ဖြစ်စေသနည်း။
၁၁ ယနေ့ ဝိညာဉ်တော်ဖွားခရစ်ယာန်များသည်လည်း ယေရမိထမ်းဆောင်ရသည့်တာဝန်မျိုး ရရှိထားကြသည်၊ “အခြားသိုး” အဝင် “လူအုပ်ကြီး” ၏ထောက်မကူညီမှုဖြင့် သူတို့သည် လျစ်လျူရှုမှု၊ လှောင်ပြောင်သရော်မှုနှင့် နှိပ်စက်ညှဉ်းပန်းမှုတို့ကို ရင်ဆိုင်ရလျက်ပင် ယေဟောဝါ၏ရည်ရွယ်တော်မူချက်များကို ဆက်၍ကြွေးကြော်ကြသည်။ (ဗျာ. ၇:၉; ယောဟန် ၁၀:၁၆) “မကြောက်နှင့်” ဟူ၍ ယေရမိကို ယေဟောဝါမိန့်တော်မူခဲ့သောစကားကိုထောက်၍ သူတို့အားယူကြသည်။ သူတို့ကို ဘုရားသခင်ခန့်အပ်ထားကြောင်း ဘယ်တော့မျှမမေ့ဘဲ ကိုယ်တော်၏သတင်းတရားကို ဟောပြောလျက်နေကြသည်။—၂ ကောရိန္သု ၂:၁၇။
တုပထိုက်သည့် ရဲရင့်ခြင်းပုံနမူနာများ
၁၂။ ယေရှုသည် ရဲရင့်ခြင်းနှင့်ပတ်သက်၍ အဘယ်ပုံသက်သေကောင်း ဖော်ပြခဲ့သနည်း၊ ကိုယ်တော်၏တပည့်များကို ကိုယ်တော်မည်သို့အားပေးခဲ့သနည်း။
၁၂ ကျွန်ုပ်တို့သည် သတ္တိရှိရှိပြုမူခဲ့ကြသည့် ယေရမိကဲ့သို့သော အခြားသူများ၏ပုံနမူနာများကို စေ့စေ့စဉ်းစားဆင်ခြင်မည်ဆိုလျှင် ရဲရင့်သည့်စိတ်ကြိုးစားမွေးမြူရာတွင် အကူအညီရနိုင်သည်။ (ဆာလံ ၇၇:၁၂) ဥပမာ၊ ယေရှု၏ဓမ္မအမှုကို ကျွန်ုပ်တို့ဆန်းစစ်ကြည့်သောအခါ စာတန်လာသွေးဆောင်ချိန်နှင့် ဂျူးခေါင်းဆောင်များ အကြီးအကျယ်အတိုက်အခံပြုသည့်အချိန်တို့တွင် ကိုယ်တော်၏ရဲစွမ်းသတ္တိကို ကျွန်ုပ်တို့အထင်ကြီးလေးစားခဲ့ကြသည်။ (လုကာ ၄:၁-၁၃; ၂၀:၁၉-၄၇) ယေဟောဝါပေးသောခွန်အားဖြင့် ယေရှုသည် မတုန်လှုပ်ခဲ့ပေ၊ ကိုယ်တော်မသေဆုံးမီအချိန်တိုလေးတွင် မိမိ၏တပည့်များကို ဤသို့မိန့်ဆိုခဲ့၏– “သင်တို့သည် ဤလောက၌ ဆင်းရဲ . . . ကိုခံရကြ၏။ သို့သော်လည်း အားယူကြလော့။ ငါသည် ဤလောကကိုအောင်ပြီ။” (ယောဟန် ၁၆:၃၃၊ သမ္မာ; ၁၇:၁၆) ယေရှု၏တပည့်များသည် ကိုယ်တော့်စံနမူနာကိုလိုက်ကြမည်ဆိုလျှင် သူတို့လည်း ဤလောကကိုအောင်နိုင်သူများ ဖြစ်ကြပေမည်။ (၁ ယောဟန် ၂:၆; ဗျာ. ၂:၇၊ ၁၁၊ ၁၇၊ ၂၆) သို့သော် သူတို့ ‘ရဲရင့်’ ဖို့လိုပေမည်။
၁၃။ ဖိလိပ္ပိမြို့သားများကို ပေါလု မည်သို့အားပေးခဲ့သနည်း။
၁၃ ယေရှုသေဆုံးပြီးနောက် နှစ်အနည်းငယ်အကြာတွင် ပေါလုနှင့် သိလတို့သည် ဖိလိပ္ပိမြို့၌ အကျဉ်းချခံရသည်။ နောက်ပိုင်းတွင် “[သူတို့၏] ရန်သူများကြောင့် အလျှင်းမကြောက်ရွံ့မတုန်လှုပ်ဘဲ၊ တစ်ပါးတည်းသော စိတ်ဝိညာဉ်၌တည်၍၊ ဧဝံဂေလိတရား [“သတင်းကောင်း၊” ကဘ] နှင့်ဆိုင်သော ယုံကြည်ခြင်းအဖို့အလိုငှာ တညီတညွတ်တည်း ကြိုးစားအားထုတ်” ကြရန် ဖိလိပ္ပိအသင်းတော်ကို ပေါလုအားပေးခဲ့၏။ သူတို့ပိုအားရှိစေရန် ပေါလုဤသို့ပြောဆိုသေးသည်– ဤ “အကြောင်းအရာ [ခရစ်ယာန်များ နှိပ်စက်ညှဉ်းပန်းခံရခြင်း] သည် [နှိပ်စက်ညှဉ်းပန်းသူတို့] ၌ ပျက်စီးခြင်း၏နိမိတ်လက္ခဏာဖြစ်၏။ ဘုရားသခင်စီရင်တော်မူသောအားဖြင့် သင်တို့၌ကား ကယ်တင်ခြင်း၏နိမိတ်လက္ခဏာဖြစ်၏။ အကြောင်းမူကား သင်တို့သည် . . . ခရစ်တော်ကိုယုံကြည်ခြင်းအခွင့်မှတစ်ပါး၊ ခရစ်တော်အတွက်ကြောင့် ဆင်းရဲခံရခြင်းအခွင့်ကို ကျေးဇူးတော်အားဖြင့်ရကြ၏။”—ဖိလိပ္ပိ ၁:၂၇-၂၉။
၁၄။ ပေါလု၏ရဲရင့်ခြင်းကြောင့် ရောမမြို့တွင် အဘယ်အကျိုးဖြစ်ထွန်းခဲ့သနည်း။
၁၄ ဖိလိပ္ပိအသင်းတော်ထံ ပေါလုစာရေးချိန်တွင် သူသည် ထောင်ပြန်ကျနေသည်၊ ဤအကြိမ်တွင်မူ ရောမမြို့၌ဖြစ်၏။ သို့တိုင်၊ အခြားသူများကို ရဲရင့်စွာ ဆက်လက်ဟောပြောခဲ့သည်။ အဘယ်အကျိုးဖြစ်ထွန်းခဲ့သနည်း။ သူဤသို့ရေးသားခဲ့သည်– “ငါ၏အကျဉ်းခံရခြင်းသည် ခရစ်တော်နှင့်စပ်ဆိုင်ကြောင်း ကိုယ်ရံတော်တစ်တပ်လုံးမှစ၍ ကြွင်းသောသူအပေါင်းတို့တွင် ထင်ရှား၏။ အရှင်ဘုရား၌တည်သော ညီအစ်ကိုတို့အနက် များစွာသောသူတို့သည်လည်း ငါခံရသောချည်နှောင်ခြင်းကြောင့် ယုံကြည်စိတ်ချ၍ ကြောက်ရွံ့ခြင်းမရှိဘဲ ဘုရားသခင်၏နှုတ် [မြွက်] တော်ကို သာ၍ဟောပြောဝံ့ကြ၏။”—ဖိလိပ္ပိ ၁:၁၃၊ ၁၄၊ သမ္မာ။
၁၅။ ကျွန်ုပ်တို့ရဲရင့်ခြင်းရှိရန် စိတ်ပိုင်းဖြတ်ချက်ကို ခိုင်ခံ့စေမည့် ယုံကြည်ခြင်းရှိ ပုံနမူနာကောင်းများကို အဘယ်နေရာတွင် တွေ့ရှိနိုင်မည်နည်း။
၁၅ ပေါလု၏ပုံသက်သေသည် ကျွန်ုပ်တို့အတွက် အားပေးမှုဖြစ်သည်။ အာဏာရှင်ဆန်ဆန်အုပ်ချုပ်ရေး၊ ဓမ္မဆရာအုပ်ချုပ်ရေးအောက်ရှိ နိုင်ငံများစွာတွင် နှိပ်စက်ညှဉ်းပန်းခံခဲ့ရသည့် မျက်မှောက်ခေတ်ခရစ်ယာန်များတင်ပြသော ပုံသက်သေကောင်းများသည်လည်း အလားတူဖြစ်သည်။ အဆိုပါပုံသက်သေကောင်းများစွာကို ကင်းမျှော်စင်နှင့် နိုးလော့!မဂ္ဂဇင်းများတွင်လည်းကောင်း၊ ယေဟောဝါသက်သေများ၏ နှစ်ချုပ်စာအုပ်များတွင်လည်းကောင်း ရေးသားဖော်ပြထား၏။ ထိုသမိုင်းမှတ်တမ်းများကို သင်ဖတ်ရှုသောအခါ သူတို့၏အတွေ့အကြုံများကို ပြောပြသူများသည် ကျွန်ုပ်တို့ကဲ့သို့ပင် သာမန်လူများဖြစ်ကြကြောင်း; အလွန်ခက်ခဲသောအခြေအနေများကို သူတို့တွေ့ကြုံကြရသော်လည်း ယေဟောဝါသည် သူတို့ကို သာမန်ထက်ထူးကဲသောတန်ခိုးတော်ကို ပေးသနားခဲ့သဖြင့် သူတို့ခံရပ်နိုင်ခဲ့ကြောင်း သတိရပါ။ ထိုသို့သောအခြေအနေမျိုးပေါ်လာပါက ကိုယ်တော်သည် ကျွန်ုပ်တို့ကို ထပ်တူခွန်အားပေးမည်ဖြစ်ကြောင်း ယုံကြည်စိတ်ချနိုင်ပါသည်။
ကျွန်ုပ်တို့၏ရဲရင့်သောရပ်တည်မှုက ယေဟောဝါအလိုတော်နှင့်တွေ့ပြီး ကိုယ်တော်ကို ဂုဏ်တင်
၁၆၊ ၁၇။ ယနေ့ ရဲရင့်သောသဘောကို ကျွန်ုပ်တို့မည်သို့မွေးမြူနိုင်မည်နည်း။
၁၆ ခရစ်ယာန်တစ်ဦးသည် အမှန်တရားနှင့် ဖြောင့်မတ်ခြင်းအတွက် အခိုင်အမာရပ်တည်မည်ဆိုလျှင် ထိုသူသည် ရဲရင့်ခြင်းရှိ၏။ သူသည် ကြောက်ရွံ့တုန်လှုပ်နေသော်လည်း ထိုသို့ရပ်တည်မည်ဆိုလျှင် ပို၍ပင် ရဲရင့်ပေသည်။ အမှန်မှာ၊ မည်သည့်ခရစ်ယာန်မဆိုသည် ယေဟောဝါ၏အလိုတော်ကို အမှန်ပင်ထမ်းဆောင်လိုလျှင်၊ ဆက်၍တည်ကြည်ရန် စိတ်ဆုံးဖြတ်ထားမည်ဆိုလျှင်၊ ဘုရားသခင်ကို အစဉ်မပြတ်ယုံကြည်ကိုးစားမည်ဆိုလျှင်၊ အတိတ်က မရေမတွက်နိုင်သော မိမိကဲ့သို့သောသူများကို ယေဟောဝါခွန်အားပေးခဲ့ကြောင်း အမြဲအမှတ်ရနေမည်ဆိုလျှင် ရဲရင့်ခြင်းရှိနိုင်ပေသည်။ ထို့ပြင်၊ ကျွန်ုပ်တို့၏ရဲရင့်သောရပ်တည်မှုကို ယေဟောဝါနှစ်သက်၍ ဂုဏ်ယူကြောင်း ကျွန်ုပ်တို့သိရှိလျှင် အလျှော့မပေးရန် ပို၍ပင် စိတ်ပိုင်းဖြတ်ထားပေမည်။ ကျွန်ုပ်တို့သည် ကိုယ်တော့်ကို အလွန်ချစ်မြတ်နိုးသောကြောင့် လှောင်ပြောင်သရော်မှု သို့မဟုတ် ထိုထက်မကပင်ခံဖို့ အသင့်ရှိကြသည်။—၁ ယောဟန် ၂:၅; ၄:၁၈။
၁၇ ကျွန်ုပ်တို့၏ယုံကြည်ခြင်းကြောင့် ဆင်းရဲခံနေရလျှင် ကျွန်ုပ်တို့အမှားတစ်ခုခုလုပ်ထားမိ၍ ဤသို့ခံရခြင်းမဟုတ်ပါ။ (၁ ပေတရု ၃:၁၇) ယေဟောဝါ၏ပိုင်သအုပ်စိုးမှုကို ထောက်ခံခြင်း၊ ကောင်းမှုပြုခြင်း၊ လောကနှင့်မစပ်ဆိုင်ခြင်းတို့ကြောင့် ကျွန်ုပ်တို့ဆင်းရဲခံနေကြရ၏။ ယင်းနှင့်စပ်လျဉ်း၍၊ တမန်တော်ပေတရုက ဤသို့ဆိုခဲ့သည်– “ကောင်းမွန်စွာပြု၍ ဆင်းရဲခံရသောအခါ သည်းခံလျှင်၊ ဘုရားသခင့်ရှေ့တော်၌ ကျေးဇူးရှိ၏။” ထို့ပြင် ပေတရုဤသို့လည်းဆို၏– “ဘုရားသခင်၏အလိုတော်အတိုင်း . . . ဆင်းရဲခံရသောသူတို့သည် ကောင်းသောအကျင့်ကိုကျင့်သည်တွင် သစ္စာရှိတော်မူသော ဖန်ဆင်းတော်မူသည့်အရှင့်ထံ၌ မိမိတို့အသက်ဝိညာဉ်ကို အပ်နှံကြစေ။” (၁ ပေတရု ၂:၂၀; ၄:၁၉၊ သမ္မာ) မှန်ပါသည်၊ ကျွန်ုပ်တို့၏ယုံကြည်ခြင်းသည် ကျွန်ုပ်တို့၏မေတ္တာရှင်ဘုရားသခင် ယေဟောဝါ၏အလိုတော်နှင့်တွေ့ပြီး ကိုယ်တော်ကိုဂုဏ်တင်သည်။ ရဲစွမ်းသတ္တိရှိရန် အကြောင်းကောင်းတစ်ရပ်ဖြစ်သည်တကား!
အာဏာပိုင်များနှင့်စကားပြောဆိုခြင်း
၁၈၊ ၁၉။ တရားသူကြီးတစ်ဦးရှေ့ ကျွန်ုပ်တို့ရဲရင့်စွာရပ်တည်သည့်အခါ တစ်နည်းအားဖြင့် သူတို့အား အဘယ်အရာကိုသိစေသနည်း။
၁၈ ယေရှု၏နောက်လိုက်များသည် နှိပ်စက်ညှဉ်းပန်းခံရမည်ဟု ကိုယ်တော်မိန့်ကြားချိန်တွင် ဤသို့လည်းမိန့်ဆိုခဲ့သေးသည်– “[လူတို့သည်] သင်တို့ကို လွှတ်ရုံးသို့အပ်နှံကြလိမ့်မည်။ တရားဇရပ်တို့၌ ရိုက်ကြလိမ့်မည်။ ထိုသူတို့မှစ၍ တစ်ပါးအမျိုးသားတို့အား သက်သေဖြစ်စေခြင်းငှာ၊ မြို့ဝန်မင်း၊ ရှင်ဘုရင်ထံသို့ ငါ့ကြောင့် သင်တို့ကိုပို့ဆောင်ကြလိမ့်မည်။” (မဿဲ ၁၀:၁၇၊ ၁၈) မဟုတ်မမှန်စွပ်စွဲခံရပြီး တရားသူကြီးတစ်ဦး သို့မဟုတ် အုပ်စိုးရှင်တစ်ဦးရှေ့ ဆင့်ခေါ်ခံရသည့်အခါ ရဲရင့်ဖို့လိုသည်။ သို့တိုင်၊ ၎င်းအချိန်အခါများကိုအသုံးပြု၍ သတ္တိရှိရှိသက်သေခံလျှင် ကျွန်ုပ်တို့သည် အရေးကြီးသောအမှုကို အောင်မြင်ပြီးမြောက်စေရန် ခဲယဉ်းသောအခြေအနေတစ်ခုကို အခွင့်ကောင်းယူလိုက်ခြင်းဖြစ်သည်။ တစ်နည်းအားဖြင့်၊ ကျွန်ုပ်တို့ကိုတရားစီရင်နေသူများအား ဆာလံကျမ်းအခန်းကြီးနှစ်တွင်ပါသည့် ယေဟောဝါ၏ ဤစကားများကို ကြားသိစေသည်– “သို့ဖြစ်၍ ဘုရင်မင်းတို့ ပညာသတိရှိကြလော့။ မြေကြီးပေါ်ရှိတရားသူကြီးတို့ ဆုံးမခြင်းကိုခံကြလော့။ ကြောက်ရွံ့သောစိတ်နှင့် ထာဝရဘုရားအားဝတ်ပြု . . . ကြလော့။” (ဆာလံ ၂:၁၀၊ ၁၁၊ သမ္မာ) ယေဟောဝါသက်သေများသည် တရားရုံး၌ မှားယွင်းစွာ စွပ်စွဲခံရသောအခါ တရားသူကြီးများသည် လွတ်လပ်စွာဝတ်ပြုကိုးကွယ်မှုကို မကြာခဏ အတည်ပြုထောက်ခံပေးခဲ့ကြရာ ယင်းအတွက် ကျွန်ုပ်တို့ကျေးဇူးတင်လေးမြတ်ကြသည်။ သို့ရာတွင်၊ တရားသူကြီးတချို့မူ အတိုက်အခံပြုသူများ၏ ဩဇာလွှမ်းမိုးမှုကိုခံခဲ့ကြသည်။ ထိုသို့သောတရားသူကြီးများကို ကျမ်းစာက “ဆုံးမခြင်းကိုခံကြလော့” ဟုဆို၏။
၁၉ ယေဟောဝါဘုရားသခင်၏ ပညတ်တရားသာ အမြင့်မြတ်ဆုံးဖြစ်ကြောင်း တရားသူကြီးများ သတိပြုသင့်သည်။ တရားသူကြီးများအပါအဝင် လူသားအားလုံးတို့သည် ယေဟောဝါဘုရားသခင်နှင့် ယေရှုခရစ်တို့ထံ စာရင်းရှင်းရမည်ဖြစ်ကြောင်းကို သူတို့သတိရသင့်၏။ (ရောမ ၁၄:၁၀) ကျွန်ုပ်တို့နှင့်ပတ်သက်၍ တရားသူကြီးတစ်ဦး တရားမျှတစွာစီရင်သည်ဖြစ်စေ၊ မစီရင်သည်ဖြစ်စေ ယေဟောဝါသည် ကျွန်ုပ်တို့ကိုထောက်မသောကြောင့် ရဲရင့်စရာအကြောင်းများစွာရှိသည်။ သမ္မာကျမ်းစာက ဤသို့ဆိုသည်– “ကိုယ်တော်၌ ခိုလှုံသောသူအပေါင်းတို့သည် မင်္ဂလာရှိကြ၏။”—ဆာလံ ၂:၁၂၊ သမ္မာ။
၂၀။ နှိပ်စက်ညှဉ်းပန်းမှုနှင့် သွားပုပ်လေလွင့်ပြောဆိုမှုတို့ကို ကျွန်ုပ်တို့ခံရကြလျှင် အဘယ်ကြောင့်ပျော်ရွှင်နိုင်ကြသနည်း။
၂၀ တောင်ပေါ်တရားဟောချိန်တွင် ယေရှုဤသို့မိန့်ဆိုခဲ့၏– “ငါ့ကြောင့် သင်တို့ကို ကဲ့ရဲ့ညှဉ်းဆဲ၍ မမှန်ဘဲလျက် အပြစ်တကာတင်ကြသောအခါ၊ သင်တို့သည် မင်္ဂလာရှိကြ၏။ ဝမ်းမြောက်ရွှင်မြူးခြင်းရှိကြလော့။ အကြောင်းမူကား၊ ကောင်းကင်ဘုံ၌ သင်တို့၏အကျိုးသည်ကြီးလှပေ၏။ သင်တို့ရှေ့ကပေါ်ထွန်းသော ပရောဖက်တို့ကို ထိုနည်းတူညှဉ်းဆဲကြပြီ။” (မဿဲ ၅:၁၁၊ ၁၂) နှိပ်စက်ညှဉ်းပန်းခြင်းကိုယ်နှိုက်က နှစ်မြို့ဖွယ်မဟုတ်သော်လည်း လူထုဆက်သွယ်ရေးများမှ သွားပုပ်လေလွင့်သတင်းများလွှင့်ခြင်းအပါအဝင် နှိပ်စက်ညှဉ်းပန်းမှုများကြား ခိုင်မြဲစွာရပ်တည်ခြင်းက ဝမ်းမြောက်စရာအကြောင်းဖြစ်သည်။ ထိုသို့ရပ်တည်ခြင်းသည် ယေဟောဝါ၏အလိုတော်ကျဖြစ်ရာ ဆုကျေးဇူးခံစားရမည် သေချာသည်။ ကျွန်ုပ်တို့ ရဲရင့်စွာရပ်တည်ခြင်းက ကျွန်ုပ်တို့၌ စစ်မှန်သောယုံကြည်ခြင်းရှိကြောင်း တင်ပြပြီး ဘုရားသခင့်စိတ်တော်နှင့်တွေ့ဖို့ သေချာသည်။ ယေဟောဝါကို ကျွန်ုပ်တို့ အပြည့်အဝယုံကြည်ကိုးစားကြောင်း ယင်းကဖော်ပြနေခြင်းဖြစ်၏။ နောက်ဆောင်းပါးဖော်ပြမည့်အတိုင်း ထိုသို့ယုံကြည်ကိုးစားခြင်းသည် ခရစ်ယာန်တစ်ဦးအတွက် အရေးပါ၏။
သင်အဘယ်အရာသိရှိခဲ့သနည်း
• ယနေ့ အဘယ်အခြေအနေမျိုးတွင် ရဲရင့်ဖို့လိုသနည်း။
• ရဲရင့်ခြင်းအရည်အသွေးကို မည်သို့ပြုစုပျိုးထောင်နိုင်မည်နည်း။
• ရဲရင့်ခြင်းကို ကောင်းစွာဖော်ပြခဲ့ကြသူတချို့ကား မည်သူများနည်း။
• ရဲရင့်မှုဖြင့် ကျွန်ုပ်တို့ အဘယ်ကြောင့်လုပ်ဆောင်လိုကြသနည်း။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
ဂျာမနီနိုင်ငံမှ ဆီမွန် အာနယ်လ် (ယခု လိဘ်စတာ)၊ မာလာဝီနိုင်ငံမှ ဝီဒက်စ် မက်ဒွန်နာ၊ ယူကရိန်းနိုင်ငံမှ လစ်ဒီယာနှင့် အိုလက်ခ်ဆေး ကူရ်ဒက်စ်တို့သည် ရဲရင့်မှု တင်ပြခဲ့ကြပြီး မတရားသူကို ခုခံတွန်းလှန်ခဲ့ကြ
[စာမျက်နှာ ၁၀ ပါ ရုပ်ပုံ]
သတင်းကောင်းကို ကျွန်ုပ်တို့မရှက်ကြ
[စာမျက်နှာ ၁၁ ပါ ရုပ်ပုံ]
ထောင်ထဲတွင် ပေါလုရဲရင့်ခဲ့ရာ သတင်းကောင်းအတွက် အကျိုးများစွာရှိခဲ့
[စာမျက်နှာ ၁၂ ပါ ရုပ်ပုံ]
ကျွန်ုပ်တို့၏ကျမ်းဆိုင်ရာရပ်တည်မှုကို တရားသူကြီးအား ရဲရင့်စွာရှင်းပြမည်ဆိုလျှင် အရေးကြီးသောသတင်းတရားကို အသိပေးနေကြ