မတိုင်မီနှင့် ပြီးနောက် သူ့ဘဝ လုံးလုံးပြောင်းလဲခဲ့
“ဘုရားသခင်၌ချဉ်းကပ်ကြလော့။ သို့ပြုလျှင်၊ သင်တို့၌ချဉ်းကပ်တော်မူလိမ့်မည်”
မတိုင်မီနှင့် ပြီးနောက် သူ့ဘဝ လုံးလုံးပြောင်းလဲခဲ့
မတ်စီပဲန်းအတွက် ဘဝဟူသည် မနှစ်မြို့ဖွယ်ကောင်းပြီး အဓိပ္ပာယ်မရှိလိုက်လေခြင်း! သူသည် တောင်အာဖရိကအလယ်ရှိ လီဆိုသိုးနိုင်ငံမှ လုံမငယ်တစ်ဦးဖြစ်ခဲ့သည်။ မတ်စီပဲန်းသည် ချာ့ခ်ျဘာသာဝင်တစ်ဦးအဖြစ် ကြီးပြင်းလာ၏။ ဘုရားသခင်ထံချဉ်းကပ်နိုင်ဖို့ အကူအညီရမည့်အစား [ခရစ်ယာန်]သီလရှင်များက သူ့ကိုငွေပေး၊ ဖြားယောင်းကာ နှစ်များစွာ သူတို့ နှင့်အတူ အကျင့်ယိုယွင်းမှုများကို ပြုကျင့်စေကြသည်။
ယင်းကြောင့် မတ်စီပဲန်းသည် ဘာသာရေးကိုစိတ်ကုန်သွားပြီး မေတ္တာပြည့်ဝသည့်ဖန်ဆင်းရှင်သည် ဖန်ဆင်းခံလူသားများကို အမှန်ဂရုစိုက်တော်မူကြောင်း မယုံကြည်နိုင်ခဲ့ချေ။ လျစ်လျူရှုပစ်ပယ်ခံရ၍ မတော်မတရားပြုကျင့်ခံခဲ့ရသောကြောင့် မတ်စီပဲန်းတွင် အလွန်နာကြည်းဖွယ် စိတ်ဒဏ်ရာများရှိ၍ မိမိသည် လုံးလုံးတန်ဖိုးမရှိဟု ခံစားနေရရှာသည်။ ယင်းကြောင့် သူသည် အလွန်ကြမ်းတမ်း၍ ရန်လိုသူတစ်ဦးဖြစ်လာရာ ရာဇဝတ်မှုကျူးလွန်သူဖြစ်ခဲ့လေသည်။
အဆုံးတွင် မတ်စီပဲန်းသည် မီးရထားစီးသူများကို လုယက်သည့်ဂိုဏ်းဝင်တစ်ဦးဖြစ်လာ၏။ သူအဖမ်းခံရပြီး တောင်အာဖရိက၌ ထောင်ကျခဲ့သည်။ နောက်ပိုင်းတွင် သူ၏အမိမြေ၊ လီဆိုသိုးနိုင်ငံသို့ ပြည်နှင်ခံရရာ ထိုတွင် ရာဇဝတ်မှု၊ သောက်ကြူးမှု၊ အကြမ်းဖက်မှုနှင့် အကျင့်ယိုယွင်းမှု ပြည့်နှက်သည့်ဘဝဖြင့် ဆက်အသက်ရှင်ခဲ့သည်။
အလွန်စိတ်ဓာတ်ကျနေချိန် တစ်ချိန်တွင် မတ်စီပဲန်းသည် တွယ်မိတွယ်ရာသဘောမျိုးဖြင့် ဘုရားသခင်ထံ အကူအညီတောင်းလေသည်။ သူက “ဘုရားသခင်၊ ဒီအခြေအနေက ကျွန်မလွတ်မြောက်မယ်ဆိုရင် ကိုယ်တော်ကို ကျွန်မတတ်နိုင်သမျှ အမှုထမ်းပါ့မယ်” ဟုကတိပြုခဲ့သည်။
မကြာမီ ယေဟောဝါသက်သေများဖြစ်ကြသော ခရစ်ယာန်သာသနာပြုများ မတ်စီပဲန်းထံရောက်လာသည်။ သူ့ကို ကျမ်းစာသင်အံမှု ကမ်းလှမ်းခဲ့ကြသည်။ ထိုသို့ကျမ်းစာလေ့လာရာမှ ဘုရားသခင်သည် လျစ်လျူရှုပြီး ဂရုမစိုက်တတ်သောပုဂ္ဂိုလ်မဟုတ်ကြောင်း သူသိရှိလာခဲ့သည်။ အမှန်မှာ၊ “မုသာ၏အဘ” စာတန်သည် စဉ်းလဲ၍ လှည့်စားတတ်သောနည်းဗျူဟာများအသုံးပြုကာ မိမိတို့တန်ဖိုးမရှိဟု လူတို့ကိုအထင်ရှိစေပြီး ယေဟောဝါသည် မိမိတို့ကို ဘယ်သောအခါမျှချစ်နိုင်မည်မဟုတ်ဟု ထင်မှတ်စေကြောင်း သူသိမြင်လာခဲ့သည်။—ယောဟန် ၈:၄၄; ဧဖက် ၆:၁၁။
ယင်းနှင့်ဆန့်ကျင်လျက် ကျွန်ုပ်တို့သည် အတိတ်မှအပြစ်များကို နောင်တယူ၍ ဘုရားသခင့်ခွင့်လွှတ်မှုရှာယူပြီး ကိုယ်တော့်စိတ်တော်နှင့်တွေ့ဖို့ ကြိုးစားလျှင် ကိုယ့်ကိုယ်ကို လေးစားနိုင်ကြောင်း သိရှိလာသောအခါ မတ်စီပဲန်းအတွက် စိတ်သက်သာစရာပါတကား! ဘုရားသခင်သည် “[ကျွန်ုပ်တို့ ] ၏စိတ်နှလုံးထက် သာ၍ကြီးမြတ်” တော်မူပြီး ကိုယ်တော်သည် ကျွန်ုပ်တို့ကိုယ်ကို ရှုမြင်ပုံနှင့် လုံးဝခြားနားစွာရှုမြင်တော်မူကြောင်း သိနားလည်လာရန် အကူအညီရခဲ့သည်။—၁ ယောဟန် ၃:၁၉၊ ၂၀။
မတ်စီပဲန်းသည် ဆာလံဆရာ၏ ဤစကားများကိုဖတ်ရှုပြီး အလွန်ဝမ်းသာပီတိဖြစ်ခဲ့ရသည်– “[ယေဟောဝါ] သည် နှလုံးကြေကွဲသူတို့နှင့်နီးတော်မူ၏။ စိတ်ကြေမွသူတို့ကိုလည်း ကယ်တင်တော်မူ၏။” (ဆာလံ ၃၄:၁၈၊ သမ္မာ) ယေဟောဝါသည် မိမိ၏ကျေးကျွန်အချို့ စိတ်မချမ်းမသာဖြစ်ပြီး အရေးမပါသူဖြစ်၏ဟု ခံစားရလျှင်ပင် ထိုသူတို့ကိုစွန့်တော်မမူကြောင်း “စိတ်ကြေမွ” နေသူတစ်ဦးဖြစ်သူ မတ်စီပဲန်းသိရှိလာသည်။ ဘုရားသခင်သည် မိမိ၏သိုးအားလုံးကို ဂရုစိုက်တော်မူပြီး ခက်ခဲသောအချိန်များတွင် သူတို့ကို ထောက်မကူညီတော်မူကြောင်း သိလာရသည့် အခါ စိတ်ကြည်နူးမိသည်။ (ဆာလံ ၅၅:၂၂; ၁ ပေတရု ၅:၆၊ ၇) အထူးသဖြင့် “ဘုရားသခင်၌ ချဉ်းကပ်ကြလော့။ သို့ ပြုလျှင်၊ သင်တို့ ၌ ချဉ်းကပ်တော်မူလိမ့်မည်” ဟူသောစကားက သူ့စိတ်ကိုထိမိခဲ့သည်။—ယာကုပ် ၄:၈။
များမကြာမီ မတ်စီပဲန်း၏ဘဝတွင် ဘုရားသခင့်နှုတ်မြွက်စကားတော်၊ သမ္မာကျမ်းစာ၏တန်ခိုး ထင်ရှားလာလေသည်။ သူသည် ခရစ်ယာန်အစည်းအဝေးများကို မှန်မှန်တက်ရောက်ပြီး ကျမ်းစာနှင့်မညီသောအကျင့်များကို စွန့်ပစ်စပြုသည်။ ရလဒ်ကား အဘယ်နည်း။ ဘုရားသခင့်မေတ္တာနှင့် ကိုယ်တော်၏မျက်နှာသာတော်ကို သူမခံစားထိုက်ဟု မယူမှတ်တော့ချေ။ ယေဟောဝါသက်သေတစ်ဦးအဖြစ် သူနှစ်ခြင်းခံပြီးကတည်းက သူသည် ဘုရားသခင့်နိုင်ငံတော်သတင်းကောင်း ကြွေးကြော်သူတစ်ဦးအနေနှင့် ခရစ်ယာန်ဓမ္မအမှုတွင် နာရီပေါင်းထောင်ချီ၍ ပါဝင်ခဲ့ပြီ။ အတိတ်မှ စိတ်ဒဏ်ရာများရှိနေစေကာမူ ယခု မတ်စီပဲန်းသည် အဓိပ္ပာယ်ပြည့်ဝပြီး ပျော်စရာကောင်းသည့်ဘဝကို ပျော်မွေ့နေသည်။ လူ့ဘဝကို တိုးတက်ကောင်းမွန်စေသော သမ္မာကျမ်းစာ၏တန်ခိုးတော် ထင်ရှားခြင်းပါတကား!—ဟေဗြဲ ၄:၁၂။
[စာမျက်နှာ ၉ ပါ အကျဉ်းဖော်ပြချက်]
“ဘုရားသခင်၊ ဒီအခြေအနေက ကျွန်မလွတ်မြောက်မယ်ဆိုရင် ကိုယ်တော်ကို ကျွန်မတတ်နိုင်သမျှ အမှုထမ်းပါ့မယ်”
[စာမျက်နှာ ၉ ပါ လေးထောင့်ကွက်]
အကျိုးသက်ရောက်သော ကျမ်းစာမူများ
မတော်မတရားဆက်ဆံခံခဲ့ရသူများကို နှစ်သိမ့်ပေးသော ကျမ်းစာမူများတွင် အောက်ပါတို့ပါဝင်သည်–
“အကျွန်ုပ်၏စိတ်ထဲမှာ စိုးရိမ်ကြောင့်ကြခြင်းများပြားသောအခါ [ဘုရားသခင်၏] နှစ်သိမ့်တော်မူခြင်းသည် အကျွန်ုပ်ကိုရွှင်လန်းစေပါ၏။” (ဆာလံ ၉၄:၁၉၊ သမ္မာ) သမ္မာကျမ်းစာပါ ယေဟောဝါ၏ “နှစ်သိမ့်တော်မူခြင်း” သည် အကြီးအကျယ်စိတ်သက်သာမှုပေးသည်။ ၎င်းတို့ကို တွေးတောဆင်ခြင်ပြီး ဆုတောင်းသည့်အခါ စိုးရိမ်ပူပန်မှုများလျော့နည်းစေပြီး ဘုရားသခင်သည် နားလည်မှုရှိသောမိတ်ဆွေတစ်ဦးဖြစ်ကြောင်း ယုံကြည်စိတ်ချမှုတိုးပွားစေသည်။
“[ယေဟောဝါသည်] နှလုံးကြေကွဲသောသူတို့ကို နှစ်သိမ့်စေ၍ သူတို့ဒဏ်ချက်များကိုပတ်စည်းတော်မူ၏။” (ဆာလံ ၁၄၇:၃၊ သမ္မာ) ယေဟောဝါ၏ ကရုဏာတော်နှင့် ယေရှု၏ရွေးဖိုးပူဇော်ရာယဇ်အားဖြင့် ကျွန်ုပ်တို့၏အပြစ်များကို ဖုံးအုပ်ရန် ကိုယ်တော်၏အစီအစဉ်ကို ကျွန်ုပ်တို့တန်ဖိုးထားလေးမြတ်မည်ဆိုလျှင် ကိုယ့်ကိုယ်ကို ဆက်အပြစ်တင်မနေဘဲ ဘုရားသခင်ထံ ယုံကြည်စိတ်ချစွာ ချဉ်းကပ်နိုင်ကြသည်။ ယင်းက တုနှိုင်း၍မရသောနှစ်သိမ့်မှုနှင့် စိတ်ငြိမ်သက်မှုရစေနိုင်သည်။
“ငါ့ကိုစေလွှတ်တော်မူသောခမည်းတော်သည် သွေးဆောင်တော်မမူလျှင်၊ အဘယ်သူမျှငါ့ [ယေရှုခရစ်] ထံသို့မလာနိုင်။ လာသောသူကို နောက်ဆုံးသောနေ့၌ ငါထမြောက်စေမည်။” (ယောဟန် ၆:၄၄) ယေဟောဝါသည် သန့်ရှင်းသောဝိညာဉ်တော်နှင့် ဘုရားသခင့်နိုင်ငံတော်သတင်း ဟောပြောခြင်းလုပ်ငန်းအားဖြင့် သားတော်ထံသို့ ကျွန်ုပ်တို့ကို ကိုယ်တိုင်သွေးဆောင်တော်မူပြီး ထာဝရအသက် မျှော်လင့်ချက်ပေးတော်မူ၏။