အခြားသူတို့ကို ယေဟောဝါရှုမြင်တော်မူ သကဲ့သို့ ကြိုးစားရှုမြင်လော့
အခြားသူတို့ကို ယေဟောဝါရှုမြင်တော်မူ သကဲ့သို့ ကြိုးစားရှုမြင်လော့
“ထာဝရဘုရားသည် လူမြင်သကဲ့သို့ မြင်တော်မူသည်မဟုတ်။”—၁ ဓမ္မရာဇဝင် ၁၆:၇။
၁၊ ၂။ ဧလျာဘကို ယေဟောဝါရှုမြင်ပုံကား ရှမွေလရှုမြင်ပုံနှင့် မည်သို့ခြားနားသနည်း၊ ၎င်းမှ ကျွန်ုပ်တို့ အဘယ်အရာသင်ယူနိုင်သနည်း။
ဘီ.စီ.အီး. ၁၁ ရာစုတွင် ယေဟောဝါသည် ပရောဖက်ရှမွေလကို လျှို့ဝှက်တာဝန်တစ်ခုထမ်းဆောင်ရန် စေလွှတ်ခဲ့သည်။ ယေရှဲအမည်ရှိသူတစ်ဦး၏အိမ်သို့သွား၍ သူ့သားတစ်ဦးကို ဣသရေလမင်းလောင်းအဖြစ် ဆီသွန်းလောင်းရန် ထိုပရောဖက်အား ကိုယ်တော်အမိန့်ပေးခဲ့၏။ ရှမွေလသည် ယေရှဲ၏သားဦး ဧလျာဘကို မြင်မြင်ချင်းပင် ဘုရားသခင်ရွေးချယ်သူကို မိမိတွေ့ရှိပြီဟု အခိုင်အမာယူမှတ်ခဲ့သည်။ သို့သော် ယေဟောဝါက ဤသို့မိန့်တော်မူသည်– “သူ၏မျက်နှာ၊ သူ၏အရပ်ကို မကြည့်မရှုနှင့်။ သူ့ကိုငါပယ်ပြီ။ ထာဝရဘုရားသည် လူမြင်သကဲ့သို့မြင်တော်မူသည်မဟုတ်။ လူသည် အဆင်းသဏ္ဌာန်ကိုကြည့်ရှုတတ်၏။ ထာဝရဘုရားမူကား နှလုံးကိုကြည့်ရှုတတ်သည်။” (၁ ဓမ္မရာဇဝင် ၁၆:၆၊ ၇) ရှမွေလသည် ဧလျာဘကို ယေဟောဝါမြင်တော်မူသကဲ့သို့ မရှုမြင်ချေ။ *
၂ လူတို့သည် သူတစ်ပါးကို ဝေဖန်ပိုင်းခြားရာတွင် မှားရန် လွယ်ကူလိုက်လေခြင်း! အပြင်ပန်းအရ နှစ်သက်ဖွယ်ကောင်းသည်ဟု ယူမှတ်စရာရှိသော်လည်း အတွင်း၌မူ မရိုးဖြောင့်သူများစွာရှိ၏။ အခြားတစ်ဖက်တွင်မူ စိတ်ရင်းမှန်သူတစ်ဦး၏ ဥပဓိရုပ်နှင့်စရိုက်များက ကျွန်ုပ်တို့ကိုစိတ်အနှောင့်အယှက်ဖြစ်စေရာ သူ့အား ကျွန်ုပ်တို့အကဲဖြတ်ပုံက မညှာမတာ၊ ခက်ထန်နေပေမည်။
၃၊ ၄။ (က) ခရစ်ယာန်နှစ်ဦးစပ်ကြား ပြဿနာပေါ်လျှင် တစ်ဦးစီအနေဖြင့် အဘယ်အရာပြုလုပ်ဖို့ စိတ်ပိုင်းဖြတ်သင့်သနည်း။ (ခ) ယုံကြည်သူချင်းတစ်ဦးနှင့် အကြီးအကျယ်သဘောထားကွဲလွဲပါက ကျွန်ုပ်တို့အနေဖြင့် ကိုယ့်ကိုယ်ကို အဘယ်မေးခွန်းများမေးသင့်သနည်း။
၃ ကျွန်ုပ်တို့ နှစ်ချီသိကျွမ်းခဲ့သူများအပါအဝင် အခြားသူတို့ကို အလျင်စလို အကဲဖြတ်ဝေဖန်တတ်လျှင် ပြဿနာများပေါ်နိုင်သည်။ တစ်ချိန်က ရင်းနှီးကျွမ်းဝင်ခဲ့သော ခရစ်ယာန်မိတ်ဆွေတစ်ဦးနှင့် သင်သည် အကြီးအကျယ်စိတ်ဝမ်းကွဲနေသည်ဆိုပါစို့။ ယခု ပြန်သင့်တင့်လိုသလော။ သို့ဆိုလျှင် အဘယ်အရာက အကူအညီဖြစ်စေမည်နည်း။
၄ သင်၏ခရစ်ယာန်ညီအစ်ကို သို့မဟုတ် ညီအစ်မကို အပြုသဘောဖြင့် အသေအချာဆင်ခြင်သုံးသပ်ပါ။ သို့ပြုရာတွင် ယေရှု၏ဤစကားကို ထောက်ရှု၍ပြုပါ– “ငါ့ကိုစေလွှတ်တော်မူသောခမည်းတော်သည် သွေးဆောင်တော်မမူလျှင်၊ အဘယ်သူမျှငါ့ထံသို့မလာနိုင်။” (ယောဟန် ၆:၄၄) ထို့နောက် သင့်ကိုယ်သင် ဤသို့မေးပါ– ‘ယေဟောဝါဟာ ဒီလူကို ကိုယ်တော်ရဲ့သားတော်ထံ ဘာကြောင့်သွေးဆောင်ခဲ့တာလဲ။ သူ့မှာ နှစ်သက်ဖွယ် ဘာအရည်အချင်းတွေရှိသလဲ။ အဲဒီအရည်အချင်းတွေကို ငါမမြင်ဘဲ၊ ဒါမှမဟုတ် တန်ဖိုးမထားဘဲ ဖြစ်နေလို့လား။ အစက ငါတို့ ဘာကြောင့်မိတ်ဆွေတွေဖြစ်ခဲ့ကြတာလဲ။ သူ့ကို ငါ ဘာကြောင့်သဘောကျတာလဲ။’ အစပိုင်းတွင် ကောင်းကွက်များကို တွေ့မြင်ဖို့ခက်နေပေမည်၊ အထူးသဖြင့် စိတ်နာကြည်းခဲ့သည်မှာ ကြာမြင့်ပြီဆိုလျှင် ထိုသို့ဖြစ်ပေမည်။ သို့သော် သင်တို့နှစ်ဦး၏စိတ်ဝမ်းကွဲမှုကို စေ့စပ်လိုပါက ထိုသို့ပြုရန် အရေးကြီးသည်။ ယင်းကို မည်သို့ပြုလုပ်နိုင်ကြောင်းသရုပ်ဖော်ပြရန် အပျက်သဘောဖြင့် တစ်ခါတစ်ရံသတ်မှတ်ခံရသူ လူနှစ်ဦး၌ ကောင်းကွက် အချို့ကို ရှာဖွေကြည့်ကြစို့။ သူတို့သည် ပရောဖက်ယောနနှင့် တမန်တော်ပေတရုတို့ဖြစ်သည်။
ယောနကို အရှိအတိုင်းရှုမြင်ခြင်း
၅။ ယောနအား အဘယ်တာဝန်အပ်နှင်းခဲ့သနည်း၊ သူ မည်သို့တုံ့ပြန်ခဲ့သနည်း။
၅ ယောနသည် ယဟောရှသား ဒုတိယမြောက် ယေရောဗောင်မင်းလက်ထက်၌ မြောက်ပိုင်းဣသရေလနိုင်ငံတွင် ပရောဖက်တစ်ပါးအဖြစ် အမှုထမ်းခဲ့သည်။ (၄ ဓမ္မရာဇဝင် ၁၄:၂၃-၂၅) တစ်နေ့သောအခါ ယေဟောဝါက ယောနကို ဣသရေလပြည်မှထွက်ခွာသွား၍ အင်အားကြီးသော အာရှုရိအင်ပါယာ၏မြို့တော် နိနေဝေသို့ ခရီးသွားစေလိုခဲ့သည်။ သူ၏အလုပ်တာဝန်ကား အဘယ်နည်း။ ထိုမြို့သားတို့၏မြို့ကြီးသည် ပျက်စီးတော့မည်ဖြစ်ကြောင်း သတိပေးရန်ဖြစ်သည်။ (ယောန ၁:၁၊ ၂) သို့သော် ယောနသည် ဘုရားသခင်ညွှန်ကြားသည့်အတိုင်းပြုမူမည့်အစား ထွက်ပြေးခဲ့သည်! နိနေဝေမြို့မှ အလွန်ကွာဝေးသော တာရှုမြို့သို့သွားမည့် သင်္ဘောတစ်စီးပေါ် တက်စီးသွားခဲ့သည်။—ယောန ၁:၃။
၆။ နိနေဝေမြို့သို့သွားရန် ယောနကို ယေဟောဝါ အဘယ်ကြောင့်ရွေးချယ်ခဲ့သနည်း။
၆ ယောနအကြောင်း သင်စဉ်းစားမိသောအခါ အဘယ်အရာကိုသင်မှတ်မိသနည်း။ နာခံမှုမရှိသော ပရောဖက်တစ်ပါးအဖြစ် သူ့ကိုယူမှတ်သလော။ သူ့ကို အပေါ်ယံကြည့်လျှင် ထိုသို့ပင် ကောက်ချက်ချပေလိမ့်မည်။ သို့သော် နာခံမှုမရှိခဲ့သောကြောင့် ဘုရားသခင်သည် သူ့အား ပရောဖက်တစ်ပါးအဖြစ် ခန့်အပ်ခဲ့ခြင်းလော။ လုံးဝမဟုတ်နိုင်ပါ! ယောနမှာ နှစ်သက်ဖွယ်အရည်အချင်းအချို့ ရှိခဲ့ရပေမည်။ ပရောဖက်တစ်ပါးအဖြစ် သူ၏မှတ်တမ်းကို သုံးသပ်ကြည့်ပါ။
၇။ ယောနသည် ဣသရေလနိုင်ငံတွင် အဘယ်အခြေအနေများအောက်၌ ယေဟောဝါအမှုတော်ကိုထမ်းခဲ့သနည်း၊ ယင်းကို သိထားခြင်းက သူ့အပေါ်ရှုမြင်ပုံကို မည်သို့ အကျိုးသက်ရောက်သနည်း။
၇ ယောနသည် လက်သင့်ခံမှုအလွန်နည်းသောနယ်မြေ၊ ဣသရေလနိုင်ငံတွင် တည်ကြည်ပင်ပန်းစွာ အမှုထမ်းခဲ့သည်။ ယောနနှင့် တစ်ခေတ်တည်းသားဖြစ်ခဲ့သူ ပရောဖက်အာမုတ်က ထိုခေတ်ရှိ ဣသရေလလူတို့သည် ရုပ်ပိုင်းကိုအဓိကထားသော အပျော်အပါးလိုက်စားသူများဖြစ်၏ဟု ဖော်ပြခဲ့သည်။ * ထိုနိုင်ငံတွင် ဆိုးသွမ်းမှုများစွာ ဖြစ်ပျက်နေလျက်နှင့် ဣသရေလလူတို့သည် ယင်းတို့ကို လုံးဝလျစ်လျူရှုခဲ့ကြသည်။ (အာမုတ် ၃:၁၃-၁၅; ၄:၄; ၆:၄-၆) သို့တိုင်၊ ယောနသည် သူတို့အား ဟောပြောရမည့်တာဝန်ကို နေ့စဉ်ရက်ဆက် တည်ကြည်စွာ ထမ်းဆောင်ခဲ့သည်။ သင်သည် သတင်းကောင်းကိုကြွေးကြော်သူတစ်ဦးဖြစ်ပါက ကိုယ့်ဘဝကိုယ်ကျေနပ်နေပြီး အလေးမမူဂရုမစိုက်သူတို့ကို ဟောပြောဖို့ အလွန်ခက်ခဲကြောင်း သတိထားမိပေမည်။ သို့ဖြစ်၍ ယောန၏အားနည်းချက်များကို အသိအမှတ်ပြုကြစဉ် ယုံကြည်ခြင်းကင်းမဲ့သောဣသရေလလူတို့အား သူဟောပြောရာတွင် သူ၏တည်ကြည်မှုနှင့် ခံနိုင်ရည်ကို ကျွန်ုပ်တို့အမှုမဲ့အမှတ်မဲ့ မနေကြစို့နှင့်။
၈။ ဣသရေလပရောဖက်တစ်ဦးသည် နိနေဝေမြို့တွင် အဘယ်အခက်အခဲများ ရင်ဆိုင်ရစရာရှိမည်နည်း။
၈ နိနေဝေမြို့သို့သွားရန်တာဝန်သည် ထိုထက်ပင်ခက်ခဲပေသည်။ ထိုမြို့သို့ရောက်ဖို့ ယောနသည် မိုင်ပေါင်း ၅၀၀ ခန့် ခြေလျင်ခရီးသွားရမည်ဖြစ်ပြီး တစ်လနီးပါးကြာမြင့်မည့် ခက်ခဲသောခရီးစဉ်ဖြစ်၏။ ထိုနေရာသို့ရောက်သည်နှင့် ရက်စက်ကြောင်းနာမည်ကြီးသူ အာရှုရိလူတို့ကို ပရောဖက်ယောနဟောပြောရမည်ဖြစ်သည်။ သူတို့သည် စစ်တိုက်ရာတွင် ရက်စက်ကြမ်းကြုတ်မှုများပြုလေ့ရှိသည်။ သူတို့၏ရိုင်းစိုင်းမှုကိုပင် သူတို့ကြွားလုံးထုတ်တတ်ကြသည်။ ထို့ကြောင့် နိနေဝေမြို့ကို “အသွေးသွန်တတ်သောမြို့” ဟုခေါ်ဆိုခြင်းမှာ အံ့အားသင့်စရာမဟုတ်ချေ။—နာဟုံ ၃:၁၊ ၇၊ သမ္မာ။
၉။ မုန်တိုင်းထန်၍ သင်္ဘောသားများ အသက်ဘေးကြုံရသည့်အခါ အဘယ်အရည်အသွေးများကို ယောနတင်ပြခဲ့သနည်း။
၉ ယေဟောဝါ၏အမိန့်ကိုမနာခံလို၍ ယောနသည် မိမိတာဝန်ကျရာနေရာမှ အလှမ်းကွာဝေးစေမည့် သင်္ဘောတစ်စင်းပေါ်တက်စီးခဲ့သည်။ မည်သို့ပင်ဖြစ်စေ ယေဟောဝါသည် မိမိ၏ပရောဖက်ကို စိတ်မပျက်ခဲ့ပါ၊ အခြားသူတစ်ဦးကိုစေလွှတ်ရန် မစီစဉ်ခဲ့ပါ။ ထိုသို့ပြုမည့်အစား ယောနကို သတိပြန်ရလာစေရန် ယေဟောဝါပြုတော်မူခဲ့သည်။ ပင်လယ်တွင် မုန်တိုင်းထန်စေခဲ့သည်။ ယောနလိုက်ပါလာသောသင်္ဘောသည် လှိုင်းလေကြားတွင် လူး၍နေ၏။ ယောနကြောင့် အပြစ်မဲ့သူများ အသက်ဆုံးရှုံးရပေတော့မည်! (ယောန ၁:၄) ထိုအခါယောန မည်သို့တုံ့ပြန်မည်နည်း။ မိမိကြောင့် သင်္ဘောပေါ်ရှိသူများကို အသက်မဆုံးရှုံးစေလိုသဖြင့် ယောနက သူတို့ကို ဤသို့ပြောခဲ့သည်– “ငါ့ကိုချီ၍ ပင်လယ်ထဲသို့ချပစ်ကြလော့။ သို့ပြုလျှင် လှိုင်းတံပိုးသည် သင်တို့၌ငြိမ်းလိမ့်မည်။” (ယောန ၁:၁၂) နောက်ဆုံး၌ သင်္ဘောသားများသည် ယောနကို သင်္ဘောပေါ်မှပစ်ချလိုက်သောအခါ မိမိကို ယေဟောဝါကယ်တင်လိမ့်မည်ဟု ယောနစဉ်းစားတွေးတောရန်အကြောင်း လုံးဝမရှိချေ။ (ယောန ၁:၁၅) သို့သော် ယောနသည် သင်္ဘောသားများ အသက်ဘေးမကြုံရစေရန် အသေခံဖို့အသင့်ရှိခဲ့၏။ ဤတွင် ရဲစွမ်းသတ္တိ၊ နှိမ့်ချမှုနှင့် မေတ္တာအရည်အသွေးများကို ကျွန်ုပ်တို့ မတွေ့မြင်ကြရပေလော။
၁၀။ ယောနကို ယေဟောဝါ ပြန်တာဝန်ပေးအပ်ခဲ့ပြီးနောက် အဘယ်အရာဖြစ်ပျက်ခဲ့သနည်း။
၁၀ အဆုံး၌ ယောနကို ယေဟောဝါကယ်တင်ခဲ့သည်။ မကြာသေးမီက ယောနပြုမူခဲ့သောအမှုတို့ကြောင့် ဘုရားသခင့်ကိုယ်စားလှယ်တစ်ဦးအဖြစ် အမှုပြန်ထမ်းရန် အပယ်ခံရသလော။ အပယ်မခံရပါ၊ ယေဟောဝါသည် ကရုဏာပြပြီး မေတ္တာပါပါဖြင့် နိနေဝေမြို့သားများကို ဟောပြောရန် ထိုပရောဖက်၏တာဝန်ကို ပြန်ပေးအပ်ခဲ့သည်။ နိနေဝေမြို့သို့ ယောနရောက်လာသောအခါ ထိုမြို့သူမြို့သားများကို ဘုရားသခင်အာရုံစိုက်သဖြင့် သူတို့၏ဆိုးယုတ်မှုများကိုတွေ့မြင်ပြီး အရက်လေးဆယ်တိုင်လေသော် သူတို့၏မြို့တော်ကို ဖျက်ဆီးလိမ့်မည်ဟု ရဲရင့်စွာပြောဟောခဲ့သည်။ (ယောန ၁:၂; ၃:၄) ယောန၏ရှင်းလင်းပြတ်သားသောသတင်းစကားကို ကြားသိကြပြီးနောက် နိနေဝေမြို့သားတို့သည် နောင်တယူသဖြင့် သူတို့၏မြို့ မပျက်စီးခဲ့ချေ။
၁၁။ ယောနသည် အဖိုးတန်သင်ခန်းစာရခဲ့ကြောင်း အဘယ်အရာက ညွှန်ပြသနည်း။
၁၁ သို့တိုင် ယောန၌ မှန်ကန်သောသဘောထား မရှိသေးပေ။ သို့သော် လက်တွေ့ကျသင်ခန်းစာတစ်ခုဖြင့် ယေဟောဝါသည် အပြင်ပန်းထက်မက ကြည့်မြင်တော်မူကြောင်း ယောနအားသိရှိလာစေရန် စိတ်ရှည်လက်ရှည် ကူညီပေးခဲ့၏။ ကိုယ်တော်သည် စိတ်နှလုံးကို ဆန်းစစ်တော်မူသည်။ (ယောန ၄:၅-၁၁) ယောနသည် အဖိုးတန်သောသင်ခန်းစာရခဲ့ကြောင်း သူကိုယ်တိုင် ဟုတ်တိုင်းမှန်ရာရေးသားခဲ့သောမှတ်တမ်းက ဖော်ပြသည်။ မိမိ၏ချွတ်ယွင်းချက်များကို အရှက်တကွဲ ခရေစေ့တွင်းကျ တလိုတလားရေးသားခဲ့ခြင်းက သူ၏စိတ်နှိမ့်ချမှုကို သက်သေထူသည်။ အမှားကိုဝန်ခံရန် ရဲစွမ်းသတ္တိရှိဖို့လိုသည်တကား!
၁၂။ (က) လူတို့ကို ယေဟောဝါရှုမြင်သကဲ့သို့ ယေရှု ရှုမြင်ကြောင်း မည်သို့သိရှိရသနည်း။ (ခ) သတင်းကောင်းဟောပြောသည့်အခါ ကျွန်ုပ်တို့တွေ့ဆုံသူများကို မည်သို့ရှုမြင်သင့်သည်ဟု အားပေးထားသနည်း။ (စာမျက်နှာ ၁၈ ရှိ လေးထောင့်ကွက်ရှု။)
၁၂ ရာစုနှစ်များစွာကုန်လွန်လေသော် ယေရှုခရစ်သည် ယောနဘဝ၏ဖြစ်ရပ်တစ်ခုကို အပြုသဘောပါပါဖော်ပြခဲ့၏။ ကိုယ်တော် ဤသို့မိန့်တော်မူခဲ့သည်– “ယောနသည် ငါးကြီးဝမ်းထဲမှာ သုံးရက်နေရသကဲ့သို့၊ လူသားသည် မြေကြီးထဲမှာ သုံးရက်နေရလတ္တံ့။” (မဿဲ ၁၂:၄၀) သင်္ချိုင်းတွင် ယေရှုရောက်ရှိခဲ့ချိန်ကို ပရောဖက်အသက်တာ၏မှောင်မိုက်ကာလနှင့် ကိုယ်တော်နှိုင်းယှဉ်ခဲ့ကြောင်း ယောနရှင်ပြန်ထမြောက်လာသောအခါ သိမြင်လာလိမ့်မည်။ ဘုရားသခင် ၏ကျေးကျွန်များ အမှားပြုမိသောအခါ သူတို့ကို မပယ်သော ဘုရားသခင်တစ်ပါးကို ကျွန်ုပ်တို့ဝတ်ပြုကိုးကွယ်ရသဖြင့် ဝမ်းမြောက်ကြသည်မဟုတ်ပေလော။ ဆာလံဆရာက ဤသို့ရေးသားခဲ့သည်– “အဘသည် သားတို့ကိုသနားစုံမက်သည်နည်းတူ ထာဝရဘုရားသည် ကြောက်ရွံ့သောသူတို့ကို သနားစုံမက်တော်မူ၏။ အကြောင်းမူကား ငါတို့ကိုယ်ခန္ဓာကိုသိတော်မူ၏။ ငါတို့သည်မြေမှုန့်ဖြစ်ကြောင်းကို အောက်မေ့တော်မူ၏။” (ဆာလံ ၁၀၃:၁၃၊ ၁၄) အမှန်မှာ ယနေ့ မစုံလင်သောလူတို့အပါအဝင် ဤ “မြေမှုန့်” သည် ဘုရားသခင့်သန့်ရှင်းသောဝိညာဉ်တော်၏ ကျောထောက်နောက်ခံမှုဖြင့် များစွာပြီးမြောက်အောင်မြင်နိုင်သည်တကား!
ပေတရုအပေါ် မျှတသောအမြင်
၁၃။ ပေတရု၏အဘယ်စရိုက်များကို သတိရမည်နည်း၊ သို့သော် ယေရှုသည် သူ့ကို တမန်တော်တစ်ပါးအဖြစ် အဘယ်ကြောင့်ရွေးချယ်ခဲ့သနည်း။
၁၃ ယခု ဒုတိယပုံဥပမာအဖြစ် ပေတရုကို အကျဉ်းချုပ်သုံးသပ်ကြည့်ကြပါစို့။ အကယ်၍ သင့်အား ပေတရုကို ပုံဖော်ပြပါဟုဆိုလျှင် သူသည် အမှန်ပင် စိတ်မြန်လက်မြန်၊ ကမူးရှူးထိုးနိုင်၍ ရောင့်တက်သူဖြစ်သည်ဟု သင်ချက်ချင်းကောက်ချက်ချမည်လော။ ထိုသို့သောစရိုက်များကို ပေတရု ရံဖန်ရံခါဖော်ပြခဲ့သည်။ သို့သော် ပေတရုသည် အမှန်ပင်စိတ်မြန်လက်မြန်၊ ကမူးရှူးထိုးနိုင်၍ ရောင့်တက်သူဖြစ်ခဲ့လျှင် ယေရှုသည် မိမိ၏ တမန်တော် ၁၂ ပါးတွင် တစ်ပါးအဖြစ် ပေတရုကိုရွေးချယ်ခဲ့လိမ့်မည်လော။ (လုကာ ၆:၁၂-၁၄) လုံးဝမဟုတ်ပါ! ယေရှုသည် ယင်းအပြစ်အနာအဆာများထက် ပေတရု၏အပြုသဘောပါသောအရည်အသွေးတို့ကို တွေ့မြင်ခဲ့သည်မှာ ထင်ရှားသည်။
၁၄။ (က) ပေတရုသည် ပွင့်ပွင့်လင်းလင်းပြောဆိုတတ်ပုံရှိခြင်းသည် အဘယ်ကြောင့်နည်း။ (ခ) ပေတရုသည် မကြာခဏ မေးခွန်းများမေးမြန်းခဲ့ခြင်းကို ကျွန်ုပ်တို့ အဘယ်ကြောင့် ကျေးဇူးတင်သင့်သနည်း။
၁၄ တစ်ခါတစ်ရံ ပေတရုသည် အခြားတမန်တော်များကိုယ်စား ပြောဆိုပေးသူဖြစ်ခဲ့သည်။ အချို့က ယင်းကို ကျိုးနွံမှုမဲ့ခြင်းဟု ယူမှတ်ကြပေမည်။ သို့သော် ယင်းသည် မှန်ပါသလော။ ပေတရုသည် အခြားတမန်တော်များထက်မက ဖြစ်နိုင်ဖွယ်ရာရှိသည်မှာ ယေရှုကိုယ်တော်တိုင်ထက်ပင် အသက်ကြီးသည်ဟု ဆိုကြသည်။ ယင်းသည် မှန်ကန်မည်ဆိုလျှင် အဘယ်ကြောင့်ပေတရုသာ မကြာခဏ ဦးဆုံးစကားပြောဆိုခဲ့ရကြောင်း ရှင်းနေပါသည်။ (မဿဲ ၁၆:၂၂) သို့သော် သုံးသပ်ကြည့်ရန် နောက်ထပ်အချက်ရှိသေး၏။ ပေတရုသည် ဝိညာဉ်ရေးကောင်းသူတစ်ဦးဖြစ်သည်။ သိလိုစိတ် အလွန်ပြင်းပြသူတစ်ဦးဖြစ်သောကြောင့် မေးခွန်းများစွာ မေးမြန်းခဲ့ခြင်းဖြစ်သည်။ ထိုသို့သူပြုလုပ်ခဲ့ခြင်းသည် ကျွန်ုပ်တို့အတွက် အကျိုးများစွာရှိပေသည်။ ယေရှုသည် ပေတရု၏မေးခွန်းများကိုဖြေကြားရာတွင် တန်ဖိုးဖြတ်မရသောစကားများကိုမိန့်ဆိုခဲ့ရာ ယင်းတို့ကို သမ္မာကျမ်းစာတွင် မှတ်တမ်းတင်ရေးသားခဲ့သည်။ ဥပမာ၊ ‘သစ္စာနှင့်သတိပညာရှိသောဘဏ္ဍာစိုး’ အကြောင်း ယေရှုမိန့်တော်မူခဲ့ခြင်းသည် ပေတရုပြောခဲ့သော စကားတစ်ခွန်းကြောင့်ဖြစ်သည်။ (လုကာ ၁၂:၄၁-၄၄) ထို့ပြင် ပေတရု၏ ဤမေးခွန်းကို စဉ်းစားကြည့်ပါ– “အကျွန်ုပ်တို့သည် ရှိသမျှကိုစွန့်ပစ်၍ ကိုယ်တော်နောက်သို့လိုက်ကြပါပြီ။ အဘယ်အကျိုးကိုရကြပါမည်နည်း။” ယင်းကြောင့် ယေရှု၏အားရှိစရာ ဤကတိတော်ကို ကြားနာခဲ့ရခြင်းဖြစ်သည်– “အကြင်သူသည် ငါ၏နာမကြောင့် အိမ်၊ လယ်၊ ညီအစ်ကို၊ နှမ၊ မိဘ၊ သားမယားတည်းဟူသော တစ်ပါးပါးကိုစွန့်၏။ ထိုသူသည် အဆတစ်ရာသောအကျိုးကိုရ၍ ထာဝရအသက်ကို အမွေခံရလတ္တံ့။”—မဿဲ ၁၅:၁၅; ၁၈:၂၁၊ ၂၂; ၁၉:၂၇-၂၉။
၁၅။ ပေတရုသည် အမှန်တကယ်ပင်တည်ကြည်သူတစ်ဦးဖြစ်ကြောင်း အဘယ်ကြောင့်ဆိုနိုင်သနည်း။
၁၅ ပေတရု၌ အခြားအရည်အချင်းကောင်းတစ်ခုရှိသေးသည်၊ ယင်းမှာ တည်ကြည်ခြင်းပင်ဖြစ်သည်။ တပည့်များစွာသည် ကိုယ်တော်၏သွန်သင်ချက်များမှ အကြောင်းအရာတစ်ခုကို နားမလည်ကြသဖြင့် ယေရှုနောက်မလိုက်ကြသောအခါ တမန်တော် ၁၂ ပါးကိုယ်စား ပေတရုက မတွန့်မဆုတ်ဘဲ ဤသို့ပြောခဲ့သည်– “အကျွန်ုပ်တို့သည် အဘယ်သူထံသို့သွားရပါမည်နည်း။ ထာဝရအသက်နှင့်ယှဉ်ယောဟန် ၆:၆၆-၆၈) ဤစကားများသည် ယေရှုအတွက် ကြည်နူးဖွယ်အမှန်ဖြစ်ခဲ့မည်တကား! နောက်ပိုင်းတွင် သခင်ကိုဖမ်းဆီးရန် လူအုပ်ရောက်လာသောအခါ ကိုယ်တော်၏တမန်တော်အများစုမှာ ထွက်ပြေးသွားခဲ့ကြသည်။ သို့သော် ပေတရုသည် မနီးမဝေးမှ လူအုပ်နောက်လိုက်ပါသွားပြီး ယဇ်ပုရောဟိတ်မင်းကြီး၏တံတိုင်းတော်အတွင်းသို့ လိုက်ဝင်သွားခဲ့သည်။ သူရဲဘောနည်း၍မဟုတ်ဘဲ ရဲစွမ်းသတ္တိရှိခြင်းကြောင့် ထိုနေရာသို့ ပေတရုရောက်သွားခြင်းဖြစ်သည်။ ယေရှုအား စစ်ဆေးမေးမြန်းနေစဉ် ပေတရုသည် မီးလှုံနေကြသောဂျူးအုပ်စုနှင့် ရောနှောခဲ့၏။ ယဇ်ပုရောဟိတ်မင်း၏ကျွန်တစ်ဦးက သူ့ကိုမှတ်မိပြီး ယေရှုနှင့်အတူရှိခဲ့သူတစ်ဦးဖြစ်ကြောင်း သူ့ကို စွပ်စွဲလေသည်။ ထိုအခါ ပေတရုသည် မိမိ၏သခင်ကိုမသိဟု ငြင်းဆိုခဲ့သည်မှန်သော်လည်း တမန်တော်အများစုမသွားဝံ့သည့် ထိုသို့သောအန္တရာယ်ရှိအခြေအနေမျိုးတွင် ပေတရုရောက်ရှိနေရခြင်းက ယေရှုအပေါ်တည်ကြည်မှုရှိ၍ ကိုယ်တော်အတွက် စိုးရိမ်မကင်းဖြစ်ခြင်းကြောင့်ဆိုသည်ကို မမေ့ကြစို့လေ။—ယောဟန် ၁၈:၁၅-၂၇။
သောစကားသည် ကိုယ်တော်၌တည်ပါ၏။” (၁၆။ ယောနနှင့် ပေတရုတို့၏ အပြုသဘောပါသောအရည်အချင်းများကို အဘယ်လက်တွေ့ကျ အကြောင်းအတွက် ကျွန်ုပ်တို့ သုံးသပ်ခဲ့ကြပြီနည်း။
၁၆ ပေတရု၏အရည်အချင်းကောင်းများသည် သူ၏အားနည်းချက်များထက် ပိုများပါသည်။ ယောနလည်း ထိုနည်းတူပင်ဖြစ်သည်။ ယောနနှင့် ပေတရုတို့ကို ခါတိုင်းကဲ့သို့မဟုတ် အပြုသဘောရှိရှိ ယခုရှုမြင်ခဲ့ကြပြီဖြစ်ရာ မျက်မှောက်ခေတ် ကျွန်ုပ်တို့၏ဝိညာဉ်ရေးညီအစ်ကို၊ ညီအစ်မများကို အကဲဖြတ်ရာတွင် အပြုသဘောပိုရှိစေဖို့ ကိုယ့်ကိုယ်ကိုလေ့ကျင့်ပေးကြရမည်။ ထိုသို့ပြုခြင်းက သူတို့နှင့်ဆက်ဆံရေး ပိုကောင်းလာစေပါလိမ့်မည်။ ဤသို့ပြုရန် အဘယ်ကြောင့် အလွန်လိုအပ်သနည်း။
သင်ခန်းစာကို ယနေ့လက်တွေ့ကျင့်သုံး
၁၇၊ ၁၈။ (က) ခရစ်ယာန်အချင်းချင်း အဘယ်ကြောင့်သဘောထားကွဲလွဲနိုင်ကြသနည်း။ (ခ) ယုံကြည်သူချင်းတို့နှင့် အခက်အခဲပြဿနာများဖြေရှင်းရန် သမ္မာကျမ်းစာမှ အဘယ်ဆုံးမစကားက အကူအညီပေးသနည်း။
၁၇ စီးပွားရေးအဆင့်အတန်းအမျိုးမျိုးအပြင် ပညာရေးနှင့် လူမျိုးရေးနောက်ခံအသီးသီးရှိ အမျိုးသား၊ အမျိုးသမီးများနှင့် ကလေးသူငယ်တို့သည် ယနေ့ ယေဟောဝါကို စည်းလုံးစွာဝတ်ပြုကိုးကွယ်နေကြ၏။ (ဗျာ. ၇:၉၊ ၁၀) ခရစ်ယာန်အသင်းတော်တွင် ဥပဓိရုပ်အမျိုးမျိုးကို ကျွန်ုပ်တို့ အမှန်တွေ့မြင်နေကြရ၏! ကျွန်ုပ်တို့သည် ဘုရားသခင်ကို ဝတ်ပြုကိုးကွယ်နေကြရာတွင် လက်ပွန်းတတီးရှိကြသောကြောင့် တစ်ခါတစ်ရံ အဆင်မပြေမှုများ အမှန်ပေါ်ပေါက်ပေလိမ့်မည်။—ရောမ ၁၂:၁၀; ဖိလိပ္ပိ ၂:၃။
၁၈ ညီအစ်ကိုညီအစ်မများ၏အားနည်းချက်များကို ကျွန်ုပ်တို့တွေ့မြင်ကြသော်လည်း ယင်းတို့ကို ကျွန်ုပ်တို့ အာရုံစိုက်မနေကြပါ။ ယင်းအစား ယေဟောဝါကိုတုပရန် ကျွန်ုပ်တို့ကြိုးစားကြသည်၊ ကိုယ်တော်နှင့်ပတ်သက်၍ ဆာလံဆရာ ဤသို့သီဆိုခဲ့သည်– ‘အိုဘုရားသခင်ထာဝရဘုရား ကိုယ်တော်သည် ဒုစရိုက်အပြစ်များကိုမှတ်တော်မူလျှင် အဘယ်သူခံရပ်နိုင်ပါမည်နည်း။’ (ဆာလံ ၁၃၀:၃) ကျွန်ုပ်တို့ကို စိတ်ဝမ်းကွဲစေနိုင်သည့် ဥပဓိရုပ်ဆိုင်ရာစရိုက်များကို အာရုံစိုက်နေကြမည့်အစား “ငြိမ်သက်ခြင်းနှင့်လည်းကောင်း၊ အချင်းချင်းတည်ဆောက်ခြင်းနှင့်လည်းကောင်း ယှဉ်သောအရာတို့ကို မီအောင်လိုက်ကြ” ၏။ (ရောမ ၁၄:၁၉) တစ်ဦးချင်းစီကို ယေဟောဝါရှုမြင်သကဲ့သို့ ရှုမြင်ရန် ကျွန်ုပ်တို့ကြိုးစားကြသည်၊ အပြစ်အနာအဆာများထက် အရည်အချင်းကောင်းများကို အာရုံစိုက်ဖို့ကြိုးစားကြ၏။ ထိုသို့ပြုလုပ်ကြသောအခါ “အချင်းချင်းသည်းခံ” နိုင်ရန် အကူအညီရသည်။—ကောလောသဲ ၃:၁၃။
၁၉။ အကြီးအကျယ်သဘောထားကွဲလွဲမှုများကို ဖြေရှင်းရာတွင် ခရစ်ယာန်တစ်ဦးပြုလုပ်နိုင်သည့် လက်တွေ့ကျနည်းလမ်းများကို အကျဉ်းချုပ်ဖော်ပြပါ။
၁၉ ကျွန်ုပ်တို့၏စိတ်နှလုံးထဲတွင် ပြေလည်အောင် မဖြေရှင်းနိုင်သော အထင်လွဲမှားမှုများ ပေါ်ပေါက်လာလျှင်ကော အသို့နည်း။ (ဆာလံ ၄:၄) သင်နှင့် ယုံကြည်သူချင်းတစ်ဦးစပ်ကြား ထိုသို့ဖြစ်ဖူးသလော။ ယင်းကိစ္စကို ကြိုးစားဖြေရှင်းပါ။ (ကမ္ဘာဦး ၃၂:၁၃-၁၅) ဦးစွာ၊ ဆုတောင်းခြင်းဖြင့် ယေဟောဝါထံချဉ်းကပ်၍ ကိုယ်တော်၏လမ်းညွှန်မှုကို တောင်းခံပါ။ ထို့နောက် ထိုသူ၏အရည်အချင်းကောင်းများကို စိတ်စွဲမှတ်ပြီး သူ့ထံ “ပညာ၏နူးညံ့သိမ်မွေ့ခြင်း” နှင့်ချဉ်းကပ်ပါ။ (ယာကုပ် ၃:၁၃) သူနှင့် အသင့်အတင့်ရှိလိုကြောင်း သူ့ကိုပြောပြပါ။ “နားကြားခြင်းငှာလျင်မြန်ကြစေ။ စကားပြောခြင်းငှာလည်းကောင်း၊ အမျက်ထွက်ခြင်းငှာလည်းကောင်း နှေးကြစေ” ဟူသောမှုတ်သွင်းခံ ဆုံးမစကားကိုသတိရပါ။ (ယာကုပ် ၁:၁၉) ‘အမျက်ထွက်နှေးစေ’ ဟု အကြံပြုထားရာ သူတစ်ထူးသည် သင့်ကို စိတ်ဆိုးအောင် ပြောဆိုပြုမူနိုင်ကြောင်းထင်ရှား၏။ ထိုသို့ဖြစ်မည်ဆိုလျှင် ကိုယ့်ကိုယ်ကိုချုပ်တည်းနိုင်ရန် ယေဟောဝါ ထံ အကူအညီတောင်းခံပါ။ (ဂလာတိ ၅:၂၂၊ ၂၃) သင့်ညီအစ်ကိုအား ပြောဆိုခွင့်ပြုပါ၊ ဂရုစိုက်နားထောင်ပေးပါ။ သူပြောသမျှကို သင်သဘောမတူနိုင်သည့်တိုင် စကားဖြတ်ပြီးမပြောပါနှင့်။ သူ၏ရှုမြင်ချက်မှာ မှားနေနိုင်သော်လည်း ယင်းသည် သူ၏ရှုမြင်ပုံဖြစ်သည်။ အဆိုပါပြဿနာကို သူ့ဘက်မှရှုမြင်ပေးဖို့ ကြိုးစားပါ။ ထိုသို့ပြုရန် သင့်ကိုယ်ကို သင့်ညီအစ်ကို၏မျက်စိဖြင့် ရှုမြင်ခြင်း ပါဝင်နိုင်ပေသည်။—သု. ၁၈:၁၇။
၂၀။ သဘောထားကွဲလွဲမှုများကို ဖြေရှင်းသောအခါ သူတစ်ပါးပြောဆိုသည်ကို အသေအချာနားထောင်ပြီးမှ ပြန်ဖြေဆိုရန် အဘယ်ကြောင့်အရေးကြီးသနည်း။
၂၀ ပြောဆိုတင်ပြဖို့ သင့်အလှည့်ကျလာလျှင် ရည်မွန်စွာစကားပြောဆိုပါ။ (ကောလောသဲ ၄:၆) သင့်ညီအစ်ကိုနှင့်ပတ်သက်၍ သင်သဘောကျသည့်အရာကို ဖွင့်ပြောပြပါ။ သင့်ကြောင့် သဘောထားကွဲလွဲမှု ပေါ်ပေါက်လာသည့်အတွက် တောင်းပန်ပါ။ သင်က နှိမ့်ချစွာကြိုးစားပြောဆိုသဖြင့် ပြန်အသင့်အတင့်ရှိလာခြင်းအတွက် ယေဟောဝါကို ကျေးဇူးတင်ပါ။ ထိုသို့မဖြစ်လာပါက အသင့်အတင့်ရှိစေဖို့ နောက်ထပ်အခွင့်အရေးများရှာယူစဉ် ယေဟောဝါ၏လမ်းပြညွှန်ကြားမှု ဆက်တောင်းခံပါလေ။—ရောမ ၁၂:၁၈။
၂၁။ အခြားသူတို့ကို ယေဟောဝါရှုမြင်တော်မူသကဲ့သို့ ရှုမြင်ရန် ဤဆွေးနွေးတင်ပြချက်က သင့်ကို မည်သို့အကူအညီပေးသနည်း။
၂၁ ယေဟောဝါသည် မိမိ၏ကျေးကျွန်အားလုံးကို ချစ်တော်မူ၏။ ကျွန်ုပ်တို့မစုံလင်ကြသော်လည်း ကိုယ်တော့်အမှုတော်တွင် ကျွန်ုပ်တို့ကိုပါဝင်စေသည်။ သူတစ်ပါးကို ကိုယ်တော်ရှုမြင်ပုံအကြောင်း ကျွန်ုပ်တို့သာ၍သိရှိနားလည်လာကြလေ ညီအစ်ကိုညီအစ်မများကို ကျွန်ုပ်တို့ပိုမိုချစ်လာနိုင်လေဖြစ်မည်။ ယုံကြည်သူချင်းတစ်ဦးကို ကျွန်ုပ်တို့မေတ္တာလျော့သွားမည်ဆိုလျှင် မေတ္တာပြန်ထားနိုင်ပါသည်။ သူတစ်ပါးကို အပြုသဘောဖြင့် ရှုမြင်နိုင်ရန်ကြိုးစားမည်၊ သူတို့ကို ယေဟောဝါရှုမြင်သကဲ့သို့ အမှန်ပင်ရှုမြင်နိုင်ကြမည်ဆိုလျှင် အမှန်တကယ်ကောင်းချီးရပေလိမ့်မည်။
[အောက်ခြေမှတ်ချက်များ]
^ အပိုဒ်၊ 1 လူချောဧလျာဘသည် ဣသရေလလူတို့အတွက် သင့်တော်သောဘုရင်အရည်အချင်းများမရှိကြောင်း နောက်ပိုင်းတွင် ထင်ရှားလာသည်။ ဖိလိတ္တိလူ့ဘီလူးကြီးဂေါလျတ်သည် စစ်ပွဲ၌ ဣသရေလလူတို့ကို စိန်ခေါ်သောအခါ ဧလျာဘနှင့် အခြားဣသရေလလူတို့သည် အလွန်ကြောက်ရွံ့၍ ဝပ်နေခဲ့ကြသည်။—၁ ဓမ္မရာဇဝင် ၁၇:၁၁၊ ၂၈-၃၀။
^ အပိုဒ်၊ 7 အရေးပါသောအောင်ပွဲအချို့အပြင် ရန်သူလက်မှ အထက်ကနယ်ပယ်ကို ပြန်နုတ်ယူခဲ့၍ အခွန်ရရှိသောကြောင့် ဒုတိယယေရောဗောင်သည် မြောက်ပိုင်းနိုင်ငံ၏စည်းစိမ်ချမ်းသာကို သိသိသာသာတိုးများလာစေခဲ့သည်။—၂ ဓမ္မရာဇဝင် ၈:၆; ၄ ဓမ္မရာဇဝင် ၁၄:၂၃-၂၈; ၂ ရာဇဝင်ချုပ် ၈:၃၊ ၄; အာမုတ် ၆:၂။
သင်မည်သို့ဖြေဆိုမည်နည်း
• ယေဟောဝါသည် မိမိ၏တည်ကြည်သောကျေးကျွန်တို့၏ အားနည်းချက်များကို မည်သို့ ရှုမြင်သနည်း။
• ယောနနှင့် ပေတရုတို့၏ အပြုသဘောပါသော အဘယ်အရည်အချင်းများကို သင်ရေတွက်ဖော်ပြနိုင်သနည်း။
• သင်၏ခရစ်ယာန်ညီအစ်ကိုများအပေါ် အဘယ်ရှုမြင်ချက်ကို ဆက်ထိန်းသိမ်းထားဖို့ သင်စိတ်ပိုင်းဖြတ်ထားသနည်း။
[လေ့လာရန်မေးခွန်းများ]
[စာမျက်နှာ ၁၈ ပါ လေးထောင့်ကွက်]
ခြားသူတို့ကို ဘုရားသခင်မည်သို့ရှုမြင်ကြောင်း စဉ်းစားကြည့်ပါ
သမ္မာကျမ်းစာပါ ယောနအကြောင်းကို သင်ဆင်ခြင်သုံးသပ်ကြည့်စဉ် သတင်းကောင်းကို သင်ဟောပြောနေကျသူတို့အပေါ် ရှုမြင်ပုံအသစ်ထားရှိဖို့လိုကြောင်း သင်တွေ့ မြင်ပါသလော။ ထိုသူတို့သည် ဣသရေလလူတို့ကဲ့သို့ပင် ကိုယ့်ဘဝကိုယ်ကျေနပ်နေပုံ၊ အလေးမမူဂရုမပြုပုံရှိနိုင်ပေသည်၊ သို့မဟုတ် ဘုရားသခင်၏သတင်းစကားကို ဆန့်ကျင်နေပေမည်။ မည်သို့ပင်ဖြစ်စေကာမူ ယေဟောဝါဘုရားသခင်သည် သူတို့ကို မည်သို့ ရှုမြင်သနည်း။ ယောန ဟောပြောခဲ့သောကြောင့် နိနေဝေမြို့၏ဘုရင်သည် နောင်တယူခဲ့သကဲ့သို့ ဤအစီအစဉ်စနစ်တွင် ထင်ပေါ်ကျော်ကြားသူအချို့ပင် တစ်နေ့နေ့၌ ပြောင်းလဲလာနိုင်ပေသည်။—ယောန ၃:၆၊ ၇။
[စာမျက်နှာ ၁၅ ပါ ရုပ်ပုံ]
အခြားသူတို့ကို ယေဟောဝါရှုမြင်တော်မူသကဲ့သို့ သင်ရှုမြင်ပါသလော
[စာမျက်နှာ ၁၆ ပါ ရုပ်ပုံ]
ယေရှုသည် ယောနအကြောင်းနှင့် ပတ်သက်၍ အပြုသဘောပါသောစကားကိုမိန့်ဆိုရန်အကြောင်း ရှာတွေ့ခဲ့