ယေဟောဝါ​၏​စိတ်​ကို ရွှင်လန်းစေသည့် လူငယ်များ

“ငါ့​သား ပညာရှိ​လော့။ ကဲ့ရဲ့​သော​သူ၏​စကား​ကို ငါ​ချေ​နိုင်အောင် ငါ့​စိတ်​ကို ရွှင်လန်း​စေ​လော့။”—သု. ၂၇:၁၁။

ဤ​လေ့လာ​ရန်​ဆောင်းပါး​များ​ကို အထူးသဖြင့် ယေဟောဝါသက်သေ​လူငယ်များ​အတွက် စီမံ​ပေး​ထား​ပါ​သည်။ ထို့​ကြောင့် ဤ​အကြောင်းအရာများ​ကို ဂရုတစိုက်​လေ့လာ​ပြီး အသင်းတော်​ကင်းမျှော်စင်​သင်တန်း​တွင် သုံးသပ်​သည့်​အခါ လွတ်လွတ်လပ်လပ် ပါဝင်​ဖြေဆို​ကြ​ရန် အသင်​လူငယ်များ​အား ကျွန်ုပ်​တို့အား​ပေး​ပါ​သည်။

၁၊ ၂။ (က) ဤ​လောက​ရှိ​အရာ​တို့​ထံ ဆွဲဆောင်​ခံရ​ရုံ​မျှ​ဖြင့် သင်သည် ခရစ်ယာန်​တစ်ဦး​မဖြစ်ထိုက်​ဟု ဆိုလိုခြင်း​ဟုတ်မဟုတ်​ကို ရှင်းပြပါ။ (ရောမ ၇:၂၁) (ခ) အာသပ်​၏​ပုံသက်သေ​မှ သင်​အဘယ်အရာ သင်ယူ​နိုင်​သနည်း။ (လေးထောင့်ကွက်၊ စာမျက်နှာ ၁၃ ကို​ရှု။)

သင်သည် အဝတ်အစား​အတွက် ဈေးဝယ်​နေသည်​ဟု စိတ်​တွင်​မြင်ယောင်​ကြည့်​လိုက်ပါ။ ဟို​ဟို​သည်​သည်​လျှောက်​ကြည့်​နေစဉ် ဝတ်စုံ​တစ်စုံ​ကို သင်​ရိပ်​ခ​နဲ​မြင်​လိုက်​ရာ ယင်းကို သင်​ချက်ချင်း​ပင် နှစ်သက်​သွား​သည်။ အရောင်​နှင့်​ပုံစံ​က သင့်အတွက် သင့်တော်​ပုံ​ပေါက်​ပြီး ဈေးနှုန်း​ကတ်ပြား​က​လည်း ဈေး​တော်​ကြောင်း ဖော်ပြ​နေသည်။ သို့သော် သင်သည် ထို​ဝတ်စုံကို အသေအချာ စစ်ဆေး​ကြည့်​လိုက်​၏။ ပိတ်သား​သည် အနား​ဖွာ​နေပြီး ချုပ်ရိုး​ချုပ်​သား​ညံ့​သည်ကို သင်​သတိပြုမိရာ များစွာ​အံ့အားသင့်​သွား​သည်။ အဆိုပါ​အထည်​သည် နှစ်သက်စရာ​ကောင်း​သော်လည်း ပေါ​ပေါ​ပြုလုပ်​ထား​သည်။ ဤမျှ​အရည်အသွေး​ညံ့​သော​ပစ္စည်း​ကို ငွေ​အကုန်ခံ​ကာ သင်​ဝယ်ယူ​မည်​လော။

^၂ ခရစ်ယာန်​လူငယ်​တစ်ဦး​အနေ​နှင့် သင်​ကြုံတွေ့​နိုင်​သည့် အခြေအနေ​တစ်ခု​ဖြင့် ယင်းကို နှိုင်းယှဉ်​ကြည့်​ပါ။ အဆိုပါ​အဝတ်​အထည်​နှင့် များစွာ​တူ​လှ​သည့် ဤ​လောက​ရှိ​အရာများ​သည် ရုတ်တရက်​ကြည့်​လိုက်​လျှင် အလွန့်အလွန် နှစ်သက်ဖွယ်​ကောင်း​နေ​ဟန်​တူ​မည်။ ဥပမာ၊ သင်၏​ကျောင်းနေ​ဖက်​များသည် စိတ်​လှုပ်ရှား​စ​ရာ​ကောင်းသော ပါတီပွဲ​များ​သွားခြင်း၊ မူးယစ်​ဆေးဝါး​များ​သုံးစွဲခြင်း၊ အရက်​သေ​စာ​သောက်​စားခြင်း၊ ပေါ့ပျက်ပျက်​ချိန်းတွေ့​ခြင်း​နှင့် လက်မထပ်မီ​လိင်ဆက်ဆံခြင်း​တို့ကို ပြုလုပ်​ကြ​ပေမည်။ ရံဖန်ရံခါ ထိုသို့​သော​ဘဝ​ပုံစံ​က သင့်ကို ဆွဲဆောင်​နေ​သလော။ လွတ်လပ်မှု​ဟု သူတို့​ခေါ်ဆို​ကြ​ရာ​ကို မြည်းစမ်း​ရုံ​မြည်းစမ်း​ကြည့်​ဖို့ သင်​တောင့်တ​ပါသလော။ သို့​ဖြစ်ပါ​က သင်သည် ဆိုးသွမ်း​နေပြီး ခရစ်ယာန်​ဖြစ်​ဖို့​မထိုက်​တော့​ဟု အလျင်အမြန် ကောက်ချက်​မချ​လိုက်ပါ​နှင့်။ အကြောင်း​မှာ ဤ​လောကသည် ဘုရားသခင့်​စိတ်တော်နှင့်​တွေ့​လို​သူ​တစ်ဦး​ကို​ပင် အလွန်​သြဇာလွှမ်း​မိုး​နိုင်​ကြောင်း သမ္မာကျမ်းစာ​က အသိအမှတ်ပြု​ထား​သည်။—၂ တိမောသေ ၄:၁၀။

၃။ (က) လောက​ရှိ​အရာ​တို့ကို​လိုက်စားခြင်း​က အဘယ်ကြောင့်​အချည်းနှီး​ဖြစ်သနည်း။ (ခ) လောက​ရေးရာ​၏ အချည်းနှီး​ဖြစ်မှု​ကို ခရစ်ယာန်​တစ်ဦး မည်သို့​ရှင်းပြ​မည်​နည်း။

^၃ ယခု သင်​ဝယ်​ဖို့​စိတ်ကူး​နေသည့် အဝတ်အစား​ကို အနီးကပ်​စစ်ဆေး​ကြည့်ရှု​နေသည့်​အလား ဤ​လောက ကမ်း​လှမ်း​နေသည့်​အရာများ​ကိုလည်း ကျေးဇူးပြု​၍ အနီးကပ်​စစ်ဆေး​ကြည့်​ပါ။ ‘ဤ​အစီအစဉ်​စနစ်​၏ ပိတ်သား​နှင့် ချုပ်ရိုး​ချုပ်​သား​သည် အဘယ်​အရည်အသွေး​ရှိ​သနည်း’ ဟု သင့်ကိုယ်​သင်​မေးကြည့်ပါ။ သမ္မာကျမ်းစာ​က “လောက . . . သည် ရွေ့သွား​ကွယ်ပျောက်​တတ်၏” ဟု​ဖော်ပြ​သည်။ (၁ ယောဟန် ၂:၁၇) လောက​မှ​ရရှိ​သည့် မည်သည့်​ပျော်ရွှင်မှု​မဆို​သည် အလွန်​ဆုံး အခိုက်အတန့်​သာ​ဖြစ်​ပေမည်။ ထို့​အပြင် ဘုရားတရား​မဲ့သည့် အမူအကျင့်​သည် ဆိုးကျိုး​များ​ကို​သာ ရိတ်သိမ်း​ကြ​ရ၏။ စေ့စပ်​ညှိနှိုင်း​၍​မရ​သည်​မှာ သေချာ​ပါ​သည်။ “လူငယ်​ဘဝတွင် အချိန်ဖြုန်း​ခဲ့​ရာ​မှ ရရှိခဲ့​သော​နာကျင်မှု​များ” ဟု​သူ​ခေါ်ဆို​သည့်​အရာ​ကို ခံစား​ခဲ့​ရသည့် ခရစ်ယာန်​တစ်ဦး​က ဤသို့​ဆို​သည်– “လောကကြီးဟာ စွဲမက်​စ​ရာ​ဖြစ်ပုံရ​ပြီး သွေးဆောင်​နေပါတယ်။ ပြီး​တော့ အဲ့​ဒါက ပျော်ရွှင်မှု​ကို အခက်အခဲ​မရှိ ရနိုင်တယ်​ဆိုတာ  သင့်ကို​ယုံကြည်​စေချင်တယ်။ ဒါပေမဲ့ မဖြစ်​နိုင်ဘူး​ဆိုတာ ထင်ရှား​နေပါတယ်။ လောကကြီးဟာ အခွင့်သာ​ချိန်မှာ သင့်ကို​အသုံးချ​မယ်၊ အခွင့်မသာ​ရင်​တော့ သင့်ကို​ခါချ​လိမ့်မယ်။” * သင်၏​လူငယ့်​ဘဝကို ဤ​ကဲ့သို့​သော​လက်အောက်ခံ​ဘဝ​ပုံစံ​တွင် အဘယ်ကြောင့်​ဖြုန်းတီး​ပစ်​ရမည်​နည်း။

“ဆိုးညစ်သူ” မှ​ကာကွယ်​ခြင်း

၄၊ ၅။ (က) မိမိ​မသေဆုံးမီ​လေး​တွင် ယေဟောဝါ​ထံ ယေရှု​မည်သို့​ဆုတောင်း​ခဲ့​သနည်း။ (ခ) ယင်းက အဘယ်ကြောင့် တော်​သင့်​သော​တောင်းဆိုချက်​တစ်ခု​ဖြစ်​ရသနည်း။

^၄ ဤ​အစီအစဉ်​စနစ်​သည် အထူး​ကောင်းမွန်​သည့် အဘယ်အရာကို​မျှ မ​ကမ်း​လှမ်းပေး​ကြောင်းကို သိမြင်​နားလည်​ထား​ရာ ယေဟောဝါသက်သေ​လူငယ်များသည် ဤ​လောက​နှင့်​မိတ်သဟာယ​မ​ဖွဲ့​ရန် ကြိုးစား​ကြသည်။ (ယာကုပ် ၄:၄) အသင်​လည်း ထို​တည်ကြည်​ကြ​သည့် လူငယ်များ​အဝင်​လော။ သို့​ဆိုလျှင် သင့်ကို​ချီးမွမ်း​ပါ​သည်။ ရွယ်တူချင်း​ဖိအား​ကို​တွန်းလှန်​ရန်​နှင့် တစ်မူထူး​ခြား​သူ​အဖြစ်​ရပ်တည်​ရန် မလွယ်ကူ​ပါ၊ သို့သော် သင်သည် အကူအညီ​ရရှိနိုင်​ပါ​သည်။

^၅ မိမိ​မသေဆုံးမီ​ကလေး​တွင် “ဆိုးညစ်သူ​ကြောင့်” နောက်လိုက်​များ​ကို ယေဟောဝါ “စောင့်မ​ပေး​တော်​မူ​မည်​အကြောင်း” ယေရှု​ဆုတောင်း​ခဲ့​၏။ (ယောဟန် ၁၇:၁၅၊ က​ဘ) ယေရှု​ဤသို့​တောင်းခံ​ခဲ့​ခြင်း​မှာ အကြောင်းကောင်း​ရှိသည်။ က​မာ​ဓိ​စောင့်သိ​ရမည့်​လမ်းစဉ်သည် နောက်လိုက်​များ​အတွက် အသက်အရွယ်​မရွေး လွယ်ကူ​မည်​မဟုတ်​ကြောင်းကို ယေရှု​သိရှိ​ခဲ့​၏။ အဘယ်ကြောင့်​နည်း။ အကြောင်းရင်း​တစ်ခု​မှာ ယေရှု​အသိအမှတ်ပြု​ခဲ့​သည့်​အတိုင်း ကိုယ်တော်​၏​နောက်လိုက်​များသည် စွမ်းအား​တန်ခိုး​ကြီးမား​၍ မမြင်နိုင်​သည့် ရန်သူ​တစ်ပါး​ဖြစ်သော စာတန်​နှင့် ရင်ဆိုင်​ကြ​ရမည်​ဖြစ်သည်။ ဤ​ဆိုးညစ်သော ဝိညာဉ်​သတ္တဝါ​သည် “ဟောက်​သော​ခြင်္သေ့​ကဲ့သို့ အဘယ်သူ​ကို​မျို​ရမည်​နည်း​ဟူ၍ လှည့်လည်​ရှာဖွေ​လျက်​ရှိ” ကြောင်း သမ္မာကျမ်းစာ​က​ဆို​၏။—၁ ပေတရု ၅:၈။

၆။ စာတန်​သည် လူငယ်များ​ကို သနား​ကြင်နာ​ခြင်း​မရှိကြောင်း ကျွန်ုပ်​တို့​မည်သို့​သိရှိ​ရသနည်း။

^၆ သမိုင်း​တစ်လျှောက် စာတန်​သည် လူသားများ​အပေါ် အရက်​စက်​အကြမ်း​ကြုတ်​ဆုံး​လုပ်ရပ်များ ကျရောက်​စေ​ရာ​တွင် ရက်ရက်စက်စက် နှစ်ခြိုက်​ပျော်မွေ့​ခဲ့​ပေ​ပြီ။ ယောဘ​နှင့်​သူ၏​မိသားစု​အပေါ် စာတန်​ကျရောက်​စေ​ခဲ့​သည့် ထိတ်လန့်ဖွယ် ဘေးဆိုးများ​ကို သုံးသပ်ကြည့်​ပါ။ (ယောဘ ၁:၁၃-၁၉; ၂:၇) သင့်​ဘဝ​တစ်သက်တာ​အတွင်း စာတန်​၏​ရမ်းကား​သော​စိတ်ဓာတ်​ကို အတိုင်း​သား​ပေါ်လွင်​စေသည့် ဖြစ်ရပ်​သတင်း​များ​ကို ပြန်​အမှတ်ရ​နိုင်​ပေ​သည်။ စာတန်​သည် ခိုး​ကြောင်​ခိုးဝှက် လှည့်လည်​ချောင်းမြောင်း​နေသည်၊ တစ်ဦးဦး​ကို​ဝါးမျို​ရန် ရှာဖွေ​ရာ​တွင် လူငယ်များ​ကို ချမ်းသာ​မပေး​တတ်​ချေ။ ဥပမာ၊ စီ.အီး. ပထမ​ရာစု​အစပိုင်း​တွင် ဟေရုဒ်​မင်း​သည် ဗက်လင်မြို့​ရှိ အသက်​နှစ်နှစ် သို့​မဟုတ် နှစ်နှစ်​အောက်​ရှိ သား​ယောက်ျားလေး​အားလုံး​ကို သတ်ပစ်​ရန် လျှို့ဝှက်​ကြံစည်​ခဲ့​၏။ (မဿဲ ၂:၁၆) ဟေရုဒ်​မင်း​အား စာတန်​လှုံ့ဆော်ပေး​ခဲ့​ပုံ​ပေါ်​သည်၊ တစ်နေ့​ကျ​လျှင် ဘုရားသခင့် ကတိထားရာ​မေရှိယ​ဖြစ်လာ​ပြီး ဘုရားသခင့်​စီရင်ချက်​ကို စာတန်​အပေါ်​ယူဆောင်​လာ​မည့်​ကလေး​အား ဖျက်ဆီး​ပစ်​ရန် အစွမ်းကုန်​အားထုတ်မှု​ကြီး​သာ​ဖြစ်​လေ​သည်! (ကမ္ဘာဦး ၃:၁၅) စာတန်​သည် လူငယ်များ​ကို သနား​ကြင်နာ​ခြင်း​မရှိ​သည်​မှာ ရှင်းနေပါသည်။ သူ၏​တစ်ခု​တည်း​သော​ရည်မှန်းချက်​မှာ လူများ​နိုင်​သမျှ​များများ​ကို ဝါးမျို​ရန်ဖြစ်​၏။ အထူးသဖြင့် ယခု​အချိန်တွင် မှန်ကန်​နေပါ​သည်၊  အကြောင်း​မှာ စာတန်​သည် ကောင်းကင်​မှ ကမ္ဘာ​မြေကြီးပေါ်​သို့ နှင်ချ​ခံရ​ပြီး “မိမိ​ကာလ​တစ်ခဏ​သာ​ရှိသည်​ကို​သိ၍၊ ပြင်းစွာ​သော​ဒေါသ​အမျက်” ထွက်​လျက်​ရှိသည်။—ဗျာ. ၁၂:၉၊ ၁၂။

၇။ (က) ယေဟောဝါ​သည် စာတန်​နှင့်​လား​လား​ကြီး​ဆန့်ကျင်​ကြောင်း မည်သို့​ပေါ်လွင်​ထင်ရှား​သနည်း။ (ခ) သင့်​ဘဝ​ပျော်ရွှင်ရေး​နှင့်​ပတ်သက်​၍ ယေဟောဝါ​မည်သို့​သဘောထား​သနည်း။

^၇ “ပြင်းစွာ​သော​ဒေါသ​အမျက်” ထွက်​နေသည့် စာတန်​နှင့် လား​လား​ကြီး​ဆန့်ကျင်​လျက် ယေဟောဝါ​သည် “သနားတော်မူ​ခြင်း” ရှိ၏။ (လုကာ ၁:၇၈) ကိုယ်တော်​သည် မေတ္တာ​၏​ပြယုဂ်​ဖြစ်​တော်​မူ​၏။ အမှန်​ဆို​ရ​လျှင် ဤ​မြင့်မြတ်​သော​အရည်အသွေးကို ကျွန်ုပ်​တို့၏​ဖန်ဆင်း​ရှင်​သည်​ပြသ​ရာ​တွင် မည်မျှ​ထင်ရှား​သနည်း​ဟူ​မူ “ဘုရားသခင်​သည် ချစ်ခြင်း​မေတ္တာ​ဖြစ်​တော်​မူ​၏” ဟူ၍ သမ္မာကျမ်းစာ​က​ဆို​သည်။ (၁ ယောဟန် ၄:၈) သင်​ဝတ်ပြု​ကိုးကွယ်​ခွင့်​ရသည့် ဘုရားသခင်​နှင့် ဤ​အစီအစဉ်​စနစ်​၏​ဘုရားသခင်​စပ်ကြား အလွန်​ကွာဟမှု​ကြီး​ပါ​တကား! စာတန်​က ဝါးမျို​ဖို့​သာ​ကြိုးစား​နေ​သော်လည်း ယေဟောဝါ​မူ​ကား ‘အဘယ်သူကိုမျှ​မပျက်စီး​စေ​လို​ချေ။’ (၂ ပေတရု ၃:၉) သင်၏​အသက်​အပါအဝင် လူသား​တိုင်း​၏​အသက်ကို အလွန်​အဖိုးထိုက်သည့်​အရာ​အဖြစ် ကိုယ်တော်​ရှုမြင်တော်မူ​၏။ လောက​နှင့်​မစပ်ဆိုင်​ရန် ကိုယ်တော့်​နှုတ်မြွက်တော်​တွင် သင့်ကို ယေဟောဝါ​သတိပေး​နှိုးဆော်​သည့်​အခါ သင့်​ဘဝ​ပျော်ရွှင်မှု​ကို ပိတ်ပင်​ရန် သို့​မဟုတ် သင်၏​လွတ်လပ်မှုကို ကန့်သတ်​ထား​ရန် ကိုယ်တော်​ကြိုးစား​နေခြင်း​မဟုတ်ပေ။ (ယောဟန် ၁၅:၁၉) ယင်းအစား ကိုယ်တော်​သည် ဆိုးညစ်သူ​ကြောင့် သင့်ကို ကြည့်ရှု​စောင်မ​လျက်​နေ​၏။ သင်၏​ကောင်းကင်​ခမည်းတော်​သည် တဒင်္ဂ​မျှ​ဖြစ်သော လောက​အပျော်အပါး​များ​ထက် များစွာ​သာ၍​ကောင်း​သည့်​အရာတစ်ခု သင့်​တွင်​ရှိစေ​လို​တော်​မူ​သည်။ ကိုယ်တော်​၏​အလိုတော်​မှာ သင့်​အား ပရဒိသု​မြေကြီးပေါ်​တွင် ထာဝစဉ်​အသက်ရှင်​ရန် “မှန်သော​အသက်” ကို​ရရှိစေ​လို​ခြင်း​ဖြစ်၏။ (၁ တိမောသေ ၆:၁၇-၁၉) ယေဟောဝါ​သည် သင့်​အား အောင်မြင်​စေ​လို​သည်၊ ထို​ပန်းတိုင်​ပေါ်​တွင်​ရှိနေ​ရန် သင့်​အား ကိုယ်တော်​အားပေး​တိုက်တွန်း​လျက်​ရှိ၏။ (၁ တိမောသေ ၂:၄) ထို့​ပြင် ယေဟောဝါ​သည် သင့်​အား အထူး​ဖိတ်ခေါ်ချက်​တစ်ရပ် ကမ်း​လှမ်း​နေသည်။ ယင်း​ကား အဘယ်နည်း။

“ငါ့​စိတ်​ကို​ရွှင်လန်း​စေ​လော့”

၈၊ ၉။ (က) ယေဟောဝါ​အား မည်သို့သော​လက်ဆောင်​ကို သင်ပေး​နိုင်​သနည်း။ (ခ) ယောဘ​ဖြစ်ရပ်​တွင်​ဖော်ပြ​ထား​သည့်​အတိုင်း ယေဟောဝါ​ကို စာတန်​မည်သို့​ကဲ့ရဲ့​သနည်း။

^၈ ရင်းနှီးသော​မိတ်ဆွေ​တစ်ဦး​အတွက် သင်​လက်ဆောင်​ဝယ်​ပေး​ဖူး​သလော၊ ထို့နောက် သင့်​မိတ်ဆွေ​သည် အံ့အားသင့်​သွား​ကာ လက်ဆောင်​ရရှိ​သည့်​အတွက် ကျေးဇူး​တင်​စကား​ဆို​သည်ကို သတိထား​မိ​သလော။ ထို​ပုဂ္ဂိုလ်​နှင့်​သင့်တော်​မည့် လက်ဆောင်​ကို သင်​များစွာ​အချိန်ကုန်​ခံ စဉ်းစား​ပြီး​သား​ဖြစ်​ပေမည်။ ယခု ဤ​မေးခွန်း​ကို သုံးသပ်ကြည့်​ပါ– သင်၏​ဖန်ဆင်း​ရှင် ယေဟောဝါ​ဘုရားသခင်​ကို မည်သို့သော​လက်ဆောင်​မျိုး သင်ပေး​နိုင်​သနည်း။ ဦးဆုံး အဆိုပါ​စိတ်ကူး​သည် သဘာဝ​မကျ​ဖြစ်​ပေမည်။ အတိုင်းအဆမဲ့​တန်ခိုးရှင်​သည် လူသား​သက်​သက်​မျှ​ထံ​မှ အဘယ်အရာ​လိုအပ်​သနည်း။ ကိုယ်တော်​မပိုင်ဆိုင်​သေး​သည့် အဘယ်အရာကို သင်ပေး​နိုင်​သနည်း။ သမ္မာကျမ်းစာ​က နယပုံပြင် ၂၇:၁၁ တွင် ဤသို့​ဖြေဆို​သည်– “ငါ့​သား ပညာရှိ​လော့။ ကဲ့ရဲ့​သော​သူ၏​စကား​ကို ငါ​ချေ​နိုင်အောင် ငါ့​စိတ်​ကို​ရွှင်လန်း​စေ​လော့။”

^၉ ကျမ်းစာ​လေ့လာ​ရာ​မှ သင်​သိထား​မည်​ဖြစ်သည့်​အတိုင်း ယေဟောဝါ​ကို ကဲ့ရဲ့​နေ​သူ​မှာ စာတန်​ပင်​ဖြစ်၏။ သူက ဘုရားသခင်​ကို​ဝတ်ပြု​နေကြ​သူများ​သည် ချစ်ခြင်း​မေတ္တာ​ကြောင့်​မဟုတ်ဘဲ ကိုယ်ကျိုး​အတွက်သာ​ဝတ်ပြု​နေကြ​သည်​ဟု အခိုင်အမာ​ပြောဆို​သည်။ သူတို့အား အခက်အခဲ​ကြုံ​စေ​လိုက်ပါ၊ စစ်မှန်သော​ဝတ်ပြုရေးကို သူတို့​ချက်ချင်း​စွန့်လွှတ်​လိုက်​ကြ​မည်​ဟု စာတန်​ဆို​၏။ ဥပမာ၊ ဖြောင့်မတ်​သူ​ယောဘ​နှင့်​စပ်လျဉ်း၍ ယေဟောဝါ​အား စာတန်​ဤသို့​ပြောဆို​ခဲ့​ရာ​ကို သုံးသပ်ကြည့်​ပါ– “ကိုယ်တော်​သည် သူ့​ကိုယ်​မှ​စ၍ သူ့​အိမ်​နှင့် သူ့​ဥစ္စာ​ရှိသမျှ​ပတ်လည်​၌ စောင်​ရန်း​ကာ​တော်​မူ​သည်မဟုတ်​လော။ သူ​ပြု​လေ​သမျှ​တို့ကို ကောင်းချီး​ပေး​တော်​မူ​ပြီ။ သူ့​သိုး နွား​အစ​ရှိသော​တိရစ္ဆာန်​တို့သည် မြေပေါ်မှာ​အလွန်​ပွား​များ​ကြပြီ။ ယခု​မူ​ကား လက်တော်ကို​ဆန့်​၍ သူ၏​ဥစ္စာ​ရှိသမျှကို​ထိခိုက်​တော်​မူလျှင် သူသည်​မျက်မှောက်တော်၌ ကိုယ်တော်​ကို​စွန့်ပယ်​ပါ​လိမ့်​မည်။”—ယောဘ ၁:၁၀၊ ၁၁။

၁၀။ (က) သမာဓိ​စောင့်သိ​ခြင်း​နှင့်​စပ်လျဉ်း၍ စာတန်​သည် ယောဘ​ကို​သာ စောဒကတက်​ခြင်း​မဟုတ်​ကြောင်း ကျွန်ုပ်​တို့​မည်သို့​သိရှိ​ရသနည်း။ (ခ) အကြွင်းမဲ့​ပိုင်သ​အုပ်စိုးမှု​ပြဿနာ​တွင် သင်​မည်သို့​ပါဝင်​ပတ်သက်​နေသနည်း။

^၁၀ ကျမ်းစာ​မှတ်တမ်း​တွင် ဖော်ပြ​ထား​သည့်​အတိုင်း စာတန်​သည် ယောဘ​၏​တည်ကြည်မှု​ကို စောဒကတက်​ရုံ​သာမက သင်​အပါအဝင် ဘုရားသခင်​ကို​ဝတ်ပြု​နေကြ​သူ အခြား​လူသား​အားလုံး​တို့ကို​ပါ စောဒကတက်​ခဲ့​သည်။ အမှန်​မှာ လူသား​အားလုံး​ကို ခြုံငုံ​၍​ပြောနေခြင်း​ဖြစ်​ရာ ယေဟောဝါ​ကို စာတန်​ဤသို့​ဆို​ခဲ့​၏– “အရေဖို့​အရေဟု​ဆို​သကဲ့သို့ လူ [ယောဘ​အပါအဝင်​လူတိုင်း] သည် မိမိ​အသက်ဖို့ မိမိ​ဥစ္စာ​ရှိသမျှကို​ပေး​ပါ​လိမ့်​မည်။” (ယောဘ ၂:၄) ဤ​မဟာ​အရေးကိစ္စ​တွင် သင့်​အခန်းကဏ္ဍ​ပါဝင်​နေသည်​ကို သင်​သဘောပေါက်​ပါသလော။ နယပုံပြင် ၂၇:၁၁ တွင် ဖော်ပြ​ထား​သည့်​အတိုင်း မိမိ​အား​ကဲ့ရဲ့​နေ​သူ စာတန်​ကို ပြန်​ချေပ​နိုင်​ရန် ကိုယ်တော်​အား သင်ပေး​နိုင်​သည့်​အရာ​တစ်ခုခု​ရှိကြောင်း ယေဟောဝါ​ပြောဆို​နေခြင်း​ဖြစ်၏။ စကြဝဠာ​ပိုင်သ​အုပ်စိုးရှင်​သည် ခေတ်​တစ်လျှောက်​လုံး အဆိုပါ​အကြီးမားဆုံး​သော အရေးကိစ္စ​နှင့်​စပ်လျဉ်း၍ အသင်​ကိုယ်တိုင်​ဖြေကြား​ပေး​ရန် သင့်​အား မေတ္တာ​ရပ်ခံ​နေသည်​ကို မြင်ယောင်​ကြည့်​ပါ။ သင့်အတွက် စိုးရွံ့ဖွယ်​ကောင်း​လှ​သည့် တာဝန်​နှင့် အခွင့်ထူးပါ​တကား! ယေဟောဝါ​တောင်းဆို​နေသည့်​အရာ​ကို သင်​ကျေပွန်​အောင် ဆောင်ရွက်​ပေး​နိုင်​ပါ​မည်​လော။ ယောဘ​ဆောင်ရွက်​နိုင်​ခဲ့​ပေ​သည်။ (ယောဘ ၂:၉၊ ၁၀) ယေရှု​အပြင် သမိုင်း​တစ်လျှောက်​ရှိ လူငယ်များ​အပါအဝင် မရေမတွက်​နိုင်သော​အခြားသူများ​ပါ ထိုသို့​လုပ်ဆောင်​နိုင်​ခဲ့​ကြ​၏။ (ဖိလိပ္ပိ ၂:၈; ဗျာ. ၆:၉) သင်လည်း  အလားတူ​လုပ်ဆောင်​နိုင်​ပါ​သည်။ သို့သော် ဤ​ကိစ္စ​တွင် ကြား​နယ်​မရှိ​ချေ။ သင်၏​လုပ်ဆောင်မှု​အစီအစဉ်​အားဖြင့် စာတန်​ကို​ကဲ့ရဲ့​စေမည် သို့​မဟုတ် ယေဟောဝါ​ကို ပြန်​ချေပ​စေမည်။ မည်သည့်​ဘက်​ကို​ထောက်မရန် သင်​ရွေးချယ်​မည်​နည်း။

သင့်ကို ယေဟောဝါ​သတိ​နှင့်​ကြည့်ရှု!

၁၁၊ ၁၂။ ကိုယ်တော်​အား​ဝတ်ပြုဖို့ သင်​ရွေးချယ်​သည်​ဖြစ်စေ၊ မရွေးချယ်​သည်​ဖြစ်စေ ယေဟောဝါ​အတွက်​အကြောင်း​လော။ ရှင်းပြပါ။

^၁၁ သင်​ရွေးချယ်​သည့်​အရာ​သည် ယေဟောဝါ​အတွက် တကယ်​အရေးပါ​သလော။ စာတန်​အား လုံလုံလောက်လောက် ကိုယ်တော်​ပြန်​ချေပ​ရန် ဆက်၍​တည်ကြည်​ခဲ့​ကြ​သည့်​သူ အလုံအလောက်​ရှိနေပြီ​မဟုတ်လော။ ယေဟောဝါ​ကို မည်သူမျှ ချစ်ခြင်း​မေတ္တာဖြင့် ဝတ်ပြု​ကြ​မည်​မဟုတ်​ကြောင်း စာတန်​အခိုင်အမာ​ပြောဆို​ခဲ့​သည်​မှာ မှန်​သော်လည်း ထို​စွပ်စွဲချက်​သည် မှားယွင်း​ခဲ့ပြီ​ဖြစ်သည်။ သို့​တိုင် ယေဟောဝါ​သည် သင့်​အား ပုဂ္ဂိုလ်​တစ်ဦး​အနေ​နှင့် ဂရုစိုက်​နေသော​ကြောင့် အကြွင်းမဲ့​ပိုင်သ​အုပ်စိုးမှု​ပြဿနာ​နှင့်​ပတ်သက်​၍ ကိုယ်တော့်​ဘက်​ရပ်တည်​စေ​လို​တော်​မူ​၏။ ယေရှု​ဤသို့​မိန့်ဆိုခဲ့သည်– “ကောင်းကင်ဘုံ​၌​ရှိတော်မူသော​သင်တို့​အဘသည် ဤ​သူငယ်​တစ်စုံ​တစ်ယောက်ကို​မျှ ပျက်စီး​စေခြင်း​ငှာ အလိုတော်​မရှိ။”—မဿဲ ၁၈:၁၄။

^၁၂ သင်​ရွေးချယ်​သည့်​လမ်းစဉ်​ကို ယေဟောဝါ​စိတ်ဝင်စား​နေသည်​မှာ ရှင်း​ပါ​သည်။ ထို့​ထက်​ကား ကိုယ်တော်​အား​ထိခိုက်​နေခြင်း​ဖြစ်၏။ လူသား​တို့၏ ကောင်းသော​လုပ်ရပ်၊ မကောင်းသော​လုပ်ရပ်​ကြောင့် ယေဟောဝါ​သည် နက်ရှိုင်း​သည့်​ခံစားမှု​များ​ဖြစ်ပေါ်​ကြောင်း သမ္မာကျမ်းစာ​က ရှင်းပြသည်။ ဥပမာ၊ ဣသရေလလူ​မျိုး​များ ထပ်ခါတလဲ​လဲ ပုန်ကန်​ကြသောအခါ ယေဟောဝါ​သည် “စိတ်တော်​နာ” ခဲ့​၏။ (ဆာလံ ၇၈:၄၀၊ ၄၁) နောဧ​ခေတ် ရေ​မလွှမ်းမိုး​မီ “လူ​အပြစ်ကြီး” သဖြင့် ယေဟောဝါ​သည် “နှလုံးတော်​ပူပန်​လျက်​ရှိ​တော်​မူ​၏။” (ကမ္ဘာဦး ၆:၅၊ ၆) ယင်းက အဘယ်​အဓိပ္ပာယ်​ရှိကြောင်း စဉ်းစား​ကြည့်​ပါ။ မှားယွင်းသော​လမ်းစဉ်​ကို သင်​ရွေးချယ်​မည်​ဆိုလျှင် သင်၏​ဖန်ဆင်း​ရှင်​ကို စိတ်နာ​ကျင်​စေနိုင်​ပါ​သည်။ ယင်းက ဘုရားသခင်​သည် စိတ်ဓာတ်​ပျော့​ညံ့​သည် သို့​မဟုတ် စိတ်​လှုပ်ရှားမှု​က လွှမ်းမိုး​ထား​သည်​ဟု မဆိုလို​ပေ။ သို့​အစား ကိုယ်တော်​သည် သင့်ကို​ချစ်​မြတ်နိုး​ကာ သင်၏​ကောင်းကျိုး​ကို ဂရုစိုက်​တော်​မူ​၏။ အခြား​တစ်ဖက်​တွင်​မူ မှန်ရာကို သင်​လုပ်ဆောင်​သည့်​အခါ ယေဟောဝါ​၏​နှလုံး ရွှင်လန်း​တော်​မူ​၏။ ကိုယ်တော်​သည် စာတန်​ကို ပြန်လည်​ချေပ​နိုင်​သည်​သာမက သင်၏​ဆုကျေးဇူး​ပေးသနား​ရှင်​ပါ ဖြစ်လာ​နိုင်သော​ကြောင့် ကိုယ်တော်​ပျော်ရွှင်​လေ​သည်။ ယင်းသည် ကိုယ်တော်​ဖြစ်လာ​လို​သည့်​အရာ​ပင်​ဖြစ်၏။ (ဟေဗြဲ ၁၁:၆) အလွန်​မေတ္တာပြည့်​ဝ​သည့် ယေဟောဝါ​ဘုရားသခင်​ကို သင်​ဝတ်ပြု​ကိုးကွယ်​ရသည်​တကား!

ယခု​ပင် ကြွယ်ဝသော​ကောင်းချီး​များ

၁၃။ ယေဟောဝါ​ကို​ဝတ်ပြုခြင်းက ယခု​ပင် ကောင်းချီး​များ မည်သို့​ရရှိစေ​သနည်း။

^၁၃ ယေဟောဝါ​အား​ဝတ်ပြုခြင်း​မှ ရရှိ​လာ​သည့် ကောင်းချီး​များသည် အနာဂတ်​တွင်​သာ ခံစားရ​ရှိ​မည်​မဟုတ်ပေ။ ယေဟောဝါသက်သေ​လူငယ်များစွာသည် ရွှင်လန်းမှု​နှင့် အားရ​ကျေနပ်မှု​တို့ကို ယခု​ပင် ခံစားရ​ရှိနေကြ​ကာ အကြောင်းရင်း​ကောင်း​လည်း​ရှိသည်။ “ထာဝရ​ဘုရား​၏​နည်း​ဥပဒေသ​တို့သည် ဖြောင့်မတ်​သည်​ဖြစ်၍ စိတ်နှလုံး​ကို​ရွှင်လန်း​စေ​တတ်၏” ဟု​ဆာလံဆရာ​က ရေးသားခဲ့​သည်။ (ဆာလံ ၁၉:၈) ကျွန်ုပ်​တို့အတွက် အဘယ်အရာ​ကောင်း​သည်ကို မည်သည့်​လူသား​ထက်​မဆို ယေဟောဝါ​သာ၍​သိတော်မူ၏။ ပရောဖက်​ဟေရှာယ​မှ​တစ်ဆင့် ယေဟောဝါ​ဤသို့​ဖော်ပြ​ခဲ့​သည်– “ငါသည် သင်၏​အကျိုးနှင့်​ယှဉ်​သော​အရာ​ကို​သွန်သင်​၍ သင်​သွား​အပ်သော​လမ်းဖြင့်​ပို့ဆောင်သော  သင်၏​ဘုရားသခင် ထာဝရ​ဘုရား​ဖြစ်၏။ သင်သည် ငါ​၏​ပညတ်​တို့ကို စောင့်ရှောက်​ပါစေ​သော။ သို့ပြုလျှင် သင်၏​ချမ်းသာ​သည် မြစ်​ကဲ့သို့​လည်းကောင်း၊ သင်၏​ဖြောင့်မတ်ခြင်း . . . သည် သမုဒ္ဒရာ​လှိုင်း​တံပိုး​ကဲ့သို့​လည်းကောင်း ဖြစ်​ရ​လိမ့်​မည်။”—ဟေရှာယ ၄၈:၁၇၊ ၁၈။

၁၄။ ကျမ်းစာ​မူများ​က အကြွေးတင်​ခြင်း​၏​နာကျင်မှုကို မည်သို့​ရှောင်ရှား​စေနိုင်​မည်​နည်း။

^၁၄ ကျမ်းစာ​မူများ​ကို​လိုက်နာခြင်းက သင့်​အား များစွာသော​နာကျင်ခြင်း​နှင့် စိတ်နှလုံး​ပူဆွေး​ခြင်း​တို့ကို လွှဲရှောင်​စေ​ပေ​လိမ့်​မည်။ ဥပမာ၊ ငွေ​ကို​တပ်မက်သူ​များသည် “ပူပန်ခြင်း​ဝေဒနာ​များနှင့် ကိုယ်ကို​ကိုယ်​ထုတ်ချင်းခပ်​အောင်​ထိုး​ကြ” သည်​ဟု သမ္မာကျမ်းစာ​က​ဆို​၏။ (၁ တိမောသေ ၆:၉၊ ၁၀) ဤ​ကျမ်းချက်​၏ အခံရခက်​သော​အမှန်တရားကို သင်၏​ရွယ်တူချင်း​များ တွေ့ကြုံ​ခံစား​ခဲ့​ရပြီ​လော။ ငယ်ရွယ်သူ​အမျိုးသား အမျိုးသမီး​တချို့​သည် နောက်ဆုံး​ပေါ်​ကုန်​အမှတ်​တံဆိပ်​ပါ​သည့် အဝတ်အစား​များနှင့် အထူး​တီထွင်​ထုတ်လုပ်​ထား​သည့် နည်း​ပညာ​ဆိုင်ရာ​ကိရိယာ​လေး​များ​ကို ပိုင်ဆိုင်​လို​ကြသော​ကြောင့် အကြွေး​နစ်​နေကြ​သည်။ သင်​အမှန်​မတတ်နိုင်​သည့်​အရာများ​အတွက် အတိုး​ကြီးကြီး​ပေး​ပြီး ရေရှည်​အကြွေး​ပြန်ဆပ်​နေရ​ခြင်း​သည် နာကြည်း​စ​ရာ​ကောင်းသော ကျွန်ခံ​ခြင်း​တစ်မျိုး​ပင်​ဖြစ်၏။—သု. ၂၂:၇။

၁၅။ ကျမ်းစာမူ​များသည် လိင်​အကျင့်​ယိုယွင်းခြင်း​မှ​ရရှိ​လာ​သည့် နာကျင်မှု​မှ အဘယ်နည်း​လမ်းများ​ဖြင့် သင့်ကို ကာကွယ်​ပေး​သနည်း။

^၁၅ လိင်ဆိုင်ရာ​အကျင့်​ယိုယွင်းခြင်း​ကိုလည်း သုံးသပ်ကြည့်​ပါ။ နှစ်စဉ် ကမ္ဘာ​တစ်ဝန်းလုံး​တွင် မရေမတွက်​နိုင်သော လက်မ​ထပ်​ထား​သည့် ဆယ်ကျော်သက်​များသည် ကိုယ်ဝန်ဆောင်​နေကြ​ရသည်။ တချို့​မှာ ပြုစု​ပျိုးထောင်​ပေး​လို​သည့်​စိတ်ဆန္ဒ​ရော စွမ်းရည်​ပါ​မရှိကြ​ဘဲ​နှင့် ကလေး​မွေး​ကြသည်။ အခြားသူ​တို့​မူ ကလေး​ဖျက်​ချ​ကြ​ရာ စိတ်သောက​၏ အလွန်​ဆိုးရွား​လှ​သည့်​အကျိုးဆက်များ​ကို အဖိုးအခ​အနေ​နှင့်​ခံစား​နေကြ​ရသည်။ ထို့​ပြင် အေအိုင်ဒီအက်စ်​ကဲ့သို့​သော လိင်ဆိုင်ရာ​ကူးစက်​ရောဂါစွဲ​ကပ်​နေကြ​သည့် ငယ်ရွယ်​သော​အမျိုးသား​အမျိုးသမီးများ​လည်း ရှိကြပါ​သေး​သည်။ ယေဟောဝါ​ကို​သိကျွမ်းသူ​တစ်ဦး​အတွက် အကြီးမားဆုံး​ဆိုးကျိုး​မှာ ယေဟောဝါ​နှင့်​ဆက်ဆံ​ရေး​ပျက်ပြား​သွားခြင်း​ဖြစ်​ပေမည်။ * (ဂလာတိ ၅:၁၉-၂၁) အကြောင်းကောင်း​ဖြင့် ကျမ်းစာ​က​ဤသို့​ဆို​၏– “မတရားသော​မေထုန်​ကို ကြ​ဉ်​ရှောင်​ကြလော့။”—၁ ကောရိန္သု ၆:၁၈။

“ပျော်ရွှင်သော​ဘုရားသခင်” အား​ဝတ်ပြုခြင်း

၁၆။ (က) ယေဟောဝါ​သည် သင်၏​လူငယ်ဘဝကို ပျော်ရွှင်​စေ​လို​ကြောင်း ကျွန်ုပ်​တို့​မည်သို့​သိရှိ​ရသနည်း။ (ခ) ယေဟောဝါ​သည် သင်​လိုက်လျှောက်ဖို့ လမ်းညွှန်ချက်များ​ကို အဘယ်ကြောင့် ချမှတ်​ပေး​သနည်း။

^၁၆ ယေဟောဝါ​ကို “ပျော်ရွှင်သော​ဘုရားသခင်” အဖြစ် သမ္မာကျမ်းစာ​က​ဖော်ပြ​၏။ (၁ တိမောသေ ၁:၁၁၊ က​ဘ) သင့်ကိုလည်း ကိုယ်တော်​ပျော်ရွှင်​စေ​လို​တော်​မူ​သည်။ အမှန်​ဆို​ရ​လျှင် ကိုယ်တော်​၏​နှုတ်မြွက်​စကားတော်​က ဤသို့​ဆို​သည်– “အသက်​ပျို​သောအခါ ပျော်မွေ့​လော့။ အရွယ်​ကောင်း​စဉ်​ကာလ​တွင် စိတ်​ရွှင်လန်းခြင်း​ရှိ​လော့။” (ဒေ. ၁၁:၉၊ သမ္မာ) သို့သော် ယေဟောဝါ​သည် လက်ရှိ​အချိန်​ထက်မက​မြင်ပြီး ကောင်းသော​အပြု​အမူ၊ ဆိုးသော​အပြု​အမူ​တို့၏ ရေရှည် အကျိုးဆက်များ​ကိုလည်း သိမြင်​နိုင်​တော်​မူ​၏။ ထို​အကြောင်းကြောင့် သင့်​အား ကိုယ်တော်​ဤသို့​သတိပေး​၏– “‘ငါ​နေ၍​မပျော်​နိုင်’ ဟု​ဆို​ရသော​နှစ်များ​မ​နီး​မ​ကပ်၊ ဆိုးသော​နေ့ရက်​ကာလ​မရောက်မီ အရွယ်​ကောင်း​စဉ်​အခါ​ကာလ​၌ သင့်​အား​ဖန်ဆင်း​တော်​မူ​သော​အရှင်ကို အောက်မေ့လော့။”—ဒေ. ၁၂:၁၊ သမ္မာ။

၁၇၊ ၁၈။ ယေဟောဝါ​အား​ဝတ်ပြုခြင်း​မှ ရရှိ​လာ​သည့် ပျော်ရွှင်မှု​ကို ငယ်ရွယ်​သည့်​ခရစ်ယာန်​တစ်ဦး မည်သို့​ဖော်ပြ​ခဲ့​ပြီး ထပ်တူ​ရွှင်လန်းမှု​မျိုးကို သင်​မည်သို့​တွေ့ရှိ​နိုင်​မည်​နည်း။

^၁၇ ယနေ့ လူငယ်များစွာ​တို့သည် ယေဟောဝါ​အား​ဝတ်ပြုခြင်း​မှ ပျော်ရွှင်မှု​များစွာ ရရှိခဲ့ကြ​ပြီ။ ဥပမာ၊ အသက် ၁၅ နှစ်အရွယ် လီ​နာ​က ဤသို့​ဆို​သည်– “ကျွန်မ​ဟာ ယုံကြည်မှု၊ ကိုယ့်​ကိုယ်ကို​လေးစားမှု​နဲ့ ခေါင်းမော့​ထား​နိုင်တယ်။ ဆေးလိပ်​မ​သောက်၊ မူးယစ်​ဆေးဝါး​မ​သုံးစွဲ​တဲ့​အတွက် ကျန်းမာ​သန်စွမ်း​နေတယ်။ အသင်းတော်က​တစ်ဆင့်​ပေး​တဲ့ အဖိုးထိုက်တဲ့​လမ်းညွှန်မှုကို ကျွန်မ​ရရှိတယ်၊ အဲဒါ​က စာတန်​ရဲ့ ပြင်းထန်​တဲ့ ဖိအား​ပေး​မှု​ကို တွန်းလှန်​ဖို့ ကျွန်မ​ကို​ကူညီပေး​တယ်။ ဘုရားသခင့်​နိုင်ငံတော်​ခန်းမ​ကနေ ရရှိနိုင်​တဲ့ တည်ဆောက်မှု​ဖြစ်စေ​တဲ့ ပေါင်းသင်းမှု​ကြောင့် ကျွန်မ​မျက်နှာဟာ ရွှင်​ပျ​နေတယ်။ အကောင်းတကာ့​အကောင်းဆုံး​က​တော့ ကျွန်မ​မှာ ကမ္ဘာ​မြေကြီးပေါ် ထာဝစဉ်​အသက်ရှင်​သွားမယ်​ဆို​တဲ့ မယှဉ်နိုင်​တဲ့​အလားအလာ ရှိနေခြင်း ဖြစ်ပါ​တယ်။”

^၁၈ လီ​နာ​နည်းတူ ခရစ်ယာန်​လူငယ်များစွာ​တို့သည် ယုံကြည်ခြင်း​အတွက် ကြိုးစား​တိုက်လှန်​နေကြ​ပြီး ယင်းက သူတို့အား ပျော်ရွှင်​စေ​လေ​သည်။ သူတို့၏​အသက်တာသည် တစ်ခါတစ်ရံ စိန်ခေါ်မှု​များနှင့်​ပြည့်နေ​သော်လည်း စစ်မှန်သော​ရည်ရွယ်ချက်​နှင့်​အနာဂတ်​ရှိကြောင်း သူတို့​နားလည်​သဘောပေါက်​ကြသည်။ ထို့​ကြောင့် သင်၏​ကောင်းကျိုး​ကို အထူး​စိတ်ဝင်စား​သည့် ဘုရားသခင်​အား ဆက်၍​ဝတ်ပြုပါ​လေ။ ကိုယ်တော်​၏​နှလုံးကို ရွှင်လန်း​စေမည်​ဆိုလျှင် ကိုယ်တော်​က​လည်း သင့်ကို ယခု​နှင့်​ထာဝစဉ် ရွှင်လန်း​စေပါ​လိမ့်​မည်။—ဆာလံ ၅:၁၁။

[အောက်ခြေ​မှတ်ချက်များ]

သင်​မှတ်မိ​သလော

• “ဆိုးယုတ်သူ” စာတန်​ထံ​မှ အဘယ်​အန္တရာယ်ကို သင်ရင်​ဆိုင်​ရ သနည်း။

• ယေဟောဝါ​၏​နှလုံးကို သင်​မည်သို့ ရွှင်လန်း​စေနိုင်​မည်​နည်း။

• ယေဟောဝါ​သည် သင့်​အား​ဂရုစိုက်​နေကြောင်း သမ္မာကျမ်းစာ​က မည်သို့​ဖော်ပြ​သနည်း။

• ယေဟောဝါ​အား​ဝတ်ပြုခြင်း​မှ​ရလာ​သည့် ကောင်းချီး​အချို့​ကား အဘယ်နည်း။

[လေ့လာ​ရန်​မေးခွန်းများ]

[စာမျက်နှာ ၁၃ ပါ လေးထောင့်ကွက်/ ရုပ်ပုံ]

ခြေလှမ်း​မှား​လု​နီး​နီး​ဖြစ်သွား​သည့် ဖြောင့်မတ်​သော​အမျိုးသား​တစ်ဦး

အာသပ်​သည် ရှေး​ဣသရေလ​နိုင်ငံ​ရှိ ယေဟောဝါ​၏​ဝတ်ပြုရာ​အိမ်​၌ ထင်ရှား​ကျော်ကြား​သော လေဝိ​တေး​ဂီတသမား​တစ်ဦး​ဖြစ်၏။ သူသည် လူထုရှေ့​ဝတ်ပြု​ကိုးကွယ်​မှု​တွင် အသုံးပြုသည့် သီချင်းများ​ကို​ပင် သီကုံး​စပ်ဆို​ခဲ့​ရသည်။ သို့သော် သူ့​တွင် ထူးခြားသည့်​အခွင့်အရေး​များ​ရှိ​လင့်​ကစား တစ်ချိန်​တွင် အာသပ်​သည် ဘုရားသခင့်​ပညတ်တော်​ကို ချိုးဖောက်​နေကြ​ငြား ပြစ်ဒဏ်​မခံရ​ပုံ​ပေါက်​နေကြ​သည့် သူ၏​သက်တူရွယ်တူ​များ​၏ ဘုရားတရား​မဲ့​သော​အပြုအမူကို ကြိုက်​နှစ်သက်​လာ​ခဲ့​၏။ နောက်ပိုင်း​တွင် “ငါ​မူ​ကား ခြေချော်​လုလျက်၊ ခြေရာ​လွဲ​လုလျက်​ရှိ​မိ​ပြီ။ အကြောင်း​မူ​ကား မတရားသော​သူတို့၏​စည်းစိမ်​ကို​မြင်​သောအခါ မိုက်​သော​သူတို့ကို​ပင် ငါ​ငြူစူ​မိ​ပြီ” ဟု အာသပ်​ဝန်ခံခဲ့​လေ​သည်။—ဆာလံ ၇၃:၂၊ ၃။

နောက်ပိုင်း​တွင် အာသပ်​သည် ဘုရားသခင့်​သန့်ရှင်း​ရာ​ဌာန​သို့​သွား​ကာ အဆိုပါ​ကိစ္စ​နှင့်​ပတ်သက်​၍ ဆုတောင်း​ခဲ့​၏။ အားသစ်လန်း​သော​အမြင်​အာရုံ​ဖြင့် ယေဟောဝါ​သည် မကောင်းမှုကို​မုန်းတီး​၍ အချိန်တန်သော် မတရားသော​သူနှင့် ဖြောင့်မတ်​သော​သူတို့သည် မိမိတို့​စိုက်​သည့်​အတိုင်း ရိတ်သိမ်း​ကြလိမ့်မည်​ကို သူ​နားလည်ခဲ့​သည်။ (ဆာလံ ၇၃:၁၇-၂၀; ဂလာတိ ၆:၇၊ ၈) မတရားသော​သူတို့သည် ချော​သော​အရပ်၌ အမှန်ပင်​ရှိနေကြပါ​သည်။ အဆုံး​တွင် ဤ​ဘုရားတရား​မဲ့​စနစ်​ကို ယေဟောဝါ​ဖျက်ဆီး​ပစ်​သည့်​အခါ ထို​သူတို့သည် ကျဆုံးသွား​ပါ​လိမ့်​မည်။—ဗျာ. ၂၁:၈။

[စာမျက်နှာ ၁၅ ပါ ရုပ်ပုံ]

ယေဟောဝါ​သည် သင့်​အား အထူး​စိတ်ဝင်စား​တော်​မူ​၏၊ စာတန်​၏​ပန်းတိုင်​မူ​ကား သင့်ကို​ဝါးမျို​ရန်ဖြစ်​၏

[စာမျက်နှာ ၁၆ ပါ ရုပ်ပုံ]

လူငယ်များစွာ​တို့သည် ခရစ်ယာန်​ချင်း​များနှင့်​အတူ ယေဟောဝါ​အား​ဝတ်ပြု​ကြ​ခြင်း​ဖြင့် အကြီးမားဆုံး​သော ပျော်ရွှင်မှု​ကို တွေ့ ရှိနေကြ