သွေး၏မြင့်မြတ်မှုကို ထိန်းသိမ်းရာတွင် အကူအညီ
ဘုရားသခင့်နိုင်ငံတော်ကြွေးကြော်သူများမှတ်တမ်း
သွေး၏မြင့်မြတ်မှုကို ထိန်းသိမ်းရာတွင် အကူအညီ
ကမ္ဘာတစ်ဝန်းရှိ ယေဟောဝါ၏ကျေးကျွန်များသည် သွေး၏မြင့်မြတ်မှုနှင့်စပ်လျဉ်း၍ ဘုရားသခင်အပေါ် တည်ကြည်မှုပြသခဲ့ကြသည်။ (တမန်တော် ၁၅:၂၈၊ ၂၉) သစ္စာနှင့်သတိပညာရှိကျွန်အတန်းအစားသည် ခရစ်ယာန်ညီအစ်ကိုအသင်းအပင်းကို ကူညီပေးခဲ့သည်။ (မဿဲ ၂၄:၄၅-၄၇) ဖိလစ်ပိုင်နိုင်ငံတွင် အဘယ်အကျိုးရလဒ်များရရှိခဲ့ကြောင်း ကြည့်ကြစို့။
ဖိလစ်ပိုင်ဌာနခွဲက ဤသို့ဖော်ပြသည်– “၁၉၉၀ ပြည့်နှစ်တွင် ဘရွတ်ကလင်ဗေသလမှ ကိုယ်စားလှယ်များ ဖိလစ်ပိုင်ဌာနခွဲ၌ နှီးနှောဖလှယ်ပွဲကျင်းပမည်ဟု ကျွန်ုပ်တို့သတင်းရခဲ့သည်။ ကိုရီးယား၊ ထိုင်ဝမ်နှင့် ဟောင်ကောင်အပါအဝင် အာရှတိုက်ရှိ ဌာနခွဲအချို့မှ ညီအစ်ကိုများကို ဖိတ်ခေါ်ခဲ့သည်။ ယင်း၏ရည်ရွယ်ချက်မှာ ဆေးရုံအချက်အလက်ဝန်ဆောင်လုပ်ငန်း တည်ထောင်ရန်နှင့် ဆေးရုံဆက်သွယ်ရေးကော်မတီများကို စီစဉ်ပေးရန်ဖြစ်သည်။ ဖိလစ်ပိုင်နိုင်ငံတွင် ထိုကော်မတီများကို အစပိုင်း၌ မြို့ကြီးလေးမြို့တွင် ဖွဲ့စည်းတည်ထောင်ခဲ့၏။” သွေးနှင့်ပတ်သက်သည့် ခရစ်ယာန်ရပ်တည်ချက်နှင့်စပ်လျဉ်း၍ ကျွန်ုပ်တို့နှင့် တလိုတလားပူးပေါင်းဆောင်ရွက်လိုမည့် ဆရာဝန်များကို ထိုကော်မတီများက ကြိုးစားရှာဖွေထားကြရမည်။ ထို့ပြင် သွေးပြဿနာ ပေါ်ပေါက်လာသောအခါ ညီအစ်ကိုများကို သူတို့ကူညီပေးကြမည်။
ဘာဂူအိုမြို့တွင် ဆေးရုံဆက်သွယ်ရေးကော်မတီတာဝန် ထမ်းဆောင်ရန် ရာမီခ်ယိုကို ရွေးချယ်ခဲ့သည်။ အချိန်ကုန်လွန်လာသည်နှင့်အမျှ ဆရာဝန်များသည် ဤလုပ်ငန်းကို သတိပြုမိလာကြလေသည်။ ဆေးရုံဆက်သွယ်ရေးကော်မတီနှင့် ဆရာဝန်များ တွေ့ဆုံပြီး သွေးသွင်းခြင်းကို ငြင်းပယ်ကြသော သက်သေခံလူနာများအား မည်သို့ကုသပေးရန် မေးမြန်းခဲ့သည့်အချိန်ကို ရာမီခ်ယိုအမှတ်ရမိသည်။ ရာမီခ်ယိုက ဤသို့ပြောပြသည်– “ဆရာဝန်တွေက မေးခွန်းတွေမေးကြတယ်၊ ဒါပေမဲ့ အဲ့ဒီမေးခွန်းတွေက ပညာရပ်ဆိုင်ရာမေးခွန်းတွေဖြစ်နေတော့ ဘယ်လိုဖြေရမှန်း ကျွန်တော်မသိဘူး။” ဤအခက်အခဲကို ကျော်လွှားနိုင်ဖို့ အကူအညီပေးပါရန် ယေဟောဝါထံ သူဆုတောင်းလိုက်သည်။ ရာမီခ်ယို ဤသို့ဆက်ပြောပြသည်– “မေးခွန်းတစ်ခုပြီးတိုင်း တခြားဆရာဝန်တွေက လက်ထောင်ပြီး ထပ်တူအခြေအနေတွေကို သူတို့ဘယ်လိုကိုင်တွယ်ခဲ့တဲ့အကြောင်း ပြောပြကြတယ်။” ရာမီခ်ယိုသည် ဤအကူအညီအတွက် ဝမ်းသာမိသည်၊ အထူးသဖြင့် ထိုအမေးအဖြေသည် နှစ်နာရီကြာသောကြောင့်ပင်။
ယခု ထိုနိုင်ငံတစ်ဝန်းတွင် ၎င်းကော်မတီ ၂၁ ခုရှိနေပြီး ထိုတွင်ညီအစ်ကို ၇၇ ဦးပါဝင်ကူညီပေးနေကြသည်။ သက်သေခံတစ်ဦးဖြစ်သူ ဆရာဝန်ဒါနီလိုက ဤသို့ဆို၏– “သက်သေခံလူနာတွေကို သူတို့ရဲ့အဖွဲ့အစည်းက ဂရုစိုက်ထောက်ပံ့ကူညီပေးနေတယ်ဆိုတာ ဆရာဝန်တွေ သိလာကြပြီ။” သမားတော်တစ်ဦးဆိုလျှင် အစပိုင်းတွင် သွေးမသွင်းဘဲ ညီအစ်ကိုတစ်ဦးကို ခွဲစိတ်ရန် နောက်ဆံတင်းခဲ့သည်။ သို့သော် ထိုညီအစ်ကိုသည် သွေးကိစ္စနှင့်ပတ်သက်၍ အခိုင်အမာရပ်တည်ခဲ့၏။ နောက်ဆုံး သွေးမသွင်းဘဲ ခွဲစိတ်ကုသလိုက်ရာ အောင်မြင်ခဲ့သည်။ ဆေးရုံသတင်းအချက်အလက်ဝန်ဆောင်လုပ်ငန်းက ဤသို့အစီရင်ခံသည်– “အဲ့ဒီညီအစ်ကိုရဲ့ကျန်းမာရေး အလျင်အမြန်ပြန်ကောင်းလာတာကို ဆရာဝန်မြင်ပြီး အံ့ဩသွားတယ်။ ဒါနဲ့ သူက ‘ဒီမှာဖြစ်ပျက်တာကိုထောက်ပြီး တကယ်လို့ ခင်ဗျားတို့ရဲ့အဖွဲ့ဝင်တစ်ဦးတစ်ယောက် သွေးမသွင်းဘဲ ဒီလိုခွဲစိတ်ကုသဖို့ လိုအပ်လာမယ်ဆိုရင် ကျွန်တော် ခွဲစိတ်ပေးဖို့ အဆင်သင့်ပဲ’ လို့ပြောပါတယ်။”