တည်ကြည်သောစိတ်နှင့်ပြည့်စုံ၍ အသက်ပြေးပွဲတွင် ဆုယူလော့
တည်ကြည်သောစိတ်နှင့်ပြည့်စုံ၍ အသက်ပြေးပွဲတွင် ဆုယူလော့
သင်သည် လှိုင်းလေထန်သော ပင်လယ်ကို ဖြတ်ကူးရလျှင် အဘယ်ရေယာဉ်မျိုးကို ရွေးမည်နည်း။ မခိုင့်တခိုင်ရွက်လှေကို ရွေးမည်လော၊ ခိုင်ခံ့တောင့်တင်းသော သင်္ဘောကို ရွေးမည်လော။ လှိုင်းထန်နေသော ပင်လယ်ကို အောင်မြင်စွာ ဖြတ်သန်းနိုင်မည့် သင်္ဘောကို သင်ရွေးချယ်မည်မှာ သေချာသည်။
မုန်တိုင်းထန်ပြီး အန္တရာယ်များပြားသော ဤစနစ်ထဲ ဖြတ်သန်းသွားလာသောအခါ တုန်လှုပ်စရာအခက်အခဲများ ကြုံတွေ့တတ်ကြရသည်။ ဥပမာ၊ လူငယ်များသည် ဤလောက၏ရှုပ်ထွေးပွေလီသော အတွေးအခေါ်များနှင့် ခေတ်ရေစီးကြောင်းများအလယ်တွင် တစ်ခါတစ်ရံ စိတ်ရှုပ်ထွေးကာ မရေရာမသေချာ ဖြစ်နေတတ်ကြပေမည်။ မကြာသေးမီကမှ ခရစ်ယာန်လမ်းစဉ်ကို လိုက်လျှောက်ခါစရှိသူများသည် ယခုထိတိုင် ထိုသို့ဖြစ်နေကြဆဲရှိမည်။ ဘုရားသခင်၏လုပ်ငန်းတော်ကို နှစ်ပေါင်းများစွာ သစ္စာရှိရှိလုပ်ဆောင်ခဲ့ကြသော တည်ကြည်သူတချို့ပင်လျှင် သူတို့မျှော်လင့်ထားရာများသည် လုံးလုံးလျားလျား ဖြစ်မလာသေးသောကြောင့် စမ်းသပ်မှုခံနေရဆဲရှိမည်။
ဤသို့ခံစားရခြင်းသည် အသစ်အဆန်းမဟုတ်ချေ။ ယေဟောဝါ၏ သစ္စာရှိကျေးကျွန်များဖြစ်ကြသည့် မောရှေ၊ ယောဘနှင့် ဒါဝိဒ်အစရှိသူတို့ပင် တစ်ခါတစ်ရံ စိုးရိမ်ပူပင်ခဲ့ကြသည်။ (တောလည်ရာ ၁၁:၁၄၊ ၁၅; ယောဘ ၃:၁-၄; ဆာလံ ၅၅:၄) သို့တိုင် သူတို့ဘဝတစ်လျှောက် ယေဟောဝါကို တည်ကြည်စွာ ဆည်းကပ်ဝတ်ပြုခဲ့ကြသည်။ သူတို့၏ပုံသက်သေကောင်းက ကျွန်ုပ်တို့ကို တည်ကြည်မှုရှိစေသော်လည်း စာတန်သည် ကျွန်ုပ်တို့ကို ထာဝရအသက်ပြေးလမ်းပေါ်မှ သွေဖည်သွားစေလိုသည်။ (လုကာ ၂၂:၃၁) သို့ဖြစ်၍ ကျွန်ုပ်တို့သည် မည်သို့ “ယုံကြည်ခြင်း၌တည်” ကြည်နိုင်ကြမည်နည်း။ (၁ ပေတရု ၅:၉) ယုံကြည်သူချင်းများကိုလည်း မည်သို့ခွန်အားပေးနိုင်မည်နည်း။
ကျွန်ုပ်တို့ တည်ကြည်မှုရှိရန် ယေဟောဝါအလိုတော်ရှိ
ကျွန်ုပ်တို့သာ ယေဟောဝါကို တည်ကြည်မည်ဆိုလျှင် ကျွန်ုပ်တို့အစဉ်ခိုင်ခံ့မြဲမြံနေရန် ကိုယ်တော်ကူညီမစတော်မူမည်။ ဆာလံဆရာဒါဝိဒ်သည် အခက်အခဲများစွာကို ကြုံတွေ့ခဲ့ရသော်လည်း ဘုရားသခင်ကို ယုံကြည်ကိုးစားသောကြောင့် ဤသို့သီဆိုနိုင်ခဲ့သည်– ယေဟောဝါသည် “ပျက်စီးရာတွင်းနှင့် အလွန်ဆိုးသောရွှံ့ထဲက ငါ့ကိုဆယ်နုတ်ပြီးလျှင် ငါ့ခြေတို့ကို ကျောက်ပေါ်မှာတင်၍ ငါ့ခြေရာတို့ကို တည်စေတော်မူ၏။”—ဆာလံ ၄၀:၂။
ကျွန်ုပ်တို့သည် “ထာဝရအသက်ကိုကိုင်ယူ” နိုင်ရန် “ယုံကြည်ခြင်းနှင့်ဆိုင်၍ ကောင်းစွာသောတိုက်လှန်ခြင်းကိုပြု” ဖို့ယေဟောဝါခွန်အားပေးတော်မူ၏။ (၁ တိမောသေ ၆:၁၂) ထို့ပြင် ကျွန်ုပ်တို့သည် တည်ကြည်သောစိတ်နှင့်ပြည့်စုံ၍ ဝိညာဉ်ရေးတိုက်ပွဲတွင် အောင်ပွဲခံနိုင်မည့် နည်းလမ်းကိုလည်း ကိုယ်တော်ပေးထားသည်။ တမန်တော်ပေါလုက “သခင်ဘုရားအားဖြင့်လည်းကောင်း၊ တန်ခိုးတော်အရှိန်အားဖြင့်လည်းကောင်း ခိုင်ခံ့ခြင်းရှိကြလော့။ [စာတန်] ၏ပရိယာယ်တို့ကို ဆီးတားနိုင်မည်အကြောင်း၊ ဘုရားသခင်ပြင်ဆင်တော်မူသော လက်နက်စုံကို ဝတ်ဆောင်ကြလော့” ဟုခရစ်ယာန်ချင်းတို့ကို တိုက်တွန်းအားပေးခဲ့သည်။ (ဧဖက် ၆:၁၀-၁၇) သို့သော် အဘယ်အရာက ကျွန်ုပ်တို့ကို စိတ်မတည်မငြိမ်ဖြစ်စေနိုင်သနည်း။ အန္တရာယ်ရှိသော ဤလွှမ်းမိုးမှုများကို ကျွန်ုပ်တို့ မည်သို့တားဆီးနိုင်မည်နည်း။
စိတ်မတည်မငြိမ်ဖြစ်စေသည့်အကြောင်းရင်းများကို သတိပြု
ကျွန်ုပ်တို့၏ဆုံးဖြတ်ချက်များသည် နောက်ဆုံး၌ ကျွန်ုပ်တို့၏ခရစ်ယာန်တည်ငြိမ်မှုကို အပြုသဘော သို့မဟုတ် အပျက်သဘောသက်ရောက်စေနိုင်သည်ဟူသော အရေးကြီးအချက်ကို သတိရခြင်းသည် ပညာရှိရာရောက်၏။ လူငယ်များသည် အလုပ်အကိုင်၊ ထပ်ဆင့်ပညာရေးနှင့် အိမ်ထောင်ပြုခြင်းအစရှိသော ကိစ္စများကို ဆုံးဖြတ်ကြရသည်။ လူကြီးများမှာမူ တခြားဒေသသို့ ပြောင်းရွှေ့သင့်မသင့်၊ သို့မဟုတ် အလုပ်နောက်တစ်ခုလုပ်သင့်၊ မလုပ်သင့် ဆုံးဖြတ်ကြရမည်။ အချိန်အသုံးပြုပုံအပြင် အခြားကိစ္စရပ်များနှင့်ပတ်သက်၍ နေ့စဉ် ဆုံးဖြတ်ချက်များ ချနေကြရသည်။ ဘုရားသခင်၏ကျေးကျွန်များအနေနှင့် စိတ်တည်ငြိမ်မှုရှိစေရန် ပညာရှိဆုံးဖြတ်ချက်များချဖို့ အဘယ်အရာက အကူအညီပေးမည်နည်း။ သက်တမ်းကြာခရစ်ယာန်တစ်ဦးက “ဆုံးဖြတ်ချက်ချရတော့မယ်ဆိုရင် ယေဟောဝါရဲ့အကူအညီကို ကျွန်မတောင်းခံတယ်။ သမ္မာကျမ်းစာကနေ၊ ခရစ်ယာန်အစည်းအဝေးတွေကနေ၊ အကြီးအကဲတွေကနေ၊ ကျမ်းစာအခြေပြုစာပေတွေကနေ ရရှိတဲ့အကြံဉာဏ်ကို လက်ခံပြီးကျင့်သုံးဖို့ အရေးကြီးတယ်လို့ ကျွန်မထင်တယ်” ဟုပြောသည်။
ဆုံးဖြတ်ချက်များချသောအခါ မိမိကိုယ်ကို ဤသို့မေးသင့်သည်– ‘ဒီနေ့ ဆုံးဖြတ်လိုက်တာကို နောက်လေးငါးနှစ်ကြာရင်ကော ကျေနပ်မလား၊ ဒါမှမဟုတ် ဝမ်းနည်းမလား။ ကျွန်ုပ်ရဲ့ဆုံးဖြတ်ချက်တွေဟာ ကျွန်ုပ်ရဲ့ဝိညာဉ်ရေးကို မထိခိုက်ဘဲ တိုးတက်စေဖို့ ကြိုးစားပြီး သေချာအောင်ပြုသလား။’—ဖိလိပ္ပိ ၃:၁၆။
နှစ်ခြင်းခံပြီးသူအချို့သည် သွေးဆောင်ခံခြင်း၊ သို့မဟုတ် ဘုရားသခင်၏ဥပဒေများကို ချိုးဖောက်ခါနီးအထိ ဖြစ်စေသည့်အတွက် စိတ်မတည်မငြိမ်ဖြစ်ခဲ့သည်။ နောင်တမရဘဲ ဆက်အပြစ်လုပ်နေသောကြောင့် အချို့သည် အသင်းတော်မှ နှင်ထုတ်ခံရပြီးနောက် အသင်းတော်ထဲ ပြန်ဝင်လာနိုင်ရန် ကြိုးစားကြသော်လည်း များမကြာမီ ထပ်တူအပြစ်မျိုးကို လုပ်ပြန်သောကြောင့် တစ်ဖန် နှင်ထုတ်ခံရပြန်သည်။ ဤသူတို့သည် ‘ဆိုးညစ်သောအမှုကို စက်ဆုပ်ရွံရှာပြီး ကောင်းမွန်သောအမှုကို မှီဝဲဆည်းကပ်’ ရန်ဘုရားသခင့်အကူအညီ မတောင်းခဲ့ခြင်းကြောင့် ဖြစ်နိုင်မည်လော။ (ရောမ ၁၂:၉; ဆာလံ ၉၇:၁၀) ကျွန်ုပ်တို့အားလုံးသည် မိမိတို့ “သွားဖို့ရာ ဖြောင့်သောလမ်းတို့ကို ပြင်ဆင်ကြ” ဖို့လိုသည်။ (ဟေဗြဲ ၁၂:၁၃) ထို့ကြောင့် ဝိညာဉ်ရေးတွင် မြဲမြံနေစေရန် ကျွန်ုပ်တို့ကို အကူအညီဖြစ်စေမည့် အချက်တချို့ကို သုံးသပ်ကြည့်ကြစို့။
ခရစ်ယာန်လုပ်ငန်းအားဖြင့် ဆက်၍တည်ကြည်လော့
အသက်ပြေးပွဲတွင် ပုံမှန်ပြေးနေနိုင်ရန် နည်းတစ်နည်းမှာ ဘုရားသခင့်နိုင်ငံတော်ဟောပြောခြင်းလုပ်ငန်းတွင် များများပါဝင်ခြင်းဖြစ်သည်။ မှန်ပါသည်၊ ခရစ်ယာန်ဓမ္မအမှုသည် ဘုရားသခင်၏အလိုတော်ဆောင်ရွက်ခြင်းအပေါ် စိတ်စွဲလမ်းပြီး ထာဝရအသက်ဆုကို မျက်ခြည်မပြတ်အာရုံစိုက်နေရန် အဖိုးမဖြတ်နိုင်သော အထောက်အကူတစ်ခုဖြစ်သည်။ ယင်းနှင့်စပ်လျဉ်း၍ ပေါလုက “ငါချစ်သောညီအစ်ကိုတို့၊ သင်တို့သည် သခင်ဘုရား၏အမှုတော်ကိုဆောင်ရွက်၍ အကျိုးကြီးသည်ကို သိမှတ်သဖြင့် တည်ကြည်သောစိတ်နှင့်ပြည့်စုံ၍ မရွေ့လျော့မတိမ်းယိမ်းဘဲလျက်၊ သခင်ဘုရား၏အမှုတော်ကို ကြိုးစားအားထုတ်ကြလော့” ဟူ၍ ကောရိန္သုမြို့သားများကို တိုက်တွန်းခဲ့၏။ (၁ ကောရိန္သု ၁၅:၅၈) “တည်ကြည်ခြင်း” ဟူသည် ‘နေရာတစ်နေရာတွင် စွဲမြဲနေခြင်း’ ဟုအဓိပ္ပာယ်ရသည်။ “မရွေ့လျော့မတိမ်းယိမ်း” ဟူမူကား ‘ကျောက်ချထားသောနေရာမှ ရွေ့မသွားစေခြင်း’ ဟုအဓိပ္ပာယ်သက်ရောက်နိုင်သည်။ ထို့ကြောင့် ကျွန်ုပ်တို့၏ခရစ်ယာန်ဓမ္မအမှုတွင် အလုပ်များနေခြင်းဖြင့် ခရစ်ယာန်လမ်းစဉ်တွင် စွဲစွဲမြဲမြဲတည်ရှိစေသည်။ ယေဟောဝါအကြောင်းသိရှိလာရန် သူတစ်ပါးကို ကူညီပေးခြင်းသည် ကျွန်ုပ်တို့၏ဘဝကို အဓိပ္ပာယ်ရှိစေသည့်အပြင် ပျော်ရွှင်မှုလည်းရရှိစေ၏။—တမန်တော် ၂၀:၃၅။
ခရစ်ယာန်သာသနာပြုခဲ့ရုံမက အခြားအချိန်ပြည့်ဟောပြောခြင်းလုပ်ငန်းတွင် အနှစ် ၃၀ ကျော်ပါဝင်ခဲ့သူ ခရစ်ယာန်အမျိုးသမီး ပေါ်လီန်က ဤသို့ပြောပြသည်– “ခရစ်ယာန်ဓမ္မအမှုဆောင်တာဟာ အကာအကွယ်ဖြစ်တယ်၊ တခြားသူတွေကို ဟောပြောနေတဲ့အတွက် ကျွန်မမှာ အမှန်တရားရှိတယ်လို့ ပိုယုံကြည်စိတ်ချစေတယ်။” ဝတ်ပြုကိုးကွယ်ရန် အစည်းအဝေးများ တက်ရောက်ခြင်း၊ ကိုယ်ပိုင်လေ့လာမှုကို ဇွဲရှိရှိပြုလုပ်ခြင်းအစရှိသော တခြားခရစ်ယာန်လုပ်ငန်းများကို မှန်မှန်ပြုလုပ်ခြင်းမှလည်း ထပ်တူယုံကြည်စိတ်ချမှုရရှိစေသည်။
မေတ္တာရှိညီအစ်ကိုအသင်းအပင်းအားဖြင့် မြဲမြံတည်ကြည်မှုရှိစေ
စစ်မှန်သောဝတ်ပြုသူများ၏ ကမ္ဘာချီအဖွဲ့အစည်းတွင် တစ်ဦးအပါအဝင်ဖြစ်ရခြင်းက ကျွန်ုပ်တို့ကို မြဲမြံတည်ကြည်စေနိုင်သည်။ ဤသို့သောမေတ္တာရှိ ကမ္ဘာချီညီအစ်ကိုအသင်းအပင်းနှင့် ပေါင်းသင်းရခြင်းသည် အမှန်တကယ်ကြီးမားသောကောင်းချီးပါတကား! (၁ ပေတရု ၂:၁၇) ထို့ပြင် ကျွန်ုပ်တို့သည် ယုံကြည်သူချင်းများကို စိတ်တည်ငြိမ်မှုရရှိစေနိုင်သည်။
ဖြောင့်မတ်သောသူ ယောဘ၏ အကျိုးဖြစ်ထွန်းသောလုပ်ရပ်များကို သုံးသပ်ကြည့်ပါ။ ဟန်ဆောင်၍နှစ်သိမ့်ပေးခဲ့သူ ဧလိဖတ်သည် ဤသို့ဝန်ခံခဲ့ရသည်– “သင်၏စကားသည် လဲလုသောသူကို ထောက်မပြီ။ နုန့်နဲသောဒူးတို့ကိုလည်း တည့်စေပြီ။” (ယောဘ ၄:၄) ကျွန်ုပ်တို့ကော မည်သို့နည်း။ ကျွန်ုပ်တို့တစ်ဦးစီအနေနှင့် ဘုရားသခင့်လုပ်ငန်းတော်တွင် ခံနိုင်ရည်ရှိကြရန် ကျွန်ုပ်တို့၏ဝိညာဉ်ရေး ညီအစ်ကို၊ ညီအစ်မများကို ကူညီပေးဖို့ တာဝန်ရှိသည်။ ညီအစ်ကို၊ ညီအစ်မများနှင့်ဆက်ဆံရာတွင် “အားမရှိသောလက်တို့ကို ခိုင်ခံ့စေကြလော့။ လှုပ်တတ်သောဒူးတို့ကို မြဲမြံစေကြလော့” ဟုဆိုသည့်အတိုင်း ကျွန်ုပ်တို့လုပ်ဆောင်နိုင်ကြ၏။ (ဟေရှာယ ၃၅:၃) ထို့ကြောင့် ခရစ်ယာန်ချင်းတို့နှင့်တွေ့ဆုံသည့်အခါတိုင်း တစ်ဦး၊ နှစ်ဦးကို အားပေးတည်ဆောက်ရန် ပန်းတိုင်ထားပါ။ (ဟေဗြဲ ၁၀:၂၄၊ ၂၅) ယေဟောဝါ၏စိတ်တော်နှင့်တွေ့ရန် သူတို့ကြိုးစားပြုလုပ်လေမျှကို ချီးမွမ်းပြီး ကျေးဇူးတင်ကြောင်းပြောဆိုခြင်းအားဖြင့် အသက်ပြေးပွဲတွင် ဆုရသည့်အထိပြေးရန် တည်ကြည်သောစိတ် အမှန်ရှိစေနိုင်သည်။
ခရစ်ယာန်အကြီးအကဲများသည် လူသစ်များကို အားပေးခြင်းအားဖြင့် များစွာအကျိုးပြုနိုင်သည်။ အကူအညီဖြစ်စေသော အကြံပြုချက်များကို ကျမ်းစာကိုးကား၍ပေးခြင်းအားဖြင့်၊ လယ်ကွင်းဓမ္မအမှုတွင် သူတို့နှင့်အတူတွဲအမှုဆောင်ခြင်းအားဖြင့် ထိုသို့ပြုနိုင်သည်။ တမန်တော်ပေါလုသည် အခွင့်အရေးအမြဲရှာယူ၍ သူတစ်ပါးကို အားပေးခဲ့သည်။ ပေါလုသည် ရောမမြို့ရှိ ခရစ်ယာန်များကို ဝိညာဉ်ရေးအရ အားပေးလိုသဖြင့် သူတို့ကို အလွန်တွေ့လိုခဲ့၏။ (ရောမ ၁:၁၁) ဖိလိပ္ပိမြို့ရှိ ပေါလုချစ်ရသောညီအစ်ကို၊ ညီအစ်မများသည် သူ၏ ‘ဝမ်းမြောက်စရာနှင့် ဦးရစ်သရဖူ’ ဖြစ်၏ဟု သဘောထားသောကြောင့် “သခင်ဘုရား၌ တည်နေကြ” ရန်အမြဲတိုက်တွန်းခဲ့သည်။ (ဖိလိပ္ပိ ၄:၁) သက်သာလောနိတ်မြို့မှ ညီအစ်ကိုများ၏ ဆင်းရဲခြင်းအကြောင်းကို ပေါလုကြားသောအခါ ‘ဆင်းရဲခြင်းကြောင့် အဘယ်သူမျှ မရွေ့လျော့မည်အကြောင်း၊ သူတို့ကို မြဲမြံစေ’ ဖို့ တိမောသေကို သူတို့ထံစေလွှတ်ခဲ့၏။—၁ သက်သာလောနိတ် ၃:၁-၃။
တမန်တော်ပေါလုနှင့် ပေတရုတို့သည် ဝတ်ပြုသူချင်းများ၏ ကြိုးစားအားထုတ်မှုများကို အသိအမှတ်ပြုပြီး လေးမြတ်တန်ဖိုးထားခဲ့ကြသည်။ (ကောလောသဲ ၂:၅; ၁ သက်သာလောနိတ် ၃:၇၊ ၈; ၂ ပေတရု ၁:၁၂) ကျွန်ုပ်တို့လည်း ညီအစ်ကိုများ၏အားနည်းချက်များကိုမဟုတ်ဘဲ သူတို့၏အရည်အသွေးကောင်းများ၊ ယေဟောဝါအား ဂုဏ်တင်ရန် သူတို့အောင်မြင်စွာဆောင်ရွက်မှုမှန်သမျှကို ထိုနည်းတူအာရုံစိုက်ကြစို့။
ကျွန်ုပ်တို့သည် အပျက်သဘောရှိမည်၊ အပြစ်ရှာမည်ဆိုလျှင် ယုံကြည်ခြင်းခိုင်ခံ့မြဲမြံရန် အချို့သူများအတွက် အခက်အခဲရှိစေနိုင်မည်။ ဤအစီအစဉ်စနစ်တွင် ညီအစ်ကိုများသည် “ပင်ပန်း၍ အားလျော့လျက်ရှိနေကြ” ကြောင်းသတိရခြင်းသည် အမှန်သင့်လျော်ပေ၏! (မဿဲ ၉:၃၆၊ သမ္မာ) ခရစ်ယာန်အသင်းတော်တွင် နှစ်သိမ့်မှုနှင့် လန်းဆန်းမှုရရှိရန် သူတို့မျှော်လင့်ထိုက်ပေသည်။ ထို့ကြောင့် ကျွန်ုပ်တို့အားလုံးသည် ဝတ်ပြုသူချင်းများကို အတတ်နိုင်ဆုံးတည်ဆောက်ပေးပြီး သူတို့မြဲမြံတည်ကြည်နိုင်ကြရန် ကူညီပေးကြပါစို့။
တစ်ခါတစ်ရံ အခြားသူများသည် ကျွန်ုပ်တို့၏တည်ကြည်မှုကို လျော့နည်းသွားစေနိုင်သည့်နည်းဖြင့် ဆက်ဆံကြပေမည်။ တစ်ဦးတစ်ယောက်၏ ကြမ်းတမ်းသောစကား သို့မဟုတ် ကြင်နာမှုမရှိသော လုပ်ရပ်တစ်ခုကြောင့် ယေဟောဝါ၏လုပ်ငန်းတော်ကို ကျွန်ုပ်တို့လျော့ပေါ့လုပ်ကိုင်ကြရမည်လော။ ကျွန်ုပ်တို့၏တည်ကြည်မှု ပပျောက်သွားစေရန် မည်သူ့ကိုမျှ ခွင့်မပြုပါလေနှင့်။—၂ ပေတရု ၃:၁၇။
ဘုရားသခင့်ကတိတော်များ—မြဲမြံတည်ကြည်စေသောလွှမ်းမိုးမှုတစ်ခု
ဘုရားသခင့်နိုင်ငံတော်အုပ်ချုပ်သည့်အခါ အထူးကောင်းမွန်သည့်အနာဂတ်ရှိမည်ဟု ယေဟောဝါ၏ကတိတော်က ကျွန်ုပ်တို့ကို တည်ကြည်မှုရှိစေရန် မျှော်လင့်ချက်ပေးသည်။ (ဟေဗြဲ ၆:၁၉) ဘုရားသခင်သည် မိမိကတိတော်အားလုံးကို ပြည့်စုံစေမည်ဟု ကျွန်ုပ်တို့ယုံကြည်စိတ်ချသောကြောင့် ‘သတိနှင့်စောင့်နေရန်၊ ယုံကြည်ခြင်း၌တည်နေရန်’ စေ့ဆော်ခံရကြ၏။ (၁ ကောရိန္သု ၁၆:၁၃; ဟေဗြဲ ၃:၆) ဘုရားသခင်၏ကတိတော်အချို့ မပြည့်စုံသေးဘဲ ကြန့်ကြာနေပုံရှိခြင်းက ကျွန်ုပ်တို့၏ယုံကြည်ခြင်းကို စမ်းသပ်နေခြင်းဖြစ်ပေမည်။ ထို့ကြောင့် မှားယွင်းသောသွန်သင်ချက်များအားဖြင့် လမ်းလွဲမသွားဖို့၊ ကျွန်ုပ်တို့မျှော်လင့်ထားရာမှ ရွေ့လျော့မသွားဖို့ သတိပြုရန် အလွန်အရေးကြီးသည်။—ကောလောသဲ ၁:၂၃; ဟေဗြဲ ၁၃:၉။
ယေဟောဝါ၏ကတိတော်များကို မယုံကြည်သောကြောင့် ဖျက်ဆီးခံရသည့် ဣသရေလလူတို့၏ မကောင်းသော ပုံသက်သေသည် ကျွန်ုပ်တို့အတွက် သတိပေးချက်ဖြစ်သင့်သည်။ (ဆာလံ ၇၈:၃၇) သူတို့နှင့်တူမည့်အစား ဤနောက်ဆုံးကာလတွင် တည်ကြည်မှုရှိပြီး ဘုရားသခင်၏အမှုတော်ကို အရေးတကြီးသဘောထားပြီး လုပ်ဆောင်ကြစို့။ အတွေ့အကြုံရင့်ကျက်သော အကြီးအကဲတစ်ဦးက “မနက်ဖြန်ပဲ ယေဟောဝါရဲ့နေ့ကြီး ရောက်လာတော့မယ့်အတိုင်း နေ့စဉ် အသက်ရှင်တယ်” ဟုပြောခဲ့သည်။—ယောလ ၁:၁၅။
မှန်ပါသည်၊ ယေဟောဝါ၏နေ့ကြီး ရောက်လာတော့မည်ဖြစ်သည်။ သို့ရာတွင် ဘုရားသခင်နှင့် အနီးကပ်ရှိနေသရွေ့ အဘယ်အရာကိုမှ ကြောက်စရာမလိုပါ။ ကိုယ်တော်၏ဖြောင့်မတ်သောစံနှုန်းများကို ကျွန်ုပ်တို့မြဲမြံစွာစွဲကိုင်ထားပြီး တည်ကြည်ကြမည်ဆိုလျှင် ထာဝရအသက်ပြေးပွဲတွင် ကျွန်ုပ်တို့ အောင်မြင်စွာ ပြေးနိုင်ကြပါလိမ့်မည်!—သု. ၁၁:၁၉; ၁ တိမောသေ ၆:၁၂၊ ၁၇-၁၉။
[စာမျက်နှာ ၂၃ ပါ ရုပ်ပုံ]
ခရစ်ယာန်ချင်းများ မြဲမြံတည်ကြည်ဖို့ အကူအညီဖြစ်စေရန် အတတ်နိုင်ဆုံး လုပ်ဆောင်ပေးနေပါသလော