အသင်းတော်များကို ခရစ်တော် မိန့်ဆို၏
အသင်းတော်များကို ခရစ်တော် မိန့်ဆို၏
“ဤကား လက်ယာလက်တွင် ကြယ်ခုနစ်လုံးကိုကိုင်လျက် ရွှေမီးခုံခုနစ်ခုံအလယ်၌ သွားလာသောအရှင်၏မိန့်ဆိုချက်များတည်း။”—ဗျာ. ၂:၁၊ ကဘ။
၁၊ ၂။ အာရှမိုင်းနားရှိ အသင်းတော်ခုနစ်ခုအား ခရစ်တော်မိန့်မှာသောစကားများကို ကျွန်ုပ်တို့ အဘယ်ကြောင့်စိတ်ဝင်စားသင့်သနည်း။
ယေဟောဝါ၏တစ်ပါးတည်းသောသားတော် ယေရှုခရစ်သည် ခရစ်ယာန်အသင်းတော်၏ဦးခေါင်းဖြစ်တော်မူ၏။ ခရစ်တော်သည် မိမိ၏ဝိညာဉ်တော်ဖွား နောက်လိုက်များ၏အသင်းတော် သန့်ရှင်းစင်ကြယ်နေစေရန် သူတို့ကိုချီးမွမ်း၍ တည့်မတ်ပေးခြင်းဖြင့် ဦးစီးဦးဆောင်ပြုခဲ့သည်။ (ဧဖက် ၅:၂၁-၂၇) ကိုယ်တော် ထိုသို့ပြုခဲ့ကြောင်း ဗျာ.ကျမ်းအခန်းကြီး ၂ နှင့် ၃ တွင် တွေ့ရှိရ၏၊ ထိုတွင် အာရှမိုင်းနားရှိ အသင်းတော်ခုနစ်ခုအား ယေရှုမိန့်မှာခဲ့သော ထိရောက်၍ မေတ္တာပါသည့် သတင်းစကားများကို ကျွန်ုပ်တို့ဖတ်ရသည်။
၂ အသင်းတော်ခုနစ်ခုကို ယေရှုမိန့်မှာသည့်စကားများမကြားရမီ တမန်တော်ယောဟန်သည် ‘သခင့်နေ့တော်’ ၏အဆင်းအာရုံတစ်ခုကို မြင်တွေ့ခွင့်ရခဲ့သည်။ (ဗျာ. ၁:၁၀) ၁၉၁၄ ခုနှစ်တွင် မေရှိယနိုင်ငံတော်တည်ထောင်သောအခါ ထို “နေ့” စတင်ခဲ့သည်။ ထို့ကြောင့် အသင်းတော်များကို ခရစ်တော်မိန့်မှာသောစကားသည် ဤနောက်ဆုံးကာလအတွက် အလွန်အရေးပါ၏။ ကိုယ်တော်၏အားပေးစကားနှင့် အကြံပေးချက်သည် ဤခဲယဉ်းဆိုးယုတ်သောကာလအတွင်း တွေ့ကြုံနေရသည့်အခြေအနေများကို ရင်ဆိုင်ကျော်လွှားစေသည်။—၂ တိမောသေ ၃:၁-၅။
၃။ တမန်တော်ယောဟန်မြင်တွေ့ခဲ့သော ‘ကြယ်များ၊’ ‘တမန်များ’ နှင့် “ရွှေမီးခွက်” တို့၏ ပုံဆောင်အဓိပ္ပာယ်များကား အဘယ်နည်း။
၃ “လက်ယာလက်၌ ကြယ်ခုနစ်လုံးကိုကိုင်” ၍ အသင်းတော်များ သို့မဟုတ် ‘ရွှေမီးတိုင်ခုနစ်တိုင်အလယ်၌သွားလာ’ သူ ဘုန်းပွင့်သောယေရှုခရစ်ကို ယောဟန်မြင်တွေ့ခဲ့သည်။ ‘ကြယ်များ’ မှာ “ခုနစ်ပါးသောအသင်းတော်တို့ကိုအုပ်သော တမန်ဖြစ်ကြ၏။” (ဗျာ. ၁:၂၀; ၂:၁) ကြယ်များသည် ဝိညာဉ်သတ္တဝါကောင်းကင်တမန်များကို တစ်ခါတစ်ရံ ပုံဆောင်သော်လည်း ခရစ်တော်သည် ဝိညာဉ်သတ္တဝါများထံ သတင်းစကားရေးပို့ရန် လူသားတစ်ဦးကိုအသုံးပြုခဲ့မည်မဟုတ်ပေ။ ထို့ကြောင့် ဤ ‘ကြယ်များ’ သည် ဝိညာဉ်တော်ဖွားကြီးကြပ်မှူးများ သို့မဟုတ် အကြီးအကဲအဖွဲ့များကို ကျိုးကြောင်းဆီလျော်စွာ ရည်ညွှန်းပါသည်။ ‘တမန်များ’ ဟူသောအသုံးအနှုန်းသည် သတင်းပေးပို့ရသည့် ၎င်းတို့၏တာဝန်ကိုဖော်ပြသည်။ ဘုရားသခင့်အဖွဲ့အစည်းသည် တိုးတက်လာသောကြောင့် ‘သစ္စာရှိဘဏ္ဍာစိုး’ သည် ယေရှု၏ “အခြားသိုး” တို့မှ အရည်အချင်းရှိသူများကို အကြီးအကဲများအဖြစ် ခန့်အပ်ခဲ့ပြီ။—လုကာ ၁၂:၄၂-၄၄; ယောဟန် ၁၀:၁၆။
၄။ အကြီးအကဲများသည် အသင်းတော်များအား ခရစ်တော်မိန့်မှာသောစကားများကို ဂရုစိုက်ခြင်းဖြင့် အဘယ်အကျိုးခံစားရသနည်း။
၄ ‘ကြယ်များ’ သည် ယေရှု၏လက်ယာလက်ဖြစ်သော ကိုယ်တော်၏အခွင့်အာဏာ၊ ထိန်းချုပ်မှု၊ မျက်နှာသာနှင့် ကာကွယ်မှုအောက် ရှိကြသည်။ ထို့ကြောင့် သူတို့သည် ကိုယ်တော်ထံ၌ စာရင်းရှင်းကြရမည်။ ယခုခေတ်အကြီးအကဲများသည် အသင်းတော်ခုနစ်ခုအား ကိုယ်တော်မိန့်မှာသောစကားများကို အလေးဂရုပြုခြင်းအားဖြင့် အလားတူအခြေအနေများကို မည်သို့ကိုင်တွယ်ဖြေရှင်းနိုင်ကြောင်း သိမြင်နားလည်ကြ၏။ သူတို့သာမက ခရစ်ယာန်အားလုံးသည် ဘုရားသခင့်သားတော်၏စကားကို နားထောင်ဖို့လိုသည်။ (မာကု ၉:၇) သို့ဖြစ်၍ အသင်းတော်များအား ခရစ်တော်မိန့်မှာသည့်စကားတို့ကို ဂရုစိုက်ခြင်းဖြင့် ကျွန်ုပ်တို့ အဘယ်အရာသင်ယူနိုင်သနည်း။
ဧဖက်မြို့ရှိတမန်ထံသို့
၅။ ဧဖက်မြို့သည် မည်သို့သောမြို့ဖြစ်ခဲ့သနည်း။
၅ ယေရှုသည် ဧဖက်မြို့ရှိအသင်းတော်ကို ချီးမွမ်း၏၊ တစ်ကြိမ်တည်းတွင် ပြစ်တင်ဆုံးမခဲ့၏။ (ဗျာ. ၂:၁-၇ ဖတ်။) အာရှမိုင်းနားအနောက်ဘက်ကမ်းရိုးတန်းရှိ ကုန်သွယ်ရေးနှင့် ဘာသာရေးဗဟိုဖြစ်သည့် ဤကြီးပွားချမ်းသာသောမြို့တွင် နတ်ဘုရားမအာတေမိ၏ ဗိမာန်ကြီးရှိသည်။ ဧဖက်မြို့တွင် အကျင့်ယိုယွင်းမှု၊ အယူမှားဝတ်ပြုမှုနှင့် နတ်ဆိုးအတတ်ပညာတို့ဖြင့် ပြည့်နှက်ခဲ့သော်လည်း ဘုရားသခင်သည် တမန်တော်ပေါလုနှင့် ထိုမြို့နေ အခြားသူများ၏ဓမ္မအမှုကို ကောင်းချီးပေးခဲ့သည်။—တမန်တော်၊ အခန်းကြီး ၁၉။
၆။ ယနေ့ တည်ကြည်သောခရစ်ယာန်များသည် ရှေးခေတ်ဧဖက်မြို့ရှိသူများနှင့် မည်သို့ဆင်တူသနည်း။
၆ ဧဖက်မြို့ရှိအသင်းတော်ကို ယေရှုဤသို့ချီးမွမ်းပြောဆိုခဲ့သည်– “သင်အကျင့်ကျင့်ခြင်း၊ ပင်ပန်းစွာလုပ်ဆောင်ခြင်း၊ သည်းခံခြင်းကိုငါသိ၏။ သင်သည် မတရားသောသူတို့ကို လက်မခံနိုင်ကြောင်းကိုလည်းကောင်း၊ တမန်တော်မဟုတ်ဘဲ၊ တမန်တော်ဖြစ်ယောင်ဆောင်သောသူတို့ကို စစ်ဆေး၍ လှည့်ဖြားသောသူဖြစ်သည်ဟု သိကြောင်းကိုလည်းကောင်း . . . ငါသိ၏။” ယနေ့ ယေရှုနောက်လိုက်စစ်များ၏ အသင်းတော်များသည် အကျင့်ကောင်းများ၊ ကြိုးပမ်းမှု၊ ခံနိုင်ရည် အစရှိသည်တို့ရှိကြသည်။ တမန်တော်များဟုယူမှတ်ခံလိုသော ညီအစ်ကိုဖြစ်ယောင်ဆောင်သူတို့ကို သူတို့သည်းမခံကြချေ။ (၂ ကောရိန္သု ၁၁:၁၃၊ ၂၆) ဧဖက်မြို့သားများကဲ့သို့ ယခုခေတ်တည်ကြည်သောခရစ်ယာန်များသည် “မတရားသောသူတို့ကို လက်မခံနိုင်” ကြချေ။ ထို့ကြောင့် ယေဟောဝါ၏စင်ကြယ်သောဝတ်ပြုရေးကို ဆက်ထိန်းသိမ်းရန်နှင့် အသင်းတော်ကိုကာကွယ်ရန် နောင်တမယူသည့် အယူဖောက်ပြန်သူများနှင့် သူတို့အပေါင်းအဖော်မလုပ်ကြချေ။—ဂလာတိ ၂:၄၊ ၅; ၂ ယောဟန် ၈-၁၁။
၇၊ ၈။ ဧဖက်မြို့ရှိအသင်းတော်တွင် အဘယ်ကြီးမားသောပြဿနာ ရှိခဲ့သနည်း၊ အလားတူအခြေအနေမျိုးကို ကျွန်ုပ်တို့ မည်သို့ကိုင်တွယ်ဖြေရှင်းနိုင်မည်နည်း။
၇ သို့တိုင် ဧဖက်ခရစ်ယာန်များ၌ ကြီးလေးသောပြဿနာတစ်ခုရှိခဲ့သည်။ ယေရှုက “သင်သည် ရှေ့ဦးစွာသောချစ်ခြင်းမေတ္တာလျော့ပြီဟု သင်၌အပြစ်တင်စရာရှိ၏” ဟုဆိုခဲ့သည်။ အသင်းတော်သားများသည် ယေဟောဝါအပေါ်ထားရှိခဲ့သော သူတို့၏ကနဦးမေတ္တာကို ပြန်ရှင်သန်စေဖို့လိုအပ်ခဲ့သည်။ (မာကု ၁၂:၂၈-၃၀; ဧဖက် ၂:၄; ၅:၁၊ ၂) ဘုရားသခင်အားချစ်သည့် ကျွန်ုပ်တို့ကိုယ်တိုင်၏ ကနဦးမေတ္တာ မခန်းခြောက်သွားစေဖို့ ကာကွယ်ထိန်းသိမ်းကြရမည်။ (၃ ယောဟန် ၃) သို့သော် ရုပ်ပစ္စည်းကြွယ်ဝလိုခြင်း၊ အပျော်အပါးလိုက်စားခြင်းတို့ကို ကျွန်ုပ်တို့၏ဘဝတွင် အဓိကထားလာလျှင်ကော။ (၁ တိမောသေ ၄:၈; ၆:၉၊ ၁၀) ထိုသို့ဖြစ်လျှင် အဆိုပါတိမ်းညွတ်မှုများအစား ယေဟောဝါအား နှစ်နှစ်ကာကာချစ်သည့်မေတ္တာနှင့် ကျွန်ုပ်တို့အတွက် ကိုယ်တော်နှင့် ကိုယ်တော့်သားတော်တို့ပြုလုပ်ပေးခဲ့သမျှကို ကျေးဇူးတင်စိတ်ရှိရန် ဘုရားသခင့်အကူအညီရဖို့ ထက်သန်စွာဆုတောင်းသင့်သည်။—၁ ယောဟန် ၄:၁၀၊ ၁၆။
၈ ခရစ်တော်က “အရင်နေရာအရပ်ကိုအောက်မေ့လော့။ နောင်တရလော့။ ရှေ့ဦးစွာသောအကျင့်ကိုကျင့်လော့” ဟုဧဖက်မြို့သားများကို တိုက်တွန်းခဲ့သည်။ ထိုသို့ မပြုလုပ်ကြလျှင်ကော။ “သို့မဟုတ် သင်ရှိရာသို့ ငါသည်အလျင်အမြန်လာမည်။ နောင်တမရလျှင်၊ သင်၏မီးခွက်ကိုနေရာမှရွှေ့မည်” ဟုယေရှုမိန့်ဆိုခဲ့သည်။ သိုးအားလုံးသာ မိမိတို့၏ကနဦးမေတ္တာ ပျောက်ဆုံးသွားမည်ဆိုလျှင် “မီးတိုင်” သို့မဟုတ် အသင်းတော်သည် ဆက်တည်ရှိမည်မဟုတ်ပါ။ ထို့ကြောင့် အသင်းတော်သည် ဝိညာဉ်ရေးဘက် ဆက်လက်ထွန်းလင်းနေစေရန် ထက်သန်သောခရစ်ယာန်များအနေနှင့် အားထုတ်ကြိုးပမ်းကြပါစို့။—မဿဲ ၅:၁၄-၁၆။
၉။ ဂိုဏ်းဂဏစွဲဝါဒကို မည်သို့ရှုမြင်သင့်သနည်း။
၉ “နိကောလတပည့်တို့ [“ဂိုဏ်း၊” ကဘ] ၏အကျင့်” ကို ဧဖက်မြို့သားများ မုန်းတီးခဲ့ကြခြင်းသည် ချီးမွမ်းစရာပင်။ ဗျာဒိတ်ကျမ်းတွင် ဖော်ပြထားသည့်အချက်မှလွဲ၍ ဤဂိုဏ်း၏မူလအစ၊ သွန်သင်ချက်များနှင့် ဓလေ့ထုံးစံများကို အတိအကျမသိရချေ။ သို့သော် လူနောက်လိုက်ခြင်းကို ယေရှုပြစ်တင်ရှုတ်ချသည့်အတွက် ဧဖက်မြို့ရှိခရစ်ယာန်များနည်းတူ ဂိုဏ်းဂဏစွဲဝါဒကို ကျွန်ုပ်တို့ဆက်၍မုန်းတီးကြရမည်။—မဿဲ ၂၃:၁၀။
၁၀။ ဝိညာဉ်တော်ဆင့်ဆိုသောစကားကို ဂရုပြုသူများသည် အဘယ်အရာကို တွေ့ကြုံခံစားကြရမည်နည်း။
၁၀ “ဝိညာဉ်တော်သည် အသင်းတော်တို့အား အဘယ်သို့မိန့်တော်မူသည်ကို နားရှိသောသူမည်သည်ကား ကြားပါစေ” ဟုယေရှုမိန့်တော်မူခဲ့သည်။ ယေရှုမြေကြီးပေါ်ရှိစဉ် ကိုယ်တော်သည် ဘုရားသခင့်ဝိညာဉ်တော်၏ လွှမ်းမိုးမှုကိုခံရ၍ မိန့်ကြားခဲ့သည်။ (ဟေရှာယ ၆၁:၁; လုကာ ၄:၁၆-၂၁) ထို့ကြောင့် သန့်ရှင်းသောဝိညာဉ်တော်အားဖြင့် ကိုယ်တော်မှတစ်ဆင့် ဘုရားသခင် ယခုမိန့်တော်မူသောစကားကို ကျွန်ုပ်တို့ဂရုစိုက်သင့်သည်။ ဝိညာဉ်တော်၏လမ်းညွှန်မှုအောက် ယေရှုဤသို့ကတိပြုခဲ့သည်– “အကြင်သူသည် အောင်မြင်၏၊ ထိုသူသည် ငါ၏ဘုရားသခင် ပရဒိသုဥယျာဉ်၌ရှိသော အသက်ပင်၏အသီးကိုစားစေခြင်းငှာ ငါအခွင့်ပေးမည်။” ဝိညာဉ်တော်ဆင့်ဆိုသောစကားကို ဂရုစိုက်ကြသော ဝိညာဉ်တော်ဖွားများအတွက် ထိုသို့ပြုခြင်းသည် ကောင်းကင်ဆိုင်ရာ ‘ဘုရားသခင့်ပရဒိသု၊’ သို့မဟုတ် ယေဟောဝါ၏မျက်မှောက်တော်ရှေ့ မသေနိုင်သောအဖြစ်ကို ရဖို့အကြောင်းရှိသည်။ ဝိညာဉ်တော်ဆင့်ဆိုသောစကားကို နားထောင်ကြသော “လူအုပ်ကြီး” သည် မြေကြီးပရဒိသုတွင် ပျော်မွေ့ကြပါလိမ့်မည်၊ ထိုတွင် သူတို့သည် “အသက်ရေစီးရာမြစ်” ရေကိုသောက်သုံးပြီး မြစ်တစ်ဖက်တစ်ချက်ရှိ ‘အပင်များ၏အရွက်များ’ ကိုအသုံးပြုခြင်းအားဖြင့် အနာရောဂါငြိမ်းကြလိမ့်မည်။—ဗျာ. ၇:၉; ၂၂:၁၊ ၂; လုကာ ၂၃:၄၃။
၁၁။ ယေဟောဝါအားချစ်သည့်စိတ်ကို ကျွန်ုပ်တို့ မည်သို့တိုးပွားလာစေနိုင်သနည်း။
၁၁ ဧဖက်မြို့သားများသည် သူတို့၏ကနဦးမေတ္တာ ပျောက်ဆုံးခဲ့ကြသည်၊ သို့သော် ယနေ့ အသင်းတော်တစ်ခုတွင် အလားတူအခြေအနေမျိုး ဖြစ်ပေါ်လာလျှင်ကော အသို့နည်း။ ကျွန်ုပ်တို့တစ်ဦးချင်းစီအနေနှင့် ယေဟောဝါ၏မေတ္တာပါသော လုပ်ရပ်များအကြောင်း ပြောဆိုခြင်းအားဖြင့် ကိုယ်တော်အားချစ်သည့်မေတ္တာကို တိုးပွားများပြားစေကြစို့။ သားတော်အားဖြင့် ရွေးနုတ်ဖိုးကိုစီစဉ်ပေးခြင်းဖြင့် ဘုရားသခင်ပြသခဲ့သောမေတ္တာတော်ကို ကျေးဇူးတင်ကြောင်းထုတ်ဖော်နိုင်သည်။ (ယောဟန် ၃:၁၆; ရောမ ၅:၈) သင့်လျော်သည့်အခါတိုင်း အစည်းအဝေးများတွင် ကျွန်ုပ်တို့ပါဝင်ဖြေဆိုရာ၌၊ အစီအစဉ်တွင် ပါဝင်ရာ၌ ဘုရားသခင့်မေတ္တာတော်ကို ဖော်ပြပြောဆိုနိုင်သည်။ ခရစ်ယာန်ဓမ္မအမှုတွင် ပါဝင်သည့်အခါ၌လည်း ယေဟောဝါ၏နာမတော်ကို ချီးမွမ်းခြင်းအားဖြင့် ကိုယ်တော်အား ချစ်ကြောင်းတင်ပြနိုင်သည်။ (ဆာလံ ၁၄၅:၁၀-၁၃) အသင်းတော်၏ကနဦးမေတ္တာကို ပြန်လည်ရှင်သန် ခိုင်ခံ့စေရန် ကျွန်ုပ်တို့သည် အပြောနှင့်အလုပ်အားဖြင့် များစွာပြုလုပ်နိုင်သည်။
စမုရနမြို့ရှိ တမန်ထံသို့
၁၂။ စမုရနမြို့နှင့် ယင်း၏ ဘာသာရေးထုံးတမ်းများအကြောင်း သမိုင်းက မည်သို့ဖော်ပြသနည်း။
၁၂ “အဦးဆုံးသောသူ၊ နောက်ဆုံးသောသူတည်းဟူသော အရင်သေ၍” ရှင်ပြန်ထမြောက်ခြင်းအားဖြင့် “အသက်ရှင်လျက်ရှိသောသူ” ခရစ်တော်သည် စမုရနအသင်းတော်ကို ချီးမွမ်းခဲ့သည်။ (ဗျာ. ၂:၈-၁၁ ဖတ်။) စမုရနမြို့ (ယခု တူရကီနိုင်ငံ၊ အဇ္ဇမေယာမြို့) ကို အာရှမိုင်းနားအနောက်ဘက် ကမ်းရိုးတန်းပေါ်၌ တည်ဆောက်ခဲ့ကြသည်။ ဂရိလူမျိုးတို့က ထိုမြို့ကိုတည်ခဲ့ကြသော်လည်း ဘီ.စီ.အီး. ၅၈၀ ခန့်တွင် လီဒီယာလူမျိုးတို့က ဖျက်ဆီးလိုက်သည်။ မဟာအလက်ဇန္ဒြား၏အရိုက်အရာကို ဆက်ခံသူများက နေရာသစ်တွင် စမုရနမြို့ကို ပြန်လည်တည်ဆောက်ခဲ့ကြသည်။ ၎င်းမြို့သည် ရောမခရိုင် အာရှနယ်တစ်စိတ်တစ်ပိုင်းဖြစ်လာပြီး ပြည်သူ့အဆောက်အအုံကောင်းများဖြင့် ကျော်ကြားသော ဖွံ့ဖြိုးတိုးတက်သည့် ကုန်သွယ်ရေးဗဟိုဖြစ်လာသည်။ ထိုမြို့ရှိ တိဗေရိကဲသာ၏ဗိမာန်က ဧကရာဇ်ကိုးကွယ်မှုဗဟို ဖြစ်လာစေသည်။ ဝတ်ပြုသူများသည် နံ့သာပေါင်းတစ်ဆိတ်စာကို မီးရှို့ပြီး “ကဲသာသည် သခင်အရှင်ဖြစ်တော်မူ၏” ဟုဆိုကြရသည်။ ခရစ်ယာန်များအတွက်မူကား ‘ယေရှုသည် သခင်အရှင်ဖြစ်’ သောကြောင့် ထိုသို့သူတို့ မပြုလုပ်နိုင်ကြချေ။ ထို့ကြောင့် သူတို့ဒဏ်ခတ်ခံခဲ့ရသည်။—ရောမ ၁၀:၉။
၁၃။ စမုရနမြို့ရှိ ခရစ်ယာန်များသည် ဆင်းရဲနွမ်းပါးကြသော်လည်း အဘယ်သဘောဖြင့် ကြွယ်ဝခဲ့ကြသနည်း။
၁၃ စမုရနမြို့ရှိခရစ်ယာန်များသည် ဒဏ်ပေးခံရကြသည့်အပြင် ဆင်းရဲနွမ်းပါးကြသည်၊ ဧကရာဇ်ဝတ်ပြုမှု၌ သူတို့မပါဝင်နိုင်ကြသောကြောင့် စီးပွားရေးကျပ်တည်းခဲ့ကြပေမည်။ ယေဟောဝါ၏ မျက်မှောက်ခေတ်ကျေးကျွန်များလည်း အလားတူစမ်းသပ်မှုများကို ခံနေကြရသည်။ (ဗျာ. ၁၃:၁၆၊ ၁၇) သူတို့သည် ဆင်းရဲနွမ်းပါးကြသော်လည်း စမုရနခရစ်ယာန်များနှင့်တူသူတို့သည် ဝိညာဉ်ရေးအရ ကြွယ်ဝချမ်းသာကြ၏၊ အမှန်မှာ ယင်းသည် အဓိကဖြစ်သည်!—သု. ၁၀:၂၂; ၃ ယောဟန် ၂။
၁၄၊ ၁၅။ ဝိညာဉ်တော်ဖွားများသည် ဗျာ. ၂:၁၀ မှ အဘယ်နှစ်သိမ့်မှုရယူနိုင်သနည်း။
၁၄ စမုရနမြို့ရှိ ဂျူးအများစုသည် “စာတန်၏အပေါင်းအသင်း” ဖြစ်ခဲ့ကြ၏၊ အကြောင်းမှာ သူတို့သည် ကျမ်းစာနှင့်မညီညွတ်သောထုံးတမ်းစဉ်လာများကို စွဲကိုင်ထားကြသည်၊ ဘုရားသခင့်သားတော်ကို ငြင်းပယ်ကြသည့်အပြင် သားတော်၏ဝိညာဉ်တော်ဖွားနောက်လိုက်များကို မလေးမစားပြောဆိုခဲ့ကြသည်။ (ရောမ ၂:၂၈၊ ၂၉) သို့သော် ထိုဝိညာဉ်တော်ဖွားများသည် ခရစ်တော်၏နောက်ဆက်တွဲစကားမှ နှစ်သိမ့်မှုများစွာရနိုင်ကြသည်! ကိုယ်တော်ဤသို့ဆို၏– “သင်သည် ခံရမည့်အရာတစ်စုံတစ်ခုကိုမျှ မကြောက်နှင့်။ သင်တို့သည် စုံစမ်းခြင်းကိုခံရမည်အကြောင်း၊ [စာတန်]သည် သင်တို့တွင် အချို့ကိုထောင်ထဲ၌လှောင်ထား၍၊ သင်တို့သည်ဆယ်ရက်ပတ်လုံး ဆင်းရဲ[ခြင်း]ကိုခံရကြလိမ့်မည်။ သေသည်တိုင်အောင် သစ္စာစောင့်လော့။ သို့ဖြစ်လျှင် အသက်သရဖူကိုငါပေးမည်။”—ဗျာ. ၂:၁၀။
၁၅ ယေရှုသည် ယေဟောဝါ၏ပိုင်သအုပ်စိုးမှုကို ထောက်ခံသည့်အတွက် သေဖို့မကြောက်ခဲ့ချေ။ (ဖိလိပ္ပိ ၂:၅-၈) ယခု စာတန်သည် ဝိညာဉ်တော်ဖွားအကြွင်းအကျန်ကို စစ်တိုက်နေသော်လည်း အုပ်စုတစ်စုအနေဖြင့်ခံရကြမည့် ဆင်းရဲခြင်း၊ အကျဉ်းချခြင်း သို့မဟုတ် မရှုမလှသေဆုံးခြင်းတို့ ကြုံတွေ့ရမည်ကို သူတို့မကြောက်ကြချေ။ (ဗျာ. ၁၂:၁၇) သူတို့သည် ဤလောကကိုအောင်နိုင်သူများ ဖြစ်ကြပါလိမ့်မည်။ ထို့ပြင် အယူမှားအားကစားပြိုင်ပွဲများတွင် အနိုင်ရရှိသူများ၏ ညှိုးနွမ်းတတ်သည့်ပန်းကုံးအစား ကောင်းကင်၌မသေနိုင်သောသတ္တဝါများအဖြစ် “အသက်သရဖူ” ကိုရကြမည်ဟု ရှင်ပြန်ထမြောက်ခဲ့သောဝိညာဉ်တော်ဖွားများကို ခရစ်တော်ကတိပြုသည်။ အဖိုးဖြတ်မရသော ဆုကျေးဇူးပါတကား!
၁၆။ ကျွန်ုပ်တို့သည် ရှေးခေတ်စမုရနအသင်းတော်နှင့်တူသော အသင်းတော်တစ်ခု၏အသင်းသားဖြစ်နေပါက အဘယ်ကိစ္စကို အာရုံစိုက်သင့်သနည်း။
၁၆ ကျွန်ုပ်တို့၏မျှော်လင့်ချက်သည် ကောင်းကင်တွင်ဖြစ်စေ၊ မြေကြီးပေါ်တွင်ဖြစ်စေ ကျွန်ုပ်တို့သည် ရှေးခေတ်စမုရနအသင်းတော်နှင့်တူသော အသင်းတော်တစ်ခု၏ အသင်းသားများဖြစ်နေလျှင်ကော အသို့နည်း။ ထိုသို့ဖြစ်လျှင် နှိပ်စက်ညှဉ်းပန်းမှုကို ဘုရားသခင်ခွင့်ပြုရသော အဓိကအကြောင်းရင်းဖြစ်သည့် အကြွင်းမဲ့ပိုင်သအုပ်စိုးမှု အရေးကိစ္စကို အာရုံစိုက်ကြရန် ယုံကြည်သူချင်းများကို ကူညီပေးကြစို့။ ယေဟောဝါ၏ သမာဓိစောင့်သိသောသက်သေအားလုံးသည် စာတန်ကို မုသာကောင်ဖြစ်ကြောင်း သက်သေထူပြီး နှိပ်စက်ညှဉ်းပန်းခံရသောလူသားတစ်ဦးပင်လျှင် ဘုရားသခင်၏အကြွင်းမဲ့ပိုင်သအုပ်စိုးခွင့်ကို မဆုတ်မနစ်ထောက်ခံနိုင်ကြောင်း တင်ပြကြသည်။ (သု. ၂၇:၁၁) နှိပ်စက်ညှဉ်းပန်းခြင်းကို ကြံ့ကြံ့ခံခြင်းအားဖြင့် “[ယေဟောဝါ] ရှေ့တော်၌ တစ်သက်လုံး”—ထာဝစဉ်ပင်—“သန့်ရှင်းဖြောင့်မတ်ခြင်း . . . အားဖြင့် ဘုရား[သခင်]ဝတ်ကိုရဲရင့်စွာပြုရသောအခွင့်” မပြတ်ရရှိရန် အခြားခရစ်ယာန်များကို အားပေးကြပါစို့။—လုကာ ၁:၆၈-၇၅။
ပေရဂံမြို့ရှိတမန်ထံသို့
၁၇၊ ၁၈။ ပေရဂံမြို့သည် အဘယ်ဝတ်ပြုမှု၏ဗဟိုဖြစ်ခဲ့သနည်း၊ ထိုသို့သောဝတ်ပြုမှု၌ မပါဝင်လျှင် မည်သို့ဖြစ်နိုင်သနည်း။
၁၇ ပေရဂံအသင်းတော်သည် ချီးမွမ်းမှုနှင့် ဆုံးမမှုခံခဲ့ရသည်။ (ဗျာ. ၂:၁၂-၁၇ ဖတ်။) စမုရနမြို့မြောက်ဘက် မိုင် ၅၀ ခန့်တွင်တည်ရှိသော ပေရဂံမြို့သည် အယူမှားဝတ်ပြုမှု ပြည့်နှက်ခဲ့သောမြို့ဖြစ်သည်။ ခါလဒဲပညာရှင် (ဗေဒင်ဆရာ) များသည် ဗာဗုလုန်မှ ထိုမြို့သို့ ထွက်ပြေးလာခဲ့ကြဟန်တူသည်။ ဖျားနာသူတို့သည် ပေရဂံမြို့ရှိ ဆေးကုသမှုနှင့် ဆေးပညာဆိုင်ရာ အက်စ်ကလီပီးယပ်စ်နတ်ဘုရား၏ဗိမာန်သို့ အုပ်လိုက်လာကြသည်။ ဆီဇာ ဩဂတ်စ်တပ်စ်ကိုဝတ်ပြုဖို့ ဗိမာန်ရှိသော ပေရဂံမြို့ကို “အစောပိုင်းအင်ပါယာအုပ်စိုးမှုခေတ် ဧကရာဇ်ကိုးကွယ်မှုဂိုဏ်း၏ဗဟို” ဟုခေါ်ဆိုခဲ့ကြသည်။—ဗြိတဲန်နီကာစွယ်စုံကျမ်း၊ ၁၉၅၉၊ အတွဲ ၁၇၊ စာမျက်နှာ ၅၀၇။
၁၈ ပေရဂံမြို့တွင် ဇုသနတ်ဘုရားကိုးကွယ်မှုအတွက် ယဇ်ပလ္လင်တစ်ခုရှိခဲ့သည်။ ၎င်းမြို့တွင် စာတန့်လှုံ့ဆော်မှုဖြင့် လူကိုးကွယ်မှုကိုလည်းပြုလုပ်ကြသည်။ ယင်းကြောင့် “စာတန်၏ရာဇပလ္လင်” ရှိရာအရပ်၌ ထိုအသင်းတော်တည်ရှိသည်ဟုဆိုခဲ့ခြင်းဖြစ်သည်! ယေဟောဝါ၏ပိုင်သအုပ်စိုးမှုကို ထောက်ခံသူတစ်ဦးသည် ဧကရာဇ်မင်းကိုဝတ်မပြုသည့်အတွက် အသတ်ခံရနိုင်သည်။ ဤလောကသည် ယခုလည်း စာတန့်လက်အောက်ရှိပြီး နိုင်ငံအထိမ်းအမှတ်များကို ယခုပင် ကိုးကွယ်နေကြဆဲရှိသည်။ (၁ ယောဟန် ၅:၁၉) ပထမရာစုမှ မျက်မှောက်အချိန်အထိ တည်ကြည်သောခရစ်ယာန်များစွာတို့သည် အာဇာနည်များအဖြစ် အသတ်ခံခဲ့ကြရပြီ၊ တစ်ဦးနှင့်ပတ်သက်၍ ခရစ်တော်က ‘သင်တို့ဘေးမှာ အသတ်ခံရသောသစ္စာရှိသူ ငါ့သက်သေ အန္တိပ’ ဟုခေါ်ဆိုခဲ့သည်။ ယေဟောဝါဘုရားသခင်နှင့် ယေရှုခရစ်သည် တည်ကြည်မှုရှိသော အဆိုပါကျေးကျွန်များကို မေ့မည်မဟုတ်ပါ။—၁ ယောဟန် ၅:၂၁။
၁၉။ ဗာလမ် အဘယ်အရာပြုလုပ်ခဲ့သနည်း၊ ခရစ်ယာန်အားလုံး အဘယ်အရာကို သတိထားရမည်နည်း။
၁၉ “ဗာလမ်၏အယူ” အကြောင်းကိုလည်း ခရစ်တော်မိန့်တော်မူခဲ့သည်။ ပရောဖက်အတုဗာလမ်သည် ရုပ်ပစ္စည်းတပ်မက်သောကြောင့် ဣသရေလလူမျိုးကို ကျိန်ဆဲရန်ကြိုးစားခဲ့သည်။ သူ၏ကျိန်ဆဲခြင်းကို ဘုရားသခင်က ကောင်းချီးဖြစ်စေသောအခါ ဗာလမ်သည် မောဘရှင်ဘုရင်ဗာလက်နှင့်ပူးပေါင်းပြီး ဣသရေလလူများစွာကို အရုပ်ကိုးကွယ်စေ၍ အကျင့်ယိုယွင်းစေခဲ့သည်။ ခရစ်ယာန်အကြီးအကဲများသည် ဗာလမ်၏လုပ်ဆောင်ချက်များကိုဆန့်ကျင်ခဲ့သူ ဖိနဟပ်ကဲ့သို့ ဖြောင့်မတ်ခြင်းတရားဘက် ပြတ်ပြတ်သားသားရပ်တည်ဖို့လိုသည်။ (တောလည်ရာ ၂၂:၁–၂၅:၁၅; ၂ ပေတရု ၂:၁၅၊ ၁၆; ယုဒ ၁၁) အမှန်မှာ ခရစ်ယာန်အားလုံးသည် အသင်းတော်ထဲ အရုပ်ကိုးကွယ်မှုနှင့် အကျင့်ယိုယွင်းမှုစိမ့်ဝင်မလာစေဖို့ သတိထားကြရမည်။—ယုဒ ၃၊ ၄။
၂၀။ ခရစ်ယာန်တစ်ဦးတွင် အယူဖောက်ပြန်မှုအမြင်များဝင်စပြုနေလျှင် သူအဘယ်အရာပြုလုပ်သင့်သနည်း။
၂၀ “နိကောလတပည့်တို့၏အယူကို စွဲလမ်းသောသူတို့” အား အသင်းတော်တွင်လက်ခံထားသောကြောင့် ပေရဂံအသင်းတော်တွင် ကြီးမားသောအန္တရာယ်ရှိခဲ့သည်။ ထိုအသင်းတော်ကို ခရစ်တော်ဤသို့မိန့်ဆိုခဲ့သည်– “နောင်တရလော့။ မရလျှင် သင်ရှိရာသို့ ငါသည် အလျင်အမြန်လာမည်။ ထိုသူတို့ကို ငါ့ခံတွင်း၏သန်လျက်နှင့် စစ်တိုက်မည်။” ဂိုဏ်းဂဏအစွဲကြီးသူများသည် ခရစ်ယာန်များကို ဝိညာဉ်ရေးအန္တရာယ်ကျရောက်စေလိုကြသည်၊ သင်းခွဲ၍ ဂိုဏ်းဂဏထောင်လိုသူများသည် ဘုရားသခင့်နိုင်ငံတော်ကို အမွေခံရကြမည်မဟုတ်ပါ။ (ရောမ ၁၆:၁၇၊ ၁၈; ၁ ကောရိန္သု ၁:၁၀; ဂလာတိ ၅:၁၉-၂၁) ခရစ်ယာန်တစ်ဦးသည် ဖောက်ပြန်သောအယူများကို စလက်ခံပြီး ထိုအယူများကိုဖြန့်လိုလျှင် ခရစ်တော်၏သတိပေးချက်ကို သတိပြုသင့်သည်! ထိုသူသည် ဘေးမသင့်လိုလျှင် နောင်တယူပြီး အသင်းတော်အကြီးအကဲများထံမှ ဝိညာဉ်ရေးအကူအညီ တောင်းခံသင့်သည်။ (ယာကုပ် ၅:၁၃-၁၈) ယေရှုသည် တရားစီရင်ရန် အမြန်ကြွလာတော့မည်ဖြစ်ရာ ထိုသို့အလျင်အမြန်လုပ်ဆောင်ဖို့လိုသည်။
၂၁၊ ၂၂။ “ဝှက်ထားသောမန္န” မုန့်ကို မည်သူစားသုံးသနည်း၊ ယင်းက အဘယ်အရာကိုပုံဆောင်သနည်း။
၂၁ သစ္စာစောင့်သိသောဝိညာဉ်တော်ဖွား ခရစ်ယာန်များနှင့် သူတို့၏တည်ကြည်သောအပေါင်းပါများသည် လာလတ္တံ့သောတရားစီရင်ခြင်းကို ကြောက်စရာမလိုချေ။ ဘုရားသခင့်သန့်ရှင်းသောဝိညာဉ်တော် လမ်းညွှန်မှုဖြင့်ပေးနေသော ယေရှု၏သွန်သင်ချက်ကို လိုက်နာသူအားလုံး ကောင်းချီးရစရာအကြောင်းရှိသည်။ ဥပမာ၊ ဤလောကကိုအောင်နိုင်သော ဝိညာဉ်တော်ဖွားများသည် “ဝှက်ထားသောမန္န” မုန့်အချို့ကို သုံးဆောင်ရန် ဖိတ်ကြားခံရပြီး “နာမသစ်” ရေးသားထားသော “ကျောက်ဖြူ” ကိုရရှိကြပါလိမ့်မည်။
၂၂ ဣသရေလလူမျိုးသည် တောကန္တာရတွင် အနှစ် ၄၀ လှည့်လည်ခဲ့စဉ်က ဘုရားသခင်ကျွေးသော မန္နမုန့်ဖြင့်အသက်ရှင်ခဲ့ကြသည်။ ၎င်း “မုန့်” အချို့ကို ပဋိညာဉ်သေတ္တာထဲရှိ ရွှေအိုးတစ်လုံးတွင်ထည့်ပြီး တဲတော်၏အသန့်ရှင်းဆုံးအခန်း၌ ဝှက်ထား၏၊ ထိုနေရာတွင် ယေဟောဝါရောက်ရှိနေတော်မူကြောင်း အံ့ဖွယ်အလင်းက ပုံဆောင်သည်။ (ထွက်မြောက်ရာ ၁၆:၁၄၊ ၁၅၊ ၂၃၊ ၂၆၊ ၃၃; ၂၆:၃၄; ဟေဗြဲ ၉:၃၊ ၄) ထိုဝှက်ထားသောမန္နမုန့်ကို မည်သူမျှစားခွင့်မရှိပါ။ သို့သော် ယေရှု၏ဝိညာဉ်တော်ဖွားနောက်လိုက်များသည် ရှင်ပြန်ထမြောက်လာကြသောအခါ မသေနိုင်သည့်အဖြစ်ကိုယူတင်ကြ၏၊ ၎င်းကို “ဝှက်ထားသောမန္န” မုန့်စားသုံးခြင်းက ပုံဆောင်သည်။—၁ ကောရိန္သု ၁၅:၅၃-၅၇။
၂၃။ “ကျောက်ဖြူ” နှင့် “နာမသစ်” တို့သည် အဘယ်အဓိပ္ပာယ်ရှိသနည်း။
၂၃ ရောမတရားရုံးများတွင် ကျောက်စရစ်အမည်းက ပြစ်ဒဏ်စီရင်ခြင်းကို ဖော်ပြပြီး ကျောက်စရစ်အဖြူဖြင့် တရားသေလွှတ်ခြင်းကို ဖော်ပြသည်။ ထိုကြောင့် အောင်နိုင်သောဝိညာဉ်တော်ဖွားခရစ်ယာန်များကို ယေရှု “ကျောက်ဖြူ” ပေးခြင်းက သူတို့ကို အပြစ်မဲ့သူ၊ စင်ကြယ်သန့်ရှင်းသူအဖြစ် သတ်မှတ်ကြောင်း ဖော်ပြသည်။ ရောမတို့သည် အရေးပါသောအခမ်းအနားပွဲများကို ဝင်ခွင့်ရဖို့ ကျောက်စရစ်ခဲများ အသုံးပြုလေ့ရှိခဲ့ရာ “ကျောက်ဖြူ” သည် ကောင်းကင်၌ သိုးသငယ်၏မင်္ဂလာပွဲကို ဝိညာဉ်တော်ဖွားများ တက်ခွင့်ရကြောင်း ဆိုလိုခြင်းဖြစ်မည်။ (ဗျာ. ၁၉:၇-၉) “နာမသစ်” သည် ကောင်းကင်နိုင်ငံတော်တွင် ယေရှု၏တွဲဖက်အမွေခံများအဖြစ် ကိုယ်တော်နှင့်ပေါင်းစည်းခွင့်ရခြင်းကို ဆိုလိုကြောင်းထင်ရှားသည်။ ယင်းတို့အားလုံးသည် ဝိညာဉ်တော်ဖွားများရော ယေဟောဝါ၏လုပ်ငန်းတော်၌ သူတို့နှင့်ပူးပေါင်းလုပ်ဆောင်နေကြသူ မြေကြီးပရဒိသုပေါ်နေထိုင်ရန် မျှော်လင့်သူတို့အတွက်ပါ တကယ့်အားပေးမှုဖြစ်သည်တကား!
၂၄။ ကျွန်ုပ်တို့သည် အယူဖောက်ပြန်ခြင်းနှင့်ပတ်သက်၍ အဘယ်အနေအထားမျိုးယူသင့်သနည်း။
၂၄ ပေရဂံအသင်းတော်သည် အယူဖောက်ပြန်သူများကြောင့် အန္တရာယ်ကြုံခဲ့ကြောင်း သတိရခြင်းသည် ပညာရှိရာရောက်၏။ ကျွန်ုပ်တို့ပူးပေါင်းနေသောအသင်းတော်၏ ဝိညာဉ်ရေးအခြေအနေသည် အလားတူ အန္တရာယ်ရှိနေလျှင် အယူဖောက်ပြန်ခြင်းကို လုံးဝငြင်းပယ်ပြီး အမှန်တရား၌ ဆက်လျှောက်လှမ်းနေကြပါစို့။ (ယောဟန် ၈:၃၂၊ ၄၄; ၃ ယောဟန် ၄) အယူဖောက်ပြန်လိုသော ဆရာအတုအယောင်များနှင့် အခြားသူတို့သည် အသင်းတော်တစ်ခုလုံးကို ဖောက်ပြန်ပျက်စီးသွားစေနိုင်သောကြောင့် အမှန်တရားကို နားမထောင်စေခြင်းငှာ တားဆီးသော ဆိုးညစ်သည့်သွေးဆောင်မှုများကို ဘယ်သောအခါမျှခွင့်မပြုဘဲ အယူဖောက်ပြန်ခြင်းကို ဆက်၍ ပြတ်ပြတ်သားသားဆန့်ကျင်နေရမည်ဖြစ်သည်။—ဂလာတိ ၅:၇-၁၂; ၂ ယောဟန် ၈-၁၁။
၂၅။ နောက်ဆောင်းပါးတွင် အဘယ်အသင်းတော်များအား ခရစ်တော်မိန့်ကြားခဲ့သော သတင်းစကားများကို သုံးသပ်ကြမည်နည်း။
၂၅ ကျွန်ုပ်တို့သုံးသပ်ခဲ့သော၊ အာရှမိုင်းနားရှိ အသင်းတော်ခုနစ်ခုအနက် သုံးခုကို ဘုန်းပွင့်သောယေရှုခရစ်မိန့်တော်မူခဲ့သည့် ချီးမွမ်းစကားနှင့် ဆုံးမစကားများသည် စဉ်းစားစရာကောင်းလိုက်လေခြင်း! သို့သော် သန့်ရှင်းသောဝိညာဉ်တော်ညွှန်ကြားသည့်အတိုင်း အခြားအသင်းတော်လေးခုကိုလည်း ကိုယ်တော်မိန့်ဆိုစရာများရှိပါသည်။ သွာတိရမြို့၊ သာဒိမြို့၊ ဖိလဒေလဖိမြို့နှင့် လောဒိကိမြို့တို့ကို မိန့်ကြားခဲ့သောသတင်းစကားများအကြောင်း နောက်ဆောင်းပါးတွင် သုံးသပ်ပါမည်။
သင်မည်သို့ဖြေဆိုမည်နည်း
• အသင်းတော်များအား ခရစ်တော်မိန့်ဆိုခဲ့သည့်စကားကို ကျွန်ုပ်တို့ အဘယ်ကြောင့်ဂရုစိုက်သင့်သနည်း။
• အသင်းတော်တစ်ခု၏ကနဦးမေတ္တာကို ကျွန်ုပ်တို့ မည်သို့ ပြန်ရှင်သန်လာစေနိုင်သနည်း။
• ရှေးခေတ်စမုရနမြို့ရှိ နွမ်းပါးသောခရစ်ယာန်များသည် အမှန်ပင်ကြွယ်ဝခဲ့သည်ဟု အဘယ်ကြောင့်ဆိုနိုင်သနည်း။
• ပေရဂံအသင်းတော်၏အခြေအနေကို ပြန်ပြောင်းသုံးသပ်ရာတွင် အယူဖောက်ပြန်သည့်အတွေးအခေါ်ကို ကျွန်ုပ်တို့မည်သို့ ရှုမြင်သင့်သနည်း။
[လေ့လာရန်မေးခွန်းများ]
[စာမျက်နှာ ၁၀ ပါ မြေပုံ]
(ကားချအပြည့်အစုံကို စာစောင်တွင်ကြည့်ပါ)
ဂရိ
အာရှမိုင်းနား
ဧဖက်
စမုရန
ပေရဂံ
သွာတိရ
သာဒိ
ဖိလဒေလဖိ
လောဒိကိ
[စာမျက်နှာ ၁၂ ပါ ရုပ်ပုံ]
“လူအုပ်ကြီး” သည် မြေကြီးပရဒိသုတွင် ပျော်မွေ့ကြမည်
[စာမျက်နှာ ၁၃ ပါ ရုပ်ပုံ]
နှိပ်စက်ညှဉ်းဆဲခံခဲ့ရသော ခရစ်ယာန်များသည် လောကကိုအောင်နိုင်သူများဖြစ်ကြ