ဘုရားသခင်နှစ်သက်သော ပေးကမ်းမှု
ဘုရားသခင်နှစ်သက်သော ပေးကမ်းမှု
ယေရှုနှင့် ကိုယ်တော့်တပည့်များသည် မာရိ၊ မာသနှင့် မကြာသေးမီက ရှင်ပြန်ထမြောက်ခဲ့သော လာဇရုအပါအဝင် ရင်းနှီးသောမိတ်ဆွေအချို့နှင့် ဗေသနိရွာတွင် စားကောင်းသောက်ဖွယ်များ စားသုံးနေခဲ့ကြ၏။ ထိုစဉ်အခါ မာရိသည် ဈေးကြီးသောဆီမွှေး တစ်ပေါင်ကိုယူ၍ ယေရှု၏ခြေထောက်ကို သုတ်လိမ်းသည်နှင့် ယုဒရှကာရုတ်သည် ဒေါသထွက်၍ ဤသို့ကန့်ကွက်ပြောဆိုခဲ့သည်– “ထိုဆီမွှေးကို ဒေနာရိအပြားသုံးရာ [တစ်နှစ်စာလုပ်ခနှင့်ညီမျှသည့်] အဖိုးနှင့်ရောင်း၍ ဆင်းရဲသောသူတို့အား အဘယ်ကြောင့် မပေးသနည်း။” အခြားသူတို့ကလည်း ချက်ချင်းပင် အလားတူ မကျေမနပ်စကားများပြောဆိုခဲ့ကြ၏။—ယောဟန် ၁၂:၁-၆; မာကု ၁၄:၃-၅။
သို့သော် ယေရှုက ဤသို့ဖြေကြားခဲ့သည်– “ထိုမိန်းမကိုရှိစေတော့ . . . ဆင်းရဲသောသူတို့သည် သင်တို့၌အစဉ်ရှိကြ၏။ သင်တို့အလိုရှိသည်အတိုင်း သူတို့အားကျေးဇူးပြုနိုင်၏။ ငါမူကား သင်တို့၌အစဉ်ရှိသည်မဟုတ်။” (မာကု ၁၄:၆-၉) ချို့ငဲ့သူတို့ကို ပေးကမ်းစွန့်ကြဲခြင်းသည် ဂုဏ်အသရေရှိရုံမက အပြစ်ပင်ဖြေနိုင်သည်ဟု ဂျူးဘာသာရေးခေါင်းဆောင်တို့က သွန်သင်ခဲ့ကြသည်။ ယေရှုကမူ ဘုရားသခင်နှစ်သက်သောပေးကမ်းခြင်းသည် ဆင်းရဲသားများကို လှူဒါန်းစွန့်ကြဲခြင်း၌သာကန့်သတ်မထားဟု ရှင်းလင်းပြတ်သားစွာဖော်ပြခဲ့သည်။
အစောပိုင်းခရစ်ယာန်အသင်းတော်တွင် မည်သို့ပေးကမ်းခဲ့ကြောင်း အကျဉ်းချုပ်သုံးသပ်ကြည့်ခြင်းအားဖြင့် ကျွန်ုပ်တို့သည် စိုးရိမ်မကင်းဖြစ်နေကြောင်း လက်တွေ့ဖော်ပြနိုင်သည့်နည်းများကို သိမည်ဖြစ်ပြီး ပေးကမ်းခြင်းဖြင့် ဘုရားသခင့်စိတ်သဘောတော်နှင့် တွေ့နိုင်မည်။ ထို့ပြင် အကောင်းတကာ့အကောင်းဆုံးဖြစ်၍ ထူးခြားသောပေးကမ်းခြင်းတစ်မျိုးကိုလည်း သိရှိလာပေလိမ့်မည်။
“စွန့်ကြဲပေးကမ်းခြင်း”
ယေရှုသည် အကြိမ်ကြိမ်ပင် တပည့်များကို “စွန့်ကြဲကြ” ရန်အားပေးတိုက်တွန်းခဲ့၏။ (လုကာ ၁၂:၃၃; သမ္မာကျမ်းစာတော်) သို့သော် ယေရှုက ဘုရားသခင်ထက် ပေးကမ်းသူကိုဂုဏ်တင်ရန် ရည်ရွယ်သည့် ဟိတ်ဟန်ပြသမှုကိုရှောင်ဖို့ သတိပေးခဲ့သည်။ ကိုယ်တော်က “သင်သည် အလှူဒါနကိုပေးသောအခါ လျှို့ဝှက်သောသူတို့သည် လူများအချီးအမွမ်းကိုခံလို၍ ပွဲသဘင်လမ်းခရီး၌ မိမိတို့ရှေ့မှာ တံပိုးခရာမှုတ်စေသည်နည်းတူ မပြုနှင့်။” (မဿဲ ၆:၁-၄) ဤဆုံးမစကားကို လိုက်နာပြီး အစောပိုင်းခရစ်ယာန်များသည် မိမိတို့အချိန်က ဘုရားသခင်အားကြည်ညိုဟန်ပြတတ်ကြသည့် ဘာသာရေးခေါင်းဆောင်များ၏အကျင့်ကိုရှောင်ကာ ဆင်းရဲသားတို့ကို ကိုယ်တိုင်ကိုယ်ကျကူညီခြင်း၊ လက်ဆောင်များပေးခြင်းကို ပြုလိုခဲ့ကြသည်။
ဥပမာ၊ လုကာ ၈:၁-၃ အရ မာဂဒလမာရိ၊ ယောဟန္န၊ ရှုရှန္နမှစ၍ အခြားသူတို့သည် ယေရှုနှင့် ကိုယ်တော့်တမန်တော်များအား အလုပ်အကျွေးပြုခြင်းငှာ လူမသိစေဘဲ “မိမိဥစ္စာကို” အသုံးပြုခဲ့ကြသည်။ ဤအမျိုးသားတို့သည် ဆင်းရဲနွမ်းပါးသူများမဟုတ်ကြသော်လည်း ခရစ်ယာန်ဓမ္မအမှုကို သူတို့အာရုံစိုက်ပြုလုပ်ကြဖို့ သူတို့၏အသက်မွေးဝမ်းကြောင်းလုပ်ငန်းများကို စွန့်လွှတ်ခဲ့ကြသည်။ (မဿဲ ၄:၁၈-၂၂; လုကာ ၅:၂၇၊ ၂၈) ဘုရားသခင်ပေးတာဝန်ကို သူတို့အပြည့်အဝဆောင်ရွက်နိုင်စေရန် ကူညီပေးခြင်းအားဖြင့် ဤအမျိုးသမီးများသည် ဘုရားသခင်ကို တစ်နည်းအားဖြင့် ဂုဏ်တင်နေကြ၏။ ထို့အပြင် ဘုရားသခင်သည် သူတို့၏ကရုဏာသက်သော ရက်ရောစွာပေးကမ်းခြင်းကို နှစ်သက်တော်မူသည့်အနေနှင့် နောင်လာနောက်သားအားလုံး ဖတ်ရှုနိုင်ရန် သမ္မာကျမ်းစာတွင် မှတ်တမ်းတင်စေခဲ့၏။—သု. ၁၉:၁၇; ဟေဗြဲ ၆:၁၀။
ဒေါ်ကာသည် “ကောင်းသောအကျင့်၊ စွန့်ကြဲခြင်းအကျင့်နှင့်ပြည့်စုံ” သော အခြားအမျိုးသမီးတစ်ဦးဖြစ်သည်။ သူနေထိုင်ရာ ပင်လယ်ကမ်းခြေအနီးရှိ ယုပ္ပေမြို့မှ ဆင်းရဲသည့်မုဆိုးမများအတွက် အင်္ကျီများ ချုပ်ပေးခဲ့၏။ သူ့အနေနှင့် ပိတ်စအားလုံးကို စိုက်ဝယ်ပေးသည်၊ သို့မဟုတ် အခမဲ့ချုပ်ပေးရုံမျှပြုသည်ကိုမူ ကျွန်ုပ်တို့မသိကြရချေ။ မည်သို့ပင်ဖြစ်စေ သူ၏ကောင်းမှုက သူ၏စေတနာကို ကရုဏာရှိရှိအကျိုးပေးတော်မူသည့် ဘုရားသခင်အပါအဝင် သူအကူအညီပေးနိုင်ခဲ့သူတို့၏ ချစ်မြတ်နိုးမှုကို ခံရစေခဲ့သည်။—တမန်တော် ၉:၃၆-၄၁။
တော်မှန်သောသဘောထားအရေးကြီး
ထိုသို့ပေးကမ်းစွန့်ကြဲရန် သူတို့ကို အဘယ်အရာက လှုံ့ဆော်ပေးခဲ့သနည်း။ အကူအညီလိုသူတို့၏ သနားစဖွယ်အသနားခံခြင်းကြောင့် ဖြစ်ပေါ်လာသည့် ထောက်ထားစာနာစိတ်၏ လှုံ့ဆော်မှုမျှမကဖြစ်သည်။ ဆင်းရဲနွမ်းပါးမှု၊ ဘေးသင့်မှု၊ ဖျားနာမှုနှင့် အခြားအခက်အခဲများကို ကြုံတွေ့နေရသူတို့အား နေ့စဉ်နေ့တိုင်း အတတ်နိုင်ဆုံးကူညီပေးရန် မိမိ၌တာဝန်ရှိသည်ဟု သူတို့ခံစားကြရသောကြောင့်ဖြစ်သည်။ (သု. ၃:၂၇၊ ၂၈; ယာကုပ် ၂:၁၅၊ ၁၆) ဤကဲ့သို့သောပေးကမ်းမှုမျိုးက ဘုရားသခင်အား နှစ်သက်စေသည်။ ယင်းသည် အဓိကအားဖြင့် ဘုရားသခင်အား အလွန်ချစ်သောမေတ္တာနှင့် ကိုယ်တော်၏ကရုဏာသက်၍ ရက်ရောသောဂုဏ်ရည်တော်ကို အတုယူလိုသည့် စိတ်ဆန္ဒက သူတို့ကို အဓိကလှုံ့ဆော်ပေးသည်။—မဿဲ ၅:၄၄၊ ၄၅; ယာကုပ် ၁:၁။
တမန်တော်ယောဟန်က “အကြင်သူသည် လော[က]စည်းစိမ်ဥစ္စာရှိလျက်ပင်၊ မိမိညီအစ်ကိုဆင်းရဲခြင်းကိုမြင်၍၊ သနားခြင်းကရုဏာစိတ်ကိုချုပ်တည်း၏၊ ထိုသူ၌ ဘုရားသခင်၏မေတ္တာတော်သည် အဘယ်သို့တည်မည်နည်း” ဟုမေးမြန်းသောအခါ ပေးကမ်းခြင်း၏ ဤအရေးပါသောရှုထောင့်ကို အလေးပေးဖော်ပြခဲ့သည်။ (၁ ယောဟန် ၃:၁၇) အဖြေကား ရှင်းနေပါသည်။ ဘုရားသခင်အားချစ်သောမေတ္တာက ပေးကမ်းစွန့်ကြဲစေသည်။ ဘုရားသခင်သည် မိမိကဲ့သို့ပင် ရက်ရောသောစိတ်သဘော တင်ပြသူတို့ကို လေးမြတ်တန်ဖိုးထား၍ ဆုပေးတော်မူ၏။ (သု. ၂၂:၉; ၂ ကောရိန္သု ၉:၆-၁၁) ယနေ့ ဤသို့သောရက်ရောမှုမျိုးကို ကျွန်ုပ်တို့တွေ့မြင်ကြရပါသလော။ များမကြာမီက ယေဟောဝါသက်သေတို့၏အသင်းတော်တစ်ခုတွင် အဘယ်အရာဖြစ်ပျက်ခဲ့ကြောင်း သုံးသပ်ကြည့်ပါ။
အိုမင်းမစွမ်းဖြစ်နေသော ခရစ်ယာန်အမျိုးသမီးတစ်ဦး၏နေအိမ်သည် ပြုပြင်မွမ်းမံပေးရန် အလွန်လိုအပ်နေ၏။ သူသည် တစ်ဦးတည်းနေထိုင်ပြီး အကူအညီပေးရန် မိသားစုလည်း မရှိချေ။ သူ၏အိမ်တွင် နှစ်များတစ်လျှောက် ခရစ်ယာန်အစည်းအဝေးများ ကျင်းပခဲ့၏၊ ထို့ပြင် မကြာခဏပင် သူနှင့်အတူ အစာစားရန် အခြားသူများကိုဖိတ်ခေါ်ခဲ့ဖူးသည်။ (တမန်တော် ၁၆:၁၄၊ ၁၅၊ ၄၀) သူ၏အခြေအနေကို တွေ့မြင်ကြသော ခရစ်ယာန်အသင်းသားများသည် သူ့အားအကူအညီပေးရန် စီစဉ်ကြလေ၏။ အချို့က ငွေထည့်ဝင်၍ အခြားသူတို့မှာမူ လုပ်အားစိုက်ကြသည်။ ရက်သတ္တပတ်အနည်းငယ်အတွင်း စေတနာ့ဝန်ထမ်းများသည် သူ့အိမ်တွင် ခေါင်မိုးအသစ်တပ်ဆင်ပေး၏၊ အိမ်သာနှင့်ရေချိုးခန်းအသစ် ဆောက်ပေးပြီး ပထမအထပ်တစ်ထပ်လုံးကို အင်္ဂတေကိုင်၍ ဆေးသုတ်ပေး၏၊ မီးဖိုချောင်ထဲတွင်လည်း နံရံကပ်ဗီရိုအသစ်များ တပ်ဆင်ပေးခဲ့ကြသည်။ သူတို့၏ပေးကမ်းမှုကား ထိုအမျိုးသမီးလိုအပ်ရာကို ဖြည့်ဆည်းပေးရုံမက အသင်းတော်သည် သာ၍ရင်းနှီးလာသည့်အပြင် စစ်မှန်သောခရစ်ယာန်ပေးကမ်းခြင်း၏ ပုံနမူနာကို အိမ်နီးချင်းတို့အား တွေ့မြင်စေခဲ့သည်။
အခြားသူတို့ကို ကျွန်ုပ်တို့ကိုယ်တိုင်ကူညီပေးနိုင်သည့် နည်းလမ်းများစွာရှိပါသည်။ ဖတဆိုးကလေးတစ်ဦးကို ကျွန်ုပ်တို့အချိန်ပေးနိုင်ပါသလော။ ကျွန်ုပ်တို့သိကျွမ်းသည့် အိုမင်းမစွမ်းမုဆိုးမတစ်ဦးအတွက် ဈေးဝယ်ခြမ်းပေးခြင်း၊ ချုပ်စရာရှိရာများ ချုပ်ပေးခြင်းတို့ကို ပြုလုပ်ပေးနိုင်မည်လော။ ချက်ပြုတ်ပေးနိုင်မည်လော၊ သို့မဟုတ် ဝင်ငွေနည်းသူတစ်ဦးအတွက် အကုန်အကျအချို့ခံပေးနိုင်မည်လော။ ထိုသို့အကူအညီပေးဖို့ ကျွန်ုပ်တို့ ချမ်းသာကြွယ်ဝစရာမလိုပါ။ တမန်တော်ပေါလု ဤသို့ရေးသားခဲ့သည်– “စေတနာစိတ်သည် အသင့်ရှိလျှင်၊ မတတ်နိုင်သောအမှုကိုမထောက်ဘဲ၊ တတ်နိုင်သောအမှုကိုထောက်၍ နှစ်သက်တော်မူဖွယ်ဖြစ်၏။” (၂ ကောရိန္သု ၈:၁၂) သို့သော် ဤသို့ ကိုယ်တိုင်ကိုယ်ကျပေးကမ်းခြင်းတစ်မျိုးတည်းကိုသာ ဘုရားသခင်ကောင်းချီးပေးတော်မူမည်လော။ လုံးဝမဟုတ်ပါ။
အဖွဲ့အလိုက် ထောက်ပံ့ပေးခြင်းကော အသို့နည်း
တစ်ခါတစ်ရံ တစ်ဦးချင်း ကြိုးပမ်းအားထုတ်မှုများဖြင့် မလုံလောက်ချေ။ အမှန်သော် ယေရှုနှင့် ကိုယ်တော်၏တမန်တော်များသည် ဆင်းရဲသားများအတွက် ရန်ပုံငွေစုပေးခဲ့ကြပြီး သူတို့၏လုပ်ငန်းတွင် တွေ့ဆုံကြသော ပေးကမ်းလိုသူတို့ထံမှ အလှူငွေလက်ခံခဲ့ကြ၏။ (ယောဟန် ၁၂:၆; ၁၃:၂၉) အလားတူ ပထမရာစုရှိ အသင်းတော်များသည် အရေးပေါ်သည့်အခါ အလှူငွေများကောက်ခံ၍ ကယ်ဆယ်ရေးလုပ်ငန်းကို ကျယ်ကျယ်ပြန့်ပြန့် စီစဉ်ပြုလုပ်ခဲ့ကြသည်။—တမန်တော် ၂:၄၄၊ ၄၅; ၆:၁-၃; ၁ တိမောသေ ၅:၉၊ ၁၀။
စီ.အီး. ၅၅ ခုနှစ်တွင် ထိုသို့သောအခြေအနေမျိုး ပေါ်ပေါက်ခဲ့သည်။ ယုဒနယ်တွင်ရှိ အသင်းတော်များသည် ဆင်းရဲခဲ့ကြသည်၊ ဖြစ်နိုင်ဖွယ်ရှိသည်မှာ မကြာသေးမီကဖြစ်ခဲ့သော အငတ်ဘေးကြီးကြောင့်ဖြစ်မည်။ (တမန်တော် ၁၁:၂၇-၃၀) ဆင်းရဲသားများအတွက် အမြဲပင်စိုးရိမ်ပူပန်ပေးသော တမန်တော်ပေါလုသည် အလှမ်းကွာဝေးသည့် မာကေဒေါနိအရပ်ရှိ အသင်းတော်များအထိ အကူအညီတောင်းခံခဲ့သည်။ သူကိုယ်တိုင် အလှူငွေကောက်ခံခဲ့၍ ၎င်းကိုပေးပို့ရန် အရည်အချင်းရှိအမျိုးသားများကို အသုံးပြုခဲ့၏။ (၁ ကောရိန္သု ၁၆:၁-၄; ဂလာတိ ၂:၁၀) ပေါလုသော်လည်းကောင်း၊ အခြားပါဝင်သူတို့သော်လည်းကောင်း သူတို့ထမ်းဆောင်ခဲ့ကြသည့်အမှုအတွက် အခကြေးငွေမယူခဲ့ချေ။—၂ ကောရိန္သု ၈:၂၀၊ ၂၁။
ဘေးဒဏ်များကျရောက်သောအခါ ယေဟောဝါသက်သေများသည် ယနေ့လည်း အကူအညီပေးရန် အသင့်ရှိကြ၏။ ဥပမာ၊ ၂၀၀၁ ခုနှစ် နွေဦးကာလအတွင်း အမေရိကန်ပြည်ထောင်စု၊ တက္ကဆပ်ပြည်နယ်၊ ဟူးစတန်မြို့တွင် မုန်တိုင်းပြင်းထန်ခဲ့သောကြောင့် အကြီးအကျယ် ရေလွှမ်းမိုးခဲ့သည်။ စုစုပေါင်း သက်သေခံများ၏အိမ်ခြေ ၇၂၃ လုံးသည် အတော်အတန်ပျက်စီးသွားခဲ့သည်။ တစ်ဦးစီလိုအပ်သည့်အကူအညီကို အကဲဖြတ်ပြီး ထိုအခြေအနေတွင် အဆင်ပြေဖို့အပြင် ဒေသခံသက်သေခံများ၏အိမ်ကို ပြန်လည်ပြုပြင်ဆောက်လုပ်ပေးရန် ကယ်ဆယ်ရေးရန်ပုံငွေများကို စီမံခန့်ခွဲပေးဖို့ အရည်အချင်းပြည့်မီသော ခရစ်ယာန်အကြီးအကဲများ ဘေးဒဏ်ကယ်ဆယ်ရေးကော်မတီကို ချက်ချင်းဖွဲ့စည်းခဲ့ကြသည်။ အနီးအနားရှိအသင်းတော်များမှ တလိုတလားရှိကြသော စေတနာ့ဝန်ထမ်းများသည် လိုအပ်ရာအားလုံးကို လုပ်ဆောင်ပေးခဲ့ကြသည်။ သက်သေခံညီအစ်မတစ်ဦးသည် သူရရှိသောအကူအညီကို အလွန်ကျေးဇူးတင်စွာဖြင့် သူ၏အာမခံကုမ္ပဏီမှ အိမ်ပြင်ခ လျော်ကြေးငွေရရှိသောအခါ ချက်ချင်းပင် အဆိုပါငွေကြေးကို ကယ်ဆယ်ရေးရန်ပုံငွေတွင် လှူဒါန်းလိုက်၏၊ သို့နှင့် အကူအညီလိုနေသောအခြားသူတို့ကိုလည်း အကူအညီရရှိစေနိုင်ခဲ့သည်။
သို့သော် အလှူခံအဖွဲ့များနှင့်ပတ်သက်လာလျှင် ကျွန်ုပ်တို့ထံရောက်လာသည့် တောင်းခံချက်တို့အတွက် ကျွန်ုပ်တို့ ပညာသတိရှိဖို့လိုသည်။ အလှူခံအဖွဲ့အချို့သည် စီမံအုပ်ချုပ်မှုပိုင်းအတွက် သို့မဟုတ် ရန်ပုံငွေတိုးရရေးအတွက် ကြော်ငြာခငွေများစွာ ကုန်ကျကြသည်ဖြစ်၍ ကောက်ခံထားသောငွေအနည်းငယ်သာ ရည်စူးထားသည့် ရည်ရွယ်ချက်အတွက် အသုံးပြုရန်ကျန်တော့သည်။ နယပုံပြင်ကျမ်း ၁၄:၁၅ ကဤသို့ဆိုသည်– “ဉာဏ်တိမ်သောသူသည် သူတစ်ပါးပြောသမျှကိုယုံတတ်၏။ ပညာသတိရှိသောသူမူကား မိမိသွားရာလမ်းကို စေ့စေ့ကြည့်ရှုတတ်၏။” သို့နှင့် အချက်အလက်များကို အသေအချာဆန်းစစ်ခြင်းက ပညာရှိလမ်းစဉ်ဖြစ်သည်။
အကျိုးအများဆုံးပြုသော ပေးကမ်းခြင်း
ပေးကမ်းလှူဒါန်းခြင်းထက် သာ၍အရေးပါသော ပေးကမ်းခြင်းတစ်မျိုး ရှိသေးသည်။ ကြွယ်ဝချမ်းသာသော လူငယ်အရာရှိတစ်ဦးက ထာဝရအသက်ရဖို့ မိမိအဘယ်အရာပြုလုပ်ရမည်နည်းဟု မေးမြန်းသောအခါ ယေရှုက ယင်းကိုရည်စောင်၍ သူ့ကို ဤသို့မိန့်ဆိုသည်– “သွားလော့။ ကိုယ်ဥစ္စာများကို ဆင်းရဲသောသူတို့အားပေးလော့။ ထိုသို့ပြုလျှင် ကောင်းကင်ဘုံ၌ဘဏ္ဍာကိုရလိမ့်မည်။ သို့ပြီးမှ ငါ့နောက်သို့လိုက်လော့။” (မဿဲ ၁၉:၁၆-၂၂) ယေရှုက ‘ဆင်းရဲသောသူတို့အား ပေးကြလျှင် သင်သည် အသက်ကိုရလိမ့်မည်’ ဟူ၍သာမဆိုကြောင်း သတိပြုပါ။ ယင်းအစား ကိုယ်တော်က ဆက်၍ “ငါ့နောက်သို့လိုက်လော့” ဟုမိန့်တော်မူ၏။ တစ်နည်းဆိုရသော် ပေးကမ်းစွန့်ကြဲခြင်းသည် ချီးမွမ်းဖွယ်ကောင်းပြီး အကျိုးဖြစ်ထွန်းသည်မှန်သော်လည်း ခရစ်ယာန်တပည့်ဖြစ်ခြင်းတွင် ထိုထက်မကအကျုံးဝင်သည်။
ယေရှု အဓိကအာရုံစိုက်ခဲ့ရာသည် အခြားသူတို့၏ဝိညာဉ်ရေးကို ကူညီပေးခြင်းဖြစ်သည်။ ကိုယ်တော်မသေမီ အချိန်တိုလေးတွင် ပိလတ်မင်းအား ဤသို့မိန့်တော်မူခဲ့သည်– “[အမှန်] တရားဘက်၌သက်သေခံခြင်းငှာ ငါသည်မွေးဖွားခြင်းကိုခံ၍ ဤလောကသို့ကြွလာပြီ။” (ယောဟန် ၁၈:၃၇) ဆင်းရဲသားများကို ကူညီပေးခြင်း၊ ဖျားနာသူတို့ကို ကုသပေးခြင်းနှင့် ဆာငတ်သူတို့ကို ကျွေးမွေးခြင်းတို့ကို ယေရှုဦးဆောင်ဦးရွက်ပြုခဲ့သော်လည်း ကိုယ်တော်သည် မိမိ၏တပည့်များကို ဟောပြောရန် အဓိကအားဖြင့် လေ့ကျင့်ပေးခဲ့သည်။ (မဿဲ ၁၀:၇၊ ၈) အမှန်သော် သူတို့ကို ကိုယ်တော်နောက်ဆုံးညွှန်ကြားသည့်စကားတွင် ဤပညတ်ပါရှိသည်– “သင်တို့သွား၍ လူမျိုးတကာတို့ကိုငါ့တပည့်ဖြစ်စေ . . . ကြလော့။”—မဿဲ ၂၈:၁၉၊ ၂၀။
မှန်ပါသည်၊ ဟောပြောခြင်းက ကမ္ဘာ့ပြဿနာအရပ်ရပ်ကို ဖြေရှင်းပေးလိမ့်မည်တော့မဟုတ်ပါ။ သို့တိုင် ဘုရားသခင့်နိုင်ငံတော်သတင်းကောင်းကို လူမျိုးအပေါင်းအား ဟောပြောခြင်းက ဘုရားသခင်ကိုဂုဏ်တင်ရာရောက်သည်၊ အကြောင်းမှာ ဟောပြောခြင်းသည် ဘုရားသခင့်အလိုတော်ကို ပြီးမြောက်အောင်မြင်စေ၍ အဆိုပါမြင့်မြတ်သောသတင်းတရားကို လက်ခံသူတို့အတွက် ထာဝရအကျိုးကျေးဇူးများ ခံစားစေသောကြောင့်ဖြစ်သည်။ (ယောဟန် ၁၇:၃; ၁ တိမောသေ ၂:၃၊ ၄) နောက်နောင် ယေဟောဝါသက်သေများ ရောက်လာသောအခါ သူတို့ကို နားထောင်ကြည့်ပါ။ သူတို့သည် ဝိညာဉ်ရေးလက်ဆောင်မွန်ကို သယ်ဆောင်လာကြသည်။ ထို့အပြင် ဤသို့ပြုခြင်းသည် သင့်အတွက် သူတို့ပေးနိုင်သမျှတွင် အကောင်းဆုံးအရာဖြစ်ကြောင်း သူတို့ သိထားကြသည်။
[စာမျက်နှာ ၆ ပါ ရုပ်ပုံ]
ကျွန်ုပ်တို့ ဂရုစိုက်ကြကြောင်းဖော်ပြရန် နည်းလမ်းများစွာရှိ
[စာမျက်နှာ ၇ ပါ ရုပ်ပုံ]
သူတစ်ပါးအား သတင်းကောင်းဟောပြောခြင်းကို ဘုရားသခင်နှစ်သက်တော်မူ၍ ထာဝရအကျိုးကျေးဇူးများရရှိစေရန် လမ်းဖွင့်ပေး