‘မကြောက်​ကြ​နှင့်၊ စိတ်မပျက်​ကြ​နှင့်’

“မကြောက်​ကြ​နှင့်။ စိတ်မပျက်​ကြ​နှင့်။ . . . ထာဝရ​ဘုရား​သည် သင်တို့​နှင့်အတူ​ရှိ​တော်​မူ​လိမ့်​မည်။”—၂ ရာဇဝင်ချုပ် ၂၀:၁၇။

၁။ အကြမ်းဖက်မှု​သည် လူ​တို့ကို မည်သို့​ခံစား​စေ​သနည်း၊ သူတို့​ကြောက်ရွံ့​စ​ရာ​အကြောင်း အဘယ်ကြောင့်​ရှိ​သနည်း။

အကြမ်းဖက်မှု! ထိုစကား​ကို ကြား​ရုံ​ဖြင့် စိတ်ထဲ​အလိုလို​ကြောက်​လာပြီး မ​လုံမ​ခြုံ​ဖြစ်၍ အားငယ်​သွား​စေ​သည်။ ယင်းက ကြောက်ရွံ့​တုန်လှုပ်၊ ဝမ်းနည်းပြီး ဒေါသ​ထွက်​စေ​၏။ ၎င်း​ပြင် ထိုစကား​လုံး​သည် လူအားလုံး နှစ်ချီ၍ ကြုံကြိုက်​လာ​မည့်​ဘေး​ကို ဖော်ပြ​သည်​ဟု များစွာ​တို့​က​စိုးရိမ်​ကြ​၏။ နိုင်ငံ​အချို့​သည် ဆယ်စုနှစ်ချီ အကြမ်းဖက်မှု​၏​ပုံစံ​အမျိုးမျိုးကို တိုက်ခိုက်​နှိမ်နင်း​ခဲ့​သော်လည်း အောင်မြင်မှု​အနည်း​အကျဉ်း​သာ​ရခြင်း​ကြောင့် ထိုသို့​စိုးရိမ်မကင်း​ဖြစ်လာ​လေ​သည်။

၂။ အကြမ်းဖက်မှု​ပြဿနာ​ကို ယေဟောဝါသက်သေ​များ မည်သို့​တုံ့ပြန်​ကြ​သနည်း၊ အဘယ်​မေးခွန်းများ ပေါ်ပေါက်​စေ​သနည်း။

^၂ မည်သို့​ပင်​ဆို​စေ မျှော်လင့်​စ​ရာ​အကြောင်း အမှန်​ရှိသည်။ နိုင်ငံ​နှင့် နယ်မြေ​ပေါင်း ၂၃၄ ခု​တွင် တက်တက်ကြွကြွ​ဟောပြော​နေကြ​သော ယေဟောဝါသက်သေ​များသည် ထူးထူးခြားခြား​ပင် အကောင်းမြင်​သူများ​ဖြစ်​ကြ​၏။ အကြမ်းဖက်မှု ဘယ်တော့​မျှ​အဆုံးတိုင်​မည်​မဟုတ်​ဟု သူတို့​စိုးရိမ်​မည့်​အစား များ​မကြာမီ​ပင် အကြမ်းဖက်မှု​အဆုံးတိုင်​မည်​ကို သူတို့ ယုံကြည်​စိတ်ချ​ကြ​၏။ သူတို့​နည်းတူ အပြုသဘော​ရှိ​ခြင်း​က လက်တွေ့ကျပါ​သလော။ ကမ္ဘာ​ပေါ် ဤ​ဘေးဒဏ်​သင့်​ခြင်း​ကို မည်သူ​ဖယ်ရှား​ပေး​နိုင်​မည်​နည်း၊ မည်သို့​ဖြစ်လာ​နိုင်​သနည်း။ အကြမ်းဖက်မှု​ပုံစံ​တစ်မျိုး​မျိုးကို ကျွန်ုပ်​တို့​ခံစား​ခဲ့​ရမည်​ဖြစ် ရာ ထိုသို့​အပြုသဘော​ရှိ​ခြင်း​အကြောင်းရင်းကို ဆန်းစစ်​ကြည့်​ရန် သင့်လျော်​ပေမည်။

၃။ ကြောက်ရွံ့​စ​ရာ အဘယ်​အကြောင်း​များ​ရှိနေ​သနည်း၊ ကျွန်ုပ်​တို့​အချိန်​နှင့်​ပတ်သက်​၍ အဘယ်အရာကို တင်ကူး​ဟောထား​သနည်း။

^၃ ယနေ့ အကြောင်း​အမျိုးမျိုး​ကြောင့် လူတို့သည် ကြောက်ရွံ့​တုန်လှုပ်​နေကြ၏။ အသက်အရွယ်​ကြီးရင့်​လွန်း​၍ ကိုယ့်​ကိုယ်ကို​မကြည့်ရှု​မပြု​စု​နိုင်​တော့​သူ၊ ကု​မရ​သော​ရောဂါ​ကြောင့် အားနည်း​လာ​နေ​သူနှင့် စား​ဝတ်​နေ​ရေး​အတွက် လုံးပန်း​နေရ​သော​မိသားစု မြောက်မြားစွာ​တို့ကို စဉ်းစား​ကြည့်​ပါ။ အမှန်​မှာ ဘဝ၏​မရေရာ​မသေချာမှု​ကိုယ်နှိုက်​ကို ထည့်​သုံးသပ်ကြည့်​ပါ! မတော်တဆမှု သို့​မဟုတ် ဘေးဒဏ်​ကြောင့် ရုတ်တရက်​သေဆုံး​ရနိုင်​ရာ ကျွန်ုပ်​တို့​မြတ်နိုးသော​အရာ​မှန်သမျှ​သည် အချိန်မရွေး ပျောက်ဆုံး​သွား​နိုင်၏။ ဤသို့​သော​ကြောက်ရွံ့​တုန်လှုပ်​မှု​နှင့် စိုးရိမ်​ပူပန်မှု​များ၊ ပုဂ္ဂိုလ်ရေး​စိတ်ဝမ်းကွဲ​ပြား​မှု​နှင့် စိတ်ပျက်​စ​ရာ​အကြောင်း​များ​ကြောင့် ကျွန်ုပ်​တို့၏​အချိန်​သည် တမန်​တော်​ပေါလု​ဖော်ပြ​ခဲ့​သည့် ဤ​အခြေအနေ​အတိုင်း ဖြစ်နေ​သည်– “နောက်ဆုံးသော​နေ့ရက်​များ​၌ ခဲယဉ်း​သော​ကာလ​များ​ဖြစ်​မည်​ဟု သိမှတ်​လော့။ အကြောင်း​မူ​ကား လူတို့သည် ကိုယ်ကို​ချစ်သော​သူ၊ . . . ပကတိ​စုံမက်ခြင်း​နှင့်​ကင်း​သော​သူ၊ ရန်ငြိုး​ထားသော​သူ၊ ချောစား​တတ်သော​သူ၊ ကိုယ်ကို​မချုပ်တည်း​နိုင်သော​သူ၊ ကြမ်းကြုတ်​သော​သူ၊ အကောင်း​ကို​မုန်း​သော​သူ” ဖြစ်​ကြ​မည်။—၂ တိမောသေ ၃:၁-၃၊ သမ္မာ။

၄။ ၂ တိမောသေ ၃:၁-၃ တွင် ဖော်ပြ​ထား​သည့် ရင်မော​ဖွယ်​အခြေအနေ​တွင် အဘယ်​အပြုသဘော​ရှုထောင့်​ရှိ​သနည်း။

^၄ ဤ​ကျမ်းချက်​သည် ရင်မော​ဖွယ်​အခြေအနေ​ကို ဖော်ပြ​ထား​သော်လည်း မျှော်လင့်ချက်​ရှိ၏။ ခဲယဉ်း​ကျပ်တည်း​သော ထို​အချိန်ကာလ​များသည် စာတန့်​လက်ရှိ ဆိုးသွမ်း​သော​စနစ်​၏ “နောက်ဆုံးသော​နေ့ရက်​များ​၌” တည်ရှိ​မည်​ဖြစ်​ကြောင်း သတိပြုပါ။ ယင်းက ကယ်လွှတ်​ခံရ​ချိန်​နီး​ကြောင်း​နှင့် မိမိ၏​နောက်လိုက်​များ​ကို တောင်းလျှောက်​ရန် ယေရှု သင်ကြား​ပေး​ခဲ့​သည့် စုံလင်သော​ဘုရားသခင့်​နိုင်ငံတော်​အုပ်ချုပ်မှု​သည် များ​မကြာမီ ဆိုးညစ်သော​ကမ္ဘာ​ကို အစားထိုး​တော့​မည်​ဖြစ်​ကြောင်း ဆိုလို​သည်။ (မဿဲ ၆:၉၊ ၁၀) အဆိုပါ​နိုင်ငံ​သည် “ပျက်စီးခြင်း​သို့​မ​ရောက်​နိုင်သော” ဘုရားသခင်​၏​ကောင်းကင်​အစိုးရ​ဖြစ်​ပြီး “[လူသား] နိုင်ငံ​ရှိသမျှ​တို့ကို ချိုးဖဲ့​ဖျက်ဆီး​၍ အစဉ်အမြဲ​တည်​လိမ့်​မည်” ဟု​ပရောဖက်​ဒံယေလ​က ဖော်ပြ​ထား​သည်။—ဒံယေလ ၂:၄၄၊ ၄၅။

အကြမ်းဖက်မှု​တစ်ဖက် ခရစ်ယာန်​ကြားနေ​မှု

၅။ အကြမ်းဖက်​ခြိမ်းခြောက်​မှု​ကို လူမျိုး​တို့သည် မကြာမီ​က မည်သို့​တုံ့ပြန်​ခဲ့​ကြ​သနည်း။

^၅ အကြမ်းဖက်မှု​သည် ဆယ်စုနှစ်​များစွာ​ချီ​၍ လူများစွာ​တို့၏​အသက်ကို ခြွေယူ​ခဲ့​လေ​ပြီ။ ၂၀၀၁ ခုနှစ်၊ စက်တင်ဘာ​လ ၁၁ ရက်​နေ့​က နယူးယောက်​နှင့် ဝါ​ရှင်​တန် ဒီ.စီ. ၌ တိုက်ခိုက်​ခံရ​ပြီး​နောက် ဤ​ဘေးအန္တရာယ်​ကို ကမ္ဘာချီ​တိုး၍​သတိပြုမိ​ကြ​လေ​သည်။ အကြမ်းဖက်မှု​သည် ကမ္ဘာချီ​ပျံ့နှံ့​နေ၍ အရေးတကြီး​ကိစ္စ​ဖြစ်လာ​ခြင်း​ကြောင့် ကမ္ဘာ​တစ်​လွှား​ရှိ​လူမျိုးစု​များသည် စုပေါင်း​၍ ဆန့်ကျင်​တိုက်ခိုက်​ရန် လျင်မြန်​စွာ​လူစု​လာ​ကြ​၏။ ဥပမာ၊ ၂၀၀၁ ခုနှစ်၊ ဒီဇင်ဘာ​လ ၄ ရက်​နေ့တွင် ဆက်သွယ်ရေး​မှတ်တမ်းများ​အရ “ဥရောပ၊ မြောက်​အမေရိက​နှင့် အာရှ​အလယ်ပိုင်း​ရှိ​နိုင်ငံ ၅၅ နိုင်ငံ​မှ နိုင်ငံ​ခြား​ရေး​ဝန်ကြီး​များသည်” သူတို့၏​ကြိုးပမ်းမှု​များ​ကို ညှိနှိုင်း​ရန် “တစ်စိတ်​တစ်​ဝမ်း​တည်း​ဖြင့် စီမံချက်​တစ်ရပ်​ကို ခံယူ​ခဲ့​ကြသည်။” ယူ. အက်စ်. ထိပ်​တန်း​အရာရှိ​တစ်ဦး​က ဤ​လုပ်ဆောင်ချက်​ကို ချီးမွမ်း​ခဲ့​၏၊ ၎င်း​သည် အကြမ်းဖက်မှုကို​ဆန့်ကျင်​တွန်းလှန်​ဖို့ “အားအင်ထပ်လောင်း” ပေး​၏​ဟု​ဆို​သည်။ ရုတ်ခြည်း​ပင် လူ​သန်းပေါင်း​များစွာ​သည် သည်​နယူးယောက်​တိုင်းမ်​စ်​မဂ္ဂဇင်း​ခေါ်ဆို​သည့် “သမိုင်းဝင်​တိုက်ပွဲ​သစ်​တစ်ခု” တွင်​ပါဝင်​နေကြ​သည်။ သူတို့၏​ကြိုးပမ်းမှု​များ မည်မျှ​အောင်မြင်​မည်​ကို စောင့်ကြည့်​ရမည်။ အကြမ်းဖက်မှုကို ဤသို့​ဆန့်ကျင်​တိုက်ခိုက်​သည့် စစ်ပွဲ​၏​ဂယက်ရိုက်မှု​များ​ကြောင့် လူများစွာ​တို့သည် ကြောက်ရွံ့​စိုးရိမ်​ပူပန်​နေကြ၏၊ သို့သော် ယေဟောဝါ​အား ယုံကြည်​ကိုးစား​သူတို့​မူ ထိုသို့​မစိုးရိမ်​ကြ​ချေ။

၆။ (က) လူ​အချို့​သည် ယေဟောဝါသက်သေ​များ​၏ ခရစ်ယာန်​ကြားနေ​မှု​ကို အဘယ်ကြောင့် တစ်ခါတစ်ရံ လက်မခံနိုင်​ကြ​သနည်း။ (ခ) နိုင်ငံရေး​ဆောင်ရွက်မှု​များနှင့်​ပတ်သက်​၍ ယေရှုသည် မိမိ၏​နောက်လိုက်​များ​အတွက် အဘယ်​စံနမူနာ​ချမှတ်​ခဲ့​သနည်း။

^၆ ယေဟောဝါသက်သေ​များသည် နိုင်ငံရေး​တွင် ကြားနေ​ကြ​ကြောင်းကို ကောင်းစွာ​သိရှိ​ကြသည်။ လူအများသည် ငြိမ်းချမ်း​သော​အချိန်တွင် ထို​အနေအထား​ကို တလိုတလား​လက်ခံ​နိုင်​ကြ​မည် ဖြစ်သော်လည်း အထူးတလည်​အရေးကြုံ​လာသော​အခါ ယင်းကို သည်းမခံ​နိုင်​ကြ​ချေ။ စစ်​ဖြစ်​ချိန်​တွင် စိုးရိမ်စိတ်​နှင့် တပ်အပ်​မပြော​နိုင်သော​အခြေအနေ​များ​ကြောင့် မျိုးချစ်စိတ်​ပြင်းထန်​လာ​တတ်၏။ ယင်းကြောင့် ရေပန်းစား​နေသော​နိုင်ငံရေး​လှုပ်ရှားမှုများ​ကို အဘယ်ကြောင့်​မထောက်ခံ​ရ​ကြောင်း အချို့​သူတို့ နားလည်​ရ​ခက်​ပေမည်။ မည်သို့​ပင်​ဖြစ်စေ ‘ဤ​လောက​နှင့်​မဆက်ဆံ​ရ’ ဟူသော ယေရှု၏​ပညတ်​ကို မိမိတို့​နာခံ​ရမည်​ဖြစ်​ကြောင်း ခရစ်ယာန်စစ်​များ​သိထားကြ​၏။ (ယောဟန် ၁၅:၁၉; ၁၇:၁၄-၁၆; ၁၈:၃၆; ယာကုပ် ၄:၄) ထိုသို့​ပြု​ရန် နိုင်ငံရေး သို့​မဟုတ် လူမှုရေး​ကိစ္စရပ်​များ​တွင် သူတို့​ကြားနေ​ဖို့​လို​သည်။ ယင်း​နှင့်​ပတ်သက်​၍ ယေရှု​ကိုယ်တော်တိုင် စံနမူနာ​ကောင်း​တင်ပြ​ခဲ့​သည်။ ကိုယ်တော်​၏​စုံလင်သော​ဉာဏ်ပညာ​နှင့် ထူးခြားသော​အရည်အသွေးများ​ကို ထောက်ရှု​လျှင် ကိုယ်တော်​သည် မိမိ​ခေတ်​ရှိ လူ့​ကိစ္စရပ်​များ​ကို ကောင်းကောင်း​ပံ့ပိုး​ကူညီပေး​နိုင်​ခဲ့​သည်။ သို့သော် ကိုယ်တော်​သည် နိုင်ငံရေး​တွင် လုံးဝ​မပါဝင်​ခဲ့​ချေ။ ယေရှုသည် ဓမ္မ​အမှု​စတင်ချိန်​တွင် စာတန်​က ဤ​လောက​၌​ရှိသမျှ​သော တိုင်းနိုင်ငံ​တို့ကို အုပ်ချုပ်ခွင့်​ပေး​မည်​ဟု ကမ်း​လှမ်း​ခဲ့​ခြင်း​ကို ကိုယ်တော်​ပြတ်ပြတ်သားသား​ငြင်းပယ်​ခဲ့​၏။ နောက်ပိုင်း​တွင် နိုင်​ငံ့​ခေါင်းဆောင်​အဖြစ် ကိုယ်တော်​အား​ရွေးချယ်​တင်မြှောက်​ခြင်း​ကို ကိုယ်တော်​ပြတ်သား​စွာ​တိမ်းရှောင်​ခဲ့​သည်။—မဿဲ ၄:၈-၁၀; ယောဟန် ၆:၁၄၊ ၁၅။

၇၊ ၈။ (က) ယေဟောဝါသက်သေ​တို့သည် နိုင်ငံရေး​တွင် ကြားနေ​ကြ​ခြင်း​က အဘယ်အရာကို မဆိုလို​သနည်း၊ အဘယ်ကြောင့်​နည်း။ (ခ) ရောမ ၁၃:၁၊ ၂ က အစိုးရ​များ​ကို​ဆန့်ကျင်​သည့် အကြမ်းဖက်​ဆောင်ရွက်မှု​များ​၌ မပါဝင်​ရ​ကြောင်း မည်သို့​ဖော်ပြ​သနည်း။

^၇ ယေဟောဝါသက်သေ​တို့သည် ကြားနေ​ကြ​သည့်​အတွက် သူတို့သည် အကြမ်းဖက်မှု​များ​ကို ထောက်ခံ​သည်၊ လျစ်လျူရှု​ထား​ကြသည်​ဟု အထင်​မမှား​သင့်​ချေ။ ထိုသို့​သူတို့​ပြုလုပ်​ကြ​မည်​ဆိုလျှင် သူတို့သည် “မေတ္တာ​နှင့်​ငြိမ်သက်ခြင်း​၏​အရှင် ဘုရားသခင်” ၏ ကျေးကျွန်​များ​ဖြစ်သည်​ဟူသော သူတို့၏​အဆိုကို ဆန့်ကျင်​ပြီး​ပြုလုပ်​နေရာကျ​မည်။ (၂ ကောရိန္သု ၁၃:၁၁၊ သမ္မာ) သူတို့သည် အကြမ်းဖက်မှုကို ယေဟောဝါ မည်သို့​သဘောထားကြောင်း သိလာ​ခဲ့​ကြပြီ။ ဆာလံဆရာ​က ဤသို့​ရေးသားခဲ့​သည်– “ထာဝရ​ဘုရား​သည် ဖြောင့်မတ်​သော​သူကို စစ်ဆေး​တော်​မူ​၍ ဆိုးသော​သူနှင့် ကြမ်းကြုတ်ခြင်း​နှစ်သက်သော​သူကို မုန်းတော်မူ​၏။” (ဆာလံ ၁၁:၅၊ သမ္မာ) တမန်​တော်​ပေတရု​အား ယေရှု​မိန့်တော်မူ​ခဲ့​သော ဤ​စကား​များ​ကိုလည်း သူတို့​သိထားကြသည်– “သင့်​ဓားကို​သူ့​နေရာ၌​ပြန်​ထား​လော့။ ဓားကို​ကိုင်​သော​သူ​ရှိသမျှ​တို့သည် ဓား​ဖြင့်​ဆုံး​ခြင်း​သို့​ရောက်​ကြလိမ့်မည်။”—မဿဲ ၂၆:၅၂။

^၈ အရေခြုံ​ခရစ်ယာန်​များသည် “ဓား” ကို မကြာခဏ​အသုံးပြု​ခဲ့​ကြောင်း သမိုင်းက အထင်အရှား​ထောက်ပြ​သော်လည်း ယေဟောဝါသက်သေ​များ​မူ ထိုသို့​မဟုတ်ပါ။ ထိုသို့​သော​ဆောင်ရွက်မှု​မှန်သမျှကို သူတို့​ရှောင်ကြဉ်​ကြ​၏။ ရောမ ၁၃:၁၊ ၂ တွင်​ပါရှိ​သော ဤ​ပညတ်​ကို သူတို့​တည်ကြည်​စွာ​လိုက်နာ​ကြသည်– “အစိုး​ရသော​မင်း​အာဏာစက်​၏​အုပ်စိုးခြင်း​ကို လူတိုင်း​ဝန်ခံ​စေ။ အကြောင်း​မူ​ကား၊ ဘုရားသခင်​၏​အခွင့်​မ​ရှိလျှင်၊ မင်း​အာဏာစက်​မရှိ။ အာဏာစက်​ရှိသမျှသည် ဘုရားသခင်​ခန့်​ထား​တော်​မူ​ရာ​ဖြစ်​သတည်း။ ထို့​ကြောင့်၊ မင်း​အာဏာကို​ဆန်​သော​သူသည် ဘုရားသခင်​စီရင်တော်မူ​ရာ​ကို​ဆန်​သော​သူ​ဖြစ်၏။ ထိုသို့​ဆန်​သော​သူသည် ရာဇ​ဝတ်​ကို​ခံရ​မည်။”

၉။ ယေဟောဝါသက်သေ​များသည် အဘယ်နည်း​နှစ်နည်း​ဖြင့် အကြမ်းဖက်မှုကို ဆန့်ကျင်​နေကြ​သနည်း။

^၉ သို့သော် အကြမ်းဖက်မှု​သည် ဆိုးရွား​လွန်း​လှ​သဖြင့် ယင်းကို​ဆိုင်ပြိုင်​တွန်းလှန်​ရေး​တွင် ယေဟောဝါသက်သေ​များ မပါဝင်​သင့်​ပေ​လော။ အမှန်ပင် ပါဝင်​သင့်​ပြီး ပါဝင်​နေကြပါ​သည်။ ဦးဆုံး​အနေ​နှင့်၊ သူတို့​ကိုယ်တိုင် အကြမ်းဖက်မှု​မှန်သမျှကို ရှောင်ကြဉ်​ခြင်း​အားဖြင့်​ဖြစ်သည်။ ဒုတိယ​အနေ​နှင့်၊ သူတို့သည် လူ​တို့အား ခရစ်ယာန်မူ​များ​ကို သွန်သင်ပေး​ကြ​ရာ ၎င်းတို့ကို လူ​တို့​လိုက်လျှောက်​ကြ​မည်​ဆိုလျှင် အကြမ်းဖက်မှု လုံးဝ​ရှိတော့မည်​မဟုတ်ပေ။ * လွန်ခဲ့သော​နှစ်​က သက်သေခံ​တို့သည် ဤ​ခရစ်ယာန်​လမ်းစဉ်​ကို လူ​တို့အား​သိရှိ​စေရန် နာရီ​ပေါင်း ၁,၂၀၂,၃၈၁,၃၀၂ နာရီ​အသုံးပြု​ခဲ့​ကြပြီ။ ဤ​အချိန်​များ​ကို အလဟဿ​ဖြုန်း​ခြင်း​မဟုတ်ပါ၊ အကြောင်း​မှာ ထို​လုပ်ငန်း​ကြောင့် လူပေါင်း ၂၆၅,၄၆၉ ယောက်​သည် ယေဟောဝါသက်သေ​များ​အဖြစ် နှစ်ခြင်း​ယူ​ခဲ့​ကြ​ရာ ဤ​သူတို့သည် အကြမ်းဖက်မှုကို လုံးလုံး​ငြင်းပယ်​ကြောင်း လူသိရှင်ကြား​တင်ပြ​ခဲ့​ကြ​၏။

၁၀။ ယနေ့ ကမ္ဘာ​ပေါ်​မှ အကြမ်းဖက်မှုကို သုတ်သင်​ပယ်ရှား​ပစ်​ရန် အဘယ်​အလားအလာ​ရှိ​သနည်း။

^၁၀ ထို့​ပြင် ဤ​လောက​မှ ဆိုးသွမ်းမှု​ကို ယေဟောဝါသက်သေ​တို့​ကိုယ်တိုင် ဘယ်တော့​မျှ​ဖယ်ရှားပစ်​နိုင်​မည်​မဟုတ်​ကြောင်း အသိအမှတ်ပြု​ကြသည်။ ထို့​ကြောင့် ဆိုးသွမ်းမှု​ကို​ဖယ်ရှား​နိုင်သော​အရှင် ယေဟောဝါ​ဘုရားသခင်​အား သူတို့​အကြွင်းမဲ့ယုံ​ကြည်​ကိုးစား​ကြ​၏။ (ဆာလံ ၈၃:၁၈) လူတို့သည် စိတ်ရင်းမှန်​ဖြင့် ကြိုးပမ်း​အားထုတ်​ကြသော်လည်း အကြမ်းဖက်မှုကို အဆုံးတိုင်​စေနိုင်​မည်​မဟုတ်ပါ။ မှုတ်သွင်းခံကျမ်း​ရေးသူက “နောက်ဆုံးသော​နေ့ရက်​များ” ဖြစ်သည့် ကျွန်ုပ်​တို့​အချိန်​နှင့်​ပတ်သက်​၍ ကျွန်ုပ်​တို့ကို ဤသို့​ကြိုတင်​သတိပေး​ထား​သည်– “ဆိုးညစ်သော​သူ၊ လှည့်ဖြား​သော​သူတို့မူကား  သူတစ်ပါးကို​လည်းကောင်း၊ ကိုယ်ကို​လည်းကောင်း လှည့်ဖြား​၍ ဆိုးညစ်ခြင်း​၌ တရွေ့ရွေ့​တိုးပွား​ကြလိမ့်မည်။” (၂ တိမောသေ ၃:၁၊ ၁၃) ဤ​ရှုထောင့်​မှ ကြည့်မြင်​သုံးသပ်​လျှင် ဆိုးညစ်မှု​ကို အောင်နိုင်​ရန် အလားအလာ​မရှိ​ချေ။ အခြား​တစ်ဖက်​တွင်​မူ အကြမ်းဖက်မှုကို လုံးဝ ထာဝစဉ်​ပပျောက်​သွား​စေ​မည့် ယေဟောဝါ​အား ယုံကြည်​စိတ်ချ​နိုင်၏။—ဆာလံ ၃၇:၁၊ ၂၊ ၉-၁၁; သု. ၂၄:၁၉၊ ၂၀; ဟေရှာယ ၆၀:၁၈။

တိုက်ခိုက်မှု​ကျရောက်​ဆဲ​ရှိ​ငြား ကြောက်ရွံ့​မှု​ကင်း​ခြင်း

၁၁။ အကြမ်းဖက်မှုကို​ဖယ်ရှား​ရန် အဘယ်အရာ​များ​ကို ယေဟောဝါ​ပြု​နှင့်​ပြီ​နည်း။

^၁၁ ငြိမ်သက်ခြင်း​အရှင်​ဘုရားသခင်​သည် အကြမ်းဖက်မှုကို ရွံမုန်း​တော်​မူ​သောကြောင့် ၎င်း​၏​ရင်းမြစ် စာတန်​ကို ဖျက်ဆီး​ပစ်​ရန် အဘယ်ကြောင့်​စီစဉ်​ထား​ကြောင်း ကျွန်ုပ်​တို့​သဘောပေါက်​နိုင်​ပါ​သည်။ အမှန်​မှာ ကောင်​ကင်​တမန်​မင်း​မိက္ခေလ၊ ဘုရားသခင်​၏​နန်းတက်စ​ဘုရင်​သစ် ယေရှု​ခရစ်​၏​လက်ချက်​ဖြင့် စာတန်​ကို ကိုယ်တော်​အရှက်ခွဲ၍​ရှုံးနိမ့်​စေ​နှင့်​ပြီ။ သမ္မာကျမ်းစာ​က ဤသို့​ဖော်ပြ​ထား​သည်– “ကောင်းကင်​၌​စစ်​ဖြစ်၏။ မိက္ခေလ​နှင့် သူ၏​ကောင်းကင်တမန်​တို့သည် နဂါး​ကို​စစ်တိုက်​ကြ​၏။ နဂါးနှင့်​သူ၏​တမန်​တို့သည် စစ်​တိုက်၍​မ​နိုင်​ကြ။ ကောင်းကင်​၌​လည်း သူတို့​နေစရာ​မရှိ။ ထို​အခါ ဤ​လောက​တစ်နိုင်ငံ​လုံး​ကို​လှည့်ဖြား​၍ . . . စာတန်​အမည်​ရှိသော ရှေး​မြွေ​ဟောင်း​တည်း​ဟူသော နဂါး​ကြီး​ကိုလည်း​ကောင်း၊ သူနှင့်​အတူ သူ၏​တမန်​တို့ကို​လည်းကောင်း၊ မြေကြီး​သို့​ချ​လိုက်​ကြ​၏။”—ဗျာ. ၁၂:၇-၉။

၁၂၊ ၁၃။ (က) ၁၉၁၄ ခုနှစ်​၏​ထူးခြားချက်​က အဘယ်နည်း။ (ခ) ဘုရားသခင့်​နိုင်ငံတော်​ကို ထောက်ခံသူ​တို့​နှင့်​ပတ်သက်​၍ ယေဇကျေလ​၏​ပရောဖက်ပြုချက်​က အဘယ်အရာကို တင်ကူး​ပြော​ထား​သနည်း။

^၁၂ သမ္မာကျမ်းစာ​သက္ကရာဇ်​ဖြစ်​စဉ်​နှင့် ကမ္ဘာ​ဖြစ်ရပ်​များ​က ၁၉၁၄ ခုနှစ်​၌ ကောင်းကင်​တွင်​စစ်​ဖြစ်​ခဲ့​ကြောင်း ထောက်ပြ​သည်။ ထို​အချိန်​ကတည်းက ကမ္ဘာ့​အခြေအနေ​သည် ဆိုး​သည်ထက်​ဆိုး​လာ​၏။ ဗျာ. ၁၂:၁၂ က ထိုသို့​အဘယ်ကြောင့်​ဖြစ်​ရ​ကြောင်း ဤသို့​ရှင်းပြသည်– “ထို​ကြောင့်၊ ကောင်းကင်​နှင့်​ကောင်းကင်သား​တို့ ရွှင်လန်း​ကြလော့။ မြေကြီး​နှင့်​ပင်လယ်​သည် အမင်္ဂလာ​ရှိ၏။ အကြောင်း​မူ​ကား၊ [စာတန်] သည် မိမိ​ကာလ​တစ်ခဏ​သာ​ရှိသည်​ကို​သိ၍၊ ပြင်းစွာ​သော​ဒေါသ​အမျက်​နှင့်​တကွ သင်တို့​ရှိရာသို့​ဆင်း​လေ​ပြီ​ဟု​ဆို​ကြသည်​ကို ငါ​ကြား​၏။”

^၁၃ ဘုရားသခင်​၏​ဝိညာဉ်​တော်​ဖွား​ဝတ်ပြုသူ​တို့​နှင့် သူတို့၏​အပေါင်းပါ “အခြားသိုး” တို့ကို စာတန် အဓိက​အမျက်ထွက်ခြင်း​သည် အံ့ဩစရာ​မဟုတ်ပေ။ (ယောဟန် ၁၀:၁၆; ဗျာ. ၁၂:၁၇) ဘုရားသခင်​တည်ထောင်​ထားသော​နိုင်ငံတော်​ကို ထောက်ခံ​အားပေး​၍ ယုံကြည်​ကိုးစား​သူအား​လုံး​ကို စာတန် အပြင်းအထန်​တိုက်ခိုက်​သောအခါ ဤ​ဆန့်ကျင်မှု​သည် အထွတ်အထိပ်​သို့ ရောက်​ပေ​လိမ့်​မည်။ ဤ​မီးကုန်ယမ်းကုန်​တိုက်ခိုက်မှု​ကို ယေဇကျေလ အခန်းကြီး ၃၈ က “မာဂေါဂ​ပြည်သား ဂေါဂ​မင်း” ၏​တိုက်ခိုက်မှု​အဖြစ် ဖော်ညွှန်း​ထား​သည်။

၁၄။ ယေဟောဝါသက်သေ​များသည် အတိတ်​က အဘယ်​ကာကွယ်​မှုများ ရရှိခဲ့ကြ​သနည်း၊ ထိုသို့ အမြဲ​ဖြစ်သွား​မည်​လော။

^၁၄ ကောင်းကင်​မှ စာတန်​နှင်ချ​ခံရ​ပြီး​နောက် နိုင်ငံရေး​အဖွဲ့​အချို့​၏ ကြိုးပမ်း​အားထုတ်မှု​များ​ကြောင့် ဘုရားသခင်​၏​လူမျိုး​သည် စာတန်​၏​တိုက်ခိုက်မှု​များ​မှ တစ်ခါတစ်ရံ​အကာအကွယ်​ရရှိခဲ့​ကြောင်း ဗျာ. ၁၂:၁၅၊ ၁၆ က ပုံဆောင်​စကား​ဖြင့် ဖော်ပြ​ထား​သည်။ ယင်း​နှင့်​ခြားနား​လျက် စာတန်​၏​နောက်ဆုံး​တိုက်ခိုက်မှု​ကာလ​အတွင်း ယေဟောဝါ​အား ယုံကြည်​ကိုးစား​သူတို့ကို အဘယ်​လူ့​အဖွဲ့အစည်း​က​မျှ လာရောက်​ကာကွယ်​ပေး​မည်​မဟုတ်​ဟု သမ္မာကျမ်းစာ​က ပြညွှန်​ထား​သည်။ ယင်းကြောင့် ခရစ်ယာန်​များ ကြောက်ရွံ့​တုန်လှုပ်​သင့်​သလော။ လုံးဝ​မတုန်လှုပ်​သင့်​ပါ!

၁၅၊ ၁၆။ (က) ယောရှဖတ်​အချိန်၌ မိမိ​လူမျိုး​ကို ယေဟောဝါ​အာမခံ​သည့်​စကား​များ​က ယနေ့ ခရစ်ယာန်​များ​ကို မည်သို့​အားတက်စေ​သနည်း။ (ခ) ယောရှဖတ်​နှင့် ထို​အချိန်​ကလူ​တို့သည် ယနေ့ ဘုရားသခင့်​ကျေးကျွန်​များ​အတွက် အဘယ်​ပုံစံ​ချမှတ်​ပေး​သနည်း။

^၁၅ ဘုရားသခင်​သည် ဘုရင်​ယောရှဖတ်​အချိန်​က ကိုယ်တော်​၏​ဇာတိ​လူမျိုး​ကို ထောက်ပံ့​ကူညီပေး​ခဲ့​သည့်​နည်းတူ ယခု​လည်း အမှန် ပင်​ကူညီပေး​ပါ​လိမ့်​မည်။ ကျွန်ုပ်​တို့ ဤသို့​ဖတ်​ရသည်– ‘ယောရှဖတ်​မင်းကြီး​နှင့် ယုဒပြည်​သူ၊ ယေရုရှလင်​မြို့သား​အပေါင်း​တို့ နားထောင်​ကြလော့။ ထာဝရ​ဘုရားသခင်​မိန့်တော်မူသည်​ကား ‘ထို​အလုံးအရင်း​ကြီး​ကြောင့် မကြောက်​ကြ​နှင့်။ စိတ်မပျက်​ကြ​နှင့်။ ဤ​စစ်မှု​သည် သင်တို့​တာ​မဟုတ်၊ ဘုရားသခင့်​တာ​ဖြစ်၏။ . . . သင်တို့သည် စစ်တိုက်​စ​ရာ​အကြောင်း​မရှိ။ ရပ်၍ [“သင့်​နေရာယူ​ပါ၊” က​ဘ] ငြိမ်​ဝပ်​စွာ​မတ်တတ်​နေ​လျက် ထာဝရ​ဘုရားသခင်​ကယ်တင်​တော်​မူ​ခြင်း​အမှုကို ကြည့်ရှု​ကြလော့။ မကြောက်​ကြ​နှင့်။ စိတ်မပျက်​ကြ​နှင့်။ နက်ဖြန်နေ့ သူတို့​တစ်ဖက်​ချီ​သွား​ကြလော့။ ထာဝရ​ဘုရားသခင်​သည် သင်တို့​နှင့်အတူ​ရှိ​တော်​မူ​လိမ့်​မည်’ ဟု​မြွက်ဆို​၏။’—၂ ရာဇဝင်ချုပ် ၂၀:၁၅-၁၇၊ သမ္မာ။

^၁၆ ယုဒပြည်သား​တို့သည် စစ်တိုက်​ရန်​မလို​ကြောင်း အာမခံချက်​ရခဲ့​သည်။ အလားတူ ဘုရားသခင်​၏​လူမျိုး​ကို မာဂေါဂ​ပြည်သား​ဂေါဂ တိုက်ခိုက်​သည့်​အခါ မိမိတို့​ကိုယ်ကို​ကာကွယ်​ရန် လက်နက်ကိုင်​တိုက်ခိုက်​ဖို့ လို​မည်​မဟုတ်​ချေ။ ယင်းအစား သူတို့သည် ‘တည်ကြည်​စွာ​မတ်တတ်ရပ်​နေ​လျက် ယေဟောဝါ​၏​ကယ်တင်​တော်​မူ​ခြင်း​ကျေးဇူး​ကို ကြည့်ရှု​ကြ’ ရ​လိမ့်​မည်။ ငြိမ်​ဝပ်​စွာ​ရပ်​လျက်​နေခြင်း​က လုံးဝ​မ​လှုပ်ရှား​ဘဲ​နေခြင်း​ကို ရည်ညွှန်း​သည်မဟုတ်​ပါ၊ ယောရှဖတ်​အချိန်၌ ဘုရားသခင့်​လူမျိုး​သည် လုံးဝ မလှုပ်မရှား မနေ​သကဲ့သို့​ဖြစ်၏။ ကျွန်ုပ်​တို့ ဤသို့​ဖတ်​ရသည်– ‘ယောရှဖတ်​သည် မြေပေါ်မှာ​ဦးချ​၍ ယုဒပြည်​သူ ယေရုရှလင်​မြို့သား​အပေါင်းတို့သည် ထာဝရ​ဘုရားသခင်​ရှေ့တော်၌ ပျပ်ဝပ်​လျက် ထာဝရ​ဘုရားသခင်​ကို ကိုးကွယ်​ကြ​၏။ . . . [ယောရှဖတ်​သည်] လူများ​နှင့်​တိုင်ပင်​ပြီး​မှ ‘ထာဝရ​ဘုရားသခင်​၏​ကရုဏာတော်​သည် အစဉ်အမြဲ​တည်​သောကြောင့် ဂုဏ်​ကျေးဇူးတော်​ကို ချီးမွမ်း​ကြလော့’ ဟု တပ်​ရှေ့မှာ​ချီ​သွား​လျက် သန့်ရှင်းခြင်း​အသရေ​ကို​ချီးမွမ်း​ရသော သီချင်းသည်​တို့ကို ထာဝရ​ဘုရားသခင်​အဖို့ ခန့်​ထား​တော်​မူ​၏။’ (၂ ရာဇဝင်ချုပ် ၂၀:၁၈-၂၁) မှန်ပါသည်၊ ရန်သူ​တိုက်ခိုက်​နေစဉ်​ပင် လူတို့သည် ယေဟောဝါ​အား တက်တက်ကြွကြွ​ချီးမွမ်း​နေကြ​သည်။ ဂေါဂ​သည် ယေဟောဝါသက်သေ​များ​ကို အပြင်းအထန်​တိုက်ခိုက်​သောအခါ ထို့​အတူ သူတို့​ပြုလုပ်​ကြလိမ့်မည်။

၁၇၊ ၁၈။ (က) ဂေါဂ​၏​တိုက်ခိုက်မှု​နှင့်​ပတ်သက်​၍ ယနေ့ ယေဟောဝါသက်သေ​များ​၌ အဘယ်​အပြုသဘောထား ရှိကြ​သနည်း။ (ခ) ခရစ်ယာန်​လူငယ်များ​အား များ​မကြာသေးမီ​က အဘယ်​သတိပေး​ချက်​ပေး​ခဲ့​သနည်း။

^၁၇ ထို​အချိန်အထိ​နှင့် ဂေါဂ​စတင်​တိုက်ခိုက်​ပြီး​နောက်​ပင် ယေဟောဝါသက်သေ​တို့သည် ဘုရားသခင့်​နိုင်ငံတော်​ကို ဆက်​ထောက်ခံကြ​လိမ့်​မည်။ ကမ္ဘာ​တစ်ဝန်း​ရှိ အသင်းတော်​ပေါင်း ၉၄,၆၀၀ ကျော်​နှင့် ပူးပေါင်း​ပြီး သူတို့သည် အစွမ်း​ခွန်အား​နှင့် ကာကွယ်​မှု​ရရှိ​လျက်​နေ​မည်။ (ဟေရှာယ ၂၆:၂၀) ယေဟောဝါ​အား ရဲစွမ်းသတ္တိ​ရှိ​ရှိ ချီးမွမ်း​ခွင့်​ရသည့် အချိန်​ပါ​တကား! ဂေါဂ​တိုက်ခိုက်​လု​ဆဲ​ဆဲ​ရှိသည်​ကို သူတို့​သိထား​ပြီး ကြောက်ရွံ့​တုန်လှုပ်​မနေကြ​ပါ။ ယင်းအစား ချီးမွမ်း​ခြင်း​ယဇ်ကို သူတို့​အတတ်နိုင်ဆုံး​ပူဇော်​ရန် လှုံ့ဆော်​ခံရ​သည်။—ဆာလံ ၁၄၆:၂။

^၁၈ ဤ​အပြုသဘောထား​ကို အချိန်ပြည့်​ခရစ်ယာန်​ဓမ္မ​အမှု ဆောင်ရွက်​နေ​သူ ကမ္ဘာ​တစ်ဝန်း​မှ လူငယ်​ထောင်ပေါင်း​များစွာ တင်ပြ​နေကြ​သည်။ ဤသို့​သော​အသက်တာ​လမ်းစဉ် ရွေးချယ်ခြင်း​၏​သာလွန်​ကောင်းမြတ်​မှု​ကို အလေးပေး​ဖော်ပြ​ရန် လူငယ်တို့—သင်တို့​အသက်တာကို မည်သို့​အသုံးပြု​ကြ​မည်​နည်း ဝေစာ​ကို ၂၀၀၂ ခုနှစ်  ခရိုင်​စည်းဝေးကြီး​များ​တွင် ထုတ်ဝေ​ခဲ့​သည်။ လူကြီး၊ လူငယ်​မရွေး ခရစ်ယာန်​အားလုံး​တို့သည် ဤသို့​သော အခန့်သင့်​သတိပေး​ချက်​များ ရရှိ​သည့်​အတွက် ကျေးဇူး​တင်​လေးမြတ်​ကြသည်။—ဆာလံ ၁၁၉:၁၄၊ ၂၄၊ ၉၉၊ ၁၁၉၊ ၁၂၉၊ ၁၄၆။

၁၉၊ ၂၀။ (က) ခရစ်ယာန်​များသည် အဘယ်ကြောင့် ကြောက်ရွံ့​တုန်လှုပ်​ရန်​အကြောင်း မရှိ​သနည်း။ (ခ) နောက်​လေ့လာ​မည့်​ဆောင်းပါး​က အဘယ်အရာ​ပြုလုပ်​ပေး​မည်​နည်း။

^၁၉ ကမ္ဘာ့​အခြေအနေ မည်သို့​ပင်​ရှိပါစေ ခရစ်ယာန်​များသည် ကြောက်ရွံ့​တုန်လှုပ်​စ​ရာ​မလိုပါ။ များ​မကြာမီ ယေဟောဝါ​၏​နိုင်ငံတော်​သည် အကြမ်းဖက်မှု​ရှိရှိသမျှကို အပြီး​အပြတ် ဖယ်ရှားပစ်​မည်​ကို သူတို့​သိထားကြ​၏။ အကြမ်းဖက်မှု​အားဖြင့် အသက်ဆုံးရှုံး​ခဲ့​ကြ​သူများစွာ​သည် ရှင်ပြန်ထမြောက်ခြင်း​ကြောင့် အသက်ပြန်ရှင်​လာ​လိမ့်​မည်​ဟု သူတို့​သိရှိ​ထားခြင်း​မှ နှစ်သိမ့်မှု​ရရှိ​ကြသည်။ ရှင်ပြန်ထမြောက်​လာ​ခြင်း​ဖြင့် အချို့​သူတို့သည် ယေဟောဝါ​ကို စတင်​သိရှိ​လာ​ကြ​မည်​ဖြစ်သော်လည်း အခြားသူများ​မှာ​မူ ကိုယ်တော်​ထံ ဆက်ကပ်​အပ်နှံ​ထားသော သူတို့၏​ဘဝ​လမ်းစဉ်​ကို ဆက်လျှောက်​လှမ်း​သွား​ကြလိမ့်မည်။—တမန်​တော် ၂၄:၁၅။

^၂၀ ခရစ်ယာန်စစ်​များ​အနေ​ဖြင့် ကျွန်ုပ်​တို့သည် ခရစ်ယာန်​ကြားနေ​မှု​ကို ဆက်​ထိန်းသိမ်း​ထား​ရန်လို​ကြောင်း သဘောပေါက်​ပြီး ထိုသို့​ဆက်​ပြုလုပ်​သွားဖို့ စိတ်​ဆုံးဖြတ်ထား​ကြ​ပါ​သည်။ ‘တည်ကြည်​စွာ​မတ်တတ်ရပ်​နေ​လျက် ယေဟောဝါ​၏​ကယ်တင်​တော်​မူ​ခြင်း​ကျေးဇူး​ကို ကြည့်ရှု’ ခွင့်​ရမည့်​မျှော်လင့်ချက်ကို ကျွန်ုပ်​တို့​ဆုပ်ကိုင်​ထား​လို​ကြ​ပါ​သည်။ နောက်​ဆောင်းပါး​က သမ္မာကျမ်းစာ​ပရောဖက်ပြုချက်​၏​ပြည့်စုံခြင်း​ကို ပိုမို​ထိုးထွင်း​သိမြင်​စေသည့် လက်ရှိ​ဖြစ်ရပ်​များ​ကို သတိပြုမိ​စေခြင်း​အားဖြင့် ယုံကြည်ခြင်း ပို​ခိုင်မြဲ​လာ​စေပါ​လိမ့်​မည်။

[အောက်ခြေမှတ်ချက်]

သင်​ရှင်းပြ​နိုင်​သလော

• ယနေ့ လူများစွာ​သည် အဘယ်ကြောင့် အဆိုးမြင်​နေကြ​သနည်း။

• ယေဟောဝါသက်သေ​များသည် အနာဂတ်​နှင့်​ပတ်သက်​၍ အဘယ်ကြောင့် အကောင်းမြင်​နေကြ​သနည်း။

• အကြမ်းဖက်မှု​အားလုံး​၏​ရင်းမြစ်​နှင့်​ပတ်သက်​၍ ယေဟောဝါ​သည် အဘယ်အရာကို ပြုလုပ်​နှင့်​ခဲ့ပြီ​နည်း။

• ဂေါဂ​၏​တိုက်ခိုက်မှု​ကို ကျွန်ုပ်​တို့ အဘယ်ကြောင့် ကြောက်ရွံ့​ရန်​အကြောင်း​မရှိ​သနည်း။

[လေ့လာ​ရန်​မေးခွန်းများ]

[စာမျက်နှာ ၁၃ ပါ ရုပ်ပုံ]

ခရစ်ယာန်​ကြားနေ​မှု​အတွက် ဆီလျော်​သော စံနမူနာ​ကို ယေရှု ချမှတ်​ပေး​ခဲ့

[စာမျက်နှာ ၁၆ ပါ ရုပ်ပုံ]

သက်သေခံ​လူငယ်​ထောင်ပေါင်း​များစွာ​သည် အချိန်ပြည့်​ခရစ်ယာန်​ဓမ္မ​အမှု​တွင် ဝမ်းမြောက်​စွာ ပါဝင်​နေကြ

[Picture Credit Line on page 12]

UN PHOTO 186226/M. Grafman