ရောင့်ရဲသောစိတ်၏ လျှို့ဝှက်ချက်ကိုသင်ယူခြင်း
ရောင့်ရဲသောစိတ်၏ လျှို့ဝှက်ချက်ကိုသင်ယူခြင်း
ဖိလိပ္ပိအသင်းတော်ရှိ ခရစ်ယာန်များထံ အားပေးစာတွင် တမန်တော်ပေါလုက ဤသို့ရေးသားခဲ့သည်– “ငါသည်တွေ့ ကြုံသမျှသောအခြင်းအရာတို့၌ ရောင့်ရဲသောစိတ်ရှိအံ့သောငှာ သင်မိပြီ။ . . . ဝစွာစားခြင်း၊ မွတ်သိပ်ခြင်း၊ စည်းစိမ်ရှိခြင်း၊ ဆင်းရဲခြင်းတို့ကိုခံရအံ့သောငှာ၊ အရပ်ရပ်တို့တွင် အရာရာ၌သင်မိပြီ။”—ဖိလိပ္ပိ ၄:၁၁၊ ၁၂။
ပေါလု၏ရောင့်ရဲသောစိတ်လျှို့ဝှက်ချက်ကား အဘယ်နည်း။ ကျွန်ုပ်တို့ခေတ်၏ လူနေမှုစရိတ်စက မြင့်မားခြင်းနှင့် စီးပွားရေးအခြေအနေ မတည်ငြိမ်ခြင်းတို့ကို ထောက်ထား၍ ခရစ်ယာန်စစ်များအနေနှင့် ရောင့်ရဲသောစိတ်ရှိလျှင် အမှန်ပင်အကျိုးရှိလိမ့်မည်၊ သို့မှသာ ဘုရားသခင့်လုပ်ငန်းတော်ကို သူတို့ ဆက်အာရုံစိုက်နိုင်ကြမည်။
ပေါလု၏စာအစပိုင်းတွင် သူ၏ ယခင်အသက်မွေးမှုလုပ်ငန်း အောင်မြင်ခြင်းအကြောင်းကို ဤသို့ဖော်ပြသည်– “အခြားသူမည်သည်ကား၊ ဇာတိ၌ကိုးစားစရာအကြောင်းရှိသည်ဟုထင်လျှင်၊ ငါမူကား သာ၍ရှိ၏။ ငါသည် ရှစ်ရက်မြောက်သောနေ့၌ အရေဖျားလှီးခြင်းကိုခံရ၏။ ဣသရေလအမျိုး ဗင်ယာမိန်အနွယ်ဖြစ်၏။ ဟေဗြဲလူမှဆင်းသက်သော ဟေဗြဲလူစစ်ဖြစ်၏။ တရားအားဖြင့် ဖာရိရှဲဖြစ်၏။ စိတ်အားကြီးခြင်းကိုမေးသော်၊ ငါသည် အသင်းတော်ကို ညှဉ်းဆဲသောသူဖြစ်၏။ ပညတ်တရားအားဖြင့်ရသော ဖြောင့်မတ်ခြင်းကိုမေးပြန်သော်၊ ငါသည် အပြစ်တင်ခွင့်နှင့် ကင်းလွတ်သောသူဖြစ်၏။” (ဖိလိပ္ပိ ၃:၄-၆) ထိုမျှမက စိတ်အားထက်သန်သူ ဂျူးတစ်ဦးအနေဖြင့် ပေါလုသည် ယေရုရှလင်မြို့ရှိ ယဇ်ပုရောဟိတ်အကြီးထံမှ တာဝန်ရထား၏၊ သူတို့၏ကျောထောက်နောက်ခံပြုမှုကို လက်ခံရရှိထား၏။ ဤအရာအားလုံးတို့က ဂျူးစနစ်ရှိ နိုင်ငံရေး၊ ဘာသာရေး၊ ငွေရေးကြေးရေးကဏ္ဍတို့တွင် အခွင့်အာဏာနှင့် ဂုဏ်သတင်းကြီးဖို့အကြောင်း သူ၌ရှိစေသည်။—တမန်တော် ၂၆:၁၀၊ ၁၂။
သို့သော် ပေါလုသည် ဇွဲရှိသောခရစ်ယာန်ဓမ္မအမှုဆောင်တစ်ဦးဖြစ်လာသည့်အခါ အစစအရာရာ အကြီးအကျယ်ပြောင်းလဲသွားသည်။ သတင်းကောင်းအတွက်ကြောင့် သူ၏အောင်မြင်သောအသက်မွေးမှုလုပ်ငန်းနှင့် အရေးပါသည်ဟု ယခင်ယူမှတ်ထားရာမှန်သမျှကို သူတလိုတလားစွန့်လွှတ်ခဲ့သည်။ (ဖိလိပ္ပိ ၃:၇၊ ၈) ယခု သူသည် မိမိကိုယ်ကို မည်သို့ထောက်ပံ့တော့မည်နည်း။ ခရစ်ယာန်ဓမ္မအမှုဆောင်တစ်ဦးအနေဖြင့် လုပ်ခများရရှိမည်လော။ သူ၏ကိုယ်ရေးကိုယ်တာလိုအပ်ရာများကို မည်သို့ဖြည့်ဆည်းပေးမည်နည်း။
ပေါလုသည် မိမိ၏ခရစ်ယာန်ဓမ္မအမှုကို အခကြေးငွေလုံးဝမယူဘဲ လုပ်ဆောင်ခဲ့သည်။ သူစေစားသူတို့ကို မနှောင့်ယှက်လို၍ ကောရိန္သုမြို့တွင်ရှိစဉ် အာကုလ၊ ပြစ်ကိလတို့နှင့်အတူ တဲရှင်ချုပ်ပြီး ကိုယ့်ကိုယ်ကိုထောက်ပံ့ခဲ့သည့်အပြင် အခြားအမှုများကိုလည်း လုပ်ဆောင်ခဲ့သည်။ (တမန်တော် ၁၈:၁-၃; ၁ သက်သာလောနိတ် ၂:၉; ၂ သက်သာလောနိတ် ၃:၈-၁၀) ပေါလုသည် ရပ်ဝေးသို့သွား၍ သုံးကြိမ်တိုင် လှည့်လည်သာသနာပြုခဲ့ပြီး ပြန်လည်ပတ်ရန်လိုသော အသင်းတော်များထံလည်း သူပြန်သွားခဲ့၏။ ဘုရားသခင့်အမှုတော်တွင် သူအချိန်ပြည့်အလုပ်များနေသောကြောင့် သူ၌ ပိုင်ဆိုင်ရာအနည်းအကျဉ်းသာရှိသည်။ များသောအားဖြင့် သူ၏လိုအပ်ရာများကို ညီအစ်ကိုများက ထောက်ပံ့ကူညီပေးသည်။ သို့သော် တစ်ခါတစ်ရံ အခွင့်မသာသောကြောင့် ချို့တဲ့နွမ်းပါး ဆင်းရဲခဲ့သည်။ (၂ ကောရိန္သု ၁၁:၂၇; ဖိလိပ္ပိ ၄:၁၅-၁၈) ထိုသို့ဖြစ်သည့်တိုင် ပေါလုသည် မိမိ၏အဖြစ်ဆိုးအကြောင်း တစ်ခါမျှ ညည်းညူခြင်းမရှိ၊ အခြားသူ၏ဥစ္စာကို လိုချင်မက်မောခြင်းမရှိခဲ့ချေ။ ခရစ်ယာန်ချင်းတို့၏အကျိုးကို သူတလိုတလားနှင့် ပျော်ရွှင်စွာဆောင်ရွက်ခဲ့သည်။ အမှန်သော် ယေရှု၏ကျော်ကြားလှသော ဤမိန့်တော်မူချက်ကို ပေါလုကိုးကားပြောဆိုခဲ့၏– “ခံယူခြင်းအရာထက် ပေးကမ်းခြင်းအရာသည် သာ၍မင်္ဂလာရှိသည်။” ကျွန်ုပ်တို့အားလုံးအတွက် အထူးကောင်းမွန်သောပုံသက်သေတစ်ရပ်ပါတကား!—တမန်တော် ၂၀:၃၃-၃၅၊ သမ္မာ။
ရောင့်ရဲသောစိတ်၏အဓိပ္ပာယ်
ပေါလုသည် ပျော်ရွှင်မှုရှိပြီး စိတ်ကျေနပ်ခဲ့ရသည့် အဓိကအချက်မှာ သူ၏ရောင့်ရဲသောစိတ်ကြောင့်ပင်ဖြစ်သည်။ သို့သော် ရောင့်ရဲခြင်းရှိ၏ဟုဆိုရာ၌ အဘယ်အရာကိုဆိုလိုသနည်း။ ရိုးရိုးပြောရလျှင် အခြေခံလိုအပ်ရာများဖြင့် ရောင့်ရဲတင်းတိမ်ခြင်းဖြစ်သည်။ ၎င်းနှင့်စပ်လျဉ်း၍ သူ၏ခရစ်ယာန်ဓမ္မအမှုလုပ်ဖော်ဆောင်ဖက် တိမောသေအား ပေါလု ဤသို့ပြောခဲ့သည်– “ရောင့်ရဲသောစိတ်ပါလျှင်၊ ဘုရား[သခင်]ဝတ်၌မွေ့လျော်ခြင်းသည် ကြီးစွာသောအကျိုးစီးပွားမှန်၏။ အကြောင်းမူကား၊ ငါတို့သည် ဤလောကထဲသို့ အဘယ်အရာမျှမပါဘဲလာသည်ဖြစ်၍ ထွက်သွားလျှင်လည်း အဘယ်အရာကိုမျှယူ၍မသွားနိုင်ဟု ထင်ရှားလျက်ရှိ၏။ သို့ဖြစ်၍၊ စားရန်၊ ဝတ်ရန်ရှိသမျှနှင့် ရောင့်ရဲလျက်နေကြကုန်အံ့။”—၁ တိမောသေ ၆:၆-၈။
ရောင့်ရဲသောစိတ်ကို ဘုရားသခင်ဝတ်၌မွေ့လျော်ခြင်းနှင့် ပေါလုဆက်စပ်ဖော်ပြထားကြောင်းသတိပြုပါ။ စစ်မှန်သောပျော်ရွှင်မှုသည် ဘုရားသခင်ရေးရာမွေ့လျော်ခြင်းမှလာကြောင်း၊ ယင်းကို ရုပ်ပစ္စည်းပိုင်ဆိုင်မှု သို့မဟုတ် ကြွယ်ဝချမ်းသာမှုမှ ရသည်မဟုတ်ဘဲ ကျွန်ုပ်တို့ထမ်းဆောင်နေသည့် ဘုရားသခင့်အမှုတော်ကို ဦးစားထားလုပ်ဆောင်ခြင်းမှရကြောင်း သူအသိအမှတ်ပြုခဲ့သည်။ “စားရန်၊ဝတ်ရန်” တို့မှာ ဘုရားသခင့်ရေးရာမွေ့လျော်မှုကို သူဆက်လက်ဆောင်ရွက်စေဖို့ အကြောင်းရင်းဖြစ်ခဲ့သည်။ သို့နှင့် ပေါလုအတွက် ရောင့်ရဲသောစိတ်ရှိခြင်း၏လျှို့ဝှက်ချက်မှာ အခြေအနေ မည်သို့ပင်ရှိနေပါစေ ယေဟောဝါကိုအားကိုးခြင်းဖြစ်သည်။
ယနေ့ လူများစွာသည် စိုးရိမ်ပူပန်၍ ပျော်ရွှင်မှုကင်းမဲ့ရသည့်အကြောင်းမှာ ထိုလျှို့ဝှက်ချက်ကို သတိမမူ၊ လျစ်လျူရှုသောကြောင့်ဖြစ်သည်။ ရောင့်ရဲသောစိတ်ကိုမွေးမြူမည့်အစား သူတို့သည် ငွေကြေးနှင့် ငွေကြေးဖြင့်ဝယ်ယူနိုင်သောအရာများအပေါ် ယုံကြည်ကိုးစားရန် အလိုရှိကြသည်။ ကြော်ငြာလုပ်ငန်းနှင့် စာနယ်ဇင်းများက လူတို့သည် သူတို့၌ နောက်ဆုံးပေါ်နှင့် အရည်အသွေးမြင့်မားသော အဆန်းပြားဆုံးကုန်ပစ္စည်းများမရှိလျှင်၊ ၎င်းတို့ကို ချက်ချင်းမရလျှင် ပျော်ရွှင်နိုင်မည်မဟုတ်ဟု ခံစားရစေသည်။ ထို့ကြောင့် များစွာတို့သည် ငွေကြေးနှင့် ရုပ်ပစ္စည်းလိုက်စားသည့်ဘဝမျိုးတွင် ကျော့မိသွားကြလေ၏။ ပျော်ရွှင်မှုနှင့် စိတ်ကျေနပ်မှုရရှိမည့်အစား သူတို့သည် “အပြစ်သွေးဆောင်ခြင်း၊ ဖမ်းမိခြင်း၊ မိုက်မဲဖျက်ဆီးတတ်သောတပ်မက်ခြင်းများထဲသို့ ကျရောက်တတ်ကြ၏။ ထိုသူတို့အားဖြင့် လူတို့သည် အကျိုးနည်းခြင်း၊ ပျက်စီးခြင်း၌နစ်မွန်းတတ်ကြ၏။”—၁ တိမောသေ ၆:၉၊ ၁၀။
လျှို့ဝှက်ချက်ကို သိလာကြသူများ
ဤခေတ်ကာလတွင် ဘုရားသခင့်ရေးရာမွေ့လျော်ခြင်းနှင့် ရောင့်ရဲသောစိတ်ရှိရှိနှင့် နေထိုင်ခြင်းအားဖြင့် ပျော်ရွှင်မှုနှင့် စိတ်ကျေနပ်မှု အမှန်တကယ်ရရှိနိုင်ပါမည်လော။ ရနိုင်ပါသည်။ အမှန်မှာ ယနေ့ သန်းနှင့်ချီသူတို့သည် ထိုအတိုင်းပြုလုပ်နေကြပြီ။ မိမိတို့တွင်ရှိသော ပစ္စည်းတို့ဖြင့် ပျော်ရွှင်သည့်လျှို့ဝှက်ချက်ကို သူတို့ သိလာကြပြီ။ ထိုသူတို့သည် ဘုရားသခင်ထံ မိမိတို့ကိုယ်ကိုဆက်ကပ်အပ်နှံထားပြီး ကိုယ်တော်၏အလိုတော်ကို ဆောင်ရွက်နေကြသည်၊ နေရာတကာတွင် လူတို့အား ကိုယ်တော့်ရည်ရွယ်တော်မူချက်ကို သွန်သင်ပေးနေကြသည့် ယေဟောဝါသက်သေများဖြစ်ကြသည်။
ဥပမာအနေဖြင့် ဘုရားသခင့်နိုင်ငံတော်သတင်းကောင်းကြွေးကြော်ရန် စေတနာ့ဝန်ထမ်းများအဖြစ် လေ့ကျင့်ယူပြီး အကျွမ်းတဝင်မရှိသောနိုင်ငံများသို့ ခရစ်ယာန်သာသနာပြုများအဖြစ် စေလွှတ်ခံရသူတို့ကို စဉ်းစားကြည့်ပါ။ (မဿဲ ၂၄:၁၄) မကြာခဏဆိုသလို သူတို့စေလွှတ်ခံရသောနိုင်ငံများရှိ လူနေမှုအခြေအနေမှာ သူတို့နေထိုင်နေကျနေရာလောက် မတိုးတက်မကြွယ်ဝပေ။ ဥပမာ၊ အာရှနိုင်ငံတစ်နိုင်ငံသို့ ခရစ်ယာန်သာသနာပြုများ ရောက်ရှိခါစဖြစ်သည့် ၁၉၄၇ ခုနှစ်အစောပိုင်းတွင် စစ်၏ဆိုးကျိုးများကို အထင်အရှားတွေ့မြင်ရဆဲဖြစ်ပြီး လျှပ်စစ်မီးရှိသည့်အိမ် အနည်းငယ်သာရှိသည်။ နိုင်ငံအတော်များများတွင် အဝတ်လျှော်စက်ဖြင့် အဝတ်လျှော်ဖွပ်မည့်အစား အဝတ်ဖွပ်သစ်သားခုံပေါ်တွင်ဖြစ်စေ၊ မြစ်နားရှိကျောက်တုံးများပေါ်တွင်ဖြစ်စေ တစ်ထည်ချင်းစီ လျှော်ဖွပ်ကြရကြောင်း ခရစ်ယာန်သာသနာပြုများ တွေ့မြင်ခဲ့ကြရသည်။ သို့သော် သူတို့သည် သမ္မာကျမ်းစာအမှန်တရားကို လူတို့အားသွန်သင်ပေးရန် ရောက်လာကြရာ ဒေသခံအခြေအနေများနှင့် လိုက်လျောညီထွေနေတတ်ရန်ကြိုးစားပြီး ခရစ်ယာန်ဓမ္မအမှုတွင် အလုပ်များနေကြတော့သည်။
အခြားသူတို့မူ ဓမ္မအမှုကို အချိန်ပြည့်ထမ်းဆောင်နေ၏၊ တချို့မှာ သတင်းကောင်းမရောက်ရှိသေးသော နယ်မြေများသို့ ရွှေ့ပြောင်းနေထိုင်ခဲ့ကြပြီ။ အက်ဒုလ်ဖိုသည် မက္ကဆီကိုရှိ ဒေသအသီးသီးတွင် အချိန်ပြည့်ဓမ္မအမှုဆောင်အဖြစ် နှစ်ပေါင်း ၅၀ ကျော် အမှုထမ်းဆောင်ခဲ့ပြီ။ သူက ဤသို့ပြောပြသည်– “တမန်တော်ပေါလုလိုပဲ ကျွန်တော့်ဇနီးနဲ့ ကျွန်တော်ဟာ အခြေအနေတွေနဲ့ လိုက်လျောညီထွေနေထိုင်တတ်လာခဲ့ကြတယ်။ ဥပမာ၊ ကျွန်တော်တို့ရောက်ခဲ့တဲ့ အသင်းတော်တစ်ခုဟာ မြို့နဲ့လည်းမနီး၊ ဈေးနဲ့လည်း အတော့်ကိုဝေးတယ်။ အစာစားတိုင်း ညီအစ်ကိုတွေဟာ မက္ကဆီကိုချပါတီတစ်ချပ်ကို ဝက်ဆီနည်းနည်းသုတ်၊ ဆားဖြူးစားပြီး၊ ကော်ဖီတစ်ခွက်သောက်ရုံနဲ့ပဲ တင်းတိမ်ရကြတယ်။ စားစရာရယ်လို့၊ တစ်နေ့ မက္ကဆီကိုချပါတီသုံးချပ်ပဲ။ ကျွန်တော်တို့လည်း အဲ့ဒီကညီအစ်ကိုတွေလို နေတတ်လာတယ်။ ယေဟောဝါအမှုတော်ကို အချိန်ပြည့်ထမ်းဆောင်ခဲ့တဲ့ နှစ်ပေါင်း ၅၄ နှစ်အတွင်းမှာ ဒီလိုတွေ့ကြုံမှုမျိုးတွေ ကျွန်တော်ရရှိခဲ့တယ်။”
ဖလိုရန်တီနိုနှင့် သူ၏မိသားစုသည် ခက်ခဲသောအခြေအနေများတွင် လိုက်လျောညီထွေ နေထိုင်တတ်လာခဲ့ပုံကို သတိရသည်။ ငယ်စဉ်ဘဝကိုပြန်သတိရ၍ သူဤသို့ပြောပြသည်– “ကျွန်တော့်အဖေဟာ ကြွယ်ဝချမ်းသာတဲ့ ကုန်သည်ကြီးပါ။ ခြံမြေအတော်များများပိုင်တယ်။ ကျွန်တော်တို့ပိုင်ခဲ့တဲ့ ကုန်ခြောက်ဆိုင်ကောင်တာကို ကျွန်တော်သတိရနေတုန်းပဲ။ အဲ့ဒီမှာ လက်မ ၂၀ အကျယ်ရှိပြီး ဇောက်အနက် ၈ လက်မ၊ အကန့်လေးကန့်ရှိတဲ့ အံဆွဲတစ်ခုရှိတယ်။ အဲဒီအံဆွဲထဲ တစ်နေ့တာရောင်းရငွေအားလုံးကို ထည့်တယ်။ တစ်နေ့တာကုန်တိုင်း အဲ့ဒီအံဆွဲဟာ ငွေဒ င်္ဂါးတွေ၊ ငွေစက္ကူတွေနဲ့ အမြဲပြည့်လျှံနေတာပဲ။
“ဒါပေမဲ့ ရုတ်တရက်ပဲ ကျွန်တော်တို့ စီးပွားရေးကျရှုံးသွားခဲ့တယ်၊ ကုံလုံကြွယ်ဝ လိုတရဘဝကနေ ချို့တဲ့လိုအပ်နေတဲ့ဘဝကို ရောက်သွားတယ်။ အိမ်ကလွဲလို့ ကျန်တာအားလုံး ဆုံးရှုံးသွားတယ်။ ဒီအပြင် ကျွန်တော့်ရဲ့အစ်ကိုတစ်ယောက်က မတော်တဆမှုဖြစ်ပြီး ကိုယ်အောက်ပိုင်းသေသွားသေးတယ်။ အခြေအနေလုံးဝပြောင်းသွားတယ်။ တစ်ခဏလောက် ကျွန်တော် အသီးအနှံနဲ့ အသားငါးရောင်းလိုက်သေးတယ်။ ဝါဂွမ်း၊ စပျစ်သီး၊ လူဆန်းပဲပင်တွေ ဆွတ်ခူးနုတ်ခဲ့ရတဲ့အပြင် လယ်ယာတွေထဲ ရေသွင်းပေးခဲ့သေးတယ်။ ဒါကြောင့် တချို့က ကျွန်တော့်ကို ဟိုစပ်စပ် ဒီစပ်စပ်လုပ်တတ်တဲ့လူလို့ ခေါ်ကြတယ်။ အမေကတော့ ကျွန်တော်တို့မှာ အမှန်တရားရှိတယ်၊ အဲ့ဒီဝိညာဉ်ရေးကြွယ်ဝချမ်းသာမှု ရှိတဲ့လူ အရမ်းနည်းတယ်လို့ပြောပြီး နှစ်သိမ့်ပေးလေ့ရှိတယ်။ ဒါကြောင့် ကျွန်တော်ဟာ ကြွယ်ဝချမ်းသာခဲ့ဖူးသလို အနည်းငယ်သာ ဒါမှမဟုတ် ဘာမှမရှိဘဲလည်း နေတတ်လာတယ်။ အခုဆိုရင် ယေဟောဝါအမှုတော်ကို ၂၅ နှစ်ခန့်အချိန်ပြည့်အမှုဆောင်ခဲ့ပြီ၊ ဘဝရဲ့အကောင်းဆုံးလမ်းစဉ်ဖြစ်တဲ့ ယေဟောဝါအမှုတော်ကို အချိန်ပြည့်ဆောင်ရွက်ဖို့ရွေးချယ်ခဲ့လို့ တစ်နေ့ပြီးတစ်နေ့ ကောင်းချီးတွေခံစားနေရတယ်လို့ ပြောနိုင်ပါတယ်။”
“ဤလောက၏အဆင်းသဏ္ဌာန်သည် ရွေ့သွားကွယ်ပျောက်တတ်၏” ဟူ၍ သမ္မာကျမ်းစာက အတိအလင်းဆိုသည်။ ထို့ကြောင့် ကျွန်ုပ်တို့ကို ဤသို့တိုက်တွန်းထားသည်– “ဝမ်းမြောက်သောသူသည် ဝမ်းမမြောက်သကဲ့သို့ဖြစ်[စေ]ရမည်။ ဥစ္စာဝယ်သောသူသည် အလျှင်းမရှိသကဲ့သို့ဖြစ်ရမည်။ ဤလောကကိုသုံးသောသူသည် မသုံးသကဲ့သို့ဖြစ်ရမည်။”—၁ ကောရိန္သု ၇:၂၉-၃၁။
သို့ဖြစ်၍ ယခုအချိန်သည် သင်၏အသက်တာလမ်းစဉ်ကို ဆန်းစစ်ရမည့်အချိန်ဖြစ်သည်။ သင့်မှာ များများစားစားမရှိလျှင် စိတ်အနှောင့်အယှက်မဖြစ်ပါနှင့်၊ စိတ်နာခြင်း၊ မနာလိုငြူစူခြင်းမရှိစေရန် သတိပြုပါ။ အခြားတစ်ဖက်တွင်မူ သင်၌ စည်းစိမ်ဥစ္စာရှိပါက ၎င်းတို့အပေါ် ပညာရှိရှိ အမြင်မှန်ထားပါ၊ စည်းစိမ်၏ ကြီးစိုးလွှမ်းမိုးမှုမခံပါနှင့်။ တမန်တော်ပေါလုသတိပေးသကဲ့သို့ အရာအားလုံးတွင် သင်၏မျှော်လင့်ခြင်း၌ “မမြဲသောစည်းစိမ်ကိုမကိုးစားဘဲ၊ ငါတို့ခံစားဖို့ရာအလုံးစုံတို့ကို ကြွယ်ဝစွာပေးသနားတော်မူသော၊ အသက်ရှင်တော်မူသောဘုရားသခင်ကို ကိုးစားရမည်။” ထိုသို့သင်ပြုမည်ဆိုလျှင် အသင်သည် ရောင့်ရဲသောစိတ်၏လျှို့ဝှက်ချက်ကို သင်ယူခဲ့ပြီဟု ဆိုနိုင်မည်။—၁ တိမောသေ ၆:၁၇-၁၉။
[စာမျက်နှာ ၉ ပါ ရုပ်ပုံ]
အခြားသူတို့အတွက် ဝန်မဖြစ်စေရန် ပေါလုသည် မိမိလက်ဖြင့်လုပ်ဆောင်ခဲ့
[စာမျက်နှာ ၁၀ ပါ ရုပ်ပုံ]
‘ရောင့်ရဲသောစိတ်နှင့် ဘုရားသခင်ဝတ်၌မွေ့လျော်ခြင်း’ ဖြင့် ထောင်နှင့်ချီသောသူတို့ ပျော်ရွှင်မှုရရှိနေကြပြီ