ကိုရီးယားနိုင်ငံတွင် ထူးခြားသောဘာသာစကားအုပ်စု၌ အမှုဆောင်ခြင်း
ကိုရီးယားနိုင်ငံတွင် ထူးခြားသောဘာသာစကားအုပ်စု၌ အမှုဆောင်ခြင်း
၁၉၉၇ ခုနှစ်၊ နွေရာသီတွင် အလွန်ထက်သန်ကြငြား ပို၍တိတ်ဆိတ်နေသော အုပ်စုတစ်စုသည် ယေဟောဝါသက်သေများ၏ ခရိုင်စည်းဝေးကြီးတစ်ခုတွင် စုရုံးခဲ့ကြသည်။ ဤစည်းဝေးကြီးသည် နားမကြားသူများနှင့် အကြားအာရုံချို့ယွင်းသူများအတွက် ကိုရီးယားနိုင်ငံ၌ ပထမဦးဆုံးအကြိမ်ကျင်းပသော စည်းဝေးကြီးဖြစ်သည်။ အများဆုံးတက်ရောက်သူ ၁,၁၇၄ ဦးရှိခဲ့သည်။ ဟောပြောချက်များ၊ လူတွေ့မေးမြန်းခန်းများနှင့် ပြဇာတ်အပါအဝင် အစီအစဉ်တစ်ခုလုံးကို ကိုရီးယားလက်ဟန်ပြဘာသာစကားဖြင့် တင်ဆက်ပြီး စည်းဝေးပွဲခန်းမတစ်ခုလုံးမှ မြင်တွေ့နိုင်သော ပိတ်ကားကြီးပေါ် ပုံထိုးပြခဲ့ကြသည်။ ယင်းသည် စေတနာ့ဝန်ထမ်းများ၏ နှစ်ချီကြိုးပမ်းအားထုတ်မှု အကျိုးရလဒ်ဖြစ်သည်။
မြေကြီးပရဒိသုတွင် “နားပင်းသောသူတို့သည် နားပင်းခြင်းနှင့်လွတ်” မည့်အချိန် ရောက်လာပါလိမ့်မည်။ (ဟေရှာယ ၃၅:၅) ထိုပရဒိသုတွင် အသက်ရှင်လိုလျှင် နားမကြားသူများအပါအဝင် လူတိုင်းသည် ဝိညာဉ်ရေးပရဒိသုအတွင်းသို့ ဦးဆုံးဝင်ရောက်ရမည်၊ ယင်းကား ဘုရားသခင့်ကောင်းချီးခံစားရသော လူမျိုးတော်၏ ကြွယ်ဝသည့်ဝိညာဉ်ရေးအခြေအနေဖြစ်သည်။ သူတို့သည် ယေဟောဝါ၏ ဆက်ကပ်အပ်နှံ၊ နှစ်ခြင်းခံပြီးသား သက်သေများဖြစ်လာကြပြီး ကိုယ်တော်၏သွန်သင်မှုကို ခံယူကြရမည်။—မိက္ခာ ၄:၁-၄။
လူနည်းစုနှင့်စတင်ခြင်း
၁၉၆၀ ပြည့်လွန်နှစ်များတွင် နားမကြားသူများကို အနည်းအကျဉ်းဟောပြောခဲ့သော်လည်း ၁၉၇၀ ပြည့်လွန်နှစ်များတိုင်မှသာ သူတို့ထဲမှ အချို့သည် ကိုရီးယားနိုင်ငံ၏မြို့တော် ဆိုးလ်တွင် ယေဟောဝါသက်သေများ၏အစည်းအဝေးများကို စတင်တက်ရောက်ခဲ့ကြသည်။ စာအမြန်ရေးနိုင်သော ခရစ်ယာန်ညီအစ်ကိုတစ်ဦးက ဟောပြောချက်များ၏ အဓိကအချက်များနှင့် အသုံးပြုသောကျမ်းချက်များကို သင်ပုန်းပေါ် ရေးချပြခဲ့သည်။
၁၉၇၁ ခုနှစ်၌ ထီဂျွန်မြို့တွင် သက်သေခံတစ်ဦးသည် နားလေးသော သားဖြစ်သူနှင့် သူ၏မိတ်ဆွေများကို ဘုရားသခင့်နိုင်ငံတော်သတင်းတရားအကြောင်း စသွန်သင်ပေးခဲ့သည်။ ၎င်းအုပ်စုမှ စိတ်ထက်သန်သူများစွာ ထွက်ပေါ်လာပြီး ယခုအခါ သူတို့သည် လက်ဟန်ပြဘာသာစကားလယ်ကွင်းတွင် အဓိကအမာခံများအဖြစ် အမှုထမ်းနေကြသည်။—ဇာခရိ ၄:၁၀။
လူငယ်များ မိမိတို့ကိုယ်ကို စိတ်ရောကိုယ်ပါပေးဆက်ကြ
နားမကြားသူများသည် ယေဟောဝါ၊ ယေရှုတို့နှင့်ဆိုင်သော အသိပညာကိုခံယူပြီး အသက်လမ်းပေါ်လျှောက်ဖို့ဆိုလျှင် နောက်ထပ်စေတနာ့ဝန်ထမ်းများထွက်လာပြီး အတော်ပင်ကြိုးပမ်းကြဖို့လိုပေမည်။ (ယောဟန် ၁၇:၃) ဤသို့ဖြစ်လာရန် ယေဟောဝါသက်သေအတော်များများသည် လက်ဟန်ပြဘာသာစကားကို သင်ယူခဲ့ကြပြီး အားရှိစရာတွေ့ကြုံမှုများရရှိနေကြသည်။
အသက် ၁၅ နှစ်အရွယ် ပတ်အင်စံသည် လက်ဟန်ပြဘာသာစကားသင်ယူဖို့ ပန်းတိုင်ထားခဲ့သည်။ ထိုဘာသာစကားကိုသင်ယူနိုင်ရန် သူသည် နားမကြားသူအယောက် ၂၀ ရှိသည့် စက်ရုံတစ်ခုတွင် အလုပ်သင်တစ်ဦးအဖြစ် အလုပ်ဝင်လုပ်ခဲ့သည်။ နားမကြားသူတို့၏ဘာသာစကားနှင့် သူတို့စဉ်းစားတွေးတောပုံကို နားလည်ရန် သူတို့နှင့်ရှစ်လကြာ အနီးကပ်အလုပ်လုပ်ခဲ့သည်။ နောက်တစ်နှစ်တွင် သူသည် မှန်မှန်ရှေ့ဆောင် သို့မဟုတ် အချိန်ပြည့်ဘုရားသခင့်နိုင်ငံတော်ကြွေးကြော်သူတစ်ဦးဖြစ်လာပြီး ကျမ်းစာအမှန်တရားကို စိတ်ဝင်စားသော နားမကြားသူအုပ်စုတစ်စုနှင့်အတူ အမှုဆောင်ခဲ့သည်။ ထိုအုပ်စုသည် အလျင်အမြန်တိုးတက်လာပြီး မကြာမီပင် တနင်္ဂနွေနေ့အစည်းအဝေးများကို ၃၅ ယောက်ကျော် တက်ရောက်ခဲ့သည်။—ဆာလံ ၁၁၀:၃။
ထို့နောက် ဆိုးလ်မြို့တွင် လက်ဟန်ပြဘာသာစကားဖြင့် ခရစ်ယာန်အစည်းအဝေးများကို ဦးဆုံးအကြိမ် သီးသန့်ကျင်းပလေသည်။ ညီအစ်ကိုပတ်အင်စံသည် ဤတိုးတက်ကြီးမားနေသောအုပ်စုတွင် အထူးရှေ့ဆောင်တစ်ဦးအဖြစ် အမှုထမ်းခဲ့သည်။ ထိုအချိန်တွင် လက်ဟန်ပြဘာသာစကားကို သူကျွမ်းကျင်စွာတတ်နေလေပြီ။ အချို့လများတွင် သူသည် နားမကြားသူများနှင့် အိမ်တွင်းကျမ်းစာသင်အံမှု ၂၈ ခုပင်ကျင်းပနိုင်ခဲ့သည်။ ထိုသူအများစုသည် တိုးတက်လာခဲ့ကြပြီး ယေဟောဝါသက်သေများဖြစ်လာကြသည်။
အလွန်တက်ကြွသော ဤစေတနာ့ဝန်ထမ်းလုပ်ငန်းကြောင့် ၁၉၇၆ ခုနှစ်၊ အောက်တိုဘာလတွင် ကြေညာသူ ၄၀ နှင့် မှန်မှန်ရှေ့ဆောင် ၂ ဦးဖြင့် ပထမဆုံး လက်ဟန်ပြဘာသာစကားအသင်းတော်ကို ဆိုးလ်မြို့၌ တည်ထောင်ခဲ့ကြသည်။ ယင်းကြောင့် ကိုရီးယားနိုင်ငံရှိ အခြားမြို့များ၌လည်း ထိုသို့လုပ်ဆောင်ရန် အားမာန်တက်စေခဲ့သည်။ နားမကြားသူများစွာသည် သတင်းကောင်းကို ဆာငတ်နေကြပြီး သူတို့ထံ လည်ပတ်လာချိန်ကို စောင့်မျှော်နေကြ၏။
နားမကြားသူတို့အလယ်၌ အမှုတော်ဆောင်ခြင်း
နားမကြားသူတို့ကို မည်သို့ရှာတွေ့သည်ကို သိလိုကြပေမည်။ တစ်ဆင့်မိတ်ဆက်ပေးခြင်းအားဖြင့် အတော်များများနှင့် ဆက်မိခဲ့သည်။ ထို့ပြင် ဒေသခံဆန်ဆိုင်ပိုင်ရှင်များထံချဉ်းကပ် မေးမြန်းခဲ့ရာ နားမကြားသူများ၏အမည်နှင့် လိပ်စာများကိုရရှိခဲ့ကြသည်။ အစိုးရရုံးအချို့မှလည်း လိုအပ်သောသတင်းအချက်အလက်ရခဲ့ကြသည်။ နားမကြားသူများနေထိုင်သောရပ်ကွက်တွင် စေ့စေ့ငှငှသက်သေခံခြင်းသည် အလွန်အောင်မြင်သဖြင့် အချိန်တန်သော် လက်ဟန်ပြဘာသာစကားအသင်းတော်လေးခုကို တည်ထောင်နိုင်ခဲ့ကြသည်။ လက်ဟန်ပြဘာသာစကားကိုသင်ယူကြရန် ခရစ်ယာန်လူငယ်များစွာကို အားပေးတိုက်တွန်းခဲ့သည်။
ယေဟောဝါသက်သေများ၏ ဌာနခွဲရုံးက လက်ဟန်ပြဘာသာစကားသင်ယူထားသော အထူးရှေ့ဆောင်ဓမ္မအမှုဆောင်သူများကို ထိုအသင်းတော်များ၌ တာဝန်ခန့်အပ်ပေးခဲ့သည်။ မကြာသေးမီကလည်း ဓမ္မအမှုသင်တန်းကျောင်းဆင်းများကို ၎င်းအသင်းတော်များ၌ တာဝန်ခန့်အပ်ခဲ့ရာ ၎င်းတို့ကို ဝိညာဉ်ရေးဘက် များစွာအားပေးတည်ဆောက်ခဲ့ပြီ။
ရင်ဆိုင်ကျော်လွှားရကြမည့် အခက်အခဲများ အမှန်ရှိပါသည်။ ဤရပ်ကွက်တွင်အမှုဆောင်ကြရန် နားမကြားသူများ၏ယဉ်ကျေးမှုကို နားလည်အောင် ကြိုးစားအားထုတ်ဖို့လိုသည်။ သူတို့သည် အတွေးအခေါ်နှင့် အပြုအမူတွင် အလွန်ပွင့်လင်းကြသည်။ ယင်းကြောင့် တစ်ခါတစ်ရံ မထင်မမှတ်သည့်အရာများဖြစ်တတ်ပြီး နားလည်မှုလွဲမှားစေနိုင်သည်။ ထို့အပြင် သက်သေခံများသည် နားမကြားသူများနှင့် ကျမ်းစာသင်အံမှုပြုလုပ်သောအခါ သူတို့၏ဘာသာစကားကို ကျွမ်းကျင်စွာတတ်မြောက်အောင် သင်ယူကြဖို့ ကူညီပေးရ၏၊ သူတို့၏ ကိုယ်ပိုင်ဖတ်ရှုလေ့လာခြင်းအစီအစဉ်ကို တိုးချဲ့ပြုလုပ်ရန်လည်း အားပေးရ၏။
နားမကြားသူများသည် အခြားသူများလုံးဝ မသိမြင်မခံစားရသော အခက်အခဲများကို သူတို့၏နေ့စဉ်လုပ်ငန်းဆောင်တာများတွင် ကြုံတွေ့ရကြသည်။ အစိုးရရုံးများနှင့် ကျန်းမာရေးဝန်ဆောင်မှုဌာနများတွင်သာမက သာမန်စီးပွားရေးကိစ္စများတွင်လည်း လူတို့နှင့်ဆက်သွယ်ရခြင်းသည် သူတို့အတွက် ပြဿနာကြီးများပေါ်လာလေ့ရှိသည်။ အနီးတစ်ဝိုက်အသင်းတော်များရှိ သက်သေခံများက မေတ္တာပါပါကူညီပေးမှုကြောင့် ခရစ်ယာန်အသင်းတော်ထဲရှိ နားမကြားသူများသည် စစ်မှန်သောညီအစ်ကိုအသင်းအပင်းမေတ္တာကို တွေ့ကြုံခံစားခဲ့ကြရသည်။—ယောဟန် ၁၃:၃၄၊ ၃၅။
အလွတ်သဘောသက်သေခံခြင်းမှ အကျိုးဖြစ်ထွန်းခဲ့
ကိုရီးယားနိုင်ငံ၏ တောင်ဘက် အဓိကဆိပ်ကမ်းမြို့ဖြစ်သော ဘူဆန်မြို့တွင် သက်သေခံတစ်ဦးသည် စာရွက်တစ်ရွက်ပေါ်တွင် ဤသို့ရေးသားခဲ့သော နားမကြားသူနှစ်ဦးကို တွေ့ဆုံခဲ့သည်– “ကျွန်တော်တို့ ပရဒိသုကို သဘောကျတယ်။ ထာဝရအသက်အကြောင်းဖော်ပြတဲ့ ကျမ်းချက်တွေကို ကျွန်တော်တို့သိချင်တယ်။” ထိုအခါ ညီအစ်ကိုသည် သူတို့၏လိပ်စာကိုရေးမှတ်လိုက်ပြီး သူတို့ထံလည်ပတ်ဖို့စီစဉ်ခဲ့သည်။ သူရောက်သွားသောအခါ ဘုရားသခင့်နိုင်ငံတော်သတင်းကိုနားထောင်ရန် စောင့်နေကြသော နားမကြားသူများ အခန်းအပြည့်ရှိသည်ကို တွေ့လိုက်ရသည်။ ဤတွေ့ကြုံမှုက လက်ဟန်ပြဘာသာစကားကို စတင်သင်ယူရန် သူ့ကိုလှုံ့ဆော်ပေးခဲ့သည်။ များမကြာမီပင် ဘူဆန်မြို့တွင် လက်ဟန်ပြဘာသာစကားအသင်းတော်တစ်ခု တည်ထောင်ခဲ့ရလေသည်။
ထိုအသင်းတော်မှညီအစ်ကိုတစ်ဦးသည် နားမကြားသူနှစ်ဦး တစ်ဦးကိုတစ်ဦး လက်ဟန်ပြဆက်သွယ်နေကြသည်ကို သတိပြုမိရာ သူတို့ထံချဉ်းကပ်သွားလေသည်။ သူတို့သည် ဘာသာရေးအစည်းအဝေးတစ်ခုမှ ပြန်လာခဲ့ကြောင်းသိရှိလိုက်ရာ ထိုနေ့မွန်းလွဲနှစ်နာရီတွင် ဘုရားသခင့်နိုင်ငံတော်ခန်းမ၌ကျင်းပမည့် အစည်းအဝေးသို့ ဖိတ်ခေါ်လိုက်သည်။ သူတို့လာရောက်ခဲ့ကြပြီး သူတို့နှင့် ကျမ်းစာသင်အံမှုစလိုက်သည်။ ၎င်းနောက် ထိုသူ ၂ ဦးသည် သူတို့၏နားမကြားသောမိတ်ဆွေအယောက် ၂၀ နှင့်အတူ ခရိုင်စည်းဝေးကြီးတစ်ခုကို တက်ရောက်ခဲ့ကြသည်။ ထိုအုပ်စုမှနှစ်ဦးမှာ လက်ဟန်ပြဘာသာစကားအသင်းတော်၌ အသင်းတော်အကြီးအကဲများဖြစ်လာပြီး တစ်ဦးမှာ ဓမ္မအမှုထမ်းဖြစ်လာသည်။
ဇွဲရှိမှု အကျိုးဖြစ်ထွန်း
နားမကြားသူအချို့သည် လက်ဟန်ပြဘာသာစကားအသင်းတော်နှင့် အတော်အတန်ဝေးလံသောအရပ်၌ နေထိုင်ကြသည်၊ ထို့ကြောင့် သူတို့ကို သမ္မာကျမ်းစာမှ ဝိညာဉ်အစာ မှန်မှန်ကျွေးမွေးပေးဖို့ ကြိုးပမ်းအားထုတ်မှုနှင့် ဇွဲရှိဖို့လိုသည်။ ဥပမာ၊ အသက် ၃၁ နှစ်ရှိအမျိုးသားတစ်ဦးသည် ကမ်းခြေတွင် တံငါလုပ်ငန်းဖြင့် အသက်မွေးသည်။ ယေဟောဝါသက်သေများနှင့် အဆက်အသွယ်ရရှိခဲ့သော ညီဖြစ်သူထံမှ ကျမ်းစာသတင်းတရားကို သူသိခဲ့ရသည်။ သူ၏ဝိညာဉ်ရေးဆာငတ်မှုကို ဖြည့်ဆည်းပေးဖို့ ဤနားမကြားသောတံငါသည်သည် ဆယ်မိုင်ခရီးဝေးသော ကိုရီးယားတောင်ဘက် ပင်လယ်ကမ်းရိုးတန်းရှိ ထောန်ယောန်မြို့သို့ လှေဖြင့်သွားရသည်။ မေစဲန်မြို့ရှိ လက်ဟန်ပြဘာသာစကားအသင်းတော်မှ အထူးရှေ့ဆောင်နှင့်တွေ့ဆုံဖို့ဖြစ်သည်။ ဤအထူးရှေ့ဆောင်ကိုယ်တိုင်လည်း နားမကြားသူ တံငါသည်နှင့် ကျမ်းစာသင်အံမှုပြုလုပ်ရန် တနင်္လာနေ့တိုင်း မိုင် ၄၀ ခရီးနှင်လာခဲ့ရသည်။
ဤနားမကြားသော ကျမ်းစာသင်သားသည် မေစဲန်မြို့တွင်ကျင်းပသော တနင်္ဂနွေနေ့အစည်းအဝေးကို တက်ရောက်ဖို့ လှေဖြင့် ၁၀ မိုင်၊ ထို့နောက် မိုင် ၄၀ ကိုဘတ်စကားစီးလာရသည်။ သူ၏ဇွဲ အကျိုးနပ်ခဲ့ပါသည်။ သူသည် လက်ဟန်ပြဘာသာစကားကိုလေ့လာရာတွင် လအနည်းငယ်အတွင်း တိုးတက်လာပြီး ကိုရီးယားအက္ခရာစဉ်ကိုလည်း ပိုတတ်မြောက်လာ၏၊ အရေးအကြီးဆုံးကား ယေဟောဝါနှင့် ဆက်ဆံရေးကောင်းရရှိစေသည့် တစ်ခုတည်းသောနည်းလမ်းကို သူသိရှိလာလေသည်။ အစည်းအဝေးများတက်ခြင်းနှင့် မှန်မှန်သက်သေခံခြင်းတို့၏ အရေးပါမှုကို သူအသိအမှတ်ပြုပြီး လက်ဟန်ပြဘာသာစကားအသင်းတော်ရှိ နယ်မြေသို့ ပြောင်းရွှေ့နေထိုင်ခဲ့သည်။ ဤသို့ပြုရန် သူ့အတွက် လွယ်ကူပါသလော။ မလွယ်ပါ။ တစ်လလျှင် ဒေါ်လာ ၃,၈၀၀ အသားတင်အမြတ်ရသော သူ၏တံငါလုပ်ငန်းကို စွန့်လွှတ်လိုက်ရသည်၊ သို့သော် သူ၏ဇွဲသည် သူ့ကိုအကျိုးပေး၏။ အမှန်တရားကို သူတိုးသိနားလည်လာ၍ နှစ်ခြင်းခံပြီးနောက် မိသားစုလိုက် ယေဟောဝါ၏အမှုတော်ကို ယခုပျော်ရွှင်စွာဆောင်ရွက်နေကြပါသည်။
နားမကြားသူများအတွက် ဘာသာပြန်ခြင်း
ဘုရားသခင့်နိုင်ငံတော်သတင်းကောင်းကို အများအားဖြင့် နှုတ်ဖြင့် ဖြန့်ဝေလေ့ရှိသည်။ သို့သော် သမ္မာကျမ်းစာသတင်းတရားကို လူအများ တိကျမှန်ကန်စွာ သိရှိစေရန် ကျမ်းစာသွန်သင်ချက်ကို သာ၍ကြာရှည်တည်ရှိနိုင်မည့်ပုံစံဖြင့် တင်ဆက်ပေးဖို့အရေးကြီး၏။ ထို့ကြောင့် ပထမရာစုတွင် အတွေ့အကြုံရှိသောအသက်ကြီးသူများက စာစောင်များနှင့် စာများ ရေးသားခဲ့ကြသည်။ (တမန်တော် ၁၅:၂၂-၃၁; ဧဖက် ၃:၄; ကောလောသဲ ၁:၂; ၄:၁၆) ကျွန်ုပ်တို့ခေတ်တွင် စာအုပ်စာတမ်းများနှင့် အခြားခရစ်ယာန်စာပေများအားဖြင့် ဝိညာဉ်အစာအလျှံပယ် ထုတ်လုပ်ပေးနေပါသည်။ ၎င်းတို့ကို လက်ဟန်ပြဘာသာစကားအမျိုးမျိုးအပါအဝင် ဘာသာစကား ရာနှင့်ချီသို့ ဘာသာပြန်ဆိုခဲ့ပြီ။ ကိုရီးယားလက်ဟန်ပြဘာသာစကားသို့ ဘာသာပြန်နိုင်ရန် ဌာနခွဲရုံးတွင် လက်ဟန်ပြဘာသာပြန်ဌာနတစ်ခုရှိသည်။ ဗီဒီယိုဌာနတွင် လက်ဟန်ပြဘာသာစကားဖြင့် ဗီဒီယိုအခွေများ ထုတ်လုပ်ကြသည်။ ဤနည်းဖြင့် ကိုရီးယားနိုင်ငံတစ်လွှားရှိ အသင်းတော်များမှ နားမကြားသော သတင်းကောင်းကြွေးကြော်သူများနှင့် စိတ်ဝင်စားသူများအတွက် ဝိညာဉ်အစာရရှိစေသည်။
လက်ဟန်ပြဘာသာစကား တတ်ကျွမ်းလာသူများစွာရှိကာ ဤသူတို့သည် ဗီဒီယိုခွေများထုတ်လုပ်ရာတွင် ကူညီပေးခဲ့ကြသော်လည်း အကောင်းဆုံးဘာသာပြန်သူများမှာ အများအားဖြင့် နားမကြားသောမိဘများ၏ ကလေးများဖြစ်သည်။ သူတို့သည် နို့စို့အရွယ်မှစ၍ လက်ဟန်ပြဘာသာစကားကို သင်ယူတတ်မြောက်လာကြသည်။ သူတို့၏ လက်ဟန်ပြပုံသည် တိကျမှန်ကန်ရုံမက သူတို့၏လက်အမူအရာများနှင့် မျက်နှာအနေအထားတို့ဖြင့် သတင်းတရားကို နှလုံးသားထဲမှ အဓိပ္ပာယ်ရှိစွာနှင့် လေးနက်စွာ တင်ဆက်နိုင်ပြီး စိတ်နှလုံးထဲရောက်စေသည်။
အထက်တွင်ဖော်ပြခဲ့သည့်အတိုင်း ယခု ကိုရီးယားနိုင်ငံတွင် လက်ဟန်ပြဘာသာစကား စည်းဝေးကြီးနှင့် စည်းဝေးပွဲများကို မှန်မှန်ကျင်းပလျက်ရှိသည်။ ယင်းကိုပြီးမြောက်အောင်မြင်စေရန် များစွာလုပ်ဆောင်ကြရ၏၊ အကုန်အကျနှင့် ကြိုးပမ်းအားထုတ်မှုတို့လည်း လိုအပ်သည်။ သို့သော် တက်ရောက်လာကြသူများသည် ဤအစီအစဉ်အတွက် အလွန်ကျေးဇူးတင်ကြ၏။ ဤအစည်းအဝေးများပြီးသည့်နောက် လူအများသည် ချက်ချင်းထမပြန်လိုကြဘဲ ဆက်၍ရင်းရင်းနှီးနှီးပေါင်းသင်းကာ ရရှိခဲ့သောဝိညာဉ်အစာကို ပြန်လည်ဆွေးနွေးသုံးသပ်လိုကြသည်။ ဤကဲ့သို့ထူးခြားသောအုပ်စုတွင် အမှုထမ်းဆောင်ရခြင်းသည် စိန်ခေါ်ချက်များစွာရှိစေသော်လည်း ရရှိခံစားရသော ဝိညာဉ်ရေးကောင်းချီးများက အမှန်တကယ်ပင် အကျိုးနပ်စေသည်။
[စာမျက်နှာ ၁၀ ပါ ရုပ်ပုံ]
ကိုရီးယားနိုင်ငံတွင် ထုတ်လုပ်သော လက်ဟန်ပြဗီဒီယိုခွေများ– “ကျွန်ုပ်တို့ထံမှ ဘုရားသခင် အဘယ်အရာတောင်းဆိုတော်မူသနည်း၊” “ကျွန်ုပ်တို့၏ ဝိညာဉ်ရေးအမွေအနှစ်ကို တန်ဖိုးထားလေးစားခြင်း၊” “ကျွန်ုပ်တို့ခေတ်အတွက် သတိပေးပုံနမူနာများ၊” နှင့်“ယေဟောဝါ၏အခွင့်အာဏာကို လေးစားပါ”
[စာမျက်နှာ ၁၀ ပါ ရုပ်ပုံ]
အောက်မှစ၍ လက်ယာရစ်– ကိုရီးယားဌာနခွဲရုံးတွင် လက်ဟန်ပြဘာသာစကား ဗီဒီယိုခွေကို စီစဉ်ထုတ်လုပ်ခြင်း; သီအိုကရက်တစ်အသုံးအနှုန်းများအတွက် လက်ဟန်ပြအမှတ်အသားများ ပြင်ဆင်ခြင်း; လက်ဟန်ပြဘာသာစကား ဘာသာပြန်အုပ်စု; ဗီဒီယိုခွေရိုက်ကူးထုတ်လုပ်စဉ် လက်ဟန်ပြသူကို အချက်ပြနေ