လူခပ်သိမ်း၏ကောင်းကွက်ကို ရှာလော့
လူခပ်သိမ်း၏ကောင်းကွက်ကို ရှာလော့
“အိုအကျွန်ုပ်၏ဘုရားသခင် ကျေးဇူးပြုပါမည်အကြောင်း [“ကောင်းကွက်အတွက်၊” ကဘ] အကျွန်ုပ်ကို အောက်မေ့တော်မူပါ။”—နေဟမိ ၁၃:၃၁။
၁။ ယေဟောဝါသည် လူခပ်သိမ်းအပေါ် မည်သို့ကောင်းမှုပြုသနည်း။
ညှို့မှိုင်းအုံ့ဆိုင်းနေသော နေ့ရက်များလွန်ပြီးနောက် နေပွင့်စပြုလာ၏။ လူတို့သည် စိတ်အားတက်ကြွ ကြည်နူးလာကြ၏။ ထိုနည်းတူ၊ ရှည်ကြာသည့် ချစ်ချစ်တောက်ပူပြင်းသော ခြောက်သွေ့ရာသီကုန်ပြီးနောက် မိုးတစ်ပြိုက်နှစ်ပြိုက်—သည်းထန်စွာ—ရွာချလိုက်ခြင်းသည် စိတ်ကိုလန်းဆန်းပေါ့ပါးသွားစေသည်။ ကျွန်ုပ်တို့၏မေတ္တာရှိဖန်ဆင်းရှင် ယေဟောဝါသည် ဤသို့သောအံ့မခန်းဖွယ် ရာသီဥတုရရှိစေရန် ကမ္ဘာမြေကြီးကို ပုံစံပြုခဲ့သည်။ ယေရှုက “သင်တို့၏ရန်သူတို့ကို ချစ်ကြလော့။ သင်တို့ကို ကျိန်ဆဲသောသူတို့အား မေတ္တာပို့ကြလော့။ သင်တို့ကို မုန်းသောသူတို့အား ကျေးဇူးပြုကြလော့။ သင်တို့ကို နှောင့်ယှက်ညှဉ်းဆဲသောသူတို့အဖို့ ဘုရားသခင်ကို ဆုတောင်းကြလော့။ အကြောင်းမူကား၊ ကောင်းကင်ဘုံ၌ရှိတော်မူသော သင်တို့အဘသည် ကောင်းသောသူ၊ မကောင်းသောသူတို့အပေါ်၌ ကိုယ်တော်၏နေကို ထွက်စေတော်မူ၏။ ဖြောင့်မတ်သောသူ၊ မဖြောင့်မတ်သောသူတို့အပေါ်၌ မိုးကိုရွာစေတော်မူ၏” ဟုသွန်သင်ပေးသောအခါ ဘုရားသခင်၏ရက်ရောမှုကို အာရုံစိုက်စေခဲ့သည်။ (မဿဲ ၅:၄၃-၄၅) မှန်၏၊ ယေဟောဝါသည် လူခပ်သိမ်းအပေါ် ကောင်းမှုပြု၏။ ကိုယ်တော်၏ကျေးကျွန်များသည် သူတစ်ပါး၏ကောင်းကွက်ကို ရှာခြင်းဖြင့် ကိုယ်တော့်ကို ကြိုးစားတုပသင့်သည်။
၂။ (က) အဘယ်အရာပေါ် အခြေပြု၍ ယေဟောဝါ ကောင်းမှုပြုသနည်း။ (ခ) ယေဟောဝါသည် မိမိ၏ရက်ရောမှုအပေါ် ကျွန်ုပ်တို့တုံ့ပြန်ပုံနှင့်စပ်လျဉ်း၍ ဘာကိုသတိပြုတော်မူသနည်း။
၂ အဘယ်အရာပေါ် အခြေပြု၍ ယေဟောဝါ ကောင်းမှုပြုသနည်း။ အာဒံ အပြစ်ပြုပြီးကတည်းက ယေဟောဝါသည် လူတို့၏ကောင်းကွက်ကိုရှာရန် မပျက်ကွက်ခဲ့ချေ။ (ဆာလံ ၁၃၀:၃၊ ၄) ကိုယ်တော်၏ရည်ရွယ်ချက်မှာ နာခံမှုရှိသောလူသားတို့ ပရဒိသုတွင် ပြန်လည်အသက်ရှင်နေထိုင်ရန် ဖြစ်သည်။ (ဧဖက် ၁:၉၊ ၁၀) ကိုယ်တော်ထံမှ မခံစားထိုက်သော အကြင်နာတရားသည် ကတိထားရာမျိုးနွယ်တော်အားဖြင့် အပြစ်နှင့်မစုံလင်မှုတို့မှ လွတ်မြောက်ရန် အလားအလာရရှိစေသည်။ (ကမ္ဘာဦး ၃:၁၅; ရောမ ၅:၁၂၊ ၁၅) ရွေးနုတ်ဖိုးအစီအစဉ်ကို လက်ခံခြင်းသည် နောက်ဆုံး၌ စုံလင်ခြင်းအဖြစ်သို့ရောက်ရန် လမ်းဖွင့်ပေးလိုက်၏။ ယခု ကျွန်ုပ်တို့တစ်ဦးစီကို ယေဟောဝါ ဂရုစိုက်ကြည့်ရှုနေရာများထဲမှတစ်ခုမှာ ကိုယ်တော်၏ရက်ရောမှုအပေါ် ကျွန်ုပ်တို့၏ တုံ့ပြန်ပုံဖြစ်သည်။ (၁ ယောဟန် ၃:၁၆) ကိုယ်တော်၏ကောင်းမှုအတွက် ကျွန်ုပ်တို့၏ကျေးဇူးတင်လေးမြတ်မှုကို မည်သည့်နည်းဖြင့်ပင်ဖော်ပြပါစေ ကိုယ်တော်သတိပြုတော်မူသည်။ “နာမတော်ကိုထောက်၍ ပြသောမေတ္တာကိုလည်းကောင်း ဘုရားသခင်သည် မေ့လျော့သည်တိုင်အောင် အဓမ္မအမှုကို ပြုတော်မူသည်မဟုတ်” ဟုတမန်တော်ပေါလုရေးသားခဲ့သည်။—ဟေဗြဲ ၆:၁၀။
၃။ အဘယ်မေးခွန်းကို သုံးသပ်သင့်သနည်း။
၃ သို့ဖြစ်လျှင် ကျွန်ုပ်တို့သည် တခြားသူများ၏ကောင်းကွက်ကို ရှာရာတွင် ယေဟောဝါကို မည်သို့တုပနိုင်သနည်း။ ဘဝကဏ္ဍလေးခုဖြစ်သည့် (၁) ခရစ်ယာန်ဓမ္မအမှု၊ (၂) မိသားစု၊ (၃) အသင်းတော်၊ (၄) အခြားသူများနှင့်ဆက်ဆံရေးတို့တွင် အဆိုပါမေးခွန်း၏အဖြေများကို သုံးသပ်ကြည့်ကြစို့။
ဟောပြောခြင်းနှင့် တပည့်ဖြစ်စေခြင်းတွင်
၄။ ခရစ်ယာန်ဓမ္မအမှုတွင်ပါဝင်ခြင်းသည် သူတစ်ပါး၏ကောင်းကွက်ရှာနည်းတစ်နည်း မည်သို့ဖြစ်သနည်း။
၄ ဂျုံစပါးနှင့်တောပင် ပုံဥပမာ၏အဓိပ္ပာယ်ကို တပည့်များမေးသောအခါ ယေရှုက “လယ်ကား ဤလောကဖြစ်၏” ဟု မိန့်ဆိုခဲ့သည်။ ခရစ်တော်၏မျက်မှောက်ခေတ် တပည့်များအနေနှင့် ကျွန်ုပ်တို့သည် ခရစ်ယာန်ဓမ္မအမှုတွင် ပါဝင်စဉ် ဤအမှန်တရားကို အသိအမှတ်ပြုကြ၏။ (မဿဲ ၁၃:၃၆-၃၈; ၂၈:၁၉၊ ၂၀) ကျွန်ုပ်တို့၏လယ်ကွင်းဓမ္မအမှုတွင် ကျွန်ုပ်တို့၏ယုံကြည်ခြင်းကို လူထုရှေ့ကြေညာခြင်းပါဝင်သည်။ ယခု ယေဟောဝါသက်သေများသည် တစ်အိမ်မှတစ်အိမ်၊ လမ်းများပေါ် အမှုဆောင်ခြင်းအတွက် နာမည်ကြီးလျက်ရှိသည့်အချက်ကပင် ဘုရားသခင့်နိုင်ငံတော်သတင်းတရားနှင့် ထိုက်တန်သူများကို ရှာဖွေခြင်းလုပ်ငန်း၌ ကျွန်ုပ်တို့၏ဇွဲလုံ့လကို ဖော်ပြ၏။ ယေရှုက “မည်သည့်မြို့၊ မည်သည့်ရွာသို့ဝင်လျှင် ထိုမြို့ရွာ၌ အဘယ်မည်သောသူသည် ထိုက်တန်သနည်းဟု မေးမြန်း (“ရှာဖွေ၊” ကဘ)” ကြလော့ဟု သွန်သင်ပေးခဲ့သည်။—မဿဲ ၁၀:၁၁; တမန်တော် ၁၇:၁၇; ၂၀:၂၀။
၅၊ ၆။ ကျွန်ုပ်တို့သည် အိမ်များသို့ ထပ်ခါတလဲလဲလည်ပတ်ရန် အဘယ်ကြောင့် ဇွဲရှိရမည်နည်း။
၅ လူတို့ထံ ဖိတ်ခေါ်မခံရဘဲ ရောက်သွားသောအခါ ကျွန်ုပ်တို့၏သတင်းတရားအပေါ် သူတို့၏တုံ့ပြန်ပုံကို ကျွန်ုပ်တို့သတိပြုမိကြပေမည်။ တစ်ခါတစ်ရံ အိမ်သားတစ်ဦးက နားထောင်နေစဉ် နောက်တစ်ဦးက “စိတ်မဝင်စားဘူး” ဟုအော်ပြောလိုက်သည့်အခါ စကားစပြတ်သွားသည်ကို ကျွန်ုပ်တို့တွေ့ရတတ်၏။ လူတစ်ဦး၏ကန့်ကွက်မှု သို့မဟုတ် စိတ်မဝင်စားမှုက နောက်တစ်ဦး၏တုံ့ပြန်မှုကို ထိခိုက်စေသည့်အတွက် ကျွန်ုပ်တို့စိတ်မကောင်းဖြစ်ရ၏! သို့ဖြစ်၍ ကျွန်ုပ်တို့သည် လူခပ်သိမ်း၏ကောင်းကွက်ကို အမြဲရှာနိုင်ရန် မည်သို့လုပ်ဆောင်နိုင်သနည်း။
၆ ထိုဒေသတွင် ကျွန်ုပ်တို့ဟောပြောသောအခါ အဆိုပါအိမ်သို့ နောက်တစ်ခေါက်လည်ပတ်ခြင်းသည် ယခင်တစ်ခေါက်က စကားစဖြတ်လိုက်သူနှင့် တိုက်ရိုက်စကားပြောခွင့် ရပေမည်။ ထိုအချိန်က ဖြစ်ပျက်ခဲ့ရာကို အမှတ်ရခြင်းက အသင့်ပြင်ဆင်ဖို့ အထောက်အကူရနိုင်၏။ ကန့်ကွက်သူသည် ဘုရားသခင့်နိုင်ငံတော်သတင်းတရား နားထောင်နေသူကို စိတ်ရင်းမှန်ဖြင့် ဟန့်တားခြင်းဖြစ်ပေမည်။ ကျွန်ုပ်တို့၏ ရည်ရွယ်ချက်များနှင့်ပတ်သက်၍ မဟုတ်မမှန်သတင်းက သူ၏အမြင်ကို ပုံသွင်းထားခြင်းဖြစ်ကောင်းဖြစ်နိုင်၏။ သို့သော် ထိုအိမ်တွင် ဘုရားသခင့်နိုင်ငံတော်သတင်းကောင်း ဇွဲရှိရှိ ဟောပြောရန်၊ အထင်လွဲမှားမှုများကို ပါးနပ်စွာ ကြိုးစားပြုပြင်ပေးရန် ကျွန်ုပ်တို့ကို တားဆီးနိုင်မည်မဟုတ်ချေ။ ကျွန်ုပ်တို့သည် ဘုရားသခင်နှင့်ဆိုင်သော တိကျမှန်ကန်သည့်အသိပညာကို လူခပ်သိမ်းသိရှိလာစေရန် ကူညီပေးလိုကြသည်။ ထို့နောက် ယေဟောဝါသည် ထိုလူကို မိမိထံသွေးဆောင်ကောင်း သွေးဆောင်လိမ့်မည်ဖြစ်သည်။—ယောဟန် ၆:၄၄; ၁ တိမောသေ ၂:၄။
၇။ လူတို့ထံ ကျွန်ုပ်တို့ချဉ်းကပ်သောအခါ အပြုသဘောရှိစေရန် အဘယ်အရာက အကူအညီဖြစ်စေနိုင်သနည်း။
၇ တပည့်များကို ယေရှုမိန့်မှာချက်များတွင် မိသားစုအတိုက်အခံအကြောင်းလည်းပါသည်။ “အဘနှင့်သား၊ အမိနှင့်သမီး၊ ယောက္ခမနှင့်ချွေးမ၊ အချင်းချင်းကွဲပြားစေခြင်းငှာ ငါလာသတည်း” ဟုကိုယ်တော်မိန့်ဆိုခဲ့သည်မဟုတ်လော။ “ကိုယ်အိမ်သူအိမ်သားတို့သည်လည်း ကိုယ်ရန်သူဖြစ်ကြလိမ့်မည်” ဟုလည်း ယေရှုထပ်ဆင့်ဆိုပြန်သည်။ (မဿဲ ၁၀:၃၅၊ ၃၆) သို့တိုင် အခြေအနေနှင့် စိတ်သဘောထား ပြောင်းလဲတတ်၏။ ရုတ်တရက်ဖျားနာခြင်း၊ ဆွေမျိုးတစ်ဦးကွယ်လွန်ခြင်း၊ ဘေးဒဏ်များ၊ စိတ်အကျဉ်းအကျပ်များနှင့် မရေမတွက်နိုင်သော တခြားအကြောင်းများကြောင့် ကျွန်ုပ်တို့၏ဟောပြောခြင်းအပေါ် လူတို့၏တုံ့ပြန်မှု ပြောင်းလဲသွားနိုင်သည်။ ကျွန်ုပ်တို့၏ဟောပြောခြင်းကို လူတို့ တုံ့ပြန်ကြမည်မဟုတ်ဟု အပျက်သဘော ထားမည်ဆိုလျှင် သူတို့၏ကောင်းကွက်ကို ကျွန်ုပ်တို့ အမှန်တကယ်ရှာနေရာကျပါသလော။ နောက်တစ်ကြိမ်တွင် သူတို့၏အိမ်သို့ အားရရွှင်လန်းစွာ ပြန်လည်ပတ်ကြည့်ပါလေ။ တုံ့ပြန်မှုမတူသည်ကို ကျွန်ုပ်တို့တွေ့ရပေမည်။ တစ်ခါတစ်ရံ ကျွန်ုပ်တို့ပြောဆိုရာသာမက ပြောဆိုပုံပြောဆိုနည်းက တုံ့ပြန်မှုကို ပြောင်းလဲစေ၏။ မဟောပြောမီ ယေဟောဝါထံ စိတ်အားထက်သန်စွာ ဆုတောင်းခြင်းသည် အပြုသဘောရှိရန်နှင့် နှစ်သက်ဖွယ်နည်းဖြင့် လူခပ်သိမ်းကို ဘုရားသခင့်နိုင်ငံတော်သတင်းတရား တင်ဆက်ရန် အကူအညီဖြစ်စေမည်မှာ သေချာသည်။—ကောလောသဲ ၄:၆; ၁ သက်သာလောနိတ် ၅:၁၇။
၈။ ခရစ်ယာန်များသည် မယုံကြည်သောဆွေမျိုးများ၏ ကောင်းကွက်ကို ရှာသောအခါ အဘယ်ရလဒ်ရရှိနိုင်သနည်း။
၈ အသင်းတော်အချို့တွင် မိသားစုတစ်စုတည်းမှအများစုသည် ယေဟောဝါ၏အမှုတော်ကို ထမ်းဆောင်ကြ၏။ တစ်ခါတစ်ရံ လူငယ်များ၏ ကြည်ညိုလေးစားမှုရစေသည့်အချက်မှာ မိသားစုအတွင်း ကောင်းသောဆက်ဆံရေးရှိပြီး အိမ်ထောင်နှောင်ကြိုးခိုင်မြဲသည့် မိမိတို့ထက်အသက်ကြီးသူ မိသားစုဝင်တစ်ဦး၏ မလျှော့သောဇွဲဖြစ်ရာ ယင်းက လူငယ်များ၏နှလုံး ပြောင်းလဲသွားစေသည်။ ခရစ်ယာန်ဇနီးများသည် တမန်တော်ပေတရု၏ဆုံးမစကားကို အလေးထားလိုက်နာခြင်းဖြင့် “စကားတစ်လုံးမျှမပါဘဲ” ခင်ပွန်းပါလာရန် စွမ်းဆောင်နိုင်ခဲ့သည်။—၁ ပေတရု ၃:၁၊ ၂၊ ကဘ။
မိသားစုတွင်
၉၊ ၁၀။ ယာကုပ်နှင့် ယောသပ်တို့နှစ်ဦးစလုံးသည် မိသားစု၏ကောင်းကွက်ကို မည်သို့ရှာယူခဲ့သနည်း။
၉ မိသားစုတစ်စုကို ပေါင်းစည်းထားသည့် နှောင်ကြိုးများသည် တခြားသူများ၏ကောင်းကွက်ကို ရှာယူနိုင်သည့် ကဏ္ဍနောက်တစ်ခုဖြစ်၏။ သားဖြစ်သူများနှင့် ယာကုပ်ဆက်ဆံပုံမှ သင်ခန်းစာတစ်ရပ်ကို သုံးသပ်ကြည့်ပါ။ ကမ္ဘာဦးအခန်းကြီး ၃၇၊ အငယ် ၃ နှင့် ၄ တွင်ယာကုပ်သည် ယောသပ်ကို အလွန်ချစ်မြတ်နိုးကြောင်း သမ္မာကျမ်းစာကဖော်ပြ၏။ မွေးချင်းများက ယောသပ်ကို သေကြောင်းကြံဖို့အထိပင် မနာလိုစိတ်ဝင်ခဲ့သည်။ သို့သော် နောက်ပိုင်းတွင် ယာကုပ်နှင့် ယောသပ်တို့၏ စိတ်သဘောထားကို သတိပြုပါ။ သူတို့နှစ်ဦးစလုံးသည် မိသားစု၏ ကောင်းကွက်ကို ရှာခဲ့လေသည်။
၁၀ အီဂျစ်ပြည် အစာခေါင်းပါးချိန်တွင် ရိက္ခာဝန်မင်းအဖြစ် ယောသပ် တာဝန်ထမ်းဆောင်နေသည့်အခါ သူ၏အစ်ကိုများကို ကြိုဆိုလက်ခံခဲ့၏။ ယောသပ်သည် မိမိမည်သူမည်ဝါဖြစ်ကြောင်း ချက်ချင်းမဖော်ပြသော်လည်း ဖခင်အိုကြီးကို သူတို့ကောင်းစွာစောင့်ရှောက်ကြောင်းနှင့် အစာရေစာသယ်ဆောင်သွားကြောင်း သေချာစေရန် ဉာဏ်ကူလုပ်ဆောင်ခဲ့သည်။ ယောသပ်သည် သူတို့၏မုန်းတီးမှုကိုခံခဲ့ရသော်လည်း သူတို့အကျိုးအတွက် ပြုလုပ်ပေးခဲ့၏။ (ကမ္ဘာဦး ၄၁:၅၃–၄၂:၈; ၄၅:၂၃) ထိုနည်းတူစွာ၊ ယာကုပ်သေခါနီးတွင် သူ၏သားအားလုံးရရှိမည့် ပရောဖက်ပြုချက်ဆိုင်ရာ ကောင်းချီးများကို ပြောပြခဲ့သည်။ သူတို့၏လုပ်ရပ်မှားများကြောင့် အထူးအခွင့်အရေးအချို့ ဆုံးရှုံးခဲ့ကြသော်လည်း သူတို့အားလုံး ပြည်တော်တွင် အမွေခံရမည်ဖြစ်သည်။ (ကမ္ဘာဦး ၄၉:၃-၂၈) ဤတွင် အံ့ဖွယ်ကောင်းလှသော တည်ကြည်သည့်မေတ္တာကို ယာကုပ်ပြလိုက်ခြင်းဖြစ်သည်!
၁၁၊ ၁၂။ (က) မည်သည့်ပရောဖက်ပြုချက်ဆိုင်ရာ ပုံနမူနာသည် မိသားစုအတွင်း ကောင်းကွက်ရှာနေခြင်း၏ အရေးပါမှုကို အလေးအနက်ဖော်ပြသနည်း။ (ခ) ယေရှု၏ဖြုန်းတီးသောသား ပုံဥပမာတွင် ဖခင်ဖြစ်သူ၏ပုံသက်သေမှ အဘယ်သင်ခန်းစာ ရရှိသနည်း။
၁၁ ယုံကြည်ခြင်းကင်းမဲ့သော ဣသရေလလူမျိုးနှင့် ဆက်ဆံရာတွင် ယေဟောဝါ၏စိတ်ရှည်ခြင်းသည် မိမိလူမျိုး၏ကောင်းကွက်ကို မည်သို့ရှာယူကြောင်း ထပ်ဆင့်ထိုးထွင်းသိမြင်စေ၏။ ယေဟောဝါသည် ပရောဖက်ဟောရှေ၏ မိသားစုအခြေအနေကိုသုံး၍ မိမိ၏မြဲမြံသောမေတ္တာကို ဖော်ပြခဲ့သည်။ ဟောရှေ၏ဇနီး ဂေါမာသည် ထပ်ခါတလဲလဲ သူ့သားအိမ်ရာပြစ်မှားခဲ့သည်။ ထိုသို့ဖြစ်နေသည့်ကြားမှ ယေဟောဝါက “ဣသရေလအမျိုးသားတို့သည် အခြားတစ်ပါးသောဘုရားတို့ကို ဖူးမြော်၍ စပျစ်သီးပျဉ်ကို အလိုရှိသော်လည်း ထာဝရဘုရားချစ်တော်မူသည်နည်းတူ မိမိခင်ပွန်း၏ချစ်ခြင်းကိုခံလျက် မျောက်မထားသော မိန်းမကိုသွား၍ ချစ်ဦးလော့” ဟုဟောရှေကို မိန့်မှာခဲ့သည်။ (ဟောရှေ ၃:၁) အဘယ်ကြောင့် ဤသို့မိန့်မှာရသနည်း။ ယေဟောဝါသည် မိမိ၏လမ်းစဉ်မှ သွေဖည်သွားသော လူမျိုးတော်မှ အချို့သူများသည် မိမိ၏စိတ်ရှည်ခြင်းကို တုံ့ပြန်လိမ့်မည်ဟု သိရှိတော်မူ၏။ ဟောရှေက ဤသို့အခိုင်အမာဆိုခဲ့သည်– “ထို့နောက်မှ ဣသရေလအမျိုးသားတို့သည် ပြန်လာ၍ သူတို့ဘုရားသခင် ထာဝရဘုရားကိုလည်းကောင်း၊ သူတို့ရှင်ဘုရင်ဒါဝိဒ်ကိုလည်းကောင်း ရှာ၍ နောင်ကာလ၌ ကျေးဇူးတော်ကိုခံအံ့သောငှာ ထာဝရဘုရားထံတော်သို့ တုန်လှုပ်လျက် ပြေးကြလိမ့်မည်။” (ဟောရှေ ၃:၅) ယင်းသည် မိသားစုပြဿနာများနှင့် ရင်ဆိုင်ရသောအခါ ပြန်ပြောင်းသတိရသင့်သည့် ပုံနမူနာကောင်းတစ်ခုဖြစ်သည်မှာ သေချာ၏။ တခြားအိမ်သားများ၏ကောင်းကွက်ကို ရှာနေခြင်းသည် စိတ်ရှည်ခြင်းနှင့်ပတ်သက်၍ အနည်းဆုံး ပုံသက်သေကောင်း ချမှတ်နိုင်လိမ့်မည်။
၁၂ ယေရှု၏ဖြုန်းတီးသောသားပုံဥပမာက ကျွန်ုပ်တို့မိသားစုတွင် ကောင်းကွက်ရှာယူနိုင်ပုံကို ပို၍ပင် ထိုးထွင်းသိမြင်စေ၏။ သားငယ်သည် အသုံးအဖြုန်းကြီးသောဘဝကို စွန့်ပြီးနောက် အိမ်သို့ပြန်လာ၏။ ဖခင်သည် သူ့ကို သနားကြင်နာစွာ လက်ခံကျွေးမွေးလေသည်။ မိသားစုကို တစ်ခါမျှမစွန့်ခွာခဲ့ဖူးသော သားကြီး၏မကျေမချမ်းပြောဆိုမှုကို ဖခင်ဖြစ်သူ မည်သို့တုံ့ပြန်ခဲ့သနည်း။ သားကြီးကို ရည်စူး၍ ဖခင်က “ငါ့သား၊ သင်သည် ငါ့ထံမှာအစဉ်နေ၏။ ငါ၏ဥစ္စာရှိသမျှသည် သင်၏ဥစ္စာဖြစ်၏” ဟုပြောဆိုခဲ့သည်။ ယင်းသည် မကျေမနပ်ငြင်းပယ်နေခြင်းမဟုတ်ဘဲ ဖခင်၏မေတ္တာတရားကို အခိုင်အမာပြောနေခြင်းသာဖြစ်သည်။ ဖခင်က ဤသို့ဆက်ဆိုသည်– “သင်၏ညီမူကား အထက်ကသေ၏၊ ယခုရှင်ပြန်၏။ အထက်ကပျောက်၏၊ ယခုတွေ့ပြန်၏။ ထိုကြောင့် ပျော်မွေ့ဝမ်းမြောက်စရာအကြောင်းရှိ၏။” ထိုနည်းတူစွာ၊ ကျွန်ုပ်တို့သည်လည်း တခြားသူများ၏ကောင်းကွက်ကို ဆက်၍ရှာနိုင်ကြသည်။—လုကာ ၁၅:၁၁-၃၂။
ခရစ်ယာန်အသင်းတော်တွင်
၁၃၊ ၁၄။ ခရစ်ယာန်အသင်းတော်တွင် မေတ္တာနှင့်ဆိုင်သော ရွှေပညတ်ကို ကျင့်သုံးနည်းတစ်နည်းကား အဘယ်နည်း။
၁၃ ခရစ်ယာန်များအနေနှင့် ကျွန်ုပ်တို့သည် မေတ္တာနှင့်ဆိုင်သော ရွှေပညတ်ကို ကျင့်သုံးရန် ပန်းတိုင်ထားကြသည်။ (ယာကုပ် ၂:၁-၉) မှန်ပါသည်၊ ရုပ်ပစ္စည်းအရ ကျွန်ုပ်တို့သည် မိမိတို့နှင့်အခြေအနေမတူသည့် အသင်းတော်သားများကို ကြည်ဖြူစွာလက်ခံပေမည်။ သို့သော် လူမျိုးရေး၊ ယဉ်ကျေးမှု သို့မဟုတ် ဘာသာရေးနောက်ခံအပေါ် မူတည်၍ ‘အဆင့်အတန်းခွဲခြား’ နေသလော။ သို့ဆိုလျှင် ယာကုပ်၏ဆုံးမစကားကို မည်သို့နှလုံးသွင်းနိုင်မည်နည်း။
၁၄ ခရစ်ယာန်အစည်းအဝေးတက်ရောက်သူအားလုံးကို ကြိုဆိုခြင်းသည် ကျွန်ုပ်တို့၏သဘောထားကြီးမှုကို ထင်ရှားပြရာရောက်၏။ ဘုရားသခင့်နိုင်ငံတော်ခန်းမသို့ ရောက်ရှိလာကြသော လူသစ်များကို မိမိကစ၍ စကားပြောသောအခါ အစပိုင်းတွင်ဖြစ်တတ်သည့် သူတို့၏ရှက်ကြောက်စိတ် ပျောက်သွားနိုင်၏။ အချို့သည် ခရစ်ယာန်အစည်းအဝေးတစ်ခုကို ပထမဦးဆုံးအကြိမ် တက်ရောက်ကြသူအချို့က ဤသို့ဆိုသည်– “လူတိုင်းက အရမ်းဖော်ရွေကြတာပဲ။ လူတိုင်းက ကျွန်မကို သိနေကြသလိုပဲ။ ကိုယ့်အိမ်ကိုယ့်ရာလိုပဲ ခံစားမိတယ်။”
၁၅။ သက်ကြီးရွယ်အိုများကို စိတ်ဝင်စားမှုပြရန် အသင်းတော်ရှိ လူငယ်များကို မည်သို့ကူညီပေးနိုင်သနည်း။
၁၅ အသင်းတော်အချို့ရှိ လူငယ်တချို့သည် အစည်းအဝေးပြီးချိန်တွင် သက်ကြီးရွယ်အိုများနှင့် မပေါင်းသင်းဘဲ ဘုရားသခင့်နိုင်ငံတော်ခန်းမ၏ အတွင်း၊ အပြင်ဘက်တွင် စုရုံးနေတတ်ကြသည်။ ဤတိမ်းယိမ်းမှုကို ပြုပြင်ပေးရန် အပြုသဘောဖြင့် မည်သို့ပြုလုပ်ပေးနိုင်သနည်း။ ပထမတစ်ချက်အနေနှင့် မိဘများက သားသမီးများကို အိမ်တွင် လေ့ကျင့်ပေးပြီး အစည်းအဝေးများအတွက် ကြိုတင်ပြင်ဆင်ပေးရန်ဖြစ်သည်။ (သု. ၂၂:၆) အိမ်သားအားလုံး အစည်းအဝေးသွားသည့်အခါ ယူဆောင်သွားရန်လိုသည့် စာအုပ်စာတမ်းအမျိုးမျိုး အသင့်ရှိစေဖို့ သူတို့ကို တာဝန်ပေးနိုင်သည်။ ဘုရားသခင့်နိုင်ငံတော်ခန်းမတွင် သက်ကြီးရွယ်အို၊ မမာမကျန်းဖြစ်နေသူတို့နှင့် အနည်းငယ်ပြောဆိုဆွေးနွေးကြရန် သားသမီးများကို အားပေးတိုက်တွန်းဖို့ မိဘများသည် အကောင်းဆုံးအနေအထားတွင်ရှိ၏။ ဤသို့သောသူများနှင့် ရည်ရွယ်ချက်ရှိရှိ စကားပြောဆိုနိုင်ခြင်းသည် ကလေးများကို ကျေနပ်အားရစေနိုင်သည်။
၁၆၊ ၁၇။ လူကြီးများသည် အသင်းတော်ရှိလူငယ်များ၏ ကောင်းကွက်ကို မည်သို့ရှာယူနိုင်သနည်း။
၁၆ သက်ကြီးရွယ်အိုညီအစ်ကို၊ ညီအစ်မများသည် အသင်းတော်ရှိ လူငယ်များကို စိတ်ဝင်စားသင့်သည်။ (ဖိလိပ္ပိ ၂:၄) သူတို့က အစပြု၍ လူငယ်များကို အားပေးစကားပြောနိုင်သည်။ အများအားဖြင့် အစည်းအဝေးအတွင်း ထူးခြားပေါ်လွင်ချက်အချို့ကို ဆွေးနွေးတင်ပြသွားတတ်၏။ အစည်းအဝေးတွင် ပျော်မပျော်၊ အထူးကျေးဇူးတင်လေးမြတ်စရာနှင့် လက်တွေ့အသုံးချနိုင်စရာ အချက်တခုခုရှိမရှိ လူငယ်များကို မေးနိုင်သည်။ အသင်းတော်သားများပင်ဖြစ်သော ဤလူငယ်များကို အစည်းအဝေးတွင် သူတို့၏အာရုံစိုက်မှုအတွက် အသိအမှတ်ပြုပြီး သူတို့၏ဖြေဆိုမှုများ သို့မဟုတ် အစီအစဉ်များတွင် သူတို့၏ပါဝင်မှုများအတွက် ချီးမွမ်းပေးသင့်သည်။ လူငယ်များက အသင်းတော်ရှိ သက်ကြီးရွယ်အိုများနှင့် အပြန်အလှန်ဆက်ဆံပုံ၊ အိမ်မှုကိစ္စအသေးအမွှားများကို ကူညီလုပ်ဆောင်ပေးပုံတို့က နောက်ပိုင်းတွင် သာ၍ကြီးမားသောတာဝန်များကို ကောင်းစွာထမ်းဆောင်နိုင်ဖို့အကြောင်းရှိသည်ကို ဖော်ပြမည်ဖြစ်သည်။—လုကာ ၁၆:၁၀။
၁၇ လူငယ်တချို့သည် တာဝန်လက်ခံခြင်းအားဖြင့် သာ၍အရေးကြီးသောတာဝန်များကို လက်ခံနိုင်သည့်အထိ သူတို့၏ဝိညာဉ်ရေးအရည်အသွေးများ တိုးတက်လာကြသည်။ တာဝန်တစ်ခုခု ရရှိထားခြင်းက မိုက်မဲသောအပြုအမူကို မလုပ်မိစေရန်လည်း အကူအညီဖြစ်စေနိုင်သည်။ (၂ တိမောသေ ၂:၂၂) ဤသို့သောတာဝန်များသည် ခရစ်ယာန်ဓမ္မအမှုထမ်းအဖြစ် တက်လှမ်းနေသော ညီအစ်ကိုများအား “စုံစမ်းခြင်းကိုခံ” သကဲ့သို့ဖြစ်၏။ (၂ တိမောသေ ၃:၁၀) အစည်းအဝေးများတွင် သူတို့၏တလိုတလားပါဝင်မှု၊ ခရစ်ယာန်ဓမ္မအမှုတွင် သူတို့၏ထက်သန်မှု၊ အသင်းတော်သားအားလုံးကို သူတို့၏ဂရုစိုက်မှုတို့က သူတို့ကို ထပ်ဆင့်တာဝန်များပေးအပ်ဖို့ အကြီးအကဲများက ဆင်ခြင်သုံးသပ်သောအခါ သူတို့၏အစွမ်းအစကို ပိုင်းခြားသိမြင်စေနိုင်၏။
လူခပ်သိမ်း၏ကောင်းကွက်ကိုရှာ
၁၈။ စီရင်ဆုံးဖြတ်သောအခါ မည်သည့်ထောင်ချောက်ကို ရှောင်ရမည်နည်း၊ အဘယ်ကြောင့်နည်း။
၁၈ “တရားတွေ့မှုစီရင်ရာတွင် လူမျက်နှာကို မထောက်ကောင်း” ဟူ၍ နယပုံပြင် ၂၄:၂၃ ကအခိုင်အမာဆို၏။ အကြီးအကဲများသည် အသင်းတော်ရေးရာကိစ္စများကို စီရင်သောအခါ မျက်နှာလိုက်ခြင်းကို ရှောင်ကြဉ်ရမည်ဟု ကောင်းကင်ဉာဏ်ပညာက ညွှန်ကြားသည်။ ယာကုပ်က ဤသို့ဆို၏– “အထက်မှသက်ရောက်သော ပညာမူကား၊ ရှေ့ဦးစွာ စင်ကြယ်၏။ ထိုမှတစ်ပါး၊ အသင့်အတင့်နေတတ်၏။ ဖြည်းညင်းသောသဘောရှိ၏။ သွေးဆောင်လွယ်၏။ ကရုဏာနှင့်လည်းကောင်း၊ ကောင်းကျိုးနှင့်လည်းကောင်း ပြည့်စုံ၏။ လျစ်လျူသောစိတ်ရှိ၏။ လျှို့ဝှက်ခြင်းနှင့်ကင်းစင်၏။” (ယာကုပ် ၃:၁၇) အကြီးအကဲများသည် တခြားသူများ၏ကောင်းကွက်ကို ရှာနေစဉ် မိမိတို့၏စီရင်ဆုံးဖြတ်မှုကို ပုဂ္ဂိုလ်ရေးဆက်ဆံမှု သို့မဟုတ် စိတ်လှုပ်ရှားမှုနှင့် ရောထွေးမသွားမိစေရန်လိုသည်။ ဆာလံဆရာအာသပ်က “ဘုရားသခင်သည် ဘုရားတို့၏ပရိသတ်၌ ရပ်လျက်နေတော်မူ၍ ဘုရားတို့ [လူ့တရားသူကြီးများကိုရည်ညွှန်းသည့် “ဘုရားကဲ့သို့သောသူများ၊”] အလယ်၌ စီရင်တော်မူ၏။ သင်တို့သည် မတရားသောသူတို့၏မျက်နှာကိုထောက်၍ အဘယ်မျှကာလပတ်လုံး မတရားသဖြင့် စီရင်ကြမည်နည်း” ဟုရေးသားခဲ့သည်။ (ဆာလံ ၈၂:၁၊ ၂၊) ထိုသို့နှင့်အညီ ခရစ်ယာန်အကြီးအကဲများသည် မိတ်ဆွေ သို့မဟုတ် ဆွေမျိုးတစ်ဦးနှင့် ပါဝင်ပတ်သက်နေသည့် ကိစ္စရပ်များတွင် မျက်နှာလိုက်မှုကို ရှောင်ကြဉ်ကြသည်။ ဤနည်းဖြင့် သူတို့သည် အသင်းတော်ကို ဆက်၍စည်းလုံးနေစေပြီး ယေဟောဝါ၏ဝိညာဉ်တော်ကို လွတ်လပ်စွာ စီးဆင်းစေကြသည်။—၁ သက်သာလောနိတ် ၅:၂၃။
၁၉။ မည်သည့်နည်းဖြင့် ကျွန်ုပ်တို့သည် တခြားသူများ၏ကောင်းကွက်ကို ရှာနိုင်သနည်း။
၁၉ ကျွန်ုပ်တို့၏ညီအစ်ကို၊ ညီအစ်မများ၏ ကောင်းကွက်ကို ရှာရာတွင် သက်သာလောနိတ်အသင်းတော်သို့ ပေါလုစာရေးစဉ်က သူ၏စိတ်ထားကို ကျွန်ုပ်တို့ ရောင်ပြန်ဟပ်ကြသည်။ သူက ဤသို့ပြောခဲ့သည်– “ငါတို့ပညတ်သည်အတိုင်း သင်တို့သည် ယခုကျင့်ကြ၏။ နောက်၌လည်း ကျင့်ကြလိမ့်မည်ဟု သခင်ဘုရားကိုအမှီပြု၍ ငါတို့သည် ယုံမှားခြင်းမရှိ။” (၂ သက်သာလောနိတ် ၃:၄) အခြားသူများ၏ကောင်းကွက်ကို ကျွန်ုပ်တို့ရှာသောအခါ သူတစ်ပါး၏အဆိုးကိုကျော်ပြီး အကောင်းကို သာ၍မြင်တတ်လာမည်။ အပြစ်ရှာလိုသည့်စိတ်ကို ရှောင်ကာ ကျွန်ုပ်တို့ညီအစ်ကိုများ၏ ချီးမွမ်းနိုင်စရာကောင်းကွက်များကို ရှာဖွေလိမ့်မည်။ “ဘဏ္ဍာစိုးမည်သည်ကား၊ သစ္စာရှိရမည်” ဟုပေါလုရေးသားခဲ့သည်။ (၁ ကောရိန္သု ၄:၂) သစ္စာရှိမှုသည် အသင်းတော်တာဝန် ရရှိထားသူများအတွက်သာမကဘဲ ကျွန်ုပ်တို့ ချစ်မြတ်နိုးရသည့် ခရစ်ယာန်ညီအစ်ကို၊ ညီအစ်မအားလုံးအတွက်လည်း ဖြစ်သည်။ သို့ဖြင့် ကျွန်ုပ်တို့သည် သူတို့နှင့် ပိုမိုရင်းနှီးကာ ခရစ်ယာန်ရင်းနှီးမှုနှောင်ကြိုး ခိုင်မြဲလာလေသည်။ ပေါလုခေတ်က ညီအစ်ကိုများကို ပေါလုရှုမြင်သကဲ့သို့ ကျွန်ုပ်တို့ရှုမြင်ကြ၏။ သူတို့သည် “ဘုရားသခင်၏နိုင်ငံတော်အဖို့ အမှုဆောင်သောသူ” များဖြစ်ပြီး ကျွန်ုပ်တို့၏စိတ်ကို “သက်သာစေကြ၏။” (ကောလောသဲ ၄:၁၁) ဤနည်းဖြင့် ကျွန်ုပ်တို့သည် ယေဟောဝါ၏စိတ်သဘောထားကို ထင်ရှားပြကြသည်။
၂၀။ လူခပ်သိမ်းတွင် ကောင်းကွက်ကို ရှာသောသူများအတွက် မည်သည့်ကောင်းချီးများ ရရှိတော့မည်နည်း။
၂၀ နေဟမိ၏ဆုတောင်းချက်အတိုင်း ကျွန်ုပ်တို့ သံယောင်လိုက်ကြသည်– “အိုအကျွန်ုပ်၏ဘုရားသခင် ကျေးဇူးပြုပါမည်အကြောင်း [“ကောင်းကွက်အတွက်၊” ကဘ] အကျွန်ုပ်ကိုအောက်မေ့တော်မူပါ။” (နေဟမိ ၁၃:၃၁) ယေဟောဝါသည် လူတို့၏ကောင်းကွက်ကို ရှာသည့်အတွက် တကယ့်ကိုဝမ်းသာစရာပါတကား! (၁ ရာဇဝင်ချုပ် ၁၄:၁၃) တခြားသူများနှင့် ကျွန်ုပ်တို့ဆက်ဆံသည့်အခါ ထိုနည်းတူလုပ်ဆောင်ကြပါလေ။ ထိုသို့ပြုလုပ်ခြင်းဖြင့် ကျွန်ုပ်တို့သည် ယခု အလွန်နီးကပ်လျက်ရှိသော ကမ္ဘာသစ်တွင် ကယ်တင်ခြင်းနှင့် ထာဝရအသက်ရရှိရန် အလားအလာရှိကြ၏။—ဆာလံ ၁၃၀:၃-၈။
သင်မည်သို့ဖြေဆိုမည်နည်း
• ယေဟောဝါသည် မည်သည့်အရာအပေါ် အခြေပြု၍ လူခပ်သိမ်းကို ကောင်းမှုပြုသနည်း။
• ကျွန်ုပ်တို့သည် အခြားသူများတွင်ကောင်းကွက်ကို မည်သို့ရှာနိုင်သနည်း။
• ကျွန်ုပ်တို့၏ခရစ်ယာန်ဓမ္မအမှုတွင်
• ကျွန်ုပ်တို့၏မိသားစုတွင်
• ကျွန်ုပ်တို့၏အသင်းတော်တွင်
• ကျွန်ုပ်တို့ဆက်ဆံနေသူအားလုံးအပေါ်တွင်
[လေ့လာရန်မေးခွန်းများ]
[စာမျက်နှာ ၂၀ ပါ ရုပ်ပုံ]
ယောသပ်သည် အစ်ကိုများ၏ မုန်းတီးခြင်းကိုခံရသော်လည်း သူတို့၏ကောင်းကွက်ကိုရှာခဲ့
[စာမျက်နှာ ၂၁ ပါ ရုပ်ပုံ]
ဆန့်ကျင်ကန့်ကွက်မှုသည် လူခပ်သိမ်းအား ကျွန်ုပ်တို့ ကြိုးစားကူညီပေးနေခြင်းကို မတားဆီးနိုင်
[စာမျက်နှာ ၂၂ ပါ ရုပ်ပုံ]
ယာကုပ်သားများ၏နောက်ကြောင်းက မည်သို့ပင်ဖြစ်ပါစေ၊ တစ်ယောက်မကျန် ကောင်းချီးရရှိခဲ့
[စာမျက်နှာ ၂၃ ပါ ရုပ်ပုံ]
ခရစ်ယာန်အစည်းအဝေးသို့ ရောက်ရှိလာသူအားလုံးကို ကြိုဆိုလက်ခံပါ