မေတ္တာတရား မရှိမဖြစ်လိုအပ်
မေတ္တာတရား မရှိမဖြစ်လိုအပ်
အသက်အရွယ်၊ ယဉ်ကျေးမှု၊ ဘာသာစကား၊ သို့မဟုတ် လူမျိုး မည်သို့ပင်ဖြစ်ပါစေ၊ လူသားအားလုံးသည် မေတ္တာကို တောင့်တကြ၏။ ထိုတောင့်တမှုကို မရလျှင် သူတို့မပျော်ပိုက်ကြတော့ချေ။ ဆေးဘက်ဆိုင်ရာ သုတေသီတစ်ဦးက ဤသို့ရေးသားခဲ့သည်– “မေတ္တာနှင့် ချစ်ခင်ရင်းနှီးမှုသည် ကျွန်ုပ်တို့ကို ဖျားနာစေသည့်၊ ကျန်းမာစေသည့်၊ ဝမ်းနည်းစေသည့်၊ ပျော်ရွှင်စေသည့်၊ ဝမ်းနည်းဖွယ်ဝေဒနာ ခံစားရစေသည့်၊ ကုစားပေးသည့် ရင်းမြစ်တစ်ခုဖြစ်၏။ ဆေးဝါးအသစ်တစ်မျိုးသည် အလားတူအကျိုးသက်ရောက်မှုရှိလျှင် ထိုနိုင်ငံရှိ ဆရာဝန်တိုင်းလိုလိုက သူတို့၏လူနာများအား ထိုဆေးကို ညွှန်းလိမ့်မည်ဖြစ်သည်။ ထိုဆေးကိုမညွှန်းခဲ့သော် လွဲချော်သောကုသမှုဖြစ်သွားပေမည်။”
သို့သော် မျက်မှောက်ခေတ် လူ့ဘောင် အထူးသဖြင့် ၎င်း၏မီဒီယာနှင့် နာမည်ကြီးစံနမူနာရှင်များက လူတို့လိုအပ်နေသော နွေးထွေးလှိုက်လှဲမှု၊ မေတ္တာပါဆက်ဆံမှုတို့ထက် စည်းစိမ်ဥစ္စာ၊ အာဏာ၊ ကျော်ကြားမှုနှင့် လိင်တို့ကို အသားပေးဖော်ပြတတ်ကြသည်။ လောကပန်းတိုင်များနှင့် အလုပ်အကိုင်များသည် လူတစ်ဦး၏ဘဝအောင်မြင်မှုဖြစ်သည်ဟု သင်ဆရာများစွာက အလေးပေးဖော်ပြတတ်ကြ၏။ လူတစ်ဦး၏ပညာရေးနှင့် စွမ်းရည်တိုးတက်ရန် ပျိုးထောင်ပေးခြင်းသည် အရေးကြီးသည်မှန်သော်လည်း မိသားစုနှင့် မိတ်ဆွေများကို အချိန်မပေးနိုင်လောက်သည်အထိ ယင်းတို့နှင့်သာ လုံးပန်းနေသင့်သလော။ လူ့သဘောသဘာဝကို နှိုက်နှိုက်ချွတ်ချွတ်လေ့လာခဲ့သူ ရှေးပညာတတ်စာရေးဆရာတစ်ဦးက ပင်ကိုစွမ်းရည်ရှိသော်လည်း မေတ္တာမရှိသောသူသည် ‘အသံမြည်သောတံပိုးခရာ၊ တီးသံကိုသာပေးတတ်သော လင်းကွင်းကဲ့သို့ဖြစ်သည်’ ဟု ခိုင်းနှိုင်းခဲ့သည်။ (၁ ကောရိန္သု ၁၃:၁) ဤသို့သောသူများသည် ချမ်းသာကြွယ်ဝနေမည်၊ နာမည်ကျော်ပုဂ္ဂိုလ်ပင် ဖြစ်နေပေမည်၊ သို့သော် သူသည် ဘယ်တော့မျှ အမှန်ပျော်ရွှင်နေမည်မဟုတ်ချေ။
လူသားများကို ကောင်းစွာနားလည်ပြီး ထူးခြားစွာချစ်မြတ်နိုးသော ယေရှုခရစ်သည် မိမိ၏သွန်သင်ချက်တွင် ဘုရားသခင်နှင့် အိမ်နီးချင်းများကို ချစ်ရန် အဓိကထား၍ သုံးသပ်ပြခဲ့သည်။ ကိုယ်တော်က “သင်၏ဘုရားသခင် ထာဝရဘုရားကို စိတ်နှလုံးအကြွင်းမဲ့ ဉာဏ်ရှိသမျှနှင့်ချစ်လော့၊ . . . ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့” ဟုမိန့်ဆိုခဲ့သည်။ (မဿဲ ၂၂:၃၇-၃၉) ဤမိန့်မှာချက်များကို လိုက်လျှောက်သူများသာလျှင် ယေရှု၏နောက်လိုက်စစ်များ ဖြစ်ကြမည်။ ထို့ကြောင့် ကိုယ်တော်က “သင်တို့သည် အချင်းချင်းချစ်ကြလျှင် လူအပေါင်းတို့သည် ထိုမေတ္တာကိုထောက်၍ သင်တို့သည် ငါ၏တပည့်ဖြစ်သည်ကို သိရကြလိမ့်မည်ဟု မိန့်တော်မူ၏။”—ယောဟန် ၁၃:၃၅။
သို့သော် လူတစ်ဦးသည် မျက်မှောက်လောကတွင် မေတ္တာတရားကို မည်သို့မွေးမြူနိုင်မည်နည်း။ ထို့ပြင် မိဘများသည် မိမိတို့သားသမီးများကို မေတ္တာတရားအကြောင်း မည်သို့သင်ပေးနိုင်သနည်း။ နောက်ဆောင်းပါးက ဤမေးခွန်းများကို ဖြေဆိုပါလိမ့်မည်။
[စာမျက်နှာ ၃ ပါ ရုပ်ပုံ]
အလိုကြီးသော ဤလောကတွင် မေတ္တာတရားကို မွေးမြူရန်မှာ စိန်ခေါ်ချက်တစ်ရပ်ဖြစ်