အကူအညီရလိုသူများအတွက် နှစ်သိမ့်မှု
အကူအညီရလိုသူများအတွက် နှစ်သိမ့်မှု
သမ္မာကျမ်းစာသည် စိတ်ကျန်းမာရေးလက်စွဲစာအုပ်တစ်အုပ် မဟုတ်ချေ။ သို့သော် ယင်းသည် ကျွန်ုပ်တို့ကို နှစ်သိမ့်မှုပေးပြီး အခက်အခဲများကြား ဘဝကို တန်ဖိုးထားတတ်ရန် ကူညီပေး၏။ ကျမ်းစာက ဤသို့အမှန်အတိုင်းဆိုသည်– “လူသည် မိန်းမဖွားသောသူဖြစ်သဖြင့် အသက်တို၍ [ဆင်းရဲခြင်း] နှင့်ပြည့်စုံပါ၏။” (ယောဘ ၁၄:၁) ကျွန်ုပ်တို့ခံနေရသော စုံစမ်းနှောင့်ယှက်မှုတချို့သည် ကျွန်ုပ်တို့၏မစုံလင်မှုကြောင့်ဖြစ်သည်။ သို့သော် လူသားတို့ခံစားနေရသော ဆင်းရဲဝေဒနာများအတွက် အဓိကတရားခံကား မည်သူနည်း။
ကျမ်းစာက ထိုသူသည် စာတန်အမည်ရှိ ဆိုးညစ်သည့်ဝိညာဉ်သားတစ်ဦးဖြစ်၏ဟု ဖော်ပြသည်။ သူသည် “ဤလောကတစ်နိုင်ငံလုံးကိုလှည့်ဖြား” နေ၍ ပြဿနာပေါင်းစုံကိုဖြစ်ပေါ်နေစေသည်။ သို့သော်လည်း သူ၏အချိန် ကုန်ဆုံးတော့မည်ဟု ကျမ်းစာကဆိုသည်။ (ဗျာ. ၁၂:၉၊ ၁၂) မကြာမီ ကမ္ဘာသူကမ္ဘာသားအပေါင်း ကြုံတွေ့နေရသော အမင်္ဂလာအပေါင်းသည် ဘုရားသခင်ကြားဝင်ဆောင်ရွက်မှုဖြင့် အဆုံးတိုင်တော့မည်။ သမ္မာကျမ်းစာအရ ဘုရားသခင်ကတိပြုထားသည့် ဖြောင့်မတ်ခြင်းတရားတည်ရာ ကမ္ဘာသစ်တွင် မျှော်လင့်ချက်ကင်းမဲ့မှုနှင့် စိတ်ပျက်အားလျော့မှုတို့ ရှိတော့မည်မဟုတ်။—၂ ပေတရု ၃:၁၃။
လူတို့ခံစားနေရသည့် ဆင်းရဲဝေဒနာသည် တဒင်္ဂမျှသာဖြစ်ကြောင်း သိရခြင်းက တကယ်နှစ်သိမ့်မှုပေးသည်တကား! ယေရှုခရစ်အစိုးရသော ဘုရားသခင့်ကောင်းကင်နိုင်ငံတော်၏ အုပ်ချုပ်မှုအောက်တွင် မတရားမှုနှင့် ဆင်းရဲဝေဒနာများ ရှိတော့မည်မဟုတ်။ ဘုရားသခင်ခန့်အပ်ထားသောဘုရင်နှင့်စပ်လျဉ်း၍ ကျမ်းစာကဤသို့ဆို၏– ကိုယ်တော်သည် “ငတ်မွတ်သောသူအော်ဟစ်သောအခါ ထိုသူကိုလည်းကောင်း၊ ကိုးကွယ်ရာမရှိ၍ ဆင်းရဲသောသူကိုလည်းကောင်း ချမ်းသာပေးတော်မူလိမ့်မည်။ ဆင်းရဲသောသူနှင့် ငတ်မွတ်သောသူကိုသနား၍ ငတ်မွတ်သောသူတို့၏အသက်ကို ကယ်တင်တော်မူလိမ့်မည်။ သူတို့အသက်ကို လှည့်စားခြင်းနှင့် ညှဉ်းဆဲခြင်း၏လက်မှရွေးနုတ်၍ သူတို့အသွေးကို နှမြောတော်မူလိမ့်မည်။”—ဆာလံ ၇၂:၁၂-၁၄။
ဤပရောဖက်ပြုချက်စကားများ ပြည့်စုံမည့်အချိန်သည် အလွန်နီးကပ်နေလေပြီ။ အားရရွှင်လန်းဖွယ်အခြေအနေများရှိ ပရဒိသုမြေကြီးပေါ်တွင် ကျွန်ုပ်တို့ထာဝစဉ်အသက်ရှင်နေထိုင်နိုင်ကြပါမည်။ (လုကာ ၂၃:၄၃; ယောဟန် ၁၇:၃) နှစ်သိမ့်မှုပေးသည့် ကျမ်းဆိုင်ရာဤကတိတော်များကို သိရှိထားခြင်းသည် အကူအညီရလိုသူများကို မျှော်လင့်ချက်နှင့် နှစ်သိမ့်မှုပေးသည်။
[Picture Credit Line on page 32]
Depressed girl: Photo ILO/J. Maillard