ယေဟောဝါ၊ အမှန်တရား၏ ဘုရားသခင်
ယေဟောဝါ၊ အမှန်တရား၏ ဘုရားသခင်
“သစ္စာစောင့်တော်မူသောဘုရားသခင် [“အမှန်တရား၏ဘုရားသခင်၊” ကဘ] ထာဝရဘုရား ကိုယ်တော်သည် အကျွန်ုပ်ကိုရွေးနုတ်တော်မူ . . . ၏။”—ဆာလံ ၃၁:၅။
၁။ မုသာဝါဒမရှိမီက ကောင်းကင်နှင့် မြေကြီးပေါ်တွင် အဘယ်အခြေအနေများရှိခဲ့သနည်း။
မုသာဝါဒမရှိသည့်အချိန်တစ်ချိန် ရှိခဲ့ဖူးပါသည်။ မျက်မြင်မရကောင်းကင်အရပ်တွင် နေထိုင်ကြသော စုံလင်သည့်ဝိညာဉ်သတ္တဝါများသည် သူတို့၏ဖန်ဆင်းရှင်၊ ‘အမှန်တရား၏ဘုရားသခင်’ ကိုအမှုထမ်းခဲ့ကြသည်။ (ဆာလံ ၃၁:၅) မုသာမရှိ၊ လှည့်စားမှု လုံးဝမရှိခဲ့ပေ။ ယေဟောဝါသည် ဟုတ်မှန်ရာများကို ကိုယ်တော်၏ဝိညာဉ်သတ္တဝါများအား ကြားသိစေ၏။ သူတို့ကို ကိုယ်တော်ချစ်မြတ်နိုးပြီး သူတို့၏ကောင်းကျိုးကို အလွန်စိတ်ဝင်စားတော်မူသောကြောင့် ထိုသို့ပြုခဲ့ခြင်းဖြစ်သည်။ မြေကြီးပေါ်၌လည်း အလားတူပင်ဖြစ်သည်။ ယေဟောဝါသည် ပထမလူသားမောင်နှံကိုဖန်ဆင်းပြီးနောက် ကိုယ်တော်၏ ခန့်အပ်ခံလမ်းကြောင်းမှတစ်ဆင့် ရှင်းလင်း၊ ရိုးစင်း၍ မှန်ကန်သောနည်းဖြင့် သူတို့နှင့် အစဉ်ဆက်သွယ်ခဲ့သည်။ အမှန်တကယ်ကောင်းလိုက်မည်ဖြစ်ခြင်း!
၂။ မုသာဝါဒကို မည်သူစတင်ဖြစ်ပေါ်စေခဲ့သနည်း၊ အဘယ်ကြောင့်နည်း။
၂ သို့သော် နောက်ဆုံးတွင် ယေဟောဝါ၏ ဝိညာဉ်သတ္တဝါသားတစ်ဦးသည် ပြိုင်ဘက်ဘုရားတစ်ပါးအနေနှင့် ဘုရားသခင်အား ရဲတင်းစွာ ဆန့်ကျင်ခဲ့သည်။ စာတန်ဟူ၍ လူတို့သိလာကြသော ဤဝိညာဉ်သတ္တဝါသည် မိမိကို အခြားသူများ ဝတ်ပြုစေရန် လိုလားခဲ့သည်။ သူ၏ရည်ရွယ်ချက် အောင်မြင်စေဖို့ အခြားသူများကို ထိန်းချုပ်နိုင်ရန် မုသာကိုစတင်ဖြစ်ပေါ်စေခဲ့သည်။ ထိုသို့ပြုခြင်းအားဖြင့် သူသည် “မုသာစကား၌ကျင်လည်သော . . . မုသာ၏အဘ” ဖြစ်လာလေသည်။—ယောဟန် ၈:၄၄။
၃။ အာဒံနှင့်ဧဝတို့သည် စာတန်၏လိမ်လည်မှုများကို မည်သို့တုံ့ပြန်ခဲ့ကြသနည်း၊ အဘယ်အကျိုးဆက်များ ရရှိခဲ့သနည်း။
၃ ပထမလူမိန်းမ ဧဝကို စာတန်က ဘုရားသခင့်ပညတ်ကို သူလျစ်လျူရှုပြီး တားမြစ်ထားသောအသီးကိုစားမည်ဆိုလျှင် သေမည်မဟုတ်ဟု မြွေတစ်ကောင်အားဖြင့်ပြောခဲ့သည်။ ၎င်းသည် မုသာစကားဖြစ်၏။ ထို့အပြင် သူက ထိုအသီးကိုစားလျှင် ဘုရားသခင်ကဲ့သို့ဖြစ်လာပြီး ကောင်းမကောင်းသိလာလိမ့်မည်ဟု ပြောသေးသည်။ ထိုစကားသည်လည်း မုသာဖြစ်၏။ ဧဝသည် တစ်ခါမျှအလိမ်မခံရဖူးသော်လည်း မြွေပြောသောစကားသည် သူ့ခင်ပွန်းအာဒံကို ဘုရားသခင်မိန့်တော်မူခဲ့သည့်စကားနှင့် မတူကြောင်း သူသိခဲ့ရမည်။ သို့တိုင် ယေဟောဝါကိုမဟုတ် စာတန်ကို သူယုံကြည်ခဲ့သည်။ ကောင်းကောင်းလှည့်စားခံရပြီး အသီးကို သူယူစားလေ၏။ နောက်ပိုင်းတွင် အာဒံလည်း အသီးကိုစားခဲ့သည်။ (ကမ္ဘာဦး ၃:၁-၆) အာဒံသည် ဧဝကဲ့သို့ လိမ်လည်သည့်စကားကို ယခင်က တစ်ခါမျှမကြားခဲ့ဖူးချေ၊ သို့သော်လည်း သူသည် လှည့်ဖြားခံရခြင်းမဟုတ်ပေ။ (၁ တိမောသေ ၂:၁၄) သူ၏လုပ်ရပ်များအားဖြင့် သူ့ဖန်ဆင်းရှင်ကို ငြင်းပယ်ကြောင်း သူတင်ပြခဲ့သည်။ ထိုအခါ လူသားတို့အပေါ် ဆိုးဝါးသောအကျိုးဆက်များ ကျရောက်လေတော့သည်။ အာဒံ၏မနာခံမှုကြောင့် အပြစ်နှင့်သေခြင်းတရားအပြင် ယိုယွင်းဖောက်ပြန်ခြင်းနှင့် မရေတွက်နိုင်သော စိတ်ဆင်းရဲစရာများကို သူ၏သားမြေးအားလုံး ခံခဲ့ကြရသည်။—ရောမ ၅:၁၂။
၄။ (က) ဧဒင်ဥယျာဉ်တွင်ပြောခဲ့သော လိမ်လည်စကားများကား အဘယ်နည်း။ (ခ) စာတန်၏လှည့်စားမှုကိုမခံရဖို့ ကျွန်ုပ်တို့ အဘယ်အရာပြုလုပ်ရမည်နည်း။
၄ မုသာဝါဒသည်လည်း ပြန့်ပွားခဲ့သည်။ ဧဒင်ဥယျာဉ်၌ပြောခဲ့သော လိမ်လည်စကားများသည် ယေဟောဝါကိုယ်တော်တိုင်၏ ဖြောင့်မှန်မှုကို ထိပါးခဲ့ကြောင်း ကျွန်ုပ်တို့ အသိအမှတ်ပြုရကြမည်။ စာတန်က ဘုရားသခင်သည် ကလိန်ဉာဏ်ဆင်လျက် ပထမလူသားမောင်နှံအား ကောင်းမွန်ရာတစ်ခုကို မပေးဘဲထားသည်ဟု အခိုင်အမာဆိုခဲ့သည်။ ထိုသို့ လုံးဝမဟုတ်ပါ။ အာဒံနှင့်ဧဝတို့သည် သူတို့၏မနာခံမှုကြောင့် အကျိုးမခံစားခဲ့ရချေ။ ယေဟောဝါမိန့်တော်မူသည့်အတိုင်း သူတို့သေဆုံးခဲ့ကြရသည်။ သို့တိုင် ယေဟောဝါကို စာတန် ဆက်ရှုတ်ချပုတ်ခတ်ခဲ့ရာ ရာစုနှစ်များစွာကြာပြီးနောက် တမန်တော်ယောဟန်က စာတန်သည် “ဤလောကတစ်နိုင်ငံလုံးကိုလှည့်ဖြား” နေကြောင်း ရေးသားရသည့်အထိဖြစ်လေသည်။ (ဗျာ. ၁၂:၉) စာတန်၏လှည့်စားမှုကိုမခံရဖို့ ယေဟောဝါနှင့် ကိုယ်တော်၏နှုတ်မြွက်စကားတော်သည် ဖြောင့်မတ်မှန်ကန်ကြောင်း အပြည့်အဝယုံကြည်စိတ်ချရကြမည်။ ယေဟောဝါ၌ယုံကြည်စိတ်ချမှုကို သင်မည်သို့ပြုစုပျိုးထောင်ပြီး ကိုယ်တော်၏ရန်သူကြီး တိုးပွားများပြားစေခဲ့သော လှည့်စားမှုနှင့် လိမ်ညာမှုများကို မခံရလေအောင် မိမိကိုယ်ကို မည်သို့ကာကွယ်နိုင်သနည်း။
ယေဟောဝါ အမှန်တရားကိုသိ
၅၊ ၆။ (က) ယေဟောဝါ၌ အဘယ်အသိပညာရှိသနည်း။ (ခ) ယေဟောဝါ၏အသိပညာနှင့် လူ့အသိပညာကိုနှိုင်းယှဉ်လျှင် မည်သို့ရှိသနည်း။
၅ ယေဟောဝါသည် “အလုံးစုံတို့ကို . . . ဖန်ဆင်းတော်မူ” သောအရှင်ဖြစ်ကြောင်း သမ္မာကျမ်းစာက အမြဲဖော်ပြသည်။ (ဧဖက် ၃:၉) ကိုယ်တော်သည် “ကောင်းကင်၊ မြေကြီး၊ သမုဒ္ဒရာမှစ၍ ထိုအရပ်တို့၌ရှိသမျှတို့ကို ဖန်ဆင်းတော်မူသောဘုရားသခင်ဖြစ်တော်မူ၏။” (တမန်တော် ၄:၂၄) ယေဟောဝါသည် ဖန်ဆင်းရှင်ဖြစ်သောကြောင့် အရာခပ်သိမ်းနှင့်ပတ်သက်သော အမှန်တရားကို သိတော်မူ၏။ သာဓကအနေနှင့်– မိမိ၏နေအိမ်ကို ကိုယ်တိုင်ပုံစံရေးဆွဲပြီးနောက် ပျဉ်ချပ်တိုင်းကို သံနှင့်စွဲစေသော ကိုယ်တိုင်ဆောက်လုပ်သူတစ်ဦးကို ကြည့်ပါ။ ထိုသူသည် အိမ်တွင်းအိမ်ပြင်ကို နောကျေအောင်သိမည်ဖြစ်ပြီး အိမ်ကိုသတိပြုမိသူ မည်သူမဆိုထက် ထိုအိမ်အကြောင်း ပိုသိနားလည်ပါလိမ့်မည်။ မိမိတို့ကိုယ်တိုင် ပုံစံပြုလုပ်ထားရာများကို လူတို့ သိကျွမ်းကြသည်။ အလားတူပင် ဖန်ဆင်းရှင်သည် မိမိဖန်ဆင်းထားရာမှန်သမျှကို အပ်ကျမပ်ကျသိတော်မူ၏။
၆ ပရောဖက်ဟေရှာယသည် ယေဟောဝါ၏အသိပညာနယ်ပယ်ကို လှပစွာရုပ်လုံးဖော်ခဲ့သည်။ ကျွန်ုပ်တို့ဤသို့ဖတ်ရသည်– “ရေများကို လက်ဆွန်းဖြင့်ခြင်သောသူ၊ မိုးကောင်းကင်ကို မိမိလက်ဖြင့်ထွာသောသူ၊ မြေမှုန့်ကို တင်းတောင်းဖြင့်ချင့်တွက်သောသူ၊ တောင်ကြီးကို ချိန်ခွင်ဖြင့်လည်းကောင်း၊ တောင်ငယ်ကို ကပ်ပယ်ဖြင့်လည်းကောင်း ချိန်သောသူကား အဘယ်သူနည်း။ ထာဝရဘုရား၏ဝိညာဉ်ကို အဘယ်သူစစ်ကြောသနည်း။ ထိုဘုရား[သခင်]နှင့်တိုင်ပင်၍ အဘယ်သူသည် အကြံပေးသနည်း။ အဘယ်သူနှင့် တိုင်ပင်တော်မူသနည်း။ ထိုဘုရား[သခင်]ကို အဘယ်သူသွန်သင်သနည်း။ ထိုဘုရားအား တရားလမ်းကိုပြသောသူ၊ ပညာနည်းကိုပေးသောသူ၊ ဉာဏ်လမ်းကိုညွှန်သောသူကား အဘယ်သူနည်း။” (ဟေရှာယ ၄၀:၁၂-၁၄) မှန်ပါသည်၊ ယေဟောဝါသည် “အသိပညာနှင့်ပြည့်စုံသောဘုရား” သခင်ဖြစ်ပြီး “ပညာစုံလင်” တော်မူ၏။ (၁ ဓမ္မရာဇဝင် ၂:၃; ယောဘ ၃၆:၄; ၃၇:၁၆) ကိုယ်တော်နှင့်နှိုင်းယှဉ်လျှင် ကျွန်ုပ်တို့မသိသည်ကား များ၏! လူသားအပေါင်း ဆည်းပူးရယူထားသော အထင်ကြီးဖွယ်အသိပညာ အလွန်များပြားကြွယ်ဝပုံရှိသော်လည်း ဖန်ဆင်းရာများကို ကျွန်ုပ်တို့သိနားလည်ထားမှုသည် “[ဘုရားသခင့်] နည်းလမ်းတော်၏ အစွန်းအဖျား” ကိုပင် မမီသေးချေ။ “တန်ခိုးတော်ဆိုင်ရာ မိုးကြိုးသံ” နှင့်နှိုင်းလျှင် “သိုးသိုးသန့်သန့် [“တီးတိုးသံ၊” ကဘ]” ကဲ့သို့ဖြစ်သည်။—ယောဘ ၂၆:၁၄၊ သမ္မာ။
၇။ ယေဟောဝါ၏အသိပညာနှင့်ပတ်သက်၍ ဒါဝိဒ် အဘယ်အရာအသိအမှတ်ပြုခဲ့သနည်း၊ ထို့ကြောင့် အဘယ်အရာကို ကျွန်ုပ်တို့ အသိအမှတ်ပြုရမည်နည်း။
၇ ကျွန်ုပ်တို့ကို ယေဟောဝါဖန်ဆင်းတော်မူသောကြောင့် ကျွန်ုပ်တို့အကြောင်း ကိုယ်တော် အမှန်ကောင်းစွာသိပါသည်။ ယင်းကို ဒါဝိဒ်မင်းအသိအမှတ်ပြုခဲ့သည်။ သူဤသို့ရေးသားခဲ့သည်– “အိုထာဝရဘုရား ကိုယ်တော်သည် အကျွန်ုပ်ကိုစစ်ကြော၍ သိတော်မူ၏။ အကျွန်ုပ်ထိုင်ခြင်း၊ ထခြင်းအရာတို့ကိုသိတော်မူ၏။ အကျွန်ုပ်အကြံအစည်တို့ကို အဝေးကပင်နားလည်တော်မူ၏။ အကျွန်ုပ်သွားသောလမ်းကိုလည်းကောင်း၊ အိပ်ရာကိုလည်းကောင်း စစ်ဆေး၍ အကျွန်ုပ်ကျင့်သောအကျင့်အလုံးစုံတို့ကို ကျွမ်းတော်မူ၏။ အကျွန်ုပ်သည် စကားတစ်ခွန်းကိုမျှမမြွက်သော်လည်း အိုထာဝရဘုရား ကိုယ်တော်သည် အကြွင်းမဲ့သိတော်မူ၏။” (ဆာလံ ၁၃၉:၁-၄) လူတို့သည် လွတ်လပ်စွာရွေးချယ် ပြုလုပ်ကြကြောင်း ဒါဝိဒ်သိထား၏၊ ဘုရားသခင်အား နာခံဖို့၊ မနာခံဖို့ ရွေးချယ်ပြုလုပ်နိုင်စွမ်းကို ကျွန်ုပ်တို့အား ကိုယ်တော်ပေးအပ်ထား၏။ (တရားဟောရာ ၃၀:၁၉၊ ၂၀; ယောရှု ၂၄:၁၅) သို့ဖြစ်စေကာမူ ယေဟောဝါသည် ကျွန်ုပ်တို့ မိမိတို့ကိုယ်ကိုသိသည်ထက် ကျွန်ုပ်တို့ကို ကိုယ်တော်ပို၍သိတော်မူ၏။ ကိုယ်တော်သည် ကျွန်ုပ်တို့အတွက် အကောင်းဆုံးဖြစ်စေလိုတော်မူပြီး ကျွန်ုပ်တို့ကို လမ်းညွှန်ပေးနိုင်တော်မူသည်။ (ယေရမိ ၁၀:၂၃) အမှန်ဆိုလျှင် ကျွန်ုပ်တို့ကို အမှန်တရားသွန်သင်ပေးရန်၊ ဉာဏ်ပညာရှိပြီး ပျော်ရွှင်မှုရှိစေရန် ကိုယ်တော်ထက် အရည်အချင်းပြည့်မီသော ဆရာ၊ ပညာရှင်၊ အကြံပေးပုဂ္ဂိုလ် တစ်ဦးတစ်ယောက်မျှမရှိချေ။
ယေဟောဝါသည် ဖြောင့်မှန်တော်မူ၏
၈။ ယေဟောဝါသည် ဖြောင့်မှန်တော်မူကြောင်း ကျွန်ုပ်တို့မည်သို့သိရသနည်း။
၈ အမှန်တရားကိုသိခြင်းဟူသည် မှန်ရာကိုအမြဲပြောဆိုခြင်း၊ ဖြောင့်မှန်ခြင်းနှင့်မတူ တခြားစီဖြစ်သည်။ ဥပမာ၊ စာတန်သည် “[အမှန်]တရား၌မတည်မနေ” ခဲ့ချေ။ (ယောဟန် ၈:၄၄) ယေဟောဝါမူကား ‘အမှန်တရား ကြွယ်ဝတော်’ မူ၏။ (ထွက်မြောက်ရာ ၃၄:၆) သမ္မာကျမ်းစာက ယေဟောဝါ၏ဖြောင့်မှန်မှုကို တစ်သမတ်တည်းဖော်ပြသည်။ တမန်တော်ပေါလုက “ဘုရားသခင်သည် မုသာမသုံးနိုင်၊” “မုသာနှင့်ကင်းစင်တော်မူ” ၏ဟုဖော်ပြခဲ့သည်။ (ဟေဗြဲ ၆:၁၈; တိတု ၁:၁) ဖြောင့်မှန်ခြင်းသည် ဘုရားသခင်၏ အရေးပါသောဂုဏ်ရည်တော်တစ်ခုဖြစ်သည်။ ယေဟောဝါသည် ဖြောင့်မှန်တော်မူသောကြောင့် ကိုယ်တော်အား ကျွန်ုပ်တို့မှီခိုအားထား ယုံကြည်စိတ်ချနိုင်ပါသည်; ကိုယ်တော်သည် သစ္စာစောင့်သူများကို ဘယ်သောအခါမျှ မလှည့်စားချေ။
၉။ ယေဟောဝါ၏နာမတော်သည် အမှန်တရားနှင့် မည်သို့ဆက်စပ်လျက်ရှိသနည်း။
၉ ယေဟောဝါ၏နာမတော်ကိုယ်နှိုက်က ကိုယ်တော်၏ဖြောင့်မှန်ခြင်းကို ထင်ရှားစေသည်။ ဘုရားသခင့်နာမတော်၏အဓိပ္ပာယ်မှာ “ကိုယ်တော်ဖြစ်လာစေသည်” ဖြစ်၏။ ယင်းက ယေဟောဝါသည် ကတိတော်မှန်သမျှကို အဆင့်ဆင့်ပြည့်စုံစေသောသူဖြစ်၏ဟု ဖော်ပြသည်။ အခြားမည်သူမျှ ထိုအနေအထားမျိုးမရှိပေ။ ယေဟောဝါသည် အမြင့်မြတ်ဆုံးအရှင်ဖြစ်သောကြောင့် ကိုယ်တော်၏ကတိတော်များ အထမမြောက်စေရန် အဘယ်အရာကမျှ မတားဆီးနိုင်ချေ။ ယေဟောဝါသည် ဖြောင့်မှန်ရုံမက ကိုယ်တော်တစ်ပါးတည်းသာ မိန့်တော်မူသမျှကို အကောင်အထည်ပေါ်စေနိုင်သည့် တန်ခိုးနှင့် ဉာဏ်ပညာရှိ၏။
၁၀။ (က) ယေဟောဝါ၏ ဖြောင့်မှန်မှုကို ယောရှု မည်သို့တွေ့မြင်ခဲ့သနည်း။ (ခ) ယေဟောဝါ၏ အဘယ်ကတိတော်များပြည့်စုံလာသည်ကို သင်တွေ့မြင်ခဲ့ပြီနည်း။
၁၀ ယေဟောဝါ၏ဖြောင့်မှန်မှုကို အထင်အရှားဖော်ပြသော အံ့ဖွယ်ရာများကို မျက်မြင်ကိုယ်တွေ့ဖြစ်ခဲ့သူ များစွာအနက် တစ်ဦးမှာ ယောရှုဖြစ်သည်။ အီဂျစ်ပြည်တွင် ယေဟောဝါကြိုတင်အသိပေးပြီး ကပ်ဘေးဆယ်ပါးကျရောက်စေခဲ့ချိန်က ယောရှုသည် ထိုပြည်၌ရှိ၏။ အခြားပြည့်စုံချက်များအနက် ယောရှုတွေ့ကြုံခဲ့ရသည်မှာ ဣသရေလလူမျိုးကို အီဂျစ်ပြည်မှလွတ်မြောက်စေ၍ သူတို့ကိုဆန့်ကျင်သော တန်ခိုးကြီးသည့်ခါနာန်စစ်တပ်ကို ချေမှုန်းပြီး ကတိထားရာပြည်သို့ပို့ဆောင်မည်ဟူသော ယေဟောဝါ၏ကတိတော်များ ပြည့်စုံခြင်းပါဝင်သည်။ ယောရှုကွယ်လွန်ခါနီးတွင် ဣသရေလအသက်ကြီးသူများကို ဤသို့ပြောခဲ့သည်– “သင်တို့၏ဘုရားသခင်ထာဝရဘုရားသည် သင်တို့အဖို့မိန့်တော်မူသော ကောင်းကျိုးတစ်စုံတစ်ပါးမျှ မယုတ်မလျော့၊ အကုန်အစင်ပြည့်စုံကြောင်းကို သင်တို့သည် စိတ်နှလုံးထဲမှာသိကြ၏။” (ယောရှု ၂၃:၁၄) ယောရှုပြုလုပ်ခဲ့သောအံ့ဖွယ်အမှုများကို သင်ကိုယ်တိုင်မတွေ့မြင်ခဲ့ဖူးသော်လည်း သင့်ဘဝတွင် ဘုရားသခင့်ကတိတော်များ မှန်ကန်ကြောင်းကို တွေ့ကြုံဖူးသလော။
ယေဟောဝါသည် အမှန်တရားကိုဖော်ပြ
၁၁။ ယေဟောဝါသည် လူအပေါင်းကို အမှန်တရားကြားသိစေလိုကြောင်း အဘယ်အရာကတင်ပြသနည်း။
၁၁ အသိပညာကြွယ်သော်လည်း မိမိသားသမီးများနှင့် စကားသိပ်မပြောသည့်မိဘတစ်ဦးကို မြင်ယောင်ကြည့်ပါ။ ယေဟောဝါသည် ထိုသို့မဟုတ်သောကြောင့် ကျေးဇူးမတင်ပေလော။ ကိုယ်တော်သည် မေတ္တာဖြင့် လူတို့နှင့် အမြဲဆက်သွယ်တော်မူသည်။ သမ္မာကျမ်းစာက ကိုယ်တော်အား ‘မဟာသွန်သင်ရှင်’ ဟုခေါ်ဆိုထား၏။ (ဟေရှာယ ၃၀:၂၀) ကိုယ်တော့်စကား နားမထောင်လိုသူများကိုပင် ချစ်ခင်ကြင်နာစွာဖြင့် ကိုယ်တော်ဆက်သွယ်၏။ ဥပမာ၊ ယေဇကျေလ၏စကားကို လက်ခံမည်မဟုတ်ဟု ယေဟောဝါသိထားသူများထံ သွားရောက်ဟောပြောဖို့ သူ့ကိုတာဝန်ပေးခဲ့သည်။ ယေဟောဝါက “အချင်းလူသား ဣသရေလအမျိုးသားတို့ရှိရာသို့သွား၍ ငါ့စကားကိုဟောပြောလော့” ဟုမိန့်တော်မူ၏။ ထို့နောက် ဤသို့သတိပေးတော်မူသည်– “ဣသရေလအမျိုးတို့မူကား သင့်စကားကိုနားမထောင်ကြ။ ငါ့စကားကိုပင်နားမထောင်ကြ။ ဣသရေလအမျိုးသားအပေါင်းတို့သည် ခိုင်မာသောနဖူးနှင့် ခိုင်မာသောနှလုံးရှိကြ၏။” ထိုတာဝန်သည် အမှန်ခက်ခဲသောတာဝန်ဖြစ်သော်လည်း ယေဇကျေလသည် တာဝန်ကျေပွန်စွာထမ်းဆောင်ခဲ့၏၊ သို့ဖြင့် သူသည် ယေဟောဝါနည်းတူ ထောက်ထားစာနာတတ်ကြောင်း ဖော်ပြခဲ့သည်။ သင်ဟောပြောရန် တာဝန်ရထားသောနေရာသည် ခဲယဉ်းသဖြင့် ဘုရားသခင်ကို မှီခိုအားထားပြီး တာဝန်ဆက်ထမ်းဆောင်နေလျှင် ပရောဖက်ယေဇကျေလကို ကိုယ်တော်ခွန်အားပေးခဲ့သကဲ့သို့ သင့်ကိုလည်း အမှန်ကူညီလိမ့်မည်။—ယေဇကျေလ ၃:၄၊ ၇-၉။
၁၂၊ ၁၃။ ဘုရားသခင်သည် အဘယ်နည်းများဖြင့် လူတို့နှင့် ဆက်သွယ်ခဲ့ပြီနည်း။
၁၂ “လူအပေါင်းတို့သည် ကယ်တင်ခြင်းသို့ရောက်၍ [အမှန်]တရားကိုသိစေခြင်းငှာ” ယေဟောဝါအလိုရှိတော်မူ၏။ (၁ တိမောသေ ၂:၄) ကိုယ်တော်သည် ပရောဖက်များ၊ ကောင်းကင်တမန်များနှင့် မိမိချစ်မြတ်နိုးသောသား ယေရှုခရစ်မှတစ်ဆင့် မိန့်တော်မူခဲ့ပြီ။ (ဟေဗြဲ ၁:၁၊ ၂; ၂:၂) ပိလတ်ကို ယေရှုဤသို့မိန့်ဆိုခဲ့သည်– “[အမှန်]တရားဘက်၌သက်သေခံခြင်းငှာ ငါသည်မွေးဖွားခြင်းကိုခံ၍ ဤလောကသို့ကြွလာပြီ။ [အမှန်]တရားနှင့်စပ်ဆိုင်သမျှသောသူတို့သည် ငါ့စကားကိုနားထောင်ကြသည်။” ပိလတ်သည် ကယ်တင်ခြင်းရဖို့ ယေဟောဝါ၏ပြင်ဆင်ပေးချက်ကို ဘုရားသခင့်သားတော်ထံမှ တိုက်ရိုက်သင်ယူရန် အခွင့်ထူးရရှိခဲ့သည်။ သို့သော် ပိလတ်သည် အမှန်တရားဘက်၌မရှိခဲ့ချေ၊ ယေရှုထံမှ သင်ယူလိုစိတ်မရှိပါ။ ထိုသို့သင်ယူမည့်အစား “[အမှန်]တရားကား အဘယ်သို့နည်း” ဟုမထီမဲ့မြင်ပြု တုံ့ပြန်ခဲ့သည်။ (ယောဟန် ၁၈:၃၇၊ ၃၈) သူ့အတွက်ဝမ်းနည်းစရာပါတကား! အခြားသူများမူကား ယေရှုကြေညာသောအမှန်တရားကို လက်ခံနားထောင်ခဲ့ကြသည်။ တပည့်များကို ကိုယ်တော်ဤသို့မိန့်တော်မူခဲ့၏– “သင်တို့မျက်စိသည် မြင်သောကြောင့် မင်္ဂလာရှိ၏။ သင်တို့နားသည်လည်း ကြားသောကြောင့် မင်္ဂလာရှိ၏။”—မဿဲ ၁၃:၁၆။
၁၃ ယေဟောဝါသည် အမှန်တရားကို ကြာရှည်တည်ရှိစေရန် သမ္မာကျမ်းစာတွင် ထိန်းသိမ်းခဲ့ပြီး အရပ်ရပ်ရှိလူတို့ ယင်းကိုသိရှိစေရန် စီစဉ်ပေးခဲ့ပြီ။ သမ္မာကျမ်းစာသည် အရှိကိုအရှိအတိုင်းဖော်ပြသည်။ ဘုရားသခင့်ဂုဏ်ရည်တော်များ၊ ရည်ရွယ်ချက်များနှင့် မိန့်မှာချက်များကိုသာမက လူ့အခြေအနေအမှန်ကိုလည်း ဖော်ပြသည်။ ယေဟောဝါထံဆုတောင်းရာတွင် ယေရှုက “ကိုယ်တော်၏နှုတ်[မြွက်စကား]သည် [အမှန်]တရားဖြစ်ပါ၏” ဟုလျှောက်ဆိုခဲ့သည်။ (ယောဟန် ၁၇:၁၇) ထို့ကြောင့် သမ္မာကျမ်းစာသည် ပြိုင်ဘက်ကင်းသော စာအုပ်တစ်အုပ်ဖြစ်သည်။ သမ္မာကျမ်းစာတစ်အုပ်တည်းကိုသာ အရာခပ်သိမ်းသိတော်မူသောဘုရားသခင် မှုတ်သွင်းရေးသားခဲ့သည်။ (၂ တိမောသေ ၃:၁၆) ၎င်းသည် လူသားအပေါင်းအား ဘုရားသခင်ပေးသော အဖိုးတန်လက်ဆောင်ဖြစ်ပြီး ယင်းကို ကိုယ်တော့်ကျေးကျွန်များ တန်ဖိုးထားမြတ်နိုးကြသည်။ ၎င်းကို နေ့စဉ်ဖတ်ရှုခြင်းသည် ပညာရှိရာရောက်၏။
အမှန်တရားကို ဆုပ်ကိုင်ထားလော့
၁၄။ ယေဟောဝါပြုလုပ်ပေးမည်ဟု မိန့်မြွက်ခဲ့သော ကတိအချို့ကား အဘယ်နည်း၊ ကိုယ်တော့်ကို ကျွန်ုပ်တို့ အဘယ်ကြောင့် ယုံကြည်စိတ်ချသင့်သနည်း။
၁၄ သမ္မာကျမ်းစာတွင် ယေဟောဝါမိန့်မှာထားသည့်စကားကို ကျွန်ုပ်တို့ အလေးအနက်ထားသင့်သည်။ ကိုယ်တော်သည် မိန့်တော်မူသည့်အတိုင်းဖြစ်တော်မူပြီး ပြောသည့်အတိုင်း ပြုတော်မူမည်။ ဘုရားသခင်အား ကျွန်ုပ်တို့ယုံကြည်စိတ်ချဖို့အကြောင်း များစွာရှိသည်။ “ဘုရားသခင်ကိုမသိသောသူ၊ ငါတို့သခင်ယေရှုခရစ်၏ဧဝံဂေလိတရားကို နားမထောင်သောသူတို့ကို . . . ဒဏ်ပေးတော်မူ” မည်ဟု ယေဟောဝါမိန့်တော်မူသောစကားကို ကျွန်ုပ်တို့ယုံကြည်စိတ်ချနိုင်သည်။ (၂ သက်သာလောနိတ် ၁:၈) ယေဟောဝါက ဖြောင့်မတ်ခြင်းတရားလမ်းသို့ လိုက်သူများကို ကိုယ်တော်ချစ်သည်၊ ယုံကြည်သောသူတို့ကို ထာဝရအသက်ပေးမည်၊ နာကျင်မှု၊ အော်ဟစ်ခြင်းနှင့် သေခြင်းကိုပင် ဖယ်ရှားပစ်မည်ဟုဆိုသောအခါ ကိုယ်တော့်ကို ယုံကြည်စိတ်ချနိုင်ပါသည်။ အဆိုပါနောက်ဆုံးကတိတော်ကို ယုံကြည်စိတ်ချစေရန် ယေဟောဝါက “တစ်ဖန်တုံ ရေးထားလော့။ ဤစကားသည် သစ္စာစကား၊ ဟုတ်မှန်သောစကားဖြစ်၏” ဟူသောညွှန်ကြားချက်ကို တမန်တော်ယောဟန်အား အလေးအနက်မိန့်ဆိုခဲ့သည်။—ဗျာ. ၂၁:၄၊ ၅; သု. ၁၅:၉; ယောဟန် ၃:၃၆။
၁၅။ စာတန်မြေတောင်မြှောက်ပေးသော မုသာစကားအချို့ကား အဘယ်နည်း။
၁၅ စာတန်သည် ယေဟောဝါနှင့် လုံးဝဆန့်ကျင်သည်။ သူသည် လူတို့ကို ဉာဏ်အလင်းပေးမည့်အစား လှည့်ဖြား၏။ စစ်မှန်သောဝတ်ပြုရေးမှ လူတို့လမ်းလွဲသွားစေရန် စာတန်သည် မုသာစကားများစွာကို မြေတောင်မြှောက်ပေးသည်။ ဥပမာ၊ ဘုရားသခင်သည် အလွန်စိမ်းကားပြီး မြေကြီးသားတို့၏ဆင်းရဲမှုများကို အမှုမထားပါဟု ကျွန်ုပ်တို့ကို စာတန်ယူမှတ်စေလိုသည်။ အမှန်မှာ၊ သမ္မာကျမ်းစာက ယေဟောဝါသည် ကိုယ်တော်၏ဖန်ဆင်းရာများကို အလွန်ဂရုစိုက်တော်မူပြီး ဆိုးသွမ်းမှုနှင့် ဆင်းရဲခြင်းဝေဒနာများ ရှိသည့်အတွက် အလွန်ဝမ်းနည်းကြောင်းဖော်ပြသည်။ (တမန်တော် ၁၇:၂၄-၃၀) ထို့အပြင် ဝိညာဉ်ရေးရာများကို လိုက်စားခြင်းသည် အချိန်ဖြုန်းခြင်းသက်သက်ဖြစ်သည်ဟု လူတို့ကို စာတန် ယူမှတ်စေလိုသည်။ သို့သော် သမ္မာကျမ်းစာက “သင်တို့လုပ်ဆောင်သောအလုပ်မှစ၍ . . . နာမတော်ကိုထောက်၍ ပြသောမေတ္တာကိုလည်းကောင်း ဘုရားသခင်သည်မေ့လျော့ရအောင် မတရားသောအရှင်ဖြစ်တော်မူသည်မဟုတ်” ဟု ကျွန်ုပ်တို့ကိုစိတ်ချစေသည်။ ထို့အပြင် “ကိုယ်တော်ကိုကြိုးစား၍ရှာသောသူအား အကျိုးပေးတော်မူ” ၏ဟူ၍လည်း ရှင်းလင်းစွာဖော်ပြထားသည်။—ဟေဗြဲ ၆:၁၀; ၁၁:၆၊ သမ္မာ။
၁၆။ ခရစ်ယာန်များသည် အဘယ်ကြောင့် နိုးနိုးကြားကြားရှိပြီး အမှန်တရားကိုဆုပ်ကိုင်ထားကြရမည်နည်း။
၁၆ စာတန်နှင့်ပတ်သက်၍ တမန်တော်ပေါလု ဤသို့ရေးသားခဲ့သည်– ‘ထိုသို့မယုံကြည်သောသူတို့ကား၊ ဘုရားသခင်၏ပုံသဏ္ဌာန်တော်တည်းဟူသော ခရစ်တော်၏ဘုန်းအသရေနှင့်ပြည့်စုံသော ဧဝံဂေလိတရား၏အရောင်သည် အလင်းကိုမပေးစေခြင်းငှာ ဤလောကကိုအစိုးရသောဘုရားသခင်သည် သူတို့၏ဉာဏ်မျက်စိကိုကွယ်စေ၏။’ (၂ ကောရိန္သု ၄:၄) ဧဝနည်းတူ အချို့တို့သည် စာတန်၏လှည့်စားခြင်းကို ကောင်းကောင်းခံလိုက်ရကြသည်။ အခြားသူများမှာမူ လှည့်စားမခံရသော်လည်း မနာခံမှုလမ်းစဉ်ကို တမင်ရွေးချယ်ခဲ့သူ အာဒံ၏လမ်းစဉ်ကို လိုက်ခဲ့ကြ၏။ (ယုဒ ၅၊ ၁၁) ထို့ကြောင့် ခရစ်ယာန်များသည် နိုးနိုးကြားကြားရှိပြီး အမှန်တရားကိုဆုပ်ကိုင်ထားဖို့ အရေးကြီးသည်။
“ဟန်ဆောင်ခြင်းကင်းသော ယုံကြည်ခြင်း” ရှိဖို့ ယေဟောဝါတောင်းဆို
၁၇။ ဘုရားသခင့်မျက်နှာသာတော်ရရှိဖို့ ကျွန်ုပ်တို့ အဘယ်အရာပြုလုပ်ရမည်နည်း။
၁၇ ယေဟောဝါ၏နည်းလမ်းတော်ရှိသမျှသည် ဟုတ်မှန်သည်ဖြစ်ရာ မိမိအား ဝတ်ပြုကိုးကွယ်သူများလည်း ဟုတ်တိုင်းမှန်ရာဖြစ်ဖို့ ကိုယ်တော်မျှော်လင့်သည်။ ဆာလံဆရာက ဤသို့ရေးသားခဲ့သည်– ‘အိုထာဝရဘုရားသခင် တဲတော်၌ အဘယ်သူသည် တည်းရပါမည်နည်း။ သန့်ရှင်းသောတောင်တော်ပေါ်မှာ အဘယ်သူသည် နေရပါမည်နည်းဟူမူကား၊ ဖြောင့်မတ်သောအကျင့်၊ တရားသောအမှုကိုပြုကျင့်၍ သစ္စာစကားကို စိတ်နှလုံးပါလျက်ပြော . . . သောသူပေတည်း။’ (ဆာလံ ၁၅:၁-၅) ထိုသို့သီဆိုခဲ့ကြသောဂျူးများသည် ယေဟောဝါ၏ သန့်ရှင်းသောတောင်တော်အကြောင်း ကြားသည့်အခါ ဇိအုန်တောင်ကို သတိရကြမည်မှာ သေချာသည်၊ ထိုအရပ်တွင် ဒါဝိဒ်မင်းသည် တဲတော်ဆောက်လုပ်ခဲ့ပြီး ထိုတဲတော်သို့ ပဋိညာဉ်သေတ္တာကို ယူဆောင်ခဲ့၏။ (၂ ဓမ္မရာဇဝင် ၆:၁၂၊ ၁၇) ထိုတောင်တော်နှင့် တဲတော်က ပုံဆောင်သဘောဖြင့် ယေဟောဝါစံတော်မူသည့်နေရာကို သတိရစေသည်။ ထိုနေရာတွင် ဘုရားသခင့်မျက်နှာသာတော်ကို တောင်းခံဖို့ ကိုယ်တော့်ထံ လူတို့ချဉ်းကပ်နိုင်ခဲ့ကြသည်။
၁၈။ (က) ဘုရားသခင်နှင့်မိတ်ဆွေဖြစ်ဖို့ အဘယ်အရာလိုအပ်သနည်း။ (ခ) နောက်ဆောင်းပါးတွင် အဘယ်အကြောင်းဆွေးနွေးမည်နည်း။
၁၈ ယေဟောဝါ၏မိတ်ဆွေဖြစ်လိုသူ မည်သူမဆိုသည် အမှန်တရားကို နှုတ်ခမ်းဖျားနှင့်သာမဟုတ်ဘဲ “နှလုံးပါလျက်” ပြောဆိုရမည်။ ဘုရားသခင့်မိတ်ဆွေစစ်များသည် နှလုံးရိုးဖြောင့်ပြီး “ဟန်ဆောင်ခြင်းကင်းသော ယုံကြည်ခြင်း” ကိုထင်ရှားပြရမည်၊ အကြောင်းမှာ မှန်ကန်သည့်လုပ်ရပ်များသည် နှလုံးထဲမှဖြစ်ပေါ်လာသောကြောင့်တည်း။ (၁ တိမောသေ ၁:၅၊ သမ္မာ; မဿဲ ၁၂:၃၄၊ ၃၅) “လှည့်စားတတ်သောသူတို့ကို ထာဝရဘုရားစက်ဆုပ်ရွံရှာ” သောကြောင့် ဘုရားသခင့်မိတ်ဆွေတစ်ဦးသည် ကလိမ်မကျ၊ မလှည့်စားတတ်ချေ။ (ဆာလံ ၅:၆) ကမ္ဘာတစ်ဝန်းရှိ ယေဟောဝါသက်သေများသည် သူတို့၏ဘုရားသခင်ကိုတုပသည့်အနေဖြင့် ဟုတ်တိုင်းမှန်ရာပြောဆိုပြုမူဖို့ ကြိုးစားအားထုတ်ကြသည်။ ဤအကြောင်းကို နောက်ဆောင်းပါး၌ ဆွေးနွေးပါမည်။
သင်မည်သို့ဖြေဆိုမည်နည်း
• ယေဟောဝါသည် အရာခပ်သိမ်းနှင့်ပတ်သက်သော အမှန်တရားကို အဘယ်ကြောင့်သိတော်မူသနည်း။
• ယေဟောဝါသည် ဖြောင့်မှန်တော်မူကြောင်း အဘယ်အရာက တင်ပြသနည်း။
• အမှန်တရားကို ယေဟောဝါမည်သို့ဖော်ပြခဲ့ပြီနည်း။
• အမှန်တရားနှင့်စပ်လျဉ်း၍ ကျွန်ုပ်တို့သည် အဘယ်အရာလိုအပ်သနည်း။
[လေ့လာရန်မေးခွန်းများ]
[စာမျက်နှာ ၁၀ ပါ ရုပ်ပုံ]
အမှန်တရား၏ဘုရားသခင်သည် မိမိဖန်ဆင်းထားရာမှန်သမျှ အကြောင်းကို သိတော်မူ၏
[စာမျက်နှာ ၁၃ ပါ ရုပ်ပုံ]
ယေဟောဝါ၏ကတိတော်များ အမှန်ဖြစ်ပျက်လာပါလိမ့်မည်