အမှန်တရား၏ဘုရားသခင်ကို တုပခြင်း
အမှန်တရား၏ဘုရားသခင်ကို တုပခြင်း
“သင်တို့သည် ဘုရားသခင်၏ချစ်သားဖြစ်ကြသည်နှင့်အညီ၊ ဘုရားသခင်ကျင့်တော်မူသည်နည်းတူ ကျင့်ကြလော့။”—ဧဖက် ၅:၁။
၁။ အမှန်တရားနှင့်စပ်လျဉ်း၍ အချို့မည်သို့ ယုံကြည်ကြသနည်း၊ သူတို့၏ဆင်ခြင်သုံးသပ်မှုသည် အဘယ်ကြောင့်မှားသနည်း။
‘အမှန်တရားကား အဘယ်နည်း။’ (ယောဟန် ၁၈:၃၈) လွန်ခဲ့သောအနှစ် ၂,၀၀၀ နီးပါးက ပုန္တိပိလတ်မင်း၏ အဆိုပါ မထီမဲ့မြင်ပြုမေးခွန်းအရ အမှန်တရားကိုရှာမတွေ့နိုင်ဟူသော သဘောသက်ရောက်စေသည်။ ယနေ့ ယင်းကိုသဘောတူသူ များစွာရှိပေမည်။ အမှန်တရား၏သဘောသဘာဝ တိုက်ခိုက်ခံနေရသည်။ လူတိုင်း ကိုယ့်အမှန်တရား ကိုယ်သတ်မှတ်သည်ဟုလည်းကောင်း၊ အကြွင်းမဲ့အမှန်တရားဟူ၍မရှိဟုလည်းကောင်း၊ အမှန်တရားသည် အစဉ်ပြောင်းလဲနေသည်ဟုလည်းကောင်း ဆိုကြသည်ကို သင်ကြားဖူးပေမည်။ ထိုသို့ဆင်ခြင်သုံးသပ်ခြင်းသည် မှား၏။ သုတေသနပြုခြင်းနှင့် ပညာသင်ကြားခြင်းတို့၏ ပန်းတိုင်ကိုယ်နှိုက်သည် ကျွန်ုပ်တို့နေထိုင်သောကမ္ဘာနှင့်ပတ်သက်၍ အဖြစ်မှန်၊ အမှန်တရားကို သင်ယူဆည်းပူးရန်ဖြစ်သည်။ အမှန်တရားဟူသည် ကိုယ့်သဘောအတိုင်း ထင်မြင်ယူဆရမည့်ကိစ္စမဟုတ်ပါ။ ဥပမာ၊ လူ့ဝိညာဉ်စိုးလ်သည် မသေနိုင်၊ သို့မဟုတ် သေနိုင်သည် ဖြစ်ရမည်။ စာတန်ရှိသည်၊ သို့မဟုတ် မရှိဟူ၍ဖြစ်ရမည်။ ဘဝမှာ ရည်ရွယ်ချက်ရှိသည်၊ သို့မဟုတ် ရည်ရွယ်ချက်မရှိဟူ၍ ဖြစ်ရမည်။ အဘယ်အရာအတွက်မဆို အဖြေမှန်တစ်ခုတည်းသာ ရှိနိုင်ပါသည်။ အဖြေတစ်ခုသည် မှန်၍၊ အခြားတစ်ခု မှားရမည်၊ နှစ်ခုစလုံး မမှန်နိုင်ချေ။
၂။ ယေဟောဝါသည် အဘယ်နည်းများဖြင့် အမှန်တရား၏ဘုရားသခင်ဖြစ်သနည်း၊ အဘယ်မေးခွန်းများကို ယခုဆွေးနွေးကြမည်နည်း။
၂ ရှေ့ဆောင်းပါးတွင် ယေဟောဝါသည် အမှန်တရား၏ဘုရားသခင်ဖြစ်ကြောင်း ကျွန်ုပ်တို့သုံးသပ်ခဲ့ကြပြီ။ အရာခပ်သိမ်းနှင့်ပတ်သက်သော အမှန်တရားကို ကိုယ်တော်သိတော်မူ၏။ ယေဟောဝါသည် လှည့်စားတတ်သော ရန်သူကြီးစာတန်နှင့် လုံးဝမတူ အခါခပ်သိမ်း ဟုတ်မှန်တော်မူ၏။ ထို့အပြင် ယေဟောဝါသည် အမှန်တရားကို အခြားသူများအား ရက်ရက်ရောရော ဖော်ပြတော်မူ၏။ တမန်တော်ပေါလုက ခရစ်ယာန်ချင်းတို့ကို “သင်တို့သည် ဘုရားသခင်၏ချစ်သားဖြစ်ကြသည်နှင့်အညီ၊ ဘုရားသခင်ကျင့်တော်မူသည်နည်းတူ ကျင့်ကြလော့” ဟုတိုက်တွန်းခဲ့သည်။ (ဧဖက် ၅:၁) ကျွန်ုပ်တို့သည် ယေဟောဝါ၏သက်သေများအနေနှင့် အမှန်တရားနှင့်အညီ ပြောဆို၊ နေထိုင်ရာတွင် ကိုယ်တော်ကို မည်သို့တုပနိုင်ကြသနည်း။ ထိုသို့တုပဖို့ အဘယ်ကြောင့်အရေးကြီးသနည်း။ အမှန်တရားလမ်းစဉ်လိုက်သူများကို ယေဟောဝါနှစ်သက်ကြောင်း အဘယ်အာမခံချက်ရှိသနည်း။ ကြည့်ကြပါစို့။
၃၊ ၄။ တမန်တော်ပေါလုနှင့် ပေတရုတို့သည် ‘နောက်ဆုံးနေ့ရက်များ’ အတွင်း ဖြစ်ပျက်မည့်အရာကို မည်သို့ဖော်ပြခဲ့ကြသနည်း။
၃ ဘာသာရေးလိမ်ညာမှုများ ပေါများသောခေတ်တွင် ကျွန်ုပ်တို့အသက်ရှင်နေကြသည်။ ဘုရားသခင့်မှုတ်သွင်းခြင်းခံရ၍ တမန်တော်ပေါလု ကြိုဟောသည့်အတိုင်း ဤ ‘နောက်ဆုံးနေ့ရက်များ’ ရှိ လူအများသည် ဘုရားသခင်ဝတ်၌မွေ့လျော်ယောင်ဆောင်၍ မွေ့လျော်ခြင်းတန်ခိုးကို ငြင်းပယ်ကြ၏။ အချို့သည် “စိတ်နှလုံးယိုယွင်း” ကြသဖြင့် အမှန်တရားကို တွန်းလှန်တိုက်ခိုက်ကြသည်။ ထို့အပြင် “ဆိုးညစ်သောသူ၊ လှည့်ဖြားသောသူတို့မူကား၊ . . . ဆိုးညစ်ခြင်း၌ တရွေ့ရွေ့တိုးပွား” နေကြသည်။ ထိုသို့သောသူများသည် အစဉ်သဖြင့် သင်ယူလေ့လာနေကြသော်လည်း ‘အမှန်တရားကို သိကျွမ်းခြင်း’ သို့ အဘယ်အခါမျှ မရောက်နိုင်ကြချေ။—၂ တိမောသေ ၃:၁၊ ၅၊ ၇၊ ၈၊ ၁၃။
၄ တမန်တော်ပေတရုသည်လည်း နောက်ဆုံးနေ့ရက်များအကြောင်း ရေးသားရန် မှုတ်သွင်းခံခဲ့ရသည်။ သူပရောဖက်ပြုသည့်အတိုင်း လူတို့သည် အမှန်တရားကို ငြင်းပယ်ရုံမျှမက ဘုရားသခင့်နှုတ်မြွက်စကားတော်နှင့် ထိုတွင်ပါသောအမှန်တရားကို ကြွေးကြော်သူများအား ပြောင်လှောင်ကြသည်။ အဆိုပါကဲ့ရဲ့ပြောင်လှောင်သူများသည် နောဧခေတ်တွင် ကမ္ဘာမြေကြီး ရေလွှမ်းမိုးခံခဲ့ရကြောင်း၊ ထိုရေလွှမ်းမိုးခြင်းသည် လာမည့်တရားစီရင်ရာနေ့၏ နမူနာဖြစ်ကြောင်းကို “တမင်” လျစ်လျူရှုကြသည်။ ထိုသို့ သူတို့တမင်မေ့လျော့နေကြခြင်းသည် ဘာသာတရားမဲ့သူများကို ဘုရားသခင်ဖျက်ဆီးချိန်တွင် သူတို့ဘေးသင့်စရာဖြစ်ပေလိမ့်မည်။—၂ ပေတရု ၃:၃-၇၊ သမ္မာ။
ယေဟောဝါကျေးကျွန်များ အမှန်တရားသိကြ
၅။ ပရောဖက်ဒံယေလအရ “အမှုကုန်ရသည်ကာလ” တွင် အဘယ်အရာဖြစ်ပျက်မည်နည်း၊ ဤပရောဖက်ပြုချက် မည်သို့ပြည့်စုံခဲ့ပြီနည်း။
၅ “အမှုကုန်ရသည်ကာလ” ကိုဖော်ပြရာတွင် ပရောဖက်ဒံယေလက ဘုရားသခင့်လူမျိုးတော်တွင် အမှန်ထူးခြားသည့်အကြောင်းတစ်ခု—ဘာသာရေးနှင့်ဆိုင်သော အမှန်တရားပြန်ပေါ်ထွန်းလာမည်ဟု ကြိုဟောခဲ့သည်။ သူဤသို့ရေးသားခဲ့သည်– “အများသောသူတို့သည် ထိုစာကိုကြည့်ရှုသောအားဖြင့် ပညာတိုးပွားလိမ့်မည်။” (ဒံယေလ ၁၂:၄) ယေဟောဝါ၏လူမျိုးတော်သည် လှည့်စားသူကြီးကြောင့် ဝေခွဲမရမဖြစ်ကြ၊ အလင်းကွယ်မနေကြချေ။ ကျမ်းစာကို လှန်လှောကြည့်ရှုလေ့လာခဲ့ကြရာ စစ်မှန်သောအသိပညာကို သူတို့ရရှိခဲ့ကြပြီ။ ပထမရာစုတွင် ယေရှုသည် တပည့်များကို ဉာဏ်အလင်းရစေခဲ့သည်။ ကိုယ်တော်သည် ‘ကျမ်းစာကိုနားလည်စေခြင်းငှာ တပည့်တို့၏ဉာဏ်ကိုဖွင့်တော်မူ’ ၏။ (လုကာ ၂၄:၄၅) ယေဟောဝါသည် ကျွန်ုပ်တို့ခေတ်၌လည်း အလားတူ ပြုတော်မူပြီ။ ကိုယ်တော်၏နှုတ်မြွက်စကားတော်၊ ဝိညာဉ်တော်နှင့် အဖွဲ့အစည်းမှတစ်ဆင့် ကိုယ်တော်သည် မိမိသိရှိထားနှင့်သော အမှန်တရားကို ကမ္ဘာတစ်ဝန်းရှိ သန်းနှင့်ချီသောသူတို့အား သိနားလည်စေခဲ့ပြီ။
၆။ ယနေ့ ဘုရားသခင့်လူမျိုးတော်သည် အဘယ်ကျမ်းစာအမှန်တရားများကို သိနားလည်ကြသနည်း။
၆ ဘုရားသခင့်လူမျိုးတော်မဟုတ်ခဲ့လျှင် ကျွန်ုပ်တို့ သိနိုင်မည်မဟုတ်သော အကြောင်းအရာများစွာကို ဘုရားသခင့်လူမျိုးတော်အနေနှင့် ကျွန်ုပ်တို့သိနားလည်ခဲ့ကြပြီ။ လောကပညာရှင်များ နှစ်ထောင်ပေါင်းများစွာ ရှာဖွေစူးစမ်းခဲ့ကြသော မေးခွန်းများ၏အဖြေကို ကျွန်ုပ်တို့သိရှိကြပြီ။ ဥပမာ၊ ဆင်းရဲခြင်းဝေဒနာ အဘယ်ကြောင့်ရှိရကြောင်း၊ လူ အဘယ်ကြောင့်သေရကြောင်းနှင့် ကမ္ဘာချီငြိမ်းချမ်းမှုနှင့် စည်းလုံးမှုကို လူတို့ အဘယ်ကြောင့်မရနိုင်ကြောင်း ကျွန်ုပ်တို့သိရကြပြီ။ အနာဂတ်တွင် ဖြစ်ပျက်လာမည့် ဘုရားသခင့်နိုင်ငံတော်၊ မြေကြီးပရဒိသုနှင့် စုံလင်သောထာဝရအသက်တို့ကို မြင်ယောင်ခြင်းကောင်းချီးကို ကျွန်ုပ်တို့ရရှိခဲ့ကြပြီ။ အကြီးမြတ်ဆုံးအရှင်၊ ယေဟောဝါကို ကျွန်ုပ်တို့သိလာကြရပြီ။ ကိုယ်တော်၏နှစ်လိုဖွယ် ဂုဏ်ရည်တော်နှင့်တကွ ကိုယ်တော်ထံမှကောင်းချီးများရလိုလျှင် ကျွန်ုပ်တို့ အဘယ်အရာပြုလုပ်ရမည်ကို သိရှိလာပြီ။ အမှန်တရားကိုသိခြင်းက မမှန်ကန်ရာတို့ကို ခွဲခြားသိမြင်နိုင်စေသည်။ အမှန်တရားကို လက်တွေ့ကျင့်သုံးခြင်းက အချည်းနှီးဖြစ်သောအမှုများကို မလိုက်ဖို့ အကာအကွယ်ဖြစ်စေသည်၊ ဘဝမှအကောင်းဆုံးအရာကို ရရှိစေပြီး အနာဂတ်နှင့်ပတ်သက်၍ ထူးမြတ်လှသောမျှော်လင့်ချက်ရှိစေသည်။
၇။ ကျမ်းစာအမှန်တရားကို မည်သူတို့ရရှိနိုင်သနည်း၊ မည်သူတို့ မရနိုင်သနည်း။
၇ ကျမ်းစာအမှန်တရားကို သင်သိနားလည်ပါသလော။ နားလည်သည်ဆိုပါက သင်သည် ကောင်းချီးကြွယ်ဝစွာခံရပြီ။ စာရေးဆရာတစ်ဦးသည် စာအုပ်တစ်အုပ်ကိုရေးသောအခါ သူသည် လူအုပ်စုတစ်စု၏အကြိုက်ကိုလိုက်၍ စီစဉ်ရေးသားလေ့ရှိသည်။ စာအုပ်အချို့မှာ အဆင့်မြင့်ပညာတတ်များအတွက်ဖြစ်သည်၊ အချို့ကိုမူ ကလေးငယ်များအတွက်၊ အခြားစာအုပ်များကိုမူ အထူးပြုပညာရပ်နယ်ပယ်များမှ သူများအတွက် ရေးသားတတ်ကြသည်။ သမ္မာကျမ်းစာကို လူတိုင်းအလွယ်တကူရရှိနိုင်သော်လည်း လူအုပ်စုတစ်စုသာ ၎င်းကိုနားလည်ပြီး တန်ဖိုးထားလေးမြတ်ကြ၏။ ယေဟောဝါက သမ္မာကျမ်းစာကို မြေကြီးပေါ်မှ စိတ်နှိမ့်ချသူများအတွက် ရည်စူးရေးသားစေ၏။ ထိုသို့သောသူများသည် ပညာရေး၊ ယဉ်ကျေးမှု၊ ဘဝအဆင့်အတန်း သို့မဟုတ် လူမျိုးစုအခြေအနေ မည်သို့ပင်ရှိစေ သမ္မာကျမ်းစာ၏အနက်အဓိပ္ပာယ်ကို သိမြင်နားလည်နိုင်ကြသည်။ (၁ တိမောသေ ၂:၃၊ ၄) သို့သော် စိတ်ထားမမှန်သူများသည် ဉာဏ်မည်မျှပင်ထက်မြက်ပါစေ၊ ပညာမည်မျှရှိပါစေ ကျမ်းစာအမှန်တရားကို နားမလည်နိုင်ချေ။ ဘုရားသခင့်နှုတ်မြွက်စကားတော်၏ အဖိုးတန်အမှန်တရားကို စိတ်နေမြင့်သူ၊ မာနကြီးသူများ နားမလည်နိုင်ပါ။ (မဿဲ ၁၃:၁၁-၁၅; လုကာ ၁၀:၂၁; တမန်တော် ၁၃:၄၈) ထိုသို့သောစာအုပ်မျိုးကို ဘုရားသခင်တစ်ပါးတည်းသာ ထုတ်လုပ်ပေးနိုင်သည်။
ယေဟောဝါ၏ကျေးကျွန်များသည် ဖြောင့်မှန်ကြ
၈။ ယေရှုသည် အဘယ်ကြောင့် အမှန်တရား၏ပြယုဂ်ဖြစ်သနည်း။
၈ ယေဟောဝါနည်းတူ ကိုယ်တော်၏သစ္စာစောင့်သိသော သက်သေများသည် ဖြောင့်မှန်ကြ၏။ ယေဟောဝါ၏အဓိကသက်သေ၊ ယေရှုခရစ်သည် ကိုယ်တော်သွန်သင်သည့်အရာများ၊ ကိုယ်တော်အသက်ရှင်နေထိုင်ပုံနှင့် သေဆုံးပုံတို့အားဖြင့် အမှန်တရားကို အခိုင်အမာအတည်ပြုသည်။ ကိုယ်တော်သည် ယေဟောဝါ၏နှုတ်မြွက်စကားတော်နှင့် ကတိတော်များ မှန်ကန်ကြောင်း ထောက်ခံအတည်ပြုသည်။ ထို့ကြောင့် ယေရှုသည် ကိုယ်တော်တိုင်မိန့်မြွက်သည့်အတိုင်း အမှန်တရား၏ပြယုဂ်ဖြစ်တော်မူ၏။—ယောဟန် ၁၄:၆; ဗျာ. ၃:၁၄; ၁၉:၁၀။
၉။ မှန်ရာကိုပြောဆိုခြင်းနှင့်ပတ်သက်၍ ကျမ်းစာက အဘယ်သို့ဆိုသနည်း။
၉ ယေရှုသည် “ကျေးဇူးတရားနှင့်လည်းကောင်း၊ [အမှန်]တရားနှင့်လည်းကောင်းပြည့်စုံ” တော်မူပြီး “[ကိုယ်တော်]၏နှုတ်၌ မုသာမရှိ” ချေ။ (ယောဟန် ၁:၁၄; ဟေရှာယ ၅၃:၉) ယေရှုချမှတ်ခဲ့သော မှန်ရာကိုပြောဆိုသည့်ပုံနမူနာအတိုင်း ခရစ်ယာန်စစ်များ လိုက်လျှောက်ကြသည်။ ယုံကြည်သူချင်းတို့ကို ပေါလုဤသို့အကြံပြုခဲ့သည်– “မုသာစကားကိုပယ်ရှား၍၊ မှန်သောစကားကိုသာ အချင်းချင်းတစ်ယောက်နှင့်တစ်ယောက်ပြောကြလော့။ အကြောင်းမူကား၊ ငါတို့သည် အချင်းချင်းအင်္ဂါချင်းဖြစ်ကြ၏။” (ဧဖက် ၄:၂၅) အစောပိုင်းတွင် ပရောဖက်ဇာခရိက “တစ်ယောက်နှင့်တစ်ယောက် မှန်သောစကားကိုပြောကြလော့” ဟုရေးသားခဲ့သည်။ (ဇာခရိ ၈:၁၆) ခရစ်ယာန်များသည် ဘုရားသခင့်နှစ်သက်မှုရလိုသောကြောင့် မှန်ရာကိုပြောဆိုကြ၏။ ယေဟောဝါသည် ဖြောင့်မှန်တော်မူပြီး မုသာသုံးခြင်း၏ဆိုးကျိုးများကို သိတော်မူ၏။ ထို့ကြောင့် မိမိ၏ကျေးကျွန်များအား မှန်ရာကိုပြောဆိုစေလိုသည်။
၁၀။ အဘယ်ကြောင့်လူတို့ လိမ်ညာကြသနည်း၊ ဆိုးကျိုးများကား အဘယ်နည်း။
၁၀ လူအများသည် အကျိုးအမြတ်တစ်စုံတစ်ရာရရှိဖို့ အလွယ်တကူ လိမ်လည်ကြပေမည်။ ပြစ်ဒဏ်မခံရဖို့၊ တစ်နည်းနည်းဖြင့် အမြတ်ထုတ်နိုင်ဖို့၊ ချီးကျူးခံရဖို့ လူတို့လိမ်လည်တတ်ကြသည်။ သို့တိုင် လိမ်လည်ပြောဆိုတတ်သောအကျင့်သည် အကျင့်ဆိုးဖြစ်သည်။ ထို့ထက်ကား လိမ်လည်သူတစ်ဦးသည် ဘုရားသခင့်မျက်နှာသာမရနိုင်ပေ။ (ဗျာ. ၂၁:၈၊ ၂၇; ၂၂:၁၅) ကျွန်ုပ်တို့သည် ဟုတ်တိုင်းမှန်ရာပြောဆိုတတ်သူများဖြစ်ကြောင်း လူအများသိထားလျှင် ကျွန်ုပ်တို့၏စကားကို လူတို့ယုံမည်; ကျွန်ုပ်တို့ကို ယုံကြည်စိတ်ချလိမ့်မည်။ သို့သော် ကျွန်ုပ်တို့သည် မုသာစကားတစ်ခွန်းတည်းသာပြောလျှင်ပင် လူတို့သိသွားပါက နောက်နောင် မိမိတို့ပြောဆိုသမျှကို လူတို့အမြဲသံသယဖြစ်နေကြပေမည်။ အာဖရိကစကားပုံတစ်ခုက “တစ်ခါညာမိ၍ ဟုတ်မှန်သောစကားတစ်ထောင်ကို မယုံတော့” ဟုဆိုသည်။ နောက်စကားပုံတစ်ခုက ဤသို့ဆို၏– “လိမ်ညာတတ်သူတစ်ဦး အမှန်ကိုပြောသော်လည်း မယုံကြတော့။”
၁၁။ ဖြောင့်မှန်ခြင်းဟူသည် အဘယ်နည်းဖြင့် အမှန်ကိုပြောဆိုခြင်းထက်မက ဖြစ်သနည်း။
၁၁ ဖြောင့်မှန်ခြင်းဟူသည် မှန်ရာကိုပြောဆိုခြင်းမျှမကပါ။ ယင်းသည် ဘဝလမ်းစဉ်တစ်ခုဖြစ်သည်။ ကျွန်ုပ်တို့မည်သူမည်ဝါဖြစ်ကြောင်း ဖော်ပြသည်။ ကျွန်ုပ်တို့သည် အပြောအားဖြင့်သာမဟုတ်ဘဲ အလုပ်အားဖြင့်ပါ အမှန်တရားကိုသိစေသည်။ တမန်တော်ပေါလုက “သူတစ်ပါးကိုဆုံးမလျက်ပင် ကိုယ်ကိုမဆုံးမသလော။ သူ့ဥစ္စာကိုမခိုးနှင့်ဟုတရားဟောလျက်ပင် ကိုယ်တိုင်ခိုးသလော။ သူ့မယားကိုမပြစ်မှားနှင့်ဟုဆိုလျက်ပင် ကိုယ်တိုင်ပြစ်မှားသလော” ဟုမေးမြန်းခဲ့သည်။ (ရောမ ၂:၂၁၊ ၂၂) သူတစ်ပါးကို ကျွန်ုပ်တို့ အမှန်တရားသွန်သင်ပေးလိုလျှင် ကျွန်ုပ်တို့ပြုလေသမျှသည် ဖြောင့်မှန်ရမည်။ ကျွန်ုပ်တို့သည် ရိုးသားဖြောင့်မတ်သူများဖြစ်၏ဟု နာမည်ကောင်းရထားလျှင် ကျွန်ုပ်တို့သွန်သင်ပေးရာကို လူတို့ ပိုမိုလက်ခံနိုင်ကြပေလိမ့်မည်။
၁၂၊ ၁၃။ ဖြောင့်မှန်ခြင်းအကြောင်း လူငယ်တစ်ဦး မည်သို့ရေးသားခဲ့သနည်း၊ သူ၏ကျင့်ဝတ်စံနှုန်းမြင့်မားရခြင်းသည် အဘယ်ကြောင့်နည်း။
၁၂ ဖြောင့်မှန်ခြင်း၏ အရေးကြီးမှုကို ယေဟောဝါကျေးကျွန် လူငယ်များလည်း သိကြသည်။ အသက် ၁၃ နှစ်အရွယ်ရှိစဉ်က ဂျဲနီသည် ကျောင်းစာစီစာကုံးတစ်ပုဒ်တွင် ဤသို့ရေးခဲ့ဖူးသည်– “ရိုးသားဖြောင့်မတ်ခြင်းကို ကျွန်မအလွန်တန်ဖိုးထားသည်။ ဝမ်းနည်းစရာမှာ ယနေ့ လူရိုးလူဖြောင့် မရှိသလောက်ဖြစ်သည်။ သို့သော် ကျွန်မဘဝတစ်လျှောက် ရိုးသားဖြောင့်မတ်မည်ဟု ကိုယ့်ကိုယ်ကိုကတိပြုထားပါသည်။ ဟုတ်တိုင်းမှန်ရာပြောသည့်အတွက် ကျွန်မနှင့် ကျွန်မ၏မိတ်ဆွေသူငယ်ချင်းများကို လတ်တလောအကျိုးမပြုသည့်တိုင် ရိုးသားဖြောင့်မတ်ဖို့ ကျွန်မအမြဲကြိုးစားမည်။ ကျွန်မ၏မိတ်ဆွေသူငယ်ချင်းများသည် မှန်ရာပြောဆိုသည့် ရိုးသားဖြောင့်မတ်သူများဖြစ်ကြောင်း သေချာစေသည်။”
၁၃ ထိုစာစီစာကုံးနှင့်ပတ်သက်၍ ဂျဲနီ၏ဆရာမက ဤသို့မှတ်ချက်ချခဲ့သည်– “မင်း အသက်ငယ်ငယ်လေးနဲ့ ဒီလို ကြံ့ခိုင်တဲ့ကိုယ်ကျင့်တရား၊ ကျင့်ဝတ်စည်းကမ်းတွေရှိနေပါလား။ စိတ်ဓာတ်ကြံ့ခိုင်တဲ့အတွက် အဲဒီမူအတိုင်း မင်းလိုက်လျှောက်သွားမှာ သေချာတယ်။” ဤကျောင်းသူလေး စိတ်ဓာတ်ကြံ့ခိုင်ခြင်းသည် အဘယ်ကြောင့်နည်း။ ဂျဲနီ၏စာစီစာကုံးနိဒါန်းပိုင်းတွင် သူက သူ၏ဘာသာတရားက “[သူ့]ဘဝအတွက် စံနှုန်းများချမှတ်ပေးသည်” ဟုဖော်ပြထားသည်။ ထိုစာစီစာကုံးကို လွန်ခဲ့သောခုနစ်နှစ်က ဂျဲနီရေးသားခဲ့သည်။ သူ၏ဆရာမ မှန်းဆခဲ့သည့်အတိုင်း ဂျဲနီသည် ယေဟောဝါသက်သေတစ်ဦးအနေနှင့် သူ၏ဘဝအသက်တာတွင် မြင့်မားသောကိုယ်ကျင့်တရားစံနှုန်းကို ဆက်လိုက်လျှောက်နေဆဲဖြစ်သည်။
ယေဟောဝါ၏ကျေးကျွန်များ အမှန်တရားဖော်ပြ
၁၄။ ဘုရားသခင့်ကျေးကျွန်များသည် မှန်ကန်ရာကိုစွဲကိုင်ထားဖို့ အလွန်ကြီးမားသောတာဝန်တစ်ရပ်ကို အဘယ်ကြောင့် ရရှိထားသနည်း။
၁၄ ယေဟောဝါသက်သေမဟုတ်သော အခြားသူများလည်း မှန်ကန်ရာကိုပြောဆို၍ ရိုးသားဖြောင့်မတ်ကြပေမည်။ သို့သော် ဘုရားသခင့်ကျေးကျွန်များအနေနှင့် ကျွန်ုပ်တို့သည် အမှန်တရားကိုထောက်ခံဖို့ အလွန်ကြီးမားသောတာဝန်ရှိသည်။ ကျမ်းစာအမှန်တရားဖြစ်သည့် ထာဝရအသက်သို့ ပို့ဆောင်နိုင်သော အမှန်တရားကို ကျွန်ုပ်တို့ ပေးအပ်ခံရကြပြီ။ ထို့ကြောင့် ထိုအသိပညာကို သူတစ်ပါးအား ဝေမျှပေးရန် ကျွန်ုပ်တို့၌တာဝန်ရှိသည်။ ယေရှုက “အကြင်သူသည် များစွာသောကျေးဇူးကိုခံရ၏၊ ထိုသူသည်အများကိုဆပ်ရ၏” ဟုမိန့်တော်မူခဲ့သည်။ (လုကာ ၁၂:၄၈) ဘုရားသခင်၏ တန်ဖိုးဖြတ်မရသော အသိပညာရရှိထားသည့်ကောင်းချီး ခံစားရသူများထံမှ ‘များစွာတောင်းဆို’ လိမ့်မည်အမှန်။
၁၅။ သူတစ်ပါးကို ကျမ်းစာအမှန်တရားဝေမျှပေးခြင်းမှ အဘယ်ပျော်ရွှင်မှုရရှိသနည်း။
၁၅ သူတစ်ပါးကို ကျမ်းစာအမှန်တရားဝေမျှပေးခြင်းမှ ပျော်ရွှင်မှုရရှိနိုင်သည်။ ကျွန်ုပ်တို့သည် ယေရှု၏ပထမရာစုတပည့်များနည်းတူ သတင်းကောင်းကို ကြေညာနေကြသည်၊ ထိုသတင်းသည် “ပင်ပန်းသည်ဖြစ်၍ ထိန်းသူမရှိဘဲ ပစ်ထားသောသိုးကဲ့သို့ ဖြစ်” သူများနှင့် ‘နတ်ဆိုးတို့၏သွန်သင်ချက်များ’ ကြောင့် အလင်းကွယ်၍ ဝေခွဲမရဖြစ်နေသူများကို အားရကြည်နူးစေ၍ မျှော်လင့်ချက်ပေးသည်။ (မဿဲ ၉:၃၆; ၁ တိမောသေ ၄:၂) တမန်တော်ယောဟန်က “ငါ၏သားသမီးတို့သည် [အမှန်]တရား၌ကျင်လည်သည်ကို ငါကြား၍ဝမ်းမြောက်ခြင်းထက် သာ၍ဝမ်းမြောက်ခြင်းမရှိ” ဟုရေးသားခဲ့သည်။ (၃ ယောဟန် ၄) ယောဟန်သည် အမှန်တရားသို့ သူခေါ်ဆောင်လာခဲ့သူများ ဖြစ်ကောင်းဖြစ်မည့် သူ၏ “သားသမီး” တို့သစ္စာရှိသောကြောင့် အကြီးအကျယ်အားရရွှင်လန်းခဲ့သည်။ ဘုရားသခင့်နှုတ်မြွက်စကားတော်ကို လူတို့ တန်ဖိုးထားလေးမြတ်ကြခြင်းက ကျွန်ုပ်တို့ကို အားရရွှင်လန်းစေသည်။
၁၆၊ ၁၇။ (က) အမှန်တရားကို လူတိုင်း အဘယ်ကြောင့်လက်မခံကြသနည်း။ (ခ) ကျမ်းစာအမှန်တရားကို ကြေညာစဉ် အဘယ်ပျော်ရွှင်မှုရရှိနိုင်သနည်း။
၁၆ လူတိုင်း အမှန်တရားကို လက်ခံကြမည်မဟုတ်သည်မှာ မှန်၏။ ယေရှုသည် ဘုရားသခင်အကြောင်း အမှန်တရားကို လူအများ လက်မခံကြသည့်တိုင် ဟောပြောတင်ပြခဲ့သည်။ ဂျူးအတိုက်အခံပြုသူများကို ကိုယ်တော်ဤသို့မိန့်တော်မူခဲ့၏– “[ငါ့ကို]အဘယ်ကြောင့်သင်တို့ မယုံကြသနည်း။ ဘုရားသခင်နှင့်စပ်ဆိုင်သောသူသည် ဘုရားသခင်၏စကားတော်ကို နားထောင်တတ်၏။ သင်တို့သည် ဘုရားသခင်နှင့်မစပ်ဆိုင်သောကြောင့် နားမထောင်ကြ။”—ယောဟန် ၈:၄၆၊ ၄၇။
၁၇ ကျွန်ုပ်တို့သည် ယေရှုကဲ့သို့ ယေဟောဝါနှင့်ပတ်သက်သော အဖိုးတန်အမှန်တရားကို မပြောဘဲမနေကြပါ။ ယေရှု၏စကားကို လူတိုင်းလက်မခံခဲ့ကြသည့်နည်းတူ ကျွန်ုပ်တို့၏စကားကိုလည်း လူတိုင်းလက်ခံမည်ဟု မမျှော်လင့်နိုင်ပေ။ သို့သော် မှန်ကန်ရာကိုလုပ်ဆောင်နေသည်ဟူသောအသိကြောင့် ကျွန်ုပ်တို့ပျော်ရွှင်နိုင်ကြသည်။ ယေဟောဝါသည် ချစ်ခင်ကြင်နာသောကြောင့် ကိုယ်တော်သည် အမှန်တရားကို လူသားတို့အား သိစေလိုသည်။ အမှန်တရားကို ရရှိပိုင်ဆိုင်ထားသူများအနေနှင့် ခရစ်ယာန်များသည် ဤမှောင်မိုက်သောလောကတွင် အလင်းဆောင်သူများဖြစ်လာကြသည်။ ကျွန်ုပ်တို့၏အပြောအဆိုအပြုအမူများအားဖြင့် အမှန်တရားအလင်းကို ထွန်းလင်းစေခြင်းဖြင့် ကောင်းကင်ခမည်းတော်၏ဂုဏ်တော်ကို ချီးမွမ်းစရာဖြစ်စေနိုင်သည်။ (မဿဲ ၅:၁၄၊ ၁၆) အမှန်တရားပါဟု စာတန်အဆိုပြုသောအတုအလိမ်ကို ကျွန်ုပ်တို့ငြင်းပယ်ပြီး စင်ကြယ်၍ စစ်မှန်သော ဘုရားသခင့်နှုတ်မြွက်စကားတော်ကို လူအများရှေ့ အတည်ပြုထောက်ခံပြောဆိုကြသည်။ ကျွန်ုပ်တို့သိရှိထားပြီး သူတစ်ပါးအား ဝေမျှပြောဆိုပေးသောအမှန်တရားသည် လက်ခံသူတို့ကို စစ်မှန်သောလွတ်လပ်မှု ပေးနိုင်သည်။—ယောဟန် ၈:၃၂။
ဖြောင့်မှန်သည့်လမ်းစဉ်ကို လိုက်လော့
၁၈။ ယေရှုသည် နာသနေလကို အဘယ်ကြောင့်နှင့် မည်သို့မျက်နှာသာပြခဲ့သနည်း။
၁၈ အမှန်တရားကို ယေရှုချစ်မြတ်နိုးပြီး ယင်းကိုဟောပြောခဲ့သည်။ မြေကြီးပေါ်ဓမ္မအမှုဆောင်စဉ်တွင် ကိုယ်တော်သည် ဟုတ်တိုင်းမှန်ရာပြောဆိုတတ်သူများကို မျက်နှာသာပြခဲ့သည်။ နာသနေလနှင့်ပတ်သက်၍ ယေရှုက “လှည့်စားခြင်းအပြစ်နှင့်ကင်းလွတ်သော ဣသရေလလူစစ်ကိုကြည့်လော့” ဟုမိန့်ဆိုခဲ့သည်။ (ယောဟန် ၁:၄၇) ထို့နောက် ဗာသောလမဲဟူ၍လည်း ခေါ်ဆိုခံခဲ့ရသူ နာသနေလသည် တမန်တော် ၁၂ ပါးတွင် တစ်ဦးပါဝင်ဖို့ ရွေးချယ်ခံခဲ့ရသည်။ (မဿဲ ၁၀:၂-၄) အမှန်တကယ်ဂုဏ်ယူစရာပင်!
၁၉-၂၁။ တစ်ချိန်က မျက်မမြင်ဖြစ်ခဲ့ဖူးသူသည် သတ္တိရှိရှိ မှန်ကန်ရာကိုပြောဆိုခဲ့သည့်အတွက် မည်သို့ကောင်းချီးခံစားခဲ့ရသနည်း။
၁၉ ယောဟန်ကျမ်းအခန်းကြီးတစ်ခန်းလုံးတွင် ယေရှု၏ကောင်းချီး ခံစားခဲ့ရသော ရိုးဖြောင့်သူနောက်တစ်ဦးအကြောင်း ဖတ်ရှုရသည်။ ထိုသူ၏အမည်ကို ကျွန်ုပ်တို့မသိကြပါ။ သို့သော် သူသည် မွေးကတည်းက မျက်မမြင် သူတောင်းစားတစ်ဦးဖြစ်ကြောင်း သိရသည်။ သူ့ကို ယေရှုမြင်စေသောအခါ လူတို့အံ့အားသင့်ခဲ့ကြသည်။ ယေရှုအားယုံကြည်သူ မည်သူမဆိုကို တရားဇရပ်မှနှင်ထုတ်ဖို့ သဘောတူထားကြသော အမှန်တရားမုန်းတီးသူ ဖာရိရှဲအချို့၏နားသို့ ဤအံ့ဖွယ်ကုသမှုသတင်း ပေါက်ကြားသွားခဲ့သည်။ တစ်ချိန်က မျက်မမြင်ဖြစ်ခဲ့သူ၏ ကြောက်တတ်သောမိဘများသည် သူတို့၏အကြံအစည်ကိုသိထားကြရာ မိမိတို့သားသည် အဘယ်ကြောင့် ယခုမျက်စိမြင်နိုင်သည်ကိုလည်းကောင်း၊ အဘယ်သူကုသပေးသည်ကိုလည်းကောင်း မိမိတို့မသိဟု ဖာရိရှဲများအား လိမ်ညာပြောဆိုခဲ့ကြသည်။—ယောဟန် ၉:၁-၂၃။
၂၀ ထိုကုသခံရသူသည် ဖာရိရှဲများရှေ့ ရောက်ရပြန်သည်။ မည်သည့်အကျိုးဆက်ကိုမျှ ထည့်မတွက်ဘဲ အမှန်အတိုင်း သူရဲဝံ့စွာပြောဆိုခဲ့သည်။ သူက မိမိမည်သို့ကုသခံရကြောင်းနှင့် ကုသပေးသူမှာ ယေရှုဖြစ်ကြောင်း ရှင်းပြခဲ့သည်။ ယေရှုသည် ဘုရားသခင်ထံမှဖြစ်ကြောင်းကို ထင်ပေါ်ကျော်ကြားပြီး ပညာတတ်များဖြစ်သော ထိုသူတို့မယုံခြင်းကို အလွန်အံ့အားသင့်မိရာ ကုသခံရသူက “ထိုသူသည် ဘုရားသခင်စေလွှတ်တော်မူသောသူမဟုတ်လျှင် အဘယ်အမှုကိုမျှမတတ်နိုင်” ဟူသော သိသာထင်ရှားသည့်အချက်ကိုလက်ခံရန် မကြောက်မရွံ့ တိုက်တွန်းပြောဆိုခဲ့သည်။ ဖာရိရှဲများသည် တုံ့ပြန်ပြောဆိုနိုင်မည့်စကားမရှိသဖြင့် ထိုသူကို ရိုင်းစိုင်းသူဟုစွပ်စွဲပြီး နှင်ထုတ်ခဲ့ကြသည်။—ယောဟန် ၉:၂၄-၃၄။
၂၁ ထိုအကြောင်းကို ယေရှုကြားသိသောအခါ မေတ္တာရှေ့ထား၊ အချိန်ယူပြီး ထိုသူကို လိုက်လံရှာဖွေခဲ့သည်။ သူ့ကိုတွေ့သောအခါ ထိုမျက်မမြင်ဖြစ်ခဲ့ဖူးသူ ပြသခဲ့သည့်ယုံကြည်ခြင်းအပေါ်အခြေခံပြီး ယုံကြည်ခြင်းတိုးပွားစေခဲ့သည်။ မိမိသည် မေရှိယဖြစ်ကြောင်း ယေရှုပွင့်ပွင့်လင်းလင်းဖော်ပြလေသည်။ မှန်ရာကိုပြောဆိုခဲ့သည့်အတွက် ထိုသူ ကောင်းချီးခံစားရခြင်းပါတကား! မှန်ကန်ရာကိုပြောဆိုသူများသည် ဘုရားသခင့်မျက်နှာသာတော် အမှန်ရမည်ဖြစ်သည်။—ယောဟန် ၉:၃၅-၃၇။
၂၂။ ဟုတ်တိုင်းမှန်ရာပြုသောလမ်းစဉ်ကို ကျွန်ုပ်တို့ အဘယ်ကြောင့်လိုက်လျှောက်သင့်သနည်း။
၂၂ အမှန်တရားနှင့်အညီ ကျင့်ခြင်းကို ကျွန်ုပ်တို့အလေးအနက်ထားသင့်သည်။ လူလူချင်းနှင့်လည်းကောင်း၊ ဘုရားသခင်နှင့်လည်းကောင်း ဆက်ဆံရေးကောင်းရှိနေစေရန် ယင်းသည် အခြေခံဖြစ်၏။ မှန်ရာကိုပြောဆိုပြုမူခြင်းသည် ပွင့်လင်းရိုးသားခြင်း၊ ချဉ်းကပ်ရလွယ်ခြင်းနှင့် ယုံကြည်စိတ်ချရခြင်းတို့ဖြစ်ပြီး ယေဟောဝါ၏မျက်နှာသာတော်ကို ရရှိစေသည်။ (ဆာလံ ၁၅:၁၊ ၂) မမှန်မကန်ပြောဆိုပြုမူခြင်းမှာမူ လှည့်စားခြင်း၊ စိတ်မချရခြင်းနှင့် သစ္စာမဲ့ခြင်းဖြစ်ပြီး ယေဟောဝါ၏အမျက်တော် ခံစားစေသည်။ (သု. ၆:၁၆-၁၉) ထို့ကြောင့် ဟုတ်တိုင်းမှန်ရာပြုသောလမ်းစဉ်ကိုလိုက်လျှောက်ရန် ဆုံးဖြတ်ချက်ချပါ။ အမှန်တရား၏ဘုရားသခင်ကို ကျွန်ုပ်တို့တုပကြရန် ကျွန်ုပ်တို့သည် အမှန်တရားကိုသိရှိရမည်၊ မှန်ကန်ရာကိုပြောဆိုရမည်၊ အမှန်တရားနှင့်အညီ အသက်ရှင်နေထိုင်ကြရမည်။
သင်မည်သို့ဖြေဆိုမည်နည်း
• ကျွန်ုပ်တို့ အမှန်တရားသိရှိထားသည့်အတွက် အဘယ်ကြောင့် ကျေးဇူးတင်နိုင်သနည်း။
• ဖြောင့်မှန်မှုရှိခြင်းတွင် ယေဟောဝါကို ကျွန်ုပ်တို့ မည်သို့တုပနိုင် ကြမည်နည်း။
• သူတစ်ပါးကို ကျမ်းစာအမှန်တရားဝေမျှပေးခြင်းမှ အဘယ်အကျိုးကျေးဇူးများ ခံစားရသနည်း။
• ဖြောင့်မှန်သောလမ်းစဉ်ကို လိုက်လျှောက်ခြင်းသည် အဘယ်ကြောင့် အရေးကြီးသနည်း။
[လေ့လာရန်မေးခွန်းများ]
[စာမျက်နှာ ၁၇ ပါ ရုပ်ပုံ]
ကျမ်းစာအမှန်တရားအပ်နှင်းခံရသော ခရစ်ယာန်များသည် ယင်းကို အခြားသူများအား စိတ်အားထက်သန်စွာ ဝေမျှပေးကြ
[စာမျက်နှာ ၁၈ ပါ ရုပ်ပုံ]
ယေရှုကုသပေးခဲ့သော မျက်မမြင်သည် မှန်ရာပြောဆိုခြင်းအတွက် ကောင်းချီးများစွာရရှိခဲ့