ကျွန်ုပ်တို့ထံမှ ယေဟောဝါ အဘယ်အရာမျှော်လင့်သနည်း

ဖွင့်ပါ

ကျွန်ုပ်တို့ထံမှ ယေဟောဝါ အဘယ်အရာမျှော်လင့်သနည်း

“တရားသဖြင့်ပြုခြင်း၊ . . . [“ကြင်နာမှု၊” ကဘ] ကိုနှစ်သက်ခြင်း၊ သင်၏ဘုရားသခင့်ရှေ့တော်၌ နှိမ့်ချ [“ကျိုးနွံ၊” ကဘ] သော စိတ်နှင့် ကျင့်နေခြင်းမှတစ်ပါး အဘယ်ပူဇော်[ရာယဇ်]ကို ထာဝရဘုရား[သခင်]တောင်းတော်မူသနည်း။”—မိက္ခာ ၆:၈။

၁၊ ၂။ ယေဟောဝါ၏ကျေးကျွန်အချို့သည် အဘယ်ကြောင့် စိတ်ဓာတ်ကျလာကြသနည်း၊ သို့သော် အဘယ်အရာက အကူအညီဖြစ်စေနိုင်သနည်း။

ဗီရာသည် အသက် ၇၅ နှစ်ခန့်ရှိပြီး ကျန်းမာရေးချူချာသော သစ္စာရှိခရစ်ယာန်တစ်ဦးဖြစ်သည်။ “တစ်ခါတလေ အမှုဆောင်ထွက်နေကြတဲ့ ကျွန်မရဲ့ခရစ်ယာန်ညီအစ်ကို၊ ညီအစ်မတွေကို ပြတင်းပေါက်ကနေ တွေ့နေရတယ်။ သူတို့နဲ့အတူ ကျွန်မအမှုဆောင်ထွက်ချင်ပေမဲ့ နေမကောင်းလို့ ယေဟောဝါရဲ့အမှုတော်ကို အကန့်အသတ်ပဲ ထမ်းဆောင်နိုင်တာမို့ မျက်ရည်ကျမိတယ်” ဟုသူပြောပြသည်။

^၂အသင်လည်း ထိုသို့ခံစားဖူးသလော။ အမှန်ဆိုရလျှင် ယေဟောဝါအား ချစ်မြတ်နိုးသူအားလုံးသည် ကိုယ်တော်၏နာမတော်၌ လျှောက်လှမ်းပြီး ကိုယ်တော်၏တောင်းဆိုချက်များနှင့်အညီ လုပ်ဆောင်လိုကြသည်။ သို့သော် ကျွန်ုပ်တို့သည် ကျန်းမာရေးချူချာနေမည်၊ အသက်အရွယ်ကြီးရင့်နေမည်၊ သို့မဟုတ် မိသားစုတာဝန်များရှိနေမည်ဆိုလျှင်ကော အသို့နည်း။ ဤသို့သောအခြေအနေများကြောင့် ဘုရားသခင်၏အမှုတော်တွင် ကျွန်ုပ်တို့ထမ်းဆောင်ချင်သလောက် မထမ်းဆောင်နိုင်သည့်အတွက် အတန်အရာစိတ်ဓာတ်ကျပေမည်။ ကျွန်ုပ်တို့၏အခြေအနေသည် ဤသို့ဖြစ်မည်ဆိုလျှင် မိက္ခာကျမ်းအခန်းကြီး ၆ နှင့် ၇ ကို သုံးသပ်ခြင်းဖြင့် အလွန်အားတက်လာနိုင်ပေသည်။ ယေဟောဝါ၏တောင်းဆိုချက်များသည် အကျိုးသင့်အကြောင်းသင့်ရှိရုံမက လက်လှမ်းမီနိုင်ကြောင်း ဤအခန်းကြီးများက ဖော်ပြသည်။

ဘုရားသခင်သည် မိမိ၏လူမျိုးတော်ကို ဆက်ဆံပုံ

၃။ ပုန်ကန်သောဣသရေလလူမျိုးကို ယေဟောဝါ မည်သို့ဆက်ဆံသနည်း။

^၃ဦးစွာ မိက္ခာ ၆:၃-၅ ကိုဖတ်ပြီး ယေဟောဝါသည် မိမိ၏လူမျိုးတော်ကို မည်သို့ဆက်ဆံကြောင်း သတိပြုကြစို့။ မိက္ခာခေတ်ရှိ ဣသရေလလူမျိုးသည် ပုန်ကန်ကြသည်ကို သတိရပါ။ သို့တိုင် ယေဟောဝါက “အိုငါ၏လူမျိုး” ဟူ၍ သူတို့ကို သနားကြင်နာစွာ ခေါ်ဆိုသည်။ ကိုယ်တော်က ‘အိုငါ၏လူမျိုး . . . [“ကျေးဇူးပြု၍၊” ကဘ] အောက်မေ့ပါ’ ဟုတောင်းပန်၏။ သူတို့ကို ကိုယ်တော်ကြမ်းတမ်းစွာ အပြစ်တင်ပြောဆိုမည့်အစား “သင့်ကို အဘယ်သို့ငါပြုဖူးသနည်း” ဟုမေးခြင်းဖြင့် သူတို့နှလုံးကိုထိမိဖို့ ကြိုးစားခဲ့သည်။ ကိုယ်တော့်တစ်ဖက်၌ “သက်သေခံ” ဖို့ပင် တိုက်တွန်းလိုက်သေးသည်။

၄။ ဘုရားသခင်၏သနားကြင်နာမှု ပုံသက်သေသည် ကျွန်ုပ်တို့အပေါ် အဘယ်အကျိုးသက်ရောက်သင့်သနည်း။

^၄ကျွန်ုပ်တို့အားလုံးအတွက် ဘုရားသခင်ပြခဲ့သော ပုံသက်သေပါတကား! ကိုယ်တော်သည် မိက္ခာခေတ်ရှိ ပုန်ကန်သူ ဣသရေလနှင့် ယုဒလူမျိုးတို့ကို “ငါ၏လူမျိုး” ဟုပင် သနားကြင်နာစွာ ခေါ်ဆိုပြီး သူတို့အား တိုက်ရိုက်စကားပြောဆိုစဉ် “ကျေးဇူးပြု၍” ဟူသောစကားလုံးကို အသုံးပြုခဲ့သည်။ ထို့ကြောင့် ကျွန်ုပ်တို့သည် အသင်းသားများနှင့် ဆက်ဆံရာတွင် သနားကြင်နာထောက်ထားစာနာမှု အမှန်ပင်ပြသင့်၏။ မှန်ပါသည်၊ အချို့သူများနှင့် ပေါင်းသင်းရခက်ပေမည်၊ သို့မဟုတ် ဝိညာဉ်ရေးအားနည်းနေပေမည်။ သို့သော် ယေဟောဝါကို သူတို့ချစ်မည်ဆိုလျှင် သူတို့ကို ကျွန်ုပ်တို့ကူညီပေးလိုပြီး သနားကြင်နာမှုပြလိုကြသည်။

၅။ မိက္ခာ ၆:၆၊ ၇ တွင်အဘယ်အခြေခံအချက်ကို ဖော်ပြထားသနည်း။

^၅ယခု မိက္ခာ ၆:၆၊ ၇ ကိုဆက်ကြည့်ကြစို့။ မိက္ခာသည် မေးခွန်းများကို ဤသို့ဆက်တိုက်မေးခဲ့သည်– ‘ငါသည် ထာဝရဘုရားသခင်ရှေ့တော်သို့ အဘယ်ပူဇော်ရာယဇ်ပါလျက် ချဉ်းကပ်၍ အမြင့်ဆုံးသော ဘုရားသခင့်ရှေ့တော်၌ ကိုးကွယ်ရမည်နည်း။ မီးရှို့ရာယဇ်နှင့် အခါလည်သောနွားသငယ်တို့ကိုဆောင်လျက် ချဉ်းကပ်ရမည်လော။ ထာဝရဘုရားသခင်သည် သိုးထီးတစ်ထောင်၊ ဆီမြစ်တစ်သောင်းကို အားရနှစ်သက်တော်မူမည်လော။ ငါ့လွန်ကျူးခြင်းအတွက် ငါ၏သားဦးကိုလည်းကောင်း၊ ငါ့စိတ်ဝိညာဉ်၏အပြစ်အတွက် ငါ၏ရင်သွေးကိုလည်းကောင်း ပူဇော်ရမည်လော။’ “သိုးထီးတစ်ထောင်၊ ဆီမြစ်တစ်သောင်း” ကိုယေဟောဝါ အားရနှစ်သက်နိုင်မည်မဟုတ်ချေ။ သို့သော် ကိုယ်တော် အားရနှစ်သက်နိုင်မည့်အရာ ရှိပါသည်။ ၎င်းကား အဘယ်နည်း။

ကျွန်ုပ်တို့ တရားမျှတမှုရှိရမည်

၆။ မိက္ခာ ၆:၈ တွင်ဖော်ပြထားသော ဘုရားသခင်တောင်းဆိုချက်သုံးချက်ကား အဘယ်နည်း။

^၆မိက္ခာ ၆:၈ တွင်ကျွန်ုပ်တို့ထံမှ ယေဟောဝါ အဘယ်အရာမျှော်လင့်ကြောင်း သိရှိရသည်။ မိက္ခာက ဤသို့မေးသည်– “တရားသဖြင့်ပြုခြင်း၊ [“ကြင်နာမှု၊” ကဘ] ကိုနှစ်သက်ခြင်း၊ သင်၏ဘုရားသခင့်ရှေ့တော်၌ နှိမ့်ချ [“ကျိုးနွံ၊” ကဘ] သောစိတ်နှင့်ကျင့်နေခြင်းမှတစ်ပါး အဘယ်ပူဇော်[ရာယဇ်]ကို ထာဝရဘုရား[သခင်]တောင်းတော်မူသနည်း။” ဤတောင်းဆိုချက်သုံးချက်သည် ကျွန်ုပ်တို့၏ခံစားပုံ၊ တွေးတောပုံ၊ လုပ်ဆောင်ပုံတို့နှင့်ပတ်သက်၏။ အဆိုပါအရည်အသွေးများကို ဖော်ပြလိုစိတ်ရှိရမည်၊ မည်သို့ဖော်ပြမည်ကို တွေးတောရမည်၊ ယင်းတို့ကိုတင်ပြရန် လုပ်ဆောင်ရမည်။ ဤတောင်းဆိုချက်သုံးချက်ကို တစ်ချက်ချင်းစီ သုံးသပ်ကြည့်ကြစို့။

၇၊ ၈။ (က) “တရားသဖြင့်ပြုခြင်း” ဟူသည် အဘယ်အရာကို ဆိုလိုသနည်း။ (ခ) မိက္ခာခေတ်တွင် အဘယ်မတရားမှုများ ပြည့်နှက်နေသနည်း။

^၇“တရားသဖြင့်ပြုခြင်း” ဟူသည် မှန်ကန်ရာလုပ်ဆောင်ခြင်းကို ဆိုလိုသည်။ ဘုရားသခင်လုပ်ဆောင်နည်းမှာ တရားမျှတမှုစံနှုန်းဖြစ်သည်။ သို့သော် မိက္ခာနှင့်တစ်ခေတ်တည်းသားများသည် တရားမျှတမှုမရှိဘဲ မတရားပြုကျင့်ကြသည်။ အဘယ်နည်းများဖြင့်နည်း။ မိက္ခာ ၆:၁၀ ကိုသုံးသပ်ကြည့်ပါ။ ၎င်းအခန်းငယ်၏အဆုံးပိုင်းတွင် ကုန်သည်များသည် အလွန်သေးငယ်သည့် “ရွံရှာဖွယ်သော တင်းတောင်းငယ်” ကိုအသုံးပြုကြသည်ဟု ဖော်ပြထား၏။ သူတို့သည် “စဉ်းလဲသောအလေးအိတ်” ကိုအသုံးပြုကြသည်ဟုလည်း အခန်းငယ် ၁၁ ကထပ်ဆင့်ဆို၏။ ထို့ပြင် အခန်းငယ် ၁၂ အရ ‘သူတို့လျှာသည် မုသာဖြစ်၏။’ သို့ဖြစ်၍ မိက္ခာခေတ်က စီးပွားရေးလောကတွင် မမှန်ကန်သောတင်းတောင်း၊ အလေးချိန်၊ မုသားစကားတို့ ပြည့်နှက်နေသည်။

^၈မတရားမှုကို ဈေးတွင်သာ တွေ့ရသည်မဟုတ်။ တရားရုံးတွင်လည်း ထိုအတိုင်းပင်ဖြစ်၏။ “မင်းသည် လက်ဆောင်ကို တောင်းတတ်၏။ တရားသူကြီးသည် တံစိုးကို စားတတ်၏” ဟုမိက္ခာ ၇:၃ ကဖော်ပြသည်။ အပြစ်မဲ့သူများကို မတရားစီရင်ရန် တရားသူကြီးများအား တံစိုးလက်ဆောင်များပေးလေ့ရှိသည်။ “သူတစ်ပါးထက်ကြီးသောသူ” သို့မဟုတ် ဩဇာအရှိန်အဝါရှိသူသည် ရာဇဝတ်မှုများတွင် ပါဝင်ပတ်သက်နေ၏။ အမှန်ဆိုရလျှင် မင်း၊ တရားသူကြီးနှင့် သူတစ်ပါးထက်ကြီးသောသူတို့သည် သူတို့၏ဆိုးညစ်သော အမူအကျင့်များကို လိမ်ယှက် “ရှုပ်” ထွေးစေတတ်သည်၊ သို့မဟုတ် ညှိနှိုင်းဆောင်ရွက်တတ်ကြသည်ဟုဆို၏။

၉။ ဆိုးညစ်သူများ၏ မတရားမှုကြောင့် ယုဒနှင့်ဣသရေလနိုင်ငံများအပေါ် အဘယ်ဆိုးကျိုးများသက်ရောက်ခဲ့သနည်း။

^၉ဆိုးညစ်သောခေါင်းဆောင်များ၏ မတရားမှုများကြောင့် ယုဒနှင့်ဣသရေလနိုင်ငံရှိသူအားလုံး ဆိုးကျိုးများခံစားခဲ့ကြရသည်။ တရားမျှတမှုမရှိသောကြောင့် အပေါင်းအသင်းများ၊ လူယုံတော်များနှင့် အိမ်ထောင်ဖက်များကြား၌ပင် ယုံကြည်စိတ်ချမှုကင်းမဲ့နေကြောင်း မိက္ခာ ၇:၅ ကဆို၏။ ယင်းကြောင့် သားနှင့်အဖ၊ သမီးနှင့်အမိတို့ကဲ့သို့ ဆွေမျိုးရင်းချာများပင် တစ်ဦးကိုတစ်ဦး အထင်အမြင်သေးကြသည်ဟု အခန်းငယ် ၆ ကဖော်ပြသည်။

၁၀။ မျက်မှောက်ခေတ် တရားမျှတမှုမရှိသောဝန်းကျင်တွင် ခရစ်ယာန်များသည် မည်သို့ကျင့်ကြံပြုမူနေကြသနည်း။

^၁၀ယနေ့ကော အသို့နည်း။ ထပ်တူအခြေအနေမျိုးကို ကျွန်ုပ်တို့ တွေ့မြင်နေရသည်မဟုတ်လော။ မိက္ခာနည်းတူ ကျွန်ုပ်တို့ဝန်းကျင်တွင် မတရားမှု၊ အယုံအကြည်ကင်းမဲ့မှု၊ လူမှုရေးနှင့် မိသားစုဘဝပြိုကွဲမှုတို့ကို တွေ့နေကြရသည်။ သို့တိုင် မဖြောင့်မတ်သောဤလောကတွင် နေထိုင်နေကြရသော ဘုရားသခင်၏ကျေးကျွန်များအနေဖြင့် ကျွန်ုပ်တို့သည် ဤလောက၏မတရားသောစိတ်ဓာတ်ကို ခရစ်ယာန်အသင်းတော်ထဲ စိမ့်ဝင်ခွင့်မပြုကြချေ။ ထိုသို့ဖြစ်စေမည့်အစား ရိုးသားဖြောင့်မတ်ခြင်း၊ သမာဓိစောင့်သိခြင်းနှင့်ဆိုင်သော မူတို့ကို စောင့်ထိန်းရန် ကြိုးစားကြသည်၊ ကျွန်ုပ်တို့၏နေ့စဉ်ဘဝအသက်တာတွင်လည်း ၎င်းတို့ကို တင်ပြနေကြသည်။ “အရာရာတို့၌ ကောင်းမွန်စွာကျင့်” ရန် ကျွန်ုပ်တို့ကြိုးစားကြ၏။ (ဟေဗြဲ ၁၃:၁၈) ကျွန်ုပ်တို့သည် တရားမျှတစွာကျင့်ကြံကြခြင်းဖြင့် စစ်မှန်သောယုံကြည်စိတ်ချမှုရှိ ညီအစ်ကိုအသင်းအပင်းတွင် ကောင်းချီးများစွာ ခံစားနေကြရသည်မဟုတ်ပေလော။

‘ယေဟောဝါ၏ဟစ်ခေါ်သံ’ ကို လူတို့ မည်သို့ကြားကြသနည်း

၁၁။ မိက္ခာ ၇:၁၂ သည် မည်သို့ပြည့်စုံနေသနည်း။

^၁၁တရားမျှတမှုမရှိလင့်ကစား လူမျိုးအပေါင်း တရားမျှတမှုကို ခံစားရလိမ့်မည်ဟု မိက္ခာပရောဖက်ပြု၏။ ပရောဖက်က လူများသည် “ပင်လယ်ကမ်းနားအရပ်ရပ်၊ တောင်ခြေရင်းအရပ်ရပ်တို့မှ” စုသိမ်းခံရကာ ယေဟောဝါအား ဝတ်ပြုကိုးကွယ်သူများဖြစ်လာကြလိမ့်မည်ဟု ကြိုဟောသည်။ (မိက္ခာ ၇:၁၂) ယနေ့ ဤပရောဖက်ပြုချက်၏ နောက်ဆုံးပြည့်စုံချက်တွင် လူမျိုးတစ်မျိုးတည်းမဟုတ်ဘဲ လူမျိုးအပေါင်းမှသူတို့သည် မျက်နှာမလိုက်သော ဘုရားသခင်၏တရားမျှတမှုအကျိုးကို ခံစားနေကြရသည်။ (ဟေရှာယ ၄၂:၁) ယင်းသည် မှန်ကန်ကြောင်း မည်သို့ထင်ရှားသနည်း။

၁၂။ ယနေ့ ‘ထာဝရဘုရားသခင်၏ဟစ်ခေါ်သံ’ ကိုမည်သို့ကြားရသနည်း။

^၁၂အဖြေရရန် မိက္ခာ၏အစောပိုင်းစကားများကို သုံးသပ်ကြည့်ပါ။ မိက္ခာ ၆:၉ တွင်ဤသို့ဖော်ပြ၏– ‘ထာဝရဘုရားသခင်၏နှုတ်မြွက်တော်သည် မြို့ကိုဟစ်ခေါ်တော်မူ၏။ ပညာရှိသောသူသည် နာမတော်ကို ကြောက်ရွံ့ရ၏။’ လူမျိုးအပေါင်းမှလူတို့သည် ‘ထာဝရဘုရားသခင်၏ဟစ်ခေါ်သံ’ ကိုမည်သို့ကြားရကြသနည်း၊ ယင်းက ကျွန်ုပ်တို့ တရားမျှတမှုရှိခြင်းနှင့် မည်သို့သက်ဆိုင်သနည်း။ ယနေ့ လူတို့သည် ဘုရားသခင်၏ပကတိအသံတော်ကို မကြားရကြပေ။ သို့ရာတွင် ကျွန်ုပ်တို့၏ ကမ္ဘာချီဟောပြောခြင်းလုပ်ငန်းအားဖြင့် လူအမျိုးအနွယ်အသီးသီး၊ ဘဝအဆင့်အတန်းအမျိုးမျိုးမှ လူတို့သည် ယေဟောဝါ၏အသံတော်ကို ကြားနေကြရ၏။ ယင်းကြောင့် ကြားနာသူများသည် ‘ဘုရားသခင်၏နာမတော်ကို ကြောက်ရွံ့’ ခန့်ညားလေးစားကြ၏။ စိတ်ထက်သန်သော ဘုရားသခင့်နိုင်ငံတော်ကြွေးကြော်သူများအဖြစ် အမှုဆောင်ခြင်းအားဖြင့် ကျွန်ုပ်တို့သည် တရားမျှတစွာ၊ မေတ္တာပါစွာ ပြုမူနေကြ၏။ ကျွန်ုပ်တို့သည် မျက်နှာမလိုက်ဘဲ ဘုရားသခင်၏နာမတော်ကို လူတိုင်းကြားသိစေခြင်းအားဖြင့် “တရားသဖြင့်ပြု” ကြသည်။

ကြင်နာမှုကို ကျွန်ုပ်တို့နှစ်သက်ရမည်

၁၃။ ချစ်ခင်ကြင်နာမှုနှင့် ချစ်ခြင်းမေတ္တာတို့၏ ကွာခြားချက်ကား အဘယ်နည်း။

^၁၃မိက္ခာ ၆:၈ တွင်ဖော်ပြထားသော ဒုတိယတောင်းဆိုချက်ကို ဆက်ဆွေးနွေးကြစို့။ ယေဟောဝါသည် ကျွန်ုပ်တို့အား “ကြင်နာမှုကို နှစ်သက်” စေလို၏။ “ကြင်နာမှု” ဟုပြန်ဆိုထားသည့် ဟေဗြဲစကားလုံးကို “ချစ်ခင်ကြင်နာမှု၊” သို့မဟုတ် “တည်ကြည်သောမေတ္တာ” ဟူ၍လည်း ပြန်ဆိုသည်။ ချစ်ခင်ကြင်နာမှုဟူသည် သူတစ်ပါးကို စိတ်ဝင်စားပြီး စာနာထောက်ထားခြင်းဖြစ်သည်။ ချစ်ခင်ကြင်နာမှုနှင့် ချစ်ခြင်းမေတ္တာ မတူချေ။ မည်သို့အားဖြင့်နည်း။ ချစ်ခြင်းမေတ္တာဟူသော စကားလုံးသည် အဓိပ္ပာယ်ပိုကျယ်ပြန့်ပြီး အရာဝတ္ထုများ၊ အယူအဆများနှင့် ဆက်စပ်ပြီး အသုံးပြုနိုင်သည်။ ဥပမာ၊ သမ္မာကျမ်းစာက “လောကကိုချစ်သောသူ” အကြောင်းဖော်ပြထားသည်။ (၁ ယောဟန် ၂:၁၅) ချစ်ခင်ကြင်နာမှုကိုကား လူတို့နှင့်၊ အထူးသဖြင့် ဘုရားသခင့်အမှုတော်ထမ်းသူတို့နှင့် အမြဲတွဲသုံးသည်။ ထို့ကြောင့် ယေဟောဝါဘုရားသခင်ကို ဝတ်ပြုကိုးကွယ်ခဲ့သူ “အာဗြဟံအား ချစ်ခင်ကြင်နာမှုပြ” သည်ဟု မိက္ခာ ၇:၂၀ [ကဘ] ကဆို၏။

၁၄၊ ၁၅။ ချစ်ခင်ကြင်နာမှုကို မည်သို့ပြသ,သနည်း၊ အဘယ်သာဓကကို ဖော်ပြထားသနည်း။

^၁၄မိက္ခာ ၇:၁၈ [ကဘ] အရ ဘုရားသခင်သည် “ချစ်ခင်ကြင်နာမှု၌ မွေ့လျော်” ၏ဟု ပရောဖက်က ဆိုသည်။ မိက္ခာ ၆:၈ ၌ကျွန်ုပ်တို့သည် ချစ်ခင်ကြင်နာမှုပြရုံမျှမက ထိုအရည်အသွေးကို ချစ်မြတ်နိုးရမည်ဟု ဆိုထားသည်။ အဆိုပါကျမ်းချက်များမှ အဘယ်အရာသိရှိရသနည်း။ ချစ်ခင်ကြင်နာမှုကို ကျွန်ုပ်တို့ပြလိုကြရာ ၎င်းကိုတလိုတလား အကန့်အသတ်မဲ့ တင်ပြကြသည်။ ယေဟောဝါနည်းတူ ကျွန်ုပ်တို့သည် လိုအပ်နေသူများကို ချစ်ခင်ကြင်နာမှုပြရန် ပျော်ရွှင်အားရကြ၏။

^၁၅ယနေ့ ဤသို့သောချစ်ခင်ကြင်နာမှုသည် ဘုရားသခင့်လူမျိုး၏ အမှတ်အသားတစ်ခုဖြစ်၏။ သာဓကတစ်ခုကို သုံးသပ်ကြည့်ပါ။ ၂၀၀၁၊ ဇွန်လ၌ ယူ.အက်စ်.အေ. တက္ကဆက်ပြည်နယ်တွင် အပူပိုင်းမုန်တိုင်းကြောင့် အကြီးအကျယ်ရေလွှမ်းမိုးခဲ့ရာ ယေဟောဝါသက်သေများ၏ ရာနှင့်ချီအိမ်များအပါအဝင် ထောင်နှင့်ချီအိုးအိမ်များ ပျက်စီးခဲ့သည်။ သက်သေခံ ၁၀,၀၀၀ ခန့်သည် မိမိတို့၏ လိုအပ်နေသော ခရစ်ယာန်ညီအစ်ကိုများကို ကူညီပေးရန် ကိုယ်ပိုင်အချိန်နှင့်ခွန်အားကို တလိုတလား အခမဲ့ပေးဆက်ခဲ့ကြ၏။ စေတနာ့ဝန်ထမ်းများသည် ဘုရားသခင့်နိုင်ငံတော်ခန်းမ ၈ ခုနှင့် ခရစ်ယာန်ညီအစ်ကိုများ၏အိမ် ၇၀၀ ကျော်ကို ပြန်လည်တည်ဆောက်ပေးရန် သူတို့၏နေ့များ၊ ညများ၊ သတ္တပတ်ကုန်ရက်များကိုသုံးလျက် မနားမနေ ခြောက်လကျော်ကျော် လုပ်ဆောင်ခဲ့ကြသည်။ ဤဆောက်လုပ်ရေးတွင် မပါဝင်နိုင်သူများသည် စားစရာ၊ အသုံးအဆောင်ပစ္စည်းများနှင့် ငွေကြေးတို့ကို လှူဒါန်းခဲ့ကြသည်။ အဆိုပါထောင်နှင့်ချီသက်သေခံအားလုံးသည် သူတို့၏ညီအစ်ကိုများကို အဘယ်ကြောင့် ကူညီပေးခဲ့ကြသနည်း။ အကြောင်းမှာ သူတို့သည် “ကြင်နာမှုကို နှစ်သက်” ကြသောကြောင့်ဖြစ်သည်။ ဤကဲ့သို့သောချစ်ခင်ကြင်နာမှုကို ကမ္ဘာတစ်ဝန်းရှိ ကျွန်ုပ်တို့၏ညီအစ်ကိုများ ပြသနေကြောင်း သိရှိရခြင်းသည် တကယ်ကိုဝမ်းသာအားရစရာပင်! မှန်ပါသည်၊ “ကြင်နာမှုကို နှစ်သက်” ပါဟူသော တောင်းဆိုချက်နှင့်အညီပြုလုပ်ခြင်းသည် ဝန်ထုပ်ဝန်ပိုးတစ်ခုမဟုတ်ဘဲ ရွှင်လန်းစရာဖြစ်၏!

ဘုရားသခင်နှင့်အတူ လျှောက်လှမ်းရာတွင် ကျိုးနွံမှုရှိပါ

၁၆။ ဘုရားသခင်နှင့်လျှောက်လှမ်းရာတွင် ကျိုးနွံမှုလိုအပ်ကြောင်း အလေးအနက်ဖော်ပြရန် အဘယ်ဥပမာက ထောက်ကူပေးသနည်း။

^၁၆မိက္ခာ ၆:၈ တွင်တွေ့ရသည့် တတိယတောင်းဆိုချက်မှာ “သင်၏ဘုရားသခင့်ရှေ့တော်၌ နှိမ့်ချ [“ကျိုးနွံ”၊ ကဘ] သောစိတ်နှင့်ကျင့်” ရန်ဖြစ်သည်။ ဆိုလိုသည်မှာ ကျွန်ုပ်တို့၏ကန့်သတ်ချက်များကို အသိအမှတ်ပြုပြီး ဘုရားသခင်ကို မှီခိုအားထားခြင်းဖြစ်၏။ ဥပမာ၊ မုန်တိုင်းကြား ဖခင်၏လက်ကို တင်းကျပ်စွာဆုပ်ကိုင်ထားပြီး လျှောက်လှမ်းနေသည့် ကလေးမလေးကို တဒင်္ဂမြင်ယောင်ကြည့်လိုက်ပါ။ ဤကလေးမသည် မိမိ၏ခွန်အား အကန့်အသတ်သာရှိကြောင်း ကောင်းစွာသိသည်၊ သို့သော် ဖခင်အပေါ် ယုံကြည်စိတ်ချမှုရှိ၏။ ထိုနည်းတူ ကျွန်ုပ်တို့လည်း မိမိတို့၏ကန့်သတ်ချက်များကို အသိအမှတ်ပြုပြီး ကောင်းကင်ခမည်းတော်ကို ယုံကြည်စိတ်ချရမည်။ ဤယုံကြည်စိတ်ချမှုကို မည်သို့ဆက်ထိန်းထားနိုင်မည်နည်း။ တစ်နည်းကား ဘုရားသခင်နှင့် တရင်းတနှီးရှိခြင်းသည် အဘယ်ကြောင့်ပညာရှိကြောင်း စိတ်ထဲစွဲမှတ်ထားခြင်းဖြင့်ဖြစ်သည်။ ယေဟောဝါသည် ကျွန်ုပ်တို့၏ ကယ်တင်ရှင်၊ လမ်းညွှန်ရှင်၊ ကာကွယ်ရှင်ဖြစ်သည်ဟူသော အချက်သုံးချက်ကို မိက္ခာ အမှတ်ရစေသည်။

၁၇။ ယေဟောဝါသည် မိမိ၏ရှေးခေတ်လူမျိုးတော်ကို မည်သို့ကယ်တင်၍ လမ်းညွှန်ပေးကာ ကာကွယ်ခဲ့သနည်း။

^၁၇မိက္ခာ ၆:၄၊ ၅ အရ၊ “သင့်ကို အဲဂုတ္တုပြည်မှ ငါဆောင်ခဲ့ပြီ” ဟုဘုရားသခင်မိန့်ဆို၏။ မှန်ပါသည်၊ ယေဟောဝါသည် ဣသရေလလူမျိုး၏ကယ်တင်ရှင်ဖြစ်တော်မူ၏။ ယေဟောဝါက ဤသို့ထပ်ဆင့်ဆိုသည်– “သင့်ရှေ့မှာ မောရှေ၊ အာရုန်၊ မိရိအံတို့ကို ငါစေလွှတ်လေပြီ။” မောရှေနှင့် အာရုန်တို့ကို အသုံးပြု၍ ထိုလူမျိုးကို လမ်းညွှန်ပေးခဲ့သည်၊ မိရိအံမူကား ဣသရေလအမျိုးသမီးများကို အောင်ပွဲခံအကတွင် ဦးဆောင်ပေးခဲ့သည်။ (ထွက်မြောက်ရာ ၇:၁၊ ၂; ၁၅:၁၊ ၁၉-၂၁; တရားဟောရာ ၃၄:၁၀) ယေဟောဝါသည် မိမိ၏ကျေးကျွန်များအားဖြင့် လမ်းညွှန်ပေးခဲ့သည်။ ယေဟောဝါသည် ဣသရေလလူမျိုးကို ဗာလက်နှင့်ဗာလမ်တို့လက်မှ ကာကွယ်ပေးခဲ့ကြောင်းနှင့် သူတို့၏နောက်ခရီးစဉ်ဖြစ်သည့် မောဘပြည်၊ ရှိတ္တိမ်မြို့မှ ကတိထားရာပြည်၊ ဂိလဂါလမြို့သို့သွားစဉ် လမ်းတစ်လျှောက်လုံး စောင့်ရှောက်ပေးခဲ့ကြောင်း သူတို့ကို ယေဟောဝါအမှတ်ရစေသည်။

၁၈။ ယနေ့ ဘုရားသခင်သည် ကျွန်ုပ်တို့၏ ကယ်တင်ရှင်၊ လမ်းညွှန်ရှင်၊ ကာကွယ်ပေးရှင်အဖြစ် မည်သို့လုပ်ဆောင်ပေးသနည်း။

^၁၈ဘုရားသခင်နှင့်အတူ ကျွန်ုပ်တို့သွားလာကြစဉ် ကိုယ်တော်သည် ကျွန်ုပ်တို့ကို စာတန်လောကမှ ကယ်နုတ်၍ သမ္မာကျမ်းစာနှင့် ကိုယ်တော်၏အဖွဲ့အစည်းအားဖြင့် လမ်းညွှန်ပေးကာ အတိုက်အခံပြုသူများနှင့်ရင်ဆိုင်ကြရသည့်အခါ အုပ်စုလိုက်အနေနှင့် ကာကွယ်ပေး၏။ ဤနည်းဖြင့် ရှေးကတိထားရာပြည်တော်ထက် များစွာသာလွန်ကောင်းမွန်သည့် ဘုရားသခင်၏ဖြောင့်မတ်သောကမ္ဘာသစ်ထဲသို့ နောက်ဆုံးခရီးစဉ်၏ မုန်တိုင်းထန်ချိန်တွင် ကောင်းကင်ခမည်းတော်နှင့်အတူ ကျွန်ုပ်တို့လျှောက်လှမ်းနေစဉ် ကိုယ်တော်၏လက်ကို တင်းကျပ်စွာဆုပ်ကိုင်ထားရန် အကြောင်းကောင်းများစွာရှိသည်။

၁၉။ ကျိုးနွံမှုသည် မည်သည့်နည်းဖြင့် ကျွန်ုပ်တို့၏ကန့်သတ်ချက်များနှင့် ဆက်နွှယ်သနည်း။

^၁၉ဘုရားသခင်နှင့်အတူ လျှောက်လှမ်းရာတွင် ကျိုးနွံမှုရှိခြင်းသည် ကျွန်ုပ်တို့၏အခြေအနေကို အရှိအတိုင်းရှုမြင်တတ်စေသည်။ ဤသို့ရှုမြင်ရခြင်းမှာ ကျိုးနွံမှုပြခြင်းတွင် ကျွန်ုပ်တို့၏ကန့်သတ်ချက်များကို သိရှိခြင်းပါဝင်ခြင်းကြောင့်ဖြစ်၏။ အသက်အရွယ်ကြီးရင့်လာခြင်း သို့မဟုတ် ကျန်းမာရေးချို့တဲ့ခြင်းတို့ကြောင့် ယေဟောဝါလုပ်ငန်းတော်တွင် ကျွန်ုပ်တို့၏လုပ်ဆောင်မှု လျော့နည်းသွားပေမည်။ ယင်းကြောင့် စိတ်ပျက်အားလျော့မည့်အစား ဘုရားသခင်သည် “မတတ်နိုင်သောအမှုကိုမထောက်ဘဲ၊ တတ်နိုင်သောအမှုကိုထောက်၍” ကျွန်ုပ်တို့၏ကြိုးစားအားထုတ်မှုများနှင့် ပူဇော်ရာများကို နှစ်သက်လက်ခံတော်မူကြောင်း သတိရသင့်သည်။ (၂ ကောရိန္သု ၈:၁၂) အမှန်ဆိုသော် ယေဟောဝါသည် ကျွန်ုပ်တို့၏အခြေအနေခွင့်ပြုသမျှ စိုးလ်အကြွင်းမဲ့လုပ်ဆောင်စေလို၏။ (ကောလောသဲ ၃:၂၃) ဘုရားသခင်၏လုပ်ငန်းတော်ကို စိတ်အားထက်သန်စွာ ဇွဲရှိရှိ အတတ်နိုင်ဆုံးလုပ်ဆောင်သည့်အခါ ကျွန်ုပ်တို့ကို ကိုယ်တော်ကောင်းချီးများစွာပေးတော်မူ၏။—သု. ၁၀:၂၂။

စောင့်မျှော်တတ်သောသဘောထားသည် ကောင်းချီးများရရှိစေ

၂၀။ အဘယ်အရာကို သိရှိထားခြင်းက မိက္ခာနည်းတူ စောင့်မျှော်တတ်သောသဘော ရှိစေသနည်း။

^၂၀ယေဟောဝါ၏ကောင်းချီး ခံစားရခြင်းက မိက္ခာ၏စိတ်သဘောထားကို တုပရန် ကျွန်ုပ်တို့ကို စေ့ဆော်ပေး၏။ သူက “ငါ့ကိုကယ်တင်တော်မူသော ဘုရားသခင်ကို စောင့်မျှော်မည်” ဟုကြွေးကြော်၏။ (မိက္ခာ ၇:၇၊ သမ္မာ) ဤစကားများသည် ဘုရားသခင်နှင့်အတူ ကျိုးနွံစွာလျှောက်လှမ်းခြင်းနှင့် မည်သို့ဆက်နွှယ်သနည်း။ စောင့်မျှော်တတ်သောသဘော၊ သို့မဟုတ် စိတ်ရှည်ခြင်းက ယေဟောဝါ၏နေ့ကြီး ရောက်မလာသေးသည့်အတွက် စိတ်ဓာတ်မကျစေရန် ကူညီပေး၏။ (သု. ၁၃:၁၂) အမှန်အတိုင်းဆိုရလျှင် ဆိုးသွမ်းသော ဤလောက၏အဆုံးကို ကျွန်ုပ်တို့အားလုံး မျှော်လင့်တောင့်တနေကြသည်။ သို့သော် ပတ်စဉ်ပတ်တိုင်း ထောင်နှင့်ချီသောလူတို့သည် ဘုရားသခင်နှင့်အတူ လျှောက်လှမ်းခါစရှိသေးသည်။ ၎င်းကိုသိရှိထားခြင်းက စောင့်မျှော်တတ်သောသဘောပြသရန် အကြောင်းကောင်းတစ်ခုဖြစ်၏။ ယင်းနှင့်စပ်လျဉ်း၍ နှစ်ကြာသက်သေခံတစ်ဦးက ဤသို့ဆိုသည်– “ဟောပြောခြင်းလုပ်ငန်းမှာ ၅၅ နှစ်ကျော်ပါဝင်ခဲ့တဲ့အချိန်ကို ပြန်ကြည့်ရင် ယေဟောဝါကိုအားကိုးပြီး စောင့်မျှော်ခဲ့လို့ ဘာမှမဆုံးရှုံးခဲ့ဘူးဆိုတာ ကျွန်တော်ယုံတယ်။ အဲ့ဒီအစား ဝမ်းနည်းကြေကွဲစရာတွေ မခံစားရသလောက်ပဲ။” အသင်လည်း အလားတူခံစားရပါသလော။

၂၁၊ ၂၂။ ကျွန်ုပ်တို့ခေတ်တွင် မိက္ခာ ၇:၁၄ သည်မည်သို့ပြည့်စုံနေသနည်း။

^၂၁ယေဟောဝါနှင့်လျှောက်လှမ်းခြင်းဖြင့် အမှန်ပင်အကျိုးကျေးဇူးများစွာရရှိ၏။ မိက္ခာ ၇:၁၄ တွင်ဖတ်ရသည့်အတိုင်း သိုးထိန်း၏လက်အောက်တွင် လုံခြုံစိတ်ချစွာကျက်စားနေကြသော သိုးများနှင့် ဘုရားသခင့်လူမျိုးတော်ကို မိက္ခာနှိုင်းယှဉ်ပြထားသည်။ ယနေ့ ဤပရောဖက်ပြုချက်၏ အကြီးစားပြည့်စုံချက်တွင် အကြွင်းအကျန်ဝိညာဉ်ရေးဣသရေလနှင့်အတူ “အခြားသိုးတို့” သည် ယုံကြည်ကိုးစားထိုက်သော သိုးထိန်းယေဟောဝါ၏လက်အောက်တွင် လုံခြုံမှုရှိနေကြ၏။ သူတို့သည် ဆင်းရဲခက်ခဲ၍ အန္တရာယ်ထူပြောသည့် ဤလောကမှ ဝိညာဉ်ရေးအရ သီးခြားဖြစ်သော ‘ဥယျာဉ်ရှိတော’ တွင်နေထိုင်ကြသည်။—ယောဟန် ၁၀:၁၆; တရားဟောရာ ၃၃:၂၈; ယေရမိ ၄၉:၃၁; ဂလာတိ ၆:၁၆။

^၂၂ထို့ပြင် မိက္ခာ ၇:၁၄ ကြိုဟောသည့်အတိုင်း ယေဟောဝါ၏လူမျိုးတော်သည် ကြီးပွားတိုးတက်မှုခံစားကြရ၏။ ဘုရားသခင်၏သိုး၊ သို့မဟုတ် လူမျိုးတော်အကြောင်း ပြောဆိုရာတွင် မိက္ခာက “ဗာရှန်ပြည်နှင့် ဂိလဒ်ပြည်၌ ကျက်စားသောအခွင့်ကို ပေးတော်မူပါ” ဟုဆို၏။ ဗာရှန်ပြည်နှင့် ဂိလဒ်ပြည်ရှိ သိုးများသည် စားကျက်ကောင်းများတွင် စားသောက်ပြီး ကြီးထွားဖွံ့ဖြိုးလာသကဲ့သို့ ယနေ့ ဘုရားသခင်၏လူမျိုးတော်သည် ဝိညာဉ်ရေးတွင် ပေါကြွယ်ဝကြသည်၊ ယင်းသည် ဘုရားသခင်နှင့်အတူ ကျိုးနွံစွာလျှောက်လှမ်းသူများအတွက် နောက်ထပ်ကောင်းချီးတစ်ခုဖြစ်၏။—တောလည်ရာ ၃၂:၁; တရားဟောရာ ၃၂:၁၄။

၂၃။ မိက္ခာ ၇:၁၈၊ ၁၉ ကိုဆင်ခြင်သုံးသပ်ခြင်းမှ ကျွန်ုပ်တို့ အဘယ်သင်ခန်းစာ ရရှိနိုင်သနည်း။

^၂၃မိက္ခာ ၇:၁၈၊ ၁၉ တွင်နောင်တရသူများကို ယေဟောဝါခွင့်လွှတ်လိုကြောင်း ပရောဖက်က ပေါ်လွင်ထင်ရှားစေသည်။ ယေဟောဝါသည် “အပြစ်မှလွှတ်တော်မူ” ပြီး “လွန်ကျူးခြင်းများကို သည်းခံတော်မူ” ၏ဟု အခန်းငယ် ၁၈ တွင်ဖော်ပြသည်။ အခန်းငယ် ၁၉ အရ ကိုယ်တော်သည် “အကျွန်ုပ်တို့၏အပြစ်အလုံးစုံတို့ကို နက်နဲသောပင်လယ်ထဲသို့ ချပစ်တော်မူလိမ့်မည်။” ၎င်းမှ အဘယ်သင်ခန်းစာရနိုင်သနည်း။ ယေဟောဝါကို ကျွန်ုပ်တို့တုပနေသလောဟု မိမိကိုယ်ကို မေးနိုင်သည်။ အခြားသူများ ကျွန်ုပ်တို့အား ပြစ်မှားသောအပြစ်များကို ခွင့်လွှတ်သလော။ ဤသို့သောသူများသည် နောင်တယူပြီး ပြုပြင်ပြောင်းလဲရန် ကြိုးစားကြလျှင် ယေဟောဝါနည်းတူ ကျွန်ုပ်တို့သည် လုံးလုံးလျားလျားနှင့်အစဉ် ခွင့်လွှတ်လိုစိတ် တင်ပြလိုကြမည်ဖြစ်သည်။

၂၄။ သင်သည် မိက္ခာပရောဖက်ပြုချက်မှ အဘယ်အကျိုးကျေးဇူးရရှိခဲ့သနည်း။

^၂၄ဤမိက္ခာပရောဖက်ပြုချက်ကို ဆင်ခြင်သုံးသပ်ခြင်းမှ အဘယ်အကျိုးကျေးဇူးများ ရရှိခဲ့သနည်း။ ယေဟောဝါသည် မိမိထံချဉ်းကပ်သူများကို စစ်မှန်သောမျှော်လင့်ချက်ပေးကြောင်း ကျွန်ုပ်တို့ကို အမှတ်ရစေသည်။ (မိက္ခာ ၂:၁-၁၃) ကျွန်ုပ်တို့သည် ဘုရားသခင်၏နာမတော်၌ ထာဝစဉ်လျှောက်လှမ်းနိုင်ရန် စစ်မှန်သောဝတ်ပြုရေးကို တတ်နိုင်သမျှတိုးမြှင့်ပေးဖို့ အားပေးတိုက်တွန်းခံရကြသည်။ (မိက္ခာ ၄:၁-၅) ထို့ပြင် ကျွန်ုပ်တို့၏အခြေအနေ မည်သို့ပင်ရှိပါစေ၊ ယေဟောဝါ၏တောင်းဆိုချက်များနှင့်အညီ ပြုမူနိုင်ကြောင်း စိတ်ချစေ၏။ မိက္ခာ၏ပရောဖက်ပြုချက်သည် ယေဟောဝါ၏နာမတော်၌ လျှောက်လှမ်းရန် ကျွန်ုပ်တို့ကို အမှန်တကယ်ပင်ခွန်အားပေးပါသည်။

သင်မည်သို့ဖြေဆိုမည်နည်း

• မိက္ခာ ၆:၈ အရ ယေဟောဝါသည် ကျွန်ုပ်တို့ထံမှ အဘယ်အရာတောင်းဆိုသနည်း။

• ကျွန်ုပ်တို့သည် “တရားသဖြင့်ပြု” မည်ဆိုလျှင် အဘယ်အရာလိုအပ်သနည်း။

• ကျွန်ုပ်တို့သည် “ကြင်နာမှုကို နှစ်သက်” ကြောင်းမည်သို့ ဖော်ပြနိုင်သနည်း။

• ‘ဘုရားသခင်နှင့်အတူ ကျိုးနွံစွာလျှောက်လှမ်းရာ’ တွင် အဘယ်အရာပါဝင်ပတ်သက်သနည်း။

[လေ့လာရန်မေးခွန်းများ]

[စာမျက်နှာ ၂၁ ပါ ရုပ်ပုံ]

မိက္ခာခေတ်တွင် ဆိုးညစ်သောအခြေအနေများရှိခဲ့သော်လည်း သူသည် ယေဟောဝါ၏တောင်းဆိုချက်များနှင့်အညီ နေထိုင်ခဲ့သည်။ အသင်လည်း ထိုသို့ ပြုနိုင်

[စာမျက်နှာ ၂၃ ပါ ရုပ်ပုံ]

ဘဝအတန်းအစားအမျိုးမျိုးမှ လူတို့ကို သက်သေခံခြင်းအားဖြင့် တရားမျှတစွာပြုမူကျင့်ကြံပါ

[စာမျက်နှာ ၂၃ ပါ ရုပ်ပုံ]

အခြားသူများ၏ လိုအပ်ရာများကို ဖြည့်ဆည်းပေးခြင်းဖြင့် ကြင်နာမှုကို ပြသပါ

[စာမျက်နှာ ၂၃ ပါ ရုပ်ပုံ]

သင်၏ကန့်သတ်ချက်များကို ကျိုးနွံစွာ အသိအမှတ်ပြု၍ တတ်နိုင်သမျှပြုလုပ်ပါ

ကင်းမျှော်စင်—လေ့လာရန် စာစောင်