သက်ကြီးရွယ်အို ယုံကြည်သူချင်းများကို သင်တန်ဖိုးထားသလော
သက်ကြီးရွယ်အို ယုံကြည်သူချင်းများကို သင်တန်ဖိုးထားသလော
ရှေးဣသရေလလူမျိုးနှင့် ဘုရားသခင် ပဋိညာဉ်ဖွဲ့ခဲ့စဉ်က သူတို့ကို ဤသို့မိန့်မှာထားသည်– “ဆံပင်ဖြူသောသူရှေ့မှာ ထရမည်။ အသက်ကြီးသောသူ၏မျက်နှာကို ရိုသေရမည်။ သင်၏ဘုရားသခင်ကို ကြောက်ရွံ့ရမည်။” (ဝတ်ပြုရာ ၁၉:၃၂) သို့ဖြစ်၍ သက်ကြီးရွယ်အိုများကို ရိုသေလေးစားခြင်းသည် မြင့်မြတ်သောတာဝန်တစ်ခုဖြစ်ပြီး ဘုရားသခင်ကို လက်အောက်ခံခြင်းနှင့် ဆက်စပ်သည်။ ယနေ့ ခရစ်ယာန်များသည် မောရှေပညတ်အောက်တွင် မရှိကြတော့သော်လည်း ယေဟောဝါသည် မိမိ၏အမှုတော်ကို ထမ်းဆောင်နေကြသော သက်ကြီးရွယ်အိုများကို တန်ဖိုးထားပြီး အလွန်မြတ်နိုးအပ်သူများအဖြစ် ရှုမြင်တော်မူ၏။ (သု. ၁၆:၃၁; ဟေဗြဲ ၇:၁၈) ကျွန်ုပ်တို့သည် ယေဟောဝါရှုမြင်သကဲ့သို့ ရှုမြင်သလော။ သက်ကြီးရွယ်အို ခရစ်ယာန်ညီအစ်ကို၊ ညီအစ်မများကို ကျွန်ုပ်တို့ တန်ဖိုးထားသလော။
သက်ကြီးရွယ်အိုမိတ်ဆွေကို တန်ဖိုးထားသူ
သက်ကြီးရွယ်အိုများအား ရိုသေလေးစားခြင်းကို ပေါ်လွင်စေသည့် ကျမ်းစာမှတ်တမ်းတစ်ခုကား ဓမ္မရာဇဝင်စတုတ္ထစောင်ဖြစ်သည်။ လူငယ်ပရောဖက်ဧလိရှဲသည် ပရောဖက်ဧလိယ၏အရိုက်အရာကို ဆက်ခံခဲ့ပုံအကြောင်း ထိုတွင်ဖော်ပြထားသည်။ ဣသရေလဆယ်နွယ်နိုင်ငံ၏ ပရောဖက်တစ်ပါးအဖြစ် ဧလိယ၏နောက်ဆုံးနေ့ရက်တွင် အဘယ်အရာဖြစ်ပျက်ခဲ့ကြောင်း သုံးသပ်ကြည့်ပါ။
ထိုနေ့ရက်တွင် ယေဟောဝါက သက်ကြီးရွယ်အိုပရောဖက်ကို ဂိလဂါလမြို့မှ ဗေသလမြို့သို့၊ ဗေသလမြို့မှ ယေရိခေါမြို့သို့၊ ယေရိခေါမြို့မှ ယော်ဒန်မြစ်သို့သွားရန် ညွှန်ကြားခဲ့သည်။ (၄ ဓမ္မရာဇဝင် ၂:၁၊ ၂၊ ၄၊ ၆) မိုင် ၃၀ နီးပါးရှိ ထိုခရီးစဉ်အတွင်း ဧလိယက မိမိနောက်မလိုက်ရန် ဧလိရှဲကို သုံးကြိမ်တိုင် တားခဲ့သည်။ သို့သော် အစောပိုင်းရာစုနှစ်များစွာက အမျိုးသမီးငယ် ရုသသည် နောမိကို မစွန့်ခွာနိုင်ဟု ပြောဆိုခဲ့သကဲ့သို့ ဧလိရှဲသည်လည်း သက်ကြီးရွယ်အိုပရောဖက်ကို လုံးဝမစွန့်ခွာခဲ့ချေ။ (ရုသ ၁:၁၆၊ ၁၇) ဧလိရှဲက “ထာဝရဘုရား[သခင်]အသက်၊ ကိုယ်တော်အသက် ရှင်တော်မူသည်အတိုင်း ကိုယ်တော်နှင့်အကျွန်ုပ် မကွာရပါ” ဟုသုံးကြိမ်ပြန်ပြောခဲ့သည်။ (၄ ဓမ္မရာဇဝင် ၂:၂၊ ၄၊ ၆) ထိုအချိန်တွင် ဧလိရှဲသည် ဧလိယကို ခြောက်နှစ်ခန့် ကူညီပေးခဲ့ပြီဖြစ်သည်။ သို့တိုင် သူသည် ဖြစ်နိုင်သရွေ့ ဧလိယနှင့်တွဲ၍ ကြာရှည်အမှုဆောင်လို၏။ မှတ်တမ်းက ဤသို့ထပ်ဆင့်ဖော်ပြသည်– “ထိုသို့နှုတ်ဆက်လျက်သွားကြစဉ်တွင် . . . ဧလိယသည် . . . တက်လေ၏။” (အခန်းငယ် ၁၁) ဣသရေလနိုင်ငံတွင် ဧလိယ၏ဓမ္မအမှု ပြီးဆုံးချိန်အထိ ဧလိယနှင့် ဧလိရှဲတို့ စကားပြောဆိုနေကြဆဲရှိသည်။ လူငယ်ပရောဖက်သည် အတွေ့အကြုံများစွာရှိသော သက်ကြီးရွယ်အိုပရောဖက်ထံမှ ဆုံးမစကားများနှင့် အားပေးစကားများကို ဖြစ်နိုင်သရွေ့ ကြားလိုခဲ့သည်မှာ ထင်ရှား၏။ သက်ကြီးရွယ်အိုမိတ်ဆွေကို ဧလိရှဲတန်ဖိုးထားကြောင်း ထင်ရှားသည်။
‘အဘ၊ အမိကဲ့သို့’
ဧလိရှဲသည် သက်ကြီးရွယ်အိုပရောဖက်ကို မိတ်ဆွေတစ်ဦးကဲ့သို့၊ ဝိညာဉ်ရေးအဘကဲ့သို့ပင် ချစ်ရသည့်အကြောင်းရင်းကို နားလည်ရန်မခက်ပေ။ (၄ ဓမ္မရာဇဝင် ၂:၁၂) ဣသရေလနိုင်ငံတွင် ဧလိယ၏တာဝန် မပြီးဆုံးမီလေးတွင် သူက “သင်နှင့်ငါမကွာမီ ငါ၌တစ်စုံတစ်ခုသောဆုကို တောင်းလော့” ဟုဧလိရှဲကို ပြောခဲ့သည်။ (အခန်းငယ် ၉) သို့ဖြစ်၍ ဧလိယသည် အဆုံးတိုင်အောင် မိမိ၏အရိုက်အရာကို ဆက်ခံမည့်သူ၏ဝိညာဉ်ရေးနှင့် ဘုရားသခင်၏လုပ်ငန်း ဆက်တည်ရှိရေးအတွက် စိုးရိမ်ပူပန်ခဲ့သည်။
ယနေ့ သက်ကြီးရွယ်အိုခရစ်ယာန်ညီအစ်ကို၊ ညီအစ်မများသည် လူငယ်များအား သူတို့၏အသိပညာနှင့် ဉာဏ်ပညာကို ရက်ရက်ရောရောဝေမျှပေးပုံတွင် အဘ၊ အမိကဲ့သို့ ဂရုစိုက်မှုရှိကြကြောင်း တွေ့ရှိရခြင်းသည် ဝမ်းသာအားရစရာပင်။ ဥပမာ၊ ယေဟောဝါသက်သေများ၏ ဌာနခွဲရုံးများတွင် အမှုဆောင်နေကြသော လုပ်သက်ရင့် စေတနာ့ဝန်ထမ်းများသည် ဗေသလအိမ်သားအသစ်များ သူတို့၏တာဝန်ထမ်းဆောင်နိုင်ရန် လိုအပ်သည့်အတတ်ပညာများရရှိဖို့ တလိုတလားကူညီပေးကြ၏။ ထိုနည်းတူစွာ၊ အသင်းတော်များထံ နှစ်ပေါင်းများစွာ လည်ပတ်ခဲ့ကြသော နယ်လှည့်ကြီးကြပ်မှူးများနှင့် သူတို့၏ဇနီးများသည် နယ်လှည့်အမှုဆောင်များဖြစ်မည့်သူတို့အား မိမိတို့သိရှိရာများစွာကို ဝမ်းသာအားရဝေမျှပေးကြသည်။ ထို့ပြင် ကမ္ဘာတစ်ဝန်းရှိ ယေဟောဝါသက်သေများ၏ အသင်းတော်များတွင် ဆယ်စုနှစ်များစွာ ယေဟောဝါအပေါ် သစ္စာရှိစွာဝတ်ပြုခဲ့ကြသော၊ အသင်းတော်သားအသစ်များကို မိမိတို့၏လက်တွေ့ကျဉာဏ်ပညာနှင့် အတွေ့အကြုံကို ဝမ်းပန်းတသာပြောပြကြသော သက်ကြီးရွယ်အိုညီအစ်ကို၊ ညီအစ်မများစွာရှိသည်။—သု. ၂:၇; ဖိလိပ္ပိ ၃:၁၇; တိတု ၂:၃-၅။
အဆိုပါချစ်ရသော သက်ကြီးရွယ်အိုခရစ်ယာန်များတင်ပြသည့် စိတ်ဝင်စားမှုကြောင့် ဤကဲ့သို့သောသက်ကြီးရွယ်အိုများကို လေးစားရခြင်းသည် အမှန်ပင် ကျေနပ်အားရစရာဖြစ်၏။ ထို့ကြောင့် ကျွန်ုပ်တို့သည် ဧလိရှဲနည်းတူ သက်ကြီးရွယ်အို ယုံကြည်သူချင်းများကို အလွန်တန်ဖိုးထားလိုကြပါသည်။ ကျွန်ုပ်တို့ကို တမန်တော်ပေါလု သတိပေးခဲ့သည့်အတိုင်း “အသက်ကြီးသောသူကို . . . အဘကဲ့သို့” “အသက်ကြီးသောမိန်းမတို့ကို အမိကဲ့သို့” အမြဲဆက်ဆံကြပါစို့။ (၁ တိမောသေ ၅:၁၊ ၂) ထိုသို့ပြုမူခြင်းအားဖြင့် ကမ္ဘာတစ်ဝန်းရှိ ခရစ်ယာန်အသင်းတော်၏ လျောက်ပတ်စွာလည်ပတ်မှုနှင့် တိုးတက်မှုအတွက် အထူးအကူအညီဖြစ်စေသည်။
[စာမျက်နှာ ၃၀ ပါ ရုပ်ပုံ]
ဧလိရှဲသည် ဖြစ်နိုင်သရွေ့ ဧလိယနှင့်တွဲ၍ ကြာရှည်အမှုဆောင်လိုခဲ့
[စာမျက်နှာ ၃၁ ပါ ရုပ်ပုံ]
လူငယ်များသည် သက်ကြီးရွယ်အိုခရစ်ယာန် များမှ အကျိုးကျေးဇူးများစွာရရှိ