အဘယ်ကြောင့်မခြားမလပ် ဆုတောင်းသင့်သနည်း
အဘယ်ကြောင့်မခြားမလပ် ဆုတောင်းသင့်သနည်း
‘မခြားမလပ်ဆုတောင်းကြလော့။ အရာရာ၌ ကျေးဇူးတော်ကို ချီးမွမ်းကြလော့။’—၁ သက်သာလောနိတ် ၅:၁၇၊ ၁၈။
၁၊ ၂။ ဆုတောင်းခြင်းအခွင့်ထူးကို ဒံယေလတန်ဖိုးထားကြောင်း သူမည်သို့ဖော်ပြခဲ့သနည်း၊ ယင်းက ဘုရားသခင်နှင့်သူ၏ဆက်ဆံရေးအပေါ် အဘယ်အကျိုးသက်ရောက်စေခဲ့သနည်း။
ပရောဖက်ဒံယေလသည် တစ်နေ့လျှင်သုံးကြိမ် ဘုရားသခင်ထံဆုတောင်းလေ့ရှိ၏။ သူသည် ယေရုရှလင်မြို့သို့ မျက်နှာမူသည့် အထက်ခန်းပြတင်းပေါက်ကိုဖွင့်၍ ဒူးထောက်ပြီး ဆုတောင်းလေ့ရှိသည်။ (၃ ဓမ္မရာဇဝင် ၈:၄၆-၄၉; ဒံယေလ ၆:၁၀) မေဒိရှင်ဘုရင်ဒါရိမင်းမှတစ်ပါး အခြားမည်သူ့ထံမျှဆုမတောင်းရဟု ဘုရင့်အမိန့်ရှိသည့်တိုင် ဒံယေလသည် မယိမ်းမယိုင်ဆက်ဆုတောင်းခဲ့သည်။ အသက်အန္တရာယ်ရှိရှိ၊ မရှိရှိ ဆုတောင်းခြင်းအလေ့အထရှိသူ ဤအမျိုးသားသည် ယေဟောဝါထံ မခြားမလပ်ဆုတောင်းခဲ့သည်။
၂ ဒံယေလကို ယေဟောဝါမည်သို့ရှုမြင်ခဲ့သနည်း။ ဒံယေလ၏ဆုတောင်းချက်တစ်ခုကို ဖြေဆိုဖို့ ကောင်းကင်တမန်ဂါဗြေလ ရောက်လာသောအခါ အဆိုပါပရောဖက်ကို “အလွန်ချစ်အပ်သောသူ” ဟု ခေါ်ဆိုခဲ့၏။ (ဒံယေလ ၉:၂၀-၂၃) ယေဇကျေလပရောဖက်ပြုချက်တွင် ဒံယေလကို ဖြောင့်မတ်သူဟု ယေဟောဝါရည်ညွှန်းခေါ်ဆိုခဲ့သည်။ (ယေဇကျေလ ၁၄:၁၄၊ ၂၀) နှစ်များတစ်လျှောက် ဒံယေလ၏ဆုတောင်းချက်များသည် သူ၏ဘုရားသခင်နှင့် ရင်းနှီးသည့်ဆက်ဆံရေး ရှိစေခဲ့သည်မှာ ထင်ရှားသည်၊ ယင်းကို ဒါရိမင်းကြီးပင် အသိအမှတ်ပြုခဲ့သည်။—ဒံယေလ ၆:၁၆။
၃။ ခရစ်ယာန်သာသနာပြုတစ်ဦး၏ အတွေ့အကြုံကဖော်ပြခဲ့သည့်အတိုင်း ဆက်တည်ကြည်ရန် ဆုတောင်းခြင်းက မည်သို့ကူညီပေးနိုင်သနည်း။
၃ မှန်မှန်ဆုတောင်းခြင်းက ပြင်းထန်သောစမ်းသပ်မှုများ ရင်ဆိုင်ဖို့လည်း ကျွန်ုပ်တို့ကို ထောက်ကူပေးနိုင်သည်။ ဥပမာ၊ တရုတ်ပြည်တွင် ခရစ်ယာန်သာသနာပြုခဲ့၍ ငါးနှစ်ကြာတစ်ကိုယ်တည်းအကျဉ်းချခံခဲ့ရသူ ဟယ်ရယ်ဒ်ကင်း၏အကြောင်းကို သုံးသပ်ကြည့်ပါ။ မိမိ၏တွေ့ကြုံမှုအကြောင်း ညီအစ်ကိုကင်း ဤသို့ပြောခဲ့သည်– “လူတွေနဲ့ ကျွန်တော်ကင်းကွာနေခဲ့ရပေမဲ့ ဘုရားသခင်နဲ့ကင်းကွာသွားရအောင် ဘယ်သူမှမလုပ်နိုင်ပါဘူး။ . . . ဒါကြောင့် ကျမ်းစာမှာဖော်ပြထားတဲ့ ဒံယေလကို သတိရပြီး ကျွန်တော့်အကျဉ်းခန်းကို ဖြတ်သွားဖြတ်လာလုပ်တဲ့သူတွေရှေ့မှာပဲ တစ်နေ့ကိုသုံးခါ အသံကျယ်ကျယ်နဲ့ ဆုတောင်းခဲ့တယ်။ . . . အဲဒီလိုအခါမျိုးမှာ ဘုရားသခင့်ဝိညာဉ်တော်က ကျွန်တော့်အတွက် အကျိုးအရှိဆုံးအရာတွေကို သတိရစေပုံပေါက်တယ်၊ အဲ့ဒီအခါ ကျွန်တော် စိတ်တည်ငြိမ်သွားတော့တယ်။ ဆုတောင်းခြင်းကနေ ကျွန်တော် ဝိညာဉ်ခွန်အားနဲ့ စိတ်သက်သာမှု တကယ်ရခဲ့တယ်!”
၄။ ဤဆောင်းပါးတွင် ဆုတောင်းခြင်းနှင့်စပ်လျဉ်း၍ အဘယ်မေးခွန်းများကို ကျွန်ုပ်တို့သုံးသပ်ကြမည်နည်း။
၄ သမ္မာကျမ်းစာက ‘မခြားမလပ်ဆုတောင်းကြလော့။ အရာရာ၌ ကျေးဇူးတော်ကိုချီးမွမ်းကြလော့’ ဟုဆို၏။ (၁ သက်သာလောနိတ် ၅:၁၇၊ ၁၈) ဤအကြံပေးချက်ကိုထောက်၍ အောက်ပါမေးခွန်းများကို ဆင်ခြင်သုံးသပ်ကြပါစို့– ကျွန်ုပ်တို့၏ဆုတောင်းချက်များကို အဘယ်ကြောင့်ဂရုစိုက်သင့်သနည်း။ ယေဟောဝါထံအစဉ်မပြတ်ချဉ်းကပ်ဖို့ အဘယ်အကြောင်းကောင်းများရှိသနည်း။ ကျွန်ုပ်တို့၏ချွတ်ယွင်းချက်များကြောင့် ဘုရားသခင်ထံဆုတောင်းဖို့ မထိုက်တန်ဟုခံစားရလျှင် အဘယ်အရာပြုလုပ်သင့်သနည်း။
ဆုတောင်းခြင်းဖြင့် မိတ်ဆွေဖွဲ့ပါ
၅။ ဆုတောင်းခြင်းက အဘယ်ထူးခြားသောဆက်ဆံရေးရရှိစေသနည်း။
၅ သင့်ကို ယေဟောဝါ၏မိတ်ဆွေအဖြစ် ကိုယ်တော်အား ယူမှတ်စေလိုသလော။ ဘိုးဘေးအာဗြဟံကို ကိုယ်တော်ထိုသို့ယူမှတ်ခဲ့၏။ (ဟေရှာယ ၄၁:၈; ယာကုပ် ၂:၂၃) ယေဟောဝါနှင့် ထိုသို့သောဆက်ဆံရေးမျိုးကို ကျွန်ုပ်တို့အား ကိုယ်တော်ရရှိစေလိုသည်။ အမှန်မှာ ကိုယ်တော့်ထံချဉ်းကပ်ကြရန် ကျွန်ုပ်တို့ကို ကိုယ်တော်အမှန်တကယ်ဖိတ်ခေါ်တော်မူ၏။ (ယာကုပ် ၄:၈) ထိုဖိတ်ခေါ်ချက်က ကျွန်ုပ်တို့ကို ထူးခြားလှသည့် ဆုတောင်းခြင်းပြင်ဆင်ပေးချက်အကြောင်း အသေအချာ စဉ်းစားစေသင့်သည်။ အရေးပါအရာရောက်သော အစိုးရအရာရှိတစ်ဦးနှင့် မိတ်ဆွေဖြစ်ဖို့မဆိုထားနှင့် သူနှင့်စကားပြောဆိုခွင့်ရရန်ပင် အလွန်ခဲယဉ်းလိုက်လေခြင်း! သို့တိုင်၊ စကြဝဠာဖန်ဆင်းရှင်သည် ကျွန်ုပ်တို့ဆန္ဒရှိသည့်အချိန်တိုင်း၊ အလိုရှိသည့်အချိန်အခါတိုင်း ကိုယ်တော့်ထံ လွတ်လွတ်လပ်လပ် ဆုတောင်းခြင်းဖြင့် ချဉ်းကပ်ဖို့ အားပေးတော်မူသည်။ (ဆာလံ ၃၇:၅) ကျွန်ုပ်တို့အဆက်မပြတ်ဆုတောင်းခြင်းက ယေဟောဝါနှင့် ရင်းနှီးသောဆက်ဆံရေးရှိလာစေသည်။
၆။ “ဆုတောင်းလျက်” နေဖို့လိုကြောင်း ယေရှု၏ပုံသက်သေက အဘယ်အရာသွန်သင်ပေးသနည်း။
၆ သို့ရာတွင် ဆုတောင်းခြင်းကို ကျွန်ုပ်တို့လျစ်လျူရှုရန် အလွန်လွယ်ကူပေ၏! နေ့စဉ်ဘဝအသက်တာ၏ဖိစီးမှုများကို ရင်ဆိုင်ဖြေရှင်းနေရခြင်းကို အာရုံစိုက်နေရ၍ ဘုရားသခင်နှင့်စကားပြောဆိုဖို့ မကြိုးစားတော့ဘဲနေမည်။ ယေရှုက မိမိ၏နောက်လိုက်များကို “ဆုတောင်းလျက်” နေကြဖို့ အားပေးခဲ့၏၊ ကိုယ်တော်တိုင်လည်း ထိုသို့ပြုလုပ်တော်မူခဲ့သည်။ (မဿဲ ၂၆:၄၁) ကိုယ်တော်သည် နေ့ရောညပါ အမြဲအလုပ်များလျက်ရှိသော်လည်း မိမိ၏ကောင်းကင်ခမည်းတော်နှင့် စကားပြောဆိုဖို့ အချိန်သတ်မှတ်ထား၏။ တစ်ခါတစ်ရံ “နံနက်အချိန်၊ မိုးမလင်းမီ” ထ၍ ယေရှုဆုတောင်းခဲ့၏။ (မာကု ၁:၃၅) အခြားအချိန်အခါများ၌ ယေဟောဝါနှင့်စကားပြောဆိုရန် တစ်နေ့တာအကုန်ပိုင်းတွင် လူဆိတ်ညံရာသို့ ထွက်သွားခဲ့သည်။ (မဿဲ ၁၄:၂၃) ယေရှုသည် အမြဲအချိန်ယူဆုတောင်းခဲ့သကဲ့သို့ ကျွန်ုပ်တို့လည်း ထိုသို့ပြုသင့်သည်။—၁ ပေတရု ၂:၂၁။
၇။ အဘယ်အခြေအနေများက ကျွန်ုပ်တို့၏ကောင်းကင်ခမည်းတော်နှင့် နေ့စဉ်စကားပြောဆိုသင့်သနည်း။
၇ ပြဿနာများကြုံတွေ့ရသည့်အခါ၊ သွေးဆောင်ခံရသည့်အခါ၊ ဆုံးဖြတ်ချက်ချရသည့်အခါတို့တွင် သီးသန့်ဆုတောင်းရန် သင့်လျော်သည့်အခါသမယများ ရတတ်ကြသည်။ (ဧဖက် ၆:၁၈) ဘဝကဏ္ဍအသီးသီးတွင် ဘုရားသခင့်လမ်းညွှန်မှုကို ကျွန်ုပ်တို့ရှာဖွေယူလျှင် ကိုယ်တော်နှင့်ကျွန်ုပ်တို့၏ဆက်ဆံရေး ပိုတိုးတက်လာမည်မှာသေချာပါသည်။ မိတ်ဆွေနှစ်ဦးသည် ပြဿနာများကို အတူတကွရင်ဆိုင်ကြမည်ဆိုလျှင် သူတို့ ပိုမိုရင်းနှီးချစ်ခင်လာမည်မဟုတ်ပေလော။ (သု. ၁၇:၁၇) ယေဟောဝါကို ကျွန်ုပ်တို့အားကိုးပြီး ကိုယ်တော့်အကူအညီရရှိမည်ဆိုလျှင် ထိုအတိုင်းဖြစ်လာပေမည်။—၂ ရာဇဝင်ချုပ် ၁၄:၁၁။
၈။ နေဟမိ၊ ယေရှုနှင့် ဟန္နတို့၏ ပုံသက်သေများမှ ကျွန်ုပ်တို့၏ကိုယ်ပိုင်ဆုတောင်းချက်များ၏ အတိုအရှည်နှင့်ပတ်သက်၍ အဘယ်အရာသိရှိရသနည်း။
၈ ဘုရားသခင်ကိုဆုတောင်းရာတွင် အချိန်မည်မျှကြာရမည်၊ အကြိမ်ပေါင်းမည်မျှရှိရမည်ဟူ၍ ကိုယ်တော်ကန့်သတ်မထားသဖြင့် အလွန်ဝမ်းသာစရာပင်ဖြစ်၏! နေဟမိသည် ပါးရှားဘုရင်ထံ အသနားမခံမီ အလျင်အမြန် တိတ်တဆိတ်ဆုတောင်းခဲ့၏။ (နေဟမိ ၂:၄၊ ၅) လာဇရုကိုရှင်ပြန်ထမြောက်စေနိုင်ရန် အစွမ်းတန်ခိုးပေးသနားဖို့ ယေဟောဝါထံ ယေရှု တိုတိုတုတ်တုတ်ဆုတောင်းတော်မူခဲ့သည်။ (ယောဟန် ၁၁:၄၁၊ ၄၂) အခြားတစ်ဖက်တွင်မူ၊ ဟန္နသည် ယေဟောဝါထံ ရင်ဖွင့်ကာ “ရှေ့တော်၌ ကြာမြင့်စွာဆုတောင်းခဲ့” သည်။ (၁ ဓမ္မရာဇဝင် ၁:၁၂၊ ၁၅၊ ၁၆) ကျွန်ုပ်တို့၏ကိုယ်ပိုင်ဆုတောင်းချက်များသည် လိုအပ်သလို အခြေအနေအရ တိုတိုတုတ်တုတ်၊ သို့မဟုတ် ရှည်လျားနိုင်ပါသည်။
၉။ ကျွန်ုပ်တို့၏ဆုတောင်းချက်များတွင် ယေဟောဝါပြုလုပ်ပေးသမျှကို ကျေးဇူးတင်ချီးမွမ်းကြောင်း အဘယ်ကြောင့် ထည့်ပြောသင့်သနည်း။
၉ ကျမ်းစာပါ ဆုတောင်းချက်များစွာသည် ယေဟောဝါ၏ အမြင့်မြတ်ဆုံးရာထူးနှင့် ကိုယ်တော်၏အံ့ဖွယ်အမှုတော်တို့ကို လှိုက်လှိုက်လှဲလှဲ ကျေးဇူးတင်ကြောင်း ဖော်ပြသည်။ (ထွက်မြောက်ရာ ၁၅:၁-၁၉; ၁ ရာဇဝင်ချုပ် ၁၆:၇-၃၆; ဆာလံ ၁၄၅) တမန်တော်ယောဟန်သည် အဆင်းအာရုံတစ်ခု၌ အသက်ကြီးသူ ၂၄ ပါးဖြစ်သူ ကောင်းကင်ရာထူးရရှိထားသော ဘိသိက်ခံခရစ်ယာန်များ၏ အရေအတွက်အပြည့်အစုံကို မြင်တွေ့ခဲ့၍ သူတို့က ယေဟောဝါအား ဤသို့ချီးမွမ်းသီဆိုနေကြသည်– “အိုထာဝရဘုရား[သခင်] [“ယေဟောဝါ၊” ကဘ]၊ ကိုယ်တော်သည် ခပ်သိမ်းသောအရာတို့ကို ဖန်ဆင်းတော်မူပြီ။ ထိုအရာတို့သည် အလိုတော်ကြောင့်ဖြစ်၍ ဖန်ဆင်းလျက်ရှိကြပါ၏။ ထို့ကြောင့်၊ ကိုယ်တော်သည် ဘုန်းအသရေတန်ခိုးတော်ကို ခံစားထိုက်တော်မူ၏။” (ဗျာ. ၄:၁၀၊ ၁၁) ကျွန်ုပ်တို့လည်း ဖန်ဆင်းရှင်ကို မှန်မှန်ချီးမွမ်းစရာအကြောင်းရှိသည်။ ကလေးတစ်ဦးသည် မိမိအတွက် မိဘများပြုလုပ်ပေးခဲ့သောအရာကို ကျေးဇူးတင်ကြောင်း လှိုက်လှိုက်လှဲလှဲပြောဆိုသည့်အခါ သူ၏မိဘများ အလွန်ပျော်ရွှင်ကြသည်! ယေဟောဝါ၏သနားကြင်နာမှုများကို ကျေးဇူးတင်စွာ ဆင်ခြင်သုံးသပ်ပြီး ၎င်းတို့အတွက် အလွန်ကျေးဇူးတင်ကြောင်း ဆုတောင်းချိန်တွင် လှိုက်လှိုက်လှဲလှဲ ဖော်ပြခြင်းသည် ဆုတောင်းခြင်းအရည်အသွေးကို တိုးတက်စေသည့် နည်းလမ်းကောင်းတစ်ခုဖြစ်သည်။
‘မခြားမလပ်ဆုတောင်းကြလော့’—အဘယ်ကြောင့်နည်း
၁၀။ ကျွန်ုပ်တို့၏ယုံကြည်ခြင်း ခိုင်ခံ့လာဖို့ ဆုတောင်းခြင်းသည် မည်မျှအရေးကြီးသနည်း။
၁၀ မှန်မှန်ဆုတောင်းခြင်းသည် ကျွန်ုပ်တို့၏ယုံကြည်ခြင်းအတွက် အလွန်အရေးကြီးသည်။ “အားမလျော့ဘဲ ကြိုးစား၍ဆုတောင်း” ဖို့လိုကြောင်း ပုံဥပမာဖြင့် ရှင်းလင်းဖော်ပြပြီးနောက် ယေရှုက “လူသားသည် ကြွလာသောအခါ ယုံကြည်ခြင်းကို မြေကြီးပေါ်မှာတွေ့မည်လော” ဟုမေးခဲ့သည်။ (လုကာ ၁၈:၁-၈) အဓိပ္ပာယ်ပြည့်ဝပြီး လှိုက်လှဲစွာတောင်းသောဆုတောင်းချက်သည် ယုံကြည်ခြင်းကို တည်ဆောက်ပေး၏။ ဘိုးဘေးအာဗြဟံသည် အသက်အရွယ်ကြီးရင့်လာပြီး သားသမီးမထွန်းကားသေးသောအခါ အဆိုပါကိစ္စအကြောင်း ဘုရားသခင်အား တင်ပြပြောဆိုခဲ့သည်။ ယေဟောဝါဖြေဆိုရာတွင် သူ့ကို ကောင်းကင်သို့ ဦးဆုံးမျှော်ကြည့်စေပြီး ကြယ်များကို ရေတွက်နိုင်လျှင် ရေတွက်ဖို့ပြောခဲ့သည်။ ထို့နောက် ဘုရားသခင်က “သင်၏အမျိုးအနွယ်သည် ထိုသို့ဖြစ်လိမ့်မည်” ဟု အာဗြဟံကို စိတ်ချစေခဲ့ရာ အာဗြဟံသည် “ [“ယေဟောဝါ၊” ကဘ] ကိုယုံကြည်သည်ဖြစ်၍ သူ၏ယုံကြည်ခြင်းကို ဖြောင့်မတ်ခြင်းကဲ့သို့မှတ်တော်မူ၏။” (ကမ္ဘာဦး ၁၅:၅၊ ၆) ကျွန်ုပ်တို့သည် ဆုတောင်းခြင်းဖြင့် ယေဟောဝါအားရင်ဖွင့်ကာ သမ္မာကျမ်းစာမှ ကိုယ်တော်၏အာမခံချက်များကိုလက်ခံ၍ ကိုယ်တော့်စကားကိုနားထောင်မည်ဆိုလျှင် ကျွန်ုပ်တို့၏ယုံကြည်ခြင်းကို ခိုင်ခံ့စေတော်မူလိမ့်မည်။
၁၁။ ပြဿနာများကို ကိုင်တွယ်ဖြေရှင်းနိုင်ရန် ဆုတောင်းခြင်းက မည်သို့ကူညီပေးနိုင်မည်နည်း။
၁၁ ဆုတောင်းခြင်းသည် ပြဿနာများကို ကျွန်ုပ်တို့ကိုင်တွယ်ဖြေရှင်းနိုင်ရန်လည်း ကူညီပေးနိုင်ပါသည်။ ကျွန်ုပ်တို့၏ဘဝအခြေအနေသည် ဝန်လေး၍ပင်ပန်းစရာဖြစ်ပြီး ရင်ဆိုင်ရသောအခက်အခဲများသည် ကြမ်းတမ်းသလော။ သမ္မာကျမ်းစာက ဤသို့အားပေးသည်– “ထမ်းရွက်ရသောဝန်ကို ထာဝရဘုရား[သခင်]၌ချထားလော့။ သင့်ကိုမစတော်မူမည်။ ဖြောင့်မတ်သောသူကို အစဉ်အမြဲလှုပ်ရှားစေတော်မမူရာ။” (ဆာလံ ၅၅:၂၂) ဆုံးဖြတ်ချက်ချရခက်သောအချိန်အခါမျိုးတွင် ယေရှု၏ပုံသက်သေကို အတုယူနိုင်ပါသည်။ ကိုယ်တော်သည် တမန်တော် ၁၂ ပါးကို မရွေးချယ်မီ တစ်ညလုံး သီးသန့်ဆုတောင်းခဲ့၏။ (လုကာ ၆:၁၂-၁၆) ကိုယ်တော်မသေဆုံးမီည၌ ယေရှုသည် အပြင်းအထန် ဆုတောင်းခဲ့ရာ ‘ကိုယ်တော်၏ချွေးသည် မြေပေါ်၌ကျသော သွေးစက်ခဲကဲ့သို့ဖြစ်’ ခဲ့သည်။ (လုကာ ၂၂:၄၄) ရလဒ်ကား အဘယ်နည်း။ ကိုယ်တော်သည် “ဘုရားသခင်ကိုကြောက်ရွံ့ ခြင်းသဘောကြောင့် နားညောင်းတော်မူခြင်းကိုခံရ” သည်။ (ဟေဗြဲ ၅:၇၊ ၈၊ သမ္မာ) ဖိစီးမှုပြင်းထန်သောအခြေအနေများနှင့် ခက်ခဲသောစမ်းသပ်မှုများကိုကြုံရသည့်အခါ ကျွန်ုပ်တို့စိတ်ထက်ထက်သန်သန်နှင့် အဆက်မပြတ်တောင်းလျှောက်သော ဆုတောင်းချက်များက ၎င်းတို့ကို ကိုင်တွယ်ဖြေရှင်းနိုင်ရန် ကူညီပေးပါလိမ့်မည်။
၁၂။ ယေဟောဝါသည် ကျွန်ုပ်တို့ကိုအလွန်စိတ်ဝင်စားကြောင်း ဆုတောင်းခြင်းအခွင့်ထူးက မည်သို့ဖော်ပြသနည်း။
၁၂ ဆုတောင်းခြင်းဖြင့် ယေဟောဝါထံ ပို၍နီးကပ်စွာချဉ်းကပ်ရမည့် နောက်အကြောင်းတစ်ခုမှာ ကိုယ်တော်သည်လည်း ကျွန်ုပ်တို့ထံချဉ်းကပ်လာမည်ဖြစ်သောကြောင့်ပင်။ (ယာကုပ် ၄:၈) ကျွန်ုပ်တို့သည် ယေဟောဝါထံရင်ဖွင့်ဆုတောင်းသည့်အခါ ကျွန်ုပ်တို့၏လိုအပ်ရာများကို ကိုယ်တော်စိတ်ဝင်စားပြီး ကျွန်ုပ်တို့ကို ကြင်နာစွာ ဂရုစိုက်ကြည့်ရှုနေတော်မူ၏ဟု ခံစားရသည်မဟုတ်ပေလော။ ဘုရားသခင်၏မေတ္တာတော်ကို ကျွန်ုပ်တို့ကိုယ်စီကိုယ်င တွေ့ ကြုံခံစားနေကြရ၏။ ယေဟောဝါသည် ကောင်းကင်ခမည်းတော်ဖြစ်၍ ကိုယ်တော်၏ကျေးကျွန်များ ဦးတိုက်တောင်းဆိုကြသည့် ဆုတောင်းချက်မှန်သမျှကို နားထောင်ပေးဖို့ အခြားမည်သူ့ကိုမျှ တာဝန်လွှဲအပ်ထားခြင်းမရှိချေ။ (ဆာလံ ၆၆:၁၉၊ ၂၀; လုကာ ၁၁:၂) ထို့ပြင် ‘ကိုယ်တော်သည် ကျွန်ုပ်တို့ကို သတိနှင့်ကြည့်ရှုတော်မူသောကြောင့် ကျွန်ုပ်တို့၌ စိုးရိမ်ခြင်းအမှုရှိသမျှတို့ကို ကိုယ်တော်၌ အပ်နှံကြ’ ရန် ဖိတ်ခေါ်တော်မူ၏။—၁ ပေတရု ၅:၆၊ ၇။
၁၃၊ ၁၄။ မခြားမလပ်ဆုတောင်းရန် အဘယ်အကြောင်းရှိသနည်း။
၁၃ ဆုတောင်းခြင်းက အမှုဆောင်ခြင်းတွင် ပိုမိုစိတ်အားထက်သန်စေနိုင်ပြီး လျစ်လျူရှုမှု သို့မဟုတ် ဆန့်ကျင်မှုကြောင့် လက်လျှော့လိုစိတ်ပေါ်လာသည့်အခါ ကျွန်ုပ်တို့ကို ခွန်အားပေးနိုင်ပါသည်။ (တမန်တော် ၄:၂၃-၃၁) ထို့ပြင် ဆုတောင်းခြင်းသည် “[စာတန်]၏ပရိယာယ်များ” မှ ကျွန်ုပ်တို့ကို ကာကွယ်ပေးနိုင်သည်။ (ဧဖက် ၆:၁၁၊ ၁၇၊ ၁၈) နေ့စဉ်စမ်းသပ်မှုများကို ကိုင်တွယ်ဖြေရှင်းရန် ကြိုးစားရာတွင် ခွန်အားပေးတော်မူပါဟု ဘုရားသခင်ထံ အမြဲဆုတောင်းနိုင်ပါသည်။ ယေရှု၏စံပြဆုတောင်းချက်တွင် “မကောင်းသောအမှုအရာ” စာတန်၏လက်မှ “ကယ်နုတ်တော်မူပါ” ဟုယေဟောဝါအားတောင်းခံချက် ပါဝင်သည်။—မဿဲ ၆:၁၃။
၁၄ ကျွန်ုပ်တို့၏အပြစ်ပြုလိုသော စိတ်သဘောထားများကို ထိန်းချုပ်နိုင်ရန် ဆက်ဆုတောင်းနေမည်ဆိုလျှင် ယေဟောဝါ၏ကူညီမစမှုကို ခံစားရပါလိမ့်မည်။ ကျွန်ုပ်တို့၌ ဤအာမခံချက်ရှိပါသည်– “ဘုရားသခင်သည် [တည်ကြည်မှု] နှင့်ပြည့်စုံတော်မူသည်ဖြစ်၍၊ သင်တို့မခံနိုင်သောစုံစမ်းနှောင့်ယှက်ခြင်းကို သင်တို့၌ရောက်စိမ့်သောငှာ အခွင့်ပေးတော်မမူ။ သင်တို့သည် ခံနိုင်မည်အကြောင်း စုံစမ်းနှောင့်ယှက်ခြင်းအရာနှင့်တကွ၊ ထွက်မြောက်သောလမ်းကိုလည်း စီရင်ပြုပြင်တော်မူလိမ့်မည်။” (၁ ကောရိန္သု ၁၀:၁၃) တမန်တော်ပေါလုကိုယ်တိုင် အခြေအနေအမျိုးမျိုးတွင် ယေဟောဝါ၏ အားရှိစေသောဂရုစိုက်မှုကို ခံစားခဲ့ရ၏။ “ငါ့ကိုခွန်အားနှင့် ပြည့်စုံစေတော်မူသောအရှင်အားဖြင့် ခပ်သိမ်းသောအမှုကို ငါတတ်စွမ်းနိုင်၏” ဟု သူဆိုခဲ့သည်။—ဖိလိပ္ပိ ၄:၁၃၊ သမ္မာ; ၂ ကောရိန္သု ၁၁:၂၃-၂၉။
ချွတ်ယွင်းချက်များရှိလင့်ကစား ဆုတောင်းခြင်းအမှုကို အမြဲပြုပါ
၁၅။ ကျွန်ုပ်တို့၏အမူအကျင့်သည် ဘုရားသခင့်စံနှုန်းများကို မမီသောအခါ အဘယ်အရာဖြစ်ပျက်လာနိုင်သနည်း။
၁၅ ကျွန်ုပ်တို့၏ဆုတောင်းချက်များကို နားညောင်းစေလိုလျှင် ဘုရားသခင့်နှုတ်မြွက်စကားတော်၏ သွန်သင်ချက်ကို မပယ်ရပေ။ တမန်တော်ယောဟန်က “ငါတို့သည် ပညတ်တော်တို့ကိုစောင့်ရှောက်၍၊ နှစ်သက်တော်မူသောအကျင့်တို့ကို ကျင့်သောကြောင့်၊ ဆုတောင်းသမျှတို့ကို ဘုရားသခင့်ထံတော်မှရကြ၏” ဟု ရေးသားခဲ့သည်။ (၁ ယောဟန် ၃:၂၂) သို့ဖြစ်လင့်ကစား ကျွန်ုပ်တို့၏အမူအကျင့်သည် ဘုရားသခင့်စံနှုန်းများကို မမီသောအခါ အဘယ်အရာဖြစ်ပျက်လာမည်နည်း။ ဧဒင်ဥယျာဉ်တွင် အာဒံနှင့်ဧဝတို့ အပြစ်ပြုပြီးနောက် သူတို့ပုန်းနေခဲ့ကြသည်။ ကျွန်ုပ်တို့လည်း ယေဟောဝါ၏ “မျက်မှောက်တော်မှ” ပုန်းရှောင်လိုစိတ်ဖြင့် ဆုမတောင်းတော့ဘဲနေပေမည်။ (ကမ္ဘာဦး ၃:၈၊ သမ္မာ) အတွေ့အကြုံရှိ နယ်လှည့်ကြီးကြပ်မှူးတစ်ဦးဖြစ်သူ ကလော့စ်ကဤသို့ဆိုသည်– “ယေဟောဝါနဲ့ ကိုယ်တော်ရဲ့အဖွဲ့အစည်းကနေ တဖြည်းဖြည်း ရွေ့လျားသွားသူတွေရဲ့ ဦးဆုံးခြေလှမ်းအမှားကတော့ ဆုမတောင်းတော့ဘဲနေတာကို အမြဲလိုလို ကျွန်တော်သတိထားမိတယ်။” (ဟေဗြဲ ၂:၁) ဟိုစေး အန်ကဲလ် ထိုသို့ပင်ဖြစ်ခဲ့သည်။ သူက ဤသို့ပြောပြသည်– “ယေဟောဝါကို ကျွန်တော်ဆုမတောင်းဘဲနေတာ ရှစ်နှစ်နီးပါးပဲ။ ကိုယ်တော့်ကို ကျွန်တော့်ရဲ့ ကောင်းကင်အဘအဖြစ် သတ်မှတ်ထားတုန်းပဲဖြစ်ပေမဲ့ ကိုယ်တော်နဲ့စကားပြောဆိုဖို့ မထိုက်တန်ဘူးလို့ ကျွန်တော်ခံစားမိတယ်။”
၁၆၊ ၁၇။ ဝိညာဉ်ရေးအားနည်းမှုကို အနိုင်ယူနိုင်ဖို့ မှန်မှန်ဆုတောင်းခြင်းက မည်သို့ကူညီပေးနိုင်ကြောင်း ဥပမာများပေးပါ။
၁၆ အချို့တို့သည် ဝိညာဉ်ရေးအားနည်းမှုကြောင့် သို့မဟုတ် အမှားကျူးလွန်မိသောကြောင့် ဆုမတောင်းထိုက်ဟု ခံစားရပေမည်။ သို့သော် ဤအချိန်သည် ဆုတောင်းခြင်းအစီအစဉ်ကို အခွင့်ကောင်းယူဖို့လိုသည့်အချိန်ပင်ဖြစ်၏။ ယောနသည် သူ၏တာဝန်မှ ရှောင်ထွက်သွားခဲ့၏။ သို့သော် ‘ဆင်းရဲကိုခံရသောကြောင့် ယောနသည် ယေဟောဝါကိုဟစ်ခေါ်ခဲ့ပြီး သူ့စကားကို ကိုယ်တော်ဖြေကြားတော်မူ၏။ ရှီးအိုးလ်၏ဝမ်းထဲက ယောနဟစ်ခေါ်သောစကားသံကို ယေဟောဝါနားထောင်တော်မူ၏။’ (ယောန ၂:၂) ယောနဆုတောင်းခဲ့ရာ သူ၏ဆုတောင်းချက်ကို ယေဟောဝါဖြေကြားပေးသည်နှင့် ယောန၏ဝိညာဉ်ရေး ပြန်ကောင်းလာလေသည်။
၁၇ ဟိုစေး အန်ကဲလ်လည်း အကူအညီရဖို့ လှိုက်လှိုက်လှဲလှဲဆုတောင်းခဲ့သည်။ သူဤသို့ပြောပြသည်– “ဘုရားသခင်ခွင့်လွှတ်ပါရန် ကျွန်တော်ရင်ဖွင့်အသနားခံခဲ့တယ်။ ကျွန်တော့်ကို ကိုယ်တော်တကယ်ပဲ ကူညီပေးပါတယ်။ ဆုတောင်းခြင်းအကူအညီမရခဲ့ရင် အမှန်တရားဘက် ကျွန်တော်ပြန်လှည့်လာလိမ့်မယ် မထင်ဘူး။ အခုဆိုရင် ကျွန်တော် နေ့တိုင်း မှန်မှန်ဆုတောင်းတယ်၊ ဆုတောင်းခွင့်ရမယ့်အချိန်တွေကိုလည်း အမြဲမျှော်တယ်။” ကျွန်ုပ်တို့၏အမှားများ၊ အပြစ်များကို ဘုရားသခင်အား ပွင့်ပွင့်လင်းလင်း၊ လွတ်လွတ်လပ်လပ် အမြဲပြောဆိုသင့်ပြီး ခွင့်လွှတ်တော်မူပါဟု နှိမ့်ချစွာ အမြဲအသနားခံသင့်သည်။ ဘုရင်ဒါဝိဒ်သည် မိမိအပြစ်ကိုဝန်ခံလိုက်သောအခါ သူ့ကို ယေဟောဝါခွင့်လွှတ်တော်မူခဲ့၏။ (ဆာလံ ၃၂:၃-၅) ယေဟောဝါသည် ကျွန်ုပ်တို့ကိုပြစ်တင်ရှုတ်ချမည့်အစား ကူညီလိုတော်မူ၏။ (၁ ယောဟန် ၃:၁၉၊ ၂၀) ထို့ပြင် အသင်းတော်အကြီးအကဲများ၏ ဆုတောင်းချက်များကလည်း ဝိညာဉ်ရေးအရ ကူညီပေးနိုင်ပါသည်၊ အကြောင်းမှာ ထိုသို့သောဆုတောင်းချက်များသည် “အလွန်တန်ခိုးပါ” ၏။—ယာကုပ် ၅:၁၃-၁၆။
၁၈။ ဘုရားသခင့်ကျေးကျွန်များသည် မည်မျှပင်လမ်းလွဲခဲ့ပါစေ အဘယ်အရာကို ယုံကြည်စိတ်ချနိုင်သနည်း။
၁၈ အမှားပြုပြီးနောက် အကြံဉာဏ်ပေးဖို့ နှိမ့်ချစွာ အကူအညီတောင်းခံလာသည့်သားကို ငြင်းပယ်မည့်ဖခင်မျိုးရှိပါမည်လော။ ကျွန်ုပ်တို့သည် မည်မျှပင် လမ်းလွဲခဲ့ပါစေ ကောင်းကင်ခမည်းတော်ထံ ပြန်လှည့်လာလျှင် ကိုယ်တော်ဝမ်းမြောက်တော်မူကြောင်း ဖြုန်းတီးသောသားပုံဥပမာက ဖော်ပြသည်။ (လုကာ ၁၅:၂၁၊ ၂၂၊ ၃၂) ယေဟောဝါသည် “အထူးသဖြင့် အပြစ်ကိုလွှတ်တော်မူ” သောကြောင့် အမှားပြုမိသူအားလုံးကို ဆုတောင်းကြရန် ကိုယ်တော်တိုက်တွန်းတော်မူ၏။ (ဟေရှာယ ၅၅:၆၊ ၇) ကြီးလေးသောအပြစ်များကို ဒါဝိဒ်ကျူးလွန်မိခဲ့သော်လည်း ယေဟောဝါထံ သူဤသို့ဆုတောင်းခဲ့သည်– “အိုဘုရားသခင် အကျွန်ုပ်ဆုတောင်းသောစကားကို နားထောင်တော်မူပါ။ အသနားတော်ခံသောအခါ ရှောင်၍နေတော်မမူပါနှင့်။” ထို့ပြင် သူက “ညဦးအချိန်၊ နံနက်အချိန်၊ မွန်းတည့်အချိန်တို့၌ ငါသည် ညည်းတွားမြည်တမ်း၍ ငါ၏အသံကို [ယေဟောဝါ] ကြားတော်မူ” ၏ဟုလည်း ဆိုခဲ့သည်။ (ဆာလံ ၅၅:၁၊ ၁၇) အလွန်အားရှိစရာပါတကား!
၁၉။ ဆုတောင်းချက်များ ဖြေကြားခံရပုံမပေါက်လျှင် ဘုရားသခင့်အလိုတော်နှင့်မတွေ့ဟု ကျွန်ုပ်တို့အဘယ်ကြောင့် ကောက်ချက်မချသင့်သနည်း။
၁၉ ကျွန်ုပ်တို့၏အသနားခံချက်သည် ချက်ချင်းအဖြေရပုံမပေါက်လျှင်ကော အသို့နည်း။ သို့ဆိုလျှင် ကျွန်ုပ်တို့တောင်းဆိုချက်သည် ယေဟောဝါ၏အလိုတော်နှင့်ညီပြီး ယေရှု၏နာမတော်မှတစ်ဆင့် တောင်းဆိုထားခြင်းဖြစ်ရမည်။ (ယောဟန် ၁၆:၂၃; ၁ ယောဟန် ၅:၁၄) ခရစ်ယာန်အချို့သည် “အလွဲတောင်းသောကြောင့်” သူတို့၏ဆုတောင်းချက်များ မပြည့်ခဲ့ကြောင်း တပည့်ဖြစ်သူယာကုပ် ရည်ညွှန်းပြောဆိုခဲ့ဖူးသည်။ (ယာကုပ် ၄:၃) အခြားတစ်ဖက်၌မူ ပြည့်စုံပုံမရသည့်ဆုတောင်းချက်များသည် ဘုရားသခင်၏အလိုတော်နှင့်မတွေ့သောကြောင့်ဖြစ်၏ဟု အလျင်အမြန်ကောက်ချက်မချသင့်ချေ။ တစ်ခါတစ်ရံ ယေဟောဝါသည် ကိစ္စတစ်ရပ်ကို မဖြေကြားမီ တည်ကြည်သောခရစ်ယာန်များအား အတန်ကြာ ဆက်ဆုတောင်းစေပေမည်။ “ဆက်သာတောင်းနေ၊ တောင်းလျှင်ရမည်” ဟု ယေရှုမိန့်ဆိုခဲ့၏။ (မဿဲ ၇:၇၊ ကဘ) ထို့ကြောင့် ကျွန်ုပ်တို့သည် ‘ဆုတောင်းခြင်းအမှုကို အမြဲပြု’ ဖို့လိုသည်။—ရောမ ၁၂:၁၂။
မှန်မှန်ဆုတောင်းပါ
၂၀၊ ၂၁။ (က) ဤ “နောက်ဆုံးသောနေ့ရက်များ၌” ကျွန်ုပ်တို့သည် အဘယ်ကြောင့် မခြားမလပ်ဆုတောင်းဖို့လိုသနည်း။ (ခ) ယေဟောဝါ၏ကျေးဇူးပလ္လင်တော်သို့ ကျွန်ုပ်တို့ နေ့စဉ်ချဉ်းကပ်သောအခါ အဘယ်အရာကို ကျွန်ုပ်တို့ရရှိကြမည်နည်း။
၂၀ “ခဲယဉ်းသောကာလ” ဖြစ်သည့် ဤ “နောက်ဆုံးသောနေ့ရက်များ၌” ဖိအားပေးမှုများနှင့် ပြဿနာများ တိုးပွားများပြားလျက်ရှိ၏။ (၂ တိမောသေ ၃:၁၊ သမ္မာ) ထို့ပြင် စမ်းသပ်မှုများသည် ကျွန်ုပ်တို့စိတ်စွဲလမ်းရာဖြစ်ဖို့လွယ်ကူနိုင်သည်။ သို့ရာတွင် ပြဿနာများ၊ သွေးဆောင်မှုများနှင့် စိတ်ဓာတ်ကျစရာများကို အမြဲတွေ့ ကြုံခံစားနေရသည့်ကြားမှ ကျွန်ုပ်တို့ မခြားမလပ်ဆုတောင်းနေမည်ဆိုလျှင် ဝိညာဉ်ရေးလမ်းစဉ်ပေါ် ကျွန်ုပ်တို့ဆက်တည်ရှိနေပါလိမ့်မည်။ ယေဟောဝါအား ကျွန်ုပ်တို့ နေ့စဉ်ဆုတောင်းခြင်းက ကျွန်ုပ်တို့လိုအပ်သည့် အရေးပါသော အထောက်အပံ့ကို ရရှိစေနိုင်သည်။
၂၁ ‘ဆုတောင်းခြင်းကို နားထောင်တော်မူသော’ ယေဟောဝါသည် ကျွန်ုပ်တို့ကို နားထောင်ပေးရန် မည်သည့်အခါမျှ အလုပ်များလွန်းခြင်းမရှိပေ။ (ဆာလံ ၆၅:၂) ကျွန်ုပ်တို့သည် ကိုယ်တော်နှင့်စကားပြောဆိုရန် ဘယ်သောအခါမျှ အလုပ်များလွန်းခြင်းမရှိကြစို့နှင့်။ ဘုရားသခင်နှင့်ကျွန်ုပ်တို့၏ ဆက်ဆံရေးသည် ကျွန်ုပ်တို့ပိုင်ဆိုင်သမျှတွင် အဖိုးအထိုက်ဆုံး ပိုင်ဆိုင်မှုဖြစ်ပေသည်။ ၎င်းကို ဘယ်သောအခါမျှ ပေါ့ပေါ့တန်တန်သဘောမထားကြစို့နှင့်။ “ထို့ကြောင့် ငါတို့သည် သနားခြင်း . . . ကိုလည်းကောင်း၊ တော်လျော်သောအချိန်၌ မစခြင်းကျေးဇူးတော်ကိုလည်းကောင်း ခံရမည်အကြောင်း ရဲရင့်သောစိတ်နှင့် ကျေးဇူးပလ္လင်တော်သို့ တိုးဝင်ချဉ်းကပ်ကြကုန်အံ့။”—ဟေဗြဲ ၄:၁၆။
သင်မည်သို့ဖြေဆိုမည်နည်း
• ဆုတောင်းခြင်း၏တန်ဖိုးအကြောင်း ပရောဖက်ဒံယေလမှ ကျွန်ုပ်တို့ အဘယ်အရာသိရှိခဲ့ရသနည်း။
• ယေဟောဝါနှင့် ကျွန်ုပ်တို့၏ဆက်ဆံရေးကို မည်သို့ခိုင်ခံ့စေနိုင် မည်နည်း။
• ကျွန်ုပ်တို့ အဘယ်ကြောင့် မခြားမလပ်ဆုတောင်းသင့်သနည်း။
• မထိုက်တန်ဟုခံစားရသောကြောင့် ယေဟောဝါထံဆုမတောင်းဘဲ အဘယ်ကြောင့်မနေသင့်သနည်း။
[လေ့လာရန်မေးခွန်းများ]
[စာမျက်နှာ ၁၆ ပါ ရုပ်ပုံ]
နေဟမိသည် ရှင်ဘုရင်နှင့်စကားမပြောဆိုမီ တိုတိုတုတ်တုတ် တိတ်တဆိတ်ဆုတောင်းခဲ့၏
[စာမျက်နှာ ၁၇ ပါ ရုပ်ပုံ]
ဟန္နသည် ‘ယေဟောဝါ ရှေ့တော်၌ ကြာမြင့်စွာ ဆုတောင်းခဲ့၏’
[စာမျက်နှာ ၁၈ ပါ ရုပ်ပုံ]
တမန်တော် ၁၂ ပါးကိုမခန့်အပ်မီ ယေရှု တစ်ညလုံး ဆုတောင်းခဲ့၏
[စာမျက်နှာ ၂၀ ပါ ရုပ်ပုံ]
ဆုတောင်းဖို့အခွင့်အရေးများ တစ်နေ့တာလုံးရရှိ