ဖြောင့်မတ်ခြင်းတရားကြောင့် နှိပ်စက်ညှဉ်းပန်းခံရ
ဖြောင့်မတ်ခြင်းတရားကြောင့် နှိပ်စက်ညှဉ်းပန်းခံရ
“ဖြောင့်မတ်ခြင်းတရားကြောင့် နှောင့်ယှက်ညှဉ်းဆဲခြင်းကို ခံရသောသူတို့သည် မင်္ဂလာရှိ [“ပျော်ရွှင်၊” ကဘ] ကြ၏။”—မဿဲ ၅:၁၀။
၁။ ပုန္တိပိလတ်မင်းရှေ့ ယေရှု အဘယ်ကြောင့်ရောက်နေရပြီး ကိုယ်တော် အဘယ်သို့မိန့်မြွက်ခဲ့သနည်း။
‘အမှန်တရားဘက်၌သက်သေခံခြင်းငှာ ငါသည်မွေးဖွားခြင်းကိုခံ၍ ဤလောကသို့ကြွလာပြီ။’ (ယောဟန် ၁၈:၃၇) ထိုစကားများကို ယေရှုမိန့်မြွက်စဉ် ကိုယ်တော်သည် ယုဒနယ် ရောမဘုရင်ခံ ပုန္တိပိလတ်ရှေ့ ရောက်ရှိနေ၏။ ယေရှုသည် ထိုနေရာသို့ မိမိဘာသာရောက်လာခဲ့ခြင်းမဟုတ်၊ ပိလတ်မင်း၏ဖိတ်ခေါ်ချက်ကြောင့် ရောက်လာခဲ့ခြင်းလည်း မဟုတ်ချေ။ သို့အစား၊ ကိုယ်တော်သည် သေဒဏ်ခံထိုက်သော အပြစ်သားတစ်ဦးဖြစ်၏ဟု ဂျူးဘာသာရေးခေါင်းဆောင်များက စွပ်စွဲသဖြင့် ထိုနေရာသို့ ရောက်ရှိနေရခြင်းဖြစ်သည်။—ယောဟန် ၁၈:၂၉-၃၁။
၂။ ယေရှုသည် အဘယ်သို့ပြုမူခဲ့ရာ အဘယ်ရလဒ်ရခဲ့သနည်း။
၂ ပိလတ်မင်းသည် မိမိကို လွှတ်ပိုင်ခွင့်ရှိကြောင်း၊ သို့မဟုတ် သေဒဏ်ပေးပိုင်ခွင့်ရှိကြောင်း ယေရှုကောင်းစွာသိထားသည်။ (ယောဟန် ၁၉:၁၀) သို့သော် ကိုယ်တော်သည် ယင်းကြောင့် ပိလတ်မင်းအား ဘုရားသခင့်နိုင်ငံတော်အကြောင်း ရဲရင့်စွာမဟောဘဲမနေခဲ့ချေ။ ယေရှုသည် အသက်အန္တရာယ်ကြုံနေရသော်လည်း ဒေသန္တရဆိုင်ရာ အခွင့်အာဏာအများဆုံးရှိသူအား သက်သေခံရန် အခွင့်အရေးကို မလွတ်တမ်းယူခဲ့သည်။ ထိုသို့သက်သေခံခဲ့သော်လည်း ယေရှုသည် ပြစ်ဒဏ်စီရင်ခံခဲ့ရပြီး ညှဉ်းဆဲရာနှက်တိုင်ပေါ်တွင် သူ၏သက်ဝင်ခံယူချက်အတွက် သေဆုံးရန်အသင့်ရှိသူအဖြစ် ဝေဒနာပြင်းထန်စွာခံရင်း သေဆုံးရလေသည်။—မဿဲ ၂၇:၂၄-၂၆; မာကု ၁၅:၁၅; လုကာ ၂၃:၂၄၊ ၂၅; ယောဟန် ၁၉:၁၃-၁၆။
သက်သေလော၊ မိမိခံယူချက်အတွက် အသက်စွန့်လွှတ်သူလော
၃။ ကျမ်းစာခေတ်က မာတစ္စ ဟူသောဂရိစကားလုံးသည် အဘယ်အရာကိုဆိုလိုခဲ့သနည်း၊ သို့သော် ယနေ့ အဘယ်အရာကိုဆိုလိုသနည်း။
၃ မျက်မှောက်ခေတ်ရှိ လူအများစုသည် မိမိခံယူချက်အတွက် အသက်စွန့်လွှတ်သူတစ်ဦးကို တစ်ယူသန်သူ၊ တစ်ဖက်စွန်းရောက်သူအဖြစ် ယူမှတ်ထားကြသည်။ မိမိတို့၏ခံယူချက်အတွက်၊ အထူးသဖြင့် ဘာသာရေးခံယူချက်အတွက် အသက်ပေးလိုသူတို့ကို အကြမ်းဖက်သမားများ သို့မဟုတ် လူ့အဖွဲ့အစည်းကို ခြိမ်းခြောက်အန္တရာယ်ပြုသူများအဖြစ် ယူမှတ်ပြီး မယုံသင်္ကာဖြစ်လေ့ရှိကြသည်။ သို့ရာတွင်၊ မိမိခံယူချက်အတွက် အသက်စွန့်လွှတ်ခြင်းဟူသော ဂရိအသုံးအနှုန်း မာတစ္စသည် ကျမ်းစာခေတ်က မိမိယုံကြည်ရာ အမှန်တရားအတိုင်း တရားရုံး၌ အမှုစစ်ခံ၍ သက်သေထွက်ဆိုသူ၊ “သက်သေ” ကိုဆိုလိုသည်။ နောက်ပိုင်းတွင်သာ အဆိုပါအသုံးအနှုန်းသည် “သက်သေခံခြင်းကြောင့် မိမိအသက်ကိုစွန့်သူ၊” သို့မဟုတ် မိမိအသက်ကိုစွန့်ခြင်းဖြင့် သက်သေခံခြင်းဟုပင် အဓိပ္ပာယ်ရှိလာလေသည်။
၄။ ယေရှုသည် အဓိကအနေနှင့် အဘယ်သဘောမျိုးဖြင့် သက်သေ (မာတစ္စ) တစ်ဦးဖြစ်ခဲ့သနည်း။
၄ ယေရှုသည် ထိုစကားလုံး၏ အစောပိုင်းခေတ်က အဓိပ္ပာယ်အတိုင်း သက်သေ (မာတစ္စ) တစ်ဦးဖြစ်ခဲ့သည်။ ပိလတ်မင်းအား ကိုယ်တော်မိန့်မြွက်ခဲ့သည့်အတိုင်း ‘အမှန်တရားဘက်၌သက်သေခံ’ ဖို့ ကိုယ်တော်ကြွလာခဲ့သည်။ ကိုယ်တော်၏သက်သေခံချက်က လူတို့ထံမှ လွန်စွာကွဲပြားသော တုံ့ပြန်မှုများကို ထွက်ပေါ်စေခဲ့သည်။ သာမန်လူတန်းစားမှအချို့သည် သူတို့ကြားသိခဲ့ရာ၊ မြင်တွေ့ခဲ့ရာတို့ကြောင့် အကြီးအကျယ်စိတ်လှုံ့ဆော်ခံခဲ့ရပြီး ယေရှုကို ယုံကြည်ခဲ့ကြ၏။ (ယောဟန် ၂:၂၃; ၈:၃၀) လူအများစုနှင့် အထူးသဖြင့် . . . ခေါင်းဆောင်တို့ကလည်း ပြင်းပြင်းထန်ထန် တုံ့ပြန်ခဲ့ကြ၏၊ သို့သော် အပြုသဘောမဆောင်သည့် သဘောမျိုးဖြင့်ဖြစ်၏။ ယေရှုသည် မိမိ၏မယုံကြည်သူ ဆွေမျိုးသားချင်းများကို ဤသို့ထောက်ပြခဲ့သည်– “လောကသားတို့သည် သင်တို့ကိုမမုန်းနိုင်။ ငါ့ကိုမုန်းကြ၏။ အကြောင်းမူကား၊ ငါသည် သူတို့၏အကျင့်ဆိုးညစ်ကြောင်းကို သက်သေခံ၏။” (ယောဟန် ၇:၇၊ သမ္မာ) အမှန်တရားကို ယေရှုသက်သေခံခဲ့သောကြောင့် ဣသရေလခေါင်းဆောင်များ၏ အမျက်ဒေါသသင့်ခဲ့ပြီး ယင်းက ကိုယ်တော်၏သေဆုံးမှုကို ဖြစ်စေခဲ့သည်။ ကိုယ်တော်သည် အမှန်တကယ်ပင် “သစ္စာရှိ၍ဟုတ်မှန်သောသက်သေ (မာတစ္စ)” ဖြစ်၏။—ဗျာ. ၃:၁၄။
“သင်တို့ကို မုန်းကြလိမ့်မည်”
၅။ ခရစ်ယာန်ဓမ္မအမှုဆောင်ချိန် အစပိုင်းတွင် နှိပ်စက်ညှဉ်းပန်းမှုအကြောင်း ယေရှုအဘယ်သို့ပြောဆိုခဲ့သနည်း။
၅ ယေရှုကိုယ်တော်တိုင် အပြင်းအထန် နှိပ်စက်ညှဉ်းပန်းခံခဲ့ရသည်သာမက မိမိ၏နောက်လိုက်များပါ ထပ်တူတွေ့ကြုံခံစားကြရမည်ဟု ကိုယ်တော်သတိပေးခဲ့၏။ ယေရှုသည် ခရစ်ယာန်ဓမ္မအမှုဆောင်ချိန် အစပိုင်းတွင် တောင်ပေါ်တရားတော်၌ မိမိ၏စကားကိုနားထောင်သူတို့အား ဤသို့မိန့်တော်မူခဲ့သည်– “ဖြောင့်မတ်ခြင်းတရားကြောင့် နှောင့်ယှက်ညှဉ်းဆဲခြင်းကို ခံရသောသူတို့သည် မင်္ဂလာရှိ [“ပျော်ရွှင်၊” ကဘ] ကြ၏။ အကြောင်းမူကား၊ ကောင်းကင်နိုင်ငံတော်သည် ထိုသူတို့၏နိုင်ငံဖြစ်၏။ ငါ့ကြောင့် သင်တို့ကို ကဲ့ရဲ့ညှဉ်းဆဲ၍ မမှန်ဘဲလျက် အပြစ်တကာတင်ကြသောအခါ၊ သင်တို့သည် မင်္ဂလာရှိ [“ပျော်ရွှင်၊” ကဘ] ကြ၏။ ဝမ်းမြောက်ရွှင်မြူးခြင်းရှိကြလော့။ အကြောင်းမူကား၊ ကောင်းကင်ဘုံ၌ သင်တို့၏အကျိုးသည်ကြီးလှပေ၏။”—မဿဲ ၅:၁၀-၁၂။
၆။ တမန်တော် ၁၂ ပါးကို ယေရှုစေလွှတ်ချိန်တွင် အဘယ်သို့သတိပေးခဲ့သနည်း။
၆ နောက်ပိုင်း တမန်တော် ၁၂ ပါးကို ယေရှုစေလွှတ်တော်မူသောအခါ သူတို့အား ဤသို့မိန့်ဆိုခဲ့သည်– “လူတို့ကိုသတိပြုကြ။ အကြောင်းမူကား၊ သင်တို့ကို လွှတ်ရုံးသို့အပ်နှံကြလိမ့်မည်။ တရားဇရပ်တို့၌ ရိုက်ကြလိမ့်မည်။ ထိုသူတို့မှစ၍ တစ်ပါးအမျိုးသားတို့အား သက်သေဖြစ်စေခြင်းငှာ၊ မြို့ဝန်မင်း၊ ရှင်ဘုရင်ထံသို့ ငါ့ကြောင့် သင်တို့ကိုပို့ဆောင်ကြလိမ့်မည်။” သို့သော် ဘာသာရေးအာဏာပိုင်များသာ တပည့်နောက်လိုက်များကို ညှဉ်းဆဲကြမည်မဟုတ်။ ယေရှု ဤသို့မိန့်ဆိုခဲ့သေး၏– “ထိုအခါ ညီအစ်ကိုချင်း တစ်ယောက်ကိုတစ်ယောက် သေစေခြင်းငှာအပ်ကြလိမ့်မည်။ အဘသည်လည်း သားကိုအပ်လိမ့်မည်။ သားသမီးတို့သည်လည်း မိဘကိုရန်ဘက်ပြု၍ သေစေကြလိမ့်မည်။ လူအပေါင်းတို့သည်လည်း ငါ့နာမကြောင့် သင်တို့ကိုမုန်းကြလိမ့်မည်။ အကြင်သူသည် အဆုံးတိုင်အောင်တည်ကြည်၏။ ထိုသူသည် ကယ်တင်ခြင်းသို့ ရောက်လိမ့်မည်။” (မဿဲ ၁၀:၁၇၊ ၁၈၊ ၂၁၊ ၂၂) ပထမရာစုခရစ်ယာန်များ၏သမိုင်းက အဆိုပါစကားများ မှန်ကန်ကြောင်း သက်သေထူသည်။
တည်ကြည်စွာ ကြံ့ကြံ့ခံနိုင်ခြင်းမှတ်တမ်း
၇။ သတေဖန်သည် သက်သေ (မာတစ္စ) တစ်ဦးဖြစ်လာရန် အဘယ်အရာကဦးတည်ပေးသနည်း။
၇ ယေရှုသေဆုံးပြီးနောက်မကြာမီ သတေဖန်သည် အမှန်တရားကိုသက်သေခံသည့်အတွက် အသေခံရသော ပထမဦးဆုံးခရစ်ယာန်ဖြစ်လာ၏။ သူသည် “ကျေးဇူးတော်နှင့်လည်းကောင်း၊ တန်ခိုးတော်နှင့်လည်းကောင်း ပြည့်စုံသဖြင့် ကြီးစွာသောနိမိတ်လက္ခဏာ၊ အံ့ဖွယ်သောအမှုများကို လူများတို့တွင်ပြုလေ၏။” သူ၏ဘာသာကို အတိုက်အခံပြုသူများသည် “သူဟောပြောရာတွင်သုံးစွဲသောပညာနှင့် အမှီပြုသောဝိညာဉ်တော်ကို မခံမရပ်နိုင်ကြ” ချေ။ (တမန်တော် ၆:၈၊ ၁၀၊ သမ္မာ) သူတို့သည် မနာလိုစိတ်ပြင်းပြစွာ သတေဖန်ကို ဂျူးအထက်တရားရုံး၊ ဆဲန်ဟီဒရင်ရှေ့ တရွတ်တိုက်ဆွဲခေါ်သွားခဲ့ကြရာ ထိုတွင် သူ့ကို မမှန်မကန်စွပ်စွဲသူများရှေ့ အစွမ်းခွန်အားအပြည့်ဖြင့် သက်သေခံခဲ့သည်။ သို့ရာတွင် အဆုံး၌ ဤတည်ကြည်သောသက်သေ သတေဖန်ကို သူ၏ရန်သူများက သတ်ပစ်လိုက်ကြသည်။—တမန်တော် ၇:၅၉၊ ၆၀။
၈။ သတေဖန်သေဆုံးပြီးနောက် သူတို့ခံရသော နှိပ်စက်ညှဉ်းပန်းမှုကို ယေရုရှလင်မြို့ရှိ တပည့်နောက်လိုက်များ မည်သို့တုံ့ပြန်ခဲ့ကြသနည်း။
၈ သတေဖန် ကွပ်မျက်ခံရပြီးနောက်တွင် “ယေရုရှလင်မြို့တွင်ရှိသော အသင်းတော်သည် ပြင်းစွာသောညှဉ်းဆဲခြင်းကိုခံရသဖြင့် တမန်တော်တို့မှတစ်ပါး သင်းဝင်သူအပေါင်းတို့သည် ယုဒပြည်၊ ရှမာရိပြည်များတွင် အရပ်ရပ်သို့ အနှံ့အပြားကွဲလွင့်ကြ၏။” (တမန်တော် ၈:၁၊ သမ္မာ) နှိပ်စက်ညှဉ်းပန်းခြင်းက ခရစ်ယာန်သက်သေခံခြင်းလုပ်ငန်းကို ရပ်တန့်သွားစေခဲ့သလော။ ထိုသို့ဖြစ်မည့်အစား “အရပ်ရပ်သို့ကွဲလွင့်သောသူတို့သည် လှည့်လည်၍ နှုတ်[မြွက်]တော်တည်းဟူသော ဝမ်းမြောက်ဖွယ်သတင်းတရားတော်ကို ဟောပြောကြ၏” ဟုမှတ်တမ်းကဆိုသည်။ (တမန်တော် ၈:၄) “လူ၏စကားထက် ဘုရားသခင်၏စကားကို နားထောင်သင့်ပါ၏” ဟု အစောပိုင်းက တမန်တော်ပေတရု မိန့်ဆိုခဲ့သည့်အတိုင်း သူတို့ခံစားခဲ့ကြရမည်။ (တမန်တော် ၅:၂၉) နှိပ်စက်ညှဉ်းပန်းမှုကြား အဆိုပါတည်ကြည်၍ ရဲစွမ်းသတ္တိရှိ တပည့်နောက်လိုက်များသည် အမှန်တရား သက်သေခံခြင်းလုပ်ငန်းကို စွဲမြဲစွာလုပ်ဆောင်ကြသည်၊ ယင်းက ပို၍အခက်အခဲဖြစ်ပေါ်စေမည်ကို သူတို့သိရှိလျက်ပင် ထိုသို့ပြုခဲ့ကြသည်။—တမန်တော် ၁၁:၁၉-၂၁။
၉။ ယေရှု၏နောက်လိုက်များ အဘယ်နှိပ်စက်ညှဉ်းပန်းမှုကို ဆက်ခံခဲ့ရသနည်း။
၉ ခက်ခဲကျပ်တည်းမှုအရှိန် လျော့မသွားခဲ့ပါ။ ဦးဆုံးအနေနှင့် သတေဖန်အား ခဲနှင့်ပေါက်သတ်ခြင်းကို ကျေနပ်စွာကြည့်ရှုခဲ့သည့် ရှောလုသည် “သခင်ဘုရား၏ [နောက်လိုက်] တို့တစ်ဖက်၌ခြိမ်းခြောက်၍၊ အသေသတ်ခြင်းငှာ ပြင်းပြစွာအသက်ရှူသဖြင့်၊ ထိုဘာသာဝင်သော ယောက်ျားမိန်းမတို့ကိုတွေ့လျှင်၊ ချည်နှောင်၍ ယေရုရှလင်မြို့သို့ ပို့ဆောင်ရမည်အကြောင်း၊ ဒမာသက်မြို့၌ရှိသော တရားဇရပ်မှူးတို့ထံသို့ မှာစာကိုပေးပါဟု ယဇ်ပုရောဟိတ်မင်းထံ၌ဝင်၍တောင်း” ခဲ့ကြောင်း ကျွန်ုပ်တို့သိရှိရသည်။ (တမန်တော် ၉:၁၊ ၂) ထို့နောက် စီ.အီး. ၄၄ ခန့်တွင် “ဟေရုဒ်မင်းသည် သင်းဝင်သူအချို့ကို ညှဉ်းဆဲခြင်းငှာစီရင်၍၊ ယောဟန်၏အစ်ကိုဖြစ်သော ယာကုပ်ကို ဓားနှင့်ကွပ်မျက်လေ၏။”—တမန်တော် ၁၂:၁၊ ၂။
၁၀။ တမန်တော်ဝတ္ထုနှင့် ဗျာ. ကျမ်းတို့တွင် နှိပ်စက်ညှဉ်းပန်းမှုနှင့်ပတ်သက်၍ အဘယ်မှတ်တမ်းကို တွေ့ရှိရသနည်း။
၁၀ တမန်တော်ဝတ္ထု၏ အခြားကျမ်းပိုဒ်များတွင် ပေါလုကဲ့သို့သော တည်ကြည်သူတို့ ခံခဲ့ရသည့် စမ်းသပ်မှုများ၊ ထောင်ချခံရခြင်းနှင့် နှိပ်စက်ညှဉ်းပန်းမှုတို့အကြောင်း မှတ်တမ်းတင်ထားသည်၊ တမန်တော်ဖြစ်လာသည့် ယခင်က ညှဉ်းဆဲခဲ့သူကိုယ်တိုင်သည်လည်း စီ.အီး. ၆၅ ခန့်တွင် ရောမဧကရာဇ် နီရိုး၏အမိန့်ကြောင့် သက်သေ (မာတစ္စ) တစ်ဦးအဖြစ် အသတ်ခံခဲ့ရပုံရှိသည်။ (၂ ကောရိန္သု ၁၁:၂၃-၂၇; ၂ တိမောသေ ၄:၆-၈) နောက်ဆုံးအနေနှင့် ပထမရာစုအဆုံးပိုင်းတွင်ရေးသားခဲ့သည့် ဗျာဒိတ်ကျမ်း၌ ကျွန်ုပ်တို့ဖတ်ရှုရသည်မှာ သက်ကြီးရွယ်အို တမန်တော်ယောဟန်သည် ‘ဘုရားသခင်အကြောင်းဟော၍ ယေရှုခရစ်အကြောင်း သက်သေခံသောကြောင့်’ ပတ်မုကျွန်းတွင် အကျဉ်းချခံခဲ့ရသည်။ ထို့ပြင် ပေရဂံမြို့တွင် “အသေသတ်ခြင်းကိုခံရသော ငါ၏သက်သေ၊ ငါ၌ [တည်ကြည်] သူ၊ အန္တိပ” အကြောင်း ဗျာဒိတ်ကျမ်းကဖော်ညွှန်းထားသည်။—ဗျာ. ၁:၉; ၂:၁၃။
၁၁။ နှိပ်စက်ညှဉ်းပန်းမှုနှင့်စပ်လျဉ်း၍ ယေရှု၏စကားများ မှန်ကန်ကြောင်း အစောပိုင်းခရစ်ယာန်များ၏လမ်းစဉ်က မည်သို့သက်သေထူခဲ့သနည်း။
၁၁ ၎င်းတို့အားလုံးက “သူတို့သည် ငါ့ကိုညှဉ်းဆဲလျှင် သင်တို့ကိုညှဉ်းဆဲကြလိမ့်မည်” ဟု မိမိ၏နောက်လိုက်များအား ယေရှုမိန့်တော်မူခဲ့သည့်စကား မှန်ကန်ကြောင်း သက်သေထူသည်။ (ယောဟန် ၁၅:၂၀) “သင်တို့သည် ယေရုရှလင်မြို့မှစသော ယုဒပြည်၊ ရှမာရိပြည်၊ မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်” ဟူသော အရှင်သခင် ယေရှုခရစ် အပ်နှင်းထားသည့်တာဝန်ကို ဆောင်ရွက်ရန် တည်ကြည်သော အစောပိုင်းခရစ်ယာန်တို့သည် အပြင်းအထန်ညှဉ်းဆဲခံရခြင်း၊ သားရဲတိရစ္ဆာန်စာဖြစ်ရခြင်း၊ သို့မဟုတ် အခြားနည်းတစ်ခုခုဖြင့် အဆုံးစွန်စမ်းသပ်မှုဖြစ်သော သေခြင်းကို ရင်ဆိုင်ဖို့ အသင့်ရှိခဲ့ကြသည်။—တမန်တော် ၁:၈။
၁၂။ အတိတ်ကာလတွင်သာ ခရစ်ယာန်များ နှိပ်စက်ညှဉ်းပန်းခံရသည်ဟု အဘယ်ကြောင့်မဆိုနိုင်သနည်း။
၁၂ ယေရှု၏နောက်လိုက်များကို ထိုသို့ရက်စက်ကြမ်းကြုတ်စွာ ပြုမူဆက်ဆံခြင်းသည် အတိတ်ကာလတွင်သာ ဖြစ်ပျက်ခဲ့ကြောင်း တစ်ဦးဦးက ထင်မှတ်မည်ဆိုလျှင် ထိုသူ အမှားကြီးမှားပေလိမ့်မည်။ ကျွန်ုပ်တို့သိရှိခဲ့သည့်အတိုင်း အတော်အတန်အခက်အခဲကြုံခဲ့ရသူ ပေါလုက ဤသို့ရေးသားခဲ့သည်– “ယေရှုခရစ်၏တရားတော်နှင့်အညီ ဘုရား [သခင်] ဝတ်၌မွေ့လျော်၍နေခြင်းငှာ အလိုရှိသောသူအပေါင်းတို့သည် ညှဉ်းဆဲခြင်းကိုခံရကြလိမ့်မည်။” (၂ တိမောသေ ၃:၁၂) နှိပ်စက်ညှဉ်းပန်းမှုခံရခြင်းအကြောင်း ပေတရုဤသို့ဆိုခဲ့သည်– “ထိုသို့အလို့ငှာ သင်တို့ကိုခေါ်တော်မူပြီ။ ခရစ်တော်သည် ငါတို့အတွက်ခံတော်မူသည်ဖြစ်၍၊ ခြေ . . . ရာကိုလျှောက်လိုက်စေခြင်းငှာ ပုံသက်သေကိုထားတော်မူပြီ။” (၁ ပေတရု ၂:၂၁) ဤအစီအစဉ်စနစ်၏ “နောက်ဆုံးသောနေ့ရက်များ” အထိ ယေဟောဝါ၏လူမျိုးတော်သည် တစ်ခါနှင့်မျှမတူအောင် ဆက်၍ရန်လိုမုန်းတီးခြင်းကိုခံရသည်။ (၂ တိမောသေ ၃:၁၊ သမ္မာ) ယေဟောဝါသက်သေများသည် ကမ္ဘာတစ်ခွင်တွင် အာဏာရှင်ဆန်သော အုပ်စိုးမှုများလက်အောက်၌ နေသည်ဖြစ်စေ၊ ဒီမိုကရက်တစ်နိုင်ငံများတွင် နေထိုင်သည်ဖြစ်စေ တစ်ချိန်မဟုတ်တစ်ချိန်၌ တစ်ဦးချင်းစီသော်လည်းကောင်း၊ အုပ်စုလိုက်သော်လည်းကောင်း နှိပ်စက်ညှဉ်းပန်းခံခဲ့ရသည်။
အဘယ်ကြောင့် မုန်းတီးခံရပြီး နှိပ်စက်ညှဉ်းပန်းခံရသနည်း
၁၃။ နှိပ်စက်ညှဉ်းပန်းမှုနှင့်စပ်လျဉ်း၍ မျက်မှောက်ခေတ် ယေဟောဝါ၏ကျေးကျွန်များ အဘယ်အရာကို စိတ်စွဲမှတ်ထားသင့်သနည်း။
၁၃ ယနေ့ ကျွန်ုပ်တို့အများစုသည် အတော်အသင့် လွတ်လပ်ငြိမ်သက်စွာ ဟောပြောရ၍ အစည်းအဝေးများတက်နိုင်ကြသော်လည်း “ဤလောက၏အဆင်းသဏ္ဌာန်သည် ရွေ့သွားကွယ်ပျောက် [“ပြောင်းလဲ၊” ကဘ] လျက်ရှိ၏” ဟူသော ကျမ်းစာသတိပေးချက်ကို နှလုံးသွင်းထားသင့်သည်။ (၁ ကောရိန္သု ၇:၃၁) အခြေအနေသည် အလွန်လျင်မြန်စွာ ပြောင်းလဲသွားနိုင်ရာ ကျွန်ုပ်တို့သည် စိတ်ဓာတ်ရေး၊ စိတ်လှုပ်ရှားမှုနှင့် ဝိညာဉ်ရေးဘက် အသင့်မပြင်ဆင်ထားလျှင် အလွယ်တကူ ခြေလှမ်းမှားသွားနိုင်သည်။ သို့ဖြစ်ရကား မိမိတို့ကိုယ်ကိုကာကွယ်ရန် အဘယ်အရာပြုလုပ်ထားနိုင်သနည်း။ ငြိမ်သက်မှုကိုမြတ်နိုးသည့် ဥပဒေလိုက်နာသူ ခရစ်ယာန်များသည် အဘယ်ကြောင့် မုန်းတီးခံရပြီး နှိပ်စက်ညှဉ်းပန်းခံရကြောင်းကို ရှင်းလင်းစွာနားလည်ထားခြင်းက အစွမ်းထက်သည့် ကာကွယ်မှုတစ်ရပ်ဖြစ်သည်။
၁၄။ ခရစ်ယာန်များ နှိပ်စက်ညှဉ်းပန်းခံရသည့်အကြောင်းရင်းကား အဘယ်အရာဖြစ်သည်ဟု ပေတရုထောက်ပြခဲ့သနည်း။
၁၄ ရောမအင်ပါယာတစ်လျှောက်ရှိ ခရစ်ယာန်များသည် စမ်းသပ်မှုများနှင့် နှိပ်စက်ညှဉ်းပန်းမှုများ တွေ့ ကြုံခံစားနေရသော စီ.အီး. ၆၂-၆၄ ခန့်တွင် ရေးခဲ့သည့် သူ၏ပထမစာစောင်၌ ဤအကြောင်းကို တမန်တော်ပေတရု ထည့်ရေးခဲ့သည်။ သူက “ချစ်သူတို့၊ သင်တို့ကိုစုံစမ်းစရာဖို့ ယခုခံရသောမီးစစ်ခြင်းအရာကိုကား၊ သင်တို့၌ အံ့သြဖွယ်သောအရာဖြစ်သည်ဟုထင်မှတ်၍၊ အံ့သြခြင်းမရှိကြနှင့်” ဟုဆိုခဲ့သည်။ အဘယ်အရာကို သူဆိုလိုကြောင်း ရှင်းပြရန် ပေတရုက ဤသို့ဆက်ဆိုသည်– “လူအသက်ကိုသတ်သောအပြစ်၊ သူ့ဥစ္စာကိုခိုးသောအပြစ်၊ [မကောင်းမှု]ကိုပြုသောအပြစ်၊ သူတစ်ပါးအမှု၌ရောနှောသောအပြစ်ရှိ၍၊ သင်တို့တွင် အဘယ်သူမျှမခံစေနှင့်။ ခရစ်ယာန်ဖြစ်သောကြောင့်ခံရလျှင်မူကား၊ ရှက်ကြောက်ခြင်းမရှိစေနှင့်။ ထိုအမှုကြောင့်ခံရလျှင် ဘုရားသခင်၏ဂုဏ်တော်ကိုချီးမွမ်းစေ။” သူတို့သည် အမှားတစ်ခုခုပြုမိသောကြောင့်မဟုတ်ဘဲ ခရစ်ယာန်ဖြစ်နေခြင်းကြောင့် ဆင်းရဲခံနေရကြောင်း ပေတရုထောက်ပြခဲ့သည်။ သူတို့၏ဝန်းကျင်ရှိလူများအတိုင်း “ကာမဂုဏ်၌ လွန်ကျူးညစ်ညူး” နေမည်ဆိုလျှင် ဖက်လဲတကင်းကြိုဆိုခံရပေလိမ့်မည်။ ယခုမူ သူတို့သည် ခရစ်တော်၏နောက်လိုက်များအဖြစ် ကြိုးစားအသက်ရှင်နေထိုင်ကြသောကြောင့် ဆင်းရဲခံနေကြရသည်။ မျက်မှောက်ခေတ် ခရစ်ယာန်စစ်များလည်း အလားတူအခြေအနေမျိုးတွင် ရှိနေကြ၏။—၁ ပေတရု ၄:၄၊ ၁၂၊ ၁၅၊ ၁၆။
၁၅။ ယနေ့ ယေဟောဝါသက်သေများအပေါ် ဆက်ဆံပုံတွင် အဘယ်ဆန့်ကျင်ဘက်အခြေအနေများကို တွေ့ရသနည်း။
၁၅ ကမ္ဘာ့ဒေသများစွာ၌ ယေဟောဝါသက်သေများသည် စည်းဝေးကြီးများနှင့် ဆောက်လုပ်ရေးစီမံကိန်းများတွင် သူတို့တင်ပြကြသည့် စည်းလုံးမှုနှင့် ပူးပေါင်းဆောင်ရွက်မှု၊ ရိုးသားမှုနှင့် လုံ့လဝီရိယ၊ သူတို့၏ စံတင်အပ်သောအမူအကျင့်နှင့် မိသားစုဘဝ၊ သူတို့၏ရည်မွန်သောအသွင်အပြင်နှင့် ပြုမူပြောဆိုပုံတို့ကြောင့် လူသိရှင်ကြား ချီးမွမ်းခံခဲ့ရသည်။ * သို့သော် ဤဆောင်းပါးကိုရေးချိန်တွင် အနည်းဆုံး ၂၈ နိုင်ငံ၌ လုပ်ငန်းပိတ်ပင်ခံရ၊ သို့မဟုတ် ကန့်သတ်ခံရရာ သက်သေခံများစွာတို့မှာ မိမိတို့၏ယုံကြည်ခြင်းကြောင့် ရိုက်ပုတ်နှိပ်စက်ခံရပြီး ဆုံးရှုံးမှုများရှိကြသည်။ ဤသို့သော ဆန့်ကျင်ဘက်အခြေအနေများ အဘယ်ကြောင့်ပေါ်လာရသနည်း။ ယင်းကို ဘုရားသခင်အဘယ်ကြောင့် ခွင့်ပြုရသနည်း။
၁၆။ ဘုရားသခင်၏လူမျိုး နှိပ်စက်ညှဉ်းပန်းခံရခြင်းကို ကိုယ်တော်ခွင့်ပြုရသည့် အဓိကအကြောင်းရင်းကား အဘယ်နည်း။
၁၆ ဦးဆုံးအနေနှင့် နယပုံပြင် ၂၇:၁၁ ပါဤစကားကို ကျွန်ုပ်တို့စိတ်စွဲမှတ်ထားသင့်သည်– “ငါ့သား ပညာရှိလော့။ ကဲ့ရဲ့သောသူ၏စကားကို ငါချေနိုင်အောင် ငါ့စိတ်ကို ရွှင်လန်းစေလော့။” ယင်းသည် ကြာမြင့်စွာကတည်းက စကြဝဠာအုပ်စိုးပိုင်သခွင့် အရေးကိစ္စကြောင့်ဖြစ်သည်။ ရာစုနှစ်များတစ်လျှောက် ယေဟောဝါအပေါ် တည်ကြည်မှုတင်ပြခဲ့သူ များစွာရှိလျက်ကယ် ဖြောင့်မတ်သူယောဘလက်ထက်၌ ယေဟောဝါအား စာတန်အပြစ်တင်ကဲ့ရဲ့ခဲ့သည်နည်းတူ ဆက်ပြုမူနေသည်။ (ယောဘ ၁:၉-၁၁; ၂:၄၊ ၅) ယခုအခါ ဘုရားသခင့်နိုင်ငံတော် အခိုင်အမာတည်ထောင်ပြီဖြစ်၍ မြေကြီးတစ်ပြင်လုံးတွင် တည်ကြည်သည့် လက်အောက်ခံပြည်သားများနှင့် ကိုယ်စားလှယ်များရှိနေပြီဖြစ်ရာ စာတန်သည် သူ၏အဆိုမှန်ကန်ကြောင်း သက်သေပြရန် နောက်ဆုံးကြိုးပမ်းချက်အနေနှင့် ပို၍ပင် ဗျာများနေပေမည်။ ဤသူတို့အပေါ် အဘယ်ဆင်းရဲခက်ခဲမှုပင် ကျရောက်လာပါစေ ဘုရားသခင်ကို ဆက်လက်တည်ကြည်ကြပါမည်လော။ ဤမေးခွန်းကို ယေဟောဝါ၏ကျေးကျွန်တစ်ယောက်စီ ကိုယ်တိုင်ကိုယ်ကျ ဖြေဆိုကြရလိမ့်မည်။—ဗျာ. ၁၂:၁၂၊ ၁၇။
၁၇။ “သင်တို့သည် သက်သေခံရသောအခွင့်ရှိကြလိမ့်မည်” ဟုယေရှုဆိုရာ၌ အဘယ်အရာကိုဆိုလိုသနည်း။
၁၇ “အစီအစဉ်စနစ်ဆုံးခန်း” အတွင်း ဖြစ်ပျက်မည့်အရာများအကြောင်း တပည့်နောက်လိုက်များကို ယေရှုမိန့်ဆိုရာတွင် မိမိ၏ကျေးကျွန်များအပေါ် ကျရောက်မည့် နှိပ်စက်ညှဉ်းပန်းမှုကို ယေဟောဝါခွင့်ပြုရသည့် အခြားအကြောင်းရင်းတစ်ခုကို ကိုယ်တော်ဤသို့ဖော်ပြခဲ့၏– “ငါ၏နာမကြောင့် သင်တို့ကို . . . ရှင်ဘုရင်၊ ဝန်မင်းထံသို့ ပို့ဆောင်ကြလိမ့်မည်။ ထိုသို့သောအားဖြင့် သင်တို့သည် သက်သေခံရသောအခွင့်ရှိကြလိမ့်မည်။” (မဿဲ ၂၄:၃၊ ၉; လုကာ ၂၁:၁၂၊ ၁၃) ယေရှုကိုယ်တော်တိုင် ဟေရုဒ်မင်းနှင့် ပုန္တိပိလတ်မင်းရှေ့ သက်သေခံတော်မူခဲ့၏။ တမန်တော်ပေါလုသည်လည်း “ရှင်ဘုရင်၊ ဝန်မင်းထံသို့ ပို့ဆောင်” ခံခဲ့ရ၏။ သခင်ယေရှုခရစ်၏ လမ်းညွှန်မှုဖြင့် ပေါလုသည် ထိုခေတ်က အာဏာအရှိဆုံးအုပ်စိုးရှင်ကို သက်သေခံနိုင်ရန် “ကဲသာဘုရင်၏အယူတော်ကိုခံပါမည်!” ဟုကြေညာခဲ့သည်။ (တမန်တော် ၂၃:၁၁; ၂၅:၈-၁၂) ယနေ့လည်း စိန်ခေါ်ချက်ဖြစ်သော အခြေအနေများပေါ်ပေါက်ခဲ့ရာ အစိုးရအရာရှိများနှင့် အများပြည်သူတို့ကို သက်သေခံရန် အခွင့်အရေးရစေခဲ့ပြီ။ *
၁၈၊ ၁၉။ (က) စမ်းသပ်မှုများကို ကိုင်တွယ်ဖြေရှင်းတတ်ခြင်းက မည်သို့အကျိုးပြုမည်နည်း။ (ခ) နောက်ဆောင်းပါးတွင် အဘယ်မေးခွန်းများကို သုံးသပ်ကြမည်နည်း။
၁၈ နောက်ဆုံးအနေနှင့် စမ်းသပ်မှုများ၊ ဆင်းရဲခြင်းများကို ကိုင်တွယ်ဖြေရှင်းနိုင်ခြင်းဖြင့် ကျွန်ုပ်တို့ကိုယ်တိုင် အကျိုးကျေးဇူးခံစားခဲ့ရပြီ။ အဘယ်နည်းဖြင့်နည်း။ တပည့်ဖြစ်သူ ယာကုပ်က ခရစ်ယာန်ချင်းများကို ဤသို့သတိပေးခဲ့၏– “ငါ့ညီအစ်ကိုတို့၊ သင်တို့၏ယုံကြည်ခြင်းကို စစ်ကြောစုံစမ်းခြင်းအရာသည် သည်းခံခြင်းကို ပွားစေတတ်သည်ဟု သိမှတ်လျက်၊ အထူးထူးအပြားပြား စုံစမ်းနှောင့်ယှက်ခြင်းနှင့်တွေ့ကြုံသောအခါ ဝမ်းမြောက်စရာအကြောင်းသက်သက်ဖြစ်သည်ဟု မှတ်ကြလော့။” မှန်ပါသည်၊ နှိပ်စက်ညှဉ်းပန်းခြင်းသည် ကျွန်ုပ်တို့၏ယုံကြည်ခြင်းကို တိုးတက်စေနိုင်ပြီး ခံနိုင်ရည်ပိုရှိစေသည်။ သို့ဖြစ်၍ ကျွန်ုပ်တို့မစိုးရိမ်ကြပါ၊ နှိပ်စက်ညှဉ်းပန်းခြင်းကို လွှဲရှောင်ရန်၊ မခံရစေရန် ကျမ်းစာနှင့်မညီညွတ်သောနည်းများကိုလည်း ကျွန်ုပ်တို့ရှာဖွေကြမည်မဟုတ်ပါ။ ယင်းအစား၊ ယာကုပ်၏ ဤတိုက်တွန်းချက်ကို ကျွန်ုပ်တို့လိုက်နာကြသည်– “သင်တို့သည် အလျှင်းမချို့တဲ့ဘဲ စေ့စပ်စုံလင်မည်အကြောင်း၊ သည်းခံခြင်းစိတ်သည် အကုန်အစင်ပြုပြင်ပါစေ။”—ယာကုပ် ၁:၂-၄။
၁၉ ဘုရားသခင်၏တည်ကြည်သော ကျေးကျွန်များ အဘယ်ကြောင့် နှိပ်စက်ညှဉ်းပန်းခံရကြောင်းနှင့် ယင်းကို ယေဟောဝါအဘယ်ကြောင့်ခွင့်ပြုရကြောင်းကို ကျွန်ုပ်တို့သိနားလည်ရန် သမ္မာကျမ်းစာက ကူညီပေးသော်လည်း ယင်းက နှိပ်စက်ညှဉ်းပန်းခြင်းကိုခံရပ်ရန် လွယ်ကူသွားစေသည်မဟုတ်ချေ။ နှိပ်စက်ခံရစဉ် ခံရပ်နိုင်ရန် အဘယ်အရာက ကျွန်ုပ်တို့ကို ခွန်အားပေးနိုင်မည်နည်း။ နှိပ်စက်ညှဉ်းပန်းခံရသောအခါ အဘယ်အရာပြုလုပ်နိုင်သနည်း။ ဤအရေးပါသောအကြောင်းများကို နောက်ဆောင်းပါးတွင် သုံးသပ်ကြမည်။
[အောက်ခြေမှတ်ချက်များ]
^ အပိုဒ်၊ 15 ၁၉၉၅၊ ဒီဇင်ဘာ ၁၅ ရက်ထုတ် ကင်းမျှော်စင် စာမျက်နှာ ၂၇-၉; ၁၉၉၄၊ ဧပြီ ၁၅၊ စာမျက်နှာ ၁၆-၁၇; နှင့် ၁၉၉၃၊ ဒီဇင်ဘာ ၂၂ နိုးလော့! [လိပ်] စာမျက်နှာ ၆-၁၃ တို့ကိုရှု။
^ အပိုဒ်၊ 17 ၂၀၀၃၊ ဇန်နဝါရီ ၈ ရက်ထုတ် နိုးလော့! စာမျက်နှာ ၃-၁၁ [လိပ်]ကိုရှု။
သင်ရှင်းပြနိုင်သလော
• ယေရှုသည် အဓိက အဘယ်သဘောဖြင့် သက်သေ (မာတစ္စ) တစ်ဦးဖြစ်ခဲ့သနည်း။
• ပထမရာစုခရစ်ယာန်များအပေါ် နှိပ်စက်ညှဉ်းပန်းမှုက အဘယ်သက်ရောက်မှုရှိခဲ့သနည်း။
• ပေတရုရှင်းပြခဲ့သည့်အတိုင်း အစောပိုင်းခရစ်ယာန်များ အဘယ်ကြောင့် နှိပ်စက်ညှဉ်းဆဲခံရသနည်း။
• ယေဟောဝါသည် မိမိ၏ကျေးကျွန်များကို အဘယ်အကြောင်းများကြောင့် နှိပ်စက်ညှဉ်းပန်းခံစေသနည်း။
[လေ့လာရန်မေးခွန်းများ]
[စာမျက်နှာ ၁၀၊ ၁၁ ပါ ရုပ်ပုံ]
ပထမရာစုခရစ်ယာန်များသည် အမှားတစ်စုံတစ်ရာ ပြုမိသောကြောင့်မဟုတ်ဘဲ ခရစ်ယာန်များ ဖြစ်ကြခြင်းကြောင့် ဆင်းရဲခံခဲ့ရကြ
ပေါလု
ယောဟန်
အန္တိပ
ယာကုပ်
သတေဖန်