လူငယ်များ၊ ယေဟောဝါနှင့်ထိုက်လျောက်စွာ ကျင့်ကြံလော့
လူငယ်များ၊ ယေဟောဝါနှင့်ထိုက်လျောက်စွာ ကျင့်ကြံလော့
ခရစ်ယာန်လူငယ်အချို့သည် မိမိတို့၏မိသားစု၊ မိမိတို့၏အသင်းတော်နှင့် အခိုက်အတန့် ဝေးကွာခဲ့ကြရသည်။ တချို့မှာ မိမိတို့၏ဓမ္မအမှုကို တိုးချဲ့ရန် ထိုသို့ပြုခဲ့ကြပြီ။ အခြားသူတို့မူ ဤလောက၏အရေးများနှင့်စပ်လျဉ်း၍ ကြားနေမှုကြောင့် မိမိတို့၏နေအိမ်ကို စွန့်ခွာခဲ့ကြရပြီ။ (ဟေရှာယ ၂:၄; ယောဟန် ၁၇:၁၆) တချို့သောနိုင်ငံများတွင် “ကဲသာ” သည် သမာဓိစောင့်သိသော လူငယ်များကို ထောင်ချခဲ့သည်၊ သို့မဟုတ် ရပ်ကွက်အကျိုးဆောင်လုပ်ငန်းများ လုပ်ဆောင်စေခဲ့သည်။ *—မာကု ၁၂:၁၇; တိတု ၃:၁၊ ၂။
အဆိုပါလူငယ်များသည် မိမိတို့၏ကြားနေမှုကြောင့် ထောင်ဒဏ်ကျခံနေရစဉ် ဆိုးသွမ်းလူငယ်များနှင့်အတူ နှစ်ရှည်လများ အကျဉ်းချခံခဲ့ရပေမည်။ အလားတူ အခြားအကြောင်းရင်းများကြောင့် အိမ်နှင့်ဝေးနေရခြင်းက လူငယ်အချို့ကို မနှစ်မြို့ဖွယ်ဝန်းကျင်တစ်ခုတွင် အလုပ်လုပ်ရဖို့ အကြောင်းပေါ်စေမည်။ ထိုသို့သောအခြေအနေထဲ တွန်းပို့ခံလိုက်ရသည့် အဆိုပါခရစ်ယာန်လူငယ်များ သို့မဟုတ် အခြားသူတို့သည် ‘ဘုရားသခင်နှင့်ထိုက်လျောက်စွာ ဆက်လက်ကျင့်ကြံနေ’ ရန် ကြိုးစားကြစဉ် သူတို့ရင်ဆိုင်ရသည့် ဖိအားပေးမှုများ၊ တောင်းဆိုချက်များကို မည်သို့အောင်မြင်စွာ ကိုင်တွယ်ဖြေရှင်းနိုင်မည်နည်း။ (၁ သက်သာလောနိတ် ၂:၁၂) သူတို့၏မိဘများသည် ဖြစ်ပေါ်လာနိုင်မည့် မည်သည့်စိတ်မချမ်းမြေ့ဖွယ် အခြေအနေမျိုးကိုမဆို ဖြေရှင်းနိုင်ဖို့ သူတို့ကို မည်သို့အသင့်ပြင်ဆင်ထားပေးနိုင်မည်နည်း။—သု. ၂၂:၃။
အထူးစိန်ခေါ်ချက်များ
“ကျွန်တော့်မိဘတွေရဲ့ ကာကွယ်စောင်မမှုနဲ့ ဝေးနေရတဲ့အပြင် ကျွန်တော့်ကိုသိကျွမ်းတဲ့ အကြီးအကဲတွေရဲ့ မေတ္တာပါကြီးကြပ်ကွပ်ကဲမှုနဲ့လည်း ကင်းကွာနေရတော့ ခက်ခဲပြီး စိုးရွံ့စရာပဲ” ဟု မလွှဲမရှောင်သာ၍ အိမ်မှ ၃၇ လကြာ ဝေးနေခဲ့ရသည့် ၂၁ နှစ်အရွယ် တာကီစ်ကဆိုသည်။ * သူကထပ်၍ “တစ်ခါတလေ ကျွန်တော် အကာအကွယ်အရမ်းမဲ့နေတယ်လို့ ခံစားမိတယ်” ဟုဆိုသည်။ အသက်နှစ်ဆယ်အရွယ်ရှိ ပက်ထရော့စ်သည် အိမ်နှင့် နှစ်နှစ်ကျော် ဝေးနေခဲ့ရသည်။ “ကျွန်တော့်ဘဝမှာ ဖျော်ဖြေရေးနဲ့ ပေါင်းသင်းမှုတွေကို ကိုယ့်သဘောနဲ့ကိုယ် ဦးဆုံး ရွေးချယ်ဆုံးဖြတ်ခဲ့ရတော့တယ်၊ ကျွန်တော့်ရဲ့ရွေးချယ်မှုတွေက အမြဲပညာရှိရှိမဖြစ်ခဲ့ဘူး” ဟုသူဝန်ခံသည်။ ထို့နောက် သူက “တစ်ခါတလေ ပိုလွတ်လပ်လာတဲ့အတွက် ကိုယ့်ကိုယ်ကိုစိုးရိမ်မိတယ်” ဟုဆိုသည်။ ထိုသို့သောအခြေအနေများရှိ ခရစ်ယာန်လူငယ်များကို မှန်မှန်တွေ့ဆုံလေ့ရှိသော ခရစ်ယာန်အကြီးအကဲတစ်ဦးဖြစ်သူ တာစော့စ်က ဤသို့ကောက်ချက်ချခဲ့သည်– “ညစ်ညမ်းတဲ့စကား၊ ပုန်ကန်မှုနဲ့ မယုံကြည်သူ ရွယ်တူချင်းတွေရဲ့ အကြမ်းဖက်တဲ့အပြုအမူတွေက သတိမရှိ၊ အကာအကွယ်မဲ့နေတဲ့ လူငယ်တွေအတွက် ဩဇာလွှမ်းမိုးမှု ဖြစ်သွားနိုင်တယ်။”
ကျမ်းစာမူများကို ရိုသေလေးစားမှုမရှိသူတို့နှင့် နေထိုင်၍ အလုပ်လုပ်နေရသည့် ခရစ်ယာန်လူငယ်များသည် သက်တူရွယ်တူချင်းတို့၏ အကျင့်ပျက်ပြားမှုနှင့် ကျမ်းစာနှင့်မညီသည့်အကျင့်များ တုပရန် သွေးဆောင်ခံရခြင်းကို သတိပြုဖို့လိုသည်။ (ဆာလံ ၁:၁; ၂၆:၄; ၁၁၉:၉) ကိုယ်ပိုင်လေ့လာမှုပြုခြင်း၊ အစည်းအဝေးတက်ခြင်းနှင့် လယ်ကွင်းလုပ်ငန်းတွင်ပါဝင်ခြင်းတို့ကို မှန်မှန်ပြုလုပ်နိုင်ရန် ခက်ခဲပေမည်။ (ဖိလိပ္ပိ ၃:၁၆) ဝိညာဉ်ရေးပန်းတိုင်များချပြီး ထိုအတိုင်းပြုမူလုပ်ဆောင်ရန်လည်း လွယ်ကူမည်မဟုတ်ပေ။
တည်ကြည်သောခရစ်ယာန်လူငယ်များသည် မိမိတို့၏အမူအကျင့်နှင့် အပြောအဆိုကို ယေဟောဝါ၏စိတ်တော်နှင့် အမှန်တကယ်တွေ့စေလိုကြသည်။ သူတို့သည် ကောင်းကင်ခမည်းတော်၏ ဤနှစ်သက်စရာကောင်းသည့် ဖိတ်ခေါ်ချက်ကို တည်ကြည်စွာ ကြိုးစားလိုက်နာကြသည်– “ငါ့သား ပညာရှိလော့။ ကဲ့ရဲ့သောသူ၏စကားကို ငါချေနိုင်အောင် ငါ့စိတ်ကို ရွှင်လန်းစေလော့။” (သု. ၂၇:၁၁) သူတို့၏ ယဉ်ကျေးသောအမူအကျင့်က ယေဟောဝါနှင့် ကိုယ်တော့်လူမျိုးတော်ကို အခြားသူများရှုမြင်ပုံအပေါ် များစွာသြဇာညောင်းကြောင်း သူတို့သိမြင်ကြသည်။—၁ ပေတရု ၂:၁၂။
ချီးကျူးစရာမှာ ထိုသို့သောလူငယ်အများစုသည် တမန်တော်ပေါလု ဤသို့ဆုတောင်းပေးခဲ့သည့် သူတို့၏ ပထမရာစုညီအစ်ကိုများနှင့်တူရန် အတတ်နိုင်ဆုံးကြိုးစားကြသည်– “သင်တို့သည် ကောင်းသောအကျင့်အမျိုးမျိုးတည်းဟူသော အသီးကိုသီးခြင်း၊ . . . ဝမ်းမြောက်သောစိတ်နှင့် အရာရာ၌သည်းခံခြင်း . . . အလို့ငှာ၊ [ယေဟောဝါ] နှင့်ထိုက်လျောက်စွာကျင့်၍ အရာရာ၌နှစ်သက်တော်မူစေ [ကြလော့]။” (ကောလောသဲ ၁:၉-၁၁) ရုပ်ပုံကိုးကွယ်သော ပတ်ဝန်းကျင်အသစ်အဆန်း၊ ရန်သူများအလယ်တွင် ဘုရားသခင်နှင့် ထိုက်လျောက်စွာ အောင်အောင်မြင်မြင် ကျင့်ကြံနေထိုင်ခဲ့သော ဘုရားသခင်ကိုကြောက်ရွံ့သူ လူငယ်တို့၏ ပုံသက်သေများစွာကို သမ္မာကျမ်းစာဖော်ပြထားသည်။—ဖိလိပ္ပိ ၂:၁၅။
“ယေဟောဝါသည် ယောသပ်နှင့်အတူရှိ”
ယာကုပ်နှင့်ရာခေလတို့၏ အချစ်ဆုံးသားယောသပ်သည် ငယ်ရွယ်စဉ်ကပင် ဘုရားသခင်အားကြောက်ရွံ့သည့်ဖခင်၏ အကာအကွယ်ရိပ်မြုံအောက်မှ ဝေးကွာခဲ့ရသည်။ သူသည် အီဂျစ်ပြည်သို့ ကျွန်အဖြစ်ရောင်းစားခံလိုက်ရ၏။ ယောသပ်သည် အလုပ်ကြိုးစားသော၊ ယုံကြည်စိတ်ချရပြီး အကျင့်ကောင်းသော လူငယ်တစ်ဦးအဖြစ် အကောင်းဆုံးပုံသက်သေကို ချမှတ်ပေးခဲ့သည်။ ယေဟောဝါအားမဝတ်ပြုသူ ပေါတိဖာ၏အစေကိုခံနေရသော်လည်း ယောသပ်သည် အသိစိတ်ရှိရှိ လုံ့လဝီရိယဖြင့် အလုပ်လုပ်ခဲ့သူဖြစ်သည်၊ ထို့ကြောင့် သူ၏သခင်က နောက်ဆုံးတွင် တစ်အိမ်ထောင်လုံး၏အမှုကိစ္စများကို သူ့လက်ထဲအပ်နှင်းလေတော့သည်။ (ကမ္ဘာဦး ၃၉:၂-၆) ယောသပ်သည် ယေဟောဝါအား ဆက်၍သမာဓိစောင့်သိခဲ့သဖြင့် အကျဉ်းချခံခဲ့ရသောအခါ “သမာဓိစောင့်တော့ကော ဘာအကြောင်းထူးလို့လဲ” ဟူ၍ မယူဆခဲ့ချေ။ သူသည် ထောင်ထဲ၌ပင် အရည်အချင်းကောင်းများကို တင်ပြခဲ့ရာ မကြာမီပင် အကျဉ်းထောင်တွင် လုပ်ငန်းအတော်များများကို ကြည့်ရှုစောင့်ရှောက်ပေးခဲ့ရလေသည်။ (ကမ္ဘာဦး ၃၉:၁၇-၂၂) ဘုရားသခင်သည် သူ့ကို ကောင်းချီးပေးခဲ့၏၊ ကမ္ဘာဦး ၃၉:၂၃ [ကဘ] ဖော်ပြသည့်အတိုင်း “ယေဟောဝါသည် ယောသပ်နှင့်အတူရှိလေသည်။”
ဘုရားသခင်ကိုကြောက်ရွံ့သောမိသားစုနှင့် ကင်းကွာနေခဲ့ရသည့် ယောသပ်အတွက် အကျင့်ယိုယွင်းရန်၊ သူ့ပတ်ပတ်လည်တွင် နေထိုင်ကြသည့် အယူမှားအီဂျစ်လူမျိုး၏ ဘဝပုံစံအတိုင်း ကျင့်ကြံရန် အလွန်လွယ်ကူလိုက်မည်ဖြစ်ခြင်း! ထိုသို့ပြုမည့်အစား၊ သူသည် ဘုရားသခင်ရေးရာမူများကို စောင့်ထိန်းခဲ့ပြီး အကြီးအကျယ်သွေးဆောင်ခံရသော်လည်း စင်ကြယ်စွာ ဆက်၍ရပ်တည်ခဲ့လေသည်။ ပေါတိဖာ၏မယားက မိမိနှင့်လိင်ဆက်ဆံဖို့ ထပ်ခါတလဲလဲ တိုက်တွန်းသည့်အခါ သူက “အပြစ်ကြီးသော ဤအမှုကိုကျွန်တော်ပြု၍ ဘုရားသခင်ကို အဘယ်သို့ပြစ်မှားနိုင်သနည်း” ဟု ခိုင်မာပြတ်သားစွာ ငြင်းဆိုခဲ့သည်။—ကမ္ဘာဦး ၃၉:၇-၉။
ယနေ့ သက်သေခံလူငယ်များသည် မသင့်တော်သည့် ပေါင်းသင်းမှုများ၊ အကျင့်ပျက်ပြားသည့် ဖျော်ဖြေမှု၊ ညစ်ညမ်းသောစာပေနှင့် ယုတ်ညံ့သည့်တေးဂီတတို့ကို ရှောင်ကြဉ်ရန် ကျမ်းစာအခြေပြုသတိပေးချက်များကို လိုက်နာဖို့လိုပေသည်။ “ထာဝရဘုရား၏မျက်စိတော်သည် ခပ်သိမ်းသောအရပ်၌ရှိ၍ ဆိုးသူ၊ ကောင်းသူတို့ကိုကြည့်ရှုတော်မူ” ကြောင်း သူတို့သိကြသည်။—သု. ၁၅:၃၊ သမ္မာ။
“အပြစ်နှင့်ဆိုင်သောပျော်မွေ့ရာများ” ကို မောရှေငြင်းပယ်ခဲ့
မောရှေသည် ရုပ်ပုံကိုးကွယ်ပြီး အပျော်အပါးလိုက်စားသည့် ဖာရော၏နန်းတော်တွင် ကြီးပြင်းလာခဲ့၏။ သူ့အကြောင်း သမ္မာကျမ်းစာက ဤသို့ဆိုသည်– “အပြစ်နှင့်ဆိုင်သော ပျော်မွေ့ရာများကိုခဏခံစားခြင်းထက်၊ ဘုရားသခင်၏လူတို့နှင့်အတူ ညှဉ်းဆဲခံရခြင်းကို သာ၍အလိုရှိသဖြင့် . . . ယုံကြည်ခြင်းစိတ်ရှိလျက် ဖာရောဘုရင့်သမီး၏သားဟူ၍ ခေါ်ဝေါ်ခြင်းအခွင့်ကိုပယ်၏။”—ဟေဗြဲ ၁၁:၂၄၊ ၂၅၊ ၂၆၊ သမ္မာ။
ဤလောကနှင့်မိတ်သဟာယဖွဲ့ခြင်းသည် အကျိုးကျေးဇူးရနိုင်သော်လည်း ကြာရှည်မခံပေ။ အလွန်ဆုံးဆိုလျှင် ဤလောကအတွက် ကျန်ကြွင်းသည့် အချိန်အကန့်အသတ်အထိသာ ခံလိမ့်မည်။ (၁ ယောဟန် ၂:၁၅-၁၇) မောရှေ၏ပုံသက်သေကို တုပလျှင် ပိုကောင်းမည်မဟုတ်ပေလော။ သူသည် “မျက်မြင်မရသောဘုရားသခင်ကို မြင်ရဘိသကဲ့သို့ တည်ကြည်ခြင်းရှိ” ကြောင်း သမ္မာကျမ်းစာကဆို၏။ (ဟေဗြဲ ၁၁:၂၇) သူသည် ဘုရားသခင်ကိုကြောက်ရွံ့ခဲ့သော ဘိုးဘေးများ၏ ဝိညာဉ်ရေးရာအမွေအနှစ်ကို အမြဲအာရုံစိုက်သည်။ ယေဟောဝါ၏ရည်ရွယ်တော်မူချက်ကို သူ့ဘဝရည်ရွယ်ချက်ဖြစ်စေကာ ဘုရားသခင့်အလိုတော်ဆောင်ခြင်းကို သူ၏ပန်းတိုင်ဖြစ်စေခဲ့သည်။—ထွက်မြောက်ရာ ၂:၁၁; တမန်တော် ၇:၂၃၊ ၂၅။
ဘာသာတရားမကိုင်းရှိုင်း၊ ဖော်ရွေမှုမရှိသည့်ဝန်းကျင်တွင် ဘုရားသခင်အားကြောက်ရွံ့သူ လူငယ်များ ရောက်ရှိနေလျှင် ကိုယ်ပိုင်လေ့လာမှုပြုခြင်းအားဖြင့် ယေဟောဝါနှင့် မိမိတို့၏နှစ်ကိုယ်ကြားဆက်ဆံရေးကို ခိုင်ခံ့စေနိုင်ပါသည်၊ ဤနည်းဖြင့် “မျက်မြင်မရသောဘုရားသခင်” ကို ပိုမိုသိကျွမ်းလာပါမည်။ အစည်းအဝေးများ မှန်မှန်တက်ခြင်းနှင့် လယ်ကွင်းလုပ်ငန်းတွင် ပါဝင်ခြင်းအပါအဝင် ခရစ်ယာန်လုပ်ငန်းဆောင်တာများကို အဆိုပါလူငယ်များ အပြည့်အဝပြုလုပ်ခြင်းဖြင့် ဝိညာဉ်ရေးရာများအပေါ် သူတို့အမြဲ အာရုံစိုက်နိုင်ကြပါလိမ့်မည်။ (ဆာလံ ၆၃:၆; ၇၇:၁၂) မောရှေကဲ့သို့ ယုံကြည်ခြင်းနှင့် မျှော်လင့်ခြင်း ခိုင်မာဖို့ သူတို့ကြိုးစားသင့်သည်။ ယေဟောဝါအား အဓိကထား စဉ်းစားတွေးခေါ်ပြီး ကိုယ်တော်၏မိတ်ဆွေဖြစ်ရန်ကြိုးစားလျှင် ကောင်းပေလိမ့်မည်။
ဘုရားသခင်အားချီးမွမ်းရန် သူ၏လျှာကိုအသုံးပြုခဲ့
အိမ်မှဝေးကွာနေစဉ် ပုံသက်သေကောင်းပြခဲ့သည့် နောက်လူငယ်တစ်ဦးမှာ ဘုရားသခင့်ပရောဖက်ဧလိရှဲလက်ထက်က ရှုရိလူမျိုးတို့၏ ဖမ်းဆီးခေါ်ဆောင်သွားခြင်းခံရသော ဣသရေလမိန်းမငယ်လေးဖြစ်သည်။ သူသည် နူနာစွဲနေသော ရှုရိစစ်တပ် ဗိုလ်ချုပ်နေမန်ဇနီး၏ အိမ်ဖော်ဖြစ်သည်။ အဆိုပါမိန်းမငယ်လေးက သူ၏သခင်မအား ဤသို့ဆိုခဲ့သည်– “ကျွန်မသခင်သည် ရှမာရိမြို့၌ရှိသော ပရောဖက်ထံသို့ရောက်ပါစေသော။ ထိုပရောဖက်သည် သခင်၌စွဲသောနူနာကို ပျောက်စေလိမ့်မည်။” သူ၏သက်သေခံချက်ကြောင့် နေမန်သည် ဣသရေလပြည်တွင်ရှိနေသော ဧလိရှဲထံသွားရောက်ခဲ့ရာ နူနာရောဂါပျောက်ကင်းသွားသည်။ ထို့အပြင် နေမန်သည် ယေဟောဝါကိုဝတ်ပြုသူတစ်ဦး ဖြစ်လာခဲ့သည်။—၄ ဓမ္မရာဇဝင် ၅:၁-၃၊ ၁၃-၁၉။
လူငယ်များသည် မိဘတို့နှင့်ဝေးကွာသည့်အခါ၌ပင် ဘုရားသခင်အားဂုဏ်တင်ရန် လျှာကိုအသုံးပြုဖို့လိုကြောင်း ဤမိန်းမငယ်လေး၏ပုံသက်သေက အလေးပေးဖော်ပြသည်။ အဆိုပါမိန်းမငယ်လေးသည် “မတော်မလျော်သောစကား” သို့မဟုတ် “ညစ်ညူးပြက်ပြယ် ပြက်ရယ်သောစကားများ” ပြောတတ်သည့်အကျင့်ရှိခဲ့မည်ဆိုလျှင် အခွင့်အရေးကြုံလာချိန်တွင် သူပြုခဲ့သည့်အတိုင်း သူ၏လျှာကို ထိထိရောက်ရောက်အသုံးပြုခဲ့ပါမည်လော။ (ဧဖက် ၅:၄၊ သမ္မာ; သု. ၁၅:၂) မိမိ၏ကြားနေမှုကြောင့် အကျဉ်းချခံခဲ့ရသည့် အသက် ၂၀ ကျော်လူငယ် နီကိုးစ်က ဤသို့ပြန်ပြောင်းပြောပြသည်– “မိဘစောင့်ရှောက်မှုနဲ့ အသင်းတော်အုပ်ထိန်းမှုနဲ့ကင်းကွာပြီး စိုက်ပျိုးရေးအကျဉ်းထောင်တစ်ခုမှာ တခြားညီအစ်ကိုတွေနဲ့အတူရှိတုန်း ကျွန်တော်တို့ရဲ့စကားပြောအရည်အသွေးဟာ ပေါ့ပျက်ယိုယွင်းခဲ့တာကို ကျွန်တော်သတိပြုမိခဲ့တယ်။ ယေဟောဝါကို ချီးမွမ်းဂုဏ်တင်ရာမရောက်ခဲ့ဘူး။” ဝမ်းသာစရာမှာ နီကိုးစ်နှင့် အခြားသူငယ်များသည် ယင်းကိစ္စနှင့်စပ်လျဉ်း၍ ပေါလု၏ ဤဆုံးမစကားကို လိုက်နာရန် ကူညီပေးခြင်းခံခဲ့ရသည်– ‘မတရားသောမေထုန်၌မှီဝဲခြင်း၊ အမျိုးမျိုးသော ကိလေသာစိတ်ညစ်ညူးခြင်း၊ လောဘလွန်ကျူးခြင်းအမှုတို့ကို သန့်ရှင်းသူတို့သည်ရှောင်သင့်သည်အတိုင်း၊ စကားနှင့်မျှမဆက်ဆံကြနှင့်။’—ဧဖက် ၅:၃။
ယေဟောဝါသည် သူတို့အတွက် တကယ့်ပုဂ္ဂိုလ်ဖြစ်
ရှေးဗာဗုလုန်မြို့တွင် ဒံယေလ၏အပေါင်းအဖော် ဟေဗြဲလူငယ်သုံးဦးတို့၏တွေ့ကြုံမှုက သေးငယ်သောအရာ၌ တည်ကြည်ခြင်းက ကြီးသောအရာ၌လည်း တည်ကြည်စေကြောင်း ယေရှုမိန့်ဆိုခဲ့သည့်မူ မှန်ကန်သည်ကို သက်သေထူသည်။ (လုကာ ၁၆:၁၀) မောရှေပညတ်က တားမြစ်ထားသည့် အစားအသောက်များ စားသုံးခြင်းကိစ္စနှင့်ရင်ဆိုင်ရသောအခါ သူတို့သည် တိုင်းတစ်ပါးတွင် သုံ့ပန်းများဖြစ်နေကြရာ ဤကိစ္စနှင့်စပ်လျဉ်း၍ ရွေးချယ်စရာမရှိဟု ဆင်ခြေတက်နိုင်သည်။ သို့သော် သေးငယ်သည့်ကိစ္စဖြစ်ပုံရသည့်တိုင် အလေးအနက်ထားခဲ့သည့်အတွက် သူတို့ကောင်းချီးခံစားခဲ့ရသည်တကား! ရှင်ဘုရင်၏အရသာရှိသော ခဲဖွယ်စားဖွယ်များကို ဆက်၍စားသုံးခဲ့ကြသည့် အခြားသောသုံ့ပန်းအားလုံးတို့ထက် သူတို့သည် ပို၍ကျန်းမာပြီး ပို၍ပညာရှိကြောင်း သက်သေထူခဲ့ကြသည်။ ဤသေးငယ်သောအရာများ၌ တည်ကြည်မှုရှိခြင်းက သူတို့အား အမှန်ပင် အားရှိစေခဲ့သည်။ ထို့ကြောင့် ပို၍ကြီးကျယ်သောစမ်းသပ်မှုဖြစ်သည့် ရုပ်တုကြီးကို ပျပ်ဝပ်ကိုးကွယ်ခြင်းကိစ္စနှင့် သူတို့ရင်ဆိုင်ရသောအခါ အလျှော့ပေးလိုက်လျှောရန် သူတို့ငြင်းဆန်ခဲ့ကြသည်။ —ဒံယေလ ၁:၃-၂၁; ၃:၁-၃၀။
ယေဟောဝါသည် ဤလူငယ်သုံးဦးအတွက် တကယ့်ပုဂ္ဂိုလ်တစ်ပါးဖြစ်ခဲ့သည်။ မိမိတို့နေအိမ်၊ ဘုရားသခင့်ဝတ်ပြုမှုဗဟိုနှင့် ဝေးကွာနေခဲ့ကြရသော်လည်း ဤလောက၏အညစ်အကြေးနှင့်ကင်းစင်ဖို့ သူတို့စိတ်ပိုင်းဖြတ်ထားကြသည်။ (၂ ပေတရု ၃:၁၄) ယေဟောဝါနှင့်သူတို့၏ဆက်ဆံရေးကို သူတို့အလွန်တန်ဖိုးထားသဖြင့် ယင်းအတွက် သူတို့အသက်စွန့်ဖို့ အသင့်ရှိကြသည်။
သင့်ကို ယေဟောဝါပယ်လိမ့်မည်မဟုတ်
လူငယ်များသည် မိမိတို့ချစ်မြတ်နိုးယုံကြည်ရသူတို့နှင့် ဝေးကွာနေရသောအခါ မလုံခြုံမှု၊ မသေချာမရေရာမှုနှင့် စိုးရိမ်ပူပန်မှုတို့ကို ခံစားကြရပေမည်။ သို့ရာတွင် သူတို့ကို ‘ယေဟောဝါပယ်လိမ့်မည်မဟုတ်’ ကြောင်း ယုံကြည်စိတ်ချမှုအပြည့်ဖြင့် စမ်းသပ်မှုများကို ရင်ဆိုင်နိုင်ကြပါသည်။ (ဆာလံ ၉၄:၁၄) ထိုသို့သောလူငယ်များသည် “ဖြောင့်မတ်ခြင်းတရားကြောင့် ဆင်းရဲခံရလျှင်၊” “ဖြောင့်မတ်ခြင်းလမ်း” ၌ သူတို့ဆက်လျှောက်လှမ်းနိုင်စေရန် သူတို့ကို ယေဟောဝါကူညီပေးပါလိမ့်မည်။—၁ ပေတရု ၃:၁၄; သု. ၈:၂၀။
ယေဟောဝါသည် ယောသပ်၊ မောရှေ၊ ဣသရေလကျွန်မလေးနှင့် တည်ကြည်သောဟေဗြဲလူငယ်သုံးဦးတို့ကို အစဉ်မပြတ်ခွန်အားပေးခဲ့ပြီး ကြွယ်ဝစွာ ဆုချတော်မူခဲ့သည်။ ယနေ့ “ယုံကြည်ခြင်းနှင့်ဆိုင်၍ ကောင်းစွာသောတိုက်လှန်ခြင်းကိုပြု” နေကြသူတို့ကို ကိုယ်တော်သည် မိမိ၏သန့်ရှင်းသောဝိညာဉ်တော်၊ သမ္မာကျမ်းစာနှင့် မိမိ၏အဖွဲ့အစည်းတို့ကို အသုံးပြု၍ ထောက်မနေတော်မူပြီး သူတို့ရှေ့တွင် “ထာဝရအသက်” ဆုကျေးဇူးကိုချထားသည်။ (၁ တိမောသေ ၆:၁၁၊ ၁၂) မှန်ပါသည်၊ ယေဟောဝါနှင့်ထိုက်လျောက်စွာကျင့်ကြံနိုင်ပါသည်၊ ယင်းသည် ပညာရှိသောလမ်းစဉ်ဖြစ်၏။—သု. ၂၃:၁၅၊ ၁၉။
[အောက်ခြေမှတ်ချက်များ]
^ အပိုဒ်၊ 2 ကင်းမျှော်စင်၊ မေ ၁ ရက်၊ ၁၉၉၆၊ စာမျက်နှာ ၁၈-၂၀ ကိုရှု။
^ အပိုဒ်၊ 5 အမည်တချို့ကို ပြောင်းလဲထားသည်။
[စာမျက်နှာ ၂၅ ပါ လေးထောင့်ကွက်]
မိဘတို့–သင့်သားသမီးများကို အသင့်ပြင်ဆင်ပေးလော့!
“အသက်ပျိုစဉ် ဖွားမြင်သောသားသမီးတို့သည် သူရဲလက်၌ရှိသောမြားကဲ့သို့ဖြစ်ကြ၏။” (ဆာလံ ၁၂၇:၄) မြားတစ်စင်းသည် ပစ်မှတ်ကို အလိုအလျောက်ထိမှန်မည်မဟုတ်ချေ။ ကျွမ်းကျွမ်းကျင်ကျင် ချိန်ရွယ်၍ပစ်ရမည်ဖြစ်၏။ အလားတူ၊ သားသမီးများသည်လည်း မိဘတို့၏ သင့်တင့်လျော်ကန်သောလမ်းညွှန်မှုမပါဘဲ အိမ်နှင့်ခွဲ၍နေသည့်အခါ ဖြစ်ရပ်မှန်များကိုရင်ဆိုင်ဖို့ အသင့်ရှိကြမည်မဟုတ်။—သု. ၂၂:၆။
လူငယ်တို့သည် မစဉ်းစားဘဲ ကောက်ကာငင်ကာလုပ်တတ်ကြသည်၊ သို့မဟုတ် “လူပျိုတို့၏တပ်မက်ခြင်းစိတ်” အလိုသို့လိုက်တတ်ကြသည်။ (၂ တိမောသေ ၂:၂၂) သမ္မာကျမ်းစာက ဤသို့သတိပေးသည်– “ဆုံးမသောကြိမ်လုံးသည် ပညာကိုပေးတတ်၏။ ပေါက်လွှတ်ထားသော သူငယ်မူကား အမိကိုအရှက်ခွဲတတ်၏။” (သု. ၂၉:၁၅၊ သမ္မာ) လူငယ်၏အပြုအမူကို ကန့်သတ်မထားပေးလျှင် အိမ်နှင့်ခွဲခွာနေရသည့်ဘဝအသက်တာ၏ တောင်းဆိုချက်များနှင့် ဖိစီးမှုများရင်ဆိုင်ရသည့်အခါ အသင့်ရှိမည်မဟုတ်ချေ။
ခရစ်ယာန်မိဘများသည် သားသမီးများကို ဤအစီအစဉ်စနစ်ရှိ အခက်အခဲများ၊ ဖိစီးမှုများနှင့် ဘဝဖြစ်ရပ်မှန်များကို ရှင်းလင်း၍ အကျိုးသင့်အကြောင်းသင့်ရှိသည့်နည်းဖြင့် အကြမ်းဖျင်းဖော်ပြပေးသင့်သည်။ လူငယ်တစ်ဦး အိမ်နှင့်ခွဲခွာနေရလျှင် ရင်ဆိုင်ရနိုင်သည့် မနှစ်မြို့ဖွယ်အခြေအနေတို့ကို အဆိုးမြင်ခြင်းမရှိ၊ စိတ်ပျက်အားလျော့ခြင်းမရှိစေဘဲ ဖော်ပြပေးနိုင်ပါသည်။ ဘုရားသခင်ပေးဉာဏ်ပညာနှင့်တကွ ဤသို့လေ့ကျင့်ပေးခြင်းအားဖြင့် “အတွေ့အကြုံမရှိသူတို့ကို လိမ္မာပါးနပ်မှု၊ ငယ်ရွယ်သူကို အသိပညာနှင့် စဉ်းစားတွေးခေါ်နိုင်စွမ်းပေး” ပေလိမ့်မည်။—သု. ၁:၄၊ ကဘ။
မိဘများသည် ဘုရားသခင့်စံနှုန်းများနှင့် ကိုယ်ကျင့်တရားမူများကို မိမိတို့သားသမီးများ၏နှလုံးထဲ သွတ်သွင်းပေးလျှင် ဘဝ၏စိန်ခေါ်ချက်များကို သူတို့လေးများအား အောင်မြင်စွာ ကိုင်တွယ်ဖြေရှင်းစေနိုင်သည်။ မိသားစုလိုက် ပုံမှန်ကျမ်းစာလေ့လာမှုပြုခြင်း၊ ပွင့်လင်းသောဆက်သွယ်ရေးရှိခြင်းနှင့် သားသမီးများ၏အရေးကိစ္စကို တကယ်စိတ်ဝင်စားမှုတင်ပြခြင်းတို့က အောင်မြင်မှုနှင့် ရှုံးနိမ့်မှုကြား ကွာဟစေသောအကြောင်းရင်း ဖြစ်စေနိုင်ပါသည်။ မိဘတို့သည် မျှတပြီး အပြုသဘောပါ၍ အကျိုးသင့်အကြောင်းသင့်ရှိသည့် ဘုရားသခင်ရေးရာလေ့ကျင့်မှုပေးခြင်း၊ သားသမီးများအား နောက်ပိုင်းတွင် ကိုယ့်ခြေပေါ်ကိုယ် ရပ်တည်တတ်ရန် ပြင်ဆင်ပေးခြင်း ပြုသင့်ပေသည်။ သင်သည် ဤလောကတွင်နေသော်လည်း ယင်း၏အစိတ်အပိုင်းမဖြစ်ဘဲ နေနိုင်ကြောင်း မိမိ၏ပုံသက်သေအားဖြင့် သားသမီးများကို မိဘများသွန်သင်ပေးနိုင်ပါသည်။—ယောဟန် ၁၇:၁၅၊ ၁၆။
[စာမျက်နှာ ၂၃ ပါ ရုပ်ပုံ]
ခရစ်ယာန်လူငယ်တချို့ မိမိတို့နေအိမ်မှထွက်ခွာခဲ့ကြ
[စာမျက်နှာ ၂၄ ပါ ရုပ်ပုံ]
သွေးဆောင်မှုကိုတွန်းလှန်ခြင်းအားဖြင့် လူငယ်များသည် ယောသပ်ကိုအတုယူပြီး ကိုယ်ကျင့်တရားစင်ကြယ်စွာနေနိုင်
[စာမျက်နှာ ၂၆ ပါ ရုပ်ပုံ]
ယေဟောဝါအားဂုဏ်တင်ချီးမွမ်းရန် မိမိ၏လျှာကိုအသုံးပြု ခဲ့သည့် ဣသရေလကျွန်မလေးကို အတုယူပါလေ