သင်တို့အသိပညာ၌ ချုပ်တည်းခြင်း ထပ်ဆင့်ကြလော့
သင်တို့အသိပညာ၌ ချုပ်တည်းခြင်း ထပ်ဆင့်ကြလော့
‘သင်တို့၏အသိပညာ၌ ချုပ်တည်းခြင်းကို ထပ်ဆင့်ကြလော့။’—၂ ပေတရု ၁:၅-၈၊ ကဘ။
၁။ လူ့ပြဿနာများစွာသည် အဘယ်မတတ်စွမ်းမှုကြောင့် ဖြစ်ပေါ်လာသနည်း။
မူးယစ်ဆေးဝါး တလွဲအသုံးပြုခြင်းကို ဆန့်ကျင်သည့် ကင်ပိန်းကြီးတစ်ခုအတွင်း ယူနိုက်တက်စတိတ်မှ လူငယ်များကို ဤသို့သတိပေးခဲ့သည်– မူးယစ်ဆေးဝါး တလွဲအသုံးပြုခြင်းသာမက သောက်ကြူးခြင်း၊ ပညာမဲ့သော သို့မဟုတ် အကျင့်ပျက်သောဘဝပုံစံများ၊ မသမာသည့်စီးပွားရေးလုပ်ငန်းများနှင့် “ကိုယ်ကာယ၏တပ်မက်ခြင်း” တို့ကို “ငြင်း” လိုက်ပါ! (ရောမ ၁၃:၁၄) သို့တိုင် ထိုသို့ငြင်းဆိုရန် အမြဲလွယ်ကူသည်ဟု မည်သူပြောနိုင်မည်နည်း။
၂။ (က) ငြင်းဆိုရန် အခက်တွေ့ခြင်းသည် အဆန်းမဟုတ်ကြောင်း အဘယ်ကျမ်းစာပုံနမူနာများက ဖော်ပြသနည်း။ (ခ) အဆိုပါပုံနမူနာများက ကျွန်ုပ်တို့ကို အဘယ်အရာပြုလုပ်ရန် အားပေးသင့်သနည်း။
၂ မစုံလင်သောလူသားအားလုံးသည် မိမိတို့ကိုယ်ကိုမချုပ်တည်းနိုင်ကြသောကြောင့် ကျွန်ုပ်တို့တွေ့ကြုံရသည့် မည်သည့်ချို့တဲ့ချက်များကိုမဆို အနိုင်ယူတတ်ဖို့ သင်ယူထားသင့်သည်။ ဘုရားသခင်၏အမှုတော်ကို ကြိုးစားထမ်းဆောင်ခဲ့သော်လည်း ငြင်းဆိုရန် တစ်ခါတစ်ရံ အခက်တွေ့ခဲ့ကြသည့် အတိတ်က လူအချို့အကြောင်း သမ္မာကျမ်းစာက ဖော်ပြသည်။ ဗာသရှေဘနှင့် ဒါဝိဒ်ပြုခဲ့သော သူ့သားအိမ်ရာပြစ်မှားခြင်းအပြစ်ကို သတိရပါ။ ယင်းကြောင့် ပြစ်မှား၍ရခဲ့သည့်ကလေးနှင့် ဗာသရှေဘ၏ခင်ပွန်းတို့ သေဆုံးခဲ့ရရှာသည်၊ သူတို့နှစ်ဦးစလုံးတွင် အပြစ်မရှိကြချေ။ (၂ ဓမ္မရာဇဝင် ၁၁:၁-၂၇; ၁၂:၁၅-၁၈) “ငါသည် ကျင့်ချင်သောအကျင့်ကောင်းကိုမကျင့်၊ မကျင့်ချင်သောအကျင့်ဆိုးကိုကျင့်၏” ဟူ၍ ပွင့်ပွင့်လင်းလင်း ဝန်ခံခဲ့သော တမန်တော်ပေါလုကိုလည်း သတိရပါ။ (ရောမ ၇:၁၉) သင်သည် တစ်ခါတစ်ရံ ထိုသို့အားမလိုအားမရဖြစ်ဖူးသလော။ ပေါလုက ဤသို့ဆက်ဆို၏– “ငါသည် အတွင်းလူအားဖြင့် ဘုရားသခင်၏ပညတ်တရားတော်ကို နှစ်သက်၏။ သို့သော်လည်း ငါ့ကိုယ်အင်္ဂါများ၌ရှိသော တရားတစ်ပါးသည် စိတ်ဝိညာဉ်တရားကို ဆိုင်ပြိုင်တိုက်လှန်သဖြင့်၊ ငါ့ကိုယ်အင်္ဂါများ၌ရှိသော အပြစ်တရားလက်သို့ ငါ့ကိုဖမ်းသွားအပ်နှံသည်ကို ငါမြင်၏။ ငါသည် ငြိုငြင်သောသူဖြစ်ပါသည်တကား။ ဤအသေကောင်မှ ငါ့ကို အဘယ်သူကယ်လွှတ်မည်နည်း။” (ရောမ ၇:၂၂-၂၄) ကျမ်းစာပုံနမူနာများက မိမိကိုယ်ကို ပိုမိုချုပ်တည်းနိုင်ရန် ကြိုးစားအားထုတ်ခြင်းကို ဘယ်တော့မှ လက်မလျှော့လိုက်ဖို့ သန္နိဋ္ဌာန်ကို ခိုင်မာစေသင့်သည်။
ချုပ်တည်းခြင်း၊ သင်ယူစရာသင်ခန်းစာတစ်ခု
၃။ ချုပ်တည်းခြင်းရှိရန် လွယ်ကူလိမ့်မည်ဟု မယူမှတ်နိုင်ကြောင်း ရှင်းပြပါ။
၃ ငြင်းဆိုနိုင်စွမ်းရှိသည့် ချုပ်တည်းခြင်းကို ၂ ပေတရု ၁:၅-၇ တွင် ယုံကြည်ခြင်း၊ အကျင့်ကောင်းခြင်း၊ အသိပညာ၊ ခံနိုင်ရည်၊ ဘုရားသခင်ဝတ်၌မွေ့လျော်ခြင်း၊ ညီအစ်ကို,ကိုစုံမက်ခြင်းနှင့် ချစ်ခြင်းမေတ္တာတို့ဖြင့်တွဲဖက်၍ ဖော်ပြထားသည်။ ဖော်ပြပါ နှစ်သက်ဖွယ် အရည်အသွေးများတစ်ခုမျှသည် မွေးရာပါမဟုတ်ချေ။ ၎င်းတို့ကို ပျိုးထောင်ရမည်ဖြစ်သည်။ သန္နိဋ္ဌာန်ချ၍ ကြိုးစားအားထုတ်မှသာ ယင်းတို့ကို အထင်အရှားဖော်ပြနိုင်မည်။ သို့ဖြစ်လျှင် ချုပ်တည်းခြင်းသည် သာ၍လွယ်ကူလိမ့်မည်ဟု ယူမှတ်သင့်သလော။
၄။ ချုပ်တည်းခြင်းနှင့်စပ်လျဉ်း၍ မိမိတွင် အဘယ်ပြဿနာမျှမရှိဟု လူအများ အဘယ်ကြောင့် ယူမှတ်ကြသနည်း၊ သို့သော် ယင်းက အဘယ်အရာ၏ သာဓကဖြစ်သနည်း။
၄ ချုပ်တည်းခြင်းနှင့်ပတ်သက်၍ မိမိတွင် အဘယ်ပြဿနာမျှမရှိဟု ယူမှတ်သူ သန်းနှင့်ချီရှိပေမည်။ သူတို့သည် သိလျက်ဖြစ်စေ၊ မသိလျက်ဖြစ်စေ မစုံလင်သောသွေးသား၏ စေစားရာကို ပြုမူကြရာတွင် ကိုယ့်အပေါ်ဖြစ်စေ၊ သူတစ်ပါးအပေါ်ဖြစ်စေ သက်ရောက်နိုင်သည့် အကျိုးဆက်များကို မစဉ်းစားမဆင်ခြင်ဘဲ စိတ်တိုင်းကျနေထိုင်ကြသည်။ (ယုဒ ၁၀) ငြင်းဆိုနိုင်စွမ်းနှင့် ငြင်းဆိုလိုစိတ်မရှိခြင်းတို့သည် ယခင်ကထက် ယခု ပိုမိုထင်ရှားလာလေပြီ။ ယင်းက ပေါလုပြောခဲ့သည့် ‘နောက်ဆုံးသောကာလ’ တွင်ကျွန်ုပ်တို့ အသက်ရှင်နေကြရကြောင်း သာဓကဖြစ်သည်၊ သူဤသို့ကြိုဟောခဲ့သည်– “ခဲယဉ်းသောကာလဖြစ်မည်ဟု သိမှတ်လော့။ အဘယ်သို့နည်းဟူမူကား၊ လူတို့သည် ကိုယ်ကိုကိုယ်ချစ်သောသူ၊ ငွေကိုတပ်မက်သောသူ၊ ဝါကြွားသောသူ၊ ထောင်လွှားစော်ကားသောသူ၊ သူ့အသရေကိုရှုတ်ချသောသူ၊ . . . မချုပ်တည်းနိုင်သောသူ . . . ဖြစ်ကြလိမ့်မည်။”—၂ တိမောသေ ၃:၁-၃။
၅။ ယေဟောဝါသက်သေများသည် ချုပ်တည်းခြင်းအကြောင်းအရာကို အဘယ်ကြောင့် စိတ်ဝင်စားကြသနည်း၊ အဘယ်အကြံပြုချက်သည် သက်ဆိုင်ဆဲဖြစ်သနည်း။
၅ ယေဟောဝါသက်သေများသည် ချုပ်တည်းမှုရှိရန်အတွက် ရင်ဆိုင်ရသော စိန်ခေါ်ချက်ကို ကောင်းစွာသိထားကြသည်။ ဘုရားသခင်၏စံနှုန်းများနှင့်အညီ အသက်ရှင်နေထိုင်ခြင်းဖြင့် ကိုယ်တော့်စိတ်တော်နှင့် တွေ့လိုသောဆန္ဒသည် မစုံလင်သောအသွေးအသား၏ စေစားရာလမ်းစဉ်နှင့် ဆိုင်ပြိုင်တိုက်လှန်နေရကြောင်း ပေါလုနည်းတူ သူတို့သိရှိကြ၏။ ထို့ကြောင့် သူတို့သည် ဤလွန်ဆွဲပွဲတွင် မည်သို့အနိုင်ရမည်အကြောင်း သိလိုကြသည်မှာ ကြာမြင့်ပေပြီ။ ၁၉၁၆ ခုနှစ်က ယခု သင်,ဖတ်နေသည့် မဂ္ဂဇင်း၏အစောပိုင်း စာစောင်တစ်စောင်တွင် “ကျွန်ုပ်တို့ကိုယ်ကိုဖြစ်စေ၊ ကျွန်ုပ်တို့၏အတွေးအခေါ်နှင့် အပြောအဆိုကိုမက အကျင့်အကြံတို့ကိုပါဖြစ်စေ ချုပ်တည်းခြင်းနှင့်ပတ်သက်၍ လျောက်ပတ်သောနည်းလမ်း” ကိုဖော်ပြခဲ့၏။ ဖိလိပ္ပိ ၄:၈ ကိုစိတ်ထဲစွဲမှတ်ထားရန် အကြံပြုခဲ့သည်။ လွန်ခဲ့သောနှစ်ပေါင်း ၂,၀၀၀ ခန့်က ထိုကျမ်းချက်ပါ မြင့်မြတ်သောအကြံပြုချက်ကို ဦးဆုံးပေးခဲ့ပြီး ထိုအချိန် သို့မဟုတ် ၁၉၁၆ ခုနှစ်ကထက် ယခု ယင်းကို လိုက်လျှောက်ရန် ပိုမိုခက်ခဲနိုင်ဖွယ်ရှိသော်လည်း ယနေ့တိုင် သက်ဆိုင်ဆဲပင်။ မည်သို့ပင်ဆိုစေ၊ ခရစ်ယာန်များသည် လောကတပ်မက်မှုများကို ငြင်းပယ်ရန် ကြိုးစားအားထုတ်ကြခြင်းဖြင့် မိမိတို့ဖန်ဆင်းရှင်၏အလိုတော်ကို လိုက်လျှောက်နေကြောင်း သိရှိကြ၏။
၆။ ချုပ်တည်းခြင်းကို ပြုစုပျိုးထောင်နေစဉ် အဘယ်ကြောင့် စိတ်ပျက်အားလျော့စရာအကြောင်း မရှိသနည်း။
၆ ချုပ်တည်းခြင်းကို ‘သန့်ရှင်းသောဝိညာဉ်တော်အသီး’ အဖြစ် ဂလာတိ ၅:၂၂၊ ၂၃ တွင်ဖော်ပြထား၏။ ဤအရည်အသွေးကို “ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ သစ္စာစောင့်ခြင်း၊ နူးညံ့သိမ်မွေ့ခြင်း” တို့နှင့်တွဲ၍ ထင်ရှားစွာပြမည်ဆိုလျှင် အကျိုးများစွာခံစားရလိမ့်မည်။ ပေတရုဖော်ပြသည့်အတိုင်း ထိုသို့ပြုခြင်းသည် ဘုရားသခင်၏အမှုတော်ကို ထမ်းဆောင်ရာတွင် ‘မလှုပ်မရှား အသီးမဲ့’ ဖြစ်လာခြင်းမှ ကာကွယ်ပေးလိမ့်မည်။ (၂ ပေတရု ၁:၈) သို့သော် ဤအရည်အသွေးများကို ကျွန်ုပ်တို့ပြသလိုသည့်အတိုင်း အလျင်အမြန်၊ အပြည့်အစုံ မပြသနိုင်လျှင် စိတ်ပျက်အားလျော့ခြင်း၊ မိမိကိုယ်ကို အပြစ်တင်ခြင်း မရှိသင့်ပေ။ ကျောင်းတွင် ကျောင်းသားတစ်ဦးသည် တခြားတစ်ဦးထက် ပို၍လျင်မြန်စွာ သင်ယူနိုင်သည်ကို သင်သတိပြုမိပေမည်။ သို့မဟုတ် အလုပ်ခွင်တွင် အလုပ်သမားတစ်ဦးသည် လုပ်ငန်းသစ်တစ်ခုကို အခြားလုပ်သမားချင်းတို့ထက် ပို၍လျင်မြန်စွာ တတ်မြောက်ပေမည်။ ထိုနည်းတူ အချို့သည် တခြားသူများထက် ခရစ်ယာန်အရည်အသွေးများကို ပို၍လျင်မြန်စွာ တတ်သိလာပြီး ပြသကြ၏။ အရေးကြီးသည်မှာ ဘုရားသခင်ရေးရာ အရည်အသွေးများကို ကျွန်ုပ်တို့အတတ်နိုင်ဆုံး ပြုစုပျိုးထောင်ပေးရန်ဖြစ်သည်။ ယင်းကို သမ္မာကျမ်းစာနှင့် အသင်းတော်မှတစ်ဆင့် ယေဟောဝါပြင်ဆင်ပေးသော အကူအညီကို အပြည့်အဝခံယူခြင်းအားဖြင့် ပြုလုပ်နိုင်သည်။ ကျွန်ုပ်တို့၏ပန်းတိုင်သို့ ရောက်ရှိရန်အတွက် အရှိန်နှုန်းသည် ဆက်လက်တိုးတက်မှုပြုနေရန် သန္နိဋ္ဌာန်ချထားသော အားထုတ်မှုများလောက် အရေးမကြီးပါ။
၇။ ချုပ်တည်းခြင်းသည် အရေးပါကြောင်း အဘယ်အရာက ဖော်ပြသနည်း။
၇ ဝိညာဉ်အသီးများတွင် ချုပ်တည်းခြင်းကို နောက်ဆုံးမှဖော်ပြထားသော်ငြားလည်း ၎င်းသည် တခြားအရည်အသွေးများထက် အရေးပါမှုတွင် မလျော့ချေ။ ကျွန်ုပ်တို့သည် မိမိကိုယ်ကိုကောင်းစွာချုပ်တည်းနိုင်လျှင် “ဇာတိပကတိအကျင့်” အားလုံးကို ရှောင်ရှားနိုင်ကြောင်း စိတ်စွဲမှတ်ထားသင့်၏။ သို့တိုင် မစုံလင်သောလူသားတို့သည် “သူ့မယားကိုပြစ်မှားခြင်း၊ မတရားသောမေထုန်၌မှီဝဲခြင်း၊ ညစ်ညူးစွာကျင့်ခြင်း၊ [ကိလေသာစိတ်]လွန်ကျူးခြင်း၊ . . . ကိုကိုးကွယ်ခြင်း၊ သူတစ်ပါးကိုပြုစားခြင်း၊ ရန်ငြိုးဖွဲ့ခြင်း၊ ရန်တွေ့ခြင်း၊ ဂုဏ်ပြိုင်ခြင်း၊ အမျက်ထွက်ခြင်း၊ ငြင်းခုံခြင်း၊ အချင်းချင်းကွဲပြားခြင်း၊ သင်းခွဲခြင်း” အစရှိသည့် “ဇာတိပကတိအကျင့်” တစ်မျိုးမျိုးကို ပြုလုပ်မိတတ်ကြသည်။ (ဂလာတိ ၅:၁၉၊ ၂၀) သို့ဖြစ်၍ ကျွန်ုပ်တို့၏စိတ်နှလုံးမှ ဉာဉ်ဆိုးများကို အမြစ်ပါမကျန်ထုတ်ပစ်ရန် အဆက်မပြတ်တွန်းလှန်နေကြရမည်။
အချို့သည် အထူးကြိုးစားအားထုတ်ကြရ
၈။ အချို့သူများ ချုပ်တည်းခြင်းတင်ပြရန် အထူးအခက်တွေ့စေသည့် အကြောင်းများကား အဘယ်နည်း။
၈ အချို့ခရစ်ယာန်များသည် ချုပ်တည်းခြင်းရှိရန် တခြားသူများထက် ပိုခက်ခဲကြသည်။ အဘယ်ကြောင့်နည်း။ မိဘများ၏လေ့ကျင့်ပေးမှု၊ သို့မဟုတ် အတိတ်မှအတွေ့အကြုံများကြောင့် ဖြစ်ပေမည်။ ချုပ်တည်းခြင်းကို ပြုစုပျိုးထောင်ပြီး တင်ပြရန်အတွက် မိမိတို့တွင် အခက်အခဲမရှိလျှင် ရွှင်လန်းအားရစရာပင်။ သို့သော် ချုပ်တည်းရန် အခက်အခဲပိုရှိသူများနှင့် ဆက်ဆံရသည့်အခါ ကျွန်ုပ်တို့ကို ကသိကအောက်ဖြစ်စေသည့်တိုင် သူတို့ကို စာနာမှုနှင့် နားလည်မှုပြသင့်သည်။ ကျွန်ုပ်တို့ကိုယ်တိုင် မစုံလင်သောကြောင့် မည်သူသည် မိမိကိုယ်ကိုဖြောင့်မတ်၏ဟူသည့် သဘောထားပြသရန် အခြေခံအကြောင်းရှိသနည်း။—ရောမ ၃:၂၃; ဧဖက် ၄:၂။
၉။ အချို့သူများတွင် အဘယ်အားနည်းချက်များ ရှိသနည်း၊ မည်သည့်အချိန်တွင် ဤအားနည်းချက်များကို အပြီးသတ်အောင်မြင်နိုင်မည်နည်း။
၉ ဥပမာပေးရလျှင် ဆေးရွက်ကြီး သို့မဟုတ် “အပျော်သဘောဖြင့်” မူးယစ်ဆေးဝါး သုံးစွဲခြင်းကို ဖြတ်လိုက်သော ခရစ်ယာန်ချင်းတချို့သည် တစ်ခါတစ်ရံ ၎င်းတို့ကို အာသာငမ်းငမ်း တောင့်တကြပေမည်။ အချို့မူကား အစားအစာ သို့မဟုတ် အရက်ယမကာကို အကန့်အသတ်နှင့် စားသောက်ရန် အခက်တွေ့ကြ၏။ တခြားသူများမှာမူ သူတို့၏လျှာကို မထိန်းနိုင်သဖြင့် စကားအားဖြင့် မှားတတ်ကြသည်။ ဤအားနည်းချက်များကို ကိုင်တွယ်ဖြေရှင်းနိုင်ရန် ဇွဲရှိရှိကြိုးစား၍ ချုပ်တည်းပေးဖို့လိုသည်။ အဘယ်ကြောင့်နည်း။ ယာကုပ် ၃:၂ ကအမှန်အတိုင်း ဤသို့ဝန်ခံ၏– “ငါတို့ရှိသမျှသည် အများသောအားဖြင့် မှားတတ်ကြ၏။ စကားအားဖြင့် မှားခြင်းမရှိသောသူမည်သည်ကား၊ စုံလင်သောသူဖြစ်၏။ မိမိကိုယ်တစ်ကိုယ်လုံးကို ချုပ်တည်းနိုင်သောသူဖြစ်၏။” အချို့ကျပြန်လျှင် လောင်းကစားခြင်းကို အလွန်ဝါသနာပါကြသည်။ သို့မဟုတ် ဒေါသကို မချုပ်တည်းနိုင်ကြပေ။ ယင်းတို့ကို သို့မဟုတ် အလားတူအားနည်းချက်များကို အောင်မြင်စွာ ကိုင်တွယ်ဖြေရှင်းတတ်ရန် အချိန်ယူရပေမည်။ ယခု ကျွန်ုပ်တို့ သိသိသာသာ တိုးတက်နိုင်သော်လည်း စုံလင်လာသည့်အချိန်မှသာ မကောင်းသောဆန္ဒများ ထာဝစဉ်ပျောက်ကွယ်သွားလိမ့်မည်။ ဤအချိန်အတောအတွင်း ချုပ်တည်းနိုင်ရန် ကြိုးစားခြင်းသည် အပြစ်ရှိဘဝပုံစံသို့ ပြန်မရောက်စေဖို့ ထောက်ကူပေးလိမ့်မည်။ ကြိုးစားနေကြစဉ် စိတ်ပျက်အားမလျော့မိစေရန် အချင်းချင်း ရိုင်းပင်းကူညီကြပါစို့။—တမန်တော် ၁၄:၂၁၊ ၂၂။
၁၀။ (က) လိင်မှုရေးရာကို ချုပ်တည်းခြင်းသည် အချို့သူတို့အတွက် အဘယ်ကြောင့်အထူးခက်ခဲသနည်း။ (ခ) ညီအစ်ကိုတစ်ဦးသည် အဘယ်ပြောင်းလဲမှုကြီးတစ်ခုကို ပြုလုပ်ခဲ့သနည်း။ (စာမျက်နှာ ၁၆ မှလေးထောင့်ကွက်ကိုရှု။)
၁၀ အချို့သူများအတွက် ချုပ်တည်းရန်ခက်သည့် ကဏ္ဍနောက်တစ်ခုမှာ လိင်မှုရေးရာဖြစ်၏။ လူ့လိင်သဘာဝသည် ယေဟောဝါ ဘုရားသခင် ကျွန်ုပ်တို့ကို ပြုလုပ်ထားရာ တစ်စိတ်တစ်ဒေသဖြစ်သည်။ သို့သော်လည်း အချို့သည် လိင်မှုရေးရာကို ဘုရားသခင့်စံနှုန်းနှင့်အညီ သူ့နေရာနှင့်သူထားရှိရန် အထူးခက်ခဲကြသည်။ ဤသူတို့သည် လိင်စိတ် အလွန်ပြင်းထန်သောကြောင့် ပိုမိုခက်ကောင်းခက်ပေမည်။ လိင်စိတ်ထကြွလာစေရန် နည်းအမျိုးမျိုးဖြင့် မီးထိုးယပ်ခတ်ပေးသော လိင်စိတ်မွှန်နေသည့် ဤလောကတွင် ကျွန်ုပ်တို့ နေထိုင်နေကြရ၏။ ယင်းကြောင့် အနည်းဆုံးအချိန်အတိုင်းအတာတစ်ခုအထိ တစ်ကိုယ်တည်းနေ၍ အိမ်ထောင်ရေးကိစ္စများနှင့် အာရုံမပျံ့လွင့်ဘဲ ဘုရားသခင့်အမှုတော်ကို လွတ်လပ်စွာထမ်းဆောင်လိုသူ ခရစ်ယာန်များအတွက် ပြဿနာဖြစ်နိုင်သည်။ (၁ ကောရိန္သု ၇:၃၂၊ ၃၃၊ ၃၇၊ ၃၈) သို့သော် “[တပ်မက်] ကိလေသာစိတ်ပူပန်ခြင်းရှိသည်ထက် ထိမ်းမြားစုံဖက်ခြင်းပြုသော် သာ၍ကောင်း၏” ဟူသော ကျမ်းစာမိန့်မှာချက်နှင့်အညီ အိမ်ထောင်ပြုရန် သူတို့ဆုံးဖြတ်ကြမည်ဖြစ်ကာ ယင်းသည် အမှန်ပင်ဂုဏ်အသရေရှိ၏။ တစ်ချိန်တည်းတွင် ကျမ်းစာဆုံးမစကားအတိုင်း “သခင်ဘုရား၌သာ“ အိမ်ထောင်ပြုရန် ဆုံးဖြတ်ထားကြသည်။ (၁ ကောရိန္သု ၇:၉၊ ၃၉) ယေဟောဝါ၏ဖြောင့်မတ်သောမူများကို လိုက်နာကျင့်သုံးရန် သူတို့စိတ်ဝင်စားကြသည့်အတွက် ကိုယ်တော် အမှန်ပင် ရွှင်လန်းလိမ့်မည်။ ဤသို့မြင့်မားသော ကိုယ်ကျင့်တရားစံနှုန်းများအပြင် သမာဓိရှိကြသူ စစ်မှန်သောဝတ်ပြုသူများနှင့် ပေါင်းသင်းရခြင်းကို ခရစ်ယာန်ချင်းများက အားရရွှင်လန်းကြသည်။
၁၁။ အိမ်ထောင်ပြုလိုသော်လည်း မပြုနိုင်သေးသည့် ညီအစ်ကို သို့မဟုတ် ညီအစ်မတစ်ဦးကို မည်သို့ကူညီပေးနိုင်သနည်း။
၁၁ သင့်တော်မည့် အိမ်ထောင်ဖက်တစ်ဦးကို ရှာမတွေ့နိုင်လျှင်ကော အသို့နည်း။ အိမ်ထောင်ပြုလိုသော်လည်း မပြုနိုင်သေးသူသည် မည်မျှစိတ်အလိုမကျဖြစ်လာနိုင်မည်ကို စိတ်ကူးကြည့်ပါ! သူသည် သင့်တော်မည့်အိမ်ထောင်ဖက်ကို ရှာနေစဉ် သူ၏မိတ်ဆွေများက အိမ်ထောင်ပြုပြီး ပျော်ရွှင်မှု အတော်အတန်ရနေကြသည်ကို တွေ့မြင်နေရပေမည်။ ဤသို့သောအခြေအနေမျိုးတွင် အချို့သူများသည် တစ်ကိုယ်တည်းရာဂစိတ်ဖြေသည့် မသန့်ရှင်းသော အကျင့်ပြဿနာသည် အဆက်မပြတ်ပေါ်လာပေမည်။ မည်သို့ပင်ဆိုစေ၊ ကိုယ်ကျင့်တရားစင်ကြယ်ရန် ကြိုးစားနေသော အခြားသူတစ်ဦးကို အဘယ်ခရစ်ယာန်တစ်ဦးတစ်ယောက်ကမျှ အမှတ်မထင် စိတ်ပျက်အားလျော့စေလိုမည်မဟုတ်ချေ။ “ဘယ်အချိန်ကျမှ အိမ်ထောင်ပြုမှာလဲ” အစရှိသော မဆင်မခြင်စကားများကို ကျွန်ုပ်တို့ ပြောဆိုမိလျှင် မရည်ရွယ်ဘဲ စိတ်ပျက်အားလျော့သွားစေနိုင်၏။ မကောင်းသောအကြံအစည်မပါဘဲ ထိုသို့ပြောမိသည်ဟုဆိုသော်လည်း ကျွန်ုပ်တို့၏လျှာကို ချုပ်တည်းထားမည်ဆိုလျှင် သာ၍ကောင်းလိုက်လေခြင်း! (ဆာလံ ၃၉:၁) တစ်ကိုယ်ရေတစ်ကာယဘဝတွင် ကိုယ်ကျင့်တရား စောင့်ထိန်းနေကြသူများကို လှိုက်လှိုက်လှဲလှဲ ချီးမွမ်းသင့်သည်။ စိတ်ပျက်အားလျော့စေမည့်အစား အားပေးစကားများ ကြိုးစားပြောနိုင်သည်။ ဥပမာ၊ ရင့်ကျက်သူအချို့ စုရုံးအစာစားသည့်အခါ သို့မဟုတ် ခရစ်ယာန်ပေါင်းသင်းမှုပြုလုပ်သည့်အခါ လူလွတ်များကိုပါ ဖိတ်ခေါ်နိုင်၏။
အိမ်ထောင်သည်ဘဝတွင် ချုပ်တည်းခြင်း
၁၂။ အိမ်ထောင်သည်များပင်လျှင် အဘယ်ကြောင့် ချုပ်တည်းမှု အတော်အတန်လိုသနည်း။
၁၂ အိမ်ထောင်သည်ဘဝတွင်လည်း လိင်ဆက်ဆံခြင်းကိစ္စတွင် ချုပ်တည်းမှုလို၏။ ဥပမာ၊ ခင်ပွန်းသည်နှင့် ဇနီးသည်၏ သံဝါသပြုလိုစိတ်သည် လုံးဝမတူပေ။ အိမ်ထောင်ဖက်တစ်ဦး၏ ကာယရေးအခြေအနေကြောင့် သံဝါသပြုရန် တစ်ခါတစ်ရံ အခက်အခဲရှိပေမည် သို့မဟုတ် လုံးဝမဖြစ်နိုင်သည့်အချိန်များရှိပေမည်။ ယခင်အဖြစ်အပျက်တစ်ခုခုကြောင့် အိမ်ထောင်ဖက်တစ်ဦးသည် ဤမိန့်မှာချက်ကို နာခံရန် အခက်တွေ့နိုင်ပေမည်– “ယောက်ျားသည် ဆက်ဆံခြင်းဝတ်ကို မိမိမယားအား ပြုစေလော့။ ထိုနည်းတူ၊ မိန်းမသည်လည်း ဆက်ဆံခြင်းဝတ်ကို မိမိလင်အား ပြုစေလော့။” ဤသို့သောအခြေအနေမျိုးတွင် အခြားအိမ်ထောင်ဖက်သည် ပို၍ချုပ်တည်းမှုရှိဖို့လိုပေမည်။ သို့ရာတွင် အိမ်ထောင်သည်ခရစ်ယာန်နှစ်ဦးစလုံးသည် ပေါလု၏မေတ္တာပါ ဤအကြံပြုချက်ကို စိတ်စွဲမှတ်ထားနိုင်၏– “အချင်းချင်းခင်ပွန်းဝတ်ကို မပယ်မရှောင်ကြနှင့်။ ထိုသို့ဆိုသော် ဆုတောင်းခြင်းဝတ်ကို ပြုရသောအခွင့်ရှိစေခြင်းငှာ၊ သဘောတူ၍ ခင်ပွန်းဝတ်ကို ခဏမျှမရှောင်ရဟုမဆိုလို။ ထိုသို့ရှောင်လျှင်၊ ကိုယ်ကိုမချုပ်တည်းနိုင်သောအားဖြင့် စာတန်သည် အပြစ်သို့ သွေးဆောင်ရသော အခွင့်မရှိစေခြင်းငှာ နောက်တစ်ဖန် အတူနေကြလော့။”—၁ ကောရိန္သု ၇:၃၊ ၅။
၁၃။ ချုပ်တည်းမှုရှိနိုင်ရန် ကြိုးစားအားထုတ်နေကြသူများ၏ အကျိုးအတွက် အဘယ်အရာ ပြုလုပ်ပေးနိုင်သနည်း။
၁၃ အိမ်ထောင်သည်ဇနီးမောင်နှံ နှစ်ဦးစလုံး ဤရင်းနှီးမှုအရှိဆုံးဆက်ဆံရေးတွင် ချုပ်တည်းတတ်လာခဲ့လျှင် နှစ်ဦးစလုံးမည်မျှ ကျေးဇူးတင်စရာပါနည်း! တစ်ချိန်တည်းတွင် ဤကဏ္ဍ၌ ချုပ်တည်းမှုရှိနိုင်ရန် ကြိုးစားနေဆဲရှိသော ဝတ်ပြုသူချင်းများကို နားလည်ပေးသင့်သည်။ ကျွန်ုပ်တို့၏ဝိညာဉ်ရေးညီအစ်ကိုများသည် ချုပ်တည်းခြင်းရှိနိုင်ဖို့နှင့် မလျောက်ပတ်သောဆန္ဒများကို အနိုင်ယူနိုင်ဖို့ သူတို့ကို ထိုးထွင်းဉာဏ်၊ ရဲစွမ်းသတ္တိနှင့် စိတ်ဓာတ်ကြံ့ခိုင်မှု ပေးသနားပါရန် ယေဟောဝါထံ ဆုတောင်းပေးဖို့ ဘယ်သောအခါမျှ မမေ့သင့်ချေ။—ဖိလိပ္ပိ ၄:၆၊ ၇။
တစ်ဦးကိုတစ်ဦး ဆက်၍ရိုင်းပင်းကူညီခြင်း
၁၄။ ကျွန်ုပ်တို့သည် ခရစ်ယာန်ချင်းများကို စာနာစွာ၊ နားလည်မှုရှိစွာ အဘယ်ကြောင့် ဆက်ဆံသင့်သနည်း။
၁၄ တစ်ခါတစ်ရံ ကျွန်ုပ်တို့အတွက် အခက်အခဲမရှိသော ကဏ္ဍတစ်ခုတွင် ချုပ်တည်းမှုရှိနိုင်ရန် ကြိုးစားနေကြသော ခရစ်ယာန်ချင်းများအပေါ် နားလည်မှုမပြနိုင်ဘဲဖြစ်ပေမည်။ သို့ရာတွင် လူ့ပင်ကိုစရိုက်ချင်းမတူကြချေ။ အချို့သည် စိတ်လှုပ်ရှားမှုမြန်ဆန်ပြီး အခြားသူများမှာမူ ထိုသို့မဟုတ်ပေ။ တချို့သည် မိမိကိုယ်ကိုချုပ်တည်းရ လွယ်ကူပြီး ၎င်းအတွက် ပြဿနာမဟုတ်ချေ။ အခြားသူများအတွက်မူ ချုပ်တည်းရန် ပိုမိုခက်ခဲပေမည်။ သို့တိုင် ချုပ်တည်းမှုရှိရန် ကြိုးစားနေသူသည် လူဆိုးမဟုတ်ကြောင်း သတိရပါ။ ခရစ်ယာန်ချင်းတို့ကို ကျွန်ုပ်တို့ နားလည်ရမည်၊ စာနာရမည်။ ချုပ်တည်းမှုရှိနိုင်ရန် ကြိုးစားနေသူများအပေါ် သနားကြင်နာမှုဆက်ပြခြင်းဖြင့် ကျွန်ုပ်တို့ကိုယ်တိုင်ပျော်ရွှင်လာသည်။ ယင်းသည် မှန်ကန်ကြောင်း မဿဲ ၅:၇ တွင်မှတ်တမ်းတင်ထားသော ယေရှု၏စကားက ဖော်ပြသည်။
၁၅။ ချုပ်တည်းခြင်းနှင့်ပတ်သက်၍ ဆာလံ ၁၃၀:၃ ပါစကားများသည် အဘယ်ကြောင့် စိတ်သက်သာမှုရရှိစေသနည်း။
၁၅ ခရစ်ယာန်ဥပဓိရုပ်မပြမိသည့်အခါများကြောင့် ခရစ်ယာန်ချင်းတစ်ဦးအား ဘယ်သောအခါမျှ အထင်အမြင်လွဲလိုမည်မဟုတ်ချေ။ ကျွန်ုပ်တို့ချုပ်တည်းမှုမပြနိုင်ခဲ့သည့် တစ်ကြိမ်ကိုသာမက ချုပ်တည်းမှုရှိခဲ့သည့် အကြိမ်ပေါင်းများစွာကို ခရစ်ယာန်ချင်းတို့ သတိမထားမိသော်လည်း ယေဟောဝါသိမြင်တော်မူကြောင်း သိရှိရခြင်းသည် တကယ်ကိုအားရှိစရာဖြစ်သည်။ ဆာလံ ၁၃၀:၃ ပါဤစကားများကို စွဲမှတ်ထားလျှင် စိတ်သက်သာမှုရ၏– ‘အိုဘုရားရှင် ထာဝရဘုရား၊ ကိုယ်တော်သည် . . . အပြစ်များကို မှတ်တော်မူလျှင် အဘယ်သူခံရပ်နိုင်ပါမည်နည်း။’
၁၆၊ ၁၇။ (က) ချုပ်တည်းခြင်းနှင့်ပတ်သက်၍ ဂလာတိ ၆:၂၊ ၅ ကိုမည်သို့လက်တွေ့ကျင့်သုံးနိုင်သနည်း။ (ခ) ချုပ်တည်းခြင်းနှင့်ပတ်သက်၍ နောက်ဆောင်းပါးတွင် အဘယ်အရာကို သုံးသပ်မည်နည်း။
၁၆ ယေဟောဝါ၏စိတ်တော်နှင့်တွေ့ရန် ကျွန်ုပ်တို့တစ်ဦးစီသည် ချုပ်တည်းခြင်းကို ပြုစုပျိုးထောင်ရမည်၊ ထိုသို့ပြုရာတွင် ခရစ်ယာန်ညီအစ်ကိုချင်းတို့ထံမှ အကူအညီရမည်ကို စိတ်ချနိုင်သည်။ ကျွန်ုပ်တို့တစ်ဦးစီသည် မိမိတို့ဝန်ကို မိမိတို့ထမ်းရွက်ရမည်မှန်သော်လည်း အားနည်းချက်များကို နိုင်နိုင်နင်းနင်းရှိနိုင်စေရန် အချင်းချင်း ရိုင်းပင်းကူညီပေးရမည်ဟု တိုက်တွန်းထားသည်။ (ဂလာတိ ၆:၂၊ ၅) ကျွန်ုပ်တို့မသွားအပ်သောနေရာများ၊ မကြည့်အပ် သို့မဟုတ် မပြုအပ်သောအရာများကို တားဆီးသည့် မိဘ၊ အိမ်ထောင်ဖက်၊ သို့မဟုတ် မိတ်ဆွေတို့ကို တန်ဖိုးထားလေးမြတ်နိုင်သည်။ ထိုသူသည် ကျွန်ုပ်တို့တွင် ချုပ်တည်းမှုဖြစ်သည့် ငြင်းဆိုနိုင်စွမ်းရှိရန် ကူညီပေးနေသည်။
၁၇ ချုပ်တည်းခြင်းနှင့်ပတ်သက်၍ ယခုဆွေးနွေးသုံးသပ်ခဲ့သမျှကို ခရစ်ယာန်အများ သဘောတူကြပေမည်၊ သို့သော် မိမိတို့ကိုယ်တိုင် တိုးတက်စရာလိုသေးသည်ဟု ယူမှတ်ကြပေမည်။ ဤသူတို့သည် ချုပ်တည်းမှုကို ပိုမိုအပြည့်အဝတင်ပြလိုကြသည်၊ မစုံလင်သူများထံမှ အကျိုးသင့်အကြောင်းသင့် မျှော်လင့်နိုင်သည်ဟု သူတို့ယုံကြည်သည့် အတိုင်းအတာအထိဖြစ်သည်။ အသင် ထိုသို့ခံစားရသလော။ သို့ဆိုလျှင် ဘုရားသခင်၏ဝိညာဉ်အသီးမှ ဤအသီးကိုပြုစုပျိုးထောင်ရန် သင်,အဘယ်အရာပြုလုပ်နိုင်သနည်း။ ထိုသို့ပြုလုပ်ခြင်းဖြင့် ခရစ်ယာန်တစ်ဦးအနေနှင့် သင်၏ရေရှည်ရည်မှန်းချက်များပြည့်မီရန် အဘယ်သို့ ထောက်ကူပေးနိုင်သနည်း။ နောက်ဆောင်းပါးတွင် ကြည့်ကြစို့။
သင်မှတ်မိသလော
ချုပ်တည်းခြင်း . . .
• ကို ခရစ်ယာန်များ ပြုစုပျိုးထောင်ပေးရန် အဘယ်ကြောင့် အရေးကြီးသနည်း။
• သည် အချို့သူများအတွက် အဘယ်ကြောင့်စိန်ခေါ်ချက်ဖြစ်သနည်း။
• သည် အိမ်ထောင်တွင် အဘယ်ကြောင့် ရှိဖို့လိုသနည်း။
• ဟူသည် ပြုစုပျိုးထောင်ရန် တစ်ဦးကိုတစ်ဦး ကူညီပေးနိုင်သည့် အရည်အချင်းတစ်ခု အဘယ်ကြောင့်ဖြစ်သနည်း။
[လေ့လာရန်မေးခွန်းများ]
[စာမျက်နှာ ၁၆ ပါ လေးထောင့်ကွက်/ ရုပ်ပုံ]
သူသည် ငြင်းဆိုတတ်ခဲ့
ဂျာမနီနိုင်ငံရှိ ယေဟောဝါသက်သေတစ်ဦးသည် စက်မှုဆက်သွယ်ရေးလမ်းကြောင်း လုပ်သားတစ်ဦးဖြစ်၏။ သူ၏လုပ်ငန်းတွင် ရုပ်မြင်သံကြားနှင့်ရေဒီယို အစီအစဉ်ပေါင်း ၃၀ ကိုစောင့်ကြပ်စစ်ဆေးပေးရသည်။ လှိုင်းထပ်မှုကြောင့် နှောင့်ယှက်သံဝင်လာသည့်အခါ ပြဿနာဖြစ်ပေါ်သောနေရာကို အတိအကျရှာယူရန် အစီအစဉ်ကို အာရုံစိုက်ရသည်။ “အဲ့ဒီအနှောင့်အယှက်တွေက အချိန်အခါမတော်၊ အကြမ်းဖက်ကားတွေ၊ အပြာကားတွေ ပြနေတဲ့အချိန်ကျမှပဲ ဝင်လာတတ်တယ်။ အဲ့ဒီမကောင်းတဲ့ပြကွက်တွေက ကျွန်တော့်စိတ်ထဲမှာ သံမှိုရိုက်ထားသလို ရက်ပေါင်းများစွာ တစ်ခါတလေ ရက်သတ္တပတ်အတော်ကြာကြာ ဖျောက်ဖျက်လို့မရအောင် စွဲနေတယ်” ဟုသူပြောပြသည်။ ယင်းက သူ၏ဝိညာဉ်ရေးကို ထိခိုက်ကြောင်း ဤသို့ဝန်ခံသည်– “ကျွန်တော် ဒေါသထွက်လွယ်တတ်လို့ အဲ့ဒီလိုအကြမ်းဖက်ကားတွေကြောင့် ကျွန်တော့်စိတ်ကို ထိန်းဖို့ခက်စေခဲ့တယ်။ အပြာကားတွေကြောင့် ကျွန်တော်နဲ့ဇနီးစပ်ကြား ဆက်ဆံရေးဟာ တင်းမာလာတယ်။ အဲ့ဒါတွေကို နေ့တိုင်းပဲ တိုက်ထုတ်နေရတာမလွယ်ဘူး။ ဒါကြောင့် လခနည်းချင်နည်းပါစေ၊ နောက်အလုပ်တစ်ခု ရှာမှဖြစ်တော့မယ်လို့ ဆုံးဖြတ်လိုက်ရတယ်။ နောက်အလုပ်တစ်ခုရတာ သိပ်မကြာသေးဘူး။ ကျွန်တော့်ဆန္ဒ ပြည့်သွားပြီ။”
[စာမျက်နှာ ၁၅ ပါ ရုပ်ပုံ]
သမ္မာကျမ်းစာလေ့လာခြင်းမှရရှိသော အသိပညာသည် ချုပ်တည်းခြင်းရှိရန် ကူညီပေး