ပေးကမ်း​ခြင်း​စိတ်ဓာတ် မွေးမြူပါ​လေ

ပေးကမ်း​ခြင်း​စိတ်ဓာတ်​ဖြင့် မွေးလာ​သူ မည်သူမျှ​မရှိပေ။ မွေး​စ​ကလေးငယ်​၏ ပင်ကိုစိတ်​မှာ မိမိ​လိုချင်ရာ​နှင့် လိုအပ်ရာ​များ​ကို အာသာပြေ​စေခြင်း​ဖြစ်သည်၊ မိမိ​အားပြု​စု​စောင့်ရှောက်​နေ​သူများ​၏ အကျိုးကို သတိမမူ​တတ်​ချေ။ သို့သော် အဆိုပါ​ကလေး​သည် မိမိ​တစ်ဦးတည်း​သာ လိုအပ်ချက်​ရှိသူ​မဟုတ်​ကြောင်း တဖြည်းဖြည်း သဘောပေါက်​လာ​သည်။ အခြား​သူများကို ထည့်တွက်​စဉ်းစား​ပေး​ရမည်၊ ခံယူ​ဖို့​ချည်း​မဟုတ်ဘဲ ပေးကမ်း​ဝေမျှ​တတ်​ဖို့​လည်း သူ​သင်ယူ​ရ​ပေမည်။ ပေးကမ်း​ခြင်း​စိတ်ဓာတ်​ကို မွေးမြူ​ပေးဖို့​လို​သည်။

ပေးကမ်း​ကြ​သူ​တိုင်း၊ ရက်ရက်ရောရော ပေးကမ်း​ကြ​သူတို့​ပင်​လျှင် ပေးကမ်း​ခြင်း​စိတ်ဓာတ်​မရှိကြ​ချေ။ တချို့​သည် မိမိတို့​အကျိုး​စီးပွား​တိုးတက်စေ​ရန် အဖွဲ့အစည်း​တစ်ခု​ကို ငွေ​လှူဒါန်း​ကြ​ပေမည်။ အခြားသူ​တို့​က​မူ လူတို့၏​ချီးမွမ်း​ခြင်း​ခံရ​ဖို့ လှူဒါန်း​ကြ​ပေမည်။ သို့ရာတွင် ခရစ်ယာန်စစ်​များ​၏ ပေးကမ်း​ခြင်း​သည် ကွာခြား​၏။ သို့​ဆိုလျှင် သမ္မာကျမ်းစာ​တွင် တိုက်တွန်း​ထား​သည့် ပေးကမ်း​ခြင်း​၏ ဂုဏ်အင်္ဂါ​ရပ်​များ​ကား အဘယ်နည်း။ ပထမ​ရာစု​ခရစ်ယာန်​များ ပေးကမ်း​ခဲ့​ကြ​ခြင်း​အကြောင်းကို ခေတ္တ​သုံးသပ်ကြည့်​ခြင်း​က ထို​မေးခွန်း​ကို ဖြေဆို​ပေး​လိမ့်​မည်။

ခရစ်ယာန်​ပေးကမ်း​ခြင်း ပုံ​နမူနာ​များ

ကျမ်းစာ​တွင်​ဖော်ပြ​ထား​သည့် ခရစ်ယာန်​ပေးကမ်း​ခြင်း​သည် အများအားဖြင့် အမှန်တကယ်​လိုအပ်​နေသူတို့​အား “ဥစ္စာ​ကို​ဝေမျှ” ခြင်း​ဖြစ်သည်။ (ဟေဗြဲ ၁၃:၁၆; ရောမ ၁၅:၂၆) အတင်းအကျပ်​တိုက်တွန်းခြင်း​ကြောင့် ပေးကမ်း​ခြင်း​မဖြစ်​သင့်​ချေ။ တမန်​တော်​ပေါလု​က ဤသို့​ရေးသားခဲ့​၏– “လူတိုင်း ကိုယ်​အလိုအလျောက်​လှူ​ရ၏။ နှမြော​သော​စိတ်​နှင့်​မ​လှူ​ရ၊ မ​လှူ​ဘဲ​မနေ​ရ​ဟု စိတ်ထင်​နှင့်​မ​လှူ​ရ၊ အကြောင်း​မူ​ကား၊ စေတနာ​စိတ်​နှင့်​လှူ​သော​သူကိုသာ ဘုရားသခင်​နှစ်သက်​တော်​မူ​၏။” (၂ ကောရိန္သု ၉:၇) ထို့​အပြင် လူအများ အမြင်​ကောင်း​အောင် ပေးကမ်း​ရန်​လည်း​မဟုတ်​ချေ။ အာနနိ​နှင့် ရှဖိရေ​တို့သည် ဟန်ဆောင်​လှူဒါန်းခဲ့​ကြ​သည့်​အတွက် ဆိုးကျိုး​များ ရိတ်သိမ်း​ခဲ့​ရသည်။—တမန်​တော် ၅:၁-၁၀။

ဂျူး​လူမျိုးများ​စွာ​နှင့် ဘာသာ​ပြောင်း​ဝင်လာ​သူတို့သည် စီ.အီး. ၃၃ ပင်တေကုတ္တေပွဲ​အတွက် ယေရုရှလင်​မြို့တွင် ရပ်​ဝေး​မှ စုဝေး​လာ​ခဲ့​ကြသောအခါ ပေးကမ်း​ဖို့​အကြောင်း ပေါ်လာ​လေ​သည်။ ထို​တွင် ယေရှု၏​နောက်လိုက်​များသည် ‘သန့်ရှင်းသော​ဝိညာဉ်​တော်​နှင့်​ပြည့်​၍ အမျိုးမျိုးသော​ဘာသာ​စကား​အားဖြင့် စတင်​ဟောပြောခဲ့​ကြ​၏။’ သူတို့​အနီးအနား​တွင် လူစုဝေး​လာ​ရာ ယေရှု​ခရစ်​အကြောင်း တက်တက်ကြွကြွ​ဟောပြောသူ ပေတရု​၏​စကား​ကို ကြား​ခဲ့​ရသည်။ တစ်ဖန် ပေတရု​နှင့် ယောဟန်တို့သည် ဝတ်ပြုရာ​အိမ်တော်​တံခါးဝ​၌ ခြေမစွမ်း​သူ​တစ်ဦး​အား မည်သို့​ကုသ​ပေး​လိုက်​သည်ကို လူ​တို့​တွေ့ မြင်ခဲ့​ကြသည်၊ ၎င်းနောက် ယေရှု​အကြောင်း​နှင့် နောင်တ​ယူဖို့​လို​ကြောင်း ပေတရု ထပ်မံ​ပြောဆို​သည်ကို သူတို့​ကြား​ခဲ့​ကြသည်။ လူပေါင်း​ထောင်နှင့်ချီ နောင်တ​ယူ​ခဲ့​ကြ​ကာ ခရစ်တော်​၏​နောက်လိုက်​များ​အဖြစ် နှစ်ခြင်း​ခံ​ခဲ့​ကြ​၏။—တမန်​တော်၊ အခန်းကြီး ၂ နှင့် ၃။ 

ဘာသာ​ပြောင်း​ဝင်လာ​ခါ​စ လူသစ်​များသည် ယေရုရှလင်​မြို့၌ ဆက်​နေ၍ ယေရှု၏​တမန်​တော်​တို့​ထံ​မှ သွန်သင်ချက်​ကို ပို​ကြားနာ​လို​ကြသည်။ သို့သော် အဆိုပါ​ဧည့်သည်​အားလုံး​၏ လိုအပ်ရာ​များ​ကို တမန်​တော်​များ မည်သို့​ဖြည့်ဆည်း​ပေး​နိုင်​မည်​နည်း။ ကျမ်းစာ​မှတ်တမ်းက ဤသို့​ဆို​သည်– “အိမ်၊ မြေကွက်​ကို​ပိုင်​သော​သူ​ရှိသမျှ​တို့သည် ရောင်းပြီး​လျှင် ရသော​အဖိုးကို​ယူဆောင်​ခဲ့​၍ တမန်​တော်​တို့၏​ခြေရင်း​၌​ထား​ကြ​သဖြင့် လူများ​ဆင်းရဲ​သည်​အတိုင်း အသီးသီး​တို့အား ဝေငှ​ပေးကမ်း​ကြ​၏။” (တမန်​တော် ၄:၃၃-၃၅) တည်ထောင်​ခါ​စ ယေရုရှလင်​အသင်းတော်တွင် ပေးကမ်း​ခြင်း​စိတ်ဓာတ် အမှန်ပင် ရှိခဲ့​လေ​သည်။

နောက်ပိုင်း​တွင် အခြားသော​အသင်းတော်​တို့​က​လည်း ထပ်တူ​ပေးကမ်း​ခြင်း​စိတ်ဓာတ်​ကို တင်ပြ​ခဲ့​ကြသည်။ ဥပမာ၊ မက်စီဒိုးနီးယား ခရစ်ယာန်​များ​ကိုယ်တိုင် ဆင်းရဲ​ကြသော်လည်း ယုဒပြည်​ရှိ ဆင်းရဲ​နွမ်းပါး​သော မိမိတို့​ညီအစ်ကို​များ​အတွက် အလှူငွေ​ထည့်ဝင်​ရာ​၌ မိမိတို့​တတ်နိုင်​သမျှ​ထက်မက ပေးကမ်း​ခဲ့​ကြ​၏။ (ရောမ ၁၅:၂၆; ၂ ကောရိန္သု ၈:၁-၇) ဖိလိပ္ပိ​အသင်းတော်သည် ပေါလု​၏​ဓမ္မ​အမှုကို ကူညီ​ထောက်ပံ့​ပေး​ရာ​တွင် ထူးခြား​ထင်ရှား​ပေ​သည်။ (ဖိလိပ္ပိ ၄:၁၅၊ ၁၆) ယေရုရှလင်​အသင်းတော်သည် ဆင်းရဲ​နွမ်းပါး​သော မုဆိုးမများ​ကို အစားအသောက် နေ့စဉ်​ဝေငှ​ပေး​ခဲ့​ကြသည်၊ ထို့​ပြင် တမန်​တော်​များသည် အကူအညီ​ရ​သင့်​သူ မုဆိုးမများ​ကို လျစ်လျူ​မ​ရှု​မိဖို့ အရည်အချင်း​ရှိ​အမျိုးသား​ခု​နစ်​ဦး​ကို ခန့်အပ်​ခဲ့​သည်။—တမန်​တော် ၆:၁-၆။

အစောပိုင်း​ခရစ်ယာန်​အသင်းတော်​တို့သည် ဆင်းရဲ​ခက်ခဲ​မည့်​ကာလ​ကို ကြိုမြင်​ပြီး အလျင်အမြန် တုံ့ပြန်​ကူညီ​ခဲ့​ကြသည်။ ဥပမာ၊ ပရောဖက်​အာဂဗု​က အစာ​ခေါင်းပါး​မှု အကြီးအကျယ်​ဖြစ်​တော့​မည့်​အကြောင်း ပရောဖက်ပြု​သောအခါ ရှုရိ​ပြည် အန္တိအုတ်မြို့​အသင်းတော်​ရှိ တပည့်​နောက်လိုက်​များသည် “အသီးအသီး​တတ်နိုင်​ကြသည်​အတိုင်း ယုဒပြည်​၌​နေသော​ညီအစ်ကို​တို့အား အကူ​အမ​ပေး​လိုက်​မည်” ဟု ဆုံးဖြတ်​ခဲ့​ကြသည်။ (တမန်​တော် ၁၁:၂၈၊ ၂၉) အခြား​သူတို့၏ လိုအပ်ရာ​များ​ကို ဖြည့်ဆည်း​ပေး​ရန် ကြိုတင်​စီစဉ်​ခဲ့​ခြင်း​သည် အလွန်​ချီးမွမ်းဖွယ်​ကောင်း​သည့် စိတ်ဓာတ်​ပါ​တကား!

အစောပိုင်း​ခရစ်ယာန်​များ​ကို အလွန်​ရက်ရော​စွာ မေတ္တာ​တင်ပြ​စေသည့်​အရာ​ကား အဘယ်အရာ​နည်း။ အမှန်​ဆို​ရ​လျှင် ပေးကမ်း​ခြင်း​စိတ်ဓာတ် မည်သို့​ရှိ​နိုင်​မည်​နည်း။ ဘုရင်​ဒါဝိဒ်​၏​ပုံ​နမူနာကို အတိုချုပ်​သုံးသပ်ကြည့်​ခြင်း​မှ ကျွန်ုပ်​တို့ များစွာ​သင်ယူ​နိုင်​ပါ​သည်။

စစ်မှန်သော​ဝတ်ပြုရေးကို ဒါဝိဒ် ရက်ရက်ရောရော​ထောက်မ

ယေဟောဝါ​တည်ရှိခြင်း​ကို ကိုယ်စား​ပြု​သည့် မြင့်မြတ်​သော ပဋိညာဉ်​သေတ္တာတော် ထား​စ​ရာ​နေရာ အတည်တကျ​မရှိ​သည်​မှာ နှစ်ပေါင်း ၅၀၀ နီးပါး​တိုင်​ခဲ့​ပေ​ပြီ။ ၎င်း​သေတ္တာတော်​ကို တဲ​တော်​အတွင်း ချထား​ကြသည်၊ တောကန္တာရ​အတွင်း ဣသရေလ​လူမျိုး လှည့်လည်​သွားလာ​စဉ်​နှင့် ၎င်းနောက် ကတိထားရာ​ပြည်တော်​ထဲ​ဝင်​စဉ်​အတွင်း ၎င်း​သေတ္တာတော်​ကို တစ်​နေရာ​မှ​တစ်​နေရာ ပြောင်းရွှေ့​ယူဆောင်​ခဲ့​ကြ​၏။ ဘုရင်​ဒါဝိဒ်​သည် သေတ္တာတော်​ကို တဲ​တော်​ထဲ​မှ​ယူ၍ အဆိုပါ​မြင့်မြတ်​သော​သေတ္တာတော်​ထား​မည့် သင့်လျော်​သော​အိမ်တော်ကို ယေဟောဝါ​အတွက် တည်ဆောက်​ပေး​လို​သည့်​ဆန္ဒ ပြင်းပြ​ခဲ့​သည်။ သို့​နှင့် ပရောဖက်​နာသန်​အား ဒါဝိဒ်​ဤသို့​မိန့်ဆို​လေ​တော့​သည်– “ကြည့်ရှု​လော့။ ငါသည် အာရဇ်သစ်သားအိမ်​နှင့်​နေ​၏။ ထာဝရ​ဘုရား [သခင်] ၏ ပဋိညာဉ်​သေတ္တာတော်​မူ​ကား ကုလားကာ​ဖြင့်​သာ ကွယ်ကာ​လျက်​နေရ​သည်။”—၁ ရာဇဝင်ချုပ် ၁၇:၁။

သို့သော် ဒါဝိဒ်​သည် စစ်သည်​တစ်ဦး​ဖြစ်​ခဲ့​၏။ ထို့​ကြောင့် ယေဟောဝါ​က သူ၏​သား​ရှောလမုန်​သည် ငြိမ်သက်​အေးချမ်း​စွာ​အုပ်စိုး​နေစဉ်​ကာလ​အတွင်း ပဋိညာဉ်သေတ္တာ​အတွက် အိမ်တော်​တည်ဆောက်​ရမည့်​သူ​ဖြစ်​ကြောင်း မိန့်တော်မူ​ခဲ့​၏။ (၁ ရာဇဝင်ချုပ် ၂၂:၇-၁၀) သို့ရာတွင် ယင်းက ဒါဝိဒ်​၏​ပေးကမ်း​ခြင်း​စိတ်ဓာတ်​ကို မ​ဟန့်တား​ခဲ့​ချေ။ အထူး​အဖွဲ့​တစ်ဖွဲ့​ကို စီမံ​ဖွဲ့စည်း​ပြီး ဝတ်ပြုရာ​အိမ်တော်​တည်ဆောက်ရေး​တွင် အသုံးပြု​မည့် အသုံးအဆောင်​ပစ္စည်း​များ​ကို စုဆောင်း​ပေး​ရန် သူ​စီစဉ်​လေ​သည်။ နောက်ပိုင်း​တွင် ရှောလမုန်​အား သူ​ဤသို့​ပြော​၏– “ငါသည် . . . ထာဝရ​ဘုရား [သခင်] ၏​အိမ်တော်အဖို့ ရွှေ​အခွက်​တစ်ထောင်​နှင့် ငွေ​အခွက်​တစ်​သောင်း​ကိုလည်း​ကောင်း၊ အချိန်​မ​မှတ်​နိုင်အောင် များစွာသော​ကြေးဝါ​နှင့် သံ​ကိုလည်း​ကောင်း၊ သစ်သား​များနှင့် ကျောက်​များ​ကိုလည်း​ကောင်း ပြင်ဆင်​ပြီ။” (၁ ရာဇဝင်ချုပ် ၂၂:၁၄) ယင်း​နှင့်​အားမရ​သေး၊ မိမိ၏​ကိုယ်ပိုင်​စည်းစိမ်​မှ ကာလ​တန်ဖိုး ၁,၂၀၀,၀၀၀,၀၀၀ ဒေါ်လာ​ကျော်​ရှိ ရွှေငွေ​တို့ကို ဒါဝိဒ်​လှူဒါန်း​လိုက်​သေး​သည်။ ထို့​အပြင် မင်းသား​မှူးမတ်များ​လည်း ရက်ရက်ရောရော ပေးလှူ​ခဲ့​ကြ​၏။ (၁ ရာဇဝင်ချုပ် ၂၉:၃-၉) ဒါဝိဒ်​သည် ရက်ရော​သော ပေးကမ်း​ခြင်း​စိတ်ဓာတ်​ရှိကြောင်း ဖော်ပြ​ခဲ့​သည်​တကား!

ဤမျှ​ရက်ရော​စွာ​ပေးကမ်း​ရန် ဒါဝိဒ်​ကို အဘယ်အရာက လှုံ့ဆော်ပေး​ခဲ့​သနည်း။ သူ​ရရှိ​စုဆောင်း​ခဲ့​သမျှ၊ အောင်မြင်​ခဲ့​သမျှ​သည် ယေဟောဝါ​ကောင်းချီး​ကြောင့်​ဖြစ်​ကြောင်း သူသိ​ရှိသည်။ ယင်းကို သူ​ဤသို့​ဆုတောင်း၍ အသိအမှတ်ပြု​ခဲ့​၏– “အကျွန်ုပ်​တို့၏​ဘုရားသခင် . . . ကိုယ်တော်​၏​နာမ​အဖို့ ကိုယ်တော်​၏​အိမ်ကို တည်ဆောက်​ခြင်း​အလို​ငှာ အကျွန်ုပ်​တို့​ပြင်ဆင်​သော ဤ​ဘဏ္ဍာ​ရှိသမျှသည် တန်ခိုးတော်​ကြောင့်​ဖြစ်ပါ​၏။ အလုံးစုံ​တို့ကို ကိုယ်တော်​ပိုင်တော်မူ​၏။ အကျွန်ုပ်​တို့၏​ဘုရားသခင် ကိုယ်တော်​သည် စိတ်နှလုံး​ကို​စစ်၍ ဖြောင့်မတ်ခြင်း​သဘောကို နှစ်သက်​တော်​မူ​သည်ကို အကျွန်ုပ်​သိပါ​၏။ အကျွန်ုပ်​မူ​ကား ဖြောင့်မတ်ခြင်း​သဘော၊ ကြည်ညို​သော​စိတ်​ရှိသည်​နှင့် ဤ​ဘဏ္ဍာ​ရှိသမျှကို ပူဇော်​ပါ​၏။ စည်းဝေး​လျက်​ရှိသော ကိုယ်တော်​၏​လူတို့သည် ကြည်ညို​သော​စိတ်​နှင့် ပူဇော်​ကြသည်​ကို​မြင်​၍ ဝမ်းမြောက်​ပါ​၏။” (၁ ရာဇဝင်ချုပ် ၂၉:၁၆၊ ၁၇) ဒါဝိဒ်​သည် ယေဟောဝါ​နှင့်​မိမိ​ဆက်ဆံ​ရေး​ရှိ​ခြင်း​ကို အမြတ်တနိုး​တန်ဖိုး​ထားခဲ့​သည်။ ဘုရားသခင့်​အမှုတော်ကို “စုံလင်သော​နှလုံး၊ ကြည်ညို​သော​စိတ်သဘော​နှင့်” ထမ်းဆောင်​ဖို့​လို​ကြောင်း သူ​အသိအမှတ်ပြု​ခဲ့​ပြီး ထိုသို့​လုပ်ဆောင်​ရ​၍ ရွှင်လန်းမှု​ရရှိခဲ့သည်။ (၁ ရာဇဝင်ချုပ် ၂၈:၉) ဤ​ထပ်တူ​အရည်အချင်းများ​ရှိ၍​လည်း အစောပိုင်း​ခရစ်ယာန်​များသည် ပေးကမ်း​ခြင်း​စိတ်ဓာတ် တင်ပြ​ခဲ့​ကြ​ခြင်း​ဖြစ်သည်။

ယေဟောဝါ—အကြီးမြတ်ဆုံး​ပေးကမ်း​ရှင်

ယေဟောဝါ​သည် ပေးကမ်း​ခြင်း​နှင့်​ပတ်သက်​၍ အကောင်းဆုံး​စံနမူနာရှင်​ဖြစ်​တော်​မူ​၏။ ကိုယ်တော်​သည် အလွန်​ချစ်ခင်​ကြင်နာ​တတ်သော​ကြောင့် “ကောင်းသော​သူ၊ မကောင်းသော​သူတို့​အပေါ်​၌ ကိုယ်တော်​၏​နေကို ထွက်​စေတော်မူ​၏။ ဖြောင့်မတ်​သော​သူ၊ မဖြောင့်မတ်​သော​သူတို့​အပေါ်​၌ မိုး​ကို​ရွာ​စေတော်မူ​၏။” (မဿဲ ၅:၄၅) လူသား​အားလုံး​ကို ကိုယ်တော် “ဇီဝ​အသက်​နှင့်​တကွ ထွက်သက်​ဝင်​သက်​မှ​စ၍ ခပ်သိမ်း​သော​အရာ​တို့ကို” ပေး​တော်​မူ​၏။ (တမန်​တော် ၁၇:၂၅) တပည့်​ဖြစ်သူ ယာကုပ်​ထောက်ပြ​သည့်​အတိုင်း​ပင် “ကောင်းမြတ်​စုံလင်သော​ဆုကျေးဇူး​ရှိသမျှ​တို့သည် အလင်း​တို့​အဘ​ထံ​တော်​က သက်ရောက်​သည်​ဖြစ်၍ အထက်​အရပ်မှ​လာ​ကြ​၏။”—ယာကုပ် ၁:၁၇။

ယေဟောဝါ​ပေး​ခဲ့​သမျှ​တွင် အကြီးမြတ်ဆုံး​ဆုကျေးဇူး​မှာ ‘ယုံကြည်​သော​သူအပေါင်း ပျက်စီးခြင်း​သို့​မ​ရောက်၊ ထာဝရ​အသက်ကို​ရစေဖို့ မိမိ၏​တစ်ပါး​တည်း​သော​သားတော်’ ကို စေလွှတ်​လိုက်ခြင်း​ဖြစ်​ပေ​သည်။ (ယောဟန် ၃:၁၆၊ က​ဘ) ထိုသို့​သော​ဆုကျေးဇူး​ကို ထိုက်တန်​သူ မည်သူမျှ​မရှိ​ချေ၊ အကြောင်း​မှာ “လူအပေါင်း​တို့သည် [အပြစ်] ကို​ပြု​၍ ဘုရားသခင့်​ရှေ့တော်၌ အသရေပျက်​ကြပြီ။” (ရောမ ၃:၂၃၊ ၂၄; ၁ ယောဟန် ၄:၉၊ ၁၀) ခရစ်တော်​၏​ရွေးနုတ်ဖိုး​သည် ဘုရားသခင်​၏ ‘ပြော​၍​မကုန်နိုင်​သော ဆုကျေးဇူး​တော်၊’ “ထူးမြတ်​သော ဘုရားသခင့်​ဆုကျေးဇူး​တော်” ၏​အခြေခံ​ဖြစ်​ပြီး ၎င်း​အတွက် ဆက်သွယ်ရေး​လမ်းကြောင်း​ဖြစ်သည်။ (၂ ကောရိန္သု ၉:၁၄၊ ၁၅) ပေါလု​သည် ဘုရားသခင့် ဆုကျေးဇူး​ကို ကျေးဇူး​တင်​လေးမြတ်​သည့်​အနေ​နှင့် “ဘုရားသခင်​၏​ကျေးဇူးတော်​နှင့်ယှဉ်သော [သတင်းကောင်း] ကို သက်သေခံ” ခြင်း​ကို သူ့​ဘဝ​လုပ်ငန်း ဖြစ်စေ​ခဲ့​သည်။ (တမန်​တော် ၂၀:၂၄) ‘လူအပေါင်း​တို့သည် ကယ်တင်ခြင်း​သို့​ရောက်​၍ အမှန်တရားကို​သိစေ’ ရန် ဘုရားသခင်​အလိုတော်​ရှိကြောင်း သူ​အသိအမှတ်ပြု​ခဲ့​သည်။—၁ တိမောသေ ၂:၄။

ယနေ့ ယင်းကို အကြီးအကျယ် ဟောပြော​သွန်သင်ခြင်း​လုပ်ငန်း​အားဖြင့် ပြီးမြောက်​အောင်မြင်​နေရာ ယခု​အခါ ကမ္ဘာ​တစ်ဝန်း နိုင်ငံ​ပေါင်း ၂၃၄ နိုင်ငံ​အထိ တိုးချဲ့​ရောက်ရှိ​နေပြီ။ ယေရှု​က ‘လူမျိုးအပေါင်း​တို့အား သက်သေ​ဖြစ်​မည်​အကြောင်း ဘုရားသခင့်​နိုင်ငံတော်​နှင့်ယှဉ်သော ဧဝံဂေလိတရား​ကို လောက​နိုင်ငံ​အရပ်ရပ်ရှိ​သမျှ​တို့​၌ ဟော​ရ​လိမ့်​မည်။ သို့​ပြီး​မှ အဆုံး​သည်​ဖြစ်လတ္တံ့’ ဟု​မိန့်ဆို​စဉ် ဤ​တိုးတက်မှု​အကြောင်း ကြိုပြော​ခဲ့​သည်။ (မဿဲ ၂၄:၁၄) မှန်ပါသည်၊ “ဧဝံဂေလိတရား​ကို ရှေးဦး​စွာ လူမျိုးအပေါင်း​တို့အား ဟော​ရ​လိမ့်​မည်။” (မာကု ၁၃:၁၀) လွန်ခဲ့သော​နှစ်​က ခြောက်​သန်း​ကျော်​သော သတင်းကောင်း​ကြွေးကြော်​သူများ​သည် ဤ​လုပ်ငန်း​တွင် နာရီ​ပေါင်း ၁,၂၀၂,၃၈၁,၃၀၂ သွင်း​ခဲ့​ကြ​ပြီး ကျမ်းစာ​သင်အံမှု​ပေါင်း ၅,၃၀၀,၀၀၀ ကျော် ကျင်းပ​ခဲ့​ကြသည်။ သေရေးရှင်ရေး​ကိစ္စ​ဖြစ်နေ​သဖြင့် ဤ​သွန်သင်​ပြသမှု​သည် အလွန်​အရေးပါ​သည်။—ရောမ ၁၀:၁၃-၁၅; ၁ ကောရိန္သု ၁:၂၁။

ကျမ်းစာ​အမှန်တရား ဆာမွတ်​နေသူတို့​ကို ကူညီပေး​ရန် သမ္မာကျမ်းစာ​အုပ်​များ၊ စာအုပ်​များနှင့် ဘရိုရှာ​များ​အပါအဝင် သန်းနှင့်ချီ​သော စာပေ​စာတမ်း​များ​ကို နှစ်စဉ် ပုံနှိပ်​ထုတ်ဝေ​၏။ ထို့​အပြင် ကင်းမျှော်စင်​နှင့် နိုးလော့!မဂ္ဂဇင်း စောင်ရေ​သန်း​တစ်ထောင်​ကျော်​ကိုလည်း ထုတ်ဝေ​နေသည်။ သတင်းကောင်းကို လူ​တို့​တုံ့ပြန်​နေကြ​သောကြောင့် ကျမ်းစာ​သွန်သင်ပေး​ရာ​နေရာများ​အဖြစ် ယေဟောဝါသက်သေ​များ​၏ ဘုရားသခင့်​နိုင်ငံတော်​ခန်းမ​များနှင့် စည်းဝေးပွဲ​ခန်းမ​များ တစ်နေ့​တခြား​တိုး၍ ဆောက်လုပ်​နေကြ​သည်။ တိုက်နယ်​စည်းဝေးပွဲ​များနှင့် အထူး​စည်းဝေးပွဲ​နေ့​များ​အပြင် ခရိုင်​စည်းဝေးကြီး​များ​ကို​ပါ နှစ်စဉ် စီစဉ်​ကျင်းပ​လျက်​ရှိသည်။ ခရစ်ယာန်​သာသနာပြု​များ၊ နယ်လှည့်​ကြီးကြပ်မှူး​များ၊ အကြီးအကဲ​များနှင့် ဓမ္မ​အမှုထမ်းများ​ကို အဆက်မပြတ် လေ့ကျင့်ပေး​နေရ​၏။ အဆိုပါ​အစီအစဉ်​အားလုံး​ကို “သစ္စာ​နှင့်​သတိပညာ​ရှိသော​ကျွန်” မှ​တစ်ဆင့် စီမံ​ပေး​တော်​မူ​သည့်​အတွက် ယေဟောဝါ​အား ကျွန်ုပ်​တို့​ကျေးဇူး​တင်​ကြ​ပါ​သည်။ (မဿဲ ၂၄:၄၅-၄၇၊ သ​မ) ကိုယ်တော်​အား ကျွန်ုပ်​တို့​ကျေးဇူး​တင်​ကြောင်း အမှန်တကယ်​ပင်​ဖော်ပြ​လို​ကြ​ပါ​သည်!

ယေဟောဝါ​အား ကျေးဇူး​တင်​ကြောင်း​ဖော်ပြခြင်း

ဝတ်ပြုရာ​အိမ်တော်​တည်ဆောက်​ခြင်း​နှင့် အစောပိုင်း​ခရစ်ယာန်​များ​၏ လိုအပ်ရာ​များ​ကို ဖြည့်ဆည်း​ပေးခြင်း​မှာ​ကဲ့သို့ ဤ​ကိစ္စရပ်​အားလုံး​အတွက် ငွေကြေး​ထောက်ပံ့မှု​သည် စေတနာအလျောက်​ထည့်ဝင်​သော အလှူငွေများ​ဖြင့်​ဖြစ်သည်။ သို့ရာတွင် ကျွန်ုပ်​တို့​သတိရ​ကြ​ရမည်​ကား အရာခပ်သိမ်း​ကို​ပိုင်ဆိုင်​တော်​မူ​သော​အရှင် ယေဟောဝါ​အား မည်သူ​တစ်ဦး​တစ်ယောက်​က​မျှ ကြွယ်ဝ​စေနိုင်​မည်​မဟုတ်။ (၁ ရာဇဝင်ချုပ် ၂၉:၁၄; ဟဂ္ဂဲ ၂:၈) ထို့​ကြောင့် အလှူငွေ​ထည့်ဝင်​ခြင်း​သည် ယေဟောဝါ​အား​ကျွန်ုပ်​တို့​ချစ်ခြင်း​နှင့် စစ်မှန်သော​ဝတ်ပြုရေး​တိုးတက်စေ​လို​သည့် ဆန္ဒ​ပြင်းပြ​ခြင်း​၏ အထောက်အထား​ဖြစ်သည်။ အဆိုပါ​ရက်ရော​သည့်​အမူအရာ​များသည် “ဘုရားသခင်​၏​ကျေးဇူးတော်​ကို ချီးမွမ်းစရာ​အကြောင်း” ဖြစ်စေ​သည်​ဟု ပေါလု​ပြော​ခဲ့​၏။ (၂ ကောရိန္သု ၉:၈-၁၃) ဤသို့​ပေးကမ်း​ခြင်း​ကို ယေဟောဝါ အားပေး​တော်​မူ​၏၊ အကြောင်း​မှာ ကိုယ်တော်​နှင့်​ပတ်သက်​၍ ကျွန်ုပ်​တို့​တွင် တော်မှန်​သည့်​စိတ်ဓာတ်​နှင့် စိတ်နှလုံး​ကောင်း​ရှိကြောင်း ဖော်ပြ​သည်။ ရက်ရော​ပြီး ယေဟောဝါ​ကို​အားကိုး​သူတို့သည် ကိုယ်တော်​၏​ကောင်းချီး ခံစားရ​မည်​ဖြစ်​ပြီး ဝိညာဉ်​ရေး​အရ ကြွယ်ဝ​ချမ်းသာ​လိမ့်​မည်။ (တရားဟောရာ ၁၁:၁၃-၁၅; သု. ၃:၉၊ ၁၀; ၁၁:၂၅) ယေရှု​က “ခံယူ​ခြင်း​အရာ​ထက် ပေးကမ်း​ခြင်း​အရာ​သည် သာ၍ [ပျော်ရွှင်စရာ​ဖြစ်] သည်” ဟု​မိန့်ဆို​လျက် ကျွန်ုပ်​တို့​ပျော်ရွှင်​ရ​လိမ့်​မည်​ဟု စိတ်ချ​စေ​သည်။—တမန်​တော် ၂၀:၃၅၊ သမ္မာ။

ပေးကမ်း​ခြင်း​စိတ်ဓာတ်​ရှိသော ခရစ်ယာန်​များသည် လိုအပ်​လာ​မည့်​အချိန်​ထိ စောင့်ကြည့်​နေ​မည်​မဟုတ်ပါ။ သို့​ပြု​မည့်​အစား သူတို့သည် ‘ခပ်သိမ်း​သော​သူတို့အား ကောင်းမှု​ပြု​ကြ​ရန်၊ အထူးသဖြင့် [မိမိတို့] နှင့် ယုံကြည်ခြင်း​တူ​သူတို့ကို ကောင်းမှု​ပြု​ကြ​ရန်’ အခွင့်အရေးရှာ​ယူ​ကြသည်။ (ဂလာတိ ၆:၁၀) ဘုရားသခင်​ရေးရာ​ရက်ရောမှု​ကို ပေါလု​အားပေး​သည့်​အနေ​နှင့် ဤသို့​ရေးသားခဲ့​သည်– “ကျေးဇူးပြု​ခြင်း၊ ဥစ္စာ​ဝေမျှခြင်း​အမှုတို့​ကို မမေ့​မ​လျော့​ကြ​နှင့်။ ထိုသို့​သော​ယဇ်ကို ဘုရားသခင်​သည် အားရ​နှစ်သက်​တော်​မူ​၏။” (ဟေဗြဲ ၁၃:၁၆) ကျွန်ုပ်​တို့၏ ပိုင်ဆိုင်ရာ​များ​ဖြစ်သော အချိန်၊ ခွန်အား၊ ငွေကြေး​တို့ကို အသုံးပြုပြီး အခြား​သူတို့ကို ကူညီ​ပေးခြင်း၊ စင်ကြယ်သော​ဝတ်ပြုရေးကို တိုးမြှင့်​ပေးခြင်း​ကို ယေဟောဝါ​ဘုရားသခင် အလွန်​အားရ​နှစ်သက်​တော်​မူ​၏။ ကိုယ်တော်​သည် ပေးကမ်း​ခြင်း​စိတ်ဓာတ်​ကို အမှန်တကယ်​ပင် မြတ်နိုး​တော်​မူ​၏။

 [စာမျက်နှာ ၂၈၊ ၂၉ ပါ လေးထောင့်ကွက်/ ရုပ်ပုံ]

အချို့​သူများ​လှူဒါန်း​ရန် ရွေးချယ်​ကြ​ပုံ နည်းလမ်းများ

ကမ္ဘာချီ​လုပ်ငန်း​အတွက် ပါဝင်​လှူဒါန်းခြင်း

များစွာသော​သူတို့သည် “ကမ္ဘာချီ​​လုပ်ငန်း​အတွက်​အလှူငွေ​—မဿဲ ၂၄:၁၄” ဟု​ရေးထား​သော အလှူငွေ​သေတ္တာ​တွင် ထည့်ဝင်​ရန် မိမိတို့၏​ငွေကြေး​များ​ကို သီးသန့်​ဖယ်​ထား​ကြသည်။

အသင်းတော်များ​သည် ယင်း​အလှူငွေများ​ကို မိမိတို့၏​သက်ဆိုင်ရာ​နိုင်ငံ​ရှိ ​ယေဟောဝါသက်သေ​များ​၏​ရုံး​သို့ လစဉ်​ပေး​ပို့​ကြသည်။ စေတနာအလျောက် ထည့်ဝင်​သော ငွေကြေး​အလှူငွေများ​ကို ​Watch Tower Bible and Tract Society of Pennsylvania, c/o Offi​​ce of the Secretary and Treasurer, 25 Columbia Heights, Brooklyn, New York 11201-​2483, သို့​မဟုတ် သင့်​နိုင်ငံ​ကို တာဝန်​ယူ​ပေး​ရသော ဌာနခွဲရုံး​သို့ တိုက်ရိုက်​ပေး​ပို့​နိုင်​သည်။ ချက်​လက်မှတ်​များ​ကို ​“ကင်းမျှော်စင်” သို့​ပေး​သင့်​သည်။ ကျောက်​မျက်​ရတနာ​နှင့် အခြား​တန်ဖိုး​ရှိ​​အရာများ​ကိုလည်း လှူဒါန်း​​နိုင်​သည်။ ဤသို့​ပေး​ပို့​လှူဒါန်း​ရာ​တွင် ​လုံးလုံးလျားလျား​​လှူဒါန်း​ကြောင်း ဖော်ပြ​သည့် စာတို​ကလေး​ပါ ထည့်​ပေး​သင့်​သည်။

ကန့်သတ်ချက်​ဖြင့်​လှူဒါန်းခြင်း အစီအစဉ်

လှူဒါန်း​သူ​တောင်းခံ​လာ​ပါ​က သူ၏​​အလှူငွေကို ပြန်လည်​ပေးအပ်​ဖို့ အထူး​​အစီ​အစဉ်​ဖြင့် ငွေကြေး​လှူဒါန်း​နိုင်​သည်။ ​ထပ်မံ​သိ​လို​ပါ​က အထက်တွင် ဖော်ပြ​ထားသော​​လိပ်စာ​ရှိ The Office of the Secretary and Treasurer ကို စာရေး​မေးမြန်း​နိုင်​သည်။

လှူဒါန်း​ရန်​စီစဉ်​ထားခြင်း

ငွေကြေး လုံးလုံးလျားလျား ပေးအပ်​ခြင်း​နှင့် ကန့်သတ်ချက်​ဖြင့် ငွေ​လှူဒါန်းခြင်း​အပြင် ကမ္ဘာချီ​နိုင်ငံတော်​လုပ်ငန်း​ကို ​အထောက်အကူ​ပြု​ရန် အခြား​ပေးကမ်း​နည်း​များ​ရှိသည်။ ၎င်း​တို့​တွင် အောက်ပါ​နည်း​များ​ပါဝင်​သည်–

အာမခံ– ကင်းမျှော်စင်​အသင်း​အမည်​ဖြင့် ​အသက်​အာမခံကြေး​ခံစားခွင့်​များ၊ အငြိမ်းစား​ခံစားခွင့်​များ​ကို ပြုလုပ်​ပေး​နိုင်​သည်။

ဘဏ်​စာရင်း​များ– ဘဏ်​ရှင်း​တမ်း​များ၊ ငွေစု​စာအုပ်​များ၊ အငြိမ်းစား​ခံစားခွင့်​စာရင်း​များ​ကို ဒေသန္တရ​ဘဏ်​စည်းကမ်း​များ​အရ ကင်းမျှော်စင်​အသင်း​ထံ အပ်နှံ သို့​မဟုတ် ​ကာယ​ကံ​ရှင် သေဆုံး​မှ လွှဲပြောင်းပေး​ရန် ​စီစဉ်​နိုင်​သည်။

အစုရှယ်ယာ​လက်မှတ်​နှင့် ငွေချေး​စာချုပ်​များ– အစုရှယ်ယာ​လက်မှတ်​များနှင့် ငွေချေး​စာချုပ်​များ​ကို ကင်းမျှော်စင်​အသင်း​သို့ လုံးလုံးလျားလျား ပေးအပ်​လှူဒါန်း​နိုင်​သည်။

အိမ်ရာ​အဆောက်အအုံ​များ– ရောင်းချ​နိုင်သော အိမ်ရာ​အဆောက်အအုံ​များ​ကို ​လှူဒါန်းခြင်း​နှင့်​ပတ်သက်​၍ လုံးလုံးလျားလျား​ဖြစ်စေ၊ လှူဒါန်း​သူ အသက်ရှင်​နေ​သရွေ့ နေထိုင်ရန်​အပိုင်း​ကို ချန်လှပ်​၍​ဖြစ်စေ ပေးအပ်​လှူဒါန်း​နိုင်​သည်။ ဤသို့​ပေးလှူ​ရန် စာချုပ်​စာတမ်း​မပြု​မီ သင့်​နိုင်ငံ​မှ ဌာနခွဲရုံး​ကို အကြောင်းကြား​ပါ။

နှစ်စဉ် ထောက်ပံ့ကြေး– နှစ်စဉ်​ထောက်ပံ့ကြေး​သည် ငွေကြေး သို့​မဟုတ် အာမခံ​​ပစ္စည်း​များ​ကို ကင်းမျှော်စင်​အသင်း​သို့ လွှဲပြောင်းပေး​သော အစီအစဉ်​တစ်ခု​ဖြစ်သည်။ ယင်း​အတွက် လှူဒါန်း​သူ သို့​မဟုတ် လှူဒါန်း​သူ​အမည် သတ်မှတ်​ထားသော တစ်ဦး​တစ်ယောက်​သည် နှစ်စဉ်​ထောက်ပံ့ကြေး​ငွေ​အပေါ် သတ်မှတ်​ထား​သည့် ထုတ်ပေး​ငွေ​ကို တစ်သက်လုံး နှစ်စဉ်​ရရှိ​သွား​မည်။ လှူဒါန်း​သူသည် နှစ်စဉ်​ထောက်ပံ့ကြေး ဝင်ငွေ​ခွန်​မှ​လွတ်ငြိမ်းခွင့်​ပြု​ငွေ​ကို ​ရရှိ​သွား​မည်။

သေတမ်းစာ​နှင့် လွှဲအပ်​စာ​များ– ​ပစ္စည်းဥစ္စာ သို့​မဟုတ် ငွေကြေး​များ​ကို ​ကင်းမျှော်စင်​အသင်း​သို့ တရားဝင်​​သေတမ်းစာ​ဖြင့် အမွေ​ပေးလှူ​ဒါန်း​​နိုင်​သည် သို့​မဟုတ် လွှဲအပ်​စာချုပ်​တွင် ကင်းမျှော်စင်​​အသင်း​က အကျိုး​ခံစားခွင့်​ရှိသူ​အဖြစ် ပါဝင်​စေနိုင်​သည်။ ဤသို့​​ခရစ်ယာန်​ဘာသာရေး​အဖွဲ့အစည်း​ကို လွှဲအပ်​ရာ​တွင် အခွန်​နှင့်​ပတ်သက်​သည့် အကျိုး​အမြတ်​တစ်စုံတစ်ရာ​ကို ဖြစ်ထွန်း​စေ​ပေမည်။

“လှူဒါန်း​ရန်​စီစဉ်​ထားခြင်း” ဝေါဟာရ​က အဓိပ္ပာယ်​သက်ရောက်​စေသည့်​အတိုင်း ဤသို့​လှူဒါန်း​သော​နည်း​များ​ကို​ပြု​ရာ​တွင် လှူဒါန်း​သူ​ဘက်​မှ ကြိုတင်​စီစဉ်​ထားမှု​အချို့ ​လိုအပ်​ပေမည်။ လှူဒါန်း​ရန်​စီစဉ်​ထား​သည့် နည်း​တစ်မျိုး​မျိုး​ဖြင့် ယေဟောဝါသက်သေ​များ​၏ ကမ္ဘာချီ​လုပ်ငန်း​ကို အကျိုးပြု​ရန် ဆန္ဒရှိ​သူများ​အတွက် အကူအညီ​ဖြစ်​ဖို့ ကမ္ဘာချီ​ဘုရားသခင့်​နိုင်ငံတော်​လုပ်ငန်း​ကို အကျိုးပြု​ဖို့ လှူဒါန်း​ရန် စီစဉ်​ထားခြင်း ဟု​​ခေါင်းစဉ်​တပ်ထား​သည့် အင်္ဂလိပ်​နှင့် စပိန်​​ဘာသာ​တို့ ဖြင့် ဘရိုရှာ​ကို အသင်းမ​က ​ပြင်ဆင်​ပြီး​ခဲ့ပြီ။ လက်ဆောင်​များ၊ သေတမ်းစာ​များ၊ လွှဲအပ်​စာ​များနှင့်​ပတ်သက်​၍ ရရှိ​သည့် မေးမြန်း​ချက်​များ​ကို ဖြေကြား​ရန် ဤ​ဘရိုရှာ​ကို ရေးသားခဲ့​ခြင်း​ဖြစ်သည်။ ယင်း​တွင် မြေယာ​ဆိုင်ရာ၊ ငွေကြေး​ဆိုင်ရာ၊ ​အခွန်​အ​တုတ်​ဆိုင်ရာ​စီစဉ်​ရေး​နှင့်​ပက်​သက်​၍ အကျိုးပြု​သည့် ထပ်ဆင့်​အကြောင်းအရာများ​လည်း ပါဝင်​သည်။ ထို့​ပြင် လက်ဆောင်​များ​ကို ယခု သို့​မဟုတ် သေတမ်းစာ​ဖြင့် ပေးအပ်​သည့် နည်း​အမျိုးမျိုးကို ဖော်ပြ​ထား​သည်။ ဤ​ဘရိုရှာ​ကို​ဖတ်ရှု​ပြီး ဥပဒေ​အရ ​သို့​မဟုတ် အခွန်​အရ အကြံပေး​သူများ​နှင့်​သော်လည်း​ကောင်း၊ လှူဒါန်းခြင်း​ဆိုင်ရာ ​စီမံ​ဌာန​နှင့်​သော်လည်း​ကောင်း ဆွေးနွေး​ပြီး​နောက် ကမ္ဘာချီ ယေဟောဝါသက်သေ​များ​ကို ကူညီ​ထောက်ပံ့​နိုင်​သူများစွာ​ရှိခဲ့​ပြီး ​တစ်ချိန်တည်း​တွင် အခွန်​ကင်းလွတ်ခွင့် တိုး၍​ရရှိစေ​ခဲ့​ကြ​ပါ​သည်။ လှူဒါန်းခြင်း​ဆိုင်ရာ ​စီမံ​ဌာန​မှ ၎င်း​ဘရိုရှာ​ကို တိုက်ရိုက်​တောင်းယူ​နိုင်​ပေမည်။

ထပ်ဆင့်​သိ​လိုလျှင် အောက်​ဖော်ပြ​ပါ​​လိပ်စာ သို့​မဟုတ် သင့်​နိုင်ငံ​တွင် လုပ်ငန်း​ကို ​စီမံကွပ်ကဲ​သော ယေဟောဝါသက်သေ​များ​၏​ရုံး၊ လှူဒါန်းခြင်း​ဆိုင်ရာ​စီမံ​ဌာန​သို့ စာရေး​၍​ဖြစ်စေ၊ တယ်လီဖုန်း​ဆက်၍​ဖြစ်စေ ​ဆက်သွယ်​နိုင်​ပါ​သည်။

Charitable Planning Offi​​ce

Watch Tower Bible and Tract Society of Pennsylvania

100 Watchtower Drive,

Patterson, New York 12563-​9204

Telephone: (845) 306-​0707

[စာမျက်နှာ ၂၆ ပါ ရုပ်ပုံ]

အစောပိုင်း​ခရစ်ယာန်​များ​ကို အဘယ်အရာက ရက်ရော စေရန် လှုံ့ဆော်ပေး​ခဲ့​သနည်း