ယေဟောဝါ၏နှလုံးကို ရွှင်ပြုံးစေသော အမျိုးသမီးများ
ယေဟောဝါ၏နှလုံးကို ရွှင်ပြုံးစေသော အမျိုးသမီးများ
‘သင်ပြုလုပ်သောအလုပ်အတိုင်း ဘုရားသခင်ဆပ်ပေးတော်မူပါစေသော၊ သင်သည် . . . ဘုရားသခင်ထံတော်မှ စုံလင်သော ဆုကျေးဇူးကို ခံရပါစေသော။’—ရုသ ၂:၁၂၊ သမ္မာ။
၁၊ ၂။ ယေဟောဝါ၏နှလုံးကို ရွှင်ပြုံးစေခဲ့ကြသော သမ္မာကျမ်းစာပါ အမျိုးသမီးများ၏ပုံနမူနာများကို ပြန်သုံးသပ်ခြင်းဖြင့် အဘယ်အကျိုးရရှိနိုင်သနည်း။
အမျိုးသမီးနှစ်ဦးသည် ဘုရားသခင်ကိုကြောက်ရွံ့သောကြောင့် ဖာရောဘုရင်တစ်ပါးကို ဖီဆန်ဝံ့ခဲ့သည်။ ပြည့်တန်ဆာတစ်ဦးသည် ယုံကြည်ခြင်းကြောင့် မိမိအသက်ကိုစွန့်ပြီး ဣသရေလသူလျှိုနှစ်ဦးကို ကာကွယ်ပေးခဲ့သည်။ အမျိုးသမီးတစ်ဦးသည် အထူးအရေးကြုံချိန်၌ စဉ်းစားချင့်ချိန်တတ်ခြင်းနှင့် နှိမ့်ချခြင်းကြောင့် လူများစွာကို အသက်ဘေးမှလွတ်မြောက်စေပြီး ယေဟောဝါ၏ဘိသိက်ခံတစ်ဦး သွေးပြစ်မသင့်ရန် တားဆီးပေးခဲ့သည်။ မုဆိုးမဖြစ်သော မိခင်တစ်ဦးသည် ယေဟောဝါအား ယုံကြည်ခြင်းနှင့်အတူ ဧည့်ဝတ်ကျေပွန်သည့်စိတ်ကြောင့် ဘုရားသခင့်ပရောဖက်ကို မိမိ၏နောက်ဆုံးလက်ကျန်အစားအစာ ကျွေးမွေးခဲ့သည်။ ၎င်းတို့မှာ ယေဟောဝါ၏နှလုံးကို ရွှင်ပြုံးစေခဲ့သော သမ္မာကျမ်းစာပါ အမျိုးသမီးများအနက် အချို့မျှသာဖြစ်၏။
၂ ထိုအမျိုးသမီးများအပေါ် ယေဟောဝါ၏သဘောထားနှင့် ကိုယ်တော်ပေးသနားခဲ့သော ဆုကျေးဇူးများက ကိုယ်တော်သည် ယောက်ျားမိန်းမဖြစ်ခြင်းထက် သာ၍အရေးပါသော ဝိညာဉ်ရေးရာအရည်အသွေးများကို အနှစ်သက်ဆုံးဖြစ်ကြောင်း ဖော်ပြသည်။ ကာယရေးကိုစွဲလမ်းသော မျက်မှောက်ခေတ်လောကတွင် ဝိညာဉ်ရေးကို ဦးစားပေးဖို့ခက်သည်။ သို့သော် ယနေ့ ဘုရားသခင့်လူမျိုးတော်တွင် အများစုဖြစ်သော ဘုရားသခင်အားကြောက်ရွံ့သူ သန်းချီသည့်အမျိုးသမီးများက ဝိညာဉ်ရေးရာကို ဦးစားပေးနိုင်ကြောင်းဖော်ပြသည်။ အဆိုပါခရစ်ယာန်အမျိုးသမီးများသည် သမ္မာကျမ်းစာပါ ဘုရားသခင်ကိုကြောက်ရွံ့သူ အမျိုးသမီးများတင်ပြခဲ့ကြသော ယုံကြည်ခြင်း၊ စဉ်းစားချင့်ချိန်တတ်ခြင်း၊ ဧည့်ဝတ်ကျေပွန်ခြင်းနှင့် အခြားအရည်အသွေးကောင်းများကို အတုယူတင်ပြကြသည်။ ရှေးခေတ်မှ ပုံသက်သေကောင်းသော အဆိုပါအမျိုးသမီးများ၏ အရည်အသွေးများကို ခရစ်ယာန်အမျိုးသားများလည်း အတုယူလိုကြပေမည်။ ထိုအရည်အသွေးများ ပိုမိုရှိစေရန် မည်သို့ပြုလုပ်နိုင်ကြောင်း အစပိုင်းတွင်ဖော်ပြခဲ့သော အမျိုးသမီးများနှင့်ပတ်သက်သည့် ကျမ်းစာမှတ်တမ်းများကို အသေအချာသုံးသပ်ကြည့်ကြပါစို့။—ရောမ ၁၅:၄; ယာကုပ် ၄:၈။
ဖာရောဘုရင်တစ်ပါးကို ဖီဆန်ခဲ့ကြသည့် အမျိုးသမီးများ
၃၊ ၄။ (က) မွေးခါစဣသရေလ သားယောက်ျားမှန်သမျှကို သတ်ပစ်ဖို့ ဖာရောအမိန့်ပေးသည်ကို ရှိဖရနှင့် ပုအာတို့ အဘယ်ကြောင့်မနာခံခဲ့ကြသနည်း။ (ခ) သူတို့၏သတ္တိနှင့် ဘုရားသခင်ရေးရာကြောက်ရွံ့မှုအတွက် အဆိုပါဝမ်းဆွဲမနှစ်ဦးကို ယေဟောဝါမည်သို့ဆုချခဲ့သနည်း။
၃ ဒုတိယကမ္ဘာစစ်ပြီးနောက် ဂျာမနီနိုင်ငံ၊ နျူရင်ဘာဂ်စစ်ခုံရုံးတွင်၊ အစုလိုက်အပြုံလိုက် သတ်ဖြတ်မှုအတွက် ပြစ်ဒဏ်ချခံရသူအများက မိမိတို့သည် အထက်အမိန့်ကိုနာခံရုံမျှသာဖြစ်သည်ဟု အကြောင်းပြပြီး အပြစ်လွှတ်ခံရဖို့ကြိုးစားခဲ့ကြသည်။ ယခု ထိုသူတို့ကို ရှိဖရနှင့် ပုအာအမည်ရှိ ဣသရေလဝမ်းဆွဲမတို့နှင့် နှိုင်းယှဉ်ကြည့်ပါ၊ ထိုအမျိုးသမီးနှစ်ဦးသည် အီဂျစ်ပြည်တွင် အမည်မဖော်သော်လည်း နိုင်လိုမင်းထက်ပြုခဲ့သည့် ဖာရောဘုရင်တစ်ပါးအုပ်စိုးစဉ် အသက်ရှင်ခဲ့ကြသည်။ ဖာရောဘုရင်သည် ဟေဗြဲလူဦးရေ လျင်မြန်စွာတိုးပွားလာမည်ကိုစိုးရိမ်သဖြင့် မွေးခါစဟေဗြဲသားယောက်ျားမှန်သမျှကို သတ်ပစ်ဖို့ ဝမ်းဆွဲနှစ်ဦးအား အမိန့်ပေးခဲ့သည်။ ရက်စက်ကြမ်းကြုတ်သော ထိုအမိန့်ကို ၎င်းအမျိုးသမီးများ မည်သို့တုံ့ပြန်ခဲ့ကြသနည်း။ “ဝမ်းဆွဲမတို့သည် . . . အဲဂုတ္တုရှင်ဘုရင် မိန့်တော်မူသည်အတိုင်းမပြု၊ ယောက်ျားတို့ကို အသက်ချမ်းသာပေးကြ၏။” ဤအမျိုးသမီးများသည် လူကိုမကြောက်ခဲ့ခြင်းမှာ အဘယ်ကြောင့်နည်း။ သူတို့သည် ‘စစ်မှန်သောဘုရားသခင်ကို ကြောက်ရွံ့’ ကြသောကြောင့်ဖြစ်၏။—ထွက်မြောက်ရာ ၁:၁၅၊ ၁၇; ကမ္ဘာဦး ၉:၆။
၄ မှန်ပါသည်၊ ထိုဝမ်းဆွဲမများသည် ယေဟောဝါ၌ခိုလှုံခဲ့ကြသဖြင့် ကိုယ်တော်သည် သူတို့အဖို့ “ဒိုင်းလွှား” ဖြစ်ပြန်ရာ ဖာရော၏အမျက်ဒေါသမှ သူတို့ကိုကာကွယ်ပေးခဲ့သည်။ (၂ ဓမ္မရာဇဝင် ၂၂:၃၁; ထွက်မြောက်ရာ ၁:၁၈-၂၀) သို့သော် ယေဟောဝါသည် သူတို့ကို ထိုမျှလောက်သာ ဆုချခဲ့သည်မဟုတ်ပါ။ ရှိဖရနှင့်ပုအာတို့အား သူတို့၏ကိုယ်ပိုင်မိသားစုများ ရှိစေခြင်းဖြင့် ဆုချခဲ့သည်။ ထို့ပြင် နောင်လာနောက်သားများဖတ်ရှုဖို့ သူတို့၏အမည်နှင့် လုပ်ရပ်များကို ကိုယ်တော်၏သမ္မာကျမ်းစာတွင် မှတ်တမ်းတင်စေခြင်းဖြင့် သူတို့ကို ကိုယ်တော်ဂုဏ်ပြုခဲ့သည်၊ ဖာရောဘုရင်၏အမည်မူကား အချိန်ကုန်လွန်လာသည်နှင့် မေ့လျော့ခံရလေပြီ။—ထွက်မြောက်ရာ ၁:၂၁; ၁ ဓမ္မရာဇဝင် ၂:၃၀ခ; သု. ၁၀:၇။
၅။ ယနေ့ ခရစ်ယာန်အမျိုးသမီးများစွာသည် ရှိဖရနှင့်ပုအာတို့၏ စိတ်သဘောထားမျိုးကို မည်သို့တင်ပြနေကြသနည်း၊ သူတို့ကို ယေဟောဝါမည်သို့ဆုချမည်နည်း။
၅ ယနေ့၊ ရှိဖရနှင့်ပုအာတို့နှင့်တူသည့် အမျိုးသမီးများရှိပါသလော။ အမှန်ရှိပါသည်! နှစ်စဉ် မြောက်မြားလှသော အဆိုပါအမျိုးသမီးများသည် “ရှင်ဘုရင်အမိန့်” တားမြစ်ထားသော နိုင်ငံများတွင် သမ္မာကျမ်းစာ၏အသက်ကယ်သတင်းကို မကြောက်မရွံ့ ဟောပြောကြခြင်းအားဖြင့် သူတို့၏လွတ်လပ်မှုသာမက အသက်ကိုပင် စွန့်စားနေကြသည်။ (ဟေဗြဲ ၁၁:၂၃; တမန်တော် ၅:၂၈၊ ၂၉) ဘုရားသခင်ကိုလည်းကောင်း၊ အိမ်နီးချင်းကိုလည်းကောင်း ချစ်ကြသောကြောင့် ဤသတ္တိရှိအမျိုးသမီးများသည် ဘုရားသခင့်နိုင်ငံတော်သတင်းကောင်း ဟောပြောခြင်းကို တားဆီးပိတ်ပင်ဖို့ မည်သူ့ကိုမျှ ခွင့်မပြုကြချေ။ ယင်းကြောင့် ခရစ်ယာန်အမျိုးသမီးများစွာသည် အတိုက်အခံနှင့် နှိပ်စက်ညှဉ်းပန်းမှု ခံရကြသည်။ (မာကု ၁၂:၃၀၊ ၃၁; ၁၃:၉-၁၃) ရှိဖရနှင့်ပုအာတို့၏အဖြစ်၌ကဲ့သို့ ယေဟောဝါသည် အဆိုပါထူးချွန်သော၊ သတ္တိရှိသောအမျိုးသမီးများ၏ လုပ်ဆောင်ချက်များကို ကောင်းစွာသိရှိတော်မူ၏၊ သူတို့သည် အဆုံးတိုင်အောင် တည်ကြည်ကြမည်ဆိုလျှင် သူတို့၏အမည်များကို “အသက်စာစောင်” တွင် စာရင်းသွင်းခြင်းအားဖြင့် ကိုယ်တော့်မေတ္တာကို ဖော်ပြပါလိမ့်မည်။—ဖိလိပ္ပိ ၄:၃၊ သမ္မာ; မဿဲ ၂၄:၁၃။
ယခင်က ပြည့်တန်ဆာဖြစ်ခဲ့သူတစ်ဦး ယေဟောဝါ၏စိတ်နှလုံးကိုရွှင်ပြုံးစေ
၆၊ ၇။ (က) ယေဟောဝါနှင့် ကိုယ်တော့်လူမျိုးတော်အကြောင်း ရာခပ်အဘယ်အရာသိထားသနည်း၊ ထိုအသိပညာက သူ့ကို အဘယ်အကျိုးပြုခဲ့သနည်း။ (ခ) သမ္မာကျမ်းစာက ရာခပ်ကို မည်သို့ဂုဏ်ပြုသနည်း။
၆ ဘီ.စီ.အီး. ၁၄၇၃ ခုနှစ်တွင် ခါနာန်ပြည်၊ ယေရိခေါမြို့၌ ရာခပ်အမည်ရှိ ပြည့်တန်ဆာတစ်ဦးနေထိုင်ခဲ့သည်။ ရာခပ်သည် ဗဟုသုတကြွယ်သူတစ်ဦး ဖြစ်ပုံရသည်။ ဣသရေလသူလျှိုနှစ်ဦးသည် သူ့အိမ်တွင် လာခိုလှုံသောအခါ သူသည် အစောပိုင်းအနှစ် ၄၀ ကဖြစ်ပျက်ခဲ့သည့် အီဂျစ်ပြည်မှ ဣသရေလလူမျိုး အံ့ဖွယ်နည်းဖြင့်လွတ်မြောက်လာပုံကို အသေးစိတ်ပြန်ပြောပြနိုင်ခဲ့သည်! မကြာသေးမီက အာမောရိရှင်ဘုရင် ရှိဟုန်နှင့်သြဃတို့ကို ဣသရေလလူမျိုး အောင်ပွဲခံခဲ့ကြောင်းကိုလည်း သူသိထားသည်။ ထိုအကြောင်းကို သူသိထားသဖြင့် အဘယ်အကျိုးခံစားခဲ့ရကြောင်း သတိပြုပါ။ သူလျှိုများကို သူဤသို့ပြောခဲ့သည်– “ထာဝရဘုရားသည် သင်တို့အား ဤပြည်ကိုပေးတော်မူကြောင်းကို . . . ကျွန်မသိပါ၏။ . . . အကြောင်းမူကား သင်တို့၏ဘုရားသခင်ထာဝရဘုရားသည် အထက်ကောင်းကင်ဘုံ၌လည်းကောင်း၊ အောက်အရပ်မြေကြီး၌လည်းကောင်း အစိုးရသောဘုရားသခင်ဖြစ်တော်မူ၏။” (ယောရှု ၂:၁၊ ၉-၁၁) ယေဟောဝါအကြောင်းနှင့် ဣသရေလလူမျိုးအတွက် ကိုယ်တော်ပြုလုပ်ပေးရာများအကြောင်း ရာခပ်သိရှိခဲ့ရာများက သူ့နှလုံးကို နှစ်လိုဖွယ်တုံ့ပြန်စေခဲ့ပြီး ကိုယ်တော်အား လက်ခံယုံကြည်စေခဲ့သည်။—ရောမ ၁၀:၁၀-၁၁။
၇ ရာခပ်၏ယုံကြည်ခြင်းက သူ့အား ပြုမူလုပ်ဆောင်စေခဲ့သည်။ သူသည် ဣသရေလသူလျှိုများကို “အဆွေဖွဲ့၍” လက်ခံခဲ့ပြီး ယေရိခေါမြို့ကို ဣသရေလလူမျိုး တိုက်ခိုက်သောအခါ အသက်ချမ်းသာရဖို့ သူတို့၏ညွှန်ကြားချက်များကို လိုက်နာခဲ့သည်။ (ဟေဗြဲ ၁၁:၃၁; ယောရှု ၂:၁၈-၂၁) ရာခပ်၏ယုံကြည်ခြင်းလုပ်ရပ်များသည် ယေဟောဝါ၏နှလုံးကို ရွှင်ပြုံးစေခဲ့ကြောင်း ယုံမှားဖွယ်မရှိချေ၊ အကြောင်းမူကား ခရစ်ယာန်များတုပဖို့ ပုံနမူနာတစ်ခုအဖြစ်၊ ဘုရားသခင့်မိတ်ဆွေ အာဗြဟံ၏အမည်နှင့်တွဲဖက်၍ သူ့အမည်ကိုဖော်ပြရန် ခရစ်ယာန်တပည့်ဖြစ်သူယာကုပ်အား ယေဟောဝါ မှုတ်သွင်းခဲ့သောကြောင့်ဖြစ်သည်။ ယာကုပ် ဤသို့ရေးသားခဲ့သည်– “ထိုနည်းတူ၊ ပြည့်တန်ဆာရာခပ်သည်၊ တမန်တို့ကို [“ဧည့်ဝတ်ကျေပွန်စွာ၊” ကဘ] လက်ခံပြီးမှ အခြားသောလမ်းဖြင့်လွှတ်လိုက်၍၊ အကျင့်အားဖြင့် ဖြောင့်မတ်ရာသို့ရောက်သည်မဟုတ်လော။”—ယာကုပ် ၂:၂၅။
၈။ ယေဟောဝါသည် ရာခပ်၏ယုံကြည်မှုနှင့် နာခံမှုကို မည်သို့ကောင်းချီးပေးခဲ့သနည်း။
၈ ယေဟောဝါသည် ရာခပ်ကို နည်းများစွာဖြင့်ဆုချခဲ့သည်။ တစ်နည်းမှာ၊ သူနှင့် သူ့အိမ်တွင်ခိုလှုံနေသူအားလုံး—အတိအကျပြောရသော် ‘သူနှင့်ဆိုင်သမျှသောသူတို့ကို’ အံ့ဖွယ်နည်းဖြင့် အသက်ချမ်းသာပေးခဲ့သည်။ ၎င်းနောက် ထိုသူတို့ကို “ဣသရေလအမျိုးသားတို့တွင်” နေထိုင်ခွင့်ပေးခဲ့ပြီး ထိုတွင် ဆွေမျိုးသားချင်းကဲ့သို့ သူတို့ကို ဆက်ဆံစေခဲ့သည်။ (ယောရှု ၂:၁၃; ၆:၂၂-၂၅; ဝတ်ပြုရာ ၁၉:၃၃၊ ၃၄) ထိုမျှသာမဟုတ်ပါ။ ယေဟောဝါသည် ရာခပ်ကို ယေရှုခရစ်တော်၏ ဘေးမတစ်ဦးဖြစ်လာခွင့်ပေးခဲ့သည်။ တစ်ချိန်က အရုပ်ကိုးကွယ်ခဲ့သော ခါနာန်အမျိုးသမီးတစ်ဦးအပေါ် ထူးကဲသောချစ်ခင်ကြင်နာမှု တင်ပြခြင်းပါတကား! *—ဆာလံ ၁၃၀:၃၊ ၄။
၉။ ရာခပ်နှင့် ပထမရာစုမှ ခရစ်ယာန်အမျိုးသမီးအချို့အပေါ် ယေဟောဝါ၏သဘောထားသည် မျက်မှောက်ခေတ်အမျိုးသမီးအချို့အတွက် အဘယ်အားပေးမှုဖြစ်နိုင်သနည်း။
၉ ပထမရာစုမှစ၍ ယနေ့အချိန်အထိ ခရစ်ယာန်အမျိုးသမီးအချို့သည် ဘုရားသခင့်စိတ်တော်နှင့်တွေ့ဖို့ ရာခပ်ကဲ့သို့ သူတို့၏အကျင့်ယိုယွင်းသည့် ဘဝပုံစံကို စွန့်လွှတ်ခဲ့ကြပြီ။ (၁ ကောရိန္သု ၆:၉-၁၁) သူတို့မှအချို့သည် အကျင့်ယိုယွင်းမှုများပြားပြီး ယင်းကို သာမန်ကိစ္စဟုပင် ယူမှတ်ကြသည့် ရှေးခေတ်ခါနာန်ပြည်နှင့်တူသော ဝန်းကျင်မျိုးတွင် ကြီးပြင်းလာခဲ့ကြပေမည်။ သို့သော် သူတို့သည် သမ္မာကျမ်းစာ၏ တိကျမှန်ကန်သောအသိပညာကို အခြေပြုသည့် ယုံကြည်ခြင်း၏လှုံ့ဆော်မှုခံရသောကြောင့် သူတို့၏ဘဝပုံစံများကို ပြောင်းလဲခဲ့ကြပြီ။ (ရောမ ၁၀:၁၇) ထို့ကြောင့် အဆိုပါအမျိုးသမီးများနှင့်ပတ်သက်၍လည်း “ဘုရားသခင်သည် သူတို့၏ဘုရား[သခင်]ဟူ၍ခေါ်ဝေါ်ခြင်းကို ရှက်တော်မမူ” ဟု ဆိုနိုင်ပါသည်။ (ဟေဗြဲ ၁၁:၁၆) အမှန်တကယ်ဂုဏ်ယူစရာပါတကား!
စဉ်းစားချင့်ချိန်တတ်ခြင်းအတွက် ကောင်းချီးခံစားရသောအမျိုးသမီး
၁၀၊ ၁၁။ နာဗလနှင့် ဒါဝိဒ်တို့နှင့်ပတ်သက်သော အဘယ်အခြေအနေများက အဘိဂဲလကို လုပ်ဆောင်စေခဲ့သနည်း။
၁၀ ရှေးခေတ်မှ တည်ကြည်သောအမျိုးသမီးများစွာတို့သည် စဉ်းစားချင့်ချိန်တတ်သောအရည်အသွေးကို ထူးခြားစွာတင်ပြခဲ့ကြရာ ယေဟောဝါ၏လူမျိုးတော်အတွက် အဖိုးတန်သူများဖြစ်ခဲ့ကြသည်။ ထိုသို့သောအမျိုးသမီးတစ်ဦးမှာ ဣသရေလသူကြွယ် မြေပိုင်ရှင်နာဗလ၏ဇနီး အဘိဂဲလဖြစ်သည်။ အဘိဂဲလ၏စဉ်းစားချင့်ချိန်တတ်မှုက အသက်များစွာအားကယ်ခဲ့ပြီး ဣသရေလနိုင်ငံ၏မင်းလောင်းဒါဝိဒ်ကို သွေးပြစ်သင့်သူဖြစ်မလာရအောင် တားဆီးပေးခဲ့သည်။ ၁ ဓမ္မရာဇဝင်အခန်းကြီး ၂၅ ၌မှတ်တမ်းတင်ထားသော အဘိဂဲလအကြောင်းကို ကျွန်ုပ်တို့ဖတ်ကြည့်နိုင်သည်။
၁၁ ဖြစ်ပျက်ပုံအစပိုင်းတွင်၊ ဒါဝိဒ်နှင့် သူ၏နောက်လိုက်များသည် နာဗလ၏သိုးအုပ်များအနီးတွင် စခန်းချထားကြရာ အမျိုးသားချင်းဖြစ်သူနာဗလကို ကျေးဇူးပြုသည့်အနေနှင့် သိုးအုပ်များကို နေ့ရောညပါ သူတို့အခမဲ့ ကာကွယ်စောင့်ရှောက်ပေးခဲ့ကြသည်။ စားနပ်ရိက္ခာလျော့နည်းလာသောအခါ ဒါဝိဒ်သည် နာဗလထံမှ အစာတောင်းခံဖို့ လုလင်ဆယ်ဦးကိုစေလွှတ်ခဲ့သည်။ ယခု နာဗလသည် ဒါဝိဒ်ကို ကျေးဇူးတုံ့ပြန်ရုံမက ယေဟောဝါ၏ဘိသိက်ခံအဖြစ် ဂုဏ်ပြုရန်အခွင့်အရေးရရှိသည်။ သို့သော် ယင်းနှင့်ဆန့်ကျင်ပြီး နာဗလပြုလုပ်ခဲ့သည်။ သူသည် ဒါဝိဒ်ကို ဒေါသတကြီး စော်ကားပြောဆိုပြီး လုလင်ပျိုတို့ကို လက်ချည်း ပြန်လွှတ်လိုက်သည်။ ထိုအကြောင်းကို ဒါဝိဒ်ကြားသော် လက်နက်ကိုင်လူ ၄၀၀ ကိုစုရုံးပြီး လက်တုံ့ပြန်ရန် ထွက်သွားလေသည်။ အဘိဂဲလသည် ခင်ပွန်းဖြစ်သူ၏ ကြမ်းတမ်းသောတုံ့ပြန်ပုံကိုသိသွားရာ စားနပ်ရိက္ခာအလျှံပယ်ပို့ပေးခြင်းဖြင့် ဒါဝိဒ်ကျေအေးစေရန် မဆိုင်းမတွ၊ အမြော်အမြင်ရှိရှိ ပြုမူဆောင်ရွက်ခဲ့သည်။ ထို့နောက် သူကိုယ်တိုင် ဒါဝိဒ်ထံသို့ သွားလေသည်။—အခန်းငယ် ၂-၂၀။
၁၂၊ ၁၃။ (က) အဘိဂဲလသည် စဉ်းစားချင့်ချိန်တတ်ပြီး ယေဟောဝါနှင့် ကိုယ်တော်ခန့်အပ်ထားသူအပေါ်လည်း တည်ကြည်မှုရှိကြောင်း မည်သို့သက်သေထူခဲ့သနည်း။ (ခ) အိမ်သို့ပြန်ရောက်သောအခါ အဘိဂဲလအဘယ်အရာပြုလုပ်ခဲ့သနည်း၊ မည်သို့ဖြစ်ပျက်ခဲ့သနည်း။
၁၂ ဒါဝိဒ်နှင့်တွေ့ဆုံသောအခါ ချမ်းသာပေးဖို့ အဘိဂဲလ၏နှိမ့်ချသောအသနားခံချက်က ယေဟောဝါ၏ဘိသိက်ခံကို သူအလွန်ရိုသေလေးစားကြောင်း ဖော်ပြသည်။ သူက ‘ကျွန်မသခင်သည် ဘုရားသခင်ဘက်မှာ စစ်တိုက်သောကြောင့် . . . ဘုရားသခင်သည် ကျွန်မသခင်အဖို့ ခိုင်ခံ့မြဲမြံသောအိမ်ကို တည်ဆောက်တော်မူလိမ့်မည်’ ဟုဆိုပြီး ဒါဝိဒ်ကို ဣသရေလလူမျိုး၏ခေါင်းဆောင်အဖြစ် ယေဟောဝါခန့်အပ်လိမ့်မည်ဟု ပြောဆိုခဲ့သေးသည်။ (အခန်းငယ် ၂၈-၃၀) တစ်ကြိမ်တည်းတွင် အဘိဂဲလက လက်စားချေလိုစိတ်ကို ဒါဝိဒ်မချုပ်တည်းပါက သွေးပြစ်သင့်ရောက်မည်ဟု ပြောလိုက်ခြင်းအားဖြင့် အတော်အတန်သတ္တိရှိကြောင်း ဖော်ပြခဲ့သည်။ (အခန်းငယ် ၂၆၊ ၃၁) ဒါဝိဒ်သည် အဘိဂဲလ၏နှိမ့်ချမှု၊ အလွန်ရိုသေလေးစားမှုနှင့် ထက်မြက်သောဆင်ခြင်သုံးသပ်မှုကြောင့် သတိပြန်လည်လာ၍ ဤသို့တုံ့ပြန်သည်– “ယနေ့ငါနှင့်တွေ့ဆုံစေခြင်းငှာ သင့်ကိုစေလွှတ်တော်မူသော ဣသရေလလူမျိုး၏ဘုရားသခင် . . . သည် မင်္ဂလာရှိတော်မူစေသတည်း။ ပိုင်းခြားသိမြင်သောသင့်ဉာဏ်၌လည်း မင်္ဂလာရှိစေသတည်း။ ယနေ့ငါသည် အသွေးကိုသွန် . . . မည်အကြောင်း ဆီးတားသောသင်သည်လည်း မင်္ဂလာရှိစေသတည်း။”—အခန်းငယ် ၃၂၊ ၃၃၊ သမ္မာ။
၁၃ အဘိဂဲလ အိမ်သို့ပြန်ရောက်သောအခါ ဒါဝိဒ်ကိုလက်ဆောင်ပေးလိုက်ကြောင်း ခင်ပွန်းသည်ကို ရဲရင့်စွာအသိပေးဖို့ လိုက်ရှာလေသည်။ သို့သော် သူ့ကိုတွေ့သောအခါ သူသည် “ယစ်မူး” လျက်ရှိ၏။ ထို့ကြောင့် သူအမူးပြေသည့်အထိစောင့်ပြီးနောက် ပြောပြလိုက်သည်။ နာဗလမည်သို့တုံ့ပြန်သနည်း။ ကြက်သေသေသွားပြီး လေဖြတ်ရောဂါပုံစံတစ်မျိုးဖြစ်နိုင်သည့် ဝေဒနာကို သူခံစားရလေသည်။ ဆယ်ရက်ကြာပြီးနောက် ဘုရားသခင့်လက်တော်ဖြင့် သူသေဆုံးသွား၏။ နာဗလသေကြောင်း ဒါဝိဒ်ကြားသိသောအခါ သူအမှန်နှစ်သက်မြတ်နိုးပြီး အလွန်လေးစားခဲ့ပုံရသူ အဘိဂဲလကို လက်ထပ်ခွင့်တောင်းလေသည်။ ဒါဝိဒ်၏တောင်းဆိုချက်ကို အဘိဂဲလလက်ခံလိုက်သည်။—အခန်းငယ် ၃၄-၄၂။
အဘိဂဲလနှင့် သင်တူနိုင်သလော
၁၄။ အဘိဂဲလ၏အဘယ်အရည်အသွေးများကို ကျွန်ုပ်တို့တိုး၍ ပြုစုပျိုးထောင်လိုကြသနည်း။
၁၄ သင်သည် အမျိုးသမီးတစ်ဦး သို့မဟုတ် အမျိုးသားတစ်ဦးဖြစ်စေ၊ အဘိဂဲလ၌ရှိသော အရည်အသွေးအချို့ကို မိမိတွင် အတိုင်းအတာတစ်ခုအထိ တိုး၍ရှိစေရန် သင်ပြုစုပျိုးထောင်ပေးဖို့လိုကြောင်း တွေ့ပါသလော။ အခက်အခဲများ ပေါ်ပေါက်လာသောအခါ ပို၍စဉ်းစားချင့်ချိန်တတ်သောနည်းဖြင့် ပြုမူဆောင်ရွက်လိုပေမည်။ သို့မဟုတ် သင့်အနီးအနားရှိသူများသည် အလွန်စိတ်လှုပ်ရှားနေချိန်တွင် အေးဆေးတည်ငြိမ်စွာ၊ အကျိုးသင့်အကြောင်းသင့်ရှိရှိ သင်စကားပြောဆိုလိုပေမည်။ သို့ဖြစ်လျှင် ထိုကိစ္စနှင့်ပတ်သက်၍ ယေဟောဝါထံဆုတောင်းပါလေ။ ကိုယ်တော်သည် “ယုံကြည်သောစိတ်နှင့် [“အဆက်မပြတ်၊” ကဘ] တောင်း” သူအားလုံးကို ဉာဏ်ပညာ၊ ပိုင်းခြားသိမြင်မှုနှင့် စဉ်းစားတွေးခေါ်နိုင်စွမ်းတို့ကိုပေးမည်ဟု ကိုယ်တော်ကတိပြုပါသည်။—ယာကုပ် ၁:၅၊ ၆; သု. ၂:၁-၆၊ ၁၀၊ ၁၁။
၁၅။ ခရစ်ယာန်အမျိုးသမီးများသည် အဘိဂဲလ၏အရည်အသွေးများကို အဘယ်အခြေအနေမျိုးများတွင် တင်ပြဖို့ အထူးအရေးကြီးသနည်း။
၁၅ ကျမ်းစာမူများကို ဂရုမစိုက်လှသော မယုံကြည်သူ လင်ယောက်ျားရှိသည့် အမျိုးသမီးတစ်ဦးသည် အဆိုပါအရည်အသွေးကောင်းများရှိဖို့ အထူးအရေးကြီးသည်။ သူသည် သောက်ကြူးသူ ဖြစ်ကောင်းဖြစ်ပေမည်။ ထိုအမျိုးသားများ ပြောင်းလဲလာလိမ့်မည်ဟု မျှော်လင့်ပါသည်။ ဇနီးမယားများ၏ နူးညံ့သောသဘော၊ အလွန်ရိုသေလေးစားခြင်းနှင့် စင်ကြယ်သောအကျင့်တို့ကြောင့် ပြောင်းလဲလာခဲ့ကြသူ များစွာရှိ၏။—၁ ပေတရု ၃:၁၊ ၂၊ ၄။
၁၆။ အိမ်တွင်းအခြေအနေ မည်သို့ပင်ရှိစေကာမူ ခရစ်ယာန်ညီအစ်မတစ်ဦးသည် ယေဟောဝါနှင့်ဆက်ဆံရေးကို အရာခပ်သိမ်းထက် တန်ဖိုးထားကြောင်း မည်သို့တင်ပြမည်နည်း။
၁၆ အိမ်တွင် မည်သို့သောအခက်အခဲများကို သင်ရင်ဆိုင်နေရပါစေ ယေဟောဝါသည် သင့်ကိုထောက်မကူညီရန် အမြဲအသင့်ရှိကြောင်း သတိရပါ။ (၁ ပေတရု ၃:၁၂) ထို့ကြောင့် ဝိညာဉ်ရေးဘက်သန်စွမ်းနေဖို့ ကြိုးစားပါ။ ဉာဏ်ပညာနှင့် တည်ငြိမ်သောနှလုံးရရှိဖို့ ဆုတောင်းပါ။ ကျမ်းစာလေ့လာခြင်း၊ ဆုတောင်းခြင်း၊ တွေးတောဆင်ခြင်ခြင်းနှင့် ခရစ်ယာန်ချင်းများနှင့်ပေါင်းသင်းခြင်းတို့ကို မှန်မှန်ပြုလုပ်ခြင်းအားဖြင့် ယေဟောဝါထံ ချဉ်းကပ်ပါ။ ယေဟောဝါအပေါ် အဘိဂဲလထားသောမေတ္တာနှင့် ကိုယ်တော်၏ခန့်အပ်ခံကျေးကျွန်အပေါ် သူ့စိတ်ထားသည် လင်ယောက်ျား၏ ဝိညာဉ်ရေးမဆန်သောအမြင်ကြောင့် မထိခိုက်ခဲ့ပါ။ ဖြောင့်မတ်သောမူများအတိုင်း သူပြုမူလုပ်ဆောင်ခဲ့သည်။ ခင်ပွန်းဖြစ်သူသည် ဘုရားသခင်၏ စံပြကျေးကျွန်တစ်ဦးဖြစ်နေလျှင်ပင် ခရစ်ယာန်ဇနီးသည်တစ်ဦးသည် မိမိကိုယ်တိုင်၏ဝိညာဉ်ရေးကို ကြိုးစားတည်ဆောက်၍ ထိန်းသိမ်းပေးဖို့လိုကြောင်း အသိအမှတ်ပြုရမည်။ သူ၏လင်ယောက်ျားသည် ဇနီး၏ဝိညာဉ်ရေးနှင့် ကာယရေးကို ကြည့်ရှုစောင့်ရှောက်ပေးဖို့ ကျမ်းပေးတာဝန်ရှိသည်မှန်သော်လည်း အဆုံးတွင်မူ “ကြောက်ရွံ့တုန်လှုပ်သောစိတ်နှင့်၊ ကိုယ်ကိုကယ်တင်ခြင်းငှာ” သူကိုယ်တိုင်ကြိုးစားရပေမည်။—ဖိလိပ္ပိ ၂:၁၂; ၁ တိမောသေ ၅:၈။
“ပရောဖက်၏အကျိုးကို” သူရရှိခဲ့
၁၇၊ ၁၈။ (က) ဇရတ္တမြို့သူမုဆိုးမသည် အဘယ်ထူးခြားသော ယုံကြည်ခြင်းစမ်းသပ်မှု ခံခဲ့ရသနည်း။ (ခ) မုဆိုးမသည် ဧလိယ၏တောင်းဆိုချက်ကို မည်သို့တုံ့ပြန်ခဲ့သနည်း၊ ထိုအတွက် သူ့ကို ယေဟောဝါမည်သို့ဆုချခဲ့သနည်း။
၁၇ ပရောဖက်ဧလိယခေတ်မှ ဆင်းရဲနွမ်းပါးသောမုဆိုးမတစ်ဦးကို ယေဟောဝါကြည့်ရှုစောင့်ရှောက်ခဲ့ပုံက မိမိတို့ကိုယ်ကိုနှင့် မိမိတို့၏အစွမ်းအစများကို စစ်မှန်သောဝတ်ပြုရေးအတွက် ပေးဆက်ကြသူများအား ကိုယ်တော်အလွန်တန်ဖိုးထားကြောင်း ဖော်ပြသည်။ ဧလိယခေတ်တွင် အတန်ကြာမိုးခေါင်သောကြောင့် ဇရတ္တမြို့နေ မုဆိုးမတစ်ဦးနှင့် သူ၏သားငယ်တို့အပါအဝင် လူများစွာ အငတ်ဘေးကြုံခဲ့ကြရသည်။ တစ်နပ်စာသာ ကျန်ကြွင်းတော့သည့်အချိန်တွင် ပရောဖက်ဧလိယသည် ဧည့်သည်အဖြစ် ရောက်လာ၏။ သူ၏တောင်းဆိုချက်သည် အလွန်ထူးခြားသည်။ ထိုအမျိုးသမီး၏အခြေအနေကို သိလျက်နှင့် သူ၏နောက်ဆုံးလက်ကျန် ဆီနှင့်ဂျုံဖြင့် “မုန့်ပြားငယ်တစ်ပြား” ဖုတ်ပေးဖို့ တောင်းဆိုခဲ့သည်။ သို့သော် သူဤသို့ဆက်ပြောသည်– “ဣသရေလအမျိုး၏ဘုရားသခင် ထာဝရဘုရား[သခင်]မိန့်တော်မူသည်ကား ‘ထာဝရဘုရား[သခင်]သည် မြေပေါ်မှာမိုးရွာစေတော်မမူမီတိုင်အောင် အိုး၌ရှိသောမုန့်ညက်မကုန်။ ဘူး၌ရှိသောဆီမလျော့ရ။’”—၃ ဓမ္မရာဇဝင် ၁၇:၈-၁၄။
၁၈ ထူးခြားသော ထိုတောင်းဆိုချက်ကို သင်မည်သို့တုံ့ပြန်ခဲ့မည်နည်း။ ဧလိယသည် ယေဟောဝါ၏ပရောဖက်ဖြစ်ကြောင်း အသိအမှတ်ပြုပုံရှိသော ဇရတ္တမြို့သူမုဆိုးမသည် “ဧလိယစကားအတိုင်းပြု” လေ၏။ သူ၏ဧည့်ဝတ်ကျေပွန်မှုကို ယေဟောဝါ မည်သို့တုံ့ပြန်ခဲ့သနည်း။ ကိုယ်တော်သည် မိုးခေါင်သည့်ကာလအတွင်း ထိုအမျိုးသမီး၊ သူ၏သားနှင့် ဧလိယတို့ကို အံ့ဖွယ်နည်းဖြင့်ကျွေးမွေးခဲ့သည်။ (၃ ဓမ္မရာဇဝင် ၁၇:၁၅၊ ၁၆) ယေဟောဝါသည် ဣသရေလအမျိုးသမီးတစ်ဦးမဟုတ်သော ဇရတ္တမြို့သူမုဆိုးမအား “ပရောဖက်၏အကျိုးကို” ပေးခဲ့သည်။ (မဿဲ ၁၀:၄၁) ဘုရားသခင့်သားတော်သည် မိမိ၏ဇာတိမြို့ဖြစ်သော နာဇရက်မြို့နေ တည်ကြည်မှုမရှိသူများရှေ့တွင် ထိုအမျိုးသမီးကိုစံပြအဖြစ် ဖော်ပြချိန်၌ အဆိုပါမုဆိုးမကို ချီးမွမ်းဂုဏ်ပြုခဲ့သည်။—လုကာ ၄:၂၄-၂၆။
၁၉။ ယနေ့ ခရစ်ယာန်အမျိုးသမီးများစွာတို့သည် ဇရတ္တမြို့သူမုဆိုးမ၏စိတ်ဓာတ်မျိုးကို အဘယ်နည်းများဖြင့် ထင်ဟပ်ပြကြသနည်း၊ သူတို့ကို ယေဟောဝါမည်သို့ယူမှတ်သနည်း။
၁၉ ယနေ့၊ ဇရတ္တမြို့သူမုဆိုးမ၏စိတ်ဓာတ်မျိုး တင်ပြသော ခရစ်ယာန်အမျိုးသမီးများစွာရှိသည်။ သာဓကအနေနှင့်၊ အများအားဖြင့် ဆင်းရဲနွမ်းပါးပြီး မိသားစုများကို ကြည့်ရှုပြုစုကြရသည့် ကိုယ်ကျိုးမငဲ့သော ခရစ်ယာန်ညီအစ်မများသည် နယ်လှည့်ကြီးကြပ်မှူးများနှင့် သူတို့၏ဇနီးများကို ပတ်စဉ်ဧည့်ဝတ်ပြုကြသည်။ အခြားသူတို့မူ ဒေသခံ အချိန်ပြည့်ဓမ္မအမှုဆောင်များကို ဧည့်ခံကျွေးမွေးကြ၊ ဆင်းရဲသူများကို အကူအညီပေးကြသည်၊ ဘုရားသခင့်နိုင်ငံတော်လုပ်ငန်းကို ထောက်ပံ့ကူညီရန် အခြားနည်းများဖြင့် မိမိတို့ကိုယ်ကိုဖြစ်စေ၊ မိမိတို့၏အစွမ်းအစများကိုဖြစ်စေ ပေးဆက်ကြသည်။ (လုကာ ၂၁:၄) ဤသို့ကိုယ်ကျိုးစွန့်ပြုမူခြင်းကို ယေဟောဝါသတိပြုသလော။ ဧကန်အမှန်သတိပြုမိပါသည်! “သင်တို့သည် သန့်ရှင်းသူတို့ကို အထက်ကလုပ်ကျွေးသည်သာမက၊ ယခုပင်လုပ်ကျွေးခြင်းအမှုကိုလည်းကောင်း၊ ထိုသို့ပြုသောအားဖြင့် နာမတော်ကိုထောက်၍ပြသော မေတ္တာကိုလည်းကောင်း၊ ဘုရားသခင်သည် မေ့လျော့သည်တိုင်အောင် အဓမ္မအမှုကိုပြုတော်မူသည်မဟုတ်။”—ဟေဗြဲ ၆:၁၀။
၂၀။ နောက်ဆောင်းပါးတွင် အဘယ်အကြောင်း ဆွေးနွေးသုံးသပ်မည်နည်း။
၂၀ ပထမရာစုတွင် ဘုရားသခင်ကိုကြောက်ရွံ့သော အမျိုးသမီးအချို့သည် ယေရှုနှင့် တမန်တော်များကို လုပ်ကျွေးခွင့်ရရှိခဲ့ကြသည်။ ထိုအမျိုးသမီးများသည် ယေဟောဝါ၏နှလုံးကို မည်သို့ရွှင်ပြုံးစေခဲ့ကြောင်း နောက်ဆောင်းပါးတွင် ဆွေးနွေးပါမည်၊ ထို့နောက် ခက်ခဲသောအခြေအနေများ၌ပင် ယေဟောဝါကို စိတ်နှလုံးအကြွင်းမဲ့အမှုထမ်းကြသော ယခုခေတ်အမျိုးသမီးများ၏ပုံနမူနာကို သုံးသပ်ကြပါမည်။
[အောက်ခြေမှတ်ချက်]
^ အပိုဒ်၊ 8 မဿဲမှတ်တမ်းတင်ခဲ့သော ယေရှု၏ဆွေစဉ်မျိုးဆက်စာရင်းတွင် အမျိုးသမီးလေးဦးဖြစ်သော တာမာ၊ ရာခပ်၊ ရုသနှင့် မာရိတို့၏အမည်များကို ဖော်ပြထားသည်။ သူတို့အားလုံးသည် သမ္မာကျမ်းစာတွင် အလွန်တန်ဖိုးထားလေးစားခံရကြသည်။—မဿဲ ၁:၃၊ ၅၊ ၁၆။
ပြန်လည်သုံးသပ်ခြင်း
• အောက်ဖော်ပြပါအမျိုးသမီးများသည် ယေဟောဝါ၏နှလုံးကို မည်သို့ ရွှင်ပြုံးစေခဲ့ကြသနည်း။
• ရှိဖရနှင့် ပုအာ
• ရာခပ်
• အဘိဂဲလ
• ဇရတ္တမြို့သူမုဆိုးမ
• အဆိုပါအမျိုးသမီးများ၏ပုံသက်သေများကို တွေးတော ဆင်ခြင်ခြင်းက ကျွန်ုပ်တို့တစ်ဦးစီကို မည်သို့ကူညီပေးနိုင် သနည်း။ ရှင်းပြပါ။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
တည်ကြည်သောအမျိုးသမီးများစွာတို့သည် “ရှင်ဘုရင်အမိန့်” တားမြစ်သည့်ကြား ဘုရားသခင့်အမှုတော်ထမ်းခဲ့ကြ
[စာမျက်နှာ ၁၀ ပါ ရုပ်ပုံ]
ရာခပ်သည် ယုံကြည်ခြင်း ရှိသူတစ်ဦးအဖြစ် အဘယ်ကြောင့် ပုံသက်သေကောင်းဖြစ်သနည်း
[စာမျက်နှာ ၁၀ ပါ ရုပ်ပုံ]
အဘိဂဲလတင်ပြခဲ့သော အဘယ်အရည်အသွေးများကို သင်တုပလိုသနည်း
[စာမျက်နှာ ၁၂ ပါ ရုပ်ပုံ]
ယနေ့ ခရစ်ယာန်အမျိုးသမီးများစွာတို့သည် ဇရတ္တမြို့သူမုဆိုးမ၏ စိတ်ဓာတ်ကို တင်ပြနေကြ