တပည့်များဖြစ်စေရန် ဟောပြောလော့
တပည့်များဖြစ်စေရန် ဟောပြောလော့
“အာကုလနှင့် ပြစ်ကိလတို့သည် [အာပေါလု] ၏စကားကိုကြားသောအခါ၊ သူ့ကိုယူ၍ ဘုရားသခင်၏[ခရစ်ယာန်]ဘာသာတရားကို သာ၍သေချာစွာသင်ကြားကြ၏။”—တမန်တော် ၁၈:၂၆။
၁။ (က) အာပေါလုသည် “စိတ်အားကြီး” သော်လည်း အဘယ်အရာလိုအပ်ခဲ့သနည်း။ (ခ) အာပေါလုသည် ဝိညာဉ်ရေးဘက် မပြည့်မစုံဖြစ်နေခြင်းကို ဖြည့်ဆည်းရန် အဘယ်အရာလိုအပ်ခဲ့သနည်း။
ဧဖက်မြို့ရှိ တရားဇရပ်တစ်ခုတွင် အာပေါလုဟောပြောနေသည်ကို ပထမရာစုမှ ခရစ်ယာန်မောင်နှံစုံ ပြစ်ကိလနှင့် အာကုလတို့ မြင်တွေ့ခဲ့ကြသည်။ အာပေါလုသည် စကားပြောကောင်းခြင်းနှင့် သွေးဆောင်နိုင်စွမ်းတို့ဖြင့် ပရိသတ်၏အာရုံကို ဖမ်းစားခဲ့သည်။ သူသည် “စိတ်အားကြီး” သူဖြစ်ပြီး ‘ယေရှုအကြောင်း စေ့စေ့ဟောပြော၍ သင်ကြား’ ခဲ့၏။ သို့သော် အာပေါလုသည် “ယောဟန်၏ဗတ္တိဇံကိုသာသိ” ထားခဲ့ကြောင်း သိသာထင်ရှားသည်။ ခရစ်တော်နှင့်ပတ်သက်၍ အာပေါလုဟောပြောခဲ့သော အကြောင်းအရာသည် မှန်ကန်ခဲ့ပါသည်။ သို့သော် မပြည့်စုံခဲ့ပါ။ ယေဟောဝါ၏ရည်ရွယ်ချက် အကောင်အထည်ပေါ်လာရေးတွင် ယေရှုခရစ်၏အခန်းကဏ္ဍကို အာပေါလု တိုးသိနားလည်ဖို့လိုနေသေးသည်။—တမန်တော် ၁၈:၂၄-၂၆။
၂။ ပြစ်ကိလနှင့် အာကုလတို့သည် အဘယ်ခက်ခဲသောလုပ်ငန်းတစ်ခုကို လက်ခံခဲ့ကြသနည်း။
၂ ပြစ်ကိလနှင့် အာကုလတို့သည် အာပေါလုအား ခရစ်တော်မိန့်မှာထားရာ ‘မှန်သမျှ’ ကို လိုက်နာ စောင့်ရှောက်နိုင်သူတစ်ဦးဖြစ်လာစေရန် ကူညီဖို့အသင့်ရှိခဲ့ကြသည်။ (မဿဲ ၂၈:၁၉၊ ၂၀) သူတို့သည် အာပေါလုကို “ယူ၍ ဘုရားသခင်၏[ခရစ်ယာန်]ဘာသာတရားကို သာ၍သေချာစွာသင်ကြားကြ၏” ဟုမှတ်တမ်းကဆိုသည်။ သို့သော် အာပေါလုကို သင်ကြားပေးရန် အချို့ခရစ်ယာန်များ ဝန်လေးခဲ့ကြမည့် အကြောင်းအချို့ရှိခဲ့သည်။ အဘယ်အကြောင်းများနည်း။ အာပေါလုနှင့် ကျမ်းစာကို အပတ်တကုတ်ဆွေးနွေးခဲ့ကြသော ပြစ်ကိလနှင့် အာကုလတို့၏ကြိုးစားမှုမှ ကျွန်ုပ်တို့ အဘယ်အရာသင်ယူနိုင်သနည်း။ ဤသမိုင်းဝင်အဖြစ်အပျက်ကို ပြန်လည်သုံးသပ်ခြင်းက အိမ်တွင်းကျမ်းစာသင်အံမှုများ စခြင်းအပေါ် မည်သို့အာရုံစိုက်စေနိုင်သနည်း။
လူတို့ကို အာရုံစိုက်ပါ
၃။ ပြစ်ကိလနှင့် အာကုလတို့သည် အာပေါလု၏နောက်ခံကြောင့် သူ့ကိုသွန်သင်ပေးဖို့ အဘယ်ကြောင့် မတွန့်ဆုတ်ခဲ့သနည်း။
၃ ဂျူးမျိုးရိုးမှ ပေါက်ဖွားလာသော အာပေါလုသည် အလက်ဇန္ဒြီးယားမြို့၌ ကြီးပြင်းလာပုံရသည်။ အလက်ဇန္ဒြီးယားမြို့သည် ထိုစဉ်က အီဂျစ်၏မြို့တော်ဖြစ်ပြီး ကမ္ဘာကျော်စာကြည့်တိုက်တည်ရှိရာ၊ အဆင့်မြင့် ပညာသင်ကျောင်းများစုဝေးရာနေရာဖြစ်၏။ ထိုမြို့တွင် ပညာရှင်များစွာအပါအဝင် ဂျူးပြည်သားများစွာရှိသည်။ ယင်းကြောင့် ထိုမြို့တွင် စက်ပ်တွားဂျင့်ကျမ်းဟုလူသိများသော ဟေဗြဲကျမ်းစာစောင်များ၏ ဂရိဘာသာပြန်ကျမ်း ပေါ်ထွက်လာသည်။ ယင်းကြောင့်လည်း အာပေါလုသည် “ကျမ်းစာ၌အားကြီးသောသူဖြစ်” ခြင်းမှာ အဆန်းမဟုတ်ပေ! အာကုလနှင့် ပြစ်ကိလတို့သည် တဲရှင်ချုပ်သူများဖြစ်ကြသည်။ အာပေါလု၏ အဟောအပြောကောင်းမှုကြောင့် သူတို့အကူအညီမပေးရဲဘဲ ဖြစ်ခဲ့ကြသလော။ မဖြစ်ခဲ့ကြပါ။ သူတို့၌မေတ္တာရှိသောကြောင့် ထိုပုဂ္ဂိုလ်၊ သူ၏လိုအပ်ရာများနှင့် သူ့ကို မည်သို့ကူညီပေးနိုင်ကြောင်း သုံးသပ်ခဲ့ကြသည်။
၄။ အာပေါလုသည် သူလိုအပ်နေသောအကူအညီကို အဘယ်နေရာတွင် မည်သို့ရရှိခဲ့သနည်း။
၄ အာပေါလုသည် မည်မျှပင်အဟောအပြောကောင်းပါစေ ညွှန်ကြားမှုလိုအပ်နေသည်။ သူလိုအပ်သောအကူအညီကို မည်သည့်တက္ကသိုလ်တွင်မျှ မတွေ့နိုင်ပါ၊ ခရစ်ယာန်အသင်းသူအသင်းသားများတွင်သာ တွေ့နိုင်သည်။ အာပေါလုသည် ဘုရားသခင်၏ကယ်တင်ခြင်းအစီအစဉ်ကို သာ၍တိကျမှန်ကန်စွာ သိနားလည်စေမည့်အချက်များမှ အကျိုးခံစားရတော့မည်ဖြစ်၏။ ပြစ်ကိလနှင့် အာကုလတို့သည် “သူ့ကိုယူ၍ ဘုရားသခင်၏[ခရစ်ယာန်]ဘာသာတရားကို သာ၍သေချာစွာသင်ကြားကြ၏။”
၅။ ပြစ်ကိလနှင့် အာကုလတို့၏ ဝိညာဉ်ရေးအကြောင်း အဘယ်အရာပြောနိုင်သနည်း။
၅ ပြစ်ကိလနှင့် အာကုလတို့သည် ဝိညာဉ်ရေးသန်စွမ်းပြီး ယုံကြည်ခြင်းအခြေခိုင်သူများဖြစ်ကြ၏။ ဖြစ်နိုင်ဖွယ်ရှိသည်မှာ၊ သူတို့သည် ဆင်းရဲ၊ ချမ်းသာမရွေး၊ ပညာတတ်ကိုဖြစ်စေ၊ ကျွန်တစ်ဦးကိုဖြစ်စေ ‘သူတို့၏မျှော်လင့်ခြင်း၏အကြောင်းကို မေးမြန်းသောသူရှိသမျှတို့အား ပြန်ပြောခြင်းငှာ အစဉ်မပြတ် အသင့်ရှိနေ’ ခဲ့ကြသည်။ (၁ ပေတရု ၃:၁၅) အာကုလနှင့် သူ၏ဇနီးတို့သည် ‘ဘုရားသခင့်နှုတ်မြွက်စကားတော်ကို မှန်ကန်စွာကိုင်တွယ်’ နိုင်ခဲ့ကြသည်။ (၂ တိမောသေ ၂:၁၅) သူတို့သည် ကျမ်းစာကို အလေးအနက် သင်ယူလေ့လာထားသူများဖြစ်ကြကြောင်း ထင်ရှားပါသည်။ အာပေါလုသည် နှလုံးကိုထိမိသော၊ ‘အသက်ရှင်၍ တန်ခိုးနှင့်ပြုပြင်တတ်သော၊ ဘုရားသခင့်နှုတ်မြွက်စကားတော်’ ပေါ်အခြေပြုသည့် သွန်သင်ချက်ကို အလွန်တန်ဖိုးထားလေးမြတ်ခဲ့သည်။—ဟေဗြဲ ၄:၁၂။
၆။ အာပေါလုသည် သူရရှိခဲ့သောအကူအညီကို တန်ဖိုးထားလေးစားကြောင်း မည်သို့သိရသနည်း။
၆ အာပေါလုသည် သူ့အား သွန်သင်ပေးသူတို့၏ ပုံနမူနာကို တန်ဖိုးထားလေးစားကာ တပည့်ဖြစ်စေခြင်းလုပ်ငန်း၌ သာ၍ကျွမ်းကျင်သူဖြစ်လာခဲ့သည်။ အထူးသဖြင့် ဂျူးပြည်သူလူထုအကြား သတင်းကောင်းကြွေးကြော်ခြင်းလုပ်ငန်းတွင် သူသိရှိလာသမျှကို ကောင်းစွာအသုံးချခဲ့သည်။ အာပေါလုသည် ခရစ်တော်အကြောင်း ဂျူးများကိုသွေးဆောင်ပြောဆိုရာ၌ အထူးအသုံးဝင်သူဖြစ်ခဲ့သည်။ သူသည် ‘ကျမ်းစာ၌ အားကြီးသောသူ’ ဖြစ်သဖြင့် ရှေးခေတ်မှပရောဖက်များအားလုံး ခရစ်တော်ကြွလာခြင်းကို စောင့်မျှော်ခဲ့ကြကြောင်း ဂျူးတို့ကို သက်သေထောက်ပြနိုင်ခဲ့သည်။ (တမန်တော် ၁၈:၂၄၊ နိုင်ငံတော်စာကြောင်းကြားညှပ်ကျမ်း) ထို့နောက် အာပေါလုသည် အခါယပြည်သို့သွား၍ ထိုတွင် “ကျေးဇူးတော်အားဖြင့် ယုံကြည်သောသူတို့ကို အလွန်ထောက်မလေ၏။ ယေရှုသည် ခရစ်တော်ဖြစ်တော်မူကြောင်းကို ကျမ်းစာအားဖြင့်ထင်ရှားစွာပြ၍၊ လူအပေါင်းတို့ရှေ့မှာ ယုဒလူတို့၏စကားကို အားကြီးစွာပယ်ဖျက်လေ၏” ဟုမှတ်တမ်းကဆက်ပြောသည်။—တမန်တော် ၁၈:၂၇၊ ၂၈။
အခြားသွန်သင်သူများ၏ပုံနမူနာမှ သင်ယူပါ
၇။ အာကုလနှင့် ပြစ်ကိလတို့သည် ကျွမ်းကျင်သောသွန်သင်သူများ မည်သို့ဖြစ်လာခဲ့ကြသနည်း။
၇ အာကုလနှင့် ပြစ်ကိလတို့သည် သမ္မာကျမ်းစာကို ကျွမ်းကျင်စွာသွန်သင်ပေးသူများ မည်သို့ဖြစ်လာခဲ့ကြသနည်း။ ဝီရိယရှိရှိ ကိုယ်ပိုင်လေ့လာမှုပြုပြီး အစည်းအဝေးများ တက်ရောက်ခဲ့ခြင်းအပြင် တမန်တော်ပေါလုနှင့် သူတို့အနီးကပ်ပေါင်းသင်းခဲ့ခြင်းကလည်း များစွာထောက်ကူခဲ့ပေမည်။ ပေါလုသည် ကောရိန္သုမြို့ရှိ ပြစ်ကိလနှင့် အာကုလတို့၏နေအိမ်တွင် ၁၈ လတိုင် နေထိုင်ခဲ့သည်။ သူတို့သည် တဲရှင်များကို အတူချုပ်လုပ်၊ ပြုပြင်ခဲ့ကြသည်။ (တမန်တော် ၁၈:၂၊ ၃) ထိုအတောအတွင်း ကျမ်းစာမှ နက်နဲသောအကြောင်းအရာများ ဆွေးနွေးနှီးနှောဖြစ်ခဲ့မည်ကို မြင်ယောင်ကြည့်လိုက်ပါ။ ပေါလုနှင့် ဤသို့ပေါင်းဖော်ရခြင်းက သူတို့၏ဝိညာဉ်ရေးကို အမှန်ပင် တိုးတက်စေခဲ့မည်တကား! “ပညာရှိတို့နှင့်ပေါင်းဖော်သောသူသည် ပညာရှိတတ်၏” ဟု နယပုံပြင် ၁၃:၂၀ ကဆိုသည်။ အပေါင်းအသင်းကောင်းခြင်းက သူတို့၏ဝိညာဉ်ရေးအလေ့အထကို ကောင်းကျိုးပြုခဲ့သည်။—၁ ကောရိန္သု ၁၅:၃၃။
၈။ ပြစ်ကိလနှင့် အာကုလတို့သည် ဓမ္မအမှုတွင် ပေါလု၏လုပ်ဆောင်ပုံမှ အဘယ်အရာသင်ယူခဲ့ကြသနည်း။
၈ ပေါလုသည် ဘုရားသခင့်နိုင်ငံတော်သတင်းကိုကြွေးကြော်စဉ် သူသည် ဆရာကောင်းတစ်ဦးဖြစ်ကြောင်း ပြစ်ကိလနှင့် အာကုလတို့ တွေ့မြင်ခဲ့ကြသည်။ ပေါလုသည် “ဥပုသ်နေ့မပြတ် [ကောရိန္သုမြို့ရှိ] တရားဇရပ်၌ ဆွေးနွေးဟောပြော၍ ယုဒလူနှင့် ဂရိလူတို့ကို ဖြားယောင်းသွေးဆောင်” ခဲ့ကြောင်း တမန်တော်ကျမ်းပါမှတ်တမ်းကဆိုသည်။ နောက်ပိုင်းတွင် သိလနှင့် တိမောသေတို့ပါ ပေါလုနှင့်အတူ “တရားဟောခြင်းအမှုကိုသာဆောင်ရွက်၍ ယေရှုသည် ခရစ်တော်ဖြစ်ကြောင်းကို ယုဒလူတို့အား ကြိုးစား၍သက်သေခံလေ၏။” တရားဇရပ်အဖွဲ့ဝင်များက စိတ်ဝင်စားမှုသိပ်မပြကြသောအခါ ပေါလုသည် မိမိ၏ဟောပြောခြင်းဆိုင်ရာဗဟိုကို သာ၍တလိုတလားရှိသော၊ တရားဇရပ်နှင့်ကပ်လျက်ရှိသည့်အိမ်သို့ ပြောင်းရွှေ့ခဲ့သည်ကို ပြစ်ကိလနှင့် အာကုလတို့ သတိပြုမိခဲ့ကြသည်။ ထိုတွင် “တရားဇရပ်မှူး” ကရိပ္ပုကို ပေါလုသည် တပည့်တစ်ဦးဖြစ်လာစေခဲ့သည်။ ထိုသူတပည့်ဖြစ်လာခြင်းသည် ရပ်ကွက်အပေါ် အလွန်အကျိုးပြုကြောင်း ပြစ်ကိလနှင့် အာကုလတို့ သတိပြုမိခဲ့ကြပုံရသည်။ မှတ်တမ်းက ဤသို့ဖော်ပြသည်– “ကရိပ္ပုသည် မိမိအိမ်သူအိမ်သားအပေါင်းတို့နှင့်တကွ သခင်ဘုရား ကိုယုံကြည်လေ၏။ ကောရိန္သုမြို့သားအများတို့သည်လည်း ယုံကြည်၍ဗတ္တိဇံကိုခံကြ၏။”—တမန်တော် ၁၈:၄-၈၊ သမ္မာ။
၉။ ပြစ်ကိလနှင့် အာကုလတို့သည် ပေါလု၏ပုံနမူနာကို မည်သို့တုံ့ပြန်ခဲ့ကြသနည်း။
၉ ပြစ်ကိလနှင့် အာကုလအစရှိသည့် အခြားနိုင်ငံတော်ကြွေးကြော်သူများသည် လယ်ကွင်းဓမ္မအမှုတွင် ပေါလု၏ပုံနမူနာကို အတုယူခဲ့ကြသည်။ တမန်တော်က “ငါသည် ခရစ်တော်၏နည်းတူကျင့်သကဲ့သို့ သင်တို့လည်း ငါ့နည်းတူကျင့်ကြလော့” ဟုအခြားခရစ်ယာန်များကို တိုက်တွန်းခဲ့သည်။ (၁ ကောရိန္သု ၁၁:၁) ပေါလု၏ပုံနမူနာအတိုင်း၊ ပြစ်ကိလနှင့် အာကုလတို့သည် ခရစ်ယာန်သွန်သင်ချက်များကို အာပေါလု ပိုမိုမှန်ကန်စွာ နားလည်လာစေရန် ကူညီပေးခဲ့ကြသည်။ တစ်ဖန် သူက အခြားသူများကို ကူညီပေးပြန်သည်။ ပြစ်ကိလနှင့် အာကုလတို့သည်လည်း ရောမမြို့၊ ကောရိန္သုမြို့နှင့် ဧဖက်မြို့တို့တွင် တပည့်များဖြစ်စေခဲ့ကြမည်အမှန်။—တမန်တော် ၁၈:၁၊ ၂၊ ၁၈၊ ၁၉; ရောမ ၁၆:၃-၅။
၁၀။ တပည့်ဖြစ်စေခြင်းလုပ်ငန်း၌ သင့်အား အထောက်အကူပြုမည့် အဘယ်အချက်များကို တမန်တော်ကျမ်းအခန်းကြီး ၁၈ မှ သိရှိခဲ့ပြီနည်း။
၁၀ တမန်တော်ကျမ်း အခန်းကြီး ၁၈ ကိုလေ့လာသုံးသပ်ခြင်းမှ ကျွန်ုပ်တို့ အဘယ်သင်ခန်းစာရသနည်း။ အာကုလနှင့် ပြစ်ကိလတို့သည် ပေါလုထံမှ များစွာသင်ယူခဲ့ကြသည့်နည်းတူ ကျွန်ုပ်တို့လည်း သမ္မာကျမ်းစာကို ကောင်းစွာသွန်သင်ပေးတတ်သူတို့၏နမူနာကို လိုက်လျှောက်ခြင်းဖြင့် တပည့်ဖြစ်စေခြင်းစွမ်းရည်ကို တိုးတက်စေနိုင်ပါသည်။ “တရားဟောခြင်းအမှုကိုသာဆောင်ရွက်” ပြီး အခြားသူများကို “စေ့စပ်သေချာစွာသက်သေခံ” သူတို့နှင့် ကျွန်ုပ်တို့ ပေါင်းဖော်နိုင်သည်။ (တမန်တော် ၁၈:၅၊ နိုင်ငံတော်စာကြောင်း ကြားညှပ်ကျမ်း) သွေးဆောင်နိုင်စွမ်းကိုအသုံးပြုပြီး လူတို့၏နှလုံးကိုထိမိအောင် မည်သို့သွန်သင်ပေးသည်ကို ကျွန်ုပ်တို့ ဂရုစိုက်မှတ်သားနိုင်သည်။ ထိုသို့သောစွမ်းရည်များသည် တပည့်ဖြစ်စေရာတွင် အထောက်အကူပြုနိုင်သည်။ လူတစ်ဦးတစ်ယောက်သည် ကျွန်ုပ်တို့နှင့် ကျမ်းစာလေ့လာသည့်အခါ သူ၏မိသားစုမှအခြားသူများ၊ သို့မဟုတ် အိမ်နီးချင်းများကို ဖိတ်ခေါ်ရန် အကြံပြုနိုင်သည်။ သို့မဟုတ် ကျွန်ုပ်တို့ကျမ်းစာသင်အံမှု ကမ်းလှမ်းနိုင်မည့်သူများရှိပါက အသိပေးရန် အကူအညီတောင်းနိုင်သည်။—တမန်တော် ၁၈:၆-၈။
တပည့်များဖြစ်စေရန် အခွင့်အလမ်းများဖန်တီးပါ
၁၁။ တပည့်သစ်များကို အဘယ်နေရာတွင် တွေ့နိုင်သနည်း။
၁၁ ပေါလုနှင့် သူ၏ခရစ်ယာန်ရောင်းရင်းများသည် တစ်အိမ်မှတစ်အိမ်ဖြစ်စေ၊ ဈေး၌ဖြစ်စေ၊ ခရီးသွားစဉ်ဖြစ်စေ၊ အမှန်အားဖြင့် နေရာတကာတွင် ဟောပြောခြင်းအားဖြင့် တပည့်ဖြစ်စေဖို့ကြိုးစားခဲ့ကြသည်။ တပည့်များဖြစ်စေရန် စိတ်အားထက်သန်စွာဟောသည့် ဘုရားသခင့်နိုင်ငံတော်လုပ်သားတစ်ဦးအနေနှင့် သင်၏လယ်ကွင်းအမှုဆောင်ခြင်းလုပ်ငန်းကို တိုးချဲ့နိုင်သလော။ ထိုက်တန်သူများကိုရှာဖွေပြီး သူတို့ကိုဟောပြောရန် အခွင့်အလမ်းကို ထိရောက်စွာအသုံးချနိုင်သလော။ သတင်းကောင်းကြေညာသူချင်းများ တပည့်များရှာတွေ့ခဲ့ကြသည့် နည်းလမ်းအချို့ကား အဘယ်နည်း။ တယ်လီဖုန်းဖြင့်သက်သေခံခြင်းကဏ္ဍကို ဦးဆုံး ကြည့်ကြပါစို့။
၁၂-၁၄။ တယ်လီဖုန်းဖြင့် သက်သေခံခြင်းအကျိုးကျေးဇူးများကို ဖော်ပြရန် သင့်တွေ့ကြုံမှု၊ သို့မဟုတ် ဤအပိုဒ်များမှ တွေ့ကြုံမှုတစ်ခုခုကို ပြောပြပါ။
၁၂ ဘရာဇီးလ်နိုင်ငံတွင် တစ်အိမ်မှတစ်အိမ်သက်သေခံနေစဉ် မာရီယားဟု ကျွန်ုပ်တို့အမည်ပေးမည့် ခရစ်ယာန်တစ်ဦးသည် တိုက်ခန်းတစ်ခုမှထွက်တော့မည့် အမျိုးသမီးငယ်တစ်ဦးကို ဝေစာတစ်စောင် ကမ်းပေးခဲ့သည်။ ဝေစာ၏ခေါင်းစဉ်ဖြင့် နိဒါန်းပျိုးကာ မာရီယားက “ကျမ်းစာအကြောင်း ပိုပြီးသိချင်ပါသလား” ဟုမေးလေသည်။ “သိချင်တာပေါ့။ ခက်တာက ကျွန်မက ဆရာမတစ်ယောက်ဆိုတော့ စာသင်တာနဲ့ပဲ အချိန်ကုန်နေတယ်” ဟုထိုအမျိုးသမီးကဖြေသည်။ ထိုအခါ မာရီယားက ကျမ်းစာအကြောင်းများကို တယ်လီဖုန်းဖြင့် ဆွေးနွေးသုံးသပ်နိုင်ကြောင်း ရှင်းပြခဲ့သည်။ ထို့နောက် ထိုအမျိုးသမီးသည် မာရီယားကို သူ၏ဖုန်းနံပါတ်ပေးခဲ့ရာ ထိုညနေခင်းတွင်ပင် ကျွန်ုပ်တို့ထံမှ ဘုရားသခင်အဘယ်အရာတောင်းဆိုတော်မူသနည်း *ဘရိုရှာကိုသုံး၍ တယ်လီဖုန်းဖြင့် သင်အံမှုစခဲ့သည်။
၁၃ အီသီယိုးပီးယားနိုင်ငံရှိ အချိန်ပြည့်ဓမ္မအမှုဆောင်တစ်ဦးသည် တယ်လီဖုန်းဖြင့် အမျိုးသားတစ်ဦးကို သက်သေခံနေစဉ် ရုတ်ရုတ်သဲသဲနောက်ခံအသံကြောင့် လန့်ဖျပ်သွားခဲ့သည်။ ထိုအမျိုးသားက နောက်မှပြန်ခေါ်ရန် ထိုညီအစ်မကိုပြောသည်။ ပြန်ခေါ်ကြည့်သောအခါ သူက တောင်းပန်စကားပြောပြီး အစောပိုင်းက ညီအစ်မဖုန်းခေါ်ချိန်တွင် သူနှင့်သူ့ဇနီးတို့ အကြီးအကျယ်ရန်ဖြစ်နေကြကြောင်းပြောပြသည်။ ထိုအချက်ကို အခွင့်ကောင်းယူပြီး ညီအစ်မက ကျမ်းစာတွင် မိသားစုပြဿနာများကို ကိုင်တွယ်ဖြေရှင်းရန် ပညာရှိလမ်းညွှန်ချက်ပါရှိကြောင်း ညွှန်ပြလေသည်။ ယေဟောဝါသက်သေများထုတ်ဝေခဲ့သော မိသားစုပျော်ရွှင်မှု၏လျှို့ဝှက်ချက်စာအုပ်သည် မိသားစုများစွာကို အကူအညီပေးခဲ့ကြောင်း ပြောပြ၏။ ထိုစာအုပ်ကိုပို့ပေးပြီး ရက်အနည်းငယ်အကြာတွင် ညီအစ်မသည် ထိုသူထံ ဖုန်းပြန်ဆက်ကြည့်သည်။ အိမ်ရှင်က “ကျွန်တော့်အိမ်ထောင် မပြိုကွဲရအောင် ဒီစာအုပ်က ကာကွယ်ပေးခဲ့တယ်” ဟုဝမ်းသာအားရပြောပြသည်။ ထိုသူသည် စာအုပ်ထဲမှ ကောင်းသောအချက်များကို လက်ဆင့်ကမ်းဝေမျှပေးဖို့ မိသားစုတွေ့ဆုံမှုပြုခဲ့သည်။ ထိုသူနှင့် အိမ်တွင်းကျမ်းစာသင်အံမှု စတင်လိုက်ပြီး များမကြာမီ သူသည် ခရစ်ယာန်အစည်းအဝေးများကို မှန်မှန်တက်ရောက်လေတော့သည်။
၁၄ တယ်လီဖုန်းဖြင့်သက်သေခံပြီး ကျမ်းစာသင်အံမှုစခဲ့သူ၊ ဒိန်းမတ်နိုင်ငံမှ ဘုရားသခင့်နိုင်ငံတော်ကြွေးကြော်သူတစ်ဦးက ဤသို့ဆို၏– “တယ်လီဖုန်းနဲ့သက်သေခံကြည့်ဖို့ လုပ်ငန်းတော်ကြီးကြပ်မှူးက ကျွန်မကို အားပေးတယ်။ ‘အဲဒါကတော့ ကျွန်မအကြိုက်မဟုတ်ဘူး’ လို့ပြောပြီး အစပိုင်းမှာ တွန့်ဆုတ်ခဲ့တယ်။ ဒါပေမဲ့ တစ်ရက်ကျတော့ အားခဲပြီး ပထမအိမ်ရှင်ဆီကို ဖုန်းခေါ်ကြည့်တယ်။ ဖုန်းကိုင်တဲ့ ဆော်နီယာနဲ့ ခဏလောက် စကားစမြည်ပြောပြီးနောက် ကျမ်းစာအခြေပြုစာစောင်တွေကို သူလက်ခံယူမယ်လို့ ပြောတယ်။ တစ်ညနေခင်းမှာ ဖန်ဆင်းခြင်းအကြောင်း ကျွန်မတို့ဆွေးနွေးကြတယ်၊ အသက်—ဤတွင်မည်သို့ရောက်ရှိခဲ့သနည်း။ ဆင့်ကဲဖြစ်စဉ်အားဖြင့်လော၊ ဖန်ဆင်းခြင်းအားဖြင့်လော [လိပ်] * စာအုပ်ကို သူဖတ်ချင်တယ်။ ဒါနဲ့ ကျွန်မတို့ လူချင်းတွေ့ပြီး အဲဒီအကြောင်း ဆွေးနွေးရင်မကောင်းဘူးလားလို့ အကြံပေးတော့ သူသဘောတူတယ်။ ကျွန်မရောက်သွားတော့ ကျမ်းစာလေ့လာဖို့ ဆော်နီယာအသင့်ပဲ၊ အဲဒီအချိန်ကစပြီး ကျွန်မတို့ အပတ်တိုင်း ကျမ်းစာလေ့လာခဲ့ကြပြီ။” ကျွန်ုပ်တို့၏ခရစ်ယာန်ညီအစ်မက ဤသို့နိဂုံးချုပ်သည်– “ကျမ်းစာသင်အံမှုတစ်ခုရဖို့ နှစ်နဲ့ချီပြီး ကျွန်မဆုတောင်းခဲ့တာ၊ ဖုန်းနဲ့သက်သေခံပြီး သင်အံမှုတစ်ခုရမယ်လို့ မထင်ခဲ့မိဘူး။”
၁၅၊ ၁၆။ နည်းအမျိုးမျိုးဖြင့် ကျမ်းစာသင်အံမှုများစရန် သတိရှိခြင်း၏ အကျိုးကျေးဇူးကိုဖော်ပြသော အဘယ်တွေ့ကြုံမှုများကို သင်ပြောပြနိုင်သနည်း။
၁၅ အဘယ်နေရာတွင်မဆိုရှိသော လူတို့အား သက်သေခံဖို့ အကြံပြုချက်များကို လက်တွေ့ကျင့်သုံးကြသောကြောင့် အောင်မြင်နေကြသူ များစွာရှိ၏။ ယူနိုက်တက်စတိတ်မှ ခရစ်ယာန်အမျိုးသမီးတစ်ဦးသည် ယာဉ်ရပ်နားစခန်းရှိ ကုန်တင်ယာဉ်တစ်စီးဘေးတွင် သူ့ကားကို ရပ်နားခဲ့သည်။ အဆိုပါကုန်တင်ယာဉ်ထဲမှ အမျိုးသမီးက သူ့ကိုတွေ့သောအခါ ညီအစ်မက ကျမ်းစာပညာပေးလုပ်ငန်းအကြောင်း စတင်ရှင်းပြလေသည်။ ထိုအမျိုးသမီးသည် နားထောင်ပြီး သူ၏ယာဉ်ထဲမှထွက်၍ ညီအစ်မ၏ကားအနီး လျှောက်လာသည်။ သူက “ရှင် ကျွန်မနဲ့စကားပြောလို့ ဝမ်းသာလိုက်တာ။ ရှင်တို့ရဲ့ ကျမ်းစာစာပေစာတမ်းတွေ မရတာ အတော်ကြာသွားပြီ။ ပြီးတော့ ကျွန်မ ကျမ်းစာကို ပြန်လေ့လာချင်တယ်။ ကျွန်မနဲ့လေ့လာနိုင်မလား” ဟုဆိုသည်။ သို့ဖြင့် ကျွန်ုပ်တို့၏ညီအစ်မသည် သတင်းကောင်းဟောပြောဝေမျှရန် အခွင့်အခါကောင်းကို ဖန်တီးခဲ့သည်။
၁၆ အမေရိကန်ပြည်ထောင်စုမှ ညီအစ်မတစ်ဦးသည် ပုဂ္ဂလိကဆေးရုံတစ်ခုသို့ သွားရောက်လည်ပတ်သောအခါ ဤသို့တွေ့ကြုံခဲ့ရသည်– သူသည် ထိုဆေးရုံ၏ လုပ်ငန်းတာဝန်ခံ ဒါရိုက်တာလူကြီးတစ်ဦးထံ ချဉ်းကပ်ပြီး ထိုတွင်နေထိုင်သူများ၏ ဝိညာဉ်ရေးလိုအပ်ရာများကို စေတနာအလျောက် ဖြည့်ဆည်းပေးလိုကြောင်း စကားကမ်းလှမ်းခဲ့သည်။ မိမိ၏အခမဲ့ကျမ်းစာသင်တန်းကို တက်ရောက်လိုသူအားလုံးနှင့် ကျမ်းစာသင်အံမှု အပတ်စဉ်ကျင်းပလိုကြောင်းလည်း ထိုညီအစ်မက ပြောပြသည်။ ဒါရိုက်တာလူကြီးက သူ့ကို လူနာခန်းအသီးသီးသို့ လည်ပတ်သွားခွင့်ပြုသည်။ မကြာမီ သူသည် ထိုဆေးရုံတွင်နေထိုင်သူ စုစုပေါင်း ၂၆ ဦးနှင့် တစ်ပတ်လျှင်သုံးကြိမ် ကျမ်းစာသင်အံမှုကျင်းပခွင့်ရသည်၊ သူတို့ထဲမှတစ်ဦးသည် ကျွန်ုပ်တို့၏အစည်းအဝေးများကို မှန်မှန်တက်ရောက်နေပြီ။
၁၇။ အိမ်တွင်းကျမ်းစာသင်အံမှုများ စရန် အဘယ်ချဉ်းကပ်နည်းသည် ထိရောက်လေ့ရှိသနည်း။
၁၇ ဘုရားသခင့် နိုင်ငံတော်ကြွေးကြော်သူ အချို့အတွက် ကျမ်းစာသင်အံမှု တိုက်ရိုက်ကမ်းလှမ်းခြင်းက အကျိုးပြုသည်။ ကြေညာသူ ၁၀၅ ဦးရှိသော အသင်းတော်တစ်ခုသည် နံနက်ခင်းတစ်ခုတွင် သူတို့တွေ့ဆုံသမျှအိမ်ရှင်တိုင်းကို ကျမ်းစာသင်အံမှုကမ်းလှမ်းဖို့ အထူးကြိုးစားခဲ့ကြသည်။ ထိုနေ့တွင် လယ်ကွင်းလုပ်ငန်း၌ ကြေညာသူရှစ်ဆယ့်ခြောက်ယောက် ပါဝင်ခဲ့ရာ နှစ်နာရီကြာ ဟောပြောပြီးနောက် အနည်းဆုံး ကျမ်းစာသင်အံမှုအသစ် ၁၅ ခုစတင်ခဲ့ရကြောင်း သူတို့တွေ့ရှိခဲ့ကြသည်။
ထိုက်တန်သူများကို ဆက်လက်ရှာဖွေနေပါ
၁၈၊ ၁၉။ ယေရှုထံမှလာသော အဘယ်အရေးကြီးသည့်ညွှန်ကြားချက်ကို ကျွန်ုပ်တို့စိတ်စွဲမှတ်ထားသင့်သနည်း၊ ထိုသို့ဖြစ်စေရန် အဘယ်အရာပြုလုပ်ဖို့ ကျွန်ုပ်တို့စိတ်ပိုင်းဖြတ်ထားသင့်သနည်း။
၁၈ ဘုရားသခင့် နိုင်ငံတော်ကြွေးကြော်သူတစ်ဦးအနေနှင့် အသင်သည် ဤဆောင်းပါးတွင်ဖော်ပြထားသော အကြံပြုချက်များကို စမ်းသပ်ကြည့်လိုပေမည်။ သက်သေခံနိုင်သည့်နည်းလမ်းများကို သုံးသပ်ဆင်ခြင်သောအခါ ဒေသခံထုံးတမ်းများကို ထည့်တွက်လျှင် ပညာရှိရာရောက်ပေမည်။ ထို့ထက်ကား ထိုက်တန်သူများကိုရှာဖွေပြီး သူတို့ကို တပည့်ဖြစ်လာစေရန် ကူညီပေးပါဟူသော ယေရှု၏ညွှန်ကြားချက်ကို စိတ်စွဲမှတ်ထားကြစို့။—မဿဲ ၁၀:၁၁; ၂၈:၁၉။
၁၉ ထိုသို့ပြုနိုင်ရန် ‘အမှန်တရားကို မှန်ကန်စွာကိုင်တွယ်’ ကြပါစို့။ ကျမ်းစာအပေါ် အခိုင်အမာအခြေပြုသော သွေးဆောင်နည်းကိုအသုံးပြုခြင်းဖြင့် ထိုသို့ပြုနိုင်ကြသည်။ ဤသို့ပြုခြင်းက လက်ခံနားထောင်သူတို့၏နှလုံးကို ထိမိပြီး ပြုမူလုပ်ဆောင်ရန် လှုံ့ဆော်ပေးပါလိမ့်မည်။ ယေဟောဝါကို မှီခိုအားထားဆုတောင်းကြစဉ် ယေရှုခရစ်၏တပည့်များဖြစ်လာစေရန် အချို့သူများကိုကူညီပေးနိုင်မည်။ ဤလုပ်ငန်းသည် အလွန်အကျိုးပြုသောလုပ်ငန်းပါတကား! ထို့ကြောင့် ကျွန်ုပ်တို့သည် တပည့်များဖြစ်စေရန် ရည်ရွယ်ချက်ဖြင့် ဟောပြောပြီး စိတ်အားထက်သန်စွာဖြင့် ဘုရားသခင့်နိုင်ငံတော်သတင်းကြွေးကြော်၍ ယေဟောဝါကို အစဉ်ဂုဏ်တင်ကာ ‘ဘုရားသခင့်ရှေ့၌ နှစ်သက်တော်မူဖွယ်သောသူများအဖြစ် မိမိတို့ကိုယ်ကိုဆက်သခြင်းငှာ ကြိုးစားအားထုတ်’ ကြပါစို့။—၂ တိမောသေ ၂:၁၅။
[အောက်ခြေမှတ်ချက်များ]
^ အပိုဒ်၊ 12 ယေဟောဝါသက်သေများထုတ်ဝေခဲ့။
^ အပိုဒ်၊ 14 ယေဟောဝါသက်သေများထုတ်ဝေခဲ့။
သင်မှတ်မိသလော
• အာပေါလုသည် ဘုရားသခင်၏နည်းလမ်းတော်များကို သာ၍သေချာစွာသင်ကြားခံရဖို့ အဘယ်ကြောင့် လိုအပ်ခဲ့သနည်း။
• ပြစ်ကိလနှင့် အာကုလတို့သည် တမန်တော်ပေါလုထံမှ အဘယ်နည်းများဖြင့် သင်ယူခဲ့ကြသနည်း။
• တပည့်ဖြစ်စေခြင်းလုပ်ငန်းနှင့်ပတ်သက်၍ တမန်တော်ကျမ်းအခန်းကြီး ၁၈ မှ သင်အဘယ်အရာ သင်ယူခဲ့ပြီနည်း။
• တပည့်များဖြစ်စေရန် အခွင့်အလမ်းများကို သင်မည်သို့ဖန်တီးနိုင်သနည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
ပြစ်ကိလနှင့် အာကုလတို့သည် အာပေါလုအား “ဘုရားသခင်၏[ခရစ်ယာန်]ဘာသာတရားကို သာ၍သေချာစွာသင်ကြားကြ၏”
[စာမျက်နှာ ၂၀ ပါ ရုပ်ပုံ]
အာပေါလုသည် တပည့်များဖြစ်စေခြင်းလုပ်ငန်းတွင် သာ၍ကျွမ်းကျင်သူဖြစ်လာခဲ့
[စာမျက်နှာ ၂၁ ပါ ရုပ်ပုံ]
ပေါလုသည် သွားလေရာအရပ်၌ ဟောပြောခဲ့
[စာမျက်နှာ ၂၃ ပါ ရုပ်ပုံ]
ဟောပြောရန် အခွင့်အလမ်းများဖန်တီးပေးပါ