ဘုရားသခင့်နိုင်ငံတော်သတင်းကို လက်ခံရန် အခြားသူများအားကူညီ
ဘုရားသခင့်နိုင်ငံတော်သတင်းကို လက်ခံရန် အခြားသူများအားကူညီ
“အဂြိပ္ပမင်းကလည်း၊ သင်သည်ဖြားယောင်းသွေးဆောင်သောအားဖြင့် ငါသည်ခရစ်ယာန်ဖြစ်လုပြီဟု ပေါလုအားပြောဆို . . . ၏။”—တမန်တော် ၂၆:၂၈။
၁၊ ၂။ တမန်တော်ပေါလုသည် ဖေတ္တုမင်းနှင့် ဘုရင်ဟေရုဒ်အဂြိပ္ပ ၂ ရှေ့မှောက် အဘယ်ကြောင့် ရောက်ခဲ့ရသနည်း။
စီ.အီး. ၅၈ ခုနှစ်တွင် ကဲသရိမြို့ရှိ ရောမဘုရင်ခံပေါကိဖေတ္တုထံသို့ ဘုရင်ဟေရုဒ်အဂြိပ္ပ ၂ နှင့် သူ၏ညီမဗေရနိတ်တို့ အလည်လာကြသည်။ ဖေတ္တုမင်းဖိတ်ခေါ်သည့်အတွက် ယေရုရှလင်မြို့မှ သူတို့ရောက်လာခြင်းဖြစ်သည်။ နောက်တစ်နေ့တွင် သူတို့သည် “များစွာသောဂုဏ်အသရေကိုဆောင်လျက်၊ စစ်သူကြီးတို့မှစ၍ ထိုမြို့၌ထင်ရှားသောသူများတို့နှင့်တကွ အိမ်တော်ဦးသို့ဝင်ကြ” ၏။ ဖေတ္တု၏အမိန့်ဖြင့် ခရစ်ယာန်တမန်တော်ပေါလုကို ရှေ့တော်သို့သွင်းကြ၏။ ယေရှုခရစ်၏ အဆိုပါနောက်လိုက်သည် အဘယ်ကြောင့် ဖေတ္တုမင်း၏တရားပလ္လင်ရှေ့မှောက် ရပ်ခဲ့ရသနည်း။—တမန်တော် ၂၅:၁၃-၂၃။
၂ ဧည့်သည်တော်များကို ဖေတ္တုပြောခဲ့သောစကားက ထိုမေးခွန်းကိုဖြေဆိုပေးပါသည်။ သူဤသို့ဆို၏– “အဂြိပ္ပမင်းကြီးမှစ၍ ယခုရှိသောသူအပေါင်းတို့၊ ဤသူကိုကြည့်ကြပါလော့။ ယေရုရှလင်မြို့၌လည်းကောင်း၊ ဤမြို့၌လည်းကောင်း ယုဒလူများအပေါင်းတို့သည် ဤသူ၏အကြောင်းကို အကျွန်ုပ်အားလျှောက်၍ သူသည် ခဏမျှအသက်မရှင်ထိုက်ပါဟုဟစ်ကြ၏။ သူသည် သေထိုက်သောအပြစ်မပြုကြောင်းကို ကျွန်ုပ်သိမြင်၍လည်းကောင်း၊ သူသည် ဘုန်းကြီးတော်မူသောဘုရင်၏ အယူတော်ကိုခံပါမည်ဟုဆို၍လည်းကောင်း သူ့ကို အထံတော်သို့စေလွှတ်စေခြင်းငှာ ကျွန်ုပ်စီရင်၏။ သူ၏အကြောင်းကိုရေးထား၍ ရှင်ဘုရင်ထံတော်သို့ပေးလိုက်စရာဖို့၊ သေချာသောအကြောင်းတစ်စုံတစ်ခုမျှ ကျွန်ုပ်၌မရှိ။ ထို့ကြောင့် သင်တို့သည် သူ့ကိုစစ်ကြောပြီးမှ ကျွန်ုပ်ရေး၍ပေးလိုက်စရာအကြောင်းရှိစေခြင်းငှာ သင်တို့ရှေ့၌လည်းကောင်း သူ့ကိုကျွန်ုပ်ထုတ်၍ပြ၏။ အကြောင်းမူကား၊ အကျဉ်းခံသောသူကို အပြစ်မပြဘဲစေလွှတ်သော် မလျော်မသင့်ဖြစ်မည်ထင်ပါသည်။”—တမန်တော် ၂၅:၂၄-၂၇။
၃။ ပေါလုကို ဝတ်ပြုရေးခေါင်းဆောင်များ အဘယ်ကြောင့်စွပ်စွဲခဲ့ကြသနည်း။
၃ ပေါလုသည် ပုန်ကန်ရန်လှုံ့ဆော်သည်ဟူသော သေဒဏ်စီရင်ထိုက်သည့်ပြစ်မှုဖြင့် မတရားစွပ်စွဲခံနေရကြောင်း ဖေတ္တု၏စကားများက ဖော်ပြသည်။ (တမန်တော် ၂၅:၁၁) သို့သော် ပေါလုသည် အပြစ်မရှိပါ။ ထိုစွပ်စွဲချက်များကို ယေရုရှလင်မြို့ရှိ မနာလိုသောဘာသာရေးခေါင်းဆောင်များ စတင်ပြောဆိုခဲ့သည်။ သူတို့သည် ဘုရားသခင့်နိုင်ငံတော်သတင်း ကြွေးကြော်သူ ပေါလု၏လုပ်ငန်းကို အတိုက်အခံပြုကြပြီး အခြားသူများအား ယေရှုခရစ်၏နောက်လိုက်များဖြစ်လာစေသည်ကို လုံးဝမကျေနပ်ကြချေ။ ပေါလုသည် အစောင့်အကြပ်ထူထပ်စွာဖြင့် ယေရုရှလင်မြို့မှ ကဲသရိဆိပ်ကမ်းမြို့သို့ ခေါ်ဆောင်ခံခဲ့ရပြီး ထိုတွင် ကဲသာဘုရင်ကို သူအယူခံဝင်ခဲ့သည်။ ထိုနေရာမှတစ်ဆင့် ရောမမြို့သို့ခေါ်ဆောင်သွားကြမည်ဖြစ်သည်။
၄။ အဘယ်အံ့အားသင့်စရာစကားကို အဂြိပ္ပမင်းမြွက်ဆိုခဲ့သနည်း။
၄ ဘုရင်ခံ၏နန်းတော်တွင် ရောမအင်ပါယာ၏ အရေးပါသောပြည်နယ်မှ အုပ်စိုးရှင်ပါဝင်သော လူစုရှေ့ရောက်နေသည့် ပေါလုကိုမြင်ယောင်ကြည့်ပါ။ အဂြိပ္ပမင်းက “သင်သည် . . . ပြောရသောအခွင့်ရှိသည်” ဟုပေါလုအားဆို၏။ ပေါလုစကားပြောနေစဉ် ထူးခြားသောအမှုတစ်ခုဖြစ်လာသည်။ ပေါလုပြောလိုက်သောစကားသည် ဘုရင်၏နှလုံးကို ထိမိစပြုလေသည်။ အမှန်တွင် အဂြိပ္ပမင်းက “သင်သည်ဖြားယောင်းသွေးဆောင်သောအားဖြင့် ငါသည် ခရစ်ယာန်ဖြစ်လုပြီ” ဟုဆိုခဲ့၏။—တမန်တော် ၂၆:၁-၂၈။
၅။ အဂြိပ္ပအားပြောဆိုခဲ့သော ပေါလု၏စကားများသည် အဘယ်ကြောင့် ဤမျှထိရောက်ခဲ့သနည်း။
၅ စဉ်းစားကြည့်ပါ! ပေါလု၏ ကျွမ်းကျင်လိမ္မာသောထုချေချက်ကြောင့် သမ္မာကျမ်းစာ၏ ထိုးဖောက်နိုင်စွမ်းသည် အုပ်စိုးရှင်တစ်ပါး၏နှလုံးကို ထိမိခဲ့သည်။ (ဟေဗြဲ ၄:၁၂) ပေါလု၏ထုချေချက်ကို ဤမျှထိရောက်စေသည်ကား အဘယ်နည်း။ တပည့်ဖြစ်စေခြင်းလုပ်ငန်းတွင် ကျွန်ုပ်တို့ကို အထောက်အကူပြုနိုင်သော အဘယ်အရာကို ပေါလုထံမှ သင်ယူနိုင်သနည်း။ သူ၏ထုချေချက်ကို ကျွန်ုပ်တို့ဆန်းစစ်လေ့လာကြည့်လျှင် ဤအဓိကအချက်နှစ်ချက် ပေါ်လွင်ထင်ရှားသည်– (၁) ပေါလုသည် သူ၏တင်ဆက်မှုတွင် သွေးဆောင်နိုင်စွမ်းရှိခဲ့သည်။ (၂) လက်မှုပညာသည်တစ်ဦးသည် ကိရိယာတစ်ခုကို ထိရောက်စွာအသုံးပြုသကဲ့သို့ သူသည် သမ္မာကျမ်းစာအသိပညာကို ကျွမ်းကျင်လိမ္မာစွာ အသုံးပြုခဲ့သည်။
သွေးဆောင်ခြင်းနည်းပညာကို အသုံးပြု
၆၊ ၇။ (က) သမ္မာကျမ်းစာတွင် အသုံးပြုထားသည့်အတိုင်း ‘သွေးဆောင်ခြင်း’ ၏အဓိပ္ပာယ်ကား အဘယ်နည်း။ (ခ) ကျမ်းစာသွန်သင်ချက်တစ်ခုကို အခြားသူများ လက်ခံလာစေရာတွင် သွေးဆောင်ခြင်းသည် အဘယ်အခန်းကဏ္ဍမှပါဝင်သနည်း။
၆ တမန်တော်ကျမ်းတွင် သွေးဆောင်ခြင်းဟူသော ဂရိစကားလုံးကို ပေါလုနှင့်ဆက်စပ်၍ ကြိမ်ဖန်များစွာ အသုံးပြုထားသည်။ ထိုစကားလုံးသည် ကျွန်ုပ်တို့၏ တပည့်ဖြစ်စေခြင်းလုပ်ငန်းနှင့်ပတ်သက်၍ အဘယ်အဓိပ္ပာယ်ရှိသနည်း။
၇ ခရစ်ယာန်ဂရိကျမ်းစာ၏ မူရင်းဘာသာစကားတွင် “သွေးဆောင်” ဟူသည် “အောင်နိုင်သည်” သို့မဟုတ် “ကျိုးကြောင်းဆင်ခြင်မှု သို့မဟုတ် ကျင့်ဝတ်ဆိုင်ရာသုံးသပ်မှုများ၏ ဩဇာဖြင့် စိတ်သဘောထားပြောင်းလဲစေခြင်း” ဖြစ်သည်ဟု ဗိုင်း၏ကျမ်းစာစကားလုံးများဆိုင်ရာ ရှင်းလင်းဖော်ပြချက်အဘိဓာန်ကဆို၏။ ထိုစကားလုံး၏အဓိပ္ပာယ်ရင်းမြစ်ကို ဆန်းစစ်ကြည့်ခြင်းက ထပ်ဆင့်အလင်းဖြာပေးသည်။ ယင်းသည် ယုံကြည်စိတ်ချသည့်သဘောဆောင်သည်။ ထို့ကြောင့် ကျမ်းစာသွန်သင်ချက်တစ်ခုကို လူတစ်ဦးလက်ခံစေဖို့ သင်သွေးဆောင်နိုင်ပြီဆိုလျှင် ၎င်းသွန်သင်ချက်မှန်ကြောင်း သူယုံကြည်လာစေဖို့ သူ၏ယုံကြည်စိတ်ချမှုကို သင်ရရှိခဲ့ပြီ။ ရှင်းနေသည်ကား၊ သမ္မာကျမ်းစာ၏အဆိုကို ယုံကြည်ပြီး ထိုအတိုင်းလုပ်ဆောင်ဖို့ လူတစ်ဦးကိုပြောရုံနှင့် မလုံလောက်ချေ။ သင့်အား နားထောင်သူသည် ကလေးတစ်ဦးဖြစ်စေ၊ အိမ်နီးချင်းတစ်ဦးဖြစ်စေ၊ လုပ်ဖော်ကိုင်ဖက်တစ်ဦးဖြစ်စေ၊ ကျောင်းနေဖက်တစ်ဦးဖြစ်စေ၊ ဆွေမျိုးတစ်ဦးဖြစ်စေ သင်ပြောဆိုသောအကြောင်းသည် မှန်သည်ဟု ယုံကြည်စိတ်ချရမည်။—၂ တိမောသေ ၃:၁၄၊ ၁၅။
၈။ လူတစ်ဦးအား ကျမ်းစာအမှန်တရားကို ယုံကြည်လက်ခံစေလိုခြင်းတွင် အဘယ်အရာပါဝင်သနည်း။
၈ သမ္မာကျမ်းစာမှ သင်ပြောဆိုသောစကားသည် အမှန်တရားဖြစ်ကြောင်း လူတစ်ဦးကို မည်သို့လက်ခံယုံကြည်စေနိုင်မည်နည်း။ ကျိုးကြောင်းညီညွတ်စွာဆင်ခြင်ခြင်း၊ ယုတ္တိရှိစွာအကြောင်းပြခြင်း၊ စိတ်အားထက်သန်စွာ တောင်းပန်ခြင်းဖြင့် ပေါလုသည် တရားနာသူတို့၏စိတ် ပြောင်းလဲသွားရန် ကြိုးစားအားထုတ်ခဲ့သည်။ * ထို့ကြောင့် အကြောင်းအရာတစ်ခုမှန်သည်ဟု အခိုင်အမာပြောရုံပြောမည့်အစား သင်၏အဆိုကိုထောက်ခံသော ကျေနပ်ဖွယ်အထောက်အထားများ ပေးဖို့လိုသည်။ ယင်းကို သင်မည်သို့ပြုလုပ်နိုင်သနည်း။ သင်၏အဆိုကို ကိုယ်ပိုင်အယူအဆပေါ်မဟုတ်ဘဲ သမ္မာကျမ်းစာပေါ် အခိုင်အမာအခြေပြုကြောင်း အသေအချာသဘောပေါက်စေပါ။ ထို့ပြင် သင်အခိုင်အမာယုံကြည်သော ကျမ်းစာဖော်ပြချက်များကို ထောက်ခံရန် အခြားအထောက်အထားများ တင်ပြပါ။ (သု. ၁၆:၂၃၊ သမ္မာ) ဥပမာ၊ နာခံမှုရှိသူများသည် မြေကြီးပရဒိသုတွင် အသက်ရမည်ဟု သင်ပြောလိုပါက ထိုဖော်ပြချက်ကို လုကာ ၂၃:၄၃; ဟေရှာယ ၆၅:၂၁-၂၅ စသည့် ကျမ်းချက်များကိုးကားပြီး ထောက်ခံပြောဆိုပါ။ သင်၏ကျမ်းဆိုင်ရာအချက်ကို ထောက်ခံရန် မည်သို့အထောက်အထားပေးနိုင်သနည်း။ ကြားနာသူ၏အတွေ့အကြုံအသိမှ ဥပမာများကို အသုံးပြုနိုင်သည်။ နေဝင်ဆည်းဆာအလှမှဖြစ်စေ၊ ပန်းတစ်ပွင့်၏မွှေးရနံ့မှဖြစ်စေ၊ သစ်သီးတစ်လုံး၏အနံ့အရသာမှဖြစ်စေ၊ သားငယ်များကို မိခင်ငှက်မကြီး အစာကျွေးနေသည့်မြင်ကွင်းမှဖြစ်စေ အခမဲ့ ပျော်ရွှင်မှုရိုးရိုးလေးကို သူ့အားပြန်သတိရစေပါ။ အဆိုပါစိတ်ကြည်နူးဖွယ်ရာများသည် မြေကြီးအသက်တာကို ဖန်ဆင်းရှင်ပျော်မွေ့စေလိုသော သက်သေသာဓကများဖြစ်ကြောင်း သူ့အားသိမြင်စေပါ။—ဒေ. ၃:၁၁၊ ၁၂။
၉။ ကျွန်ုပ်တို့၏ဟောပြောခြင်းလုပ်ငန်းတွင် အကျိုးသင့်အကြောင်းသင့်ရှိခြင်းကို မည်သို့တင်ပြနိုင်သနည်း။
၉ ကျမ်းစာသွန်သင်ချက်တစ်ခုကို လူတစ်ဦးလက်ခံလာစေရန် ကြိုးစားသွေးဆောင်ရာတွင် သင်၏စိတ်ထက်သန်မှုကြောင့် အကျိုးသင့်အကြောင်းသင့်မရှိ၊ တစ်ယူသန်ဆန်သည့်ပုံ မထွက်စေဖို့ သတိပြုပါ၊ သို့ဖြစ်လျှင် ကြားနာသူ၏စိတ်နှလုံးတံခါးကို ပိတ်သွားစေမည်။ ဓမ္မအမှုကျောင်းစာအုပ်က ဤသို့သတိပေးသည်– “သူတစ်ထူး၏ အမြတ်တနိုးယုံကြည်ချက်တစ်ရပ်ကို အမှားဟု အမှန်အတိုင်း တုံးတိတိပြောဆိုလိုက်ခြင်းသည် ကျမ်းချက်တသီတတန်းကြီးက ကျားကန်ပေးထားသည့်တိုင် ယေဘုယျအားဖြင့် ကောင်းကျိုးရလေ့မရှိပေ။ ဥပမာအနေနှင့် အများကျင်းပနေသော အထိမ်းအမှတ်ပွဲများသည် အယူလွဲဘာသာမှ မြစ်ဖျားခံသည်ဟု ရှုတ်ချပြစ်တင်မည်ဆိုလျှင် ယင်းတို့အပေါ် လူတို့၏ခံစားချက်ကို ပြောင်းလဲမပစ်နိုင်ပေ။ အများအားဖြင့် ကျိုးကြောင်းဆင်ခြင်သည့်နည်းဖြင့် ချဉ်းကပ်ပုံသည် ပို၍အောင်မြင်လေ့ရှိသည်။” အကျိုးသင့်အကြောင်းသင့်ရှိရန် အဘယ်ကြောင့် အစွမ်းကုန်ကြိုးစားသင့်သနည်း။ ထိုစာအုပ်က ဤသို့ဆို၏– “ကျိုးကြောင်းဆင်ခြင်ပုံဖြင့် ပြောဆိုခြင်းသည် ဆွေးနွေးလာစေရန် အားပေးပြီး နောက်ပိုင်းတွင် လူတို့အား စဉ်းစားတွေးတောစေသည်၊ နောက်နောင် စကားလက်ဆုံပြောဆိုဖို့ လမ်းစဖွင့်ပေးသည်။ ယင်းသည် တကယ်ပင် သွေးဆောင်နိုင်စွမ်းရှိသည်။”—ကောလောသဲ ၄:၆။
နှလုံးကိုထိမိလှုပ်ရှားစေသော သွေးဆောင်မှု
၁၀။ ပေါလုသည် အဂြိပ္ပမင်းရှေ့ သူ၏ထုချေချက်ကို မည်သို့နိဒါန်းပျိုးခဲ့သနည်း။
၁၀ တမန်တော်ကျမ်းအခန်းကြီး ၂၆ ပါ ပေါလု၏ထုချေစကားများကို အသေအချာသုံးသပ်ကြည့်ကြစို့။ သူ၏ဟောပြောချက်ကို မည်သို့စတင်ခဲ့ကြောင်း သတိပြုပါ။ အဂြိပ္ပသည် နှမတော်ဗေရနိတ်နှင့် ကြားမကောင်းသောဆက်ဆံရေးရှိနေသော်လည်း ပေါလုသည် သူဟောမည့်အကြောင်းကို နိဒါန်းပျိုးရန် မင်းကြီးအား ချီးမွမ်းပြောဆိုဖို့ အကြောင်းကောင်းတစ်ခုကို သူရှာတွေ့ခဲ့သည်။ ပေါလုဤသို့ဆိုခဲ့သည်– “အဂြိပ္ပမင်းကြီး၊ ယုဒလူတို့သည် အကျွန်ုပ်ကိုအမှုလုပ်သမျှသောအရာမှာ၊ ရှေ့တော်၌အပြစ်ဖြေရာစကားကို ယနေ့ပြောရမည်အကြောင်းကိုလည်းကောင်း၊ ထိုမျှမက ကိုယ်တော်သည် ယုဒထုံးတမ်း၊ ပုစ္ဆာအမေးများကို လေ့ကျက်တော်မူကြောင်းကိုလည်းကောင်း အကျွန်ုပ်ထောက်၍ ကိုယ်၌မင်္ဂလာရှိသည်ဟု ကိုယ်ကိုထင်မှတ်ပါ၏။ ထို့ကြောင့် သည်းခံသောစိတ်တော်နှင့် အကျွန်ုပ်စကားကိုနားထောင်တော်မူမည်အကြောင်း အသနားတော်ခံပါ၏။”—တမန်တော် ၂၆:၂၊ ၃။
၁၁။ အဂြိပ္ပအား ပေါလုပြောဆိုခဲ့သောစကားများက ရိုသေလေးစားမှုကို မည်သို့ဖော်ပြသနည်း၊ အဘယ်ရလဒ်ရခဲ့သနည်း။
၁၁ အဂြိပ္ပအား၊ မင်းကြီးဟူသည့်သူ၏ဘွဲ့ဖြင့်ခေါ်ဆိုခြင်းဖြင့် သူ၏အဆင့်မြင့်ရာထူးကို ပေါလုအသိအမှတ်ပြုခဲ့ကြောင်း သတိပြုမိသလော။ ဤသို့ပြုခြင်းက ရိုသေလေးစားမှုပြရာရောက်သည်၊ ထို့ပြင် ပညာရှိစွာ စကားလုံးရွေးချယ်ပြောဆိုခြင်းဖြင့် ပေါလုသည် အဂြိပ္ပကို ဂုဏ်တင်ခဲ့သည်။ (၁ ပေတရု ၂:၁၇) အဂြိပ္ပသည် ဂျူးပြည်သူပြည်သားများ၏ ရှုပ်ထွေးသောထုံးတမ်းများနှင့် ပညတ်များကို သိကျွမ်းသူဖြစ်ကြောင်း အသိအမှတ်ပြု၍ ဤမျှဗဟုသုတကြွယ်သောအုပ်စိုးရှင်အရှေ့ မိမိထုချေပြောဆိုခွင့်ရသည့်အတွက် ဝမ်းသာကြောင်း ပေါလုပြောခဲ့သည်။ ခရစ်ယာန်တစ်ဦးဖြစ်သော ပေါလုသည် ခရစ်ယာန်မဟုတ်သူ အဂြိပ္ပထက် သာလွန်သည့်အလား မပြုမူခဲ့ပါ။ (ဖိလိပ္ပိ ၂:၃) ထိုသို့ပြုမည့်အစား မိမိအား စိတ်ရှည်စွာနားထောင်ပေးဖို့ ရှင်ဘုရင်ကို ပေါလုအသနားခံခဲ့သည်။ သို့ဖြင့် ပေါလုသည် မိမိတင်ဆက်မည့်အကြောင်းအရာကို အဂြိပ္ပနှင့် အခြားနားဆင်သူများပါ လက်ခံနိုင်ဖွယ်ဖြစ်စေမည့် ဝန်းကျင်အခြေအနေမျိုးကို ဖြစ်ပေါ်စေခဲ့သည်။ သူသည် မိမိ၏ချေပချက်များကို တည်ဆောက်နိုင်မည့် နှစ်ဦးနှစ်ဖက်သဘောတူနိုင်သောအနေအထားကို ဖန်တီးနေခဲ့ခြင်းဖြစ်သည်။
၁၂။ ဘုရားသခင့်နိုင်ငံတော်သတင်း ကြွေးကြော်ခြင်းလုပ်ငန်းတွင် နားထောင်သူတို့၏နှလုံးကို မည်သို့ထိမိလှုပ်ရှားစေနိုင်သနည်း။
၁၂ အဂြိပ္ပအရှေ့ရောက်နေသော ပေါလုနည်းတူ ကျွန်ုပ်တို့သည် ဘုရားသခင့်နိုင်ငံတော်သတင်းတရားကို တင်ဆက်သောအခါ နိဒါန်းမှသည် နိဂုံးချုပ်အထိ ကြားနာသူ၏နှလုံးကို ထိမိလှုပ်ရှားစေဖို့ ကြိုးစားကြပါစို့။ ကျွန်ုပ်တို့ဟောပြောနေသူအား အရိုးခံလေးစားမှုပြခြင်း၊ ထိုသူ၏ပုဂ္ဂလိကနောက်ခံနှင့် အတွေးအခေါ်တို့ကို အမှန်စိတ်ဝင်စားမှု တင်ပြခြင်းအားဖြင့် ထိုသို့ပြုနိုင်ပါသည်။—၁ ကောရိန္သု ၉:၂၀-၂၃။
သမ္မာကျမ်းစာကို ကျွမ်းကျင်စွာအသုံးပြု
၁၃။ သင်သည် ပေါလုနည်းတူ ကြားနာသူတို့ကို မည်သို့လှုံ့ဆော်ပေးနိုင်သနည်း။
၁၃ ပေါလုသည် သတင်းကောင်းနှင့်အညီ လုပ်ဆောင်ရန် မိမိအား နားထောင်သူတို့ကို လှုံ့ဆော်ပေးလိုစိတ်ရှိခဲ့သည်။ (၁ သက်သာလောနိတ် ၁:၅-၇) ထို့ကြောင့် သူသည် စေ့ဆော်မှုပင်ရင်းဖြစ်သော သူတို့၏ပုံဆောင်နှလုံးကို ထိမိလှုပ်ရှားစေခဲ့သည်။ အဂြိပ္ပမင်းအရှေ့ ပေါလု၏ထုချေချက်ကို ပြန်သုံးသပ်ကြည့်ရာတွင် မောရှေနှင့် ပရောဖက်များ၏ဖော်ပြချက်များကို ကိုးကားခြင်းဖြင့် ‘ဘုရားသခင့်နှုတ်မြွက်စကားတော်ကို’ ပေါလုမည်သို့ ‘မှန်ကန်စွာကိုင်တွယ်ခဲ့’ ကြောင်း သတိပြုပါ။—၂ တိမောသေ ၂:၁၅။
၁၄။ အဂြိပ္ပမင်းရှေ့တွင် သွေးဆောင်ခြင်းကို ပေါလုမည်သို့အသုံးပြုခဲ့ကြောင်း ရှင်းပြပါ။
၁၄ အဂြိပ္ပမင်းသည် အမည်ခံဂျူးတစ်ဦးသာဖြစ်ကြောင်း ပေါလုသိထားသည်။ ယုဒဘာသာနှင့်ပတ်သက်၍ အဂြိပ္ပသိကျွမ်းထားရာကို အကြောင်းပြုပြီး ပေါလုက မိမိဟောပြောသည့်အကြောင်းသည် အမှန်အားဖြင့် မေရှိယ၏သေခြင်း၊ ရှင်ပြန်ထမြောက်ခြင်းနှင့်ပတ်သက်သည့် “မောရှေမှစသော ပရောဖက်များတို့ဟောပြောသောစကားထက် . . . မလွန်” ကြောင်း ကျိုးကြောင်းဆင်ခြင်ပြခဲ့သည်။ (တမန်တော် ၂၆:၂၂၊ ၂၃) အဂြိပ္ပကို ပေါလုက “အိုအဂြိပ္ပမင်းကြီး၊ ကိုယ်တော်သည် အနာဂတ္တိကျမ်းစာကိုယုံတော်မူသလော” ဟု တိုက်ရိုက်မေးမြန်းခဲ့သည်။ ထိုအခါ အဂြိပ္ပမင်း အကျပ်ရိုက်ခဲ့သည်။ ပရောဖက်များကို မယုံဟုဆိုလိုက်ပါက ယုံကြည်သူဂျူးတစ်ဦးအဖြစ် သူ့အသရေပျက်ချေမည်။ သို့သော် ပေါလုနှင့် သူသဘောတူလိုက်ပါက တမန်တော်နှင့် တစ်တန်းတစ်စားတည်းဖြစ်သွားပြီး သူ့ကို ခရစ်ယာန်တစ်ဦးဟု ခေါ်ကြတော့မည်။ ပေါလုသည် မိမိ၏မေးခွန်းကို အမြော်အမြင်ရှိရှိ ဤသို့ဖြေဆိုခဲ့သည်– “ယုံတော်မူသည်ကို အကျွန်ုပ်သိပါသည်။” အဂြိပ္ပသည် မည်သို့ဖြေဆိုရန် လှုံ့ဆော်ခံရသနည်း။ သူက “သင်သည်ဖြားယောင်းသွေးဆောင်သောအားဖြင့် ငါသည် ခရစ်ယာန်ဖြစ်လုပြီ” ဟုတုံ့ပြန်ခဲ့သည်။ (တမန်တော် ၂၆:၂၇၊ ၂၈) အဂြိပ္ပသည် ခရစ်ယာန်တစ်ဦးဖြစ်မလာသော်လည်း ပေါလု၏သတင်းတရားသည် သူ့နှလုံးကို အတော်အတန်ထိမိခဲ့ကြောင်း ထင်ရှားပါသည်။—ဟေဗြဲ ၄:၁၂။
၁၅။ သက်သာလောနိတ်မြို့တွင် အသင်းတော်တစ်ခုကို ပေါလု မည်သို့တည်ထောင်နိုင်ခဲ့သနည်း။
၁၅ သတင်းကောင်းကို ပေါလုတင်ဆက်ပုံတွင် ကြေညာခြင်းနှင့် သွေးဆောင်ခြင်း နှစ်မျိုးစလုံးပါဝင်ကြောင်း သတိပြုမိသလော။ ‘ဘုရားသခင့်နှုတ်မြွက်စကားတော်ကို မှန်ကန်စွာကိုင်တွယ်’ စဉ် အဆိုပါချဉ်းကပ်နည်းကို ပေါလုအသုံးပြုခဲ့သောကြောင့် ကြားနာသူအချို့သည် နားထောင်ရုံမက ယုံကြည်သူများဖြစ်လာကြသည်။ သက်သာလောနိတ်မြို့ရှိ တရားဇရပ်တွင် ဂျူးများနှင့် ဘုရားသခင်ကိုကြောက်ရွံ့သော တစ်ပါးအမျိုးသားများကို ပေါလုရှာတွေ့ချိန်၌ ထိုသို့ဖြစ်ခဲ့သည်။ တမန်တော် ၁၇:၂-၄ ပါမှတ်တမ်းကဤသို့ဆို၏– “ပေါလုသည် မိမိထုံးစံရှိသည်အတိုင်း ထိုဇရပ်သို့ဝင်၍၊ ဥပုသ်နေ့သုံးရက်တွင် ကျမ်းစာကိုအမှီပြု၍ ထိုသူတို့နှင့်ဆွေးနွေးနှီးနှောသဖြင့်၊ ခရစ်တော်သည် အသေခံရမည်။ သေခြင်းမှထမြောက်ရမည် . . . ဟူသောအကြောင်းအရာတို့ကို ရှင်းလင်းစွာဖွင့်ပြလေ၏။ ထိုသူအချို့တို့သည် ယုံကြည်ခြင်းသို့ရောက် . . . ကြ၏။” ပေါလုသည် ဖျောင်းဖျသွေးဆောင်ခဲ့သည်။ ယေရှုသည် ကြာမြင့်စွာကတည်းက ကတိထားခဲ့သောမေရှိယဖြစ်ကြောင်း ကျမ်းစာဖြင့် ကျိုးကြောင်းဆင်ခြင်ပြ၊ ရှင်းပြပြီး သက်သေထူခဲ့သည်။ ရလဒ်ကား အဘယ်နည်း။ ယုံကြည်သူများဖြင့် ဖွဲ့စည်းထားသော အသင်းတော်တစ်ခု တည်ထောင်နိုင်ခဲ့သည်။
၁၆။ ဘုရားသခင့်နိုင်ငံတော် ကြွေးကြော်ခြင်းတွင် ပျော်ရွှင်မှု မည်သို့ပိုရနိုင်သနည်း။
၁၆ သမ္မာကျမ်းစာကို သင်ရှင်းပြသောအခါ သွေးဆောင်ခြင်းနည်းပညာ၌ သာ၍ကျွမ်းကျင်လာနိုင်သလော။ ထိုသို့ဖြစ်လျှင် ဘုရားသခင့်နိုင်ငံတော်သတင်းကောင်းကို ဟောပြောသွန်သင်ခြင်းမှ ကျေနပ်မှုနှင့် ပျော်ရွှင်မှုပိုရပါလိမ့်မည်။ ဟောပြောခြင်းလုပ်ငန်းတွင် ကျမ်းစာကိုပိုမိုအသုံးပြုပါဟူသော အကြံပြုချက်များကို လိုက်နာကျင့်သုံးခဲ့ကြသူ သတင်းကောင်းကြေညာသူများသည် ထိုသို့ခံစားနေကြရပြီ။
၁၇။ ကျွန်ုပ်တို့၏ဓမ္မအမှုတွင် ကျမ်းစာအသုံးပြုခြင်းသည် မည်သို့အကျိုးပြုကြောင်းဖော်ပြရန် ကိုယ်ပိုင်တွေ့ကြုံမှုတစ်ခုကို တင်ပြပြောဆိုပါ၊ သို့မဟုတ် အပိုဒ်ထဲမှတွေ့ကြုံမှုကို အတိုချုပ်ဖော်ပြပါ။
၁၇ သာဓကအနေနှင့် ယေဟောဝါသက်သေများ၏ နယ်လှည့်ကြီးကြပ်မှူးတစ်ဦးက ဤသို့စာရေးအကြောင်းကြားသည်– “ယခု ညီအစ်ကို၊ ညီအစ်မအတော်များများသည် တစ်အိမ်မှတစ်အိမ် သက်သေခံသောအခါ ကျမ်းစာကို လက်ထဲဆောင်ထားကြသည်။ ယင်းကြောင့် ကြေညာသူအများသည် သူတို့တွေ့ဆုံသမျှလူတို့အား ကျမ်းချက်တစ်ချက်နှစ်ချက် ဖတ်ပြခွင့်ရကြသည်။ ကျွန်ုပ်တို့၏ဓမ္မအမှုဆိုရာ၌ မဂ္ဂဇင်းများနှင့် စာအုပ်များကိုသာ ဝေခြင်းမဟုတ်ဘဲ သမ္မာကျမ်းစာနှင့်ပတ်သက်နေကြောင်း အိမ်ရှင်နှင့် ကြေညာသူပါ စဉ်းစားမိလာကြပြီ။” ဟောပြောခြင်းလုပ်ငန်းတွင် ကျမ်းစာကိုမြင်သာအောင် ကိုင်ဆောင်ထားမထားဆိုသည်မှာ ဒေသထုံးစံအပါအဝင် အကြောင်းအမျိုးမျိုးအပေါ် မူတည်ပေမည်။ မည်သို့ဆိုစေ ဘုရားသခင့်နိုင်ငံတော်သတင်းတရား လက်ခံလာစေဖို့ အခြားသူများကိုသွေးဆောင်ရာတွင် သမ္မာကျမ်းစာကို ကျွမ်းကျင်စွာအသုံးပြုတတ်သူဖြစ်သည်ဟု နာမည်ကောင်းရသူ ဖြစ်လိုစိတ်ရှိသင့်ပါသည်။
ဓမ္မအမှုအပေါ် ဘုရားသခင့်အမြင်ရှိခြင်း
၁၈၊ ၁၉။ (က) ဘုရားသခင်သည် ကျွန်ုပ်တို့၏ဓမ္မအမှုကို မည်သို့ရှုမြင်သနည်း၊ ကိုယ်တော်၏အမြင်မျိုးကို ကျွန်ုပ်တို့ အဘယ်ကြောင့်မွေးမြူသင့်သနည်း။ (ခ) ပြန်လည်ပတ်မှုများပြုလုပ်ရာတွင် အောင်မြင်ရန် အဘယ်အရာက အထောက်အကူပြုမည်နည်း။ (စာမျက်နှာ ၁၆ ရှိ “ပြန်လည်ပတ်မှုများပြုလုပ်ရာတွင် အောင်မြင်မှုရရှိနိုင်ပုံ” ခေါင်းစဉ်ရှိ လေးထောင့်ကွက်ကိုရှု။)
၁၈ နားထောင်သူများ၏ နှလုံးကိုထိမိရန် အခြားနည်းတစ်နည်းမှာ ကျွန်ုပ်တို့၏ဓမ္မအမှုကို ဘုရားသခင့်အမြင်ဖြင့် ကြည့်မြင်ခြင်းနှင့် စိတ်ရှည်သည်းခံခြင်းရှိဖို့ဖြစ်သည်။ ဘုရားသခင်၏အလိုတော်မှာ လူအပေါင်းတို့သည် ‘တိကျမှန်ကန်သော အမှန်တရားအသိပညာကိုသိစေခြင်းငှာ’ ဖြစ်၏။ (၁ တိမောသေ ၂:၃၊ ၄) ကျွန်ုပ်တို့၏ဆန္ဒလည်း ထိုသို့ဖြစ်သည်မဟုတ်လော။ ယေဟောဝါသည် သည်းခံစိတ်ရှည်တော်မူသောကြောင့် လူများစွာအား နောင်တယူခွင့်ရရှိစေသည်။ (၂ ပေတရု ၃:၉) ထို့ကြောင့် ဘုရားသခင့်နိုင်ငံတော်သတင်းကို နားထောင်လိုသူတစ်ဦးနှင့် တွေ့ဆုံသည့်အခါ ထိုစိတ်ဝင်စားမှုကို ပြုစုပျိုးထောင်ပေးရန် အကြိမ်ကြိမ်ပြန်သွားဖို့လိုပေမည်။ အမှန်တရားမျိုးစေ့ ကြီးထွားလာသည်ကိုစောင့်ကြည့်ဖို့ အချိန်နှင့် သည်းခံမှုလို၏။ (၁ ကောရိန္သု ၃:၆) “ပြန်လည်ပတ်မှုများပြုလုပ်ရာတွင် အောင်မြင်မှုရရှိနိုင်ပုံ” ခေါင်းစဉ်ရှိ ပူးတွဲပါလေးထောင့်ကွက်၌ ထိုစိတ်ဝင်စားမှုကို ပြုစုပျိုးထောင်ပေးရန် အကြံပြုချက်များဖော်ပြထားသည်။ လူတို့၏အသက်တာများ—သူတို့၏ပြဿနာများနှင့် အခြေအနေများ—သည် အမြဲပြောင်းလဲနေကြောင်း သတိရပါ။ သူတို့ကို အိမ်တွင်တွေ့ဖို့ အကြိမ်ကြိမ်ပြန်သွားဖို့ လိုမည်ဖြစ်သော်လည်း ကြိုးစားရကျိုးနပ်ပါသည်။ ကျွန်ုပ်တို့သည် ဘုရားသခင်၏ကယ်တင်ခြင်းသတင်းကို သူတို့အား ကြားနာစေလိုကြသည်။ ထို့ကြောင့် ဘုရားသခင့်နိုင်ငံတော်သတင်းကို အခြားသူများ လက်ခံလာစေဖို့ ကူညီပေးသည့်လုပ်ငန်းတွင် သွေးဆောင်နိုင်စွမ်း တိုးတက်လာစေရန် လိုအပ်သောဉာဏ်ပညာရရှိဖို့ ယေဟောဝါဘုရားသခင်ထံ ဆုတောင်းပါလေ။
၁၉ ဘုရားသခင့်နိုင်ငံတော်သတင်းကို ပိုမိုကြားသိလိုသူတစ်ဦးကို တွေ့သောအခါ ခရစ်ယာန်လုပ်သားများအနေနှင့် ကျွန်ုပ်တို့အဘယ်အရာပြုလုပ်နိုင်သေးသနည်း။ နောက်ဆောင်းပါးတွင် အကြံပြုချက်များပါရှိသည်။
[အောကိခြေမှတ်ချက်]
^ အပိုဒ်၊ 8 သွေးဆောင်ခြင်းနှင့်ပတ်သက်၍ ထပ်ဆင့်သိလိုပါက ယေဟောဝါသက်သေများထုတ်ဝေခဲ့သော သီအိုကရက်တစ် ဓမ္မအမှုကျောင်း ပညာရေးမှ အကျိုးရယူစာအုပ် သင်ခန်းစာ ၄၈ နှင့် ၄၉ ကိုရှု။
သင်မှတ်မိသလော
• အဂြိပ္ပမင်းရှေ့ ပေါလု၏ထုချေချက်ကို အဘယ်အရာက ထိရောက်စေခဲ့သနည်း။
• ကျွန်ုပ်တို့၏သတင်းတရားသည် စိတ်နှလုံးကို မည်သို့ ထိမိလှုပ်ရှားစေနိုင်သနည်း။
• စိတ်နှလုံးကိုထိမိရန် သမ္မာကျမ်းစာကို ထိရောက်စွာအသုံးပြုဖို့ အဘယ်အရာက ထောက်ကူမည်နည်း။
• ဓမ္မအမှုကို ဘုရားသခင်၏ရှုထောင့်မှ မည်သို့ရှုမြင်နိုင်သနည်း။
[လေ့လာရန်မေးခွန်း]
[စာမျက်နှာ ပါ လေးထောင့်ကွက်/ ရုပ်ပုံ]
ပြန်လည်ပတ်မှုများပြုလုပ်ရာတွင် အောင်မြင်မှုရရှိနိုင်ပုံ
• လူတို့ကို အမှန်တကယ်ပုဂ္ဂိုလ်ရေးစိတ်ဝင်စားမှု ရှိကြောင်းဖော်ပြပါ။
• နှစ်သက်ဖွယ်ကျမ်းစာအကြောင်းအရာတစ်ခုကို ဆွေးနွေးရန် ရွေးချယ်ထားပါ။
• ဆက်တိုက်ပြန်လည်ပတ်နိုင်ဖို့ လမ်းခင်းထားပါ။
• ထိုသူနှင့်ခွဲခွာပြီးနောက် သူ့အကြောင်း ဆက်စဉ်းစားတွေးတောပါ။
• စိတ်ဝင်စားမှုကို ဆက်ပျိုးထောင်ပေးနိုင်ရန် တစ်ရက် နှစ်ရက်အတွင်းပြန်သွားပါ။
• သင့်ရည်ရွယ်ချက်မှာ ကျမ်းစာသင်အံမှုစရန်ဖြစ်ကြောင်း စိတ်ထဲစွဲမှတ်ထားပါ။
• စိတ်ဝင်စားမှုတိုးလာစေရန် ယေဟောဝါထံ ဆုတောင်းပါ။
[စာမျက်နှာ ၁၅ ပါ ရုပ်ပုံ]
ဘုရင်ခံဖေတ္တုနှင့် အဂြိပ္ပမင်းရှေ့ရောက်ရှိခဲ့စဉ်က ပေါလု သွေးဆောင်ပြောဆိုခဲ့