“ကျေးဇူးတော်ကိုသိသောစိတ် ရှိကြလော့”
“ကျေးဇူးတော်ကိုသိသောစိတ် ရှိကြလော့”
“သင်တို့စိတ်နှလုံးအထဲ၌ ခရစ်တော်၏ငြိမ်သက်ခြင်းအုပ်စိုးစေ။ . . . ကျေးဇူးတော်ကိုသိသောစိတ် ရှိကြလော့။”—ကောလောသဲ ၃:၁၅။
၁။ ခရစ်ယာန်အသင်းတော်နှင့် စာတန်ချုပ်ကိုင်ထားသောလောကတွင် အဘယ်ခြားနားချက်ကို ကျွန်ုပ်တို့ သတိပြုမိသနည်း။
ကမ္ဘာတစ်ဝန်းရှိ ယေဟောဝါသက်သေများ၏ အသင်းတော် ၉၄,၆၀၀ တွင်ကျေးဇူးတင်တတ်သောစိတ်ကို ကျွန်ုပ်တို့တွေ့ရသည်။ အစည်းအဝေးတစ်ခုစီကို ယေဟောဝါအား ကျေးဇူးတင်သည့် ဆုတောင်းချက်ဖြင့် အစပြုပြီး အဆုံးသတ်သည်။ လူငယ်လူကြီးများသာမက လူသစ်လူဟောင်းများလည်း အတူတကွဝတ်ပြု၍ ပျော်ရွှင်စွာပေါင်းသင်းကြချိန်တွင် “ကျေးဇူးတင်ပါတယ်၊” “ရပါတယ်၊” သို့မဟုတ် အလားတူစကားများ ပြောဆိုတတ်ကြသည်ကို ကျွန်ုပ်တို့ မကြာခဏကြားရလေ့ရှိသည်။ (ဆာလံ ၁၃၃:၁) ယင်းသည် ‘ယေဟောဝါကို မသိသောသူ၊ ဧဝံဂေလိတရားကို နားမထောင်သောသူ’ တို့တွင်ရှိ တစ်ကိုယ်ကောင်းစိတ်နှင့် တခြားစီပင်! (၂ သက်သာလောနိတ် ၁:၈) ကျေးဇူးကန်းသောလောကတွင် ကျွန်ုပ်တို့ အသက်ရှင်နေထိုင်ကြသည်။ ဤလောက၏ဘုရားသခင်၊ တစ်ကိုယ်ကောင်းဆန်ဖို့ အများဆုံးအားပေးသူ စာတန်၏မာန်မာနနှင့် ပုန်ကန်စိတ်သည် လူ့အဖွဲ့အစည်းတွင် ပျံ့နှံ့စိမ့်ဝင်လျက်ရှိသည်မှာ အံ့အားသင့်စရာမဟုတ်ပေ!—ယောဟန် ၈:၄၄; ၂ ကောရိန္သု ၄:၄; ၁ ယောဟန် ၅:၁၉။
၂။ အဘယ်သတိပေးချက်ကို ကျွန်ုပ်တို့ ဂရုစိုက်ဖို့လိုသနည်း၊ အဘယ်မေးခွန်းများကို ဆင်ခြင်သုံးသပ်မည်နည်း။
၂ စာတန်လောက၏ဝိုင်းထားခံရသော ကျွန်ုပ်တို့သည် ၎င်း၏စိတ်ထားများကြောင့် အကျင့်မပျက်ပြားစေရန် သတိထားရမည်။ ပထမရာစုတွင် ဧဖက်ခရစ်ယာန်များကို တမန်တော်ပေါလု ဤသို့သတိပေးခဲ့သည်– ‘သင်တို့သည် အထက်က လောကတရားသို့လိုက်၍ အာကာသကောင်းကင်၏တန်ခိုးကို အစိုးရသောမင်းတည်းဟူသော ငြင်းဆန်သောသူတို့၌ ပြုပြင်သောဝိညာဉ်၏အလိုနှင့်အညီ အပြစ်၌ ကျင်လည်ကြ၍ ထိုငြင်းဆန်သောသူတို့နှင့်တကွ ငါတို့ရှိသမျှသည် အထက်က ကိုယ်ကာယ၏အလိုသို့လည်းကောင်း၊ စိတ်၏အလိုသို့လည်းကောင်းလိုက်သဖြင့် ကာမဂုဏ်တို့၌ ကျင်လည်သည်ဖြစ်၍ ကြွင်းသောသူတို့ကဲ့သို့ပင် ပကတိအတိုင်း အမျက်တော်ကိုခံရသောသူဖြစ်ကြ၏။’ (ဧဖက် ၂:၁-၃) ယနေ့ လူအများသည်လည်း ထိုအတိုင်းပင်ဖြစ်၏။ သို့ဖြစ်လျှင် ကျေးဇူးတင်တတ်သောစိတ်ကို မည်သို့ဆက်ထိန်းထားနိုင်သနည်း။ ယေဟောဝါသည် မည်သို့ကူညီပေးသနည်း။ ကျွန်ုပ်တို့သည် အမှန်ပင်ကျေးဇူးတင်ကြောင်း အဘယ်လက်တွေ့ကျနည်းများဖြင့် ဖော်ပြနိုင်သနည်း။
ကျေးဇူးတင်စရာအကြောင်းရင်းများ
၃။ အဘယ်အရာများအတွက် ယေဟောဝါအား ကျွန်ုပ်တို့ ကျေးဇူးတင်ကြရမည်နည်း။
၃ အထူးသဖြင့် ကျွန်ုပ်တို့အား အလျှံပယ်ပေးထားသော ဆုကျေးဇူးတချို့ကို သုံးသပ်သောအခါ ကျွန်ုပ်တို့၏ဖန်ဆင်းရှင်၊ အသက်ပေးပိုင်ရှင်ဖြစ်သော ယေဟောဝါဘုရားသခင်အား ကျေးဇူးတင်စရာအကြောင်းရှိ၏။ (ယာကုပ် ၁:၁၇) ကျွန်ုပ်တို့ အသက်ရှင်နေရသည့်အတွက် ယေဟောဝါအား နေ့စဉ် ကျေးဇူးတင်စရာပင်။ (ဆာလံ ၃၆:၉) ကျွန်ုပ်တို့ပတ်လည်တွင် နေ၊ လနှင့် ကြယ်များအစရှိသော ယေဟောဝါလက်ရာ အထောက်အထားများစွာကိုလည်း သတိပြုမိကြသည်။ အသက်ရှင်သန်စေသည့် သတ္တုဓာတ်မြောက်မြားစွာ သိုလှောင်ထားသော ဤကမ္ဘာဂြိုဟ်မှစ၍ အချိုးညီညီ ရောနှောနေသည့် မရှိမဖြစ်ဓာတ်ငွေ့များပါရှိသော လေထုနှင့် ရှုပ်ထွေးသည့် သဘာဝသံသရာများက ကျွန်ုပ်တို့၏မေတ္တာရှင် ကောင်းကင်ခမည်းတော်ကို ကျေးဇူးတင်စရာရှိကြောင်း သက်သေထူ၏။ ရှင်ဘုရင်ဒါဝိဒ်က ဤသို့စပ်ဆိုခဲ့သည်– ‘အကျွန်ုပ်၏ထာဝရဘုရားသခင် အကျွန်ုပ်တို့အဖို့ပြုတော်မူသော အံ့သြဖွယ်အမှုတို့နှင့် ကြံစည်တော်မူသော အကြံအစည်တို့သည် များလှပါ၏။ ရှေ့တော်၌ အစဉ်အတိုင်းလျှောက်၍ မကုန်နိုင်ပါ။ အကျွန်ုပ်ထုတ်ဖော်ကြားပြောမည်ဟုဆိုသော် ရေတွက်၍မကုန်နိုင်အောင် များလှပါ၏။’—ဆာလံ ၄၀:၅။
၄။ အသင်းတော်များတွင် ပျော်ရွှင်အားရစရာ ပေါင်းသင်းမှုရှိသည့်အတွက် ယေဟောဝါအား အဘယ်ကြောင့် ကျေးဇူးတင်သင့်သနည်း။
၄ ယနေ့ ယေဟောဝါ၏ကျေးကျွန်များသည် ပကတိပရဒိသုနှင့် အလှမ်းဝေးနေသေးသော်လည်း ဝိညာဉ်ရေးပရဒိသုတွင် နေထိုင်လျက်ရှိကြ၏။ ဘုရားသခင့်နိုင်ငံတော်ခန်းမတွင်၊ စည်းဝေးကြီးများတွင်၊ စည်းဝေးပွဲများတွင် ကျွန်ုပ်တို့၏ယုံကြည်သူချင်းများသည် ဘုရားသခင်၏သန့်ရှင်းသောဝိညာဉ်တော်အသီး သီးပွင့်နေကြကြောင်း တွေ့ရှိရ၏။ သက်သေခံတချို့သည် [ခရစ်ယာန်]ဘာသာရေးနောက်ခံမရှိသူများကို ဟောပြောသည့်အခါ ဂလာတိမြို့သားများထံ ပေါလုရေးခဲ့သောစာကို ကိုးကားဖော်ပြကြ၏။ သူတို့သည် ပထမဦးစွာ “ဇာတိပကတိအကျင့်တို့” ကိုအာရုံစိုက်စေပြီး နားထောင်နေသူများ အဘယ်အရာကို သတိပြုမိသနည်းဟု မေးမြန်းကြသည်။ (ဂလာတိ ၅:၁၉-၂၃) ယနေ့ လူ့အဖွဲ့အစည်းတွင် ထိုအကျင့်များကို အထင်အရှားတွေ့ရှိနေရကြောင်း လူအများစုက သဘောတူလက်ခံကြသည်။ ဘုရားသခင်၏သန့်ရှင်းသောဝိညာဉ်တော်အသီးကို သူတို့အား ဖော်ပြပြီး ဒေသခံဘုရားသခင့်နိုင်ငံတော်ခန်းမသို့ ဖိတ်ခေါ်၍ ထိုဝိညာဉ်အသီးကို သူတို့ကိုယ်တိုင် တွေ့မြင်သည့်အခါ လူအများက “ဘုရားသခင်သည် သူတို့တွင် အမှန်ရှိတော်မူသည်” ဟုချက်ချင်းပင် ဝန်ခံကြ၏။ (၁ ကောရိန္သု ၁၄:၂၅) ယင်းကို ဒေသခံဘုရားသခင့်နိုင်ငံတော်ခန်းမတွင်သာ တွေ့ရှိရခြင်းမဟုတ်ချေ။ သင်သည် မည်သည့်နေရာသို့သွားသွား၊ ခြောက်သန်းကျော်သော ယေဟောဝါသက်သေတစ်ဦးဦးနှင့်တွေ့လျှင် အလားတူရွှင်လန်းအားရစိတ်ကို တွေ့ရမည်။ မှန်ပါသည်၊ ဤတည်ဆောက်စရာပေါင်းသင်းမှုဖြစ်စေသည့် သန့်ရှင်းသောဝိညာဉ်တော် ပေးသနားသော ယေဟောဝါအား ကျေးဇူးတင်စရာအကြောင်းရှိ၏။—ဇေဖနိ ၃:၉; ဧဖက် ၃:၂၀၊ ၂၁။
၅၊ ၆။ ဘုရားသခင်၏အကြီးမြတ်ဆုံး ဆုကျေးဇူးဖြစ်သည့် ရွေးနုတ်ဖိုးကို ကျွန်ုပ်တို့ကျေးဇူးတင်ကြောင်း မည်သို့ဖော်ပြနိုင်သနည်း။
၅ ယေဟောဝါပေးသနားသည့် ကောင်းမြတ်စုံလင်ဆုံး ဆုကျေးဇူးသည် ကိုယ်တော်၏သားတော် ယေရှုဖြစ်၍ ဤသားတော်မှတစ်ဆင့် ရွေးနုတ်ဖိုးပူဇော်ရာယဇ်ကို စီစဉ်ပေးတော်မူ၏။ တမန်တော်ယောဟန်က “ဘုရားသခင်သည် ငါတို့ကို ဤမျှလောက်ချစ်တော်မူသည်မှန်လျှင် ငါတို့သည်လည်း အချင်းချင်းချစ်ရကြမည်” ဟုရေးသားခဲ့သည်။ (၁ ယောဟန် ၄:၁၁) ကျွန်ုပ်တို့သည် ယေဟောဝါအား ချစ်မြတ်နိုးပြီး ကျေးဇူးသိတတ်ကြောင်း ဖော်ပြရုံမက သူတစ်ပါးကို ချစ်ကြောင်း ထင်ရှားစေသည့် ဘဝပုံစံအတိုင်း အသက်ရှင်ခြင်းဖြင့် ရွေးနုတ်ဖိုးအတွက် ကျေးဇူးတင်နိုင်ကြသည်။—မဿဲ ၂၂:၃၇-၃၉။
၆ ရှေးဣသရေလလူမျိုးနှင့် ယေဟောဝါဆက်ဆံပုံကို သုံးသပ်ခြင်းဖြင့် ကျေးဇူးတင်စိတ်ကို ဖော်ပြပုံနှင့်စပ်လျဉ်း၍ ပိုမိုသိရှိလာပါလိမ့်မည်။ ယေဟောဝါသည် မောရှေမှတစ်ဆင့်ပေးခဲ့သော ပညတ်တရားအားဖြင့် ထိုလူမျိုးကို သင်ခန်းစာများစွာ သွန်သင်ပေးခဲ့၏။ “ပညတ်တရားတော်အားဖြင့် ပညာကိုလည်းကောင်း၊ [အမှန်]တရားကိုလည်းကောင်း ရိပ်မိသော” ကျွန်ုပ်တို့သည် “ကျေးဇူးတော်ကိုသိသောစိတ်ရှိကြလော့” ဟူသော ပေါလု၏ အကြံပြုချက်ကို လိုက်လျှောက်နိုင်ကြပါလိမ့်မည်။—ရောမ ၂:၂၀; ကောလောသဲ ၃:၁၅။
မောရှေပညတ်တရားမှ သင်ခန်းစာသုံးခု
၇။ ဆယ်ဖို့တစ်ဖို့ပေးခြင်းအစီအစဉ်အားဖြင့် ယေဟောဝါအား ဣသရေလလူတို့ ကျေးဇူးတင်ကြောင်း မည်သို့တင်ပြခွင့်ရခဲ့သနည်း။
၇ မောရှေပညတ်တရားတွင် ယေဟောဝါသည် မိမိ၏ကောင်းမြတ်မှုကို ဣသရေလလူတို့ အမှန်ပင်ကျေးဇူးတင်ကြောင်း ဖော်ပြနိုင်သည့် နည်းသုံးနည်းပေးခဲ့၏။ ပထမနည်းမှာ ဆယ်ဖို့တစ်ဖို့ပေးခြင်းဖြစ်၏။ ‘နွား၊ သိုးဆိတ်’ တို့နှင့်အတူ မြေကဖြစ်သော အသီးအနှံဆယ်စုတစ်စုသည် ‘ယေဟောဝါအဖို့သန့်ရှင်းရမည်’ ဖြစ်သည်။ (ဝတ်ပြုရာ ၂၇:၃၀-၃၂) ဣသရေလလူတို့သည် နာခံကြသောအခါ ယေဟောဝါသည် သူတို့ကို ကောင်းချီးအလျှံပယ်ပေး၏။ “‘ဆယ်ဖို့တစ်ဖို့ရှိသမျှကို ဘဏ္ဍာတိုက်ထဲသို့သွင်း၍ ငါ့အိမ်တော်၌ စားစရာရှိစေခြင်းငှာပြုကြလော့။ ငါသည် မိုးကောင်းကင်ပြတင်းပေါက်တို့ကိုဖွင့်၍ ကောင်းချီးမင်္ဂလာကို အကုန်အစင်သွန်းလောင်းမည်၊ မသွန်းလောင်းမည်ကို ထိုသို့စုံစမ်းကြလော့’ ဟုကောင်းကင်ဗိုလ်ခြေအရှင်ထာဝရဘုရား မိန့်တော်မူ၏။”—မာလခိ ၃:၁၀။
၈။ ဆယ်ဖို့တစ်ဖို့ပေးခြင်းနှင့် စေတနာအလျောက် အလှူထည့်ဝင်ခြင်းတို့သည် မည်သို့ကွာခြားသနည်း။
၈ ဒုတိယနည်းမှာ ယေဟောဝါသည် ဣသရေလလူတို့ထံမှ ဆယ်ဖို့တစ်ဖို့ကို တောင်းဆိုသည့်အပြင် စေတနာအလျောက် လှူဒါန်းစေခဲ့၏။ ဣသရေလလူတို့ကို ဤသို့ဆိုရန် မောရှေအား ကိုယ်တော်မိန့်မှာခဲ့သည်– ‘ငါပို့ဆောင်သောပြည်သို့ သင်တို့သည်ရောက်၍ ထိုပြည်၌ဖြစ်သောမုန့်ကို စားကြသောအခါ ယေဟောဝါအား ချီးမြှောက်ရာပူဇော်ရာယဇ်ကို ဆက်ရမည်။’ သူတို့၏အမျိုးအစဉ်အဆက်တို့သည် အဦးနယ်သော “မုန့်စိမ်းဖြင့်လုပ်သောမုန့်ပြား” အချို့ကို ‘ယေဟောဝါအား ဆက်ရကြမည်’ ဖြစ်သည်။ ဤအဦးနယ်သောမုန့်ပြား မည်ရွေ့မည်မျှဆက်သရမည်ဟု အတိအကျမဖော်ပြထားကြောင်း သတိပြုပါ။ (တောလည်ရာ ၁၅:၁၈-၂၁) ဣသရေလလူတို့သည် ကျေးဇူးတင်သည့်အနေနှင့် အလှူထည့်ဝင်သည့်အခါ ယေဟောဝါထံမှ ဧကန်မုချ ကောင်းချီးခံစားရကြမည်ဖြစ်၏။ ထပ်တူအစီအစဉ်ကို ယေဇကျေလ၏ဝတ်ပြုရာအိမ်တော် အမြင်အာရုံတွင် တွေ့ရှိရသည်။ ကျွန်ုပ်တို့ ဤသို့ဖတ်ရသည်– “အဦးသီးသောအသီးအမျိုးမျိုးနှင့် ချီးမြှောက်ရာပူဇော်သကာအလုံးစုံတို့ကို ယဇ်ပုရောဟိတ်သည် သိမ်းယူရမည်။ သူသည် သင့်အိမ်၌ ကောင်းချီးမင်္ဂလာကို သက်ရောက်စေခြင်းငှာ အဦးနယ်သောမုန့်စိမ်းကို သူ၌လှူရမည်။”—ယေဇကျေလ ၄၄:၃၀။
၉။ ယေဟောဝါသည် ကောက်သင်းကောက်ခြင်းအစီအစဉ်အားဖြင့် အဘယ်အရာကို သင်ပေးခဲ့သနည်း။
၉ တတိယနည်းမှာ ကောက်သင်းကောက်ခြင်းအလေ့အထကို ယေဟောဝါစီမံပေးခဲ့ခြင်းဖြစ်သည်။ ဘုရားသခင်က “ကိုယ်မြေ၌ဖြစ်သောစပါးကို ရိတ်သောအခါ လယ်ထောင့်တို့ကို အကုန်အစင်မရိတ်ရ။ သိမ်းရာတွင် ကျန်ကြွင်းသောအရာကို ပြန်၍မကောက်မသိမ်းရ။ ကိုယ်စပျစ်သီးကို အကုန်အစင်မသိမ်းရ။ ကျန်ကြွင်းသောအသီးကို ပြန်၍မဆွတ်ရ။ ထိုအသီးကို ဆင်းရဲသောသူ ဧည့်သည်. . . အဖို့ ချန်ခြွင်းရမည်။ ငါသည် သင်တို့၏ဘုရားသခင်ထာဝရဘုရားဖြစ်၏” ဟုမိန့်မှာခဲ့သည်။ (ဝတ်ပြုရာ ၁၉:၉၊ ၁၀) ဤတွင်တစ်ဖန်၊ မည်ရွေ့မည်မျှချန်ထားရမည်ကို အတိအကျမဖော်ပြထားချေ။ ဆင်းရဲချို့တဲ့သူများအတွက် မည်ရွေ့မည်မျှချန်ထားမည်ကို ဣသရေလတစ်ဦးချင်းစီက ကိုယ်တိုင်ဆုံးဖြတ်ရမည်ဖြစ်သည်။ ပညာရှိရှင်ဘုရင်ရှောလမုန်သည် လျောက်ပတ်စွာ ဤသို့ဆိုခဲ့သည်– ‘ဆင်းရဲသားကို သနားသောသူသည် ယေဟောဝါအား ချေးငှားသောသူဖြစ်၍ သူပြုသောအမှု၏အကျိုးကို ဆပ်ပေးတော်မူလိမ့်မည်။’ (သု. ၁၉:၁၇) ဤနည်းဖြင့် ယေဟောဝါသည် ဆင်းရဲချို့တဲ့သူများကို သနားကြင်နာဖို့၊ ထောက်ထားစာနာဖို့ သွန်သင်ပေးခဲ့၏။
၁၀။ ဣသရေလလူတို့သည် ကျေးဇူးမသိတတ်သည့်အခါ အဘယ်အကျိုးဆက်များကို ခံခဲ့ကြရသနည်း။
၁၀ ဣသရေလလူတို့သည် နာခံမှုရှိရှိ ဆယ်ဖို့တစ်ဖို့ယူဆောင်လာကြသည့်အခါ၊ စေတနာအလျောက် အလှူထည့်ဝင်သည့်အခါ၊ ဆင်းရဲချို့တဲ့သူများအတွက် စီစဉ်ပေးသည့်အခါ သူတို့ကို ယေဟောဝါကောင်းချီးပေးခဲ့၏။ သို့သော်လည်း ဣသရေလလူတို့သည် ကျေးဇူးမသိတတ်သည့်အခါ ယေဟောဝါ၏မျက်နှာတော် ဆုံးရှုံးရ၏။ ယင်းက ဘေးသင့်စေပြီး နောက်ဆုံးတွင် ပြည်နှင်ဒဏ်ခံရစေ၏။ (၂ ရာဇဝင်ချုပ် ၃၆:၁၇-၂၁) သို့ဆိုလျှင် ကျွန်ုပ်တို့ အဘယ်သင်ခန်းစာများရသနည်း။
ကျွန်ုပ်တို့ကျေးဇူးတင်ကြောင်း ဖော်ပြချက်များ
၁၁။ ယေဟောဝါအား ကျေးဇူးတင်ကြောင်းဖော်ပြနိုင်သည့် အဓိကနည်းကား အဘယ်နည်း။
၁၁ ထိုနည်းတူစွာ ယေဟောဝါအားချီးမွမ်းပြီး ကျေးဇူးတင်ကြောင်းဖော်ပြနိုင်သော အဓိကနည်းတွင် “ဆက်သခြင်း” ပါဝင်သည်။ အမှန်ဆိုရလျှင် ခရစ်ယာန်များအနေနှင့် ကျွန်ုပ်တို့သည် တိရစ္ဆာန်များ သို့မဟုတ် အသီးအနှံများ ပူဇော်ရသည့် မောရှေ၏ပညတ်တရားအောက်တွင် မရှိကြတော့ချေ။ (ကောလောသဲ ၂:၁၄) မည်သို့ပင်ဆိုစေ၊ တမန်တော်ပေါလုက ဟေဗြဲခရစ်ယာန်များကို ဤသို့တိုက်တွန်းခဲ့သည်– “ငါတို့သည် ဘုရားသခင်၏ကျေးဇူးတော်ကို ဝန်ခံလျက်၊ နှုတ်ခမ်းအသီးတည်းဟူသော ချီးမွမ်းခြင်းယဇ်ကို . . . ဘုရားသခင့်ရှေ့တော်၌ အစဉ်ပူဇော်ကြကုန်အံ့။” (ဟေဗြဲ ၁၃:၁၅) လူအများရှေ့ဖြစ်စေ၊ ခရစ်ယာန်ချင်းများ၏ ‘အသင်းတော်အလယ်’ တွင်ဖြစ်စေ ယေဟောဝါအား ချီးမွမ်းခြင်းယဇ်ပူဇော်ရန် ကျွန်ုပ်တို့၏စွမ်းရည်များနှင့် ဥစ္စာအင်ခွင်များကို အသုံးပြုခြင်းဖြင့် ကျွန်ုပ်တို့၏မေတ္တာရှင် ကောင်းကင်ခမည်းတော် ယေဟောဝါဘုရားသခင်ကို လှိုက်လှိုက်လှဲလှဲကျေးဇူးတင်ကြောင်း ဖော်ပြနိုင်သည်။ (ဆာလံ ၂၆:၁၂) ထိုသို့ပြုရာတွင် ယေဟောဝါအား ဣသရေလလူတို့ ကျေးဇူးတင်ကြောင်းဖော်ပြသည့် နည်းများမှ ကျွန်ုပ်တို့ အဘယ်အရာသိရှိနိုင်သနည်း။
၁၂။ ကျွန်ုပ်တို့၏ခရစ်ယာန်တာဝန်နှင့်ပတ်သက်ပြီး ဆယ်ဖို့တစ်ဖို့ပေးခြင်းအစီအစဉ်မှ အဘယ်အရာသိရှိနိုင်သနည်း။
၁၂ ကျွန်ုပ်တို့ဆွေးနွေးခဲ့ပြီးသည့်အတိုင်း ဦးဆုံးအနေနှင့် ဆယ်ဖို့တစ်ဖို့ပေးခြင်းအစီအစဉ်သည် မဖြစ်မနေပြုရမည့်အစီအစဉ်ဖြစ်သည်; ဣသရေလလူတိုင်း ထိုသို့ပေးဆက်ရန် တာဝန်ရှိ၏။ ခရစ်ယာန်များအနေနှင့် ကျွန်ုပ်တို့သည် ခရစ်ယာန်ဓမ္မအမှုတွင်ပါဝင်ပြီး အစည်းအဝေးများကို တက်ရောက်ရန် တာဝန်ရှိကြသည်။ အဆိုပါလုပ်ဆောင်မှုများကို မဖြစ်မနေပြုရမည်။ နောက်ဆုံးကာလနှင့်ပတ်သက်သည့် ယေရှု၏အရေးကြီးပရောဖက်ပြုချက်တွင် ကိုယ်တော်က ဤသို့တိုက်ရိုက်ဖော်ပြခဲ့သည်– ‘လူမျိုးအပေါင်းတို့အား သက်သေဖြစ်မည်အကြောင်း ဘုရားသခင့်နိုင်ငံတော်နှင့်ယှဉ်သော ဧဝံဂေလိတရားကို လောကနိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ အဆုံးသည်ဖြစ်လတ္တံ့။’ (မဿဲ ၂၄:၁၄; ၂၈:၁၉၊ ၂၀) တမန်တော်ပေါလုသည် ခရစ်ယာန်အစည်းအဝေးများနှင့်စပ်လျဉ်း၍ ဤသို့ရေးသားရန် မှုတ်သွင်းခံခဲ့ရသည်– “မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကို ကျင့်စေခြင်းငှာလည်းကောင်း တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက် ထောက်စာကြည့်ရှုကြကုန်အံ့။ လူအချို့တို့၏ထုံးစံရှိသည်အတိုင်း၊ အချင်းချင်းစည်းဝေးခြင်းအမှုကို မရှောင်မလွှဲကြနှင့်။ အချင်းချင်းတို့ကို တိုက်တွန်းနှိုးဆော်ကြလော့။ ကာလအချိန်ရောက်လုနီးသည်ကိုထောက်သဖြင့် သာ၍ကြိုးစားကြလော့။” (ဟေဗြဲ ၁၀:၂၄၊ ၂၅) ဟောပြောခြင်းနှင့် သွန်သင်ခြင်းသာမက ခရစ်ယာန်အစည်းအဝေးများတွင် ညီအစ်ကိုများနှင့် မှန်မှန်ပေါင်းသင်းခြင်းတာဝန်ကို အခွင့်အရေးအဖြစ်၊ ဂုဏ်ယူစရာအဖြစ် ရှုမြင်ကာ အားရဝမ်းသာ လက်ခံပြုလုပ်သောအခါ ယေဟောဝါအား ကျွန်ုပ်တို့ကျေးဇူးတင်ကြောင်း ဖော်ပြကြ၏။
၁၃။ စေတနာအလျောက် အလှူထည့်ဝင်ခြင်းနှင့် ကောက်သင်းကောက်ခြင်းတို့မှ အဘယ်သင်ခန်းစာရရှိသနည်း။
၁၃ ထို့ပြင် ဣသရေလလူတို့ ကျေးဇူးတင်လေးမြတ်ကြောင်း ပြသနိုင်သည့် အခြားအစီအစဉ်နှစ်ခုဖြစ်သော စေတနာအလျောက် အလှူထည့်ဝင်ခြင်းနှင့် ကောက်သင်းကောက်ခြင်းတို့ကို သုံးသပ်ခြင်းမှလည်း ကျွန်ုပ်တို့ အကျိုးကျေးဇူးရရှိနိုင်သည်။ သတ်သတ်မှတ်မှတ် တောင်းဆိုထားသော ဆယ်ဖို့တစ်ဖို့ပေးခြင်းနှင့်ခြားနားစွာ စေတနာအလျောက် အလှူထည့်ဝင်ခြင်းနှင့် ကောက်သင်းကောက်ခြင်းအစီအစဉ်တွင် မည်ရွေ့မည်မျှဟူ၍ သတ်သတ်မှတ်မှတ် မတောင်းဆိုခဲ့ချေ။ ၎င်းအစား၊ ယေဟောဝါကျေးကျွန်တစ်ဦး၏စိတ်နှလုံးတွင်းရှိ ကျေးဇူးတင်လေးမြတ်မှု အတိမ်အနက်အတိုင်း လုပ်ဆောင်စေခွင့်ပြု၏။ ထိုနည်းတူ၊ ယေဟောဝါကျေးကျွန်တိုင်း၏ အခြေခံတာဝန်ဖြစ်သည့် ခရစ်ယာန်ဓမ္မအမှုတွင်ပါဝင်ပြီး အစည်းအဝေးများ တက်ရောက်ခြင်းကို ကျွန်ုပ်တို့လေးမြတ်ကြသော်လည်း စိတ်နှလုံးအကြွင်းမဲ့၊ စိတ်လိုကိုယ်လျောက် ပါဝင်တက်ရောက်ကြသလော။ ကျွန်ုပ်တို့အတွက် ယေဟောဝါပြုလုပ်ပေးသမျှ အရာအားလုံးတို့ကို လှိုက်လှိုက်လှဲလှဲကျေးဇူးတင်ကြောင်း တင်ပြနိုင်သည့် အခွင့်အရေးတစ်ခုအဖြစ် ရှုမြင်သလော။ ကျွန်ုပ်တို့တစ်ဦးချင်းစီ၏အခြေအနေ ခွင့်ပြုသမျှ အဆိုပါလုပ်ဆောင်မှုများတွင် အပြည့်အဝပါဝင်ကြသလော။ သို့မဟုတ် ယင်းတို့အားလုံးကို ကျွန်ုပ်တို့လုပ်ဆောင်ရမည့် တာဝန်တစ်ခုအဖြစ်သာ ရှုမြင်သလော။ အဆိုပါမေးခွန်းများကို ကျွန်ုပ်တို့တစ်ဦးစီ ကိုယ်တိုင်ဖြေဆိုကြရမည်။ တမန်တော်ပေါလုက ဤသို့ဖော်ပြခဲ့သည်– “လူတိုင်း ကိုယ်ပြုသောအမှုကို စစ်ကြောစေ။ သို့ပြုလျှင် သူတစ်ပါး၌မဆိုဘဲ ကိုယ်၌သာ ဝါကြွားဝမ်းမြောက်စရာအကြောင်းရှိလိမ့်မည်။”—ဂလာတိ ၆:၄။
၁၄။ ယေဟောဝါ၏အမှုတော်ကို ထမ်းဆောင်ရာတွင် ကျွန်ုပ်တို့ထံမှ ကိုယ်တော် အဘယ်အရာမျှော်လင့်သနည်း။
၁၄ ကျွန်ုပ်တို့၏အခြေအနေများကို ယေဟောဝါဘုရားသခင် ကောင်းစွာသိတော်မူ၏။ ကျွန်ုပ်တို့၏ကန့်သတ်ချက်များကိုလည်း သိတော်မူ၏။ ကိုယ်တော်၏ကျေးကျွန်များ စိတ်လိုကိုယ်လျောက်ဆက်သသည့် ပူဇော်ရာယဇ် များများနည်းနည်း ကိုယ်တော်တန်ဖိုးထား၏။ ကျွန်ုပ်တို့အားလုံး တစ်သမတ်တည်းပေးဆက်လိမ့်မည်ဟု ကိုယ်တော်မမျှော်လင့်သကဲ့သို့ ကျွန်ုပ်တို့လည်း ထိုသို့ပေးဆက်နိုင်ကြမည်မဟုတ်ချေ။ ပစ္စည်းလှူဒါန်းခြင်းအကြောင်း ဆွေးနွေးသောအခါ တမန်တော်ပေါလုက ကောရိန္သုခရစ်ယာန်များအား ဤသို့ဆိုခဲ့သည်– “စေတနာစိတ်သည် အသင့်ရှိလျှင် မတတ်နိုင်သောအမှုကိုမထောက်ဘဲ တတ်နိုင်သောအမှုကိုထောက်၍ နှစ်သက်တော်မူဖွယ်ဖြစ်၏။” (၂ ကောရိန္သု ၈:၁၂) အဆိုပါမူသည် ဘုရားသခင့်အမှုတော် ထမ်းဆောင်ခြင်းနှင့်လည်း ထပ်တူထပ်မျှသက်ဆိုင်သည်။ ကျွန်ုပ်တို့အမှုဆောင်နိုင်သည့်ပမာဏကိုမဟုတ်ဘဲ အားရဝမ်းသာ၊ စိတ်နှလုံးအကြွင်းမဲ့ အမှုဆောင်ခြင်းကို ယေဟောဝါလက်ခံတော်မူ၏။—ဆာလံ ၁၀၀:၁-၅; ကောလောသဲ ၃:၂၃။
ရှေ့ဆောင်စိတ်ဓာတ်ကို ပျိုးထောင်ပြီး ဆက်ထိန်းထားလော့
၁၅၊ ၁၆။ (က) ရှေ့ဆောင်ဓမ္မအမှုနှင့် ကျေးဇူးတင်ခြင်းစပ်ကြား အဘယ်ဆက်နွှယ်မှုရှိသနည်း။ (ခ) ရှေ့ဆောင်အဖြစ် အမှုမဆောင်နိုင်သူများသည် ရှေ့ဆောင်စိတ်ဓာတ်ကို မည်သို့တင်ပြနိုင်သနည်း။
၁၅ ယေဟောဝါအား ကျေးဇူးတင်ကြောင်းဖော်ပြသည့် အထိရောက်ဆုံးနည်းမှာ အချိန်ပြည့်ခရစ်ယာန်ဓမ္မအမှုတွင် ပါဝင်ခြင်းဖြစ်သည်။ ယေဟောဝါအားချစ်မြတ်နိုးပြီး ကိုယ်တော်၏မခံစားထိုက်သောကရုဏာကို ကျေးဇူးတင်သောကြောင့် ဆက်ကပ်အပ်နှံကျေးကျွန်များစွာသည် ယေဟောဝါ၏အမှုတော်ကို အချိန်များများထမ်းဆောင်နိုင်ရန် သူတို့၏အသက်တာကို အကြီးအကျယ်ပြောင်းလဲခဲ့ကြပြီ။ သို့ဖြင့် အချို့သည် သတင်းကောင်းဟောပြောခြင်းနှင့် အမှန်တရားသွန်သင်ခြင်းလုပ်ငန်းအတွက် လစဉ် ပျမ်းမျှနာရီ ၇၀ သွင်းရသော မှန်မှန်ရှေ့ဆောင်များ ပြုလုပ်နိုင်ခဲ့ကြ၏။ အခြေအနေအမျိုးမျိုးကြောင့် ကန့်သတ်ချက်များရှိသော အခြားသူများမှာမူ လစဉ် နာရီ ၅၀ သွင်းရသော အရန်ရှေ့ဆောင်များအဖြစ် အခါအားလျော်စွာ ဟောပြောခြင်းလုပ်ငန်း၌ ပါဝင်ကြသည်။
၁၆ သို့သော် မှန်မှန်ရှေ့ဆောင်များအနေနှင့်ဖြစ်စေ၊ အရန်ရှေ့ဆောင်များအနေနှင့်ဖြစ်စေ အမှုမဆောင်နိုင်ကြသော ယေဟောဝါ၏ကျေးကျွန်များစွာကော အသို့နည်း။ သူတို့သည် ရှေ့ဆောင်စိတ်ဓာတ်ကို ပျိုးထောင်ပြီး ဆက်ထိန်းသိမ်းထားခြင်းအားဖြင့် ကျေးဇူးတင်ကြောင်း ဖော်ပြနိုင်ကြပါသည်။ မည်သို့အားဖြင့်နည်း။ ရှေ့ဆောင်နိုင်သူများကို အားပေးခြင်းအားဖြင့်၊ အချိန်ပြည့်ခရစ်ယာန်ဓမ္မအမှုဆောင်ခြင်းကို မိမိ၏ဘဝလုပ်ငန်းအဖြစ် သားသမီးများအား လုပ်ကိုင်စေရန် ရွေးချယ်စေခြင်းအားဖြင့်၊ အခြေအနေပေါ်မူတည်၍ ဟောပြောခြင်းတွင် ဇွဲရှိရှိပါဝင်ခြင်းအားဖြင့်ဖြစ်သည်။ ခရစ်ယာန်ဓမ္မအမှုတွင် ကျွန်ုပ်တို့ပေးဆက်ရာသည် ကျွန်ုပ်တို့အတွက် ယေဟောဝါပြုလုပ်ပေးခဲ့သည့်၊ ပြုလုပ်နေဆဲရှိသည့်၊ ပြုလုပ်ပေးမည့်အရာများအတွက် ကျေးဇူးတင်လေးမြတ်စိတ် အတိမ်အနက်အပေါ် များစွာမူတည်၏။
ကျွန်ုပ်တို့၏ “အဖိုးထိုက်သောအရာများ” ဖြင့် ကျေးဇူးတင်ခြင်း
၁၇၊ ၁၈။ (က) ကျွန်ုပ်တို့၏ “အဖိုးထိုက်သောအရာများ” နှင့်ကျေးဇူးသိတတ်စိတ်ကို မည်သို့ပြနိုင်သနည်း။ (ခ) မုဆိုးမထည့်ဝင်သော အလှူဒါနကို ယေရှု မည်သို့ဝေဖန်သနည်း၊ အဘယ်ကြောင့်နည်း။
၁၇ နယပုံပြင် ၃:၉ [ကဘ] က “သင်၏အဖိုးထိုက်သောအရာများနှင့် အဦးသီးသောအသီးအနှံရှိသမျှတို့ဖြင့် ယေဟောဝါအား ဂုဏ်ပြုလော့” ဟုဆိုသည်။ ယေဟောဝါ၏ကျေးကျွန်များသည် ဆယ်ဖို့တစ်ဖို့ပေးစရာမလိုတော့ချေ။ ၎င်းအစား၊ ကောရိန္သုအသင်းတော်ထံ ပေါလုဤသို့ရေးသားခဲ့သည်– “လူတိုင်း ကိုယ်အလိုအလျောက်လှူရ၏။ နှမြောသောစိတ်နှင့်မလှူရ။ မလှူဘဲမနေရဟု စိတ်ထင်နှင့်မလှူရ။ အကြောင်းမူကား စေတနာစိတ်နှင့်လှူသောသူကိုသာ ဘုရားသခင်နှစ်သက်တော်မူ၏။” (၂ ကောရိန္သု ၉:၇) ကမ္ဘာချီဘုရားသခင့်နိုင်ငံတော် ဟောပြောခြင်းလုပ်ငန်းကို ထောက်ပံ့ရန် စေတနာအလျောက် အလှူငွေထည့်ဝင်ခြင်းသည်လည်း ကျေးဇူးတင်ရာရောက်၏။ လှိုက်လှိုက်လှဲလှဲ ကျေးဇူးတင်လေးမြတ်သောစိတ်ရှိခြင်းက ကျွန်ုပ်တို့ကို မှန်မှန်အလှူငွေထည့်ဝင်စေသည်၊ အစောပိုင်းခရစ်ယာန်များပြုသကဲ့သို့ ဖြစ်နိုင်လျှင် အပတ်စဉ် တစ်စုံတစ်ရာထည့်ဝင်ရန် သတ်မှတ်၍ ဖယ်ထားပေမည်။—၁ ကောရိန္သု ၁၆:၁၊ ၂။
၁၈ ကျွန်ုပ်တို့ အလှူထည့်ဝင်သောပမာဏက ယေဟောဝါအား ကျွန်ုပ်တို့မည်မျှကျေးဇူးတင်ကြောင်း ဖော်ပြခြင်းမဟုတ်ပါ။ ယင်းအစား၊ ကျွန်ုပ်တို့လှူဒါန်းသည့် စိတ်ထားက ဖော်ပြပါသည်။ ဝတ်ပြုရာအိမ်တော်တွင် ဘဏ္ဍာတိုက်များထဲသို့ လှူဒါန်းသူတို့ကို ကြည့်ရှုနေစဉ် ယင်းကို ယေရှုသတိပြုမိသည်။ “ကြေးနီဒ င်္ဂါးနှစ်ပြားသွင်းချ” သည့်ဆင်းရဲသောမုဆိုးမတစ်ဦးကို မြင်သော် ယေရှုက “ငါအမှန်ဆိုသည်ကား၊ ထိုဆင်းရဲသောမုဆိုးမသည် အခြားသောသူအပေါင်းထက် သာ၍သွင်းချပြီ။ အကြောင်းမူကား၊ ထိုသူအပေါင်းတို့သည် မိမိတို့ကြွယ်ဝသော စည်းစိမ်ထဲကနုတ်၍ ဘုရားသခင်၏အလှူတော်စုထဲသို့ သွင်းချကြ၏။ ထိုမိန်းမမူကား၊ အလွန်ဆင်းရဲလျက်ပင် မိမိအသက်မွေးစရာဥစ္စာရှိသမျှကို သွင်းချလေပြီ” ဟုမိန့်တော်မူ၏။”—လုကာ ၂၁:၁-၄။
၁၉။ ကျွန်ုပ်တို့၏ကျေးဇူးတင်နည်းများကို ပြန်လည်ဆန်းစစ်ရန် အဘယ်ကြောင့်ကောင်းသနည်း။
၁၉ ကျွန်ုပ်တို့ မည်သို့ကျေးဇူးတင်နိုင်ကြောင်း ဆွေးနွေးထားသည့် ဤလေ့လာသုံးသပ်ချက်က ကျေးဇူးသိတတ်စိတ် ဖော်ပြနည်းများကို ပြန်လည်ဆန်းစစ်ကြည့်ရန် ကျွန်ုပ်တို့ကို လှုံ့ဆော်ပေးပါလေစေ။ ယေဟောဝါအား ကျွန်ုပ်တို့ဆက်သသည့် ချီးမွမ်းခြင်းယဇ်ကိုသာမက ဥစ္စာအင်ခွင်အားဖြင့် ကမ္ဘာချီလုပ်ငန်းကို ထောက်ပံ့ပေးခြင်းကိုပါ တိုးမြှင့်ပေးနိုင်သလော။ ထိုသို့ ကျွန်ုပ်တို့ ပြုလုပ်လာလေ ရက်ရောတော်မူသော ကျွန်ုပ်တို့၏မေတ္တာရှင်ခမည်းတော် ယေဟောဝါသည် ကျွန်ုပ်တို့၏ကျေးဇူးတင်တတ်သောစိတ်ကို နှစ်သက်လာလေဖြစ်မည်ဟု ယုံကြည်စိတ်ချနိုင်ပါ၏။
သင်မှတ်မိသလော
• အဘယ်အကြောင်းများကြောင့် ယေဟောဝါအား ကျေးဇူးတင်သင့်သနည်း။
• ဆယ်ဖို့တစ်ဖို့ပေးခြင်း၊ စေတနာအလျောက် အလှူထည့်ဝင်ခြင်းနှင့် ကောက်သင်းကောက်ခြင်းတို့မှ အဘယ်သင်ခန်းစာများ ရရှိသနည်း။
• ရှေ့ဆောင်စိတ်ဓာတ်ကို မည်သို့ပျိုးထောင်နိုင်သနည်း။
• ယေဟောဝါအား ကျေးဇူးတင်ရန် ကျွန်ုပ်တို့၏ “အဖိုးထိုက်သောအရာများ” ကိုမည်သို့အသုံးပြုနိုင်သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
“ကောင်းမြတ်စုံလင်သောဆုကျေးဇူးရှိသမျှတို့သည် . . . အထက်အရပ်မှလာကြ၏”
[စာမျက်နှာ ၁၆ ပါ ရုပ်ပုံ]
ဤတွင် ပညတ်တရားမှ အဘယ်သင်ခန်းစာသုံးခုကို ဖော်ပြထားသနည်း
[စာမျက်နှာ ၁၈ ပါ ရုပ်ပုံ]
အဘယ်ပူဇော်ရာယဇ်များကို ကျွန်ုပ်တို့ ပူဇော်နိုင်သနည်း