‘ယေဟောဝါ၌ မွေ့လျော်လော့’
‘ယေဟောဝါ၌ မွေ့လျော်လော့’
‘ယေဟောဝါ၌ မွေ့လျော်ခြင်းရှိလော့။ သို့ပြုလျှင် စိတ်နှလုံးအလို ပြည့်စုံရသောအခွင့်ကို ပေးတော်မူမည်။’ —ဆာလံ ၃၇:၄။
၁၊ ၂။ စစ်မှန်သောပျော်ရွှင်မှု၏ရင်းမြစ်ကား မည်သူနည်း၊ ရှင်ဘုရင်ဒါဝိဒ်သည် ယင်းကို မည်သို့အာရုံစိုက်စေခဲ့သနည်း။
‘စိတ်နှလုံးနှိမ့်ချသောသူတို့သည် ပျော်ရွှင်ကြ၏။ . . . သနားစုံမက်တတ်သောသူတို့သည် ပျော်ရွှင်ကြ၏။ . . . သူတစ်ပါးခြင်းခိုက်ရန်ပြုခြင်းကို ငြိမ်းစေတတ်သောသူတို့သည် ပျော်ရွှင်ကြ၏။’ ခရစ်ဝင်ကျမ်းရေးသူ မဿဲမှတ်တမ်းတင်ခဲ့သည်အတိုင်း ယေရှု၏ကျော်ကြားသော တောင်ပေါ်တရားတော်၏ ထူးခြားထင်ရှားသည့် နိဒါန်းတွင် ပျော်ရွှင်သူများနှင့်ပတ်သက်၍ အဆိုပါဖော်ပြချက်များအပြင် အခြားဖော်ပြချက်ခြောက်ခု ပါဝင်သည်။ (မဿဲ ၅:၃-၁၁) ယေရှု၏စကားများက ကျွန်ုပ်တို့ ပျော်ရွှင်နိုင်ကြောင်း အာမခံ၏။
၂ ရှေးဣသရေလရှင်ဘုရင်ဒါဝိဒ် စပ်ဆိုခဲ့သည့် မြင့်မြတ်သောသီချင်းတစ်ပုဒ်သည် စစ်မှန်သောပျော်ရွှင်မှု၏ရင်းမြစ် ယေဟောဝါအား အာရုံစိုက်စေသည်။ ဒါဝိဒ်က ‘ယေဟောဝါ၌ မွေ့လျော်ခြင်းရှိလော့။ သို့ပြုလျှင် စိတ်နှလုံးအလို ပြည့်စုံရသောအခွင့်ကို ပေးတော်မူမည်’ ဟုဆိုခဲ့သည်။ (ဆာလံ ၃၇:၄) သို့သော် အဘယ်အရာက ယေဟောဝါနှင့် ကိုယ်တော်၏ကိုယ်ရည်ကိုယ်သွေးများကို သိကျွမ်းခြင်း၌ “မွေ့လျော်” စေနိုင်သနည်း။ ကိုယ်တော်ပြုလုပ်ပေးခဲ့ရာများနှင့် ကိုယ်တော်၏ရည်ရွယ်ချက် ပြီးမြောက်အောင်မြင်စေရန် ပြုတော်မူမည့်အရာများကို စဉ်းစားသုံးသပ်ခြင်းဖြင့် “စိတ်နှလုံးအလို ပြည့်စုံရသောအခွင့်” မည်သို့ရနိုင်မည်နည်း။ ဆာလံကျမ်းအခန်းကြီး ၃၇၊ အခန်းငယ် ၁ မှ ၁၁ အထိ ခရေစေ့တွင်းကျလေ့လာခြင်းဖြင့် အဖြေများရရှိမည်။
“မငြူစူနှင့်”
၃၊ ၄။ ဆာလံ ၃၇:၁ တွင်မှတ်တမ်းတင်ထားသည့်အတိုင်း ဒါဝိဒ်သည် အဘယ်အကြံဉာဏ်ပေးသနည်း၊ ယနေ့ ယင်းကိုသတိပြုခြင်းသည် အဘယ်ကြောင့်လျောက်ပတ်သနည်း။
၃ ကျွန်ုပ်တို့အသက်ရှင်ရသောအချိန်သည် “ခဲယဉ်း” ကျပ်တည်းပြီး ဆိုးသွမ်းသောကာလဖြစ်သည်။ တမန်တော်ပေါလု၏ ဤစကားများ အမှန်ပင်ပြည့်စုံလာသည်ကို ကျွန်ုပ်တို့ မြင်တွေ့ကြရပြီ– “ဆိုးညစ်သောသူ၊ လှည့်ဖြားသောသူတို့မူကား သူတစ်ပါးကိုလည်းကောင်း၊ ကိုယ်ကိုလည်းကောင်း လှည့်ဖြား၍ ဆိုးညစ်ခြင်း၌ တရွေ့ရွေ့တိုးပွားကြလိမ့်မည်။” (၂ တိမောသေ ၃:၁၊ ၁၃) လူဆိုးတို့၏ အောင်မြင်ကြီးပွားပုံကြောင့် သူတို့ကို အလွယ်တကူ အားကျမိနိုင်၏! ၎င်းတို့အားလုံးသည် ကျွန်ုပ်တို့ကို စိတ်အနှောင့်အယှက်ဖြစ်စေပြီး ဝိညာဉ်ရေးအမြင်အာရုံ လွဲသွားစေနိုင်သည်။ အဆိုပါဖြစ်လာနိုင်ဖွယ် အန္တရာယ်အကြောင်း ဆာလံ ၃၇ ၏အဖွင့်စကားများက မည်သို့သတိပေးနှိုးဆော်ထားကြောင်း သတိပြုပါ– “လူဆိုးတို့အကြောင်းကြောင့် စိတ်မပူနှင့်။ မတရားသဖြင့်ပြုသောသူတို့ကို မငြူစူနှင့်။”
၄ ကမ္ဘာ့မီဒီယာသည် မတရားမှုစာရင်းကို နေ့စဉ်နှင့်အမျှ တရစပ်ဖော်ပြလျက်ရှိ၏။ ကောက်ကျစ်သော စီးပွားရေးသမားများ၏ လိမ်လည်မှုကို အရေးမယူချေ။ ရာဇဝတ်သားများသည် ခိုကိုးရာမဲ့သူများကို ခေါင်းပုံဖြတ်တတ်ကြသည်။ လူသတ်သမားများကို စုံစမ်း၍မရ သို့မဟုတ် ပြစ်ဒဏ်မပေးချေ။ ဤကဲ့သို့သောမတရားမှုများသည် ကျွန်ုပ်တို့ကို ဒေါသထွက်စေပြီး စိတ်တည်ငြိမ်မှုကို ပျက်ပြားစေနိုင်၏။ လူဆိုးများ အောင်မြင်နေပုံရခြင်းကြောင့် ငြူစူစိတ်ပင် ဝင်လာနိုင်သည်။ သို့သော် ကျွန်ုပ်တို့ စိတ်အနှောင့်အယှက်ဖြစ်နေရုံဖြင့် အခြေအနေကောင်းသွားမည်လော။ လူဆိုးများ ကောင်းစားပုံရှိနေခြင်းကို ငြူစူခြင်းဖြင့် သူတို့ ဆိုးကျိုးမခံစားရဘဲနေမည်လော။ လုံးဝမဟုတ်ပါ! ထို့ပြင် ၎င်းအတွက် ကျွန်ုပ်တို့ ‘စိတ်ပူ’ စရာလည်း လုံးဝမလိုပါ။ အဘယ်ကြောင့်နည်း။
၅။ လူဆိုးများကို မြက်ပင်နှင့် အဘယ်ကြောင့်နှိုင်းထားသနည်း။
၅ ဆာလံဆရာက ဤသို့ဖြေဆိုသည်– “အကြောင်းမူကား သူတို့သည် မကြာမမြင့်မီ မြက်ပင်ကဲ့သို့ ရိတ်ခြင်းကိုခံရ၍ စိမ်းသောပျိုးပင်ညှိုးနွမ်းသကဲ့သို့ ဖြစ်ရလိမ့်မည်။” (ဆာလံ ၃၇:၂) စိမ်းလန်းသောမြက်နုသည် ရှုပျော်ဖွယ်ဖြစ်သော်လည်း မကြာမီ အရွက်များ ညှိုးနွမ်းခြောက်သွေ့ကုန်၏။ လူဆိုးများလည်း ထိုနည်းလည်းကောင်းပင်ဖြစ်သည်။ သူတို့ကြီးပွားနေပုံသည် ထာဝစဉ်တည်ရှိမည်မဟုတ်ချေ။ သူတို့သေဆုံးသွားသောအခါ သူတို့မတရားရယူထားသော ပစ္စည်းဥစ္စာများသည် သူတို့ကို ကူညီပေးလိမ့်မည်မဟုတ်ပေ။ အဆုံးတွင် မတရားမှုဟူသည် ဖုံးကွယ်ရာမရှိ။ “အပြစ်တရား၏အခကား သေခြင်းပေတည်း” ဟုပေါလုရေးသားခဲ့သည်။ (ရောမ ၆:၂၃) လူဆိုး များနှင့် မဖြောင့်မတ်သူရှိသမျှတို့သည် နောက်ဆုံး၌ သူတို့၏ “အခ” ကိုရကြပြီး ပျောက်ကွယ်သွားလိမ့်မည်။ အမှန်တကယ်ပင် အကျိုးမဲ့ဘဝလမ်းစဉ်ပါတကား!—ဆာလံ ၃၇:၃၅၊ ၃၆; ၄၉:၁၆၊ ၁၇။
၆။ ဆာလံ ၃၇:၁၊ ၂ မှ အဘယ်သင်ခန်းစာ ရနိုင်သနည်း။
၆ သို့ဖြစ်လျှင် လူဆိုးများ တစ်ခဏချမ်းသာနေခြင်းကို ကျွန်ုပ်တို့ စိတ်အနှောင့်အယှက်ဖြစ်သင့်သလော။ ဆာလံ ၃၇ ၏ပထမဆုံးအခန်းငယ်နှစ်ခုမှ ကျွန်ုပ်တို့သင်ခန်းစာရသည်မှာ သူတို့၏အောင်မြင်မှုကြောင့် ယေဟောဝါ၏အမှုတော်ကိုထမ်းဆောင်ရန် သင်ရွေးချယ်ထားသောလမ်းစဉ်မှ သွေဖည်မသွားဖို့ဖြစ်၏။ ၎င်းအစား၊ ဝိညာဉ်ရေးကောင်းချီးများနှင့် ပန်းတိုင်များအပေါ် ဆက်အာရုံစိုက်ထားပါ။—သု. ၂၃:၁၇။
“ယေဟောဝါ၌ကိုးစား၍ ကောင်းမှုပြုလော့”
၇။ ယေဟောဝါကို အဘယ်ကြောင့် မှီခိုအားထားသင့်သနည်း။
၇ ဆာလံဆရာက “ယေဟောဝါ၌ကိုးစား၍ ကောင်းမှုပြုလော့” ဟုကျွန်ုပ်တို့ကို တိုက်တွန်းထားသည်။ (ဆာလံ ၃၇:၃က၊ ကဘ) ကျွန်ုပ်တို့တွင် စိုးရိမ်ပူပန်မှုများ၊ သံသယများရှိနေလျှင် ယေဟောဝါကို ပုံအပ်၍ ယုံကြည်စိတ်ချဖို့လိုသည်။ ကိုယ်တော်တစ်ဦးတည်းသာ ဝိညာဉ်ရေးလုံခြုံမှု အပြည့်အဝပေးနိုင်တော်မူ၏။ မောရှေက ‘အမြင့်ဆုံးသောဘုရားသခင်၏ ကွယ်ကာရာဌာနတော်၌နေသောသူသည် အဆုံးမဲ့တန်ခိုးရှင်၏အရိပ်ကို ခိုရလိမ့်မည်’ ဟူ၍ ရေးသားခဲ့သည်။ (ဆာလံ ၉၁:၁) ဤအစီအစဉ်စနစ်တွင် မတရားမှုတိုးများလာသောကြောင့် စိတ်အနှောင့်အယှက်ဖြစ်နေလျှင် ယေဟောဝါကို သာ၍မှီခိုအားထားဖို့လို၏။ အကယ်၍ ကျွန်ုပ်တို့ခြေဆစ်လွဲသွားလျှင် မိတ်ဆွေ၏အကူအညီကို အလွန်တန်ဖိုးထားပေမည်။ ထိုနည်းတူ တည်ကြည်စွာ လျှောက်လှမ်းနိုင်ရန် ကြိုးစားသောအခါ ယေဟောဝါ၏အကူအညီလိုသည်။—ဟေရှာယ ၅၀:၁၀။
၈။ လူဆိုးတို့၏ကောင်းစားမှုကြောင့် အလွန်အမင်းစိတ်အနှောင့်အယှက်မဖြစ်စေရန် ခရစ်ယာန်ဓမ္မအမှုတွင် ပါဝင်ခြင်းက မည်သို့အကူအညီဖြစ်စေနိုင်သနည်း။
၈ လူဆိုးတို့၏ကောင်းစားမှုကြောင့် စိတ်အနှောင့်အယှက်ဖြစ်ခြင်းကို ဖြေရှင်းနည်းတစ်နည်းမှာ သိုးကဲ့သို့သောသူများကို ရှာဖွေပြီး ယေဟောဝါ၏ရည်ရွယ်ချက်နှင့်ပတ်သက်၍ တိကျမှန်ကန်သောအသိပညာပေးခြင်းတွင် အလုပ်များနေခြင်းဖြစ်သည်။ ဆိုးသွမ်းမှုတိုးများလာမည်ဖြစ်ရာ သူတစ်ပါးကိုကူညီပေးခြင်းတွင် ပိုမိုအလုပ်များနေဖို့လိုသည်။ တမန်တော်ပေါလုက “ကျေးဇူး [“ကောင်းမှု၊” ကဘ] ပြုခြင်း၊ ဥစ္စာဝေမျှခြင်းအမှုတို့ကို မမေ့မလျော့ကြနှင့်။ ထိုသို့သောယဇ်ကို ဘုရားသခင်သည် အားရနှစ်သက်တော်မူ၏” ဟုရေးသားခဲ့သည်။ ကျွန်ုပ်တို့ပြုလုပ်နိုင်သည့် အကောင်းဆုံး “ကောင်းမှု” မှာသူတစ်ပါးကို အထူးကောင်းမြတ်သော ဘုရားသခင့်နိုင်ငံတော်သတင်းကောင်း ပြောပြခြင်းဖြစ်၏။ လူသိရှင်ကြားဟောပြောခြင်းသည် အမှန်ပင် “ချီးမွမ်းခြင်းယဇ်” ဖြစ်သည်။—ဟေဗြဲ ၁၃:၁၅၊ ၁၆; ဂလာတိ ၆:၁၀။
၉။ “ပြည်တော်၌နေ” ထိုင်ရန် ဒါဝိဒ်၏တိုက်တွန်းချက်ကို ရှင်းပြပါ။
၉ “ပြည်တော်၌နေ၍ [တည်ကြည်ခြင်း] ကိုကျက်စားလော့” ဟုဒါဝိဒ်ဆက်ဆိုသည်။ (ဆာလံ ၃၇:၃ခ) ဒါဝိဒ်အချိန်က “ပြည်တော်” သည်ဣသရေလလူမျိုးကို ယေဟောဝါပေးသည့် ကတိထားရာပြည်ဖြစ်၏။ ရှောလမုန်အုပ်ချုပ်ချိန်တွင် ပြည်တော်၏နယ်နိမိတ်သည် မြောက်ဘက်ဒန်အရပ်မှ တောင်ဘက်ဗေရရှေဘအရပ်အထိ ကျယ်ပြန့်သည်။ ယင်းသည် ဣသရေလလူမျိုး နေထိုင်ရာအရပ်ဖြစ်သည်။ (၃ ဓမ္မရာဇဝင် ၄:၂၅) ယနေ့ ကျွန်ုပ်တို့ အဘယ်နေရာတွင်နေထိုင်ပါစေ ဖြောင့်မတ်သောကမ္ဘာသစ်တွင် ကမ္ဘာဂြိုဟ်တစ်ခုလုံး ပရဒိသုဖြစ်လာမည့်အချိန်ကို စောင့်မျှော်နေကြပါသည်။ ဤအတောအတွင်း ကျွန်ုပ်တို့သည် ဝိညာဉ်ရေးလုံခြုံမှုဖြင့် နေထိုင်လျက်ရှိကြ၏။—ဟေရှာယ ၆၅:၁၃၊ ၁၄။
၁၀။ ကျွန်ုပ်တို့သည် ‘တည်ကြည်ခြင်းကိုကျက်စား’ သောအခါ အဘယ်အကျိုးကျေးဇူး ခံစားရသနည်း။
၁၀ ကျွန်ုပ်တို့သည် “[တည်ကြည်ခြင်း] ကိုကျက်စား” သောအခါ အဘယ်အကျိုးကျေးဇူး ခံစားကြရမည်နည်း။ မှုတ်သွင်းခံနယပုံပြင်ကျမ်းက “[တည်ကြည်] သောသူသည် ကောင်းချီးမင်္ဂလာနှင့်ကြွယ်ဝလိမ့်မည်” ဟုသတိပေးသည်။ (သု. ၂၈:၂၀) ကျွန်ုပ်တို့ မည်သည့်နေရာ၌ပင် နေထိုင်ပါစေ သတင်းကောင်းကို မည်သူကိုမဆို တည်ကြည်စွဲမြဲစွာ ဟောပြောလျှင် ယေဟောဝါထံတော်မှ ကောင်းချီးများရရှိလိမ့်မည်။ ဥပမာ၊ ဖရဲန့်ခ်နှင့် သူ့ဇနီးရို့စ်တို့သည် စကော့တလန် မြောက်ပိုင်းရှိ မြို့တစ်မြို့တွင် လွန်ခဲ့သောအနှစ် ၄၀ ကရှေ့ဆောင်များအဖြစ် တာဝန်ယူ အမှုဆောင်ခဲ့ကြသည်။ ထိုတွင် အမှန်တရားကို စိတ်ဝင်စားခဲ့ကြသူ လူနည်းစုလည်း မရှိတော့ချေ။ ဤရှေ့ဆောင်ဇနီးမောင်နှံသည် စိတ်မပျက်ဘဲ ဟောပြောခြင်းနှင့် တပည့်ဖြစ်စေခြင်းလုပ်ငန်းကို စတင်ထမ်းဆောင်လေသည်။ ယခုအခါ ထိုမြို့တွင် တိုးတက်နေသော အသင်းတော်တစ်ခုရှိနေပြီ။ ဤဇနီးမောင်နှံ၏တည်ကြည်မှုကို ယေဟောဝါ အမှန်ပင်ကောင်းချီးပေးခဲ့ပြီ။ ဖရဲန့်ခ်က “အမှန်တရားမှာ အခုထိ ကျွန်ုတော်တို့ ရှိနေကြပြီး ယေဟောဝါရဲ့အသုံးတော်ခံဖြစ်ရတာ အကြီးမြတ်ဆုံးကောင်းချီးပါပဲ” ဟုနှိမ့်ချစွာပြောသည်။ မှန်၏၊ ကျွန်ုပ်တို့သည် ‘တည်ကြည်ခြင်းကိုကျက်စား’ သောအခါ ကောင်းချီးများစွာ ခံစားရခြင်းကို တန်ဖိုးထားလေးမြတ်ကြ၏။
‘ယေဟောဝါ၌ မွေ့လျော်လော့’
၁၁၊ ၁၂။ (က) ကျွန်ုပ်တို့သည် မည်သို့ ‘ယေဟောဝါ၌ မွေ့လျော်’ နိုင်သနည်း။ (ခ) ကိုယ်ပိုင်လေ့လာမှုနှင့်စပ်လျဉ်း၍ အဘယ်ပန်းတိုင်ချနိုင်သနည်း၊ ရရှိနိုင်ဖွယ်ရလဒ်ကား အဘယ်နည်း။
၁၁ ယေဟောဝါနှင့် ကျွန်ုပ်တို့၏ဆက်ဆံရေး ခိုင်ခံ့စေရန်နှင့် ကိုယ်တော့်ကို အမြဲယုံကြည်ကိုးစားနေရန် ‘ယေဟောဝါ၌ မွေ့လျော်’ ရမည်။ (ဆာလံ ၃၇:၄က) ၎င်းကို မည်သို့ပြုလုပ်နိုင်သနည်း။ ကျွန်ုပ်တို့၏အခြေအနေသည် မည်မျှပင်ခက်ခဲပါစေ ယင်းကို အာရုံစိုက်နေမည့်အစား ယေဟောဝါအပေါ် အာရုံပြုထားကြသည်။ ထိုသို့ပြုရန်နည်းတစ်နည်းမှာ အချိန်ယူ၍ သမ္မာကျမ်းစာဖတ်ရှုခြင်းဖြစ်သည်။ (ဆာလံ ၁:၁၊ ၂) သင်သည် သမ္မာကျမ်းစာဖတ်ရှုခြင်းကို ပျော်မွေ့ပါသလော။ ယေဟောဝါအကြောင်း ပိုမိုသိရှိလိုသောပန်းတိုင်ဖြင့် ကျမ်းစာကိုဖတ်လျှင် အမှန်တကယ်ပျော်မွေ့ပါလိမ့်မည်။ အပိုဒ်တစ်ပိုဒ်ကိုဖတ်ပြီးတိုင်း ခဏရပ်၍ ‘ဤအပိုဒ်က ကျွန်ုပ်ကို ယေဟောဝါအကြောင်း အဘယ်အရာသင်ပေးသနည်း’ ဟု မိမိကိုယ်ကိုမေးပါ။ ကျမ်းစာဖတ်ချိန်တွင် အနီးအနား၌ မှတ်စုစာအုပ်၊ သို့မဟုတ် စာရွက်တစ်ရွက်ရှိလျှင် အထောက်အကူဖြစ်လိမ့်မည်။ ခဏရပ်၍ သင်ဖတ်ရှုခဲ့သည့်အကြောင်း၏အဓိပ္ပာယ်ကို ဆင်ခြင်သုံးသပ်တိုင်း ဘုရားသခင်၏ ချစ်ခင်စဖွယ်ဂုဏ်ရည်တစ်ခုခုကို သတိရစေသည့်စကားစု ချရေးမှတ်လိုက်ပါ။ အခြားဆာလံကျမ်းတစ်ပုဒ်တွင် ဒါဝိဒ် ဤသို့စပ်ဆိုခဲ့သည်– ‘အကျွန်ုပ်ပြောသောစကားနှင့် စိတ်နှလုံး၏အကြံအစည်သည် ရှေ့တော်၌ နှစ်သက်ဖွယ်ဖြစ်ပါစေသော။ အိုထာဝရဘုရားသခင် အကျွန်ုပ်၏ကျောက်၊ အကျွန်ုပ်ကိုရွေးနုတ်တော်မူသောဘုရားသခင်။’ (ဆာလံ ၁၉:၁၄) သမ္မာကျမ်းစာကို ဤသို့အာရုံစိုက်ဖတ်ရှုခြင်းသည် ယေဟောဝါရှေ့တော်တွင် “နှစ်သက်ဖွယ်” ဖြစ်သည့်ပြင် ကျွန်ုပ်တို့လည်း အားရကျေနပ်ကြ၏။
၁၂ လေ့လာဆင်ခြင်သုံးသပ်ခြင်းမှ ပျော်ရွှင်မှု မည်သို့ရနိုင်သနည်း။ ယေဟောဝါနှင့် ကိုယ်တော်၏နည်းလမ်းတော်များအကြောင်း တတ်သိနိုင်သ၍ များများသိရှိလာရန် ပန်းတိုင်ထားနိုင်သည်။ အသက်ရှင်ခဲ့သမျှတွင် အကြီးမြတ်ဆုံးလူသား နှင့် ယေဟောဝါထံ ချဉ်းကပ်လော့ * အစရှိသောစာအုပ်များတွင် ကျွန်ုပ်တို့ကျေးဇူးတင်လေးမြတ်စိတ်ဖြင့် ဆင်ခြင်သုံးသပ်နိုင်သည့် အချက်အလက်များစွာရှိ၏၏။ ထိုသို့ပြုလျှင် ယေဟောဝါသည် ဖြောင့်မတ်သူများအား “စိတ်နှလုံးအလိုပြည့်စုံရသောအခွင့်ကို ပေးတော်မူမည်” ဟုဒါဝိဒ်အာမခံသည်။ (ဆာလံ ၃၇:၄ခ) တမန်တော်ယောဟန်သည် ထိုသို့သောယုံကြည်စိတ်ချမှုမျိုးဖြင့် ဤစကားများကို ရေးသားရန် လှုံ့ဆော်ခံရခြင်းဖြစ်မည်– “ငါတို့သည် ဘုရားသခင့်အထံတော်၌ ရဲရင့်ခြင်း [“ယုံကြည်စိတ်ချခြင်း၊” ကဘ] အကြောင်းဟူမူကား၊ ငါတို့သည် အလိုတော်နှင့်အညီ တစ်စုံတစ်ခုသောဆုကိုတောင်းလျှင် ဘုရားသခင်သည် နားထောင်တော်မူ၏။ ဆုတောင်းသမျှသောစကားတို့ကို နားထောင်တော်မူသည်ကို ငါတို့သည်သိလျှင် အထံတော်၌တောင်းသောဆုတို့ကို ရမည်ဟုသိရကြ၏။”—၁ ယောဟန် ၅:၁၄၊ ၁၅။
၁၃။ မကြာသေးမီနှစ်များက နိုင်ငံများစွာတွင် ဘုရားသခင့်နိုင်ငံတော်ဟောပြောခြင်းလုပ်ငန်း မည်သို့တိုးချဲ့ခဲ့သနည်း။
၁၃ တည်ကြည်ဖြောင့်မတ်သူများအနေနှင့် ကျွန်ုပ်တို့ အနှစ်ခြိုက်ဆုံးအရာမှာ ယေဟောဝါ၏အကြွင်းမဲ့ပိုင်သအုပ်စိုးမှု သံသယကင်းရှင်းရေးဖြစ်သည်။ (သု. ၂၇:၁၁) ကြမ်းတမ်းသောအုပ်စိုးမှုအောက်ရှိ နိုင်ငံများမှ ကျွန်ုပ်တို့၏ညီအစ်ကိုများ လုပ်ဆောင်နေသမျှ အံ့မခန်းဖွယ် ဟောပြောခြင်းလုပ်ငန်းအကြောင်း ကျွန်ုပ်တို့ကြားသိရသောအခါ နှလုံးယိုဖိတ်မတတ် ဝမ်းသာပီတိဖြစ်ရသည်မဟုတ် ပေလော။ ကျွန်ုပ်တို့သည် ဤအစီအစဉ်စနစ်အဆုံးမတိုင်မီ ထပ်၍ မည်သို့လွတ်လပ်လာဦးမည်ကို မျှော်လင့်စောင့်စားနေကြသည်။ လွတ်လပ်စွာ ဝတ်ပြုကိုးကွယ်ခွင့်ရှိသည့် အနောက်နိုင်ငံများတွင်နေထိုင်ကြသော ယေဟောဝါသက်သေများသည် အနောက်တိုင်းတွင် ခေတ္တယာယီလာနေထိုင်ကြသော ကျောင်းသားများ၊ ခိုလှုံသူများနှင့် အခြားသူတို့ကို အင်တိုက်အားတိုက်ဟောပြောခွင့်ရလျက်ရှိ၏။ ကျွန်ုပ်တို့အတောင့်တဆုံးဆန္ဒမှာ အဆိုပါသူတို့ နေရင်းပြည်သို့ ပြန်သောအခါ ထိုးဖောက်မြင်နိုင်ပုံမရသည့် အမှောင်ထု၌ပင် အမှန်တရားအလင်းကို ဆက်လက်ထွန်းလင်းသွားရန်ဖြစ်သည်။—မဿဲ ၅:၁၄-၁၆။
‘ကိုယ်အမှုအရာကို ယေဟောဝါ၌အပ်လော့”
၁၄။ ယေဟောဝါကို ကျွန်ုပ်တို့မှီခိုအားထားနိုင်ကြောင်း အဘယ်သာဓကရှိသနည်း။
၁၄ လေးလံသောဝန်ထုပ်များဖြစ်ပုံရသည့် ကျွန်ုပ်တို့၏စိုးရိမ်ပူပန်မှုများ ပပျောက်သွားနိုင်သည်ဟု သိရှိရခြင်းသည် အမှန်ပင် စိတ်သက်သာရာရစေသည်တကား! မည်သို့အားဖြင့်နည်း။ ဒါဝိဒ်က ‘ကိုယ်အမှုအရာကို ယေဟောဝါ၌အပ်လော့။ ကိုယ်တော်ကို ကိုးစားလော့’ ဟုပြောပြီးနောက် ‘သို့ပြုလျှင် စီရင်တော်မူမည်’ ဟုထပ်ဆင့်ဆို၏။ (ဆာလံ ၃၇:၅) ယေဟောဝါ၏ထောက်မမှုရမည်ကို စိတ်ချနိုင်ကြောင်း ကျွန်ုပ်တို့၏အသင်းတော်များတွင် သာဓကများစွာရှိ၏။ (ဆာလံ ၅၅:၂၂) ရှေ့ဆောင်များ၊ နယ်လှည့်ကြီးကြပ်မှူးများ၊ ခရစ်ယာန်သာသနာပြုများ၊ ဗေသလတွင် စေတနာ့ဝန်ထမ်းနေသူများအဖြစ် အချိန်ပြည့်အမှုဆောင်နေသူအားလုံးသည် ယေဟောဝါ၏ကြည့်ရှုစောင့်ရှောက်မှုကို ယုံကြည်စိတ်ချနိုင်ကြောင်း သက်သေပြနိုင်ကြ၏။ သင်,သိကျွမ်းသူများနှင့် စကားစမြည်ပြောဆိုပြီး သူတို့ကို ယေဟောဝါ မည်သို့ကူမပေးခဲ့ကြောင်း မေးမြန်းကြည့်ပါလေ။ ခက်ခဲသောအချိန်များတွင်ပင် ယေဟောဝါ၏လက်တော် တစ်ခါမျှမတိုခဲ့ကြောင်း ဖော်ပြသည့်တွေ့ကြုံမှုများစွာကို ကြားသိကြရလိမ့်မည်။ ကိုယ်တော်သည် ဘဝလိုအပ်ရာများကို အမြဲထောက်ပံ့ပေးတော်မူ၏။—ဆာလံ ၃၇:၂၅; မဿဲ ၆:၂၅-၃၄။
၁၅။ ဘုရားသခင့်လူတို့၏ဖြောင့်မတ်မှုသည် မည်သို့ထွန်းလင်းသနည်း။
၁၅ ကျွန်ုပ်တို့သည် ယေဟောဝါအပေါ် လုံးလုံးလျားလျား ယုံကြည်ကိုးစားသောအခါ ဆာလံဆရာ ဤသို့ထပ်ဆင့်ဆိုသည့်အတိုင်း “သင်၏ဖြောင့်မတ်ခြင်းအကြောင်းကို အလင်းကဲ့သို့လည်းကောင်း၊ တရားသဖြင့်ပြုခြင်းအရာကို မွန်းတည့်ရောင်ခြည်ကဲ့သို့လည်းကောင်း ဖော်ပြတော်မူ” သည်ကို ခံစားနိုင်ကြမည်။ (ဆာလံ ၃၇:၆) ယေဟောဝါသက်သေများအနေနှင့် ကျွန်ုပ်တို့သည် တစ်ခါတစ်ရံ အထင်လွဲမှားခံရကြ၏။ သို့သော် ကျွန်ုပ်တို့သည် ယေဟောဝါနှင့် အိမ်နီးချင်းကိုချစ်သည့် မေတ္တာကြောင့် လူတို့ထံသွား၍ အမှုဆောင်နေကြကြောင်း နှလုံးရိုးဖြောင့်သူများအား ယေဟောဝါသိစေတော်မူ၏။ တစ်ချိန်တည်းတွင် လူအများ အထင်လွဲမှားနေသည့် ကျွန်ုပ်တို့၏ဖြောင့်မတ်သောအမူအကျင့်ကို ဖုံးကွယ်ထား၍မရနိုင်ချေ။ အတိုက်အခံနှင့် ညှဉ်းပန်းနှိပ်စက်မှုအမျိုးမျိုးကြားမှ ကျွန်ုပ်တို့ကို ယေဟောဝါထောက်ပံ့ပေးတော်မူ၏။ ရလဒ်ကား၊ ဘုရားသခင့်လူတို့၏ ဖြောင့်မတ်မှုသည် မွန်းတည့်နေကဲ့သို့ ထွန်းလင်းလျက်ရှိသည်။—၁ ပေတရု ၂:၁၂။
“ငြိမ်ဝပ်စွာနေ၍ . . . ငံ့လင့်လော့”
၁၆၊ ၁၇။ ဆာလံ ၃၇:၇ နှင့်အညီ အဘယ်အရာအတွက် အချိန်တန်ပြီနည်း၊ အဘယ်ကြောင့်နည်း။
၁၆ ဆာလံဆရာက ‘ထာဝရဘုရားသခင်ရှေ့မှာ ငြိမ်ဝပ်စွာနေ၍ ကိုယ်တော်ကို ငံ့လင့်လော့။ မိမိအမှု၌ အောင်တတ်သောသူ၊ မကောင်းသောအကြံအစည်တို့ကို ပြီးစီးစေသောသူ၏အကြောင်းကြောင့် စိတ်မပူနှင့်’ ဟုဆက်ပြောသည်။ (ဆာလံ ၃၇:၇) ဤတွင် ယေဟောဝါ၏လုပ်ဆောင်မှုကို စိတ်ရှည်စွာ စောင့်ဆိုင်းနေဖို့လိုကြောင်း ဒါဝိဒ်အလေးပေးဖော်ပြသည်။ ဤအစီအစဉ်စနစ် ဆုံးခန်းမတိုင်သေးသော်လည်း ညည်းညူစရာအကြောင်းမဟုတ်ချေ။ ယေဟောဝါ၏ကရုဏာနှင့် စိတ်ရှည်မှုသည် ကျွန်ုပ်တို့ အစကထင်မှတ်ခဲ့သည်ထက် ပို၍ပင်ကြီးမားကြောင်း တွေ့မြင်ခဲ့ပြီမဟုတ်လော။ ဆုံးခန်းမတိုင်မီ သတင်းကောင်းဟောပြောခြင်းလုပ်ငန်း၌ ဆက်အလုပ်များနေခြင်းအားဖြင့် ကျွန်ုပ်တို့သည်လည်း စိတ်ရှည်စွာ စောင့်မျှော်နေကြကြောင်း ယခု ဖော်ပြနိုင်သလော။ (မာကု ၁၃:၁၀) ကျွန်ုပ်တို့၏ရွှင်လန်းမှုနှင့် ဝိညာဉ်ရေးလုံခြုံမှု ပပျောက်သွားစေနိုင်သည့် မဆင်မခြင်လုပ်ရပ်များကိုရှောင်ရန် ယခု အချိန်တန်ပြီ။ စာတန်လောက၏ အကျင့်ပျက်ပြားစေသော သွေးဆောင်မှုများကို သာ၍ပင်ကြိုးစားတွန်းလှန်ရမည့်အချိန်ကား ယခုအချိန်ပင်ဖြစ်သည်။ ထို့ပြင် ကိုယ်ကျင့်တရား သန့်ရှင်းစင်ကြယ်မှုကို ဆက်ထိန်းထားပြီး ယေဟောဝါနှင့် ကျွန်ုပ်တို့၏ဖြောင့်မတ်သောဆက်ဆံရေးကို ဘယ်တော့မျှ မပျက်ပြားစေရမည့်အချိန်သည် ယခုအချိန်ဖြစ်၏။ အကျင့်ပျက်အတွေးများကို ဖယ်ထုတ်ပစ်ပြီး ဆန့်ကျင်ဘက်လိင် သို့မဟုတ် လိင်တူများအပေါ် မလျောက်ပတ်သောအပြုအမူများကို ရှောင်ရှားကြပါစို့။—ကောလောသဲ ၃:၅။
၁၇ ဒါဝိဒ်က ‘အမျက်မထွက်စေနှင့်။ ဒေါသစိတ်ကို စွန့်ပယ်လော့။ ပြစ်မှားစေခြင်းငှာ တိုက်တွန်းတတ်သောစိတ်မရှိစေနှင့်။ ပြစ်မှားသောသူတို့သည် ပယ်ရှင်းခြင်းကိုခံရကြလိမ့်မည်။ ထာဝရဘုရားသခင်ကို မျှော်လင့်သောသူတို့မူကား ပြည်တော်ကို အမွေခံရကြလိမ့်မည်’ ဟု သတိပေးဆုံးမ၏။ (ဆာလံ ၃၇:၈၊ ၉) မှန်ပါသည်၊ အကျင့်ယိုယွင်းမှုနှင့် ယင်းကိုဖြစ်ပေါ်စေသူရှိသမျှတို့ကို ကမ္ဘာမြေပေါ်မှ ယေဟောဝါလုံးဝဖယ်ရှားတော့မည့် ယခုအလွန်နီးကပ်လျက်ရှိသောအချိန်ကို ကျွန်ုပ်တို့ စိတ်ချလက်ချ စောင့်မျှော်နိုင်ကြသည်။
“ခဏကြာပြီးမှ”
၁၈၊ ၁၉။ ဆာလံ ၃၇:၁၀ မှအဘယ်အားပေးမှု ရရှိသနည်း။
၁၈ “ခဏကြာပြီးမှ မတရားသောသူသည်မရှိရ။ သူ၏နေရာကို စေ့စေ့ရှာ၍မတွေ့ရ။” (ဆာလံ ၃၇:၁၀) ဤအစီအစဉ်စနစ်အဆုံး၊ ယေဟောဝါနှင့်ကင်းကွာနေသည့်အတွက် ဘေးသင့်ခြင်းအဆုံး နီးလာသည်နှင့်အမျှ အဆိုပါစကားများသည် ကျွန်ုပ်တို့ကို အမှန်ပင်အားရှိစေ၏! လူဖန်တီးခဲ့သော မည်သည့်အစိုးရ၊ မည်သည့် အာဏာစက်မဆို လုံးဝမအောင်မြင်ခဲ့ချေ။ ယခုအခါ ဘုရားသခင်အုပ်ချုပ်မှု၊ စစ်မှန်သောသီအိုကရေစီ၊ ယေရှုခရစ်၏လက်တွင်ရှိ ယေဟောဝါ၏နိုင်ငံတော် ရောက်ရှိတော့မည့်အချိန် နီးကပ်လာလျက်ရှိသည်။ ၎င်းသည် ကမ္ဘာ့ရေးရာများကို အပြီးသတ်ချုပ်ကိုင်ပြီး ဘုရားသခင့်နိုင်ငံတော်ကို ဆန့်ကျင်ပုန်ကန်သူ ရှိရှိသမျှကို ဖျက်ဆီးတော့မည်။—ဒံယေလ ၂:၄၄၊ ၄၅။
၁၉ ဘုရားသခင့်နိုင်ငံတော်အောက် ကမ္ဘာသစ်တွင် သင်သည် “မတရားသောသူ” ကိုရှာလျှင်ပင် တွေ့နိုင်တော့မည်မဟုတ်ချေ။ ထိုအချိန်တွင် ယေဟောဝါကို ဆန့်ကျင်ပုန်ကန်သူ မည်သူမဆို ချက်ချင်းဖျက်ဆီးခံရလိမ့်မည်။ ထိုတွင် ကိုယ်တော်၏ပိုင်သအုပ်စိုးမှုကို တိုက်ခိုက်မည့်သူ၊ ဘုရားသခင့်ရေးရာအာဏာကို လက်အောက်ခံရန် ငြင်းပယ်မည့်သူ ရှိတော့မည်မဟုတ်ချေ။ သင်၏အိမ်နီးချင်းအားလုံးသည် သင့်နည်းတူ ယေဟောဝါ၏စိတ်တော်နှင့် တွေ့လိုသူများဖြစ်ကြလိမ့်မည်။ သော့ခတ်စရာမလို၊ မင်းတုပ်များချထားစရာမလို၊ အပြည့်အဝယုံကြည်ကိုးစားမှုနှင့် ပျော်ရွှင်မှုရှိသည့် တကယ့်လုံခြုံမည့်အချိန်ပါတကား!—ဟေရှာယ ၆၅:၂၀; မိက္ခာ ၄:၄; ၂ ပေတရု ၃:၁၃။
၂၀၊ ၂၁။ (က) ဆာလံ ၃၇:၁၁ ပါ “အနွံအနာခံ” သူများကား မည်သူများနည်း၊ သူတို့သည် “များပြားသောငြိမ်သက်ခြင်း” ကိုအဘယ်နေရာတွင် တွေ့ရှိသနည်း။ (ခ) သာ၍ကြီးမြတ်သော ဒါဝိဒ်ဖြစ်သူကို ကျွန်ုပ်တို့တုပလျှင် အဘယ်ကောင်းချီးများရရှိမည်နည်း။
၂၀ ထို့နောက် “အနွံအနာခံသောသူတို့မူကား မြေကြီးကိုပိုင်ဆိုင်” ရကြလိမ့်မည်။ (ဆာလံ ၃၇:၁၁က၊ ကဘ) သို့သော် အဆိုပါ “အနွံအနာခံသောသူတို့” ကားမည်သူတို့ဖြစ်သနည်း။ “အနွံအနာခံခြင်း” ဟုပြန်ဆိုထားသော စကားလုံးသည် “ဖိစီးနှိပ်စက်ခံရ၊ နှိမ့်ချခံရ၊ အရှက်ခွဲခံရ” ဟူ၍ အဓိပ္ပာယ်ရသော မူရင်းစကားလုံးမှ ဆင်းသက်လာ၏။ “အနွံအနာခံသောသူတို့” သည် သူတို့အပေါ် မတရားအနိုင်ကျင့်မှုရှိသမျှကို တည့်မတ်ပေးရန် ယေဟောဝါအား နှိမ့်ချစွာ စောင့်ဆိုင်းနေသူများဖြစ်သည်။ သူတို့သည် “များပြားသောငြိမ်သက်ခြင်း၌ မွေ့လျော်ကြလိမ့်မည်။” (ဆာလံ ၃၇:၁၁ခ) ယခုပင်လျှင် စစ်မှန်သောခရစ်ယာန်အသင်းတော်နှင့် ပေါင်းသင်းရသည့် ဝိညာဉ်ရေးပရဒိသုတွင် များပြားသောငြိမ်သက်ခြင်းကို ကျွန်ုပ်တို့တွေ့ရှိရ၏။
၂၁ ကျွန်ုပ်တို့သည် ဆင်းရဲခက်ခဲမှုများကို ယခုခံစားနေရသေးသော်လည်း အချင်းချင်းထောက်မကူညီ၍ စိတ်ဓာတ်ကျသူများကို နှစ်သိမ့်ပေးကြသည်။ ရလဒ်ကား၊ ယေဟောဝါ၏လူတို့တွင် စစ်မှန်သောအတွင်းကျေနပ်ရောင့်ရဲမှု တိုးများလာခြင်းဖြစ်သည်။ သိုးထိန်းများအဖြစ် ခန့်အပ်ထားသော ညီအစ်ကိုများသည် ဖြောင့်မတ်ခြင်းတရားအတွက်ခံရသော ဆင်းရဲခက်ခဲမှုကို ခံနိုင်ရည်ရှိရှိ ခံရပ်နိုင်ဖို့ ကျွန်ုပ်တို့၏ဝိညာဉ်ရေးလိုအပ်ရာများသာမက တစ်ခါတစ်ရံ ကာယရေးလိုအပ်ရာများကိုပင် မေတ္တာပါစွာကူညီပေးကြသည်။ (၁ သက်သာလောနိတ် ၂:၇၊ ၁၁; ၁ ပေတရု ၅:၂၊ ၃) ဤငြိမ်သက်မှုသည် တကယ်တန်ဖိုးမဖြတ်နိုင်သောပိုင်ဆိုင်မှုတစ်ခုပါတကား! ထို့ပြင် လက်တစ်ကမ်းအလိုတွင်ရှိသည့် အေးဆေးငြိမ်သက်သော ပရဒိသုတွင် ထာဝရအသက်ရဖို့လည်း ကျွန်ုပ်တို့မျှော်လင့်နိုင်ကြ၏။ သို့ဖြစ်၍ ယေဟောဝါအတွက်ဇွဲကြောင့် အဆုံးတိုင် တည်ကြည်စွာအမှုဆောင်ရန် လှုံ့ဆော်ပေးခံရသော သာ၍ကြီးမြတ်သည့်ဒါဝိဒ်ဖြစ်သူ ယေရှုခရစ်ကို ကျွန်ုပ်တို့အတုယူကြပါစို့။ (၁ ပေတရု ၂:၂၁) ဤသို့ပြုခြင်းအားဖြင့် ကျွန်ုပ်တို့သည် အဆက်မပြတ်ပျော်ရွှင်ကြပြီး ကျွန်ုပ်တို့မွေ့လျော်ကြရသည့် ဘုရားသခင် ယေဟောဝါကို ချီးမွမ်းနိုင်ကြလိမ့်မည်။
[အောက်ခြေမှတ်ချက်]
^ အပိုဒ်၊ 12 ယေဟောဝါသက်သေများ ထုတ်ဝေသည်။
သင်ဖြေဆိုနိုင်သလော
• ဆာလံ ၃၇:၁၊ ၂ မှ အဘယ်သင်ခန်းစာများ ရရှိခဲ့သနည်း။
• သင်သည် မည်သို့ ‘ယေဟောဝါ၌မွေ့လျော်’ နိုင်သနည်း။
• ကျွန်ုပ်တို့သည် ယေဟောဝါကို မှီခိုအားထားနိုင်ကြောင်း အဘယ်အထောက်အထားရှိသနည်း။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
ခရစ်ယာန်များသည် “မတရားသဖြင့်ပြုသောသူတို့ကို မငြူစူ” ကြ
[စာမျက်နှာ ၁၀ ပါ ရုပ်ပုံ]
‘ယေဟောဝါ၌ကိုးစား၍ ကောင်းမှုပြုလော့’
[စာမျက်နှာ ၁၁ ပါ ရုပ်ပုံ]
သင်သည် ယေဟောဝါအကြောင်း တတ်နိုင်သလောက် သင်ယူခြင်းအားဖြင့် ကိုယ်တော်၌ မွေ့လျော်ပါ
[စာမျက်နှာ ၁၂ ပါ ရုပ်ပုံ]
“အနွံအနာခံသောသူတို့မူကား မြေကြီးကို ပိုင်ဆိုင်ကြလိမ့်မည်”