ရေ​မ​လုံ​သော ရေကျင်း​များ

သမ္မာကျမ်းစာ​ခေတ်တွင် ရေကျင်း​များသည် လူ​တို့​တူး​ထားသော မြေအောက်​ရေ​လှောင်​ကန်​များ​ဖြစ်သည်။ ကတိထားရာ​ပြည်တော်​တွင် အချို့​သော​ကာလ​များ​အတွင်း ယင်း​တို့သည် အရေးကြီး​လှ​သည့် ရေ​သိုလှောင်​ရာ​တစ်ခု​တည်း​သော နေရာ​ဖြစ်​ခဲ့​သည်။

ဘုရားသခင်​၏​ဆင့်ဆိုချက်​တစ်ခု​ကို မှတ်တမ်းတင်​ရာ​တွင် ယေရမိ​သည် ရေကျင်း​များ​ကို ဥပစာ​သဘောဖြင့်​ရည်ညွှန်း​၍ ဤသို့​ဆို​သည်– “ငါ​၏​လူတို့သည် အသက်​စမ်းရေ​တွင်း​တည်း​ဟူသော ငါ့ကို​စွန့်ပယ်​၍ ရေ​မ​လုံ၊ ပဲ့​ပျက်​သော​ရေကျင်း​တို့ကို​တူး​သော​အားဖြင့် [မကောင်းမှု] နှစ်ပါး​ကို​ပြု​ကြပြီ။”—ယေရမိ ၂:၁၃။

ဣသရေလ​လူမျိုး​သည် “အသက်​စမ်းရေ​တွင်း” ဖြစ်သော သူတို့၏​ဘုရားသခင် ယေဟောဝါ​ကို စွန့်ပယ်​ခဲ့​ကြ​ပြီး အယူမှား​သော​လူမျိုး​တို့​နှင့် ခနော်ခနဲ့​နိုင်​သည့် စစ်​မဟာမိတ်​များ​ဖွဲ့​ထား​ကာ အစွမ်း​မရှိသော နတ်​ဘုရား​များ​ကို ဝတ်ပြု​နေကြ​လေ​သည်။ အဆိုပါ အားကိုး​ခိုလှုံရာ​အရပ်​တို့သည် ယေရမိ​၏​ပုံ​ပ​မာ​အရ အကာအကွယ်​ပေး​နိုင်စွမ်း​မရှိ၊ ကယ်တင်​နိုင်စွမ်း​မရှိသည့် ရေ​မ​လုံ​သော​ရေကျင်း​များ​မျှ​သာ ဖြစ်​ကြ​လေ​သည်။—တရားဟောရာ ၂၈:၂၀။

ဤ​သမိုင်းဝင်​ပုံ​နမူနာ​မှ ယနေ့ ကျွန်ုပ်​တို့အတွက် သင်ခန်းစာယူ​စ​ရာ​ရှိသလော။ ယေရမိ​အချိန်​က​ကဲ့သို့ ထာဝရ​ဘုရားသခင် ယေဟောဝါ​သည် တစ်ခု​တည်း​သော ပင်မ​အသက်ပေး​စမ်းရေ​တွင်း​ဖြစ်​လျက်​ရှိသည်။ (ဆာလံ ၃၆:၉; ဗျာဒိတ် ၄:၁၁) လူသား​တို့သည် သားတော်​ယေရှု​ခရစ်​မှ​တစ်ဆင့် ကိုယ်တော်​ထံ​မှ​သာ​လျှင် ထာဝရ​အသက်​ရနိုင်​ကြသည်။ (ယောဟန် ၄:၁၄; ၁၇:၃) သို့​တိုင် ယနေ့ လူအများစု​သည် ယေရမိ​ခေတ်​မှ လူ​တို့​ကဲ့သို့​ပင် သမ္မာကျမ်းစာ​တွင် ဖော်ပြ​ထား​သည့် ဘုရားသခင့်​နှုတ်မြွက်​စကားတော်​ကို ငြင်းပယ်​ရုံ​မ​က ဖျက်​လို​ဖျက်ဆီး​ပြု​လို​ကြသည်။ သူတို့သည် သင့်တော်​သလို​ပြုသော နိုင်ငံရေး​ဖြေရှင်းချက်​များ၊ အနှစ်သာရ​မရှိသော လူ့​ဆင်ခြင်​ဉာဏ်​များနှင့် ဘုရားသခင့်​ဂုဏ်တော်​ကို ညှိုးနွမ်း​စေသည့် အချည်းနှီး​သော အယူအဆ​အတွေးအခေါ်​များ​ကို အားကိုး​အားထားကြ​သည်။ (၁ ကောရိန္သု ၃:၁၈-၂၀; ကောလောသဲ ၂:၈) ရွေး​ရမည့်​အရာ​မှာ ရှင်းနေပါသည်။ သင်သည် မည်​သူ့ကို ယုံကြည်​ကိုးစား​မည်​နည်း။ “အသက်​စမ်းရေ​တွင်း” ယေဟောဝါ​ရှင်​ကို​လော၊ “ရေ​မ​လုံ၊ ပဲ့​ပျက်​သော ရေကျင်း​တို့” ကို​လော။

[စာမျက်နှာ ၃၂ ပါ ရုပ်ပုံ]

ဣသရေလ​နိုင်ငံသား​တစ်ဦး၏ သင်္ချိုင်းဂူ​တစ်ခု​မှ​ရရှိသော မယ်တော်​ဘုရားမ မြေထည်​ရုပ်တု​ငယ်