ယေရှု၏လူ့မိသားစုမှ သင်ယူခြင်း
ယေရှု၏လူ့မိသားစုမှ သင်ယူခြင်း
ယေရှုနှစ်ခြင်းမခံမီ မြေကြီးအသက်တာ၏ ဦးဆုံးအနှစ် ၃၀ အထိ အတူနေထိုင်ခဲ့သော ကိုယ်တော်၏လူ့မိသားစုအကြောင်း သင်,အဘယ်အရာသိရှိသနည်း။ ခရစ်ဝင်ကျမ်းများက အဘယ်အရာဖော်ပြသနည်း။ ကိုယ်တော်၏မိသားစုအကြောင်းကို ဆန်းစစ်လေ့လာကြည့်ခြင်းမှ အဘယ်အရာသိရှိရသနည်း။ အဖြေများမှ သင်အကျိုးရယူနိုင်ပါသည်။
ယေရှုသည် ရွှေလင်ပန်းနှင့် အချင်းဆေး၍ မွေးဖွားလာသလော။ ကိုယ်တော်၏မွေးစားဖခင် ယောသပ်သည် လက်သမားတစ်ဦးဖြစ်၏။ ၎င်းသည် သစ်သားရဖို့ တစ်ခါတစ်ရံ သစ်ပင်များကို ခုတ်လှဲရသည့် အားအင်စိုက်ထုတ်ဖို့လိုသော ကာယအလုပ်ဖြစ်၏။ ယေရှုမွေးဖွားပြီးနောက် ရက် ၄၀ ခန့်တွင် ကိုယ်တော်၏မိဘများသည် ယေရုရှလင်မြို့သို့သွား၍ ပညတ်တရားအတိုင်း ယဇ်ပူဇော်ခဲ့ကြသည်။ ပညတ်ထားသည့်အတိုင်း ချိုးကလေးတစ်ကောင် သို့မဟုတ် ခိုတစ်ကောင်နှင့်အတူ သိုးတစ်ကောင်ကို သူတို့ပူဇော်ခဲ့သလော။ မပူဇော်ခဲ့ပါ။ ဤသို့သောယဇ်များကို သူတို့တတ်နိုင်ပုံမရချေ။ သို့တိုင် ဆင်းရဲသားများအတွက် အခြားပညတ်အစီအစဉ်တစ်ခုရှိ၏။ ၎င်းအစီအစဉ်အတိုင်း ယောသပ်နှင့်မာရိတို့သည် ‘ခိုနှစ်ကောင် သို့မဟုတ် ချိုးကလေးနှစ်ကောင်’ ကိုပူဇော်ခဲ့ကြသည်။ တန်ဖိုးနည်းသောတိရစ္ဆာန်များကို ရွေးချယ်ပူဇော်ခဲ့ကြခြင်းက သူတို့မိသားစုသည် ဆင်းရဲကြောင်း ဖော်ပြ၏။—လုကာ ၂:၂၂-၂၄; ဝတ်ပြုရာ ၁၂:၆၊ ၈။
လူသားအပေါင်းကိုအုပ်ချုပ်မည့် အနာဂတ် ရှင်ဘုရင်ယေရှုခရစ်သည် အထက်တန်းလွှာမဟုတ်သော စားဝတ်နေရေးအတွက် ရုန်းကန်နေသူများကြားတွင် မွေးဖွားခဲ့သည်ကို သင်တွေ့မြင်နိုင်၏။ ကိုယ်တော်သည် မွေးစားဖခင်ကဲ့သို့ပင် လက်သမားဘဝဖြင့် ကြီးပြင်းလာခဲ့၏။ (မဿဲ ၁၃:၅၅; မာကု ၆:၃) ကောင်းကင်တွင် တန်ခိုးကြီးဝိညာဉ်သားတစ်ပါးအဖြစ် “ယေရှုသည် စည်းစိမ်ရှိသော်လည်း” ကျွန်ုပ်တို့အတွက် “ဆင်းရဲခြင်းကိုခံတော်မူ” ၏ဟု သမ္မာကျမ်းစာကဆိုသည်။ ကိုယ်တော်သည် နိမ့်ကျသောလူသားတစ်ဦးအဆင့်ကိုခံယူကာ သာမန်လူ့မိသားစုမှ ကြီးပြင်းလာခဲ့သည်။ (၂ ကောရိန္သု ၈:၉; ဖိလိပ္ပိ ၂:၅-၉; ဟေဗြဲ ၂:၉) ယေရှုသည် လူကုံထံမိသားစုမှ မွေးဖွားလာခြင်းမဟုတ်သည့်အတွက် မိမိတို့နှင့်တန်းတူဖြစ်သည်ဟု လူအချို့ကို ခံစားရစေသဖြင့် ကိုယ်တော်၏ဂုဏ်ဒြပ်၊ အဆင့်အတန်းက သူတို့၏အာရုံကို မထွေပြားစေခဲ့ပါ။ ကိုယ်တော်၏သွန်သင်ချက်များ၊ နှစ်လိုဖွယ်အရည်အသွေးများနှင့် အံ့ဖွယ်လုပ်ရပ်များကို သူတို့လေးမြတ်တန်ဖိုးထားနိုင်ခဲ့ကြသည်။ (မဿဲ ၇:၂၈၊ ၂၉; ၉:၁၉-၃၃; ၁၁:၂၈၊ ၂၉) ယေရှုအား သာမန်မိသားစုမှ မွေးဖွားလာစေသည့် ယေဟောဝါဘုရားသခင်၏ ဉာဏ်ပညာတော်ကို ကျွန်ုပ်တို့သဘောပေါက်နိုင်၏။
ယခု ယေရှု၏အိမ်သားများအကြောင်း သုံးသပ်ပြီး သူတို့ထံမှ အဘယ်သင်ခန်းစာရနိုင်ကြောင်း ကြည့်ကြစို့။
ယောသပ်—ဖြောင့်မတ်သူတစ်ဦး
မိမိနှင့်စေ့စပ်ထားသူက “မဆက်ဆံမီတွင်” ပဋိသန္ဓေစွဲနေကြောင်း ယောသပ်သိရှိသည့်အခါ မာရိကိုချစ်သည့်မေတ္တာနှင့် အကျင့်ပျက်ပြားပုံရမှုကို စက်ဆုပ်ရွံရှာမှုစပ်ကြား လွန်ဆွဲနေပေမည်။ အခြေအနေတစ်ရပ်လုံးက ခင်ပွန်းလောင်းအနေဖြင့် သူ၏ပိုင်ဆိုင်ခွင့်ကို ချိုးဖောက်လိုက်ပုံရ၏။ သူ့ခေတ်သူ့အချိန်က စေ့စပ်ထားသောအမျိုးသမီးတစ်ဦးကို ဇနီးတစ်ဦးအဖြစ် ယူမှတ်ကြသည်။ ယောသပ်သည် စဉ်းစားချင့်ချိန်ပြီးနောက် မာရိကို သူ့သားအိမ်ရာပြစ်မှားသူအဖြစ် ခဲနှင့်ပေါက်သတ်မခံရစေရန် တိတ်တဆိတ်ကွာရှင်းဖို့ ဆုံးဖြတ်ခဲ့သည်။—မဿဲ ၁:၁၈; တရားဟောရာ ၂၂:၂၃၊ ၂၄။
ထိုအခါ ကောင်းကင်တမန်တစ်ပါးသည် ယောသပ်၏အိပ်မက်တွင် ထင်ရှားလာပြီး “သင်၏ခင်ပွန်းမာရိကို ထိန်းသိမ်းရမည့်အခွင့်ကို မစိုးရိမ်နှင့်။ ဤပဋိသန္ဓေသည် သန့်ရှင်းသောဝိညာဉ်တော်ကြောင့်ဖြစ်၏။ သားယောက်ျားကို ဖွားမြင်လိမ့်မည်။ ထိုသားသည် မိမိလူတို့ကို အပြစ်မှကယ်ချွတ်မည့်သူဖြစ်သောကြောင့် ယေရှုဟူသောအမည်ဖြင့် မှည့်ရမည်” ဟုဆို၏။ ဘုရားသခင်ထံတော်မှ ထိုညွှန်ကြားချက်ကို ယောသပ်ရရှိသည့်အခါ ညွှန်ကြားချက်အတိုင်း လုပ်ဆောင်၍ မာရိကို အိမ်သို့ခေါ်ဆောင်သွားလေ၏။—မဿဲ ၁:၂၀-၂၄။
ဤသို့ဆုံးဖြတ်ပြုမူခဲ့သောကြောင့် ဖြောင့်မတ်ပြီး သစ္စာရှိသောထိုသူသည် ပရောဖက်ဟေရှာယအားဖြင့် ယေဟောဝါက “ကြည့်ရှုလော့။ သတို့သမီးကညာသည် ပဋိသန္ဓေစွဲယူ၍ သားယောက်ျားကို ဖွားမြင်လတ္တံ့။ ထိုသားကို ဧမာနွေလအမည်ဖြင့် မှည့်ရလတ္တံ့” ဟူ၍မိန့်ဆိုချက် ပြည့်စုံမှုတွင် ပါဝင်ခွင့်ရလေသည်။ (ဟေရှာယ ၇:၁၄) မာရိ၏သားဦးသည် မိမိ၏သားရင်းဖြစ်မည်မဟုတ်သော်လည်း မေရှိယ၏မွေးစားဖခင်ဖြစ်ခွင့်ရခြင်းကို ယောသပ်တန်ဖိုးထားလေးမြတ်ခဲ့သည့် ဝိညာဉ်ရေးစိတ်ထားရှိသူတစ်ဦးဖြစ်သည်။
သားဦးကို မာရိမဖွားမီတိုင်အောင် သံဝါသပြုခြင်းကို ယောသပ် ရှောင်ကြဉ်ခဲ့၏။ (မဿဲ ၁:၂၅) ယခုမှ လက်ထပ်ပြီးခါစဇနီးမောင်နှံအတွက် ထိုသို့ရှောင်ကြဉ်ရခြင်းသည် ခက်ခဲမည်ဖြစ်သော်လည်း သူတို့သည် ကလေး၏ဖခင် မည်သူမည်ဝါဖြစ်ကြောင်း အထင်လွဲမှား မခံလိုခဲ့ကြချေ။ ချီးကျူးစရာကောင်းသော ချုပ်တည်းမှု ပုံသက်သေပါတကား! ယောသပ်သည် မိမိ၏လိုအင်ဆန္ဒများထက် ဝိညာဉ်ရေးရာကို တန်ဖိုးထားခဲ့သည်။
မိမိမွေးစားသားကို မွေးမြူပြုစုခြင်းနှင့်ပတ်သက်၍ ကောင်းကင်တမန်၏ ညွှန်ကြားချက်ကို လေးကြိမ်တိုင် ယောသပ်ရရှိခဲ့သည်။ ၎င်းတို့အနက် သုံးကြိမ်တွင် ကလေးကို အဘယ်နေရာ၌ မွေးမြူရမည်အကြောင်း မှာကြားခဲ့၏။ ကလေးအသက်ရှင်ရေးအတွက် ချက်ချင်းနာခံပြုလုပ်ဖို့ အရေးကြီး၏။ ယောသပ်သည် ထိုဖြစ်ရပ်အားလုံးတွင် မဆိုင်းမတွလုပ်ဆောင်ခဲ့သည်၊ သူငယ်ကို ဦးဆုံး အီဂျစ်ပြည်သို့ ခေါ်ဆောင်သွား၏၊ ထို့နောက် ဣသရေလပြည်သို့ ပြန်ခေါ်လာ၏။ ဤသို့ပြုလုပ်ခဲ့သောကြောင့် ကလေးငယ်များကို ဟေရုဒ်မင်းကြီး သိမ်းရုံးသတ်ဖြတ်ခဲ့ချိန်တွင် သူငယ်ယေရှု လွတ်မြောက်ခဲ့သည်။ ထို့ပြင် ယောသပ်၏နာခံမှုကြောင့် မေရှိယနှင့်ပတ်သက်သော ပရောဖက်ပြုချက်များ ပြည့်စုံလာခဲ့လေသည်။—မဿဲ ၂:၁၃-၂၃။
ယေရှုသည် ကိုယ့်ကိုယ်ကိုထောက်ပံ့နိုင်ရန် သူ့အား ယောသပ်သည် အသက်မွေးလုပ်ငန်းတစ်ခုကို သင်ပေးခဲ့သည်။ ထို့ကြောင့် ယေရှုကို “လက်သမားသား” အဖြစ်သာမက “လက်သမား” ဟူ၍လည်း လူသိများခဲ့ကြသည်။ (မဿဲ ၁၃:၅၅; မာကု ၆:၃) ယေရှုသည် “ငါတို့ခံရသည်နည်းတူ အမျိုးမျိုးသောစုံစမ်းနှောင့်ယှက်ခြင်းတို့ကို ခံဖူးသောသူဖြစ်တော်မူ၏” ဟုတမန်တော်ပေါလု ရေးသားခဲ့သည်။ ယင်းတွင် မိသားစုကိုထောက်ပံ့ရန် အလုပ်ကြိုးစားခြင်း ပါဝင်ပေမည်။—ဟေဗြဲ ၄:၁၅။
ခရစ်ယာန်ဂရိကျမ်းစာစောင်များတွင် ယောသပ်အကြောင်း နောက်ဆုံး ဖော်ပြချက်၌ စစ်မှန်သောဝတ်ပြုရေးကို သူမည်မျှဆည်းကပ်ခဲ့ကြောင်း တွေ့မြင်ရ၏။ ယောသပ်သည် ပသခါပွဲတက်ရောက်ရန် သူ၏မိသားစုကို ယေရုရှလင်မြို့သို့ ခေါ်ဆောင်သွားခဲ့သည်။ အမျိုးသားများသာ တက်ရောက်ရမည်ဖြစ်သော်လည်း ယောသပ်သည် မိသားစုကို ယေရုရှလင်မြို့သို့ “နှစ်တိုင်းအစဉ်” ခေါ်သွားသည့် အလေ့အထ ပြုလုပ်ခဲ့၏။ သူတို့သည် နာဇရက်မြို့မှ ယေရုရှလင်မြို့သို့ ၆၅ မိုင်ခန့် လမ်းလျှောက်သွားရသည့်အတွက် အကြီးအကျယ် ကိုယ်ကျိုးစွန့်ခဲ့ကြရပေမည်။ သို့သော် သမ္မာကျမ်းစာတွင် မှတ်တမ်းတင်ထားသည့် ထိုအဖြစ်အပျက်တွင် ယေရှုသည် အုပ်စုကွဲကျန်ရစ်ခဲ့သည်။ နောက်ဆုံး ပြန်တွေ့သည့်အခါ ကိုယ်တော်သည် ဝတ်ပြုရာအိမ်တော်တွင် ပညတ်တရားသွန်သင်ပေးသူများနှင့် ဆွေးနွေးမေးမြန်းလျက်ရှိ၏။ ယေရှု၏အသက် ၁၂ နှစ်သာရှိသေးသော်လည်း မဟာဉာဏ်ပညာရှိပြီး ကျမ်းစာအသိပညာကြွယ်ဝကြောင်း ထင်ရှားသည်။ မိဘများသည် ယေရှုကို ဝိညာဉ်ရေးစိတ်ထားရှိသော သားယောက်ျားလေးဖြစ်လာစေရန် ပြုစုပျိုးထောင်ပေးပြီး ကောင်းစွာသွန်သင်ပေးခဲ့ကြောင်း ဤအဖြစ်အပျက်မှ ကျွန်ုပ်တို့သိရှိရ၏။ (လုကာ ၂:၄၁-၅၀) ၎င်းနောက် မကြာမီပင် ယောသပ်ကွယ်လွန်သွားခဲ့ပုံရသည်၊ အကြောင်းမှာ ကျမ်းစာပါ နောက်ပိုင်းမှတ်တမ်းများတွင် ယောသပ်အကြောင်း မဖော်ပြထားတော့ချေ။
မှန်ပါ၏၊ ယောသပ်သည် မိသားစု၏ဝိညာဉ်ရေးနှင့် ကာယရေးနှစ်တန်စလုံးကို ကောင်းစွာဂရုစိုက်ပေးခဲ့သည့် ဖြောင့်မတ်သောသူဖြစ်၏။ ယနေ့ ဘုရားသခင်၏အလိုတော် အဘယ်အရာဖြစ်သည်ကို ပိုင်းခြားသိမြင်လာသောအခါ ယောသပ်နည်းတူ သင့်ဘဝအသက်တာတွင် ဝိညာဉ်ရေးအကျိုးစီးပွားကို ရှေးဦးထားပါသလော။ (၁ တိမောသေ ၂:၄၊ ၅) သင်သည် ယောသပ်ကဲ့သို့ လက်အောက်ခံမှုပြကာ ကျမ်းစာတွင် ဖော်ပြထားသည့် ဘုရားသခင်၏မိန့်မှာချက်များကို စိတ်လိုကိုယ်လျောက် နာခံသလော။ အခြားသူများနှင့် ဝိညာဉ်ရေးရာများကို အဓိပ္ပာယ်ရှိရှိ ပြောဆိုဆွေးနွေးနိုင်ရန် သင်၏သားသမီးများကို သင်ပေးသလော။
မာရိ—ကိုယ်ကျိုးစွန့် ဘုရားသခင့်ကျေးကျွန်တစ်ဦး
ယေရှု၏မိခင် မာရိသည် ဘုရားသခင့်ကျေးကျွန်ကောင်း တစ်ဦးဖြစ်၏။ ကောင်းကင်တမန်ဂါဗြေလက ကလေးမွေးဖွားမည်ဟု အသိပေးသောအခါ မာရိ အလွန်အံ့အားသင့်ခဲ့သည်။ သူသည် အပျိုစင်ဖြစ်သဖြင့် “ယောက်ျားနှင့်မဆက်ဆံ” ခဲ့ဖူးချေ။ သို့သော် သန့်ရှင်းသောဝိညာဉ်တော်အားဖြင့် ကလေးမွေးရမည်ဟု သိလာသောအခါ ထိုအမိန့်တော်ကို နှိမ့်ချစွာလက်ခံပြီး ‘အကျွန်ုပ်သည် ထာဝရဘုရားသခင်၏ကျွန်မဖြစ်ပါ၏။ ကိုယ်တော်၏စကားအတိုင်း အကျွန်ုပ်၌ဖြစ်ပါစေသော’ ဟုဆို၏။ (လုကာ ၁:၃၀-၃၈) ထိုဝိညာဉ်ရေးအခွင့်ထူးကို အလွန်တန်ဖိုးထားသဖြင့် သူ၏ဆုံးဖြတ်ချက်ကြောင့် ဖြစ်ပေါ်လာမည့် မည်သည့်အခက်အခဲကိုမဆို ခံယူဖို့ အသင့်ရှိခဲ့သည်။
ဤတာဝန်ကို သူလက်ခံလိုက်ခြင်းကြောင့် အမျိုးသမီးတစ်ဦးအဖြစ် သူ၏ဘဝတစ်ခုလုံး ပြောင်းလဲသွားလေသည်။ စင်ကြယ်စေခြင်းအတွက် ယေရုရှလင်မြို့သို့ မာရိသွားသောအခါ ရှုမောင်အမည်ရှိ တရားကိုရိုသေသော အသက်ကြီးသူတစ်ဦးက “သန်လျက်သည် သင်၏စိတ်နှလုံးကို ခွင်းလိမ့်မည်” ဟုသူ့ကိုပြောခဲ့သည်။ (လုကာ ၂:၂၅-၃၅) လူအများက ယေရှုကိုငြင်းပယ်ပြီး နောက်ဆုံး ညှဉ်းဆဲရာသစ်တိုင်တွင် သံနှင့်ရိုက်ခြင်းကို တွေ့မြင်ရသည့်အခါ မာရိမည်သို့ခံစားရမည်ကို သူရည်ညွှန်းနေခြင်းဖြစ်ကြောင်း ထင်ရှား၏။
ယေရှု တဖြည်းဖြည်းကြီးပြင်းလာစဉ် မာရိသည် ကိုယ်တော်၏အသက်တာတွင် ဖြစ်ပျက်ခဲ့ရာများကို စိတ်ထဲမှတ်ထားပြီး “စဉ်းစားဆင်ခြင်လျက်နေ၏။” (လုကာ ၂:၁၉၊ ၅၁) သူသည် ယောသပ်နည်းတူ ဝိညာဉ်ရေးစိတ်ထားရှိသူဖြစ်ပြီး ပရောဖက်ပြုချက်များကို ပြည့်စုံစေသည့်အဖြစ်အပျက်များနှင့် မိန့်ဆိုချက်များကို စိတ်ထဲမှတ်သားထားခဲ့သည်။ မာရိသည် ကောင်းကင်တမန်ဂါဗြေလ၏ ဤစကားကို စွဲမှတ်ထားခဲ့ပေမည်– ‘ထိုသားသည်ကား ကြီးမြတ်သောသူဖြစ်လိမ့်မည်။ အမြင့်ဆုံးသောဘုရားသခင်၏သားတော်ဟု ခေါ်ဝေါ်သမုတ်ခြင်းကိုခံရလိမ့်မည်။ သူ့အဘ ဒါဝိဒ်၏ရာဇပလ္လင်ကို ထာဝရအရှင်ဘုရားသခင်သည် သူ့အားပေးတော်မူမည်။ ထိုသူသည်လည်း ယာကုပ်အမျိုးအနွယ်ကို အစဉ်မပြတ်အုပ်စိုးလိမ့်မည်။ သူ၏နိုင်ငံသည်လည်း ဆုံးခြင်းမရှိရ။’ (လုကာ ၁:၃၂၊ ၃၃) မာရိသည် မေရှိယ၏လူသားမိခင်ဖြစ်ခွင့်ရခြင်းကို အလေးအနက်တန်ဖိုးထားခဲ့၏။
အံ့ဖွယ်နည်းဖြင့် ပဋိသန္ဓေစွဲခဲ့သည့် ဆွေမျိုးတော်စပ်သူ ဧလိရှဗက်နှင့် တွေ့ဆုံခဲ့ချိန်၌လည်း မာရိ၏ဝိညာဉ်ရေးစိတ်ထား ထင်ရှားလာပြန်သည်။ မာရိသည် သူ့ကိုတွေ့သောအခါ ယေဟောဝါအား ချီးမွမ်းပြီး ဘုရားသခင့်နှုတ်မြွက်စကားတော်ကို ချစ်မြတ်နိုးကြောင်း ဖော်ပြခဲ့သည်။ ၁ ဓမ္မရာဇဝင် အခန်းကြီး ၂ တွင်မှတ်တမ်းတင်ထားသည့် ဟန္န၏ဆုတောင်းချက်နှင့် တခြားဟေဗြဲကျမ်းစာစောင်များမှ စကားများကို သူရည်ညွှန်းခဲ့သည်။ ဤကဲ့သို့ကျမ်းစာအသိပညာရှိခြင်းက သူသည် ဘုရားသခင်အား ဆည်းကပ်အပ်နှံ၊ ကြောက်ရွံ့သော မိခင်တစ်ဦးဖြစ်လာရန် အရည်အချင်းပြည့်မီကြောင်း ဖော်ပြ၏။ သူ၏သားကို ဝိညာဉ်ရေးအရ ပြုစုပျိုးထောင်ရန် ယောသပ်နှင့် ပူးပေါင်းလုပ်ဆောင်ခဲ့ပေမည်။—ကမ္ဘာဦး ၃၀:၁၃; ၁ ဓမ္မရာဇဝင် ၂:၁-၁၀; မာလခိ ၃:၁၂; လုကာ ၁:၄၆-၅၅။
မိမိ၏သားသည် မေရှိယဖြစ်သည်ကို မာရိအခိုင်အမာယုံကြည်ခဲ့သည်၊ ယေရှုသေပြီးနောက်၌ပင် သူ၏ယုံကြည်ခြင်း မလျော့နည်းသွားခဲ့ချေ။ ကိုယ်တော်ရှင်ပြန်ထမြောက်ပြီးနောက် မကြာမီ တမန်တော်များနှင့်အတူ ဆုတောင်းရန် စုဝေးခဲ့ကြသည့် တည်ကြည်သောတပည့်များတွင် မာရိသည် တစ်ဦးပါဝင်ခဲ့သည်။ (တမန်တော် ၁:၁၃၊ ၁၄) ညှဉ်းဆဲရာသစ်တိုင်ပေါ်တွင် ချစ်ရသောသား သေဆုံးရခြင်းကို မြင်တွေ့ခဲ့ရသည့်အခါ စိတ်ထိခိုက်ခဲ့သော်လည်း သူ၏ယုံကြည်ခြင်းကို ဆက်ထိန်းထားခဲ့သည်။
မာရိ၏ဘဝအကြောင်း သင်သိရှိလာခြင်းမှ အဘယ်အကျိုးကျေးဇူးရရှိနိုင်သနည်း။ ကိုယ်ကျိုးစွန့်ရပါစေ၊ ဘုရားသခင်၏အမှုတော် ထမ်းဆောင်ခွင့်ရခြင်းကို သင်လက်ခံပါသလော။ ယနေ့ ဤအခွင့်ထူးကို သင်အလေးအနက်ထား အာရုံစိုက်ပါသလော။ ယေရှုကြိုဟောခဲ့ရာများကို သင်စွဲမှတ်ထားပြီး ယနေ့ ဖြစ်ပျက်နေရာများနှင့် နှိုင်းယှဉ်ကာ “စဉ်းစားဆင်ခြင်လျက်နေ” သလော။ (မဿဲကျမ်းအခန်းကြီး ၂၄ နှင့် ၂၅; မာကုကျမ်းအခန်းကြီး ၁၃; လုကာကျမ်းအခန်းကြီး ၂၁) ကျမ်းစာကို ပိုင်နိုင်စွာအသုံးပြုပြီး စကားစမြည်ပြောဆိုရာတွင် ယင်းကိုထည့်ပြောဆိုတတ်ရန် မာရိကိုအတုယူသလော။ ယေရှု၏နောက်လိုက်ဖြစ်ခြင်းကြောင့် စိတ်ဆင်းရဲခံရသည့်တိုင် ကိုယ်တော်အား ဆက်လက်ယုံကြည်ကိုးစားမည်လော။
ယေရှု၏ညီများ—ပြောင်းလဲမှုရှိနိုင်
ယေရှု၏ညီများသည် ယေရှုသေဆုံးပြီးနောက်မှ ကိုယ်တော့်ကို ယုံကြည်ခဲ့ကြပုံရှိသည်။ ညှဉ်းဆဲရာသစ်တိုင်ပေါ်တွင် ကိုယ်တော်အသတ်ခံရစဉ်က သူတို့တစ်ဦးမျှမရှိသည့်အတွက် မိခင်ကို တမန်တော်ယောဟန်ထံ အပ်ခဲ့ခြင်းသည် တိုက်ဆိုင်မှုမဖြစ်နိုင်ချေ။ ဆွေမျိုးများက ယေရှုကို လေးစားမှုမရှိကြရာ တစ်ကြိမ်တစ်ခါတွင် ယေရှုအား “အရူး” ဟူ၍ပင် ခေါ်ဆိုခဲ့ကြသည်။ (မာကု ၃:၂၁) ယေရှု၏မိသားစုတွင် မယုံကြည်သူများရှိသောကြောင့် မယုံကြည်သူအိမ်သားများနှင့် အတူနေထိုင်ရသူများသည် ဆွေမျိုးများ၏ ပြောင်လှောင်ကဲ့ရဲ့ခြင်း ခံရသည့်အခါ မည်သို့ခံစားရမည်ကို ယေရှုကောင်းစွာသဘောပေါက်ကြောင်း စိတ်ချနိုင်၏။
သို့သော် ယေရှုရှင်ပြန်ထမြောက်ပြီးနောက် ကိုယ်တော်၏ညီများသည် ကိုယ်တော့်ကို ယုံကြည်လာကြပုံရ၏။ စီ.အီး. ၃၃ ခုနှစ်၊ ပင်တေကုတ္တေပွဲမတိုင်မီ ယေရုရှလင်မြို့တွင် စုဝေးပြီး တမန်တော်များနှင့်အတူ ဆုတောင်းခဲ့ကြသည့် အုပ်စုတွင် သူတို့လည်းပါသည်။ (တမန်တော် ၁:၁၄) သူတို့၏မိတူဖကွဲအစ်ကို ရှင်ပြန်ထမြောက်လာခြင်းသည် သူတို့၏နှလုံးကိုပြောင်းလဲစေ၍ အစ်ကို၏တပည့်များဖြစ်လာရန် စေ့ဆော်ပေးခဲ့သည်မှာ ထင်ရှား၏။ ယုံကြည်ခြင်းမတူသူ ဆွေမျိုးများကို ဘယ်တော့မျှ လက်မလျှော့လိုက်သင့်ချေ။
ယေရှုကိုယ်ယောင်ထင်ရှားပြခြင်းကို တွေ့မြင်ခဲ့သော မိတူဖကွဲညီ ယာကုပ်သည် ခရစ်ယာန်အသင်းတွင် အရေးကြီးအခန်းကဏ္ဍမှ ပါဝင်လှုပ်ရှားခဲ့သူတစ်ဦးဖြစ်ကြောင်း သမ္မာကျမ်းစာက ဖော်ပြထား၏။ သူသည် ခရစ်ယာန်ချင်းများထံ ဘုရားသခင့်မှုတ်သွင်းခံ စာတစ်စောင်ရေးသားပြီး ယုံကြည်ခြင်းကို ဆက်ထိန်းထားကြရန် သူတို့အား အကြံပေးခဲ့၏။ (တမန်တော် ၁၅:၆-၂၉; ၁ ကောရိန္သု ၁၅:၇; ဂလာတိ ၁:၁၈၊ ၁၉; ၂:၉; ယာကုပ် ၁:၁) မိတူဖကွဲညီ နောက်တစ်ဦးဖြစ်သူ ယုဒသည် ယုံကြည်ခြင်းအတွက် ကြိုးစားတိုက်လှန်ကြရန် ယုံကြည်သူချင်းများကို မှုတ်သွင်းခံအားပေးစာတစ်စောင် ရေးသားခဲ့သည်။ (ယုဒ ၁) သူတို့ကို ခရစ်ယာန်ချင်းများ အထင်ကြီးပြီး လက်ခံစေရန် ယေရှုနှင့် သွေးသားတော်စပ်ကြောင်း ယာကုပ်ရော၊ ယုဒပါ သူတို့၏စာထဲတွင် မရေးသားထားသည်မှာ မှတ်သားထိုက်ပေသည်။ သူတို့ထံမှ ကျွန်ုပ်တို့သင်ယူနိုင်သည့် ချီးကျူးဖွယ်ကျိုးနွံမှု သင်ခန်းစာပါတကား!
သို့ဖြစ်၍ ယေရှု၏မိသားစုမှ ကျွန်ုပ်တို့သင်ယူနိုင်သည့်အချက်အချို့ကား အဘယ်နည်း။ ဤသို့သောနည်းများဖြင့် ပြသနိုင်သည့် ဆည်းကပ်ဝတ်ပြုခြင်း သင်ခန်းစာများမှာ အောက်ပါအတိုင်းဖြစ်၏– (၁) ဖော်ပြထားသော ဘုရားသခင့်အလိုတော်ကို တည်ကြည်စွာ လက်အောက်ခံပြီး ထိုသို့ပြုခြင်းကြောင့် ဖြစ်ပေါ်လာသော စမ်းသပ်မှုအားလုံးကို ရင်ဆိုင်ပါ။ (၂) ကိုယ်ကျိုးစွန့်ရသည့်တိုင် ဝိညာဉ်ရေးစံနှုန်းများကို ရှေးဦးထားပါ။ (၃) သင်၏သားသမီးများကို သမ္မာကျမ်းစာနှင့်အညီ လေ့ကျင့်ပေးပါ။ (၄) ယုံကြည်ခြင်းမတူသော အိမ်သားများကို လက်မလျှော့လိုက်ပါနှင့်။ (၅) ခရစ်ယာန်အသင်းတော်တွင် ထင်ပေါ်သူများနှင့် အမျိုးတော်စပ်ပါသည်ဟု မကြွားဝါပါနှင့်။ မှန်ပါသည်၊ ယေရှု၏လူ့မိသားစုအကြောင်း သိရှိရခြင်းသည် ကိုယ်တော်နှင့် ပိုမိုရင်းနှီးစေပြီး ယေရှုငယ်စဉ်ဘဝက ကိုယ်တော်အား ပြုစုစောင့်ရှောက်ရန် သာမန်မိသားစုကို ယေဟောဝါရွေးချယ်တော်မူခဲ့ခြင်းအတွက် ကျွန်ုပ်တို့၏ကျေးဇူးတင်စိတ် တိုးပွားလာစေသည်။
[စာမျက်နှာ ၄၊ ၅ ပါ ရုပ်ပုံ]
ယောသပ်သည် မာရိကို ဇနီးအဖြစ် ယူခဲ့ကာ မေရှိယနှင့်ဆိုင်သော ပရောဖက်ပြုချက်များ ပြည့်စုံလာခြင်းတွင် ပတ်သက်လာခဲ့
[စာမျက်နှာ ၆ ပါ ရုပ်ပုံ]
ယောသပ်နှင့် မာရိသည် သားသမီးများကို ဝိညာဉ်ရေးစံနှုန်း များနှင့် အလုပ်ဆိုင်ရာကို သင်ပေးခဲ့
[စာမျက်နှာ ၇ ပါ ရုပ်ပုံ]
ယေရှု၏ညီများသည် ဝိညာဉ်ရေးစိတ်ထားရှိသော အိမ်ထောင်စုတွင် ကြီးပြင်းလာကြသော်လည်း ကိုယ်တော်သေဆုံးပြီးနောက်မှ ကိုယ်တော့်ကို ယုံကြည်ခဲ့ကြ
[စာမျက်နှာ ၈ ပါ ရုပ်ပုံ]
ယေရှု၏မိတူဖကွဲညီများဖြစ်သူ ယာကုပ်နှင့် ယုဒတို့သည် ခရစ်ယာန်ချင်းတို့ကို အားပေးခဲ့ကြ