ကမ္ဘာဦးကျမ်းမှ ပေါ်လွင်ချက်များ—၁
ယေဟောဝါ၏နှုတ်မြွက်စကားတော်သည် အသက်ရှင်၏
ကမ္ဘာဦးကျမ်းမှ ပေါ်လွင်ချက်များ—၁
ကမ္ဘာဦးကျမ်းသည် စကြဝဠာတည်ရှိလာပုံ၊ ကမ္ဘာဂြိုဟ်ကို လူသားတို့အတွက် အသင့်ပြင်ဆင်ပေးခဲ့ပုံနှင့် ကမ္ဘာပေါ် လူတို့မှီတင်းနေထိုင်လာကြပုံအကြောင်း ပြောပြပါသည်။ ဤစာစောင်ကို သိနာတောထဲတွင် မောရှေရေးသားခဲ့ပြီး ဘီ.စီ.အီး. ၁၅၁၃ ခုနှစ်တွင် အပြီးသတ်ခဲ့ပေမည်။
ကမ္ဘာဦးကျမ်းသည် ရေလွှမ်းခြင်းမတိုင်မီ ကမ္ဘာအကြောင်း၊ ရေလွှမ်းမိုးပြီး နှောင်းပိုင်းခေတ်တွင် အဘယ်အရာဖြစ်ပျက်ခဲ့ကြောင်းနှင့် ယေဟောဝါဘုရားသခင်သည် အာဗြဟံ၊ ဣဇာက်၊ ယာကုပ်၊ ယောသပ်တို့နှင့် မည်သို့အပြန်အလှန်ဆက်ဆံခဲ့ကြောင်း ပြောပြသည်။ ဤဆောင်းပါးတွင် ကမ္ဘာဦးကျမ်း ၁:၁–၁၁:၉ ပါပေါ်လွင်ချက်များကို သုံးသပ်ပါမည်၊ ယင်းက အခြေခံအားဖြင့် ဘိုးဘေးအာဗြဟံနှင့် ယေဟောဝါ စတင်ဆက်သွယ်ခဲ့ချိန်အထိ ဖြစ်သည်။
ရေလွှမ်းမိုးခြင်းမတိုင်မီ ကမ္ဘာ
“အစအဦး၌” ဟူသော ကမ္ဘာဦးကျမ်း၏အဖွင့်စကားသည် လွန်ခဲ့သောအနှစ်ဘီလီယံများစွာထိတိုင်ကို ရည်ညွှန်းသည်။ ဖန်ဆင်းရာ “နေ့” ခြောက်ရက် သို့မဟုတ် အထူးဖန်ဆင်းရာကာလအတွင်း ဖြစ်ပျက်ခဲ့ရာများကို ဖော်ပြထားပုံမှာ ထိုစဉ်အခါက ကမ္ဘာပေါ် လူတစ်ဦးရှိခဲ့မည်ဆိုလျှင် သူ့အရှေ့၌ ဖြစ်ပျက်နေသည့်အလား ဖော်ပြထားသည်။ ဘုရားသခင်သည် ဆဋ္ဌမနေ့အကုန်ပိုင်းတွင် လူကိုဖန်ဆင်းခဲ့သည်။ လူ့မနာခံမှုကြောင့် ပရဒိသုသည် များမကြာမီ ပျောက်ဆုံးသွားသော်လည်း ယေဟောဝါသည် မျှော်လင့်ချက်ပေးတော်မူ၏။ အပြစ်၏အကျိုးဆက်များကို ပယ်ဖျက်ပြီး စာတန်ကို ကြိတ်ပစ်မည့် “အမျိုးအနွယ်” အကြောင်း သမ္မာကျမ်းစာ၏ ပထမဆုံးပရောဖက်ပြုချက်က ဖော်ပြသည်။
နောက်ပိုင်း ၁၆ ရာစုအတွင်း စာတန်သည် အာဗေလ၊ ဧနောက်နှင့်နောဧ စသည့် တည်ကြည်သူအနည်းငယ်မှလွဲ၍ လူအားလုံးနီးပါးကို ဘုရားသခင်ထံတော်မှ လှည့်သွားစေနိုင်ခဲ့သည်။ ဥပမာ၊ ကာဣနသည် သူ၏ဖြောင့်မတ်သောညီ အာဗေလကို သတ်ပစ်လိုက်သည်။ မရိုသေမခန့်ညားသည့်နည်းဖြင့် ‘ယေဟောဝါ၏နာမတော်ကိုအမှီပြု၍ ကိုးကွယ်စပြုခဲ့ကြ’ ပုံရှိသည်။ လာမက်သည် မိမိကိုယ်ကိုကာကွယ်သည်ဟုဆိုလျက် လူပျိုတစ်ဦးကို သတ်ပစ်ခဲ့ကြောင်း ကဗျာတစ်ပုဒ်စပ်ဆိုရာတွင် အဆိုပါခေတ်ရှိ အကြမ်းဖက်စိတ်ဓာတ်ကို ထင်ဟပ်ပေါ်လွင်စေသည်။ ဘုရားသခင်၏ နာခံမှုမရှိသော ကောင်းကင်သားများက လူ့သမီးများကိုယူပြီး နက်ဖလင်ခေါ် ရက်စက်ကြမ်းကြုတ်သည့်လူ့ဘီလူးများကို မွေးဖွားစေသောအခါ အခြေအနေပိုဆိုးရွားလာ၏။ ဤအခြေအနေများကြား တည်ကြည်သူနောဧသည် သင်္ဘောကိုဆောက်လုပ်စဉ် ကျရောက်အံ့ဆဲ ရေလွှမ်းမိုးဘေးအကြောင်း လူတို့ကို သတ္တိရှိရှိသတိပေးကာ ထိုဖျက်ဆီးခြင်းဘေးကို သူ့မိသားစုနှင့်အတူ ကပ်ကျော်လေသည်။
ကျမ်းစာမေးခွန်းများ အဖြေ–
၁:၁၆၊ [ကဘ]—ဘုရားသခင်သည် စတုတ္ထနေ့၌သာ အလင်းအိမ်များကို ပြုလုပ်ခဲ့လျှင် ပထမနေ့တွင် အလင်းကို မည်သို့ဖြစ်စေနိုင်မည်နည်း။ ကမ္ဘာဦး ၁ အခန်းငယ် ၁၆ တွင် ‘ပြုလုပ်’ (make) ဟုဘာသာပြန်ဆိုထားသော ဟေဗြဲစကားလုံးသည် ကမ္ဘာဦး ၁:၁၊ ၂၁၊ ၂၇ အခန်းကြီး ၁၊ အခန်းငယ် ၁၊ ၂၁ နှင့် ၂၇ တို့ပါ “ဖန်ဆင်း” (create) ဟူသောစကားလုံးနှင့် မတူချေ။ အလင်းအိမ်များပါ အပါအဝင် “ကောင်းကင်” ကို “ပထမနေ့ရက်” မတိုင်မီ ကြာမြင့်စွာကပင် ဖန်ဆင်းထားပြီးဖြစ်သည်။ သို့သော် အလင်းအိမ်များမှ ထုတ်လွှတ်သော အလင်းသည် မြေမျက်နှာပြင်ပေါ်သို့ မရောက်နိုင်ချေ။ ပထမနေ့တွင် “အလင်းဖြစ်လေ၏၊” အကြောင်းမှာ မိုးတိမ်လွှာများကြား အလင်းပျံ့နှံ့ထိုးဖောက်ဝင်လာရာ အလင်းကို မြေပြင်ပေါ်မှမြင်ရလေ၏။ သို့ဖြင့် လည်နေသောကမ္ဘာဂြိုဟ်တွင် နေ့နှင့်ည တစ်လှည့်စီဖြစ်ပေါ်စပြုသည်။ (ကမ္ဘာဦး ၁:၁-၃၊ ၅) အဆိုပါအလင်းထွက်ပေါ်သည့် နေရာများကိုကား မြေပြင်ပေါ်မှ မမြင်နိုင်သေးချေ။ သို့သော် စတုတ္ထဖန်ဆင်းရာကာလအတွင်း ထူးထူးခြားခြားပြောင်းလဲသွားသည်။ ယခု နေ၊ လ၊ ကြယ်တို့၏အလင်းကို “မြေကြီးပေါ်၌လင်းစေ” လေ၏။ (ကမ္ဘာဦး ၁:၁၇၊ သမ္မာ) ယခုအချိန်တွင် မြေပြင်ပေါ်မှ ၎င်းတို့ကို တွေ့မြင်နိုင်ပြီဖြစ်ရာ ‘၎င်းတို့ကို ဘုရားသခင်ဖြစ်ပေါ်စေတော်မူ၏။’
၃:၈—ယေဟောဝါဘုရားသခင်သည် အာဒံကို တိုက်ရိုက်စကားပြောခဲ့သလော။ ဘုရားသခင်သည် လူတို့ကို ကောင်းကင်တမန်မှတစ်ဆင့် စကားပြောလေ့ရှိကြောင်း သမ္မာကျမ်းစာက ဖော်ပြသည်။ (ကမ္ဘာဦး ၁၆:၇-၁၁; ၁၈:၁-၃၊ ၂၂-၂၆; ၁၉:၁; တရားသူကြီး ၂:၁-၄; ၆:၁၁-၁၆၊ ၂၂; ၁၃:၁၅-၂၂) ဘုရားသခင်၏ အဓိကပြောရေးဆိုခွင့်ရှိသူမှာ ‘နှုတ်မြွက်စကားတော်’ ဟုခေါ်သော ကိုယ်တော်၏တစ်ပါးတည်းသောသားတော်ဖြစ်၏။ (ယောဟန် ၁:၁) အာဒံနှင့်ဧဝတို့ကို ဤ ‘နှုတ်မြွက်စကားတော်’ မှတစ်ဆင့် ဘုရားသခင်စကားပြောခဲ့ပေမည်။—ကမ္ဘာဦး ၁:၂၆-၂၈; ၂:၁၆; ၃:၈-၁၃။
၃:၁၇—မြေကြီးသည် အဘယ်နည်းဖြင့် ကျိန်ခြင်းခံခဲ့ရသနည်း၊ မည်မျှကြာသနည်း။ မြေကို ကျိန်ထားသည့်အတွက် ထွန်ယက်စိုက်ပျိုးဖို့ အလွန်ခက်ခဲလိမ့်မည်ဖြစ်သည်။ ဆူးပင်အမျိုးမျိုးပေါက်နေသော အကျိန်ခံမြေ၏ အကျိုးဆက်များကို အာဒံ၏သားစဉ်မြေးဆက်များ အကြီးအကျယ်ခံခဲ့ရသဖြင့် နောဧ၏ဖခင် လာမက်က “ထာဝရဘုရားကျိန်တော်မူသောမြေ၌လုပ်၍ ပင်ပန်းစွာခံရ” ပြီဟုပြောခဲ့သည်။ (ကမ္ဘာဦး ၅:၂၉) ရေလွှမ်းမိုးဘေးပြီးနောက် ယေဟောဝါသည် နောဧနှင့် သူ၏သားများကို ကောင်းချီးပေးပြီး မြေကြီးကိုပြည့်စေဖို့ ကိုယ်တော်၏ရည်ရွယ်ချက်ကို ဖော်ပြခဲ့သည်။ (ကမ္ဘာဦး ၉:၁) ထိုအချိန်တွင် မြေကြီးသည် ဘုရားသခင်၏ကျိန်ခြင်းကို မခံရတော့ပုံရှိသည်။—ကမ္ဘာဦး ၁၃:၁၀။
၄:၁၅—ယေဟောဝါသည် ‘ကာဣန၌’ မည်သို့ “အမှတ်ပေးတော်မူ” သနည်း။ ကာဣန၏ကိုယ်ပေါ်တွင် အမှတ်လက္ခဏာတစ်ခုခု တစ်နည်းတစ်ဖုံဖြင့် ထားရှိသည်ဟု ကျမ်းစာကမပြောပါ။ သို့သော် ထိုအမှတ်လက္ခဏာတွင် အခြားသူများ သိရှိလိုက်နာခဲ့ကြသည့် အလေးအနက်ထုတ်ပြန်ထားသော အမိန့်တစ်ခုပါဝင်ပုံရကာ ယင်းက သူ့ကို မည်သူမျှ ကလဲ့စားချေမသတ်ပစ်ရန် ကာကွယ်ပေးသည်။
၄:၁၇—ကာဣနသည် သူ၏မိန်းမကို အဘယ်မှရရှိခဲ့သနည်း။ အာဒံသည် “သားသမီးများကိုမြင်လေ၏။” (ကမ္ဘာဦး ၅:၄) ထို့ကြောင့် ကာဣနသည် သူ၏ညီမတစ်ယောက် သို့မဟုတ် တူမတစ်ယောက်ကို မိန်းမအဖြစ်ယူခဲ့ပေမည်။ နောက်ပိုင်းတွင် ဣသရေလလူမျိုးအား ဘုရားသခင်ပေးခဲ့သောပညတ်က သွေးရင်းညီအစ်ကို၊ ညီမကို ထိမ်းမြားခွင့် မပြုတော့ချေ။—ဝတ်ပြုရာ ၁၈:၉။
၅:၂၄—ဘုရားသခင်သည် အဘယ်နည်းဖြင့် ‘ဧနောက်ကို သိမ်းယူ’ ခဲ့သနည်း။ ဧနောက်သည် အသက်အန္တရာယ်ရှိခဲ့ဟန်တူသည်၊ သို့သော် ရန်သူများလက်၌ ဝေဒနာခံစားရဖို့ ဘုရားသခင်ခွင့်မပြုခဲ့ချေ။ “ဧနောက်သည် သေခြင်းနှင့်လွတ်၍ ဘဝပြောင်းရ၏” ဟုတမန်တော်ပေါလုရေးသားခဲ့သည်။ (ဟေဗြဲ ၁၁:၅) ထိုသို့ဆိုသဖြင့် ဘုရားသခင်သည် သူ့ကို ကောင်းကင်သို့ဆောင်ယူသွားပြီး ထိုတွင် သူအသက်ဆက်ရှင်နေသည်ဟု မဆိုလိုပါ။ ကောင်းကင်တက်သူတို့တွင် ယေရှုသည် ပထမဦးဆုံးသူဖြစ်တော်မူ၏။ (ယောဟန် ၃:၁၃; ဟေဗြဲ ၆:၁၉၊ ၂၀) ဧနောက်သည် “သေခြင်းနှင့်လွတ်” ရန် ပြောင်းရွှေ့ခံရသည့်အဖြစ်မှာ သူ့ကို ဘုရားသခင်သည် ပရောဖက်ပြုချက်ဆိုင်ရာမိန်းမောနေစေခဲ့ပြီး ထိုအခြေအနေမျိုး၌ရှိစဉ်ပင် သူအသက်သေဆုံးသွားခြင်းကို ဆိုလိုပေမည်။ ထိုသို့သောအခြေအနေမျိုးတွင် ဧနောက်သည် ဝေဒနာကိုမခံစားရ၊ ရန်သူများလက်ချက်ဖြင့် “သေခြင်းနှင့်လွတ်” ခဲ့ခြင်းဖြစ်သည်။
၆:၆—လူကိုဖန်ဆင်းခဲ့ခြင်းကို ယေဟောဝါ အဘယ်နည်းဖြင့် ‘နောင်တရ’ သည်ဟုဆိုနိုင်သနည်း။ ဤတွင် ‘နောင်တရခဲ့’ ဟုဘာသာပြန်ဆိုထားသော ဟေဗြဲစကားလုံးသည် သဘောထားနှင့် ရည်ရွယ်ချက်ပြောင်းလဲခြင်းနှင့် သက်ဆိုင်သည်။ ယေဟောဝါသည် စုံလင်သောကြောင့် လူကိုဖန်ဆင်းသည့်အတွက် မမှားခဲ့ပါ။ သို့ရာတွင် ရေလွှမ်းမိုးခြင်းမတိုင်မီခေတ်က လူဆိုးတို့နှင့်ပတ်သက်၍မူ ကိုယ်တော့်စိတ်သဘောထား ပြောင်းလဲခဲ့သည်။ ဘုရားသခင်သည် လူတို့၏ဆိုးယုတ်မှုကို မနှစ်သက်သောကြောင့် လူ့ဖန်ဆင်းရှင်အဖြစ်မှ သူတို့ကိုဖျက်ဆီးသူအဖြစ်သို့ သဘောထားပြောင်းလဲခဲ့သည်။ လူအချို့ကို ကိုယ်တော်ကယ်တင်ခဲ့ခြင်းက ဆိုးယုတ်လာသူများနှင့်ပတ်သက်၍သာ ကိုယ်တော်နောင်တရခဲ့ကြောင်း ဖော်ပြသည်။—၂ ပေတရု ၂:၅၊ ၉။
၇:၂—တိရစ္ဆာန်များ သန့်ရှင်း၊ မသန့်ရှင်းကို အဘယ်အရာပေါ်မူတည်ပြီး ခွဲခြားခဲ့သနည်း။ ခွဲခြားမှုမှာ အဘယ်တိရစ္ဆာန်ကို စားနိုင်၊ မစားနိုင်အပေါ် မူမတည်ဘဲ ဝတ်ပြုရေးတွင် ပူဇော်ရာယဇ်အဖြစ် အသုံးပြုခြင်းအပေါ်မူတည်ခဲ့ကြောင်း ထင်ရှားသည်။ ရေလွှမ်းမိုးဘေးမတိုင်မီက တိရစ္ဆာန်အသားကို လူတို့မစားခဲ့ပါ။ စားသုံးဖို့ “စင်ကြယ်၊” “မစင်ကြယ်” သည်ကို မောရှေပညတ်ပေါ်ထွက်လာချိန်၌သာ သတ်မှတ်ခဲ့၍ ထိုပညတ် အပယ်ခံရချိန်၌ ၎င်းကန့်သတ်ချက်များ အဆုံးတိုင်ခဲ့သည်။ (တမန်တော် ၁၀:၉-၁၆; ဧဖက် ၂:၁၅) ယေဟောဝါအား ဝတ်ပြုကိုးကွယ်ရာ၌ အဘယ်တိရစ္ဆာန်ကို ပူဇော်ဖို့သင့်လျော်ကြောင်း နောဧသိရှိထားပုံရသည်။ အကြောင်းမှာ သင်္ဘောပေါ်မှဆင်းသည်နှင့် သူသည် “ထာဝရဘုရားအဖို့ ယဇ်ပလ္လင်ကိုတည်ပြီးမှ စင်ကြယ်သောသား၊ စင်ကြယ်သောငှက်အမျိုးမျိုးထဲကယူ၍ ယဇ်ပလ္လင်ပေါ်မှာ မီးရှို့သောယဇ်ကို ပူဇော်လေ၏။”—ကမ္ဘာဦး ၈:၂၀။
၇:၁၁—ကမ္ဘာချီရေလွှမ်းမိုးစေသော ရေများသည် အဘယ်မှလာသနည်း။ ဒုတိယဖန်ဆင်းရာကာလ၊ သို့မဟုတ် “နေ့” အတွင်း၊ ကမ္ဘာ့လေထု “မိုးမျက်နှာကြက်” ဖြစ်ပေါ်လာသောအခါ “မိုးမျက်နှာကြက်အောက်၌” ရှိသောရေနှင့် “မိုးမျက်နှာကြက်အပေါ်၌” ရှိသောရေများ တည်ရှိလာသည်။ (ကမ္ဘာဦး ၁:၆၊ ၇) “အောက်၌” ရှိသောရေများမှာ မြေကြီးပေါ်၌ ရှိထားနှင့်ပြီးဖြစ်သည်။ “အပေါ်၌” ရှိသောရေများမှာ မြေမျက်နှာပြင်အထက်တွင် ဆိုင်းနေသောရေငွေ့ထုကြီးဖြစ်ပြီး “ကြီးစွာသောနက်နဲရာရေပေါက်ရေတွင်းတို့” ဖြစ်လာသည်။ အဆိုပါရေများသည် နောဧခေတ်တွင် မြေပေါ်ရွာသွန်းခဲ့သည်။
ကျွန်ုပ်တို့အတွက် သင်ခန်းစာများ–
၁:၂၆။ ဘုရားသခင့်ပုံသဏ္ဌာန်တော်နှင့်အညီ ဖန်ဆင်းခံထားရကား လူတို့သည် ဘုရားသခင့်ဂုဏ်ရည်တော်များကို ရောင်ပြန်ဟပ်နိုင်သောအစွမ်းရှိ၏။ ဖန်ဆင်းတော်မူသောအရှင်ကို ကျွန်ုပ်တို့ရောင်ပြန်ဟပ်ကာ ချစ်ခြင်းမေတ္တာ၊ ကရုဏာ၊ ကြင်နာခြင်း၊ ကောင်းမြတ်ခြင်းနှင့် သည်းခံခြင်းစသည့် အရည်အသွေးများကို ပြုစုပျိုးထောင်ရန် အမှန်ကြိုးစားသင့်ပါသည်။
၂:၂၂-၂၄။ အိမ်ထောင်မင်္ဂလာသည် ဘုရားသခင့်အစီအစဉ်ဖြစ်၏။ လင်ယောက်ျားသည် အိမ်ထောင်ဦးစီးအဖြစ် တာဝန်ထမ်းဆောင်ရ၍ အိမ်ထောင်ရေးနှောင်ကြိုးသည် ထာဝရဖြစ်ပြီး မြင့်မြတ်၏။
၃:၁-၅၊ ၁၆-၂၃။ ပျော်ရွှင်မှုသည် ကျွန်ုပ်တို့၏နေ့စဉ်အသက်တာတွင် ယေဟောဝါ၏အကြွင်းမဲ့ပိုင်သအုပ်စိုးမှုကို အသိအမှတ်ပြုခြင်းအပေါ် မူတည်သည်။
၃:၁၈၊ ၁၉; ၅:၅; ၆:၇; ၇:၂၃။ ယေဟောဝါ၏နှုတ်မြွက်စကားများသည် အစဉ်ဖြစ်ပျက်လာသည်။
၄:၃-၇။ အာဗေလသည် ယုံကြည်ခြင်းရှိသော ဖြောင့်မတ်သူဖြစ်သောကြောင့် သူ၏ယဇ်ကို ယေဟောဝါနှစ်သက်လက်ခံခဲ့သည်။ (ဟေဗြဲ ၁၁:၄) ကာဣနမှာမူ ယုံကြည်ခြင်းမရှိကြောင်း သူ၏လုပ်ရပ်များက ဖော်ပြသည်။ သူ၏အကျင့်များ ဆိုးယုတ်ကြောင်း မနာလိုမှု၊ မုန်းတီးမှုနှင့် လူသတ်မှုတို့ကဖော်၏။ (၁ ယောဟန် ၃:၁၂) ထို့ပြင် သူ၏ပူဇော်ရာယဇ်ကို အပေါ်ယံသဘောဖြင့်သာ ပူဇော်ပြီး ဝတ်ကျေတမ်းကျေမျှ ဆက်သခဲ့ပုံရသည်။ ယေဟောဝါထံ ကျွန်ုပ်တို့ဆက်သသော ချီးမွမ်းခြင်းယဇ်များသည် နှလုံးအကြွင်းမဲ့ဖြစ်ပြီး သဘောထားမှန်ဖြင့်ပြုလုပ်သော အကျင့်ကောင်းများနှင့် ဒွန်တွဲနေသင့်သည်မဟုတ်လော။
၆:၂၂။ နောဧသည် သင်္ဘောဆောက်လုပ်ဖို့ နှစ်များစွာကြာသော်လည်း ဘုရားသခင်မိန့်မှာသည့်အတိုင်း ပြုလုပ်ခဲ့သည်။ ထို့ကြောင့် နောဧနှင့် သူ့မိသားစုသည် ရေလွှမ်းမိုးဘေးကို ကပ်ကျော်ခဲ့ကြ၏။ ယေဟောဝါသည် ရေးသားထားသော ကိုယ်တော်၏နှုတ်မြွက်စကားတော်မှတစ်ဆင့် ကျွန်ုပ်တို့ကို စကားပြောဆိုတော်မူ၍ ကိုယ်တော်၏အဖွဲ့အစည်းမှတစ်ဆင့် လမ်းညွှန်ပေးပါသည်။ ကျွန်ုပ်တို့နားထောင်၍ နာခံမှုပြလျှင် အကျိုးခံစားရမည်။
၇:၂၁-၂၄။ ယေဟောဝါသည် ဖြောင့်မတ်သူများကို လူဆိုးတို့နှင့်အတူ မဖျက်ဆီးပါ။
လူသားတို့အတွက် တစ်ခေတ်ဆန်းလာ
ရေလွှမ်းမိုးခြင်းမတိုင်မီက လောက မရှိတော့သည့်အခါ ခေတ်သစ်တစ်ခေတ်သို့ လူသားတို့ဝင်ရောက်လာခဲ့ကြသည်။ ဤအချိန်မှစ၍ လူတို့သည် အသားစားခွင့်ရသော်လည်း အသွေးကိုရှောင်ကြဉ်ဖို့ မိန့်မှာခံကြရသည်။ ယေဟောဝါသည် လူသတ်မှုကို သေဒဏ်ချမှတ်ပြီး သက်တံ့ပဋိညာဉ်ဖွဲ့ကာ မြေကြီးကို ရေလွှမ်းမိုးဘေးဖြင့် ဘယ်တော့မျှ မဖျက်ဆီးတော့ဟု ကတိပြုခဲ့သည်။ နောဧ၏သားသုံးဦးသည် လူသားမျိုးနွယ်တစ်ခုလုံး၏ ဘိုးဘေးများဖြစ်လာကြသည်၊ သို့သော် သူ၏မြစ် နိမ်ရောဒသည် ‘ယေဟောဝါကိုဆန့်ကျင်သည့် အားကြီးသောမုဆိုးဖြစ်’ လာလေသည်။ မြေကြီးအနှံ့အပြား သွားရောက်နေထိုင်ကြမည့်အစား လူတို့သည် မိမိတို့၏နာမည်ကျော်စောစေဖို့ ဘေဘဲလ်ဟုခေါ်သော မြို့တစ်မြို့နှင့် ရဲတိုက်တစ်ခုကို ဆောက်လုပ်ရန် ဆုံးဖြတ်ခဲ့ကြသည်။ သို့သော် ယေဟောဝါသည် သူတို့၏ဘာသာစကားကို ရှုပ်ထွေးစေပြီး မြေတစ်ပြင်လုံးသို့ ပျံ့နှံ့သွားစေသောအခါ သူတို့၏အကြံအစည်များ ပျက်ပြားလေ၏။
ကျမ်းစာမေးခွန်းများ အဖြေ–
၈:၁၁—ရေလွှမ်းမိုးခြင်းကြောင့် သစ်ပင်များပျက်စီးခဲ့လျှင် ချိုးငှက်သည် သံလွင်ရွက်ကို အဘယ်မှရသနည်း။ ဖြစ်နိုင်ခြေနှစ်ခုရှိသည်။ သံလွင်ပင်သည် အတော်ပင် ကြံ့ခိုင်သောအပင်ဖြစ်ရာ ရေလွှမ်းမိုးစဉ် လအနည်းငယ်အတောအတွင်း ရေအောက်၌ ဆက်အသက်ရှင်နိုင်ခြင်းဖြစ်သည်။ ရေလွှမ်းခံရသော သံလွင်ပင်တစ်ပင်သည် ရေကျသွားသည်နှင့် ကုန်းမြေပေါ် ပြန်ရောက်လာပြီး အရွက်များ ပြန်ပေါက်နိုင်ပါသည်။ နောဧထံသို့ ချိုးငှက်ချီလာသော သံလွင်ရွက်မှာ ရေကျသွားပြီးနောက် ထွက်လာသောရွက်နုဖြစ်နိုင်ပေသည်။
၉:၂၀-၂၅—နောဧသည် ခါနာန်ကို အဘယ်ကြောင့်ကျိန်ဆဲခဲ့သနည်း။ ခါနာန်သည် အဘိုးဖြစ်သူ နောဧကို ရင့်သီးရိုင်းစိုင်းစွာပြောဆိုပြုမူခဲ့သည့် အပြစ်ရှိခြင်းကြောင့်ဖြစ်နိုင်သည်။ ခါနာန်၏ဖခင် ဟာမသည် ယင်းကို သိလျက်နှင့် ဝင်မဆုံးမဘဲ သတင်းဖြန့်ခဲ့ပုံရှိသည်။ သို့သော် နောဧ၏အခြားသားနှစ်ဦးဖြစ်သော ရှေမနှင့် ယာဖက်တို့မူ ဖခင်ကို အဝတ်နှင့်ဖုံးပေးခဲ့ကြသည်။ ထို့ကြောင့် သူတို့ကောင်းချီးရခဲ့ပြီး ခါနာန်မူကား ကျိန်ခြင်းခံခဲ့ရသည်၊ ဟာမသည် သူ၏သားအပေါ် ရောက်ရှိလာသော အရှက်ကွဲခြင်းအကျိုးဆက်ကို ခံစားခဲ့ရသည်။
၁၀:၂၅—ဖာလက်ခေတ်တွင် မြေကြီးကို မည်သို့ “ခွဲဝေ” ခဲ့ကြသနည်း။ ဖာလက်သည် ဘီ.စီ.အီး. ၂၂၆၉ မှ ၂၀၃၀ အထိ အသက်ရှင်ခဲ့သည်။ “သူ့လက်ထက်၌” ဘေဘဲလ်ဆောက်လုပ်သူများ၏ ဘာသာစကားကို ယေဟောဝါရှုပ်ထွေးစေခဲ့၍ မြေမျက်နှာပြင် အရပ်ရပ်သို့ သူတို့ကို ကွဲလွင့်စေခြင်းဖြင့် ကြီးစွာသောခွဲဝေခြင်းကို ဖြစ်ပေါ်စေတော်မူခဲ့သည်။ (ကမ္ဘာဦး ၁၁:၉) သို့ဖြင့် “မြေကြီး [သို့မဟုတ်၊ ကမ္ဘာ့လူဦးရေ] ကို” ဖာလက်ခေတ်၌ “ခွဲဝေကြ၏။”
ကျွန်ုပ်တို့အတွက် သင်ခန်းစာများ–
၉:၁; ၁၁:၉။ မည်သည့်လူ့အကြံအစည်၊ သို့မဟုတ် လူ့ကြိုးပမ်းမှုကမျှ ယေဟောဝါ၏ရည်ရွယ်ချက် မပြည့်စုံစေအောင် ဟန့်တားနိုင်မည်မဟုတ်ချေ။
၁၀:၁-၃၂။ အခန်းကြီး ၅ နှင့် ၁၀ တွင်ဖော်ပြထားသော ရေလွှမ်းမိုးခြင်းမတိုင်မီနှင့် ပြီးနောက် ဆွေစဉ်မျိုးဆက်မှတ်တမ်းနှစ်ခုက ပထမလူသားအာဒံမှသည် နောဧ၏သားသုံးဦးမှတစ်ဆင့် လူသားမျိုးနွယ်တစ်ရပ်လုံးကို ဆွေမျိုးစပ်ပြသည်။ အာရှုရိလူမျိုး၊ ခါလဒဲလူမျိုး၊ ဟေဗြဲလူမျိုး၊ ဆီးရီးယားလူမျိုးနှင့် အာရပ်မျိုးနွယ်အချို့တို့သည် ရှေမ၏ သားစဉ်မြေးဆက်များဖြစ်ကြ၏။ အီသီယိုးပီးယား၊ အီဂျစ်၊ ခါနာန်အပြင် အာဖရိကနှင့် အာရပ်မျိုးနွယ်အချို့သည် ဟာမမှ ဆင်းသက်လာကြ၏။ အင်ဒို-ဥရောပသားများသည် ယာဖက်၏သားစဉ်မြေးဆက်များဖြစ်ကြ၏။ လူသားအားလုံး ဆွေမျိုးတော်စပ်ပြီး ဘုရားသခင်ရှေ့တွင် တန်းတူညီမျှ မွေးဖွားလာကြ၏။ (တမန်တော် ၁၇:၂၆) ဤအမှန်တရားက အခြားသူများကို ကျွန်ုပ်တို့ရှုမြင်၊ ဆက်ဆံပုံအပေါ် ဩဇာသက်ရောက်စေရပေမည်။
ဘုရားသခင့်နှုတ်မြွက်စကားတော်သည် တန်ခိုးနှင့်ပြုပြင်နိုင်
ကမ္ဘာဦးကျမ်း၏ပထမပိုင်းတွင် လူ့အစောပိုင်းသမိုင်းမှတ်တမ်း၏ တစ်ခုတည်းသော တိကျမှန်ကန်သည့် သမိုင်းမှတ်တမ်း ပါရှိသည်။ ဤစာမျက်နှာများက လူကို မြေကြီးပေါ် ဘုရားသခင်ထားခဲ့ရသည့် ရည်ရွယ်ချက်အမှန်ကို ထိုးထွင်းသိမြင်စေသည်။ ထိုရည်ရွယ်ချက်ပြည့်စုံရန် နိမ်ရောဒ၏ကြိုးပမ်းမှုကဲ့သို့သော အဘယ်လူ့ကြိုးပမ်းမှုမျှ မဟန့်တားနိုင်ကြောင်း သိမြင်ရခြင်းသည် အားတက်စရာပါတကား!
သင်သည် သီအိုကရက်တစ်ဓမ္မအမှုကျောင်းအတွက် ပြင်ဆင်ရာ၌ ပတ်စဉ်ကျမ်းစာဖတ်ရှုခြင်းကို ပြုလုပ်စဉ် “ကျမ်းစာမေးခွန်းများ အဖြေ” အပိုင်းအောက် ဖော်ပြထားရာများကို သုံးသပ်ဆင်ခြင်သည့်အခါ ခက်ခဲသောကျမ်းပိုဒ်အချို့ကို နားလည်လာပါလိမ့်မည်။ ပတ်စဉ်ကျမ်းစာဖတ်ရှုခြင်းအစီအစဉ်မှ မည်သို့အကျိုးရယူနိုင်ကြောင်းကို “ကျွန်ုပ်တို့အတွက် သင်ခန်းစာများ” အောက်ရှိမှတ်ချက်များက ဖော်ပြပါမည်။ သင့်လျော်သည့်အခါ လုပ်ငန်းတော်အစည်းအဝေးတွင် ဒေသလိုအပ်ရာများအတွက် အခြေခံအဖြစ်လည်း ၎င်းတို့ကို အသုံးပြုနိုင်ပါသည်။ ယေဟောဝါ၏နှုတ်မြွက်စကားတော်သည် အမှန်ပင် အသက်ရှင်ပြီး ကျွန်ုပ်တို့၏ဘဝကို တန်ခိုးနှင့်ပြုပြင်နိုင်ပါသည်။—ဟေဗြဲ ၄:၁၂။