“သူတို့၏​အသံသည် မြေတစ်ပြင်လုံး၌​နှံ့ပြား”

‘လူမျိုးတကာ​တို့ကို ငါ့​တပည့်​ဖြစ်စေ​လျက် ခမည်းတော်၊ သားတော်၊ သန့်ရှင်းသော​ဝိညာဉ်​တော်​၏​နာမ၌ နှစ်ခြင်း​ပေး​ကြလော့။’—မဿဲ ၂၈:၁၉။

၁၊ ၂။ (က) ယေရှုသည် တပည့်​များ​ကို အဘယ်​တာဝန်​အပ်နှင်း​ခဲ့​သနည်း။ (ခ) ပထမ​ရာစု​ခရစ်ယာန်​များသည် အဘယ်ကြောင့် ထို​မျှ လုပ်ဆောင်​နိုင်​ခဲ့​ကြ​သနည်း။

ကောင်းကင်​သို့ ယေရှု​မတက်ကြွမီ​ကလေး​တွင် တပည့်​များ​ကို တာဝန်​တစ်ခု အပ်နှင်း​ခဲ့​၏။ ကိုယ်တော်​က ‘လူမျိုးတကာ​တို့ကို ငါ့​တပည့်​ဖြစ်စေ​လျက် ခမည်းတော်၊ သားတော်၊ သန့်ရှင်းသော​ဝိညာဉ်​တော်​၏​နာမ၌ နှစ်ခြင်း​ပေး​ကြလော့’ ဟု​မိန့်ဆိုခဲ့သည်။ (မဿဲ ၂၈:၁၉) တကယ့်ကို​ကြီးမား​သည့် တာဝန်​တစ်ခု​ပင်!

^၂ စဉ်းစား​ကြည့်​ပါ! စီ.အီး. ၃၃၊ ပင်တေကုတ္တေ​ပွဲနေ့​တွင် တပည့် ၁၂၀ ခန့်​သည် သန့်ရှင်းသော​ဝိညာဉ်​တော် သွန်းလောင်း​ခံရ​ပြီး​သည်​နှင့် ကြာမြင့်စွာ​ကတည်းက မျှော်လင့်​ခဲ့​သော မေရှိယ​မှာ ယေရှု​ဖြစ်​ကြောင်း၊ ကိုယ်တော်​မှ​တစ်ဆင့် ကယ်တင်ခြင်း​ရနိုင်​ကြောင်း တခြားသူ​များ​ကို ပြောပြ​ခြင်း​ဖြင့် ထို​တာဝန်​ကို ထမ်းဆောင်​ခဲ့​ကြ​လေ​သည်။ (တမန်​တော် ၂:၁-၃၆) ဤ​အုပ်စုငယ်​သည် “လူမျိုးတကာ” ထံ​မည်သို့​ရောက်ရှိ​နိုင်​မည်​နည်း။ လူ့​အနေ​နှင့် မဖြစ်​နိုင်​သော်လည်း “ဘုရားသခင်​သည် ခပ်သိမ်း​သော​အမှုတို့​ကို တတ်နိုင်” တော်​မူ​၏။ (မဿဲ ၁၉:၂၆) အစောပိုင်း​ခရစ်ယာန်​များသည် ယေဟောဝါ​၏​သန့်ရှင်းသော​ဝိညာဉ်​တော် ထောက်မမှု ရရှိခဲ့ကြ​သည့်​ပြင် သူတို့တွင် အရေးတကြီး​သဘောထား​လည်း ရှိခဲ့​ကြ​၏။ (ဇာခရိ ၄:၆; ၂ တိမောသေ ၄:၂) ထို့​ကြောင့် ဆယ်စုနှစ်​အနည်းငယ်​အတွင်း တမန်​တော်​ပေါလု​က ‘ကောင်းကင်​အောက်​၌​ရှိသမျှ​သော သတ္တဝါ​တို့အား’ သတင်းကောင်း​ကြေညာ​ခဲ့ပြီ​ဟု ပြောဆို​နိုင်​လေ​သည်။—ကောလောသဲ ၁:၂၂၊ ၂၃။

၃။ စစ်မှန်သော​ခရစ်ယာန် “စပါးပင်” ကို​အဘယ်အရာက ဖုံးအုပ်​ထား​သနည်း။

^၃ စစ်မှန်သော​ဝတ်ပြုရေးသည် ပထမ​ရာစု​၏ နှစ်​အများစု​အတွင်း​တစ်လျှောက်​တွင် ပျံ့နှံ့​ခဲ့​သည်။ သို့သော် စာတန်​သည် “တော​မျိုးစေ့” ကို​ကြဲ​ပြီး ရိတ်သိမ်းချိန်​မတိုင်မီ​အထိ စစ်မှန်သော​ခရစ်ယာန် “စပါးပင်” တို့သည် နှစ်ပေါင်း​များစွာ ဖုံးအုပ်​ထား​ခံရ​မည်​ဟု ယေရှု ပရောဖက်ပြု​ခဲ့​သည်။ တမန်​တော်​များ ကွယ်လွန်​သွားပြီး​နောက် ထို​အတိုင်း​ဖြစ်လာ​လေ​သည်။—မဿဲ ၁၃:၂၄-၃၉။

ယနေ့ တစ်မုဟုတ်ချင်း​တိုးတက်​နေ

၄၊ ၅။ ဝိညာဉ်​တော်​ဖွား​ခရစ်ယာန်​များသည် ၁၉၁၉ ခုနှစ်​မှ​စ၍ အဘယ်​လုပ်ငန်း​ကို စတင်​ထမ်းဆောင်​ခဲ့​ကြ​သနည်း၊ ယင်းက အဘယ်ကြောင့် ကြီးမားသော​စိန်ခေါ်ချက်​တစ်ခု ဖြစ်​ရသနည်း။

^၄ ၁၉၁၉ ခုနှစ်​တွင် တောပင်​များ​မှ စစ်မှန်သော​ခရစ်ယာန်​စပါးပင်​တို့ကို​ခွဲထုတ်​ရန် အချိန်တန်​ခဲ့​သည်။ ယေရှု​မိန့်မှာ​ထားသော ကြီးမားသော​တာဝန်​ကို ထမ်းဆောင်​ဖို့​လို​သေး​ကြောင်း ဝိညာဉ်​တော်​ဖွား​ခရစ်ယာန်​များ သဘောပေါက်​ကြသည်။ မိမိတို့သည် ‘နောက်ဆုံး​ကာလ’ တွင်​အသက်ရှင်နေ​ရ​ကြောင်း အခိုင်အမာ​ယုံကြည်​ကြ​ပြီး ယေရှု၏ ဤ​ပရောဖက်ပြုချက်​ကိုလည်း သူတို့​သိထားကြသည်– ‘လူမျိုးအပေါင်း​တို့အား သက်သေ​ဖြစ်​မည်​အကြောင်း ဘုရားသခင့်​နိုင်ငံတော်​နှင့်ယှဉ်သော ဧဝံဂေလိတရား​ကို လောက​နိုင်ငံ​အရပ်ရပ်ရှိ​သမျှ​တို့​၌ ဟော​ရ​လိမ့်​မည်။ သို့​ပြီး​မှ အဆုံး​သည် ဖြစ်လတ္တံ့။’ (၂ တိမောသေ ၃:၁; မဿဲ ၂၄:၁၄) မှန်ပါသည်၊ လုပ်ကိုင်​စ​ရာ​များစွာ​ရှိကြောင်း သူတို့​သဘောပေါက်​ကြ​၏။

^၅ သို့​တိုင် စီ.အီး. ၃၃ ခုနှစ်​မှ တပည့်​များ​ကဲ့သို့ အဆိုပါ​ဝိညာဉ်​တော်​ဖွား​ခရစ်ယာန်​များသည် ကြီးမားသော​စိန်ခေါ်ချက်​တစ်ခု​ကို ရင်ဆိုင်​နေကြ​ရသည်။ သူတို့သည် နိုင်ငံ​အနည်းငယ်​တွင် ထောင်​ဂဏန်း​အနည်းငယ်​မျှ​သာ​ရှိ၏။ သတင်းကောင်းကို ‘လောက​နိုင်ငံ​အရပ်ရပ်ရှိ​သမျှ​တို့​၌’ မည်သို့​ဟောပြောနိုင်​ကြ​မည်​နည်း။ ဆီဇာ​ဘုရင်​များ​အုပ်ချုပ်ချိန်​က ကမ္ဘာ့​လူဦးရေ သန်းပေါင်း ၃၀၀ မှ ပထမ​ကမ္ဘာ​စစ်​ပြီး​နောက် ၂ ဘီလီယံ​နီးပါး​အထိ တိုးများ​လာ​သည်ကို သတိရပါ။ ၂၀ ရာစု​တစ်လျှောက် လူဦးရေ ဆက်၍​တိုးများ​လာ​ပေ​ဦး​မည်။

၆။ ၁၉၃၀ ပြည့်လွန်​နှစ်များ​တိုင်​လေ​သော် အဘယ်​အတိုင်းအတာ​အထိ သတင်းကောင်း​ပျံ့နှံ့​ခဲ့​သနည်း။

^၆ မည်သို့​ပင်​ဖြစ်ပါစေ၊ယေဟောဝါ​၏​ဝိညာဉ်​တော်​ဖွား​ကျေးကျွန်​များသည် ပထမ​ရာစု​မှ​ညီအစ်ကို​များ​ကဲ့သို့​ပင် ယေဟောဝါ​နှင့် ကိုယ်တော်​၏​ဝိညာဉ်တော်သည် မိမိတို့​နှင့်အတူ​ရှိကြောင်း ယုံကြည်​စိတ်ချမှု​အပြည့်​ဖြင့် ထို​တာဝန်​ကို စတင်​ထမ်းဆောင်​ခဲ့​ကြသည်။ ၁၉၃၀ ပြည့်လွန်​နှစ်များ​အလယ်တွင် ဧဝံဂေလိတရား​ဟောပြောသူ ၅၆,၀၀၀ ခန့်​သည် ၁၁၅ နိုင်ငံ​တွင် ကျမ်းစာ​အမှန်တရားကို ကြေညာ​နေကြ၏။ များစွာ​လုပ်ကိုင်ပြီး​ဖြစ်သော်လည်း လုပ်ကိုင်​စ​ရာ​များစွာ ကျန်ရှိ​နေ​သေး​သည်။

၇။ (က) ဝိညာဉ်​တော်​ဖွား​ခရစ်ယာန်​များသည် အဘယ်​စိန်ခေါ်ချက်​အသစ်​တစ်ခု​ကို ရင်ဆိုင်ခဲ့​ကြ​ရသနည်း။ (ခ) “အခြားသိုး​တို့” ၏​ထောက်မမှု​ဖြင့် စုသိမ်းခြင်း​လုပ်ငန်း​သည် မည်သို့​တိုးတက်​ခဲ့​သနည်း။

^၇ ထို့နောက် ဗျာ. ၇:၉ [က​ဘ] တွင်​ဖော်ပြ​ထားသော “လူအုပ်ကြီး” သည်​မည်သူ​မည်ဝါ​ဖြစ်​ကြောင်း ပိုမို​သဘောပေါက်​လာ​ခြင်း​က စိန်ခေါ်ချက်​အသစ်​တစ်ခု​ဖြစ်ပေါ်​စေပြီး အဆိုပါ​အလုပ်​ကြိုးစား​သော ခရစ်ယာန်​များ​ကို ကူညီ​ပေး​မည့်​သူများ​ရှိလာ​မည်​ဟု မျှော်လင့်​စေ​သည်။ မြေကြီး​မျှော်လင့်ချက်​ရှိကြ​သူ မရေမတွက်​နိုင်သော “အခြားသိုး​တို့” ကို “အသီးအသီး​ဘာသာ​စကား​ကို​ပြော​သော လူ​အမျိုးအနွယ်​ခပ်သိမ်း​တို့​အထဲ​မှ” စုသိမ်း​ကြသည်။ (ယောဟန် ၁၀:၁၆) ဤ​သူတို့သည် ‘ယေဟောဝါ​၏​ဝတ်​ကို နေ့​ည​မပြတ်​ပြု’ ကြလိမ့်မည်။ (ဗျာ. ၇:၁၅) ဆိုလိုသည်မှာ သူတို့သည် ဟောပြောခြင်း​နှင့် သွန်သင်ခြင်း​လုပ်ငန်း​တွင် ပါဝင်​ကူညီ​ပေး​ကြလိမ့်မည်။ (ဟေရှာယ ၆၁:၅) ထို့​ကြောင့် ဧဝံဂေလိတရား​ဟောပြောသူ​အရေအတွက် ထောင်သောင်း​မှ​သည် သန်းနှင့်ချီ​၍ တိုးများ​လာ​ကြောင်း ဝိညာဉ်​တော်​ဖွား​ခရစ်ယာန်​များ မြင်တွေ့ရ​သည့်​အခါ ဝမ်းသာ​ပီတိ​ဖြစ်​ခဲ့​ကြသည်။ ၂၀၀၃ ခုနှစ်​တွင် ဟောပြောခြင်း​၌ ပါဝင်သူ​နှုန်းသစ် ၆,၄၂၉,၃၅၁ ရှိ၏၊ သူတို့​မှ အများစု​သည် လူအုပ်ကြီး​ဖြစ်၏။ * ဝိညာဉ်​တော်​ဖွား​ခရစ်ယာန်​များသည် အခြားသိုး​များ​၏​ကူညီ​ပေး​မှု​ကို ကျေးဇူး​တင်​ကြ​ပြီး အခြားသိုး​များ​က​လည်း ဝိညာဉ်​တော်​ဖွား​ညီအစ်ကို​များ​ကို ထောက်​မပေး​ရသည့်​အခွင့်ထူး​အတွက် ကျေးဇူး​တင်​ကြ​၏။—မဿဲ ၂၅:၃၄-၄၀။

၈။ ယေဟောဝါသက်သေ​များသည် ဒုတိယ​ကမ္ဘာ​စစ်​အတွင်း ဖြစ်ပွား​ခဲ့​သော ကြမ်းတမ်း​သည့်​ဖိနှိပ်မှုကို မည်သို့​တုံ့ပြန်​ခဲ့​ကြ​သနည်း။

^၈ စပါးပင်​အတန်းအစား တစ်ဖန်​သိသာ​ထင်ရှား​လာသော​အခါ စာတန်​သည် သူတို့ကို​ဆန့်ကျင်​၍ ပြင်းထန်​စွာ​စစ်​ဆင်နွှဲ​ခဲ့​၏။ (ဗျာ. ၁၂:၁၇) လူအုပ်ကြီး ပေါ်လာ​ပြန်​သည့်​အခါ စာတန် မည်သို့​တုံ့ပြန်​ခဲ့​သနည်း။ အကြီးအကျယ်​အကြမ်းဖက်​နှိမ်နင်း​လေ​၏! ဒုတိယ​ကမ္ဘာ​စစ်​အတွင်း စစ်မှန်သော​ဝတ်ပြုရေးကို ကမ္ဘာချီ​တိုက်ခိုက်မှု​နောက်ဝယ် စာတန်​ရှိကြောင်း ကျွန်ုပ်​တို့ သံသယ​ရှိ​နိုင်​သလော။ ခရစ်ယာန်​များသည် နှစ်ဖက်စလုံး​မှ တိုက်ပွဲဝင်​များ​၏ ကြမ်းတမ်းသော​ဖိနှိပ်မှုကို ခံ​ခဲ့​ရ​ရှာ​၏။ ချစ်လှစွာ​သော​ညီအစ်ကို၊ ညီအစ်မ​များစွာ​သည် အလွန်​ဆိုးရွား​သော စမ်းသပ်မှု​များ​ခံ​ခဲ့​ကြ​ရပြီး အချို့​သည် သူတို့၏​ယုံကြည်ခြင်း​အတွက် အသတ်ခံခဲ့ရ​သည်။ သို့​တိုင် သူတို့သည် ဆာလံဆရာ​၏ ဤ​စကား​များ​ကို သံယောင်လိုက်​ကြသည်– “ဘုရားသခင်​ကို​အမှီပြု၍ နှုတ်[မြွက်]တော်​၌ ဝါကြွား​ပါ​မည်။ ငါသည် ဘုရားသခင်​ကို ခိုလှုံ​သည်​ဖြစ်၍ ကြောက်စရာ​မရှိ။ လူသည် ငါ​၌​အဘယ်​သို့​ပြု​နိုင်​သနည်း။” (ဆာလံ ၅၆:၄; မဿဲ ၁၀:၂၈) ဝိညာဉ်​တော်​ဖွား​ခရစ်ယာန်​များနှင့် အခြားသိုး​များသည် ယေဟောဝါ​၏​ဝိညာဉ်​တော်​ကြောင့် ခွန်အား​ရရှိ​ပြီး ခိုင်မြဲ​စွာ အတူတကွ​ရပ်တည်ခဲ့​ကြသည်။ (၂ ကောရိန္သု ၄:၇) ရလဒ်​ကား၊ “ဘုရားသခင်​၏​သာသနာတော်​သည် တိုးပွား” လာ​၏။ (တမန်​တော် ၆:၇) စစ်​ဖြစ်ပွား​ချိန် ၁၉၃၉ ခုနှစ်​တွင် တည်ကြည်သော​ခရစ်ယာန် ၇၂,၄၇၅ ဦး​တို့သည် ဟောပြောခြင်း​လုပ်ငန်း​၌ ပါဝင်​ခဲ့​ကြ​ကြောင်း မှတ်တမ်း​ရရှိ​သည်။ သို့သော် စစ်​ပြီးဆုံး​သွား​သည့် ၁၉၄၅ ခုနှစ်​အတွက် မပြည့်စုံ​သော​မှတ်တမ်းအရ တက်ကြွ​လှုပ်ရှား​သော သက်သေခံ ၁၅၆,၂၉၉ ဦး​တို့သည် သတင်းကောင်း​ဟောပြောလျက်​ရှိကြ​ကြောင်း သိရှိ​ရသည်။ စာတန်​အတွက် ရှုံးနိမ့်​မှု​ပါ​တကား!

၉။ ဒုတိယ​ကမ္ဘာ​စစ်​အတွင်း အဘယ်​ကျောင်း​အသစ်များ​ဖွင့်လှစ်​ကြောင်း ကြေညာ​ခဲ့​သနည်း။

^၉ ရှင်း​နေသည်​မှာ၊ ဒုတိယ​ကမ္ဘာ​စစ်​၏​ရှုပ်ထွေးမှု​ကြောင့် ယေဟောဝါ​ကျေးကျွန်​များသည် ဟောပြောခြင်း​လုပ်ငန်း မပြီးမြောက်​မှာ​ကို သံသယ​မဝင်​ခဲ့​ကြ​ချေ။ စစ်​အရှိန် အထွတ်အထိပ်​ရောက်ရှိချိန် ၁၉၄၃ ခုနှစ်​တွင်​ပင် သင်တန်း​ကျောင်း​အသစ်​နှစ်ခု​ကို ဖွင့်လှစ်​ကြောင်း ကြေညာ​သည်။ တစ်ခု​မှာ ဟောပြောခြင်း​နှင့် တပည့်​ဖြစ်စေ​ခြင်း​လုပ်ငန်း​အတွက် သက်သေခံ​ယောက်စီ​ယောက်​တိုင်း​ကို လေ့ကျင့်ပေး​ရန် အသင်းတော်​အားလုံး​၌ ကျင်းပ​သည့် ယခု​အခေါ် သီအိုကရက်တစ်​ဓမ္မ​အမှု​ကျောင်း​ဖြစ်၏။ နောက်တစ်ခု​မှာ တိုင်းတစ်ပါး​တွင် ဟောပြောခြင်း​လုပ်ငန်း​ကို လုပ်ဆောင်ကြ​မည့် ခရစ်ယာန်​သာသနာပြု​များ​ကို လေ့ကျင့်ပေး​သည့် ကင်းမျှော်စင် သမ္မာကျမ်းစာ ဂိလဒ်​ကျောင်း​ဖြစ်သည်။ မှန်ပါသည်၊ နောက်ဆုံး​၌ စစ်​ပြီးဆုံး​သွား​သည့်​အခါ စစ်မှန်သော​ခရစ်ယာန်​များသည် တိုး၍​ပင် လုပ်ဆောင်ရန် အသင့်ရှိနေ​ကြသည်။

၁၀။ ၂၀၀၃ ခုနှစ်​အတွင်း ယေဟောဝါ​လူမျိုးတော်​၏ စိတ်အား​ထက်သန်မှု မည်သို့​ထင်ရှား​သနည်း။

^၁၀ သူတို့သည် တကယ်​ထူးခြား​ကောင်းမွန်​စွာ လုပ်ဆောင်ခဲ့​သည်​တကား! သီအိုကရက်တစ်​ဓမ္မ​အမှု​ကျောင်းတွင် လေ့ကျင့်ပေး​ခံရ​သူအား​လုံး–လူငယ်​နှင့်​လူကြီး၊ မိဘ​နှင့်​ကလေး၊ အိုမင်းမစွမ်း​သူများ​ပင်–ယေရှု​ပေးအပ်​ခဲ့​သော ကြီးမားသော​တာဝန် ပြီးမြောက်​စေရန် ပါဝင်​လုပ်ဆောင်​လျက်​ရှိကြသည်။ (ဆာလံ ၁၄၈:၁၂၊ ၁၃; ယောလ ၂:၂၈၊ ၂၉) ၂၀၀၃ ခုနှစ်​တွင် လစဉ်​ပျမ်းမျှ ၈၂၅,၁၈၅ ဦး​သည် ရှေ့ဆောင်​လုပ်ငန်း​တွင် ယာယီ သို့​မဟုတ် ဆက်တိုက်​ပါဝင်​ကြ​ခြင်း​ဖြင့် သူတို့၏​အရေးတကြီး​သဘောထားကို တင်ပြ​ကြသည်။ ထို​နှစ်​၌​ပင် ယေဟောဝါသက်သေ​များသည် အခြားသူများ​အား ဘုရားသခင့်​နိုင်ငံတော်​သတင်းကောင်း​ပြောပြ​ရာ​တွင် နာရီ​ပေါင်း ၁,၂၃၄,၇၉၆,၄၇၇ အသုံးပြု​ခဲ့​ကြသည်။ ယေဟောဝါ​သည် မိမိလူ​မျိုး​တော်​၏ စိတ်အား​ထက်သန်မှု​ကို တကယ်​နှစ်သက်​အားရ​တော်​မူ​သည်​တကား!

တိုင်းတစ်ပါး​လယ်ကွင်းများ​၌

၁၁၊ ၁၂။ အဘယ်​သာဓက​များ​က ခရစ်ယာန်​သာသနာပြု​များ​၏ ကြိုးစား​မှု​မှတ်တမ်းကောင်း​ကို ဖော်ပြ​သနည်း။

^၁၁ ဂိလဒ်​ကျောင်းဆင်း​များနှင့် မကြာသေးမီ​က ဓမ္မ​အမှုထမ်း​ကျောင်းဆင်း​များသည် နှစ်များ​တစ်လျှောက် အံ့ချီးဖွယ်​လုပ်ဆောင်မှု​မှတ်တမ်း​တစ်ခု ပေး​ပို့​ခဲ့​ကြသည်။ ဥပမာ၊ ဘရာဇီး​နိုင်ငံ​တွင် ပထမဦးဆုံး ခရစ်ယာန်​သာသနာပြု​များ ရောက်ရှိ​ခဲ့​သည့် ၁၉၄၅ ခုနှစ်​၌ ကြေညာသူ ၄၀၀ ပင်မ​ရှိသေး​ချေ။ ထို​သူတို့နှင့် ထပ်​ရောက်လာ​သော ခရစ်ယာန်​သာသနာပြု​များသည် စိတ်အား​ထက်သန်​သော ဘရာဇီး​ညီအစ်ကို​များနှင့်​အတူ ကြိုးစား​အမှုဆောင်ခဲ့​ကြ​ရာ သူတို့၏​ကြိုးစား​မှုများ​ကို ယေဟောဝါ အကြီးအကျယ်​ကောင်းချီး​ပေး​ခဲ့​၏။ ၂၀၀၃ ခုနှစ်​တွင် ဘရာဇီး​နိုင်ငံ​သည် နှုန်းသစ် ၆၀၇,၃၆၂ မှတ်တမ်းသွင်း​ခဲ့​သည်ကို တွေ့ရ​၍ အဆိုပါ​အစောပိုင်း​အချိန်ကို မှတ်မိ​ကြ​သည့် မည်သူ​မဆို တကယ်​ကို​ဝမ်းသာ​ပီတိ​ဖြစ်စရာ​ပင်!

^၁၂ ဂျပန်​နိုင်ငံ​ကို သုံးသပ်ကြည့်​ပါ။ ဒုတိယ​ကမ္ဘာ​စစ်​မတိုင်မီ​က ထို​နိုင်ငံ​တွင် ဘုရားသခင့်​နိုင်ငံတော်​ဟောပြောသူ တစ်​ရာ​ခန့်​သာ​ရှိခဲ့​သည်။ စစ်​အတွင်း ရက်စက်​ကြမ်းတမ်းသော ညှဉ်းပန်း​နှိပ်စက်မှု​ကြောင့် ထို​အရေအတွက် လျော့နည်း​သွား​ရာ စစ်​ပြီးဆုံးချိန်​တွင် အသက်ရှင်​ကျန်ရစ်သူ သက်သေခံ​အနည်းငယ်​သာ ဝိညာဉ်​ရေး​အရ ရှင်သန်​လျက်​ရှိသည်။ (သု. ၁၄:၃၂) အဆိုပါ​ထူးကဲ​စွာ တည်ကြည်​ခဲ့​ကြ​သူ​အနည်းငယ်​သည် ၁၉၄၉ ခုနှစ်​၌ ပထမဦးဆုံး​ရောက်ရှိ​လာ​ကြသော ဂိလဒ်​ကျောင်းဆင်း ခရစ်ယာန်​သာသနာပြု ၁၃ ဦး​တို့ကို ဝမ်းသာ​အားရ​ကြိုဆို​ခဲ့​ကြ​မည်​မှာ သေချာ​သည်၊ ထို​ခရစ်ယာန်​သာသနာပြု​များသည်​လည်း စိတ်အား​ထက်သန်​ပြီး ဧည့်ဝတ်​ပျူ​ငှာ​ကြသော ဂျပန်​ညီအစ်ကို​များနှင့် ချက်ချင်း​ပင် ခင်မင်​ရင်းနှီး​သွား​ကြ​လေ​သည်။ နောက်ပိုင်း အနှစ် ၅၀ ကျော် ၂၀၀၃ ခုနှစ်​တွင် ဂျပန်​နိုင်ငံ​သည် ကြေညာသူ​စုစုပေါင်း ၂၁၇,၅၀၈ ဦး​မှတ်တမ်းသွင်း​၏! ယေဟောဝါ​သည် ထို​နိုင်ငံ​ရှိ မိမိ၏​လူ​တို့ကို အမှန်ပင် ကြွယ်ဝ​စွာ​ကောင်းချီး​ပေး​ခဲ့​လေ​ပြီ။ တခြား​နိုင်ငံ​များစွာ​တို့​မှ​လည်း ထို​နည်း​ထပ်တူ မှတ်တမ်းများ​ရရှိ​သည်။ တိုင်းတစ်ပါး​နယ်မြေ​များ​တွင် သွားရောက်​ဟောပြောနိုင်​သူများ​သည် သတင်းကောင်း​ပျံ့နှံ့​ရေး​တွင် များစွာ​ပါဝင်​ခဲ့​ကြ​ရာ ၂၀၀၃ ခုနှစ်​၌ ကမ္ဘာ​တစ်ဝန်း​ရှိ နိုင်ငံ​များ၊ ကျွန်း​များနှင့် နယ်မြေ ၂၃၅ တို့​တွင် သတင်းကောင်း​ကြားနေ​ကြ​ရသည်။ မှန်ပါသည်၊ လူအုပ်ကြီးသည် ‘နိုင်ငံတကာ’ မှ​ထွက်​လာ​လျက်​ရှိ၏။

“အသီးအသီး​ဘာသာ​စကား​ကို​ပြော​သော လူ​အမျိုးအနွယ်​ခပ်သိမ်း​တို့​အထဲ​မှ​ထွက်၍”

၁၃၊ ၁၄။ “အသီးအသီး​ဘာသာ​စကား” ဖြင့်​သတင်းကောင်း ဟောပြောခြင်း​၏​တန်ဖိုး​ကို အဘယ်​နည်းဖြင့် ယေဟောဝါ​ဖော်ပြ​ခဲ့​သနည်း။

^၁၃ တပည့်​များသည် စီ.အီး. ၃၃၊ ပင်တေကုတ္တေ​ပွဲနေ့​တွင် သန့်ရှင်းသော​ဝိညာဉ်​တော် သွန်းလောင်း​ခံရ​ပြီး​နောက် ပထမဦးဆုံး​ပြသ​ခဲ့​သည့် အံ့ဖွယ်​အမှုမှာ စုရုံး​ရောက်ရှိ​နေသော​လူအုပ်​ကို သူတို့၏ ဘာသာ​စကား​ဖြင့် ဟောပြောကြ​ခြင်း​ဖြစ်သည်။ သူတို့၏​စကား​ကို ကြားနာ​ခဲ့​သူအား​လုံး​သည် ဂရိ​ဘာသာ​စကား​ဖြစ်​နိုင်​ဖွယ်​ရှိသည့် နိုင်ငံတကာ​သုံး​ဘာသာ​စကား​တစ်ခု​ကို ပြောဆို​ကြ​ပေမည်။ သူတို့သည် ‘ဘုရားသခင်​ကို​ရိုသေ​သော​လူ​တို့’ ဖြစ်​ကြ​ရာ ဝတ်ပြုရာ​အိမ်တော်တွင်​ပြုသော ဟေဗြဲ​ဝတ်ပြုရေး အခမ်းအနား​များ​ကိုလည်း သိရှိနားလည်​နိုင်​ဖွယ်​ရှိ၏။ သို့သော် သူတို့​ငယ်​စဉ်​မှ​စ၍ သိရှိ​ခဲ့​သော ဘာသာ​စကား​ဖြင့် သတင်းကောင်းကို ကြား​ရသည့်​အခါ နားထောင်​လို​စိတ် ဖြစ်ပေါ်​စေ​၏။—တမန်​တော် ၂:၅၊ ၇-၁၂။

^၁၄ ယနေ့လည်း ဟောပြောခြင်း​လုပ်ငန်း​တွင် ဘာသာ​စကား​မြောက်မြားစွာ​ကို အသုံးပြုလျက်​ရှိ၏။ လူအုပ်ကြီးသည် နိုင်ငံ​များ​မှ​သာ​မဟုတ်ဘဲ “အသီးအသီး​ဘာသာ​စကား​ကို​ပြော​သော လူ​အမျိုးအနွယ်​ခပ်သိမ်း​တို့” မှ​လည်း ထွက်​လာ​လိမ့်​မည်​ဟု ပရောဖက်ပြု​ထား​သည်။ ယင်း​နှင့်​အညီ ဇာခရိ​အားဖြင့် ယေဟောဝါ ဤသို့​ပရောဖက်ပြု​ခဲ့​သည်– “ဘာသာ​အသီးအသီး​ကို​ပြောတတ်​သော လူအမျိုးမျိုး​တို့​တွင် တစ်ကျိပ်​သော​လူတို့သည် ယုဒ​လူ​ဖြစ်သော​သူ၏ အဝတ်စွန်း​ကို​ကိုင်​လျက် ‘ဘုရားသခင်​သည် သင်​နှင့်အတူ​ရှိ​တော်​မူ​သည်​ဟု အကျွန်ုပ်​တို့သည်​ကြား​သိ၍ သင်တို့​နှင့်အတူ လိုက်ပါမည်’ ဟု​ဆို​ကြလိမ့်မည်။” (ဇာခရိ ၈:၂၃) ယေဟောဝါသက်သေ​များသည် ဘာသာ​စကား​အမျိုးမျိုး​ပြောဆိုခြင်း ဆုကျေးဇူး မရရှိ​ထား​ကြသော်လည်း လူ​တို့​နားလည်​သည့် ဘာသာ​စကား​ဖြင့် သွန်သင်​ပေးခြင်း​တန်ဖိုး​ကို သိ​ကြသည်။

၁၅၊ ၁၆။ ခရစ်ယာန်​သာသနာပြု​များနှင့် တခြားသူ​များသည် ဒေသခံ​ဘာသာ​စကား​များ​ဖြင့် ဟောပြောနိုင်​ရန် မည်သို့​ကြိုးစား​ခဲ့​ကြ​ရသနည်း။

^၁၅ မှန်ပါသည်၊ ယနေ့ အင်္ဂလိပ်၊ ပြင်သစ်​နှင့် စပိန်​ဘာသာ​စကား​တို့​ကဲ့သို့​သော နေရာတကာ​သုံး ဘာသာ​စကား​အနည်းငယ်​သာ​ရှိ၏။ သို့သော် တခြား​နိုင်ငံ​များ​တွင် အမှုဆောင်ရန် မိမိတို့​ဇာတိမြေ​မှ ထွက်ခွာ​လာ​ခဲ့​ကြ​သူများ​သည် “ထာဝရ​အသက်ကို တလိုတလား​ရှိ​သူများ” ထံ​သတင်းကောင်း​ရောက်ရှိ​စေနိုင်​ရန် ဒေသခံ​ဘာသာ​စကား​များ​ကို ကြိုးစား​သင်ယူ​ကြသည်။ (တမန်​တော် ၁၃:၄၈၊ က​ဘ) ထိုသို့​ပြုခြင်း​သည် ခက်ခဲ​ပေ​လိမ့်​မည်။ တူဗာလူး​နိုင်ငံ​၏ တောင်​ပစိဖိတ်ကျွန်း​မှ ညီအစ်ကို​များသည် မိမိတို့​ဘာသာ​စကား​ဖြင့် စာအုပ်စာတမ်း​များ လိုအပ်​ခဲ့​သည့်​အခါ ခရစ်ယာန်​သာသနာပြု​တစ်ဦး​သည် ထို​တာဝန်​ကို လက်ခံ​ယူ​ခဲ့​၏။ အဘိဓာန်​မရှိသော​ကြောင့် သူသည် တူဗာလူး​စကားလုံး​များ​၏​ခက်ဆစ်​အဘိဓာန်​ကို စတင်​ပြုစု​လေ​သည်။ အတန်​ကြာသော် သင်သည် ကမ္ဘာ့​ပရဒိသု​အတွင်း ထာဝစဉ်​အသက်ရှင်​နိုင်​သည် * စာအုပ်​ကို တူဗာလူး​ဘာသာ​စကား​ဖြင့် ထုတ်ဝေ​လိုက်​သည်။ ကျူ​ရာ​ဆို​ကျွန်း​သို့ ခရစ်ယာန်​သာသနာပြု​များ ရောက်ရှိ​လာသော​အခါ ထို​တွင် ဒေသခံ​ဘာသာ​စကား ပါပီ​မဲ​န်​တို​ဖြင့် ကျမ်းစာ,စာပေ​များ​မရှိ၊ အဘိဓာန်​လည်း​မရှိ​ချေ။ ထို​ဘာသာ​စကား​ကို မည်သို့​ရေး​သင့်​သည်​နှင့်​ပတ်သက်​၍​လည်း အတော်ပင်​သဘောထား​ကွဲလွဲ​မှု ရှိခဲ့​ကြသည်။ သို့​တိုင် ပထမဦးဆုံး​ရောက်ရှိ​လာသော ခရစ်ယာန်​သာသနာပြု​များသည် နှစ်နှစ်​အတွင်း ထို​ဘာသာ​စကား​ဖြင့် ပထမဦးဆုံး ခရစ်ယာန်​ကျမ်းစာ​ဝေစာ​ကို ထုတ်ဝေ​ခဲ့​သည်။ ယနေ့ ကင်းမျှော်စင်​ကို အင်္ဂလိပ်​နှင့်​တစ်ပြိုင်တည်း ၁၃၃ ဘာသာ​စကား​ဖြင့်​ထုတ်ဝေ​နေရာ ပါပီ​မဲ​န်​တို​ဘာသာ​စကား​လည်း တစ်ခု​အပါအဝင်​ဖြစ်၏။

^၁၆ နမီးဘီးယား​နိုင်ငံ​သို့ ပထမ​ဆုံး​ရောက်ရှိ​လာသော ခရစ်ယာန်​သာသနာပြု​များသည် ဘာသာ​ပြန်ဆို​ရန် ဒေသခံ​သက်သေခံ​တစ်ဦး​ကို​မျှ မ​တွေ့ခဲ့​ချေ။ ထို့​ပြင် ဒေသခံ​ဘာသာ​စကား​တစ်ခု​ဖြစ်သည့် နာ​မာ​စကား​တွင် “စုံလင်ခြင်း” အစ​ရှိသည့် သုံးလေ့​သုံး​ထ​ရှိသော​အယူအဆ​များ​အတွက် စကားလုံး​များ​မရှိ​ချေ။ ခရစ်ယာန်​သာသနာပြု​တစ်ဦး​က ဤသို့​ဖော်ပြ​သည်– “ဘာသာပြန်​ဖို့ ကျမ်းစာ​သင်​နေတဲ့ ကျောင်း​ဆရာ​တွေ​ကို အများအားဖြင့် အသုံးပြု​ခဲ့​ရတယ်။ သူတို့မှာ အမှန်တရား​နဲ့​ပတ်သက်​တဲ့​အသိပညာ သိပ်​မရှိ​သေး​တဲ့​အတွက် စာ​ကြောင်း​တစ်​ကြောင်း​စီ တိကျ​မှန်ကန်​နိုင်​ဖို့ သူတို့နဲ့အတူ ကျွန်တော်​ထိုင်ပြီး ဘာသာပြန်ခဲ့​ရတယ်။” မည်သို့​ပင်​ဖြစ်ပါစေ၊ နောက်ဆုံး​တွင် ကမ္ဘာသစ်​၌​အသက်တာ ဝေစာ​ကို နမီးဘီးယား​ဘာသာ​စကား​လေးမျိုး​ဖြင့် ပြန်ဆို​နိုင်​ခဲ့​သည်။ ယနေ့ ကွာ​ညာ​မာ​နှင့် ငုံ​ဂါ​ဘာသာ​စကား​ဖြင့် ကင်းမျှော်စင် ကို​ပုံမှန်​ထုတ်ဝေ​နေသည်။

၁၇၊ ၁၈။ မက္ကဆီကို​နှင့် အခြား​နိုင်ငံ​များ​တွင် အဘယ်​အခက်အခဲ​ကို ကိုင်တွယ်​ဖြေရှင်း​နေကြ​သနည်း။

^၁၇ မက္ကဆီကို​နိုင်ငံ​တွင် အဓိက​အသုံးပြု​သော​ဘာသာ​စကား​မှာ စပိန်​စကား​ဖြစ်၏။ သို့သော် စပိန်​လူမျိုးများ မ​ရောက်လာ​မီ ထို​တွင် ဘာသာ​စကား​များစွာ ပြောဆို​နှင့်​ကြ​ပြီး အတော်များများကို ယခု​တိုင် ပြောဆို​နေကြ​သေး​သည်။ ထို့​ကြောင့် ယခု ယေဟောဝါသက်သေ​များ​၏​စာပေ​ကို မက္ကဆီကန်​ဘာသာ​စကား ခု​နစ်​မျိုး​နှင့်​အပြင် မက္ကဆီကန်​လက်ဟန်ပြ​ဘာသာ​စကား​ဖြင့်​လည်း ထုတ်ဝေ​လျက်​ရှိ၏။ အမေရိကန်​အင်​ဒီး​ယန်း​ဘာသာ​စကား​တွင် မာယာ နိုင်ငံတော်​ဓမ္မ​အမှု သည်​ပထမ​ဆုံး​ရက်စွဲ​ပါ စာစောင်​ဖြစ်၏။ မက္ကဆီကို​နိုင်ငံ​တွင် ဘုရားသခင့်​နိုင်ငံတော်​ကြေညာသူ ၅၇၂,၅၃၀ ဦး​အနက် ထောင်နှင့်ချီ​၍ မာယာ၊ အက်​ဇ်​တက်​စ်​နှင့် အခြား​လူမျိုးများ​ကို တွေ့ရှိ​ရသည်။

^၁၈ မကြာသေးမီ​အချိန်​က သန်းနှင့်ချီ​သော​လူတို့သည် ခိုလှုံ​သူများ​အဖြစ် တိုင်းတစ်ပါး​သို့ ထွက်ပြေး​ခဲ့​ကြ​ရသည်၊ သို့​မဟုတ် စီးပွားရေး​အခြေအနေ​များ​ကြောင့် ပြောင်းရွှေ့​ခဲ့​ကြ​ရသည်။ ယင်းကြောင့် ယခု နိုင်ငံ​များစွာ​တွင် ယခင်​က​မရှိခဲ့​ဖူး​သော နိုင်ငံ​ခြား​ဘာသာ​စကားပြော ရပ်ကွက်​ကြီး​များ ရှိနေပြီ။ ယေဟောဝါသက်သေ​များသည် ထို​ခက်ခဲ​သော​တာဝန်​ကို လက်ခံ​ယူ​ခဲ့​ကြသည်။ ဥပမာ၊ အီတလီ​နိုင်ငံ​တွင် အီတလီ​ဘာသာ​စကား​အပြင် အခြား​ဘာသာ​စကား ၂၂ မျိုး​ပြောဆို​သည့် အသင်းတော်များ​နှင့် အုပ်စု​များ​ရှိ၏။ ညီအစ်ကို​များ​က တခြား​ဘာသာ​စကားပြော​ဆို​သူများကို ဟောပြောနိုင်​ရန် အီတလီ လက်ဟန်ပြ​ဘာသာ​စကား​အပါအဝင် ဘာသာ​စကား ၁၆ ခု​ကို​သင်ပေး​သည့် သင်တန်း​များ​ကို မကြာသေးမီ​က ဖွင့်လှစ်​ထား​သည်။ အခြား​နိုင်ငံ​များစွာ​တွင်​လည်း ယေဟောဝါသက်သေ​များသည် တိုင်းတစ်ပါး​မှ​ဝင်ရောက်​လာ​သူများ​ထံ ရောက်ရှိ​ရန် ထပ်တူ​ကြိုးစား​နေကြ၏။ မှန်ပါသည်၊ ယေဟောဝါ​၏​အကူအညီ​ဖြင့် လူအုပ်ကြီးသည် ဘာသာ​စကား​အုပ်စု​များစွာ​မှ ထွက်​လာ​လျက်​ရှိကြသည်။

“မြေတစ်ပြင်လုံး၌”

၁၉၊ ၂၀။ ယနေ့ ပေါလု​၏​အဘယ်​စကား​များသည် ထူးခြား​စွာ ပြည့်စုံ​လျက်​ရှိ​သနည်း။

^၁၉ ပထမ​ရာစု​တွင် တမန်​တော်​ပေါလု ဤသို့​ရေးသားခဲ့​သည်– “လူအပေါင်း​တို့သည် မကြား​ရ​ကြပြီ​လော။ အမှန်​ကြား​ရ​ကြပြီ။ ‘သူတို့၏​အသံသည် မြေတစ်ပြင်လုံး၌ နှံ့ပြား​၍ သူတို့၏​စကား​သည် မြေကြီးစွန်း​တိုင်အောင် ရောက်​လေ​ပြီ။’” (ရောမ ၁၀:၁၈) ပထမ​ရာစု​တွင် ထိုသို့​ဖြစ်​ခဲ့​သော် ကျွန်ုပ်​တို့​ခေတ်တွင် သာ၍​ပင်​ဖြစ်နေ​သည်​တကား! သမိုင်း​တွင် ယခင် မည်သည့်​အချိန်​က​ထက်​မဆို ယခု သန်းနှင့်ချီ​သော​သူတို့သည် ဤသို့​ပြောဆို​နေကြ၏– ‘ငါသည် ခပ်သိမ်း​သော​ကာလ​တို့​၌ ယေဟောဝါ​ကို ကောင်းချီး​ပေး​မည်။ ဂုဏ်​ကျေးဇူးတော်​ကို အစဉ်မပြတ်​မြွက်ဆို​မည်။’—ဆာလံ ၃၄:၁။

^၂၀ ထို့​ပြင် ဤ​လုပ်ငန်း​၏​အရှိန် လျော့​မသွား​ချေ။ ဘုရားသခင့်​နိုင်ငံတော်​ကြေညာသူ​အရေအတွက် တိုးများ​လာ​လျက်​ရှိ၏။ ဟောပြောခြင်း​လုပ်ငန်း​တွင် အချိန်​များစွာ အသုံးပြုလျက်​ရှိ၏။ ပြန်လည်ပတ်မှု​များ သန်းနှင့်ချီ​ပြုလုပ်​၍ ကျမ်းစာ​သင်အံမှု ထောင်သောင်း​ချီ​၍ ကျင်းပ​လျက်​ရှိ၏။ စိတ်ဝင်စားသူ​လူသစ်များ​၏​အရေအတွက်​သည်လည်း တိုးများ​လာ​လျက်​ရှိ၏။ ယ​မ​န်​နှစ်​က ယေရှု၏​သေခြင်း​သတိရအောက်မေ့ပွဲကို တက်ရောက်သူ​နှုန်းသစ် ၁၆,၀၉၇,၆၂၂ ယောက်​ရှိခဲ့​သည်။ လုပ်ကိုင်​စ​ရာ​များစွာ​ရှိနေသေး​သည်​မှာ ထင်ရှား​၏။ ပြင်းထန်သော​ညှဉ်းပန်း​နှိပ်စက်မှု​ကို ခံရပ်​ခဲ့​သော ကျွန်ုပ်​တို့​ညီအစ်ကို​များ​၏ ခိုင်မြဲ​သော​တည်ကြည်မှု​ကို ဆက်၍​တုပ​ကြပါစို့။ ၁၉၁၉ ခုနှစ်​ကတည်းက ယေဟောဝါ​၏​လုပ်ငန်းတော်တွင် ပါဝင်​အသုံးတော်ခံ​ခဲ့​သော ညီအစ်ကို​အားလုံး​၏ စိတ်အား​ထက်သန်မှု​ကို တင်ပြ​ကြ​စို့​လေ။ ဆာလံဆရာ​၏​ဤ​သီချင်းကို အမြဲမပြတ်​သံယောင်လိုက်​ကြ​စို့– ‘အသက်​ရှိသောသူ​အပေါင်းတို့သည် ယေဟောဝါ​ကို ချီးမွမ်း​ကြ​စေ။ ဟာ​လေ​လု​ယ။’—ဆာလံ ၁၅၀:၆။

[အောက်ခြေ​မှတ်ချက်များ]

 သင်​ရှင်းပြ​နိုင်​သလော

• ၁၉၁၉ ခုနှစ်​တွင် အဘယ်​တာဝန်​ကို ညီအစ်ကို​များ စတင် ထမ်းဆောင်​ခဲ့​ကြ​သနည်း၊ ယင်းသည် အဘယ်ကြောင့် စိန်ခေါ်ချက်​တစ်ရပ်​ဖြစ်သနည်း။

• ဟောပြောခြင်း​လုပ်ငန်း​ကို ထောက်ကူ​ပေး​ရန် မည်သူ​တို့ကို စုသိမ်း​ခဲ့​သနည်း။

• တိုင်းတစ်ပါး​တွင် အမှုဆောင်​နေကြ​သော ခရစ်ယာန်​သာသနာပြု​များနှင့် တခြားသူ​များသည် အဘယ်​မှတ်တမ်းတင်​ခဲ့ပြီ​နည်း။

• ယနေ့ ယေဟောဝါ​သည် မိမိလူ​မျိုး​၏​လုပ်ငန်း​ကို ကောင်းချီး​ပေး​နေကြောင်း အဘယ်​သက်သေ​သာဓက​ကို သင်​ကိုးကား​ပြ​နိုင်​သနည်း။

 [လေ့လာ​ရန်​မေးခွန်းများ]

 [စာမျက်နှာ ၁၈-၂၁ ပါ ဇယား]

ကမ္ဘာချီ​ယေဟောဝါသက်သေ​များ​၏ ၂၀၀၃ ခုနှစ်​လုပ်ငန်းတော်​မှတ်တမ်း

 [စာမျက်နှာ ၁၄၊ ၁၅ ပါ ရုပ်ပုံ]

ဒုတိယ​ကမ္ဘာ​စစ်​၏​ရှုပ်ထွေးမှု​ကြောင့် သတင်းကောင်း ဟောပြောနိုင်​ခြေ​ကို ခရစ်ယာန်​များ သံသယ​မဝင်​ခဲ့​ကြ

[Credit Line]

Explosion: U.S. Navy photo; others: U.S. Coast Guard photo

[စာမျက်နှာ ၁၆၊ ၁၇ ပါ ရုပ်ပုံ]

လူအုပ်ကြီးသည် အသီးအသီး​ဘာသာ​စကား​ကို​ပြော​သော လူ​အမျိုးအနွယ်​ခပ်သိမ်း​ထဲ​မှ ထွက်​လာ​လိမ့်​မည်